ပါရာဇိကကဏ္ဍံ (ဘိက္ခုနီဝိဘင်္ဂေါ)

၁. ပါရာဇိကကဏ္ဍံ (ဘိက္ခုနီဝိဘင်္ဂေါ)

၁. ပဌမပါရာဇိကံ

၆၅၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သာဠှော မိဂါရနတ္တာ ဘိက္ခုနိသံဃဿ ဝိဟာရံ ကတ္တုကာမော ဟောတိ။ အထ ခေါ သာဠှော မိဂါရနတ္တာ ဘိက္ခုနိယော ဥပသင်္ကမိတွာ ဧတဒဝေါစ – ‘‘ဣစ္ဆာမဟံ, အယျေ, ဘိက္ခုနိသင်္ဃဿ ဝိဟာရံ ကာတုံ။ ဒေထ မေ နဝကမ္မိကံ ဘိက္ခုနိ’’န္တိ။ တေန ခေါ ပန သမယေန စတဿော ဘဂိနိယော ဘိက္ခုနီသု ပဗ္ဗဇိတာ ဟောန္တိ – နန္ဒါ, နန္ဒဝတီ, သုန္ဒရီနန္ဒါ, ထုလ္လနန္ဒါတိ။ တာသု သုန္ဒရီနန္ဒါ ဘိက္ခုနီ တရုဏပဗ္ဗဇိတာ အဘိရူပါ ဟောတိ ဒဿနီယာ ပါသာဒိကာ ပဏ္ဍိတာ ဗျတ္တာ မေဓါဝိနီ ဒက္ခါ အနလသာ, တတြုပါယာယ ဝီမံသာယ သမန္နာဂတာ, အလံ ကာတုံ အလံ သံဝိဓါတုံ။ အထ ခေါ ဘိက္ခုနိသံဃော သုန္ဒရီနန္ဒံ ဘိက္ခုနိံ သမ္မန္နိတွာ သာဠှဿ မိဂါရနတ္တုနော နဝကမ္မိကံ အဒါသိ။ တေန ခေါ ပန သမယေန သုန္ဒရီနန္ဒါ ဘိက္ခုနီ သာဠှဿ မိဂါရနတ္တုနော နိဝေသနံ အဘိက္ခဏံ ဂစ္ဆတိ – ‘‘ဝါသိံ ဒေထ, ပရသုံ [ဖရသုံ (သျာ. က.)] ဒေထ, ကုဌာရိံ [ကုဓါရိံ (က.)] ဒေထ, ကုဒ္ဒါလံ ဒေထ, နိခါဒနံ ဒေထာ’’တိ။ သာဠှောပိ မိဂါရနတ္တာ ဘိက္ခုနုပဿယံ အဘိက္ခဏံ ဂစ္ဆတိ ကတာကတံ ဇာနိတုံ။ တေ အဘိဏှဒဿနေန ပဋိဗဒ္ဓစိတ္တာ အဟေသုံ။

အထ ခေါ သာဠှော မိဂါရနတ္တာ သုန္ဒရီနန္ဒံ ဘိက္ခုနိံ ဒူသေတုံ ဩကာသံ အလဘမာနော ဧတဒေဝတ္ထာယ ဘိက္ခုနိသင်္ဃဿ ဘတ္တံ အကာသိ။ အထ ခေါ သာဠှော မိဂါရနတ္တာ ဘတ္တဂ္ဂေ အာသနံ ပညပေန္တော – ‘‘ဧတ္တကာ ဘိက္ခုနိယော အယျာယ သုန္ဒရီနန္ဒါယ ဝုဍ္ဎတရာ’’တိ ဧကမန္တံ အာသနံ ပညပေသိ ‘‘ဧတ္တကာ နဝကတရာ’’တိ – ဧကမန္တံ အာသနံ ပညပေသိ။ ပဋိစ္ဆန္နေ ဩကာသေ နိကူဋေ သုန္ဒရီနန္ဒါယ ဘိက္ခုနိယာ အာသနံ ပညပေသိ, ယထာ ထေရာ ဘိက္ခုနိယော ဇာနေယျုံ – ‘‘နဝကာနံ ဘိက္ခုနီနံ သန္တိကေ နိသိန္နာ’’တိ; နဝကာပိ ဘိက္ခုနိယော ဇာနေယျုံ – ‘‘ထေရာနံ ဘိက္ခုနီနံ သန္တိကေ နိသိန္နာ’’တိ။ အထ ခေါ သာဠှော မိဂါရနတ္တာ ဘိက္ခုနိသင်္ဃဿ ကာလံ အာရောစာပေသိ – ‘‘ကာလော, အယျေ, နိဋ္ဌိတံ ဘတ္တ’’န္တိ။ သုန္ဒရီနန္ဒါ ဘိက္ခုနီ သလ္လက္ခေတွာ – ‘‘န ဗဟုကတော သာဠှော မိဂါရနတ္တာ ဘိက္ခုနိသင်္ဃဿ ဘတ္တံ အကာသိ; မံ သော ဒူသေတုကာမော။ သစာဟံ ဂမိဿာမိ ဝိဿရော မေ ဘဝိဿတီ’’တိ, အန္တေဝါသိနိံ ဘိက္ခုနိံ အာဏာပေသိ – ‘‘ဂစ္ဆ မေ ပိဏ္ဍပါတံ နီဟရ။ ယော စေ မံ ပုစ္ဆတိ, ‘ဂိလာနာ’တိ ပဋိဝေဒေဟီ’’တိ။ ‘‘ဧဝံ, အယျေ’’တိ ခေါ သာ ဘိက္ခုနီ သုန္ဒရီနန္ဒါယ ဘိက္ခုနိယာ ပစ္စဿောသိ။

