၁. ပါရာဇိကကဏ္ဍ

၁. ပဌမပါရာဇိက

သုဒိန္နဘာဏဝါရ

၂၄. တေန ခေါ ပန သမယေန ဝေသာလိယာ အဝိဒူရေ ကလန္ဒဂါမော နာမ အတ္ထိ [ကလန္ဒဂါမော နာမ ဟောတိ (သီ.), ကလန္ဒဂါမော ဟောတိ (သျာ.)]။ တတ္ထ သုဒိန္နော နာမ ကလန္ဒပုတ္တော သေဋ္ဌိပုတ္တော ဟောတိ။ အထ ခေါ သုဒိန္နော ကလန္ဒပုတ္တော သမ္ဗဟုလေဟိ [သမ္ပဟူလေဟိ (သီ.)] သဟာယကေဟိ သဒ္ဓိံ ဝေသာလိံ အဂမာသိ ကေနစိဒေဝ ကရဏီယေန ။ တေန ခေါ ပန သမယေန ဘဂဝါ မဟတိယာ ပရိသာယ ပရိဝုတော ဓမ္မံ ဒေသေန္တော နိသိန္နော ဟောတိ။ အဒ္ဒသ ခေါ သုဒိန္နော ကလန္ဒပုတ္တော ဘဂဝန္တံ မဟတိယာ ပရိသာယ ပရိဝုတံ ဓမ္မံ ဒေသေန္တံ နိသိန္နံ။ ဒိသွာနဿ ဧတဒဟောသိ – ‘‘ယံနူနာဟမ္ပိ ဓမ္မံ သုဏေယျ’’န္တိ။ အထ ခေါ သုဒိန္နော ကလန္ဒပုတ္တော ယေန သာ ပရိသာ တေနုပသင်္ကမိ; ဥပသင်္ကမိတွာ ဧကမန္တံ နိသီဒိ။ ဧကမန္တံ နိသိန္နဿ ခေါ သုဒိန္နဿ ကလန္ဒပုတ္တဿ ဧတဒဟောသိ – ‘‘ယထာ ယထာ ခေါ အဟံ ဘဂဝတာ ဓမ္မံ ဒေသိတံ အာဇာနာမိ, နယိဒံ သုကရံ အဂါရံ အဇ္ဈာဝသတာ ဧကန္တပရိပုဏ္ဏံ ဧကန္တပရိသုဒ္ဓံ သင်္ခလိခိတံ ဗြဟ္မစရိယံ စရိတုံ; ယံနူနာဟံ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇေယျ’’န္တိ။ အထ ခေါ သာ ပရိသာ ဘဂဝတာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ။

၂၅. အထ ခေါ သုဒိန္နော ကလန္ဒပုတ္တော အစိရဝုဋ္ဌိတာယ ပရိသာယ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ သုဒိန္နော ကလန္ဒပုတ္တော ဘဂဝန္တံ ဧတဒဝေါစ – ‘‘ယထာ ယထာဟံ, ဘန္တေ, ဘဂဝတာ ဓမ္မံ ဒေသိတံ အာဇာနာမိ , နယိဒံ သုကရံ အဂါရံ အဇ္ဈာဝသတာ ဧကန္တပရိပုဏ္ဏံ ဧကန္တပရိသုဒ္ဓံ သင်္ခလိခိတံ ဗြဟ္မစရိယံ စရိတုံ; ဣစ္ဆာမဟံ, ဘန္တေ, ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတုံ။ ပဗ္ဗာဇေတု မံ ဘဂဝါ’’တိ။ ‘‘အနုညာတောသိ ပန တွံ, သုဒ္ဒိန္န, မာတာပိတူဟိ အဂါရသ္မာ အနဂါရိယံ ပဗ္ဗဇ္ဇာယာ’’တိ? ‘‘န ခေါ အဟံ, ဘန္တေ, အနုညာတော မာတာပိတူဟိ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ‘‘န ခေါ, သုဒိန္န, တထာဂတာ အနနုညာတံ မာတာပိတူဟိ ပုတ္တံ ပဗ္ဗာဇေန္တီ’’တိ။ ‘‘သောဟံ, ဘန္တေ, တထာ ကရိဿာမိ ယထာ မံ မာတာပိတရော အနုဇာနိဿန္တိ အဂါရသ္မာ အနဂါရိယံ ပဗ္ဗဇ္ဇာယာ’’တိ။

၂၆. အထ ခေါ သုဒိန္နော ကလန္ဒပုတ္တော ဝေသာလိယံ တံ ကရဏီယံ တီရေတွာ ယေန ကလန္ဒဂါမော ယေန မာတာပိတရော တေနုပသင်္ကမိ; ဥပသင်္ကမိတွာ မာတာပိတရော ဧတဒဝေါစ – ‘‘အမ္မတာတာ, ယထာ ယထာဟံ ဘဂဝတာ ဓမ္မံ ဒေသိတံ အာဇာနာမိ, နယိဒံ သုကရံ အဂါရံ အဇ္ဈာဝသတာ ဧကန္တပရိပုဏ္ဏံ ဧကန္တပရိသုဒ္ဓံ သင်္ခလိခိတံ ဗြဟ္မစရိယံ စရိတုံ; ဣစ္ဆာမဟံ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတုံ။ အနုဇာနာထ မံ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ဧဝံ ဝုတ္တေ သုဒိန္နဿ ကလန္ဒပုတ္တဿ မာတာပိတရော သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, တာတ သုဒိန္န, အမှာကံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, တာတ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ မယံ တေ အကာမကာ ဝိနာ ဘဝိဿာမ, ကိံ ပန မယံ တံ ဇီဝန္တံ အနုဇာနိဿာမ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ဒုတိယမ္ပိ ခေါ သုဒိန္နော ကလန္ဒပုတ္တော မာတာပိတရော ဧတဒဝေါစ – ‘‘အမ္မတာတာ, ယထာ ယထာဟံ ဘဂဝတာ ဓမ္မံ ဒေသိတံ အာဇာနာမိ, နယိဒံ သုကရံ အဂါရံ အဇ္ဈာဝသတာ ဧကန္တပရိပုဏ္ဏံ ဧကန္တပရိသုဒ္ဓံ သင်္ခလိခိတံ ဗြဟ္မစရိယံ စရိတုံ; ဣစ္ဆာမဟံ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတုံ။ အနုဇာနာထ မံ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ဒုတိယမ္ပိ ခေါ သုဒိန္နဿ ကလန္ဒပုတ္တဿ မာတာပိတရော သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, တာတ သုဒိန္န, အမှာကံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, တာတ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ မယံ တေ အကာမကာ ဝိနာ ဘဝိဿာမ, ကိံ ပန မယံ တံ ဇီဝန္တံ အနုဇာနိဿာမ အဂါရသ္မာ အနဂါရိယံ ပဗ္ဗဇ္ဇာယာ’’တိ! တတိယမ္ပိ ခေါ သုဒိန္နော ကလန္ဒပုတ္တော မာတာပိတရော ဧတဒဝေါစ – ‘‘အမ္မတာတာ , ယထာ ယထာဟံ ဘဂဝတာ ဓမ္မံ ဒေသိတံ အာဇာနာမိ, နယိဒံ သုကရံ အဂါရံ အဇ္ဈာဝသတာ ဧကန္တပရိပုဏ္ဏံ ဧကန္တပရိသုဒ္ဓံ သင်္ခလိခိတံ ဗြဟ္မစရိယံ စရိတုံ; ဣစ္ဆာမဟံ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတုံ ။ အနုဇာနာထ မံ အဂါရသ္မာ အနဂါရိယံ ပဗ္ဗဇ္ဇာယာ’’တိ။ တတိယမ္ပိ ခေါ သုဒိန္နဿ ကလန္ဒပုတ္တဿ မာတာပိတရော သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, တာတ သုဒိန္န, အမှာကံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, တာတ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ မယံ တေ အကာမကာ ဝိနာ ဘဝိဿာမ, ကိံ ပန မယံ တံ ဇီဝန္တံ အနုဇာနိဿာမ အဂါရသ္မာ အနဂါရိယံ ပဗ္ဗဇ္ဇာယာ’’တိ!

၂၇. အထ ခေါ သုဒိန္နော ကလန္ဒပုတ္တော – ‘‘န မံ မာတာပိတရော အနုဇာနန္တိ အဂါရသ္မာ အနဂါရိယံ ပဗ္ဗဇ္ဇာယာ’’တိ, တတ္ထေဝ အနန္တရဟိတာယ ဘူမိယာ နိပဇ္ဇိ – ဣဓေဝ မေ မရဏံ ဘဝိဿတိ ပဗ္ဗဇ္ဇာ ဝါတိ။ အထ ခေါ သုဒိန္နော ကလန္ဒပုတ္တော ဧကမ္ပိ ဘတ္တံ န ဘုဉ္ဇိ, ဒွေပိ ဘတ္တာနိ န ဘုဉ္ဇိ, တီဏိပိ ဘတ္တာနိ န ဘုဉ္ဇိ, စတ္တာရိပိ ဘတ္တာနိ န ဘုဉ္ဇိ, ပဉ္စပိ ဘတ္တာနိ န ဘုဉ္ဇိ, ဆပိ ဘတ္တာနိ န ဘုဉ္ဇိ, သတ္တပိ ဘတ္တာနိ န ဘုဉ္ဇိ။

၂၈. အထ ခေါ သုဒိန္နဿ ကလန္ဒပုတ္တဿ မာတာပိတရော သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, တာတ သုဒိန္န, အမှာကံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, တာတ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ မယံ တေ အကာမကာ ဝိနာ ဘဝိဿာမ, ကိံ ပန မယံ တံ ဇီဝန္တံ အနုဇာနိဿာမ အဂါရသ္မာ အနဂါရိယံ ပဗ္ဗဇ္ဇာယ? ဥဋ္ဌေဟိ, တာတ သုဒိန္န, ဘုဉ္ဇ စ ပိဝ စ ပရိစာရေဟိ စ, ဘုဉ္ဇန္တော ပိဝန္တော ပရိစာရေန္တော ကာမေ ပရိဘုဉ္ဇန္တော ပုညာနိ ကရောန္တော အဘိရမဿု။ န တံ မယံ အနုဇာနာမ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ဧဝံ ဝုတ္တေ သုဒိန္နော ကလန္ဒပုတ္တော တုဏှီ အဟောသိ။ ဒုတိယမ္ပိ ခေါ။ပေ.။ တတိယမ္ပိ ခေါ သုဒိန္နဿ ကလန္ဒပုတ္တဿ မာတာပိတရော သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, တာတ သုဒိန္န, အမှာကံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, တာတ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ မယံ တေ အကာမကာ ဝိနာ ဘဝိဿာမ, ကိံ ပန မယံ တံ ဇီဝန္တံ အနုဇာနိဿာမ အဂါရသ္မာ အနဂါရိယံ ပဗ္ဗဇ္ဇာယ! ဥဋ္ဌေဟိ, တာတ သုဒိန္န, ဘုဉ္ဇ စ ပိဝ စ ပရိစာရေဟိ စ, ဘုဉ္ဇန္တော ပိဝန္တော ပရိစာရေန္တော ကာမေ ပရိဘုဉ္ဇန္တော ပုညာနိ ကရောန္တော အဘိရမဿု။ န တံ မယံ အနုဇာနာမ အဂါရသ္မာ အနဂါရိယံ ပဗ္ဗဇ္ဇာယာ’’တိ။ တတိယမ္ပိ ခေါ သုဒိန္နော ကလန္ဒပုတ္တော တုဏှီ အဟောသိ။

အထ ခေါ သုဒိန္နဿ ကလန္ဒပုတ္တဿ သဟာယကာ ယေန သုဒိန္နော ကလန္ဒပုတ္တော တေနုပသင်္ကမိံသု; ဥပသင်္ကမိတွာ သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, သမ္မ သုဒိန္န, မာတာပိတူနံ ဧကပုတ္တကော ပိယော မနာပေါ သုခေဓိတော သုခပရိဟတော။ န တွံ, သမ္မ သုဒိန္န, ကိဉ္စိ ဒုက္ခဿ ဇာနာသိ။ မရဏေနပိ တေ မာတာပိတရော အကာမကာ ဝိနာ ဘဝိဿန္တိ, ကိံ ပန တံ ဇီဝန္တံ အနုဇာနိဿန္တိ အဂါရသ္မာ အနဂါရိယံ ပဗ္ဗဇာယ! ဥဋ္ဌေဟိ, သမ္မ သုဒိန္န, ဘုဉ္ဇ စ ပိဝ စ ပရိစာရေဟိ စ, ဘုဉ္ဇန္တော ပိဝန္တော ပရိစာရေန္တော ကာမေ ပရိဘုဉ္ဇန္တော ပုညာနိ ကရောန္တော အဘိရမဿု, န တံ မာတာပိတရော အနုဇာနိဿန္တိ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ဧဝံ ဝုတ္တေ, သုဒိန္နော ကလန္ဒပုတ္တော တုဏှီ အဟောသိ။ ဒုတိယမ္ပိ ခေါ။ပေ.။ တတိယမ္ပိ ခေါ သုဒိန္နဿ ကလန္ဒပုတ္တဿ သဟာယကာ သုဒိန္နံ ကလန္ဒပုတ္တံ ဧတဒဝေါစုံ – ‘‘တွံ ခေါသိ, သမ္မ သုဒိန္န။ပေ.။ တတိယမ္ပိ ခေါ သုဒိန္နော ကလန္ဒပုတ္တော တုဏှီ အဟောသိ။

၂၉. အထ ခေါ သုဒိန္နဿ ကလန္ဒပုတ္တဿ သဟာယကာ ယေန သုဒိန္နဿ ကလန္ဒပုတ္တဿ မာတာပိတရော တေနုပသင်္ကမိံသု; ဥပသင်္ကမိတွာ သုဒိန္နဿ ကလန္ဒပုတ္တဿ မာတာပိတရော ဧတဒဝေါစုံ – ‘‘အမ္မတာတာ, ဧသော သုဒိန္နော အနန္တရဟိတာယ ဘူမိယာ နိပန္နော – ‘ဣဓေဝ မေ မရဏံ ဘဝိဿတိ ပဗ္ဗဇ္ဇာ ဝါ’တိ။ သစေ တုမှေ သုဒိန္နံ နာနုဇာနိဿထ အဂါရသ္မာ အနဂါရိယံ ပဗ္ဗဇ္ဇာယ, တတ္ထေဝ မရဏံ အာဂမိဿတိ။ သစေ ပန တုမှေ သုဒိန္နံ အနုဇာနိဿထ အဂါရသ္မာ အနဂါရိယံ ပဗ္ဗဇ္ဇာယ, ပဗ္ဗဇိတမ္ပိ နံ ဒက္ခိဿထ။ သစေ သုဒိန္နော နာဘိရမိဿတိ အဂါရသ္မာ အနဂါရိယံ ပဗ္ဗဇ္ဇာယ, ကာ တဿ အညာ ဂတိ ဘဝိဿတိ, ဣဓေဝ ပစ္စာဂမိဿတိ။ အနုဇာနာထ သုဒိန္နံ အဂါရသ္မာ အနဂါရိယံ ပဗ္ဗဇ္ဇာယာ’’တိ။ ‘‘အနုဇာနာမ , တာတာ, သုဒိန္နံ အဂါရသ္မာ အနဂါရိယံ ပဗ္ဗဇ္ဇာယာ’’တိ။ အထ ခေါ သုဒိန္နဿ ကလန္ဒပုတ္တဿ သဟာယကာ ယေန သုဒိန္နော ကလန္ဒပုတ္တော တေနုပသင်္ကမိံသု; ဥပသင်္ကမိတွာ သုဒိန္နံ ကလန္ဒပုတ္တံ ဧတဒဝေါစုံ – ‘‘ဥဋ္ဌေဟိ, သမ္မ သုဒိန္န, အနုညာတောသိ မာတာပိတူဟိ အဂါရသ္မာ အနဂါရိယံ ပဗ္ဗဇ္ဇာယာ’’တိ။

၃၀. အထ ခေါ သုဒိန္နော ကလန္ဒပုတ္တော – ‘‘အနုညာတောမှိ ကိရ မာတာပိတူဟိ အဂါရသ္မာ အနဂါရိယံ ပဗ္ဗဇ္ဇာယာ’’တိ, ဟဋ္ဌော ဥဒဂ္ဂေါ ပါဏိနာ ဂတ္တာနိ ပရိပုဉ္ဆန္တော ဝုဋ္ဌာသိ။ အထ ခေါ သုဒိန္နော ကလန္ဒပုတ္တော ကတိပါဟံ ဗလံ ဂါဟေတွာ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသန္နော ခေါ သုဒိန္နော ကလန္ဒပုတ္တော ဘဂဝန္တံ ဧတဒဝေါစ – ‘‘အနုညာတော [အနုညာတောမှိ (သီ. သျာ.)] အဟံ, ဘန္တေ, မာတာပိတူဟိ အဂါရသ္မာ အနဂါရိယံ ပဗ္ဗဇ္ဇာယ။ ပဗ္ဗာဇေတု မံ ဘဂဝါ’’တိ ။ အလတ္ထ ခေါ သုဒိန္နော ကလန္ဒပုတ္တော ဘဂဝတော သန္တိကေ ပဗ္ဗဇ္ဇံ, အလတ္ထ ဥပသမ္ပဒံ။ အစိရူပသမ္ပန္နော စ ပနာယသ္မာ သုဒိန္နော ဧဝရူပေ ဓုတဂုဏေ သမာဒါယ ဝတ္တတိ, အာရညိကော ဟောတိ ပိဏ္ဍပါတိကော ပံသုကူလိကော သပဒါနစာရိကော, အညတရံ ဝဇ္ဇိဂါမံ ဥပနိဿာယ ဝိဟရတိ။

တေန ခေါ ပန သမယေန ဝဇ္ဇီ ဒုဗ္ဘိက္ခါ ဟောတိ ဒွီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ အထ ခေါ အာယသ္မတော သုဒိန္နဿ ဧတဒဟောသိ – ‘‘ဧတရဟိ ခေါ ဝဇ္ဇီ ဒုဗ္ဘိက္ခါ ဒွီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ ဗဟူ ခေါ ပန မေ ဝေသာလိယံ ဉာတီ အဍ္ဎာ မဟဒ္ဓနာ မဟာဘောဂါ ပဟူတဇာတရူပရဇတာ ပဟူတဝိတ္တူပကရဏာ ပဟူတဓနဓညာ။ ယံနူနာဟံ ဉာတီ ဥပနိဿာယ ဝိဟရေယျံ! ဉာတီ မံ [ဉာတကာပိ မံ (သျာ.)] နိဿာယ ဒါနာနိ ဒဿန္တိ ပုညာနိ ကရိဿန္တိ, ဘိက္ခူ စ လာဘံ လစ္ဆန္တိ, အဟဉ္စ ပိဏ္ဍကေန န ကိလမိဿာမီ’’တိ။ အထ ခေါ အာယသ္မာ သုဒိန္နော သေနာသနံ သံသာမေတွာ ပတ္တစီဝရမာဒါယ ယေန ဝေသာလီ တေန ပက္ကာမိ။ အနုပုဗ္ဗေန ယေန ဝေသာလီ တဒဝသရိ။ တတြ သုဒံ အာယသ္မာ သုဒိန္နော ဝေသာလိယံ ဝိဟရတိ မဟာဝနေ ကူဋာဂါရသာလာယံ။ အဿောသုံ ခေါ အာယသ္မတော သုဒိန္နဿ ဉာတကာ – ‘‘သုဒိန္နော ကိရ ကလန္ဒပုတ္တော ဝေသာလိံ အနုပ္ပတ္တော’’တိ။ တေ အာယသ္မတော သုဒိန္နဿ သဋ္ဌိမတ္တေ ထာလိပါကေ ဘတ္တာဘိဟာရံ အဘိဟရိံသု။ အထ ခေါ အာယသ္မာ သုဒိန္နော တေ သဋ္ဌိမတ္တေ ထာလိပါကေ ဘိက္ခူနံ ဝိဿဇ္ဇေတွာ ပုဗ္ဗဏှသမယံ နိဝါသေတွာ ပတ္တစီဝရမာဒါယ ကလန္ဒဂါမံ ပိဏ္ဍာယ ပါဝိသိ။ ကလန္ဒဂါမေ သပဒါနံ ပိဏ္ဍာယ စရမာနော ယေန သကပိတု နိဝေသနံ တေနုပသင်္ကမိ။

၃၁. တေန ခေါ ပန သမယေန အာယသ္မတော သုဒိန္နဿ ဉာတိဒါသီ အာဘိဒေါသိကံ ကုမ္မာသံ ဆဍ္ဍေတုကာမာ [ဆဋ္ဋေတုကာမာ (က.)] ဟောတိ။ အထ ခေါ အာယသ္မာ သုဒိန္နော တံ ဉာတိဒါသိံ ဧတဒဝေါစ – ‘‘သစေ တံ, ဘဂိနိ, ဆဍ္ဍနီယဓမ္မံ , ဣဓ မေ ပတ္တေ အာကိရာ’’တိ။ အထ ခေါ အာယသ္မတော သုဒိန္နဿ ဉာတိဒါသီ တံ အာဘိဒေါသိကံ ကုမ္မာသံ အာယသ္မတော သုဒိန္နဿ ပတ္တေ အာကိရန္တီ ဟတ္ထာနဉ္စ ပါဒါနဉ္စ သရဿ စ နိမိတ္တံ အဂ္ဂဟေသိ။ အထ ခေါ အာယသ္မတော သုဒိန္နဿ ဉာတိဒါသီ ယေနာယသ္မတော သုဒိန္နဿ မာတာ တေနုပသင်္ကမိ; ဥပသင်္ကမိတွာ အာယသ္မတော သုဒိန္နဿ မာတရံ ဧတဒဝေါစ – ‘‘ယဂ္ဃေယျေ, ဇာနေယျာသိ, အယျပုတ္တော သုဒိန္နော အနုပ္ပတ္တော’’တိ။ ‘‘သစေ, ဇေ, တွံ သစ္စံ ဘဏသိ, အဒါသိံ တံ ကရောမီ’’တိ။

၃၂. တေန ခေါ ပန သမယေန အာယသ္မာ သုဒိန္နော တံ အာဘိဒေါသိကံ ကုမ္မာသံ အညတရံ ကုဋ္ဋမူလံ [ကုဍ္ဍမူလံ (သီ. သျာ.)] နိဿာယ ပရိဘုဉ္ဇတိ။ ပိတာပိ ခေါ အာယသ္မတော သုဒိန္နဿ ကမ္မန္တာ အာဂစ္ဆန္တော အဒ္ဒသ အာယသ္မန္တံ သုဒိန္နံ တံ အာဘိဒေါသိကံ ကုမ္မာသံ အညတရံ ကုဋ္ဋမူလံ နိဿာယ ပရိဘုဉ္ဇန္တံ ။ ဒိသွာန ယေနာယသ္မာ သုဒိန္နော တေနုပသင်္ကမိ; ဥပသင်္ကမိတွာ အာယသ္မန္တံ သုဒိန္နံ ဧတဒဝေါစ – ‘‘အတ္ထိ နာမ, တာတ သုဒိန္န, အာဘိဒေါသိကံ ကုမ္မာသံ ပရိဘုဉ္ဇိဿသိ! နနု နာမ, တာတ သုဒိန္န, သကံ ဂေဟံ ဂန္တဗ္ဗ’’န္တိ? ‘‘အဂမိမှ [အဂမမှာ (က.)] ခေါ တေ ဂဟပတိ, ဂေဟံ။ တတောယံ အာဘိဒေါသိကော ကုမ္မာသော’’တိ။ အထ ခေါ အာယသ္မတော သုဒိန္နဿ ပိတာ အာယသ္မတော သုဒိန္နဿ ဗာဟာယံ ဂဟေတွာ အာယသ္မန္တံ သုဒိန္နံ ဧတဒဝေါစ – ‘‘ဧဟိ, တာတ သုဒိန္န, ဃရံ ဂမိဿာမာ’’တိ။ အထ ခေါ အာယသ္မာ သုဒိန္နော ယေန သကပိတု နိဝေသနံ တေနုပသင်္ကမိ ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ အာယသ္မတော သုဒိန္နဿ ပိတာ အာယသ္မန္တံ သုဒိန္နံ ဧတဒဝေါစ – ‘‘ဘုဉ္ဇ, တာတ သုဒိန္နာ’’တိ။ ‘‘အလံ, ဂဟပတိ, ကတံ မေ အဇ္ဇ ဘတ္တကိစ္စ’’န္တိ။ ‘‘အဓိဝါသေဟိ, တာတ သုဒိန္န, သွာတနာယ ဘတ္တ’’န္တိ။ အဓိဝါသေသိ ခေါ အာယသ္မာ သုဒိန္နော တုဏှီဘာဝေန။ အထ ခေါ အာယသ္မာ သုဒိန္နော ဥဋ္ဌာယာသနာ ပက္ကာမိ။

၃၃. အထ ခေါ အာယသ္မတော သုဒိန္နဿ မာတာ တဿာ ရတ္တိယာ အစ္စယေန ဟရိတေန ဂေါမယေန ပထဝိံ ဩပုဉ္ဇာပေတွာ [ဩပုစ္ဆာပေတွာ (သီ. သျာ.)] ဒွေ ပုဉ္ဇေ ကာရာပေသိ – ဧကံ ဟိရညဿ, ဧကံ သုဝဏ္ဏဿ။ တာဝ မဟန္တာ ပုဉ္ဇာ အဟေသုံ, ဩရတော ဌိတော ပုရိသော ပါရတော ဌိတံ ပုရိသံ န ပဿတိ; ပါရတော ဌိတော ပုရိသော ဩရတော ဌိတံ ပုရိသံ န ပဿတိ။ တေ ပုဉ္ဇေ ကိလဉ္ဇေဟိ ပဋိစ္ဆာဒါပေတွာ မဇ္ဈေ အာသနံ ပညာပေတွာ တိရောကရဏီယံ ပရိက္ခိပိတွာ အာယသ္မတော သုဒိန္နဿ ပုရာဏဒုတိယိကံ အာမန္တေသိ – ‘‘တေန ဟိ, ဝဓု, ယေန အလင်္ကာရေန အလင်္ကတာ ပုတ္တဿ မေ သုဒိန္နဿ ပိယာ အဟောသိ မနာပါ တေန အလင်္ကာရေန အလင်္ကရာ’’တိ။ ‘‘ဧဝံ, အယျေ’’တိ, ခေါ အာယသ္မတော သုဒိန္နဿ ပုရာဏဒုတိယိကာ အာယသ္မတော သုဒိန္နဿ မာတုယာ ပစ္စဿောသိ။

၃၄. အထ ခေါ အာယသ္မာ သုဒိန္နော ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန သကပိတု နိဝေသနံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ အာယသ္မတော သုဒိန္နဿ ပိတာ ယေနာယသ္မာ သုဒိန္နော တေနုပသင်္ကမိ; ဥပသင်္ကမိတွာ တေ ပုဉ္ဇေ ဝိဝရာပေတွာ အာယသ္မန္တံ သုဒိန္နံ ဧတဒဝေါစ – ‘‘ဣဒံ တေ, တာတ သုဒိန္န, မာတု မတ္တိကံ ဣတ္ထိကာယ ဣတ္ထိဓနံ, အညံ ပေတ္တိကံ အညံ ပိတာမဟံ။ လဗ္ဘာ, တာတ သုဒိန္န, ဟီနာယာဝတ္တိတွာ ဘောဂါ စ ဘုဉ္ဇိတုံ ပုညာနိ စ ကာတုံ။ ဧဟိ တွံ, တာတ သုဒိန္န, ဟီနာယာဝတ္တိတွာ ဘောဂေ စ ဘုဉ္ဇဿု ပုညာနိ စ ကရောဟီ’’တိ ။ ‘‘တာတ, န ဥဿဟာမိ န ဝိသဟာမိ, အဘိရတော အဟံ ဗြဟ္မစရိယံ စရာမီ’’တိ။ ဒုတိယမ္ပိ ခေါ။ပေ.။ တတိယမ္ပိ ခေါ အာယသ္မတော သုဒိန္နဿ ပိတာ အာယသ္မန္တံ သုဒိန္နံ ဧတဒဝေါစ – ‘‘ဣဒံ တေ, တာတ သုဒိန္န, မာတု မတ္တိကံ, ဣတ္ထိကာယ ဣတ္ထိဓနံ, အညံ ပေတ္တိကံ , အညံ ပိတာမဟံ။ လဗ္ဘာ, တာတ သုဒိန္န, ဟီနာယာဝတ္တိတွာ ဘောဂါ စ ဘုဉ္ဇိတုံ ပုညာနိ စ ကာတုံ။ ဧဟိ တွံ, တာတ သုဒိန္န, ဟီနာယာဝတ္တိတွာ ဘောဂေ စ ဘုဉ္ဇဿု ပုညာနိ စ ကရောဟီ’’တိ။ ‘‘ဝဒေယျာမ ခေါ တံ, ဂဟပတိ, သစေ တွံ နာတိကဍ္ဎေယျာသီ’’တိ။ ‘‘ဝဒေဟိ, တာတ သုဒိန္နာ’’တိ။ တေန ဟိ တွံ, ဂဟပတိ, မဟန္တေ မဟန္တေ သာဏိပသိဗ္ဗကေ ကာရာပေတွာ ဟိရညသုဝဏ္ဏဿ ပူရာပေတွာ သကဋေဟိ နိဗ္ဗာဟာပေတွာ မဇ္ဈေ ဂင်္ဂါယ သောတေ ဩပါတေဟိ [ဩသာဒေဟိ (သီ. သျာ.)]။ တံ ကိဿ ဟေတု? ယဉှိ တေ, ဂဟပတိ, ဘဝိဿတိ တတောနိဒါနံ ဘယံ ဝါ ဆမ္ဘိတတ္တံ ဝါ လောမဟံသော ဝါ အာရက္ခေါ ဝါ သော တေ န ဘဝိဿတီ’’တိ။ ဧဝံ ဝုတ္တေ, အာယသ္မတော သုဒိန္နဿ ပိတာ အနတ္တမနော အဟောသိ – ‘‘ကထဉှိ နာမ ပုတ္တော သုဒိန္နော ဧဝံ ဝက္ခတီ’’တိ!

၃၅. အထ ခေါ အာယသ္မတော သုဒိန္နဿ ပိတာ အာယသ္မတော သုဒိန္နဿ ပုရာဏဒုတိယိကံ အာမန္တေသိ – ‘‘တေန ဟိ, ဝဓု, တွံ ပိယာ စ မနာပါ စ [တွမ္ပိ ယာစ (သီ.)]။ အပ္ပေဝ နာမ ပုတ္တော သုဒိန္နော တုယှမ္ပိ ဝစနံ ကရေယျာ’’တိ! အထ ခေါ အာယသ္မတော သုဒိန္နဿ ပုရာဏဒုတိယိကာ အာယသ္မတော သုဒိန္နဿ ပါဒေသု ဂဟေတွာ အာယသ္မန္တံ သုဒိန္နံ ဧတဒဝေါစ – ‘‘ကီဒိသာ နာမ တာ, အယျပုတ္တ, အစ္ဆရာယော ယာသံ တွံ ဟေတု ဗြဟ္မစရိယံ စရသီ’’တိ? ‘‘န ခေါ အဟံ, ဘဂိနိ, အစ္ဆရာနံ ဟေတု ဗြဟ္မစရိယံ စရာမီ’’တိ။ အထ ခေါ အာယသ္မတော သုဒိန္နဿ ပုရာဏဒုတိယိကာ – ‘‘အဇ္ဇတဂ္ဂေ မံ အယျပုတ္တော သုဒိန္နော ဘဂိနိဝါဒေန သမုဒါစရတီ’’တိ, တတ္ထေဝ မုစ္ဆိတာ ပပတာ။

အထ ခေါ အာယသ္မာ သုဒိန္နော ပိတရံ ဧတဒဝေါစ – ‘‘သစေ, ဂဟပတိ, ဘောဇနံ ဒါတဗ္ဗံ ဒေထ, မာ နော ဝိဟေဌယိတ္ထာ’’တိ။ ‘‘ဘုဉ္ဇ, တာတ သုဒိန္နာ’’တိ။ အထ ခေါ အာယသ္မတော သုဒိန္နဿ မာတာ စ ပိတာ စ အာယသ္မန္တံ သုဒိန္နံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေသုံ သမ္ပဝါရေသုံ။ အထ ခေါ အာယသ္မတော သုဒိန္နဿ မာတာ အာယသ္မန္တံ သုဒိန္နံ ဘုတ္တာဝိံ ဩနီတပတ္တပါဏိံ ဧတဒဝေါစ – ‘‘ဣဒံ, တာတ သုဒိန္န, ကုလံ အဍ္ဎံ မဟဒ္ဓနံ မဟာဘောဂံ ပဟူတဇာတရူပရဇတံ ပဟူတဝိတ္တူပကရဏံ ပဟူတဓနဓညံ။ လဗ္ဘာ, တာတ သုဒိန္န, ဟီနာယာဝတ္တိတွာ ဘောဂါ စ ဘုဉ္ဇိတုံ ပုညာနိ စ ကာတုံ။ ဧဟိ တွံ, တာတ သုဒိန္န, ဟီနာယာဝတ္တိတွာ ဘောဂေ စ ဘုဉ္ဇဿု ပုညာနိ စ ကရောဟီ’’တိ။ ‘‘အမ္မ, န ဥဿဟာမိ န ဝိသဟာမိ , အဘိရတော အဟံ ဗြဟ္မစရိယံ စရာမီ’’တိ။ ဒုတိယမ္ပိ ခေါ။ပေ.။ တတိယမ္ပိ ခေါ အာယသ္မတော သုဒိန္နဿ မာတာ အာယသ္မန္တံ သုဒိန္နံ ဧတဒဝေါစ – ‘‘ဣဒံ, တာတ သုဒိန္န, ကုလံ အဍ္ဎံ မဟဒ္ဓနံ မဟာဘောဂံ ပဟူတဇာတရူပရဇတံ ပဟူတဝိတ္တူပကရဏံ ပဟူတဓနဓညံ [ပဟူတဓနဓညံ (ပ. စရာမီတိ) ဣတိပါဌော သဗ္ဗတ္ထ နတ္ထိ, ဦနော မညေ]။ တေန ဟိ, တာတ သုဒိန္န, ဗီဇကမ္ပိ ဒေဟိ – မာ နော အပုတ္တကံ သာပတေယျံ လိစ္ဆဝယော အတိဟရာပေသု’’န္တိ။ ‘‘ဧတံ ခေါ မေ, အမ္မ, သက္ကာ ကာတု’’န္တိ။ ‘‘ကဟံ ပန, တာတ သုဒိန္န, ဧတရဟိ ဝိဟရသီ’’တိ? ‘‘မဟာဝနေ, အမ္မာ’’တိ။ အထ ခေါ အာယသ္မာ သုဒိန္နော ဥဋ္ဌာယာသနာ ပက္ကာမိ။

၃၆. အထ ခေါ အာယသ္မတော သုဒိန္နဿ မာတာ အာယသ္မတော သုဒိန္နဿ ပုရာဏဒုတိယိကံ အာမန္တေသိ – ‘‘တေန ဟိ, ဝဓု, ယဒါ ဥတုနီ ဟောသိ, ပုပ္ဖံ တေ ဥပ္ပန္နံ ဟောတိ, အထ မေ အာရောစေယျာသီ’’တိ။ ‘‘ဧဝံ အယျေ’’တိ ခေါ အာယသ္မတော သုဒိန္နဿ ပုရာဏဒုတိယိကာ အာယသ္မတော သုဒိန္နဿ မာတုယာ ပစ္စဿောသိ။ အထ ခေါ အာယသ္မတော သုဒိန္နဿ ပုရာဏဒုတိယိကာ နစိရဿေဝ ဥတုနီ အဟောသိ, ပုပ္ဖံသာ ဥပ္ပဇ္ဇိ။ အထ ခေါ အာယသ္မတော သုဒိန္နဿ ပုရာဏဒုတိယိကာ အာယသ္မတော သုဒိန္နဿ မာတရံ ဧတဒဝေါစ – ‘‘ဥတုနီမှိ, အယျေ, ပုပ္ဖံ မေ ဥပ္ပန္န’’န္တိ။ ‘‘တေန ဟိ, ဝဓု, ယေန အလင်္ကာရေန အလင်္ကတာ ပုတ္တဿ သုဒိန္နဿ ပိယာ အဟောသိ မနာပါ တေန အလင်္ကာရေန အလင်္ကရာ’’တိ။ ‘‘ဧဝံ အယျေ’’တိ ခေါ အာယသ္မတော သုဒိန္နဿ ပုရာဏဒုတိယိကာ အာယသ္မတော သုဒိန္နဿ မာတုယာ ပစ္စဿောသိ။ အထ ခေါ အာယသ္မတော သုဒိန္နဿ မာတာ အာယသ္မတော သုဒိန္နဿ ပုရာဏဒုတိယိကံ အာဒါယ ယေန မဟာဝနံ ယေနာယသ္မာ သုဒိန္နော တေနုပသင်္ကမိ; ဥပသင်္ကမိတွာ အာယသ္မန္တံ သုဒိန္နံ ဧတဒဝေါစ – ‘‘ဣဒံ, တာတ သုဒိန္န, ကုလံ အဍ္ဎံ မဟဒ္ဓနံ မဟာဘောဂံ ပဟူတဇာတရူပရဇတံ ပဟူတဝိတ္တူပကရဏံ ပဟူတဓနဓညံ။ လဗ္ဘာ, တာတ သုဒိန္န, ဟီနာယာဝတ္တိတွာ ဘောဂါ စ ဘုဉ္ဇိတုံ ပုညာနိ စ ကာတုံ။ ဧဟိ တွံ, တာတ သုဒိန္န, ဟီနာယာဝတ္တိတွာ ဘောဂေ စ ဘုဉ္ဇဿု ပုညာနိ စ ကရောဟီ’’တိ။ ‘‘အမ္မ, န ဥဿဟာမိ န ဝိသဟာမိ, အဘိရတော အဟံ ဗြဟ္မစရိယံ စရာမီ’’တိ။ ဒုတိယမ္ပိ ခေါ။ပေ.။ တတိယမ္ပိ ခေါ အာယသ္မတော သုဒိန္နဿ မာတာ အာယသ္မန္တံ သုဒိန္နံ ဧတဒဝေါစ – ‘‘ဣဒံ, တာတ သုဒိန္န, ကုလံ အဍ္ဎံ မဟဒ္ဓနံ မဟာဘောဂံ ပဟူတဇာတရူပရဇတံ ပဟူတဝိတ္တူပကရဏံ ပဟူတဓနဓညံ။ တေန ဟိ, တာတ သုဒိန္န, ဗီဇကမ္ပိ ဒေဟိ – မာ နော အပုတ္တကံ သာပတေယျံ လိစ္ဆဝယော အတိဟရာပေသု’’န္တိ။ ‘‘ဧတံ ခေါ မေ, အမ္မ, သက္ကာ ကာတု’’န္တိ, ပုရာဏဒုတိယိကာယ ဗာဟာယံ ဂဟေတွာ မဟာဝနံ အဇ္ဈောဂါဟေတွာ အပညတ္တေ သိက္ခါပဒေ အနာဒီနဝဒဿော ပုရာဏဒုတိယိကာယ တိက္ခတ္တုံ မေထုနံ ဓမ္မံ အဘိဝိညာပေသိ။ သာ တေန ဂဗ္ဘံ ဂဏှိ။ ဘုမ္မာ ဒေဝါ သဒ္ဒမနုဿာဝေသုံ – ‘‘နိရဗ္ဗုဒေါ ဝတ, ဘော, ဘိက္ခုသံဃော နိရာဒီနဝေါ; သုဒိန္နေန ကလန္ဒပုတ္တေန အဗ္ဗုဒံ ဥပ္ပါဒိတံ, အာဒီနဝေါ ဥပ္ပါဒိတော’’တိ။ ဘုမ္မာနံ ဒေဝါနံ သဒ္ဒံ သုတွာ စာတုမဟာရာဇိကာ [စာတုမ္မဟာရာဇိကာ (သီ. သျာ.)] ဒေဝါ သဒ္ဒမနုဿာဝေသုံ။ပေ.။ တာဝတိံသာ ဒေဝါ။ ယာမာ ဒေဝါ ။ တုသိတာ ဒေဝါ။ နိမ္မာနရတီ ဒေဝါ။ ပရနိမ္မိတဝသဝတ္တီ ဒေဝါ။ ဗြဟ္မကာယိကာ ဒေဝါ သဒ္ဒမနုဿာဝေသုံ – ‘‘နိရဗ္ဗုဒေါ ဝတ, ဘော, ဘိက္ခုသံဃော နိရာဒီနဝေါ; သုဒိန္နေန ကလန္ဒပုတ္တေန အဗ္ဗုဒံ ဥပ္ပါဒိတံ, အာဒီနဝေါ ဥပ္ပါဒိတော’’တိ။ ဣတိဟ တေန ခဏေန တေန မုဟုတ္တေန ယာဝ ဗြဟ္မလောကာ သဒ္ဒေါ အဗ္ဘုဂ္ဂစ္ဆိ။

အထ ခေါ အာယသ္မတော သုဒိန္နဿ ပုရာဏဒုတိယိကာ တဿ ဂဗ္ဘဿ ပရိပါကမနွာယ ပုတ္တံ ဝိဇာယိ။ အထ ခေါ အာယသ္မတော သုဒိန္နဿ သဟာယကာ တဿ ဒါရကဿ ‘ဗီဇကော’တိ နာမံ အကံသု။ အာယသ္မတော သုဒိန္နဿ ပုရာဏဒုတိယိကာယ ဗီဇကမာတာတိ နာမံ အကံသု။ အာယသ္မတော သုဒိန္နဿ ဗီဇကပိတာတိ နာမံ အကံသု။ တေ အပရေန သမယေန ဥဘော အဂါရသ္မာ အနဂါရိယံ ပဗ္ဗဇိတွာ အရဟတ္တံ သစ္ဆာကံသု။

၃၇. အထ ခေါ အာယသ္မတော သုဒိန္နဿ အဟုဒေဝ ကုက္ကုစ္စံ, အဟု ဝိပ္ပဋိသာရော – ‘‘အလာဘာ ဝတ မေ, န ဝတ မေ လာဘာ! ဒုလ္လဒ္ဓံ ဝတ မေ, န ဝတ မေ သုလဒ္ဓံ! ယောဟံ ဧဝံ သွာက္ခါတေ ဓမ္မဝိနယေ ပဗ္ဗဇိတွာ နာသက္ခိံ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတု’’န္တိ။ သော တေနေဝ ကုက္ကုစ္စေန တေန ဝိပ္ပဋိသာရေန ကိသော အဟောသိ လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော အန္တောမနော လီနမနော ဒုက္ခီ ဒုမ္မနော ဝိပ္ပဋိသာရီ ပဇ္ဈာယိ။

၃၈. အထ ခေါ အာယသ္မတော သုဒိန္နဿ သဟာယကာ ဘိက္ခူ အာယသ္မန္တံ သုဒိန္နံ ဧတဒဝေါစုံ – ‘‘ပုဗ္ဗေ ခေါ တွံ, အာဝုသော သုဒိန္န, ဝဏ္ဏဝါ အဟောသိ ဣဏိန္ဒြိယော ပသန္နမုခဝဏ္ဏော ဝိပ္ပသန္နဆဝိဝဏ္ဏော; သော ဒါနိ တွံ ဧတရဟိ ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော အန္တောမနော လီနမနော ဒုက္ခီ ဒုမ္မနော ဝိပ္ပဋိသာရီ ပဇ္ဈာယသိ။ ကစ္စိ နော တွံ, အာဝုသော သုဒိန္န, အနဘိရတော ဗြဟ္မစရိယံ စရသီ’’တိ? ‘‘န ခေါ အဟံ, အာဝုသော, အနဘိရတော ဗြဟ္မစရိယံ စရာမိ။ အတ္ထိ မေ ပါပကမ္မံ ကတံ; ပုရာဏဒုတိယိကာယ မေထုနော ဓမ္မော ပဋိသေဝိတော; တဿ မယှံ, အာဝုသော, အဟုဒေဝ ကုက္ကုစ္စံ အဟု ဝိပ္ပဋိသာရော – ‘အလာဘာ ဝတ မေ, န ဝတ မေ လာဘာ; ဒုလ္လဒ္ဓံ ဝတ မေ, န ဝတ မေ သုလဒ္ဓံ; ယောဟံ ဧဝံ သွာက္ခါတေ ဓမ္မဝိနယေ ပဗ္ဗဇိတွာ နာသက္ခိံ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတု’’န္တိ။ ‘‘အလဉှိ တေ, အာဝုသော သုဒိန္န, ကုက္ကုစ္စာယ အလံ ဝိပ္ပဋိသာရာယ ယံ တွံ ဧဝံ သွာက္ခါတေ ဓမ္မဝိနယေ ပဗ္ဗဇိတွာ န သက္ခိဿသိ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတုံ။ နနု, အာဝုသော, ဘဂဝတာ အနေကပရိယာယေန ဝိရာဂါယ ဓမ္မော ဒေသိတော, နော သရာဂါယ; ဝိသံယောဂါယ ဓမ္မော ဒေသိတော, နော သံယောဂါယ; အနုပါဒါနာယ ဓမ္မော ဒေသိတော, နော သဥပါဒါနာယ။ တတ္ထ နာမ တွံ, အာဝုသော, ဘဂဝတာ ဝိရာဂါယ ဓမ္မေ ဒေသိတေ သရာဂါယ စေတေဿသိ, ဝိသံယောဂါယ ဓမ္မေ ဒေသိတေ သံယောဂါယ စေတေဿသိ, အနုပါဒါနာယ ဓမ္မေ ဒေသိတေ သဥပါဒါနာယ စေတေဿသိ! နနု, အာဝုသော, ဘဂဝတာ အနေကပရိယာယေန ရာဂဝိရာဂါယ ဓမ္မော ဒေသိတော, မဒနိမ္မဒနာယ ပိပါသဝိနယာယ အာလယသမုဂ္ဃါတာယ ဝဋ္ဋုပစ္ဆေဒါယ တဏှာက္ခယာယ ဝိရာဂါယ နိရောဓါယ နိဗ္ဗာနာယ ဓမ္မော ဒေသိတော! နနု, အာဝုသော, ဘဂဝတာ အနေကပရိယာယေန ကာမာနံ ပဟာနံ အက္ခါတံ, ကာမသညာနံ ပရိညာ အက္ခါတာ, ကာမပိပါသာနံ ပဋိဝိနယော အက္ခါတော, ကာမဝိတက္ကာနံ သမုဂ္ဃါတော အက္ခါတော, ကာမပရိဠာဟာနံ ဝူပသမော အက္ခါတော! နေတံ, အာဝုသော, အပ္ပသန္နာနံ ဝါ ပသာဒါယ, ပသန္နာနံ ဝါ ဘိယျောဘာဝါယ။ အထ ခွေတံ, အာဝုသော, အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။

၃၉. အထ ခေါ တေ ဘိက္ခူ အာယသ္မန္တံ သုဒိန္နံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ သုဒိန္နံ ပဋိပုစ္ဆိ – ‘‘သစ္စံ ကိရ တွံ, သုဒိန္န, ပုရာဏဒုတိယိကာယ မေထုနံ ဓမ္မံ ပဋိသေဝီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ [အနနုစ္ဆဝိယံ (သီ.)], မောဃပုရိသ, အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, ဧဝံ သွာက္ခါတေ ဓမ္မဝိနယေ ပဗ္ဗဇိတွာ န သက္ခိဿသိ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတုံ! နနု မယာ, မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော, နော သရာဂါယ; ဝိသံယောဂါယ ဓမ္မော ဒေသိတော, နော သံယောဂါယ; အနုပါဒါနာယ ဓမ္မော ဒေသိတော, နော သဥပါဒါနာယ! တတ္ထ နာမ တွံ, မောဃပုရိသ, မယာ ဝိရာဂါယ ဓမ္မေ ဒေသိတေ သရာဂါယ စေတေဿသိ , ဝိသံယောဂါယ ဓမ္မေ ဒေသိတေ သံယောဂါယ စေတေဿသိ, အနုပါဒါနာယ ဓမ္မေ ဒေသိတေ သဥပါဒါနာယ စေတေဿသိ! နနု မယာ, မောဃပုရိသ, အနေကပရိယာယေန ရာဂဝိရာဂါယ ဓမ္မော ဒေသိတော! မဒနိမ္မဒနာယ ပိပါသဝိနယာယ အာလယသမုဂ္ဃါတာယ ဝဋ္ဋုပစ္ဆေဒါယ တဏှာက္ခယာယ ဝိရာဂါယ နိရောဓါယ နိဗ္ဗာနာယ ဓမ္မော ဒေသိတော! နနု မယာ, မောဃပုရိသ, အနေကပရိယာယေန ကာမာနံ ပဟာနံ အက္ခါတံ, ကာမသညာနံ ပရိညာ အက္ခါတာ, ကာမပိပါသာနံ ပဋိဝိနယော အက္ခါတော, ကာမဝိတက္ကာနံ သမုဂ္ဃါတော အက္ခါတော, ကာမပရိဠာဟာနံ ဝူပသမော အက္ခါတော! ဝရံ တေ, မောဃပုရိသ, အာသိဝိသဿ [အာသီဝိသဿ (သီ. သျာ.)] ဃောရဝိသဿ မုခေ အင်္ဂဇာတံ ပက္ခိတ္တံ, န တွေဝ မာတုဂါမဿ အင်္ဂဇာတေ အင်္ဂဇာတံ ပက္ခိတ္တံ။ ဝရံ တေ, မောဃပုရိသ, ကဏှသပ္ပဿ မုခေ အင်္ဂဇာတံ ပက္ခိတ္တံ, န တွေဝ မာတုဂါမဿ အင်္ဂဇာတေ အင်္ဂဇာတံ ပက္ခိတ္တံ။ ဝရံ တေ, မောဃပုရိသ, အင်္ဂါရကာသုယာ အာဒိတ္တာယ သမ္ပဇ္ဇလိတာယ သဇောတိဘူတာယ အင်္ဂဇာတံ ပက္ခိတ္တံ, န တွေဝ မာတုဂါမဿ အင်္ဂဇာတေ အင်္ဂဇာတံ ပက္ခိတ္တံ။ တံ ကိဿ ဟေတု? တတောနိဒါနဉှိ, မောဃပုရိသ, မရဏံ ဝါ နိဂစ္ဆေယျ မရဏမတ္တံ ဝါ ဒုက္ခံ, န တွေဝ တပ္ပစ္စယာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ ဣတောနိဒါနဉ္စ ခေါ, မောဃပုရိသ, ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ တတ္ထ နာမ တွံ, မောဃပုရိသ, ယံ တွံ အသဒ္ဓမ္မံ ဂါမဓမ္မံ ဝသလဓမ္မံ ဒုဋ္ဌုလ္လံ ဩဒကန္တိကံ ရဟဿံ ဒွယံဒွယသမာပတ္တိံ သမာပဇ္ဇိဿသိ, ဗဟူနံ ခေါ တွံ, မောဃပုရိသ, အကုသလာနံ ဓမ္မာနံ အာဒိကတ္တာ ပုဗ္ဗင်္ဂမော။ နေတံ, မောဃပုရိသ, အပ္ပသန္နာနံ ဝါ ပသာဒါယ, ပသန္နာနံ ဝါ ဘိယျောဘာဝါယ; အထ ခွေတံ, မောဃပုရိသ, အပ္ပသန္နာနဉ္စေဝ အပ္ပသာဒါယ, ပသန္နာနဉ္စ ဧကစ္စာနံ အညထတ္တာယာ’’တိ။

