သေခိယကဏ္ဍံ

၇. သေခိယကဏ္ဍံ

၁. ပရိမဏ္ဍလဝဂ္ဂေါ

ဣမေ ခေါ ပနာယသ္မန္တော သေခိယာ

ဓမ္မာ ဥဒ္ဒေသံ အာဂစ္ဆန္တိ။

၅၇၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပုရတောပိ ပစ္ဆတောပိ ဩလမ္ဗေန္တာ နိဝါသေန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ပုရတောပိ ပစ္ဆတောပိ ဩလမ္ဗေန္တာ နိဝါသေဿန္တိ, သေယျထာပိ ဂိဟီ ကာမဘောဂိနော’’တိ။ အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ပုရတောပိ ပစ္ဆတောပိ ဩလမ္ဗေန္တာ နိဝါသေဿန္တီ’’တိ! အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဆဗ္ဗဂ္ဂိယေ ဘိက္ခူ ပဋိပုစ္ဆိ – ‘‘သစ္စံ ကိရ တုမှေ, ဘိက္ခဝေ, ပုရတောပိ ပစ္ဆတောပိ ဩလမ္ဗေန္တာ နိဝါသေထာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တုမှေ, မောဃပုရိသာ, ပုရတောပိ ပစ္ဆတောပိ ဩလမ္ဗေန္တာ နိဝါသေဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘ပရိမဏ္ဍလံ နိဝါသေဿာမီတိ သိက္ခါ ကရဏီယာ’’တိ။

ပရိမဏ္ဍလံ နိဝါသေတဗ္ဗံ နာဘိမဏ္ဍလံ ဇာဏုမဏ္ဍလံ ပဋိစ္ဆာဒေန္တေန။ ယော အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော နိဝါသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၅၇၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပုရတောပိ ပစ္ဆတောပိ ဩလမ္ဗေန္တာ ပါရုပန္တိ။ပေ.။။

‘‘ပရိမဏ္ဍလံ ပါရုပိဿာမီတိ သိက္ခါ ကရဏီယာ’’တိ။

ပရိမဏ္ဍလံ ပါရုပိတဗ္ဗံ ဥဘော ကဏ္ဏေ သမံ ကတွာ။ ယော အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော ပါရုပတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၅၇၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ကာယံ ဝိဝရိတွာ အန္တရဃရေ ဂစ္ဆန္တိ။ပေ.။။

‘‘သုပ္ပဋိစ္ဆန္နော အန္တရဃရေ ဂမိဿာမီတိ သိက္ခါ ကရဏီယာ’’တိ။

သုပ္ပဋိစ္ဆန္နေန အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ကာယံ ဝိဝရိတွာ အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၅၇၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ကာယံ ဝိဝရိတွာ အန္တရဃရေ နိသီဒန္တိ။ပေ.။။

‘‘သုပ္ပဋိစ္ဆန္နော အန္တရဃရေ နိသီဒိဿာမီတိ သိက္ခါ ကရဏီယာ’’တိ။

သုပ္ပဋိစ္ဆန္နေန အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ကာယံ ဝိဝရိတွာ အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၅၈၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဟတ္ထမ္ပိ ပါဒမ္ပိ ကီဠာပေန္တာ အန္တရဃရေ ဂစ္ဆန္တိ။ပေ.။။

‘‘သုသံဝုတော အန္တရဃရေ ဂမိဿာမီတိ သိက္ခါ ကရဏီယာ’’တိ။

သုသံဝုတေန အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တော အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဥမ္မတ္တကဿ, အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၅၈၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဟတ္ထမ္ပိ ပါဒမ္ပိ ကီဠာပေန္တာ အန္တရဃရေ နိသီဒန္တိ။ပေ.။။

‘‘သုသံဝုတော အန္တရဃရေ နိသီဒိဿာမီတိ သိက္ခါ ကရဏီယာ’’တိ။

သုသံဝုတေန အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တော အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၅၈၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ တဟံ တဟံ ဩလောကေန္တာ အန္တရဃရေ ဂစ္ဆန္တိ။ပေ.။။

‘‘ဩက္ခိတ္တစက္ခု အန္တရဃရေ ဂမိဿာမီတိ သိက္ခါ ကရဏီယာ’’တိ။

ဩက္ခိတ္တစက္ခုနာ အန္တရဃရေ ဂန္တဗ္ဗံ ယုဂမတ္တံ ပေက္ခန္တေန။ ယော အနာဒရိယံ ပဋိစ္စ တဟံ တဟံ ဩလောကေန္တော အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၅၈၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ တဟံ တဟံ ဩလောကေန္တာ အန္တရဃရေ နိသီဒန္တိ။ပေ.။။

‘‘ဩက္ခိတ္တစက္ခု အန္တရဃရေ နိသီဒိဿာမီတိ သိက္ခါ ကရဏီယာ’’တိ။

ဩက္ခိတ္တစက္ခုနာ အန္တရဃရေ နိသီဒိတဗ္ဗံ ယုဂမတ္တံ ပေက္ခန္တေန။ ယော အနာဒရိယံ ပဋိစ္စ တဟံ တဟံ ဩလောကေန္တော အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၅၈၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥက္ခိတ္တကာယ အန္တရဃရေ ဂစ္ဆန္တိ။ပေ.။။

‘‘န ဥက္ခိတ္တကာယ အန္တရဃရေ ဂမိဿာမီတိ သိက္ခါ ကရဏီယာ’’တိ။

န ဥက္ခိတ္တကာယ အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ဧကတော ဝါ ဥဘတော ဝါ ဥက္ခိပိတွာ အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၅၈၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥက္ခိတ္တကာယ အန္တရဃရေ နိသီဒန္တိ။ပေ.။။

‘‘န ဥက္ခိတ္တကာယ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ဥက္ခိတ္တကာယ အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ဧကတော ဝါ ဥဘတော ဝါ ဥက္ခိပိတွာ အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

ပရိမဏ္ဍလဝဂ္ဂေါ ပဌမော။

၂. ဥဇ္ဇဂ္ဃိကဝဂ္ဂေါ

၅၈၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ မဟာဟသိတံ ဟသန္တာ အန္တရဃရေ ဂစ္ဆန္တိ။ပေ.။။

‘‘န ဥဇ္ဇဂ္ဃိကာယ အန္တရဃရေ ဂမိဿာမီတိ သိက္ခါ ကရဏီယာ’’တိ။

န ဥဇ္ဇဂ္ဃိကာယ အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ မဟာဟသိတံ ဟသန္တော အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဟသနီယသ္မိံ ဝတ္ထုသ္မိံ မိဟိတမတ္တံ ကရောတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၅၈၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ မဟာဟသိတံ ဟသန္တာ အန္တရဃရေ နိသီဒန္တိ။ပေ.။။

‘‘န ဥဇ္ဇဂ္ဃိကာယ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ဥဇ္ဇဂ္ဃိကာယ အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ မဟာဟသိတံ ဟသန္တော အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဟသနီယသ္မိံ ဝတ္ထုသ္မိံ မိဟိတမတ္တံ ကရောတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၅၈၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥစ္စာသဒ္ဒံ မဟာသဒ္ဒံ ကရောန္တာ အန္တရဃရေ ဂစ္ဆန္တိ။ပေ.။။

