ပါစိတ္တိယကဏ္ဍံ (ဘိက္ခုနီဝိဘင်္ဂေါ)

၄. ပါစိတ္တိယကဏ္ဍံ (ဘိက္ခုနီဝိဘင်္ဂေါ)

၁. လသုဏဝဂ္ဂ

၁. ပဌမသိက္ခါပဒံ

ဣမေ ခေါ ပနာယျာယော ဆသဋ္ဌိသတာ ပါစိတ္တိယာ

ဓမ္မာ ဥဒ္ဒေသံ အာဂစ္ဆန္တိ။

၇၉၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရေန ဥပါသကေန ဘိက္ခုနိသံဃော လသုဏေန ပဝါရိတော ဟောတိ – ‘‘ယာသံ အယျာနံ လသုဏေန အတ္ထော, အဟံ လသုဏေနာ’’တိ။ ခေတ္တပါလော စ အာဏတ္တော ဟောတိ – ‘‘သစေ ဘိက္ခုနိယော အာဂစ္ဆန္တိ, ဧကမေကာယ ဘိက္ခုနိယာ ဒွေတယော ဘဏ္ဍိကေ ဒေဟီ’’တိ။ တေန ခေါ ပန သမယေန သာဝတ္ထိယံ ဥဿဝေါ ဟောတိ။ ယထာဘတံ လသုဏံ ပရိက္ခယံ အဂမာသိ။ ဘိက္ခုနိယော တံ ဥပါသကံ ဥပသင်္ကမိတွာ ဧတဒဝေါစုံ – ‘‘လသုဏေန, အာဝုသော, အတ္ထော’’တိ။ ‘‘နတ္ထာယျေ။ ယထာဘတံ လသုဏံ ပရိက္ခီဏံ။ ခေတ္တံ ဂစ္ဆထာ’’တိ။ ထုလ္လနန္ဒါ ဘိက္ခုနီ ခေတ္တံ ဂန္တွာ န မတ္တံ ဇာနိတွာ ဗဟုံ လသုဏံ ဟရာပေသိ။ ခေတ္တပါလော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော န မတ္တံ ဇာနိတွာ ဗဟုံ လသုဏံ ဟရာပေဿန္တီ’’တိ! အဿောသုံ ခေါ ဘိက္ခုနိယော တဿ ခေတ္တပါလဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ န မတ္တံ ဇာနိတွာ ဗဟုံ လသုဏံ ဟရာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ န မတ္တံ ဇာနိတွာ ဗဟုံ လသုဏံ ဟရာပေတီတိ [ဟရာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ န မတ္တံ ဇာနိတွာ ဗဟုံ လသုဏံ ဟရာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ –

‘‘ဘူတပုဗ္ဗံ, ဘိက္ခဝေ, ထုလ္လနန္ဒါ ဘိက္ခုနီ အညတရဿ ဗြာဟ္မဏဿ ပဇာပတိ အဟောသိ။ တိဿော စ ဓီတရော – နန္ဒါ, နန္ဒဝတီ, သုန္ဒရီနန္ဒါ။ အထ ခေါ, ဘိက္ခဝေ, သော ဗြာဟ္မဏော ကာလင်္ကတွာ အညတရံ ဟံသယောနိံ ဥပပဇ္ဇိ။ တဿ သဗ္ဗသောဝဏ္ဏမယာ ပတ္တာ အဟေသုံ။ သော တာသံ ဧကေကံ ပတ္တံ ဒေတိ။ အထ ခေါ, ဘိက္ခဝေ, ထုလ္လနန္ဒါ ဘိက္ခုနီ ‘‘အယံ ဟံသော အမှာကံ ဧကေကံ ပတ္တံ ဒေတီ’’တိ တံ ဟံသရာဇံ ဂဟေတွာ နိပ္ပတ္တံ အကာသိ။ တဿ ပုန ဇာယမာနာ ပတ္တာ သေတာ သမ္ပဇ္ဇိံသု။ တဒါပိ, ဘိက္ခဝေ, ထုလ္လနန္ဒါ ဘိက္ခုနီ အတိလောဘေန သုဝဏ္ဏာ ပရိဟီနာ။ ဣဒါနိ လသုဏာ ပရိဟာယိဿတီ’’တိ။

[ဇာ. ၁.၁.၁၃၆ သုဝဏ္ဏဟံသဇာတကေပိ] ‘‘ယံ လဒ္ဓံ တေန တုဋ္ဌဗ္ဗံ၊ အတိလောဘော ဟိ ပါပကော။

ဟံသရာဇံ ဂဟေတွာန၊ သုဝဏ္ဏာ ပရိဟာယထာ’’တိ။

အထ ခေါ ဘဂဝါ ထုလ္လနန္ဒံ ဘိက္ခုနိံ အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၉၄. ‘‘ယာ ပန ဘိက္ခုနီ လသုဏံ ခါဒေယျ ပါစိတ္တိယ’’န္တိ။

၇၉၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

လသုဏံ နာမ မာဂဓကံ ဝုစ္စတိ။

‘‘ခါဒိဿာမီတိ ပဋိဂ္ဂဏှာ’’တိ, အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

၇၉၆. လသုဏေ လသုဏသညာ ခါဒတိ, အာပတ္တိ ပါစိတ္တိယဿ။ လသုဏေ ဝေမတိကာ ခါဒတိ, အာပတ္တိ ပါစိတ္တိယဿ။ လသုဏေ အလသုဏသညာ ခါဒတိ, အာပတ္တိ ပါစိတ္တိယဿ။

အလသုဏေ လသုဏသညာ ခါဒတိ, အာပတ္တိ ဒုက္ကဋဿ။ အလသုဏေ ဝေမတိကာ ခါဒတိ, အာပတ္တိ ဒုက္ကဋဿ။ အလသုဏေ အလသုဏသညာ ခါဒတိ, အနာပတ္တိ။

၇၉၇. အနာပတ္တိ ပလဏ္ဍုကေ, ဘဉ္ဇနကေ, ဟရီတကေ, စာပလသုဏေ, သူပသမ္ပါကေ, မံသသမ္ပါကေ, တေလသမ္ပါကေ, သာဠဝေ, ဥတ္တရိဘင်္ဂေ, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၇၉၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေတွာ အစိရဝတိယာ နဒိယာ ဝေသိယာဟိ သဒ္ဓိံ နဂ္ဂါ ဧကတိတ္ထေ နဟာယန္တိ။ ဝေသိယာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော သမ္ဗာဓေ လောမံ သံဟရာပေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တာသံ ဝေသိယာနံ ဥဇ္ဈာယန္တီနံ ခိယျန္တီနံ ဝိပါစေန္တီနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၉၉. ‘‘ယာ ပန ဘိက္ခုနီ သမ္ဗာဓေ လောမံ သံဟရာပေယျ, ပါစိတ္တိယ’’န္တိ။

၈၀၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သမ္ဗာဓေါ နာမ ဥဘော ဥပကစ္ဆကာ, မုတ္တကရဏံ။

သံဟရာပေယျာတိ ဧကမ္ပိ လောမံ သံဟရာပေတိ, အာပတ္တိ ပါစိတ္တိယဿ။ ဗဟုကေပိ လောမေ သံဟရာပေတိ, အာပတ္တိ ပါစိတ္တိယဿ။

၈၀၁. အနာပတ္တိ အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၈၀၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဒွေ ဘိက္ခုနိယော အနဘိရတိယာ ဣဠိတာ ဩဝရကံ ပဝိသိတွာ တလဃာတကံ ကရောန္တိ။ ဘိက္ခုနိယော တေန သဒ္ဒေန ဥပဓါဝိတွာ တာ ဘိက္ခုနိယော ဧတဒဝေါစုံ – ‘‘ကိဿ တုမှေ, အယျေ, ပုရိသေန သဒ္ဓိံ သမ္ပဒုဿထာ’’တိ? ‘‘န မယံ, အယျေ, ပုရိသေန သဒ္ဓိံ သမ္ပဒုဿာမာ’’တိ။ ဘိက္ခုနီနံ ဧတမတ္ထံ အာရောစေသုံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော တလဃာတကံ ကရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော တလဃာတကံ ကရောန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော တလဃာတကံ ကရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၀၃. ‘‘တလဃာတကေ ပါစိတ္တိယ’’န္တိ။

၈၀၄. တလဃာတကံ နာမ သမ္ဖဿံ သာဒိယန္တီ အန္တမသော ဥပ္ပလပတ္တေနပိ မုတ္တကရဏေ ပဟာရံ ဒေတိ, အာပတ္တိ ပါစိတ္တိယဿ။

၈၀၅. အနာပတ္တိ အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၈၀၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ပုရာဏရာဇောရောဓါ ဘိက္ခုနီသု ပဗ္ဗဇိတာ [အညတရော ပုရာဏရာဇောရောဓေါ ဘိက္ခုနီသု ပဗ္ဗဇိတော (သျာ.)] ဟောတိ။ အညတရာ ဘိက္ခုနီ အနဘိရတိယာ ဣဠိတာ ယေန သာ ဘိက္ခုနီ တေနုပသင်္ကမိ; ဥပသင်္ကမိတွာ တံ ဘိက္ခုနိံ ဧတဒဝေါစ – ‘‘ရာဇာ ခေါ, အယျေ, တုမှေ စိရာစိရံ ဂစ္ဆတိ။ ကထံ တုမှေ ဓါရေထာ’’တိ? ‘‘ဇတုမဋ္ဌကေန, အယျေ’’တိ။ ‘‘ကိံ ဧတံ, အယျေ, ဇတုမဋ္ဌက’’န္တိ? အထ ခေါ သာ ဘိက္ခုနီ တဿာ ဘိက္ခုနိယာ ဇတုမဋ္ဌကံ အာစိက္ခိ။ အထ ခေါ သာ ဘိက္ခုနီ ဇတုမဋ္ဌကံ အာဒိယိတွာ ဓေါဝိတုံ ဝိဿရိတွာ ဧကမန္တံ ဆဍ္ဍေသိ။ ဘိက္ခုနိယော မက္ခိကာဟိ သမ္ပရိကိဏ္ဏံ ပဿိတွာ ဧဝမာဟံသု – ‘‘ကဿိဒံ ကမ္မ’’န္တိ? သာ ဧဝမာဟ – ‘‘မယှိဒံ ကမ္မ’’န္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဇတုမဋ္ဌကံ အာဒိယိဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဇတုမဋ္ဌကံ အာဒိယတီတိ [အာဒိယီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ဇတုမဋ္ဌကံ အာဒိယိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၀၇. ‘‘ဇတုမဋ္ဌကေ [ဇတုမဋ္ဋကေ (သီ.)] ပါစိတ္တိယ’’န္တိ။

၈၀၈. ဇတုမဋ္ဌကံ နာမ ဇတုမယံ ကဋ္ဌမယံ ပိဋ္ဌမယံ မတ္တိကာမယံ။

အာဒိယေယျာတိ သမ္ဖဿံ သာဒိယန္တီ အန္တမသော ဥပ္ပလပတ္တမ္ပိ မုတ္တကရဏံ ပဝေသေတိ, အာပတ္တိ ပါစိတ္တိယဿ။

၈၀၉. အနာပတ္တိ အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၈၁၀. တေန သမယေန ဗုဒ္ဓေါ ဘဂဝါ သက္ကေသု ဝိဟရတိ ကပိလဝတ္ထုသ္မိံ နိဂြောဓါရာမေ။ အထ ခေါ မဟာပဇာပတိ ဂေါတမီ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ အဓေါဝါတေ အဋ္ဌာသိ – ‘‘ဒုဂ္ဂန္ဓေါ, ဘဂဝါ, မာတုဂါမော’’တိ။ အထ ခေါ ဘဂဝါ – ‘‘အာဒိယန္တု ခေါ ဘိက္ခုနိယော ဥဒကသုဒ္ဓိက’’န္တိ, မဟာပဇာပတိံ ဂေါတမိံ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ မဟာပဇာပတိ ဂေါတမီ ဘဂဝတာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဘိက္ခုနီနံ ဥဒကသုဒ္ဓိက’’န္တိ။ တေန ခေါ ပန သမယေန အညတရာ ဘိက္ခုနီ – ‘‘ဘဂဝတာ ဥဒကသုဒ္ဓိကာ အနုညာတာ’’တိ အတိဂမ္ဘီရံ ဥဒကသုဒ္ဓိကံ အာဒိယန္တီ မုတ္တကရဏေ ဝဏံ အကာသိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ကထဉှိ နာမ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိဿတီတိ။ပေ.။ သစ္စံ ကိရ, ဘိက္ခဝေ, ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယတီ’’တိ [အာဒိယီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၁၁. ‘‘ဥဒကသုဒ္ဓိကံ ပန ဘိက္ခုနိယာ အာဒိယမာနာယ ဒွင်္ဂုလပဗ္ဗပရမံ အာဒါတဗ္ဗံ။ တံ အတိက္ကာမေန္တိယာ ပါစိတ္တိယ’’န္တိ။

၈၁၂. ဥဒကသုဒ္ဓိကံ နာမ မုတ္တကရဏဿ ဓေါဝနာ ဝုစ္စတိ။

အာဒိယမာနာယာတိ ဓေါဝန္တိယာ။

ဒွင်္ဂုလပဗ္ဗပရမံ အာဒါတဗ္ဗန္တိ ဒွီသု အင်္ဂုလေသု ဒွေ ပဗ္ဗပရမာ အာဒါတဗ္ဗာ။

တံ အတိက္ကာမေန္တိယာတိ သမ္ဖဿံ သာဒိယန္တီ အန္တမသော ကေသဂ္ဂမတ္တမ္ပိ အတိက္ကာမေတိ, အာပတ္တိ ပါစိတ္တိယဿ။

၈၁၃. အတိရေကဒွင်္ဂုလပဗ္ဗေ အတိရေကသညာ အာဒိယတိ, အာပတ္တိ ပါစိတ္တိယဿ။ အတိရေကဒွင်္ဂုလပဗ္ဗေ ဝေမတိကာ အာဒိယတိ, အာပတ္တိ ပါစိတ္တိယဿ ။ အတိရေကဒွင်္ဂုလပဗ္ဗေ ဦနကသညာ အာဒိယတိ, အာပတ္တိ ပါစိတ္တိယဿ ။

ဦနကဒွင်္ဂုလပဗ္ဗေ အတိရေကသညာ, အာပတ္တိ ဒုက္ကဋဿ။ ဦနကဒွင်္ဂုလပဗ္ဗေ ဝေမတိကာ, အာပတ္တိ ဒုက္ကဋဿ။ ဦနကဒွင်္ဂုလပဗ္ဗေ ဦနကသညာ, အနာပတ္တိ။

၈၁၄. အနာပတ္တိ ဒွင်္ဂုလပဗ္ဗပရမံ အာဒိယတိ, ဦနကဒွင်္ဂုလပဗ္ဗပရမံ အာဒိယတိ, အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၈၁၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာရောဟန္တော နာမ မဟာမတ္တော ဘိက္ခူသု ပဗ္ဗဇိတော ဟောတိ။ တဿ ပုရာဏဒုတိယိကာ ဘိက္ခုနီသု ပဗ္ဗဇိတာ ဟောတိ။ တေန ခေါ ပန သမယေန သော ဘိက္ခု တဿာ ဘိက္ခုနိယာ သန္တိကေ ဘတ္တဝိဿဂ္ဂံ ကရောတိ။ အထ ခေါ သာ ဘိက္ခုနီ တဿ ဘိက္ခုနော ဘုဉ္ဇန္တဿ ပါနီယေန စ ဝိဓူပနေန စ ဥပတိဋ္ဌိတွာ အစ္စာဝဒတိ။ အထ ခေါ သော ဘိက္ခု တံ ဘိက္ခုနိံ အပသာဒေတိ – ‘‘မာ, ဘဂိနိ, ဧဝရူပံ အကာသိ။ နေတံ ကပ္ပတီ’’တိ။ ‘‘ပုဗ္ဗေ မံ တွံ ဧဝဉ္စ ဧဝဉ္စ ကရောသိ, ဣဒါနိ ဧတ္တကံ န သဟသီ’’တိ – ပါနီယထာလကံ မတ္ထကေ အာသုမ္ဘိတွာ ဝိဓူပနေန ပဟာရံ အဒါသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဘိက္ခုဿ ပဟာရံ ဒဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဘိက္ခုဿ ပဟာရံ အဒါသီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ဘိက္ခုဿ ပဟာရံ ဒဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၁၆. ‘‘ယာ ပန ဘိက္ခုနီ ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌေယျ, ပါစိတ္တိယ’’န္တိ။

၈၁၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုဿာတိ ဥပသမ္ပန္နဿ။

ဘုဉ္ဇန္တဿာတိ ပဉ္စန္နံ ဘောဇနာနံ အညတရံ ဘောဇနံ ဘုဉ္ဇန္တဿ။

ပါနီယံ နာမ ယံ ကိဉ္စိ ပါနီယံ။

ဝိဓူပနံ နာမ ယာ ကာစိ ဗီဇနီ။

ဥပတိဋ္ဌေယျာတိ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ။

၈၁၈. ဥပသမ္ပန္နေ ဥပသမ္ပန္နသညာ ပါနီယေန ဝါ ဝိဓူပနေန ဝါ ဥပတိဋ္ဌတိ, အာပတ္တိ ပါစိတ္တိယဿ။ ဥပသမ္ပန္နေ ဝေမတိကာ ပါနီယေန ဝါ ဝိဓူပနေန ဝါ ဥပတိဋ္ဌတိ, အာပတ္တိ ပါစိတ္တိယဿ။ ဥပသမ္ပန္နေ အနုပသမ္ပန္နသညာ ပါနီယေန ဝါ ဝိဓူပနေန ဝါ ဥပတိဋ္ဌတိ, အာပတ္တိ ပါစိတ္တိယဿ။

ဟတ္ထပါသံ ဝိဇဟိတွာ ဥပတိဋ္ဌတိ, အာပတ္တိ ဒုက္ကဋဿ။ ခါဒနီယံ ခါဒန္တဿ ဥပတိဋ္ဌတိ, အာပတ္တိ ဒုက္ကဋဿ။ အနုပသမ္ပန္နဿ ဥပတိဋ္ဌတိ, အာပတ္တိ ဒုက္ကဋဿ။ အနုပသမ္ပန္နေ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နေ ဝေမတိကာ, အာပတ္တိ ဒုက္ကဋဿ။ အနုပသမ္ပန္နေ အနုပသမ္ပန္နသညာ, အာပတ္တိ ဒုက္ကဋဿ။

၈၁၉. အနာပတ္တိ ဒေတိ, ဒါပေတိ, အနုပသမ္ပန္နံ အာဏာပေတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၈၂၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော သဿကာလေ အာမကဓညံ ဝိညာပေတွာ နဂရံ အတိဟရန္တိ ဒွါရဋ္ဌာနေ – ‘‘ဒေထာယျေ, ဘာဂ’’န္တိ။ ပလိဗုန္ဓေတွာ မုဉ္စိံသု။ အထ ခေါ တာ ဘိက္ခုနိယော ဥပဿယံ ဂန္တွာ ဘိက္ခုနီနံ ဧတမတ္ထံ အာရောစေသုံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အာမကဓညံ ဝိညာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အာမကဓညံ ဝိညာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အာမကဓညံ ဝိညာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၂၁. ‘‘ယာ ပန ဘိက္ခုနီ အာမကဓညံ ဝိညတွာ ဝါ ဝိညာပေတွာ ဝါ ဘဇ္ဇိတွာ ဝါ ဘဇ္ဇာပေတွာ ဝါ ကောဋ္ဋေတွာ ဝါ ကောဋ္ဋာပေတွာ ဝါ ပစိတွာ ဝါ ပစာပေတွာ ဝါ ဘုဉ္ဇေယျ, ပါစိတ္တိယ’’န္တိ။

၈၂၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အာမကဓညံ နာမ သာလိ ဝီဟိ ယဝေါ ဂေါဓုမော ကင်္ဂု ဝရကော ကုဒြုသကော။

ဝိညတွာတိ သယံ ဝိညတွာ။ ဝိညာပေတွာတိ အညံ ဝိညာပေတွာ။

ဘဇ္ဇိတွာတိ သယံ ဘဇ္ဇိတွာ။ ဘဇ္ဇာပေတွာတိ အညံ ဘဇ္ဇာပေတွာ။

ကောဋ္ဋေတွာတိ သယံ ကောဋ္ဋေတွာ။ ကောဋ္ဋာပေတွာတိ အညံ ကောဋ္ဋာပေတွာ။

ပစိတွာတိ သယံ ပစိတွာ။ ပစာပေတွာတိ အညံ ပစာပေတွာ။

‘‘ဘုဉ္ဇိဿာမီ’’တိ ပဋိဂ္ဂဏှာတိ , အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

၈၂၃. အနာပတ္တိ အာဗာဓပစ္စယာ, အပရဏ္ဏံ ဝိညာပေတိ, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၈၂၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရော ဗြာဟ္မဏော နိဗ္ဗိဋ္ဌရာဇဘဋော ‘‘တညေဝ ဘဋပထံ ယာစိဿာမီ’’တိ သီသံ နဟာယိတွာ ဘိက္ခုနုပဿယံ နိဿာယ ရာဇကုလံ ဂစ္ဆတိ။ အညတရာ ဘိက္ခုနီ ကဋာဟေ ဝစ္စံ ကတွာ တိရောကုဋ္ဋေ ဆဍ္ဍေန္တီ တဿ ဗြာဟ္မဏဿ မတ္ထကေ အာသုမ္ဘိ။ အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘အဿမဏိယော ဣမာ မုဏ္ဍာ ဗန္ဓကိနိယော။ ကထဉှိ နာမ ဂူထကဋာဟံ မတ္ထကေ အာသုမ္ဘိဿန္တိ! ဣမာသံ ဥပဿယံ ဈာပေဿာမီ’’တိ! ဥမ္မုကံ ဂဟေတွာ ဥပဿယံ ပဝိသတိ။ အညတရော ဥပါသကော ဥပဿယာ နိက္ခမန္တော အဒ္ဒသ တံ ဗြာဟ္မဏံ ဥမ္မုကံ ဂဟေတွာ ဥပဿယံ ပဝိသန္တံ။ ဒိသွာန တံ ဗြာဟ္မဏံ ဧတဒဝေါစ – ‘‘ကိဿ တွံ, ဘော, ဥမ္မုကံ ဂဟေတွာ ဥပဿယံ ပဝိသသီ’’တိ? ‘‘ဣမာ မံ, ဘော, မုဏ္ဍာ ဗန္ဓကိနိယော ဂူထကဋာဟံ မတ္ထကေ အာသုမ္ဘိံသု။ ဣမာသံ ဥပဿယံ ဈာပေဿာမီ’’တိ။ ‘‘ဂစ္ဆ, ဘော ဗြာဟ္မဏ, မင်္ဂလံ ဧတံ။ သဟဿံ လစ္ဆသိ တဉ္စ ဘဋပထ’’န္တိ။ အထ ခေါ သော ဗြာဟ္မဏော သီသံ နဟာယိတွာ ရာဇကုလံ ဂန္တွာ သဟဿံ အလတ္ထ တဉ္စ ဘဋပထံ။ အထ ခေါ သော ဥပါသကော ဥပဿယံ ပဝိသိတွာ ဘိက္ခုနီနံ ဧတမတ္ထံ အာရောစေတွာ ပရိဘာသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ , ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၂၅. ‘‘ယာ ပန ဘိက္ခုနီ ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ တိရောကုဋ္ဋေ ဝါ တိရောပါကာရေ ဝါ ဆဍ္ဍေယျ ဝါ ဆဍ္ဍာပေယျ ဝါ, ပါစိတ္တိယ’’န္တိ။

၈၂၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဥစ္စာရော နာမ ဂူထော ဝုစ္စတိ။ ပဿာဝေါ နာမ မုတ္တံ ဝုစ္စတိ။

သင်္ကာရံ နာမ ကစဝရံ ဝုစ္စတိ။

ဝိဃာသံ နာမ စလကာနိ ဝါ အဋ္ဌိကာနိ ဝါ ဥစ္ဆိဋ္ဌောဒကံ ဝါ။

ကုဋ္ဋော နာမ တယော ကုဋ္ဋာ – ဣဋ္ဌကာကုဋ္ဋော, သိလာကုဋ္ဋော, ဒါရုကုဋ္ဋော။

ပါကာရော နာမ တယော ပါကာရာ – ဣဋ္ဌကာပါကာရော, သိလာပါကာရော, ဒါရုပါကာရော။

တိရောကုဋ္ဋေတိ ကုဋ္ဋဿ ပရတော။ တိရောပါကာရေတိ ပါကာရဿ ပရတော။

ဆဍ္ဍေယျာတိ သယံ ဆဍ္ဍေတိ, အာပတ္တိ ပါစိတ္တိယဿ။

ဆဍ္ဍာပေယျာတိ အညံ အာဏာပေတိ, အာပတ္တိ ဒုက္ကဋဿ။ သကိံ အာဏတ္တာ ဗဟုကမ္ပိ ဆဍ္ဍေတိ, အာပတ္တိ ပါစိတ္တိယဿ။

၈၂၇. အနာပတ္တိ ဩလောကေတွာ ဆဍ္ဍေတိ, အဝဠဉ္ဇေ ဆဍ္ဍေတိ, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၈၂၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရဿ ဗြာဟ္မဏဿ ဘိက္ခုနူပဿယံ နိဿာယ ယဝခေတ္တံ ဟောတိ။ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ခေတ္တေ ဆဍ္ဍေန္တိ။ အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အမှာကံ ယဝခေတ္တံ ဒူသေဿန္တီ’’တိ! အဿောသုံ ခေါ ဘိက္ခုနိယော တဿ ဗြာဟ္မဏဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၂၉. ‘‘ယာ ပန ဘိက္ခုနီ ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ ဟရိတေ ဆဍ္ဍေယျ ဝါ ဆဍ္ဍာပေယျ ဝါ, ပါစိတ္တိယ’’န္တိ။

၈၃၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဥစ္စာရော နာမ ဂူထော ဝုစ္စတိ။ ပဿာဝေါ နာမ မုတ္တံ ဝုစ္စတိ။

သင်္ကာရံ နာမ ကစဝရံ ဝုစ္စတိ။

ဝိဃာသံ နာမ စလကာနိ ဝါ အဋ္ဌိကာနိ ဝါ ဥစ္ဆိဋ္ဌောဒကံ ဝါ။

ဟရိတံ နာမ ပုဗ္ဗဏ္ဏံ အပရဏ္ဏံ ယံ မနုဿာနံ ဥပဘောဂပရိဘောဂံ ရောပိမံ ။

ဆဍ္ဍေယျာတိ သယံ ဆဍ္ဍေတိ, အာပတ္တိ ပါစိတ္တိယဿ။

ဆဍ္ဍာပေယျာတိ အညံ အာဏာပေတိ, အာပတ္တိ ဒုက္ကဋဿ။ သကိံ အာဏတ္တာ ဗဟုကမ္ပိ ဆဍ္ဍေတိ, အာပတ္တိ ပါစိတ္တိယဿ။

၈၃၁. ဟရိတေ ဟရိတသညာ ဆဍ္ဍေတိ ဝါ ဆဍ္ဍာပေတိ ဝါ, အာပတ္တိ ပါစိတ္တိယဿ။ ဟရိတေ ဝေမတိကာ ဆဍ္ဍေတိ ဝါ ဆဍ္ဍာပေတိ ဝါ, အာပတ္တိ ပါစိတ္တိယဿ ။ ဟရိတေ အဟရိတသညာ ဆဍ္ဍေတိ ဝါ ဆဍ္ဍာပေတိ ဝါ, အာပတ္တိ ပါစိတ္တိယဿ။

အဟရိတေ ဟရိတသညာ, အာပတ္တိ ဒုက္ကဋဿ။ အဟရိတေ ဝေမတိကာ, အာပတ္တိ ဒုက္ကဋဿ။ အဟရိတေ အဟရိတသညာ, အနာပတ္တိ။

၈၃၂. အနာပတ္တိ ဩလောကေတွာ ဆဍ္ဍေတိ, ခေတ္တမရိယာဒေ [ဆဍ္ဍိတခေတ္တေ (?) အဋ္ဌကထာ ဩလောကေတဗ္ဗာ] ဆဍ္ဍေတိ သာမိကေ အာပုစ္ဆိတွာ အပလောကေတွာ ဆဍ္ဍေတိ, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၈၃၃. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ရာဇဂဟေ ဂိရဂ္ဂသမဇ္ဇော ဟောတိ။ ဆဗ္ဗဂ္ဂိယာ ဘိက္ခုနိယော ဂိရဂ္ဂသမဇ္ဇံ ဒဿနာယ အဂမံသု။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၃၄. ‘‘ယာ ပန ဘိက္ခုနီ နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆေယျ, ပါစိတ္တိယ’’န္တိ။

၈၃၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

နစ္စံ နာမ ယံ ကိဉ္စိ နစ္စံ။ ဂီတံ နာမ ယံ ကိဉ္စိ ဂီတံ။ ဝါဒိတံ နာမ ယံ ကိဉ္စိ ဝါဒိတံ။

၈၃၆. ဒဿနာယ ဂစ္ဆတိ, အာပတ္တိ ဒုက္ကဋဿ။ ယတ္ထ ဌိတာ ပဿတိ ဝါ သုဏာတိ ဝါ, အာပတ္တိ ပါစိတ္တိယဿ။ ဒဿနူပစာရံ ဝိဇဟိတွာ ပုနပ္ပုနံ ပဿတိ ဝါ သုဏာတိ ဝါ, အာပတ္တိ ပါစိတ္တိယဿ။ ဧကမေကံ ဒဿနာယ ဂစ္ဆတိ, အာပတ္တိ ဒုက္ကဋဿ။ ယတ္ထ ဌိတာ ပဿတိ ဝါ သုဏာတိ ဝါ, အာပတ္တိ ပါစိတ္တိယဿ။ ဒဿနူပစာရံ ဝိဇဟိတွာ ပုနပ္ပုနံ ပဿတိ ဝါ သုဏာတိ ဝါ, အာပတ္တိ ပါစိတ္တိယဿ။

၈၃၇. အနာပတ္တိ အာရာမေ ဌိတာ ပဿတိ ဝါ သုဏာတိ ဝါ, ဘိက္ခုနိယာ ဌိတောကာသံ ဝါ နိသိန္နောကာသံ ဝါ နိပန္နောကာသံ ဝါ အာဂန္တွာ နစ္စန္တိ ဝါ ဂါယန္တိ ဝါ ဝါဒေန္တိ ဝါ, ပဋိပထံ ဂစ္ဆန္တီ ပဿတိ ဝါ သုဏာတိ ဝါ, သတိ ကရဏီယေ ဂန္တွာ ပဿတိ ဝါ သုဏာတိ ဝါ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

