၅. ပါဋိဒေသနီယကဏ္ဍံ (ဘိက္ခုနီဝိဘင်္ဂေါ)
၁. ပဌမပါဋိဒေသနီယသိက္ခါပဒံ
ဣမေ ခေါ ပနာယျာယော အဋ္ဌ ပါဋိဒေသနီယာ
ဓမ္မာ ဥဒ္ဒေသံ အာဂစ္ဆန္တိ။
၁၂၂၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သပ္ပိံ ဝိညာပေတွာ ဘုဉ္ဇန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော သပ္ပိံ ဝိညာပေတွာ ဘုဉ္ဇိဿန္တိ! ကဿ သမ္ပန္နံ န မနာပံ, ကဿ သာဒုံ န ရုစ္စတီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော သပ္ပိံ ဝိညာပေတွာ ဘုဉ္ဇိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ, ဘိက္ခုနိယော သပ္ပိံ ဝိညာပေတွာ ဘုဉ္ဇန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော သပ္ပိံ ဝိညာပေတွာ ဘုဉ္ဇိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –
‘‘ယာ ပန ဘိက္ခုနီ သပ္ပိံ ဝိညာပေတွာ ဘုဉ္ဇေယျ, ပဋိဒေသေတဗ္ဗံ တာယ ဘိက္ခုနိယာ – ‘ဂါရယှံ, အယျေ, ဓမ္မံ အာပဇ္ဇိံ အသပ္ပါယံ ပါဋိဒေသနီယံ, တံ ပဋိဒေသေမီ’’’တိ။
ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။
၁၂၂၉. တေန ခေါ ပန သမယေန ဘိက္ခုနိယော ဂိလာနာ ဟောန္တိ။ ဂိလာနပုစ္ဆိကာ ဘိက္ခုနိယော ဂိလာနာ ဘိက္ခုနိယော ဧတဒဝေါစုံ – ‘‘ကစ္စိ, အယျေ, ခမနီယံ, ကစ္စိ ယာပနီယ’’န္တိ? ‘‘ပုဗ္ဗေ မယံ, အယျေ, သပ္ပိံ ဝိညာပေတွာ ဘုဉ္ဇာမ, တေန နော ဖာသု ဟောတိ; ဣဒါနိ ပန ‘‘ဘဂဝတာ ပဋိက္ခိတ္တ’’န္တိ ကုက္ကုစ္စာယန္တာ န ဝိညာပေမ, တေန နော န ဖာသု ဟောတီ’’တိ။ပေ.။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, ဂိလာနာယ ဘိက္ခုနိယာ သပ္ပိံ ဝိညာပေတွာ ဘုဉ္ဇိတုံ ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –
၁၂၃၀. ‘‘ယာ ပန ဘိက္ခုနီ အဂိလာနာ သပ္ပိံ ဝိညာပေတွာ ဘုဉ္ဇေယျ, ပဋိဒေသေတဗ္ဗံ တာယ ဘိက္ခုနိယာ – ‘ဂါရယှံ, အယျေ, ဓမ္မံ အာပဇ္ဇိံ အသပ္ပါယံ ပါဋိဒေသနီယံ တံ ပဋိဒေသေမီ’’’တိ။
၁၂၃၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
အဂိလာနာ နာမ ယဿာ ဝိနာ သပ္ပိနာ ဖာသု ဟောတိ။
ဂိလာနာ နာမ ယဿာ ဝိနာ သပ္ပိနာ န ဖာသု ဟောတိ။
သပ္ပိ နာမ ဂေါသပ္ပိ ဝါ အဇိကာသပ္ပိ ဝါ မဟိံသသပ္ပိ ဝါ။ ယေသံ မံသံ ကပ္ပတိ တေသံ သပ္ပိ။