တေန ခေါ ပန သမယေန သာဠှော မိဂါရနတ္တာ ဗဟိဒွါရကောဋ္ဌကေ ဌိတော ဟောတိ သုန္ဒရီနန္ဒံ ဘိက္ခုနိံ ပဋိပုစ္ဆန္တော – ‘‘ကဟံ, အယျေ, အယျာ သုန္ဒရီနန္ဒါ? ကဟံ, အယျေ, အယျာ သုန္ဒရီနန္ဒါ’’တိ? ဧဝံ ဝုတ္တေ သုန္ဒရီနန္ဒါယ ဘိက္ခုနိယာ အန္တေဝါသိနီ ဘိက္ခုနီ သာဠှံ မိဂါရနတ္တာရံ ဧတဒဝေါစ – ‘‘ဂိလာနာဝုသော; ပိဏ္ဍပါတံ နီဟရိဿာမီ’’တိ။ အထ ခေါ သာဠှော မိဂါရနတ္တာ – ‘‘ယမ္ပါဟံ အတ္ထာယ [ယံပါဟံ (သျာ.)] ဘိက္ခုနိသင်္ဃဿ ဘတ္တံ အကာသိံ အယျာယ သုန္ဒရီနန္ဒါယ ကာရဏာ’’တိ မနုဿေ အာဏာပေတွာ – ‘‘ဘိက္ခုနိသံဃံ ဘတ္တေန ပရိဝိသထာ’’တိ ဝတွာ ယေန ဘိက္ခုနုပဿယော တေနုပသင်္ကမိ။ တေန ခေါ ပန သမယေန သုန္ဒရီနန္ဒါ ဘိက္ခုနီ ဗဟာရာမကောဋ္ဌကေ ဌိတာ ဟောတိ သာဠှံ မိဂါရနတ္တာရံ ပတိမာနေန္တီ။ အဒ္ဒသာ ခေါ သုန္ဒရီနန္ဒါ ဘိက္ခုနီ သာဠှံ မိဂါရနတ္တာရံ ဒူရတောဝ အာဂစ္ဆန္တံ။ ဒိသွာန ဥပဿယံ ပဝိသိတွာ သသီသံ ပါရုပိတွာ မဉ္စကေ နိပဇ္ဇိ။ အထ ခေါ သာဠှော မိဂါရနတ္တာ ယေန သုန္ဒရီနန္ဒါ ဘိက္ခုနီ တေနုပသင်္ကမိ; ဥပသင်္ကမိတွာ သုန္ဒရီနန္ဒံ ဘိက္ခုနိံ ဧတဒဝေါစ – ‘‘ကိံ တေ, အယျေ, အဖာသု, ကိဿ နိပန္နာသီ’’တိ? ‘‘ဧဝဉှေတံ, အာဝုသော, ဟောတိ ယာ အနိစ္ဆန္တံ ဣစ္ဆတီ’’တိ။ ‘‘ကျာဟံ တံ, အယျေ , န ဣစ္ဆိဿာမိ? အပိ စာဟံ ဩကာသံ န လဘာမိ တံ ဒူသေတု’’န္တိ။ အဝဿုတော အဝဿုတာယ သုန္ဒရီနန္ဒါယ ဘိက္ခုနိယာ ကာယသံသဂ္ဂံ သမာပဇ္ဇိ။

တေန ခေါ ပန သမယေန အညတရာ ဘိက္ခုနီ ဇရာဒုဗ္ဗလာ စရဏဂိလာနာ သုန္ဒရီနန္ဒါယ ဘိက္ခုနိယာ အဝိဒူရေ နိပန္နာ ဟောတိ။ အဒ္ဒသာ ခေါ သာ ဘိက္ခုနီ သာဠှံ မိဂါရနတ္တာရံ အဝဿုတံ အဝဿုတာယ သုန္ဒရီနန္ဒါယ ဘိက္ခုနိယာ ကာယသံသဂ္ဂံ သမာပဇ္ဇန္တံ။ ဒိသွာန ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ အယျာ သုန္ဒရီနန္ဒါ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိဿတီ’’တိ ! အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ သန္တုဋ္ဌာ လဇ္ဇိနိယော ကုက္ကုစ္စိကာ သိက္ခါကာမာ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ သုန္ဒရီနန္ဒါ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိဿတီ’’တိ! အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ယေ တေ ဘိက္ခူ အပ္ပိစ္ဆာ သန္တုဋ္ဌာ လဇ္ဇိနော ကုက္ကုစ္စကာ သိက္ခါကာမာ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သုန္ဒရီနန္ဒါ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိဿတီ’’တိ!

အထ ခေါ တေ ဘိက္ခူ သုန္ဒရီနန္ဒံ ဘိက္ခုနိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, သုန္ဒရီနန္ဒါ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယတီ’’တိ [သာဒိယီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, ဘိက္ခဝေ, သုန္ဒရီနန္ဒါယ ဘိက္ခုနိယာ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ, ဘိက္ခဝေ, သုန္ဒရီနန္ဒါ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ။ အထ ခွေတံ, ဘိက္ခဝေ , အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။ အထ ခေါ ဘဂဝါ သုန္ဒရီနန္ဒံ ဘိက္ခုနိံ အနေကပရိယာယေန ဝိဂရဟိတွာ ဒုဗ္ဘရတာယ ဒုပ္ပေါသတာယ မဟိစ္ဆတာယ အသန္တုဋ္ဌိတာယ [အသန္တုဋ္ဌတာယ (သျာ.), အသန္တုဋ္ဌိယာ (က.)] သင်္ဂဏိကာယ ကောသဇ္ဇဿ အဝဏ္ဏံ ဘာသိတွာ, အနေကပရိယာယေန သုဘရတာယ သုပေါသတာယ အပ္ပိစ္ဆဿ သန္တုဋ္ဌဿ [သန္တုဋ္ဌိယာ (က.)] သလ္လေခဿ ဓုတဿ ပါသာဒိကဿ အပစယဿ ဝီရိယာရမ္ဘဿ ဝဏ္ဏံ ဘာသိတွာ, ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခုနီနံ သိက္ခါပဒံ ပညပေဿာမိ ဒသ အတ္ထဝသေ ပဋိစ္စ – သင်္ဃသုဋ္ဌုတာယ, သင်္ဃဖာသုတာယ, ဒုမ္မင်္ကူနံ ဘိက္ခုနီနံ နိဂ္ဂဟာယ , ပေသလာနံ ဘိက္ခုနီနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၆၅၇. ‘‘ယာ ပန ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ အာမသနံ ဝါ ပရာမသနံ ဝါ ဂဟဏံ ဝါ ဆုပနံ ဝါ ပဋိဣဠနံ ဝါ သာဒိယေယျ, အယမ္ပိ ပါရာဇိကာ ဟောတိ အသံဝါသာ ဥဗ္ဘဇာဏုမဏ္ဍလိကာ’’တိ။