‘‘အပ္ပသဒ္ဒေါ အန္တရဃရေ ဂမိဿာမီတိ သိက္ခါ ကရဏီယာ’’တိ။

အပ္ပသဒ္ဒေန အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တော အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ, အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၅၈၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥစ္စာသဒ္ဒံ မဟာသဒ္ဒံ ကရောန္တာ အန္တရဃရေ နိသီဒန္တိ။ပေ.။။

‘‘အပ္ပသဒ္ဒေါ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

အပ္ပသဒ္ဒေန အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တော အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၅၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ကာယပ္ပစာလကံ အန္တရဃရေ ဂစ္ဆန္တိ ကာယံ ဩလမ္ဗေန္တာ။ပေ.။။

‘‘န ကာယပ္ပစာလကံ အန္တရဃရေ ဂမိဿာမီတိ သိက္ခါ ကရဏီယာ’’တိ။

န ကာယပ္ပစာလကံ အန္တရဃရေ ဂန္တဗ္ဗံ။ ကာယံ ပဂ္ဂဟေတွာ ဂန္တဗ္ဗံ ။ ယော အနာဒရိယံ ပဋိစ္စ ကာယပ္ပစာလကံ အန္တရဃရေ ဂစ္ဆတိ ကာယံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၅၉၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ကာယပ္ပစာလကံ အန္တရဃရေ နိသီဒန္တိ, ကာယံ ဩလမ္ဗေန္တာ။ပေ.။။

‘‘န ကာယပ္ပစာလကံ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ကာယပ္ပစာလကံ အန္တရဃရေ နိသီဒိတဗ္ဗံ။ ကာယံ ပဂ္ဂဟေတွာ နိသီဒိတဗ္ဗံ။ ယော အနာဒရိယံ ပဋိစ္စ ကာယပ္ပစာလကံ အန္တရဃရေ နိသီဒတိ ကာယံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၅၉၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဗာဟုပ္ပစာလကံ အန္တရဃရေ ဂစ္ဆန္တိ ဗာဟုံ ဩလမ္ဗေန္တာ။ပေ.။။

‘‘န ဗာဟုပ္ပစာလကံ အန္တရဃရေ ဂမိဿာမီတိ သိက္ခါ ကရဏီယာ’’တိ။

န ဗာဟုပ္ပစာလကံ အန္တရဃရေ ဂန္တဗ္ဗံ။ ဗာဟုံ ပဂ္ဂဟေတွာ ဂန္တဗ္ဗံ။ ယော အနာဒရိယံ ပဋိစ္စ ဗာဟုပ္ပစာလကံ အန္တရဃရေ ဂစ္ဆတိ ဗာဟုံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၅၉၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဗာဟုပ္ပစာလကံ အန္တရဃရေ နိသီဒန္တိ ဗာဟုံ ဩလမ္ဗေန္တာ။ပေ.။။

‘‘န ဗာဟုပ္ပစာလကံ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ဗာဟုပ္ပစာလကံ အန္တရဃရေ နိသီဒိတဗ္ဗံ။ ဗာဟုံ ပဂ္ဂဟေတွာ နိသီဒိတဗ္ဗံ။ ယော အနာဒရိယံ ပဋိစ္စ ဗာဟုပ္ပစာလကံ အန္တရဃရေ နိသီဒတိ ဗာဟုံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၅၉၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍကဿ အာရာမေ ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သီသပ္ပစာလကံ အန္တရဃရေ ဂစ္ဆန္တိ သီသံ ဩလမ္ဗေန္တာ။ပေ.။။

‘‘န သီသပ္ပစာလကံ အန္တရဃရေ ဂမိဿာမီတိ သိက္ခါ ကရဏီယာ’’တိ။

န သီသပ္ပစာလကံ အန္တရဃရေ ဂန္တဗ္ဗံ။ သီသံ ပဂ္ဂဟေတွာ ဂန္တဗ္ဗံ။ ယော အနာဒရိယံ ပဋိစ္စ သီသပ္ပစာလကံ အန္တရဃရေ ဂစ္ဆတိ သီသံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၅၉၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သီသပ္ပစာလကံ အန္တရဃရေ နိသီဒန္တိ သီသံ ဩလမ္ဗေန္တာ။ပေ.။။

‘‘န သီသပ္ပစာလကံ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န သီသပ္ပစာလကံ အန္တရဃရေ နိသီဒိတဗ္ဗံ။ သီသံ ပဂ္ဂဟေတွာ နိသီဒိတဗ္ဗံ ။ ယော အနာဒရိယံ ပဋိစ္စ သီသပ္ပစာလကံ အန္တရဃရေ နိသီဒတိ သီသံ ဩလမ္ဗေန္တော, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

ဥဇ္ဇဂ္ဃိကဝဂ္ဂေါ ဒုတိယော။

၃. ခမ္ဘကတဝဂ္ဂေါ

၅၉၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ခမ္ဘကတာ အန္တရဃရေ ဂစ္ဆန္တိ။ပေ.။။

‘‘န ခမ္ဘကတော အန္တရဃရေ ဂမိဿာမီတိ သိက္ခါ ကရဏီယာ’’တိ။

န ခမ္ဘကတေန အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ဧကတော ဝါ ဥဘတော ဝါ ခမ္ဘံ ကတွာ အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၅၉၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ခမ္ဘကတာ အန္တရဃရေ နိသီဒန္တိ။ပေ.။။

‘‘န ခမ္ဘကတော အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ခမ္ဘကတေန အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ဧကတော ဝါ ဥဘတော ဝါ ခမ္ဘံ ကတွာ အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၅၉၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သသီသံ ပါရုပိတွာ အန္တရဃရေ ဂစ္ဆန္တိ။ပေ.။။

‘‘န ဩဂုဏ္ဌိတော အန္တရဃရေ ဂမိဿာမီတိ သိက္ခါ ကရဏီယာ’’တိ။

န ဩဂုဏ္ဌိတေန အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ သသီသံ ပါရုပိတွာ အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၅၉၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သသီသံ ပါရုပိတွာ အန္တရဃရေ နိသီဒန္တိ။ပေ.။။

‘‘န ဩဂုဏ္ဌိတော အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ဩဂုဏ္ဌိတေန အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ သသီသံ ပါရုပိတွာ အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု, ဥမ္မတ္တကဿ, အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၆၀၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥက္ကုဋိကာယ အန္တရဃရေ ဂစ္ဆန္တိ။ပေ.။။

‘‘န ဥက္ကုဋိကာယ အန္တရဃရေ ဂမိဿာမီတိ သိက္ခါ ကရဏီယာ’’တိ။

န ဥက္ကုဋိကာယ အန္တရဃရေ ဂန္တဗ္ဗံ။ ယော အနာဒရိယံ ပဋိစ္စ ဥက္ကုဋိကာယ အန္တရဃရေ ဂစ္ဆတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၆၀၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပလ္လတ္ထိကာယ [ပလ္လတ္တိကာယ (က.)] အန္တရဃရေ နိသီဒန္တိ။ပေ.။။

‘‘န ပလ္လတ္ထိကာယ အန္တရဃရေ နိသီဒိဿာမီတိ သိက္ခါ ကရဏီယာ’’တိ။

န ပလ္လတ္ထိကာယ အန္တရဃရေ နိသီဒိတဗ္ဗံ။ ယော အနာဒရိယံ ပဋိစ္စ ဟတ္ထပလ္လတ္ထိကာယ ဝါ ဒုဿပလ္လတ္ထိကာယ ဝါ အန္တရဃရေ နိသီဒတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဝါသူပဂတဿ, အာပဒါသု,

ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၆၀၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အသက္ကစ္စံ ပိဏ္ဍပါတံ ပဋိဂ္ဂဏှန္တိ ဆဍ္ဍေတုကာမာ ဝိယ။ပေ.။။

‘‘သက္ကစ္စံ ပိဏ္ဍပါတံ ပဋိဂ္ဂဟေဿာမီတိ သိက္ခါ ကရဏီယာ’’တိ။

သက္ကစ္စံ ပိဏ္ဍပါတော ပဋိဂ္ဂဟေတဗ္ဗော။ ယော အနာဒရိယံ ပဋိစ္စ အသက္ကစ္စံ ပိဏ္ဍပါတံ ပဋိဂ္ဂဏှာတိ ဆဍ္ဍေတုကာမော ဝိယ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၆၀၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ တဟံ တဟံ ဩလောကေန္တာ ပိဏ္ဍပါတံ ပဋိဂ္ဂဏှန္တိ, အာကိရန္တေပိ အတိက္ကန္တေပိ [အတိက္ကမန္တေပိ (သီ.)] န ဇာနန္တိ။ပေ.။။

‘‘ပတ္တသညီ ပိဏ္ဍပါတံ ပဋိဂ္ဂဟေဿာမီတိ သိက္ခါ ကရဏီယာ’’တိ။

ပတ္တသညိနာ ပိဏ္ဍပါတော ပဋိဂ္ဂဟေတဗ္ဗော။ ယော အနာဒရိယံ ပဋိစ္စ တဟံ တဟံ ဩလောကေန္တော ပိဏ္ဍပါတံ ပဋိဂ္ဂဏှာတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၆၀၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပိဏ္ဍပါတံ ပဋိဂ္ဂဏှန္တာ သူပညေဝ ဗဟုံ ပဋိဂ္ဂဏှန္တိ။ပေ.။။

‘‘သမသူပကံ ပိဏ္ဍပါတံ ပဋိဂ္ဂဟေဿာမီတိ သိက္ခါ ကရဏီယာ’’တိ။

သူပေါ နာမ ဒွေ သူပါ – မုဂ္ဂသူပေါ, မာသသူပေါ။ ဟတ္ထဟာရိယော သမသူပကော ပိဏ္ဍပါတော ပဋိဂ္ဂဟေတဗ္ဗော။ ယော အနာဒရိယံ ပဋိစ္စ သူပညေဝ ဗဟုံ ပဋိဂ္ဂဏှာတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ရသရသေ, ဉာတကာနံ ပဝါရိတာနံ, အညဿတ္ထာယ, အတ္တနော ဓနေန, အာပဒါသု, ဥမ္မတ္တကဿ, အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၆၀၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ထူဣကတံ ပိဏ္ဍပါတံ ပဋိဂ္ဂဏှန္တိ။ပေ.။။

‘‘သမတိတ္တိကံ [သမတိတ္ထိကံ (က.)] ပိဏ္ဍပါတံ ပဋိဂ္ဂဟေဿာမီတိ သိက္ခါ ကရဏီယာ’’တိ။

သမတိတ္တိကော [သမတိတ္ထိကံ (က.)] ပိဏ္ဍပါတော ပဋိဂ္ဂဟေတဗ္ဗော။ ယော အနာဒရိယံ ပဋိစ္စ ထူဣကတံ ပိဏ္ဍပါတံ ပဋိဂ္ဂဏှာတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

ခမ္ဘကတဝဂ္ဂေါ တတိယော။

၄. သက္ကစ္စဝဂ္ဂေါ

၆၀၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အသက္ကစ္စံ ပိဏ္ဍပါတံ ဘုဉ္ဇန္တိ အဘုဉ္ဇိတုကာမာ ဝိယ။ပေ.။။

‘‘သက္ကစ္စံ ပိဏ္ဍပါတံ ဘုဉ္ဇိဿာမီတိ သိက္ခါ ကရဏီယာ’’တိ။

သက္ကစ္စံ ပိဏ္ဍပါတော ဘုဉ္ဇိတဗ္ဗော။ ယော အနာဒရိယံ ပဋိစ္စ အသက္ကစ္စံ ပိဏ္ဍပါတံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အာပဒါသု, ဥမ္မတ္တကဿ,

အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၆၀၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ တဟံ တဟံ ဩလောကေန္တာ ပိဏ္ဍပါတံ ဘုဉ္ဇန္တိ, အာကိရန္တေပိ အတိက္ကန္တေပိ န ဇာနန္တိ။ပေ.။ ။

‘‘ပတ္တသညီ ပိဏ္ဍပါတံ ဘုဉ္ဇိဿာမီတိ သိက္ခါ ကရဏီယာ’’တိ။

ပတ္တသညိနာ ပိဏ္ဍပါတော ဘုဉ္ဇိတဗ္ဗော။ ယော အနာဒရိယံ ပဋိစ္စ တဟံ တဟံ ဩလောကေန္တော ပိဏ္ဍပါတံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၆၀၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ တဟံ တဟံ ဩမသိတွာ [ဩမဒ္ဒိတွာ (က.)] ပိဏ္ဍပါတံ ဘုဉ္ဇန္တိ။ပေ.။။

‘‘သပဒါနံ ပိဏ္ဍပါတံ ဘုဉ္ဇိဿာမီတိ သိက္ခါ ကရဏီယာ’’တိ။

သပဒါနံ ပိဏ္ဍပါတော ဘုဉ္ဇိတဗ္ဗော။ ယော အနာဒရိယံ ပဋိစ္စ တဟံ တဟံ ဩမသိတွာ [ဩမဒ္ဒိတွာ (က.)] ပိဏ္ဍပါတံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အညေသံ ဒေန္တော ဩမသတိ, အညဿ ဘာဇနေ အာကိရန္တော ဩမသတိ, ဥတ္တရိဘင်္ဂေ, အာပဒါသု, ဥမ္မတ္တကဿ, အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၆၀၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပိဏ္ဍပါတံ ဘုဉ္ဇန္တာ သူပညေဝ ဗဟုံ ဘုဉ္ဇန္တိ။ပေ.။။

‘‘သမသူပကံ ပိဏ္ဍပါတံ ဘုဉ္ဇိဿာမီတိ သိက္ခါ ကရဏီယာ’’တိ။

သူပေါ နာမ ဒွေ သူပါ – မုဂ္ဂသူပေါ, မာသသူပေါ ဟတ္ထဟာရိယော။ သမသူပကော ပိဏ္ဍပါတော ဘုဉ္ဇိတဗ္ဗော။ ယော အနာဒရိယံ ပဋိစ္စ သူပညေဝ ဗဟုံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ရသရသေ , ဉာတကာနံ ပဝါရိတာနံ, အတ္တနော ဓနေန, အာပဒါသု, ဥမ္မတ္တကဿ, အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၆၁၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇန္တိ။ပေ.။။