အထ ခေါ ဘဂဝါ အာယသ္မန္တံ သုဒိန္နံ အနေကပရိယာယေန ဝိဂရဟိတွာ ဒုဗ္ဘရတာယ ဒုပ္ပေါသတာယ မဟိစ္ဆတာယ အသန္တုဋ္ဌိတာယ [အသန္တုဋ္ဌတာယ (သျာ.)] သင်္ဂဏိကာယ ကောသဇ္ဇဿ အဝဏ္ဏံ ဘာသိတွာ အနေကပရိယာယေန သုဘရတာယ သုပေါသတာယ အပ္ပိစ္ဆဿ သန္တုဋ္ဌဿ သလ္လေခဿ ဓုတဿ ပါသာဒိကဿ အပစယဿ ဝီရိယာရမ္ဘဿ [ဝီရိယာရဗ္ဘဿ (က.)] ဝဏ္ဏံ ဘာသိတွာ ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခူနံ သိက္ခါပဒံ ပညပေဿာမိ [ပညာပေဿာမိ (သီ. သျာ.)] ဒသ အတ္ထဝသေ ပဋိစ္စ – သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘ယော ပန ဘိက္ခု မေထုနံ ဓမ္မံ ပဋိသေဝေယျ, ပါရာဇိကော ဟောတိ အသံဝါသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

သုဒိန္နဘာဏဝါရော နိဋ္ဌိတော။

မက္ကဋီဝတ္ထု

၄၀. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ မက္ကဋိံ အာမိသေန ဥပလာပေတွာ တဿာ မေထုနံ ဓမ္မံ ပဋိသေဝတိ။ အထ ခေါ သော ဘိက္ခု ပုဗ္ဗဏှသမယံ နိဝါသေတွာ ပတ္တစီဝရံ အာဒါယ ဝေသာလိံ ပိဏ္ဍာယ ပါဝိသိ။ တေန ခေါ ပန သမယေန သမ္ဗဟုလာ ဘိက္ခူ သေနာသနစာရိကံ အာဟိဏ္ဍန္တာ ယေန တဿ ဘိက္ခုနော ဝိဟာရော တေနုပသင်္ကမိံသု။ အဒ္ဒသ ခေါ သာ မက္ကဋီ တေ ဘိက္ခူ ဒူရတောဝ အာဂစ္ဆန္တေ။ ဒိသွာန ယေန တေ ဘိက္ခူ တေနုပသင်္ကမိ; ဥပသင်္ကမိတွာ တေသံ ဘိက္ခူနံ ပုရတော ကဋိမ္ပိ စာလေသိ ဆေပ္ပမ္ပိ စာလေသိ, ကဋိမ္ပိ ဩဍ္ဍိ, နိမိတ္တမ္ပိ အကာသိ။ အထ ခေါ တေသံ ဘိက္ခူနံ ဧတဒဟောသိ – ‘‘နိဿံသယံ ခေါ သော ဘိက္ခု ဣမိဿာ မက္ကဋိယာ မေထုနံ ဓမ္မံ ပဋိသေဝတီ’’တိ။ ဧကမန္တံ နိလီယိံသု။ အထ ခေါ သော ဘိက္ခု ဝေသာလိယံ ပိဏ္ဍာယ စရိတွာ ပိဏ္ဍပါတံ အာဒါယ ပဋိက္ကမိ။

၄၁. အထ ခေါ သာ မက္ကဋီ ယေန သော ဘိက္ခု တေနုပသင်္ကမိ။ အထ ခေါ သော ဘိက္ခု တံ ပိဏ္ဍပါတံ ဧကဒေသံ ဘုဉ္ဇိတွာ ဧကဒေသံ တဿာ မက္ကဋိယာ အဒါသိ။ အထ ခေါ သာ မက္ကဋီ တံ ပိဏ္ဍပါတံ ဘုဉ္ဇိတွာ တဿ ဘိက္ခုနော ကဋိံ ဩဍ္ဍိ။ အထ ခေါ သော ဘိက္ခု တဿာ မက္ကဋိယာ မေထုနံ ဓမ္မံ ပဋိသေဝတိ။ အထ ခေါ တေ ဘိက္ခူ တံ ဘိက္ခုံ ဧတဒဝေါစုံ – ‘‘နနု, အာဝုသော, ဘဂဝတာ သိက္ခါပဒံ ပညတ္တံ; ကိဿ တွံ, အာဝုသော, မက္ကဋိယာ မေထုနံ ဓမ္မံ ပဋိသေဝသီ’’တိ? ‘‘သစ္စံ, အာဝုသော, ဘဂဝတာ သိက္ခါပဒံ ပညတ္တံ; တဉ္စ ခေါ မနုဿိတ္ထိယာ , နော တိရစ္ဆာနဂတာယာ’’တိ။ ‘‘နနု, အာဝုသော, တထေဝ တံ ဟောတိ။ အနနုစ္ဆဝိကံ, အာဝုသော, အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, အာဝုသော, ဧဝံ သွာက္ခါတေ ဓမ္မဝိနယေ ပဗ္ဗဇိတွာ န သက္ခိဿသိ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတုံ! နနု, အာဝုသော, ဘဂဝတာ အနေကပရိယာယေန ဝိရာဂါယ ဓမ္မော ဒေသိတော, နော သရာဂါယ။ပေ.။ ကာမပရိဠာဟာနံ ဝူပသမော အက္ခါတော! နေတံ, အာဝုသော, အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ။ အထ ခွေတံ, အာဝုသော, အပ္ပသန္နာနဉ္စေဝ အပ္ပသာဒါယ, ပသန္နာနဉ္စ ဧကစ္စာနံ အညထတ္တာယာ’’တိ။ အထ ခေါ တေ ဘိက္ခူ တံ ဘိက္ခုံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အရောစေသုံ။

၄၂. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ တံ ဘိက္ခုံ ပဋိပုစ္ဆိ – ‘‘သစ္စံ ကိရ တွံ, ဘိက္ခု, မက္ကဋိယာ မေထုနံ ဓမ္မံ ပဋိသေဝီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, ဧဝံ သွာက္ခါတေ ဓမ္မဝိနယေ ပဗ္ဗဇိတွာ န သက္ခိဿသိ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတုံ! နနု မယာ, မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော, နော သရာဂါယ ။ပေ.။ ကာမပရိဠာဟာနံ ဝူပသမော အက္ခါတော! ဝရံ တေ, မောဃပုရိသ, အာသီဝိသဿ ဃောရဝိသဿ မုခေ အင်္ဂဇာတံ ပက္ခိတ္တံ, န တွေဝ မက္ကဋိယာ အင်္ဂဇာတေ အင်္ဂဇာတံ ပက္ခိတ္တံ။ ဝရံ တေ, မောဃပုရိသ, ကဏှသပ္ပဿ မုခေ အင်္ဂဇာတံ ပက္ခိတ္တံ, န တွေဝ မက္ကဋိယာ အင်္ဂဇာတေ အင်္ဂဇာတံ ပက္ခိတ္တံ။ ဝရံ တေ, မောဃပုရိသ, အင်္ဂါရကာသုယာ အာဒိတ္တာယ သမ္ပဇ္ဇလိတာယ သဇောတိဘူတာယ အင်္ဂဇာတံ ပက္ခိတ္တံ, န တွေဝ မက္ကဋိယာ အင်္ဂဇာတေ အင်္ဂဇာတံ ပက္ခိတ္တံ။ တံ ကိဿ ဟေတု? တတောနိဒါနဉှိ, မောဃပုရိသ, မရဏံ ဝါ နိဂစ္ဆေယျ မရဏမတ္တံ ဝါ ဒုက္ခံ; န တွေဝ တပ္ပစ္စယာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ ဣတောနိဒါနဉ္စ ခေါ, မောဃပုရိသ, ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ တတ္ထ နာမ တွံ, မောဃပုရိသ, ယံ တွံ အသဒ္ဓမ္မံ ဂါမဓမ္မံ ဝသလဓမ္မံ ဒုဋ္ဌုလ္လံ ဩဒကန္တိကံ ရဟဿံ ဒွယံဒွယသမာပတ္တိံ သမာပဇ္ဇိဿသိ! နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘ယော ပန ဘိက္ခု မေထုနံ ဓမ္မံ ပဋိသေဝေယျ အန္တမသော တိရစ္ဆာနဂတာယပိ, ပါရာဇိကော ဟောတိ အသံဝါသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

မက္ကဋီဝတ္ထု နိဋ္ဌိတံ။

သန္ထတဘာဏဝါရော

၄၃. တေန ခေါ ပန သမယေန သမ္ဗဟုလာ ဝေသာလိကာ ဝဇ္ဇိပုတ္တကာ ဘိက္ခူ ယာဝဒတ္ထံ ဘုဉ္ဇိံသု, ယာဝဒတ္ထံ သုပိံသု, ယာဝဒတ္ထံ နှာယိံသု။ ယာဝဒတ္ထံ ဘုဉ္ဇိတွာ ယာဝဒတ္ထံ သုပိတွာ ယာဝဒတ္ထံ နှာယိတွာ အယောနိသော မနသိ ကရိတွာ သိက္ခံ အပစ္စက္ခါယ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝိံသု။ တေ အပရေန သမယေန ဉာတိဗျသနေနပိ ဖုဋ္ဌာ ဘောဂဗျသနေနပိ ဖုဋ္ဌာ ရောဂဗျသနေနပိ ဖုဋ္ဌာ အာယသ္မန္တံ အာနန္ဒံ ဥပသင်္ကမိတွာ ဧဝံ ဝဒန္တိ – ‘‘န မယံ, ဘန္တေ အာနန္ဒ, ဗုဒ္ဓဂရဟိနော န ဓမ္မဂရဟိနော န သံဃဂရဟိနော; အတ္တဂရဟိနော မယံ, ဘန္တေ အာနန္ဒ, အနညဂရဟိနော။ မယမေဝမှာ အလက္ခိကာ မယံ အပ္ပပုညာ, ယေ မယံ ဧဝံ သွာက္ခါတေ ဓမ္မဝိနယေ ပဗ္ဗဇိတွာ နာသက္ခိမှာ ယာဝဇီဝံ ပရိပုဏ္ဏံ ပရိသုဒ္ဓံ ဗြဟ္မစရိယံ စရိတုံ။ ဣဒါနိ စေပိ [ဣဒါနိပိ စေ (သျာ.)] မယံ, ဘန္တေ အာနန္ဒ, လဘေယျာမ ဘဂဝတော သန္တိကေ ပဗ္ဗဇ္ဇံ လဘေယျာမ ဥပသမ္ပဒံ, ဣဒါနိပိ မယံ ဝိပဿကာ ကုသလာနံ ဓမ္မာနံ ပုဗ္ဗရတ္တာပရရတ္တံ ဗောဓိပက္ခိကာနံ ဓမ္မာနံ ဘာဝနာနုယောဂမနုယုတ္တာ ဝိဟရေယျာမ။ သာဓု, ဘန္တေ အာနန္ဒ, ဘဂဝတော ဧတမတ္ထံ အာရောစေဟီ’’တိ။ ‘‘ဧဝမာဝုသော’’တိ ခေါ အာယသ္မာ အာနန္ဒေါ ဝေသာလိကာနံ ဝဇ္ဇိပုတ္တကာနံ ပဋိဿုဏိတွာ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝတော ဧတမတ္ထံ အာရောစေသိ။

‘‘အဋ္ဌာနမေတံ, အာနန္ဒ, အနဝကာသော ယံ တထာဂတော ဝဇ္ဇီနံ ဝါ ဝဇ္ဇိပုတ္တကာနံ ဝါ ကာရဏာ သာဝကာနံ ပါရာဇိကံ သိက္ခါပဒံ ပညတ္တံ သမူဟနေယျာ’’တိ။

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘ယော, ဘိက္ခဝေ [ယော ပန ဘိက္ခဝေ ဘိက္ခု (သီ.) ယော ခေါ ဘိက္ခဝေ ဘိက္ခု (သျာ.)], သိက္ခံ အပစ္စက္ခါယ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝတိ သော အာဂတော န ဥပသမ္ပါဒေတဗ္ဗော ; ယော စ ခေါ, ဘိက္ခဝေ [ယော စ ခေါ ဘိက္ခဝေ ဘိက္ခု (သီ. သျာ.)], သိက္ခံ ပစ္စက္ခါယ ဒုဗ္ဗလျံ အာဝိကတွာ မေထုနံ ဓမ္မံ ပဋိသေဝတိ သော အာဂတော ဥပသမ္ပါဒေတဗ္ဗော။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၄၄. ‘‘ယော ပန ဘိက္ခု ဘိက္ခူနံ သိက္ခါသာဇီဝသမာပန္နော သိက္ခံ အပစ္စက္ခါယ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝေယျ အန္တမသော တိရစ္ဆာနဂတာယပိ, ပါရာဇိကော ဟောတိ အသံဝါသော’’တိ။

၄၅. ယော ပနာတိ ယော ယာဒိသော ယထာယုတ္တော ယထာဇစ္စော ယထာနာမော ယထာဂေါတ္တော ယထာသီလော ယထာဝိဟာရီ ယထာဂေါစရော ထေရော ဝါ နဝေါ ဝါ မဇ္ဈိမော ဝါ။ ဧသော ဝုစ္စတိ ‘ယော ပနာ’တိ။

[ဝိဘ. ၅၁၀, ဈာနဝိဘင်္ဂေပိ] ဘိက္ခူတိ ဘိက္ခကောတိ ဘိက္ခု, ဘိက္ခါစရိယံ အဇ္ဈုပဂတောတိ ဘိက္ခု, ဘိန္နပဋဓရောတိ ဘိက္ခု, သမညာယ ဘိက္ခု, ပဋိညာယ ဘိက္ခု, ဧဟိ ဘိက္ခူတိ ဘိက္ခု, တီဟိ သရဏဂမနေဟိ ဥပသမ္ပန္နောတိ ဘိက္ခု, ဘဒြော ဘိက္ခု, သာရော ဘိက္ခု, သေခေါ ဘိက္ခု, အသေခေါ ဘိက္ခု, သမဂ္ဂေန သံဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နောတိ ဘိက္ခု။ တတြ ယွာယံ ဘိက္ခု သမဂ္ဂေန သံဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နော, အယံ ဣမသ္မိံ အတ္ထေ အဓိပ္ပေတော ဘိက္ခူတိ။

[ဒီ. နိ. ၃.၃၀၅] သိက္ခါတိ တိဿော သိက္ခါ – အဓိသီလသိက္ခါ, အဓိစိတ္တသိက္ခါ, အဓိပညာသိက္ခါ ။ တတြ ယာယံ အဓိသီလသိက္ခါ, အယံ ဣမသ္မိံ အတ္ထေ အဓိပ္ပေတာ သိက္ခါတိ။

သာဇီဝံ နာမ ယံ ဘဂဝတာ ပညတ္တံ သိက္ခါပဒံ, ဧတံ သာဇီဝံ နာမ။ တသ္မိံ သိက္ခတိ, တေန ဝုစ္စတိ သာဇီဝသမာပန္နောတိ။

သိက္ခံ အပစ္စက္ခါယ ဒုဗ္ဗလျံ အနာဝိကတွာတိ အတ္ထိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ; အတ္ထိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ။

‘‘ကထဉ္စ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။ ဣဓ, ဘိက္ခဝေ, ဘိက္ခု ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော ဥပါသကဘာဝံ ပတ္ထယမာနော အာရာမိကဘာဝံ ပတ္ထယမာနော သာမဏေရဘာဝံ ပတ္ထယမာနော တိတ္ထိယဘာဝံ ပတ္ထယမာနော တိတ္ထိယသာဝကဘာဝံ ပတ္ထယမာနော အဿမဏဘာဝံ ပတ္ထယမာနော အသကျပုတ္တိယဘာဝံ ပတ္ထယမာနော – ‘ယံနူနာဟံ ဗုဒ္ဓံ ပစ္စက္ခေယျ’န္တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘ယံနူနာဟံ ဓမ္မံ ပစ္စက္ခေယျ’န္တိ ဝဒတိ ဝိညာပေတိ။ပေ.။ ယံနူနာဟံ သံဃံ။ ယံနူနာဟံ သိက္ခံ။ ယံနူနာဟံ ဝိနယံ။ ယံနူနာဟံ ပါတိမောက္ခံ။ ယံနူနာဟံ ဥဒ္ဒေသံ။ ယံနူနာဟံ ဥပဇ္ဈာယံ။ ယံနူနာဟံ အာစရိယံ။ ယံနူနာဟံ သဒ္ဓိဝိဟာရိကံ။ ယံနူနာဟံ အန္တေဝါသိကံ။ ယံနူနာဟံ သမာနုပဇ္ဈာယကံ။ ယံနူနာဟံ သမာနာစရိယကံ ယံနူနာဟံ သဗြဟ္မစာရိံ ပစ္စက္ခေယျ’န္တိ ဝဒတိ ဝိညာပေတိ။ ‘ယံနူနာဟံ ဂိဟီ အဿ’န္တိ ဝဒတိ ဝိညာပေတိ။ ‘ယံနူနာဟံ ဥပါသကော အဿ’န္တိ။ ‘ယံနူနာဟံ အာရာမိကော အဿ’န္တိ။ ‘ယံနူနာဟံ သာမဏေရော အဿ’န္တိ။ ‘ယံနူနာဟံ တိတ္ထိယော အဿ’န္တိ။ ‘ယံနူနာဟံ တိတ္ထိယသာဝကော အဿ’န္တိ။ ‘ယံနူနာဟံ အဿမဏော အဿ’န္တိ။ ‘ယံနူနာဟံ အသကျပုတ္တိယော အဿ’န္တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၄၆. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘ယဒိ ပနာဟံ ဗုဒ္ဓံ ပစ္စက္ခေယျ’န္တိ ဝဒတိ ဝိညာပေတိ။ပေ.။ ‘ယဒိ ပနာဟံ အသကျပုတ္တိယော အဿ’န္တိ ဝဒတိ ဝိညာပေတိ။ပေ.။ ‘အပါဟံ ဗုဒ္ဓံ ပစ္စက္ခေယျ’န္တိ ဝဒတိ ဝိညာပေတိ။ပေ.။ ‘အပါဟံ အသကျပုတ္တိယော အဿ’န္တိ ဝဒတိ ဝိညာပေတိ။ပေ.။ ‘ဟန္ဒါဟံ ဗုဒ္ဓံ ပစ္စက္ခေယျ’န္တိ ဝဒတိ ဝိညာပေတိ။ပေ.။ ‘ဟန္ဒါဟံ အသကျပုတ္တိယော အဿ’န္တိ ဝဒတိ ဝိညာပေတိ။ပေ.။ ‘ဟောတိ မေ ဗုဒ္ဓံ ပစ္စက္ခေယျ’န္တိ ဝဒတိ ဝိညာပေတိ။ပေ.။ ‘ဟောတိ မေ အသကျပုတ္တိယော အဿ’န္တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၄၇. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော ‘မာတရံ သရာမီ’တိ ဝဒတိ ဝိညာပေတိ။ ‘ပိတရံ သရာမီ’တိ ဝဒတိ ဝိညာပေတိ။ ‘ဘာတရံ သရာမီ’တိ ဝဒတိ ဝိညာပေတိ။ ‘ဘဂိနိံ သရာမီ’တိ ဝဒတိ ဝိညာပေတိ။ ‘ပုတ္တံ သရာမီ’တိ ဝဒတိ ဝိညာပေတိ။ ‘ဓီတရံ သရာမီ’တိ ဝဒတိ ဝိညာပေတိ။ ‘ပဇာပတိံ သရာမီ’တိ ဝဒတိ ဝိညာပေတိ။ ‘ဉာတကေ သရာမီ’တိ ဝဒတိ ဝိညာပေတိ။ ‘မိတ္တေ သရာမီ’တိ ဝဒတိ ဝိညာပေတိ။ ‘ဂါမံ သရာမီ’တိ ဝဒတိ ဝိညာပေတိ။ ‘နိဂမံ သရာမီ’တိ ဝဒတိ ဝိညာပေတိ။ ‘ခေတ္တံ သရာမီ’တိ ဝဒတိ ဝိညာပေတိ။ ‘ဝတ္ထုံ သရာမိ’တိ ဝဒတိ ဝိညာပေတိ။ ‘ဟိရညံ သရာမီ’တိ ဝဒတိ ဝိညာပေတိ။ ‘သုဝဏ္ဏံ သရာမီ’တိ ဝဒတိ ဝိညာပေတိ။ ‘သိပ္ပံ သရာမီ’တိ ဝဒတိ ဝိညာပေတိ။ ‘ပုဗ္ဗေ ဟသိတံ လပိတံ ကီဠိတံ သမနုဿရာမီ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၄၈. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘မာတာ မေ အတ္ထိ, သာ မယာ ပေါသေတဗ္ဗာ’တိ ဝဒတိ ဝိညာပေတိ။ ‘ပိတာ မေ အတ္ထိ, သော မယာ ပေါသေတဗ္ဗော’တိ ဝဒတိ ဝိညာပေတိ။ ‘ဘာတာ မေ အတ္ထိ, သော မယာ ပေါသေတဗ္ဗော’တိ ဝဒတိ ဝိညာပေတိ။ ‘ဘဂိနီ မေ အတ္ထိ, သာ မယာ ပေါသေတဗ္ဗာ’တိ ဝဒတိ ဝိညာပေတိ။ ‘ပုတ္တော မေ အတ္ထိ, သော မယာ ပေါသေတဗ္ဗော’တိ ဝဒတိ ဝိညာပေတိ။ ‘ဓီတာ မေ အတ္ထိ, သာ မယာ ပေါသေတဗ္ဗာ’တိ ဝဒတိ ဝိညာပေတိ။ ‘ပဇာပတိ မေ အတ္ထိ, သာ မယာ ပေါသေတဗ္ဗာ’တိ ဝဒတိ ဝိညာပေတိ ။ ‘ဉာတကာ မေ အတ္ထိ, တေ မယာ ပေါသေတဗ္ဗာ’တိ ဝဒတိ ဝိညာပေတိ။ ‘မိတ္တာ မေ အတ္ထိ, တေ မယာ ပေါသေတဗ္ဗာ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၄၉. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘မာတာ မေ အတ္ထိ, သာ မံ ပေါသေဿတီ’တိ ဝဒတိ ဝိညာပေတိ။ ‘ပိတာ မေ အတ္ထိ, သော မံ ပေါသေဿတီ’တိ ဝဒတိ ဝိညာပေတိ။ ‘ဘာတာ မေ အတ္ထိ, သော မံ ပေါသေဿတီ’တိ ဝဒတိ ဝိညာပေတိ။ ‘ဘဂိနီ မေ အတ္ထိ, သာ မံ ပေါသေဿတီ’တိ ဝဒတိ ဝိညာပေတိ။ ‘ပုတ္တော မေ အတ္ထိ, သော မံ ပေါသေဿတီ’တိ ဝဒတိ ဝိညာပေတိ။ ‘ဓီတာ မေ အတ္ထိ, သာ မံ ပေါသေဿတီ’တိ ဝဒတိ ဝိညာပေတိ။ ‘ပဇာပတိ မေ အတ္ထိ, သာ မံ ပေါသေဿတီ’တိ ဝဒတိ ဝိညာပေတိ။ ‘ဉာတကာ မေ အတ္ထိ, တေ မံ ပေါသေဿန္တီ’တိ ဝဒတိ ဝိညာပေတိ။ ‘မိတ္တာ မေ အတ္ထိ, တေ မံ ပေါသေဿန္တီ’တိ ဝဒတိ ဝိညာပေတိ။ ‘ဂါမော မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘နိဂမော မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘ခေတ္တံ မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘ဝတ္ထု မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘ဟိရညံ မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘သုဝဏ္ဏံ မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ‘သိပ္ပံ မေ အတ္ထိ, တေနာဟံ ဇီဝိဿာမီ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၅၀. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော ‘ဒုက္ကရ’န္တိ ဝဒတိ ဝိညာပေတိ။ ‘န သုကရ’န္တိ ဝဒတိ ဝိညာပေတိ။ ‘ဒုစ္စရ’န္တိ ဝဒတိ ဝိညာပေတိ။ ‘န သုစရ’န္တိ ဝဒတိ ဝိညာပေတိ။ ‘န ဥဿဟာမီ’တိ ဝဒတိ ဝိညာပေတိ။ ‘န ဝိသဟာမီ’တိ ဝဒတိ ဝိညာပေတိ။ ‘န ရမာမီ’တိ ဝဒတိ ဝိညာပေတိ။ ‘နာဘိရမာမီ’တိ ဝဒတိ ဝိညာပေတိ။ ဧဝမ္ပိ ခေါ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ အပစ္စက္ခါတာ။

၅၁. ‘‘ကထဉ္စ , ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ? ဣဓ , ဘိက္ခဝေ, ဘိက္ခု ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘ဗုဒ္ဓံ ပစ္စက္ခါမီ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ။

‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘ဓမ္မံ ပစ္စက္ခါမီ’တိ ဝဒတိ ဝိညာပေတိ။ ‘သံဃံ ပစ္စက္ခါမီ’တိ ဝဒတိ ဝိညာပေတိ။ ‘သိက္ခံ ပစ္စက္ခါမီ’တိ ဝဒတိ ဝိညာပေတိ။ ‘ဝိနယံ ပစ္စက္ခါမီ’တိ ဝဒတိ ဝိညာပေတိ။ ‘ပါတိမောက္ခံ ပစ္စက္ခါမီ’တိ ဝဒတိ ဝိညာပေတိ။ ‘ဥဒ္ဒေသံ ပစ္စက္ခါမီ’တိ ဝဒတိ ဝိညာပေတိ။ ‘ဥပဇ္ဈာယံ ပစ္စက္ခါမီ’တိ ဝဒတိ ဝိညာပေတိ။ ‘အာစရိယံ ပစ္စက္ခါမီ’တိ ဝဒတိ ဝိညာပေတိ။ ‘သဒ္ဓိဝိဟာရိကံ ပစ္စက္ခါမီ’တိ ဝဒတိ ဝိညာပေတိ။ ‘အန္တေဝါသိကံ ပစ္စက္ခါမီ’တိ ဝဒတိ ဝိညာပေတိ။ ‘သမာနုပဇ္ဈာယကံ ပစ္စက္ခါမီ’တိ ဝဒတိ ဝိညာပေတိ။ ‘သမာနာစရိယကံ ပစ္စက္ခါမီ’တိ ဝဒတိ ဝိညာပေတိ။ ‘သဗြဟ္မစာရိံ ပစ္စက္ခါမီ’တိ ဝဒတိ ဝိညာပေတိ။ ‘ဂိဟီတိ မံ ဓါရေဟီ’တိ ဝဒတိ ဝိညာပေတိ။ ‘ဥပါသကောတိ မံ ဓါရေဟီ’တိ ဝဒတိ ဝိညာပေတိ။ ‘အာရာမိကောတိ မံ ဓါရေဟီ’တိ ဝဒတိ ဝိညာပေတိ။ ‘သာမဏေရောတိ မံ ဓါရေဟီ’တိ ဝဒတိ ဝိညာပေတိ။ ‘တိတ္ထိယောတိ မံ ဓါရေဟီ’တိ ဝဒတိ ဝိညာပေတိ။ ‘တိတ္ထိယသာဝကောတိ မံ ဓါရေဟီ’တိ ဝဒတိ ဝိညာပေတိ။ ‘အဿမဏောတိ မံ ဓါရေဟီ’တိ ဝဒတိ ဝိညာပေတိ။ ‘အသကျပုတ္တိယောတိ မံ ဓါရေဟီ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ။

၅၂. ‘‘အထ ဝါ ပန ဥက္ကဏ္ဌိတော အနဘိရတော သာမညာ စဝိတုကာမော ဘိက္ခုဘာဝံ အဋ္ဋီယမာနော ဟရာယမာနော ဇိဂုစ္ဆမာနော ဂိဟိဘာဝံ ပတ္ထယမာနော။ပေ.။ အသကျပုတ္တိယဘာဝံ ပတ္ထယမာနော – ‘အလံ မေ ဗုဒ္ဓေနာ’တိ ဝဒတိ ဝိညာပေတိ။ပေ.။ ‘အလံ မေ သဗြဟ္မစာရီဟီ’တိ ဝဒတိ ဝိညာပေတိ။ ဧဝမ္ပိ။ပေ.။ အထ ဝါ ပန။ပေ.။ ‘ကိံ နု မေ ဗုဒ္ဓေနာ’တိ ဝဒတိ ဝိညာပေတိ။ပေ.။ ‘ကိံ နု မေ သဗြဟ္မစာရီဟီ’တိ ဝဒတိ ဝိညာပေတိ။ ‘န မမတ္ထော ဗုဒ္ဓေနာ’တိ ဝဒတိ ဝိညာပေတိ။ပေ.။ ‘န မမတ္ထော သဗြဟ္မစာရီဟီ’တိ ဝဒတိ ဝိညာပေတိ။ ‘သုမုတ္တာဟံ ဗုဒ္ဓေနာ’တိ ဝဒတိ ဝိညာပေတိ။ပေ.။ ‘သုမုတ္တာဟံ သဗြဟ္မစာရီဟီ’တိ ဝဒတိ ဝိညာပေတိ။ ဧဝမ္ပိ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ။

၅၃. ‘‘ယာနိ ဝါ ပနညာနိပိ အတ္ထိ ဗုဒ္ဓဝေဝစနာနိ ဝါ ဓမ္မဝေဝစနာနိ ဝါ သံဃဝေဝစနာနိ ဝါ သိက္ခါဝေဝစနာနိ ဝါ ဝိနယဝေဝစနာနိ ဝါ ပါတိမောက္ခဝေဝစနာနိ ဝါ ဥဒ္ဒေသဝေဝစနာနိ ဝါ ဥပဇ္ဈာယဝေဝစနာနိ ဝါ အာစရိယဝေဝစနာနိ ဝါ သဒ္ဓိဝိဟာရိကဝေဝစနာနိ ဝါ အန္တေဝါသိကဝေဝစနာနိ ဝါ သမာနုပဇ္ဈာယကဝေဝစနာနိ ဝါ သမာနာစရိယကဝေဝစနာနိ ဝါ သဗြဟ္မစာရိဝေဝစနာနိ ဝါ ဂိဟိဝေဝစနာနိ ဝါ ဥပါသကဝေဝစနာနိ ဝါ အာရာမိကဝေဝစနာနိ ဝါ သာမဏေရဝေဝစနာနိ ဝါ တိတ္ထိယဝေဝစနာနိ ဝါ တိတ္ထိယသာဝကဝေဝစနာနိ ဝါ အဿမဏဝေဝစနာနိ ဝါ အသကျပုတ္တိယဝေဝစနာနိ ဝါ, တေဟိ အာကာရေဟိ တေဟိ လိင်္ဂေဟိ တေဟိ နိမိတ္တေဟိ ဝဒတိ ဝိညာပေတိ။ ဧဝံ ခေါ, ဘိက္ခဝေ, ဒုဗ္ဗလျာဝိကမ္မဉ္စေဝ ဟောတိ သိက္ခါ စ ပစ္စက္ခါတာ။

၅၄. ‘‘ကထဉ္စ, ဘိက္ခဝေ, အပစ္စက္ခါတာ ဟောတိ သိက္ခါ? ဣဓ, ဘိက္ခဝေ, ယေဟိ အာကာရေဟိ ယေဟိ လိင်္ဂေဟိ ယေဟိ နိမိတ္တေဟိ သိက္ခါ ပစ္စက္ခါတာ ဟောတိ တေဟိ အာကာရေဟိ တေဟိ လိင်္ဂေဟိ တေဟိ နိမိတ္တေဟိ ဥမ္မတ္တကော သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ဥမ္မတ္တကဿ သန္တိကေ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ခိတ္တစိတ္တော သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ခိတ္တစိတ္တဿ သန္တိကေ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ဝေဒနာဋ္ဋော သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ဝေဒနာဋ္ဋဿ သန္တိကေ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ဒေဝတာယ သန္တိကေ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ တိရစ္ဆာနဂတဿ သန္တိကေ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ အရိယကေန မိလက္ခဿ [မိလက္ခကဿ (သီ. သျာ.) မိလက္ခုဿ (က.)] သန္တိကေ သိက္ခံ ပစ္စက္ခါတိ, သော စ န ပဋိဝိဇာနာတိ, အပစ္စက္ခါတာ ဟောတိ သိက္ခါ။ မိလက္ခကေန အရိယကဿ သန္တိကေ သိက္ခံ ပစ္စက္ခါတိ, သော စ န ပဋိဝိဇာနာတိ, အပစ္စက္ခါတာ ဟောတိ သိက္ခါ။ အရိယကေန အရိယဿ သန္တိကေ သိက္ခံ ပစ္စက္ခါတိ, သော စ န ပဋိဝိဇာနာတိ , အပစ္စက္ခါတာ ဟောတိ သိက္ခါ။ မိလက္ခကေန မိလက္ခဿ သန္တိကေ သိက္ခံ ပစ္စက္ခါတိ, သော စ န ပဋိဝိဇာနာတိ, အပစ္စက္ခါတာ ဟောတိ သိက္ခါ။ ဒဝါယ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ ရဝါယ သိက္ခံ ပစ္စက္ခါတိ, အပစ္စက္ခါတာ ဟောတိ သိက္ခါ။ အသာဝေတုကာမော သာဝေတိ, အပစ္စက္ခါတာ ဟောတိ သိက္ခါ။ သာဝေတုကာမော န သာဝေတိ, အပစ္စက္ခါတာ ဟောတိ သိက္ခါ။ အဝိညုဿ သာဝေတိ, အပစ္စက္ခါတာ ဟောတိ သိက္ခါ။ ဝိညုဿ န သာဝေတိ, အပစ္စက္ခါတာ ဟောတိ သိက္ခါ။ သဗ္ဗသော ဝါ ပန န သာဝေတိ, အပစ္စက္ခါတာ ဟောတိ သိက္ခါ။ ဧဝံ ခေါ, ဘိက္ခဝေ, အပစ္စက္ခါတာ ဟောတိ သိက္ခါ’’။

၅၅. [မဟာနိ. ၄၉, ၅၀, ၅၁] မေထုနဓမ္မော နာမ ယော သော အသဒ္ဓမ္မော ဂါမဓမ္မော ဝသလဓမ္မော ဒုဋ္ဌုလ္လံ ဩဒကန္တိကံ ရဟဿံ ဒွယံဒွယသမာပတ္တိ, ဧသော မေထုနဓမ္မော နာမ။

ပဋိသေဝတိ နာမ ယော နိမိတ္တေန နိမိတ္တံ အင်္ဂဇာတေန အင်္ဂဇာတံ အန္တမသော တိလဖလမတ္တမ္ပိ ပဝေသေတိ, ဧသော ပဋိသေဝတိ နာမ။

အန္တမသော တိရစ္ဆာနဂတာယဣတိ တိရစ္ဆာနဂတိတ္ထိယာပိ မေထုနံ ဓမ္မံ ပဋိသေဝိတွာ အဿမဏော ဟောတိ အသကျပုတ္တိယော, ပဂေဝ မနုဿိတ္ထိယာ။ တေန ဝုစ္စတိ – ‘အန္တမသော တိရစ္ဆာနဂတာယဣ’တိ။

ပါရာဇိကော ဟောတီတိ သေယျထာပိ နာမ ပုရိသော သီသစ္ဆိန္နော အဘဗ္ဗော တေန သရီရဗန္ဓနေန ဇီဝိတုံ, ဧဝမေဝ ဘိက္ခု မေထုနံ ဓမ္မံ ပဋိသေဝိတွာ အဿမဏော ဟောတိ အသကျပုတ္တိယော။ တေန ဝုစ္စတိ – ‘ပါရာဇိကော ဟောတီ’တိ။

အသံဝါသောတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ – ဧသော သံဝါသော နာမ။ သော တေန သဒ္ဓိံ နတ္ထိ။ တေန ဝုစ္စတိ – ‘အသံဝါသော’တိ။

၅၆. တိဿော ဣတ္ထိယော – မနုဿိတ္ထီ, အမနုဿိတ္ထီ, တိရစ္ဆာနဂတိတ္ထီ။ တယော ဥဘတောဗျဉ္ဇနကာ – မနုဿုဘတောဗျဉ္ဇနကော, အမနုဿုဘတောဗျဉ္ဇနကော, တိရစ္ဆာနဂတုဘတောဗျဉ္ဇနကော။ တယော ပဏ္ဍကာ – မနုဿပဏ္ဍကော, အမနုဿပဏ္ဍကော , တိရစ္ဆာနဂတပဏ္ဍကော။ တယော ပုရိသာ – မနုဿပုရိသော, အမနုဿပုရိသော, တိရစ္ဆာနဂတပုရိသော။

မနုဿိတ္ထိယာ တယော မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿ – ဝစ္စမဂ္ဂေ, ပဿာဝမဂ္ဂေ, မုခေ။ အမနုဿိတ္ထိယာ။ပေ.။ တိရစ္ဆာနဂတိတ္ထိယာ တယော မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿ – ဝစ္စမဂ္ဂေ, ပဿာဝမဂ္ဂေ, မုခေ။ မနုဿုဘတောဗျဉ္ဇနကဿ။ အမနုဿုဘတောဗျဉ္ဇနကဿ။ တိရစ္ဆာနဂတုဘတောဗျဉ္ဇနကဿ တယော မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿ – ဝစ္စမဂ္ဂေ, ပဿာဝမဂ္ဂေ, မုခေ။ မနုဿပဏ္ဍကဿ ဒွေ မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿ – ဝစ္စမဂ္ဂေ, မုခေ။ အမနုဿပဏ္ဍကဿ။ တိရစ္ဆာနဂတပဏ္ဍကဿ။ မနုဿပုရိသဿ။ အမနုဿပုရိသဿ။ တိရစ္ဆာနဂတပုရိသဿ ဒွေ မဂ္ဂေ မေထုနံ ဓမ္မံ ပဋိသေဝန္တဿ အာပတ္တိ ပါရာဇိကဿ – ဝစ္စမဂ္ဂေ, မုခေ။

၅၇. ဘိက္ခုဿ သေဝနစိတ္တံ ဥပဋ္ဌိတေ မနုဿိတ္ထိယာ ဝစ္စမဂ္ဂံ အင်္ဂဇာတံ ပဝေသေန္တဿ အာပတ္တိ ပါရာဇိကဿ။ ဘိက္ခုဿ သေဝနစိတ္တံ ဥပဋ္ဌိတေ မနုဿိတ္ထိယာ ပဿာဝမဂ္ဂံ။ မုခံ အင်္ဂဇာတံ ပဝေသေန္တဿ အာပတ္တိ ပါရာဇိကဿ။ ဘိက္ခုဿ သေဝနစိတ္တံ ဥပဋ္ဌိတေ အမနုဿိတ္ထိယာ။ တိရစ္ဆာနဂတိတ္ထိယာ။ မနုဿုဘတောဗျဉ္ဇနကဿ။ အမနုဿုဘတောဗျဉ္ဇနကဿ။ တိရစ္ဆာနဂတုဘတောဗျဉ္ဇနကဿ။ ဝစ္စမဂ္ဂံ ပဿာဝမဂ္ဂံ မုခံ အင်္ဂဇာတံ ပဝေသေန္တဿ အာပတ္တိ ပါရာဇိကဿ။ ဘိက္ခုဿ သေဝနစိတ္တံ ဥပဋ္ဌိတေ မနုဿပဏ္ဍကဿ ဝစ္စမဂ္ဂံ မုခံ အင်္ဂဇာတံ ပဝေသေန္တဿ အာပတ္တိ ပါရာဇိကဿ။ ဘိက္ခုဿ သေဝနစိတ္တံ ဥပဋ္ဌိတေ အမနုဿပဏ္ဍကဿ။ တိရစ္ဆာနဂတပဏ္ဍကဿ။ မနုဿပုရိသဿ။ အမနုဿပုရိသဿ။ တိရစ္ဆာနဂတပုရိသဿ ဝစ္စမဂ္ဂံ မုခံ အင်္ဂဇာတံ ပဝေသေန္တဿ အာပတ္တိ ပါရာဇိကဿ။

၅၈. ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ [ပဝိသနံ သာဒယတိ (က.)], ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ။ သော စေ ပဝေသနံ န သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ။ သော စေ ပဝေသနံ န သာဒိယတိ, ပဝိဋ္ဌံ န သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ။ သော စေ ပဝေသနံ န သာဒိယတိ, ပဝိဋ္ဌံ န သာဒိယတိ, ဌိတံ န သာဒိယတိ, ဥဒ္ဓရဏံ သာဒိယတိ အာပတ္တိ ပါရာဇိကဿ။ ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန အင်္ဂဇာတံ အဘိနိသီဒေန္တိ။ သော စေ ပဝေသနံ န သာဒိယတိ, ပဝိဋ္ဌံ န သာဒိယတိ, ဌိတံ န သာဒိယတိ, ဥဒ္ဓရဏံ န သာဒိယတိ, အနာပတ္တိ။

ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

၅၉. ဘိက္ခုပစ္စတ္ထိကာ မနုဿိတ္ထိံ ဇာဂရန္တိံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ အမနုဿိတ္ထိံ။ တိရစ္ဆာနဂတိတ္ထိံ။ မနုဿုဘတောဗျဉ္ဇနကံ။ အမနုဿုဘတောဗျဉ္ဇနကံ။ တိရစ္ဆာနဂတုဘတောဗျဉ္ဇနကံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ တိရစ္ဆာနဂတုဘတောဗျဉ္ဇနကံ ဇာဂရန္တံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ , ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ မနုဿပဏ္ဍကံ။ အမနုဿပဏ္ဍကံ။ တိရစ္ဆာနဂတပဏ္ဍကံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ တိရစ္ဆာနဂတပဏ္ဍကံ ဇာဂရန္တံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

၆၀. ဘိက္ခုပစ္စတ္ထိကာ မနုဿပုရိသံ။ အမနုဿပုရိသံ။ တိရစ္ဆာနဂတပုရိသံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ တိရစ္ဆာနဂတပုရိသံ ဇာဂရန္တံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

၆၁. ဘိက္ခုပစ္စတ္ထိကာ မနုဿိတ္ထိံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ သန္ထတာယ အသန္ထတဿ, အသန္ထတာယ သန္ထတဿ, သန္ထတာယ သန္ထတဿ, အသန္ထတာယ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ ။

ဘိက္ခုပစ္စတ္ထိကာ မနုဿိတ္ထိံ ဇာဂရန္တိံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ, သန္ထတာယ အသန္ထတဿ, အသန္ထတာယ သန္ထတဿ, သန္ထတာယ သန္ထတဿ, အသန္ထတာယ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ အမနုဿိတ္ထိံ။ တိရစ္ဆာနဂတိတ္ထိံ။ မနုဿုဘတောဗျဉ္ဇနကံ။ အမနဿုဘတောဗျဉ္ဇနကံ ။ တိရစ္ဆာနဂတုဘတောဗျဉ္ဇနကံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ တိရစ္ဆာနဂတုဘတောဗျဉ္ဇနကံ ဇာဂရန္တံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ ပဿာဝမဂ္ဂေန။ မုခေန အင်္ဂဇာတံ အဘိနိသီဒေန္တိ, သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ , ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

၆၂. ဘိက္ခုပစ္စတ္ထိကာ မနုဿပဏ္ဍကံ။ အမနုဿပဏ္ဍကံ။ တိရစ္ဆာနဂတပဏ္ဍကံ။ မနုဿပုရိသံ။ အမနုဿပုရိသံ။ တိရစ္ဆာနဂတပုရိသံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ တိရစ္ဆာနဂတပုရိသံ ဇာဂရန္တံ။ သုတ္တံ။ မတ္တံ။ ဥမ္မတ္တံ။ ပမတ္တံ။ မတံ အက္ခါယိတံ။ မတံ ယေဘုယျေန အက္ခါယိတံ။ပေ.။ အာပတ္တိ ပါရာဇိကဿ။ မတံ ယေဘုယျေန ခါယိတံ ဘိက္ခုဿ သန္တိကေ အာနေတွာ ဝစ္စမဂ္ဂေန။ မုခေန အင်္ဂဇာတံ အဘိနိသီဒေန္တိ, သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ , အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

၆၃. ဘိက္ခုပစ္စတ္ထိကာ ဘိက္ခုံ မနုဿိတ္ထိယာ သန္တိကေ အာနေတွာ အင်္ဂဇာတေန ဝစ္စမဂ္ဂံ။ ပဿာဝမဂ္ဂံ။ မုခံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ , ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ ဘိက္ခုံ မနုဿိတ္ထိယာ ဇာဂရန္တိယာ။ သုတ္တာယ။ မတ္တာယ။ ဥမ္မတ္တာယ။ ပမတ္တာယ ။ မတာယ အက္ခါယိတာယ။ မတာယ ယေဘုယျေန အက္ခါယိတာယ။ပေ.။ အာပတ္တိ ပါရာဇိကဿ။ မတာယ ယေဘုယျေန ခါယိတာယ သန္တိကေ အာနေတွာ အင်္ဂဇာတေန ဝစ္စမဂ္ဂံ။ ပဿာဝမဂ္ဂံ။ မုခံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ ဘိက္ခုံ အမနုဿိတ္ထိယာ။ တိရစ္ဆာနဂတိတ္ထိယာ။ မနုဿုဘတောဗျဉ္ဇနကဿ။ အမနုဿုဘတောဗျဉ္ဇနကဿ။ တိရစ္ဆာနဂတုဘတောဗျဉ္ဇနကဿ။ မနုဿပဏ္ဍကဿ။ အမနုဿပဏ္ဍကဿ။ တိရစ္ဆာနဂတပဏ္ဍကဿ။ မနုဿပုရိသဿ။ အမနုဿပုရိသဿ။ တိရစ္ဆာနဂတပုရိသဿ သန္တိကေ အာနေတွာ အင်္ဂဇာတေန ဝစ္စမဂ္ဂံ။ မုခံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ ဘိက္ခုံ တိရစ္ဆာနဂတပုရိသဿ ဇာဂရန္တဿ။ သုတ္တဿ။ မတ္တဿ။ ဥမ္မတ္တဿ။ ပမတ္တဿ။ မတဿ အက္ခါယိတဿ။ မတဿ ယေဘုယျေန အက္ခါယိတဿ။ပေ.။ အာပတ္တိ ပါရာဇိကဿ။ မတဿ ယေဘုယျေန ခါယိတဿ သန္တိကေ အာနေတွာ အင်္ဂဇာတေန ဝစ္စမဂ္ဂံ။ မုခံ အဘိနိသီဒေန္တိ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

