နိဿဂ္ဂိယကဏ္ဍံ (ဘိက္ခုနီဝိဘင်္ဂေါ)

၃. နိဿဂ္ဂိယကဏ္ဍံ (ဘိက္ခုနီဝိဘင်္ဂေါ)

၁. ပတ္တဝဂ္ဂ

၁. ပဌမသိက္ခါပဒံ

ဣမေ ခေါ ပနာယျာယော တိံသ နိဿဂ္ဂိယာ ပါစိတ္တိယာ

ဓမ္မာ ဥဒ္ဒေသံ အာဂစ္ဆန္တိ။

၇၃၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ဗဟူ ပတ္တေ သန္နိစယံ ကရောန္တိ။ မနုဿာ ဝိဟာရစာရိကံ အာဟိဏ္ဍန္တာ ပဿိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဗဟူ ပတ္တေ သန္နိစယံ ကရိဿန္တိ, ပတ္တဝါဏိဇ္ဇံ ဝါ ဘိက္ခုနိယော ကရိဿန္တိ, အာမတ္တိကာပဏံ ဝါ ပသာရေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ပတ္တသန္နိစယံ ကရိဿန္တီ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ပတ္တသန္နိစယံ ကရောန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော ပတ္တသန္နိစယံ ကရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၃၄. ‘‘ယာ ပန ဘိက္ခုနီ ပတ္တသန္နိစယံ ကရေယျ , နိဿဂ္ဂိယံ ပါစိတ္တိယ’’န္တိ။

၇၃၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ပတ္တော နာမ ဒွေ ပတ္တာ – အယောပတ္တော, မတ္တိကာပတ္တော။ တယော ပတ္တဿ ဝဏ္ဏာ – ဥက္ကဋ္ဌော ပတ္တော, မဇ္ဈိမော ပတ္တော, ဩမကော ပတ္တော။ ဥက္ကဋ္ဌော နာမ ပတ္တော အဍ္ဎာဠှကောဒနံ ဂဏှာတိ စတုဘာဂံ ခါဒနံ တဒုပိယံ ဗျဉ္ဇနံ။ မဇ္ဈိမော နာမ ပတ္တော နာဠိကောဒနံ ဂဏှာတိ စတုဘာဂံ ခါဒနံ တဒုပိယံ ဗျဉ္ဇနံ။ ဩမကော နာမ ပတ္တော ပတ္ထောဒနံ ဂဏှာတိ စတုဘာဂံ ခါဒနံ တဒုပိယံ ဗျဉ္ဇနံ။ တတော ဥက္ကဋ္ဌော အပတ္တော ဩမကော အပတ္တော။

သန္နိစယံ ကရေယျာတိ အနဓိဋ္ဌိတော အဝိကပ္ပိတော။

နိဿဂ္ဂိယော ဟောတီတိ သဟ အရုဏုဂ္ဂမနာ နိဿဂ္ဂိယော ဟောတိ။ နိဿဇ္ဇိတဗ္ဗော သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗော။ တာယ ဘိက္ခုနိယာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အယံ မေ, အယျေ, ပတ္တော ရတ္တာတိက္ကန္တော နိဿဂ္ဂိယော, ဣမာဟံ သံဃဿ နိဿဇ္ဇာမီ’’တိ။ နိဿဇ္ဇိတွာ အာပတ္တိ ဒေသေတဗ္ဗာ။ ဗျတ္တာယ ဘိက္ခုနိယာ ပဋိဗလာယ အာပတ္တိ ပဋိဂ္ဂဟေတဗ္ဗာ။ နိဿဋ္ဌပတ္တော ဒါတဗ္ဗော –

‘‘သုဏာတု မေ, အယျေ, သံဃော။ အယံ ပတ္တော ဣတ္ထန္နာမာယ ဘိက္ခုနိယာ နိဿဂ္ဂိယော သံဃဿ နိဿဋ္ဌော။ ယဒိ သံဃဿ ပတ္တကလ္လံ, သံဃော ဣမံ ပတ္တံ ဣတ္ထန္နာမာယ ဘိက္ခုနိယာ ဒဒေယျာ’’တိ။

တာယ ဘိက္ခုနိယာ သမ္ဗဟုလာ ဘိက္ခုနိယော ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခုနီနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿု ဝစနီယာ – ‘‘အယံ မေ, အယျာယော, ပတ္တော ရတ္တာတိက္ကန္တော နိဿဂ္ဂိယော, ဣမာဟံ အယျာနံ နိဿဇ္ဇာမီ’’တိ။ နိဿဇ္ဇိတွာ အာပတ္တိ ဒေသေတဗ္ဗာ။ ဗျတ္တာယ ဘိက္ခုနိယာ ပဋိဗလာယ အာပတ္တိ ပဋိဂ္ဂဟေတဗ္ဗာ။ နိဿဋ္ဌပတ္တော ဒါတဗ္ဗော –

‘‘သုဏန္တု မေ အယျာယော။ အယံ ပတ္တော ဣတ္ထန္နာမာယ ဘိက္ခုနိယာ နိဿဂ္ဂိယော အယျာနံ နိဿဋ္ဌော။ ယဒိ အယျာနံ ပတ္တကလ္လံ, အယျာယော ဣမံ ပတ္တံ ဣတ္ထန္နာမာယ ဘိက္ခုနိယာ ဒဒေယျု’’န္တိ။

တာယ ဘိက္ခုနိယာ ဧကံ ဘိက္ခုနိံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယာ – ‘‘အယံ မေ, အယျေ, ပတ္တော ရတ္တာတိက္ကန္တော နိဿဂ္ဂိယော။ ဣမာဟံ အယျာယ နိဿဇ္ဇာမီ’’တိ။ နိဿဇ္ဇိတွာ အာပတ္တိ ဒေသေတဗ္ဗာ။ တာယ ဘိက္ခုနိယာ အာပတ္တိ ပဋိဂ္ဂဟေတဗ္ဗာ။ နိဿဋ္ဌပတ္တော ဒါတဗ္ဗော – ‘‘ဣမံ ပတ္တံ အယျာယ ဒမ္မီ’’တိ။