‘‘န ထူပကတော ဩမဒ္ဒိတွာ ပိဏ္ဍပါတံ ဘုဉ္ဇိဿာမီတိ သိက္ခါ ကရဏီယာ’’တိ။

န ထူပကတော ဩမဒ္ဒိတွာ ပိဏ္ဍပါတော ဘုဉ္ဇိတဗ္ဗော။ ယော အနာဒရိယံ ပဋိစ္စ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇတိ အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ပရိတ္တကေ သေသေ ဧကတော သံကဍ္ဎိတွာ ဩမဒ္ဒိတွာ ဘုဉ္ဇတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၆၁၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သူပမ္ပိ ဗျဉ္ဇနမ္ပိ ဩဒနေန ပဋိစ္ဆာဒေန္တိ ဘိယျောကမျတံ ဥပါဒါယ။ပေ.။။

‘‘န သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေဿာမိ ဘိယျောကမျတံ ဥပါဒါယာတိ သိက္ခါ ကရဏီယာ’’တိ။

န သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေတဗ္ဗံ ဘိယျောကမျတံ ဥပါဒါယ။ ယော အနာဒရိယံ ပဋိစ္စ သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေတိ ဘိယျောကမျတံ ဥပါဒါယ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, သာမိကာ ပဋိစ္ဆာဒေတွာ ဒေန္တိ, န ဘိယျောကမျတံ ဥပါဒါယ, အာပဒါသု, ဥမ္မတ္တကဿ , အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၆၁၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိဿန္တိ! ကဿ သမ္ပန္နံ န မနာပံ ! ကဿ သာဒုံ န ရုစ္စတီ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိဿန္တီ’’တိ။ပေ.။ သစ္စံ ကိရ တုမှေ, ဘိက္ခဝေ, သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇထာတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တုမှေ, မောဃပုရိသာ, သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န သူပံ ဝါ ဩဒနံ ဝါ အတ္တနော အတ္ထာယ ဝိညာပေတွာ ဘုဉ္ဇိဿာမီတိ သိက္ခါ ကရဏီယာ’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၆၁၃. တေန ခေါ ပန သမယေန ဘိက္ခူ ဂိလာနာ ဟောန္တိ။ ဂိလာနပုစ္ဆကာ ဘိက္ခူ ဂိလာနေ ဘိက္ခူ ဧတဒဝေါစုံ – ‘‘ကစ္စာဝုသော, ခမနီယံ, ကစ္စိ ယာပနီယ’’န္တိ? ‘‘ပုဗ္ဗေ မယံ, အာဝုသော, သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇာမ, တေန နော ဖာသု ဟောတိ။ ဣဒါနိ ပန – ‘‘ဘဂဝတာ ပဋိက္ခိတ္တ’’န္တိ ကုက္ကုစ္စာယန္တာ န ဝိညာပေမ, တေန နော န ဖာသု ဟောတီ’’တိ။ ဘဂဝတော ဧတမတ္ထံ အာရောစေသုံ။ပေ.။ အနုဇာနာမိ, ဘိက္ခဝေ, ဂိလာနေန ဘိက္ခုနာ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိတုံ။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇိဿာမီတိ သိက္ခါ ကရဏီယာ’’တိ။

န သူပံ ဝါ ဩဒနံ ဝါ အဂိလာနေန အတ္တနော အတ္ထာယ ဝိညာပေတွာ ဘုဉ္ဇိတဗ္ဗံ။ ယော အနာဒရိယံ ပဋိစ္စ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဉာတကာနံ ပဝါရိတာနံ, အညဿတ္ထာယ, အတ္တနော ဓနေန, အာပဒါသု, ဥမ္မတ္တကဿ, အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၆၁၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥဇ္ဈာနသညီ ပရေသံ ပတ္တံ ဩလောကေန္တိ။ပေ.။။

‘‘န ဥဇ္ဈာနသညီ ပရေသံ ပတ္တံ ဩလောကေဿာမီတိ သိက္ခါ ကရဏီယာ’’တိ။

န ဥဇ္ဈာနသညိနာ ပရေသံ ပတ္တော ဩလောကေတဗ္ဗော။ ယော အနာဒရိယံ ပဋိစ္စ ဥဇ္ဈာနသညီ ပရေသံ ပတ္တံ ဩလောကေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ‘‘ဒဿာမီ’’တိ ဝါ ‘‘ဒါပေဿာမီ’’တိ ဝါ ဩလောကေတိ, န ဥဇ္ဈာနသညိဿ, အာပဒါသု, ဥမ္မတ္တကဿ, အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၆၁၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ မဟန္တံ ကဗဠံ ကရောန္တိ။ပေ.။။

‘‘နာတိမဟန္တံ ကဗဠံ ကရိဿာမီတိ သိက္ခါ ကရဏီယာ’’တိ။

နာတိမဟန္တော ကဗဠော ကာတဗ္ဗော။ ယော အနာဒရိယံ ပဋိစ္စ မဟန္တံ ကဗဠံ ကရောတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ခဇ္ဇကေ, ဖလာဖလေ, ဥတ္တရိဘင်္ဂေ, အာပဒါသု, ဥမ္မတ္တကဿ, အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၆၁၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဒီဃံ အာလောပံ ကရောန္တိ။ပေ.။။

‘‘ပရိမဏ္ဍလံ အာလောပံ ကရိဿာမီတိ သိက္ခါ ကရဏီယာ’’တိ။

ပရိမဏ္ဍလော အာလောပေါ ကာတဗ္ဗော။ ယော အနာဒရိယံ ပဋိစ္စ ဒီဃံ အာလောပံ ကရောတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ခဇ္ဇကေ, ဖလာဖလေ, ဥတ္တရိဘင်္ဂေ, အာပဒါသု, ဥမ္မတ္တကဿ, အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

သက္ကစ္စဝဂ္ဂေါ စတုတ္ထော။

၅. ကဗဠဝဂ္ဂေါ

၆၁၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အနာဟဋေ ကဗဠေ မုခဒွါရံ ဝိဝရန္တိ။ပေ.။။

‘‘န အနာဟဋေ ကဗဠေ မုခဒွါရံ ဝိဝရိဿာမီတိ သိက္ခါ ကရဏီယာ’’တိ။

န အနာဟဋေ ကဗဠေ မုခဒွါရံ ဝိဝရိတဗ္ဗံ။ ယော အနာဒရိယံ ပဋိစ္စ အနာဟဋေ ကဗဠေ မုခဒွါရံ ဝိဝရတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၆၁၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဘုဉ္ဇမာနာ သဗ္ဗံ ဟတ္ထံ မုခေ ပက္ခိပန္တိ။ပေ.။။

‘‘န ဘုဉ္ဇမာနော သဗ္ဗံ ဟတ္ထံ မုခေ ပက္ခိပိဿာမီတိ သိက္ခါကရဏီယာ’’တိ။

န ဘုဉ္ဇမာနေန သဗ္ဗော ဟတ္ထော မုခေ ပက္ခိပိတဗ္ဗော။ ယော အနာဒရိယံ ပဋိစ္စ ဘုဉ္ဇမာနော သဗ္ဗံ ဟတ္ထံ မုခေ ပက္ခိပတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၆၁၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သကဗဠေန မုခေန ဗျာဟရန္တိ။ပေ.။။

‘‘န သကဗဠေန မုခေန ဗျာဟရိဿာမီတိ သိက္ခါ ကရဏီယာ’’တိ။

န သကဗဠေန မုခေန ဗျာဟရိတဗ္ဗံ။ ယော အနာဒရိယံ ပဋိစ္စ သကဗဠေန မုခေန ဗျာဟရတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၆၂၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပိဏ္ဍုက္ခေပကံ ဘုဉ္ဇန္တိ။ပေ.။။