၆၅၈. ယာ ပနာတိ ယာ ယာဒိသာ ယထာယုတ္တာ ယထာဇစ္စာ ယထာနာမာ ယထာဂေါတ္တာ ယထာသီလာ ယထာဝိဟာရိနီ ယထာဂေါစရာ ထေရာ ဝါ နဝါ ဝါ မဇ္ဈိမာ ဝါ, ဧသာ ဝုစ္စတိ ယာ ပနာတိ။

ဘိက္ခုနီတိ ဘိက္ခိကာတိ ဘိက္ခုနီ; ဘိက္ခါစရိယံ အဇ္ဈုပဂတာတိ ဘိက္ခုနီ; ဘိန္နပဋဓရာတိ ဘိက္ခုနီ ; သမညာယ ဘိက္ခုနီ; ပဋိညာယ ဘိက္ခုနီ; ဧဟိ ဘိက္ခုနီတိ ဘိက္ခုနီ; တီဟိ သရဏဂမနေဟိ ဥပသမ္ပန္နာတိ ဘိက္ခုနီ; ဘဒြာ ဘိက္ခုနီ; သာရာ ဘိက္ခုနီ; သေခါ ဘိက္ခုနီ; အသေခါ ဘိက္ခုနီ; သမဂ္ဂေန ဥဘတောသံဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နာတိ ဘိက္ခုနီ။ တတြ ယာယံ ဘိက္ခုနီ သမဂ္ဂေန ဥဘတောသံဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နာ, အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဝဿုတာ နာမ သာရတ္တာ အပေက္ခဝတီ ပဋိဗဒ္ဓစိတ္တာ။

အဝဿုတော နာမ သာရတ္တော အပေက္ခဝါ ပဋိဗဒ္ဓစိတ္တော။

ပုရိသပုဂ္ဂလော နာမ မနုဿပုရိသော န ယက္ခေါ န ပေတော န တိရစ္ဆာနဂတော ဝိညူ ပဋိဗလော ကာယသံသဂ္ဂံ သမာပဇ္ဇိတုံ။

အဓက္ခကန္တိ ဟေဋ္ဌက္ခကံ။

ဥဗ္ဘဇာဏုမဏ္ဍလန္တိ ဥပရိဇာဏုမဏ္ဍလံ။

အာမသနံ နာမ အာမဋ္ဌမတ္တံ။

ပရာမသနံ နာမ ဣတောစိတော စ သဉ္စောပနံ။

ဂဟဏံ နာမ ဂဟိတမတ္တံ။

ဆုပနံ နာမ ဖုဋ္ဌမတ္တံ။

ပဋိဣဠနံ ဝါ သာဒိယေယျာတိ အင်္ဂံ ဂဟေတွာ နိပ္ပီဠနံ သာဒိယတိ။

အယမ္ပီတိ ပုရိမာယော ဥပါဒါယ ဝုစ္စတိ။

ပါရာဇိကာ ဟောတီတိ သေယျထာပိ နာမ ပုရိသော သီသစ္ဆိန္နော အဘဗ္ဗော တေန သရီရဗန္ဓနေန ဇီဝိတုံ, ဧဝမေဝ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ အာမသနံ ဝါ ပရာမသနံ ဝါ ဂဟဏံ ဝါ ဆုပနံ ဝါ ပဋိဣဠနံ ဝါ သာဒိယန္တီ အဿမဏီ ဟောတိ အသကျဓီတာ။ တေန ဝုစ္စတိ ပါရာဇိကာ ဟောတီတိ။

အသံဝါသာတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ, ဧသော သံဝါသော နာမ။ သော တာယ သဒ္ဓိံ နတ္ထိ, တေန ဝုစ္စတိ အသံဝါသာတိ။

၆၅၉. ဥဘတောအဝဿုတေ အဓက္ခကံ ဥဗ္ဘဇာဏုမဏ္ဍလံ ကာယေန ကာယံ အာမသတိ, အာပတ္တိ ပါရာဇိကဿ။ ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယဿ။ ကာယပဋိဗဒ္ဓေန ကာယံ အာမသတိ, အာပတ္တိ ထုလ္လစ္စယဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ , အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

ဥဗ္ဘက္ခကံ အဓေါဇာဏုမဏ္ဍလံ ကာယေန ကာယံ အာမသတိ, အာပတ္တိ ထုလ္လစ္စယဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

၆၆၀. ဧကတောအဝဿုတေ အဓက္ခကံ ဥဗ္ဘဇာဏုမဏ္ဍလံ ကာယေန ကာယံ အာမသတိ , အာပတ္တိ ထုလ္လစ္စယဿ။ ကာယေန ကာယပဋိဗဒ္ဓံ အာမသတိ , အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