၇၃၆. ရတ္တာတိက္ကန္တေ အတိက္ကန္တသညာ, နိဿဂ္ဂိယံ ပါစိတ္တိယံ။ ရတ္တာတိက္ကန္တေ ဝေမတိကာ, နိဿဂ္ဂိယံ ပါစိတ္တိယံ။ ရတ္တာတိက္ကန္တေ အနတိက္ကန္တသညာ, နိဿဂ္ဂိယံ ပါစိတ္တိယံ။ အနဓိဋ္ဌိတေ အဓိဋ္ဌိတသညာ, နိဿဂ္ဂိယံ ပါစိတ္တိယံ။ အဝိကပ္ပိတေ ဝိကပ္ပိတသညာ, နိဿဂ္ဂိယံ ပါစိတ္တိယံ။ အဝိဿဇ္ဇိတေ ဝိဿဇ္ဇိတသညာ , နိဿဂ္ဂိယံ ပါစိတ္တိယံ။ အနဋ္ဌေ နဋ္ဌသညာ။ အဝိနဋ္ဌေ ဝိနဋ္ဌသညာ။ အဘိန္နေ ဘိန္နသညာ။ အဝိလုတ္တေ ဝိလုတ္တသညာ, နိဿဂ္ဂိယံ ပါစိတ္တိယံ။

နိဿဂ္ဂိယံ ပတ္တံ အနိဿဇ္ဇိတွာ ပရိဘုဉ္ဇတိ, အာပတ္တိ ဒုက္ကဋဿ။ ရတ္တာနတိက္ကန္တေ အတိက္ကန္တသညာ, အာပတ္တိ ဒုက္ကဋဿ။ ရတ္တာနတိက္ကန္တေ ဝေမတိကာ, အာပတ္တိ ဒုက္ကဋဿ။ ရတ္တာနတိက္ကန္တေ အနတိက္ကန္တသညာ အနာပတ္တိ။

၇၃၇. အနာပတ္တိ အန္တောအရုဏေ အဓိဋ္ဌေတိ, ဝိကပ္ပေတိ, ဝိဿဇ္ဇေတိ, နဿတိ, ဝိနဿတိ, ဘိဇ္ဇတိ, အစ္ဆိန္ဒိတွာ ဂဏှန္တိ, ဝိဿာသံ ဂဏှန္တိ, ဥမ္မတ္တိကာယ, အာဒိကမ္မိကာယာတိ။

တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော နိဿဋ္ဌပတ္တံ န ဒေန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, နိဿဋ္ဌပတ္တော န ဒါတဗ္ဗော။ ယာ န ဒဒေယျ, အာပတ္တိ ဒုက္ကဋဿာတိ။

ပဌမသိက္ခါပဒံ နိဋ္ဌိတံ။

၂. ဒုတိယသိက္ခါပဒံ

၇၃၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ ။ တေန ခေါ ပန သမယေန သမ္ဗဟုလာ ဘိက္ခုနိယော ဂါမကာဝါသေ ဝဿံဝုဋ္ဌာ [ဝဿံဝုတ္ထာ (သီ. သျာ.)] သာဝတ္ထိံ အဂမံသု ဝတ္တသမ္ပန္နာ ဣရိယာပထသမ္ပန္နာ ဒုစ္စောဠာ လူခစီဝရာ။ ဥပါသကာ တာ ဘိက္ခုနိယော ပဿိတွာ – ‘‘ဣမာ ဘိက္ခုနိယော ဝတ္တသမ္ပန္နာ ဣရိယာပထသမ္ပန္နာ ဒုစ္စောဠာ လူခစီဝရာ, ဣမာ ဘိက္ခုနိယော အစ္ဆိန္နာ ဘဝိဿန္တီ’’တိ ဘိက္ခုနိသံဃဿ အကာလစီဝရံ အဒံသု။ ထုလ္လနန္ဒါ ဘိက္ခုနီ – ‘‘အမှာကံ ကထိနံ အတ္ထတံ ကာလစီဝရ’’န္တိ အဓိဋ္ဌဟိတွာ ဘာဇာပေသိ။ ဥပါသကာ တာ ဘိက္ခုနိယော ပဿိတွာ ဧတဒဝေါစုံ – ‘‘အပယျာဟိ စီဝရံ လဒ္ဓ’’န္တိ? ‘‘န မယံ, အာဝုသော, စီဝရံ လဘာမ။ အယျာ ထုလ္လနန္ဒါ – ‘အမှာကံ ကထိနံ အတ္ထတံ ကာလစီဝရ’န္တိ အဓိဋ္ဌဟိတွာ ဘာဇာပေသီ’’တိ။ ဥပါသကာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အကာလစီဝရံ ‘ကာလစီဝရ’န္တိ အဓိဋ္ဌဟိတွာ ဘာဇာပေဿတီ’’တိ! အဿောသုံ ခေါ ဘိက္ခုနိယော တေသံ ဥပါသကာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အကာလစီဝရံ ‘ကာလစီဝရ’န္တိ အဓိဋ္ဌဟိတွာ ဘာဇာပေဿတီ’’တိ! အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ ။ပေ.။ သစ္စံ ကိရ, ဘိက္ခဝေ , ထုလ္လနန္ဒါ ဘိက္ခုနီ အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေတီတိ [ဘာဇာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၃၉. ‘‘ယာ ပန ဘိက္ခုနီ အကာလစီဝရံ ‘ကာလစီဝရ’န္တိ အဓိဋ္ဌဟိတွာ ဘာဇာပေယျ, နိဿဂ္ဂိယံ ပါစိတ္တိယ’’န္တိ။

၇၄၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အကာလစီဝရံ နာမ အနတ္ထတေ ကထိနေ ဧကာဒသမာသေ ဥပ္ပန္နံ, အတ္ထတေ ကထိနေ သတ္တမာသေ ဥပ္ပန္နံ, ကာလေပိ အာဒိဿ ဒိန္နံ, ဧတံ အကာလစီဝရံ နာမ။

အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန , ဘိက္ခဝေ, နိဿဇ္ဇိတဗ္ဗံ။ပေ.။ ဣဒံ မေ, အယျေ, အကာလစီဝရံ ‘‘ကာလစီဝရ’န္တိ အဓိဋ္ဌဟိတွာ ဘာဇာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၄၁. အကာလစီဝရေ အကာလစီဝရသညာ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေတိ, နိဿဂ္ဂိယံ ပါစိတ္တိယံ။ အကာလစီဝရေ ဝေမတိကာ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေတိ, အာပတ္တိ ဒုက္ကဋဿ။ အကာလစီဝရေ ကာလစီဝရသညာ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေတိ , အနာပတ္တိ။ ကာလစီဝရေ အကာလစီဝရသညာ, အာပတ္တိ ဒုက္ကဋဿ။ ကာလစီဝရေ ဝေမတိကာ, အာပတ္တိ ဒုက္ကဋဿ။ ကာလစီဝရေ ကာလစီဝရသညာ, အနာပတ္တိ။