‘‘န ပိဏ္ဍုက္ခေပကံ ဘုဉ္ဇိဿာမီတိ သိက္ခါ ကရဏီယာ’’တိ။

န ပိဏ္ဍုက္ခေပကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ပိဏ္ဍုက္ခေပကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ခဇ္ဇကေ, ဖလာဖလေ, အာပဒါသု, ဥမ္မတ္တကဿ, အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၆၂၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ကဗဠာဝစ္ဆေဒကံ ဘုဉ္ဇန္တိ။ပေ.။။

‘‘န ကဗဠာဝစ္ဆေဒကံ ဘုဉ္ဇိဿာမီတိ သိက္ခါ ကရဏီယာ’’တိ။

န ကဗဠာဝစ္ဆေဒကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ကဗဠာဝစ္ဆေဒကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ခဇ္ဇကေ ဖလာဖလေ, ဥတ္တရိဘင်္ဂေ, အာပဒါသု, ဥမ္မတ္တကဿ, အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၆၂၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အဝဂဏ္ဍကာရကံ ဘုဉ္ဇန္တိ။ပေ.။။

‘‘န အဝဂဏ္ဍကာရကံ ဘုဉ္ဇိဿာမီတိ သိက္ခါ ကရဏီယာ’’တိ။

န အဝဂဏ္ဍကာရကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ဧကတော ဝါ ဥဘတော ဝါ ဂဏ္ဍံ ကတွာ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဖလာဖလေ, အာပဒါသု, ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၆၂၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဟတ္ထနိဒ္ဓုနကံ ဘုဉ္ဇန္တိ။ပေ.။။

‘‘န ဟတ္ထနိဒ္ဓုနကံ ဘုဉ္ဇိဿာမီတိ သိက္ခါ ကရဏီယာ’’တိ။

န ဟတ္ထနိဒ္ဓုနကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ဟတ္ထနိဒ္ဓုနကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ကစဝရံ ဆဍ္ဍေန္တော ဟတ္ထံ နိဒ္ဓုနာတိ, အာပဒါသု, ဥမ္မတ္တကဿ, အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၆၂၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သိတ္ထာဝကာရကံ ဘုဉ္ဇန္တိ။ပေ.။။

‘‘န သိတ္ထာဝကာရကံ ဘုဉ္ဇိဿာမီတိ သိက္ခါ ကရဏီယာ’’တိ။

န သိတ္ထာဝကာရကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ သိတ္ထာဝကာရကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ကစဝရံ ဆဍ္ဍေန္တော သိတ္ထံ ဆဍ္ဍယတိ, အာပဒါသု, ဥမ္မတ္တကဿ, အာဒိကမ္မိကဿာတိ ။

အဋ္ဌမသိက္ခါပဒံ နိဋ္ဌိတံ။

၆၂၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဇိဝှာနိစ္ဆာရကံ ဘုဉ္ဇန္တိ။ပေ.။။

‘‘န ဇိဝှာနိစ္ဆာရကံ ဘုဉ္ဇိဿာမီတိ သိက္ခါ ကရဏီယာ’’တိ။

န ဇိဝှာနိစ္ဆာရကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ဇိဝှာနိစ္ဆာရကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၆၂၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ စပုစပုကာရကံ ဘုဉ္ဇန္တိ။ပေ.။။

‘‘န စပုစပုကာရကံ ဘုဉ္ဇိဿာမီတိ သိက္ခါ ကရဏီယာ’’တိ။

န စပုစပုကာရကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ စပုစပုကာရကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

ကဗဠဝဂ္ဂေါ ပဉ္စမော။

၆. သုရုသုရုဝဂ္ဂေါ

၆၂၇. တေန သမယေန ဗုဒ္ဓေါ ဘဂဝါ ကောသမ္ဗိယံ ဝိဟရတိ ဃောသိတာရာမေ။ တေန ခေါ ပန သမယေန အညတရေန ဗြာဟ္မဏေန သံဃဿ ပယောပါနံ ပဋိယတ္တံ ဟောတိ။ ဘိက္ခူ သုရုသုရုကာရကံ ခီရံ ပိဝန္တိ။ အညတရော နဋပုဗ္ဗကော ဘိက္ခု ဧဝမာဟ – ‘‘သဗ္ဗောယံ မညေ သံဃော သီတီကတော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခု သံဃံ အာရဗ္ဘ ဒဝံ ကရိဿတီ’’တိ။ပေ.။ သစ္စံ ကိရ တွံ, ဘိက္ခု, သံဃံ အာရဗ္ဘ ဒဝံ အကာသီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တွံ, မောဃပုရိသ, သံဃံ အာရဗ္ဘ ဒဝံ ကရိဿသိ! နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ – ‘‘န, ဘိက္ခဝေ, ဗုဒ္ဓံ ဝါ ဓမ္မံ ဝါ သံဃံ ဝါ အာရဗ္ဘ ဒဝေါ ကာတဗ္ဗော။ ယော ကရေယျ, အာပတ္တိ ဒုက္ကဋဿာ’’တိ။ အထ ခေါ ဘဂဝါ တံ ဘိက္ခုံ အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န သုရုသုရုကာရကံ ဘုဉ္ဇိဿာမီတိ သိက္ခါ ကရဏီယာ’’တိ။

န သုရုသုရုကာရကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ သုရုသုရုကာရကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၆၂၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဟတ္ထနိလ္လေဟကံ ဘုဉ္ဇန္တိ။ပေ.။။

‘‘န ဟတ္ထနိလ္လေဟကံ ဘုဉ္ဇိဿာမီတိ သိက္ခါ ကရဏီယာ’’တိ။

န ဟတ္ထနိလ္လေဟကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ဟတ္ထနိလ္လေဟကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၆၂၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပတ္တနိလ္လေဟကံ ဘုဉ္ဇန္တိ။ပေ.။။

‘‘န ပတ္တနိလ္လေဟကံ ဘုဉ္ဇိဿာမီတိ သိက္ခါ ကရဏီယာ’’တိ။

န ပတ္တနိလ္လေဟကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ပတ္တနိလ္လေဟကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ပရိတ္တကေ သေသေ ဧကတော သင်္ကဍ္ဎိတွာ နိလ္လေဟိတွာ ဘုဉ္ဇတိ, အာပဒါသု, ဥမ္မတ္တကဿ, အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၆၃၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဩဋ္ဌနိလ္လေဟကံ ဘုဉ္ဇန္တိ။ပေ.။။