လသုဏဝဂ္ဂေါ ပဌမော။

၂. အန္ဓကာရဝဂ္ဂေါ

၁. ပဌမသိက္ခါပဒံ

၈၃၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဒ္ဒါယ ကာပိလာနိယာ အန္တေဝါသိနိယာ ဘိက္ခုနိယာ ဉာတကော ပုရိသော ဂါမကာ သာဝတ္ထိံ အဂမာသိ ကေနစိဒေဝ ကရဏီယေန။ အထ ခေါ သာ ဘိက္ခုနီ တေန ပုရိသေန သဒ္ဓိံ ရတ္တန္ဓကာရေ အပ္ပဒီပေ ဧကေနေကာ သန္တိဋ္ဌတိပိ သလ္လပတိပိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိဣ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ , ဘိက္ခုနီ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၃၉. ‘‘ယာ ပန ဘိက္ခုနီ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌေယျ ဝါ သလ္လပေယျ ဝါ, ပါစိတ္တိယ’’န္တိ။

၈၄၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ရတ္တန္ဓကာရေတိ ဩဂ္ဂတေ သူရိယေ။ အပ္ပဒီပေတိ အနာလောကေ။

ပုရိသော နာမ မနုဿပုရိသော န ယက္ခေါ န ပေတော န တိရစ္ဆာနဂတော ဝိညူ ပဋိဗလော သန္တိဋ္ဌိတုံ သလ္လပိတုံ။

သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။

သန္တိဋ္ဌေယျ ဝါတိ ပုရိသဿ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ။

သလ္လပေယျ ဝါတိ ပုရိသဿ ဟတ္ထပါသေ ဌိတာ သလ္လပတိ, အာပတ္တိ ပါစိတ္တိယဿ။

ဟတ္ထပါသံ ဝိဇဟိတွာ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။ ယက္ခေန ဝါ ပေတေန ဝါ ပဏ္ဍကေန ဝါ တိရစ္ဆာနဂတမနုဿဝိဂ္ဂဟေန ဝါ သဒ္ဓိံ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။

၈၄၁. အနာပတ္တိ ယော ကောစိ ဝိညူ ဒုတိယော [ယာ ကာစိ ဝိညူ ဒုတိယာ (သျာ.)] ဟောတိ, အရဟောပေက္ခါ, အညဝိဟိတာ သန္တိဋ္ဌတိ ဝါ သလ္လပတိ ဝါ, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၈၄၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဒ္ဒါယ ကာပိလာနိယာ အန္တေဝါသိနိယာ ဘိက္ခုနိယာ ဉာတကော ပုရိသော ဂါမကာ သာဝတ္ထိံ အဂမာသိ ကေနစိဒေဝ ကရဏီယေန။ အထ ခေါ သာ ဘိက္ခုနီ – ‘‘ဘဂဝတာ ပဋိက္ခိတ္တံ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌိတုံ သလ္လပိတု’’န္တိ တေနေဝ ပုရိသေန သဒ္ဓိံ ပဋိစ္ဆန္နေ ဩကာသေ ဧကေနေကာ သန္တိဋ္ဌတိပိ သလ္လပတိပိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိဣ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၄၃. ‘‘ယာ ပန ဘိက္ခုနီ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌေယျ ဝါ သလ္လပေယျ ဝါ, ပါစိတ္တိယ’’န္တိ။

၈၄၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပဋိစ္ဆန္နော နာမ ဩကာသော ကုဋ္ဋေန ဝါ ကဝါဋေန ဝါ ကိလဉ္ဇေန ဝါ သာဏိပါကာရေန ဝါ ရုက္ခေန ဝါ ထမ္ဘေန ဝါ ကောတ္ထဠိယာ ဝါ ယေန ကေနစိ ပဋိစ္ဆန္နော ဟောတိ။

ပုရိသော နာမ မနုဿပုရိသော န ယက္ခေါ န ပေတော န တိရစ္ဆာနဂတော ဝိညူ ပဋိဗလော သန္တိဋ္ဌိတုံ သလ္လပိတုံ။

သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။

သန္တိဋ္ဌေယျ ဝါတိ ပုရိသဿ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ။

သလ္လပေယျ ဝါတိ ပုရိသဿ ဟတ္ထပါသေ ဌိတာ သလ္လပတိ, အာပတ္တိ ပါစိတ္တိယဿ။

ဟတ္ထပါသံ ဝိဇဟိတွာ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။ ယက္ခေန ဝါ ပေတေန ဝါ ပဏ္ဍကေန ဝါ တိရစ္ဆာနဂတမနုဿဝိဂ္ဂဟေန ဝါ သဒ္ဓိံ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။

၈၄၅. အနာပတ္တိ ယော ကောစိ ဝိညူ ဒုတိယော ဟောတိ, အရဟောပေက္ခါ, အညဝိဟိတာ သန္တိဋ္ဌတိ ဝါ သလ္လပတိ ဝါ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၈၄၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဒ္ဒါယ ကာပိလာနိယာ အန္တေဝါသိနိယာ ဘိက္ခုနိယာ ဉာတကော ပုရိသော ဂါမကာ သာဝတ္ထိံ အဂမာသိ ကေနစိဒေဝ ကရဏီယေန။ အထ ခေါ သာ ဘိက္ခုနီ – ‘‘ဘဂဝတာ ပဋိက္ခိတ္တံ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌိတုံ သလ္လပိတု’’န္တိ တေနေဝ ပုရိသေန သဒ္ဓိံ အဇ္ဈောကာသေ ဧကေနေကာ သန္တိဋ္ဌတိပိ သလ္လပတိပိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိဣ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၄၇. ‘‘ယာ ပန ဘိက္ခုနီ အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌေယျ ဝါ သလ္လပေယျ ဝါ, ပါစိတ္တိယ’’န္တိ။

၈၄၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဇ္ဈောကာသော နာမ အပ္ပဋိစ္ဆန္နော ဟောတိ ကုဋ္ဋေန ဝါ ကဝါဋေန ဝါ ကိလဉ္ဇေန ဝါ သာဏိပါကာရေန ဝါ ရုက္ခေန ဝါ ထမ္ဘေန ဝါ ကောတ္ထဠိယာ ဝါ, ယေန ကေနစိ အပ္ပဋိစ္ဆန္နော ဟောတိ။

ပုရိသော နာမ မနုဿပုရိသော, န ယက္ခေါ န ပေတော န တိရစ္ဆာနဂတော, ဝိညူ ပဋိဗလော သန္တိဋ္ဌိတုံ သလ္လပိတုံ။

သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။

သန္တိဋ္ဌေယျ ဝါတိ ပုရိသဿ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ။

သလ္လပေယျ ဝါတိ ပုရိသဿ ဟတ္ထပါသေ ဌိတာ သလ္လပတိ, အာပတ္တိ ပါစိတ္တိယဿ။

ဟတ္ထပါသံ ဝိဇဟိတွာ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။ ယက္ခေန ဝါ ပေတေန ဝါ ပဏ္ဍကေန ဝါ တိရစ္ဆာဂတမနုဿဝိဂ္ဂဟေန ဝါ သဒ္ဓိံ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။

၈၄၉. အနာပတ္တိ ယော ကောစိ ဝိညူ ဒုတိယော ဟောတိ, အရဟောပေက္ခါ, အညဝိဟိတာ သန္တိဋ္ဌတိ ဝါ သလ္လပတိ ဝါ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၈၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိပိ နိကဏ္ဏိကမ္ပိ ဇပ္ပေတိ ဒုတိယိကမ္ပိ ဘိက္ခုနိံ ဥယျောဇေတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ နိကဏ္ဏိကမ္ပိ ဇပ္ပိဿတိ ဒုတိယိကမ္ပိ ဘိက္ခုနိံ ဥယျောဇေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိပိ နိကဏ္ဏိကမ္ပိ ဇပ္ပေတိ ဒုတိယိကမ္ပိ ဘိက္ခုနိံ ဥယျောဇေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ နိကဏ္ဏိကမ္ပိ ဇပ္ပိဿတိ ဒုတိယိကမ္ပိ ဘိက္ခုနိံ ဥယျောဇေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၅၁. ‘‘ယာ ပန ဘိက္ခုနီ ရထိကာယ ဝါ ဗျူဟေ ဝါ သိင်္ဃာဋကေ ဝါ ပုရိသေန သဒ္ဓိံ ဧကေနေကာ သန္တိဋ္ဌေယျ ဝါ သလ္လပေယျ ဝါ နိကဏ္ဏိကံ ဝါ ဇပ္ပေယျ ဒုတိယိကံ ဝါ ဘိက္ခုနိံ ဥယျောဇေယျ, ပါစိတ္တိယ’’န္တိ။

၈၅၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ရထိကာ နာမ ရစ္ဆာ ဝုစ္စတိ။ ဗျူဟံ နာမ ယေနေဝ ပဝိသန္တိ တေနေဝ နိက္ခမန္တိ။ သိင်္ဃာဋကော နာမ စစ္စရံ ဝုစ္စတိ။

ပုရိသော နာမ မနုဿပုရိသော န ယက္ခေါ န ပေတော န တိရစ္ဆာနဂတော ဝိညူ ပဋိဗလော သန္တိဋ္ဌိတုံ သလ္လပိတုံ။

သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။

သန္တိဋ္ဌေယျ ဝါတိ ပုရိသဿ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ။

သလ္လပေယျ ဝါတိ ပုရိသဿ ဟတ္ထပါသေ ဌိတာ သလ္လပတိ, အာပတ္တိ ပါစိတ္တိယဿ။

နိကဏ္ဏိကံ ဝါ ဇပ္ပေယျာတိ ပုရိသဿ ဥပကဏ္ဏကေ အာရောစေတိ , အာပတ္တိ ပါစိတ္တိယဿ။

ဒုတိယိကံ ဝါ ဘိက္ခုနိံ ဥယျောဇေယျာတိ အနာစာရံ အာစရိတုကာမာ ဒုတိယိကမ္ပိ ဘိက္ခုနိံ ဥယျောဇေတိ, အာပတ္တိ ဒုက္ကဋဿ။ ဒဿနူပစာရံ ဝါ သဝနူပစာရံ ဝါ ဝိဇဟန္တိယာ အာပတ္တိ ဒုက္ကဋဿ။ ဝိဇဟိတေ အာပတ္တိ ပါစိတ္တိယဿ။

ဟတ္ထပါသံ ဝိဇဟိတွာ သန္တိဋ္ဌတိ ဝါ သလ္လပတိ ဝါ အာပတ္တိ ဒုက္ကဋဿ။ ယက္ခေန ဝါ ပေတေန ဝါ ပဏ္ဍကေန ဝါ တိရစ္ဆာနဂတမနုဿဝိဂ္ဂဟေန ဝါ သဒ္ဓိံ သန္တိဋ္ဌတိ ဝါ သလ္လပတိ ဝါ, အာပတ္တိ ဒုက္ကဋဿ။

၈၅၃. အနာပတ္တိ ယော ကောစိ ဝိညူ ဒုတိယော ဟောတိ, အရဟောပေက္ခါ, အညဝိဟိတာ သန္တိဋ္ဌတိ ဝါ သလ္လပတိ ဝါ, န အနာစာရံ အာစရိတုကာမာ, သတိ ကရဏီယေ ဒုတိယိကံ ဘိက္ခုနိံ ဥယျောဇေတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၈၅၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ အညတရဿ ကုလဿ ကုလူပိကာ ဟောတိ နိစ္စဘတ္တိကာ။ အထ ခေါ သာ ဘိက္ခုနီ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တံ ကုလံ တေနုပသင်္ကမိ; ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကာမိ။ တဿ ကုလဿ ဒါသီ ဃရံ သမ္မဇ္ဇန္တီ တံ အာသနံ ဘာဇနန္တရိကာယ ပက္ခိပိ။ မနုဿာ တံ အာသနံ အပဿန္တာ တံ ဘိက္ခုနိံ ဧတဒဝေါစုံ – ‘‘ကဟံ တံ, အယျေ, အာသန’’န္တိ? ‘‘နာဟံ တံ, အာဝုသော, အာသနံ ပဿာမီ’’တိ။ ‘‘ဒေထာယျေ, တံ အာသန’’န္တိ ပရိဘာသိတွာ နိစ္စဘတ္တံ ပစ္ဆိန္ဒိံသု။ အထ ခေါ တေ မနုဿာ ဃရံ သောဓေန္တာ တံ အာသနံ ဘာဇနန္တရိကာယ ပဿိတွာ တံ ဘိက္ခုနိံ ခမာပေတွာ နိစ္စဘတ္တံ ပဋ္ဌပေသုံ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမိဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမတီတိ [ပက္ကမီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ ဘိက္ခုနီ ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၅၅. ‘‘ယာ ပန ဘိက္ခုနီ ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမေယျ, ပါစိတ္တိယ’’န္တိ။

၈၅၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပုရေဘတ္တံ နာမ အရုဏုဂ္ဂမနံ ဥပါဒါယ ယာဝ မဇ္ဈနှိကာ။

ကုလံ နာမ စတ္တာရိ ကုလာနိ – ခတ္တိယကုလံ, ဗြာဟ္မဏကုလံ, ဝေဿကုလံ, သုဒ္ဒကုလံ။ ဥပသင်္ကမိတွာတိ တတ္ထ ဂန္တွာ။

အာသနံ နာမ ပလ္လင်္ကဿ ဩကာသော ဝုစ္စတိ။ နိသီဒိတွာတိ တသ္မိံ နိသီဒိတွာ။

သာမိကေ အနာပုစ္ဆာ ပက္ကမေယျာတိ ယော တသ္မိံ ကုလေ မနုဿော ဝိညူ တံ အနာပုစ္ဆာ အနောဝဿကံ အတိက္ကာမေန္တိယာ အာပတ္တိ ပါစိတ္တိယဿ။ အဇ္ဈောကာသေ ဥပစာရံ အတိက္ကာမေန္တိယာ အာပတ္တိ ပါစိတ္တိယဿ။

၈၅၇. အနာပုစ္ဆိတေ အနာပုစ္ဆိတသညာ ပက္ကမတိ, အာပတ္တိ ပါစိတ္တိယဿ။ အနာပုစ္ဆိတေ ဝေမတိကာ ပက္ကမတိ, အာပတ္တိ ပါစိတ္တိယဿ။ အနာပုစ္ဆိတေ အာပုစ္ဆိတသညာ ပက္ကမတိ, အာပတ္တိ ပါစိတ္တိယဿ။

ပလ္လင်္ကဿ အနောကာသေ အာပတ္တိ ဒုက္ကဋဿ။ အာပုစ္ဆိတေ အနာပုစ္ဆိတသညာ, အာပတ္တိ ဒုက္ကဋဿ။ အာပုစ္ဆိတေ ဝေမတိကာ, အာပတ္တိ ဒုက္ကဋဿ။ အာပုစ္ဆိတေ အာပုစ္ဆိတသညာ, အနာပတ္တိ။

၈၅၈. အနာပတ္တိ အာပုစ္ဆာ ဂစ္ဆတိ, အသံဟာရိမေ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၈၅၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒတိပိ အဘိနိပဇ္ဇတိပိ။ မနုဿာ ထုလ္လနန္ဒံ ဘိက္ခုနိံ ဟိရီယမာနာ အာသနေ နေဝ အဘိနိသီဒန္တိ န အဘိနိပဇ္ဇန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒိဿတိပိ အဘိနိပဇ္ဇိဿတိဣ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒိဿတိပိ အဘိနိပဇ္ဇိဿတိဣ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒတိပိ အဘိနိပဇ္ဇတိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ , ထုလ္လနန္ဒါ ဘိက္ခုနီ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒိဿတိပိ အဘိနိပဇ္ဇိဿတိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၆၀. ‘‘ယာ ပန ဘိက္ခုနီ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒေယျ ဝါ အဘိနိပဇ္ဇေယျ ဝါ, ပါစိတ္တိယ’’န္တိ။

၈၆၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပစ္ဆာဘတ္တံ နာမ မဇ္ဈနှိကေ ဝီတိဝတ္တေ ယာဝ အတ္ထင်္ဂတေ သူရိယေ။

ကုလံ နာမ စတ္တာရိ ကုလာနိ – ခတ္တိယကုလံ, ဗြာဟ္မဏကုလံ, ဝေဿကုလံ, သုဒ္ဒကုလံ။ ဥပသင်္ကမိတွာတိ တတ္ထ ဂန္တွာ။

သာမိကေ အနာပုစ္ဆာတိ ယော တသ္မိံ ကုလေ မနုဿော သာမိကော ဒါတုံ, တံ အနာပုစ္ဆာ။

အာသနံ နာမ ပလ္လင်္ကဿ ဩကာသော ဝုစ္စတိ။

အဘိနိသီဒေယျာတိ တသ္မိံ အဘိနိသီဒတိ, အာပတ္တိ ပါစိတ္တိယဿ။

အဘိနိပဇ္ဇေယျာတိ တသ္မိံ အဘိနိပဇ္ဇတိ, အာပတ္တိ ပါစိတ္တိယဿ။

၈၆၂. အနာပုစ္ဆိတေ အနာပုစ္ဆိတသညာ အာသနေ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။ အနာပုစ္ဆိတေ ဝေမတိကာ အာသနေ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။ အနာပုစ္ဆိတေ အာပုစ္ဆိတသညာ အာသနေ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။

ပလ္လင်္ကဿ အနောကာသေ အာပတ္တိ ဒုက္ကဋဿ။ အာပုစ္ဆိတေ အနာပုစ္ဆိတသညာ, အာပတ္တိ ဒုက္ကဋဿ ။ အာပုစ္ဆိတေ ဝေမတိကာ, အာပတ္တိ ဒုက္ကဋဿ။ အာပုစ္ဆိတေ အာပုစ္ဆိတသညာ, အနာပတ္တိ။

၈၆၃. အနာပတ္တိ အာပုစ္ဆာ အာသနေ အဘိနိသီဒတိ ဝါ အဘိနိပဇ္ဇတိ ဝါ, ဓုဝပညတ္တေ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၈၆၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သမ္ဗဟုလာ ဘိက္ခုနိယော ကောသလေသု ဇနပဒေ သာဝတ္ထိံ ဂစ္ဆန္တိယော သာယံ အညတရံ ဂါမံ ဥပဂန္တွာ အညတရံ ဗြာဟ္မဏကုလံ ဥပသင်္ကမိတွာ ဩကာသံ ယာစိံသု။ အထ ခေါ သာ ဗြာဟ္မဏီ တာ ဘိက္ခုနိယော ဧတဒဝေါစ – ‘‘အာဂမေထ, အယျေ, ယာဝ ဗြာဟ္မဏော အာဂစ္ဆတီ’’တိ။ ဘိက္ခုနိယော – ‘‘ယာဝ ဗြာဟ္မဏော အာဂစ္ဆတီ’’တိ သေယျံ သန္ထရိတွာ ဧကစ္စာ နိသီဒိံသု ဧကစ္စာ နိပဇ္ဇိံသု။ အထ ခေါ သော ဗြာဟ္မဏော ရတ္တိံ အာဂန္တွာ တံ ဗြာဟ္မဏိံ ဧတဒဝေါစ – ‘‘ကာ ဣမာ’’တိ? ‘‘ဘိက္ခုနိယော, အယျာ’’တိ။ ‘‘နိက္ကဍ္ဎထ ဣမာ မုဏ္ဍာ ဗန္ဓကိနိယော’’တိ, ဃရတော နိက္ကဍ္ဎာပေသိ။ အထ ခေါ တာ ဘိက္ခုနိယော သာဝတ္ထိံ ဂန္တွာ ဘိက္ခုနီနံ ဧတမတ္ထံ အာရောစေသုံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒိဿန္တိပိ အဘိနိပဇ္ဇိဿန္တိဣ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒန္တိပိ အဘိနိပဇ္ဇန္တိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒိဿန္တိပိ အဘိနိပဇ္ဇိဿန္တိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၆၅. ‘‘ယာ ပန ဘိက္ခုနီ ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒေယျ ဝါ အဘိနိပဇ္ဇေယျ ဝါ, ပါစိတ္တိယ’’န္တိ။

၈၆၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဝိကာလော နာမ အတ္ထင်္ဂတေ သူရိယေ ယာဝ အရုဏုဂ္ဂမနာ။

ကုလံ နာမ စတ္တာရိ ကုလာနိ – ခတ္တိယကုလံ, ဗြာဟ္မဏကုလံ, ဝေဿကုလံ သုဒ္ဒကုလံ။ ဥပသင်္ကမိတွာတိ တတ္ထ ဂန္တွာ။

သာမိကေ အနာပုစ္ဆာတိ ယော တသ္မိံ ကုလေ မနုဿော သာမိကော ဒါတုံ, တံ အနာပုစ္ဆာ။

သေယျံ နာမ အန္တမသော ပဏ္ဏသန္ထာရောပိ။ သန္ထရိတွာတိ သယံ သန္ထရိတွာ။ သန္ထရာပေတွာတိ အညံ သန္ထရာပေတွာ။ အဘိနိသီဒေယျာတိ တသ္မိံ အဘိနိသီဒတိ, အာပတ္တိ ပါစိတ္တိယဿ။ အဘိနိပဇ္ဇေယျာတိ တသ္မိံ အဘိနိပဇ္ဇတိ, အာပတ္တိ ပါစိတ္တိယဿ။

၈၆၇. အနာပုစ္ဆိတေ အနာပုစ္ဆိတသညာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။ အနာပုစ္ဆိတေ ဝေမတိကာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။ အနာပုစ္ဆိတေ အာပုစ္ဆိတသညာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။

အာပုစ္ဆိတေ အနာပုစ္ဆိတသညာ, အာပတ္တိ ဒုက္ကဋဿ။ အာပုစ္ဆိတေ ဝေမတိကာ, အာပတ္တိ ဒုက္ကဋဿ။ အာပုစ္ဆိတေ အာပုစ္ဆိတသညာ, အနာပတ္တိ။

၈၆၈. အနာပတ္တိ အာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၈၆၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဒ္ဒါယ ကာပိလာနိယာ အန္တေဝါသိနီ ဘိက္ခုနီ ဘဒ္ဒံ ကာပိလာနိံ သက္ကစ္စံ ဥပဋ္ဌေတိ။ ဘဒ္ဒါ ကာပိလာနီ ဘိက္ခုနိယော ဧတဒဝေါစ – ‘‘အယံ မံ, အယျေ, ဘိက္ခုနီ သက္ကစံ ဥပဋ္ဌေတိ, ဣမိဿာဟံ စီဝရံ ဒဿာမီ’’တိ။ အထ ခေါ သာ ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေသိ – ‘‘အဟံ ကိရာယျေ, အယျံ န သက္ကစ္စံ ဥပဋ္ဌေမိ, န ကိရ မေ အယျာ စီဝရံ ဒဿတီ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေတီတိ [ဥဇ္ဈာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၇၀. ‘‘ယာ ပန ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေယျ, ပါစိတ္တိယ’’န္တိ။

၈၇၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဒုဂ္ဂဟိတေနာတိ အညထာ ဂဟိတေန [ဥဂ္ဂဟိတေန (က.)]။

ဒူပဓါရိတေနာတိ အညထာ ဥပဓါရိတေန။

ပရန္တိ ဥပသမ္ပန္နံ ဥဇ္ဈာပေတိ, အာပတ္တိ ပါစိတ္တိယဿ။

၈၇၂. ဥပသမ္ပန္နာယ ဥပသမ္ပန္နသညာ ဥဇ္ဈာပေတိ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ ဥဇ္ဈာပေတိ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ ဥဇ္ဈာပေတိ, အာပတ္တိ ပါစိတ္တိယဿ။

အနုပသမ္ပန္နံ ဥဇ္ဈာပေတိ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၈၇၃. အနာပတ္တိ ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၈၇၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော အတ္တနော ဘဏ္ဍကံ အပဿန္တိယော စဏ္ဍကာဠိံ ဘိက္ခုနိံ ဧတဒဝေါစုံ – ‘‘အပါယျေ, အမှာကံ, ဘဏ္ဍကံ ပဿေယျာသီ’’တိ? စဏ္ဍကာဠီ ဘိက္ခုနီ ဥဇ္ဈာယတိ ခိယျတိ ဝိပါစေတိ – ‘‘အဟမေဝ နူန စောရီ, အဟမေဝ နူန အလဇ္ဇိနီ, ယာ အယျာယော အတ္တနော ဘဏ္ဍကံ အပဿန္တိယော တာ မံ ဧဝမာဟံသု – ‘အပါယျေ, အမှာကံ ဘဏ္ဍကံ ပဿေယျာသီ’တိ? သစာဟံ, အယျေ, တုမှာကံ ဘဏ္ဍကံ ဂဏှာမိ, အဿမဏီ ဟောမိ, ဗြဟ္မစရိယာ စဝါမိ, နိရယံ ဥပပဇ္ဇာမိ; ယာ ပန မံ အဘူတေန ဧဝမာဟ သာပိ အဿမဏီ ဟောတု, ဗြဟ္မစရိယာ စဝတု, နိရယံ ဥပပဇ္ဇတူ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ စဏ္ဍကာဠီ အတ္တာနမ္ပိ ပရမ္ပိ နိရယေနပိ ဗြဟ္မစရိယေနပိ အဘိသပိဿတီ’’တိ။ပေ.။ သစ္စံ ကိရ, ဘိက္ခဝေ, စဏ္ဍကာဠီ ဘိက္ခုနီ အတ္တာနမ္ပိ ပရမ္ပိ နိရယေနပိ ဗြဟ္မစရိယေနပိ အဘိသပတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, စဏ္ဍကာဠီ ဘိက္ခုနီ အတ္တာနမ္ပိ ပရမ္ပိ နိရယေနပိ ဗြဟ္မစရိယေနပိ အဘိသပိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၇၅. ‘‘ယာ ပန ဘိက္ခုနီ အတ္တာနံ ဝါ ပရံ ဝါ နိရယေန ဝါ ဗြဟ္မစရိယေန ဝါ အဘိသပေယျ, ပါစိတ္တိယျ’’န္တိ။

၈၇၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အတ္တာနန္တိ ပစ္စတ္တံ။ ပရန္တိ ဥပသမ္ပန္နံ။ နိရယေန ဝါ ဗြဟ္မစရိယေန ဝါ အဘိသပတိ, အာပတ္တိ ပါစိတ္တိယဿ။

၈၇၇. ဥပသမ္ပန္နာယ ဥပသမ္ပန္နသညာ နိရယေန ဝါ ဗြဟ္မစရိယေန ဝါ အဘိသပတိ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ နိရယေန ဝါ ဗြဟ္မစရိယေန ဝါ အဘိသပတိ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ နိရယေန ဝါ ဗြဟ္မစရိယေန ဝါ အဘိသပတိ, အာပတ္တိ ပါစိတ္တိယဿ။

တိရစ္ဆာနယောနိယာ ဝါ ပေတ္တိဝိသယေန ဝါ မနုဿဒေါဘဂ္ဂေန ဝါ အဘိသပတိ, အာပတ္တိ ဒုက္ကဋဿ။ အနုပသမ္ပန္နံ အဘိသပတိ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၈၇၈. အနာပတ္တိ အတ္ထပုရေက္ခါရာယ, ဓမ္မပုရေက္ခါရာယ, အနုသာသနိပုရေက္ခါရာယ, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၈၇၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန စဏ္ဍကာဠီ ဘိက္ခုနီ ဘိက္ခုနီဟိ သဒ္ဓိံ ဘဏ္ဍိတွာ အတ္တာနံ ဝဓိတွာ ဝဓိတွာ ရောဒတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ စဏ္ဍကာဠီ အတ္တာနံ ဝဓိတွာ ဝဓိတွာ ရောဒိဿတီ’’တိ။ပေ.။ သစ္စံ ကိရ, ဘိက္ခဝေ, စဏ္ဍကာဠီ ဘိက္ခုနီ အတ္တာနံ ဝဓိတွာ ဝဓိတွာ ရောဒတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, စဏ္ဍကာဠီ ဘိက္ခုနီ အတ္တာနံ ဝဓိတွာ ဝဓိတွာ ရောဒိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၈၀. ‘‘ယာ ပန ဘိက္ခုနီ အတ္တာနံ ဝဓိတွာ ဝဓိတွာ ရောဒေယျ, ပါစိတ္တိယ’’န္တိ။

၈၈၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အတ္တာနန္တိ ပစ္စတ္တံ။ ဝဓိတွာ ဝဓိတွာ ရောဒတိ, အာပတ္တိ ပါစိတ္တိယဿ။ ဝဓတိ န ရောဒတိ, အာပတ္တိ ဒုက္ကဋဿ။ ရောဒတိ န ဝဓတိ, အာပတ္တိ ဒုက္ကဋဿ။

၈၈၂. အနာပတ္တိ ဉာတိဗျသနေန ဝါ ဘောဂဗျသနေန ဝါ ရောဂဗျသနေန ဝါ ဖုဋ္ဌာ ရောဒတိ န ဝဓတိ, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

အန္ဓကာရဝဂ္ဂေါ ဒုတိယော။

၃. နဂ္ဂဝဂ္ဂေါ

၁. ပဌမသိက္ခါပဒံ

၈၈၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သမ္ဗဟုလာ [မဟာဝ. ၃၅၀] ဘိက္ခုနိယော အစိရဝတိယာ နဒိယာ ဝေသိယာဟိ သဒ္ဓိံ နဂ္ဂါ ဧကတိတ္ထေ နဟာယန္တိ။ ဝေသိယာ တာ ဘိက္ခုနိယော ဥပ္ပဏ္ဍေသုံ – ‘‘ကိံ နု ခေါ နာမ တုမှာကံ, အယျေ, ဒဟရာနံ [ဒဟရာနံ ဒဟရာနံ (သီ.)] ဗြဟ္မစရိယံ စိဏ္ဏေန, နနု နာမ ကာမာ ပရိဘုဉ္ဇိတဗ္ဗာ ! ယဒါ ဇိဏ္ဏာ ဘဝိဿထ တဒါ ဗြဟ္မစရိယံ စရိဿထ။ ဧဝံ တုမှာကံ ဥဘော အတ္ထာ ပရိဂ္ဂဟိတာ ဘဝိဿန္တီ’’တိ။ ဘိက္ခုနိယော ဝေသိယာဟိ ဥပ္ပဏ္ဍိယမာနာ မင်္ကူ အဟေသုံ။ အထ ခေါ တာ ဘိက္ခုနိယော ဥပဿယံ ဂန္တွာ ဘိက္ခုနီနံ ဧတမတ္ထံ အာရောစေသုံ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခုနီနံ သိက္ခါပဒံ ပညပေဿာမိ ဒသ အတ္ထဝသေ ပဋိစ္စ – သံဃသုဋ္ဌုတာယ။ပေ.။ ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၈၄. ‘‘ယာ ပန ဘိက္ခုနီ နဂ္ဂါ နဟာယေယျ, ပါစိတ္တိယ’’န္တိ။

၈၈၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

နဂ္ဂါ နဟာယေယျာတိ အနိဝတ္ထာ ဝါ အပါရုတာ ဝါ နဟာယတိ, ပယောဂေ ဒုက္ကဋံ။ နဟာနပရိယောသာနေ အာပတ္တိ ပါစိတ္တိယဿ။