၇၄၂. အနာပတ္တိ အကာလစီဝရံ ကာလစီဝရသညာ ဘာဇာပေတိ, ကာလစီဝရံ ကာလစီဝရသညာ ဘာဇာပေတိ, ဥမ္မတ္တိကာယ, အာဒိကမ္မိကာယာတိ။

ဒုတိယသိက္ခါပဒံ နိဋ္ဌိတံ။

၃. တတိယသိက္ခါပဒံ

၇၄၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ အညတရာယ ဘိက္ခုနိယာ သဒ္ဓိံ စီဝရံ ပရိဝတ္တေတွာ ပရိဘုဉ္ဇိ။ အထ ခေါ သာ ဘိက္ခုနီ တံ စီဝရံ သံဃရိတွာ [သံဟရိတွာ (က.)] နိက္ခိပိ။ ထုလ္လနန္ဒါ ဘိက္ခုနီ တံ ဘိက္ခုနိံ ဧတဒဝေါစ – ‘‘ယံ တေ, အယျေ, မယာ သဒ္ဓိံ စီဝရံ ပရိဝတ္တိတံ, ကဟံ တံ စီဝရ’’န္တိ? အထ ခေါ သာ ဘိက္ခုနီ တံ စီဝရံ နီဟရိတွာ ထုလ္လနန္ဒါယ ဘိက္ခုနိယာ ဒဿေသိ။ ထုလ္လနန္ဒါ ဘိက္ခုနီ တံ ဘိက္ခုနိံ ဧတဒဝေါစ – ‘‘ဟန္ဒါယျေ, တုယှံ စီဝရံ, အာဟရ မေ’တံ စီဝရံ, ယံ တုယှံ တုယှမေဝေတံ, ယံ မယှံ မယှမေဝေတံ, အာဟရ မေ’တံ, သကံ ပစ္စာဟရာ’’တိ အစ္ဆိန္ဒိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒိဿတီ’’တိ! အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရာစေသုံ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒတီတိ [အစ္ဆိန္ဒီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၄၄. ‘‘ယာ ပန ဘိက္ခုနီ ဘိက္ခုနိယာ သဒ္ဓိံ စီဝရံ ပရိဝတ္တေတွာ သာ ပစ္ဆာ ဧဝံ ဝဒေယျ – ‘ဟန္ဒါယျေ, တုယှံ စီဝရံ အာဟရ, မေတံ စီဝရံ, ယံ တုယှံ တုယှမေဝေတံ, ယံ မယှံ မယှမေဝေတံ, အာဟရ မေတံ, သကံ ပစ္စာဟရာ’တိ အစ္ဆိန္ဒေယျ ဝါ အစ္ဆိန္ဒါပေယျ ဝါ, နိဿဂ္ဂိယံ ပါစိတ္တိယ’’န္တိ။

၇၄၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဘိက္ခုနိယာ သဒ္ဓိန္တိ အညာယ ဘိက္ခုနိယာ သဒ္ဓိံ။

စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ။

ပရိဝတ္တေတွာတိ ပရိတ္တေန ဝါ ဝိပုလံ, ဝိပုလေန ဝါ ပရိတ္တံ။

အစ္ဆိန္ဒေယျာတိ သယံ အစ္ဆိန္ဒတိ နိဿဂ္ဂိယံ ပါစိတ္တိယံ။

အစ္ဆိန္ဒါပေယျာတိ အညံ အာဏာပေတိ, အာပတ္တိ ဒုက္ကဋဿ။ သကိံ အာဏတ္တာ ဗဟုကမ္ပိ အစ္ဆိန္ဒတိ, နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ အယျေ စီဝရံ ဘိက္ခုနိယာ သဒ္ဓိံ ပရိဝတ္တေတွာ အစ္ဆိန္နံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၄၆. ဥပသမ္ပန္နာယ ဥပသမ္ပန္နသညာ စီဝရံ ပရိဝတ္တေတွာ အစ္ဆိန္ဒတိ ဝါ အစ္ဆိန္ဒါပေတိ ဝါ, နိဿဂ္ဂိယံ ပါစိတ္တိယံ။ ဥပသမ္ပန္နာယ ဝေမတိကာ စီဝရံ ပရိဝတ္တေတွာ အစ္ဆိန္ဒတိ ဝါ အစ္ဆိန္ဒါပေတိ ဝါ, နိဿဂ္ဂိယံ ပါစိတ္တိယံ။ ဥပသမ္ပန္နာယ အနုပသမ္ပန္နသညာ စီဝရံ ပရိဝတ္တေတွာ အစ္ဆိန္ဒတိ ဝါ အစ္ဆိန္ဒါပေတိ ဝါ, နိဿဂ္ဂိယံ ပါစိတ္တိယံ။

အညံ ပရိက္ခါရံ ပရိဝတ္တေတွာ အစ္ဆိန္ဒတိ ဝါ အစ္ဆိန္ဒါပေတိ ဝါ, အာပတ္တိ ဒုက္ကဋဿ။ အနုပသမ္ပန္နာယ သဒ္ဓိံ စီဝရံ ဝါ အညံ ဝါ ပရိက္ခါရံ ပရိဝတ္တေတွာ အစ္ဆိန္ဒတိ ဝါ အစ္ဆိန္ဒါပေတိ ဝါ, အာပတ္တိ ဒုက္ကဋဿ။ အနုပသမ္ပန္နာယ ဥပသမ္ပန္နသညာ, အာပတ္တိ ဒုက္ကဋဿ။ အနုပသမ္ပန္နာယ ဝေမတိကာ, အာပတ္တိ ဒုက္ကဋဿ။ အနုပသမ္ပန္နာယ အနုပသမ္ပန္နသညာ, အာပတ္တိ ဒုက္ကဋဿ။