‘‘န ဩဋ္ဌနိလ္လေဟကံ ဘုဉ္ဇိဿာမီတိ သိက္ခါ ကရဏီယာ’’တိ။

န ဩဋ္ဌနိလ္လေဟကံ ဘုဉ္ဇိတဗ္ဗံ။ ယော အနာဒရိယံ ပဋိစ္စ ဩဋ္ဌနိလ္လေဟကံ ဘုဉ္ဇတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၆၃၁. တေန သမယေန ဗုဒ္ဓေါ ဘဂဝါ ဘဂ္ဂေသု ဝိဟရတိ သုသုမာရဂိရေ [သုံသုမာရဂိရေ (သီ. သျာ.), သံသုမာရဂိရေ (က.)] ဘေသကဠာဝနေ မိဂဒါယေ။ တေန ခေါ ပန သမယေန ဘိက္ခူ ကောကနဒေ [ကောကနုဒေ (က.)] ပါသာဒေ သာမိသေန ဟတ္ထေန ပါနီယထာလကံ ပဋိဂ္ဂဏှန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ သာမိသေန ဟတ္ထေန ပါနီယထာလကံ ပဋိဂ္ဂဟေဿန္တိ, သေယျထာပိ ဂိဟီ ကာမဘောဂိနော’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ သာမိသေန ဟတ္ထေန ပါနီယထာလကံ ပဋိဂ္ဂဟေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခူ သာမိသေန ဟတ္ထေန ပါနီယထာလကံ ပဋိဂ္ဂဏှန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တေ, ဘိက္ခဝေ, မောဃပုရိသာ သာမိသေန ဟတ္ထေန ပါနီယထာလကံ ပဋိဂ္ဂဟေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န သာမိသေန ဟတ္ထေန ပါနီယထာလကံ ပဋိဂ္ဂဟေဿာမီတိ သိက္ခါ ကရဏီယာ’’တိ။

န သာမိသေန ဟတ္ထေန ပါနီယထာလကော ပဋိဂ္ဂဟေတဗ္ဗော။ ယော အနာဒရိယံ ပဋိစ္စ သာမိသေန ဟတ္ထေန ပါနီယထာလကံ ပဋိဂ္ဂဏှာတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ‘‘ဓေါဝိဿာမီ’’တိ ဝါ ‘‘ဓေါဝါပေဿာမီ’’တိ ဝါ ပဋိဂ္ဂဏှာတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၆၃၂. တေန သမယေန ဗုဒ္ဓေါ ဘဂဝါ ဘဂ္ဂေသု ဝိဟရတိ သုသုမာရဂိရေ ဘေသကဠာဝနေ မိဂဒါယေ။ တေန ခေါ ပန သမယေန ဘိက္ခူ ကောကနဒေ ပါသာဒေ သသိတ္ထကံ ပတ္တဓေါဝနံ အန္တရဃရေ ဆဍ္ဍေန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ သသိတ္ထကံ ပတ္တဓေါဝနံ အန္တရဃရေ ဆဍ္ဍေဿန္တိ, သေယျထာပိ ဂိဟီ ကာမဘောဂိနော’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ သသိတ္ထကံ ပတ္တဓေါဝနံ အန္တရဃရေ ဆဍ္ဍေဿန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခူ သသိတ္ထကံ ပတ္တဓေါဝနံ အန္တရဃရေ ဆဍ္ဍေန္တီတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တေ, ဘိက္ခဝေ, မောဃပုရိသာ သသိတ္ထကံ ပတ္တဓေါဝနံ အန္တရဃရေ ဆဍ္ဍေဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န သသိတ္ထကံ ပတ္တဓေါဝနံ အန္တရဃရေ ဆဍ္ဍေဿာမီတိ သိက္ခါ ကရဏီယာ’’တိ။

န သသိတ္ထကံ ပတ္တဓေါဝနံ အန္တရဃရေ ဆဍ္ဍေတဗ္ဗံ။ ယော အနာဒရိယံ ပဋိစ္စ သသိတ္ထကံ ပတ္တဓေါဝနံ အန္တရဃရေ ဆဍ္ဍေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ဥဒ္ဓရိတွာ ဝါ ဘိန္ဒိတွာ ဝါ ပဋိဂ္ဂဟေ ဝါ နီဟရိတွာ ဝါ ဆဍ္ဍေတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၆၃၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဆတ္တပါဏိဿ ဓမ္မံ ဒေသေန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဆတ္တပါဏိဿ ဓမ္မံ ဒေသေဿန္တီ’’တိ။ပေ.။ သစ္စံ ကိရ တုမှေ, ဘိက္ခဝေ, ဆတ္တပါဏိဿ ဓမ္မံ ဒေသေထာတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တုမှေ, မောဃပုရိသာ, ဆတ္တပါဏိဿ ဓမ္မံ ဒေသေဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န ဆတ္တပါဏိဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၆၃၄. တေန ခေါ ပန သမယေန ဘိက္ခူ ဆတ္တပါဏိဿ ဂိလာနဿ ဓမ္မံ ဒေသေတုံ ကုက္ကုစ္စာယန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ဆတ္တပါဏိဿ ဂိလာနဿ ဓမ္မံ န ဒေသေဿန္တီ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဆတ္တပါဏိဿ ဂိလာနဿ ဓမ္မံ ဒေသေတုံ။ ဧဝဉ္စ ပန , ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န ဆတ္တပါဏိဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ဆတ္တံ နာမ တီဏိ ဆတ္တာနိ – သေတစ္ဆတ္တံ, ကိလဉ္ဇစ္ဆတ္တံ, ပဏ္ဏစ္ဆတ္တံ မဏ္ဍလဗဒ္ဓံ သလာကဗဒ္ဓံ။

ဓမ္မော နာမ ဗုဒ္ဓဘာသိတော သာဝကဘာသိတော ဣသိဘာသိတော ဒေဝတာဘာသိတော အတ္ထူပသဉှိတော ဓမ္မူပသဉှိတော။

ဒေသေယျာတိ ပဒေန ဒေသေတိ, ပဒေ ပဒေ အာပတ္တိ ဒုက္ကဋဿ။ အက္ခရာယ ဒေသေတိ, အက္ခရက္ခရာယ အာပတ္တိ ဒုက္ကဋဿ။ န ဆတ္တပါဏိဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဆတ္တပါဏိဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၆၃၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဒဏ္ဍပါဏိဿ ဓမ္မံ ဒေသေန္တိ။ပေ.။။

‘‘န ဒဏ္ဍပါဏိဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ဒဏ္ဍော နာမ မဇ္ဈိမဿ ပုရိသဿ စတုဟတ္ထော ဒဏ္ဍော။ တတော ဥက္ကဋ္ဌော အဒဏ္ဍော, ဩမကော အဒဏ္ဍော။

န ဒဏ္ဍပါဏိဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဒဏ္ဍပါဏိဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၆၃၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သတ္ထပါဏိဿ ဓမ္မံ ဒေသေန္တိ။ပေ.။။

‘‘န သတ္ထပါဏိဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

သတ္ထံ နာမ ဧကတောဓါရံ ဥဘတောဓါရံ ပဟရဏံ။

န သတ္ထပါဏိဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ သတ္ထပါဏိဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၆၃၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ အာဝုဓပါဏိဿ ဓမ္မံ ဒေသေန္တိ။ပေ.။။

‘‘န အာဝုဓပါဏိဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

အာဝုဓံ နာမ စာပေါ ကောဒဏ္ဍော။

န အာဝုဓပါဏိဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ အာဝုဓပါဏိဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

သုရုသုရုဝဂ္ဂေါ ဆဋ္ဌော။

၇. ပါဒုကဝဂ္ဂေါ

၆၃၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပါဒုကာရုဠှဿ ဓမ္မံ ဒေသေန္တိ။ပေ.။။

‘‘န ပါဒုကာရုဠှဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ပါဒုကာရုဠှဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ အက္ကန္တဿ ဝါ ပဋိမုက္ကဿ ဝါ ဩမုက္ကဿ ဝါ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဌမသိက္ခါပဒံ နိဋ္ဌိတံ။

၆၃၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥပါဟနာရုဠှဿ ဓမ္မံ ဒေသေန္တိ။ပေ.။။