၈၈၆. အနာပတ္တိ အစ္ဆိန္နစီဝရိကာယ ဝါ နဋ္ဌစီဝရိကာယ ဝါ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၈၈၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဂဝတာ ဘိက္ခုနီနံ [မဟာဝ. ၃၅၁] ဥဒကသာဋိကာ အနုညာတာ ဟောတိ ။ ဆဗ္ဗဂ္ဂိယာ ဘိက္ခုနိယော – ‘‘ဘဂဝတာ ဥဒကသာဋိကာ အနုညာတာ’’တိ အပ္ပမာဏိကာယော ဥဒကသာဋိကာယော ဓါရေသုံ [ဓါရေန္တိ (ပါစိ. ၅၃၁-၅၄၅)]။ ပုရတောပိ ပစ္ဆတောပိ အာကဍ္ဎန္တာ အာဟိဏ္ဍန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော အပ္ပမာဏိကာယော ဥဒကသာဋိကာယော ဓါရေဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော အပ္ပမာဏိကာယော ဥဒကသာဋိကာယော ဓါရေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော အပ္ပမာဏိကာယော ဥဒကသာဋိကာယော ဓါရေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၈၈. ‘‘ဥဒကသာဋိကံ ပန ဘိက္ခုနိယာ ကာရယမာနာယ ပမာဏိကာ ကာရေတဗ္ဗာ။ တတြိဒံ ပမာဏံ – ဒီဃသော စတဿော ဝိဒတ္ထိယော, သုဂတဝိဒတ္ထိယာ; တိရိယံ ဒွေ ဝိဒတ္ထိယော။ တံ အတိက္ကာမေန္တိယာ ဆေဒနကံ ပါစိတ္တိယ’’န္တိ။

၈၈၉. ဥဒကသာဋိကာ နာမ ယာယ နိဝတ္ထာ [နိဝတ္ထာယ (သျာ.)] နဟာယတိ။

ကာရယမာနာယာတိ ကရောန္တိယာ ဝါ ကာရာပေန္တိယာ ဝါ။

ပမာဏိကာ ကာရေတဗ္ဗာ။ တတြိဒံ ပမာဏံ – ဒီဃသော စတဿော ဝိဒတ္ထိယော, သုဂတဝိဒတ္ထိယာ; တိရိယံ ဒွေ ဝိဒတ္ထိယော။ တံ အတိက္ကာမေတွာ ကရောတိ ဝါ ကာရာပေတိ ဝါ, ပယောဂေ ဒုက္ကဋံ။ ပဋိလာဘေန ဆိန္ဒိတွာ ပါစိတ္တိယံ ဒေသေတဗ္ဗံ။

၈၉၀. အတ္တနာ ဝိပ္ပကတံ အတ္တနာ ပရိယောသာပေတိ, အာပတ္တိ ပါစိတ္တိယဿ ။ အတ္တနာ ဝိပ္ပကတံ ပရေဟိ ပရိယောသာပေတိ, အာပတ္တိ ပါစိတ္တိယဿ။ ပရေဟိ ဝိပ္ပကတံ အတ္တနာ ပရိယောသာပေတိ, အာပတ္တိ ပါစိတ္တိယဿ။ ပရေဟိ ဝိပ္ပကတံ ပရေဟိ ပရိယောသာပေတိ, အာပတ္တိ ပါစိတ္တိယဿ။

အညဿတ္ထာယ ကရောတိ ဝါ ကာရာပေတိ ဝါ, အာပတ္တိ ဒုက္ကဋဿ။ အညေန ကတံ ပဋိလဘိတွာ ပရိဘုဉ္ဇတိ, အာပတ္တိ ဒုက္ကဋဿ။

၈၉၁. အနာပတ္တိ ပမာဏိကံ ကရောတိ, ဦနကံ ကရောတိ, အညေန ကတံ ပမာဏာတိက္ကန္တံ ပဋိလဘိတွာ ဆိန္ဒိတွာ ပရိဘုဉ္ဇတိ, ဝိတာနံ ဝါ ဘူမတ္ထရဏံ ဝါ သာဏိပါကာရံ ဝါ ဘိသိံ ဝါ ဗိဗ္ဗောဟနံ ဝါ ကရောတိ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၈၉၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရိဿာ ဘိက္ခုနိယာ မဟဂ္ဃေ စီဝရဒုဿေ စီဝရံ ဒုက္ကဋံ ဟောတိ ဒုဿိဗ္ဗိတံ။ ထုလ္လနန္ဒါ ဘိက္ခုနီ တံ ဘိက္ခုနိံ ဧတဒဝေါစ – ‘‘သုန္ဒရံ ခေါ ဣဒံ တေ, အယျေ, စီဝရဒုဿံ; စီဝရဉ္စ ခေါ ဒုက္ကဋံ ဒုဿိဗ္ဗိတ’’န္တိ။ ‘‘ဝိသိဗ္ဗေမိ, အယျေ, သိဗ္ဗိဿသီ’’တိ? ‘‘အာမာယျေ, သိဗ္ဗိဿာမီ’’တိ။ အထ ခေါ သာ ဘိက္ခုနီ တံ စီဝရံ ဝိသိဗ္ဗေတွာ ထုလ္လနန္ဒါယ ဘိက္ခုနိယာ အဒါသိ။ ထုလ္လနန္ဒါ ဘိက္ခုနီ – ‘‘သိဗ္ဗိဿာမိ သိဗ္ဗိဿာမီ’’တိ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဘိက္ခုနိယာ စီဝရံ ဝိသိဗ္ဗာပေတွာ နေဝ သိဗ္ဗိဿတိ န သိဗ္ဗာပနာယ ဥဿုက္ကံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ စီဝရံ ဝိသိဗ္ဗာပေတွာ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ စီဝရံ ဝိသိဗ္ဗာပေတွာ နေဝ သိဗ္ဗိဿတိ န သိဗ္ဗာပနာယ ဥဿုက္ကံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၉၃. ‘‘ယာ ပန ဘိက္ခုနီ ဘိက္ခုနိယာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗေယျ န သိဗ္ဗာပနာယ ဥဿုက္ကံ ကရေယျ, အညတြ စတူဟပဉ္စာဟာ, ပါစိတ္တိယ’’န္တိ။

၈၉၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာတိ အညာယ ဘိက္ခုနိယာ။

စီဝရံ နာမ ဆန္နံ စီဝရာနံ အညတရံ စီဝရံ။

ဝိသိဗ္ဗေတွာတိ သယံ ဝိသိဗ္ဗေတွာ။ ဝိသိဗ္ဗာပေတွာတိ အညံ ဝိသိဗ္ဗာပေတွာ။

သာ ပစ္ဆာ အနန္တရာယိကိနီတိ အသတိ အန္တရာယေ။

နေဝ သိဗ္ဗေယျာတိ န သယံ သိဗ္ဗေယျ။ န သိဗ္ဗာပနာယ ဥဿုက္ကံ ကရေယျာတိ န အညံ အာဏာပေယျ။

အညတြ စတူဟပဉ္စာဟာတိ ဌပေတွာ စတူဟပဉ္စာဟံ။ ‘‘နေဝ သိဗ္ဗိဿာမိ န သိဗ္ဗာပနာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၈၉၅. ဥပသမ္ပန္နာယ ဥပသမ္ပန္နသညာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ, အညတြ စတူဟပဉ္စာဟာ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ, အညတြ စတူဟပဉ္စာဟာ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ, အညတြ စတူဟပဉ္စာဟာ, အာပတ္တိ ပါစိတ္တိယဿ။

အညံ ပရိက္ခါရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ, အညတြ စတူဟပဉ္စာဟာ, အာပတ္တိ ဒုက္ကဋဿ ။ အနုပသမ္ပန္နာယ စီဝရံ ဝါ အညံ ဝါ ပရိက္ခါရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ သာ ပစ္ဆာ အနန္တရာယိကိနီ နေဝ သိဗ္ဗတိ န သိဗ္ဗာပနာယ ဥဿုက္ကံ ကရောတိ, အညတြ စတူဟပဉ္စာဟာ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၈၉၆. အနာပတ္တိ သတိ အန္တရာယေ, ပရိယေသိတွာ န လဘတိ, ကရောန္တီ စတူဟပဉ္စာဟံ အတိက္ကာမေတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၈၉၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဘိက္ခုနီနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမန္တိ။ တာနိ စီဝရာနိ စိရံ နိက္ခိတ္တာနိ ကဏ္ဏကိတာနိ ဟောန္တိ။ တာနိ ဘိက္ခုနိယော ဩတာပေန္တိ။ ဘိက္ခုနိယော တာ ဘိက္ခုနိယော ဧတဒဝေါစုံ – ‘‘ကဿိမာနိ , အယျေ, စီဝရာနိ ကဏ္ဏကိတာနီ’’တိ? အထ ခေါ တာ ဘိက္ခုနိယော ဘိက္ခုနီနံ ဧတမတ္ထံ အာရောစေသုံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဘိက္ခုနီနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဘိက္ခုနီနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဘိက္ခုနီနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၈၉၈. ‘‘ယာ ပန ဘိက္ခုနီ ပဉ္စာဟိကံ သံဃာဋိစာရံ [သံဃာဋိဝါရံ (သျာ.)] အတိက္ကာမေယျ, ပါစိတ္တိယ’’န္တိ။

၈၉၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပဉ္စာဟိကံ သံဃာဋိစာရံ အတိက္ကာမေယျာတိ ပဉ္စမံ ဒိဝသံ ပဉ္စ စီဝရာနိ နေဝ နိဝါသေတိ န ပါရုပတိ န ဩတာပေတိ, ပဉ္စမံ ဒိဝသံ အတိက္ကာမေတိ, အာပတ္တိ ပါစိတ္တိယဿ။

၉၀၀. ပဉ္စာဟာတိက္ကန္တေ အတိက္ကန္တသညာ, အာပတ္တိ ပါစိတ္တိယဿ။ ပဉ္စာဟာတိက္ကန္တေ ဝေမတိကာ, အာပတ္တိ ပါစိတ္တိယဿ။ ပဉ္စာဟာတိက္ကန္တေ အနတိက္ကန္တသညာ , အာပတ္တိ ပါစိတ္တိယဿ။

ပဉ္စာဟာနတိက္ကန္တေ အတိက္ကန္တသညာ, အာပတ္တိ ဒုက္ကဋဿ။ ပဉ္စာဟာနတိက္ကန္တေ ဝေမတိကာ, အာပတ္တိ ဒုက္ကဋဿ။ ပဉ္စာဟာနတိက္ကန္တေ အနတိက္ကန္တသညာ, အနာပတ္တိ။

၉၀၁. အနာပတ္တိ ပဉ္စမံ ဒိဝသံ ပဉ္စ စီဝရာနိ နိဝါသေတိ ဝါ ပါရုပတိ ဝါ ဩတာပေတိ ဝါ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၉၀၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ ပိဏ္ဍာယ စရိတွာ အလ္လစီဝရံ ပတ္ထရိတွာ ဝိဟာရံ ပါဝိသိ။ အညတရာ ဘိက္ခုနီ တံ စီဝရံ ပါရုပိတွာ ဂါမံ ပိဏ္ဍာယ ပါဝိသိ။ သာ နိက္ခမိတွာ ဘိက္ခုနိယော ပုစ္ဆိ – ‘‘အပါယျေ, မယှံ စီဝရံ ပဿေယျာထာ’’တိ? ဘိက္ခုနိယော တဿာ ဘိက္ခုနိယာ ဧတမတ္ထံ အာရောစေသုံ။ အထ ခေါ သာ ဘိက္ခုနီ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနီ မယှံ စီဝရံ အနာပုစ္ဆာ ပါရုပိဿတီ’’တိ! အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဘိက္ခုနိယာ စီဝရံ အနာပုစ္ဆာ ပါရုပိဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဘိက္ခုနိယာ စီဝရံ အနာပုစ္ဆာ ပါရုပတီတိ [ပါရုဣတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ဘိက္ခုနိယာ စီဝရံ အနာပုစ္ဆာ ပါရုပိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၀၃. ‘‘ယာ ပန ဘိက္ခုနီ စီဝရသင်္ကမနီယံ ဓါရေယျ, ပါစိတ္တိယ’’န္တိ။

၉၀၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

စီဝရသင်္ကမနီယံ နာမ ဥပသမ္ပန္နာယ ပဉ္စန္နံ စီဝရာနံ အညတရံ စီဝရံ တဿာ ဝါ အဒိန္နံ တံ ဝါ အနာပုစ္ဆာ နိဝါသေတိ ဝါ ပါရုပတိ ဝါ, အာပတ္တိ ပါစိတ္တိယဿ။

၉၀၅. ဥပသမ္ပန္နာယ ဥပသမ္ပန္နသညာ စီဝရသင်္ကမနီယံ ဓါရေတိ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ စီဝရသင်္ကမနီယံ ဓါရေတိ , အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ စီဝရသင်္ကမနီယံ ဓါရေတိ, အာပတ္တိ ပါစိတ္တိယဿ ။

အနုပသမ္ပန္နာယ စီဝရသင်္ကမနီယံ ဓါရေတိ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ , အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၉၀၆. အနာပတ္တိ သာ ဝါ ဒေတိ, တံ ဝါ အာပုစ္ဆာ နိဝါသေတိ ဝါ ပါရုပတိ ဝါ, အစ္ဆိန္နစီဝရိကာယ, နဋ္ဌစီဝရိကာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၉၀၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါယ ဘိက္ခုနိယာ ဥပဋ္ဌာကကုလံ ထုလ္လနန္ဒံ ဘိက္ခုနိံ ဧတဒဝေါစ – ‘‘ဘိက္ခုနိသံဃဿ, အယျေ, စီဝရံ ဒဿာမာ’’တိ။ ထုလ္လနန္ဒါ ဘိက္ခုနီ – ‘‘တုမှေ ဗဟုကိစ္စာ ဗဟုကရဏီယာ’’တိ အန္တရာယံ အကာသိ။ တေန ခေါ ပန သမယေန တဿ ကုလဿ ဃရံ ဍယှတိ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အမှာကံ ဒေယျဓမ္မံ အန္တရာယံ ကရိဿတိ! ဥဘယေနာမှ ပရိဗာဟိရာ [ပရိဟီနာ (သီ.)], ဘောဂေဟိ စ ပုညေန စာ’’တိ။ အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဂဏဿ စီဝရလာဘံ အန္တရာယံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဂဏဿ စီဝရလာဘံ အန္တရာယံ အကာသီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဂဏဿ စီဝရလာဘံ အန္တရာယံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၀၈. ‘‘ယာ ပန ဘိက္ခုနီ ဂဏဿ စီဝရလာဘံ အန္တရာယံ ကရေယျ, ပါစိတ္တိယ’’န္တိ။

၉၀၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဂဏော နာမ ဘိက္ခုနိသံဃော ဝုစ္စတိ။

စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ။

အန္တရာယံ ကရေယျာတိ ‘‘ကထံ ဣမေ စီဝရံ န [ဣမံ စီဝရံ (က.)] ဒဒေယျု’’န္တိ အန္တရာယံ ကရောတိ, အာပတ္တိ ပါစိတ္တိယဿ။ အညံ ပရိက္ခါရံ အန္တရာယံ ကရောတိ, အာပတ္တိ ဒုက္ကဋဿ။ သမ္ဗဟုလာနံ ဘိက္ခုနီနံ ဝါ ဧကဘိက္ခုနိယာ ဝါ အနုပသမ္ပန္နာယ ဝါ စီဝရံ ဝါ အညံ ဝါ ပရိက္ခါရံ အန္တရာယံ ကရောတိ, အာပတ္တိ ဒုက္ကဋဿ။

၉၁၀. အနာပတ္တိ အာနိသံသံ ဒဿေတွာ နိဝါရေတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၉၁၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိသံဃဿ အကာလစီဝရံ ဥပ္ပန္နံ ဟောတိ။ အထ ခေါ ဘိက္ခုနိသံဃော တံ စီဝရံ ဘာဇေတုကာမော သန္နိပတိ။ တေန ခေါ ပန သမယေန ထုလ္လနန္ဒါယ ဘိက္ခုနိယာ အန္တေဝါသိနိယော ဘိက္ခုနိယော ပက္ကန္တာ ဟောန္တိ။ ထုလ္လနန္ဒါ ဘိက္ခုနီ တာ ဘိက္ခုနိယော ဧတဒဝေါစ – ‘‘အယျေ, ဘိက္ခုနိယော ပက္ကန္တာ, န တာဝ စီဝရံ ဘာဇီယိဿတီ’’တိ။ စီဝရဝိဘင်္ဂံ ပဋိဗာဟိ။ ဘိက္ခုနိယော န တာဝ စီဝရံ ဘာဇီယိဿတီတိ ပက္ကမိံသု [ဝိပက္ကမိံသု (သျာ.)]။ ထုလ္လနန္ဒါ ဘိက္ခုနီ အန္တေဝါသိနီသု ဘိက္ခုနီသု အာဂတာသု တံ စီဝရံ ဘာဇာပေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဓမ္မိကံ စီဝရဝိဘင်္ဂံ ပဋိဗာဟိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဓမ္မိကံ စီဝရဝိဘင်္ဂံ ပဋိဗာဟတီတိ [ပဋိဗာဟီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဓမ္မိကံ စီဝရဝိဘင်္ဂံ ပဋိဗာဟိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၁၂. ‘‘ယာ ပန ဘိက္ခုနီ ဓမ္မိကံ စီဝရဝိဘင်္ဂံ ပဋိဗာဟေယျ, ပါစိတ္တိယ’’န္တိ။

၉၁၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဓမ္မိကောနာမ စီဝရဝိဘင်္ဂေါ သမဂ္ဂေါ ဘိက္ခုနိသံဃော သန္နိပတိတွာ ဘာဇေတိ။

ပဋိဗာဟေယျာတိ ကထံ ဣမံ စီဝရံ န ဘာဇေယျာတိ [စီဝရံ ဘာဇေယျာတိ (က.)] ပဋိဗာဟတိ, အာပတ္တိ ပါစိတ္တိယဿ။

၉၁၄. ဓမ္မိကေ ဓမ္မိကသညာ ပဋိဗာဟတိ, အာပတ္တိ ပါစိတ္တိယဿ။ ဓမ္မိကေ ဝေမတိကာ ပဋိဗာဟတိ, အာပတ္တိ ဒုက္ကဋဿ။ ဓမ္မိကေ အဓမ္မိကသညာ ပဋိဗာဟတိ, အနာပတ္တိ။ အဓမ္မိကေ ဓမ္မိကသညာ, အာပတ္တိ ဒုက္ကဋဿ။ အဓမ္မိကေ ဝေမတိကာ, အာပတ္တိ ဒုက္ကဋဿ။ အဓမ္မိကေ အဓမ္မိကသညာ, အနာပတ္တိ။

၉၁၅. အနာပတ္တိ အာနိသံသံ ဒဿေတွာ ပဋိဗာဟတိ, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၉၁၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ နဋာနမ္ပိ နဋကာနမ္ပိ လင်္ဃကာနမ္ပိ သောကဇ္ဈာယိကာနမ္ပိ [သောကသာယိကာနမ္ပိ (သီ.)] ကုမ္ဘထူဏိကာနမ္ပိ [ကုမ္ဘထုဏိကာနမ္ပိ (က.)] သမဏစီဝရံ ဒေတိ – ‘‘မယှံ ပရိသတိ [ပရိသတိံ (သီ.)] ဝဏ္ဏံ ဘာသထာ’’တိ။ နဋာပိ နဋကာပိ လင်္ဃကာပိ သောကဇ္ဈာယိကာပိ ကုမ္ဘထူဏိကာပိ ထုလ္လနန္ဒါယ ဘိက္ခုနိယာ ပရိသတိ ဝဏ္ဏံ ဘာသန္တိ – ‘‘အယျာ ထုလ္လနန္ဒါ ဗဟုဿုတာ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ; ဒေထ အယျာယ, ကရောထ အယျာယာ’’တိ။ ယာ တာ ဘိက္ခုနိယော အပ္ပိစ္ဆာ, တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အဂါရိကဿ သမဏစီဝရံ ဒဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အဂါရိကဿ သမဏစီဝရံ ဒေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အဂါရိကဿ သမဏစီဝရံ ဒဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၁၇. ‘‘ယာ ပန ဘိက္ခုနီ အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သမဏစီဝရံ ဒဒေယျ, ပါစိတ္တိယ’’န္တိ။

၉၁၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဂါရိကော နာမ ယော ကောစိ အဂါရံ အဇ္ဈာဝသတိ။

ပရိဗ္ဗာဇကော နာမ ဘိက္ခုဉ္စ သာမဏေရဉ္စ ဌပေတွာ ယော ကောစိ ပရိဗ္ဗာဇကသမာပန္နော။

ပရိဗ္ဗာဇိကာ နာမ ဘိက္ခုနိဉ္စ သိက္ခမာနဉ္စ သာမဏေရိဉ္စ ဌပေတွာ ယာ ကာစိ ပရိဗ္ဗာဇိကသမာပန္နာ။

သမဏစီဝရံ နာမ ကပ္ပကတံ ဝုစ္စတိ။ ဒေတိ, အာပတ္တိ ပါစိတ္တိယဿ။

၉၁၉. အနာပတ္တိ မာတာပိတူနံ ဒေတိ, တာဝကာလိကံ ဒေတိ, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၉၂၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါယ ဘိက္ခုနိယာ ဥပဋ္ဌာကကုလံ ထုလ္လနန္ဒံ ဘိက္ခုနိံ ဧတဒဝေါစ – ‘‘သစေ မယံ, အယျေ, သက္ကောမ, ဘိက္ခုနိသံဃဿ စီဝရံ ဒဿာမာ’’တိ။ တေန ခေါ ပန သမယေန ဝဿံဝုဋ္ဌာ ဘိက္ခုနိယော စီဝရံ ဘာဇေတုကာမာ သန္နိပတိံသု။ ထုလ္လနန္ဒါ ဘိက္ခုနီ တာ ဘိက္ခုနိယော ဧတဒဝေါစ – ‘‘အာဂမေထ, အယျေ, အတ္ထိ ဘိက္ခုနိသံဃဿ စီဝရပစ္စာသာ’’တိ။ ဘိက္ခုနိယော ထုလ္လနန္ဒံ ဘိက္ခုနိံ ဧတဒဝေါစုံ – ‘‘ဂစ္ဆာယျေ, တံ စီဝရံ ဇာနာဟီ’’တိ။ ထုလ္လနန္ဒါ ဘိက္ခုနီ ယေန တံ ကုလံ တေနုပသင်္ကမိ; ဥပသင်္ကမိတွာ တေ မနုဿေ ဧတဒဝေါစ – ‘‘ဒေထာဝုသော, ဘိက္ခုနိသံဃဿ စီဝရ’’န္တိ။ ‘‘န မယံ, အယျေ, သက္ကောမ ဘိက္ခုနိသံဃဿ စီဝရံ ဒါတု’’န္တိ ။ ထုလ္လနန္ဒါ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေတီတိ [အတိက္ကာမေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေဿတိ ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၂၁. ‘‘ယာ ပန ဘိက္ခုနီ ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေယျ, ပါစိတ္တိယ’’န္တိ။

၉၂၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဒုဗ္ဗလစီဝရပစ္စာသာ နာမ ‘‘သစေ မယံ သက္ကောမ, ဒဿာမ ကရိဿာမာ’’တိ ဝါစာ ဘိန္နာ ဟောတိ။

စီဝရကာလသမယော နာမ အနတ္ထတေ ကထိနေ ဝဿာနဿ ပစ္ဆိမော မာသော, အတ္ထတေ ကထိနေ ပဉ္စ မာသာ။

စီဝရကာလသမယံ အတိက္ကာမေယျာတိ အနတ္ထတေ ကထိနေ ဝဿာနဿ ပစ္ဆိမံ ဒိဝသံ အတိက္ကာမေတိ, အာပတ္တိ ပါစိတ္တိယဿ။ အတ္ထတေ ကထိနေ ကထိနုဒ္ဓါရဒိဝသံ အတိက္ကာမေတိ, အာပတ္တိ ပါစိတ္တိယဿ။

၉၂၃. ဒုဗ္ဗလစီဝရေ ဒုဗ္ဗလစီဝရသညာ စီဝရကာလသမယံ အတိက္ကာမေတိ, အာပတ္တိ ပါစိတ္တိယဿ။ ဒုဗ္ဗလစီဝရေ ဝေမတိကာ စီဝရကာလသမယံ အတိက္ကာမေတိ, အာပတ္တိ ဒုက္ကဋဿ။ ဒုဗ္ဗလစီဝရေ အဒုဗ္ဗလစီဝရသညာ စီဝရကာလသမယံ အတိက္ကာမေတိ, အနာပတ္တိ။

အဒုဗ္ဗလစီဝရေ ဒုဗ္ဗလစီဝရသညာ, အာပတ္တိ ဒုက္ကဋဿ။ အဒုဗ္ဗလစီဝရေ ဝေမတိကာ, အာပတ္တိ ဒုက္ကဋဿ။ အဒုဗ္ဗလစီဝရေ အဒုဗ္ဗလစီဝရသညာ, အနာပတ္တိ။

၉၂၄. အနာပတ္တိ အာနိသံသံ ဒဿေတွာ နိဝါရေတိ, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၉၂၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရေန ဥပါသကေန သံဃံ ဥဒ္ဒိဿ ဝိဟာရော ကာရာပိတော ဟောတိ။ သော တဿ ဝိဟာရဿ မဟေ ဥဘတောသံဃဿ အကာလစီဝရံ ဒါတုကာမော ဟောတိ။ တေန ခေါ ပန သမယေန ဥဘတောသံဃဿ ကထိနံ အတ္ထတံ ဟောတိ။ အထ ခေါ သော ဥပါသကော သံဃံ ဥပသင်္ကမိတွာ ကထိနုဒ္ဓါရံ ယာစိ။ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ကထိနံ ဥဒ္ဓရိတုံ။ ဧဝဉ္စ ပန ဘိက္ခဝေ ကထိနံ ဥဒ္ဓရိတဗ္ဗံ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၉၂၆. ‘‘သုဏာတု မေ, ဘန္တေ, သံဃော။ ယဒိ သံဃဿ ပတ္တကလ္လံ, သံဃော ကထိနံ ဥဒ္ဓရေယျ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ သံဃော ကထိနံ ဥဒ္ဓရတိ။ ယဿာယသ္မတော ခမတိ ကထိနဿ ဥဒ္ဓါရော, သော တုဏှဿ; ယဿ နက္ခမတိ, သော ဘာသေယျ။

‘‘ဥဗ္ဘတံ သံဃေန ကထိနံ, ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၉၂၇. အထ ခေါ သော ဥပါသကော ဘိက္ခုနိသံဃံ ဥပသင်္ကမိတွာ ကထိနုဒ္ဓါရံ ယာစိ။ ထုလ္လနန္ဒါ ဘိက္ခုနီ – ‘‘စီဝရံ အမှာကံ ဘဝိဿတီ’’တိ ကထိနုဒ္ဓါရံ ပဋိဗာဟိ။ အထ ခေါ သော ဥပါသကော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အမှာကံ ကထိနုဒ္ဓါရံ န ဒဿန္တီ’’တိ! အဿောသုံ ခေါ ဘိက္ခုနိယော တဿ ဥပါသကဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဓမ္မိကံ ကထိနုဒ္ဓါရံ ပဋိဗာဟိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဓမ္မိကံ ကထိနုဒ္ဓါရံ ပဋိဗာဟတီတိ [ပဋိဗာဟီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဓမ္မိကံ ကထိနုဒ္ဓါရံ ပဋိဗာဟိဿတိ ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၂၈. ‘‘ယာ ပန ဘိက္ခုနီ ဓမ္မိကံ ကထိနုဒ္ဓါရံ ပဋိဗာဟေယျ, ပါစိတ္တိယ’’န္တိ။

၉၂၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဓမ္မိကော နာမ ကထိနုဒ္ဓါရော သမဂ္ဂေါ ဘိက္ခုနိသံဃော သန္နိပတိတွာ ဥဒ္ဓရတိ။

ပဋိဗာဟေယျာတိ ‘‘ကထံ ဣဒံ ကထိနံ န ဥဒ္ဓရေယျာ’’တိ [ကထိနံ ဥဒ္ဓရေယျာတိ (က.)] ပဋိဗာဟတိ, အာပတ္တိ ပါစိတ္တိယဿ။

၉၃၀. ဓမ္မိကေ ဓမ္မိကသညာ ပဋိဗာဟတိ, အာပတ္တိ ပါစိတ္တိယဿ။ ဓမ္မိကေ ဝေမတိကာ ပဋိဗာဟတိ, အာပတ္တိ ဒုက္ကဋဿ။ ဓမ္မိကေ အဓမ္မိကသညာ ပဋိဗာဟတိ, အနာပတ္တိ။ အဓမ္မိကေ ဓမ္မိကသညာ, အာပတ္တိ ဒုက္ကဋဿ။ အဓမ္မိကေ ဝေမတိကာ, အာပတ္တိ ဒုက္ကဋဿ။ အဓမ္မိကေ အဓမ္မိကသညာ, အနာပတ္တိ။

၉၃၁. အနာပတ္တိ အနိသံသံ ဒဿေတွာ ပဋိဗာဟတိ, ဥမ္မတ္တိကာယ, အာဒိကမ္မိကာယာတိ ။

ဒသမသိက္ခါပဒံ နိဋ္ဌိတံ။

နဂ္ဂဝဂ္ဂေါ တတိယော။

၄. တုဝဋ္ဋဝဂ္ဂေါ

၁. ပဌမသိက္ခါပဒံ

၉၃၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ ။ တေန ခေါ ပန သမယေန ဘိက္ခုနိယော ဒွေ ဧကမဉ္စေ တုဝဋ္ဋေန္တိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဧကမဉ္စေ တုဝဋ္ဋေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဧကမဉ္စေ တုဝဋ္ဋေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဒွေ ဧကမဉ္စေ တုဝဋ္ဋေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဒွေ ဧကမဉ္စေ တုဝဋ္ဋေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၃၃. ‘‘ယာ ပန ဘိက္ခုနိယော ဒွေ ဧကမဉ္စေ တုဝဋ္ဋေယျုံ, ပါစိတ္တိယ’’န္တိ။

၉၃၄. ယာ ပနာတိ ယာ ယာဒိသာ။ပေ.။ ဘိက္ခုနိယောတိ ဥပသမ္ပန္နာယော ဝုစ္စန္တိ။

ဒွေ ဧကမဉ္စေ တုဝဋ္ဋေယျုန္တိ ဧကာယ နိပန္နာယ အပရာ နိပဇ္ဇတိ, အာပတ္တိ ပါစိတ္တိယဿ။ ဥဘော ဝါ နိပဇ္ဇန္တိ, အာပတ္တိ ပါစိတ္တိယဿ။ ဥဋ္ဌဟိတွာ ပုနပ္ပုနံ နိပဇ္ဇန္တိ, အာပတ္တိ ပါစိတ္တိယဿ။

၉၃၅. အနာပတ္တိ ဧကာယ နိပန္နာယ အပရာ နိသီဒတိ, ဥဘော ဝါ နိသီဒန္တိ, ဥမ္မတ္တိကာနံ, အာဒိကမ္မိကာနန္တိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၉၃၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေန္တိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေန္တီတိ? ‘‘သစ္စံ , ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၃၇. ‘‘ယာ ပန ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေယျုံ, ပါစိတ္တိယ’’န္တိ။