၇၄၇. အနာပတ္တိ သာ ဝါ ဒေတိ, တဿာ ဝါ ဝိဿသန္တီ ဂဏှာတိ, ဥမ္မတ္တိကာယ, အာဒိကမ္မိကာယာတိ။

တတိယသိက္ခါပဒံ နိဋ္ဌိတံ။

၄. စတုတ္ထသိက္ခါပဒံ

၇၄၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဂိလာနာ ဟောတိ။ အထ ခေါ အညတရော ဥပါသကော ယေန ထုလ္လနန္ဒါ ဘိက္ခုနီ တေနုပသင်္ကမိ; ဥပသင်္ကမိတွာ ထုလ္လနန္ဒံ ဘိက္ခုနိံ ဧတဒဝေါစ – ‘‘ကိံ တေ, အယျေ, အဖာသု, ကိံ အာဟရီယတူ’’တိ? ‘‘သပ္ပိနာ မေ, အာဝုသော, အတ္ထော’’တိ။ အထ ခေါ သော ဥပါသကော အညတရဿ အာပဏိကဿ ဃရာ ကဟာပဏဿ သပ္ပိံ အာဟရိတွာ ထုလ္လနန္ဒါယ ဘိက္ခုနိယာ အဒါသိ။ ထုလ္လနန္ဒါ ဘိက္ခုနီ ဧဝမာဟ – ‘‘န မေ, အာဝုသော, သပ္ပိနာ အတ္ထော; တေလေန မေ အတ္ထော’’တိ။ အထ ခေါ သော ဥပါသကော ယေန သော အာပဏိကော တေနုပသင်္ကမိ; ဥပသင်္ကမိတွာ တံ အာပဏိကံ ဧတဒဝေါစ – ‘‘န ကိရာယျော အယျာယ သပ္ပိနာ အတ္ထော, တေလေန အတ္ထော။ ဟန္ဒ တေ သပ္ပိံ, တေလံ မေ ဒေဟီ’’တိ။ ‘‘သစေ မယံ အယျော ဝိက္ကီတံ ဘဏ္ဍံ ပုန အာဒိယိဿာမ [အာဟရိဿာမ (က.)], ကဒါ အမှာကံ ဘဏ္ဍံ ဝိက္ကာယိဿတိ [ဝိက္ကီယိဿတိ (?)]; သပ္ပိဿ ကယေန သပ္ပိ ဟဋံ, တေလဿ ကယံ အာဟရ, တေလံ ဟရိဿသီ’’တိ။ အထ ခေါ သော ဥပါသကော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ အယျာ ထုလ္လနန္ဒါ အညံ ဝိညာပေတွာ အညံ ဝိညာပေဿတီ’’တိ! အဿောသုံ ခေါ ဘိက္ခုနိယော တဿ ဥပါသကဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ။ပေ.။ အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အညံ ဝိညာပေတွာ အညံ ဝိညာပေတီတိ [ဝိညာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အညံ ဝိညာပေတွာ အညံ ဝိညာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၄၉. ‘‘ယာ ပန ဘိက္ခုနီ အညံ ဝိညာပေတွာ အညံ ဝိညာပေယျ, နိဿဂ္ဂိယံ ပါစိတ္တိယ’’န္တိ။

၇၅၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညံ ဝိညာပေတွာတိ ယံ ကိဉ္စိ ဝိညာပေတွာ။

အညံ ဝိညာပေယျာတိ တံ ဌပေတွာ အညံ ဝိညာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ အယျေ အညံ ဝိညာပေတွာ အညံ ဝိညာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီတိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီ’’တိ။

၇၅၁. အညေ အညသညာ အညံ ဝိညာပေတိ, နိဿဂ္ဂိယံ ပါစိတ္တိယံ။ အညေ ဝေမတိကာ အညံ ဝိညာပေတိ, နိဿဂ္ဂိယံ ပါစိတ္တိယံ။ အညေ အနညသညာ အညံ ဝိညာပေတိ, နိဿဂ္ဂိယံ ပါစိတ္တိယံ။

အနညေ အညသညာ အနညံ ဝိညာပေတိ, အာပတ္တိ ဒုက္ကဋဿ။ အနညေ ဝေမတိကာ အနညံ ဝိညာပေတိ, အာပတ္တိ ဒုက္ကဋဿ။ အနညေ အနညသညာ, အနာပတ္တိ။

၇၅၂. အနာပတ္တိ တညေဝ [တဉ္စေဝ (သျာ.)] ဝိညာပေတိ, အညဉ္စ ဝိညာပေတိ, အာနိသံသံ ဒဿေတွာ ဝိညာပေတိ, ဥမ္မတ္တိကာယ, အာဒိကမ္မိကာယာတိ။

စတုတ္ထသိက္ခါပဒံ နိဋ္ဌိတံ။

၅. ပဉ္စမသိက္ခါပဒံ

၇၅၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဂိလာနာ ဟောတိ။ အထ ခေါ အညတရော ဥပါသကော ယေန ထုလ္လနန္ဒါ ဘိက္ခုနီ တေနုပသင်္ကမိ; ဥပသင်္ကမိတွာ ထုလ္လနန္ဒံ ဘိက္ခုနိံ ဧတဒဝေါစ – ‘‘ကစ္စိ, အယျေ, ခမနီယံ ကစ္စိ ယာပနီယ’’န္တိ? ‘‘န မေ, အာဝုသော, ခမနီယံ, န ယာပနီယ’’န္တိ။ ‘‘အမုကဿ, အယျေ, အာပဏိကဿ ဃရေ ကဟာပဏံ နိက္ခိပိဿာမိ, တတော ယံ ဣစ္ဆေယျာသိ တံ အာဟရာပေယျာသီ’’တိ။ ထုလ္လနန္ဒါ ဘိက္ခုနီ အညတရံ သိက္ခမာနံ အာဏာပေသိ – ‘‘ဂစ္ဆ, သိက္ခမာနေ, အမုကဿ အာပဏိကဿ ဃရာ ကဟာပဏဿ တေလံ အာဟရာ’’တိ။ အထ ခေါ သာ သိက္ခမာနာ တဿ အာပဏိကဿ ဃရာ ကဟာပဏဿ တေလံ အာဟရိတွာ ထုလ္လနန္ဒါယ ဘိက္ခုနိယာ အဒါသိ။ ထုလ္လနန္ဒါ ဘိက္ခုနီ ဧဝမာဟ – ‘‘န မေ, သိက္ခမာနေ, တေလေန အတ္ထော, သပ္ပိနာ မေ အတ္ထော’’တိ။ အထ ခေါ သာ သိက္ခမာနာ ယေန သော အာပဏိကော တေနုပသင်္ကမိ; ဥပသင်္ကမိတွာ တံ အာပဏိကံ ဧတဒဝေါစ – ‘‘န ကိရ, အာဝုသော, အယျာယ တေလေန အတ္ထော, သပ္ပိနာ အတ္ထော, ဟန္ဒ တေ တေလံ, သပ္ပိံ မေ ဒေဟီ’’တိ။ ‘‘သစေ မယံ, အယျေ, ဝိက္ကီတံ ဘဏ္ဍံ ပုန အာဒိယိဿာမ, ကဒါ အမှာကံ ဘဏ္ဍံ ဝိက္ကာယိဿတိ! တေလဿ ကယေန တေလံ ဟဋံ, သပ္ပိဿ ကယံ အာဟရ, သပ္ပိံ ဟရိဿသီ’’တိ။ အထ ခေါ သာ သိက္ခမာနာ ရောဒန္တီ အဋ္ဌာသိ။ ဘိက္ခုနိယော တံ သိက္ခမာနံ ဧတဒဝေါစုံ – ‘‘ကိဿ တွံ, သိက္ခမာနေ, ရောဒသီ’’တိ? အထ ခေါ သာ သိက္ခမာနာ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အညံ စေတာပေတွာ အညံ စေတာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အညံ စေတာပေတွာ အညံ စေတာပေတီတိ [စေတာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အညံ စေတာပေတွာ အညံ စေတာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၅၄. ‘‘ယာ ပန ဘိက္ခုနီ အညံ စေတာပေတွာ အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၅၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညံ စေတာပေတွာတိ ယံ ကိဉ္စိ စေတာပေတွာ။