‘‘န ဥပါဟနာရုဠှဿ အဂိလာနဿ ဓမ္မံ ဒေသေဿာမီတိ သိက္ခါကရဏီယာ’’တိ။

န ဥပါဟနာရုဠှဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ အက္ကန္တဿ ဝါ ပဋိမုက္ကဿ ဝါ ဩမုက္ကဿ ဝါ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒုတိယသိက္ခါပဒံ နိဋ္ဌိတံ။

၆၄၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ယာနဂတဿ ဓမ္မံ ဒေသေန္တိ။ပေ.။။

‘‘န ယာနဂတဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ယာနံ နာမ ဝယှံ ရထော သကဋံ သန္ဒမာနိကာ သိဝိကာ ပါဋင်္ကီ။

န ယာနဂတဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ယာနဂတဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

တတိယသိက္ခါပဒံ နိဋ္ဌိတံ။

၆၄၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ သယနဂတဿ ဓမ္မံ ဒေသေန္တိ။ပေ.။။

‘‘န သယနဂတဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န သယနဂတဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ အန္တမသော ဆမာယမ္ပိ နိပန္နဿ သယနဂတဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

စတုတ္ထသိက္ခါပဒံ နိဋ္ဌိတံ။

၆၄၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပလ္လတ္ထိကာယ နိသိန္နဿ ဓမ္မံ ဒေသေန္တိ။ပေ.။။

‘‘န ပလ္လတ္ထိကာယ နိသိန္နဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ပလ္လတ္ထိကာယ နိသိန္နဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဟတ္ထပလ္လတ္ထိကာယ ဝါ ဒုဿပလ္လတ္ထိကာယ ဝါ နိသိန္နဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ပဉ္စမသိက္ခါပဒံ နိဋ္ဌိတံ။

၆၄၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဝေဌိတသီသဿ ဓမ္မံ ဒေသေန္တိ။ပေ.။။

‘‘န ဝေဌိတသီသဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ဝေဌိတသီသော နာမ ကေသန္တံ န ဒဿာပေတွာ ဝေဌိတော ဟောတိ။

န ဝေဌိတသီသဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဝေဌိတသီသဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ကေသန္တံ ဝိဝရာပေတွာ ဒေသေတိ, အာပဒါသု, ဥမ္မတ္တကဿ, အာဒိကမ္မိကဿာတိ။

ဆဋ္ဌသိက္ခါပဒံ နိဋ္ဌိတံ။

၆၄၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဩဂုဏ္ဌိတသီသဿ ဓမ္မံ ဒေသေန္တိ။ပေ.။။

‘‘န ဩဂုဏ္ဌိတသီသဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

ဩဂုဏ္ဌိတသီသော နာမ သသီသံ ပါရုတော ဝုစ္စတိ။

န ဩဂုဏ္ဌိတသီသဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဩဂုဏ္ဌိတသီသဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, သီသံ ဝိဝရာပေတွာ ဒေသေတိ, အာပဒါသု, ဥမ္မတ္တကဿ, အာဒိကမ္မိကဿာတိ။

သတ္တမသိက္ခါပဒံ နိဋ္ဌိတံ။

၆၄၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဆမာယ နိသီဒိတွာ အာသနေ နိသိန္နဿ ဓမ္မံ ဒေသေန္တိ။ပေ.။။

‘‘န ဆမာယံ နိသီဒိတွာ အာသနေ နိသိန္နဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ဆမာယံ နိသီဒိတွာ [နိသိန္နေန (အဋ္ဌကထာ)] အာသနေ နိသိန္နဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဆမာယံ နိသီဒိတွာ အာသနေ နိသိန္နဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

အဋ္ဌမသိက္ခါပဒံ နိဋ္ဌိတံ။

၆၄၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေဿန္တီ’’တိ။ပေ.။ သစ္စံ ကိရ တုမှေ, ဘိက္ခဝေ, နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေထာတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တုမှေ, မောဃပုရိသာ, နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ –

၆၄၇. ‘‘ဘူတပုဗ္ဗံ , ဘိက္ခဝေ, ဗာရာဏသိယံ အညတရဿ ဆပကဿ [ဆဝကဿ (သျာ.)] ပဇာပတိ ဂဗ္ဘိနီ အဟောသိ။ အထ ခေါ, ဘိက္ခဝေ, သာ ဆပကီ တံ ဆပကံ ဧတဒဝေါစ – ‘ဂဗ္ဘိနီမှိ, အယျပုတ္တ! ဣစ္ဆာမိ အမ္ဗံ ခါဒိတု’န္တိ။ ‘နတ္ထိ အမ္ဗံ [အမ္ဗော (သျာ.)], အကာလော အမ္ဗဿာ’တိ။ ‘သစေ န လဘိဿာမိ မရိဿာမီ’တိ။ တေန ခေါ ပန သမယေန, ရညော အမ္ဗော ဓုဝဖလော ဟောတိ။ အထ ခေါ, ဘိက္ခဝေ, သော ဆပကော ယေန သော အမ္ဗော တေနုပသင်္ကမိ; ဥပသင်္ကမိတွာ တံ အမ္ဗံ အဘိရုဟိတွာ နိလီနော အစ္ဆိ ။ အထ ခေါ, ဘိက္ခဝေ, ရာဇာ ပုရောဟိတေန ဗြာဟ္မဏေန သဒ္ဓိံ ယေန သော အမ္ဗော တေနုပသင်္ကမိ; ဥပသင်္ကမိတွာ ဥစ္စေ အာသနေ နိသီဒိတွာ မန္တံ ပရိယာပုဏာတိ ။ အထ ခေါ, ဘိက္ခဝေ , တဿ ဆပကဿ ဧတဒဟောသိ – ‘ယာဝ အဓမ္မိကော အယံ ရာဇာ, ယတြ ဟိ နာမ ဥစ္စေ အာသနေ နိသီဒိတွာ မန္တံ ပရိယာပုဏိဿတိ။ အယဉ္စ ဗြာဟ္မဏော အဓမ္မိကော, ယတြ ဟိ နာမ နီစေ အာသနေ နိသီဒိတွာ ဥစ္စေ အာသနေ နိသိန္နဿ မန္တံ ဝါစေဿတိ။ အဟဉ္စမှိ အဓမ္မိကော, ယောဟံ ဣတ္ထိယာ ကာရဏာ ရညော အမ္ဗံ အဝဟရာမိ။ သဗ္ဗမိဒံ စရိမံ ကတ’န္တိ တတ္ထေဝ ပရိပတိ။

[ဣမာ ဂါထာယော ဇာ. ၁.၄.၃၃-၃၅ ဇာတကေ အညထာ ဒိဿန္တိ] ‘‘ဥဘော အတ္ထံ န ဇာနန္တိ၊ ဥဘော ဓမ္မံ န ပဿရေ။