၉၃၈. ယာ ပနာတိ ယာ ယာဒိသာ။ပေ.။ ဘိက္ခုနိယောတိ ဥပသမ္ပန္နာယော ဝုစ္စန္တိ။

ဒွေ ဧကတ္ထရဏပါဝုရဏာ တုဝဋ္ဋေယျုန္တိ တညေဝ အတ္ထရိတွာ တညေဝ ပါရုပန္တိ, အာပတ္တိ ပါစိတ္တိယဿ။

၉၃၉. ဧကတ္ထရဏပါဝုရဏေ ဧကတ္ထရဏပါဝုရဏသညာ တုဝဋ္ဋေန္တိ, အာပတ္တိ ပါစိတ္တိယဿ။ ဧကတ္ထရဏပါဝုရဏေ ဝေမတိကာ တုဝဋ္ဋေန္တိ, အာပတ္တိ ပါစိတ္တိယဿ။ ဧကတ္ထရဏပါဝုရဏေ နာနတ္ထရဏပါဝုရဏသညာ တုဝဋ္ဋေန္တိ, အာပတ္တိ ပါစိတ္တိယဿ။

ဧကတ္ထရဏေ နာနာပါဝုရဏေ [နာနာပါဝုရဏသညာ (က.)], အာပတ္တိ ဒုက္ကဋဿ။ နာနတ္ထရဏေ ဧကပါဝုရဏေ [ဧကပါဝုရဏသညာ (က.)], အာပတ္တိ ဒုက္ကဋဿ။ နာနတ္ထရဏပါဝုရဏေ ဧကတ္ထရဏပါဝုရဏသညာ, အာပတ္တိ ဒုက္ကဋဿ။ နာနတ္ထရဏပါဝုရဏေ ဝေမတိကာ, အာပတ္တိ ဒုက္ကဋဿ။ နာနတ္ထရဏပါဝုရဏေ နာနတ္ထရဏပါဝုရဏသညာ, အနာပတ္တိ။

၉၄၀. အနာပတ္တိ ဝဝတ္ထာနံ ဒဿေတွာ နိပဇ္ဇန္တိ, ဥမ္မတ္တိကာနံ, အာဒိကမ္မိကာနန္တိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၉၄၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ။ ဘဒ္ဒါပိ ကာပိလာနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ။ မနုဿာ – ‘‘အယျာ ဘဒ္ဒါ ကာပိလာနီ ဗဟုဿုတာ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ’’တိ ဘဒ္ဒံ ကာပိလာနိံ ပဌမံ ပယိရုပါသိတွာ, ပစ္ဆာ ထုလ္လနန္ဒံ ဘိက္ခုနိံ ပယိရုပါသန္တိ။ ထုလ္လနန္ဒါ ဘိက္ခုနီ ဣဿာပကတာ – ‘‘ဣမာ ကိရ အပ္ပိစ္ဆာ သန္တုဋ္ဌာ ပဝိဝိတ္တာ အသံသဋ္ဌာ ယာ ဣမာ သညတ္တိဗဟုလာ ဝိညတ္တိဗဟုလာ ဝိဟရန္တီ’’တိ ဘဒ္ဒါယ ကာပိလာနိယာ ပုရတော စင်္ကမတိပိ တိဋ္ဌတိပိ နိသီဒတိပိ သေယျမ္ပိ ကပ္ပေတိ ဥဒ္ဒိသတိပိ ဥဒ္ဒိသာပေတိပိ သဇ္ဈာယမ္ပိ ကရောတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အယျာယ ဘဒ္ဒါယ ကာပိလာနိယာ သဉ္စိစ္စ အဖာသုံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဘဒ္ဒါယ ကာပိလာနိယာ သဉ္စိစ္စ အဖာသုံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဘဒ္ဒါယ ကာပိလာနိယာ သဉ္စိစ္စ အဖာသုံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၄၂. ‘‘ယာ ပန ဘိက္ခုနီ ဘိက္ခုနိယာ သဉ္စိစ္စ အဖာသုံ ကရေယျ, ပါစိတ္တိယ’’န္တိ။

၉၄၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာတိ အညာယ ဘိက္ခုနိယာ။

သဉ္စိစ္စာတိ ဇာနန္တီ သဉ္ဇာနန္တီ စေစ္စ အဘိဝိတရိတွာ ဝီတိက္ကမော။

အဖာသုံ ကရေယျာတိ – ‘‘ဣမိနာ ဣမိဿာ အဖာသု ဘဝိဿတီ’’တိ အနာပုစ္ဆာ ပုရတော စင်္ကမတိ ဝါ တိဋ္ဌတိ ဝါ နိသီဒတိ ဝါ သေယျံ ဝါ ကပ္ပေတိ ဥဒ္ဒိသတိ ဝါ ဥဒ္ဒိသာပေတိ ဝါ သဇ္ဈာယံ ဝါ ကရောတိ, အာပတ္တိ ပါစိတ္တိယဿ။

၉၄၄. ဥပသမ္ပန္နာယ ဥပသမ္ပန္နသညာ သဉ္စိစ္စ အဖာသုံ ကရောတိ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ သဉ္စိစ္စ အဖာသုံ ကရောတိ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ သဉ္စိစ္စ အဖာသုံ ကရောတိ, အာပတ္တိ ပါစိတ္တိယဿ။

အနုပသမ္ပန္နာယ သဉ္စိစ္စ အဖာသုံ ကရောတိ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၉၄၅. အနာပတ္တိ န အဖာသုံ ကတ္တုကာမာ အာပုစ္ဆာ ပုရတော စင်္ကမတိ ဝါ တိဋ္ဌတိ ဝါ နိသီဒတိ ဝါ သေယျံ ဝါ ကပ္ပေတိ ဥဒ္ဒိသတိ ဝါ ဥဒ္ဒိသာပေတိ ဝါ သဇ္ဈာယံ ဝါ ကရောတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၉၄၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဒုက္ခိတံ သဟဇီဝိနိံ နေဝ ဥပဋ္ဌေတိ န ဥပဋ္ဌာပနာယ ဥဿုက္ကံ ကရောတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဒုက္ခိတံ သဟဇီဝိနိံ နေဝ ဥပဋ္ဌေဿတိ န ဥပဋ္ဌာပနာယ ဥဿုက္ကံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဒုက္ခိတံ သဟဇီဝိနိံ နေဝ ဥပဋ္ဌေတိ န ဥပဋ္ဌာပနာယ ဥဿုက္ကံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဒုက္ခိတံ သဟဇီဝိနိံ နေဝ ဥပဋ္ဌေဿတိ န ဥပဋ္ဌာပနာယ ဥဿုက္ကံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၄၇. ‘‘ယာ ပန ဘိက္ခုနီ ဒုက္ခိတံ သဟဇီဝိနိံ နေဝ ဥပဋ္ဌေယျ န ဥပဋ္ဌာပနာယ ဥဿုက္ကံ ကရေယျ, ပါစိတ္တိယ’’န္တိ။

၉၄၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဒုက္ခိတာ နာမ ဂိလာနာ ဝုစ္စတိ။

သဟဇီဝိနီ နာမ သဒ္ဓိဝိဟာရိနီ ဝုစ္စတိ။

နေဝ ဥပဋ္ဌေယျာတိ န သယံ ဥပဋ္ဌေယျ။

န ဥပဋ္ဌာပနာယ ဥဿုက္ကံ ကရေယျာတိ န အညံ အာဏာပေယျ ။

‘‘နေဝ ဥပဋ္ဌေဿာမိ, န ဥပဋ္ဌာပနာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။ အန္တေဝါသိနိံ ဝါ အနုပသမ္ပန္နံ ဝါ နေဝ ဥပဋ္ဌေတိ, န ဥပဋ္ဌာပနာယ ဥဿုက္ကံ ကရောတိ, အာပတ္တိ ဒုက္ကဋဿ။

၉၄၉. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၉၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘဒ္ဒါ ကာပိလာနီ သာကေတေ ဝဿံ ဥပဂတာ ဟောတိ။ သာ ကေနစိဒေဝ ကရဏီယေန ဥဗ္ဗာဠှာ ထုလ္လနန္ဒါယ ဘိက္ခုနိယာ သန္တိကေ ဒူတံ ပါဟေသိ – ‘‘သစေ မေ အယျာ ထုလ္လနန္ဒါ ဥပဿယံ ဒဒေယျ အာဂစ္ဆေယျာမဟံ သာဝတ္ထိ’’န္တိ။ ထုလ္လနန္ဒါ ဘိက္ခုနီ ဧဝမာဟ – ‘‘အာဂစ္ဆတု, ဒဿာမီ’’တိ။ အထ ခေါ ဘဒ္ဒါ ကာပိလာနီ သာကေတာ သာဝတ္ထိံ အဂမာသိ။ ထုလ္လနန္ဒါ ဘိက္ခုနီ ဘဒ္ဒါယ ကာပိလာနိယာ ဥပဿယံ အဒါသိ။ တေန ခေါ ပန သမယေန ထုလ္လနန္ဒါ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ။ ဘဒ္ဒါပိ ကာပိလာနီ ဗဟုဿုတာ [ဗဟုဿုတာယေဝ (က.)] ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ။ မနုဿာ – ‘‘အယျာ ဘဒ္ဒါ ကာပိလာနီ ဗဟုဿုတာ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ’’တိ ဘဒ္ဒံ ကာပိလာနိံ ပဌမံ ပယိရုပါသိတွာ ပစ္ဆာ ထုလ္လနန္ဒံ ဘိက္ခုနိံ ပယိရုပါသန္တိ။ ထုလ္လနန္ဒါ ဘိက္ခုနီ ဣဿာပကတာ – ‘‘ဣမာ ကိရ အပ္ပိစ္ဆာ သန္တုဋ္ဌာ ပဝိဝိတ္တာ အသံသဋ္ဌာ ယာ ဣမာ သညတ္တိဗဟုလာ ဝိညတ္တိဗဟုလာ ဝိဟရန္တီ’’တိ ကုပိတာ အနတ္တမနာ ဘဒ္ဒံ ကာပိလာနိံ ဥပဿယာ နိက္ကဍ္ဎိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အယျာယ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတီတိ [နိက္ကဍ္ဎီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၅၁. ‘‘ယာ ပန ဘိက္ခုနီ ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎေယျ ဝါ နိက္ကဍ္ဎာပေယျ ဝါ, ပါစိတ္တိယ’’န္တိ။

၉၅၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာတိ အညာယ ဘိက္ခုနိယာ။ ဥပဿယော နာမ ကဝါဋဗဒ္ဓေါ ဝုစ္စတိ။ ဒတွာတိ သယံ ဒတွာ။ ကုပိတာ အနတ္တမနာတိ အနဘိရဒ္ဓါ အာဟတစိတ္တာ ခိလဇာတာ။

နိက္ကဍ္ဎေယျာတိ ဂဗ္ဘေ ဂဟေတွာ ပမုခံ နိက္ကဍ္ဎတိ, အာပတ္တိ ပါစိတ္တိယဿ။ ပမုခေ ဂဟေတွာ ဗဟိ နိက္ကဍ္ဎတိ, အာပတ္တိ ပါစိတ္တိယဿ။ ဧကေန ပယောဂေန ဗဟုကေပိ ဒွါရေ အတိက္ကာမေတိ, အာပတ္တိ ပါစိတ္တိယဿ။

နိက္ကဍ္ဎာပေယျာတိ အညံ အာဏာပေတိ, အာပတ္တိ ပါစိတ္တိယဿ [ဧတ္ထ ‘‘အာပတ္တိ ဒုက္ကဋဿာ’’တိ သဗ္ဗတ္ထ ဒိဿတိ, ဘိက္ခုဝိဘင်္ဂေ ပန ဣဒိသေသု အာဏတ္တိသဟဂတသိက္ခါပဒေသု ‘‘အညံ အာဏာပေတိ အာပတ္တိ ပါစိတ္တိယဿာ’’တိ အာဂတတ္တာ တမနုဝတ္တိတွာ ဝိသောဓိတမိဒံ]။ သကိံ အာဏတ္တာ ဗဟုကေပိ ဒွါရေ အတိက္ကာမေတိ, အာပတ္တိ ပါစိတ္တိယဿ။

၉၅၃. ဥပသမ္ပန္နာယ ဥပသမ္ပန္နသညာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ပါစိတ္တိယဿ။

တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ဒုက္ကဋဿ။ အကဝါဋဗဒ္ဓါ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ဒုက္ကဋဿ။ တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ဒုက္ကဋဿ။ အနုပသမ္ပန္နံ ကဝါဋဗဒ္ဓါ ဝါ အကဝါဋဗဒ္ဓါ ဝါ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ဒုက္ကဋဿ။ တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၉၅၄. အနာပတ္တိ အလဇ္ဇိနိံ နိက္ကဍ္ဎတိ ဝါ နိက္ကဍ္ဎာပေတိ ဝါ, တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, ဥမ္မတ္တိကံ နိက္ကဍ္ဎတိ ဝါ နိက္ကဍ္ဎာပေတိ ဝါ, တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, ဘဏ္ဍနကာရိကံ ကလဟကာရိကံ ဝိဝါဒကာရိကံ ဘဿကာရိကံ သံဃေ အဓိကရဏကာရိကံ နိက္ကဍ္ဎတိ ဝါ နိက္ကဍ္ဎာပေတိ ဝါ, တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, အန္တေဝါသိနိံ ဝါ သဒ္ဓိဝိဟာရိနိံ ဝါ န သမ္မာ ဝတ္တန္တိံ နိက္ကဍ္ဎတိ ဝါ နိက္ကဍ္ဎာပေတိ ဝါ, တဿာ ပရိက္ခါရံ နိက္ကဍ္ဎတိ ဝါ နိက္ကဍ္ဎာပေတိ ဝါ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၉၅၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန စဏ္ဍကာဠီ ဘိက္ခုနီ သံသဋ္ဌာ ဝိဟရတိ ဂဟပတိနာပိ ဂဟပတိပုတ္တေနပိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ စဏ္ဍကာဠီ သံသဋ္ဌာ ဝိဟရိဿတိ ဂဟပတိနာပိ ဂဟပတိပုတ္တေနဣ’’တိ။ပေ.။ သစ္စံ ကိရ, ဘိက္ခဝေ, စဏ္ဍကာဠီ ဘိက္ခုနီ သံသဋ္ဌာ ဝိဟရတိ ဂဟပတိနာပိ ဂဟပတိပုတ္တေနဣတိ ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ , စဏ္ဍကာဠီ ဘိက္ခုနီ သံသဋ္ဌာ ဝိဟရိဿတိ ဂဟပတိနာပိ ဂဟပတိပုတ္တေနပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၅၆. ‘‘ယာ ပန ဘိက္ခုနီ သံသဋ္ဌာ ဝိဟရေယျ ဂဟပတိနာ ဝါ ဂဟပတိပုတ္တေန ဝါ သာ ဘိက္ခုနီ ဘိက္ခုနီဟိ ဧဝမဿ ဝစနီယာ – ‘မာယျေ, သံသဋ္ဌာ ဝိဟရိ ဂဟပတိနာပိ ဂဟပတိပုတ္တေနပိ။ ဝိဝိစ္စာယျေ; ဝိဝေကညေဝ ဘဂိနိယာ သံဃော ဝဏ္ဏေတီ’တိ။ ဧဝဉ္စ [ဧဝဉ္စ ပန (က.)] သာ ဘိက္ခုနီ ဘိက္ခုနီဟိ ဝုစ္စမာနာ တထေဝ ပဂ္ဂဏှေယျ, သာ ဘိက္ခုနီ ဘိက္ခုနီဟိ ယာဝတတိယံ သမနုဘာသိတဗ္ဗာ တဿ ပဋိနိဿဂ္ဂါယ။ ယာဝတတိယဉ္စေ သမနုဘာသီယမာနာ တံ ပဋိနိဿဇ္ဇေယျ, ဣစ္စေတံ ကုသလံ; နော စေ ပဋိနိဿဇ္ဇေယျ, ပါစိတ္တိယ’’န္တိ။

၉၅၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သံသဋ္ဌာ နာမ အနနုလောမိကေန ကာယိကဝါစသိကေန သံသဋ္ဌာ။

ဂဟပတိ နာမ ယော ကောစိ အဂါရံ အဇ္ဈာဝသတိ။

ဂဟပတိပုတ္တော နာမ ယေ ကေစိ [ယော ကောစိ (က.)] ပုတ္တဘာတရော။

သာ ဘိက္ခုနီတိ ယာ သာ သံသဋ္ဌာ ဘိက္ခုနီ။

ဘိက္ခုနီဟီတိ အညာဟိ ဘိက္ခုနီဟိ။ ယာ ပဿန္တိ ယာ သုဏန္တိ တာဟိ ဝတ္တဗ္ဗာ – ‘‘မာယျေ, သံသဋ္ဌာ ဝိဟရိ ဂဟပတိနာပိ ဂဟပတိပုတ္တေနပိ။ ဝိဝိစ္စာယျေ; ဝိဝေကညေဝ ဘဂိနိယာ သံဃော ဝဏ္ဏေတီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သုတွာ န ဝဒန္တိ, အာပတ္တိ ဒုက္ကဋဿ။ သာ ဘိက္ခုနီ သံဃမဇ္ဈမ္ပိ အာကဍ္ဎိတွာ ဝတ္တဗ္ဗာ – ‘‘မာယျေ , သံသဋ္ဌာ ဝိဟရိ ဂဟပတိနာပိ ဂဟပတိပုတ္တေနပိ။ ဝိဝိစ္စာယျေ; ဝိဝေကညေဝဘဂိနိယာ သံဃော ဝဏ္ဏေတီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သာ ဘိက္ခုနီ သမနုဘာသိတဗ္ဗာ။ ဧဝဉ္စ ပန, ဘိက္ခဝေ, သမနုဘာသိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၉၅၈. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဘိက္ခုနီ သံသဋ္ဌာ ဝိဟရတိ ဂဟပတိနာပိ ဂဟပတိပုတ္တေနပိ။ သာ တံ ဝတ္ထုံ န ပဋိနိဿဇ္ဇတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမံ ဘိက္ခုနိံ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဘိက္ခုနီ သံသဋ္ဌာ ဝိဟရတိ ဂဟပတိနာပိ ဂဟပတိပုတ္တေနပိ။ သာ တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုနိံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာ အယျာယ ခမတိ ဣတ္ထန္နာမာယ ဘိက္ခုနိယာ သမနုဘာသနာ တဿ ဝတ္ထုဿ ပဋိနိဿဂ္ဂါယ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ။ပေ.။။

‘‘သမနုဘဋ္ဌာ သံဃေန ဣတ္ထန္နာမာ ဘိက္ခုနီ တဿ ဝတ္ထုဿ ပဋိနိဿဂ္ဂါယ; ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ အာပတ္တိ ပါစိတ္တိယဿ။

၉၅၉. ဓမ္မကမ္မေ ဓမ္မကမ္မသညာ န ပဋိနိဿဇ္ဇတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ န ပဋိနိဿဇ္ဇတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ န ပဋိနိဿဇ္ဇတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၉၆၀. အနာပတ္တိ အသမနုဘာသန္တိယာ, ပဋိနိဿဇ္ဇန္တိယာ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၉၆၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တိ။ ဓုတ္တာ ဒူသေန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၆၂. ‘‘ယာ ပန ဘိက္ခုနီ အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရေယျ, ပါစိတ္တိယ’’န္တိ။

၉၆၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အန္တောရဋ္ဌေတိ ယဿ ဝိဇိတေ ဝိဟရတိ, တဿ ရဋ္ဌေ။

သာသင်္ကံ နာမ တသ္မိံ မဂ္ဂေ စောရာနံ နိဝိဋ္ဌောကာသော ဒိဿတိ, ဘုတ္တောကာသော ဒိဿတိ, ဌိတောကာသော ဒိဿတိ, နိသိန္နောကာသော ဒိဿတိ, နိပန္နောကာသော ဒိဿတိ။

သပ္ပဋိဘယံ နာမ တသ္မိံ မဂ္ဂေ စောရေဟိ မနုဿာ ဟတာ ဒိဿန္တိ, ဝိလုတ္တာ ဒိဿန္တိ, အာကောဋိတာ ဒိဿန္တိ။

အသတ္ထိကာ နာမ ဝိနာ သတ္ထေန။

စာရိကံ စရေယျာတိ ကုက္ကုဋသမ္ပါတေ ဂါမေ ဂါမန္တရေ ဂါမန္တရေ အာပတ္တိ ပါစိတ္တိယဿ။ အဂါမကေ အရညေ အဒ္ဓယောဇနေ အဒ္ဓယောဇနေ အာပတ္တိ ပါစိတ္တိယဿ။

၉၆၄. အနာပတ္တိ သတ္ထေန သဟ ဂစ္ဆတိ, ခေမေ အပ္ပဋိဘယေ ဂစ္ဆတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၉၆၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တိ။ ဓုတ္တာ ဒူသေန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၆၆. ‘‘ယာ ပန ဘိက္ခုနီ တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရေယျ, ပါစတ္တိယ’’န္တိ။

၉၆၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

တိရောရဋ္ဌေတိ ယဿ ဝိဇိတေ ဝိဟရတိ, တံ ဌပေတွာ အညဿ ရဋ္ဌေ။

သာသင်္ကံ နာမ တသ္မိံ မဂ္ဂေ စောရာနံ နိဝိဋ္ဌောကာသော ဒိဿတိ, ဘုတ္တောကာသော ဒိဿတိ, ဌိတောကာသော ဒိဿတိ, နိသိန္နောကာသော ဒိဿတိ, နိပန္နောကာသော ဒိဿတိ။

သပ္ပဋိဘယံ နာမ တသ္မိံ မဂ္ဂေ စောရေဟိ မနုဿာ ဟတာ ဒိဿန္တိ, ဝိလုတ္တာ ဒိဿန္တိ, အာကောဋိတာ ဒိဿန္တိ။

အသတ္ထိကာ နာမ ဝိနာ သတ္ထေန။

စာရိကံ စရေယျာတိ ကုက္ကုဋသမ္ပါတေ ဂါမေ ဂါမန္တရေ ဂါမန္တရေ, အာပတ္တိ ပါစိတ္တိယဿ။ အဂါမကေ အရညေ အဒ္ဓယောဇနေ အဒ္ဓယောဇနေ အာပတ္တိ ပါစိတ္တိယဿ။

၉၆၈. အနာပတ္တိ သတ္ထေန သဟ ဂစ္ဆတိ, ခေမေ အပ္ပဋိဘယေ ဂစ္ဆတိ , အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၉၆၉. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ဘိက္ခုနိယော အန္တောဝဿံ စာရိကံ စရန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အန္တောဝဿံ စာရိကံ စရိဿန္တိ ဟရိတာနိ တိဏာနိ စ သမ္မဒ္ဒန္တာ, ဧကိန္ဒြိယံ ဇီဝံ ဝိဟေဌေန္တာ, ဗဟူ ခုဒ္ဒကေ ပါဏေ သံဃာတံ အာပါဒေန္တာ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အန္တောဝဿံ စာရိကံ စရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အန္တောဝဿံ စာရိကံ စရန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အန္တောဝဿံ စာရိကံ စရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၇၀. ‘‘ယာ ပန ဘိက္ခုနီ အန္တောဝဿံ စာရိကံ စရေယျ, ပါစိတ္တိယ’’န္တိ။

၉၇၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အန္တောဝဿန္တိ ပုရိမံ ဝါ တေမာသံ ပစ္ဆိမံ ဝါ တေမာသံ အဝသိတွာ။

စာရိကံ စရေယျာတိ ကုက္ကုဋသမ္ပါတေ ဂါမေ ဂါမန္တရေ ဂါမန္တရေ အာပတ္တိ ပါစိတ္တိယဿ။ အဂါမကေ အရညေ အဒ္ဓယောဇနေ အဒ္ဓယောဇနေ အာပတ္တိ ပါစိတ္တိယဿ။

၉၇၂. အနာပတ္တိ သတ္တာဟကရဏီယေန ဂစ္ဆတိ, ကေနစိ ဥဗ္ဗာဠှာ ဂစ္ဆတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၉၇၃. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ဘိက္ခုနိယော တတ္ထေဝ ရာဇဂဟေ ဝဿံ ဝသန္တိ, တတ္ထ ဟေမန္တံ, တတ္ထ ဂိမှံ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘အာဟုန္ဒရိကာ ဘိက္ခုနီနံ ဒိသာ အန္ဓကာရာ, န ဣမာသံ ဒိသာ ပက္ခါယန္တီ’’တိ။ အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခုနီနံ သိက္ခါပဒံ ပညပေဿာမိ ဒသ အတ္ထဝသေ ပဋိစ္စ – သံဃသုဋ္ဌုတာယ။ပေ.။ သဒ္ဓမ္မဋ္ဌိတိယာ ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၇၄. ‘‘ယာ ပန ဘိက္ခုနီ ဝဿံဝုဋ္ဌာ စာရိကံ န ပက္ကမေယျ အန္တမသော ဆပ္ပဉ္စယောဇနာနိပိ, ပါစိတ္တိယ’’န္တိ။

၉၇၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဝဿံဝုဋ္ဌာ နာမ ပုရိမံ ဝါ တေမာသံ ပစ္ဆိမံ ဝါ တေမာသံ ဝုဋ္ဌာ။

‘‘စာရိကံ န ပက္ကမိဿာမိ အန္တမသော ဆပ္ပဉ္စယောဇနာနိဣ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၉၇၆. အနာပတ္တိ သတိ အန္တရာယေ, ပရိယေသိတွာ ဒုတိယိကံ ဘိက္ခုနိံ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

တုဝဋ္ဋဝဂ္ဂေါ စတုတ္ထော။

၅. စိတ္တာဂါရဝဂ္ဂေါ

၁. ပဌမသိက္ခါပဒံ

၉၇၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ရညော ပသေနဒိဿ ကောသလဿ ဥယျာနေ စိတ္တာဂါရေ ပဋိဘာနစိတ္တံ ကတံ ဟောတိ။ ဗဟူ မနုဿာ စိတ္တာဂါရံ ဒဿနာယ ဂစ္ဆန္တိ။ ဆဗ္ဗဂ္ဂိယာပိ ဘိက္ခုနိယော စိတ္တာဂါရံ ဒဿနာယ အဂမံသု။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော စိတ္တာဂါရံ ဒဿနာယ ဂစ္ဆိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော စိတ္တာဂါရံ ဒဿနာယ ဂစ္ဆိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော စိတ္တာဂါရံ ဒဿနာယ ဂစ္ဆန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော စိတ္တာဂါရံ ဒဿနာယ ဂစ္ဆိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၇၈. ‘‘ယာ ပန ဘိက္ခုနီ ရာဇာဂါရံ ဝါ စိတ္တာဂါရံ ဝါ အာရာမံ ဝါ ဥယျာနံ ဝါ ပေါက္ခရဏိံ ဝါ ဒဿနာယ ဂစ္ဆေယျ, ပါစိတ္တိယ’’န္တိ။

၉၇၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ရာဇာဂါရံ နာမ ယတ္ထ ကတ္ထစိ ရညော ကီဠိတုံ ရမိတုံ ကတံ ဟောတိ။

စိတ္တာဂါရံ နာမ ယတ္ထ ကတ္ထစိ မနုဿာနံ ကီဠိတုံ ရမိတုံ ကတံ ဟောတိ။

အာရာမော နာမ ယတ္ထ ကတ္ထစိ မနုဿာနံ ကီဠိတုံ ရမိတုံ ကတော ဟောတိ။

ဥယျာနံ နာမ ယတ္ထ ကတ္ထစိ မနုဿာနံ ကီဠိတုံ ရမိတုံ ကတံ ဟောတိ။

ပေါက္ခရဏီ နာမ ယတ္ထ ကတ္ထစိ မနုဿာနံ ကီဠိတုံ ရမိတုံ ကတာ ဟောတိ။

၉၈၀. ဒဿနာယ ဂစ္ဆတိ, အာပတ္တိ ဒုက္ကဋဿ။ ယတ္ထ ဌိတာ ပဿတိ, အာပတ္တိ ပါစိတ္တိယဿ။ ဒဿနူပစာရံ ဝိဇဟိတွာ ပုနပ္ပုနံ ပဿတိ, အာပတ္တိ ပါစိတ္တိယဿ။ ဧကမေကံ ဒဿနာယ ဂစ္ဆတိ, အာပတ္တိ ဒုက္ကဋဿ။ ယတ္ထ ဌိတာ ပဿတိ, အာပတ္တိ ပစိတ္တိယဿ။ ဒဿနူပစာရံ ဝိဇဟိတွာ ပုနပ္ပုနံ ပဿတိ, အာပတ္တိ ပါစိတ္တိယဿ။

၉၈၁. အနာပတ္တိ အာရာမေ ဌိတာ ပဿတိ, ဂစ္ဆန္တီ ဝါ အာဂစ္ဆန္တီ ဝါ ပဿတိ, သတိ ကရဏီယေ ဂန္တွာ ပဿတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၉၈၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇန္တိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၈၃. ‘‘ယာ ပန ဘိက္ခုနီ အာသန္ဒိံ ဝါ ပလ္လင်္ကံ ဝါ ပရိဘုဉ္ဇေယျ, ပါစိတ္တိယ’’န္တိ။

၉၈၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အာသန္ဒီ နာမ အတိက္ကန္တပ္ပမာဏာ ဝုစ္စတိ။

ပလ္လင်္ကော နာမ အာဟရိမေဟိ [‘‘အသံဟာရိမေဟိ’’ ဣတိ ကင်္ခါဝိတရဏိယာ သမေတိ] ဝါဠေဟိ ကတော ဟောတိ။

ပရိဘုဉ္ဇေယျာတိ တသ္မိံ အဘိနိသီဒတိ ဝါ အဘိနိပဇ္ဇတိ ဝါ, အာပတ္တိ ပါစိတ္တိယဿ။

၉၈၅. အနာပတ္တိ အာသန္ဒိယာ ပါဒေ ဆိန္ဒိတွာ ပရိဘုဉ္ဇတိ, ပလ္လင်္ကဿ ဝါဠေ ဘိန္ဒိတွာ ပရိဘုဉ္ဇတိ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၉၈၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သုတ္တံ ကန္တန္တိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော သုတ္တံ ကန္တိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော သုတ္တံ ကန္တိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော သုတ္တံ ကန္တန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော သုတ္တံ ကန္တိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၈၇. ‘‘ယာ ပန ဘိက္ခုနီ သုတ္တံ ကန္တေယျ, ပါစိတ္တိယ’’န္တိ။

၉၈၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သုတ္တံ နာမ ဆ သုတ္တာနိ – ခေါမံ, ကပ္ပါသိကံ, ကောသေယျံ, ကမ္ဗလံ, သာဏံ, ဘင်္ဂံ။

ကန္တေယျာတိ သယံ ကန္တတိ, ပယောဂေ ဒုက္ကဋံ။ ဥဇ္ဇဝုဇ္ဇဝေ အာပတ္တိ ပါစိတ္တိယဿ။

၉၈၉. အနာပတ္တိ ကန္တိတသုတ္တံ ကန္တတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၉၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဂိဟိဝေယျာဝစ္စံ ကရောန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂိဟိဝေယျာဝစ္စံ ကရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဂိဟိဝေယျာဝစ္စံ ကရောန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဂိဟိဝေယျာဝစ္စံ ကရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၉၁. ‘‘ယာ ပန ဘိက္ခုနီ ဂိဟိဝေယျာဝစ္စံ ကရေယျ, ပါစိတ္တိယ’’န္တိ။