အညံ စေတာပေယျာတိ တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညံ စေတာပေတွာ အညံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၅၆. အညေ အညသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညေ အနညသညာ အညံ စေတာပေတိ, နိဿဂ္ဂိယံ ပါစိတ္တိယံ။

အနညေ အညသညာ အနညံ စေတာပေတိ, အာပတ္တိ ဒုက္ကဋဿ။ အနညေ ဝေမတိကာ အနညံ စေတာပေတိ, အာပတ္တိ ဒုက္ကဋဿ။ အနညေ အနညသညာ အနာပတ္တိ။

၇၅၇. အနာပတ္တိ တညေဝ [တဉ္စေဝ (သျာ.)] စေတာပေတိ, အညဉ္စ စေတာပေတိ, အာနိသံသံ ဒဿေတွာ စေတာပေတိ, ဥမ္မတ္တိကာယ, အာဒိကမ္မိကာယာတိ။

ပဉ္စမသိက္ခါပဒံ နိဋ္ဌိတံ။

၆. ဆဋ္ဌသိက္ခါပဒံ

၇၅၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဥပါသကာ ဘိက္ခုနိသံဃဿ စီဝရတ္ထာယ ဆန္ဒကံ သံဃရိတွာ အညတရဿ ပါဝါရိကဿ ဃရေ ပရိက္ခါရံ နိက္ခိပိတွာ ဘိက္ခုနိယော ဥပသင်္ကမိတွာ ဧတဒဝေါစုံ – ‘‘အမုကဿ, အယျေ, ပါဝါရိကဿ ဃရေ စီဝရတ္ထာယ ပရိက္ခါရော နိက္ခိတ္တော, တတော စီဝရံ အာဟရာပေတွာ ဘာဇေထာ’’တိ။ ဘိက္ခုနိယော တေန ပရိက္ခါရေန ဘေသဇ္ဇံ စေတာပေတွာ ပရိဘုဉ္ဇိံသု။ ဥပါသကာ ဇာနိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပေဿန္တီ’’တိ! အဿောသုံ ခေါ ဘိက္ခုနိယော တေသံ ဥပါသကာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၅၉. ‘‘ယာ ပန ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၆၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညဒတ္ထိကေန ပရိက္ခါရေန အညုဒ္ဒိသိကေနာတိ အညဿတ္ထာယ ဒိန္နေန။

သင်္ဃိကေနာတိ သံဃဿ, န ဂဏဿ, န ဧကဘိက္ခုနိယာ။

အညံ စေတာပေယျာတိ ယံအတ္ထာယ ဒိန္နံ, တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန အညံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၆၁. အညဒတ္ထိကေ အညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ အနညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ။

အနညဒတ္ထိကေ အညဒတ္ထိကသညာ, အာပတ္တိ ဒုက္ကဋဿ။ အနညဒတ္ထိကေ ဝေမတိကာ, အာပတ္တိ ဒုက္ကဋဿ။ အနညဒတ္ထိကေ အနညဒတ္ထိကသညာ, အနာပတ္တိ။

၇၆၂. အနာပတ္တိ သေသကံ ဥပနေတိ, သာမိကေ အပလောကေတွာ ဥပနေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဆဋ္ဌသိက္ခါပဒံ နိဋ္ဌိတံ။

၇. သတ္တမသိက္ခါပဒံ

၇၆၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဥပါသကာ ဘိက္ခုနိသံဃဿ စီဝရတ္ထာယ ဆန္ဒကံ သံဃရိတွာ အညတရဿ ပါဝါရိကဿ ဃရေ ပရိက္ခါရံ နိက္ခိပိတွာ ဘိက္ခုနိယော ဥပသင်္ကမိတွာ ဧတဒဝေါစုံ – ‘‘အမုကဿ, အယျေ, ပါဝါရိကဿ ဃရေ စီဝရတ္ထာယ ပရိက္ခါရော နိက္ခိတ္တော, တတော စီဝရံ အာဟရာပေတွာ ဘာဇေထာ’’တိ။ ဘိက္ခုနိယော တေန စ ပရိက္ခါရေန သယမ္ပိ ယာစိတွာ ဘေသဇ္ဇံ စေတာပေတွာ ပရိဘုဉ္ဇိံသု။ ဥပါသကာ ဇာနိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန သညာစိကေန အညံ စေတာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန သညာစိကေန အညံ စေတာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန သညာစိကေန အညံ စေတာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၆၄. ‘‘ယာ ပန ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန သညာစိကေန အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၆၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညဒတ္ထိကေန ပရိက္ခါရေန အညုဒ္ဒိသိကေနာတိ အညဿတ္ထာယ ဒိန္နေန။

သင်္ဃိကေနာတိ သံဃဿ, န ဂဏဿ, န ဧကဘိက္ခုနိယာ။

သညာစိကေနာတိ သယံ ယာစိတွာ။

အညံ စေတာပေယျာတိ ယံအတ္ထာယ ဒိန္နံ တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညဒတ္ထိကေန ပရိက္ခါရေန အညုဒ္ဒိသိကေန သင်္ဃိကေန သညာစိကေန အညံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၆၆. အညဒတ္ထိကေ အညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ အနညဒတ္ထိကသညာ အညံ စေတာပေတိ , နိဿဂ္ဂိယံ ပါစိတ္တိယံ။ နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ။

အနညဒတ္ထိကေ အညဒတ္ထိကသညာ, အာပတ္တိ ဒုက္ကဋဿ။ အနညဒတ္ထိကေ ဝေမတိကာ, အာပတ္တိ ဒုက္ကဋဿ။ အနညဒတ္ထိကေ အနညဒတ္ထိကသညာ, အနာပတ္တိ။