ယော စာယံ မန္တံ ဝါစေတိ၊ ယော စာဓမ္မေနဓီယတိ။

‘‘သာလီနံ ဩဒနော ဘုတ္တော၊ သုစိမံသူပသေစနော။

တသ္မာ ဓမ္မေ န ဝတ္တာမိ၊ ဓမ္မော အရိယေဘိ ဝဏ္ဏိတော။

‘‘ဓိရတ္ထု တံ ဓနလာဘံ၊ ယသလာဘဉ္စ ဗြာဟ္မဏ။

ယာ ဝုတ္တိ ဝိနိပါတေန၊ အဓမ္မစရဏေန ဝါ။

‘‘ပရိဗ္ဗဇ မဟာဗြဟ္မေ၊ ပစန္တညေပိ ပါဏိနော။

မာ တွံ အဓမ္မော အာစရိတော၊ အသ္မာ ကုမ္ဘမိဝါဘိဒါ’’တိ။

‘‘တဒါပိ မေ, ဘိက္ခဝေ, အမနာပါ နီစေ အာသနေ နိသီဒိတွာ ဥစ္စေ အာသနေ နိသိန္နဿ မန္တံ ဝါစေတုံ, ကိမင်္ဂ ပန ဧတရဟိ န အမနာပါ ဘဝိဿတိ နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေတုံ။ နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န နီစေ အာသနေ နိသီဒိတွာ ဥစ္စေ အာသနေ နိသိန္နဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န နီစေ အာသနေ နိသီဒိတွာ ဥစ္စေ အာသနေ နိသိန္နဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ နီစေ အာသနေ နိသီဒိတွာ ဥစ္စေ အာသနေ နိသိန္နဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

နဝမသိက္ခါပဒံ နိဋ္ဌိတံ။

၆၄၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဌိတာ နိသိန္နဿ ဓမ္မံ ဒေသေန္တိ။ပေ.။။

‘‘န ဌိတော နိသိန္နဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ဌိတေန နိသိန္နဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဌိတော နိသိန္နဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒသမသိက္ခါပဒံ နိဋ္ဌိတံ။

၆၄၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ပစ္ဆတော ဂစ္ဆန္တာ ပုရတော ဂစ္ဆန္တဿ ဓမ္မံ ဒေသေန္တိ။ပေ.။။

‘‘န ပစ္ဆတော ဂစ္ဆန္တော ပုရတော ဂစ္ဆန္တဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ပစ္ဆတော ဂစ္ဆန္တေန ပုရတော ဂစ္ဆန္တဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ပစ္ဆတော ဂစ္ဆန္တော ပုရတော ဂစ္ဆန္တဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဧကာဒသမသိက္ခါပဒံ နိဋ္ဌိတံ။

၆၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥပ္ပထေန ဂစ္ဆန္တာ ပထေန ဂစ္ဆန္တဿ ဓမ္မံ ဒေသေန္တိ။ပေ.။။

‘‘န ဥပ္ပထေန ဂစ္ဆန္တော ပထေန ဂစ္ဆန္တဿ အဂိလာနဿ ဓမ္မံ ဒေသေဿာမီတိ သိက္ခါ ကရဏီယာ’’တိ။

န ဥပ္ပထေန ဂစ္ဆန္တေန ပထေန ဂစ္ဆန္တဿ အဂိလာနဿ ဓမ္မော ဒေသေတဗ္ဗော။ ယော အနာဒရိယံ ပဋိစ္စ ဥပ္ပထေန ဂစ္ဆန္တော ပထေန ဂစ္ဆန္တဿ အဂိလာနဿ ဓမ္မံ ဒေသေတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

ဒွါဒသမသိက္ခါပဒံ နိဋ္ဌိတံ။

၆၅၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဌိတာ ဥစ္စာရမ္ပိ ပဿာဝမ္ပိ ကရောန္တိ။ပေ.။။

‘‘န ဌိတော အဂိလာနော ဥစ္စာရံ ဝါ ပဿာဝံ ဝါ ကရိဿာမီတိ သိက္ခါ ကရဏီယာ’’တိ။

န ဌိတေန အဂိလာနေန ဥစ္စာရော ဝါ ပဿာဝေါ ဝါ ကာတဗ္ဗော။ ယော အနာဒရိယံ ပဋိစ္စ ဌိတော အဂိလာနော ဥစ္စာရံ ဝါ ပဿာဝံ ဝါ ကရောတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ။ပေ.။ အာဒိကမ္မိကဿာတိ။

တေရသမသိက္ခါပဒံ နိဋ္ဌိတံ။

၆၅၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဟရိတေ ဥစ္စာရမ္ပိ ပဿာဝမ္ပိ ခေဠမ္ပိ ကရောန္တိ။ပေ.။။

‘‘န ဟရိတေ အဂိလာနော ဥစ္စာရံ ဝါ ပဿာဝံ ဝါ ခေဠံ ဝါ ကရိဿာမီတိ သိက္ခါ ကရဏီယာ’’တိ။

န ဟရိတေ အဂိလာနေန ဥစ္စာရော ဝါ ပဿာဝေါ ဝါ ခေဠော ဝါ ကာတဗ္ဗော။ ယော အနာဒရိယံ ပဋိစ္စ ဟရိတေ အဂိလာနော ဥစ္စာရံ ဝါ ပဿာဝံ ဝါ ခေဠံ ဝါ ကရောတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, အပ္ပဟရိတေ ကတော ဟရိတံ ဩတ္ထရတိ, အာပဒါသု, ဥမ္မတ္တကဿ, အာဒိကမ္မိကဿာတိ။

စုဒ္ဒသမသိက္ခါပဒံ နိဋ္ဌိတံ။

၆၅၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန ဆဗ္ဗဂ္ဂိယာ ဘိက္ခူ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကရောန္တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကရိဿန္တိ, သေယျထာပိ ဂိဟီ ကာမဘောဂိနော’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကရိဿန္တီ’’တိ။ပေ.။ သစ္စံ ကိရ တုမှေ, ဘိက္ခဝေ, ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကရောထာတိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တုမှေ, မောဃပုရိသာ, ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကရိဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရိဿာမီတိ သိက္ခါ ကရဏီယာ’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၆၅၄. တေန ခေါ ပန သမယေန ဂိလာနာ ဘိက္ခူ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကာတုံ ကုက္ကုစ္စာယန္တိ။ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဂိလာနေန ဘိက္ခုနာ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ ကာတုံ။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘န ဥဒကေ အဂိလာနော ဥစ္စာရံ ဝါ ပဿာဝံ ဝါ ခေဠံ ဝါ ကရိဿာမီတိ သိက္ခါ ကရဏီယာ’’တိ။

န ဥဒကေ အဂိလာနေန ဥစ္စာရော ဝါ ပဿာဝေါ ဝါ ခေဠော ဝါ ကာတဗ္ဗော။ ယော အနာဒရိယံ ပဋိစ္စ ဥဒကေ အဂိလာနော ဥစ္စာရံ ဝါ ပဿာဝံ ဝါ ခေဠံ ဝါ ကရောတိ, အာပတ္တိ ဒုက္ကဋဿ။

အနာပတ္တိ အသဉ္စိစ္စ, အဿတိယာ, အဇာနန္တဿ, ဂိလာနဿ, ထလေ ကတော ဥဒကံ ဩတ္ထရတိ, အာပဒါသု, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

ပန္နရသမသိက္ခါပဒံ နိဋ္ဌိတံ။

ပါဒုကဝဂ္ဂေါ သတ္တမော။

ဥဒ္ဒိဋ္ဌာ ခေါ, အာယသ္မန္တော, သေခိယာ ဓမ္မာ။ တတ္ထာယသ္မန္တေ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယသ္မန္တော, တသ္မာ တုဏှီ, ဧဝမေတံ ဓါရယာမီတိ။

သေခိယာ နိဋ္ဌိတာ။

သေခိယကဏ္ဍံ နိဋ္ဌိတံ။