၆၄. ဘိက္ခုပစ္စတ္ထိကာ ဘိက္ခုံ မနုဿိတ္ထိယာ သန္တိကေ အာနေတွာ အင်္ဂဇာတေန ဝစ္စမဂ္ဂံ။ ပဿာဝမဂ္ဂံ။ မုခံ အဘိနိသီဒေန္တိ သန္ထတဿ အသန္ထတာယ, အသန္ထတဿ သန္ထတာယ, သန္ထတဿ သန္ထတာယ, အသန္ထတဿ အသန္ထတာယ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ ဘိက္ခုံ မနုဿိတ္ထိယာ ဇာဂရန္တိယာ။ သုတ္တာယ။ မတ္တာယ။ ဥမ္မတ္တာယ။ ပမတ္တာယ။ မတာယ အက္ခါယိတာယ။ မတာယ ယေဘုယျေန အက္ခါယိတာယ။ပေ.။ အာပတ္တိ ပါရာဇိကဿ။ မတာယ ယေဘုယျေန ခါယိတာယ သန္တိကေ အာနေတွာ အင်္ဂဇာတေန ဝစ္စမဂ္ဂံ။ ပဿာဝမဂ္ဂံ။ မုခံ အဘိနိသီဒေန္တိ သန္ထတဿ အသန္ထတာယ, အသန္ထတဿ သန္ထတာယ, သန္ထတဿ သန္ထတာယ, အသန္ထတဿ အသန္ထတာယ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ဘိက္ခုပစ္စတ္ထိကာ ဘိက္ခုံ အမနုဿိတ္ထိယာ။ တိရစ္ဆာနဂတိတ္ထိယာ။ မနုဿုဘတောဗျဉ္ဇနကဿ။ အမနုဿုဘတောဗျဉ္ဇနကဿ။ တိရစ္ဆာနဂတုဘတောဗျဉ္ဇနကဿ။ မနုဿပဏ္ဍကဿ။ အမနုဿပဏ္ဍကဿ။ တိရစ္ဆာနဂတပဏ္ဍကဿ။ မနုဿပုရိသဿ။ အမနုဿပုရိသဿ။ တိရစ္ဆာနဂတပုရိသဿ သန္တိကေ အာနေတွာ အင်္ဂဇာတေန ဝစ္စမဂ္ဂံ။ မုခံ အဘိနိသီဒေန္တိ သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ပါရာဇိကဿ။ပေ.။ န သာဒိယတိ, အနာပတ္တိ။

၆၅. ဘိက္ခုပစ္စတ္ထိကာ ဘိက္ခုံ တိရစ္ဆာနဂတပုရိသဿ ဇာဂရန္တဿ။ သုတ္တဿ။ မတ္တဿ။ ဥမ္မတ္တဿ။ ပမတ္တဿ။ မတဿ အက္ခါယိတဿ။ မတဿ ယေဘုယျေန အက္ခါယိတဿ။ပေ.။ အာပတ္တိ ပါရာဇိကဿ။ မတဿ ယေဘုယျေန ခါယိတဿ သန္တိကေ အာနေတွာ အင်္ဂဇာတေန ဝစ္စမဂ္ဂံ။ မုခံ အဘိနိသီဒေန္တိ သန္ထတဿ အသန္ထတဿ, အသန္ထတဿ သန္ထတဿ, သန္ထတဿ သန္ထတဿ, အသန္ထတဿ အသန္ထတဿ။ သော စေ ပဝေသနံ သာဒိယတိ, ပဝိဋ္ဌံ သာဒိယတိ, ဌိတံ သာဒိယတိ, ဥဒ္ဓရဏံ သာဒိယတိ, အာပတ္တိ ထုလ္လစ္စယဿ။ပေ.။ န သာဒိယတိ, အနာပတ္တိ။

ယထာ ဘိက္ခုပစ္စတ္ထိကာ ဝိတ္ထာရိတာ, ဧဝံ ဝိတ္ထာရေတဗ္ဗာ။

ရာဇပစ္စတ္ထိကာ။ စောရပစ္စတ္ထိကာ။ ဓုတ္တပစ္စတ္ထိကာ။ ဥပ္ပဠဂန္ဓပစ္စတ္ထိကာ။ သံခိတ္တံ။

၆၆. မဂ္ဂေန မဂ္ဂံ ပဝေသေတိ, အာပတ္တိ ပါရာဇိကဿ။ မဂ္ဂေန အမဂ္ဂံ ပဝေသေတိ, အာပတ္တိ ပါရာဇိကဿ။ အမဂ္ဂေန မဂ္ဂံ ပဝေသေတိ, အာပတ္တိ ပါရာဇိကဿ။ အမဂ္ဂေန အမဂ္ဂံ ပဝေသေတိ, အာပတ္တိ ထုလ္လစ္စယဿ။

ဘိက္ခု သုတ္တဘိက္ခုမှိ ဝိပ္ပဋိပဇ္ဇတိ; ပဋိဗုဒ္ဓေါ သာဒိယတိ, ဥဘော နာသေတဗ္ဗာ။ ပဋိဗုဒ္ဓေါ န သာဒိယတိ, ဒူသကော နာသေတဗ္ဗော။ ဘိက္ခု သုတ္တသာမဏေရမှိ ဝိပ္ပဋိပဇ္ဇတိ; ပဋိဗုဒ္ဓေါ သာဒိယတိ, ဥဘော နာသေတဗ္ဗာ။ ပဋိဗုဒ္ဓေါ န သာဒိယတိ, ဒူသကော နာသေတဗ္ဗော။ သာမဏေရော သုတ္တဘိက္ခုမှိ ဝိပ္ပဋိပဇ္ဇတိ; ပဋိဗုဒ္ဓေါ သာဒိယတိ, ဥဘော နာသေတဗ္ဗာ။ ပဋိဗုဒ္ဓေါ န သာဒိယတိ, ဒူသကော နာသေတဗ္ဗော။ သာမဏေရော သုတ္တသာမဏေရမှိ ဝိပ္ပဋိပဇ္ဇတိ; ပဋိဗုဒ္ဓေါ သာဒိယတိ, ဥဘော နာသေတဗ္ဗာ ။ ပဋိဗုဒ္ဓေါ န သာဒိယတိ, ဒူသကော နာသေတဗ္ဗော။

အနာပတ္တိ အဇာနန္တဿ, အသာဒိယန္တဿ, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

သန္ထတဘာဏဝါရော နိဋ္ဌိတော။

ဝိနီတဝတ္ထုဥဒ္ဒါနဂါထာ

မက္ကဋီ ဝဇ္ဇိပုတ္တာ စ၊ ဂိဟီ နဂ္ဂေါ စ တိတ္ထိယာ။

ဒါရိကုပ္ပလဝဏ္ဏာ စ၊ ဗျဉ္ဇနေဟိပရေ ဒုဝေ။

မာတာ ဓီတာ ဘဂိနီ စ၊ ဇာယာ စ မုဒု လမ္ဗိနာ။

ဒွေ ဝဏာ လေပစိတ္တဉ္စ၊ ဒါရုဓီတလိကာယ စ။

သုန္ဒရေန သဟ ပဉ္စ၊ ပဉ္စ သိဝထိကဋ္ဌိကာ။

နာဂီ ယက္ခီ စ ပေတီ စ၊ ပဏ္ဍကောပဟတော ဆုပေ။

ဘဒ္ဒိယေ အရဟံ သုတ္တော၊ သာဝတ္ထိယာ စတုရော ပရေ။

ဝေသာလိယာ တယော မာလာ၊ သုပိနေ ဘာရုကစ္ဆကော။

သုပဗ္ဗာ သဒ္ဓါ ဘိက္ခုနီ၊ သိက္ခမာနာ သာမဏေရီ စ။

ဝေသိယာ ပဏ္ဍကော ဂိဟီ၊ အညမညံ ဝုဍ္ဎပဗ္ဗဇိတော မိဂေါတိ။

ဝိနီတဝတ္ထု

၆၇. တေန ခေါ ပန သမယေန အညတရော ဘိက္ခု မက္ကဋိယာ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန သမ္ဗဟုလာ ဝေသာလိကာ ဝဇ္ဇိပုတ္တကာ ဘိက္ခူ သိက္ခံ အပစ္စက္ခါယ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝိံသု။ တေသံ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ? ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ, ဂိဟိလိင်္ဂေန မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ, နဂ္ဂေါ ဟုတွာ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ, ကုသစီရံ နိဝါသေတွာ။ ဝါကစီရံ နိဝါသေတွာ။ ဖလကစီရံ နိဝါသေတွာ။ ကေသကမ္ဗလံ နိဝါသေတွာ။ ဝါလကမ္ဗလံ နိဝါသေတွာ။ ဥလူကပက္ခိကံ နိဝါသေတွာ။ အဇိနက္ခိပံ နိဝါသေတွာ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ပိဏ္ဍစာရိကော ဘိက္ခု ဣဌကေ နိပန္နံ ဒါရိကံ ပဿိတွာ သာရတ္တော အင်္ဂုဋ္ဌံ အင်္ဂဇာတံ ပဝေသေသိ။ သာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ , ဘိက္ခု, ပါရာဇိကဿ။ အာပတ္တိ သံဃာဒိသေသဿာ’’တိ။

၆၈. တေန ခေါ ပန သမယေန အညတရော မာဏဝကော ဥပ္ပလဝဏ္ဏာယ ဘိက္ခုနိယာ ပဋိဗဒ္ဓစိတ္တော ဟောတိ။ အထ ခေါ သော မာဏဝကော ဥပ္ပလဝဏ္ဏာယ ဘိက္ခုနိယာ ဂါမံ ပိဏ္ဍာယ ပဝိဋ္ဌာယ ကုဋိကံ ပဝိသိတွာ နိလီနော အစ္ဆိ။ ဥပ္ပလဝဏ္ဏာ ဘိက္ခုနီ ပစ္ဆာဘတ္တံ ပိဏ္ဍပါတပဋိက္ကန္တာ ပါဒေ ပက္ခါလေတွာ ကုဋိကံ ပဝိသိတွာ မဉ္စကေ နိသီဒိ။ အထ ခေါ သော မာဏဝကော ဥပ္ပလဝဏ္ဏံ ဘိက္ခုနိံ ဥဂ္ဂဟေတွာ ဒူသေသိ။ ဥပ္ပလဝဏ္ဏာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, အသာဒိယန္တိယာ’’တိ။

၆၉. တေန ခေါ ပန သမယေန အညတရဿ ဘိက္ခုနော ဣတ္ထိလိင်္ဂံ ပါတုဘူတံ ဟောတိ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ, ဘိက္ခဝေ, တံယေဝ ဥပဇ္ဈံ တမေဝ ဥပသမ္ပဒံ တာနိယေဝ [တာနိ (သီ. သျာ.)] ဝဿာနိ ဘိက္ခုနီဟိ သင်္ဂမိတုံ [သင်္ကမိတုံ (သီ. သျာ.)]။ ယာ အာပတ္တိယော ဘိက္ခူနံ ဘိက္ခုနီဟိ သာဓါရဏာ တာ အာပတ္တိယော ဘိက္ခုနီနံ သန္တိကေ ဝုဋ္ဌာတုံ။ ယာ အာပတ္တိယော ဘိက္ခူနံ ဘိက္ခုနီဟိ အသာဓါရဏာ တာဟိ အာပတ္တီဟိ အနာပတ္တီ’’တိ။

တေန ခေါ ပန သမယေန အညတရိဿာ ဘိက္ခုနိယာ ပုရိသလိင်္ဂံ ပါတုဘူတံ ဟောတိ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ, ဘိက္ခဝေ, တံယေဝ ဥပဇ္ဈံ တမေဝ ဥပသမ္ပဒံ တာနိယေဝ [တာနိ (သီ. သျာ.)] ဝဿာနိ ဘိက္ခူဟိ သင်္ဂမိတုံ [သင်္ကမိတုံ (သီ. သျာ.)]။ ယာ အာပတ္တိယော ဘိက္ခုနီနံ ဘိက္ခူဟိ သာဓါရဏာ တာ အာပတ္တိယော ဘိက္ခူနံ သန္တိကေ ဝုဋ္ဌာတုံ။ ယာ အာပတ္တိယော ဘိက္ခုနီနံ ဘိက္ခူဟိ အသာဓါရဏာ တာဟိ အာပတ္တီဟိ အနာပတ္တီ’’တိ။

၇၀. တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ, မာတုယာ မေထုနံ ဓမ္မံ ပဋိသေဝိ။ ဓီတုယာ မေထုနံ ဓမ္မံ ပဋိသေဝိ။ ဘဂိနိယာ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ပုရာဏဒုတိယိကာယ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၇၁. တေန ခေါ ပန သမယေန အညတရော ဘိက္ခု မုဒုပိဋ္ဌိကော ဟောတိ။ သော အနဘိရတိယာ ဣဠိတော အတ္တနော အင်္ဂဇာတံ မုခေန အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပရာဇိက’’န္တိ။

တေန ခေါ ပန သမယေန အညတရော ဘိက္ခု လမ္ဗီ ဟောတိ။ သော အနဘိရတိယာ ဣဠိတော အတ္တနော အင်္ဂဇာတံ အတ္တနော ဝစ္စမဂ္ဂံ ပဝေသေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု မတသရီရံ ပဿိ။ တသ္မိဉ္စ သရီရေ အင်္ဂဇာတသာမန္တာ ဝဏော ဟောတိ။ သော – ‘ဧဝံ မေ အနာပတ္တိ ဘဝိဿတီ’တိ, အင်္ဂဇာတေ အင်္ဂဇာတံ ပဝေသေတွာ ဝဏေန နီဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု မတသရီရံ ပဿိ။ တသ္မိဉ္စ သရီရေ အင်္ဂဇာတသာမန္တာ ဝဏော ဟောတိ။ သော – ‘ဧဝံ မေ အနာပတ္တိ ဘဝိဿတီ’တိ, ဝဏေ အင်္ဂဇာတံ ပဝေသေတွာ အင်္ဂဇာတေန နီဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သာရတ္တော လေပစိတ္တဿ နိမိတ္တံ အင်္ဂဇာတေန ဆုပိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု သာရတ္တော ဒါရုဓီတလိကာယ နိမိတ္တံ အင်္ဂဇာတေန ဆုပိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

၇၂. တေန ခေါ ပန သမယေန သုန္ဒရော နာမ ဘိက္ခု ရာဇဂဟာ ပဗ္ဗဇိတော ရထိကာယ [ရထိယာယ (က.)] ဂစ္ဆတိ။ အညတရာ ဣတ္ထီ – ‘မုဟုတ္တံ [ဣတ္ထီ တံ ပဿိတွာ ဧတဒဝေါစ မုဟုတ္တံ (သျာ.)], ဘန္တေ, အာဂမေဟိ, ဝန္ဒိဿာမီ’တိ သာ ဝန္ဒန္တီ အန္တရဝါသကံ ဥက္ခိပိတွာ မုခေန အင်္ဂဇာတံ အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, သာဒိယိ’’န္တိ။ ‘‘အနာပတ္တိ, ဘိက္ခု, အသာဒိယန္တဿာ’’တိ။

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ ‘‘အလံ, ဘဂိနိ, နေတံ ကပ္ပတီ’’တိ။ ‘‘ဧဟိ, ဘန္တေ, အဟံ ဝါယမိဿာမိ, တွံ မာ ဝါယမိ, ဧဝံ တေ အနာပတ္တိ ဘဝိဿတီ’’တိ။ သော ဘိက္ခု တထာ အကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ ‘‘အလံ, ဘဂိနိ, နေတံ ကပ္ပတီ’’တိ။ ‘‘ဧဟိ ဘန္တေ, တွံ ဝါယမ, အဟံ န ဝါယမိဿာမိ, ဧဝံ တေ အနာပတ္တိ ဘဝိဿတီ’’တိ။ သော ဘိက္ခု တထာ အကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ ‘‘အလံ, ဘဂိနိ, နေတံ ကပ္ပတီ’’တိ။ ‘‘ဧဟိ, ဘန္တေ, အဗ္ဘန္တရံ ဃဋ္ဋေတွာ ဗဟိ မောစေဟိ။ပေ.။ ဗဟိ ဃဋ္ဋေတွာ အဗ္ဘန္တရံ မောစေဟိ, ဧဝံ တေ အနာပတ္တိ ဘဝိဿတီ’’တိ။ သော ဘိက္ခု တထာ အကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၇၃. တေန ခေါ ပန သမယေန အညတရော ဘိက္ခု သိဝထိကံ ဂန္တွာ အက္ခါယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ယေဘုယျေန အက္ခါယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ယေဘုယျေန ခါယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ဆိန္နသီသံ ပဿိတွာ ဝဋ္ဋကတေ မုခေ ဆုပန္တံ အင်္ဂဇာတံ ပဝေသေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ဆိန္နသီသံ ပဿိတွာ ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု အညတရိဿာ ဣတ္ထိယာ ပဋိဗဒ္ဓစိတ္တော ဟောတိ။ သာ ကာလင်္ကတာ [ကာလကတာ (သီ. သျာ.)] သုသာနေ ဆဍ္ဍိတာ။ အဋ္ဌိကာနိ ဝိပ္ပကိဏ္ဏာနိ ဟောန္တိ။ အထ ခေါ သော ဘိက္ခု သိဝထိကံ ဂန္တွာ အဋ္ဌိကာနိ သင်္ကဍ္ဎိတွာ နိမိတ္တေ အင်္ဂဇာတံ ပဋိပါဒေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု နာဂိယာ မေထုနံ ဓမ္မံ ပဋိသေဝိ။ ယက္ခိနိယာ မေထုနံ ဓမ္မံ ပဋိသေဝိ။ ပေတိယာ မေထုနံ ဓမ္မံ ပဋိသေဝိ ။ ပဏ္ဍကဿ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ဥပဟတိန္ဒြိယော ဟောတိ။ သော – ‘နာဟံ ဝေဒိယာမိ [ဝေဒယာမိ (က.)] သုခံ ဝါ ဒုက္ခံ ဝါ, အနာပတ္တိ မေ ဘဝိဿတီ’တိ, မေထုနံ ဓမ္မံ ပဋိသေဝိ။ ဘဂဝတော ဧတမတ္ထံ အာရောစေသုံ။ ‘‘ဝေဒယိ ဝါ သော, ဘိက္ခဝေ, မောဃပုရိသော န ဝါ ဝေဒယိ, အာပတ္တိ ပါရာဇိကဿာ’’တိ။

တေန ခေါ ပန သမယေန အညတရော ဘိက္ခု – ‘ဣတ္ထိယာ မေထုနံ ဓမ္မံ ပဋိသေဝိဿာမီ’တိ, ဆုပိတမတ္တေ ဝိပ္ပဋိသာရီ အဟောသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ သံဃာဒိသေသဿာ’’တိ။

၇၄. တေန ခေါ ပန သမယေန အညတရော ဘိက္ခု ဘဒ္ဒိယေ ဇာတိယာဝနေ ဒိဝါဝိဟာရဂတော နိပန္နော ဟောတိ။ တဿ အင်္ဂမင်္ဂါနိ ဝါတူပတ္ထဒ္ဓါနိ ဟောန္တိ။ အညတရာ ဣတ္ထီ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ ပက္ကာမိ။ ဘိက္ခူ ကိလိန္နံ ပဿိတွာ ဘဂဝတော ဧတမတ္ထံ အာရောစေသုံ။ ‘‘ပဉ္စဟိ , ဘိက္ခဝေ, အာကာရေဟိ အင်္ဂဇာတံ ကမ္မနိယံ ဟောတိ – ရာဂေန, ဝစ္စေန, ပဿာဝေန, ဝါတေန, ဥစ္စာလိင်္ဂပါဏကဒဋ္ဌေန။ ဣမေဟိ ခေါ, ဘိက္ခဝေ, ပဉ္စဟာကာရေဟိ အင်္ဂဇာတံ ကမ္မနိယံ ဟောတိ ။ အဋ္ဌာနမေတံ, ဘိက္ခဝေ, အနဝကာသော ယံ တဿ ဘိက္ခုနော ရာဂေန အင်္ဂဇာတံ ကမ္မနိယံ အဿ။ အရဟံ သော, ဘိက္ခဝေ, ဘိက္ခု။ အနာပတ္တိ, ဘိက္ခဝေ, တဿ ဘိက္ခုနော’’တိ။

တေန ခေါ ပန သမယေန အညတရော ဘိက္ခု သာဝတ္ထိယာ အန္ဓဝနေ ဒိဝါဝိဟာရဂတော နိပန္နော ဟောတိ။ အညတရာ ဂေါပါလိကာ ပဿိတွာ အင်္ဂဇာတေ အဘိနိသီဒိ။ သော ဘိက္ခု ပဝေသနံ သာဒိယိ, ပဝိဋ္ဌံ သာဒိယိ, ဌိတံ သာဒိယိ, ဥဒ္ဓရဏံ သာဒိယိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သာဝတ္ထိယာ အန္ဓဝနေ ဒိဝါဝိဟာရဂတော နိပန္နော ဟောတိ။ အညတရာ အဇပါလိကာ ပဿိတွာ။ အညတရာ ကဋ္ဌဟာရိကာ ပဿိတွာ။ အညတရာ ဂေါမယဟာရိကာ ပဿိတွာ အင်္ဂဇာတေ အဘိနိသီဒိ။ သော ဘိက္ခု ပဝေသနံ သာဒိယိ, ပဝိဋ္ဌံ သာဒိယိ, ဌိတံ သာဒိယိ, ဥဒ္ဓရဏံ သာဒိယိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၇၅. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော နိပန္နော ဟောတိ။ အညတရာ ဣတ္ထီ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ သာမန္တာ ဟသမာနာ ဌိတာ ဟောတိ ။ သော ဘိက္ခု ပဋိဗုဇ္ဈိတွာ တံ ဣတ္ထိံ ဧတဒဝေါစ – ‘‘တုယှိဒံ ကမ္မ’’န္တိ? ‘‘အာမ, မယှံ ကမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, ဇာနာမီ’’တိ။ ‘‘အနာပတ္တိ, ဘိက္ခု, အဇာနန္တဿာ’’တိ။

၇၆. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော ရုက္ခံ အပဿာယ နိပန္နော ဟောတိ။ အညတရာ ဣတ္ထီ ပဿိတွာ အင်္ဂဇာတေ အဘိနိသီဒိ။ သော ဘိက္ခု သဟသာ ဝုဋ္ဌာသိ။ တဿ ကုက္ကုစ္စံ အဟောသိ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, သာဒိယိ’’န္တိ။ ‘‘အနာပတ္တိ, ဘိက္ခု, အသာဒိယန္တဿာ’’တိ။

တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော ရုက္ခံ အပဿာယ နိပန္နော ဟောတိ။ အညတရာ ဣတ္ထီ ပဿိတွာ အင်္ဂဇာတေ အဘိနိသီဒိ။ သော ဘိက္ခု အက္ကမိတွာ ပဝတ္တေသိ [ပဝဋ္ဋေသိ (သီ. သျာ.)]။ တဿ ကုက္ကုစ္စံ အဟောသိ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, သာဒိယိ’’န္တိ။ ‘‘အနာပတ္တိ, ဘိက္ခု, အသာဒိယန္တဿာ’’တိ။

၇၇. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ကူဋာဂါရသာလာယံ ဒိဝါဝိဟာရဂတော ဒွါရံ ဝိဝရိတွာ နိပန္နော ဟောတိ။ တဿ အင်္ဂမင်္ဂါနိ ဝါတူပတ္ထဒ္ဓါနိ ဟောန္တိ။ တေန ခေါ ပန သမယေန သမ္ဗဟုလာ ဣတ္ထိယော ဂန္ဓဉ္စ မာလဉ္စ အာဒါယ အာရာမံ အာဂမံသု ဝိဟာရပေက္ခိကာယော။ အထ ခေါ တာ ဣတ္ထိယော တံ ဘိက္ခုံ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ, ပုရိသူသဘော ဝတာယန္တိ ဝတွာ ဂန္ဓဉ္စ မာလဉ္စ အာရောပေတွာ ပက္ကမိံသု။ ဘိက္ခူ ကိလိန္နံ ပဿိတွာ ဘဂဝတော ဧတမတ္ထံ အာရောစေသုံ။ ‘‘ပဉ္စဟိ, ဘိက္ခဝေ, အာကာရေဟိ အင်္ဂဇာတံ ကမ္မနိယံ ဟောတိ – ရာဂေန, ဝစ္စေန, ပဿာဝေန, ဝါတေန, ဥစ္စာလိင်္ဂပါဏကဒဋ္ဌေန။ ဣမေဟိ ခေါ, ဘိက္ခဝေ, ပဉ္စဟာကာရေဟိ အင်္ဂဇာတံ ကမ္မနိယံ ဟောတိ။ အဋ္ဌာနမေတံ, ဘိက္ခဝေ, အနဝကာသော, ယံ တဿ ဘိက္ခုနော ရာဂေန အင်္ဂဇာတံ ကမ္မနိယံ အဿ။ အရဟံ သော, ဘိက္ခဝေ, ဘိက္ခု။ အနာပတ္တိ, ဘိက္ခဝေ, တဿ ဘိက္ခုနော။ အနုဇာနာမိ, ဘိက္ခဝေ, ဒိဝါ ပဋိသလ္လီယန္တေန ဒွါရံ သံဝရိတွာ ပဋိသလ္လီယိတု’’န္တိ။

၇၈. တေန ခေါ ပန သမယေန အညတရော ဘာရုကစ္ဆကော ဘိက္ခု သုပိနန္တေ [သုပိနန္တေန (သီ. သျာ.)] ပုရာဏဒုတိယိကာယ မေထုနံ ဓမ္မံ ပဋိသေဝိတွာ – ‘အဿမဏော အဟံ, ဝိဗ္ဘမိဿာမီ’တိ, ဘာရုကစ္ဆံ ဂစ္ဆန္တော အန္တရာမဂ္ဂေ အာယသ္မန္တံ ဥပါလိံ ပဿိတွာ ဧတမတ္ထံ အာရောစေသိ။ အာယသ္မာ ဥပါလိ ဧဝမာဟ – ‘‘အနာပတ္တိ, အာဝုသော, သုပိနန္တေနာ’’တိ။

တေန ခေါ ပန သမယေန ရာဇဂဟေ သုပဗ္ဗာ နာမ ဥပါသိကာ မုဓပ္ပသန္နာ [မုဒ္ဓပ္ပသန္နာ (သီ.)] ဟောတိ။ သာ ဧဝံဒိဋ္ဌိကာ ဟောတိ – ‘‘ယာ မေထုနံ ဓမ္မံ ဒေတိ သာ အဂ္ဂဒါနံ ဒေတီ’’တိ။ သာ ဘိက္ခုံ ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ ‘‘အလံ, ဘဂိနိ, နေတံ ကပ္ပတီ’’တိ။ ‘‘ဧဟိ, ဘန္တေ, ဦရုန္တရိကာယ [ဦရန္တရိကာယ (သီ.)] ဃဋ္ဋေဟိ, ဧဝံ တေ အနာပတ္တိ ဘဝိဿတီ’’တိ။ပေ.။ ဧဟိ, ဘန္တေ, နာဘိယံ ဃဋ္ဋေဟိ။ ဧဟိ, ဘန္တေ, ဥဒရဝဋ္ဋိယံ ဃဋ္ဋေဟိ။ ဧဟိ, ဘန္တေ, ဥပကစ္ဆကေ ဃဋ္ဋေဟိ။ ဧဟိ, ဘန္တေ, ဂီဝါယံ ဃဋ္ဋေဟိ။ ဧဟိ, ဘန္တေ, ကဏ္ဏစ္ဆိဒ္ဒေ ဃဋ္ဋေဟိ။ ဧဟိ, ဘန္တေ, ကေသဝဋ္ဋိယံ ဃဋ္ဋေဟိ။ ဧဟိ, ဘန္တေ, အင်္ဂုလန္တရိကာယ ဃဋ္ဋေဟိ။ ‘‘ဧဟိ, ဘန္တေ, ဟတ္ထေန ဥပက္ကမိတွာ မောစေဿာမိ, ဧဝံ တေ အနာပတ္တိ ဘဝိဿတီ’’တိ။ သော ဘိက္ခု တထာ အကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ သံဃာဒိသေသဿာ’’တိ။

၇၉. တေန ခေါ ပန သမယေန သာဝတ္ထိယံ သဒ္ဓါ နာမ ဥပါသိကာ မုဓပ္ပသန္နာ ဟောတိ။ သာ ဧဝံဒိဋ္ဌိကာ ဟောတိ – ‘‘ယာ မေထုနံ ဓမ္မံ ဒေတိ သာ အဂ္ဂဒါနံ ဒေတီ’’တိ။ သာ ဘိက္ခုံ ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ ‘‘အလံ, ဘဂိနိ, နေတံ ကပ္ပတီ’’တိ။ ‘‘ဧဟိ, ဘန္တေ, ဦရုန္တရိကာယ ဃဋ္ဋေဟိ။ပေ.။ ဧဟိ, ဘန္တေ, ဟတ္ထေန ဥပက္ကမိတွာ မောစေဿာမိ, ဧဝံ တေ အနာပတ္တိ ဘဝိဿတီ’’တိ။ သော ဘိက္ခု တထာ အကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ သံဃာဒိသေသဿာ’’တိ။

၈၀. တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခုံ ဂဟေတွာ ဘိက္ခုနိယာ ဝိပ္ပဋိပါဒေသုံ။ သိက္ခမာနာယ ဝိပ္ပဋိပါဒေသုံ။ သာမဏေရိယာ ဝိပ္ပဋိပါဒေသုံ။ ဥဘော သာဒိယိံသု။ ဥဘော နာသေတဗ္ဗာ။ ဥဘော န သာဒိယိံသု။ ဥဘိန္နံ အနာပတ္တိ။

၈၁. တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခုံ ဂဟေတွာ ဝေသိယာ ဝိပ္ပဋိပါဒေသုံ။ ပဏ္ဍကေ ဝိပ္ပဋိပါဒေသုံ။ ဂိဟိနိယာ ဝိပ္ပဋိပါဒေသုံ။ ဘိက္ခု သာဒိယိ။ ဘိက္ခု နာသေတဗ္ဗော။ ဘိက္ခု န သာဒိယိ။ ဘိက္ခုဿ အနာပတ္တိ။

တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခူ ဂဟေတွာ အညမညံ ဝိပ္ပဋိပါဒေသုံ။ ဥဘော သာဒိယိံသု။ ဥဘော နာသေတဗ္ဗာ။ ဥဘော န သာဒိယိံသု။ ဥဘိန္နံ အနာပတ္တိ။

၈၂. တေန ခေါ ပန သမယေန အညတရော ဝုဍ္ဎပဗ္ဗဇိတော ဘိက္ခု ပုရာဏဒုတိယိကာယ ဒဿနံ အဂမာသိ။ သာ – ‘ဧဟိ, ဘန္တေ, ဝိဗ္ဘမာ’တိ အဂ္ဂဟေသိ။ သော ဘိက္ခု ပဋိက္ကမန္တော ဥတ္တာနော ပရိပတိ။ သာ ဥဗ္ဘဇိတွာ [ဥဗ္ဘုဇိတွာ (သီ. သျာ.)] အင်္ဂဇာတေ [အင်္ဂဇာတေန (သီ.)] အဘိနိသီဒိ။ တဿ ကုက္ကုစ္စံ အဟောသိ ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, သာဒိယိ’’န္တိ။ ‘‘အနာပတ္တိ, ဘိက္ခု, အသာဒိယန္တဿာ’’တိ။

၈၃. တေန ခေါ ပန သမယေန အညတရော ဘိက္ခု အရညေ ဝိဟရတိ။ မိဂပေါတကော တဿ ပဿာဝဋ္ဌာနံ အာဂန္တွာ ပဿာဝံ ပိဝန္တော မုခေန အင်္ဂဇာတံ အဂ္ဂဟေသိ။ သော ဘိက္ခု သာဒိယိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

ပဌမပါရာဇိကံ သမတ္တံ။

၂. ဒုတိယပါရာဇိကံ

၈၄. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ။ တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ဣသိဂိလိပဿေ တိဏကုဋိယော ကရိတွာ ဝဿံ ဥပဂစ္ဆိံသု။ အာယသ္မာပိ ဓနိယော ကုမ္ဘကာရပုတ္တော တိဏကုဋိကံ ကရိတွာ ဝဿံ ဥပဂစ္ဆိ။ အထ ခေါ တေ ဘိက္ခူ ဝဿံဝုဋ္ဌာ တေမာသစ္စယေန တိဏကုဋိယော ဘိန္ဒိတွာ တိဏဉ္စ ကဋ္ဌဉ္စ ပဋိသာမေတွာ ဇနပဒစာရိကံ ပက္ကမိံသု။ အာယသ္မာ ပန ဓနိယော ကုမ္ဘကာရပုတ္တော တတ္ထေဝ ဝဿံ ဝသိ, တတ္ထ ဟေမန္တံ, တတ္ထ ဂိမှံ။ အထ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။ ဒုတိယမ္ပိ ခေါ အာယသ္မာ ဓနိယော ကုမ္ဘကာရပုတ္တော တိဏဉ္စ ကဋ္ဌဉ္စ သံကဍ္ဎိတွာ တိဏကုဋိကံ အကာသိ။ ဒုတိယမ္ပိ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။ တတိယမ္ပိ ခေါ အာယသ္မာ ဓနိယော ကုမ္ဘကာရပုတ္တော တိဏဉ္စ ကဋ္ဌဉ္စ သံကဍ္ဎိတွာ တိဏကုဋိကံ အကာသိ။ တတိယမ္ပိ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။

အထ ခေါ အာယသ္မတော ဓနိယဿ ကုမ္ဘကာရပုတ္တဿ ဧတဒဟောသိ – ‘‘ယာဝတတိယကံ ခေါ မေ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။ အဟံ ခေါ ပန သုသိက္ခိတော အနဝယော သကေ အာစရိယကေ ကုမ္ဘကာရကမ္မေ ပရိယောဒါတသိပ္ပေါ ။ ယံနူနာဟံ သာမံ စိက္ခလ္လံ မဒ္ဒိတွာ သဗ္ဗမတ္တိကာမယံ ကုဋိကံ ကရေယျ’’န္တိ! အထ ခေါ အာယသ္မာ ဓနိယော ကုမ္ဘကာရပုတ္တော သာမံ စိက္ခလ္လံ မဒ္ဒိတွာ သဗ္ဗမတ္တိကာမယံ ကုဋိကံ ကရိတွာ တိဏဉ္စ ကဋ္ဌဉ္စ ဂေါမယဉ္စ သံကဍ္ဎိတွာ တံ ကုဋိကံ ပစိ။ သာ အဟောသိ ကုဋိကာ အဘိရူပါ ဒဿနီယာ ပါသာဒိကာ လောဟိတိကာ [လောဟိတကာ (သျာ.)], သေယျထာပိ ဣန္ဒဂေါပကော။ သေယျထာပိ နာမ ကိင်္ကဏိကသဒ္ဒေါ [ကိင်္ကိဏိကသဒ္ဒေါ (သီ. သျာ.)] ဧဝမေဝံ တဿာ ကုဋိကာယ သဒ္ဒေါ အဟောသိ။

၈၅. အထ ခေါ ဘဂဝါ သမ္ဗဟုလေဟိ ဘိက္ခူဟိ သဒ္ဓိံ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသ တံ ကုဋိကံ အဘိရူပံ ဒဿနီယံ ပါသာဒိကံ လောဟိတိကံ။ ဒိသွာန ဘိက္ခူ အာမန္တေသိ – ‘‘ကိံ ဧတံ, ဘိက္ခဝေ, အဘိရူပံ ဒဿနီယံ ပါသာဒိကံ လောဟိတိကံ, သေယျထာပိ ဣန္ဒဂေါပကော’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, ဘိက္ခဝေ, တဿ မောဃပုရိသဿ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ သော, ဘိက္ခဝေ, မောဃပုရိသော သဗ္ဗမတ္တိကာမယံ ကုဋိကံ ကရိဿတိ! န ဟိ နာမ, ဘိက္ခဝေ, တဿ မောဃပုရိသဿ ပါဏေသု အနုဒ္ဒယာ အနုကမ္ပါ အဝိဟေသာ ဘဝိဿတိ! ဂစ္ဆထေတံ, ဘိက္ခဝေ, ကုဋိကံ ဘိန္ဒထ။ မာ ပစ္ဆိမာ ဇနတာ ပါဏေသု ပါတဗျတံ အာပဇ္ဇိ။ န စ, ဘိက္ခဝေ, သဗ္ဗမတ္တိကာမယာ ကုဋိကာ ကာတဗ္ဗာ။ ယော ကရေယျ, အာပတ္တိ ဒုက္ကဋဿာ’’တိ။ ‘‘ဧဝံ, ဘန္တေ’’တိ, ခေါ တေ ဘိက္ခူ ဘဂဝတော ပဋိဿုဏိတွာ ယေန သာ ကုဋိကာ တေနုပသင်္ကမိံသု; ဥပသင်္ကမိတွာ တံ ကုဋိကံ ဘိန္ဒိံသု။ အထ ခေါ အာယသ္မာ ဓနိယော ကုမ္ဘကာရပုတ္တော တေ ဘိက္ခူ ဧတဒဝေါစ – ‘‘ကိဿ မေ တုမှေ, အာဝုသော, ကုဋိကံ ဘိန္ဒထာ’’တိ? ‘‘ဘဂဝါ, အာဝုသော, ဘေဒါပေတီ’’တိ။ ‘‘ဘိန္ဒထာဝုသော, သစေ ဓမ္မဿာမီ ဘေဒါပေတီ’’တိ။

၈၆. အထ ခေါ အာယသ္မတော ဓနိယဿ ကုမ္ဘကာရပုတ္တဿ ဧတဒဟောသိ – ‘‘ယာဝတတိယကံ ခေါ မေ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။ ယာပိ မယာ သဗ္ဗမတ္တိကာမယာ ကုဋိကာ ကတာ သာပိ ဘဂဝတာ ဘေဒါပိတာ။ အတ္ထိ စ မေ ဒါရုဂဟေ ဂဏကော သန္ဒိဋ္ဌော။ ယံနူနာဟံ ဒါရုဂဟေ ဂဏကံ ဒါရူနိ ယာစိတွာ ဒါရုကုဋိကံ ကရေယျ’’န္တိ။ အထ ခေါ အာယသ္မာ ဓနိယော ကုမ္ဘကာရပုတ္တော ယေန ဒါရုဂဟေ ဂဏကော တေနုပသင်္ကမိ; ဥပသင်္ကမိတွာ ဒါရုဂဟေ ဂဏကံ ဧတဒဝေါစ – ‘‘ယာဝတတိယကံ ခေါ မေ, အာဝုသော, ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု။ ယာပိ မယာ သဗ္ဗမတ္တိကာမယာ ကုဋိကာ ကတာ သာပိ ဘဂဝတာ ဘေဒါပိတာ ။ ဒေဟိ မေ, အာဝုသော, ဒါရူနိ။ ဣစ္ဆာမိ ဒါရုကုဋိကံ [ဒါရုကုဍ္ဍိကံ ကုဋိကံ (သီ.)] ကာတု’’န္တိ။ ‘‘နတ္ထိ, ဘန္တေ, တာဒိသာနိ ဒါရူနိ ယာနာဟံ အယျဿ ဒဒေယျံ။ အတ္ထိ , ဘန္တေ, ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ။ သစေ တာနိ ဒါရူနိ ရာဇာ ဒါပေတိ ဟရာပေထ, ဘန္တေ’’တိ။ ‘‘ဒိန္နာနိ, အာဝုသော, ရညာ’’တိ။ အထ ခေါ ဒါရုဂဟေ ဂဏကဿ ဧတဒဟောသိ – ‘‘ဣမေ ခေါ သမဏာ သကျပုတ္တိယာ ဓမ္မစာရိနော သမစာရိနော [သမ္မစာရိနော (က.)] ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ။ ရာဇာပိမေသံ အဘိပ္ပသန္နော။ နာရဟတိ အဒိန္နံ ဒိန္နန္တိ ဝတ္တု’’န္တိ။ အထ ခေါ ဒါရုဂဟေ ဂဏကော အာယသ္မန္တံ ဓနိယံ ကုမ္ဘကာရပုတ္တံ ဧတဒဝေါစ – ‘‘ဟရာပေထ, ဘန္တေ’’တိ။ အထ ခေါ အာယသ္မာ ဓနိယော ကုမ္ဘကာရပုတ္တော တာနိ ဒါရူနိ ခဏ္ဍာခဏ္ဍိကံ ဆေဒါပေတွာ သကဋေဟိ နိဗ္ဗာဟာပေတွာ ဒါရုကုဋိကံ အကာသိ။

၈၇. အထ ခေါ ဝဿကာရော ဗြာဟ္မဏော မဂဓမဟာမတ္တော ရာဇဂဟေ ကမ္မန္တေ အနုသညာယမာနော ယေန ဒါရုဂဟေ ဂဏကော တေနုပသင်္ကမိ; ဥပသင်္ကမိတွာ ဒါရုဂဟေ ဂဏကံ ဧတဒဝေါစ – ‘‘ယာနိ တာနိ, ဘဏေ, ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ကဟံ တာနိ ဒါရူနီ’’တိ? ‘‘တာနိ, သာမိ, ဒါရူနိ ဒေဝေန အယျဿ ဓနိယဿ ကုမ္ဘကာရပုတ္တဿ ဒိန္နာနီ’’တိ။ အထ ခေါ ဝဿကာရော ဗြာဟ္မဏော မဂဓမဟာမတ္တော အနတ္တမနော အဟောသိ – ‘‘ကထဉှိ နာမ ဒေဝေါ ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ဓနိယဿ ကုမ္ဘကာရပုတ္တဿ ဒဿတီ’’တိ! အထ ခေါ ဝဿကာရော ဗြာဟ္မဏော မဂဓမဟာမတ္တော ယေန ရာဇာ မာဂဓေါ သေနိယော ဗိမ္ဗိသာရော တေနုပသင်္ကမိ; ဥပသင်္ကမိတွာ ရာဇာနံ မာဂဓံ သေနိယံ ဗိမ္ဗိသာရံ ဧတဒဝေါစ – ‘‘သစ္စံ ကိရ, ဒေဝေန [သစ္စံ ကိရ ဒေဝ ဒေဝေန (သီ.)] ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ဓနိယဿ ကုမ္ဘကာရပုတ္တဿ ဒိန္နာနီ’’တိ? ‘‘ကော ဧဝမာဟာ’’တိ? ‘‘ဒါရုဂဟေ ဂဏကော, ဒေဝါ’’တိ။ ‘‘တေန ဟိ, ဗြာဟ္မဏ, ဒါရုဂဟေ ဂဏကံ အာဏာပေဟီ’’တိ။ အထ ခေါ ဝဿကာရော ဗြာဟ္မဏော မဂဓမဟာမတ္တော ဒါရုဂဟေ ဂဏကံ ဗန္ဓံ [ဗဒ္ဓံ (သီ.)] အာဏာပေသိ။ အဒ္ဒသ ခေါ အာယသ္မာ ဓနိယော ကုမ္ဘကာရပုတ္တော ဒါရုဂဟေ ဂဏကံ ဗန္ဓံ နိယျမာနံ။ ဒိသွာန ဒါရုဂဟေ ဂဏကံ ဧတဒဝေါစ – ‘‘ကိဿ တွံ, အာဝုသော, ဗန္ဓေါ နိယျာသီ’’တိ? ‘‘တေသံ, ဘန္တေ, ဒါရူနံ ကိစ္စာ’’တိ။ ‘‘ဂစ္ဆာဝုသော, အဟမ္ပိ အာဂစ္ဆာမီ’’တိ။ ‘‘ဧယျာသိ, ဘန္တေ, ပုရာဟံ ဟညာမီ’’တိ။

၈၈. အထ ခေါ အာယသ္မာ ဓနိယော ကုမ္ဘကာရပုတ္တော ယေန ရညော မာဂဓဿ သေနိယဿ ဗိမ္ဗိသာရဿ နိဝေသနံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ ရာဇာ မာဂဓေါ သေနိယော ဗိမ္ဗိသာရော ယေနာယသ္မာ ဓနိယော ကုမ္ဘကာရပုတ္တော တေနုပသင်္ကမိ; ဥပသင်္ကမိတွာ အာယသ္မန္တံ ဓနိယံ ကုမ္ဘကာရပုတ္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ ရာဇာ မာဂဓေါ သေနိယော ဗိမ္ဗိသာရော အာယသ္မန္တံ ဓနိယံ ကုမ္ဘကာရပုတ္တံ ဧတဒဝေါစ – ‘‘သစ္စံ ကိရ မယာ, ဘန္တေ, ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ အယျဿ ဒိန္နာနီ’’တိ? ‘‘ဧဝံ, မဟာရာဇာ’’တိ။ ‘‘မယံ ခေါ, ဘန္တေ, ရာဇာနော နာမ ဗဟုကိစ္စာ ဗဟုကရဏီယာ, ဒတွာပိ န သရေယျာမ; ဣင်္ဃ, ဘန္တေ, သရာပေဟီ’’တိ။ ‘‘သရသိ တွံ, မဟာရာဇ, ပဌမာဘိသိတ္တော ဧဝရူပိံ ဝါစံ ဘာသိတာ – ‘‘ဒိန္နညေဝ သမဏဗြာဟ္မဏာနံ တိဏကဋ္ဌောဒကံ ပရိဘုဉ္ဇန္တူ’’တိ။ ‘‘သရာမဟံ, ဘန္တေ။ သန္တိ, ဘန္တေ, သမဏဗြာဟ္မဏာ လဇ္ဇိနော ကုက္ကုစ္စကာ သိက္ခါကာမာ။ တေသံ အပ္ပမတ္တကေပိ ကုက္ကုစ္စံ ဥပ္ပဇ္ဇတိ။ တေသံ မယာ သန္ဓါယ ဘာသိတံ, တဉ္စ ခေါ အရညေ အပရိဂ္ဂဟိတံ။ သော တွံ, ဘန္တေ, တေန လေသေန ဒါရူနိ အဒိန္နံ ဟရိတုံ မညသိ! ကထဉှိ နာမ မာဒိသော သမဏံ ဝါ ဗြာဟ္မဏံ ဝါ ဝိဇိတေ ဝသန္တံ ဟနေယျ ဝါ ဗန္ဓေယျ ဝါ ပဗ္ဗာဇေယျ ဝါ! ဂစ္ဆ, ဘန္တေ, လောမေန တွံ မုတ္တောသိ။ မာဿု ပုနပိ ဧဝရူပံ အကာသီ’’တိ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ ဣမေ ဟိ နာမ ဓမ္မစာရိနော သမစာရိနော ဗြာဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ, နတ္ထိ ဣမေသံ ဗြဟ္မညံ။ နဋ္ဌံ ဣမေသံ သာမညံ, နဋ္ဌံ ဣမေသံ ဗြဟ္မညံ။ ကုတော ဣမေသံ သာမညံ, ကုတော ဣမေသံ ဗြဟ္မညံ! အပဂတာ ဣမေ သာမညာ, အပဂတာ ဣမေ ဗြဟ္မညာ။ ရာဇာနမ္ပိ ဣမေ ဝဉ္စေန္တိ, ကိံ ပနညေ မနုဿေ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ သန္တုဋ္ဌာ လဇ္ဇိနော ကုက္ကုစ္စကာ သိက္ခါကာမာ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဓနိယော ကုမ္ဘကာရပုတ္တော ရညော ဒါရူနိ အဒိန္နံ အာဒိယိဿတီ’’တိ! အထ ခေါ တေ ဘိက္ခူ အာယသ္မန္တံ ဓနိယံ ကုမ္ဘကာရပုတ္တံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဓနိယံ ကုမ္ဘကာရပုတ္တံ ပဋိပုစ္ဆိ – ‘‘သစ္စံ ကိရ တွံ, ဓနိယ, ရညော ဒါရူနိ အဒိန္နံ အာဒိယီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ , ရညော ဒါရူနိ အဒိန္နံ အာဒိယိဿသိ! နေတံ, မောဃပုရိသ, အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ; အထခွေတံ, မောဃပုရိသ, အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။