ဥဗ္ဘက္ခကံ အဓေါဇာဏုမဏ္ဍလံ ကာယေန ကာယံ အာမသတိ, အာပတ္တိ ဒုက္ကဋဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

၆၆၁. ဥဘတောအဝဿုတေ ယက္ခဿ ဝါ ပေတဿ ဝါ ပဏ္ဍကဿ ဝါ တိရစ္ဆာနဂတမနုဿဝိဂ္ဂဟဿ ဝါ အဓက္ခကံ ဥဗ္ဘဇာဏုမဏ္ဍလံ ကာယေန ကာယံ အာမသတိ, အာပတ္တိ ထုလ္လစ္စယဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

ဥဗ္ဘက္ခကံ အဓေါဇာဏုမဏ္ဍလံ ကာယေန ကာယံ အာမသတိ, အာပတ္တိ ဒုက္ကဋဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

၆၆၂. ဧကတောအဝဿုတေ အဓက္ခကံ ဥဗ္ဘဇာဏုမဏ္ဍလံ ကာယေန ကာယံ အာမသတိ, အာပတ္တိ ဒုက္ကဋဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

ဥဗ္ဘက္ခကံ အဓေါဇာဏုမဏ္ဍလံ ကာယေန ကာယံ အာမသတိ, အာပတ္တိ ဒုက္ကဋဿ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋဿ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

နိဿဂ္ဂိယေန ကာယံ အာမသတိ, အာပတ္တိ ဒုက္ကဋဿ။ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။

၆၆၃. အနာပတ္တိ အသဉ္စိစ္စ, အဿတိယာ, အဇာနန္တိယာ, အသာဒိယန္တိယာ, ဥမ္မတ္တိကာယ, ခိတ္တစိတ္တာယ, ဝေဒနာဋ္ဋာယ, အာဒိကမ္မိကာယာတိ။

ပဌမပါရာဇိကံ သမတ္တံ [ဘိက္ခုနိဝိဘင်္ဂေ သိက္ခာပဒဂဏနာ ဘိက္ခူဟိ§အသာဓါရဏဝသေန ပကာသိတာတိ ဝေဒိတဗ္ဗာ]။

၂. ဒုတိယပါရာဇိကံ

၆၆၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန သုန္ဒရီနန္ဒါ ဘိက္ခုနီ သာဠှေန မိဂါရနတ္တုနာ ဂဗ္ဘိနီ ဟောတိ ။ ယာဝ ဂဗ္ဘော တရုဏော အဟောသိ တာဝ ဆာဒေသိ။ ပရိပက္ကေ ဂဗ္ဘေ ဝိဗ္ဘမိတွာ ဝိဇာယိ။ ဘိက္ခုနိယော ထုလ္လနန္ဒံ ဘိက္ခုနိံ ဧတဒဝေါစုံ – ‘‘သုန္ဒရီနန္ဒါ ခေါ, အယျေ, အစိရဝိဗ္ဘန္တာ ဝိဇာတာ။ ကစ္စိ နော သာ ဘိက္ခုနီယေဝ သမာနာ ဂဗ္ဘိနီ’’တိ? ‘‘ဧဝံ, အယျေ’’တိ။ ‘‘ကိဿ ပန တွံ, အယျေ, ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေသိ န ဂဏဿ အာရောစေသီ’’တိ? ‘‘ယော ဧတိဿာ အဝဏ္ဏော မယှေသော အဝဏ္ဏော, ယာ ဧတိဿာ အကိတ္တိ မယှေသာ အကိတ္တိ, ယော ဧတိဿာ အယသော မယှေသော အယသော, ယော ဧတိဿာ အလာဘော မယှေသော အလာဘော။ ကျာဟံ, အယျေ, အတ္တနော အဝဏ္ဏံ အတ္တနော အကိတ္တိံ အတ္တနော အယသံ အတ္တနော အလာဘံ ပရေသံ အာရောစေဿာမီ’’တိ? ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေဿတိ န ဂဏဿ အာရောစေဿတီ’’တိ! အထ ခေါ တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ [ယေ တေ ဘိက္ခူ။ပေ.။ (?)] ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေတိ [ပဋိစောဒေသိ။ အာရောစေသီတိ (က.)] န ဂဏဿ အာရောစေတီ’’တိ [ပဋိစောဒေသိ။ အာရောစေသီတိ (က.)]? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေဿတိ န ဂဏဿ အာရောစေဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၆၆၅. ‘‘ယာ ပန ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေယျ န ဂဏဿ အာရောစေယျ, ယဒါ စ သာ ဌိတာ ဝါ အဿ စုတာ ဝါ နာသိတာ ဝါ အဝဿဋာ ဝါ, သာ ပစ္ဆာ ဧဝံ ဝဒေယျ – ‘ပုဗ္ဗေဝါဟံ, အယျေ, အညာသိံ ဧတံ ဘိက္ခုနိံ ဧဝရူပါ စ ဧဝရူပါ စ သာ ဘဂိနီတိ , နော စ ခေါ အတ္တနာ ပဋိစောဒေဿံ န ဂဏဿ အာရောစေဿ’န္တိ, အယမ္ပိ ပါရာဇိကာ ဟောတိ အသံဝါသာ ဝဇ္ဇပ္ပဋိစ္ဆာဒိကာ’’တိ။