အဂိလာနာ အတ္တနော အတ္ထာယ ဝိညာပေတိ, ပယောဂေ ဒုက္ကဋံ။ ပဋိလာဘေန ‘‘ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။
၁၂၃၂. အဂိလာနာ အဂိလာနသညာ သပ္ပိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ။ အဂိလာနာ ဝေမတိကာ သပ္ပိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ။ အဂိလာနာ ဂိလာနသညာ သပ္ပိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ။
ဂိလာနာ အဂိလာနသညာ, အာပတ္တိ ဒုက္ကဋဿ။ ဂိလာနာ ဝေမတိကာ, အာပတ္တိ ဒုက္ကဋဿ။ ဂိလာနာ ဂိလာနသညာ, အနာပတ္တိ။
၁၂၃၃. အနာပတ္တိ ဂိလာနာယ, ဂိလာနာ ဟုတွာ ဝိညာပေတွာ အဂိလာနာ ဘုဉ္ဇတိ, ဂိလာနာယ သေသကံ ဘုဉ္ဇတိ, ဉာတကာနံ ပဝါရိတာနံ, အညဿတ္ထာယ, အတ္တနော ဓနေန, ဥမ္မတ္တိကာယ, အာဒိကမ္မိကာယာတိ။
ပဌမပါဋိဒေသနီယသိက္ခါပဒံ နိဋ္ဌိတံ။
၂. ဒုတိယာဒိပါဋိဒေသနီယသိက္ခါပဒါနိ
၁၂၃၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော တေလံ ဝိညာပေတွာ ဘုဉ္ဇန္တိ။ပေ.။ မဓုံ ဝိညာပေတွာ ဘုဉ္ဇန္တိ။ပေ.။ ဖာဏိတံ ဝိညာပေတွာ ဘုဉ္ဇန္တိ။ပေ.။ မစ္ဆံ ဝိညာပေတွာ ဘုဉ္ဇန္တိ။ပေ.။ မံသံ ဝိညာပေတွာ ဘုဉ္ဇန္တိ။ပေ.။ ခီရံ ဝိညာပေတွာ ဘုဉ္ဇန္တိ။ပေ.။ ဒဓိံ ဝိညာပေတွာ ဘုဉ္ဇန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒဓိံ ဝိညာပေတွာ ဘုဉ္ဇိဿန္တိ! ကဿ သမ္ပန္နံ န မနာပံ, ကဿ သာဒုံ န ရုစ္စတီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဒဓိံ ဝိညာပေတွာ ဘုဉ္ဇိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဒဓိံ ဝိညာပေတွာ ဘုဉ္ဇန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဒဓိံ ဝိညာပေတွာ ဘုဉ္ဇိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –
‘‘ယာ ပန ဘိက္ခုနီ ဒဓိံ ဝိညာပေတွာ ဘုဉ္ဇေယျ, ပဋိဒေသေတဗ္ဗံ တာယ ဘိက္ခုနိယာ – ‘ဂါရယှံ, အယျေ, ဓမ္မံ အာပဇ္ဇိံ အသပ္ပါယံ ပါဋိဒေသနီယံ, တံ ပဋိဒေသေမီ’’’တိ။
ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။