တေန ခေါ ပန သမယေန အညတရော ပုရာဏဝေါဟာရိကော မဟာမတ္တော ဘိက္ခူသု ပဗ္ဗဇိတော ဘဂဝတော အဝိဒူရေ နိသိန္နော ဟောတိ။ အထ ခေါ ဘဂဝါ တံ ဘိက္ခုံ ဧတဒဝေါစ – ‘‘ကိတ္တကေန ခေါ ဘိက္ခု ရာဇာ မာဂဓေါ သေနိယော ဗိမ္ဗိသာရော စောရံ ဂဟေတွာ ဟနတိ ဝါ ဗန္ဓတိ ဝါ ပဗ္ဗာဇေတိ ဝါ’’တိ? ‘‘ပါဒေန ဝါ, ဘဂဝါ, ပါဒါရဟေန ဝါ’’တိ [ပါဒါရဟေနဝါ အတိရေကပါဒေနဝါတိ (သျာ.)]။ တေန ခေါ ပန သမယေန ရာဇဂဟေ ပဉ္စမာသကော ပါဒေါ ဟောတိ။ အထ ခေါ ဘဂဝါ အာယသ္မန္တံ ဓနိယံ ကုမ္ဘကာရပုတ္တံ အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၈၉. ‘‘ယော ပန ဘိက္ခု အဒိန္နံ ထေယျသင်္ခါတံ အာဒိယေယျ, ယထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံ ဝါ ဗန္ဓေယျုံ ဝါ ပဗ္ဗာဇေယျုံ ဝါ – ‘စောရောသိ ဗာလောသိ မူဠှောသိ ထေနောသီ’တိ, တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၉၀. တေန ခေါ ပန သမယေန ဆဗ္ဗဂ္ဂိယာ ဘိက္ခူ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိတွာ အာရာမံ ဟရိတွာ ဘာဇေသုံ။ ဘိက္ခူ ဧဝမာဟံသု – ‘‘မဟာပုညတ္ထ တုမှေ, အာဝုသော။ ဗဟုံ တုမှာကံ စီဝရံ ဥပ္ပန္န’’န္တိ။ ‘‘ကုတော အာဝုသော, အမှာကံ ပုညံ, ဣဒါနိ မယံ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိမှာ’’တိ။ ‘‘နနု, အာဝုသော, ဘဂဝတာ သိက္ခါပဒံ ပညတ္တံ။ ကိဿ တုမှေ, အာဝုသော, ရဇကဘဏ္ဍိကံ အဝဟရိတ္ထာ’’တိ ? ‘‘သစ္စံ, အာဝုသော, ဘဂဝတာ သိက္ခါပဒံ ပညတ္တံ။ တဉ္စ ခေါ ဂါမေ, နော အရညေ’’တိ။ ‘‘နနု, အာဝုသော, တထေဝေတံ ဟောတိ။ အနနုစ္ဆဝိကံ, အာဝုသော, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တုမှေ, အာဝုသော, ရဇကဘဏ္ဍိကံ အဝဟရိဿထ! နေတံ, အာဝုသော, အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ; အထခွေတံ, အာဝုသော, အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။ အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဆဗ္ဗဂ္ဂိယေ ဘိက္ခူ ပဋိပုစ္ဆိ – ‘‘သစ္စံ ကိရ တုမှေ, ဘိက္ခဝေ, ရဇကတ္ထရဏံ ဂန္တွာ ရဇကဘဏ္ဍိကံ အဝဟရိတ္ထာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသာ, အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တုမှေ, မောဃပုရိသာ, ရဇကဘဏ္ဍိကံ အဝဟရိဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ; အထ ခွေတံ, မောဃပုရိသာ, အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ။ အထ ခေါ ဘဂဝါ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ဝီရိယာရမ္ဘဿ ဝဏ္ဏံ ဘာသိတွာ ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတွာ ဘိက္ခူ အာမန္တေသိ။ပေ.။ ‘‘ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၉၁. ‘‘ယော ပန ဘိက္ခု ဂါမာ ဝါ အရညာ ဝါ အဒိန္နံ ထေယျသင်္ခါတံ အာဒိယေယျ, ယထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံ ဝါ ဗန္ဓေယျုံ ဝါ ပဗ္ဗာဇေယျုံ ဝါ – ‘စောရောသိ ဗာလောသိ မူဠှောသိ ထေနောသီ’တိ, တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသော’’တိ။

၉၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဂါမော နာမ ဧကကုဋိကောပိ ဂါမော, ဒွိကုဋိကောပိ ဂါမော, တိကုဋိကောပိ ဂါမော, စတုကုဋိကောပိ ဂါမော, သမနုဿောပိ ဂါမော, အမနုဿောပိ ဂါမော, ပရိက္ခိတ္တောပိ ဂါမော, အပရိက္ခိတ္တောပိ ဂါမော, ဂေါနိသာဒိနိဝိဋ္ဌောပိ ဂါမော, ယောပိ သတ္ထော အတိရေကစတုမာသနိဝိဋ္ဌော သောပိ ဝုစ္စတိ ဂါမော။

ဂါမူပစာရော နာမ ပရိက္ခိတ္တဿ ဂါမဿ ဣန္ဒခီလေ [ဣန္ဒခိလေ (က.)] ဌိတဿ မဇ္ဈိမဿ ပုရိသဿ လေဍ္ဍုပါတော, အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော။

အရညံ နာမ ဌပေတွာ ဂါမဉ္စ ဂါမူပစာရဉ္စ အဝသေသံ အရညံ နာမ။

အဒိန္နံ နာမံ ယံ အဒိန္နံ အနိဿဋ္ဌံ အပရိစ္စတ္တံ ရက္ခိတံ ဂေါပိတံ မမာယိတံ ပရပရိဂ္ဂဟိတံ။ ဧတံ အဒိန္နံ နာမ။

ထေယျသင်္ခါတန္တိ ထေယျစိတ္တော အဝဟရဏစိတ္တော။

အာဒိယေယျာတိ အာဒိယေယျ ဟရေယျ အဝဟရေယျ ဣရိယာပထံ ဝိကောပေယျ ဌာနာ စာဝေယျ သင်္ကေတံ ဝီတိနာမေယျ။

ယထာရူပံ နာမ ပါဒံ ဝါ ပါဒါရဟံ ဝါ အတိရေကပါဒံ ဝါ။

ရာဇာနော နာမ ပထဗျာရာဇာ ပဒေသရာဇာ မဏ္ဍလိကာ အန္တရဘောဂိကာ အက္ခဒဿာ မဟာမတ္တာ, ယေ ဝါ ပန ဆေဇ္ဇဘေဇ္ဇံ ကရောန္တာ အနုသာသန္တိ။ ဧတေ ရာဇာနော နာမ။

စောရော နာမ ယော ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ။ ဧသော စောရော နာမ။

ဟနေယျုံ ဝါတိ ဟတ္ထေန ဝါ ပါဒေန ဝါ ကသာယ ဝါ ဝေတ္တေန ဝါ အဍ္ဎဒဏ္ဍကေန ဝါ ဆေဇ္ဇာယ ဝါ ဟနေယျုံ။

ဗန္ဓေယျုံ ဝါတိ ရဇ္ဇုဗန္ဓနေန ဝါ အန္ဒုဗန္ဓနေန ဝါ သင်္ခလိကဗန္ဓနေန ဝါ ဃရဗန္ဓနေန ဝါ နဂရဗန္ဓနေန ဝါ ဂါမဗန္ဓနေန ဝါ နိဂမဗန္ဓနေန ဝါ ဗန္ဓေယျုံ, ပုရိသဂုတ္တိံ ဝါ ကရေယျုံ။

ပဗ္ဗာဇေယျုံ ဝါတိ ဂါမာ ဝါ နိဂမာ ဝါ နဂရာ ဝါ ဇနပဒါ ဝါ ဇနပဒပဒေသာ ဝါ ပဗ္ဗာဇေယျုံ။

စောရောသိ ဗာလောသိ မူဠှောသိ ထေနောသီတိ ပရိဘာသော ဧသော။

တထာရူပံ နာမ ပါဒံ ဝါ ပါဒါရဟံ ဝါ အတိရေကပါဒံ ဝါ။

အာဒိယမာနောတိ အာဒိယမာနော ဟရမာနော အဝဟရမာနော ဣရိယာပထံ ဝိကောပယမာနော ဌာနာ စာဝယမာနော သင်္ကေတံ ဝီတိနာမယမာနော။

အယမ္ပီတိ ပုရိမံ ဥပါဒါယ ဝုစ္စတိ။

ပါရာဇိကော ဟောတီတိ သေယျထာပိ နာမ ပဏ္ဍုပလာသော ဗန္ဓနာ ပဝုတ္တော [ဟရိတတ္တာယ (သီ. သျာ.)] အဘဗ္ဗော ဟရိတတ္ထာယ [ဟရိတတ္တာယ (သီ. သျာ.)], ဧဝမေဝ ဘိက္ခု ပါဒံ ဝါ ပါဒါရဟံ ဝါ အတိရေကပါဒံ ဝါ အဒိန္နံ ထေယျသင်္ခါတံ အာဒိယိတွာ အဿမဏော ဟောတိ အသကျပုတ္တိယော။ တေန ဝုစ္စတိ – ‘ပါရာဇိကော ဟောတီ’တိ။

အသံဝါသောတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ။ ဧသော သံဝါသော နာမ။ သော တေန သဒ္ဓိံ နတ္ထိ။ တေန ဝုစ္စတိ – ‘အသံဝါသော’တိ။

၉၃. ဘူမဋ္ဌံ ထလဋ္ဌံ အာကာသဋ္ဌံ ဝေဟာသဋ္ဌံ ဥဒကဋ္ဌံ နာဝဋ္ဌံ ယာနဋ္ဌံ ဘာရဋ္ဌံ အာရာမဋ္ဌံ ဝိဟာရဋ္ဌံ ခေတ္တဋ္ဌံ ဝတ္ထုဋ္ဌံ ဂါမဋ္ဌံ အရညဋ္ဌံ ဥဒကံ ဒန္တပေါဏံ [ဒန္တပေါနံ (သီ. က.)] ဝနပ္ပတိ ဟရဏကံ ဥပနိဓိ သုင်္ကဃာတံ ပါဏော အပဒံ ဒွိပဒံ စတုပ္ပဒံ ဗဟုပ္ပဒံ ဩစရကော ဩဏိရက္ခေါ သံဝိဒါဝဟာရော သင်္ကေတကမ္မံ နိမိတ္တကမ္မန္တိ။

၉၄. ဘူမဋ္ဌံ နာမ ဘဏ္ဍံ ဘူမိယံ နိက္ခိတ္တံ ဟောတိ နိခါတံ ပဋိစ္ဆန္နံ။ ဘူမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ကုဒါလံ ဝါ ပိဋကံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ တတ္ထ ဇာတကံ ကဋ္ဌံ ဝါ လတံ ဝါ ဆိန္ဒတိ, အာပတ္တိ ဒုက္ကဋဿ။ တတ္ထ ပံသုံ ခဏတိ ဝါ ဗျူဟတိ [ဝိယူဟတိ (သျာ.)] ဝါ ဥဒ္ဓရတိ ဝါ, အာပတ္တိ ဒုက္ကဋဿ။ ကုမ္ဘိံ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ အတ္တနော ဘာဇနံ ပဝေသေတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ အတ္တနော ဘာဇနဂတံ ဝါ ကရောတိ မုဋ္ဌိံ ဝါ ဆိန္ဒတိ, အာပတ္တိ ပါရာဇိကဿ။ သုတ္တာရုဠှံ ဘဏ္ဍံ ပါမင်္ဂံ ဝါ ကဏ္ဌသုတ္တကံ ဝါ ကဋိသုတ္တကံ ဝါ သာဋကံ ဝါ ဝေဌနံ ဝါ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ကောဋိယံ ဂဟေတွာ ဥစ္စာရေတိ, အာပတ္တိ ထုလ္လစ္စယဿ။ ဃံသန္တော နီဟရတိ, အာပတ္တိ ထုလ္လစ္စယဿ။ အန္တမသော ကေသဂ္ဂမတ္တမ္ပိ ကုမ္ဘိမုခါ မောစေတိ, အာပတ္တိ ပါရာဇိကဿ။ သပ္ပိံ ဝါ တေလံ ဝါ မဓုံ ဝါ ဖာဏိတံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော ဧကေန ပယောဂေန ပိဝတိ, အာပတ္တိ ပါရာဇိကဿ။ တတ္ထေဝ ဘိန္ဒတိ ဝါ ဆဍ္ဍေတိ ဝါ ဈာပေတိ ဝါ အပရိဘောဂံ ဝါ ကရောတိ, အာပတ္တိ ဒုက္ကဋဿ။

၉၅. ထလဋ္ဌံ နာမ ဘဏ္ဍံ ထလေ နိက္ခိတ္တံ ဟောတိ။ ထလဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၉၆. အာကာသဋ္ဌံ နာမ ဘဏ္ဍံ အာကာသဂတံ ဟောတိ။ မောရော ဝါ ကပိဉ္ဇရော ဝါ တိတ္တိရော ဝါ ဝဋ္ဋကော ဝါ, သာဋကံ ဝါ ဝေဌနံ ဝါ ဟိရညံ ဝါ သုဝဏ္ဏံ ဝါ ဆိဇ္ဇမာနံ ပတတိ။ အာကာသဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ ။ ဂမနံ ဥပစ္ဆိန္ဒတိ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၉၇. ဝေဟာသဋ္ဌံ နာမ ဘဏ္ဍံ ဝေဟာသဂတံ ဟောတိ။ မဉ္စေ ဝါ ဣဌေ ဝါ စီဝရဝံသေ ဝါ စီဝရရဇ္ဇုယာ ဝါ ဘိတ္တိခိလေ ဝါ နာဂဒန္တေ ဝါ ရုက္ခေ ဝါ လဂ္ဂိတံ ဟောတိ, အန္တမသော ပတ္တာဓါရကေပိ။ ဝေဟာသဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၉၈. ဥဒကဋ္ဌံ နာမ ဘဏ္ဍံ ဥဒကေ နိက္ခိတ္တံ ဟောတိ။ ဥဒကဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ နိမုဇ္ဇတိ ဝါ ဥမ္မုဇ္ဇတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ တတ္ထ ဇာတကံ ဥပ္ပလံ ဝါ ပဒုမံ ဝါ ပုဏ္ဍရီကံ ဝါ ဘိသံ ဝါ မစ္ဆံ ဝါ ကစ္ဆပံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၉၉. နာဝါ နာမ ယာယ တရတိ။ နာဝဋ္ဌံ နာမ ဘဏ္ဍံ နာဝါယ နိက္ခိတ္တံ ဟောတိ။ ‘‘နာဝဋ္ဌံ ဘဏ္ဍံ အဝဟရိဿာမီ’’တိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ နာဝံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဗန္ဓနံ မောစေတိ, အာပတ္တိ ဒုက္ကဋဿ။ ဗန္ဓနံ မောစေတွာ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဥဒ္ဓံ ဝါ အဓေါ ဝါ တိရိယံ ဝါ အန္တမသော ကေသဂ္ဂမတ္တမ္ပိ သင်္ကာမေတိ, အာပတ္တိ ပါရာဇိကဿ။

၁၀၀. ယာနံ နာမ ဝယှံ ရထော သကဋံ သန္ဒမာနိကာ။ ယာနဋ္ဌံ နာမ ဘဏ္ဍံ ယာနေ နိက္ခိတ္တံ ဟောတိ။ ယာနဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ယာနံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၀၁. ဘာရော နာမ သီသဘာရော ခန္ဓဘာရော ကဋိဘာရော ဩလမ္ဗကော။ သီသေ ဘာရံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ခန္ဓံ ဩရောပေတိ, အာပတ္တိ ပါရာဇိကဿ။ ခန္ဓေ ဘာရံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ကဋိံ ဩရောပေတိ, အာပတ္တိ ပါရာဇိကဿ။ ကဋိယာ ဘာရံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဟတ္ထေန ဂဏှာတိ, အာပတ္တိ ပါရာဇိကဿ။ ဟတ္ထေ ဘာရံ ထေယျစိတ္တော ဘူမိယံ နိက္ခိပတိ, အာပတ္တိ ပါရာဇိကဿ။ ထေယျစိတ္တော ဘူမိတော ဂဏှာတိ, အာပတ္တိ ပါရာဇိကဿ။

၁၀၂. အာရာမော နာမ ပုပ္ဖာရာမော ဖလာရာမော။ အာရာမဋ္ဌံ နာမ ဘဏ္ဍံ အာရာမေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ ထလဋ္ဌံ, အာကာသဋ္ဌံ, ဝေဟာသဋ္ဌံ။ အာရာမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ တတ္ထ ဇာတကံ မူလံ ဝါ တစံ ဝါ ပတ္တံ ဝါ ပုပ္ဖံ ဝါ ဖလံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ အာရာမံ အဘိယုဉ္ဇတိ, အာပတ္တိ ဒုက္ကဋဿ။ သာမိကဿ ဝိမတိံ ဥပ္ပါဒေတိ, အာပတ္တိ ထုလ္လစ္စယဿ။ သာမိကော န မယှံ ဘဝိဿတီတိ ဓုရံ နိက္ခိပတိ, အာပတ္တိ ပါရာဇိကဿ။ ဓမ္မံ စရန္တော သာမိကံ ပရာဇေတိ, အာပတ္တိ ပါရာဇိကဿ။ ဓမ္မံ စရန္တော ပရဇ္ဇတိ, အာပတ္တိ ထုလ္လစ္စယဿ။

၁၀၃. ဝိဟာရဋ္ဌံ နာမ ဘဏ္ဍံ ဝိဟာရေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ, ထလဋ္ဌံ, အာကာသဋ္ဌံ, ဝေဟာသဋ္ဌံ။ ဝိဟာရဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ဝိဟာရံ အဘိယုဉ္ဇတိ, အာပတ္တိ ဒုက္ကဋဿ။ သာမိကဿ ဝိမတိံ ဥပ္ပါဒေတိ, အာပတ္တိ ထုလ္လစ္စယဿ။ သာမိကော န မယှံ ဘဝိဿတီတိ ဓုရံ နိက္ခိပတိ, အာပတ္တိ ပါရာဇိကဿ။ ဓမ္မံ စရန္တော သာမိကံ ပရာဇေတိ, အာပတ္တိ ပါရာဇိကဿ။ ဓမ္မံ စရန္တော ပရဇ္ဇတိ, အာပတ္တိ ထုလ္လစ္စယဿ။

၁၀၄. ခေတ္တံ နာမ ယတ္ထ ပုဗ္ဗဏ္ဏံ ဝါ အပရဏ္ဏံ ဝါ ဇာယတိ။ ခေတ္တဋ္ဌံ နာမ ဘဏ္ဍံ ခေတ္တေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ, ထလဋ္ဌံ, အာကာသဋ္ဌံ, ဝေဟာသဋ္ဌံ။ ခေတ္တဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ, ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ တတ္ထ ဇာတကံ ပုဗ္ဗဏ္ဏံ ဝါ အပရဏ္ဏံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ခေတ္တံ အဘိယုဉ္ဇတိ, အာပတ္တိ ဒုက္ကဋဿ။ သာမိကဿ ဝိမတိံ ဥပ္ပါဒေတိ, အာပတ္တိ ထုလ္လစ္စယဿ။ သာမိကော န မယှံ ဘဝိဿတီတိ ဓုရံ နိက္ခိပတိ, အာပတ္တိ ပါရာဇိကဿ။ ဓမ္မံ စရန္တော သာမိကံ ပရာဇေတိ, အာပတ္တိ ပါရာဇိကဿ။ ဓမ္မံ စရန္တော ပရဇ္ဇတိ, အာပတ္တိ ထုလ္လစ္စယဿ။ ခိလံ ဝါ ရဇ္ဇုံ ဝါ ဝတိံ ဝါ မရိယာဒံ ဝါ သင်္ကာမေတိ, အာပတ္တိ ဒုက္ကဋဿ။ ဧကံ ပယောဂံ အနာဂတေ, အာပတ္တိ ထုလ္လစ္စယဿ။ တသ္မိံ ပယောဂေ အာဂတေ, အာပတ္တိ ပါရာဇိကဿ။

၁၀၅. ဝတ္ထု နာမ အာရာမဝတ္ထု ဝိဟာရဝတ္ထု။ ဝတ္ထုဋ္ဌံ နာမ ဘဏ္ဍံ ဝတ္ထုသ္မိံ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ, ထလဋ္ဌံ, အာကာသဋ္ဌံ, ဝေဟာသဋ္ဌံ။ ဝတ္ထုဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ဝတ္ထုံ အဘိယုဉ္ဇတိ, အာပတ္တိ ဒုက္ကဋဿ။ သာမိကဿ ဝိမတိံ ဥပ္ပါဒေတိ, အာပတ္တိ ထုလ္လစ္စယဿ။ သာမိကော န မယှံ ဘဝိဿတီတိ ဓုရံ နိက္ခိပတိ, အာပတ္တိ ပါရာဇိကဿ။ ဓမ္မံ စရန္တော သာမိကံ ပရာဇေတိ, အာပတ္တိ ပါရာဇိကဿ။ ဓမ္မံ စရန္တော ပရဇ္ဇတိ, အာပတ္တိ ထုလ္လစ္စယဿ။ ခီလံ ဝါ ရဇ္ဇုံ ဝါ ဝတိံ ဝါ ပါကာရံ ဝါ သင်္ကာမေတိ, အာပတ္တိ ဒုက္ကဋဿ။ ဧကံ ပယောဂံ အနာဂတေ အာပတ္တိ ထုလ္လစ္စယဿ။ တသ္မိံ ပယောဂေ အာဂတေ အာပတ္တိ ပါရာဇိကဿ။

၁၀၆. ဂါမဋ္ဌံ နာမ ဘဏ္ဍံ ဂါမေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ, ထလဋ္ဌံ, အာကာသဋ္ဌံ, ဝေဟာသဋ္ဌံ။ ဂါမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၀၇. အရညံ နာမ ယံ မနုဿာနံ ပရိဂ္ဂဟိတံ ဟောတိ, တံ အရညံ။ အရညဋ္ဌံ နာမ ဘဏ္ဍံ အရညေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ, ထလဋ္ဌံ, အာကာသဋ္ဌံ, ဝေဟာသဋ္ဌံ။ အရညဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ, အာပတ္တိ ဒုက္ကဋဿ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ တတ္ထ ဇာတကံ ကဋ္ဌံ ဝါ လတံ ဝါ တိဏံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၀၈. ဥဒကံ နာမ ဘာဇနဂတံ ဝါ ဟောတိ ပေါက္ခရဏိယာ ဝါ တဠာကေ ဝါ။ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ ။ အတ္တနော ဘာဇနံ ပဝေသေတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ဥဒကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ အတ္တနော ဘာဇနဂတံ ကရောတိ, အာပတ္တိ ပါရာဇိကဿ။ မရိယာဒံ ဘိန္ဒတိ, အာပတ္တိ ဒုက္ကဋဿ။ မရိယာဒံ ဘိန္ဒိတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ဥဒကံ နိက္ခါမေတိ, အာပတ္တိ ပါရာဇိကဿ။ အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ ဥဒကံ နိက္ခါမေတိ, အာပတ္တိ ထုလ္လစ္စယဿ။ မာသကံ ဝါ ဦနမာသကံ ဝါ အဂ္ဃနကံ ဥဒကံ နိက္ခါမေတိ, အာပတ္တိ ဒုက္ကဋဿ။

၁၀၉. ဒန္တပေါဏံ နာမ ဆိန္နံ ဝါ အစ္ဆိန္နံ ဝါ။ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၁၀. ဝနပ္ပတိ နာမ ယော မနုဿာနံ ပရိဂ္ဂဟိတော ဟောတိ ရုက္ခေါ ပရိဘောဂေါ။ ထေယျစိတ္တော ဆိန္ဒတိ, ပဟာရေ ပဟာရေ အာပတ္တိ ဒုက္ကဋဿ။ ဧကံ ပဟာရံ အနာဂတေ, အာပတ္တိ ထုလ္လစ္စယဿ။ တသ္မိံ ပဟာရေ အာဂတေ, အာပတ္တိ ပါရာဇိကဿ။

၁၁၁. ဟရဏကံ နာမ အညဿ ဟရဏကံ ဘဏ္ဍံ။ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ သဟဘဏ္ဍဟာရကံ ပဒသာ နေဿာမီတိ ပဌမံ ပါဒံ သင်္ကာမေတိ, အာပတ္တိ ထုလ္လစ္စယဿ။ ဒုတိယံ ပါဒံ သင်္ကာမေတိ, အာပတ္တိ ပါရာဇိကဿ။ ပတိတံ ဘဏ္ဍံ ဂဟေဿာမီတိ ပါတာပေတိ, အာပတ္တိ ဒုက္ကဋဿ။ ပတိတံ ဘဏ္ဍံ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၁၂. ဥပနိဓိ နာမ ဥပနိက္ခိတ္တံ ဘဏ္ဍံ။ ဒေဟိ မေ ဘဏ္ဍန္တိ ဝုစ္စမာနော နာဟံ ဂဏှာမီတိ ဘဏတိ, အာပတ္တိ ဒုက္ကဋဿ။ သာမိကဿ ဝိမတိံ ဥပ္ပါဒေတိ , အာပတ္တိ ထုလ္လစ္စယဿ ။ သာမိကော န မယှံ ဒဿတီတိ ဓုရံ နိက္ခိပတိ, အာပတ္တိ ပါရာဇိကဿ။ ဓမ္မံ စရန္တော သာမိကံ ပရာဇေတိ, အာပတ္တိ ပါရာဇိကဿ။ ဓမ္မံ စရန္တော ပရဇ္ဇတိ, အာပတ္တိ ထုလ္လစ္စယဿ။

၁၁၃. သုင်္ကဃာတံ နာမ ရညာ ဌပိတံ ဟောတိ ပဗ္ဗတခဏ္ဍေ ဝါ နဒီတိတ္ထေ ဝါ ဂါမဒွါရေ ဝါ – ‘အတြ ပဝိဋ္ဌဿ သုင်္ကံ ဂဏှန္တူ’တိ။ တတြ ပဝိသိတွာ ရာဇဂ္ဂံ [ရာဇဂ္ဃံ (သီ. သျာ.)] ဘဏ္ဍံ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ပဌမံ ပါဒံ သုင်္ကဃာတံ အတိက္ကာမေတိ, အာပတ္တိ ထုလ္လစ္စယဿ။ ဒုတိယံ ပါဒံ အတိက္ကာမေတိ, အာပတ္တိ ပါရာဇိကဿ။ အန္တောသုင်္ကဃာတေ ဌိတော ဗဟိသုင်္ကဃာတံ ပါတေတိ, အာပတ္တိ ပါရာဇိကဿ။ သုင်္ကံ ပရိဟရတိ, အာပတ္တိ ဒုက္ကဋဿ။

၁၁၄. ပါဏော နာမ မနုဿပါဏော ဝုစ္စတိ။ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ပဒသာ နေဿာမီတိ ပဌမံ ပါဒံ သင်္ကာမေတိ, အာပတ္တိ ထုလ္လစ္စယဿ။ ဒုတိယံ ပါဒံ သင်္ကာမေတိ, အာပတ္တိ ပါရာဇိကဿ။

အပဒံ နာမ အဟိ မစ္ဆာ။ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၁၅. ဒွိပဒံ နာမ မနုဿာ, ပက္ခဇာတာ။ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ပဒသာ နေဿာမီတိ ပဌမံ ပါဒံ သင်္ကာမေတိ, အာပတ္တိ ထုလ္လစ္စယဿ။ ဒုတိယံ ပါဒံ သင်္ကာမေတိ, အာပတ္တိ ပါရာဇိကဿ။

၁၁၆. စတုပ္ပဒံ နာမ – ဟတ္ထီ အဿာ ဩဋ္ဌာ ဂေါဏာ ဂဒြဘာ ပသုကာ။ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ပဒသာ နေဿာမီတိ ပဌမံ ပါဒံ သင်္ကာမေတိ, အာပတ္တိ ထုလ္လစ္စယဿ။ ဒုတိယံ ပါဒံ သင်္ကာမေတိ, အာပတ္တိ ထုလ္လစ္စယဿ။ တတိယံ ပါဒံ သင်္ကာမေတိ, အာပတ္တိ ထုလ္လစ္စယဿ။ စတုတ္ထံ ပါဒံ သင်္ကာမေတိ, အာပတ္တိ ပါရာဇိကဿ။

၁၁၇. ဗဟုပ္ပဒံ နာမ – ဝိစ္ဆိကာ သတပဒီ ဥစ္စာလိင်္ဂပါဏကာ။ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။ ပဒသာ နေဿာမီတိ သင်္ကာမေတိ, ပဒေ ပဒေ အာပတ္တိ ထုလ္လစ္စယဿ။ ပစ္ဆိမံ ပါဒံ သင်္ကာမေတိ, အာပတ္တိ ပါရာဇိကဿ။

၁၁၈. ဩစရကော နာမ ဘဏ္ဍံ ဩစရိတွာ အာစိက္ခတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော တံ ဘဏ္ဍံ အဝဟရတိ, အာပတ္တိ ဥဘိန္နံ ပါရာဇိကဿ။

ဩဏိရက္ခေါ နာမ အာဟဋံ ဘဏ္ဍံ ဂေါပေန္တော ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

သံဝိဒါဝဟာရော နာမ သမ္ဗဟုလာ သံဝိဒဟိတွာ ဧကော ဘဏ္ဍံ အဝဟရတိ, အာပတ္တိ သဗ္ဗေသံ ပါရာဇိကဿ။

၁၁၉. သင်္ကေတကမ္မံ နာမ သင်္ကေတံ ကရောတိ – ‘‘ပုရေဘတ္တံ ဝါ ပစ္ဆာဘတ္တံ ဝါ ရတ္တိံ ဝါ ဒိဝါ ဝါ တေန သင်္ကေတေန တံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ တေန သင်္ကေတေန တံ ဘဏ္ဍံ အဝဟရတိ, အာပတ္တိ ဥဘိန္နံ ပါရာဇိကဿ။ တံ သင်္ကေတံ ပုရေ ဝါ ပစ္ဆာ ဝါ တံ ဘဏ္ဍံ အဝဟရတိ, မူလဋ္ဌဿ အနာပတ္တိ။ အဝဟာရကဿ အာပတ္တိ ပါရာဇိကဿ။

၁၂၀. နိမိတ္တကမ္မံ နာမ နိမိတ္တံ ကရောတိ။ အက္ခိံ ဝါ နိခဏိဿာမိ ဘမုကံ ဝါ ဥက္ခိပိဿာမိ သီသံ ဝါ ဥက္ခိပိဿာမိ, တေန နိမိတ္တေန တံ ဘဏ္ဍံ အဝဟရာတိ, အာပတ္တိ ဒုက္ကဋဿ။ တေန နိမိတ္တေန တံ ဘဏ္ဍံ အဝဟရတိ, အာပတ္တိ ဥဘိန္နံ ပါရာဇိကဿ။ တံ နိမိတ္တံ ပုရေ ဝါ ပစ္ဆာ ဝါ တံ ဘဏ္ဍံ အဝဟရတိ, မူလဋ္ဌဿ အနာပတ္တိ။ အဝဟာရကဿ အာပတ္တိ ပါရာဇိကဿ။

၁၂၁. ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော တံ မညမာနော တံ အဝဟရတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော တံ မညမာနော အညံ အဝဟရတိ, မူလဋ္ဌဿ အနာပတ္တိ။ အဝဟာရကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော အညံ မညမာနော တံ အဝဟရတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော အညံ မညမာနော အညံ အဝဟရတိ, မူလဋ္ဌဿ အနာပတ္တိ။ အဝဟာရကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဘဏ္ဍံ အဝဟရတူ’’’တိ, အာပတ္တိ ဒုက္ကဋဿ။ သော ဣတရဿ အာရောစေတိ, အာပတ္တိ ဒုက္ကဋဿ။ အဝဟာရကော ပဋိဂ္ဂဏှာတိ, မူလဋ္ဌဿ အာပတ္တိ ထုလ္လစ္စယဿ။ သော တံ ဘဏ္ဍံ အဝဟရတိ, အာပတ္တိ သဗ္ဗေသံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဘဏ္ဍံ အဝဟရတူ’’’တိ, အာပတ္တိ ဒုက္ကဋဿ။ သော အညံ အာဏာပေတိ, အာပတ္တိ ဒုက္ကဋဿ။ အဝဟာရကော ပဋိဂ္ဂဏှာတိ, အာပတ္တိ ဒုက္ကဋဿ။ သော တံ ဘဏ္ဍံ အဝဟရတိ, မူလဋ္ဌဿ အနာပတ္တိ။ အာဏာပကဿ စ အဝဟာရကဿ စ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော ဂန္တွာ ပုန ပစ္စာဂစ္ဆတိ – ‘‘နာဟံ သက္ကောမိ တံ ဘဏ္ဍံ အဝဟရိတု’’န္တိ။ သော ပုန အာဏာပေတိ – ‘‘ယဒါ သက္ကောသိ တဒါ တံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော တံ ဘဏ္ဍံ အဝဟရတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ န သာဝေတိ – ‘‘မာ အဝဟရီ’’တိ။ သော တံ ဘဏ္ဍံ အဝဟရတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ သာဝေတိ – ‘‘မာ အဝဟရီ’’တိ။ သော ‘‘အာဏတ္တော အဟံ တယာ’’တိ, တံ ဘဏ္ဍံ အဝဟရတိ, မူလဋ္ဌဿ အနာပတ္တိ။ အဝဟာရကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ သာဝေတိ – ‘‘မာ အဝဟရီ’’တိ။ သော ‘‘သာဓူ’’တိ [သုဋ္ဌူတိ (က.)]? ဩရမတိ, ဥဘိန္နံ အနာပတ္တိ။

၁၂၂. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ပါရာဇိကဿ – ပရပရိဂ္ဂဟိတဉ္စ ဟောတိ, ပရပရိဂ္ဂဟိတသညီ စ, ဂရုကော စ ဟောတိ ပရိက္ခါရော, ပဉ္စမာသကော ဝါ အတိရေကပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၂၃. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ထုလ္လစ္စယဿ – ပရပရိဂ္ဂဟိတဉ္စ ဟောတိ, ပရပရိဂ္ဂဟိတသညီ စ, လဟုကော စ ဟောတိ ပရိက္ခါရော, အတိရေကမာသကော ဝါ ဦနပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ထုလ္လစ္စယဿ။

၁၂၄. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ။ ပရပရိဂ္ဂဟိတဉ္စ ဟောတိ, ပရပရိဂ္ဂဟိတသညီ စ, လဟုကော စ ဟောတိ ပရိက္ခါရော, မာသကော ဝါ ဦနမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ဒုက္ကဋဿ။

၁၂၅. ဆဟိ အာကာရေဟိ အဒိန္နံ အာဒိယန္တဿ အာပတ္တိ ပါရာဇိကဿ။ န စ သကသညီ, န စ ဝိဿာသဂ္ဂါဟီ, န စ တာဝကာလိကံ, ဂရုကော စ ဟောတိ ပရိက္ခါရော, ပဉ္စမာသကော ဝါ အတိရေကပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋသ။ ဖန္ဒါပေတိ, အာပတ္တိ ထုလ္လစ္စယဿ။ ဌာနာ စာဝေတိ, အာပတ္တိ ပါရာဇိကဿ။

၁၂၆. ဆဟိ အာကာရေဟိ အဒိန္နံ အာဒိယန္တဿ အာပတ္တိ ထုလ္လစ္စယဿ။ န စ သကသညီ, န စ ဝိဿာသဂ္ဂါဟီ, န စ တာဝကာလိကံ, လဟုကော စ ဟောတိ ပရိက္ခါရော အတိရေကမာသကော ဝါ ဦနပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ထုလ္လစ္စယဿ။

၁၂၇. ဆဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ။ န စ သကသညီ, န စ ဝိဿာသဂ္ဂါဟီ, န စ တာဝကာလိကံ, လဟုကော စ ဟောတိ ပရိက္ခါရော, မာသကော ဝါ ဦနမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ဒုက္ကဋဿ။

၁၂၈. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ။ န စ ပရပရိဂ္ဂဟိတံ ဟောတိ, ပရပရိဂ္ဂဟိတသညီ စ, ဂရုကော စ ဟောတိ ပရိက္ခါရော, ပဉ္စမာသကော ဝါ အတိရေကပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ဒုက္ကဋဿ။

၁၂၉. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ။ န စ ပရပရိဂ္ဂဟိတံ ဟောတိ, ပရပရိဂ္ဂဟိတသညီ စ, လဟုကော စ ဟောတိ ပရိက္ခါရော, အတိရေကမာသကော ဝါ ဦနပဉ္စမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ဒုက္ကဋဿ။

၁၃၀. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ။ န စ ပရပရိဂ္ဂဟိတံ ဟောတိ, ပရပရိဂ္ဂဟိတသညီ စ, လဟုကော စ ဟောတိ ပရိက္ခါရော, မာသကော ဝါ ဦနမာသကော ဝါ, ထေယျစိတ္တဉ္စ ပစ္စုပဋ္ဌိတံ ဟောတိ။ အာမသတိ, အာပတ္တိ ဒုက္ကဋဿ။ ဖန္ဒါပေတိ, အာပတ္တိ ဒုက္ကဋဿ။ ဌာနာ စာဝေတိ, အာပတ္တိ ဒုက္ကဋဿ။

၁၃၁. အနာပတ္တိ သသညိဿ, ဝိဿာသဂ္ဂါဟေ, တာဝကာလိကေ, ပေတပရိဂ္ဂဟေ, တိရစ္ဆာနဂတပရိဂ္ဂဟေ, ပံသုကူလသညိဿ, ဥမ္မတ္တကဿ, (ခိတ္တစိတ္တဿ ဝေဒနာဋ္ဋဿ) [(ခိတ္တစိတ္တဿ ဝေဒနာဋ္ဋဿ) ကတ္ထစိ နတ္ထိ] အာဒိကမ္မိကဿာတိ။

အဒိန္နာဒါနမှိ ပဌမဘာဏဝါရော နိဋ္ဌိတော။

ဝိနီတဝတ္ထုဥဒ္ဒါနဂါထာ

ရဇကေဟိ ပဉ္စ အက္ခါတာ၊ စတုရော အတ္ထရဏေဟိ စ။

အန္ဓကာရေန ဝေ ပဉ္စ၊ ပဉ္စ ဟာရဏကေန စ။

နိရုတ္တိယာ ပဉ္စ အက္ခါတာ၊ ဝါတေဟိ အပရေ ဒုဝေ။

အသမ္ဘိန္နေ ကုသာပါတော၊ ဇန္တဂ္ဂေန [ဇန္တာဃရေန (သျာ.)] သဟာ ဒသ။

ဝိဃာသေဟိ ပဉ္စ အက္ခါတာ၊ ပဉ္စ စေဝ အမူလကာ။

ဒုဗ္ဘိက္ခေ ကုရမံသဉ္စ [ကူရမံသဉ္စ (သျာ.)]၊ ပူဝသက္ခလိမောဒကာ။

ဆပရိက္ခါရထဝိကာ ၊ ဘိသိဝံသာ န နိက္ခမေ။

ခါဒနီယဉ္စ ဝိဿာသံ၊ သသညာယပရေ ဒုဝေ။

သတ္တ နာဝဟရာမာတိ၊ သတ္တ စေဝ အဝါဟရုံ။

သံဃဿ အဝဟရုံ သတ္တ၊ ပုပ္ဖေဟိ အပရေ ဒုဝေ။

တယော စ ဝုတ္တဝါဒိနော၊ မဏိ တီဏိ အတိက္ကမေ။

သူကရာ စ မိဂါ မစ္ဆာ၊ ယာနဉ္စာပိ ပဝတ္တယိ။

ဒုဝေ ပေသီ ဒုဝေ ဒါရူ၊ ပံသုကူလံ ဒုဝေ ဒကာ။

အနုပုဗ္ဗဝိဓါနေန ၊ တဒညော န ပရိပူရယိ။

သာဝတ္ထိယာ စတုရော မုဋ္ဌီ၊ ဒွေ ဝိဃာသာ ဒုဝေ တိဏာ။

သံဃဿ ဘာဇယုံ သတ္တ၊ သတ္တ စေဝ အဿာမိကာ။

ဒါရုဒကာ မတ္တိကာ ဒွေ တိဏာနိ။

သံဃဿ သတ္တ အဝဟာသိ သေယျံ။

သဿာမိကံ န စာပိ နီဟရေယျ။

ဟရေယျ သဿာမိကံ တာဝကာလိကံ။

စမ္ပါ ရာဇဂဟေ စေဝ၊ ဝေသာလိယာ စ အဇ္ဇုကော။

ဗာရာဏသီ စ ကောသမ္ဗီ၊ သာဂလာ ဒဠှိကေန စာတိ။

ဝိနီတဝတ္ထု

၁၃၂. တေန ခေါ ပန သမယေန ဆဗ္ဗဂ္ဂိယာ ဘိက္ခူ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိံသု။ တေသံ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ။ ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ ။ ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တံ ဥပ္ပါဒေသိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, စိတ္တုပ္ပါဒေ’’တိ။

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော အာမသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော ဖန္ဒါပေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော ဌာနာ စာဝေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၃၃. တေန ခေါ ပန သမယေန အညတရော ပိဏ္ဍစာရိကော ဘိက္ခု မဟဂ္ဃံ ဥတ္တရတ္ထရဏံ ပဿိတွာ ထေယျစိတ္တံ ဥပ္ပါဒေသိ။ပေ.။ ထေယျစိတ္တော အာမသိ။ပေ.။ ထေယျစိတ္တော ဖန္ဒါပေသိ။ပေ.။ ထေယျစိတ္တော ဌာနာ စာဝေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၃၄. တေန ခေါ ပန သမယေန အညတရော ဘိက္ခု ဒိဝါ ဘဏ္ဍံ ပဿိတွာ နိမိတ္တံ အကာသိ – ‘ရတ္တိံ အဝဟရိဿာမီ’တိ။ သော တံ မညမာနော တံ အဝဟရိ။ပေ.။ တံ မညမာနော အညံ အဝဟရိ။ပေ.။ အညံ မညမာနော တံ အဝဟရိ။ပေ.။ အညံ မညမာနော အညံ အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ ။

တေန ခေါ ပန သမယေန အညတရော ဘိက္ခု ဒိဝါ ဘဏ္ဍံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ။ သော တံ မညမာနော အတ္တနော ဘဏ္ဍံ အဝဟရိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု အညဿ ဘဏ္ဍံ ဟရန္တော သီသေ ဘာရံ ထေယျစိတ္တော အာမသိ။ပေ.။ ထေယျစိတ္တော ဖန္ဒါပေသိ။ပေ.။ ထေယျစိတ္တော ခန္ဓံ ဩရောပေသိ။ပေ.။ ခန္ဓေ ဘာရံ ထေယျစိတ္တော အာမသိ။ပေ.။ ထေယျစိတ္တော ဖန္ဒါပေသိ။ပေ.။ ထေယျစိတ္တော ကဋိံ ဩရောပေသိ။ပေ.။ ကဋိယာ ဘာရံ ထေယျစိတ္တော အာမသိ။ပေ.။ ထေယျစိတ္တော ဖန္ဒါပေသိ။ပေ.။ ထေယျစိတ္တော ဟတ္ထေန အဂ္ဂဟေသိ။ပေ.။ ဟတ္ထေ ဘာရံ ထေယျစိတ္တော ဘူမိယံ နိက္ခိပိ။ပေ.။ ထေယျစိတ္တော ဘူမိတော အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၃၅. တေန ခေါ ပန သမယေန အညတရော ဘိက္ခု အဇ္ဈောကာသေ စီဝရံ ပတ္ထရိတွာ ဝိဟာရံ ပါဝိသိ။ အညတရော ဘိက္ခု – ‘မာယိဒံ စီဝရံ နဿီ’တိ, ပဋိသာမေသိ။ သော နိက္ခမိတွာ တံ ဘိက္ခုံ ပုစ္ဆိ – ‘‘အာဝုသော, မယှံ စီဝရံ ကေန အဝဟဋ’’န္တိ ? သော ဧဝမာဟ – ‘‘မယာ အဝဟဋ’’န္တိ။ ‘‘သော တံ အာဒိယိ, အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။။ ဘဂဝတော ဧတမတ္ထံ အာရောစေသိ။ ‘‘ကိံစိတ္တော တွံ, ဘိက္ခူ’’တိ? ‘‘နိရုတ္တိပထော အဟံ, ဘဂဝါ’’တိ။ ‘‘အနာပတ္တိ, ဘိက္ခု, နိရုတ္တိပထေ’’တိ။

တေန ခေါ ပန သမယေန အညတရော ဘိက္ခု ဣဌေ စီဝရံ နိက္ခိပိတွာ။ ဣဌေ နိသီဒနံ နိက္ခိပိတွာ။ ဟေဋ္ဌာဣဌေ ပတ္တံ နိက္ခိပိတွာ ဝိဟာရံ ပါဝိသိ။ အညတရော ဘိက္ခု – ‘‘မာယံ ပတ္တော နဿီ’’တိ ပဋိသာမေသိ။ သော နိက္ခမိတွာ တံ ဘိက္ခုံ ပုစ္ဆိ – ‘‘အာဝုသော, မယှံ ပတ္တော ကေန အဝဟဋော’’တိ? သော ဧဝမာဟ – ‘‘မယာ အဝဟဋော’’တိ။ ‘‘သော တံ အာဒိယိ, အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နိရုတ္တိပထေ’’တိ။

တေန ခေါ ပန သမယေန အညတရာ ဘိက္ခုနီ ဝတိယာ စီဝရံ ပတ္ထရိတွာ ဝိဟာရံ ပါဝိသိ။ အညတရာ ဘိက္ခုနီ – ‘မာယိဒံ စီဝရံ နဿီ’တိ ပဋိသာမေသိ။ သာ နိက္ခမိတွာ တံ ဘိက္ခုနိံ ပုစ္ဆိ – ‘‘အယျေ, မယှံ စီဝရံ ကေန အဝဟဋ’’န္တိ? သာ ဧဝမာဟ – ‘‘မယာ အဝဟဋ’’န္တိ။ ‘‘သာ တံ အာဒိယိ, အဿမဏီသိ တွ’’န္တိ။ တဿာ ကုက္ကုစ္စံ အဟောသိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘အနာပတ္တိ, ဘိက္ခဝေ, နိရုတ္တိပထေ’’တိ။

၁၃၆. တေန ခေါ ပန သမယေန အညတရော ဘိက္ခု ဝါတမဏ္ဍလိကာယ ဥက္ခိတ္တံ သာဋကံ ပဿိတွာ သာမိကာနံ ဒဿာမီတိ, အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ ဘိက္ခူ’’တိ? ‘‘အထေယျစိတ္တော အဟံ, ဘဂဝါ’’တိ။ အနာပတ္တိ, ဘိက္ခု, အထေယျစိတ္တဿာ’’တိ။

တေန ခေါ ပန သမယေန အညတရော ဘိက္ခု ဝါတမဏ္ဍလိကာယ ဥက္ခိတ္တံ ဝေဌနံ ပဿိတွာ ‘ပုရေ သာမိကာ ပဿန္တီ’တိ ထေယျစိတ္တော အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၃၇. တေန ခေါ ပန သမယေန အညတရော ဘိက္ခု သုသာနံ ဂန္တွာ အဘိန္နေ သရီရေ ပံသုကူလံ အဂ္ဂဟေသိ။ တသ္မိဉ္စ သရီရေ ပေတော အဓိဝတ္ထော ဟောတိ ။ အထ ခေါ သော ပေတော တံ ဘိက္ခုံ ဧတဒဝေါစ – ‘‘မာ, ဘန္တေ, မယှံ သာဋကံ အဂ္ဂဟေသီ’’တိ။ သော ဘိက္ခု အနာဒိယန္တော အဂမာသိ ။ အထ ခေါ တံ သရီရံ ဥဋ္ဌဟိတွာ တဿ ဘိက္ခုနော ပိဋ္ဌိတော ပိဋ္ဌိတော အနုဗန္ဓိ။ အထ ခေါ သော ဘိက္ခု ဝိဟာရံ ပဝိသိတွာ ဒွါရံ ထကေသိ။ အထ ခေါ တံ သရီရံ တတ္ထေဝ ပရိပတိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, အဘိန္နေ သရီရေ ပံသုကူလံ ဂဟေတဗ္ဗံ။ သော ဂဏှေယျ, အာပတ္တိ ဒုက္ကဋဿာ’’တိ။

၁၃၈. တေန ခေါ ပန သမယေန အညတရော ဘိက္ခု သံဃဿ စီဝရေ ဘာဇီယမာနေ ထေယျစိတ္တော ကုသံ သင်္ကာမေတွာ စီဝရံ အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၃၉. တေန ခေါ ပန သမယေန အာယသ္မာ အာနန္ဒေါ ဇန္တာဃရေ အညတရဿ ဘိက္ခုနော အန္တရဝါသကံ အတ္တနော မညမာနော နိဝါသေသိ။ အထ ခေါ သော ဘိက္ခု အာယသ္မန္တံ အာနန္ဒံ ဧတဒဝေါစ – ‘‘ကိဿ မေ တွံ, အာဝုသော အာနန္ဒ, အန္တရဝါသကံ နိဝါသေသီ’’တိ? ‘‘သကသညီ အဟံ, အာဝုသော’’တိ။ ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, သကသညိဿာ’’တိ။

၁၄၀. တေန ခေါ ပန သမယေန သမ္ဗဟုလာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ သီဟဝိဃာသံ ပဿိတွာ ပစာပေတွာ ပရိဘုဉ္ဇိံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, သီဟဝိဃာသေ’’တိ။

တေန ခေါ ပန သမယေန သမ္ဗဟုလာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ ဗျဂ္ဃဝိဃာသံ ပဿိတွာ။ ဒီပိဝိဃာသံ ပဿိတွာ။ တရစ္ဆဝိဃာသံ ပဿိတွာ။ ကောကဝိဃာသံ ပဿိတွာ ပစာပေတွာ ပရိဘုဉ္ဇိံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, တိရစ္ဆာနဂတပရိဂ္ဂဟေ’’တိ။

၁၄၁. တေန ခေါ ပန သမယေန အညတရော ဘိက္ခု သံဃဿ ဩဒနေ ဘာဇီယမာနေ – ‘အပရဿ ဘာဂံ ဒေဟီ’တိ အမူလကံ အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ။

တေန ခေါ ပန သမယေန အညတရော ဘိက္ခု သံဃဿ ခါဒနီယေ ဘာဇိယမာနေ။ သံဃဿ ပူဝေ ဘာဇိယမာနေ။ သံဃဿ ဥစ္ဆုမှိ ဘာဇိယမာနေ။ သံဃဿ တိမ္ဗရူသကေ ဘာဇိယမာနေ – ‘အပရဿ ဘာဂံ ဒေဟီ’တိ အမူလကံ အဂ္ဂဟေသိ။ တဿ ကုက္ကုစ္စံ အဟောသိ။ပေ.။။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ။