၉၉၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဂိဟိဝေယျာဝစ္စံ နာမ အဂါရိကဿ ယာဂုံ ဝါ ဘတ္တံ ဝါ ခါဒနီယံ ဝါ ပစတိ, သာဋကံ ဝါ ဝေဌနံ ဝါ ဓေါဝတိ, အာပတ္တိ ပါစိတ္တိယဿ။

၉၉၃. အနာပတ္တိ ယာဂုပါနေ, သံဃဘတ္တေ, စေတိယပူဇာယ, အတ္တနော ဝေယျာဝစ္စကရဿ ယာဂုံ ဝါ ဘတ္တံ ဝါ ခါဒနီယံ ဝါ ပစတိ, သာဋကံ ဝါ ဝေဌနံ ဝါ ဓေါဝတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၉၉၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ ထုလ္လနန္ဒံ ဘိက္ခုနိံ ဥပသင်္ကမိတွာ ဧတဒဝေါစ – ‘‘ဧဟာယျေ, ဣမံ အဓိကရဏံ ဝူပသမေဟီ’’တိ။ ထုလ္လနန္ဒါ ဘိက္ခုနီ ‘သာဓူ’တိ ပဋိဿုဏိတွာ နေဝ ဝူပသမေတိ န ဝူပသမာယ ဥဿုက္ကံ ကရောတိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဘိက္ခုနိယာ – ‘ဧဟာယျေ’, ဣမံ အဓိကရဏံ ဝူပသမေဟီ’တိ ဝုစ္စမာနာ – ‘သာဓူ’တိ ပဋိဿုဏိတွာ, နေဝ ဝူပသမေဿတိ န ဝူပသမာယ ဥဿုက္ကံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ – ‘‘ဧဟာယျေ, ဣမံ အဓိကရဏံ ဝူပသမေဟီ’’တိ ဝုစ္စမာနာ – ‘‘သာဓူ’’တိ ပဋိဿုဏိတွာ, နေဝ ဝူပသမေတိ န ဝူပသမာယ ဥဿုက္ကံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ – ‘‘ဧဟာယျေ, ဣမံ အဓိကရဏံ ဝူပသမေဟီ’’တိ ဝုစ္စမာနာ – ‘‘သာဓူ’’တိ ပဋိဿုဏိတွာ, နေဝ ဝူပသမေဿတိ န ဝူပသမာယ ဥဿုက္ကံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၉၉၅. ‘‘ယာ ပန ဘိက္ခုနီ ဘိက္ခုနိယာ – ‘ဧဟာယျေ, ဣမံ အဓိကရဏံ ဝူပသမေဟီ’တိ ဝုစ္စမာနာ – ‘သာဓူ’တိ ပဋိဿုဏိတွာ သာ ပစ္ဆာ အနန္တရာယိကိနီ နေဝ ဝူပသမေယျ န ဝူပသမာယ ဥဿုက္ကံ ကရေယျ, ပါစိတ္တိယ’’န္တိ။

၉၉၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာတိ အညာယ ဘိက္ခုနိယာ။

အဓိကရဏံ နာမ စတ္တာရိ အဓိကရဏာနိ – ဝိဝါဒါဓိကရဏံ, အနုဝါဒါဓိကရဏံ, အာပတ္တာဓိကရဏံ, ကိစ္စာဓိကရဏံ။

ဧဟာယျေ ဣမံ အဓိကရဏံ ဝူပသမေဟီတိ ဧဟာယျေ ဣမံ အဓိကရဏံ ဝိနိစ္ဆေဟိ။

သာ ပစ္ဆာ အနန္တရာယိကိနီတိ အသတိ အန္တရာယေ။

နေဝ ဝူပသမေယျာတိ န သယံ ဝူပသမေယျ။

န ဝူပသမာယ ဥဿုက္ကံ ကရေယျာတိ န အညံ အာဏာပေယျ။ ‘‘နေဝ ဝူပသမေဿာမိ န ဝူပသမာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ, အာပတ္တိ ပါစိတ္တိယဿ။

၉၉၇. ဥပသမ္ပန္နာယ ဥပသမ္ပန္နသညာ အဓိကရဏံ နေဝ ဝူပသမေတိ န ဝူပသမာယ ဥဿုက္ကံ ကရောတိ, အာပတ္တိ ပါစိတ္တိယဿ။ ဥပသမ္ပန္နာယ ဝေမတိကာ အဓိကရဏံ နေဝ ဝူပသမေတိ, န ဝူပသမာယ ဥဿုက္ကံ ကရောတိ, အာပတ္တိ ပါစိတ္တိယဿ။ ဥပသမ္ပန္နာယ အနုပသမ္ပန္နသညာ အဓိကရဏံ နေဝ ဝူပသမေတိ, န ဝူပသမာယ ဥဿုက္ကံ ကရောတိ, အာပတ္တိ ပါစိတ္တိယဿ။

အနုပသမ္ပန္နာယ အဓိကရဏံ နေဝ ဝူပသမေတိ, န ဝူပသမာယ ဥဿုက္ကံ ကရောတိ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၉၉၈. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၉၉၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ နဋာနမ္ပိ နဋကာနမ္ပိ လင်္ဃကာနမ္ပိ သောကဇ္ဈာယိကာနမ္ပိ ကုမ္ဘထူဏိကာနမ္ပိ သဟတ္ထာ ခါဒနီယံ ဘောဇနီယံ ဒေတိ – ‘‘မယှံ ပရိသတိ ဝဏ္ဏံ ဘာသထာ’’တိ။ နဋာပိ နဋကာပိ လင်္ဃကာပိ သောကဇ္ဈာယိကာပိ ကုမ္ဘထူဏိကာပိ ထုလ္လနန္ဒါယ ဘိက္ခုနိယာ ပရိသတိ ဝဏ္ဏံ ဘာသန္တိ – ‘‘အယျာ ထုလ္လနန္ဒါ ဗဟုဿုတာ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ; ဒေထ အယျာယ, ကရောထ အယျာယာ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ကထဉှိ နာမ အယျာ ထုလ္လနန္ဒါ အဂါရိကဿ သဟတ္ထာ ခါဒနီယံ ဘောဇနီယံ ဒဿတီတိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အဂါရိကဿ သဟတ္ထာ ခါဒနီယံ ဘောဇနီယံ ဒေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အဂါရိကဿ သဟတ္ထာ ခါဒနီယံ ဘောဇနီယံ ဒဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၀၀. ‘‘ယာ ပန ဘိက္ခုနီ အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒဒေယျ, ပါစိတ္တိယ’’န္တိ။

၁၀၀၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဂါရိကော နာမ ယော ကောစိ အဂါရံ အဇ္ဈာဝသတိ။

ပရိဗ္ဗာဇကော နာမ ဘိက္ခုဉ္စ သာမဏေရဉ္စ ဌပေတွာ ယော ကောစိ ပရိဗ္ဗာဇကသမာပန္နော။

ပရိဗ္ဗာဇိကာ နာမ ဘိက္ခုနိဉ္စ သိက္ခမာနဉ္စ သာမဏေရိဉ္စ ဌပေတွာ ယာ ကာစိ ပရိဗ္ဗာဇိကသမာပန္နာ။

ခါဒနီယံ နာမ ပဉ္စ ဘောဇနာနိ – ဥဒကဒန္တပေါနံ ဌပေတွာ အဝသေသံ ခါဒနီယံ နာမ။

ဘောဇနီယံ နာမ ပဉ္စ ဘောဇနာနိ – ဩဒနော, ကုမ္မာသော, သတ္တု, မစ္ဆော, မံသံ။

ဒဒေယျာတိ ကာယေန ဝါ ကာယပဋိဗဒ္ဓေန ဝါ နိဿဂ္ဂိယေန ဝါ ဒေတိ, အာပတ္တိ ပါစိတ္တိယဿ။ ဥဒကဒန္တပေါနံ ဒေတိ, အာပတ္တိ ဒုက္ကဋဿ။

၁၀၀၂. အနာပတ္တိ ဒါပေတိ န ဒေတိ, ဥပနိက္ခိပိတွာ ဒေတိ, ဗာဟိရာလေပံ ဒေတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၁၀၀၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ အာဝသထစီဝရံ အနိဿဇ္ဇိတွာ ပရိဘုဉ္ဇတိ။ အညာ ဥတုနိယော ဘိက္ခုနိယော န လဘန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အာဝသထစီဝရံ အနိဿဇ္ဇိတွာ ပရိဘုဉ္ဇိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အာဝသထစီဝရံ အနိဿဇ္ဇိတွာ ပရိဘုဉ္ဇတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အာဝသထစီဝရံ အနိဿဇ္ဇိတွာ ပရိဘုဉ္ဇိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၀၄. ‘‘ယာ ပန ဘိက္ခုနီ အာဝသထစီဝရံ အနိဿဇ္ဇိတွာ ပရိဘုဉ္ဇေယျ, ပါစိတ္တိယ’’န္တိ။

၁၀၀၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အာဝသထစီဝရံ နာမ ‘‘ဥတုနိယော ဘိက္ခုနိယော ပရိဘုဉ္ဇန္တူ’’တိ ဒိန္နံ ဟောတိ။

အနိဿဇ္ဇိတွာ ပရိဘုဉ္ဇေယျာတိ ဒွေတိဿော ရတ္တိယော ပရိဘုဉ္ဇိတွာ စတုတ္ထဒိဝသေ ဓေါဝိတွာ ဘိက္ခုနိယာ ဝါ သိက္ခမာနာယ ဝါ သာမဏေရိယာ ဝါ အနိဿဇ္ဇိတွာ ပရိဘုဉ္ဇတိ , အာပတ္တိ ပါစိတ္တိယဿ။

၁၀၀၆. အနိဿဇ္ဇိတေ အနိဿဇ္ဇိတသညာ ပရိဘုဉ္ဇတိ, အာပတ္တိ ပါစိတ္တိယဿ။ အနိဿဇ္ဇိတေ ဝေမတိကာ ပရိဘုဉ္ဇတိ, အာပတ္တိ ပါစိတ္တိယဿ။ အနိဿဇ္ဇိတေ နိဿဇ္ဇိတသညာ ပရိဘုဉ္ဇတိ, အာပတ္တိ ပါစိတ္တိယဿ။

နိဿဇ္ဇိတေ အနိဿဇ္ဇိတသညာ, အာပတ္တိ ဒုက္ကဋဿ။ နိဿဇ္ဇိတေ ဝေမတိကာ, အာပတ္တိ ဒုက္ကဋဿ။ နိဿဇ္ဇိတေ နိဿဇ္ဇိတသညာ အနာပတ္တိ။

၁၀၀၇. အနာပတ္တိ နိဿဇ္ဇိတွာ ပရိဘုဉ္ဇတိ, ပုန ပရိယာယေန ပရိဘုဉ္ဇတိ, အညာ ဥတုနိယော ဘိက္ခုနိယော န ဟောန္တိ, အစ္ဆိန္နစီဝရိကာယ, နဋ္ဌစီဝရိကာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၁၀၀၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ အာဝသထံ အနိဿဇ္ဇိတွာ စာရိကံ ပက္ကာမိ။ တေန ခေါ ပန သမယေန ထုလ္လနန္ဒါယ ဘိက္ခုနိယာ အာဝသထော ဍယှတိ။ ဘိက္ခုနိယော ဧဝမာဟံသု – ‘‘ဟန္ဒါယျေ, ဘဏ္ဍကံ နီဟရာမာ’’တိ။ ဧကစ္စာ ဧဝမာဟံသု – ‘‘န မယံ, အယျေ, နီဟရိဿာမ။ ယံ ကိဉ္စိ နဋ္ဌံ သဗ္ဗံ အမှေ အဘိယုဉ္ဇိဿတီ’’တိ။ ထုလ္လနန္ဒါ ဘိက္ခုနီ ပုနဒေဝ တံ အာဝသထံ ပစ္စာဂန္တွာ ဘိက္ခုနိယော ပုစ္ဆိ – ‘‘အပါယျေ, ဘဏ္ဍကံ နီဟရိတ္ထာ’’တိ? ‘‘န မယံ, အယျေ, နီဟရိမှာ’’တိ ။ ထုလ္လနန္ဒါ ဘိက္ခုနီ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အာဝသထေ ဍယှမာနေ ဘဏ္ဍကံ န နီဟရိဿန္တီ’’တိ! ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အာဝသထံ အနိဿဇ္ဇိတွာ စာရိကံ ပက္ကမိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အာဝသထံ အနိဿဇ္ဇိတွာ စာရိကံ ပက္ကမတီတိ [ပက္ကမီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အာဝသထံ အနိဿဇ္ဇိတွာ စာရိကံ ပက္ကမိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၀၉. ‘‘ယာ ပန ဘိက္ခုနီ အာဝသထံ အနိဿဇ္ဇိတွာ စာရိကံ ပက္ကမေယျ, ပါစိတ္တိယ’’န္တိ။

၁၀၁၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အာဝသထော နာမ ကဝါဋဗဒ္ဓေါ ဝုစ္စတိ။

အနိဿဇ္ဇိတွာ စာရိကံ ပက္ကမေယျာတိ ဘိက္ခုနိယာ ဝါ သိက္ခမာနာယ ဝါ သာမဏေရိယာ ဝါ အနိဿဇ္ဇိတွာ ပရိက္ခိတ္တဿ အာဝသထဿ ပရိက္ခေပံ အတိက္ကာမေန္တိယာ အာပတ္တိ ပါစိတ္တိယဿ။ အပရိက္ခိတ္တဿ အာဝသထဿ ဥပစာရံ အတိက္ကာမေန္တိယာ အာပတ္တိ ပါစိတ္တိယဿ။

၁၀၁၁. အနိဿဇ္ဇိတေ အနိဿဇ္ဇိတသညာ ပက္ကမတိ, အာပတ္တိ ပါစိတ္တိယဿ။ အနိဿဇ္ဇိတေ ဝေမတိကာ ပက္ကမတိ, အာပတ္တိ ပါစိတ္တိယဿ။ အနိဿဇ္ဇိတေ နိဿဇ္ဇိတသညာ ပက္ကမတိ, အာပတ္တိ ပါစိတ္တိယဿ။

အကဝါဋဗဒ္ဓံ အနိဿဇ္ဇိတွာ ပက္ကမတိ, အာပတ္တိ ဒုက္ကဋဿ။ နိဿဇ္ဇိတေ အနိဿဇ္ဇိတသညာ, အာပတ္တိ ဒုက္ကဋဿ။ နိဿဇ္ဇိတေ ဝေမတိကာ, အာပတ္တိ ဒုက္ကဋဿ။ နိဿဇ္ဇိတေ နိဿဇ္ဇိတသညာ, အနာပတ္တိ။

၁၀၁၂. အနာပတ္တိ နိဿဇ္ဇိတွာ ပက္ကမတိ, သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၁၀၁၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ပရိယာပုဏန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော တိရစ္ဆာနဝိဇ္ဇံ ပရိယာပုဏိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ပရိယာပုဏိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ပရိယာပုဏန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ပရိယာပုဏိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၁၄. ‘‘ယာ ပန ဘိက္ခုနီ တိရစ္ဆာနဝိဇ္ဇံ ပရိယာပုဏေယျ, ပါစိတ္တိယ’’န္တိ။

၁၀၁၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

တိရစ္ဆာနဝိဇ္ဇာ [တိရစ္ဆာနဝိဇ္ဇံ (က.)] နာမ ယံ ကိဉ္စိ ဗာဟိရကံ အနတ္ထသံဟိတံ။

ပရိယာပုဏေယျာတိ ပဒေန ပရိယာပုဏာတိ, ပဒေ ပဒေ အာပတ္တိ ပါစိတ္တိယဿ။ အက္ခရာယ ပရိယာပုဏာတိ, အက္ခရက္ခရာယ အာပတ္တိ ပါစိတ္တိယဿ။

၁၀၁၆. အနာပတ္တိ လေခံ ပရိယာပုဏာတိ, ဓါရဏံ ပရိယာပုဏာတိ, ဂုတ္တတ္ထာယ ပရိတ္တံ ပရိယာပုဏာတိ, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၁၀၁၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ဝါစေန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော တိရစ္ဆာနဝိဇ္ဇံ ဝါစေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ဝါစေဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ဝါစေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ဝါစေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၁၈. ‘‘ယာ ပန ဘိက္ခုနီ တိရစ္ဆာနဝိဇ္ဇံ ဝါစေယျ, ပါစိတ္တိယ’’န္တိ။

၁၀၁၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

တိရစ္ဆာနဝိဇ္ဇာ [တိရစ္ဆာနဝိဇ္ဇံ (က.)] နာမ ယံ ကိဉ္စိ ဗာဟိရကံ အနတ္ထသံဟိတံ။

ဝါစေယျာတိ ပဒေန ဝါစေတိ, ပဒေ ပဒေ အာပတ္တိ ပါစိတ္တိယဿ။ အက္ခရာယ ဝါစေတိ, အက္ခရက္ခရာယ အာပတ္တိ ပါစိတ္တိယဿ။

၁၀၂၀. အနာပတ္တိ လေခံ ဝါစေတိ, ဓါရဏံ ဝါစေတိ, ဂုတ္တတ္ထာယ ပရိတ္တံ ဝါစေတိ, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

စိတ္တာဂါရဝဂ္ဂေါ ပဉ္စမော။

၆. အာရာမဝဂ္ဂေါ

၁. ပဌမသိက္ခါပဒံ

၁၀၂၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သမ္ဗဟုလာ ဘိက္ခူ ဂါမကာဝါသေ ဧကစီဝရာ စီဝရကမ္မံ ကရောန္တိ။ ဘိက္ခုနိယော အနာပုစ္ဆာ အာရာမံ ပဝိသိတွာ ယေန တေ ဘိက္ခူ တေနုပသင်္ကမိံသု။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အနာပုစ္ဆာ အာရာမံ ပဝိသိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အနာပုစ္ဆာ အာရာမံ ပဝိသန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အနာပုစ္ဆာ အာရာမံ ပဝိသိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

‘‘ယာ ပန ဘိက္ခုနီ အနာပုစ္ဆာ အာရာမံ ပဝိသေယျ, ပါစိတ္တိယ’’န္တိ။

ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။

၁၀၂၂. တေန ခေါ ပန သမယေန တေ ဘိက္ခူ တမှာ အာဝါသာ ပက္ကမိံသု။ ဘိက္ခုနိယော – ‘‘အယျာ ပက္ကန္တာ’’တိ, အာရာမံ နာဂမံသု။ အထ ခေါ တေ ဘိက္ခူ ပုနဒေဝ တံ အာဝါသံ ပစ္စာဂစ္ဆိံသု။ ဘိက္ခုနိယော – ‘‘အယျာ အာဂတာ’’တိ, အာပုစ္ဆာ အာရာမံ ပဝိသိတွာ ယေန တေ ဘိက္ခူ တေနုပသင်္ကမိံသု; ဥပသင်္ကမိတွာ တေ ဘိက္ခူ အဘိဝါဒေတွာ ဧကမန္တံ အဋ္ဌံသု။ ဧကမန္တံ ဌိတာ ခေါ တာ ဘိက္ခုနိယော တေ ဘိက္ခူ ဧတဒဝေါစုံ – ‘‘ကိဿ တုမှေ, ဘဂိနိယော, အာရာမံ နေဝ သမ္မဇ္ဇိတ္ထ န ပါနီယံ ပရိဘောဇနီယံ ဥပဋ္ဌာပိတ္ထာတိ? ဘဂဝတာ, အယျာ, သိက္ခါပဒံ ပညတ္တံ [ပညတ္တံ ဟောတိ (က.)] ဟောတိ – ‘‘န အနာပုစ္ဆာ အာရာမော ပဝိသိတဗ္ဗော’’တိ။ တေန မယံ န အာဂမိမှာ’’တိ။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, သန္တံ ဘိက္ခုံ အာပုစ္ဆာ အာရာမံ ပဝိသိတုံ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

‘‘ယာ ပန ဘိက္ခုနီ သန္တံ ဘိက္ခုံ အနာပုစ္ဆာ အာရာမံ ပဝိသေယျ, ပါစိတ္တိယ’’န္တိ။

ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။

၁၀၂၃. တေန ခေါ ပန သမယေန တေ ဘိက္ခူ တမှာ အာဝါသာ ပက္ကမိတွာ ပုနဒေဝ တံ အာဝါသံ ပစ္စာဂစ္ဆိံသု။ ဘိက္ခုနိယော – ‘‘အယျာ ပက္ကန္တာ’’တိ အနာပုစ္ဆာ အာရာမံ ပဝိသိံသု။ တာသံ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ – ‘န သန္တံ ဘိက္ခုံ အနာပုစ္ဆာ အာရာမော ပဝိသိတဗ္ဗော’တိ။ မယဉ္စမှာ သန္တံ ဘိက္ခုံ အနာပုစ္ဆာ အာရာမံ ပဝိသိမှာ။ ကစ္စိ နု ခေါ မယံ ပါစိတ္တိယံ အာပတ္တိံ အာပန္နာ’’တိ။ပေ.။ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၂၄. ‘‘ယာ ပန ဘိက္ခုနီ ဇာနံ သဘိက္ခုကံ အာရာမံ အနာပုစ္ဆာ ပဝိသေယျ, ပါစိတ္တိယ’’န္တိ။

၁၀၂၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဇာနာတိ နာမ သာမံ ဝါ ဇာနာတိ, အညေ ဝါ တဿာ အာရောစေန္တိ, တေ ဝါ အာရောစေန္တိ။

သဘိက္ခုကော နာမ အာရာမော ယတ္ထ ဘိက္ခူ ရုက္ခမူလေပိ ဝသန္တိ။

အနာပုစ္ဆာ အာရာမံ ပဝိသေယျာတိ ဘိက္ခုံ ဝါ သာမဏေရံ ဝါ အာရာမိကံ ဝါ အနာပုစ္ဆာ ပရိက္ခိတ္တဿ အာရာမဿ ပရိက္ခေပံ အတိက္ကာမေန္တိယာ အာပတ္တိ ပါစိတ္တိယဿ။ အပရိက္ခိတ္တဿ အာရာမဿ ဥပစာရံ ဩက္ကမန္တိယာ အာပတ္တိ ပါစိတ္တိယဿ။

၁၀၂၆. သဘိက္ခုကေ သဘိက္ခုကသညာ သန္တံ ဘိက္ခုံ အနာပုစ္ဆာ အာရာမံ ပဝိသတိ, အာပတ္တိ ပါစိတ္တိယဿ။ သဘိက္ခုကေ ဝေမတိကာ သန္တံ ဘိက္ခုံ အနာပုစ္ဆာ အာရာမံ ပဝိသတိ, အာပတ္တိ ဒုက္ကဋဿ။ သဘိက္ခုကေ အဘိက္ခုကသညာ သန္တံ ဘိက္ခုံ အနာပုစ္ဆာ အာရာမံ ပဝိသတိ, အနာပတ္တိ။

အဘိက္ခုကေ သဘိက္ခုကသညာ, အာပတ္တိ ဒုက္ကဋဿ။ အဘိက္ခုကေ ဝေမတိကာ, အာပတ္တိ ဒုက္ကဋဿ။ အဘိက္ခုကေ အဘိက္ခုကသညာ, အနာပတ္တိ။

၁၀၂၇. အနာပတ္တိ သန္တံ ဘိက္ခုံ အာပုစ္ဆာ ပဝိသတိ, အသန္တံ ဘိက္ခုံ အနာပုစ္ဆာ ပဝိသတိ, သီသာနုလောကိကာ ဂစ္ဆတိ, ယတ္ထ ဘိက္ခုနိယော သန္နိပတိတာ ဟောန္တိ တတ္ထ ဂစ္ဆတိ, အာရာမေန မဂ္ဂေါ ဟောတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၁၀၂၈. တေန သမယေန ဗုဒ္ဓေါ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ။ တေန ခေါ ပန သမယေန အာယသ္မတော ဥပါလိဿ ဥပဇ္ဈာယော အာယသ္မာ ကပ္ပိတကော သုသာနေ ဝိဟရတိ။ တေန ခေါ ပန သမယေန ဆဗ္ဗဂ္ဂိယာနံ ဘိက္ခုနီနံ မဟတ္တရာ [မဟန္တတရာ (သီ.)] ဘိက္ခုနီ ကာလင်္ကတာ ဟောတိ။ ဆဗ္ဗဂ္ဂိယာ ဘိက္ခုနိယော တံ ဘိက္ခုနိံ နီဟရိတွာ အာယသ္မတော ကပ္ပိတကဿ ဝိဟာရဿ အဝိဒူရေ ဈာပေတွာ ထူပံ ကတွာ ဂန္တွာ တသ္မိံ ထူပေ ရောဒန္တိ။ အထ ခေါ အာယသ္မာ ကပ္ပိတကော တေန သဒ္ဒေန ဥဗ္ဗာဠှော တံ ထူပံ ဘိန္ဒိတွာ ပကိရေသိ။ ဆဗ္ဗဂ္ဂိယာ ဘိက္ခုနိယော – ‘‘ဣမိနာ ကပ္ပိတကေန အမှာကံ အယျာယ ထူပေါ ဘိန္နော, ဟန္ဒ နံ ဃာတေမာ’’တိ, မန္တေသုံ ။ အညတရာ ဘိက္ခုနီ အာယသ္မတော ဥပါလိဿ ဧတမတ္ထံ အာရောစေသိ။ အာယသ္မာ ဥပါလိ အာယသ္မတော ကပ္ပိတကဿ ဧတမတ္ထံ အာရောစေသိ။ အထ ခေါ အာယသ္မာ ကပ္ပိတကော ဝိဟာရာ နိက္ခမိတွာ နိလီနော အစ္ဆိ။ အထ ခေါ ဆဗ္ဗဂ္ဂိယာ ဘိက္ခုနိယော ယေနာယသ္မတော ကပ္ပိတကဿ ဝိဟာရော တေနုပသင်္ကမိံသု ; ဥပသင်္ကမိတွာ အာယသ္မတော ကပ္ပိတကဿ ဝိဟာရံ ပါသာဏေဟိ စ လေဍ္ဍူဟိ စ ဩတ္ထရာပေတွာ, ‘‘မတော ကပ္ပိတကော’’တိ ပက္ကမိံသု။

အထ ခေါ အာယသ္မာ ကပ္ပိတကော တဿာ ရတ္တိယာ အစ္စယေန ပုဗ္ဗဏှသမယံ နိဝါသေတွာ ပတ္တစီဝရမာဒါယ ဝေသာလိံ ပိဏ္ဍာယ ပါဝိသိ။ အဒ္ဒသံသု ခေါ ဆဗ္ဗဂ္ဂိယာ ဘိက္ခုနိယော အာယသ္မန္တံ ကပ္ပိတကံ ပိဏ္ဍာယ စရန္တံ။ ဒိသွာန ဧဝမာဟံသု – ‘‘အယံ ကပ္ပိတကော ဇီဝတိ, ကော နု ခေါ အမှာကံ မန္တံ သံဟရီ’’တိ? အဿောသုံ ခေါ ဆဗ္ဗဂ္ဂိယာ ဘိက္ခုနိယော – ‘‘အယျေန ကိရ ဥပါလိနာ အမှာကံ မန္တော သံဟဋော’’တိ။ တာ အာယသ္မန္တံ ဥပါလိံ အက္ကောသိံသု – ‘‘ကထဉှိ နာမ အယံ ကာသာဝဋော မလမဇ္ဇနော နိဟီနဇစ္စော အမှာကံ မန္တံ သံဟရိဿတီ’’တိ! ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော အယျံ ဥပါလိံ အက္ကောသိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဥပါလိံ အက္ကောသန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဥပါလိံ အက္ကောသိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ , ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၂၉. ‘‘ယာ ပန ဘိက္ခုနီ ဘိက္ခုံ အက္ကောသေယျ ဝါ ပရိဘာသေယျ ဝါ, ပါစိတ္တိယ’’န္တိ။

၁၀၃၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုန္တိ ဥပသမ္ပန္နံ။ အက္ကောသေယျ ဝါတိ ဒသဟိ ဝါ အက္ကောသဝတ္ထူဟိ အက္ကောသတိ ဧတေသံ ဝါ အညတရေန, အာပတ္တိ ပါစိတ္တိယဿ။

ပရိဘာသေယျ ဝါတိ ဘယံ ဥပဒံသေတိ, အာပတ္တိ ပါစိတ္တိယဿ။

၁၀၃၁. ဥပသမ္ပန္နေ ဥပသမ္ပန္နသညာ အက္ကောသတိ ဝါ ပရိဘာသတိ ဝါ, အာပတ္တိ ပါစိတ္တိယဿ။ ဥပသမ္ပန္နေ ဝေမတိကာ အက္ကောသတိ ဝါ ပရိဘာသတိ ဝါ, အာပတ္တိ ပါစိတ္တိယဿ။ ဥပသမ္ပန္နေ အနုပသမ္ပန္နသညာ အက္ကောသတိ ဝါ ပရိဘာသတိ ဝါ, အာပတ္တိ ပါစိတ္တိယဿ။

အနုပသမ္ပန္နံ အက္ကောသတိ ဝါ ပရိဘာသတိ ဝါ, အာပတ္တိ ဒုက္ကဋဿ။ အနုပသမ္ပန္နေ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နေ ဝေမတိကာ, အာပတ္တိ ဒုက္ကဋဿ။ အနုပသမ္ပန္နေ အနုပသမ္ပန္နသညာ, အာပတ္တိ ဒုက္ကဋဿ။