၇၆၇. အနာပတ္တိ သေသကံ ဥပနေတိ, သာမိကေ အပလောကေတွာ ဥပနေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

သတ္တမသိက္ခါပဒံ နိဋ္ဌိတံ။

၈. အဋ္ဌမသိက္ခါပဒံ

၇၆၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရဿ ပူဂဿ ပရိဝေဏဝါသိကာ ဘိက္ခုနိယော ယာဂုယာ ကိလမန္တိ။ အထ ခေါ သော ပူဂေါ ဘိက္ခုနီနံ ယာဂုအတ္ထာယ ဆန္ဒကံ သံဃရိတွာ အညတရဿ အာပဏိကဿ ဃရေ ပရိက္ခါရံ နိက္ခိပိတွာ ဘိက္ခုနိယော ဥပသင်္ကမိတွာ ဧတဒဝေါစ – ‘‘အမုကဿ, အယျေ, အာပဏိကဿ ဃရေ ယာဂုအတ္ထာယ ပရိက္ခါရော နိက္ခိတ္တော, တတော တဏ္ဍုလံ အာဟရာပေတွာ ယာဂုံ ပစာပေတွာ ပရိဘုဉ္ဇထာ’’တိ။ ဘိက္ခုနိယော တေန ပရိက္ခါရေန ဘေသဇ္ဇံ စေတာပေတွာ ပရိဘုဉ္ဇိံသု။ သော ပူဂေါ ဇာနိတွာ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန အညံ စေတာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန အညံ စေတာပေန္တီတိ? ‘‘သစ္စံ, ဘဂဝါ’’တိ ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန အညံ စေတာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၆၉. ‘‘ယာ ပန ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၇၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညဒတ္ထိကေန ပရိက္ခါရေန အညုဒ္ဒိသိကေနာတိ အညဿတ္ထာယ ဒိန္နေန။

မဟာဇနိကေနာတိ ဂဏဿ, န သံဃဿ, န ဧကဘိက္ခုနိယာ။

အညံ စေတာပေယျာတိ ယံအတ္ထာယ ဒိန္နံ တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန အညံ စေတာပိတံ နိဿဂ္ဂိယံ ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၇၁. အညဒတ္ထိကေ အညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ အနညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ။

အနညဒတ္ထိကေ အညဒတ္ထိကသညာ, အာပတ္တိ ဒုက္ကဋဿ။ အနညဒတ္ထိကေ ဝေမတိကာ, အာပတ္တိ ဒုက္ကဋဿ။ အနညဒတ္ထိကေ အနညဒတ္ထိကသညာ, အနာပတ္တိ။

၇၇၂. အနာပတ္တိ သေသကံ ဥပနေတိ, သာမိကေ အပလောကေတွာ ဥပနေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

အဋ္ဌမသိက္ခါပဒံ နိဋ္ဌိတံ။

၉. နဝမသိက္ခါပဒံ

၇၇၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အညတရဿ ပူဂဿ ပရိဝေဏဝါသိကာ ဘိက္ခုနိယော ယာဂုယာ ကိလမန္တိ။ အထ ခေါ သော ပူဂေါ ဘိက္ခုနီနံ ယာဂုအတ္ထာယ ဆန္ဒကံ သံဃရိတွာ အညတရဿ အာပဏိကဿ ဃရေ ပရိက္ခါရံ နိက္ခိပိတွာ ဘိက္ခုနိယော ဥပသင်္ကမိတွာ ဧတဒဝေါစ – ‘‘အမုကဿ, အယျေ, အာပဏိကဿ ဃရေ ယာဂုအတ္ထာယ ပရိက္ခါရော နိက္ခိတ္တော။ တတော တဏ္ဍုလေ အာဟရာပေတွာ ယာဂုံ ပစာပေတွာ ပရိဘုဉ္ဇထာ’’တိ။ ဘိက္ခုနိယော တေန စ ပရိက္ခါရေန သယမ္ပိ ယာစိတွာ ဘေသဇ္ဇံ စေတာပေတွာ ပရိဘုဉ္ဇိံသု။ သော ပူဂေါ ဇာနိတွာ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန သညာစိကေန အညံ စေတာပေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန သညာစိကေန အညံ စေတာပေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဘိက္ခုနိယော အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန သညာစိကေန အညံ စေတာပေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၇၄. ‘‘ယာ ပန ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန သညာစိကေန အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၇၅. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညဒတ္ထိကေန ပရိက္ခါရေန အညုဒ္ဒိသိကေနာတိ အညဿတ္ထာယ ဒိန္နေန။

မဟာဇနိကေနာတိ ဂဏဿ, န သံဃဿ, န ဧကဘိက္ခုနိယာ။

သညာစိကေနာတိ သယံ ယာစိတွာ။

အညံ စေတာပေယျာတိ ယံအတ္ထာယ ဒိန္နံ တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညဒတ္ထိကေန ပရိက္ခါရေန အညုဒ္ဒိသိကေန မဟာဇနိကေန သညာစိကေန အညံ စေတာပိတံ နိဿဂ္ဂိယံ။ ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၇၆. အညဒတ္ထိကေ အညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ အနညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ။

အနညဒတ္ထိကေ အညဒတ္ထိကသညာ, အာပတ္တိ ဒုက္ကဋဿ။ အနညဒတ္ထိကေ ဝေမတိကာ, အာပတ္တိ ဒုက္ကဋဿ။ အနညဒတ္ထိကေ အနညဒတ္ထိကသညာ အနာပတ္တိ။

၇၇၇. အနာပတ္တိ သေသကံ ဥပနေတိ, သာမိကေ အပလောကေတွာ ဥပနေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