၁၄၂. တေန ခေါ ပန သမယေန အညတရော ဘိက္ခု ဒုဗ္ဘိက္ခေ ဩဒနီယဃရံ ပဝိသိတွာ ပတ္တပူရံ ဩဒနံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ဒုဗ္ဘိက္ခေ သူနဃရံ [သူနာဃရံ (သီ. သျာ)] ပဝိသိတွာ ပတ္တပူရံ မံသံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ဒုဗ္ဘိက္ခေ ပူဝဃရံ ပဝိသိတွာ ပတ္တပူရံ ပူဝံ ထေယျစိတ္တော အဝဟရိ။ပေ.။ ပတ္တပူရာ သက္ခလိယော ထေယျစိတ္တော အဝဟရိ။ပေ.။ ပတ္တပူရေ မောဒကေ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၄၃. တေန ခေါ ပန သမယေန အညတရော ဘိက္ခု ဒိဝါ ပရိက္ခါရံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ။ သော တံ မညမာနော တံ အဝဟရိ။ပေ.။ တံ မညမာနော အညံ အဝဟရိ။ပေ.။ အညံ မညမာနော တံ အဝဟရိ။ပေ.။ အညံ မညမာနော အညံ အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ဒိဝါ ပရိက္ခါရံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ။ သော တံ မညမာနော အတ္တနော ပရိက္ခါရံ အဝဟရိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

၁၄၄. တေန ခေါ ပန သမယေန အညတရော ဘိက္ခု ဣဌေ ထဝိကံ ပဿိတွာ – ‘‘ဣတော ဂဏှန္တော ပါရာဇိကော ဘဝိဿာမီ’’တိ သဟ ဣဌကေန သင်္ကာမေတွာ အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သံဃဿ ဘိသိံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၄၅. တေန ခေါ ပန သမယေန အညတရော ဘိက္ခု စီဝရဝံသေ စီဝရံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ဝိဟာရေ စီဝရံ အဝဟရိတွာ – ‘‘ဣတော နိက္ခမန္တော ပါရာဇိကော ဘဝိဿာမီ’’တိ ဝိဟာရာ န နိက္ခမိ။ပေ.။ ဘဂဝတော ဧတမတ္ထံ အာရောစေသုံ။ ‘‘နိက္ခမိ [နိက္ခမေယျ (သီ. သျာ.)] ဝါ သော, ဘိက္ခဝေ, မောဃပုရိသော န ဝါ နိက္ခမိ [နိက္ခမေယျ (သီ. သျာ.)], အာပတ္တိ ပါရာဇိကဿာ’’တိ။

၁၄၆. တေန ခေါ ပန သမယေန ဒွေ ဘိက္ခူ သဟာယကာ ဟောန္တိ။ ဧကော ဘိက္ခု ဂါမံ ပိဏ္ဍာယ ပါဝိသိ။ ဒုတိယော ဘိက္ခု သံဃဿ ခါဒနီယေ ဘာဇီယမာနေ သဟာယကဿ ဘာဂံ ဂဟေတွာ တဿ ဝိဿသန္တော ပရိဘုဉ္ဇိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘ကိံ စိတ္တော တွံ, ဘိက္ခူ’’တိ? ‘‘ဝိဿာသဂ္ဂါဟော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ဝိဿာသဂ္ဂါဟေ’’တိ။

၁၄၇. တေန ခေါ ပန သမယေန သမ္ဗဟုလာ ဘိက္ခူ စီဝရကမ္မံ ကရောန္တိ။ သံဃဿ ခါဒနီယေ ဘာဇီယမာနေ သဗ္ဗေသံ ပဋိဝိသာ အာဟရိတွာ ဥပနိက္ခိတ္တာ ဟောန္တိ။ အညတရော ဘိက္ခု အညတရဿ ဘိက္ခုနော ပဋိဝိသံ အတ္တနော မညမာနော ပရိဘုဉ္ဇိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘သကသညီ အဟံ, ဘဂဝါ’’တိ။ ‘‘အနာပတ္တိ, ဘိက္ခု, သကသညိဿာ’’တိ။

တေန ခေါ ပန သမယေန သမ္ဗဟုလာ ဘိက္ခူ စီဝရကမ္မံ ကရောန္တိ။ သံဃဿ ခါဒနီယေ ဘာဇိယမာနေ အညတရဿ ဘိက္ခုနော ပတ္တေန အညတရဿ ဘိက္ခုနော ပဋိဝိသော အာဟရိတွာ ဥပနိက္ခိတ္တော ဟောတိ။ ပတ္တသာမိကော ဘိက္ခု အတ္တနော မညမာနော ပရိဘုဉ္ဇိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သကသညိဿာ’’တိ။

၁၄၈. တေန ခေါ ပန သမယေန အမ္ဗစောရကာ အမ္ဗံ ပါတေတွာ ဘဏ္ဍိကံ အာဒါယ အဂမံသု။ သာမိကာ တေ စောရကေ အနုဗန္ဓိံသု။ စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု။ ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ဘဂဝတော ဧတမတ္ထံ အာရောစေသုံ။ ‘‘ကိံစိတ္တာ တုမှေ, ဘိက္ခဝေ’’တိ? ‘‘ပံသုကူလသညိနော မယံ, ဘဂဝါ’’တိ။ ‘‘အနာပတ္တိ, ဘိက္ခဝေ, ပံသုကူလသညိဿာ’’တိ။

တေန ခေါ ပန သမယေန ဇမ္ဗုစောရကာ။ လဗုဇစောရကာ။ ပနသစောရကာ။ တာလပက္ကစောရကာ။ ဥစ္ဆုစောရကာ။ တိမ္ဗရူသကစောရကာ တိမ္ဗရူသကေ ဥစ္စိနိတွာ ဘဏ္ဍိကံ အာဒါယ အဂမံသု။ သာမိကာ တေ စောရကေ အနုဗန္ဓိံသု။ စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု။ ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပံသုကူလသညိဿာ’’တိ။

တေန ခေါ ပန သမယေန အမ္ဗစောရကာ အမ္ဗံ ပါတေတွာ ဘဏ္ဍိကံ အာဒါယ အဂမံသု။ သာမိကာ တေ စောရကေ အနုဗန္ဓိံသု။ စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု။ ဘိက္ခူ – ‘ပုရေ သာမိကာ ပဿန္တီ’တိ, ထေယျစိတ္တာ ပရိဘုဉ္ဇိံသု။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန ဇမ္ဗုစောရကာ။ လဗုဇစောရကာ။ ပနသစောရကာ။ တာလပက္ကစောရကာ။ ဥစ္ဆုစောရကာ။ တိမ္ဗရူသကစောရကာ တိမ္ဗရူသကေ ဥစ္စိနိတွာ ဘဏ္ဍိကံ အာဒါယ အဂမံသု။ သာမိကာ တေ စောရကေ အနုဗန္ဓိံသု။ စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု။ ဘိက္ခူ – ‘ပုရေ သာမိကာ ပဿန္တီ’တိ, ထေယျစိတ္တာ ပရိဘုဉ္ဇိံသု။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ဘိက္ခု သံဃဿ အမ္ဗံ ထေယျစိတ္တော အဝဟရိ။ သံဃဿ ဇမ္ဗုံ။ သံဃဿ လဗုဇံ။ သံဃဿ ပနသံ။ သံဃဿ တာလပက္ကံ။ သံဃဿ ဥစ္ဆုံ။ သံဃဿ တိမ္ဗရူသကံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၄၉. တေန ခေါ ပန သမယေန အညတရော ဘိက္ခု ပုပ္ဖာရာမံ ဂန္တွာ ဩစိတံ ပုပ္ဖံ ပဉ္စမာသဂ္ဃနကံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ပုပ္ဖာရာမံ ဂန္တွာ ပုပ္ဖံ ဩစိနိတွာ ပဉ္စမာသဂ္ဃနကံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု အာပန္နော ပါရာဇိက’’န္တိ။

၁၅၀. တေန ခေါ ပန သမယေန အညတရော ဘိက္ခု ဂါမကံ ဂစ္ဆန္တော အညတရံ ဘိက္ခုံ ဧတဒဝေါစ – ‘‘အာဝုသော, တုယှံ ဥပဋ္ဌာကကုလံ ဝုတ္တော ဝဇ္ဇေမီ’’တိ။ သော ဂန္တွာ ဧကံ သာဋကံ အာဟရာပေတွာ အတ္တနာ ပရိဘုဉ္ဇိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ဝုတ္တော ဝဇ္ဇေမီတိ ဝတ္တဗ္ဗော။ ယော ဝဒေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဂါမကံ ဂစ္ဆတိ။ အညတရော ဘိက္ခု တံ ဘိက္ခုံ ဧတဒဝေါစ – ‘‘အာဝုသော, မယှံ ဥပဋ္ဌာကကုလံ ဝုတ္တော ဝဇ္ဇေဟီ’’တိ။ သော ဂန္တွာ ယုဂသာဋကံ အာဟရာပေတွာ ဧကံ အတ္တနာ ပရိဘုဉ္ဇိ, ဧကံ တဿ ဘိက္ခုနော အဒါသိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ဝုတ္တော ဝဇ္ဇေဟီတိ ဝတ္တဗ္ဗော။ ယော ဝဒေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဂါမကံ ဂစ္ဆန္တော အညတရံ ဘိက္ခုံ ဧတဒဝေါစ – ‘‘အာဝုသော, တုယှံ ဥပဋ္ဌာကကုလံ ဝုတ္တော ဝဇ္ဇေမီ’’တိ။ သောပိ ဧဝမာဟ – ‘‘ဝုတ္တော ဝဇ္ဇေဟီ’’တိ။ သော ဂန္တွာ အာဠှကံ သပ္ပိံ တုလံ ဂုဠံ ဒေါဏံ တဏ္ဍုလံ အာဟရာပေတွာ အတ္တနာ ပရိဘုဉ္ဇိ။ သော ဇာနိတွာ တံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ဝုတ္တော ဝဇ္ဇေမီတိ ဝတ္တဗ္ဗော, န စ ဝုတ္တော ဝဇ္ဇေဟီတိ ဝတ္တဗ္ဗော။ ယော ဝဒေယျ, အာပတ္တိ ဒုက္ကဋဿာ’’တိ။

၁၅၁. တေန ခေါ ပန သမယေန အညတရော ပုရိသော မဟဂ္ဃံ မဏိံ အာဒါယ အညတရေန ဘိက္ခုနာ သဒ္ဓိံ အဒ္ဓါနမဂ္ဂပ္ပဋိပန္နော ဟောတိ။ အထ ခေါ သော ပုရိသော သုင်္ကဋ္ဌာနံ ပဿိတွာ တဿ ဘိက္ခုနော အဇာနန္တဿ ထဝိကာယ မဏိံ ပက္ခိပိတွာ သုင်္ကဋ္ဌာနံ အတိက္ကမိတွာ အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, ဇာနာမီ’’တိ။ ‘‘အနာပတ္တိ, ဘိက္ခု, အဇာနန္တဿာ’’တိ။

တေန ခေါ ပန သမယေန အညတရော ပုရိသော မဟဂ္ဃံ မဏိံ အာဒါယ အညတရေန ဘိက္ခုနာ သဒ္ဓိံ အဒ္ဓါနမဂ္ဂပ္ပဋိပန္နော ဟောတိ။ အထ ခေါ သော ပုရိသော သုင်္ကဋ္ဌာနံ ပဿိတွာ ဂိလာနာလယံ ကရိတွာ အတ္တနော ဘဏ္ဍိကံ တဿ ဘိက္ခုနော အဒါသိ။ အထ ခေါ သော ပုရိသော သုင်္ကဋ္ဌာနံ အတိက္ကမိတွာ တံ ဘိက္ခုံ ဧတဒဝေါစ – ‘‘အာဟရ မေ, ဘန္တေ, ဘဏ္ဍိကံ; နာဟံ အကလ္လကော’’တိ။ ‘‘ကိဿ ပန တွံ, အာဝုသော, ဧဝရူပံ အကာသီ’’တိ? အထ ခေါ သော ပုရိသော တဿ ဘိက္ခုနော ဧတမတ္ထံ အာရောစေသိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, ဇာနာမီ’’တိ။ ‘‘အနာပတ္တိ, ဘိက္ခု, အဇာနန္တဿာ’’တိ။

၁၅၂. တေန ခေါ ပန သမယေန အညတရော ဘိက္ခု သတ္ထေန သဒ္ဓိံ အဒ္ဓါနမဂ္ဂပ္ပဋိပန္နော ဟောတိ။ အညတရော ပုရိသော တံ ဘိက္ခုံ အာမိသေန ဥပလာပေတွာ သုင်္ကဋ္ဌာနံ ပဿိတွာ မဟဂ္ဃံ မဏိံ တဿ ဘိက္ခုနော အဒါသိ – ‘‘ဣမံ, ဘန္တေ, မဏိံ သုင်္ကဋ္ဌာနံ အတိက္ကာမေဟီ’’တိ။ အထ ခေါ သော ဘိက္ခု တံ မဏိံ သုင်္ကဋ္ဌာနံ အတိက္ကာမေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၅၃. တေန ခေါ ပန သမယေန အညတရော ဘိက္ခု ပါသေ ဗန္ဓံ သူကရံ ကာရုညေန မုဉ္စိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ကာရုညာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ကာရုညာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ပါသေ ဗန္ဓံ သူကရံ – ‘‘ပုရေ သာမိကာ ပဿန္တီ’’တိ, ထေယျစိတ္တော မုဉ္စိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ပါသေ ဗန္ဓံ မိဂံ ကာရုညေန မုဉ္စိ။ ပါသေ ဗန္ဓံ မိဂံ – ‘‘ပုရေ သာမိကာ ပဿန္တီ’’တိ, ထေယျစိတ္တော မုဉ္စိ ။ ကုမိနေ ဗန္ဓေ မစ္ဆေ ကာရုညေန မုဉ္စိ။ ကုမိနေ ဗန္ဓေ မစ္ဆေ – ‘‘ပုရေ သာမိကာ ပဿန္တီ’’တိ ထေယျစိတ္တော မုဉ္စိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ယာနေ ဘဏ္ဍံ ပဿိတွာ – ‘‘ဣတော ဂဏှန္တော ပါရာဇိကော ဘဝိဿာမီ’’တိ, အတိက္ကမိတွာ ပဝဋ္ဋေတွာ [ပဝတ္တေတွာ (က.)] အဂ္ဂဟေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ , ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု ကုလလေန ဥက္ခိတ္တံ မံသပေသိံ – ‘‘သာမိကာနံ ဒဿာမီ’’တိ အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အထေယျစိတ္တဿာ’’တိ။

တေန ခေါ ပန သမယေန အညတရော ဘိက္ခု ကုလလေန ဥက္ခိတ္တံ မံသပေသိံ – ‘‘ပုရေ သာမိကာ ပဿန္တီ’’တိ, ထေယျစိတ္တော အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၅၄. တေန ခေါ ပန သမယေန မနုဿာ ဥဠုမ္ပံ ဗန္ဓိတွာ အစိရဝတိယာ နဒိယာ ဩသာရေန္တိ။ ဗန္ဓနေ ဆိန္နေ ကဋ္ဌာနိ ဝိပ္ပကိဏ္ဏာနိ အဂမံသု။ ဘိက္ခူ ပံသုကူလသညိနော ဥတ္တာရေသုံ။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပံသုကူလသညိဿာ’’တိ။

တေန ခေါ ပန သမယေန မနုဿာ ဥဠုမ္ပံ ဗန္ဓိတွာ အစိရဝတိယာ နဒိယာ ဩသာရေန္တိ။ ဗန္ဓနေ ဆိန္နေ ကဋ္ဌာနိ ဝိပ္ပကိဏ္ဏာနိ အဂမံသု။ ဘိက္ခူ – ‘‘ပုရေ သာမိကာ ပဿန္တီ’’တိ, ထေယျစိတ္တာ ဥတ္တာရေသုံ။ သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ဂေါပါလကော ရုက္ခေ သာဋကံ အာလဂ္ဂေတွာ ဥစ္စာရံ အဂမာသိ။ အညတရော ဘိက္ခု ပံသုကူလသညီ အဂ္ဂဟေသိ ။ အထ ခေါ သော ဂေါပါလကော တံ ဘိက္ခုံ စောဒေသိ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပံသုကူလသညိဿာ’’တိ။

တေန ခေါ ပန သမယေန အညတရဿ ဘိက္ခုနော နဒိံ တရန္တဿ ရဇကာနံ ဟတ္ထတော မုတ္တံ သာဋကံ ပါဒေ လဂ္ဂံ ဟောတိ။ သော ဘိက္ခု – ‘‘သာမိကာနံ ဒဿာမီ’’တိ အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အထေယျစိတ္တဿာ’’တိ။

တေန ခေါ ပန သမယေန အညတရဿ ဘိက္ခုနော နဒိံ တရန္တဿ ရဇကာနံ ဟတ္ထတော မုတ္တံ သာဋကံ ပါဒေ လဂ္ဂံ ဟောတိ ။ သော ဘိက္ခု – ‘‘ပုရေ သာမိကာ ပဿန္တီ’’တိ, ထေယျစိတ္တော အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၅၅. တေန ခေါ ပန သမယေန အညတရော ဘိက္ခု သပ္ပိကုမ္ဘိံ ပဿိတွာ ထောကံ ထောကံ ပရိဘုဉ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန သမ္ဗဟုလာ ဘိက္ခူ သံဝိဒဟိတွာ အဂမံသု – ‘‘ဘဏ္ဍံ အဝဟရိဿာမာ’’တိ။ ဧကော ဘဏ္ဍံ အဝဟရိ။ တေ ဧဝမာဟံသု – ‘‘န မယံ ပါရာဇိကာ။ ယော အဝဟဋော သော ပါရာဇိကော’’တိ။ ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန သမ္ဗဟုလာ ဘိက္ခူ သံဝိဒဟိတွာ ဘဏ္ဍံ အဝဟရိတွာ ဘာဇေသုံ ။ တေဟိ ဘာဇီယမာနေ ဧကမေကဿ ပဋိဝိသော န ပဉ္စမာသကော ပူရိ။ တေ ဧဝမာဟံသု – ‘‘န မယံ ပါရာဇိကာ’’တိ။ ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ဘိက္ခု သာဝတ္ထိယံ ဒုဗ္ဘိက္ခေ အာပဏိကဿ တဏ္ဍုလမုဋ္ဌိံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သာဝတ္ထိယံ ဒုဗ္ဘိက္ခေ အာပဏိကဿ မုဂ္ဂမုဋ္ဌိံ။ မာသမုဋ္ဌိံ။ တိလမုဋ္ဌိံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု အာပန္နော ပါရာဇိက’’န္တိ။

တေန ခေါ ပန သမယေန သာဝတ္ထိယံ အန္ဓဝနေ စောရကာ ဂါဝိံ ဟန္တွာ မံသံ ခါဒိတွာ သေသကံ ပဋိသာမေတွာ အဂမံသု။ ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု။ စောရကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပံသုကူလသညိဿာ’’တိ။

တေန ခေါ ပန သမယေန သာဝတ္ထိယံ အန္ဓဝနေ စောရကာ သူကရံ ဟန္တွာ မံသံ ခါဒိတွာ သေသကံ ပဋိသာမေတွာ အဂမံသု။ ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု။ စောရကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပံသုကူလသညိဿာ’’တိ။

တေန ခေါ ပန သမယေန အညတရော ဘိက္ခု တိဏက္ခေတ္တံ ဂန္တွာ လူတံ တိဏံ ပဉ္စမာသဂ္ဃနကံ ထေယျစိတ္တော အဝဟရိ။ တဿ ကုက္ကုစ္စံ အဟောသိ ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု တိဏက္ခေတ္တံ ဂန္တွာ တိဏံ လာယိတွာ ပဉ္စမာသဂ္ဃနကံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၅၆. တေန ခေါ ပန သမယေန အာဂန္တုကာ ဘိက္ခူ သံဃဿ အမ္ဗံ ဘာဇာပေတွာ ပရိဘုဉ္ဇိံသု။ အာဝါသိကာ ဘိက္ခူ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ။ တေသံ ကုက္ကုစ္စံ အဟောသိ။ပေ.။ ဘဂဝတော ဧတမတ္ထံ အာရောစေသုံ။ ‘‘ကိံစိတ္တာ တုမှေ, ဘိက္ခဝေ’’တိ? ‘‘ပရိဘောဂတ္ထာယ [ပရိဘောဂတ္ထာ (သီ.)] မယံ ဘဂဝါ’’တိ။ ‘‘အနာပတ္တိ, ဘိက္ခဝေ, ပရိဘောဂတ္ထာယာ’’တိ။

တေန ခေါ ပန သမယေန အာဂန္တုကာ ဘိက္ခူ သံဃဿ ဇမ္ဗုံ။ သံဃဿ လဗုဇံ။ သံဃဿ ပနသံ။ သံဃဿ တာလပက္ကံ။ သံဃဿ ဥစ္ဆုံ။ သံဃဿ တိမ္ဗရူသကံ ဘာဇာပေတွာ ပရိဘုဉ္ဇိံသု။ အာဝါသိကာ ဘိက္ခူ တေ ဘိက္ခူ စောဒေသုံ – ‘‘အဿမဏာတ္ထ, တုမှေ’’တိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပရိဘောဂတ္ထာယာ’’တိ။

တေန ခေါ ပန သမယေန အမ္ဗပါလကာ ဘိက္ခူနံ အမ္ဗဖလံ ဒေန္တိ။ ဘိက္ခူ – ‘‘ဂေါပေတုံ ဣမေ ဣဿရာ, နယိမေ ဒါတု’’န္တိ, ကုက္ကုစ္စာယန္တာ န ပဋိဂ္ဂဏှန္တိ။ ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, ဂေါပကဿ ဒါနေ’’တိ။

တေန ခေါ ပန သမယေန ဇမ္ဗုပါလကာ။ လဗုဇပါလကာ။ ပနသပါလကာ။ တာလပက္ကပါလကာ။ ဥစ္ဆုပါလကာ။ တိမ္ဗရူသကပါလကာ ဘိက္ခူနံ တိမ္ဗရူသကံ ဒေန္တိ။ ဘိက္ခူ – ‘‘ဂေါပေတုံ ဣမေ ဣဿရာ, နယိမေ ဒါတု’’န္တိ, ကုက္ကုစ္စာယန္တာ န ပဋိဂ္ဂဏှန္တိ။ ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, ဂေါပကဿ ဒါနေ’’တိ။

တေန ခေါ ပန သမယေန အညတရော ဘိက္ခု သံဃဿ ဒါရုံ တာဝကာလိကံ ဟရိတွာ အတ္တနော ဝိဟာရဿ ကုဋ္ဋံ ဥပတ္ထမ္ဘေသိ။ ဘိက္ခူ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တဿ ကုက္ကုစ္စံ အဟောသိ။ ဘဂဝတော ဧတမတ္ထံ အာရောစေသိ။ ‘‘ကိံစိတ္တော တွံ, ဘိက္ခူ’’တိ? ‘‘တာဝကာလိကော အဟံ, ဘဂဝါ’’တိ။ ‘‘အနာပတ္တိ, ဘိက္ခု, တာဝကာလိကေ’’တိ။

တေန ခေါ ပန သမယေန အညတရော ဘိက္ခု သံဃဿ ဥဒကံ ထေယျစိတ္တော အဝဟရိ။ သံဃဿ မတ္တိကံ ထေယျစိတ္တော အဝဟရိ။ သံဃဿ ပုဉ္ဇကိတံ တိဏံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သံဃဿ ပုဉ္ဇကိတံ တိဏံ ထေယျစိတ္တော ဈာပေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု သံဃဿ မဉ္စံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု သံဃဿ ဣဌံ။ သံဃဿ ဘိသိံ။ သံဃဿ ဗိဗ္ဗောဟနံ [ဗိမ္ဗောဟနံ (သီ. သျာ.)] ။ သံဃဿ ကဝါဋံ။ သံဃဿ အာလောကသန္ဓိံ။ သံဃဿ ဂေါပါနသိံ ထေယျစိတ္တော အဝဟရိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၁၅၇. [စူဠဝ. ၃၂၄] တေန ခေါ ပန သမယေန ဘိက္ခူ အညတရဿ ဥပါသကဿ ဝိဟာရပရိဘောဂံ သေနာသနံ အညတြ ပရိဘုဉ္ဇန္တိ။ အထ ခေါ သော ဥပါသကော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘဒန္တာ အညတြ ပရိဘောဂံ အညတြ ပရိဘုဉ္ဇိဿန္တီ’’တိ! ဘဂဝတော ဧတမတ္ထံ အာရောစေသုံ။ ‘‘န, ဘိက္ခဝေ, အညတြ ပရိဘောဂေါ အညတြ ပရိဘုဉ္ဇိတဗ္ဗော။ ယော ပရိဘုဉ္ဇေယျ, အာပတ္တိ ဒုက္ကဋဿာ’’တိ။

[စူဠဝ. ၃၂၄] တေန ခေါ ပန သမယေန ဘိက္ခူ ဥပေါသထဂ္ဂမ္ပိ သန္နိသဇ္ဇမ္ပိ ဟရိတုံ ကုက္ကုစ္စာယန္တာ ဆမာယံ နိသီဒန္တိ။ ဂတ္တာနိပိ စီဝရာနိပိ ပံသုကိတာနိ ဟောန္တိ။ ဘဂဝတော ဧတမတ္ထံ အာရောစေသုံ။ ‘‘အနုဇာနာမိ, ဘိက္ခဝေ, တာဝကာလိကံ ဟရိတု’’န္တိ။

တေန ခေါ ပန သမယေန စမ္ပါယံ ထုလ္လနန္ဒါယ ဘိက္ခုနိယာ အန္တေဝါသိနီ ဘိက္ခုနီ ထုလ္လနန္ဒါယ ဘိက္ခုနိယာ ဥပဋ္ဌာကကုလံ ဂန္တွာ – ‘‘အယျာ ဣစ္ဆတိ တေကဋုလယာဂုံ ပါတု’’န္တိ, ပစာပေတွာ ဟရိတွာ အတ္တနာ ပရိဘုဉ္ဇိ။ သာ ဇာနိတွာ တံ စောဒေသိ – ‘‘အဿမဏီသိ တွ’’န္တိ။ တဿာ ကုက္ကုစ္စံ အဟောသိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ။

တေန ခေါ ပန သမယေန ရာဇဂဟေ ထုလ္လနန္ဒါယ ဘိက္ခုနိယာ အန္တေဝါသိနီ ဘိက္ခုနီ ထုလ္လနန္ဒါယ ဘိက္ခုနိယာ ဥပဋ္ဌာကကုလံ ဂန္တွာ – ‘‘အယျာ ဣစ္ဆတိ မဓုဂေါဠကံ ခါဒိတု’’န္တိ, ပစာပေတွာ ဟရိတွာ အတ္တနာ ပရိဘုဉ္ဇိ။ သာ ဇာနိတွာ တံ စောဒေသိ – ‘‘အဿမဏီသိ တွ’’န္တိ။ တဿာ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ။

၁၅၈. တေန ခေါ ပန သမယေန ဝေသာလိယံ အာယသ္မတော အဇ္ဇုကဿ ဥပဋ္ဌာကဿ ဂဟပတိနော ဒွေ ဒါရကာ ဟောန္တိ – ပုတ္တော စ ဘာဂိနေယျော စ။ အထ ခေါ သော ဂဟပတိ အာယသ္မန္တံ အဇ္ဇုကံ ဧတဒဝေါစ – ‘‘ဣမံ, ဘန္တေ, ဩကာသံ ယော ဣမေသံ ဒွိန္နံ ဒါရကာနံ သဒ္ဓေါ ဟောတိ ပသန္နော တဿ အာစိက္ခေယျာသီ’’တိ [အာစိက္ခေယျာသီတိ သော ကာလမကာသိ (သျာ.)]။ တေန ခေါ ပန သမယေန တဿ ဂဟပတိနော ဘာဂိနေယျော သဒ္ဓေါ ဟောတိ ပသန္နော။ အထ ခေါ အာယသ္မာ အဇ္ဇုကော တံ ဩကာသံ တဿ ဒါရကဿ အာစိက္ခိ။ သော တေန သာပတေယျေန ကုဋုမ္ဗဉ္စ သဏ္ဌပေသိ ဒါနဉ္စ ပဋ္ဌပေသိ။ အထ ခေါ တဿ ဂဟပတိနော ပုတ္တော အာယသ္မန္တံ အာနန္ဒံ ဧတဒဝေါစ – ‘‘ကော နု ခေါ, ဘန္တေ အာနန္ဒ, ပိတုနော ဒါယဇ္ဇော – ပုတ္တော ဝါ ဘာဂိနေယျော ဝါ’’တိ? ‘‘ပုတ္တော ခေါ, အာဝုသော, ပိတုနော ဒါယဇ္ဇော’’တိ။ ‘‘အယံ, ဘန္တေ, အယျော အဇ္ဇုကော အမှာကံ သာပတေယျံ အမှာကံ မေထုနကဿ အာစိက္ခီ’’တိ။ ‘‘အဿမဏော, အာဝုသော, အာယသ္မာ အဇ္ဇုကော’’တိ။ အထ ခေါ အာယသ္မာ အဇ္ဇုကော အာယသ္မန္တံ အာနန္ဒံ ဧတဒဝေါစ – ‘‘ဒေဟိ မေ, အာဝုသော အာနန္ဒ, ဝိနိစ္ဆယ’’န္တိ။ တေန ခေါ ပန သမယေန အာယသ္မာ ဥပါလိ အာယသ္မတော အဇ္ဇုကဿ ပက္ခေါ ဟောတိ။ အထ ခေါ အာယသ္မာ ဥပါလိ အာယသ္မန္တံ အာနန္ဒံ ဧတဒဝေါစ – ‘‘ယော နု ခေါ, အာဝုသော အာနန္ဒ, သာမိကေန ‘ဣမံ ဩကာသံ ဣတ္ထန္နာမဿ အာစိက္ခေယျာသီ’တိ ဝုတ္တော တဿ အာစိက္ခတိ, ကိံ သော အာပဇ္ဇတီ’’တိ? ‘‘န, ဘန္တေ, ကိဉ္စိ အာပဇ္ဇတိ, အန္တမသော ဒုက္ကဋမတ္တမ္ပီ’’တိ။ ‘‘အယံ, အာဝုသော, အာယသ္မာ အဇ္ဇုကော သာမိကေန – ‘ဣမံ ဩကာသံ ဣတ္ထန္နာမဿ အာစိက္ခါ’တိ ဝုတ္တော တဿ အာစိက္ခတိ; အနာပတ္တိ, အာဝုသော, အာယသ္မတော အဇ္ဇုကဿာ’’တိ။

၁၅၉. တေန ခေါ ပန သမယေန ဗာရာဏသိယံ အာယသ္မတော ပိလိန္ဒဝစ္ဆဿ ဥပဋ္ဌာကကုလံ စောရေဟိ ဥပဒ္ဒုတံ ဟောတိ။ ဒွေ စ ဒါရကာ နီတာ ဟောန္တိ။ အထ ခေါ အာယသ္မာ ပိလိန္ဒဝစ္ဆော တေ ဒါရကေ ဣဒ္ဓိယာ အာနေတွာ ပါသာဒေ ဌပေသိ။ မနုဿာ တေ ဒါရကေ ပဿိတွာ – ‘‘အယျဿာယံ ပိလိန္ဒဝစ္ဆဿ ဣဒ္ဓါနုဘာဝေါ’’တိ, အာယသ္မန္တေ ပိလိန္ဒဝစ္ဆေ အဘိပ္ပသီဒိံသု။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ပိလိန္ဒဝစ္ဆော စောရေဟိ နီတေ ဒါရကေ အာနေဿတီ’’တိ! ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ [ဣဒ္ဓိမတော (သီ.), ဣဒ္ဓိမန္တဿ (သျာ.)], ဣဒ္ဓိမဿ ဣဒ္ဓိဝိသယေ’’တိ။

၁၆၀. တေန ခေါ ပန သမယေန ဒွေ ဘိက္ခူ သဟာယကာ ဟောန္တိ – ပဏ္ဍုကော စ ကပိလော စ။ ဧကော ဂါမကေ ဝိဟရတိ, ဧကော ကောသမ္ဗိယံ။ အထ ခေါ တဿ ဘိက္ခုနော ဂါမကာ ကောသမ္ဗိံ ဂစ္ဆန္တဿ အန္တရာမဂ္ဂေ နဒိံ တရန္တဿ သူကရိကာနံ ဟတ္ထတော မုတ္တာ မေဒဝဋ္ဋိ ပါဒေ လဂ္ဂါ ဟောတိ။ သော ဘိက္ခု – ‘‘သာမိကာနံ ဒဿာမီ’’တိ အဂ္ဂဟေသိ။ သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ။ တံ ဥတ္တိဏ္ဏံ ဂေါပါလိကာ [အညတရာ ဂေါပါလိကာ (သီ. သျာ.)] ပဿိတွာ ဧတဒဝေါစ – ‘‘ဧဟိ, ဘန္တေ, မေထုနံ ဓမ္မံ ပဋိသေဝါ’’တိ။ သော – ‘‘ပကတိယာပါဟံ အဿမဏော’’တိ တဿာ မေထုနံ ဓမ္မံ ပဋိသေဝိတွာ ကောသမ္ဗိံ ဂန္တွာ ဘိက္ခူနံ ဧတမတ္ထံ အာရောစေသိ။ ဘိက္ခူ ဘဂဝတော ဧတမတ္ထံ ဩရောစေသုံ။ ‘‘အနာပတ္တိ, ဘိက္ခဝေ, အဒိန္နာဒါနေ ပါရာဇိကဿ; အာပတ္တိ မေထုနဓမ္မသမာယောဂေ ပါရာဇိကဿာ’’တိ။

၁၆၁. တေန ခေါ ပန သမယေန သာဂလာယံ အာယသ္မတော ဒဠှိကဿ သဒ္ဓိဝိဟာရိကော ဘိက္ခု အနဘိရတိယာ ဣဠိတော အာပဏိကဿ ဝေဌနံ အဝဟရိတွာ အာယသ္မန္တံ ဒဠှိကံ ဧတဒဝေါစ – ‘‘အဿမဏော အဟံ, ဘန္တေ, ဝိဗ္ဘမိဿာမီ’’တိ။ ‘‘ကိံ တယာ, အာဝုသော, ကတ’’န္တိ? သော တမတ္ထံ အာရောစေသိ။ အာဟရာပေတွာ အဂ္ဃါပေသိ။ တံ အဂ္ဃါပေန္တံ န ပဉ္စမာသကေ အဂ္ဃတိ ။ ‘‘အနာပတ္တိ, အာဝုသော, ပါရာဇိကဿာ’’တိ။ ဓမ္မကထံ အကာသိ။ သော ဘိက္ခု အဘိရမတီတိ [အဘိရမီတိ (သီ. သျာ.)]။

ဒုတိယပါရာဇိကံ သမတ္တံ။

၃. တတိယပါရာဇိကံ

၁၆၂. [ဣဒံ ဝတ္ထု သံ. နိ. ၅.၉၈၅] တေန သမယေန ဗုဒ္ဓေါ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ။ တေန ခေါ ပန သမယေန ဘဂဝါ ဘိက္ခူနံ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိဿ အာဒိဿ အသုဘသမာပတ္တိယာ ဝဏ္ဏံ ဘာသတိ။ အထ ခေါ ဘဂဝါ ဘိက္ခူ အာမန္တေသိ – ‘‘ဣစ္ဆာမဟံ, ဘိက္ခဝေ, အဒ္ဓမာသံ ပဋိသလ္လီယိတုံ။ နမှိ ကေနစိ ဥပသင်္ကမိတဗ္ဗော, အညတြ ဧကေန ပိဏ္ဍပါတနီဟာရကေနာ’’တိ။ ‘‘ဧဝံ, ဘန္တေ’’တိ, ခေါ တေ ဘိက္ခူ ဘဂဝတော ပဋိဿုဏိတွာ နာဿုဓ ကောစိ ဘဂဝန္တံ ဥပသင်္ကမတိ, အညတြ ဧကေန ပိဏ္ဍပါတနီဟာရကေန။ ဘိက္ခူ – ‘‘ဘဂဝါ ခေါ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိဿ အာဒိဿ အသုဘသမာပတ္တိယာ ဝဏ္ဏံ ဘာသတီ’’တိ (တေ) [( ) (?) ဧဝမုပရိပိ ဤဒိသေသု ဌာနေသု] အနေကာကာရဝေါကာရံ အသုဘဘာဝနာနုယောဂမနုယုတ္တာ ဝိဟရန္တိ။ တေ သကေန ကာယေန အဋ္ဋီယန္တိ ဟရာယန္တိ ဇိဂုစ္ဆန္တိ။ သေယျထာပိ နာမ ဣတ္ထီ ဝါ ပုရိသော ဝါ ဒဟရော ယုဝါ မဏ္ဍနကဇာတိကော သီသံနှာတော အဟိကုဏပေန ဝါ ကုက္ကုရကုဏပေန ဝါ မနုဿကုဏပေန ဝါ ကဏ္ဌေ အာသတ္တေန အဋ္ဋီယေယျ ဟရာယေယျ ဇိဂုစ္ဆေယျ, ဧဝမေဝ တေ ဘိက္ခူ သကေန ကာယေန အဋ္ဋီယန္တာ ဟရာယန္တာ ဇိဂုစ္ဆန္တာ အတ္တနာပိ အတ္တာနံ ဇီဝိတာ ဝေါရောပေန္တိ, အညမညမ္ပိ ဇီဝိတာ ဝေါရောပေန္တိ, မိဂလဏ္ဍိကမ္ပိ သမဏကုတ္တကံ ဥပသင်္ကမိတွာ ဧဝံ ဝဒန္တိ – ‘‘သာဓု နော, အာဝုသော, ဇီဝိတာ ဝေါရောပေဟိ ။ ဣဒံ တေ ပတ္တစီဝရံ ဘဝိဿတီ’’တိ။ အထ ခေါ မိဂလဏ္ဍိကော သမဏကုတ္တကော ပတ္တစီဝရေဟိ ဘဋော သမ္ဗဟုလေ ဘိက္ခူ ဇီဝိတာ ဝေါရောပေတွာ လောဟိတကံ [လောဟိတဂတံ (က.)] အသိံ အာဒါယ ယေန ဝဂ္ဂမုဒါ နဒီ တေနုပသင်္ကမိ။

၁၆၃. အထ ခေါ မိဂလဏ္ဍိကဿ သမဏကုတ္တကဿ လောဟိတကံ တံ အသိံ ဓေါဝန္တဿ အဟုဒေဝ ကုက္ကုစ္စံ အဟု ဝိပ္ပဋိသာရော – ‘‘အလာဘာ ဝတ မေ, န ဝတ မေ လာဘာ; ဒုလ္လဒ္ဓံ ဝတ မေ, န ဝတ မေ သုလဒ္ဓံ ။ ဗဟုံ ဝတ မယာ အပုညံ ပသုတံ, ယောဟံ ဘိက္ခူ သီလဝန္တေ ကလျာဏဓမ္မေ ဇီဝိတာ ဝေါရောပေသိ’’န္တိ။ အထ ခေါ အညတရာ မာရကာယိကာ ဒေဝတာ အဘိဇ္ဇမာနေ ဥဒကေ အာဂန္တွာ မိဂလဏ္ဍိကံ သမဏကုတ္တကံ ဧတဒဝေါစ – ‘‘သာဓု သာဓု သပ္ပုရိသ, လာဘာ တေ သပ္ပုရိသ, သုလဒ္ဓံ တေ သပ္ပုရိသ။ ဗဟုံ တယာ သပ္ပုရိသ ပုညံ ပသုတံ, ယံ တွံ အတိဏ္ဏေ တာရေသီ’’တိ။ အထ ခေါ မိဂလဏ္ဍိကော သမဏကုတ္တကော – ‘‘လာဘာ ကိရ မေ, သုလဒ္ဓံ ကိရ မေ, ဗဟုံ ကိရ မယာ ပုညံ ပသုတံ, အတိဏ္ဏော ကိရာဟံ တာရေမီ’’တိ တိဏှံ အသိံ အာဒါယ ဝိဟာရေန ဝိဟာရံ ပရိဝေဏေန ပရိဝေဏံ ဥပသင်္ကမိတွာ ဧဝံ ဝဒေတိ – ‘‘ကော အတိဏ္ဏော, ကံ တာရေမီ’’တိ? တတ္ထ ယေ တေ ဘိက္ခူ အဝီတရာဂါ တေသံ တသ္မိံ သမယေ ဟောတိယေဝ ဘယံ ဟောတိ ဆမ္ဘိတတ္တံ ဟောတိ လောမဟံသော။ ယေ ပန တေ ဘိက္ခူ ဝီတရာဂါ တေသံ တသ္မိံ သမယေ န ဟောတိ ဘယံ န ဟောတိ ဆမ္ဘိတတ္တံ န ဟောတိ လောမဟံသော။ အထ ခေါ မိဂလဏ္ဍိကော သမဏကုတ္တကော ဧကမ္ပိ ဘိက္ခုံ ဧကာဟေန ဇီဝိတာ ဝေါရောပေသိ, ဒွေပိ ဘိက္ခူ ဧကာဟေန ဇီဝိတာ ဝေါရောပေသိ, တယောပိ ဘိက္ခူ ဧကာဟေန ဇီဝိတာ ဝေါရောပေသိ, စတ္တာရောပိ ဘိက္ခူ ဧကာဟေန ဇီဝိတာ ဝေါရောပေသိ, ပဉ္စပိ ဘိက္ခူ ဧကာဟေန ဇီဝိတာ ဝေါရောပေသိ, ဒသပိ ဘိက္ခူ ဧကာဟေန ဇီဝိတာ ဝေါရောပေသိ, ဝီသမ္ပိ ဘိက္ခူ ဧကာဟေန ဇီဝိတာ ဝေါရောပေသိ, တိံသမ္ပိ ဘိက္ခူ ဧကာဟေန ဇီဝိတာ ဝေါရောပေသိ, စတ္တာလီသမ္ပိ ဘိက္ခူ ဧကာဟေန ဇီဝိတာ ဝေါရောပေသိ, ပညာသမ္ပိ ဘိက္ခူ ဧကာဟေန ဇီဝိတာ ဝေါရောပေသိ, သဋ္ဌိမ္ပိ ဘိက္ခူ ဧကာဟေန ဇီဝိတာ ဝေါရောပေသိ။

၁၆၄. အထ ခေါ ဘဂဝါ တဿ အဒ္ဓမာသဿ အစ္စယေန ပဋိသလ္လာနာ ဝုဋ္ဌိတော အာယသ္မန္တံ အာနန္ဒံ အာမန္တေသိ – ‘‘ကိံ နု ခေါ, အာနန္ဒ, တနုဘူတော ဝိယ ဘိက္ခုသံဃော’’တိ? ‘‘တထာ ဟိ ပန, ဘန္တေ, ဘဂဝါ ဘိက္ခူနံ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိဿ အာဒိဿ အသုဘသမာပတ္တိယာ ဝဏ္ဏံ ဘာသတိ။ တေ စ, ဘန္တေ, ဘိက္ခူ – ‘ဘဂဝါ ခေါ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိဿ အာဒိဿ အသုဘသမာပတ္တိယာ ဝဏ္ဏံ ဘာသတီ’တိ, တေ အနေကာကာရဝေါကာရံ အသုဘဘာဝနာနုယောဂမနုယုတ္တာ ဝိဟရန္တိ။ တေ သကေန ကာယေန အဋ္ဋီယန္တိ ဟရာယန္တိ ဇိဂုစ္ဆန္တိ။ သေယျထာပိ နာမ ဣတ္ထီ ဝါ ပုရိသော ဝါ ဒဟရော ယုဝါ မဏ္ဍနကဇာတိကော သီသံနှာတော အဟိကုဏပေန ဝါ ကုက္ကုရကုဏပေန ဝါ မနုဿကုဏပေန ဝါ ကဏ္ဌေ အာသတ္တေန အဋ္ဋီယေယျ ဟရာယေယျ ဇိဂုစ္ဆေယျ, ဧဝမေဝ တေ ဘိက္ခူ သကေန ကာယေန အဋ္ဋီယန္တာ ဟရာယန္တာ ဇိဂုစ္ဆန္တာ အတ္တနာပိ အတ္တာနံ ဇီဝိတာ ဝေါရောပေန္တိ, အညမညမ္ပိ ဇီဝိတာ ဝေါရောပေန္တိ, မိဂလဏ္ဍိကမ္ပိ သမဏကုတ္တကံ ဥပသင်္ကမိတွာ ဧဝံ ဝဒန္တိ – ‘သာဓု နော, အာဝုသော, ဇီဝိတာ ဝေါရောပေဟိ။ ဣဒံ တေ ပတ္တစီဝရံ ဘဝိဿတီ’တိ။ အထ ခေါ, ဘန္တေ, မိဂလဏ္ဍိကော သမဏကုတ္တကော ပတ္တစီဝရေဟိ ဘဋော ဧကမ္ပိ ဘိက္ခုံ ဧကာဟေန ဇီဝိတာ ဝေါရောပေသိ။ပေ.။ သဋ္ဌိမ္ပိ ဘိက္ခူ ဧကာဟေန ဇီဝိတာ ဝေါရောပေသိ။ သာဓု, ဘန္တေ, ဘဂဝါ အညံ ပရိယာယံ အာစိက္ခတု ယထာယံ ဘိက္ခုသံဃော အညာယ သဏ္ဌဟေယျာ’’တိ။ ‘‘တေနဟာနန္ဒ, ယာဝတိကာ ဘိက္ခူ ဝေသာလိံ ဥပနိဿာယ ဝိဟရန္တိ တေ သဗ္ဗေ ဥပဋ္ဌာနသာလာယံ သန္နိပါတေဟီ’’တိ ။ ‘‘ဧဝံ, ဘန္တေ’’တိ, ခေါ အာယသ္မာ အာနန္ဒေါ ဘဂဝတော ပဋိဿုဏိတွာ ယာဝတိကာ ဘိက္ခူ ဝေသာလိံ ဥပနိဿာယ ဝိဟရန္တိ တေ သဗ္ဗေ ဥပဋ္ဌာနသာလာယံ သန္နိပါတေတွာ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ ဧတဒဝေါစ – ‘‘သန္နိပတိတော, ဘန္တေ ဘိက္ခုသံဃော; ယဿ ဒါနိ, ဘန္တေ, ဘဂဝါ ကာလံ မညတီ’’တိ။

၁၆၅. အထ ခေါ ဘဂဝါ ယေန ဥပဋ္ဌာနသာလာ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ နိသဇ္ဇ ခေါ ဘဂဝါ ဘိက္ခူ အာမန္တေသိ – ‘‘အယမ္ပိ ခေါ, ဘိက္ခဝေ, အာနာပါနဿတိသမာဓိ ဘာဝိတော ဗဟုလီကတော သန္တော စေဝ ပဏီတော စ အသေစနကော စ သုခေါ စ ဝိဟာရော ဥပ္ပန္နုပ္ပန္နေ စ ပါပကေ အကုသလေ ဓမ္မေ ဌာနသော အန္တရဓါပေတိ ဝူပသမေတိ။ သေယျထာပိ, ဘိက္ခဝေ, ဂိမှာနံ ပစ္ဆိမေ မာသေ ဥဟတံ [ဦဟတံ (က.)] ရဇောဇလ္လံ တမေနံ မဟာ အကာလမေဃော ဌာနသော အန္တရဓါပေတိ ဝူပသမေတိ, ဧဝမေဝ ခေါ, ဘိက္ခဝေ, အာနာပါနဿတိသမာဓိ ဘာဝိတော ဗဟုလီကတော သန္တော စေဝ ပဏီတော စ အသေစနကော စ သုခေါ စ ဝိဟာရော ဥပ္ပန္နုပ္ပန္နေ စ ပါပကေ အကုသလေ ဓမ္မေ ဌာနသော အန္တရဓါပေတိ ဝူပသမေတိ။ ကထံ ဘာဝိတော စ, ဘိက္ခဝေ, အာနာပါနဿတိသမာဓိ ကထံ ဗဟုလီကတော သန္တော စေဝ ပဏီတော စ အသေစနကော စ သုခေါ စ ဝိဟာရော ဥပ္ပန္နုပ္ပန္နေ စ ပါပကေ အကုသလေ ဓမ္မေ ဌာနသော အန္တရဓါပေတိ ဝူပသမေတိ? ဣဓ, ဘိက္ခဝေ, ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ နိသီဒတိ ပလ္လင်္ကံ အာဘုဇိတွာ ဥဇုံ ကာယံ ပဏိဓါယ ပရိမုခံ သတိံ ဥပဋ္ဌပေတွာ။ သော သတောဝ အဿသတိ သတော ပဿသတိ။ ဒီဃံ ဝါ အဿသန္တော ဒီဃံ အဿသာမီတိ ပဇာနာတိ, ဒီဃံ ဝါ ပဿသန္တော ဒီဃံ ပဿသာမီတိ ပဇာနာတိ။ ရဿံ ဝါ အဿသန္တော ရဿံ အဿသာမီတိ ပဇာနာတိ, ရဿံ ဝါ ပဿသန္တော ရဿံ ပဿသာမီတိ ပဇာနာတိ။ သဗ္ဗကာယပ္ပဋိသံဝေဒီ အဿသိဿာမီတိ သိက္ခတိ။ သဗ္ဗကာယပ္ပဋိသံဝေဒီ ပဿသိဿာမီတိ သိက္ခတိ။ ပဿမ္ဘယံ ကာယသင်္ခါရံ အဿသိဿာမီတိ သိက္ခတိ။ ပဿမ္ဘယံ ကာယသင်္ခါရံ ပဿသိဿာမီတိ သိက္ခတိ။ ဣတိပ္ပဋိသံဝေဒီ အဿသိဿာမီတိ သိက္ခတိ။ ဣတိပ္ပဋိသံဝေဒီ ပဿသိဿာမီတိ သိက္ခတိ။ သုခပ္ပဋိသံဝေဒီ အဿသိဿာမီတိ သိက္ခတိ။ သုခပ္ပဋိသံဝေဒီ ပဿသိဿာမီတိ သိက္ခတိ။ စိတ္တသင်္ခါရပ္ပဋိသံဝေဒီ အဿသိဿာမီတိ သိက္ခတိ။ စိတ္တသင်္ခါရပ္ပဋိသံဝေဒီ ပဿသိဿာမီတိ သိက္ခတိ။ ပဿမ္ဘယံ စိတ္တသင်္ခါရံ အဿသိဿာမီတိ သိက္ခတိ။ ပဿမ္ဘယံ စိတ္တသင်္ခါရံ ပဿသိဿာမီတိ သိက္ခတိ။ စိတ္တပ္ပဋိသံဝေဒီ အဿသိဿာမီတိ သိက္ခတိ။ စိတ္တပ္ပဋိသံဝေဒီ ပဿသိဿာမီတိ သိက္ခတိ။ အဘိပ္ပမောဒယံ စိတ္တံ။ပေ.။ သမာဒဟံ စိတ္တံ။ပေ.။ ဝိမောစယံ စိတ္တံ။ပေ.။ အနိစ္စာနုပဿီ။ပေ.။ ဝိရာဂါနုပဿီ။ပေ.။ နိရောဓါနုပဿီ။ပေ.။ ပဋိနိဿဂ္ဂါနုပဿီ အဿသိဿာမီတိ သိက္ခတိ။ ပဋိနိဿဂ္ဂါနုပဿီ ပဿသိဿာမီတိ သိက္ခတိ။ ဧဝံ ဘာဝိတော ခေါ, ဘိက္ခဝေ, အာနာပါနဿတိသမာဓိ ဧဝံ ဗဟုလီကတော သန္တော စေဝ ပဏီတော စ အသေစနကော စ သုခေါ စ ဝိဟာရော ဥပ္ပန္နုပ္ပန္နေ စ ပါပကေ အကုသလေ ဓမ္မေ ဌာနသော အန္တရဓါပေတိ ဝူပသမေတီ’’တိ။