၁၀၃၂. အနာပတ္တိ အတ္ထပုရေက္ခါရာယ, ဓမ္မပုရေက္ခါရာယ, အနုသာသနိပုရေက္ခါရာယ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၁၀၃၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန စဏ္ဍကာဠီ ဘိက္ခုနီ ဘဏ္ဍနကာရိကာ ဟောတိ ကလဟကာရိကာ ဝိဝါဒကာရိကာ ဘဿကာရိကာ သံဃေ အဓိကရဏကာရိကာ။ ထုလ္လနန္ဒါ ဘိက္ခုနီ တဿာ ကမ္မေ ကရီယမာနေ ပဋိက္ကောသတိ။ တေန ခေါ ပန သမယေန ထုလ္လနန္ဒါ ဘိက္ခုနီ ဂါမကံ အဂမာသိ ကေနစိဒေဝ ကရဏီယေန။ အထ ခေါ ဘိက္ခုနိသံဃော – ‘‘ထုလ္လနန္ဒါ ဘိက္ခုနီ ပက္ကန္တာ’’တိ စဏ္ဍကာဠိံ ဘိက္ခုနိံ အာပတ္တိယာ အဒဿနေ ဥက္ခိပိ။ ထုလ္လနန္ဒါ ဘိက္ခုနီ ဂါမကေ တံ ကရဏီယံ တီရေတွာ ပုနဒေဝ သာဝတ္ထိံ ပစ္စာဂစ္ဆိ။ စဏ္ဍကာဠီ ဘိက္ခုနီ ထုလ္လနန္ဒါယ ဘိက္ခုနိယာ အာဂစ္ဆန္တိယာ နေဝ အာသနံ ပညပေသိ န ပါဒေါဒကံ ပါဒဣဌံ ပါဒကဌလိကံ ဥပနိက္ခိပိ; န ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိ န ပါနီယေန အာပုစ္ဆိ။ ထုလ္လနန္ဒါ ဘိက္ခုနီ စဏ္ဍကာဠိံ ဘိက္ခုနိံ ဧတဒဝေါစ – ‘‘ကိဿ တွံ, အယျေ, မယိ အာဂစ္ဆန္တိယာ နေဝ အာသနံ ပညပေသိ န ပါဒေါဒကံ ပါဒဣဌံ ပါဒကဌလိကံ ဥပနိက္ခိပိ; န ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိ န ပါနီယေန အာပုစ္ဆီ’’တိ? ‘‘ဧဝဉှေတံ, အယျေ, ဟောတိ ယထာ တံ အနာထာယာ’’တိ။ ‘‘ကိဿ ပန တွံ, အယျေ, အနာထာ’’တိ? ‘‘ဣမာ မံ, အယျေ, ဘိက္ခုနိယော – ‘‘အယံ အနာထာ အပ္ပညာတာ, နတ္ထိ ဣမိဿာ ကာစိ ပတိဝတ္တာ’’တိ, အာပတ္တိယာ အဒဿနေ ဥက္ခိပိံသူ’’တိ။ ထုလ္လနန္ဒါ ဘိက္ခုနီ – ‘‘ဗာလာ ဧတာ အဗျတ္တာ ဧတာ နေတာ ဇာနန္တိ ကမ္မံ ဝါ ကမ္မဒေါသံ ဝါ ကမ္မဝိပတ္တိံ ဝါ ကမ္မသမ္ပတ္တိံ ဝါ’’တိ, စဏ္ဍီကတာ ဂဏံ ပရိဘာသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ စဏ္ဍီကတာ ဂဏံ ပရိဘာသိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ စဏ္ဍီကတာ ဂဏံ ပရိဘာသတီတိ [ပရိဘာသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ ။ပေ.။ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ စဏ္ဍီကတာ ဂဏံ ပရိဘာသိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၃၄. ‘‘ယာ ပန ဘိက္ခုနီ စဏ္ဍီကတာ ဂဏံ ပရိဘာသေယျ, ပါစိတ္တိယ’’န္တိ။

၁၀၃၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

စဏ္ဍီကတာ နာမ ကောဓနာ ဝုစ္စတိ။

ဂဏော နာမ ဘိက္ခုနိသံဃော ဝုစ္စတိ။

ပရိဘာသေယျာတိ ‘‘ဗာလာ ဧတာ အဗျတ္တာ ဧတာ နေတာ ဇာနန္တိ ကမ္မံ ဝါ ကမ္မဒေါသံ ဝါ ကမ္မဝိပတ္တိံ ဝါ ကမ္မသမ္ပတ္တိံ ဝါ’’တိ ပရိဘာသတိ, အာပတ္တိ ပါစိတ္တိယဿ။ သမ္ဗဟုလာ ဘိက္ခုနိယော ဝါ ဧကံ ဘိက္ခုနိံ ဝါ အနုပသမ္ပန္နံ ဝါ ပရိဘာသတိ, အာပတ္တိ ဒုက္ကဋဿ။

၁၀၃၆. အနာပတ္တိ အတ္ထပုရေက္ခါရာယ, ဓမ္မပုရေက္ခါရာယ, အနုသာသနိပုရေက္ခါရာယ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၁၀၃၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရော ဗြာဟ္မဏော ဘိက္ခုနိယော နိမန္တေတွာ ဘောဇေသိ ။ ဘိက္ခုနိယော ဘုတ္တာဝီ [ဘုတ္တာဝိနီ (က.)] ပဝါရိတာ ဉာတိကုလာနိ ဂန္တွာ ဧကစ္စာ ဘုဉ္ဇိံသု ဧကစ္စာ ပိဏ္ဍပါတံ အာဒါယ အဂမံသု။ အထ ခေါ သော ဗြာဟ္မဏော ပဋိဝိဿကေ ဧတဒဝေါစ – ‘‘ဘိက္ခုနိယော မယာ အယျာ သန္တပ္ပိတာ, ဧထ တုမှေပိ သန္တပ္ပေဿာမီ’’တိ။ တေ ဧဝမာဟံသု – ‘‘ကိံ တွံ, အယျော, အမှေ သန္တပ္ပေဿသိ! ယာပိ တယာ နိမန္တိတာ တာပိ အမှာကံ ဃရာနိ အာဂန္တွာ ဧကစ္စာ ဘုဉ္ဇိံသု ဧကစ္စာ ပိဏ္ဍပါတံ အာဒါယ အဂမံသူ’’တိ။ အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အမှာကံ ဃရေ ဘုဉ္ဇိတွာ အညတြ ဘုဉ္ဇိဿန္တိ, န စာဟံ ပဋိဗလော ယာဝဒတ္ထံ ဒါတု’’န္တိ! အဿောသုံ ခေါ ဘိက္ခုနိယော တဿ ဗြာဟ္မဏဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဘုတ္တာဝီ [ဘုတ္တာဝိနီ (က.)] ပဝါရိတာ အညတြ ဘုဉ္ဇိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဘုတ္တာဝီ ပဝါရိတာ အညတြ ဘုဉ္ဇန္တီတိ ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဘုတ္တာဝီ ပဝါရိတာ အညတြ ဘုဉ္ဇိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၃၈. ‘‘ယာ ပန ဘိက္ခုနီ နိမန္တိတာ ဝါ ပဝါရိတာ ဝါ ခါဒနီယံ ဝါ ဘောဇနီယံ ဝါ ခါဒေယျ ဝါ ဘုဉ္ဇေယျ ဝါ, ပါစိတ္တိယ’’န္တိ။

၁၀၃၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

နိမန္တိတာ နာမ ပဉ္စန္နံ ဘောဇနာနံ အညတရေန ဘောဇနေန နိမန္တိတာ။

ပဝါရိတာ နာမ အသနံ ပညာယတိ, ဘောဇနံ ပညာယတိ, ဟတ္ထပါသေ ဌိတာ အဘိဟရတိ, ပဋိက္ခေပေါ ပညာယတိ။

ခါဒနီယံ နာမ ပဉ္စ ဘောဇနာနိ – ယာဂုံ ယာမကာလိကံ သတ္တာဟကာလိကံ ယာဝဇီဝိကံ ဌပေတွာ အဝသေသံ ခါဒနီယံ နာမ။

ဘောဇနီယံ နာမ ပဉ္စ ဘောဇနာနိ – ဩဒနော, ကုမ္မာသော, သတ္တု, မစ္ဆော, မံသံ။

‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

၁၀၄၀. နိမန္တိတေ နိမန္တိတသညာ ခါဒနီယံ ဝါ ဘောဇနီယံ ဝါ ခါဒတိ ဝါ ဘုဉ္ဇတိ ဝါ, အာပတ္တိ ပါစိတ္တိယဿ။ နိမန္တိတေ ဝေမတိကာ ခါဒနီယံ ဝါ ဘောဇနီယံ ဝါ ခါဒတိ ဝါ ဘုဉ္ဇတိ ဝါ, အာပတ္တိ ပါစိတ္တိယဿ။ နိမန္တိတေ အနိမန္တိတသညာ ခါဒနီယံ ဝါ ဘောဇနီယံ ဝါ ခါဒတိ ဝါ ဘုဉ္ဇတိ ဝါ, အာပတ္တိ ပါစိတ္တိယဿ။

ယာမကာလိကံ သတ္တာဟကာလိကံ ယာဝဇီဝိကံ အာဟာရတ္ထာယ ပဋိဂ္ဂဏှာတိ, အာပတ္တိ ဒုက္ကဋဿ။ အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ။ပေ.။။

၁၀၄၁. အနာပတ္တိ နိမန္တိတာ အပ္ပဝါရိတာ, ယာဂုံ ပိဝတိ, သာမိကေ အပလောကေတွာ ဘုဉ္ဇတိ, ယာမကာလိကံ သတ္တာဟကာလိကံ ယာဝဇီဝိကံ သတိ ပစ္စယေ ပရိဘုဉ္ဇတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၁၀၄၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ သာဝတ္ထိယံ အညတရိဿာ ဝိသိခါယ ပိဏ္ဍာယ စရမာနာ ယေန အညတရံ ကုလံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ တေ မနုဿာ တံ ဘိက္ခုနိံ ဘောဇေတွာ ဧတဒဝေါစုံ – ‘‘အညာပိ, အယျေ, ဘိက္ခုနိယော အာဂစ္ဆန္တူ’’တိ။ အထ ခေါ သာ ဘိက္ခုနီ, ‘‘ကထဉှိ နာမ [ကထံ အညာ (သျာ.)] ဘိက္ခုနိယော နာဂစ္ဆေယျု’’န္တိ, ဘိက္ခုနိယော ဥပသင်္ကမိတွာ ဧတဒဝေါစ – ‘‘အမုကသ္မိံ, အယျေ, ဩကာသေ ဝါဠာ သုနခါ စဏ္ဍော ဗလိဗဒ္ဒေါ စိက္ခလ္လော ဩကာသော။ မာ ခေါ တတ္ထ အဂမိတ္ထာ’’တိ။ အညတရာပိ ဘိက္ခုနီ တဿာ ဝိသိခါယ ပိဏ္ဍာယ စရမာနာ ယေန တံ ကုလံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ တေ မနုဿာ တံ ဘိက္ခုနိံ ဘောဇေတွာ ဧတဒဝေါစုံ – ‘‘ကိဿ, အယျေ, ဘိက္ခုနိယော န အာဂစ္ဆန္တီ’’တိ? အထ ခေါ သာ ဘိက္ခုနီ တေသံ မနုဿာနံ ဧတမတ္ထံ အာရောစေသိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ကုလံ မစ္ဆရာယိဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ကုလံ မစ္ဆရာယတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ကုလံ မစ္ဆရာယိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၄၃. ‘‘ယာ ပန ဘိက္ခုနီ ကုလမစ္ဆရိနီ အဿ, ပါစိတ္တိယ’’န္တိ။

၁၀၄၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ကုလံ နာမ စတ္တာရိ ကုလာနိ – ခတ္တိယကုလံ, ဗြာဟ္မဏကုလံ, ဝေဿကုလံ, သုဒ္ဒကုလံ။

မစ္ဆရိနီ အဿာတိ ‘‘ကထံ ဘိက္ခုနိယော နာဂစ္ဆေယျု’’န္တိ ဘိက္ခုနီနံ သန္တိကေ ကုလဿ အဝဏ္ဏံ ဘာသတိ, အာပတ္တိ ပါစိတ္တိယဿ။ ကုလဿ ဝါ သန္တိကေ ဘိက္ခုနီနံ အဝဏ္ဏံ ဘာသတိ, အာပတ္တိ ပါစိတ္တိယဿ။

၁၀၄၅. အနာပတ္တိ ကုလံ န မစ္ဆရာယန္တီ သန္တံယေဝ အာဒီနဝံ အာစိက္ခတိ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၁၀၄၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သမ္ဗဟုလာ ဘိက္ခုနိယော ဂါမကာဝါသေ ဝဿံဝုဋ္ဌာ သာဝတ္ထိံ အဂမံသု။ ဘိက္ခုနိယော တာ ဘိက္ခုနိယော ဧတဒဝေါစုံ – ‘‘ကတ္ထာယျာယော ဝဿံဝုဋ္ဌာ? ကစ္စိ ဩဝါဒေါ ဣဒ္ဓေါ အဟောသီ’’တိ? ‘‘နတ္ထယျေ, တတ္ထ ဘိက္ခူ; ကုတော ဩဝါဒေါ ဣဒ္ဓေါ ဘဝိဿတီ’’တိ! ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အဘိက္ခုကေ အာဝါသေ ဝဿံ ဝသိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အဘိက္ခုကေ အာဝါသေ ဝဿံ ဝသန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ , ဘိက္ခုနိယော အဘိက္ခုကေ အာဝါသေ ဝဿံ ဝသိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၄၇. ‘‘ယာ ပန ဘိက္ခုနီ အဘိက္ခုကေ အာဝါသေ ဝဿံ ဝသေယျ, ပါစိတ္တိယ’’န္တိ။

၁၀၄၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဘိက္ခုကော နာမ အာဝါသော န သက္ကာ ဟောတိ ဩဝါဒါယ ဝါ သံဝါသာယ ဝါ ဂန္တုံ။ ‘‘ဝဿံ ဝသိဿာမီ’’တိ သေနာသနံ ပညပေတိ ပါနီယံ ပရိဘောဇနီယံ ဥပဋ္ဌပေတိ ပရိဝေဏံ သမ္မဇ္ဇတိ, အာပတ္တိ ဒုက္ကဋဿ။ သဟ အရုဏုဂ္ဂမနာ အာပတ္တိ ပါစိတ္တိယဿ။

၁၀၄၉. အနာပတ္တိ ဝဿုပဂတာ ဘိက္ခူ ပက္ကန္တာ ဝါ ဟောန္တိ ဝိဗ္ဘန္တာ ဝါ ကာလင်္ကတာ ဝါ ပက္ခသင်္ကန္တာ ဝါ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၁၀၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သမ္ဗဟုလာ ဘိက္ခုနိယော ဂါမကာဝါသေ ဝဿံဝုဋ္ဌာ သာဝတ္ထိံ အဂမံသု။ ဘိက္ခုနိယော တာ ဘိက္ခုနိယော ဧတဒဝေါစုံ – ‘‘ကတ္ထာယျာယော ဝဿံဝုဋ္ဌာ; ကတ္ထ [ကစ္စိ (သျာ.)] ဘိက္ခုသံဃော ပဝါရိတော’’တိ ? ‘‘န မယံ, အယျေ, ဘိက္ခုသံဃံ ပဝါရေမာ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဝဿံဝုဋ္ဌာ ဘိက္ခုသံဃံ န ပဝါရေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဝဿံဝုဋ္ဌာ ဘိက္ခုသံဃံ န ပဝါရေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဝဿံဝုဋ္ဌာ ဘိက္ခုသံဃံ န ပဝါရေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၅၁. ‘‘ယာ ပန ဘိက္ခုနီ ဝဿံဝုဋ္ဌာ ဥဘတောသံဃေ တီဟိ ဌာနေဟိ န ပဝါရေယျ ဒိဋ္ဌေန ဝါ သုတေန ဝါ ပရိသင်္ကာယ ဝါ, ပါစိတ္တိယ’’န္တိ။

၁၀၅၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဝဿံဝုဋ္ဌာ နာမ ပုရိမံ ဝါ တေမာသံ ပစ္ဆိမံ ဝါ တေမာသံ ဝုဋ္ဌာ။ ဥဘတောသံဃေ တီဟိ ဌာနေဟိ န ပဝါရေဿာမိ ဒိဋ္ဌေန ဝါ သုတေန ဝါ ပရိသင်္ကာယ ဝါ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၀၅၃. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၁၀၅၄. တေန သမယေန ဗုဒ္ဓေါ ဘဂဝါ သက္ကေသု ဝိဟရတိ ကပိလဝတ္ထုသ္မိံ နိဂြောဓါရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဘိက္ခုနုပဿယံ ဥပသင်္ကမိတွာ ဆဗ္ဗဂ္ဂိယာ ဘိက္ခုနိယော ဩဝဒန္တိ။ ဘိက္ခုနိယော ဆဗ္ဗဂ္ဂိယာ ဘိက္ခုနိယော ဧတဒဝေါစုံ – ‘‘ဧထာယျေ ဩဝါဒံ ဂမိဿာမာ’’တိ။ ‘‘ယမ္ပိ မယံ, အယျေ, ဂစ္ဆေယျာမ ဩဝါဒဿ ကာရဏာ, အယျာ ဆဗ္ဗဂ္ဂိယာ ဣဓေဝ အာဂန္တွာ အမှေ ဩဝဒန္တီ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဩဝါဒံ န ဂစ္ဆိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဩဝါဒံ န ဂစ္ဆန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဩဝါဒံ န ဂစ္ဆိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၅၅. ‘‘ယာ ပန ဘိက္ခုနီ ဩဝါဒါယ ဝါ သံဝါသာယ ဝါ န ဂစ္ဆေယျ, ပါစိတ္တိယ’’န္တိ။

၁၀၅၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဩဝါဒေါ နာမ အဋ္ဌ ဂရုဓမ္မာ။

သံဝါသော နာမ ဧကကမ္မံ ဧကုဒ္ဒေသော သမသိက္ခတာ။ ဩဝါဒါယ ဝါ သံဝါသာယ ဝါ န ဂစ္ဆိဿာမီတိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၀၅၇. အနာပတ္တိ သတိ အန္တရာယေ, ပရိယေသိတွာ ဒုတိယိကံ ဘိက္ခုနိံ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၁၀၅၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဥပေါသထမ္ပိ န ပုစ္ဆန္တိ ဩဝါဒမ္ပိ န ယာစန္တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဥပေါသထမ္ပိ န ပုစ္ဆိဿန္တိ ဩဝါဒမ္ပိ န ယာစိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ‘‘ဥပေါသထမ္ပိ န ပုစ္ဆန္တိ ဩဝါဒမ္ပိ န ယာစန္တီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဥပေါသထမ္ပိ န ပုစ္ဆိဿန္တိ ဩဝါဒမ္ပိ န ယာစိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၅၉. ‘‘အနွဒ္ဓမာသံ ဘိက္ခုနိယာ ဘိက္ခုသံဃတော ဒွေ ဓမ္မာ ပစ္စာသီသိတဗ္ဗာ – ဥပေါသထပုစ္ဆကဉ္စ ဩဝါဒူပသင်္ကမနဉ္စ။ တံ အတိက္ကာမေန္တိယာ ပါစိတ္တိယ’’န္တိ။

၁၀၆၀. အနွဒ္ဓမာသန္တိ အနုပေါသထိကံ။ ဥပေါသထော နာမ ဒွေ ဥပေါသထာ – စာတုဒ္ဒသိကော စ ပန္နရသိကော စ။

ဩဝါဒေါ နာမ အဋ္ဌ ဂရုဓမ္မာ။ ‘‘ဥပေါသထမ္ပိ န ပုစ္ဆိဿာမိ ဩဝါဒမ္ပိ န ယာစိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၀၆၁. အနာပတ္တိ သတိ အန္တရာယေ, ပရိယေသိတွာ ဒုတိယိကံ ဘိက္ခုနိံ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၁၀၆၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒါပေသိ။ အထ ခေါ သော ပုရိသော တံ ဘိက္ခုနိံ ဒူသေတုံ ဥပက္ကမိ။ သာ ဝိဿရမကာသိ။ ဘိက္ခုနိယော ဥပဓါဝိတွာ တံ ဘိက္ခုနိံ ဧတဒဝေါစုံ – ‘‘ကိဿ တွံ, အယျေ, ဝိဿရမကာသီ’’တိ? အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒါပေဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒါပေတီတိ [ဘေဒါပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒါပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၆၃. ‘‘ယာ ပန ဘိက္ခုနီ ပသာခေ ဇာတံ ဂဏ္ဍံ ဝါ ရုဓိတံ ဝါ အနပလောကေတွာ သံဃံ ဝါ ဂဏံ ဝါ ပုရိသေန သဒ္ဓိံ ဧကေနေကာ ဘေဒါပေယျ ဝါ ဖာလာပေယျ ဝါ ဓေါဝါပေယျ ဝါ အာလိမ္ပါပေယျ ဝါ ဗန္ဓါပေယျ ဝါ မောစာပေယျ ဝါ, ပါစိတ္တိယ’’န္တိ။

၁၀၆၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပသာခံ နာမ အဓေါနာဘိ ဥဗ္ဘဇာဏုမဏ္ဍလံ။ ဇာတန္တိ တတ္ထ ဇာတံ။ ဂဏ္ဍော နာမ ယော ကောစိ ဂဏ္ဍော။ ရုဓိတံ နာမ ယံ ကိဉ္စိ ဝဏံ။ အနပလောကေတွာတိ အနာပုစ္ဆာ။ သံဃော နာမ ဘိက္ခုနိသံဃော ဝုစ္စတိ။ ဂဏော နာမ သမ္ဗဟုလာ ဘိက္ခုနိယော ဝုစ္စန္တိ။ ပုရိသော နာမ မနုဿပုရိသော, န ယက္ခေါ, န ပေတော, န တိရစ္ဆာနဂတော, ဝိညူ ပဋိဗလော ဒူသေတုံ။ သဒ္ဓိန္တိ ဧကတော။ ဧကေနေကာတိ ပုရိသော စေဝ ဟောတိ ဘိက္ခုနီ စ။

၁၀၆၅. ‘‘ဘိန္ဒါ’’တိ အာဏာပေတိ, အာပတ္တိ ဒုက္ကဋဿ။ ဘိန္နေ အာပတ္တိ ပါစိတ္တိယဿ။ ‘‘ဖာလေဟီ’’တိ အာဏာပေတိ, အာပတ္တိ ဒုက္ကဋဿ။ ဖာလိတေ အာပတ္တိ ပါစိတ္တိယဿ။ ‘‘ဓေါဝါ’’တိ အာဏာပေတိ , အာပတ္တိ ဒုက္ကဋဿ။ ဓေါဝိတေ [ဓေါတေ (သျာ.)] အာပတ္တိ ပါစိတ္တိယဿ။ ‘‘အာလိမ္ပါ’’တိ အာဏာပေတိ, အာပတ္တိ ဒုက္ကဋဿ။ လိတ္တေ [အာလိတ္တေ (သျာ.)] အာပတ္တိ ပါစိတ္တိယဿ။ ‘‘ဗန္ဓါဟီ’’တိ အာဏာပေတိ, အာပတ္တိ ဒုက္ကဋဿ။ ဗဒ္ဓေ အာပတ္တိ ပါစိတ္တိယဿ။ ‘‘မောစေဟီ’’တိ အာဏာပေတိ, အာပတ္တိ ဒုက္ကဋဿ။ မုတ္တေ အာပတ္တိ ပါစိတ္တိယဿ။

၁၀၆၆. အနာပတ္တိ အပလောကေတွာ ဘေဒါပေတိ ဝါ ဖာလာပေတိ ဝါ ဓေါဝါပေတိ ဝါ အာလိမ္ပါပေတိ ဝါ ဗန္ဓါပေတိ ဝါ မောစာပေတိ ဝါ, ယာ ကာစိ ဝိညူ ဒုတိယိကာ [ယာ ကာစိ ဝိညူ ဒုတိယာ (သျာ.), ယော ကောစိ ဝိညူ ဒုတိယော (က.)] ဟောတိ, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

အာရာမဝဂ္ဂေါ ဆဋ္ဌော။

၇. ဂဗ္ဘိနီဝဂ္ဂေါ

၁. ပဌမသိက္ခါပဒံ

၁၀၆၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဂဗ္ဘိနိံ ဝုဋ္ဌာပေန္တိ။ သာ ပိဏ္ဍာယ စရတိ။ မနုဿာ ဧဝမာဟံသု – ‘‘ဒေထာယျာယ ဘိက္ခံ , ဂရုဘာရာ [ဂရုဂဗ္ဘာ (သျာ.)] အယျာ’’တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂဗ္ဘိနိံ ဝုဋ္ဌာပေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂဗ္ဘိနိံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဂဗ္ဘိနိံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဂဗ္ဘိနိံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၆၈. ‘‘ယာ ပန ဘိက္ခုနီ ဂဗ္ဘိနိံ ဝုဋ္ဌာပေယျ, ပါစိတ္တိယ’’န္တိ။

၁၀၆၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဂဗ္ဘိနီ နာမ အာပန္နသတ္တာ ဝုစ္စတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၇၀. ဂဗ္ဘိနိယာ ဂဗ္ဘိနိသညာ ဝုဋ္ဌာပေတိ, အာပတ္တိ ပါစိတ္တိယဿ။ ဂဗ္ဘိနိယာ ဝေမတိကာ ဝုဋ္ဌာပေတိ, အာပတ္တိ ဒုက္ကဋဿ။ ဂဗ္ဘိနိယာ အဂဗ္ဘိနိသညာ ဝုဋ္ဌာပေတိ, အနာပတ္တိ။ အဂဗ္ဘိနိယာ ဂဗ္ဘိနိသညာ , အာပတ္တိ ဒုက္ကဋဿ။ အဂဗ္ဘိနိယာ ဝေမတိကာ, အာပတ္တိ ဒုက္ကဋဿ။ အဂဗ္ဘိနိယာ အဂဗ္ဘိနိသညာ, အနာပတ္တိ။

၁၀၇၁. အနာပတ္တိ ဂဗ္ဘိနိံ အဂဗ္ဘိနိသညာ ဝုဋ္ဌာပေတိ, အဂဗ္ဘိနိံ အဂဗ္ဘိနိသညာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၁၀၇၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပါယန္တိံ ဝုဋ္ဌာပေန္တိ။ သာ ပိဏ္ဍာယ စရတိ။ မနုဿာ ဧဝမာဟံသု – ‘‘ဒေထာယျာယ ဘိက္ခံ, သဒုတိယိကာ အယျာ’’တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပါယန္တိံ ဝုဋ္ဌာပေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပါယန္တိံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပါယန္တိံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ပါယန္တိံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၇၃. ‘‘ယာ ပန ဘိက္ခုနီ ပါယန္တိံ ဝုဋ္ဌာပေယျ, ပါစိတ္တိယ’’န္တိ။

၁၀၇၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပါယန္တီ နာမ မာတာ ဝါ ဟောတိ [ဟောတု (က.)] ဓါတိ [ဓါတီ (သီ. သျာ.)] ဝါ။

ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၇၅. ပါယန္တိယာ ပါယန္တိသညာ ဝုဋ္ဌာပေတိ, အာပတ္တိ ပါစိတ္တိယဿ။ ပါယန္တိယာ ဝေမတိကာ ဝုဋ္ဌာပေတိ, အာပတ္တိ ဒုက္ကဋဿ။ ပါယန္တိယာ အပါယန္တိသညာ ဝုဋ္ဌာပေတိ, အနာပတ္တိ။ အပါယန္တိယာ ပါယန္တိသညာ, အာပတ္တိ ဒုက္ကဋဿ။ အပါယန္တိယာ ဝေမတိကာ, အာပတ္တိ ဒုက္ကဋဿ။ အပါယန္တိယာ အပါယန္တိသညာ, အနာပတ္တိ။

၁၀၇၆. အနာပတ္တိ ပါယန္တိံ အပါယန္တိသညာ ဝုဋ္ဌာပေတိ, အပါယန္တိံ အပါယန္တိသညာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၁၀၇၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေန္တိ။ တာ ဗာလာ ဟောန္တိ အဗျတ္တာ န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေန္တီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေဿန္တိ! နေတံ , ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, သိက္ခမာနာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ သိက္ခမာနာယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ, ဣတ္ထန္နာမာ ဣတ္ထန္နာမာယ အယျာယ သိက္ခမာနာ။ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၀၇၈. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ သိက္ခမာနာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ ယဒိ သံဃဿ ပတ္တကလ္လံ သံဃော ဣတ္ထန္နာမာယ သိက္ခမာနာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ သိက္ခမာနာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ သံဃော ဣတ္ထန္နာမာယ သိက္ခမာနာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ သိက္ခမာနာယ ဒွေ ဝဿာနိ ဆသု ဓမ္မေသု သိက္ခါသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ သိက္ခမာနာယ ဒွေ ဝဿာနိ ဆသု ဓမ္မေသု သိက္ခါသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၁၀၇၉. သာ သိက္ခမာနာ ‘‘ဧဝံ ဝဒေဟီ’’တိ ဝတ္တဗ္ဗာ – ‘‘ပါဏာတိပါတာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ အဒိန္နာဒါနာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ အဗြဟ္မစရိယာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ မုသာဝါဒါ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ သုရာမေရယမဇ္ဇပ္ပမာဒဋ္ဌာနာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ ဝိကာလဘောဇနာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၈၀. ‘‘ယာ ပန ဘိက္ခုနီ ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေယျ, ပါစိတ္တိယ’’န္တိ။

၁၀၈၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဒွေ ဝဿာနီတိ ဒွေ သံဝစ္ဆရာနိ။ အသိက္ခိတသိက္ခါ နာမ သိက္ခါ ဝါ န ဒိန္နာ ဟောတိ, ဒိန္နာ ဝါ သိက္ခါ ကုပိတာ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၈၂. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၀၈၃. အနာပတ္တိ ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၁၀၈၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေန္တိ။ ဘိက္ခုနိယော ဧဝမာဟံသု – ‘‘ဧထ, သိက္ခမာနာ, ဣမံ ဇာနာထ, ဣမံ ဒေထ, ဣမံ အာဟရထ, ဣမိနာ အတ္ထော, ဣမံ ကပ္ပိယံ ကရောထာ’’တိ။ တာ ဧဝမာဟံသု – ‘‘န မယံ, အယျေ, သိက္ခမာနာ။ ဘိက္ခုနိယော မယ’’န္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ ဝုဋ္ဌာနသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ , အယျေ, ဣတ္ထန္နာမာ ဣတ္ထန္နာမာယ အယျာယ ဒွေ ဝဿာနိ ဆသု ဓမ္မေသု သိက္ခိတသိက္ခါ သိက္ခမာနာ သံဃံ ဝုဋ္ဌာနသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၀၈၅. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ဒွေ ဝဿာနိ ဆသု ဓမ္မေသု သိက္ခိတသိက္ခါ သိက္ခမာနာ သံဃံ ဝုဋ္ဌာနသမ္မုတိံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ ဝုဋ္ဌာနသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ , အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ဒွေ ဝဿာနိ ဆသု ဓမ္မေသု သိက္ခိတသိက္ခါ သိက္ခမာနာ သံဃံ ဝုဋ္ဌာနသမ္မုတိံ ယာစတိ။ သံဃော ဣတ္ထန္နာမာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ ဝုဋ္ဌာနသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ ဝုဋ္ဌာနသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သိက္ခမာနာယ ဝုဋ္ဌာနသမ္မုတိ; ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၈၆. ‘‘ယာ ပန ဘိက္ခုနီ ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေယျ, ပါစိတ္တိယ’’န္တိ။