နဝမသိက္ခါပဒံ နိဋ္ဌိတံ။

၁၀. ဒသမသိက္ခါပဒံ

၇၇၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ။ ဗဟူ မနုဿာ ထုလ္လနန္ဒံ ဘိက္ခုနိံ ပယိရုပါသန္တိ။ တေန ခေါ ပန သမယေန ထုလ္လနန္ဒါယ ဘိက္ခုနိယာ ပရိဝေဏံ ဥန္ဒြိယတိ [ဥဒြီယတိ (သျာ.)]။ မနုဿာ ထုလ္လနန္ဒံ ဘိက္ခုနိံ ဧတဒဝေါစုံ – ‘‘ကိဿိဒံ တေ, အယျေ, ပရိဝေဏံ ဥန္ဒြိယတီ’’တိ? ‘‘နတ္ထာဝုသော, ဒါယကာ, နတ္ထိ ကာရကာ’’တိ။ အထ ခေါ တေ မနုဿာ ထုလ္လနန္ဒါယ ဘိက္ခုနိယာ ပရိဝေဏတ္ထာယ ဆန္ဒကံ သံဃရိတွာ ထုလ္လနန္ဒါယ ဘိက္ခုနိယာ ပရိက္ခါရံ အဒံသု။ ထုလ္လနန္ဒါ ဘိက္ခုနီ တေန စ ပရိက္ခါရေန သယမ္ပိ ယာစိတွာ ဘေသဇ္ဇံ စေတာပေတွာ ပရိဘုဉ္ဇိ။ မနုဿာ ဇာနိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ အညဒတ္ထိကေန ပရိက္ခါရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၇၉. ‘‘ယာ ပန ဘိက္ခုနီ အညဒတ္ထိကေန ပရိက္ခါရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၈၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အညဒတ္ထိကေန ပရိက္ခါရေန အညုဒ္ဒိသိကေနာတိ အညဿတ္ထာယ ဒိန္နေန။

ပုဂ္ဂလိကေနာတိ ဧကာယ ဘိက္ခုနိယာ, န သံဃဿ, န ဂဏဿ။

သညာစိကေနာတိ သယံ ယာစိတွာ။

အညံ စေတာပေယျာတိ ယံအတ္ထာယ ဒိန္နံ တံ ဌပေတွာ အညံ စေတာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, အညဒတ္ထိကေန ပရိက္ခါရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၈၁. အညဒတ္ထိကေ အညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ ဝေမတိကာ အညံ စေတာပေတိ, နိဿဂ္ဂိယံ ပါစိတ္တိယံ။ အညဒတ္ထိကေ အနညဒတ္ထိကသညာ အညံ စေတာပေတိ, နိဿဂ္ဂိယံ ပါစိတ္တိယံ။ နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ။

အနညဒတ္ထိကေ အညဒတ္ထိကသညာ, အာပတ္တိ ဒုက္ကဋဿ။ အနညဒတ္ထိကေ ဝေမတိကာ, အာပတ္တိ ဒုက္ကဋဿ။ အနညဒတ္ထိကေ အနညဒတ္ထိကသညာ, အနာပတ္တိ။

၇၈၂. အနာပတ္တိ သေသကံ ဥပနေတိ, သာမိကေ အပလောကေတွာ ဥပနေတိ, အာပဒါသု, ဥမ္မတ္တိကာယ, အာဒိကမ္မိကာယာတိ။

ဒသမသိက္ခါပဒံ နိဋ္ဌိတံ။

၁၁. ဧကာဒသမသိက္ခါပဒံ

၇၈၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ။ အထ ခေါ ရာဇာ ပသေနဒိ ကောသလော သီတကာလေ မဟဂ္ဃံ ကမ္ဗလံ ပါရုပိတွာ ယေန ထုလ္လနန္ဒါ ဘိက္ခုနီ တေနုပသင်္ကမိ; ဥပသင်္ကမိတွာ ထုလ္လနန္ဒံ ဘိက္ခုနိံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ ရာဇာနံ ပသေနဒိံ ကောသလံ ထုလ္လနန္ဒါ ဘိက္ခုနီ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ ရာဇာ ပသေနဒိ ကောသလော ထုလ္လနန္ဒါယ ဘိက္ခုနိယာ ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ထုလ္လနန္ဒံ ဘိက္ခုနိံ ဧတဒဝေါစ – ‘‘ဝဒေယျာသိ, အယျေ, ယေန အတ္ထော’’တိ? ‘‘သစေ မေ တွံ, မဟာရာဇ, ဒါတုကာမောသိ, ဣမံ ကမ္ဗလံ ဒေဟီ’’တိ။ အထ ခေါ ရာဇာ ပသေနဒိ ကောသလော ထုလ္လနန္ဒါယ ဘိက္ခုနိယာ ကမ္ဗလံ ဒတွာ ဥဋ္ဌာယာသနာ ထုလ္လနန္ဒံ ဘိက္ခုနိံ အဘိဝါဒေတွာ ပဒက္ခိဏံ ကတွာ ပက္ကာမိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘မဟိစ္ဆာ ဣမာ ဘိက္ခုနိယော အသန္တုဋ္ဌာ။ ကထဉှိ နာမ ရာဇာနံ ကမ္ဗလံ ဝိညာပေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ရာဇာနံ ကမ္ဗလံ ဝိညာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ရာဇာနံ ကမ္ဗလံ ဝိညာပေတီတိ [ဝိညာပေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ရာဇာနံ ကမ္ဗလံ ဝိညာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၈၄. ‘‘ဂရုပါဝုရဏံ [ပါပုရဏံ (သီ. သျာ.)] ပန ဘိက္ခုနိယာ စေတာပေန္တိယာ စတုက္ကံသပရမံ စေတာပေတဗ္ဗံ။ တတော စေ ဥတ္တရိ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၈၅. ဂရုပါဝုရဏံ နာမ ယံ ကိဉ္စိ သီတကာလေ ပါဝုရဏံ။

စေတာပေန္တိယာတိ ဝိညာပေန္တိယာ။

စတုက္ကံသပရမံ စေတာပေတဗ္ဗန္တိ သောဠသကဟာပဏဂ္ဃနကံ စေတာပေတဗ္ဗံ။

တတော စေ ဥတ္တရိ စေတာပေယျာတိ တတုတ္တရိ ဝိညာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ‘‘ဣဒံ မေ, အယျေ, ဂရုပါဝုရဏံ အတိရေကစတုက္ကံသပရမံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီ’’တိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၈၆. အတိရေကစတုက္ကံသေ အတိရေကသညာ စေတာပေတိ, နိဿဂ္ဂိယံ ပါစိတ္တိယံ။ အတိရေကစတုက္ကံသေ ဝေမတိကာ စေတာပေတိ, နိဿဂ္ဂိယံ ပါစိတ္တိယံ ။ အတိရေကစတုက္ကံသေ ဦနကသညာ စေတာပေတိ, နိဿဂ္ဂိယံ ပါစိတ္တိယံ။

ဦနကစတုက္ကံသေ အတိရေကသညာ, အာပတ္တိ ဒုက္ကဋဿ။ ဦနကစတုက္ကံသေ ဝေမတိကာ, အာပတ္တိ ဒုက္ကဋဿ။ ဦနကစတုက္ကံသေ ဦနကသညာ, အနာပတ္တိ။