၁၆၆. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, ဘိက္ခူ အတ္တနာပိ အတ္တာနံ ဇီဝိတာ ဝေါရောပေန္တိ, အညမညမ္ပိ ဇီဝိတာ ဝေါရောပေန္တိ မိဂလဏ္ဍိကမ္ပိ သမဏကုတ္တကံ ဥပသင်္ကမိတွာ ဧဝံ ဝဒန္တိ – ‘သာဓု နော, အာဝုသော , ဇီဝိတာ ဝေါရောပေဟိ, ဣဒံ တေ ပတ္တစီဝရံ ဘဝိဿတီ’’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, ဘိက္ခဝေ, တေသံ ဘိက္ခူနံ အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တေ, ဘိက္ခဝေ, ဘိက္ခူ အတ္တနာပိ အတ္တာနံ ဇီဝိတာ ဝေါရောပေဿန္တိ, အညမညမ္ပိ ဇီဝိတာ ဝေါရောပေဿန္တိ, မိဂလဏ္ဍိကမ္ပိ သမဏကုတ္တကံ ဥပသင်္ကမိတွာ ဧဝံ ဝက္ခန္တိ – ‘သာဓု နော, အာဝုသော, ဇီဝိတာ ဝေါရောပေဟိ, ဣဒံ တေ ပတ္တစီဝရံ ဘဝိဿတီ’တိ။ နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၁၆၇. ‘‘ယော ပန ဘိက္ခု သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေယျ သတ္ထဟာရကံ ဝါဿ ပရိယေသေယျ, အယမ္ပိ ပါရာဇိကော ဟောတိ အသံဝါသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၁၆၈. တေန ခေါ ပန သမယေန အညတရော ဥပါသကော ဂိလာနော ဟောတိ။ တဿ ပဇာပတိ အဘိရူပါ ဟောတိ ဒဿနီယာ ပါသာဒိကာ။ ဆဗ္ဗဂ္ဂိယာ ဘိက္ခူ တဿာ ဣတ္ထိယာ ပဋိဗဒ္ဓစိတ္တာ ဟောန္တိ။ အထ ခေါ ဆဗ္ဗဂ္ဂိယာနံ ဘိက္ခူနံ ဧတဒဟောသိ – ‘‘သစေ ခေါ သော, အာဝုသော , ဥပါသကော ဇီဝိဿတိ န မယံ တံ ဣတ္ထိံ လဘိဿာမ။ ဟန္ဒ မယံ, အာဝုသော, တဿ ဥပါသကဿ မရဏဝဏ္ဏံ သံဝဏ္ဏေမာ’’တိ။ အထ ခေါ ဆဗ္ဗဂ္ဂိယာ ဘိက္ခူ ယေန သော ဥပါသကော တေနုပသင်္ကမိံသု; ဥပသင်္ကမိတွာ တံ ဥပါသကံ ဧတဒဝေါစုံ – ‘‘တွံ ခေါသိ, ဥပါသက, ကတကလျာဏော ကတကုသလော ကတဘီရုတ္တာဏော အကတပါပေါ အကတလုဒ္ဒေါ အကတကိဗ္ဗိသော။ ကတံ တယာ ကလျာဏံ, အကတံ တယာ ပါပံ ။ ကိံ တုယှိမိနာ ပါပကေန ဒုဇ္ဇီဝိတေန! မတံ တေ ဇီဝိတာ သေယျော။ ဣတော တွံ ကာလင်္ကတော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿသိ။ တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေဿသီ’’တိ။

၁၆၉. အထ ခေါ သော ဥပါသကော – ‘‘သစ္စံ ခေါ အယျာ အာဟံသု။ အဟဉှိ ကတကလျာဏော ကတကုသလော ကတဘီရုတ္တာဏော အကတပါပေါ အကတလုဒ္ဒေါ အကတကိဗ္ဗိသော။ ကတံ မယာ ကလျာဏံ, အကတံ မယာ ပါပံ ။ ကိံ မယှိမိနာ ပါပကေန ဒုဇ္ဇီဝိတေန! မတံ မေ ဇီဝိတာ သေယျော။ ဣတော အဟံ ကာလင်္ကတော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿာမိ။ တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေဿာမီ’’တိ, သော အသပ္ပါယာနိ စေဝ ဘောဇနာနိ ဘုဉ္ဇိ အသပ္ပါယာနိ စ ခါဒနီယာနိ ခါဒိ အသပ္ပါယာနိ စ သာယနီယာနိ သာယိ အသပ္ပါယာနိ စ ပါနာနိ ပိဝိ။ တဿ အသပ္ပါယာနိ စေဝ ဘောဇနာနိ ဘုဉ္ဇတော အသပ္ပါယာနိ စ ခါဒနီယာနိ ခါဒတော အသပ္ပါယာနိ စ သာယနီယာနိ သာယတော အသပ္ပါယာနိ စ ပါနာနိ ပိဝတော ခရော အာဗာဓေါ ဥပ္ပဇ္ဇိ။ သော တေနေဝ အာဗာဓေန ကာလမကာသိ။ တဿ ပဇာပတိ ဥဇ္ဈာယတိ ခိယျတိ ဝိပါစေတိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ ဣမေ ဟိ နာမ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ နတ္ထိ ဣမေသံ ဗြဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗြဟ္မညံ, ကုတော ဣမေသံ သာမညံ ကုတော ဣမေသံ ဗြဟ္မညံ, အပဂတာ ဣမေ သာမညာ အပဂတာ ဣမေ ဗြဟ္မညာ။ ဣမေ မေ သာမိကဿ မရဏဝဏ္ဏံ သံဝဏ္ဏေသုံ။ ဣမေဟိ မေ သာမိကော မာရိတော’’တိ။ အညေပိ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ ဣမေ ဟိ နာမ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ နတ္ထိ ဣမေသံ ဗြဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗြဟ္မညံ, ကုတော ဣမေသံ သာမညံ ကုတော ဣမေသံ ဗြဟ္မညံ, အပဂတာ ဣမေ သာမညာ အပဂတာ ဣမေ ဗြဟ္မညာ။ ဣမေ ဥပါသကဿ မရဏဝဏ္ဏံ သံဝဏ္ဏေသုံ။ ဣမေဟိ ဥပါသကော မာရိတော’’တိ။ အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဥပါသကဿ မရဏဝဏ္ဏံ သံဝဏ္ဏိဿန္တီ’’တိ!

၁၇၀. အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမှေ, ဘိက္ခဝေ, ဥပါသကဿ မရဏဝဏ္ဏံ သံဝဏ္ဏေထာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသာ, အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တုမှေ, မောဃပုရိသာ, ဥပါသကဿ မရဏဝဏ္ဏံ သံဝဏ္ဏိဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၁၇၁. ‘‘ယော ပန ဘိက္ခု သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေယျ သတ္ထဟာရကံ ဝါဿ ပရိယေသေယျ မရဏဝဏ္ဏံ ဝါ သံဝဏ္ဏေယျ မရဏာယ ဝါ သမာဒပေယျ – ‘အမ္ဘော ပုရိသ, ကိံ တုယှိမိနာ ပါပကေန ဒုဇ္ဇီဝိတေန, မတံ တေ ဇီဝိတာ သေယျော’တိ, ဣတိ စိတ္တမနော စိတ္တသင်္ကပ္ပေါ အနေကပရိယာယေန မရဏဝဏ္ဏံ ဝါ သံဝဏ္ဏေယျ, မရဏာယ ဝါ သမာဒပေယျ, အယမ္ပိ ပါရာဇိကော ဟောတိ အသံဝါသော’’တိ။

၁၇၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

သဉ္စိစ္စာတိ ဇာနန္တော သဉ္ဇာနန္တော စေစ္စ အဘိဝိတရိတွာ ဝီတိက္ကမော။

မနုဿဝိဂ္ဂဟော နာမ ယံ မာတုကုစ္ဆိသ္မိံ ပဌမံ စိတ္တံ ဥပ္ပန္နံ ပဌမံ ဝိညာဏံ ပါတုဘူတံ, ယာဝ မရဏကာလာ ဧတ္ထန္တရေ ဧသော မနုဿဝိဂ္ဂဟော နာမ။

ဇီဝိတာ ဝေါရောပေယျာတိ ဇီဝိတိန္ဒြိယံ ဥပစ္ဆိန္ဒတိ ဥပရောဓေတိ သန္တတိံ ဝိကောပေတိ။

သတ္ထဟာရကံ ဝါဿ ပရိယေသေယျာတိ အသိံ ဝါ သတ္တိံ ဝါ ဘေဏ္ဍိံ ဝါ [ဘေန္ဒိံ ဝါ (က.)] လဂုဠံ ဝါ [သူလံဝါ လဂုဠံဝါ (သျာ.)] ပါသာဏံ ဝါ သတ္ထံ ဝါ ဝိသံ ဝါ ရဇ္ဇုံ ဝါ။

မရဏဝဏ္ဏံ ဝါ သံဝဏ္ဏေယျာတိ ဇီဝိတေ အာဒီနဝံ ဒဿေတိ, မရဏေ ဝဏ္ဏံ ဘဏတိ။

မရဏာယ ဝါ သမာဒပေယျာတိ သတ္ထံ ဝါ အာဟရ, ဝိသံ ဝါ ခါဒ, ရဇ္ဇုယာ ဝါ ဥဗ္ဗန္ဓိတွာ ကာလင်္ကရောဟီတိ။

အမ္ဘော ပုရိသာတိ အာလပနာဓိဝစနမေတံ။

ကိံ တုယှိမိနာ ပါပကေန ဒုဇ္ဇီဝိတေနာတိ ပါပကံ နာမ ဇီဝိတံ အဍ္ဎာနံ ဇီဝိတံ ဥပါဒါယ ဒလိဒ္ဒါနံ ဇီဝိတံ ပါပကံ လာမကံ, သဓနာနံ ဇီဝိတံ ဥပါဒါယ အဓနာနံ ဇီဝိတံ ပါပကံ, ဒေဝါနံ ဇီဝိတံ ဥပါဒါယ မနုဿာနံ ဇီဝိတံ ပါပကံ ။

ဒုဇ္ဇီဝိတံ နာမ ဟတ္ထစ္ဆိန္နဿ ပါဒစ္ဆိန္နဿ ဟတ္ထပါဒစ္ဆိန္နဿ ကဏ္ဏစ္ဆိန္နဿ နာသစ္ဆိန္နဿ ကဏ္ဏနာသစ္ဆိန္နဿ, ဣမိနာ စ ပါပကေန ဣမိနာ စ ဒုဇ္ဇီဝိတေန မတံ တေ ဇီဝိတာ သေယျောတိ။

ဣတိ စိတ္တမနောတိ ယံ စိတ္တံ တံ မနော, ယံ မနော တံ စိတ္တံ။

စိတ္တသင်္ကပ္ပေါတိ မရဏသညီ မရဏစေတနော မရဏာဓိပ္ပါယော။

အနေကပရိယာယေနာတိ ဥစ္စာဝစေဟိ အာကာရေဟိ။

မရဏဝဏ္ဏံ ဝါ သံဝဏ္ဏေယျာတိ ဇီဝိတေ အာဒီနဝံ ဒဿေတိ, မရဏေ ဝဏ္ဏံ ဘဏတိ – ‘‘ဣတော တွံ ကာလင်္ကတော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇိဿသိ, တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင်္ဂီဘူတော ပရိစာရေဿသီ’’တိ။

မရဏာယ ဝါ သမာဒပေယျာတိ သတ္ထံ ဝါ အာဟရ, ဝိသံ ဝါ ခါဒ, ရဇ္ဇုယာ ဝါ ဥဗ္ဗန္ဓိတွာ ကာလင်္ကရောဟိ, သောဗ္ဘေ ဝါ နရကေ ဝါ ပပါတေ ဝါ ပပတာတိ။

အယမ္ပီတိ ပုရိမေ ဥပါဒါယ ဝုစ္စတိ။

ပါရာဇိကော ဟောတီတိ သေယျထာပိ နာမ ပုထုသိလာ ဒွိဓါ ဘိန္နာ [ဒွေဓါ ဘိန္နာ (သျာ.)] အပ္ပဋိသန္ဓိကာ ဟောတိ, ဧဝမေဝ ဘိက္ခု သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေတွာ အဿမဏော ဟောတိ အသကျပုတ္တိယော။ တေန ဝုစ္စတိ – ‘ပါရာဇိကော ဟောတီ’တိ။

အသံဝါသောတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ – ဧသော သံဝါသော နာမ။ သော တေန သဒ္ဓိံ နတ္ထိ, တေန ဝုစ္စတိ အသံဝါသောတိ။

၁၇၃. သာမံ, အဓိဋ္ဌာယ, ဒူတေန, ဒူတပရံပရာယ, ဝိသက္ကိယေန ဒူတေန, ဂတပစ္စာဂတေန ဒူတေန, အရဟော ရဟောသညီ, ရဟော အရဟောသညီ, အရဟော အရဟောသညီ, ရဟော ရဟောသညီ ကာယေန သံဝဏ္ဏေတိ, ဝါစာယ သံဝဏ္ဏေတိ, ကာယေန ဝါစာယ သံဝဏ္ဏေတိ, ဒူတေန သံဝဏ္ဏေတိ, လေခါယ သံဝဏ္ဏေတိ, ဩပါတံ အပဿေနံ, ဥပနိက္ခိပနံ, ဘေသဇ္ဇံ, ရူပူပဟာရော, သဒ္ဒူပဟာရော, ဂန္ဓူပဟာရော, ရသူပဟာရော, ဖောဋ္ဌဗ္ဗူပဟာရော, ဓမ္မူပဟာရော, အာစိက္ခနာ, အနုသာသနီ, သင်္ကေတကမ္မံ, နိမိတ္တကမ္မန္တိ။

၁၇၄. သာမန္တိ သယံ ဟနတိ ကာယေန ဝါ ကာယပဋိဗဒ္ဓေန ဝါ နိဿဂ္ဂိယေန ဝါ။

အဓိဋ္ဌာယာတိ အဓိဋ္ဌဟိတွာ အာဏာပေတိ – ‘‘ဧဝံ ဝိဇ္ဈ, ဧဝံ ပဟရ, ဧဝံ ဃာတေဟီ’’တိ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော တံ မညမာနော တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော တံ မညမာနော အညံ ဇီဝိတာ ဝေါရောပေတ္တိ, မူလဋ္ဌဿ အနာပတ္တိ။ ဝဓကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော အညံ မညမာနော တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော အညံ မညမာနော အညံ ဇီဝိတာ ဝေါရောပေတိ; မူလဋ္ဌဿ အနာပတ္တိ, ဝဓကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဇီဝိတာ ဝေါရောပေတူ’’’တိ, အာပတ္တိ ဒုက္ကဋဿ။ သော ဣတရဿ အာရောစေတိ, အာပတ္တိ ဒုက္ကဋဿ။ ဝဓကော ပဋိဂ္ဂဏှာတိ, မူလဋ္ဌဿ အာပတ္တိ ထုလ္လစ္စယဿ။ သော တံ ဇီဝိတာ ဝေါရောပေတိ, အာပတ္တိ သဗ္ဗေသံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဇီဝိတာ ဝေါရောပေတူ’’’တိ, အာပတ္တိ ဒုက္ကဋဿ။ သော အညံ အာဏာပေတိ, အာပတ္တိ ဒုက္ကဋဿ။ ဝဓကော ပဋိဂ္ဂဏှာတိ, အာပတ္တိ ဒုက္ကဋဿ။ သော တံ ဇီဝိတာ ဝေါရောပေတိ, မူလဋ္ဌဿ အနာပတ္တိ; အာဏာပကဿ စ ဝဓကဿ စ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော ဂန္တွာ ပုန ပစ္စာဂစ္ဆတိ – ‘‘နာဟံ သက္ကောမိ တံ ဇီဝိတာ ဝေါရောပေတု’’န္တိ။ သော ပုန အာဏာပေတိ – ‘‘ယဒါ သက္ကောသိ တဒါ တံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ န သာဝေတိ – ‘‘မာ ဃာတေဟီ’’တိ။ သော တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ သာဝေတိ – ‘‘မာ ဃာတေဟီ’’တိ။ သော – ‘‘အာဏတ္တော အဟံ တယာ’’တိ တံ ဇီဝိတာ ဝေါရောပေတိ, မူလဋ္ဌဿ အနာပတ္တိ။ ဝဓကဿ အာပတ္တိ ပါရာဇိကဿ။

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ သော အာဏာပေတွာ ဝိပ္ပဋိသာရီ သာဝေတိ – ‘‘မာ ဃာတေဟီ’’တိ။ သော သာဓူတိ ဩရမတိ, ဥဘိန္နံ အနာပတ္တိ။

၁၇၅. အရဟော ရဟောသညီ ဥလ္လပတိ – ‘‘အဟော ဣတ္ထန္နာမော ဟတော အဿာ’’တိ, အာပတ္တိ ဒုက္ကဋဿ။ ရဟော အရဟောသညီ ဥလ္လပတိ – ‘‘အဟော ဣတ္ထန္နာမော ဟတော အဿာ’’တိ, အာပတ္တိ ဒုက္ကဋဿ။ အရဟော အရဟောသညီ ဥလ္လပတိ – ‘‘အဟော ဣတ္ထန္နာမော ဟတော အဿာ’’တိ, အာပတ္တိ ဒုက္ကဋဿ ။ ရဟော ရဟောသညီ ဥလ္လပတိ – ‘‘အဟော ဣတ္ထန္နာမော ဟတော အဿာ’’တိ, အာပတ္တိ ဒုက္ကဋဿ။

ကာယေန သံဝဏ္ဏေတိ နာမ ကာယေန ဝိကာရံ ကရောတိ – ‘‘ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ တာယ သံဝဏ္ဏနာယ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဝါစာယ သံဝဏ္ဏေတိ နာမ ဝါစာယ ဘဏတိ – ‘‘ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ တာယ သံဝဏ္ဏနာယ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ကာယေန ဝါစာယ သံဝဏ္ဏေတိ နာမ ကာယေန စ ဝိကာရံ ကရောတိ, ဝါစာယ စ ဘဏတိ – ‘‘ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ တာယ သံဝဏ္ဏနာယ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဒူတေန သံဝဏ္ဏေတိ နာမ ဒူတဿ သာသနံ အာရောစေတိ – ‘‘ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ ဒူတဿ သာသနံ သုတွာ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

၁၇၆. လေခါယ သံဝဏ္ဏေတိ နာမ လေခံ ဆိန္ဒတိ – ‘‘ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အက္ခရက္ခရာယ အာပတ္တိ ဒုက္ကဋဿ။ လေခံ ပဿိတွာ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဩပါတံ နာမ မနုဿံ ဥဒ္ဒိဿ ဩပါတံ ခနတိ – ‘‘ပပတိတွာ မရိဿတီ’’တိ, အာပတ္တိ ဒုက္ကဋဿ။ ပပတိတေ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ အနောဒိဿ ဩပါတံ ခနတိ – ‘‘ယော ကောစိ ပပတိတွာ မရိဿတီ’’တိ, အာပတ္တိ ဒုက္ကဋဿ။ မနုဿော တသ္မိံ ပပတတိ, အာပတ္တိ ဒုက္ကဋဿ။ ပပတိတေ ဒုက္ခါ ဝေဒနာ ဥပ္ပဇ္ဇတိ , အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ ယက္ခေါ ဝါ ပေတော ဝါ တိရစ္ဆာနဂတမနုဿဝိဂ္ဂဟော ဝါ တသ္မိံ ပပတတိ, အာပတ္တိ ဒုက္ကဋဿ။ ပပတိတေ ဒုက္ခါ ဝေဒနာ ဥပ္ပဇ္ဇတိ, အာပတ္တိ ဒုက္ကဋဿ။ မရတိ, အာပတ္တိ ထုလ္လစ္စယဿ။ တိရစ္ဆာနဂတော တသ္မိံ ပပတတိ, အာပတ္တိ ဒုက္ကဋဿ။ ပပတိတေ ဒုက္ခါ ဝေဒနာ ဥပ္ပဇ္ဇတိ, အာပတ္တိ ဒုက္ကဋဿ။ မရတိ, အာပတ္တိ ပါစိတ္တိယဿ။

၁၇၇. အပဿေနံ နာမ အပဿေနေ သတ္ထံ ဝါ ဌပေတိ ဝိသေန ဝါ မက္ခေတိ ဒုဗ္ဗလံ ဝါ ကရောတိ သောဗ္ဘေ ဝါ နရကေ ဝါ ပပါတေ ဝါ ဌပေတိ – ‘‘ပပတိတွာ မရိဿတီ’’တိ, အာပတ္တိ ဒုက္ကဋဿ။ သတ္ထေန ဝါ ဝိသေန ဝါ ပပတိတေန ဝါ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ , အာပတ္တိ ပါရာဇိကဿ။

ဥပနိက္ခိပနံ နာမ အသိံ ဝါ သတ္တိံ ဝါ ဘေဏ္ဍိံ ဝါ လဂုဠံ ဝါ ပါသာဏံ ဝါ သတ္ထံ ဝါ ဝိသံ ဝါ ရဇ္ဇုံ ဝါ ဥပနိက္ခိပတိ – ‘‘ဣမိနာ မရိဿတီ’’တိ, အာပတ္တိ ဒုက္ကဋဿ။ ‘‘တေန မရိဿာမီ’’တိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဘေသဇ္ဇံ နာမ သပ္ပိံ ဝါ နဝနီတံ ဝါ တေလံ ဝါ မဓုံ ဝါ ဖာဏိတံ ဝါ ဒေတိ – ‘‘ဣမံ သာယိတွာ မရိဿတီ’’တိ, အာပတ္တိ ဒုက္ကဋဿ။ တံ သာယိတေ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

၁၇၈. ရူပူပဟာရော နာမ အမနာပိကံ ရူပံ ဥပသံဟရတိ ဘယာနကံ ဘေရဝံ – ‘‘ဣမံ ပဿိတွာ ဥတ္တသိတွာ မရိဿတီ’’တိ, အာပတ္တိ ဒုက္ကဋဿ။ တံ ပဿိတွာ ဥတ္တသတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ မနာပိကံ ရူပံ ဥပသံဟရတိ [ဥပသံဟရတိ ပေမနီယံ ဟဒယင်္ဂမံ (သျာ.)] – ‘‘ဣမံ ပဿိတွာ အလာဘကေန သုဿိတွာ မရိဿတီ’’တိ, အာပတ္တိ ဒုက္ကဋဿ။ တံ ပဿိတွာ အလာဘကေန သုဿတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

သဒ္ဒူပဟာရော နာမ အမနာပိကံ သဒ္ဒံ ဥပသံဟရတိ ဘယာနကံ ဘေရဝံ – ‘‘ဣမံ သုတွာ ဥတ္တသိတွာ မရိဿတီ’’တိ, အာပတ္တိ ဒုက္ကဋဿ။ တံ သုတွာ ဥတ္တသတိ , အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ မနာပိကံ သဒ္ဒံ ဥပသံဟရတိ ပေမနီယံ ဟဒယင်္ဂမံ – ‘‘ဣမံ သုတွာ အလာဘကေန သုဿိတွာ မရိဿတီ’’တိ, အာပတ္တိ ဒုက္ကဋဿ။ တံ သုတွာ အလာဘကေန သုဿတိ, အာပတ္တိ ထုလ္လစ္စယဿ။ မရတိ , အာပတ္တိ ပါရာဇိကဿ။

ဂန္ဓူပဟာရော နာမ အမနာပိကံ ဂန္ဓံ ဥပသံဟရတိ ဇေဂုစ္ဆံ ပါဋိကုလျံ [ပဋိကူလံ (?)] – ‘‘ဣမံ ဃာယိတွာ ဇေဂုစ္ဆတာ ပါဋိကုလျတာ မရိဿတီ’’တိ, အာပတ္တိ ဒုက္ကဋဿ။ တံ ဃာယိတေ ဇေဂုစ္ဆတာ ပါဋိကုလျတာ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ မနာပိကံ ဂန္ဓံ ဥပသံဟရတိ – ‘‘ဣမံ ဃာယိတွာ အလာဘကေန သုဿိတွာ မရိဿတီ’’တိ, အာပတ္တိ ဒုက္ကဋဿ။ တံ ဃာယိတွာ အလာဘကေန သုဿတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ရသူပဟာရော နာမ အမနာပိကံ ရသံ ဥပသံဟရတိ ဇေဂုစ္ဆံ ပါဋိကုလျံ [ပဋိကူလံ (?)] – ‘‘ဣမံ သာယိတွာ ဇေဂုစ္ဆတာ ပါဋိကုလျတာ မရိဿတီ’’တိ, အာပတ္တိ ဒုက္ကဋဿ။ တံ သာယိတေ ဇေဂုစ္ဆတာ ပါဋိကုလျတာ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ မနာပိကံ ရသံ ဥပသံဟရတိ – ‘‘ဣမံ သာယိတွာ အလာဘကေန သုဿိတွာ မရိဿတီ’’တိ, အာပတ္တိ ဒုက္ကဋဿ။ တံ သာယိတွာ အလာဘကေန သုဿတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဖောဋ္ဌဗ္ဗူပဟာရော နာမ အမနာပိကံ ဖောဋ္ဌဗ္ဗံ ဥပသံဟရတိ ဒုက္ခသမ္ဖဿံ ခရသမ္ဖဿံ – ‘‘ဣမိနာ ဖုဋ္ဌော မရိဿတီ’’တိ, အာပတ္တိ ဒုက္ကဋဿ။ တေန ဖုဋ္ဌဿ ဒုက္ခါ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ မနာပိကံ ဖောဋ္ဌဗ္ဗံ ဥပသံဟရတိ သုခသမ္ဖဿံ မုဒုသမ္ဖဿံ – ‘‘ဣမိနာ ဖုဋ္ဌော အလာဘကေန သုဿိတွာ မရိဿတီ’’တိ, အာပတ္တိ ဒုက္ကဋဿ။ တေန ဖုဋ္ဌော အလာဘကေန သုဿတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

ဓမ္မူပဟာရော နာမ နေရယိကဿ နိရယကထံ ကထေတိ – ‘‘ဣမံ သုတွာ ဥတ္တသိတွာ မရိဿတီ’’တိ, အာပတ္တိ ဒုက္ကဋဿ။ တံ သုတွာ ဥတ္တသတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။ ကလျာဏကမ္မဿ သဂ္ဂကထံ ကထေတိ – ‘‘ဣမံ သုတွာ အဓိမုတ္တော မရိဿတီ’’တိ, အာပတ္တိ ဒုက္ကဋဿ။ တံ သုတွာ အဓိမုတ္တော မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

၁၇၉. အာစိက္ခနာ နာမ ပုဋ္ဌော ဘဏတိ – ‘‘ဧဝံ မရဿု။ ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ တာယ အာစိက္ခနာယ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

အနုသာသနီ နာမ အပုဋ္ဌော ဘဏတိ – ‘‘ဧဝံ မရဿု။ ယော ဧဝံ မရတိ သော ဓနံ ဝါ လဘတိ ယသံ ဝါ လဘတိ သဂ္ဂံ ဝါ ဂစ္ဆတီ’’တိ, အာပတ္တိ ဒုက္ကဋဿ။ တာယ အနုသာသနိယာ မရိဿာမီတိ ဒုက္ခံ ဝေဒနံ ဥပ္ပါဒေတိ, အာပတ္တိ ထုလ္လစ္စယဿ။ မရတိ, အာပတ္တိ ပါရာဇိကဿ။

သင်္ကေတကမ္မံ နာမ သင်္ကေတံ ကရောတိ ပုရေဘတ္တံ ဝါ ပစ္ဆာဘတ္တံ ဝါ ရတ္တိံ ဝါ ဒိဝါ ဝါ – ‘‘တေန သင်္ကေတေန တံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ တေန သင်္ကေတေန တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။ တံ သင်္ကေတံ ပုရေ ဝါ ပစ္ဆာ ဝါ တံ ဇီဝိတာ ဝေါရောပေတိ, မူလဋ္ဌဿ အနာပတ္တိ, ဝဓကဿ အာပတ္တိ ပါရာဇိကဿ။

နိမိတ္တကမ္မံ နာမ နိမိတ္တံ ကရောတိ – ‘‘အက္ခိံ ဝါ နိခဏိဿာမိ ဘမုကံ ဝါ ဥက္ခိပိဿာမိ သီသံ ဝါ ဥက္ခိပိဿာမိ, တေန နိမိတ္တေန တံ ဇီဝိတာ ဝေါရောပေဟီ’’တိ, အာပတ္တိ ဒုက္ကဋဿ။ တေန နိမိတ္တေန တံ ဇီဝိတာ ဝေါရောပေတိ, အာပတ္တိ ဥဘိန္နံ ပါရာဇိကဿ။ တံ နိမိတ္တံ ပုရေ ဝါ ပစ္ဆာ ဝါ တံ ဇီဝိတာ ဝေါရောပေတိ, မူလဋ္ဌဿ အနာပတ္တိ, ဝဓကဿ အာပတ္တိ ပါရာဇိကဿ။

အနာပတ္တိ အသဉ္စိစ္စ အဇာနန္တဿ နမရဏာဓိပ္ပါယဿ ဥမ္မတ္တကဿ [ဥမ္မတ္တကဿ ခိတ္တစိတ္တဿ ဝေဒနာဋ္ဋဿ (သျာ.)] အာဒိကမ္မိကဿာတိ။

မနုဿဝိဂ္ဂဟပါရာဇိကမှိ ပဌမဘာဏဝါရော နိဋ္ဌိတော။

ဝိနီတဝတ္ထုဥဒ္ဒါနဂါထာ

သံဝဏ္ဏနာ နိသီဒန္တော၊ မုသလောဒုက္ခလေန စ။

ဝုဍ္ဎပဗ္ဗဇိတာဘိသန္နော၊ အဂ္ဂဝီမံသနာဝိသံ။

တယော စ ဝတ္ထုကမ္မေဟိ၊ ဣဋ္ဌကာဟိပရေ တယော။

ဝါသီ ဂေါပါနသီ စေဝ၊ အဋ္ဋကောတရဏံ ပတိ။

သေဒံ နတ္ထုဉ္စ သမ္ဗာဟော၊ နှာပနဗ္ဘဉ္ဇနေန စ။

ဥဋ္ဌာပေန္တော နိပါတေန္တော၊ အန္နပါနေန မာရဏံ။

ဇာရဂဗ္ဘော သပတ္တီ စ၊ မာတာ ပုတ္တံ ဥဘော ဝဓိ။

ဥဘော န မိယျရေ မဒ္ဒါ၊ တာပံ ဝဉ္ဈာ ဝိဇာယိနီ။

ပတောဒံ နိဂ္ဂဟေ ယက္ခေါ၊ ဝါဠယက္ခဉ္စ ပါဟိဏိ။

တံ မညမာနော ပဟရိ၊ သဂ္ဂဉ္စ နိရယံ ဘဏေ။

အာဠဝိယာ တယော ရုက္ခါ၊ ဒါယေဟိ အပရေ တယော။

မာ ကိလမေသိ န တုယှံ၊ တက္ကံ သောဝီရကေန စာတိ။

ဝိနီတဝတ္ထု

၁၈၀. တေန ခေါ ပန သမယေန အညတရော ဘိက္ခု ဂိလာနော ဟောတိ။ တဿ ဘိက္ခူ ကာရုညေန မရဏဝဏ္ဏံ သံဝဏ္ဏေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ? ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမှေ, ဘိက္ခဝေ, အာပန္နာ ပါရာဇိက’’န္တိ။

တေန ခေါ ပန သမယေန အညတရော ပိဏ္ဍစာရိကော ဘိက္ခု ဣဌကေ ပိလောတိကာယ ပဋိစ္ဆန္နံ ဒါရကံ နိသီဒန္တော ဩတ္ထရိတွာ မာရေသိ။ တဿ ကုက္ကုစ္စံ အဟောသိ ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, အပ္ပဋိဝေက္ခိတွာ အာသနေ နိသီဒိတဗ္ဗံ; ယော နိသီဒေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဘတ္တဂ္ဂေ အန္တရဃရေ အာသနံ ပညပေန္တော မုသလေ ဥဿိတေ ဧကံ မုသလံ အဂ္ဂဟေသိ။ ဒုတိယော မုသလော ပရိပတိတွာ အညတရဿ ဒါရကဿ မတ္ထကေ အဝတ္ထာသိ။ သော ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘အသဉ္စိစ္စ အဟံ, ဘဂဝါ’’တိ။ ‘‘အနာပတ္တိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန အညတရော ဘိက္ခု ဘတ္တဂ္ဂေ အန္တရဃရေ အာသနံ ပညပေန္တော ဥဒုက္ခလဘဏ္ဍိကံ အက္ကမိတွာ ပဝဋ္ဋေသိ။ အညတရံ ဒါရကံ ဩတ္ထရိတွာ မာရေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝေါစ – ‘‘ဂစ္ဆ, ဘန္တေ, သံဃော တံ ပတိမာနေတီ’’တိ ပိဋ္ဌိယံ ဂဟေတွာ ပဏာမေသိ။ သော ပပတိတွာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, မရဏာဓိပ္ပါယော’’တိ။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝေါစ – ‘‘ဂစ္ဆ, ဘန္တေ, သံဃော တံ ပတိမာနေတီ’’တိ မရဏာဓိပ္ပါယော ပိဋ္ဌိယံ ဂဟေတွာ ပဏာမေသိ။ သော ပပတိတွာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝေါစ – ‘‘ဂစ္ဆ, ဘန္တေ, သံဃော တံ ပတိမာနေတီ’’တိ မရဏာဓိပ္ပါယော ပိဋ္ဌိယံ ဂဟေတွာ ပဏာမေသိ။ သော ပပတိတွာ န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ ; အာပတ္တိ ထုလ္လစ္စယဿာ’’တိ။

၁၈၁. တေန ခေါ ပန သမယေန အညတရဿ ဘိက္ခုနော ဘုဉ္ဇန္တဿ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု တဿ ဘိက္ခုနော ဂီဝါယံ ပဟာရံ အဒါသိ။ သလောဟိတံ မံသံ ပတိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော ဘုဉ္ဇန္တဿ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု မရဏာဓိပ္ပါယော တဿ ဘိက္ခုနော ဂီဝါယံ ပဟာရံ အဒါသိ။ သလောဟိတံ မံသံ ပတိ။ သော ဘိက္ခု ကာလမကာသိ ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရဿ ဘိက္ခုနော ဘုဉ္ဇန္တဿ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု မရဏာဓိပ္ပါယော တဿ ဘိက္ခုနော ဂီဝါယံ ပဟာရံ အဒါသိ။ သလောဟိတံ မံသံ ပတိ။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ပိဏ္ဍစာရိကော ဘိက္ခု ဝိသဂတံ ပိဏ္ဍပါတံ လဘိတွာ ပဋိက္ကမနံ ဟရိတွာ ဘိက္ခူနံ အဂ္ဂကာရိကံ အဒါသိ။ တေ ဘိက္ခူ ကာလမကံသု။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, ဇာနာမီ’’တိ။ ‘‘အနာပတ္တိ, ဘိက္ခု, အဇာနန္တဿာ’’တိ။

တေန ခေါ ပန သမယေန အညတရော ဘိက္ခု ဝီမံသာဓိပ္ပါယော အညတရဿ ဘိက္ခုနော ဝိသံ အဒါသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဝီမံသာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၂. တေန ခေါ ပန သမယေန အာဠဝကာ [အာဠဝိကာ (သျာ.)] ဘိက္ခူ ဝိဟာရဝတ္ထုံ ကရောန္တိ ။ အညတရော ဘိက္ခု ဟေဋ္ဌာ ဟုတွာ သိလံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ သိလာ ဟေဋ္ဌိမဿ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန အာဠဝကာ ဘိက္ခူ ဝိဟာရဝတ္ထုံ ကရောန္တိ။ အညတရော ဘိက္ခု ဟေဋ္ဌာ ဟုတွာ သိလံ ဥစ္စာရေသိ။ ဥပရိမော ဘိက္ခု မရဏာဓိပ္ပါယော ဟေဋ္ဌိမဿ ဘိက္ခုနော မတ္ထကေ သိလံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အာဠဝကာ ဘိက္ခူ ဝိဟာရဿ ကုဋ္ဋံ ဥဋ္ဌာပေန္တိ။ အညတရော ဘိက္ခု ဟေဋ္ဌာ ဟုတွာ ဣဋ္ဌကံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဣဋ္ဌကာ ဟေဋ္ဌိမဿ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန အာဠဝကာ ဘိက္ခူ ဝိဟာရဿ ကုဋ္ဋံ ဥဋ္ဌာပေန္တိ။ အညတရော ဘိက္ခု ဟေဋ္ဌာ ဟုတွာ ဣဋ္ဌကံ ဥစ္စာရေသိ။ ဥပရိမော ဘိက္ခု မရဏာဓိပ္ပါယော ဟေဋ္ဌိမဿ ဘိက္ခုနော မတ္ထကေ ဣဋ္ဌကံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၃. တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတွာ ဝါသိံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဝါသီ ဟေဋ္ဌိမဿ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတွာ ဝါသိံ ဥစ္စာရေသိ။ ဥပရိမော ဘိက္ခု မရဏာဓိပ္ပါယော ဟေဋ္ဌိမဿ ဘိက္ခုနော မတ္ထကေ ဝါသိံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတွာ ဂေါပါနသိံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဂေါပါနသီ ဟေဋ္ဌိမဿ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတွာ ဂေါပါနသိံ ဥစ္စာရေသိ။ ဥပရိမော ဘိက္ခု မရဏာဓိပ္ပါယော ဟေဋ္ဌိမဿ ဘိက္ခုနော မတ္ထကေ ဂေါပါနသိံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တာ အဋ္ဋကံ ဗန္ဓန္တိ။ အညတရော ဘိက္ခု အညတရံ ဘိက္ခုံ ဧတဒဝေါစ – ‘‘အာဝုသော, အတြဋ္ဌိတော ဗန္ဓါဟီ’’တိ။ သော တတြဋ္ဌိတော ဗန္ဓန္တော ပရိပတိတွာ ကာလမကာသိ ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, မရဏာဓိပ္ပါယော’’တိ။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တာ အဋ္ဋကံ ဗန္ဓန္တိ။ အညတရော ဘိက္ခု မရဏာဓိပ္ပါယော အညတရံ ဘိက္ခုံ ဧတဒဝေါစ – ‘‘အာဝုသော, အတြဋ္ဌိတော ဗန္ဓါဟီ’’တိ။ သော တတြဋ္ဌိတော ဗန္ဓန္တော ပရိပတိတွာ ကာလမကာသိ။ပေ.။ ပရိပတိတွာ န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဝိဟာရံ ဆာဒေတွာ ဩတရတိ။ အညတရော ဘိက္ခု တံ ဘိက္ခုံ ဧတဒဝေါစ – ‘‘အာဝုသော, ဣတော ဩတရာဟီ’’တိ။ သော တေန ဩတရန္တော ပရိပတိတွာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဝိဟာရံ ဆာဒေတွာ ဩတရတိ ။ အညတရော ဘိက္ခု မရဏာဓိပ္ပါယော တံ ဘိက္ခုံ ဧတဒဝေါစ – ‘‘အာဝုသော, ဣတော ဩတရာဟီ’’တိ။ သော တေန ဩတရန္တော ပရိပတိတွာ ကာလမကာသိ။ပေ.။ ပရိပတိတွာ န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု အနဘိရတိယာ ဣဠိတော ဂိဇ္ဈကူဋံ ပဗ္ဗတံ အဘိရုဟိတွာ ပပါတေ ပပတန္တော အညတရံ ဝိလီဝကာရံ ဩတ္ထရိတွာ မာရေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, အတ္တာနံ ပါတေတဗ္ဗံ။ ယော ပါတေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန ဆဗ္ဗဂ္ဂိယာ ဘိက္ခူ ဂိဇ္ဈကူဋံ ပဗ္ဗတံ အဘိရုဟိတွာ ဒဝါယ သိလံ ပဝိဇ္ဈိံသု။ သာ အညတရံ ဂေါပါလကံ ဩတ္ထရိတွာ မာရေသိ။ တေသံ ကုက္ကုစ္စံ အဟောသိ ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ။ န စ, ဘိက္ခဝေ, ဒဝါယ သိလာ ပဝိဇ္ဈိတဗ္ဗာ။ ယော ပဝိဇ္ဈေယျ, အာပတ္တိ ဒုက္ကဋဿာ’’တိ။

၁၈၄. တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ သေဒေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ ။ တံ ဘိက္ခူ မရဏာဓိပ္ပါယာ သေဒေသုံ။ သော ဘိက္ခု ကာလမကာသိ။။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော သီသာဘိတာပေါ ဟောတိ။ တဿ ဘိက္ခူ နတ္ထုံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော သီသာဘိတာပေါ ဟောတိ။ တဿ ဘိက္ခူ မရဏာဓိပ္ပါယာ နတ္ထုံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ သမ္ဗာဟေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပါယာ သမ္ဗာဟေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခု နှာပေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပါယာ နှာပေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ တေလေန အဗ္ဘဉ္ဇိံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပါယာ တေလေန အဗ္ဘဉ္ဇိံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၅. တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဥဋ္ဌာပေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပါယာ ဥဋ္ဌာပေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ နိပါတေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပါယာ နိပါတေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တဿ ဘိက္ခူ အန္နံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တဿ ဘိက္ခူ မရဏာဓိပ္ပါယာ အန္နံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တဿ ဘိက္ခု ပါနံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တဿ ဘိက္ခူ မရဏာဓိပ္ပါယာ ပါနံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ , ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၆. တေန ခေါ ပန သမယေန အညတရာ ဣတ္ထီ ပဝုတ္ထပတိကာ ဇာရေန ဂဗ္ဘိနီ ဟောတိ။ သာ ကုလူပကံ ဘိက္ခုံ ဧတဒဝေါစ – ‘‘ဣင်္ဃာယျ ဂဗ္ဘပါတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တဿာ ဂဗ္ဘပါတနံ အဒါသိ။ ဒါရကော ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရဿ ပုရိသဿ ဒွေ ပဇာပတိယော ဟောန္တိ – ဧကာ ဝဉ္ဈာ, ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘သစေ သာ, ဘန္တေ, ဝိဇာယိဿတိ သဗ္ဗဿ ကုဋုမ္ဗဿ ဣဿရာ ဘဝိဿတိ။ ဣင်္ဃာယျ, တဿာ ဂဗ္ဘပါတနံ ဇာနာဟီ’’တိ ။‘‘သုဋ္ဌု, ဘဂိနီ’’တိ တဿာ ဂဗ္ဘပါတနံ အဒါသိ။ ဒါရကော ကာလမကာသိ, မာတာ န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရဿ ပုရိသဿ ဒွေ ပဇာပတိယော ဟောန္တိ – ဧကာ ဝဉ္ဈာ, ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘သစေ သာ, ဘန္တေ, ဝိဇာယိဿတိ သဗ္ဗဿ ကုဋုမ္ဗဿ ဣဿရာ ဘဝိဿတိ။ ဣင်္ဃာယျ, တဿာ ဂဗ္ဘပါတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တဿာ ဂဗ္ဘပါတနံ အဒါသိ။ မာတာ ကာလမကာသိ, ဒါရကော န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ပုရိသဿ ဒွေ ပဇာပတိယော ဟောန္တိ – ဧကာ ဝဉ္ဈာ , ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘သစေ သာ, ဘန္တေ, ဝိဇာယိဿတိ သဗ္ဗဿ ကုဋုမ္ဗဿ ဣဿရာ ဘဝိဿတိ။ ဣင်္ဃာယျ, တဿာ ဂဗ္ဘပါတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တဿာ ဂဗ္ဘပါတနံ အဒါသိ။ ဥဘော ကာလမကံသု။ပေ.။ ဥဘော န ကာလမကံသု။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၇. တေန ခေါ ပန သမယေန အညတရာ ဂဗ္ဘိနီ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ဣင်္ဃာယျ, ဂဗ္ဘပါတနံ ဇာနာဟီ’’တိ။ ‘‘တေန ဟိ, ဘဂိနိ, မဒ္ဒဿူ’’တိ။ သာ မဒ္ဒါပေတွာ ဂဗ္ဘံ ပါတေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရာ ဂဗ္ဘိနီ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ဣင်္ဃာယျ, ဂဗ္ဘပါတနံ ဇာနာဟီ’’တိ။ ‘‘တေန ဟိ, ဘဂိနိ, တာပေဟီ’’တိ။ သာ တာပေတွာ ဂဗ္ဘံ ပါတေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရာ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ဣင်္ဃာယျ, ဘေသဇ္ဇံ ဇာနာဟိ ယေနာဟံ ဝိဇာယေယျ’’န္တိ။ ‘‘သုဋ္ဌု, ဘဂိနီ’’တိ တဿာ ဘေသဇ္ဇံ အဒါသိ ။ သာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဝိဇာယိနီ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ဣင်္ဃာယျ, ဘေသဇ္ဇံ ဇာနာဟိ ယေနာဟံ န ဝိဇာယေယျ’’န္တိ။ ‘‘သုဋ္ဌု, ဘဂိနီ’’တိ တဿာ ဘေသဇ္ဇံ အဒါသိ။ သာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ , ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန ဆဗ္ဗဂ္ဂိယာ ဘိက္ခူ သတ္တရသဝဂ္ဂိယံ ဘိက္ခုံ အင်္ဂုလိပတောဒကေန ဟာသေသုံ။ သော ဘိက္ခု ဥတ္တန္တော အနဿာသကော ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿာ’’တိ [ပါရာဇိကဿ, အာပတ္တိ ပါစိတ္တိယဿာတိ (သျာ.)]။

တေန ခေါ ပန သမယေန သတ္တရသဝဂ္ဂိယာ ဘိက္ခူ ဆဗ္ဗဂ္ဂိယံ ဘိက္ခုံ ကမ္မံ ကရိဿာမာတိ ဩတ္ထရိတွာ မာရေသုံ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿာ’’တိ။

တေန ခေါ ပန သမယေန အညတရော ဘူတဝေဇ္ဇကော ဘိက္ခု ယက္ခံ ဇီဝိတာ ဝေါရောပေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဝါဠယက္ခဝိဟာရံ ပါဟေသိ။ တံ ယက္ခါ ဇီဝိတာ ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု မရဏာဓိပ္ပါယော အညတရံ ဘိက္ခုံ ဝါဠယက္ခဝိဟာရံ ပါဟေသိ။ တံ ယက္ခါ ဇီဝိတာ ဝေါရောပေသုံ။ပေ.။ တံ ယက္ခါ ဇီဝိတာ န ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ ။