၆၆၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

ဇာနာတိ နာမ သာမံ ဝါ ဇာနာတိ, အညေ ဝါ တဿာ အာရောစေန္တိ, သာ ဝါ အာရောစေတိ။

ပါရာဇိကံ ဓမ္မံ အဇ္ဈာပန္နန္တိ အဋ္ဌန္နံ ပါရာဇိကာနံ အညတရံ ပါရာဇိကံ အဇ္ဈာပန္နံ။

နေဝတ္တနာ ပဋိစောဒေယျာတိ န သယံ စောဒေယျ။

န ဂဏဿ အာရောစေယျာတိ န အညာသံ ဘိက္ခုနီနံ အာရောစေယျ။

ယဒါ စ သာ ဌိတာ ဝါ အဿ စုတာ ဝါတိ ဌိတာ နာမ သလိင်္ဂေ ဌိတာ ဝုစ္စတိ။ စုတာ နာမ ကာလင်္ကတာ ဝုစ္စတိ။ နာသိတာ နာမ သယံ ဝါ ဝိဗ္ဘန္တာ ဟောတိ အညေဟိ ဝါ နာသိတာ။ အဝဿဋာ နာမ တိတ္ထာယတနံ သင်္ကန္တာ ဝုစ္စတိ။ သာ ပစ္ဆာ ဧဝံ ဝဒေယျ – ‘‘ပုဗ္ဗေဝါဟံ, အယျေ, အညာသိံ ဧတံ ဘိက္ခုနိံ ဧဝရူပါ စ ဧဝရူပါ စ သာ ဘဂိနီ’’တိ။

နော စ ခေါ အတ္တနာ ပဋိစောဒေဿန္တိ သယံ ဝါ န စောဒေဿံ။

န ဂဏဿ အာရောစေဿန္တိ န အညာသံ ဘိက္ခုနီနံ အာရောစေဿံ။

အယမ္ပီတိ ပုရိမာယော ဥပါဒါယ ဝုစ္စတိ။

ပါရာဇိကာ ဟောတီတိ သေယျထာပိ နာမ ပဏ္ဍုပလာသော ဗန္ဓနာ ပမုတ္တော အဘဗ္ဗော ဟရိတတ္ထာယ, ဧဝမေဝ ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေဿာမိ န ဂဏဿ အာရောစေဿာမီတိ ဓုရံ နိက္ခိတ္တမတ္တေ အဿမဏီ ဟောတိ အသကျဓီတာ။ တေန ဝုစ္စတိ ပါရာဇိကာ ဟောတီတိ။

အသံဝါသာတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ။ ဧသော သံဝါသော နာမ။ သော တာယ သဒ္ဓိံ နတ္ထိ။ တေန ဝုစ္စတိ အသံဝါသာတိ။

၆၆၇. အနာပတ္တိ ‘‘သင်္ဃဿ ဘဏ္ဍနံ ဝါ ကလဟော ဝါ ဝိဂ္ဂဟော ဝါ ဝိဝါဒေါ ဝါ ဘဝိဿတီ’’တိ နာရောစေတိ, ‘‘သင်္ဃဘေဒေါ ဝါ သင်္ဃရာဇိ ဝါ ဘဝိဿတီ’’တိ နာရောစေတိ, ‘‘အယံ ကက္ခဠာ ဖရုသာ ဇီဝိတန္တရာယံ ဝါ ဗြဟ္မစရိယန္တရာယံ ဝါ ကရိဿတီ’’တိ နာရောစေတိ, အညာ ပတိရူပါ ဘိက္ခုနိယော အပဿန္တီ နာရောစေတိ, နစ္ဆာဒေတုကာမာ နာရောစေတိ, ပညာယိဿတိ သကေန ကမ္မေနာတိ နာရောစေတိ, ဥမ္မတ္တိကာယ။ပေ.။ အာဒိကမ္မိကာယာတိ။

ဒုတိယပါရာဇိကံ သမတ္တံ။

၃. တတိယပါရာဇိကံ

၆၆၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ထုလ္လနန္ဒါ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တတိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒါ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တိဿတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒါ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တတီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ထုလ္လနန္ဒါ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တိဿတိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၆၆၉. ‘‘ယာ ပန ဘိက္ခုနီ သမဂ္ဂေန သံဃေန ဥက္ခိတ္တံ ဘိက္ခုံ ဓမ္မေန ဝိနယေန သတ္ထုသာသနေန အနာဒရံ အပ္ပဋိကာရံ အကတသဟာယံ တမနုဝတ္တေယျ, သာ ဘိက္ခုနီ ဘိက္ခုနီဟိ ဧဝမဿ ဝစနီယာ – ‘ဧသော ခေါ, အယျေ, ဘိက္ခု သမဂ္ဂေန သံဃေန ဥက္ခိတ္တော ဓမ္မေန ဝိနယေန သတ္ထုသာသနေန အနာဒရော အပ္ပဋိကာရော အကတသဟာယော, မာယျေ, ဧတံ ဘိက္ခုံ အနုဝတ္တီ’တိ။ ဧဝဉ္စ သာ ဘိက္ခုနီ ဘိက္ခုနီဟိ ဝုစ္စမာနာ တထေဝ ပဂ္ဂဏှေယျ, သာ ဘိက္ခုနီ ဘိက္ခုနီဟိ ယာဝတတိယံ သမနုဘာသိတဗ္ဗာ တဿ ပဋိနိဿဂ္ဂါယ။ ယာဝတတိယံ စေ သမနုဘာသိယမာနာ တံ ပဋိနိဿဇ္ဇေယျ, ဣစ္စေတံ ကုသလံ။ နော စေ ပဋိနိဿဇ္ဇေယျ, အယမ္ပိ ပါရာဇိကာ ဟောတိ အသံဝါသာ ဥက္ခိတ္တာနုဝတ္တိကာ’’တိ။