၇၈၇. အနာပတ္တိ စတုက္ကံသပရမံ စေတာပေတိ, ဦနကစတုက္ကံသပရမံ စေတာပေတိ, ဉာတကာနံ, ပဝါရိတာနံ, အညဿတ္ထာယ, အတ္တနော ဓနေန, မဟဂ္ဃံ စေတာပေတုကာမဿ အပ္ပဂ္ဃံ စေတာပေတိ, ဥမ္မတ္တိကာယ, အာဒိကမ္မိကာယာတိ။

ဧကာဒသမသိက္ခါပဒံ နိဋ္ဌိတံ။

၁၂. ဒွါဒသမသိက္ခါပဒံ

၇၈၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ။ အထ ခေါ ရာဇာ ပသေနဒိ ကောသလော ဥဏှကာလေ မဟဂ္ဃံ ခေါမံ ပါရုပိတွာ ယေန ထုလ္လနန္ဒါ ဘိက္ခုနီ တေနုပသင်္ကမိ; ဥပသင်္ကမိတွာ ထုလ္လနန္ဒံ ဘိက္ခုနိံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ ရာဇာနံ ပသေနဒိံ ကောသလံ ထုလ္လနန္ဒါ ဘိက္ခုနီ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ ရာဇာ ပသေနဒိ ကောသလော ထုလ္လနန္ဒါယ ဘိက္ခုနိယာ ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ထုလ္လနန္ဒံ ဘိက္ခုနိံ ဧတဒဝေါစ – ‘‘ဝဒေယျာသိ, အယျေ, ယေန အတ္ထော’’တိ ။ ‘‘သစေ မေ တွံ, မဟာရာဇ, ဒါတုကာမောသိ, ဣမံ ခေါမံ ဒေဟီ’’တိ။ အထ ခေါ ရာဇာ ပသေနဒိ ကောသလော ထုလ္လနန္ဒါယ ဘိက္ခုနိယာ ခေါမံ ဒတွာ ဥဋ္ဌာယာသနာ ထုလ္လနန္ဒံ ဘိက္ခုနိံ အဘိဝါဒေတွာ ပဒက္ခိဏံ ကတွာ ပက္ကာမိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘မဟိစ္ဆာ ဣမာ ဘိက္ခုနိယော အသန္တုဋ္ဌာ။ ကထဉှိ နာမ ရာဇာနံ ခေါမံ ဝိညာပေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ရာဇာနံ ခေါမံ ဝိညာပေဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ရာဇာနံ ခေါမံ ဝိညာပေတီတိ [ဝိညာပေသီတိ (က.)]? ‘‘သစ္စံ, ဘဂဝါတိ’’။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ရာဇာနံ ခေါမံ ဝိညာပေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၇၈၉. ‘‘လဟုပါဝုရဏံ ပန ဘိက္ခုနိယာ စေတာပေန္တိယာ အဍ္ဎတေယျကံသပရမံ စေတာပေတဗ္ဗံ။ တတော စေ ဥတ္တရိ စေတာပေယျ, နိဿဂ္ဂိယံ ပါစိတ္တိယ’’န္တိ။

၇၉၀. လဟုပါဝုရဏံ နာမ ယံ ကိဉ္စိ ဥဏှကာလေ ပါဝုရဏံ။

စေတာပေန္တိယာတိ ဝိညာပေန္တိယာ။

အဍ္ဎတေယျကံသပရမံ စေတာပေတဗ္ဗန္တိ ဒသကဟာပဏဂ္ဃနကံ စေတာပေတဗ္ဗံ။

တတော စေ ဥတ္တရိ စေတာပေယျာတိ တတုတ္တရိ ဝိညာပေတိ, ပယောဂေ ဒုက္ကဋံ။ ပဋိလာဘေန နိဿဂ္ဂိယံ ဟောတိ။ နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ။ ဧဝဉ္စ ပန, ဘိက္ခဝေ, နိဿဇ္ဇိတဗ္ဗံ။ပေ.။ ဣဒံ မေ, အယျေ, လဟုပါဝုရဏံ အတိရေကအဍ္ဎတေယျကံသပရမံ စေတာပိတံ နိဿဂ္ဂိယံ, ဣမာဟံ သံဃဿ နိဿဇ္ဇာမီတိ။ပေ.။ ဒဒေယျာတိ။ပေ.။ ဒဒေယျုန္တိ။ပေ.။ အယျာယ ဒမ္မီတိ။

၇၉၁. အတိရေကအဍ္ဎတေယျကံသေ အတိရေကသညာ စေတာပေတိ, နိဿဂ္ဂိယံ ပါစိတ္တိယံ။ အတိရေကအဍ္ဎတေယျကံသေ ဝေမတိကာ စေတာပေတိ, နိဿဂ္ဂိယံ ပါစိတ္တိယံ။ အတိရေကအဍ္ဎတေယျကံသေ ဦနကသညာ စေတာပေတိ, နိဿဂ္ဂိယံ ပါစိတ္တိယံ။

ဦနကအဍ္ဎတေယျကံသေ အတိရေကသညာ, အာပတ္တိ ဒုက္ကဋဿ။ ဦနကအဍ္ဎတေယျကံသေ ဝေမတိကာ, အာပတ္တိ ဒုက္ကဋဿ။ ဦနကအဍ္ဎတေယျကံသေ ဦနကသညာ , အနာပတ္တိ။

၇၉၂. အနာပတ္တိ အဍ္ဎတေယျကံသပရမံ စေတာပေတိ, ဦနကအဍ္ဎတေယျကံသပရမံ စေတာပေတိ, ဉာတကာနံ, ပဝါရိတာနံ, အညဿတ္ထာယ, အတ္တနော ဓနေန, မဟဂ္ဃံ စေတာပေတုကာမဿ အပ္ပဂ္ဃံ စေတာပေတိ, ဥမ္မတ္တိကာယ, အာဒိကမ္မိကာယာတိ။

ဒွါဒသမသိက္ခါပဒံ နိဋ္ဌိတံ။

ဥဒ္ဒိဋ္ဌာ ခေါ, အယျာယော, တိံသ နိဿဂ္ဂိယာ ပါစိတ္တိယာ ဓမ္မာ။ တတ္ထာယျာယော ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယျာယော, တသ္မာ တုဏှီ, ဧဝမေတံ ဓါရယာမီတိ။

ဘိက္ခုနိဝိဘင်ဂေ နိဿဂ္ဂိယကဏ္ဍံ နိဋ္ဌိတံ။