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဝါဠကန္တာရံ ပါဟေသိ ။ တံ ဝါဠာ ဇီဝိတာ ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု မရဏာဓိပ္ပါယော အညတရံ ဘိက္ခုံ ဝါဠကန္တာရံ ပါဟေသိ။ တံ ဝါဠာ ဇီဝိတာ ဝေါရောပေသုံ။ပေ.။ တံ ဝါဠာ ဇီဝိတာ န ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု အညတရံ ဘိက္ခုံ စောရကန္တာရံ ပါဟေသိ။ တံ စောရာ ဇီဝိတာ ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု မရဏာဓိပ္ပါယော အညတရံ ဘိက္ခုံ စောရကန္တာရံ ပါဟေသိ။ တံ စောရာ ဇီဝိတာ ဝေါရောပေသုံ။ပေ.။ တံ စောရာ ဇီဝိတာ န ဝေါရောပေသုံ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၈. တေန ခေါ ပန သမယေန အညတရော ဘိက္ခု တံ မညမာနော တံ ဇီဝိတာ ဝေါရောပေသိ။ပေ.။ တံ မညမာနော အညံ ဇီဝိတာ ဝေါရောပေသိ။ပေ.။ အညံ မညမာနော တံ ဇီဝိတာ ဝေါရောပေသိ။ပေ.။ အညံ မညမာနော အညံ ဇီဝိတာ ဝေါရောပေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု အမနုဿေန ဂဟိတော ဟောတိ။ အညတရော ဘိက္ခု တဿ ဘိက္ခုနော ပဟာရံ အဒါသိ။ သော ဘိက္ခု ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု , နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု အမနုဿေန ဂဟိတော ဟောတိ။ အညတရော ဘိက္ခု မရဏာဓိပ္ပါယော တဿ ဘိက္ခုနော ပဟာရံ အဒါသိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ကလျာဏကမ္မဿ သဂ္ဂကထံ ကထေသိ။ သော အဓိမုတ္တော ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု မရဏာဓိပ္ပါယော ကလျာဏကမ္မဿ သဂ္ဂကထံ ကထေသိ။ သော အဓိမုတ္တော ကာလမကာသိ။ပေ.။ သော အဓိမုတ္တော န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု နေရယိကဿ နိရယကထံ ကထေသိ။ သော ဥတ္တသိတွာ ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု မရဏာဓိပ္ပါယော နေရယိကဿ နိရယကထံ ကထေသိ။ သော ဥတ္တသိတွာ ကာလမကာသိ။ပေ.။ သော ဥတ္တသိတွာ န ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၈၉. တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တာ ရုက္ခံ ဆိန္ဒန္တိ။ အညတရော ဘိက္ခု အညတရံ ဘိက္ခုံ ဧတဒဝေါစ – ‘‘အာဝုသော, အတြဋ္ဌိတော ဆိန္ဒါဟီ’’တိ။ တံ တတြဋ္ဌိတံ ဆိန္ဒန္တံ ရုက္ခေါ ဩတ္ထရိတွာ မာရေသိ ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပါယဿာ’’တိ။

တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တာ ရုက္ခံ ဆိန္ဒန္တိ။ အညတရော ဘိက္ခု မရဏာဓိပ္ပါယော အညတရံ ဘိက္ခုံ ဧတဒဝေါစ – ‘‘အာဝုသော, အတြဋ္ဌိတော ဆိန္ဒါဟီ’’တိ။ တံ တတြဋ္ဌိတံ ဆိန္ဒန္တံ ရုက္ခေါ ဩတ္ထရိတွာ မာရေသိ။ပေ.။ ရုက္ခေါ ဩတ္ထရိတွာ န မာရေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၁၉၀. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဒါယံ အာလိမ္ပေသုံ [အာဠိမ္ပေသုံ (သျာ. က.)]; မနုဿာ ဒဍ္ဎာ ကာလမကံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပါယဿာ’’တိ။

တေန ခေါ ပန သမယေန ဆဗ္ဗဂ္ဂိယာ ဘိက္ခူ မရဏာဓိပ္ပါယာ ဒါယံ အာလိမ္ပေသုံ။ မနုဿာ ဒဍ္ဎာ ကာလမကံသု။ပေ.။ မနုဿာ ဒဍ္ဎာ န ကာလမကံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပါရာဇိကဿ; အာပတ္တိ ထုလ္လစ္စယဿာ’’တိ။

၁၉၁. တေန ခေါ ပန သမယေန အညတရော ဘိက္ခု အာဃာတနံ ဂန္တွာ စောရဃာတံ ဧတဒဝေါစ – ‘‘အာဝုသော, မာယိမံ ကိလမေသိ။ ဧကေန ပဟာရေန ဇီဝိတာ ဝေါရောပေဟီ’’တိ။ ‘‘သုဋ္ဌု, ဘန္တေ’’တိ ဧကေန ပဟာရေန ဇီဝိတာ ဝေါရောပေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု အာဃာတနံ ဂန္တွာ စောရဃာတံ ဧတဒဝေါစ – ‘‘အာဝုသော, မာယိမံ ကိလမေသိ ။ ဧကေန ပဟာရေန ဇီဝိတာ ဝေါရောပေဟီ’’တိ။ သော – ‘‘နာဟံ တုယှံ ဝစနံ ကရိဿာမီ’’တိ တံ ဇီဝိတာ ဝေါရောပေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

၁၉၂. တေန ခေါ ပန သမယေန အညတရော ပုရိသော ဉာတိဃရေ ဟတ္ထပါဒစ္ဆိန္နော ဉာတကေဟိ သမ္ပရိကိဏ္ဏော ဟောတိ။ အညတရော ဘိက္ခု တေ မနုဿေ ဧတဒဝေါစ – ‘‘အာဝုသော, ဣစ္ဆထ ဣမဿ မရဏ’’န္တိ? ‘‘အာမ, ဘန္တေ, ဣစ္ဆာမာ’’တိ။ ‘‘တေန ဟိ တက္ကံ ပါယေထာ’’တိ။ တေ တံ တက္ကံ ပါယေသုံ။ သော ကာလမကာသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ပုရိသော ကုလဃရေ ဟတ္ထပါဒစ္ဆိန္နော ဉာတကေဟိ သမ္ပရိကိဏ္ဏော ဟောတိ။ အညတရာ ဘိက္ခုနီ တေ မနုဿေ ဧတဒဝေါစ – ‘‘အာဝုသော, ဣစ္ဆထ ဣမဿ မရဏ’’န္တိ? ‘‘အာမယျေ, ဣစ္ဆာမာ’’တိ။ ‘‘တေန ဟိ လောဏသောဝီရကံ ပါယေထာ’’တိ။ တေ တံ လောဏသောဝီရကံ ပါယေသုံ။ သော ကာလမကာသိ။ တဿာ ကုက္ကုစ္စံ အဟောသိ။ အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ ‘‘အာပတ္တိံ သာ, ဘိက္ခဝေ, ဘိက္ခုနီ အာပန္နာ ပါရာဇိက’’န္တိ။

တတိယပါရာဇိကံ သမတ္တံ။

၄. စတုတ္ထပါရာဇိကံ

၁၉၃. [ဣဒံ ဝတ္ထု ပါစိ. ၆၇] တေန သမယေန ဗုဒ္ဓေါ ဘဂဝါ ဝေသာလိယံ ဝိဟရတိ မဟာဝနေ ကူဋာဂါရသာလာယံ။ တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ဝဂ္ဂုမုဒါယ နဒိယာ တီရေ ဝဿံ ဥပဂစ္ဆိံသု။ တေန ခေါ ပန သမယေန ဝဇ္ဇီ ဒုဗ္ဘိက္ခါ ဟောတိ ဒွီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ အထ ခေါ တေသံ ဘိက္ခူနံ ဧတဒဟောသိ – ‘‘ဧတရဟိ ခေါ ဝဇ္ဇီ ဒုဗ္ဘိက္ခါ ဒွီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ ကေန နု ခေါ မယံ ဥပါယေန သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသေယျာမ, န စ ပိဏ္ဍကေန ကိလမေယျာမာ’’တိ? ဧကစ္စေ ဧဝမာဟံသု – ‘‘ဟန္ဒ မယံ, အာဝုသော, ဂိဟီနံ ကမ္မန္တံ အဓိဋ္ဌေမ, ဧဝံ တေ အမှာကံ ဒါတုံ မညိဿန္တိ။ ဧဝံ မယံ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိဿာမ, န စ ပိဏ္ဍကေန ကိလမိဿာမာ’’တိ။ ဧကစ္စေ ဧဝမာဟံသု – ‘‘အလံ, အာဝုသော, ကိံ ဂိဟီနံ ကမ္မန္တံ အဓိဋ္ဌိတေန! ဟန္ဒ မယံ , အာဝုသော, ဂိဟီနံ ဒူတေယျံ ဟရာမ, ဧဝံ တေ အမှာကံ ဒါတုံ မညိဿန္တိ။ ဧဝံ မယံ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိဿာမ, န စ ပိဏ္ဍကေန ကိလမိဿာမာ’’တိ။ ဧကစ္စေ ဧဝမာဟံသု – ‘‘အလံ, အာဝုသော, ကိံ ဂိဟီနံ ကမ္မန္တံ အဓိဋ္ဌိတေန! ကိံ ဂိဟီနံ ဒူတေယျံ ဟဋေန! ဟန္ဒ မယံ, အာဝုသော, ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိဿာမ – ‘အသုကော ဘိက္ခု ပဌမဿ ဈာနဿ လာဘီ, အသုကော ဘိက္ခု ဒုတိယဿ ဈာနဿ လာဘီ, အသုကော ဘိက္ခု တတိယဿ ဈာနဿ လာဘီ, အသုကော ဘိက္ခု စတုတ္ထဿ ဈာနဿ လာဘီ, အသုကော ဘိက္ခု သောတာပန္နော, အသုကော ဘိက္ခု သကဒါဂါမီ, အသုကော ဘိက္ခု အနာဂါမီ, အသုကော ဘိက္ခု အရဟာ, အသုကော ဘိက္ခု တေဝိဇ္ဇော, အသုကော ဘိက္ခု ဆဠဘိညော’တိ။ ဧဝံ တေ အမှာကံ ဒါတုံ မညိဿန္တိ။ ဧဝံ မယံ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိဿာမ, န စ ပိဏ္ဍကေန ကိလမိဿာမာ’’တိ။ ‘‘ဧသောယေဝ ခေါ, အာဝုသော, သေယျော ယော အမှာကံ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏော ဘာသိတော’’တိ။

၁၉၄. အထ ခေါ တေ ဘိက္ခူ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိံသု – ‘‘အသုကော ဘိက္ခု ပဌမဿ ဈာနဿ လာဘီ။ပေ.။ အသုကော ဘိက္ခု ဆဠဘိညော’’တိ။ အထ ခေါ တေ မနုဿာ – ‘‘လာဘာ ဝတ နော, သုလဒ္ဓံ ဝတ နော, ယေသံ ဝတ နော ဧဝရူပါ ဘိက္ခူ ဝဿံ ဥပဂတာ; န ဝတ နော ဣတော ပုဗ္ဗေ ဧဝရူပါ ဘိက္ခူ ဝဿံ ဥပဂတာ ယထယိမေ ဘိက္ခူ သီလဝန္တော ကလျာဏဓမ္မာ’’တိ, တေ န တာဒိသာနိ ဘောဇနာနိ အတ္တနာ ပရိဘုဉ္ဇန္တိ မာတာပိတူနံ ဒေန္တိ ပုတ္တဒါရဿ ဒေန္တိ ဒါသကမ္မကရပေါရိသဿ ဒေန္တိ မိတ္တာမစ္စာနံ ဒေန္တိ ဉာတိသာလောဟိတာနံ ဒေန္တိ, ယာဒိသာနိ ဘိက္ခူနံ ဒေန္တိ။ တေ န တာဒိသာနိ ခါဒနီယာနိ သာယနီယာနိ ပါနာနိ အတ္တနာ ခါဒန္တိ သာယန္တိ ပိဝန္တိ မာတာပိတူနံ ဒေန္တိ ပုတ္တဒါရဿ ဒေန္တိ ဒါသကမ္မကရပေါရိသဿ ဒေန္တိ မိတ္တာမစ္စာနံ ဒေန္တိ ဉာတိသာလောဟိတာနံ ဒေန္တိ, ယာဒိသာနိ ဘိက္ခူနံ ဒေန္တိ။ အထ ခေါ တေ ဘိက္ခူ ဝဏ္ဏဝါ အဟေသုံ ဣဏိန္ဒြိယာ ပသန္နမုခဝဏ္ဏာ ဝိပ္ပသန္နဆဝိဝဏ္ဏာ။

အာစိဏ္ဏံ ခေါ ပနေတံ ဝဿံဝုဋ္ဌာနံ ဘိက္ခူနံ ဘဂဝန္တံ ဒဿနာယ ဥပသင်္ကမိတုံ။ အထ ခေါ တေ ဘိက္ခူ ဝဿံဝုဋ္ဌာ တေမာသစ္စယေန သေနာသနံ သံသာမေတွာ ပတ္တစီဝရံ အာဒါယ ယေန ဝေသာလီ တေန ပက္ကမိံသု။ အနုပုဗ္ဗေန ယေန ဝေသာလီ မဟာဝနံ ကူဋာဂါရသာလာ ယေန ဘဂဝါ တေနုပသင်္ကမိံသု; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု။

တေန ခေါ ပန သမယေန ဒိသာသု ဝဿံဝုဋ္ဌာ ဘိက္ခူ ကိသာ ဟောန္တိ လူခါ ဒုဗ္ဗဏ္ဏာ ဥပ္ပဏ္ဍုပ္ပဏ္ဍုကဇာတာ ဓမနိသန္ထတဂတ္တာ; ဝဂ္ဂုမုဒါတီရိယာ ပန ဘိက္ခူ ဝဏ္ဏဝါ ဟောန္တိ ဣဏိန္ဒြိယာ ပသန္နမုခဝဏ္ဏာ ဝိပ္ပသန္နဆဝိဝဏ္ဏာ။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခေါ ဘဂဝါ ဝဂ္ဂုမုဒါတီရိယေ ဘိက္ခူ ဧတဒဝေါစ – ‘‘ကစ္စိ, ဘိက္ခဝေ, ခမနီယံ ကစ္စိ ယာပနီယံ ကစ္စိ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိတ္ထ န စ ပိဏ္ဍကေန ကိလမိတ္ထာ’’တိ? ‘‘ခမနီယံ, ဘဂဝါ, ယာပနီယံ, ဘဂဝါ။ သမဂ္ဂါ စ မယံ, ဘန္တေ, သမ္မောဒမာနာ အဝိဝဒမာနာ ဖာသုကံ ဝဿံ ဝသိမှာ, န စ ပိဏ္ဍကေန ကိလမိမှာ’’တိ။ ဇာနန္တာပိ တထာဂတာ ပုစ္ဆန္တိ, ဇာနန္တာပိ န ပုစ္ဆန္တိ။ပေ.။ ဒွီဟာကာရေဟိ ဗုဒ္ဓါ ဘဂဝန္တော ဘိက္ခူ ပဋိပုစ္ဆန္တိ – ဓမ္မံ ဝါ ဒေသေဿာမ, သာဝကာနံ ဝါ သိက္ခါပဒံ ပညာပေဿာမာတိ။ အထ ခေါ ဘဂဝါ ဝဂ္ဂုမုဒါတီရိယေ ဘိက္ခူ ဧတဒဝေါစ – ‘‘ယထာ ကထံ ပန တုမှေ, ဘိက္ခဝေ, သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိတ္ထ န စ ပိဏ္ဍကေန ကိလမိတ္ထာ’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ – ‘‘ကစ္စိ ပန ဝေါ, ဘိက္ခဝေ, ဘူတ’’န္တိ? ‘‘အဘူတံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသာ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တုမှေ, မောဃပုရိသာ, ဥဒရဿ ကာရဏာ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိဿထ! ဝရံ တုမှေဟိ, မောဃပုရိသာ, တိဏှေန ဂေါဝိကန္တနေန [ဂေါဝိကတ္တနေန (သီ. က.)] ကုစ္ဆိံ ပရိကန္တော, န တွေဝ ဥဒရဿ ကာရဏာ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏော ဘာသိတော! တံ ကိဿ ဟေတု? တတော နိဒါနဉှိ, မောဃပုရိသာ, မရဏံ ဝါ နိဂစ္ဆေယျ မရဏမတ္တံ ဝါ ဒုက္ခံ, န တွေဝ တပ္ပစ္စယာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယ။ ဣတော နိဒါနဉ္စ ခေါ, မောဃပုရိသာ, ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ နေတံ, မောဃပုရိသာ, အပ္ပသန္နာနံ ဝါ ပသာဒါယ’’။ပေ.။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ –

၁၉၅. ‘‘ပဉ္စိမေ, ဘိက္ခဝေ, မဟာစောရာ သန္တော သံဝိဇ္ဇမာနာ လောကသ္မိံ။ ကတမေ ပဉ္စ? ဣဓ, ဘိက္ခဝေ, ဧကစ္စဿ မဟာစောရဿ ဧဝံ ဟောတိ – ‘ကုဒါဿု နာမာဟံ သတေန ဝါ သဟဿေန ဝါ ပရိဝုတော ဂါမနိဂမရာဇဓါနီသု အာဟိဏ္ဍိဿာမိ ဟနန္တော ဃာတေန္တော ဆိန္ဒန္တော ဆေဒါပေန္တော ပစန္တော ပါစေန္တော’တိ! သော အပရေန သမယေန သတေန ဝါ သဟဿေန ဝါ ပရိဝုတော ဂါမနိဂမရာဇဓါနီသု အာဟိဏ္ဍတိ ဟနန္တော ဃာတေန္တော ဆိန္ဒန္တော ဆေဒါပေန္တော ပစန္တော ပါစေန္တော။ ဧဝမေဝ ခေါ, ဘိက္ခဝေ, ဣဓေကစ္စဿ ပါပဘိက္ခုနော ဧဝံ ဟောတိ – ‘ကုဒါဿု နာမာဟံ သတေန ဝါ သဟဿေန ဝါ ပရိဝုတော ဂါမနိဂမရာဇဓါနီသု စာရိကံ စရိဿာမိ သက္ကတော ဂရုကတော မာနိတော ပူဇိတော အပစိတော ဂဟဋ္ဌာနဉ္စေဝ ပဗ္ဗဇိတာနဉ္စ, လာဘီ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရာန’န္တိ ! သော အပရေန သမယေန သတေန ဝါ သဟဿေန ဝါ ပရိဝုတော ဂါမနိဂမရာဇဓါနီသု စာရိကံ စရတိ သက္ကတော ဂရုကတော မာနိတော ပူဇိတော အပစိတော ဂဟဋ္ဌာနဉ္စေဝ ပဗ္ဗဇိတာနဉ္စ, လာဘီ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရာနံ။ အယံ, ဘိက္ခဝေ, ပဌမော မဟာစောရော သန္တော သံဝိဇ္ဇမာနော လောကသ္မိံ။

‘‘ပုန စပရံ, ဘိက္ခဝေ, ဣဓေကစ္စော ပါပဘိက္ခု တထာဂတပ္ပဝေဒိတံ ဓမ္မဝိနယံ ပရိယာပုဏိတွာ အတ္တနော ဒဟတိ။ အယံ, ဘိက္ခဝေ, ဒုတိယော မဟာစောရော သန္တော သံဝိဇ္ဇမာနော လောကသ္မိံ။

‘‘ပုန စပရံ, ဘိက္ခဝေ, ဣဓေကစ္စော ပါပဘိက္ခု သုဒ္ဓံ ဗြဟ္မစာရိံ ပရိသုဒ္ဓံ ဗြဟ္မစရိယံ စရန္တံ အမူလကေန အဗြဟ္မစရိယေန အနုဒ္ဓံသေတိ။ အယံ, ဘိက္ခဝေ, တတိယော မဟာစောရော သန္တော သံဝိဇ္ဇမာနော လောကသ္မိံ။

‘‘ပုန စပရံ, ဘိက္ခဝေ, ဣဓေကစ္စော ပါပဘိက္ခု ယာနိ တာနိ သံဃဿ ဂရုဘဏ္ဍာနိ ဂရုပရိက္ခါရာနိ, သေယျထိဒံ – အာရာမော အာရာမဝတ္ထု ဝိဟာရော ဝိဟာရဝတ္ထု မဉ္စော ဣဌံ ဘိသိ ဗိမ္ဗောဟနံ [ဗိမ္ဗောဟနံ (သီ. သျာ.)] လောဟကုမ္ဘီ လောဟဘာဏကံ လောဟဝါရကော လောဟကဋာဟံ ဝါသီ ပရသု [ဖရသု (သီ. သျာ.)] ကုဌာရီ ကုဒါလော နိခါဒနံ ဝလ္လိ ဝေဠု မုဉ္ဇံ ပဗ္ဗဇံ တိဏံ မတ္တိကာ ဒါရုဘဏ္ဍံ မတ္တိကာဘဏ္ဍံ, တေဟိ ဂိဟီံ သင်္ဂဏှာတိ ဥပလာပေတိ။ အယံ, ဘိက္ခဝေ, စတုတ္ထော မဟာစောရော သန္တော သံဝိဇ္ဇမာနော လောကသ္မိံ။

‘‘သဒေဝကေ, ဘိက္ခဝေ, လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ အယံ အဂ္ဂေါ မဟာစောရော ယော အသန္တံ အဘူတံ ဥတ္တရိမနုဿဓမ္မံ ဥလ္လပတိ။ တံ ကိဿ ဟေတု? ထေယျာယ ဝေါ, ဘိက္ခဝေ, ရဋ္ဌပိဏ္ဍော ဘုတ္တော’’တိ။

[သံ. နိ. ၁.၃၅] အညထာ သန္တမတ္တာနံ၊ အညထာ ယော ပဝေဒယေ။

နိကစ္စ ကိတဝဿေဝ၊ ဘုတ္တံ ထေယျေန တဿ တံ။

[ဓ. ပ. ၃၀၇ ဓမ္မပဒေပိ] ကာသာဝကဏ္ဌာ ဗဟဝေါ၊ ပါပဓမ္မာ အသညတာ။

ပါပါ ပါပေဟိ ကမ္မေဟိ၊ နိရယံ တေ ဥပပဇ္ဇရေ။

[ဓ. ပ. ၃၀၇ ဓမ္မပဒေပိ] သေယျော အယောဂုဠော ဘုတ္တော၊ တတ္တော အဂ္ဂိသိခူပမော။

ယဉ္စေ ဘုဉ္ဇေယျ ဒုဿီလော၊ ရဋ္ဌပိဏ္ဍံ အသညတောတိ။

အထ ခေါ ဘဂဝါ တေ ဝဂ္ဂုမုဒါတီရိယေ ဘိက္ခူ အနေကပရိယာယေန ဝိဂရဟိတွာ ဒုဗ္ဘရတာယ ဒုပ္ပေါသတာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘ယော ပန ဘိက္ခု အနဘိဇာနံ ဥတ္တရိမနုဿဓမ္မံ အတ္တုပနာယိကံ အလမရိယဉာဏဒဿနံ သမုဒါစရေယျ – ‘ဣတိ ဇာနာမိ ဣတိ ပဿာမီ’တိ, တတော အပရေန သမယေန သမနုဂ္ဂါဟီယမာနော ဝါ အသမနုဂ္ဂါဟီယမာနော ဝါ အာပန္နော ဝိသုဒ္ဓါပေက္ခေါ ဧဝံ ဝဒေယျ – ‘အဇာနမေဝံ, အာဝုသော, အဝစံ ဇာနာမိ , အပဿံ ပဿာမိ။ တုစ္ဆံ မုသာ ဝိလပိ’န္တိ, အယမ္ပိ ပါရာဇိကော ဟောတိ အသံဝါသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၁၉၆. တေန ခေါ ပန သမယေန သမ္ဗဟုလာ ဘိက္ခူ အဒိဋ္ဌေ ဒိဋ္ဌသညိနော အပတ္တေ ပတ္တသညိနော အနဓိဂတေ အဓိဂတသညိနော အသစ္ဆိကတေ သစ္ဆိကတသညိနော အဓိမာနေန အညံ ဗျာကရိံသု။ တေသံ အပရေန သမယေန ရာဂါယပိ စိတ္တံ နမတိ ဒေါသာယပိ စိတ္တံ နမတိ မောဟာယပိ စိတ္တံ နမတိ။ တေသံ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ။ မယဉ္စမှ အဒိဋ္ဌေ ဒိဋ္ဌသညိနော အပတ္တေ ပတ္တသညိနော အနဓိဂတေ အဓိဂတသညိနော အသစ္ဆိကတေ သစ္ဆိကတသညိနော, အဓိမာနေန အညံ ဗျာကရိမှာ။ ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ? တေ အာယသ္မတော အာနန္ဒဿ ဧတမတ္ထံ အာရောစေသုံ။ အာယသ္မာ အာနန္ဒေါ ဘဂဝတော ဧတမတ္ထံ အာရောစေသိ။ ‘‘ဟောန္တိ ယေ တေ, အာနန္ဒ [ဟောန္တိ ယေဝါနန္ဒ (သျာ.), ဟောန္တိ တေ အာနန္ဒ (သီ.)], ဘိက္ခူ အဒိဋ္ဌေ ဒိဋ္ဌသညိနော အပတ္တေ ပတ္တသညိနော အနဓိဂတေ အဓိဂတသညိနော အသစ္ဆိကတေ သစ္ဆိကတသညိနော အဓိမာနေန အညံ ဗျာကရောန္တိ။ တဉ္စ ခေါ ဧတံ အဗ္ဗောဟာရိက’’န္တိ။

‘‘ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၁၉၇. ‘‘ယော ပန ဘိက္ခု အနဘိဇာနံ ဥတ္တရိမနုဿဓမ္မံ အတ္တုပနာယိကံ အလမရိယဉာဏဒဿနံ သမုဒါစရေယျ – ‘ဣတိ ဇာနာမိ ဣတိ ပဿာမီ’တိ, တတော အပရေန သမယေန သမနုဂ္ဂါဟီယမာနော ဝါ အသမနုဂ္ဂါဟီယမာနော ဝါ အာပန္နော ဝိသုဒ္ဓါပေက္ခေါ ဧဝံ ဝဒေယျ – ‘အဇာနမေဝံ, အာဝုသော, အဝစံ ဇာနာမိ, အပဿံ ပဿာမိ။ တုစ္ဆံ မုသာ ဝိလပိ’န္တိ, အညတြ အဓိမာနာ, အယမ္ပိ ပါရာဇိကော ဟောတိ အသံဝါသော’’တိ။

၁၉၈. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

အနဘိဇာနန္တိ အသန္တံ အဘူတံ အသံဝိဇ္ဇမာနံ အဇာနန္တော အပဿန္တော အတ္တနိ ကုသလံ ဓမ္မံ – အတ္ထိ မေ ကုသလော ဓမ္မောတိ။

[ပါစိ. ၇၀] ဥတ္တရိမနုဿဓမ္မော နာမ ဈာနံ ဝိမောက္ခေါ [ဝိမောက္ခံ (သီ. သျာ.)] သမာဓိ သမာပတ္တိ ဉာဏဒဿနံ မဂ္ဂဘာဝနာ ဖလသစ္ဆိကိရိယာ ကိလေသပ္ပဟာနံ ဝိနီဝရဏတာ စိတ္တဿ သုညာဂါရေ အဘိရတိ။

အတ္တုပနာယိကန္တိ တေ ဝါ ကုသလေ ဓမ္မေ အတ္တနိ ဥပနေတိ အတ္တာနံ ဝါ တေသု ကုသလေသု ဓမ္မေသု ဥပနေတိ။

ဉာဏန္တိ တိဿော ဝိဇ္ဇာ။ ဒဿနန္တိ ယံ ဉာဏံ တံ ဒဿနံ။ ယံ ဒဿနံ တံ ဉာဏံ။

သမုဒါစရေယျာတိ အာရောစေယျ ဣတ္ထိယာ ဝါ ပုရိသဿ ဝါ ဂဟဋ္ဌဿ ဝါ ပဗ္ဗဇိတဿ ဝါ။

ဣတိ ဇာနာမိ ဣတိ ပဿာမီတိ ဇာနာမဟံ ဧတေ ဓမ္မေ, ပဿာမဟံ ဧတေ ဓမ္မေ အတ္ထိ စ ဧတေ ဓမ္မာ မယိ, အဟဉ္စ ဧတေသု ဓမ္မေသု သန္ဒိဿာမီတိ။

တတော အပရေန သမယေနာတိ ယသ္မိံ ခဏေ သမုဒါစိဏ္ဏံ ဟောတိ တံ ခဏံ တံ လယံ တံ မုဟုတ္တံ ဝီတိဝတ္တေ။

သမနုဂ္ဂါဟီယမာနောတိ ယံ ဝတ္ထု ပဋိညာတံ ဟောတိ တသ္မိံ ဝတ္ထုသ္မိံ သမနုဂ္ဂါဟီယမာနော – ‘‘ကိန္တေ အဓိဂတံ, ကိန္တိ တေ အဓိဂတံ, ကဒါ တေ အဓိဂတံ, ကတ္ထ တေ အဓိဂတံ, ကတမေ တေ ကိလေသာ ပဟီနာ, ကတမေသံ တွံ ဓမ္မာနံ လာဘီ’’တိ။

အသမနုဂ္ဂါဟီယမာနောတိ န ကေနစိ ဝုစ္စမာနော။

အာပန္နောတိ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပိတွာ ပါရာဇိကံ အာပတ္တိံ အာပန္နော ဟောတိ။

ဝိသုဒ္ဓါပေက္ခေါတိ ဂိဟီ ဝါ ဟောတုကာမော ဥပါသကော ဝါ ဟောတုကာမော အာရာမိကော ဝါ ဟောတုကာမော သာမဏေရော ဝါ ဟောတုကာမော။

အဇာနမေဝံ , အာဝုသော, အဝစံ – ဇာနာမိ, အပဿံ ပဿာမီတိ နာဟံ ဧတေ ဓမ္မေ ဇာနာမိ, နာဟံ ဧတေ ဓမ္မေ ပဿာမိ, နတ္ထိ စ ဧတေ ဓမ္မာ မယိ, န စာဟံ ဧတေသု ဓမ္မေသု သန္ဒိဿာမီတိ။

တုစ္ဆံ မုသာ ဝိလပိန္တိ တုစ္ဆကံ မယာ ဘဏိတံ, မုသာ မယာ ဘဏိတံ, အဘူတံ မယာ ဘဏိတံ, အဇာနန္တေန မယာ ဘဏိတံ။

အညတြ အဓိမာနာတိ ဌပေတွာ အဓိမာနံ။

အယမ္ပီတိ ပုရိမေ ဥပါဒါယ ဝုစ္စတိ။

ပါရာဇိကော ဟောတီတိ သေယျထာပိ နာမ တာလော မတ္ထကစ္ဆိန္နော အဘဗ္ဗော ပုန ဝိရူဠှိယာ, ဧဝမေဝ ဘိက္ခု ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပိတွာ အဿမဏော ဟောတိ အသကျပုတ္တိယော။ တေန ဝုစ္စတိ – ‘‘ပါရာဇိကော ဟောတီ’’တိ။

အသံဝါသောတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ – ဧသော သံဝါသော နာမ။ သော တေန သဒ္ဓိံ နတ္ထိ။ တေန ဝုစ္စတိ – ‘‘အသံဝါသော’’တိ။

၁၉၉. ဥတ္တရိမနုဿဓမ္မော နာမ ဈာနံ ဝိမောက္ခေါ သမာဓိ သမာပတ္တိ ဉာဏဒဿနံ မဂ္ဂဘာဝနာ ဖလသစ္ဆိကိရိယာ ကိလေသပ္ပဟာနံ ဝိနီဝရဏတာ စိတ္တဿ သုညာဂါရေ အဘိရတိ။

[ပါစိ. ၇၀] ဈာနန္တိ ပဌမံ ဈာနံ ဒုတိယံ ဈာနံ တတိယံ ဈာနံ စတုတ္ထံ ဈာနံ။

[ပါစိ. ၇၀] ဝိမောက္ခေါတိ သုညတော ဝိမောက္ခေါ အနိမိတ္တော ဝိမောက္ခေါ အပ္ပဏိဟိတော ဝိမောက္ခေါ။

[ပါစိ. ၇၀] သမာဓီတိ သုညတော သမာဓိ အနိမိတ္တော သမာဓိ အပ္ပဏိဟိတော သမာဓိ။

[ပါစိ. ၇၀] သမာပတ္တီတိ သုညတာ သမာပတ္တိ အနိမိတ္တာ သမာပတ္တိ အပ္ပဏိဟိတာ သမာပတ္တိ။

[ပါစိ. ၇၀] ဉာဏဒဿနန္တိ တိဿော ဝိဇ္ဇာ။

[ပါစိ. ၇၀] မဂ္ဂဘာဝနာတိ စတ္တာရော သတိပဋ္ဌာနာ, စတ္တာရော သမ္မပ္ပဓါနာ, စတ္တာရော ဣဒ္ဓိပါဒါ, ပဉ္စိန္ဒြိယာနိ, ပဉ္စ ဗလာနိ, သတ္တ ဗောဇ္ဈင်္ဂါ, အရိယော အဋ္ဌင်္ဂိကော မဂ္ဂေါ။

[ပါစိ. ၇၀] ဖလသစ္ဆိကိရိယာတိ သောတာပတ္တိဖလဿ သစ္ဆိကိရိယာ, သကဒါဂါမိဖလဿ သစ္ဆိကိရိယာ, အနာဂါမိဖလဿ သစ္ဆိကိရိယာ, အရဟတ္တဿ [အရဟတ္တဖလဿ (သျာ.)] သစ္ဆိကိရိယာ။

[ပါစိ. ၇၀] ကိလေသပ္ပဟာနန္တိ ရာဂဿ ပဟာနံ ဒေါသဿ ပဟာနံ မောဟဿ ပဟာနံ။

[ပါစိ. ၇၀] ဝိနီဝရဏတာ စိတ္တဿာတိ ရာဂါ စိတ္တံ ဝိနီဝရဏတာ, ဒေါသာ စိတ္တံ ဝိနီဝရဏတာ, မောဟာ စိတ္တံ ဝိနီဝရဏတာ။

[ပါစိ. ၇၀] သုညာဂါရေ အဘိရတီတိ ပဌမေန ဈာနေန သုညာဂါရေ အဘိရတိ, ဒုတိယေန ဈာနေန သုညာဂါရေ အဘိရတိ, တတိယေန ဈာနေန သုညာဂါရေ အဘိရတိ, စတုတ္ထေန ဈာနေန သုညာဂါရေ အဘိရတိ။

၂၀၀. တီဟာကာရေဟိ ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ, ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ ဝိနိဓါယ ခန္တိံ။

ဆဟာကာရေဟိ ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၁. တီဟာကာရေဟိ ပဌမံ ဈာနံ သမာပဇ္ဇာမီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမံ ဈာနံ သမာပဇ္ဇာမီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမံ ဈာနံ သမာပဇ္ဇာမီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ။

ဆဟာကာရေဟိ ပဌမံ ဈာနံ သမာပဇ္ဇာမီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမံ ဈာနံ သမာပဇ္ဇာမီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၂. တီဟာကာရေဟိ ပဌမံ ဈာနံ သမာပန္နောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမံ ဈာနံ သမာပန္နောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမံ ဈာနံ သမာပန္နောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ။

ဆဟာကာရေဟိ ပဌမံ ဈာနံ သမာပန္နောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမံ ဈာနံ သမာပန္နောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၃. တီဟာကာရေဟိ ပဌမဿ ဈာနဿ လာဘီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမဿ ဈာနဿ လာဘီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမဿ ဈာနဿ လာဘီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ , ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ။

ဆဟာကာရေဟိ ပဌမဿ ဈာနဿ လာဘီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမဿ ဈာနဿ လာဘီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၄. တီဟာကာရေဟိ ပဌမဿ ဈာနဿ ဝသီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမဿ ဈာနဿ ဝသီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမဿ ဈာနဿ ဝသီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ။

ဆဟာကာရေဟိ ပဌမဿ ဈာနဿ ဝသီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမဿ ဈာနဿ ဝသီမှီတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၅. တီဟာကာရေဟိ ပဌမံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ။

စတူဟာကာရေဟိ ပဌမံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ။

ပဉ္စဟာကာရေဟိ ပဌမံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ။

ဆဟာကာရေဟိ ပဌမံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ။

သတ္တဟာကာရေဟိ ပဌမံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ယထာ ဣဒံ ပဌမံ ဈာနံ ဝိတ္ထာရိတံ တံ သဗ္ဗမ္ပိ ဝိတ္ထာရေတဗ္ဗံ။

၂၀၆. တီဟာကာရေဟိ။ပေ.။ သတ္တဟာကာရေဟိ ဒုတိယံ ဈာနံ။ပေ.။ တတိယံ ဈာနံ။ပေ.။ စတုတ္ထံ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ စတုတ္ထဿ ဈာနဿ လာဘီမှိ။ ဝသီမှိ။ စတုတ္ထံ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

၂၀၇. တီဟာကာရေဟိ သုညတံ ဝိမောက္ခံ။ အနိမိတ္တံ ဝိမောက္ခံ။ အပ္ပဏိဟိတံ ဝိမောက္ခံ။ သမာပဇ္ဇိံ။ သမာပဇ္ဇာမိ။ သမာပန္နော။ အပ္ပဏိဟိတဿ ဝိမောက္ခဿ လာဘီမှိ။ ဝသီမှိ။ အပ္ပဏိဟိတော ဝိမောက္ခေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ပေ.။။

တီဟာကာရေဟိ သုညတံ သမာဓိံ။ အနိမိတ္တံ သမာဓိံ။ အပ္ပဏိဟိတံ သမာဓိံ သမာပဇ္ဇိံ။ သမာပဇ္ဇာမိ။ သမာပန္နော။ အပ္ပဏိဟိတဿ သမာဓိဿ လာဘီမှိ။ ဝသီမှိ။ အပ္ပဏိဟိတော သမာဓိ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ သုညတံ သမာပတ္တိံ။ အနိမိတ္တံ သမာပတ္တိံ။ အပ္ပဏိဟိတံ သမာပတ္တိံ သမာပဇ္ဇိံ။ သမာပဇ္ဇာမိ။ သမာပန္နော။ အပ္ပဏိဟိတာယ သမာပတ္တိယာ လာဘီမှိ။ ဝသီမှိ။ အပ္ပဏိဟိတာ သမာပတ္တိ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ တိဿော ဝိဇ္ဇာ သမာပဇ္ဇိံ။ သမာပဇ္ဇာမိ သမာပန္နော။ တိဿန္နံ ဝိဇ္ဇာနံ လာဘီမှိ။ ဝသီမှိ။ တိဿော ဝိဇ္ဇာ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ စတ္တာရော သတိပဋ္ဌာနေ။ စတ္တာရော သမ္မပ္ပဓါနေ။ စတ္တာရော ဣဒ္ဓိပါဒေ သမာပဇ္ဇိံ။ သမာပဇ္ဇာမိ။ သမာပန္နော။ စတုန္နံ ဣဒ္ဓိပါဒါနံ လာဘီမှိ။ ဝသီမှိ။ စတ္တာရော ဣဒ္ဓိပါဒါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဉ္စိန္ဒြိယာနိ။ ပဉ္စ ဗလာနိ သမာပဇ္ဇိံ။ သမာပဇ္ဇာမိ။ သမာပန္နော ။ ပဉ္စန္နံ ဗလာနံ လာဘီမှိ။ ဝသီမှိ။ ပဉ္စဗလာနိ သစ္ဆိကတာနိ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ သတ္တ ဗောဇ္ဈင်္ဂေ သမာပဇ္ဇိံ။ သမာပဇ္ဇာမိ။ သမာပန္နော။ သတ္တန္နံ ဗောဇ္ဈင်္ဂါနံ လာဘီမှိ။ ဝသီမှိ။ သတ္တ ဗောဇ္ဈင်္ဂါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ အရိယံ အဋ္ဌင်္ဂိကံ မဂ္ဂံ သမာပဇ္ဇိံ။ သမာပဇ္ဇာမိ။ သမာပန္နော။ အရိယဿ အဋ္ဌင်္ဂိကဿ မဂ္ဂဿ လာဘီမှိ။ ဝသီမှိ။ အရိယော အဋ္ဌင်္ဂိကော မဂ္ဂေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ သောတာပတ္တိဖလံ။ သကဒါဂါမိဖလံ။ အနာဂါမိဖလံ။ အရဟတ္တံ သမာပဇ္ဇိံ။ သမာပဇ္ဇာမိ။ သမာပန္နော။ အရဟတ္တဿ လာဘီမှိ ဝသီမှိ အရဟတ္တံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ ။

တီဟာကာရေဟိ ရာဂေါ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ဒေါသော မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟော မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ရာဂါ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ဒေါသာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ။ပေ.။ သတ္တဟာကာရေဟိ မောဟာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ – ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

သုဒ္ဓိကံ နိဋ္ဌိတံ။

၂၀၈. တီဟာကာရေဟိ ပဌမဉ္စ ဈာနံ ဒုတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ ဒုတိယဿ စ ဈာနဿ လာဘီမှိ။ ဝသီမှိ။ ပဌမဉ္စ ဈာနံ ဒုတိယဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ပေ.။။

တီဟာကာရေဟိ ပဌမဉ္စ ဈာနံ တတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ တတိယဿ စ ဈာနဿ လာဘီမှိ။ ဝသီမှိ။ ပဌမဉ္စ ဈာနံ တတိယဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ စတုတ္ထဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ စတုတ္ထဿ စ ဈာနဿ လာဘီမှိ။ ဝသီမှိ။ ပဌမဉ္စ ဈာနံ စတုတ္ထဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ သုညတဉ္စ ဝိမောက္ခံ။ ပဌမဉ္စ ဈာနံ အနိမိတ္တဉ္စ ဝိမောက္ခံ။ ပဌမဉ္စ ဈာနံ အပ္ပဏိဟိတဉ္စ ဝိမောက္ခံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ အပ္ပဏိဟိတဿ စ ဝိမောက္ခဿ လာဘီမှိ။ ဝသီမှိ။ ပဌမဉ္စ ဈာနံ အပ္ပဏိဟိတော စ ဝိမောက္ခေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ သုညတဉ္စ သမာဓိံ။ ပဌမဉ္စ ဈာနံ အနိမိတ္တဉ္စ သမာဓိံ။ ပဌမဉ္စ ဈာနံ အပ္ပဏိဟိတဉ္စ သမာဓိံ သမာပဇ္ဇိံ။ သမာပဇ္ဇာမိ။ သမာပန္နော ပဌမဿ စ ဈာနဿ အပ္ပဏိဟိတဿ စ သမာဓိဿ လာဘီမှိ။ ဝသီမှိ။ ပဌမဉ္စ ဈာနံ အပ္ပဏိဟိတော စ သမာဓိ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ သုညတဉ္စ သမာပတ္တိံ။ ပဌမဉ္စ ဈာနံ အနိမိတ္တဉ္စ သမာပတ္တိံ။ ပဌမဉ္စ ဈာနံ အပ္ပဏိဟိတဉ္စ သမာပတ္တိံ သမာပဇ္ဇိံ။ သမာပဇ္ဇာမိ။ သမာပန္နော ပဌမဿ စ ဈာနဿ အပ္ပဏိဟိတာယ စ သမာပတ္တိယာ လာဘီမှိ။ ဝသီမှိ။ ပဌမဉ္စ ဈာနံ အပ္ပဏိဟိတာ စ သမာပတ္တိ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ တိဿော စ ဝိဇ္ဇာ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ တိဿန္နဉ္စ ဝိဇ္ဇာနံ လာဘီမှိ။ ဝသီမှိ။ ပဌမဉ္စ ဈာနံ တိဿော စ ဝိဇ္ဇာ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ စတ္တာရော စ သတိပဋ္ဌာနေ။ ပဌမဉ္စ ဈာနံ စတ္တာရော စ သမ္မပ္ပဓါနေ။ ပဌမဉ္စ ဈာနံ စတ္တာရော စ ဣဒ္ဓိပါဒေ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ စတုန္နဉ္စ ဣဒ္ဓိပါဒါနံ လာဘီမှိ။ ဝသီမှိ။ ပဌမဉ္စ ဈာနံ စတ္တာရော စ ဣဒ္ဓိပါဒါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ ပဉ္စ စ ဣန္ဒြိယာနိ။ ပဌမဉ္စ ဈာနံ ပဉ္စ စ ဗလာနိ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ ပဉ္စန္နဉ္စ ဗလာနံ လာဘီမှိ။ ဝသီမှိ။ ပဌမဉ္စ ဈာနံ ပဉ္စ စ ဗလာနိ သစ္ဆိကတာနိ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

၂၀၉. တီဟာကာရေဟိ ပဌမဉ္စ ဈာနံ သတ္တ စ ဗောဇ္ဈင်္ဂေ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ သတ္တန္နဉ္စ ဗောဇ္ဈင်္ဂါနံ လာဘီမှိ။ ဝသီမှိ။ ပဌမဉ္စ ဈာနံ သတ္တ စ ဗောဇ္ဈင်္ဂါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ အရိယဉ္စ အဋ္ဌင်္ဂိကံ မဂ္ဂံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ အရိယဿ စ အဋ္ဌင်္ဂိကဿ မဂ္ဂဿ လာဘီမှိ ဝသီမှိ။ ပဌမဉ္စ ဈာနံ အရိယော စ အဋ္ဌင်္ဂိကော မဂ္ဂေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ သောတာပတ္တိဖလဉ္စ။ ပဌမဉ္စ ဈာနံ သကဒါဂါမိဖလဉ္စ။ ပဌမဉ္စ ဈာနံ အနာဂါမိဖလဉ္စ။ ပဌမဉ္စ ဈာနံ အရဟတ္တဉ္စ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ အရဟတ္တဿ စ လာဘီမှိ။ ဝသီမှိ။ ပဌမဉ္စ ဈာနံ အရဟတ္တဉ္စ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ပဌမဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ လာဘီမှိ။ ဝသီမှိ။ ပဌမဉ္စ ဈာနံ သစ္ဆိကတံ မယာ, ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ။ပေ.။ သတ္တဟာကာရေဟိ ပဌမဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ပဌမဿ စ ဈာနဿ လာဘီမှိ။ ဝသီမှိ။ ပဌမဉ္စ ဈာနံ သစ္ဆိကတံ မယာ, ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏံ။ မောဟာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ခဏ္ဍစက္ကံ နိဋ္ဌိတံ။

၂၁၀. တီဟာကာရေဟိ ဒုတိယဉ္စ ဈာနံ တတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ဒုတိယဿ စ ဈာနဿ တတိယဿ စ ဈာနဿ လာဘီမှိ။ ဝသီမှိ။ ဒုတိယဉ္စ ဈာနံ တတိယဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ဒုတိယဉ္စ ဈာနံ စတုတ္ထဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ဒုတိယဿ စ ဈာနဿ စတုတ္ထဿ စ ဈာနဿ လာဘီမှိ။ ဝသီမှိ။ ဒုတိယဉ္စ ဈာနံ စတုတ္ထဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ဒုတိယဉ္စ ဈာနံ သုညတဉ္စ ဝိမောက္ခံ။ အနိမိတ္တဉ္စ ဝိမောက္ခံ။ အပ္ပဏိဟိတဉ္စ ဝိမောက္ခံ။ သုညတဉ္စ သမာဓိံ။ အနိမိတ္တဉ္စ သမာဓိံ။ အပ္ပဏိဟိတဉ္စ သမာဓိံ။ သုညတဉ္စ သမာပတ္တိံ။ အနိမိတ္တဉ္စ သမာပတ္တိံ။ အပ္ပဏိဟိတဉ္စ သမာပတ္တိံ။ တိဿော စ ဝိဇ္ဇာ။ စတ္တာရော စ သတိပဋ္ဌာနေ။ စတ္တာရော စ သမ္မပ္ပဓါနေ။ စတ္တာရော စ ဣဒ္ဓိပါဒေ။ ပဉ္စ စ ဣန္ဒြိယာနိ။ ပဉ္စ စ ဗလာနိ။ သတ္တ စ ဗောဇ္ဈင်္ဂေ။ အရိယဉ္စ အဋ္ဌင်္ဂိကံ မဂ္ဂံ။ သောတာပတ္တိဖလဉ္စ။ သကဒါဂါမိဖလဉ္စ။ အနာဂါမိဖလဉ္စ။ အရဟတ္တဉ္စ သမာပဇ္ဇိံ။ သမာပဇ္ဇာမိ။ သမာပန္နော။ ဒုတိယဿ စ ဈာနဿ အရဟတ္တဿ စ လာဘီမှိ။ ဝသီမှိ။ ဒုတိယဉ္စ ဈာနံ အရဟတ္တဉ္စ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ဒုတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ဒုတိယဿ စ ဈာနဿ လာဘီမှိ။ ဝသီမှိ။ ဒုတိယဉ္စ ဈာနံ သစ္ဆိကတံ မယာ, ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏံ။ မောဟာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ ။ပေ.။ သတ္တဟာကာရေဟိ ဒုတိယဉ္စ ဈာနံ ပဌမဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ ဒုတိယဿ စ ဈာနဿ ပဌမဿ စ ဈာနဿ လာဘီမှိ။ ဝသီမှိ။ ဒုတိယဉ္စ ဈာနံ ပဌမဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ပေ.။ ဝိနိဓါယ ဘာဝံ။

ဗဒ္ဓစက္ကံ။

ဧဝံ ဧကေကံ မူလံ ကာတုန ဗဒ္ဓစက္ကံ ပရိဝတ္တကံ ကတ္တဗ္ဗံ။

ဣဒံ သံခိတ္တံ။

၂၁၁. တီဟာကာရေဟိ တတိယဉ္စ ဈာနံ စတုတ္ထဉ္စ ဈာနံ။ပေ.။ တတိယဉ္စ ဈာနံ အရဟတ္တဉ္စ သမာပဇ္ဇိံ။ သမာပဇ္ဇာမိ။ သမာပန္နော။ တတိယဿ စ ဈာနဿ အရဟတ္တဿ စ လာဘီမှိ။ ဝသီမှိ။ တတိယဉ္စ ဈာနံ အရဟတ္တဉ္စ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ တတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ တတိယဿ စ ဈာနဿ လာဘီမှိ။ ဝသီမှိ။ တတိယဉ္စ ဈာနံ သစ္ဆိကတံ မယာ, ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏံ။ မောဟာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ တတိယဉ္စ ဈာနံ ပဌမဉ္စ ဈာနံ။ တတိယဉ္စ ဈာနံ ဒုတိယဉ္စ ဈာနံ သမာပဇ္ဇိံ။ သမာပဇ္ဇာမိ။ သမာပန္နော။ တတိယဿ စ ဈာနဿ ဒုတိယဿ စ ဈာနဿ လာဘီမှိ။ ဝသီမှိ။ တတိယဉ္စ ဈာနံ ဒုတိယဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီကာရေဟိ မောဟာ စ မေ စိတ္တံ ဝိနီဝရဏံ ပဌမဉ္စ ဈာနံ။ပေ.။ ဒုတိယဉ္စ ဈာနံ။ တတိယဉ္စ ဈာနံ။ စတုတ္ထဉ္စ ဈာနံ သမာပဇ္ဇိံ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ စတုတ္ထဿ စ ဈာနဿ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ စတုတ္ထဉ္စ ဈာနံ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

၂၁၂. တီဟာကာရေဟိ မောဟာ စ မေ စိတ္တံ ဝိနီဝရဏံ သုညတဉ္စ ဝိမောက္ခံ။ အနိမိတ္တဉ္စ ဝိမောက္ခံ။ အပ္ပဏိဟိတဉ္စ ဝိမောက္ခံ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ အပ္ပဏိဟိတဿ စ ဝိမောက္ခဿ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ အပ္ပဏိဟိတော စ ဝိမောက္ခေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ သုညတဉ္စ သမာဓိံ။ အနိမိတ္တဉ္စ သမာဓိံ။ အပ္ပဏိဟိတဉ္စ သမာဓိံ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ အပ္ပဏိဟိတဿ စ သမာဓိဿ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ အပ္ပဏိဟိတော စ သမာဓိ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ သုညတဉ္စ သမာပတ္တိံ။ အနိမိတ္တဉ္စ သမာပတ္တိံ။ အပ္ပဏိဟိတဉ္စ သမာပတ္တိံ သမာပဇ္ဇိံ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ အပ္ပဏိဟိတာယ စ သမာပတ္တိယာ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ အပ္ပဏိဟိတာ စ သမာပတ္တိ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ တိဿော စ ဝိဇ္ဇာ သမာပဇ္ဇိံ။ သမာပဇ္ဇာမိ။ သမာပန္နော။ ‘မောဟာ စ မေ စိတ္တံ ဝိနီဝရဏံ တိဿန္နဉ္စ ဝိဇ္ဇာနံ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ တိဿော စ ဝိဇ္ဇာ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ စတ္တာရော စ သတိပဋ္ဌာနေ။ စတ္တာရော စ သမ္မပ္ပဓါနေ။ စတ္တာရော စ ဣဒ္ဓိပါဒေ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ စတုန္နဉ္စ ဣဒ္ဓိပါဒါနံ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ စတ္တာရော စ ဣဒ္ဓိပါဒါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

၂၁၃. တီဟာကာရေဟိ မောဟာ စ မေ စိတ္တံ ဝိနီဝရဏံ ပဉ္စ စ ဣန္ဒြိယာနိ။ ပဉ္စ စ ဗလာနိ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ ပဉ္စန္နဉ္စ ဗလာနံ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ ပဉ္စ စ ဗလာနိ သစ္ဆိကတာနိ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ သတ္တ စ ဗောဇ္ဈင်္ဂေ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ သတ္တန္နဉ္စ ဗောဇ္ဈင်္ဂါနံ လာဘီမှိ ။ ဝသီမှိ။ မောဟာ စ မေ စိတ္တံ ဝိနီဝရဏံ သတ္တ စ ဗောဇ္ဈင်္ဂါ သစ္ဆိကတာ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ အရိယဉ္စ အဋ္ဌင်္ဂိကံ မဂ္ဂံ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ အရိယဿ စ အဋ္ဌင်္ဂိကဿ မဂ္ဂဿ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ အရိယော စ အဋ္ဌင်္ဂိကော မဂ္ဂေါ သစ္ဆိကတော မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ သောတာပတ္တိဖလဉ္စ။ သကဒါဂါမိဖလဉ္စ။ အနာဂါမိဖလဉ္စ။ အရဟတ္တဉ္စ သမာပဇ္ဇိံ။ သမာပဇ္ဇာမိ။ သမာပန္နော။ မောဟာ စ မေ စိတ္တံ ဝိနီဝရဏံ အရဟတ္တဿ စ လာဘီမှိ။ ဝသီမှိ။ မောဟာ စ မေ စိတ္တံ ဝိနီဝရဏံ အရဟတ္တဉ္စ သစ္ဆိကတံ မယာတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ မောဟာ စ မေ စိတ္တံ ဝိနီဝရဏံ, ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။

တီဟာကာရေဟိ။ပေ.။ သတ္တဟာကာရေဟိ မောဟာ စ မေ စိတ္တံ ဝိနီဝရဏံ ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ဧကမူလကံ နိဋ္ဌိတံ။ [ဧကမူလကံ သင်္ခိတ္တံ နိဋ္ဌိတံ (သျာ.)]