၆၇၀. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

သမဂ္ဂေါ နာမ သံဃော သမာနသံဝါသကော သမာနသီမာယံ ဌိတော။

ဥက္ခိတ္တော နာမ အာပတ္တိယာ အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ [အဒဿနေန ဝါ အပ္ပဋိကမ္မေန ဝါ အပ္ပဋိနိဿဂ္ဂေန ဝါ (က.), အဒဿနေ ဝါ အပ္ပဋိကမ္မေ ဝါ ပါပိကာယ ဒိဋ္ဌိယာ အပ္ပဋိနိဿဂ္ဂေ ဝါ (?)] ဥက္ခိတ္တော။

ဓမ္မေန ဝိနယေနာတိ ယေန ဓမ္မေန ယေန ဝိနယေန။

သတ္ထုသာသနေနာတိ ဇိနသာသနေန ဗုဒ္ဓသာသနေန။

အနာဒရော နာမ သံဃံ ဝါ ဂဏံ ဝါ ပုဂ္ဂလံ ဝါ ကမ္မံ ဝါ နာဒိယတိ။

အပ္ပဋိကာရော နာမ ဥက္ခိတ္တော အနောသာရိတော။

အကတသဟာယော နာမ သမာနသံဝါသကာ ဘိက္ခူ ဝုစ္စန္တိ သဟာယာ။ သော တေဟိ သဒ္ဓိံ နတ္ထိ, တေန ဝုစ္စတိ အကတသဟာယောတိ။

တမနုဝတ္တေယျာတိ ယံဒိဋ္ဌိကော သော ဟောတိ ယံခန္တိကော ယံရုစိကော, သာပိ တံဒိဋ္ဌိကာ ဟောတိ တံခန္တိကာ တံရုစိကာ။

သာ ဘိက္ခုနီတိ ယာ သာ ဥက္ခိတ္တာနုဝတ္တိကာ ဘိက္ခုနီ။

ဘိက္ခုနီဟီတိ အညာဟိ ဘိက္ခုနီဟိ။ ယာ ပဿန္တိ ယာ သုဏန္တိ တာဟိ ဝတ္တဗ္ဗာ – ‘‘ဧသော ခေါ, အယျေ, ဘိက္ခု သမဂ္ဂေန သံဃေန ဥက္ခိတ္တော ဓမ္မေန ဝိနယေန သတ္ထုသာသနေန အနာဒရော အပ္ပဋိကာရော အကတသဟာယော။ မာယျေ, ဧတံ ဘိက္ခုံ အနုဝတ္တီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သုတွာ န ဝဒန္တိ, အာပတ္တိ ဒုက္ကဋဿ။ သာ ဘိက္ခုနီ သင်္ဃမဇ္ဈမ္ပိ အာကဍ္ဎိတွာ ဝတ္တဗ္ဗာ – ‘‘ဧသော ခေါ, အယျေ, ဘိက္ခု သမဂ္ဂေန သံဃေန ဥက္ခိတ္တော ဓမ္မေန ဝိနယေန သတ္ထုသာသနေန အနာဒရော အပ္ပဋိကာရော အကတသဟာယော။ မာယျေ, ဧတံ ဘိက္ခုံ အနုဝတ္တီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇတိ, ဣစ္စေတံ ကုသလံ။ နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သာ ဘိက္ခုနီ သမနုဘာသိတဗ္ဗာ။ ဧဝဉ္စ ပန, ဘိက္ခဝေ, သမနုဘာသိတဗ္ဗာ။ ဗျတ္တာယ ဘိက္ခုနိယာ ပဋိဗလာယ သံဃော ဉာပေတဗ္ဗော –

၆၇၁. ‘‘သုဏာတု မေ, အယျေ, သံဃော။ အယံ ဣတ္ထန္နာမာ ဘိက္ခုနီ သမဂ္ဂေန သံဃေန ဥက္ခိတ္တံ ဘိက္ခုံ ဓမ္မေန ဝိနယေန သတ္ထုသာသနေန အနာဒရံ အပ္ပဋိကာရံ အကတသဟာယံ တမနုဝတ္တတိ, သာ တံ ဝတ္ထုံ န ပဋိနိဿဇ္ဇတိ။ ယဒိ သင်္ဃဿ ပတ္တကလ္လံ, သံဃော ဣတ္ထန္နာမံ ဘိက္ခုနိံ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, အယျေ, သံဃော။ အယံ ဣတ္ထန္နာမာ ဘိက္ခုနီ သမဂ္ဂေန သံဃေန ဥက္ခိတ္တံ ဘိက္ခုံ ဓမ္မေန ဝိနယေန သတ္ထုသာသနေန အနာဒရံ အပ္ပဋိကာရံ အကတသဟာယံ တမနုဝတ္တတိ။ သာ တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုနိံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာ အယျာယ ခမတိ ဣတ္ထန္နာမာယ ဘိက္ခုနိယာ သမနုဘာသနာ တဿ ဝတ္ထုဿ ပဋိနိဿဂ္ဂါယ, သာ တုဏှဿ; ယဿာ နက္ခမတိ, သာ ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ။ပေ.။။

‘‘သမနုဘဋ္ဌာ သံဃေန ဣတ္ထန္နာမာ ဘိက္ခုနီ တဿ ဝတ္ထုဿ ပဋိနိဿဂ္ဂါယ။ ခမတိ သင်္ဃဿ, တသ္မာ တုဏှီ, ဧဝမေတံ ဓါရယာမီ’’တိ။

ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ, ကမ္မဝါစာ ပရိယောသာနေ အာပတ္တိ ပါရာဇိကဿ။

အယမ္ပီတိ ပုရိမာယော ဥပါဒါယ ဝုစ္စတိ။

ပါရာဇိကာ ဟောတီတိ သေယျထာပိ နာမ ပုထုသိလာ ဒွေဓါ ဘိန္နာ အပ္ပဋိသန္ဓိကာ ဟောတိ, ဧဝမေဝ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ အဿမဏီ ဟောတိ အသကျဓီတာ။ တေန ဝုစ္စတိ ပါရာဇိကာ ဟောတီတိ။

အသံဝါသာတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ။ ဧသော သံဝါသော နာမ။ သော တာယ သဒ္ဓိံ နတ္ထိ။ တေန ဝုစ္စတိ အသံဝါသာတိ။

၆၇၂. ဓမ္မကမ္မေ ဓမ္မကမ္မသညာ န ပဋိနိဿဇ္ဇတိ, အာပတ္တိ ပါရာဇိကဿ။ ဓမ္မကမ္မေ ဝေမတိကာ န ပဋိနိဿဇ္ဇတိ, အာပတ္တိ ပါရာဇိကဿ။ ဓမ္မကမ္မေ အဓမ္မကမ္မသညာ န ပဋိနိဿဇ္ဇတိ, အာပတ္တိ ပါရာဇိကဿ။

အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋဿ။ အဓမ္မကမ္မေ ဝေမတိကာ, အာပတ္တိ ဒုက္ကဋဿ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋဿ။

၆၇၃. အနာပတ္တိ အသမနုဘာသန္တိယာ, ပဋိနိဿဇ္ဇန္တိယာ, ဥမ္မတ္တိကာယ။ပေ.။ အာဒိကမ္မိကာယာတိ။

တတိယပါရာဇိကံ သမတ္တံ။

၄. စတုတ္ထပါရာဇိကံ

၆၇၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော အဝဿုတာ အဝဿုတဿ ပုရိသပုဂ္ဂလဿ ဟတ္ထဂ္ဂဟဏမ္ပိ သာဒိယန္တိ, သံဃာဋိကဏ္ဏဂ္ဂဟဏမ္ပိ သာဒိယန္တိ, သန္တိဋ္ဌန္တိပိ, သလ္လပန္တိပိ, သင်္ကေတမ္ပိ ဂစ္ဆန္တိ, ပုရိသဿပိ အဗ္ဘာဂမနံ သာဒိယန္တိ, ဆန္နမ္ပိ အနုပဝိသန္တိ, ကာယမ္ပိ တဒတ္ထာယ ဥပသံဟရန္တိ ဧတဿ အသဒ္ဓမ္မဿ ပဋိသေဝနတ္ထာယ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော အဝဿုတာ အဝဿုတဿ ပုရိသပုဂ္ဂလဿ ဟတ္ထဂ္ဂဟဏမ္ပိ သာဒိယိဿန္တိ, သံဃာဋိကဏ္ဏဂ္ဂဟဏမ္ပိ သာဒိယိဿန္တိ, သန္တိဋ္ဌိဿန္တိပိ, သလ္လပိဿန္တိပိ, သင်္ကေတမ္ပိ ဂစ္ဆိဿန္တိ, ပုရိသဿပိ အဗ္ဘာဂမနံ သာဒိယိဿန္တိ, ဆန္နမ္ပိ အနုပဝိသိဿန္တိ, ကာယမ္ပိ တဒတ္ထာယ ဥပသံဟရိဿန္တိ ဧတဿ အသဒ္ဓမ္မဿ ပဋိသေဝနတ္ထာယာ’’တိ။ပေ.။ သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခုနိယော အဝဿုတာ အဝဿုတဿ ပုရိသပုဂ္ဂလဿ ဟတ္ထဂ္ဂဟဏမ္ပိ သာဒိယန္တိ, သံဃာဋိကဏ္ဏဂ္ဂဟဏမ္ပိ သာဒိယန္တိ, သန္တိဋ္ဌန္တိပိ, သလ္လပန္တိပိ, သင်္ကေတမ္ပိ ဂစ္ဆန္တိ, ပုရိသဿပိ အဗ္ဘာဂမနံ သာဒိယန္တိ, ဆန္နမ္ပိ အနုပဝိသန္တိ, ကာယမ္ပိ တဒတ္ထာယ ဥပသံဟရန္တိ ဧတဿ အသဒ္ဓမ္မဿ ပဋိသေဝနတ္ထာယာတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ, ဘိက္ခဝေ, ဆဗ္ဗဂ္ဂိယာ ဘိက္ခုနိယော အဝဿုတာ အဝဿုတဿ ပုရိသပုဂ္ဂလဿ ဟတ္ထဂ္ဂဟဏမ္ပိ သာဒိယိဿန္တိ, သံဃာဋိကဏ္ဏဂ္ဂဟဏမ္ပိ သာဒိယိဿန္တိ, သန္တိဋ္ဌိဿန္တိပိ, သလ္လပိဿန္တိပိ, သင်္ကေတမ္ပိ ဂစ္ဆိဿန္တိ, ပုရိသဿပိ အဗ္ဘာဂမနံ သာဒိယိဿန္တိ, ဆန္နမ္ပိ အနုပဝိသိဿန္တိ, ကာယမ္ပိ တဒတ္ထာယ ဥပသံဟရိဿန္တိ ဧတဿ အသဒ္ဓမ္မဿ ပဋိသေဝနတ္ထာယ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခါပဒံ ဥဒ္ဒိသန္တု –

၆၇၅. ‘‘ယာ ပန ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ဟတ္ထဂ္ဂဟဏံ ဝါ သာဒိယေယျ, သံဃာဋိကဏ္ဏဂ္ဂဟဏံ ဝါ သာဒိယေယျ, သန္တိဋ္ဌေယျ ဝါ, သလ္လပေယျ ဝါ, သင်္ကေတံ ဝါ ဂစ္ဆေယျ , ပုရိသဿ ဝါ အဗ္ဘာဂမနံ သာဒိယေယျ, ဆန္နံ ဝါ အနုပဝိသေယျ, ကာယံ ဝါ တဒတ္ထာယ ဥပသံဟရေယျ ဧတဿ အသဒ္ဓမ္မဿ ပဋိသေဝနတ္ထာယ, အယမ္ပိ ပါရာဇိကာ ဟောတိ အသံဝါသာ အဋ္ဌဝတ္ထုကာ’’တိ။