၁၂၃၅. တေန ခေါ ပန သမယေန ဘိက္ခုနိယော ဂိလာနာ ဟောန္တိ။ ဂိလာနပုစ္ဆိကာ ဘိက္ခုနိယော ဂိလာနာ ဘိက္ခုနိယော ဧတဒဝေါစုံ – ‘‘ကစ္စိ, အယျေ, ခမနီယံ, ကစ္စိ ယာပနီယ’’န္တိ? ‘‘ပုဗ္ဗေ မယံ, အယျေ, ဒဓိံ ဝိညာပေတွာ ဘုဉ္ဇိမှာ, တေန နော ဖာသု ဟောတိ, ဣဒါနိ ပန ‘‘ဘဂဝတာ ပဋိက္ခိတ္တ’’န္တိ ကုက္ကုစ္စာယန္တာ န ဝိညာပေမ, တေန နော န ဖာသု ဟောတီ’’တိ။ပေ.။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, ဂိလာနာယ ဘိက္ခုနိယာ ဒဓိံ ဝိညာပေတွာ ဘုဉ္ဇိတုံ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –
၁၂၃၆. ‘‘ယာ ပန ဘိက္ခုနီ အဂိလာနာ (တေလံ။ပေ.။ မဓုံ။ပေ.။ ဖာဏိတံ။ပေ.။ မစ္ဆံ။ပေ.။ မံသံ။ပေ.။ ခီရံ။ပေ.။) ဒဓိံ ဝိညာပေတွာ ဘုဉ္ဇေယျ , ပဋိဒေသေတဗ္ဗံ တာယ ဘိက္ခုနိယာ – ‘ဂါရယှံ, အယျေ, ဓမ္မံ အာပဇ္ဇိံ အသပ္ပါယံ ပါဋိဒေသနီယံ, တံ ပဋိဒေသေမီ’’’တိ။
၁၂၃၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
အဂိလာနာ နာမ ယဿာ ဝိနာ ဒဓိနာ ဖာသု ဟောတိ။
ဂိလာနာ နာမ ယဿာ ဝိနာ ဒဓိနာ န ဖာသု ဟောတိ။
တေလံ နာမ တိလတေလံ သာသပတေလံ မဓုကတေလံ ဧရဏ္ဍတေလံ ဝသာတေလံ။
မဓု နာမ မက္ခိကာမဓု။ ဖာဏိတံ နာမ ဥစ္ဆုမှာ နိဗ္ဗတ္တံ။ မစ္ဆော နာမ ဩဒကော ဝုစ္စတိ။ မံသံ နာမ ယေသံ မံသံ ကပ္ပတိ တေသံ မံသံ။ ခီရံ နာမ ဂေါခီရံ ဝါ အဇိကာခီရံ ဝါ မဟိံသခီရံ ဝါ ယေသံ မံသံ ကပ္ပတိ တေသံ ခီရံ။ ဒဓိ နာမ တေသညေဝ ဒဓိ။
အဂိလာနာ အတ္တနော အတ္ထာယ ဝိညာပေတိ, ပယောဂေ ဒုက္ကဋံ။ ပဋိလာဘေန ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။
၁၂၃၈. အဂိလာနာ အဂိလာနသညာ ဒဓိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ ။ အဂိလာနာ ဝေမတိကာ ဒဓိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ။ အဂိလာနာ ဂိလာနသညာ ဒဓိံ ဝိညာပေတွာ ဘုဉ္ဇတိ, အာပတ္တိ ပါဋိဒေသနီယဿ။
ဂိလာနာ အဂိလာနသညာ, အာပတ္တိ ဒုက္ကဋဿ။ ဂိလာနာ ဝေမတိကာ, အာပတ္တိ ဒုက္ကဋဿ။ ဂိလာနာ ဂိလာနသညာ အနာပတ္တိ။
၁၂၃၉. အနာပတ္တိ ဂိလာနာယ, ဂိလာနာ ဟုတွာ ဝိညာပေတွာ အဂိလာနာ ဘုဉ္ဇတိ, ဂိလာနာယ သေသကံ ဘုဉ္ဇတိ, ဉာတကာနံ ပဝါရိတာနံ, အညဿတ္ထာယ, အတ္တနော ဓနေန, ဥမ္မတ္တိကာယ, အာဒိကမ္မိကာယာတိ။
အဋ္ဌမပါဋိဒေသနီယသိက္ခါပဒံ နိဋ္ဌိတံ။
ဥဒ္ဒိဋ္ဌာ ခေါ, အယျာယော, အဋ္ဌ ပါဋိဒေသနီယာ ဓမ္မာ။ တတ္ထာယျာယော ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယျာယော, တသ္မာ တုဏှီ, ဧဝမေတံ ဓါရယာမီတိ။
ဘိက္ခုနိဝိဘင်္ဂေ ပါဋိဒေသနီယကဏ္ဍံ နိဋ္ဌိတံ။