၁၀၈၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဒွေ ဝဿာနီတိ ဒွေ သံဝစ္ဆရာနိ။ သိက္ခိတသိက္ခါ နာမ ဆသု ဓမ္မေသု သိက္ခိတသိက္ခါ။ အသမ္မတာ နာမ ဉတ္တိဒုတိယေန ကမ္မေန ဝုဋ္ဌာနသမ္မုတိ န ဒိန္နာဟောတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၈၈. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၀၈၉. အနာပတ္တိ ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန သမ္မတံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၁၀၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ ။ တေန ခေါ ပန သမယေန ဘိက္ခုနိယော ဦနဒွါဒသဝဿံ ဂိဟိဂတံ ဝုဋ္ဌာပေန္တိ။ တာ အက္ခမာ ဟောန္တိ သီတဿ ဥဏှဿ ဇိဃစ္ဆာယ ပိပါသာယ ဍံသမကသဝါတာတပသရီသပသမ္ဖဿာနံ ဒုရုတ္တာနံ ဒုရာဂတာနံ ဝစနပထာနံ။ ဥပ္ပန္နာနံ သာရီရိကာနံ ဝေဒနာနံ ဒုက္ခါနံ တိဗ္ဗာနံ ခရာနံ ကဋုကာနံ အသာတာနံ အမနာပါနံ ပါဏဟရာနံ အနဓိဝါသကဇာတိကာ ဟောန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဦနဒွါဒသဝဿံ ဂိဟိဂတံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဦနဒွါဒသဝဿံ ဂိဟိဂတံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဦနဒွါဒသဝဿံ ဂိဟိဂတံ ဝုဋ္ဌာပေဿန္တိ! ဦနဒွါဒသဝဿာ [ဦနဒွါဒသဝဿာဟိ (က.)], ဘိက္ခဝေ, ဂိဟိဂတာ အက္ခမာ ဟောတိ သီတဿ ဥဏှဿ ဇိဃစ္ဆာယ ပိပါသာယ ဍံသမကသဝါတာတပသရီသပသမ္ဖဿာနံ ဒုရုတ္တာနံ ဒုရာဂတာနံ ဝစနပထာနံ။ ဥပ္ပန္နာနံ သာရီရိကာနံ ဝေဒနာနံ ဒုက္ခါနံ တိဗ္ဗာနံ ခရာနံ ကဋုကာနံ အသာတာနံ အမနာပါနံ ပါဏဟရာနံ အနဓိဝါသကဇာတိကာ ဟောတိ။ ဒွါဒသဝဿာဝ [ဒွါဒသဝဿာ စ (သျာ. က.)] ခေါ, ဘိက္ခဝေ, ဂိဟိဂတာ ခမာ ဟောတိ သီတဿ ဥဏှဿ ဇိဃစ္ဆာယ ပိပါသာယ ဍံသမကသဝါတာတပသရီသပသမ္ဖဿာနံ ဒုရုတ္တာနံ ဒုရာဂတာနံ ဝစနပထာနံ။ ဥပ္ပန္နာနံ သာရီရိကာနံ ဝေဒနာနံ ဒုက္ခါနံ တိဗ္ဗာနံ ခရာနံ ကဋုကာနံ အသာတာနံ အမနာပါနံ ပါဏဟရာနံ အဓိဝါသကဇာတိကာ ဟောတိ။ နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၉၁. ‘‘ယာ ပန ဘိက္ခုနီ ဦနဒွါဒသဝဿံ ဂိဟိဂတံ ဝုဋ္ဌာပေယျ, ပါစိတ္တိယ’’န္တိ။

၁၀၉၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဦနဒွါဒသဝဿာ နာမ အပ္ပတ္တဒွါဒသဝဿာ။ ဂိဟိဂတာ နာမ ပုရိသန္တရဂတာ ဝုစ္စတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၉၃. ဦနဒွါဒသဝဿာယ ဦနဒွါဒသဝဿသညာ ဝုဋ္ဌာပေတိ, အာပတ္တိ ပါစိတ္တိယဿ။ ဦနဒွါဒသဝဿာယ ဝေမတိကာ ဝုဋ္ဌာပေတိ, အာပတ္တိ ဒုက္ကဋဿ။ ဦနဒွါဒသဝဿာယ ပရိပုဏ္ဏသညာ ဝုဋ္ဌာပေတိ, အနာပတ္တိ။

ပရိပုဏ္ဏဒွါဒသဝဿာယ ဦနဒွါဒသဝဿသညာ, အာပတ္တိ ဒုက္ကဋဿ။ ပရိပုဏ္ဏဒွါဒသဝဿာယ ဝေမတိကာ, အာပတ္တိ ဒုက္ကဋဿ။ ပရိပုဏ္ဏဒွါဒသဝဿာယ ပရိပုဏ္ဏသညာ, အနာပတ္တိ။

၁၀၉၄. အနာပတ္တိ ဦနဒွါဒသဝဿံ ပရိပုဏ္ဏသညာ ဝုဋ္ဌာပေတိ, ပရိပုဏ္ဏဒွါဒသဝဿံ ပရိပုဏ္ဏသညာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၁၀၉၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တိ။ တာ ဗာလာ ဟောန္တိ အဗျတ္တာ န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ ပရိပုဏ္ဏဒွါဒသဝဿာယ ဂိဟိဂတာယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ, ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၀၉၆. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ ယဒိ သံဃဿ ပတ္တကလ္လံ သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခါသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခါသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

သာ ပရိပုဏ္ဏဒွါဒသဝဿာ ဂိဟိဂတာ ဧဝံ ဝဒေဟီတိ ဝတ္တဗ္ဗာ – ‘‘ပါဏာတိပါတာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ပေ.။ ဝိကာလဘောဇနာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၀၉၇. ‘‘ယာ ပန ဘိက္ခုနီ ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေယျ, ပါစိတ္တိယ’’န္တိ။

၁၀၉၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပရိပုဏ္ဏဒွါဒသဝဿာ နာမ ပတ္တဒွါဒသဝဿာ။ ဂိဟိဂတာ နာမ ပုရိသန္တရဂတာ ဝုစ္စတိ။ ဒွေ ဝဿာနီတိ ဒွေ သံဝစ္ဆရာနိ။ အသိက္ခိတသိက္ခါ နာမ သိက္ခါ ဝါ န ဒိန္နာ ဟောတိ, ဒိန္နာ ဝါ သိက္ခါ ကုပိတာ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၀၉၉. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ဒုက္ကဋဿ။

၁၁၀၀. အနာပတ္တိ ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၁၁၀၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တိ။ ဘိက္ခုနိယော ဧဝမာဟံသု – ‘‘ဧထ သိက္ခမာနာ, ဣမံ ဇာနာထ, ဣမံ ဒေထ, ဣမံ အာဟရထ, ဣမိနာ အတ္ထော, ဣမံ ကပ္ပိယံ ကရောထာ’’တိ။ တာ ဧဝမာဟံသု – ‘‘န မယံ, အယျေ, သိက္ခမာနာ, ဘိက္ခုနိယော မယ’’န္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတ္တံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ ဘိက္ခဝေ ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ, ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ ဒွေ ဝဿာနိ ဆသု ဓမ္မေသု သိက္ခိတသိက္ခါ, သံဃံ ဝုဋ္ဌာနသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော။

၁၁၀၂. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ ဒွေ ဝဿာနိ ဆသု ဓမ္မေသု သိက္ခိတသိက္ခါ သံဃံ ဝုဋ္ဌာနသမ္မုတိံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဒွါဒသဝဿာ ဂိဟိဂတာ ဒွေ ဝဿာနိ ဆသု ဓမ္မေသု သိက္ခိတသိက္ခါ သံဃံ ဝုဋ္ဌာနသမ္မုတိံ ယာစတိ။ သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ ပရိပုဏ္ဏဒွါဒသဝဿာယ ဂိဟိဂတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၀၃. ‘‘ယာ ပန ဘိက္ခုနီ ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေယျ, ပါစိတ္တိယ’’န္တိ။

၁၁၀၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပရိပုဏ္ဏဒွါဒသဝဿာ နာမ ပတ္တဒွါဒသဝဿာ။ ဂိဟိဂတာ နာမ ပုရိသန္တရဂတာ ဝုစ္စတိ။ ဒွေ ဝဿာနီတိ ဒွေ သံဝစ္ဆရာနိ။ သိက္ခိတသိက္ခါ နာမ ဆသု ဓမ္မေသု သိက္ခိတသိက္ခါ။ အသမ္မတာ နာမ ဉတ္တိဒုတိယေန ကမ္မေန ဝုဋ္ဌာနသမ္မုတိ န ဒိန္နာ ဟောတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၀၅. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၁၀၆. အနာပတ္တိ ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန သမ္မတံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၁၁၀၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှာတိ န အနုဂ္ဂဏှာပေတိ။ တာ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှိဿတိ န အနုဂ္ဂဏှာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှာတိ န အနုဂ္ဂဏှာပေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှိဿတိ န အနုဂ္ဂဏှာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၀၈. ‘‘ယာ ပန ဘိက္ခုနီ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှေယျ န အနုဂ္ဂဏှာပေယျ, ပါစိတ္တိယ’’န္တိ။

၁၁၀၉. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သဟဇီဝိနီ နာမ သဒ္ဓိဝိဟာရိနီ ဝုစ္စတိ။ ဝုဋ္ဌာပေတွာတိ ဥပသမ္ပါဒေတွာ။ ဒွေ ဝဿာနီတိ ဒွေ သံဝစ္ဆရာနိ။

နေဝ အနုဂ္ဂဏှေယျာတိ န သယံ အနုဂ္ဂဏှေယျ ဥဒ္ဒေသေန ပရိပုစ္ဆာယ ဩဝါဒေန အနုသာသနိယာ။

န အနုဂ္ဂဏှာပေယျာတိ န အညံ အာဏာပေယျ ‘‘ဒွေ ဝဿာနိ နေဝ အနုဂ္ဂဏှိဿာမိ န အနုဂ္ဂဏှာပေဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၁၁၀. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၁၁၁၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓန္တိ။ တာ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၁၂. ‘‘ယာ ပန ဘိက္ခုနီ ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓေယျ, ပါစိတ္တိယ’’န္တိ။

၁၁၁၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဝုဋ္ဌာပိတန္တိ ဥပသမ္ပါဒိတံ။ ပဝတ္တိနီ နာမ ဥပဇ္ဈာယာ ဝုစ္စတိ။ ဒွေ ဝဿာနီတိ ဒွေ သံဝစ္ဆရာနိ။ နာနုဗန္ဓေယျာတိ န သယံ ဥပဋ္ဌဟေယျ။ ဒွေ ဝဿာနိ နာနုဗန္ဓိဿာမီတိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၁၁၄. အနာပတ္တိ ဥပဇ္ဈာယာ ဗာလာ ဝါ ဟောတိ အလဇ္ဇိနီ ဝါ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၁၁၁၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ နေဝ ဝူပကာသေတိ န ဝူပကာသာပေတိ။ သာမိကော အဂ္ဂဟေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ သဟဇီဝိနိံ ဝုဋ္ဌာပေတွာ နေဝ ဝူပကာသေဿတိ န ဝူပကာသာပေဿတိ, သာမိကော အဂ္ဂဟေသိ ! သစာယံ ဘိက္ခုနီ ပက္ကန္တာ အဿ, န စ သာမိကော ဂဏှေယျာ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ နေဝ ဝူပကာသေတိ န ဝူပကာသာပေတိ [။သိ (က.)], သာမိကော အဂ္ဂဟေသီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ သဟဇီဝိနိံ ဝုဋ္ဌာပေတွာ နေဝ ဝူပကာသေဿတိ န ဝူပကာသာပေဿတိ, သာမိကော အဂ္ဂဟေသိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၁၆. ‘‘ယာ ပန ဘိက္ခုနီ သဟဇီဝိနိံ ဝုဋ္ဌာပေတွာ နေဝ ဝူပကာသေယျ န ဝူပကာသာပေယျ အန္တမသော ဆပ္ပဉ္စယောဇနာနိပိ, ပါစိတ္တိယ’’န္တိ။

၁၁၁၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သဟဇီဝိနီ နာမ သဒ္ဓိဝိဟာရိနီ ဝုစ္စတိ။ ဝုဋ္ဌာပေတွာတိ ဥပသမ္ပါဒေတွာ။ နေဝ ဝူပကာသေယျာတိ န သယံ ဝူပကာသေယျ။ န ဝူပကာသာပေယျာတိ န အညံ အာဏာပေယျ။ ‘‘နေဝ ဝူပကာသေဿာမိ န ဝူပကာသာပေဿာမိ အန္တမသော ဆပ္ပဉ္စယောဇနာနိဣ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၁၁၈. အနာပတ္တိ သတိ အန္တရာယေ, ပရိယေသိတွာ ဒုတိယိကံ ဘိက္ခုနိံ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

ဂဗ္ဘိနိဝဂ္ဂေါ သတ္တမော။

၈. ကုမာရီဘူတဝဂ္ဂေါ

၁. ပဌမသိက္ခါပဒံ

၁၁၁၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဦနဝီသတိဝဿံ ကုမာရိဘူတံ ဝုဋ္ဌာပေန္တိ။ တာ အက္ခမာ ဟောန္တိ သီတဿ ဥဏှဿ ဇိဃစ္ဆာယ ပိပါသာယ ဍံသမကသဝါတာတပသရီသပသမ္ဖဿာနံ ဒုရုတ္တာနံ ဒုရာဂတာနံ ဝစနပထာနံ။ ဥပ္ပန္နာနံ သာရီရိကာနံ ဝေဒနာနံ ဒုက္ခါနံ တိဗ္ဗာနံ ခရာနံ ကဋုကာနံ အသာတာနံ အမနာပါနံ ပါဏဟရာနံ အနဓိဝါသကဇာတိကာ ဟောန္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဦနဝီသတိဝဿံ ကုမာရိဘူတံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဦနဝီသတိဝဿံ ကုမာရိဘူတံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဦနဝီသတိဝဿံ ကုမာရိဘူတံ ဝုဋ္ဌာပေဿန္တိ! ဦနဝီသတိဝဿာ, ဘိက္ခဝေ, ကုမာရိဘူတာ အက္ခမာ ဟောတိ သီတဿ ဥဏှဿ။ပေ.။ ပါဏဟရာနံ အနဓိဝါသကဇာတိကာ ဟောတိ။ ဝီသတိဝဿာဝ ခေါ, ဘိက္ခဝေ, ကုမာရိဘူတာ ခမာ ဟောတိ သီတဿ ဥဏှဿ။ပေ.။ ပါဏဟရာနံ အဓိဝါသကဇာတိကာ ဟောတိ။ နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၂၀. ‘‘ယာ ပန ဘိက္ခုနီ ဦနဝီသတိဝဿံ ကုမာရိဘူတံ ဝုဋ္ဌာပေယျ, ပါစိတ္တိယ’’န္တိ။

၁၁၂၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဦနဝီသတိဝဿာ နာမ အပ္ပတ္တဝီသတိဝဿာ။ ကုမာရိဘူတာ နာမ သာမဏေရီ ဝုစ္စတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၂၂. ဦနဝီသတိဝဿာယ ဦနဝီသတိဝဿသညာ ဝုဋ္ဌာပေတိ, အာပတ္တိ ပါစိတ္တိယဿ။ ဦနဝီသတိဝဿာယ ဝေမတိကာ ဝုဋ္ဌာပေတိ, အာပတ္တိ ဒုက္ကဋဿ။ ဦနဝီသတိဝဿာယ ပရိပုဏ္ဏသညာ ဝုဋ္ဌာပေတိ, အနာပတ္တိ။ ပရိပုဏ္ဏဝီသတိဝဿာယ ဦနဝီသတိဝဿသညာ, အာပတ္တိ ဒုက္ကဋဿ။ ပရိပုဏ္ဏဝီသတိဝဿာယ ဝေမတိကာ, အာပတ္တိ ဒုက္ကဋဿ။ ပရိပုဏ္ဏဝီသတိဝဿာယ ပရိပုဏ္ဏသညာ, အနာပတ္တိ။

၁၁၂၃. အနာပတ္တိ ဦနဝီသတိဝဿံ ပရိပုဏ္ဏသညာ ဝုဋ္ဌာပေတိ, ပရိပုဏ္ဏဝီသတိဝဿံ ပရိပုဏ္ဏသညာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၁၁၂၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တိ။ တာ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, အဋ္ဌာရသဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒါတုံ။ ဧဝဉ္စ ပန ဘိက္ခဝေ ဒါတဗ္ဗာ။ တာယ အဋ္ဌာရသဝဿာယ ကုမာရိဘူတာယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ , ဣတ္ထန္နာမာ ဣတ္ထန္နာမာယ အယျာယ အဋ္ဌာရသဝဿာ ကုမာရိဘူတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၁၂၅. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ အဋ္ဌာရသဝဿာ ကုမာရိဘူတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမာယ အဋ္ဌာရသဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ အဋ္ဌာရသဝဿာ ကုမာရိဘူတာ သံဃံ ဒွေ ဝဿာနိ ဆသု ဓမ္မေသု သိက္ခါသမ္မုတိံ ယာစတိ။ သံဃော ဣတ္ထန္နာမာယ အဋ္ဌာရသဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခါသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ အဋ္ဌာရသဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခါသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ အဋ္ဌာရသဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခါသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

သာ အဋ္ဌာရသဝဿာ ကုမာရိဘူတာ ဧဝံ ဝဒေဟီတိ ဝတ္တဗ္ဗာ – ‘‘ပါဏာတိပါတာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမိ။ပေ.။ ဝိကာလဘောဇနာ ဝေရမဏိံ ဒွေ ဝဿာနိ အဝီတိက္ကမ္မ သမာဒါနံ သမာဒိယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၂၆. ‘‘ယာ ပန ဘိက္ခုနီ ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေယျ, ပါစိတ္တိယ’’န္တိ။

၁၁၂၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပရိပုဏ္ဏဝီသတိဝဿာ နာမ ပတ္တဝီသတိဝဿာ။ ကုမာရိဘူတာ နာမ သာမဏေရီ ဝုစ္စတိ။ ဒွေ ဝဿာနီတိ ဒွေ သံဝစ္ဆရာနိ။ အသိက္ခိတသိက္ခါ နာမ သိက္ခါ ဝါ န ဒိန္နာ ဟောတိ, ဒိန္နာ ဝါ သိက္ခါ ကုပိတာ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၂၈. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၁၂၉. အနာပတ္တိ ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၁၁၃၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တိ။ ဘိက္ခုနိယော ဧဝမာဟံသု – ‘‘ဧထ သိက္ခမာနာ, ဣမံ ဇာနာထ, ဣမံ ဒေထ, ဣမံ အာဟရထ, ဣမိနာ အတ္ထော, ဣမံ ကပ္ပိယံ ကရောထာ’’တိ။ တာ ဧဝမာဟံသု – ‘‘န မယံ, အယျေ, သိက္ခမာနာ; ဘိက္ခုနိယော မယ’’န္တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေဿန္တိ! နေတံ, ဘိက္ခဝေ , အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ, ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဝီသတိဝဿာ ကုမာရိဘူတာ ဒွေ ဝဿာနိ ဆသု ဓမ္မေသု သိက္ခိတသိက္ခါ သံဃံ ဝုဋ္ဌာနသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၁၃၁. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဝီသတိဝဿာ ကုမာရိဘူတာ ဒွေ ဝဿာနိ ဆသု ဓမ္မေသု သိက္ခိတသိက္ခါ သံဃံ ဝုဋ္ဌာနသမ္မုတိံ ယာစတိ။ ယဒိ သံဃဿ ပတ္တကလ္လံ သံဃော ဣတ္ထန္နာမာယ ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဣတ္ထန္နာမာယ အယျာယ ပရိပုဏ္ဏဝီသတိဝဿာ ကုမာရိဘူတာ ဒွေ ဝဿာနိ ဆသု ဓမ္မေသု သိက္ခိတသိက္ခါ သံဃံ ဝုဋ္ဌာနသမ္မုတိံ ယာစတိ။ သံဃော ဣတ္ထန္နာမာယ ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ ပရိပုဏ္ဏဝီသတိဝဿာယ ကုမာရိဘူတာယ ဒွေ ဝဿာနိ ဆသု ဓမ္မေသု သိက္ခိတသိက္ခါယ ဝုဋ္ဌာနသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၃၂. ‘‘ယာ ပန ဘိက္ခုနီ ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေယျ, ပါစိတ္တိယ’’န္တိ။

၁၁၃၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပရိပုဏ္ဏဝီသတိဝဿာ နာမ ပတ္တဝီသတိဝဿာ။ ကုမာရိဘူတာ နာမ သာမဏေရီ ဝုစ္စတိ။ ဒွေ ဝဿာနီတိ ဒွေ သံဝစ္ဆရာနိ။ သိက္ခိတသိက္ခါ နာမ ဆသု ဓမ္မေသု သိက္ခိတသိက္ခါ ။ အသမ္မတာ နာမ ဉတ္တိဒုတိယေန ကမ္မေန ဝုဋ္ဌာနသမ္မုတိ န ဒိန္နာ ဟောတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၃၄. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၁၃၅. အနာပတ္တိ ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန သမ္မတံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၁၁၃၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဦနဒွါဒသဝဿာ ဝုဋ္ဌာပေန္တိ။ တာ ဗာလာ ဟောန္တိ အဗျတ္တာ န ဇာနန္တိ ကပ္ပိယံ ဝါ အကပ္ပိယံ ဝါ။ သဒ္ဓိဝိဟာရိနိယောပိ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဦနဒွါဒသဝဿာ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဦနဒွါဒသဝဿာ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဦနဒွါဒသဝဿာ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၃၇. ‘‘ယာ ပန ဘိက္ခုနီ ဦနဒွါဒသဝဿာ ဝုဋ္ဌာပေယျ, ပါစိတ္တိယ’’န္တိ။

၁၁၃၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဦနဒွါဒသဝဿာ နာမ အပ္ပတ္တဒွါဒသဝဿာ။

ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၃၉. အနာပတ္တိ ပရိပုဏ္ဏဒွါဒသဝဿာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၁၁၄၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေန္တိ။ တာ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ သဒ္ဓိဝိဟာရိနိယောပိ ဗာလာ ဟောန္တိ အဗျတ္တာ; န ဇာနန္တိ ကပ္ပိယံ ဝါ အကပ္ပိယံ ဝါ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပရိပုဏ္ဏဒွါဒသဝဿာယ ဘိက္ခုနိယာ ဝုဋ္ဌာပနသမ္မုတိံ ဒါတုံ။ ဧဝဉ္စ ပန, ဘိက္ခဝေ, ဒါတဗ္ဗာ။ တာယ ပရိပုဏ္ဏဒွါဒသဝဿာယ ဘိက္ခုနိယာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – အဟံ, အယျေ, ဣတ္ထန္နာမာ ပရိပုဏ္ဏဒွါဒသဝဿာ ဘိက္ခုနီ သံဃံ ဝုဋ္ဌာပနသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ သာ ဘိက္ခုနီ သံဃေန ပရိစ္ဆိန္ဒိတဗ္ဗာ – ‘‘ဗျတ္တာယံ ဘိက္ခုနီ လဇ္ဇိနီ’’တိ။ သစေ ဗာလာ စ ဟောတိ အလဇ္ဇိနီ စ, န ဒါတဗ္ဗာ။ သစေ ဗာလာ ဟောတိ လဇ္ဇိနီ, န ဒါတဗ္ဗာ။ သစေ ဗျတ္တာ ဟောတိ အလဇ္ဇိနီ, န ဒါတဗ္ဗာ။ သစေ ဗျတ္တာ စ ဟောတိ လဇ္ဇိနီ စ, ဒါတဗ္ဗာ။ ဧဝဉ္စ ပန, ဘိက္ခဝေ, ဒါတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၁၁၄၁. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ပရိပုဏ္ဏဒွါဒသဝဿာ ဘိက္ခုနီ သံဃံ ဝုဋ္ဌာပနသမ္မုတိံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဘိက္ခုနိယာ ဝုဋ္ဌာပနသမ္မုတိံ ဒဒေယျ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ပရိပုဏ္ဏဒွါဒသဝဿာ ဘိက္ခုနီ သံဃံ ဝုဋ္ဌာပနသမ္မုတိံ ယာစတိ။ သံဃော ဣတ္ထန္နာမာယ ပရိပုဏ္ဏဒွါဒသဝဿာယ ဘိက္ခုနိယာ ဝုဋ္ဌာပနသမ္မုတိံ ဒေတိ။ ယဿာ အယျာယ ခမတိ ဣတ္ထန္နာမာယ ပရိပုဏ္ဏဒွါဒသဝဿာယ ဘိက္ခုနိယာ ဝုဋ္ဌာပနသမ္မုတိယာ ဒါနံ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒိန္နာ သံဃေန ဣတ္ထန္နာမာယ ပရိပုဏ္ဏဒွါဒသဝဿာယ ဘိက္ခုနိယာ ဝုဋ္ဌာပနသမ္မုတိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

အထ ခေါ ဘဂဝါ တာ ဘိက္ခုနိယော အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၄၂. ‘‘ယာ ပန ဘိက္ခုနီ ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေယျ, ပါစိတ္တိယ’’န္တိ ။

၁၁၄၃. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပရိပုဏ္ဏဒွါဒသဝဿာ နာမ ပတ္တဒွါဒသဝဿာ။

အသမ္မတာ နာမ ဉတ္တိဒုတိယေန ကမ္မေန ဝုဋ္ဌာပနသမ္မုတိ န ဒိန္နာ ဟောတိ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၄၄. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပါစိတ္တိယဿ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပါစိတ္တိယဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၁၁၄၅. အနာပတ္တိ ပရိပုဏ္ဏဒွါဒသဝဿာ သံဃေန သမ္မတာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၁၁၄၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန စဏ္ဍကာဠီ ဘိက္ခုနီ ဘိက္ခုနိသံဃံ ဥပသင်္ကမိတွာ ဝုဋ္ဌာပနသမ္မုတိံ ယာစတိ။ အထ ခေါ ဘိက္ခုနိသံဃော စဏ္ဍကာဠိံ ဘိက္ခုနိံ ပရိစ္ဆိန္ဒိတွာ – ‘‘အလံ တာဝ တေ, အယျေ, ဝုဋ္ဌာပိတေနာ’’တိ, ဝုဋ္ဌာပနသမ္မုတိံ န အဒါသိ။ စဏ္ဍကာဠီ ဘိက္ခုနီ ‘သာဓူ’တိ ပဋိဿုဏိ။ တေန ခေါ ပန သမယေန ဘိက္ခုနိသံဃော အညာသံ ဘိက္ခုနီနံ ဝုဋ္ဌာပနသမ္မုတိံ ဒေတိ။ စဏ္ဍကာဠီ ဘိက္ခုနီ ဥဇ္ဈာယတိ ခိယျတိ ဝိပါစေတိ – ‘‘အဟမေဝ နူန ဗာလာ, အဟမေဝ နူန အလဇ္ဇိနီ; ယံ သံဃော အညာသံ ဘိက္ခုနီနံ ဝုဋ္ဌာပနသမ္မုတိံ ဒေတိ, မယှမေဝ န ဒေတီ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ စဏ္ဍကာဠီ – ‘အလံ တာဝ တေ, အယျေ, ဝုဋ္ဌာပိတေနာ’တိ ဝုစ္စမာနာ ‘သာဓူ’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇိဿတီ’’တိ။ပေ.။ သစ္စံ ကိရ, ဘိက္ခဝေ, ‘စဏ္ဍကာဠီ ဘိက္ခုနီ အလံ တာဝ တေ အယျေ ဝုဋ္ဌာပိတေနာ’တိ ဝုစ္စမာနာ ‘‘သာဓူ’’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇတီတိ [အာပဇ္ဇီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, စဏ္ဍကာဠီ ဘိက္ခုနီ – ‘‘အလံ တာဝ တေ, အယျေ, ဝုဋ္ဌာပိတေနာ’’တိ ဝုစ္စမာနာ ‘သာဓူ’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၄၇. ‘‘ယာ ပန ဘိက္ခုနီ – ‘အလံ တာဝ တေ, အယျေ, ဝုဋ္ဌာပိတေနာ’တိ ဝုစ္စမာနာ ‘သာဓူ’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇေယျ, ပါစိတ္တိယ’’န္တိ။

၁၁၄၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အလံ တာဝ တေ အယျေ ဝုဋ္ဌာပိတေနာတိ အလံ တာဝ တေ, အယျေ, ဥပသမ္ပါဒိတေန။ ‘သာဓူ’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇတိ, အာပတ္တိ ပါစိတ္တိယဿ။

၁၁၄၉. အနာပတ္တိ ပကတိယာ ဆန္ဒါ ဒေါသာ မောဟာ ဘယာ ကရောန္တံ ခိယျတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၁၁၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ သိက္ခမာနာ ထုလ္လနန္ဒံ ဘိက္ခုနိံ ဥပသင်္ကမိတွာ ဥပသမ္ပဒံ ယာစိ။ ထုလ္လနန္ဒါ ဘိက္ခုနီ တံ သိက္ခမာနံ – ‘‘သစေ မေ တွံ, အယျေ, စီဝရံ ဒဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတိ။ အထ ခေါ သာ သိက္ခမာနာ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ သိက္ခမာနံ – ‘သစေ မေ တွံ, အယျေ, စီဝရံ ဒဿသိ ဧဝါဟံ တံ ဝုဋ္ဌာပေဿာမီ’တိ ဝတွာ, နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ သိက္ခမာနံ – ‘‘သစေ မေ တွံ, အယျေ , စီဝရံ ဒဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ သိက္ခမာနံ – ‘‘သစေ မေ တွံ, အယျေ, စီဝရံ ဒဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၅၁. ‘‘ယာ ပန ဘိက္ခုနီ သိက္ခမာနံ – ‘သစေ မေ တွံ, အယျေ, စီဝရံ ဒဿသိ, ဧဝါဟံ တံ ဝုဋ္ဌာပေဿာမီ’တိ ဝတွာ, သာ ပစ္ဆာ အနန္တရာယိကိနီ နေဝ ဝုဋ္ဌာပေယျ န ဝုဋ္ဌာပနာယ ဥဿုက္ကံ ကရေယျ, ပါစိတ္တိယ’’န္တိ။

၁၁၅၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။

သစေ မေ တွံ အယျေ စီဝရံ ဒဿသိ ဧဝါဟံ တံ ဝုဋ္ဌာပေဿာမီတိ ဧဝါဟံ တံ ဥပသမ္ပါဒေဿာမိ။

သာ ပစ္ဆာ အနန္တရာယိကိနီတိ အသတိ အန္တရာယေ။

နေဝ ဝုဋ္ဌာပေယျာတိ န သယံ ဝုဋ္ဌာပေယျ။

န ဝုဋ္ဌာပနာယ ဥဿုက္ကံ ကရေယျာတိ န အညံ အာဏာပေယျ။ ‘‘နေဝ ဝုဋ္ဌာပေဿာမိ န ဝုဋ္ဌာပနာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၁၅၃. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၁၁၅၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ သိက္ခမာနာ ထုလ္လနန္ဒံ ဘိက္ခုနိံ ဥပသင်္ကမိတွာ ဥပသမ္ပဒံ ယာစိ။ ထုလ္လနန္ဒါ ဘိက္ခုနီ တံ သိက္ခမာနံ ‘‘သစေ မံ တွံ, အယျေ, ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတိ။ အထ ခေါ သာ သိက္ခမာနာ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ သိက္ခမာနံ – သစေ မံ တွံ, အယျေ, ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီတိ ဝတွာ, နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ သိက္ခမာနံ – ‘‘သစေ မံ တွံ အယျေ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ သိက္ခမာနံ – ‘‘သစေ မံ တွံ, အယျေ, ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ, နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၅၅. ‘‘ယာ ပန ဘိက္ခုနီ သိက္ခမာနံ – ‘သစေ မံ တွံ အယျေ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’တိ ဝတွာ, သာ ပစ္ဆာ အနန္တရာယိကိနီ နေဝ ဝုဋ္ဌာပေယျ န ဝုဋ္ဌာပနာယ ဥဿုက္ကံ ကရေယျ, ပါစိတ္တိယ’’န္တိ။