၆၇၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

အဝဿုတာ နာမ သာရတ္တာ အပေက္ခဝတီ ပဋိဗဒ္ဓစိတ္တာ။

အဝဿုတော နာမ သာရတ္တော အပေက္ခဝါ ပဋိဗဒ္ဓစိတ္တော။

ပုရိသပုဂ္ဂလော နာမ မနုဿပုရိသော, န ယက္ခေါ န ပေတော န တိရစ္ဆာနဂတော ဝိညူ ပဋိဗလော ကာယသံသဂ္ဂံ သမာပဇ္ဇိတုံ။

ဟတ္ထဂ္ဂဟဏံ ဝါ သာဒိယေယျာတိ ဟတ္ထော နာမ ကပ္ပရံ ဥပါဒါယ ယာဝ အဂ္ဂနခါ။ ဧတဿ အသဒ္ဓမ္မဿ ပဋိသေဝနတ္ထာယ ဥဗ္ဘက္ခကံ အဓေါဇာဏုမဏ္ဍလံ ဂဟဏံ သာဒိယတိ, အာပတ္တိ ထုလ္လစ္စယဿ။

သံဃာဋိကဏ္ဏဂ္ဂဟဏံ ဝါ သာဒိယေယျာတိ ဧတဿ အသဒ္ဓမ္မဿ ပဋိသေဝနတ္ထာယ နိဝတ္ထံ ဝါ ပါရုတံ ဝါ ဂဟဏံ သာဒိယတိ, အာပတ္တိ ထုလ္လစ္စယဿ။

သန္တိဋ္ဌေယျ ဝါတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသဿ ဟတ္ထပါသေ တိဋ္ဌတိ, အာပတ္တိ ထုလ္လစ္စယဿ။

သလ္လပေယျ ဝါတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသဿ ဟတ္ထပါသေ ဌိတာ သလ္လပတိ, အာပတ္တိ ထုလ္လစ္စယဿ။

သင်္ကေတံ ဝါ ဂစ္ဆေယျာတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသေန – ‘‘ဣတ္ထန္နာမံ ဩကာသံ [ဣဒံ ပဒံ အဋ္ဌကထာယံ န ဒိဿတိ] အာဂစ္ဆာ’’တိ – ဝုတ္တာ ဂစ္ဆတိ။ ပဒေ ပဒေ အာပတ္တိ ဒုက္ကဋဿ။ ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ။

ပုရိသဿ ဝါ အဗ္ဘာဂမနံ သာဒိယေယျာတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသဿ အဗ္ဘာဂမနံ သာဒိယတိ, အာပတ္တိ ဒုက္ကဋဿ။ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ။

ဆန္နံ ဝါ အနုပဝိသေယျာတိ ဧတဿ အသဒ္ဓမ္မဿ ပဋိသေဝနတ္ထာယ ယေန ကေနစိ ပဋိစ္ဆန္နံ ဩကာသံ ပဝိဋ္ဌမတ္တေ အာပတ္တိ ထုလ္လစ္စယဿ။

ကာယံ ဝါ တဒတ္ထာယ ဥပသံဟရေယျာတိ ဧတဿ အသဒ္ဓမ္မဿ ပဋိသေဝနတ္ထာယ ပုရိသဿ ဟတ္ထပါသေ ဌိတာ ကာယံ ဥပသံဟရတိ, အာပတ္တိ ထုလ္လစ္စယဿ။

အယမ္ပီတိ ပုရိမာယော ဥပါဒါယ ဝုစ္စတိ။

ပါရာဇိကာ ဟောတီတိ သေယျထာပိ နာမ တာလော မတ္ထကစ္ဆိန္နော အဘဗ္ဗော ပုန ဝိရုဠှိယာ ဧဝမေဝ ဘိက္ခုနီ အဋ္ဌမံ ဝတ္ထုံ ပရိပူရေန္တီ အဿမဏီ ဟောတိ အသကျဓီတာ။ တေန ဝုစ္စတိ ပါရာဇိကာ ဟောတီတိ။

အသံဝါသာတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ။ ဧသော သံဝါသော နာမ။ သော တာယ သဒ္ဓိံ နတ္ထိ။ တေန ဝုစ္စတိ အသံဝါသာတိ။

၆၇၇. အနာပတ္တိ အသဉ္စိစ္စ, အဿတိယာ, အဇာနန္တိယာ, အသာဒိယန္တိယာ, ဥမ္မတ္တိကာယ, ခိတ္တစိတ္တာယ, ဝေဒနာဋ္ဋာယ, အာဒိကမ္မိကာယာတိ။

စတုတ္ထပါရာဇိကံ သမတ္တံ။

ဥဒ္ဒိဋ္ဌာ ခေါ, အယျာယော, အဋ္ဌ ပါရာဇိကာ ဓမ္မာ။ ယေသံ ဘိက္ခုနီ အညတရံ ဝါ အညတရံ ဝါ အာပဇ္ဇိတွာ န လဘတိ ဘိက္ခုနီဟိ သဒ္ဓိံ သံဝါသံ, ယထာ ပုရေ တထာ ပစ္ဆာ, ပါရာဇိကာ ဟောတိ အသံဝါသာ။ တတ္ထာယျာယော ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယျာယော, တသ္မာ တုဏှီ, ဧဝမေတံ ဓါရယာမီတိ။

ဘိက္ခုနိဝိဘ‌‌င်ဂေ ပါရာဇိကကဏ္ဍံ နိဋ္ဌိတံ။