၁၁၅၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။

သစေ မံ တွံ အယျေ ဒွေ ဝဿာနိ အနုဗန္ဓိဿသီတိ ဒွေ သံဝစ္ဆရာနိ ဥပဋ္ဌဟိဿသိ။

ဧဝါဟံ တံ ဝုဋ္ဌာပေဿာမီတိ ဧဝါဟံ တံ ဥပသမ္ပါဒေဿာမိ။

သာ ပစ္ဆာ အနန္တရာယိကိနီတိ အသတိ အန္တရာယေ။

နေဝ ဝုဋ္ဌာပေယျာတိ န သယံ ဝုဋ္ဌာပေယျ။

န ဝုဋ္ဌာပနာယ ဥဿုက္ကံ ကရေယျာတိ န အညံ အာဏာပေယျ။ ‘‘နေဝ ဝုဋ္ဌာပေဿာမိ န ဝုဋ္ဌာပနာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ။

၁၁၅၇. အနာပတ္တိ သတိ အန္တရာယေ, ပရိယေသိတွာ န လဘတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၁၁၅၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ [သောကဝဿံ (သီ.) သောကာဝဿံ (သျာ.)] စဏ္ဍကာဠိံ သိက္ခမာနံ ဝုဋ္ဌာပေတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ [သောကဝဿံ (သီ.) သောကာဝဿံ (သျာ.)] စဏ္ဍကာဠိံ သိက္ခမာနံ ဝုဋ္ဌာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ [သောကဝဿံ (သီ.) သောကာဝဿံ (သျာ.)] စဏ္ဍကာဠိံ သိက္ခမာနံ ဝုဋ္ဌာပေတီတိ [ဝုဋ္ဌာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ စဏ္ဍကာဠိံ သိက္ခမာနံ ဝုဋ္ဌာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၅၉. ‘‘ယာ ပန ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ သိက္ခမာနံ ဝုဋ္ဌာပေယျ, ပါစိတ္တိယ’’န္တိ။

၁၁၆၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပုရိသော နာမ ပတ္တဝီသတိဝဿော။ ကုမာရကော နာမ အပ္ပတ္တဝီသတိဝဿော။ သံသဋ္ဌာ နာမ အနနုလောမိကေန ကာယိကဝါစသိကေန သံသဋ္ဌာ။ စဏ္ဍီ နာမ ကောဓနာ ဝုစ္စတိ။

သောကာဝါသာ နာမ ပရေသံ ဒုက္ခံ ဥပ္ပါဒေတိ, သောကံ အာဝိသတိ။ သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ; ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၆၁. အနာပတ္တိ အဇာနန္တီ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၁၁၆၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ မာတာပိတူဟိပိ သာမိကေနပိ အနနုညာတံ သိက္ခမာနံ ဝုဋ္ဌာပေတိ။ မာတာပိတရောပိ သာမိကောပိ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အမှေဟိ အနနုညာတံ သိက္ခမာနံ ဝုဋ္ဌာပေဿတီ’’တိ! အဿောသုံ ခေါ ဘိက္ခုနိယော မာတာပိတူနမ္ပိ သာမိကဿပိ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ မာတာပိတူဟိပိ သာမိကေနပိ အနနုညာတံ သိက္ခမာနံ ဝုဋ္ဌာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ, မာတာပိတူဟိပိ သာမိကေနပိ အနနုညာတံ သိက္ခမာနံ ဝုဋ္ဌာပေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ မာတာပိတူဟိပိ သာမိကေနပိ အနနုညာတံ သိက္ခမာနံ ဝုဋ္ဌာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၆၃. ‘‘ယာ ပန ဘိက္ခုနီ မာတာပိတူဟိ ဝါ သာမိကေန ဝါ အနနုညာတံ သိက္ခမာနံ ဝုဋ္ဌာပေယျ, ပါစိတ္တိယ’’န္တိ။

၁၁၆၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

မာတာပိတရော နာမ ဇနကာ ဝုစ္စန္တိ။ သာမိကော နာမ ယေန ပရိဂ္ဂဟိတာ ဟောတိ။ အနနုညာတာတိ အနာပုစ္ဆာ။ သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။ ဝုဋ္ဌာပေယျာတိ ဥပသမ္ပါဒေယျ။

ဝုဋ္ဌာပေဿာမီတိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၆၅. အနာပတ္တိ အဇာနန္တီ ဝုဋ္ဌာပေတိ, အပလောကေတွာ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

၁၁. ဧကာဒသမသိက္ခါပဒံ

၁၁၆၆. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ထုလ္လနန္ဒါ ဘိက္ခုနီ – ‘‘သိက္ခမာနံ ဝုဋ္ဌာပေဿာမီ’’တိ ထေရေ ဘိက္ခူ သန္နိပါတေတွာ ပဟူတံ ခါဒနီယံ ဘောဇနီယံ ပဿိတွာ – ‘‘န တာဝါဟံ, အယျာ, သိက္ခမာနံ ဝုဋ္ဌာပေဿာမီ’’တိ ထေရေ ဘိက္ခူ ဥယျောဇေတွာ ဒေဝဒတ္တံ ကောကာလိကံ ကဋမောဒကတိဿကံ ခဏ္ဍဒေဝိယာ ပုတ္တံ သမုဒ္ဒဒတ္တံ သန္နိပါတေတွာ သိက္ခမာနံ ဝုဋ္ဌာပေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ပါရိဝါသိကဆန္ဒဒါနေန သိက္ခမာနံ ဝုဋ္ဌာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ပါရိဝါသိကဆန္ဒဒါနေန သိက္ခမာနံ ဝုဋ္ဌာပေတီတိ [ဝုဋ္ဌာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ပါရိဝါသိကဆန္ဒဒါနေန သိက္ခမာနံ ဝုဋ္ဌာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၆၇. ‘‘ယာ ပန ဘိက္ခုနီ ပါရိဝါသိကဆန္ဒဒါနေန သိက္ခမာနံ ဝုဋ္ဌာပေယျ, ပါစိတ္တိယ’’န္တိ။

၁၁၆၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပါရိဝါသိကဆန္ဒဒါနေနာတိ ဝုဋ္ဌိတာယ ပရိသာယ။ သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၆၉. အနာပတ္တိ အဝုဋ္ဌိတာယ ပရိသာယ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဧကာဒသမသိက္ခါပဒံ နိဋ္ဌိတံ။

၁၂. ဒွါဒသမသိက္ခါပဒံ

၁၁၇၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော အနုဝဿံ ဝုဋ္ဌာပေန္တိ, ဥပဿယော န သမ္မတိ။ မနုဿာ [မနုဿာ ဝိဟာရစာရိကံ အာဟိဏ္ဍန္တာ ပဿိတွာ (သီ.)] ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အနုဝဿံ ဝုဋ္ဌာပေဿန္တိ, ဥပဿယော န သမ္မတီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အနုဝဿံ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အနုဝဿံ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အနုဝဿံ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၇၁. ‘‘ယာ ပန ဘိက္ခုနီ အနုဝဿံ ဝုဋ္ဌာပေယျ, ပါစိတ္တိယ’’န္တိ။

၁၁၇၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အနုဝဿန္တိ အနုသံဝစ္ဆရံ။ ဝုဋ္ဌာပေယျာတိ ဥပသမ္ပါဒေယျ။

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၇၃. အနာပတ္တိ ဧကန္တရိကံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

ဒွါဒသမသိက္ခါပဒံ နိဋ္ဌိတံ။

၁၃. တေရသမသိက္ခါပဒံ

၁၁၇၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဧကံ ဝဿံ ဒွေ ဝုဋ္ဌာပေန္တိ။ ဥပဿယော တထေဝ န သမ္မတိ။ မနုဿာ [မနုဿာ ဝိဟာရစာရိကံ အာဟိဏ္ဍန္တာ ပဿိတွာ (သီ.)] တထေဝ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဧကံ ဝဿံ ဒွေ ဝုဋ္ဌာပေဿန္တိ! ဥပဿယော တထေဝ န သမ္မတီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဧကံ ဝဿံ ဒွေ ဝုဋ္ဌာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဧကံ ဝဿံ ဒွေ ဝုဋ္ဌာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဧကံ ဝဿံ ဒွေ ဝုဋ္ဌာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၇၅. ‘‘ယာ ပန ဘိက္ခုနီ ဧကံ ဝဿံ ဒွေ ဝုဋ္ဌာပေယျ, ပါစိတ္တိယ’’န္တိ။

၁၁၇၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဧကံ ဝဿန္တိ ဧကံ သံဝစ္ဆရံ။ ဒွေ ဝုဋ္ဌာပေယျာတိ ဒွေ ဥပသမ္ပါဒေယျ။

‘‘ဒွေ ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ, သီမံ ဝါ သမ္မန္နတိ, အာပတ္တိ ဒုက္ကဋဿ။ ဉတ္တိယာ ဒုက္ကဋံ။ ဒွီဟိ ကမ္မဝါစာဟိ ဒုက္ကဋာ။ ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ။ ဂဏဿ စ အာစရိနိယာ စ အာပတ္တိ ဒုက္ကဋဿ။

၁၁၇၇. အနာပတ္တိ ဧကန္တရိကံ ဧကံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။

တေရသမသိက္ခါပဒံ နိဋ္ဌိတံ။

ကုမာရီဘူတဝဂ္ဂေါ အဋ္ဌမော။

၉. ဆတ္တုပါဟနဝဂ္ဂေါ

၁. ပဌမသိက္ခါပဒံ

၁၁၇၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဆတ္တုပါဟနံ ဓါရေန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဆတ္တုပါဟနံ ဓါရေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဆတ္တုပါဟနံ ဓါရေဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဆတ္တုပါဟနံ ဓါရေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဆတ္တုပါဟနံ ဓါရေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

‘‘ယာ ပန ဘိက္ခုနီ ဆတ္တုပါဟနံ ဓါရေယျ, ပါစိတ္တိယ’’န္တိ။

ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။

၁၁၇၉. တေန ခေါ ပန သမယေန အညတရာ ဘိက္ခုနီ ဂိလာနာ ဟောတိ။ တဿာ ဝိနာ ဆတ္တုပါဟနံ န ဖာသု ဟောတိ။ပေ.။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, ဂိလာနာယ ဘိက္ခုနိယာ ဆတ္တုပါဟနံ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၈၀. ‘‘ယာ ပန ဘိက္ခုနီ အဂိလာနာ ဆတ္တုပါဟနံ ဓါရေယျ, ပါစိတ္တိယ’’န္တိ။

၁၁၈၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဂိလာနာ နာမ ယဿာ ဝိနာ ဆတ္တုပါဟနံ ဖာသု ဟောတိ။

ဂိလာနာ နာမ ယဿာ ဝိနာ ဆတ္တုပါဟနံ န ဖာသု ဟောတိ။

ဆတ္တံ နာမ တီဏိ ဆတ္တာနိ – သေတစ္ဆတ္တံ, ကိလဉ္ဇစ္ဆတ္တံ, ပဏ္ဏစ္ဆတ္တံ မဏ္ဍလဗဒ္ဓံ သလာကဗဒ္ဓံ။ ဓါရေယျာတိ သကိမ္ပိ ဓါရေတိ, အာပတ္တိ ပါစိတ္တိယဿ။

၁၁၈၂. အဂိလာနာ အဂိလာနသညာ ဆတ္တုပါဟနံ ဓါရေတိ, အာပတ္တိ ပါစိတ္တိယဿ။ အဂိလာနာ ဝေမတိကာ ဆတ္တုပါဟနံ ဓါရေတိ, အာပတ္တိ ပါစိတ္တိယဿ။ အဂိလာနာ ဂိလာနသညာ ဆတ္တုပါဟနံ ဓါရေတိ, အာပတ္တိ ပါစိတ္တိယဿ။

ဆတ္တံ ဓါရေတိ န ဥပါဟနံ, အာပတ္တိ ဒုက္ကဋဿ။ ဥပါဟနံ ဓါရေတိ န ဆတ္တံ, အာပတ္တိ ဒုက္ကဋဿ ။ ဂိလာနာ အဂိလာနသညာ, အာပတ္တိ ဒုက္ကဋဿ။ ဂိလာနာ ဝေမတိကာ, အာပတ္တိ ဒုက္ကဋဿ။ ဂိလာနာ ဂိလာနသညာ, အနာပတ္တိ။

၁၁၈၃. အနာပတ္တိ ဂိလာနာယ, အာရာမေ အာရာမူပစာရေ ဓါရေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၁၁၈၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ယာနေန ယာယန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ယာနေန ယာယိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ. ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ယာနေန ယာယိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ယာနေန ယာယန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ယာနေန ယာယိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

‘‘ယာ ပန ဘိက္ခုနီ ယာနေန ယာယေယျ, ပါစိတ္တိယ’’န္တိ။

ဧဝဉ္စိဒံ ဘဂဝတာ ဘိက္ခုနီနံ သိက္ခါပဒံ ပညတ္တံ ဟောတိ။

၁၁၈၅. တေန ခေါ ပန သမယေန အညတရာ ဘိက္ခုနီ ဂိလာနာ ဟောတိ, န သက္ကောတိ ပဒသာ ဂန္တုံ။ပေ.။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, ဂိလာနာယ ဘိက္ခုနိယာ ယာနံ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၈၆. ‘‘ယာ ပန ဘိက္ခုနီ အဂိလာနာ ယာနေန ယာယေယျ, ပါစိတ္တိယ’’န္တိ။

၁၁၈၇. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဂိလာနာ နာမ သက္ကောတိ ပဒသာ ဂန္တုံ။

ဂိလာနာ နာမ န သက္ကောတိ ပဒသာ ဂန္တုံ။

ယာနံ နာမ ဝယှံ ရထော သကဋံ သန္ဒမာနိကာ သိဝိကာ ပါဋင်္ကီ။

ယာယေယျာတိ သကိမ္ပိ ယာနေန ယာယတိ, အာပတ္တိ ပါစိတ္တိယဿ။

၁၁၈၈. အဂိလာနာ အဂိလာနသညာ ယာနေန ယာယတိ, အာပတ္တိ ပါစိတ္တိယဿ။ အဂိလာနာ ဝေမတိကာ ယာနေန ယာယတိ, အာပတ္တိ ပါစိတ္တိယဿ ။ အဂိလာနာ ဂိလာနသညာ ယာနေန ယာယတိ, အာပတ္တိ ပါစိတ္တိယဿ။

ဂိလာနာ အဂိလာနသညာ, အာပတ္တိ ဒုက္ကဋဿ။ ဂိလာနာ ဝေမတိကာ, အာပတ္တိ ဒုက္ကဋဿ။ ဂိလာနာ ဂိလာနသညာ, အနာပတ္တိ။

၁၁၈၉. အနာပတ္တိ ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၁၁၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ အညတရိဿာ ဣတ္ထိယာ ကုလူပိကာ ဟောတိ။ အထ ခေါ သာ ဣတ္ထီ တံ ဘိက္ခုနိံ ဧတဒဝေါစ – ‘‘ဟန္ဒါယျေ, ဣမံ သံဃာဏိံ အမုကာယ နာမ ဣတ္ထိယာ ဒေဟီ’’တိ။ အထ ခေါ သာ ဘိက္ခုနီ – ‘‘သစာဟံ ပတ္တေန အာဒါယ ဂစ္ဆာမိ ဝိဿရော မေ ဘဝိဿတီ’’တိ ပဋိမုဉ္စိတွာ အဂမာသိ။ တဿာ ရထိကာယ သုတ္တကေ ဆိန္နေ ဝိပ္ပကိရိယိံသု။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော သံဃာဏိံ ဓါရေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ. ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ သံဃာဏိံ ဓါရေဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ သံဃာဏိံ ဓါရေတီ’’တိ [ဓါရေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ သံဃာဏိံ ဓါရေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၉၁. ‘‘ယာ ပန ဘိက္ခုနီ သံဃာဏိံ ဓါရေယျ, ပါစိတ္တိယ’’န္တိ။

၁၁၉၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သံဃာဏိ နာမ ယာ ကာစိ ကဋူပဂါ။

ဓါရေယျာတိ သကိမ္ပိ ဓါရေတိ, အာပတ္တိ ပါစိတ္တိယဿ။

၁၁၉၃. အနာပတ္တိ အာဗာဓပ္ပစ္စယာ, ကဋိသုတ္တကံ ဓါရေတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၁၁၉၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဣတ္ထာလင်္ကာရံ ဓါရေန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဣတ္ထာလင်္ကာရံ ဓါရေဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဣတ္ထာလင်္ကာရံ ဓါရေဿန္တီ’’တိ ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဣတ္ထာလင်္ကာရံ ဓါရေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဣတ္ထာလင်္ကာရံ ဓါရေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၉၅. ‘‘ယာ ပန ဘိက္ခုနီ ဣတ္ထာလင်္ကာရံ ဓါရေယျ, ပါစိတ္တိယ’’န္တိ။

၁၁၉၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဣတ္ထာလင်္ကာရော နာမ သီသူပဂေါ ဂီဝူပဂေါ ဟတ္ထူပဂေါ ပါဒူပဂေါ ကဋူပဂေါ။ ဓါရေယျာတိ သကိမ္ပိ ဓါရေတိ, အာပတ္တိ ပါစိတ္တိယဿ။

၁၁၉၇. အနာပတ္တိ အာဗာဓပစ္စယာ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၁၁၉၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဂန္ဓဝဏ္ဏကေန နဟာယန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂန္ဓဝဏ္ဏကေန နဟာယိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဂန္ဓဝဏ္ဏကေန နဟာယိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဂန္ဓဝဏ္ဏကေန နဟာယန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဂန္ဓဝဏ္ဏကေန နဟာယိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၁၉၉. ‘‘ယာ ပန ဘိက္ခုနီ ဂန္ဓဝဏ္ဏကေန နဟာယေယျ, ပါစိတ္တိယ’’န္တိ။

၁၂၀၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဂန္ဓေါ နာမ ယော ကောစိ ဂန္ဓေါ။ ဝဏ္ဏကံ နာမ ယံ ကိဉ္စိ ဝဏ္ဏကံ။ နဟာယေယျာတိ နဟာယတိ။ ပယောဂေ ဒုက္ကဋံ, နဟာနပရိယောသာနေ အာပတ္တိ ပါစိတ္တိယဿ။

၁၂၀၁. အနာပတ္တိ အာဗာဓပ္ပစ္စယာ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၁၂၀၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဝါသိတကေန ပိညာကေန နဟာယန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဝါသိတကေန ပိညာကေန နဟာယိဿန္တိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ဝါသိတကေန ပိညာကေန နဟာယိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဝါသိတကေန ပိညာကေန နဟာယန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ဝါသိတကေန ပိညာကေန နဟာယိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၀၃. ‘‘ယာ ပန ဘိက္ခုနီ ဝါသိတကေန ပိညာကေန နဟာယေယျ, ပါစိတ္တိယ’’န္တိ။

၁၂၀၄. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဝါသိတကံ နာမ ယံ ကိဉ္စိ ဂန္ဓဝါသိတကံ။ ပိညာကံ နာမ တိလပိဋ္ဌံ ဝုစ္စတိ။ နဟာယေယျာတိ နဟာယတိ။ ပယောဂေ ဒုက္ကဋံ, နဟာနပရိယောသာနေ အာပတ္တိ ပါစိတ္တိယဿ။

၁၂၀၅. အနာပတ္တိ အာဗာဓပ္ပစ္စယာ, ပကတိပိညာကေန နဟာယတိ, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၁၂၀၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဘိက္ခုနိယာ ဥမ္မဒ္ဒါပေန္တိပိ ပရိမဒ္ဒါပေန္တိပိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဘိက္ခုနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိပိ သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဘိက္ခုနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိဣ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဘိက္ခုနိယာ ဥမ္မဒ္ဒါပေန္တိပိ ပရိမဒ္ဒါပေန္တိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဘိက္ခုနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၀၇. ‘‘ယာ ပန ဘိက္ခုနီ ဘိက္ခုနိယာ ဥမ္မဒ္ဒါပေယျ ဝါ ပရိမဒ္ဒါပေယျ ဝါ, ပါစိတ္တိယ’’န္တိ။

၁၂၀၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာတိ အညာယ ဘိက္ခုနိယာ။ ဥမ္မဒ္ဒါပေယျ ဝါတိ ဥမ္မဒ္ဒါပေတိ [ဥဗ္ဗဋ္ဋာပေတိ (သီ.)], အာပတ္တိ ပါစိတ္တိယဿ။ ပရိမဒ္ဒါပေယျ ဝါတိ သမ္ဗာဟာပေတိ, အာပတ္တိ ပါစိတ္တိယဿ။

၁၂၀၉. အနာပတ္တိ ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈-၉-၁၀. အဋ္ဌမ-နဝမ-ဒသမသိက္ခါပဒံ

၁၂၁၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော သိက္ခမာနာယ ဥမ္မဒ္ဒါပေန္တိပိ ပရိမဒ္ဒါပေန္တိပိ။ပေ.။ သာမဏေရိယာ ဥမ္မဒ္ဒါပေန္တိပိ ပရိမဒ္ဒါပေန္တိပိ။ပေ.။ ဂိဟိနိယာ ဥမ္မဒ္ဒါပေန္တိပိ ပရိမဒ္ဒါပေန္တိပိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂိဟိနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိပိ, သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ကထဉှိ နာမ ဘိက္ခုနိယော ဂိဟိနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိဣတိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဂိဟိနိယာ ဥမ္မဒ္ဒါပေန္တိပိ ပရိမဒ္ဒါပေန္တိဣတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဂိဟိနိယာ ဥမ္မဒ္ဒါပေဿန္တိပိ ပရိမဒ္ဒါပေဿန္တိပိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၁၁. ‘‘ယာ ပန ဘိက္ခုနီ (သိက္ခမာနာယ။ပေ.။ သာမဏေရိယာ။ပေ.။) ဂိဟိနိယာ ဥမ္မဒ္ဒါပေယျ ဝါ ပရိမဒ္ဒါပေယျ ဝါ, ပါစိတ္တိယ’’န္တိ။

၁၂၁၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခါ။

သာမဏေရီ နာမ ဒသသိက္ခါပဒိကာ။

ဂိဟိနီ နာမ အဂါရိနီ ဝုစ္စတိ။

ဥမ္မဒ္ဒါပေယျ ဝါတိ ဥမ္မဒ္ဒါပေတိ, အာပတ္တိ ပါစိတ္တိယဿ။

ပရိမဒ္ဒါပေယျ ဝါတိ သမ္ဗာဟာပေတိ, အာပတ္တိ ပါစိတ္တိယဿ။

၁၂၁၃. အနာပတ္တိ ဂိလာနာယ [အာဗာဓပ္ပစ္စယာ (က.)], အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမ နဝမ ဒသမသိက္ခါပဒါနိ နိဋ္ဌိတာနိ။

၁၁. ဧကာဒသမသိက္ခါပဒံ

၁၂၁၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒန္တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၁၅. ‘‘ယာ ပန ဘိက္ခုနီ ဘိက္ခုဿ ပုရတော အနာပုစ္ဆာ အာသနေ နိသီဒေယျ, ပါစိတ္တိယ’’န္တိ။

၁၂၁၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုဿ ပုရတောတိ ဥပသမ္ပန္နဿ ပုရတော။ အနာပုစ္ဆာတိ အနပလောကေတွာ။ အာသနေ နိသီဒေယျာတိ အန္တမသော ဆမာယပိ နိသီဒတိ, အာပတ္တိ ပါစိတ္တိယဿ။

၁၂၁၇. အနာပုစ္ဆိတေ အနာပုစ္ဆိတသညာ အာသနေ နိသီဒတိ, အာပတ္တိ ပါစိတ္တိယဿ။ အနာပုစ္ဆိတေ ဝေမတိကာ အာသနေ နိသီဒတိ, အာပတ္တိ ပါစိတ္တိယဿ ။ အနာပုစ္ဆိတေ အာပုစ္ဆိတသညာ အာသနေ နိသီဒတိ, အာပတ္တိ ပါစိတ္တိယဿ။

အာပုစ္ဆိတေ အနာပုစ္ဆိတသညာ, အာပတ္တိ ဒုက္ကဋဿ။ အာပုစ္ဆိတေ ဝေမတိကာ, အာပတ္တိ ဒုက္ကဋဿ။ အာပုစ္ဆိတေ အာပုစ္ဆိတသညာ, အနာပတ္တိ။

၁၂၁၈. အနာပတ္တိ အာပုစ္ဆာ အာသနေ နိသီဒတိ, ဂိလာနာယ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဧကာဒသမသိက္ခါပဒံ နိဋ္ဌိတံ။

၁၂. ဒွါဒသမသိက္ခါပဒံ

၁၂၁၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဘိက္ခုနိယော အနောကာသကတံ ဘိက္ခုံ ပဉှံ ပုစ္ဆန္တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အနောကာသကတံ ဘိက္ခုံ ပဉှံ ပုစ္ဆိဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အနောကာသကတံ ဘိက္ခုံ ပဉှံ ပုစ္ဆန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အနောကာသကတံ ဘိက္ခုံ ပဉှံ ပုစ္ဆိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၂၀. ‘‘ယာ ပန ဘိက္ခုနီ အနောကာသကတံ ဘိက္ခုံ ပဉှံ ပုစ္ဆေယျ, ပါစိတ္တိယ’’န္တိ။

၁၂၂၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အနောကာသကတန္တိ အနာပုစ္ဆာ။ ဘိက္ခုန္တိ ဥပသမ္ပန္နံ။ ပဉှံ ပုစ္ဆေယျာတိ သုတ္တန္တေ ဩကာသံ ကာရာပေတွာ ဝိနယံ ဝါ အဘိဓမ္မံ ဝါ ပုစ္ဆတိ, အာပတ္တိ ပါစိတ္တိယဿ။ ဝိနယေ ဩကာသံ ကာရာပေတွာ သုတ္တန္တံ ဝါ အဘိဓမ္မံ ဝါ ပုစ္ဆတိ, အာပတ္တိ ပါစိတ္တိယဿ။ အဘိဓမ္မေ ဩကာသံ ကာရာပေတွာ သုတ္တန္တံ ဝါ ဝိနယံ ဝါ ပုစ္ဆတိ, အာပတ္တိ ပါစိတ္တိယဿ။

၁၂၂၂. အနာပုစ္ဆိတေ အနာပုစ္ဆိတသညာ ပဉှံ ပုစ္ဆတိ, အာပတ္တိ ပါစိတ္တိယဿ။ အနာပုစ္ဆိတေ ဝေမတိကာ ပဉှံ ပုစ္ဆတိ, အာပတ္တိ ပါစိတ္တိယဿ။ အနာပုစ္ဆိတေ အာပုစ္ဆိတသညာ ပဉှံ ပုစ္ဆတိ, အာပတ္တိ ပါစိတ္တိယဿ။

အာပုစ္ဆိတေ အနာပုစ္ဆိတသညာ, အာပတ္တိ ဒုက္ကဋဿ။ အာပုစ္ဆိတေ ဝေမတိကာ, အာပတ္တိ ဒုက္ကဋဿ။ အာပုစ္ဆိတေ အာပုစ္ဆိတသညာ, အနာပတ္တိ။

၁၂၂၃. အနာပတ္တိ ဩကာသံ ကာရာပေတွာ ပုစ္ဆတိ, အနောဒိဿ ဩကာသံ ကာရာပေတွာ ယတ္ထ ကတ္ထစိ ပုစ္ဆတိ, ဥမ္မတ္တိကာယ, အာဒိကမ္မိကာယာတိ။

ဒွါဒသမသိက္ခါပဒံ နိဋ္ဌိတံ။

၁၃. တေရသမသိက္ခါပဒံ

၁၂၂၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရာ ဘိက္ခုနီ အသင်္ကစ္စိကာ [အသင်္ကစ္ဆိကာ (သျာ.)] ဂါမံ ပိဏ္ဍာယ ပါဝိသိ။ တဿာ ရထိကာယ ဝါတမဏ္ဍလိကာ သံဃာဋိယော ဥက္ခိပိံသု။ မနုဿာ ဥက္ကုဋ္ဌိံ အကံသု – ‘‘သုန္ဒရာ အယျာယ ထနုဒရာ’’တိ။ သာ ဘိက္ခုနီ တေဟိ မနုဿေဟိ ဥပ္ပဏ္ဍိယမာနာ မင်္ကု အဟောသိ။ အထ ခေါ သာ ဘိက္ခုနီ ဥပဿယံ ဂန္တွာ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ အသင်္ကစ္စိကာ ဂါမံ ပဝိသိဿတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ အသင်္ကစ္စိကာ ဂါမံ ပါဝိသီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနီ အသင်္ကစ္စိကာ ဂါမံ ပဝိသိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၁၂၂၅. ‘‘ယာ ပန ဘိက္ခုနီ အသင်္ကစ္စိကာ [အသင်္ကစ္ဆိကာ (သျာ.)] ဂါမံ ပဝိသေယျ, ပါစိတ္တိယ’’န္တိ။

၁၂၂၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အသင်္ကစ္စိကာတိ ဝိနာ သင်္ကစ္စိကံ။

သင်္ကစ္စိကံ နာမ အဓက္ခကံ ဥဗ္ဘနာဘိ, တဿ ပဋိစ္ဆာဒနတ္ထာယ။

ဂါမံ ပဝိသေယျာတိ ပရိက္ခိတ္တဿ ဂါမဿ ပရိက္ခေပံ အတိက္ကာမေန္တိယာ အာပတ္တိ ပါစိတ္တိယဿ။ အပရိက္ခိတ္တဿ ဂါမဿ ဥပစာရံ ဩက္ကမန္တိယာ အာပတ္တိ ပါစိတ္တိယဿ။

၁၂၂၇. အနာပတ္တိ အစ္ဆိန္နစီဝရိကာယ, နဋ္ဌစီဝရိကာယ, ဂိလာနာယ, အဿတိယာ, အဇာနန္တိယာ, အာပဒါသု, ဥမ္မတ္တိကာယ, အာဒိကမ္မိကာယာတိ။

တေရသမသိက္ခါပဒံ နိဋ္ဌိတံ။

ဆတ္တုပါဟနဝဂ္ဂေါ နဝမော။

ဥဒ္ဒိဋ္ဌာ ခေါ, အယျာယော, ဆသဋ္ဌိသတာ ပါစိတ္တိယာ ဓမ္မာ။ တတ္ထာယျာယော ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယျာယော, တသ္မာ တုဏှီ, ဧဝမေတံ ဓါရယာမီတိ။

ခုဒ္ဒကံ သမတ္တံ။

ဘိက္ခုနိဝိဘင်္ဂေ ပါစိတ္တိယကဏ္ဍံ နိဋ္ဌိတံ။