ယထာ ဧကမူလကံ ဝိတ္ထာရိတံ ဧဝမေဝ ဒုမူလကာဒိပိ ဝိတ္ထာရေတဗ္ဗံ။

ဣဒံ သဗ္ဗမူလကံ

၂၁၄. တီဟာကာရေဟိ ။ပေ.။ သတ္တဟာကာရေဟိ ပဌမဉ္စ ဈာနံ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ သုညတဉ္စ ဝိမောက္ခံ အနိမိတ္တဉ္စ ဝိမောက္ခံ အပ္ပဏိဟိတဉ္စ ဝိမောက္ခံ သုညတဉ္စ သမာဓိံ အနိမိတ္တဉ္စ သမာဓိံ အပ္ပဏိဟိတဉ္စ သမာဓိံ သုညတဉ္စ သမာပတ္တိံ အနိမိတ္တဉ္စ သမာပတ္တိံ အပ္ပဏိဟိတဉ္စ သမာပတ္တိံ တိဿော စ ဝိဇ္ဇာ စတ္တာရော စ သတိပဋ္ဌာနေ စတ္တာရော စ သမ္မပ္ပဓါနေ စတ္တာရော စ ဣဒ္ဓိပါဒေ ပဉ္စ စ ဣန္ဒြိယာနိ ပဉ္စ စ ဗလာနိ သတ္တ စ ဗောဇ္ဈင်္ဂေ အရိယဉ္စ အဋ္ဌင်္ဂိကံ မဂ္ဂံ သောတာပတ္တိဖလဉ္စ သကဒါဂါမိဖလဉ္စ အနာဂါမိဖလဉ္စ အရဟတ္တဉ္စ သမာပဇ္ဇိံ။ သမာပဇ္ဇာမိ။ သမာပန္နော။ပေ.။ ရာဂေါ စ မေ စတ္တော, ဒေါသော စ မေ စတ္တော, မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ စ မေ စိတ္တံ ဝိနီဝရဏံ, ဒေါသာ စ မေ စိတ္တံ ဝိနီဝရဏံ, မောဟာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ အာပတ္တိ ပါရာဇိကဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

သဗ္ဗမူလကံ နိဋ္ဌိတံ။

သုဒ္ဓိကဝါရကထာ နိဋ္ဌိတာ။

၂၁၅. တီဟာကာရေဟိ ပဌမံ ဈာနံ သမာပဇ္ဇိန္တိ ဝတ္တုကာမော ဒုတိယံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ ပဌမံ ဈာနံ သမာပဇ္ဇိန္တိ ဝတ္တုကာမော တတိယံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ ပဌမံ ဈာနံ သမာပဇ္ဇိန္တိ ဝတ္တုကာမော စတုတ္ထံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ ။ပေ.။ သတ္တဟာကာရေဟိ ပဌမံ ဈာနံ သမာပဇ္ဇိန္တိ ဝတ္တုကာမော သုညတံ ဝိမောက္ခံ။ အနိမိတ္တံ ဝိမောက္ခံ။ အပ္ပဏိဟိတံ ဝိမောက္ခံ။ သုညတံ သမာဓိံ။ အနိမိတ္တံ သမာဓိံ။ အပ္ပဏိဟိတံ သမာဓိံ။ သုညတံ သမာပတ္တိံ။ အနိမိတ္တံ သမာပတ္တိံ။ အပ္ပဏိဟိတံ သမာပတ္တိံ။ တိဿော ဝိဇ္ဇာ။ စတ္တာရော သတိပဋ္ဌာနေ။ စတ္တာရော သမ္မပ္ပဓါနေ။ စတ္တာရော ဣဒ္ဓိပါဒေ။ ပဉ္စိန္ဒြိယာနိ။ ပဉ္စ ဗလာနိ။ သတ္တ ဗောဇ္ဈင်္ဂေ။ အရိယံ အဋ္ဌင်္ဂိကံ မဂ္ဂံ။ သောတာပတ္တိဖလံ။ သကဒါဂါမိဖလံ။ အနာဂါမိဖလံ။ အရဟတ္တံ သမာပဇ္ဇိံ။ပေ.။ ရာဂေါ မေ စတ္တော။ ဒေါသော မေ စတ္တော။ မောဟော မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ မေ စိတ္တံ ဝိနီဝရဏံ။ ဒေါသာ မေ စိတ္တံ ဝိနီဝရဏံ။ မောဟာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ဝတ္ထုဝိသာရကဿ ဧကမူလကဿ ခဏ္ဍစက္ကံ နိဋ္ဌိတံ။

၂၁၆. တီဟာကာရေဟိ ဒုတိယံ ဈာနံ သမာပဇ္ဇိန္တိ ဝတ္တုကာမော တတိယံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ ဒုတိယံ ဈာနံ သမာပဇ္ဇိန္တိ ဝတ္တုကာမော စတုတ္ထံ ဈာနံ သမာပဇ္ဇိန္တိ။ပေ.။ မောဟာ စ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ။ပေ.။ သတ္တဟာကာရေဟိ ဒုတိယံ ဈာနံ သမာပဇ္ဇိန္တိ ဝတ္တုကာမော ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ ; န ပဋိဝိဇာနန္တဿ အာပတ္တိ ထုလ္လစ္စယဿ။ပေ.။ ဝိနိဓါယ ဘာဝံ။

ဝတ္ထုဝိသာရကဿ ဧကမူလကဿ ဗဒ္ဓစက္ကံ။

မူလံ သံခိတ္တံ။

၂၁၇. တီဟာကာရေဟိ မောဟာ မေ စိတ္တံ ဝိနီဝရဏန္တိ ဝတ္တုကာမော ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ။ပေ.။ သတ္တဟာကာရေဟိ မောဟာ မေ စိတ္တံ ဝိနီဝရဏန္တိ ဝတ္တုကာမော ဒေါသာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။ပေ.။ ဝိနိဓါယ ဘာဝံ။

ဝတ္ထုဝိသာရကဿ ဧကမူလကံ နိဋ္ဌိတံ။

ယထာ ဧကမူလကံ ဝိတ္ထာရိတံ ဧဝမေဝ ဒုမူလကာဒိပိ ဝိတ္ထာရေတဗ္ဗံ။

ဣဒံ သဗ္ဗမူလကံ

၂၁၈. တီဟာကာရေဟိ။ပေ.။ သတ္တဟာကာရေဟိ ပဌမဉ္စ ဈာနံ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ သုညတဉ္စ ဝိမောက္ခံ အနိမိတ္တဉ္စ ဝိမောက္ခံ အပ္ပဏိဟိတဉ္စ ဝိမောက္ခံ သုညတဉ္စ သမာဓိံ အနိမိတ္တဉ္စ သမာဓိံ အပ္ပဏိဟိတဉ္စ သမာဓိံ သုညတဉ္စ သမာပတ္တိံ အနိမိတ္တဉ္စ သမာပတ္တိံ အပ္ပဏိဟိတဉ္စ သမာပတ္တိံ တိဿော စ ဝိဇ္ဇာ စတ္တာရော စ သတိပဋ္ဌာနေ စတ္တာရော စ သမ္မပ္ပဓါနေ စတ္တာရော စ ဣဒ္ဓိပါဒေ ပဉ္စ စ ဣန္ဒြိယာနိ ပဉ္စ စ ဗလာနိ သတ္တ စ ဗောဇ္ဈင်္ဂေ အရိယဉ္စ အဋ္ဌင်္ဂိကံ မဂ္ဂံ သောတာပတ္တိဖလဉ္စ သကဒါဂါမိဖလဉ္စ အနာဂါမိဖလဉ္စ အရဟတ္တဉ္စ သမာပဇ္ဇိံ။ပေ.။ ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏန္တိ ဝတ္တုကာမော မောဟာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။ [[ ] ဧတ္ထန္တရေ ပါဌာ သျာမပေါတ္ထကေ နတ္ထိ]

၂၁၉. တီဟာကာရေဟိ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ သုညတဉ္စ ဝိမောက္ခံ အနိမိတ္တဉ္စ ဝိမောက္ခံ အပ္ပဏိဟိတဉ္စ ဝိမောက္ခံ သုညတဉ္စ သမာဓိံ အနိမိတ္တဉ္စ သမာဓိံ အပ္ပဏိဟိတဉ္စ သမာဓိံ သုညတဉ္စ သမာပတ္တိံ အနိမိတ္တဉ္စ သမာပတ္တိံ အပ္ပဏိဟိတဉ္စ သမာပတ္တိံ တိဿော စ ဝိဇ္ဇာ စတ္တာရော စ သတိပဋ္ဌာနေ စတ္တာရော စ သမ္မပ္ပဓါနေ စတ္တာရော စ ဣဒ္ဓိပါဒေ ပဉ္စ စ ဣန္ဒြိယာနိ ပဉ္စ စ ဗလာနိ သတ္တ စ ဗောဇ္ဈင်္ဂေ အရိယဉ္စ အဋ္ဌင်္ဂိကံ မဂ္ဂံ သောတာပတ္တိဖလဉ္စ သကဒါဂါမိဖလဉ္စ အနာဂါမိဖလဉ္စ အရဟတ္တဉ္စ သမာပဇ္ဇိံ။ပေ.။ ရာဂေါ စ မေ စတ္တော။ ဒေါသော စ မေ စတ္တော။ မောဟော စ မေ စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတော။ ရာဂါ စ မေ စိတ္တံ ဝိနီဝရဏံ။ ဒေါသာ စ မေ စိတ္တံ ဝိနီဝရဏံ။ မောဟာ စ မေ စိတ္တံ ဝိနီဝရဏန္တိ ဝတ္တုကာမော ပဌမံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ တတိယဉ္စ ဈာနံ စတုတ္ထဉ္စ ဈာနံ။ပေ.။ မောဟာ စ မေ စိတ္တံ ဝိနီဝရဏံ ပဌမဉ္စ ဈာနံ သမာပဇ္ဇိန္တိ ဝတ္တုကာမော ဒုတိယံ ဈာနံ သမာပဇ္ဇိန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ; န ပဋိဝိဇာနန္တဿ အာပတ္တိ ထုလ္လစ္စယဿ။

တီဟာကာရေဟိ။ပေ.။ သတ္တဟာကာရေဟိ မောဟာ စ မေ စိတ္တံ ဝိနီဝရဏံ ပဌမဉ္စ ဈာနံ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ။ပေ.။ ရာဂါ စ မေ စိတ္တံ ဝိနီဝရဏန္တိ ဝတ္တုကာမော ဒေါသာ မေ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ပါရာဇိကဿ ; န ပဋိဝိဇာနန္တဿ အာပတ္တိ ထုလ္လစ္စယဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ဝတ္ထုဝိသာရကဿ သဗ္ဗမူလကံ နိဋ္ဌိတံ။

ဝတ္ထုဝိသာရကဿ စက္ကပေယျာလံ နိဋ္ဌိတံ။

ဝတ္ထုကာမဝါရကထာ နိဋ္ဌိတာ။

၂၂၀. တီဟာကာရေဟိ ယော တေ ဝိဟာရေ ဝသိ သော ဘိက္ခု ပဌမံ ဈာနံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု ပဌမဿ ဈာနဿ လာဘီ။ ဝသီ။ တေန ဘိက္ခုနာ ပဌမံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။

စတူဟာကာရေဟိ ။ ပဉ္စဟာကာရေဟိ။ ဆဟာကာရေဟိ။ သတ္တဟာကာရေဟိ ယော တေ ဝိဟာရေ ဝသိ သော ဘိက္ခု ပဌမံ ဈာနံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု ပဌမဿ ဈာနဿ လာဘီ။ ဝသီ။ တေန ဘိက္ခုနာ ပဌမံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

တီဟာကာရေဟိ ယော တေ ဝိဟာရေ ဝသိ သော ဘိက္ခု ဒုတိယံ ဈာနံ။ တတိယံ ဈာနံ။ စတုတ္ထံ ဈာနံ။ သုညတံ ဝိမောက္ခံ။ အနိမိတ္တံ ဝိမောက္ခံ။ အပ္ပဏိဟိတံ ဝိမောက္ခံ။ သုညတံ သမာဓိံ။ အနိမိတ္တံ သမာဓိံ။ အပ္ပဏိဟိတံ သမာဓိံ။ သုညတံ သမာပတ္တိံ။ အနိမိတ္တံ သမာပတ္တိံ။ အပ္ပဏိဟိတံ သမာပတ္တိံ။ တိဿော ဝိဇ္ဇာ။ စတ္တာရော သတိပဋ္ဌာနေ။ စတ္တာရော သမ္မပ္ပဓါနေ။ စတ္တာရော ဣဒ္ဓိပါဒေ။ ပဉ္စ ဣန္ဒြိယာနိ။ ပဉ္စ ဗလာနိ။ သတ္တ ဗောဇ္ဈင်္ဂေ။ အရိယံ အဋ္ဌင်္ဂိကံ မဂ္ဂံ။ သောတာပတ္တိဖလံ။ သကဒါဂါမိဖလံ။ အနာဂါမိဖလံ။ အရဟတ္တံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု အရဟတ္တဿ လာဘီ။ ဝသီ။ တေန ဘိက္ခုနာ အရဟတ္တံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။

တီဟာကာရေဟိ ယော တေ ဝိဟာရေ ဝသိ, တဿ ဘိက္ခုနော ရာဂေါ စတ္တော။ ဒေါသော စတ္တော။ မောဟော စတ္တော ဝန္တော မုတ္တော ပဟီနော ပဋိနိဿဋ္ဌော ဥက္ခေဋိတော သမုက္ခေဋိတောတိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။

တီဟာကာရေဟိ။ပေ.။ သတ္တဟာကာရေဟိ ယော တေ ဝိဟာရေ ဝသိ, တဿ ဘိက္ခုနော ရာဂါ စိတ္တံ ဝိနီဝရဏံ။ ဒေါသာ စိတ္တံ ဝိနီဝရဏံ။ မောဟာ စိတ္တံ ဝိနီဝရဏန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ပေ.။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

တီဟာကာရေဟိ။ပေ.။ သတ္တဟာကာရေဟိ ယော တေ ဝိဟာရေ ဝသိ သော ဘိက္ခု သုညာဂါရေ ပဌမံ ဈာနံ။ ဒုတိယံ ဈာနံ။ တတိယံ ဈာနံ။ စတုတ္ထံ ဈာနံ သမာပဇ္ဇိ ။ သမာပဇ္ဇတိ။ သမာပန္နော။ သော ဘိက္ခု သုညာဂါရေ စတုတ္ထဿ ဈာနဿ လာဘီ။ ဝသီ။ တေန ဘိက္ခုနာ သုညာဂါရေ စတုတ္ထံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ ပုဗ္ဗေဝဿ ဟောတိ မုသာ ဘဏိဿန္တိ, ဘဏန္တဿ ဟောတိ မုသာ ဘဏာမီတိ ဘဏိတဿ ဟောတိ, မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ယထာ ဣဒံ ဝိတ္ထာရိတံ ဧဝမေဝ သေသာနိပိ ဝိတ္ထာရေတဗ္ဗာနိ။

၂၂၁. တီဟာကာရေဟိ။ပေ.။ သတ္တဟာကာရေဟိ ယော တေ စီဝရံ ပရိဘုဉ္ဇိ။ ယော တေ ပိဏ္ဍပါတံ ပရိဘုဉ္ဇိ။ ယော တေ သေနာသနံ ပရိဘုဉ္ဇိ။ ယော တေ ဂိလာနပ္ပစ္စယဘေသဇ္ဇပရိက္ခါရံ ပရိဘုဉ္ဇိ သော ဘိက္ခု သုညာဂါရေ စတုတ္ထံ ဈာနံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု သုညာဂါရေ စတုတ္ထဿ ဈာနဿ လာဘီ။ ဝသီ။ တေန ဘိက္ခုနာ သုညာဂါရေ စတုတ္ထံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ပေ.။ ဝိနိဓါယ ဘာဝံ။

တီဟာကာရေဟိ။ပေ.။ သတ္တဟာကာရေဟိ ယေန တေ ဝိဟာရော ပရိဘုတ္တော။ ယေန တေ စီဝရံ ပရိဘုတ္တံ။ ယေန တေ ပိဏ္ဍပါတော ပရိဘုတ္တော။ ယေန တေ သေနာသနံ ပရိဘုတ္တံ။ ယေန တေ ဂိလာနပ္ပစ္စယဘေသဇ္ဇပရိက္ခါရော ပရိဘုတ္တော။ သော ဘိက္ခု သုညာဂါရေ စတုတ္ထံ ဈာနံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု သုညာဂါရေ စတုတ္ထဿ ဈာနဿ လာဘီ။ ဝသီ။ တေန ဘိက္ခုနာ သုညာဂါရေ စတုတ္ထံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ပေ.။ ဝိနိဓါယ ဘာဝံ။

တီဟာကာရေဟိ ။ပေ.။ သတ္တဟာကာရေဟိ ယံ တွံ အာဂမ္မ ဝိဟာရံ အဒါသိ။ စီဝရံ အဒါသိ။ ပိဏ္ဍပါတံ အဒါသိ။ သေနာသနံ အဒါသိ။ ဂိလာနပ္ပစ္စယဘေသဇ္ဇပရိက္ခါရံ အဒါသိ သော ဘိက္ခု သုညာဂါရေ စတုတ္ထံ ဈာနံ သမာပဇ္ဇိ။ သမာပဇ္ဇတိ။ သမာပန္နော။ သော ဘိက္ခု သုညာဂါရေ စတုတ္ထဿ ဈာနဿ လာဘီ။ ဝသီ။ တေန ဘိက္ခုနာ သုညာဂါရေ စတုတ္ထံ ဈာနံ သစ္ဆိကတန္တိ သမ္ပဇာနမုသာ ဘဏန္တဿ ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ။ ပုဗ္ဗေဝဿ ဟောတိ မုသာ ဘဏိဿန္တိ , ဘဏန္တဿ ဟောတိ မုသာ ဘဏာမီတိ, ဘဏိတဿ ဟောတိ မုသာ မယာ ဘဏိတန္တိ, ဝိနိဓါယ ဒိဋ္ဌိံ, ဝိနိဓါယ ခန္တိံ, ဝိနိဓါယ ရုစိံ, ဝိနိဓါယ ဘာဝံ။

ပေယျာလပန္နရသကံ နိဋ္ဌိတံ။

ပစ္စယပ္ပဋိသံယုတ္တဝါရကထာ နိဋ္ဌိတာ။

ဥတ္တရိမနုဿဓမ္မစက္ကပေယျာလံ နိဋ္ဌိတံ။

၂၂၂. အနာပတ္တိ အဓိမာနေန, အနုလ္လပနာဓိပ္ပါယဿ, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

အဓိမာနေ [အဓိမာနေန (ဣ.)] အရညမှိ၊ ပိဏ္ဍောပဇ္ဈာရိယာပထော။

သံယောဇနာ ရဟောဓမ္မာ၊ ဝိဟာရော ပစ္စုပဋ္ဌိတော။

န ဒုက္ကရံ ဝီရိယမထောပိ မစ္စုနော။

ဘာယာဝုသော ဝိပ္ပဋိသာရိ သမ္မာ။

ဝိရိယေန ယောဂေန အာရာဓနာယ။

အထ ဝေဒနာယ အဓိဝါသနာ ဒုဝေ။

ဗြာဟ္မဏေ ပဉ္စ ဝတ္ထူနိ၊ အညံ ဗျာကရဏာ တယော။

အဂါရာဝရဏာ ကာမာ၊ ရတိ စာပိ အပက္ကမိ။

အဋ္ဌိ ပေသိ ဥဘော ဂါဝဃာတကာ။

ပိဏ္ဍော သာကုဏိကော နိစ္ဆဝိ ဩရဗ္ဘိ။

အသိ စ သူကရိကော သတ္တိ မာဂဝိ။

ဥသု စ ကာရဏိကော သူစိ သာရထိ။

ယော စ သိဗ္ဗီယတိ သူစကော ဟိ သော။

အဏ္ဍဘာရိ အဟု ဂါမကူဋကော။

ကူပေ နိမုဂ္ဂေါ ဟိ သော ပါရဒါရိကော။

ဂူထခါဒီ အဟု ဒုဋ္ဌဗြာဟ္မဏော။

နိစ္ဆဝိတ္ထီ အတိစာရိနီ အဟု။

မင်္ဂုလိတ္ထီ အဟု ဣက္ခဏိတ္ထိကာ။

ဩကိလိနီ ဟိ သပတ္တင်္ဂါရောကိရိ။

သီသစ္ဆိန္နော အဟု စောရဃာတကော။

ဘိက္ခု ဘိက္ခုနီ သိက္ခမာနာ။

သာမဏေရော အထ သာမဏေရိကာ။

ကဿပဿ ဝိနယသ္မိံ ပဗ္ဗဇံ။

ပါပကမ္မမကရိံသု တာဝဒေ။

တပေါဒါ ရာဇဂဟေ ယုဒ္ဓံ၊ နာဂါနောဂါဟနေန စ။

သောဘိတော အရဟံ ဘိက္ခု၊ ပဉ္စကပ္ပသတံ သရေတိ။

ဝိနီတဝတ္ထု

၂၂၃. တေန ခေါ ပန သမယေန အညတရော ဘိက္ခု အဓိမာနေန အညံ ဗျာကာသိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ။ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, အဓိမာနေနာ’’တိ။

တေန ခေါ ပန သမယေန အညတရော ဘိက္ခု ပဏိဓါယ အရညေ ဝိဟရတိ – ‘‘ဧဝံ မံ ဇနော သမ္ဘာဝေဿတီ’’တိ။ တံ ဇနော သမ္ဘာဝေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ပဏိဓါယ အရညေ ဝတ္ထဗ္ဗံ။ ယော ဝသေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ပဏိဓါယ ပိဏ္ဍာယ စရတိ – ‘‘ဧဝံ မံ ဇနော သမ္ဘာဝေဿတီ’’တိ။ တံ ဇနော သမ္ဘာဝေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ပဏိဓါယ ပိဏ္ဍာယ စရိတဗ္ဗံ။ ယော စရေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဧတဒဝေါစ – ‘‘ယေ, အာဝုသော, အမှာကံ ဥပဇ္ဈာယဿ သဒ္ဓိဝိဟာရိကာ သဗ္ဗေဝ အရဟန္တော’’တိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဥလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဧတဒဝေါစ – ‘‘ယေ, အာဝုသော, အမှာကံ ဥပဇ္ဈာယဿ အန္တေဝါသိကာ သဗ္ဗေဝ မဟိဒ္ဓိကာ မဟာနုဘာဝါ’’တိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဥလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ပဏိဓါယ စင်္ကမတိ။ ပဏိဓါယ တိဋ္ဌတိ။ ပဏိဓါယ နိသီဒတိ။ ပဏိဓါယ သေယျံ ကပ္ပေတိ – ‘‘ဧဝံ မံ ဇနော သမ္ဘာဝေဿတီ’’တိ။ တံ ဇနော သမ္ဘာဝေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ။ န စ, ဘိက္ခဝေ, ပဏိဓါယ သေယျာ ကပ္ပေတဗ္ဗာ။ ယော ကပ္ပေယျ, အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ။ သောပိ ဧဝမာဟ – ‘‘မယှမ္ပိ, အာဝုသော, သံယောဇနာ ပဟီနာ’’တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၂၂၄. တေန ခေါ ပန သမယေန အညတရော ဘိက္ခု ရဟောဂတော ဥတ္တရိမနုဿဓမ္မံ ဥလ္လပတိ။ ပရစိတ္တဝိဒူ ဘိက္ခု တံ ဘိက္ခုံ အပသာဒေသိ – ‘‘မာ, အာဝုသော, ဧဝရူပံ အဘဏိ။ နတ္ထေသော တုယှ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ရဟောဂတော ဥတ္တရိမနုဿဓမ္မံ ဥလ္လပတိ။ ဒေဝတာ တံ ဘိက္ခုံ အပသာဒေသိ – ‘‘မာ, ဘန္တေ, ဧဝရူပံ အဘဏိ။ နတ္ထေသော တုယှ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု အညတရံ ဥပါသကံ ဧတဒဝေါစ – ‘‘ယော, အာဝုသော , တုယှံ ဝိဟာရေ ဝသတိ သော ဘိက္ခု အရဟာ’’တိ ။ သော စ တဿ ဝိဟာရေ ဝသတိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဥလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု အညတရံ ဥပါသကံ ဧတဒဝေါစ – ‘‘ယံ တွံ, အာဝုသော, ဥပဋ္ဌေသိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရေန သော ဘိက္ခု အရဟာ’’တိ။ သော စ တံ ဥပဋ္ဌေတိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရေန။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဥလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၂၂၅. တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘နာဝုသော, ဒုက္ကရံ အညံ ဗျာကာတု’’န္တိ။ တဿ ကုက္ကုစ္စံ အဟောသိ – ‘‘ယေ ခေါ တေ ဘဂဝတော သာဝကာ တေ ဧဝံ ဝဒေယျုံ။ အဟဉ္စမှိ န ဘဂဝတော သာဝကော။ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘ကိံစိတ္တော တွံ, ဘိက္ခူ’’တိ? ‘‘အနုလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ, အာဝုသော, ဓမ္မော အာရဒ္ဓဝီရိယေနာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘မာ ခေါ, အာဝုသော, ဘာယီ’’တိ။ နာဟံ, အာဝုသော, မစ္စုနော ဘာယာမီ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘မာ ခေါ, အာဝုသော, ဘာယီ’’တိ။ ‘‘ယော နူနာဝုသော, ဝိပ္ပဋိသာရီ အဿ သော ဘာယေယျာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ, အာဝုသော, ဓမ္မော သမ္မာပယုတ္တေနာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ, အာဝုသော, ဓမ္မော အာရဒ္ဓဝီရိယေနာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ, အာဝုသော, ဓမ္မော ယုတ္တယောဂေနာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘ကစ္စာဝုသော, ခမနီယံ, ကစ္စိ ယာပနီယ’’န္တိ? ‘‘နာဝုသော, သက္ကာ ယေန ဝါ တေန ဝါ အဓိဝါသေတု’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဧတဒဝေါစုံ – ‘‘ကစ္စာဝုသော ခမနီယံ, ကစ္စိ ယာပနီယ’’န္တိ? ‘‘နာဝုသော, သက္ကာ ပုထုဇ္ဇနေန အဓိဝါသေတု’’န္တိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘ဥလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, ပါရာဇိကဿ; အာပတ္တိ ထုလ္လစ္စယဿာ’’တိ။

၂၂၆. တေန ခေါ ပန သမယေန အညတရော ဗြာဟ္မဏော ဘိက္ခူ နိမန္တေတွာ ဧတဒဝေါစ – ‘‘အာယန္တု, ဘောန္တော အရဟန္တော’’တိ။ တေသံ ကုက္ကုစ္စံ အဟောသိ – ‘‘မယဉ္စမှ န အရဟန္တော [အနရဟန္တော (သီ.)]။ အယဉ္စ ဗြာဟ္မဏော အမှေ အရဟန္တဝါဒေန သမုဒါစရတိ။ ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, ပသာဒဘညေ’’တိ။

တေန ခေါ ပန သမယေန အညတရော ဗြာဟ္မဏော ဘိက္ခူ နိမန္တေတွာ ဧတဒဝေါစ – ‘‘နိသီဒန္တု, ဘောန္တော အရဟန္တော’’တိ။ ‘‘ဘုဉ္ဇန္တု, ဘောန္တော အရဟန္တော’’တိ။ ‘‘တပ္ပေန္တု, ဘောန္တော အရဟန္တော’’တိ။ ‘‘ဂစ္ဆန္တု, ဘောန္တော အရဟန္တော’’တိ။ တေသံ ကုက္ကုစ္စံ အဟောသိ – ‘‘မယဉ္စမှ န အရဟန္တော ။ အယဉ္စ ဗြာဟ္မဏော အမှေ အရဟန္တဝါဒေန သမုဒါစရတိ။ ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ ‘‘အနာပတ္တိ, ဘိက္ခဝေ, ပသာဒဘညေ’’တိ။

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ။ သောပိ ဧဝမာဟ – ‘‘မယှမ္ပိ, အာဝုသော, အာသဝါ ပဟီနာ’’တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ။ သောပိ ဧဝမာဟ – ‘‘မယှမ္ပိ, အာဝုသော, ဧတေ ဓမ္မာ သံဝိဇ္ဇန္တီ’’တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ။ သောပိ ဧဝမာဟ – ‘‘အဟမ္ပါဝုသော, တေသု ဓမ္မေသု သန္ဒိဿာမီ’’တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ , ဘိက္ခု, အာပန္နော ပါရာဇိက’’န္တိ။

တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘ဧဟိ, ဘန္တေ, အဂါရံ အဇ္ဈာဝသာ’’တိ။ ‘‘အဘဗ္ဗော ခေါ, အာဝုသော, မာဒိသော အဂါရံ အဇ္ဈာဝသိတု’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

၂၂၇. တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘ဧဟိ, ဘန္တေ, ကာမေ ပရိဘုဉ္ဇာ’’တိ။ ‘‘အာဝဋာ မေ, အာဝုသော, ကာမာ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘အဘိရမသိ, ဘန္တေ’’တိ? ‘‘အဘိရတော အဟံ, အာဝုသော, ပရမာယ အဘိရတိယာ’’တိ။ တဿ ကုက္ကုစ္စံ အဟောသိ။ ‘‘ယေ ခေါ တေ ဘဂဝတော သာဝကာ တေ ဧဝံ ဝဒေယျုံ! အဟဉ္စမှိ န ဘဂဝတော သာဝကော။ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘ကိံစိတ္တော တွံ, ဘိက္ခူ’’တိ? ‘‘အနုလ္လပနာဓိပ္ပါယော အဟံ, ဘဂဝါ’’တိ။ ‘‘အနာပတ္တိ, ဘိက္ခု, အနုလ္လပနာဓိပ္ပါယဿာ’’တိ။

တေန ခေါ ပန သမယေန သမ္ဗဟုလာ ဘိက္ခူ ကတိကံ ကတွာ အညတရသ္မိံ အာဝါသေ ဝဿံ ဥပဂစ္ဆိံသု – ‘‘ယော ဣမမှာ အာဝါသာ ပဌမံ ပက္ကမိဿတိ တံ မယံ အရဟာတိ ဇာနိဿာမာ’’တိ။ အညတရော ဘိက္ခု – ‘‘မံ အရဟာတိ ဇာနန္တူ’’တိ, တမှာ အာဝါသာ ပဌမံ ပက္ကာမိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော ပါရာဇိက’’န္တိ။

၂၂၈. [ဣမာနိ ဝတ္ထုနိ သံ. နိ. ၂.၂၀၂ အာဂတာနိ] တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန အာယသ္မာ စ လက္ခဏော အာယသ္မာ စ မဟာမောဂ္ဂလ္လာနော ဂိဇ္ဈကူဋေ ပဗ္ဗတေ ဝိဟရန္တိ။ အထ ခေါ အာယသ္မာ မဟာမောဂ္ဂလ္လာနော ပုဗ္ဗဏှသမယံ နိဝါသေတွာ ပတ္တစီဝရံ အာဒါယ ယေနာယသ္မာ လက္ခဏော တေနုပသင်္ကမိ; ဥပသင်္ကမိတွာ အာယသ္မန္တံ လက္ခဏံ ဧတဒဝေါစ – ‘‘အာယာမာဝုသော လက္ခဏ, ရာဇဂဟံ ပိဏ္ဍာယ ပဝိသိဿာမာ’’တိ။ ‘‘ဧဝမာဝုသော’’တိ ခေါ အာယသ္မာ လက္ခဏော အာယသ္မတော မဟာမောဂ္ဂလ္လာနဿ ပစ္စဿောသိ။ အထ ခေါ အာယသ္မာ မဟာမောဂ္ဂလ္လာနော ဂိဇ္ဈကူဋာ ပဗ္ဗတာ ဩရောဟန္တော အညတရသ္မိံ ပဒေသေ သိတံ ပါတွာကာသိ။ အထ ခေါ အာယသ္မာ လက္ခဏော အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ကော နု ခေါ, အာဝုသော မောဂ္ဂလ္လာန, ဟေတု ကော ပစ္စယော သိတဿ ပါတုကမ္မာယာ’’တိ? ‘‘အကာလော ခေါ, အာဝုသော လက္ခဏ, ဧတဿ ပဉှဿ [ပဉှဿ ဗျာကရဏာယ (သျာ.)]။ ဘဂဝတော မံ သန္တိကေ ဧတံ ပဉှံ ပုစ္ဆာတိ။ အထ ခေါ အာယသ္မာ စ လက္ခဏော အာယသ္မာ စ မဟာမောဂ္ဂလ္လာနော ရာဇဂဟေ ပိဏ္ဍာယ စရိတွာ ပစ္ဆာဘတ္တံ ပိဏ္ဍပါတပဋိက္ကန္တာ ယေန ဘဂဝါ တေနုပသင်္ကမိံသု; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု။ ဧကမန္တံ နိသိန္နော ခေါ အာယသ္မာ လက္ခဏော အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ဣဓါယသ္မာ မဟာမောဂ္ဂလ္လာနော ဂိဇ္ဈကူဋာ ပဗ္ဗတာ ဩရောဟန္တော အညတရသ္မိံ ပဒေသေ သိတံ ပါတွာကာသိ။ ကော နု ခေါ, အာဝုသော မောဂ္ဂလ္လာန, ဟေတု ကော ပစ္စယော သိတဿ ပါတုကမ္မာယာ’’တိ? ‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အဋ္ဌိကသင်္ခလိကံ ဝေဟာသံ ဂစ္ဆန္တိံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဖာသုဠန္တရိကာဟိ ဝိတုဍေန္တိ [ဝိတုဒေန္တိ ဝိတစ္ဆေန္တိ ဝိရာဇေန္တိ (သျာ.)]။ သာ သုဒံ အဋ္ဋဿရံ ကရောတိ။ တဿ မယှံ, အာဝုသော, ဧတဒဟောသိ – ‘အစ္ဆရိယံ ဝတ ဘော, အဗ္ဘုတံ ဝတ ဘော, ဧဝရူပေါပိ နာမ သတ္တော ဘဝိဿတိ! ဧဝရူပေါပိ နာမ ယက္ခေါ ဘဝိဿတိ! ဧဝရူပေါပိ နာမ အတ္တဘာဝပ္ပဋိလာဘော ဘဝိဿတီ’’’တိ! ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ။ အထ ခေါ ဘဂဝါ ဘိက္ခူ အာမန္တေသိ – ‘‘စက္ခုဘူတာ ဝတ, ဘိက္ခဝေ, သာဝကာ ဝိဟရန္တိ။ ဉာဏဘူတာ ဝတ, ဘိက္ခဝေ, သာဝကာ ဝိဟရန္တိ။ ယတြ ဟိ နာမ သာဝကော ဧဝရူပံ ဉဿတိ ဝါ ဒက္ခတိ ဝါ သက္ခိံ ဝါ ကရိဿတိ။ ပုဗ္ဗေဝ မေ သော, ဘိက္ခဝေ, သတ္တော ဒိဋ္ဌော အဟောသိ။ အပိ စာဟံ န ဗျာကာသိံ။ အဟဉ္စေတံ ဗျာကရေယျံ ပရေ စ မေ န သဒ္ဒဟေယျုံ။ ယေ မေ န သဒ္ဒဟေယျုံ တေသံ တံ အဿ ဒီဃရတ္တံ အဟိတာယ ဒုက္ခါယ။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဂေါဃာတကော အဟောသိ။ သော တဿ ကမ္မဿ ဝိပါကေန ဗဟူနိ ဝဿာနိ ဗဟူနိ ဝဿသတာနိ ဗဟူနိ ဝဿသဟဿာနိ ဗဟူနိ ဝဿသတသဟဿာနိ နိရယေ ပစ္စိတွာ တဿေဝ ကမ္မဿ ဝိပါကာဝသေသေန ဧဝရူပံ အတ္တဘာဝပ္ပဋိလာဘံ ပဋိသံဝေဒေတိ။ သစ္စံ, ဘိက္ခဝေ, မောဂ္ဂလ္လာနော အာဟ။ အနာပတ္တိ, ဘိက္ခဝေ, မောဂ္ဂလ္လာနဿာ’’တိ။

၂၂၉. ‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ မံသပေသိံ ဝေဟာသံ ဂစ္ဆန္တိံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ [ဝိတုဒေန္တိ ဝိတစ္ဆေန္တိ ဝိရာဇေန္တိ (သျာ.)]။ သာ သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဂေါဃာတကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ မံသပိဏ္ဍံ ဝေဟာသံ ဂစ္ဆန္တံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ သာကုဏိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ နိစ္ဆဝိံ ပုရိသံ ဝေဟာသံ ဂစ္ဆန္တံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဩရဗ္ဘိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အသိလောမံ ပုရိသံ ဝေဟာသံ ဂစ္ဆန္တံ ။ တဿ တေ အသီ ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ သူကရိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သတ္တိလောမံ ပုရိသံ ဝေဟာသံ ဂစ္ဆန္တံ။ တဿ တာ သတ္တိယော ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ မာဂဝိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဥသုလောမံ ပုရိသံ ဝေဟာသံ ဂစ္ဆန္တံ။ တဿ တေ ဥသူ ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ကာရဏိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သူစိလောမံ ပုရိသံ ဝေဟာသံ ဂစ္ဆန္တံ။ တဿ တာ သူစိယော ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ သာရထိကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သူစိလောမံ ပုရိသံ ဝေဟာသံ ဂစ္ဆန္တံ။ တဿ တာ သူစိယော သီသေ ပဝိသိတွာ မုခတော နိက္ခမန္တိ; မုခေ ပဝိသိတွာ ဥရတော နိက္ခမန္တိ; ဥရေ ပဝိသိတွာ ဥဒရတော နိက္ခမန္တိ; ဥဒရေ ပဝိသိတွာ ဦရူဟိ နိက္ခမန္တိ; ဦရူသု ပဝိသိတွာ ဇင်္ဃာဟိ နိက္ခမန္တိ; ဇင်္ဃာသု ပဝိသိတွာ ပါဒေဟိ နိက္ခမန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ သူစကော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ကုမ္ဘဏ္ဍံ ပုရိသံ ဝေဟာသံ ဂစ္ဆန္တံ။ သော ဂစ္ဆန္တောပိ တေဝ အဏ္ဍေ ခန္ဓေ အာရောပေတွာ ဂစ္ဆတိ, နိသီဒန္တောပိ တေသွေဝ အဏ္ဍေသု နိသီဒတိ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဂါမကူဋော အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ပုရိသံ ဂူထကူပေ သသီသကံ နိမုဂ္ဂံ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ပါရဒါရိကော အဟောသိ။ပေ.။။

‘‘ဣဓါဟံ , အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ပုရိသံ ဂူထကူပေ သသီသကံ နိမုဂ္ဂံ ဥဘောဟိ ဟတ္ထေဟိ ဂူထံ ခါဒန္တံ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဒုဋ္ဌဗြာဟ္မဏော အဟောသိ။ သော ကဿပဿ သမ္မာသမ္ဗုဒ္ဓဿ ပါဝစနေ ဘိက္ခုသံဃံ ဘတ္တေန နိမန္တေတွာ ဒေါဏိယော [ဒေါဏိယော (ဣတိပိ)] ဂူထဿ ပူရာပေတွာ ကာလံ အာရောစာပေတွာ ဧတဒဝေါစ – ‘အတော [ဣတော (သျာ.) အဟော (ဣတိပိ)], ဘောန္တော, ယာဝဒတ္ထံ ဘုဉ္ဇန္တု စေဝ ဟရန္တု စာ’’’တိ။ပေ.။။

၂၃၀. ‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ နိစ္ဆဝိံ ဣတ္ထိံ ဝေဟာသံ ဂစ္ဆန္တိံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သာ သုဒံ အဋ္ဋဿရံ ကရောတိ။ပေ.။ ဧသာ, ဘိက္ခဝေ, ဣတ္ထီ ဣမသ္မိံယေဝ ရာဇဂဟေ အတိစာရိနီ အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဣတ္ထိံ ဒုဂ္ဂန္ဓံ မင်္ဂုလိံ ဝေဟာသံ ဂစ္ဆန္တိံ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သာ သုဒံ အဋ္ဋဿရံ ကရောတိ။ပေ.။ ဧသာ, ဘိက္ခဝေ, ဣတ္ထီ ဣမသ္မိံယေဝ ရာဇဂဟေ ဣက္ခဏိကာ အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဣတ္ထိံ ဥပ္ပက္ကံ ဩကိလိနိံ ဩကိရိနိံ ဝေဟာသံ ဂစ္ဆန္တိံ။ သာ သုဒံ အဋ္ဋဿရံ ကရောတိ။ပေ.။ ဧသာ, ဘိက္ခဝေ , ဣတ္ထီ ကာလိင်္ဂဿ ရညော အဂ္ဂမဟေသီ အဟောသိ။ သာ ဣဿာပကတာ သပတ္တိံ အင်္ဂါရကဋာဟေန ဩကိရိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အသီသကံ ကဗန္ဓံ ဝေဟာသံ ဂစ္ဆန္တံ။ တဿ ဥရေ အက္ခီနိ စေဝ ဟောန္တိ မုခဉ္စ။ တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, သတ္တော ဣမသ္မိံယေဝ ရာဇဂဟေ ဟာရိကော နာမ စောရဃာတကော အဟောသိ။ပေ.။။

‘‘ဣဓါဟံ , အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဘိက္ခုံ ဝေဟာသံ ဂစ္ဆန္တံ။ တဿ သံဃာဋိပိ အာဒိတ္တာ သမ္ပဇ္ဇလိတာ သဇောတိဘူတာ, ပတ္တောပိ အာဒိတ္တော သမ္ပဇ္ဇလိတော သဇောတိဘူတော, ကာယဗန္ဓနမ္ပိ အာဒိတ္တံ သမ္ပဇ္ဇလိတံ သဇောတိဘူတံ, ကာယောပိ အာဒိတ္တော သမ္ပဇ္ဇလိတော သဇောတိဘူတော။ သော သုဒံ အဋ္ဋဿရံ ကရောတိ။ပေ.။ ဧသော, ဘိက္ခဝေ, ဘိက္ခု ကဿပဿ သမ္မာသမ္ဗုဒ္ဓဿ ပါဝစနေ ပါပဘိက္ခု အဟောသိ။ပေ.။။

‘‘ဣဓါဟံ, အာဝုသော, ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဘိက္ခုနိံ။ အဒ္ဒသံ သိက္ခမာနံ။ အဒ္ဒသံ သာမဏေရံ။ အဒ္ဒသံ သာမဏေရိံ ဝေဟာသံ ဂစ္ဆန္တိံ။ တဿာ သံဃာဋိပိ အာဒိတ္တာ သမ္ပဇ္ဇလိတာ သဇောတိဘူတာ, ပတ္တောပိ အာဒိတ္တော သမ္ပဇ္ဇလိတော သဇောတိဘူတော, ကာယဗန္ဓနမ္ပိ အာဒိတ္တံ သမ္ပဇ္ဇလိတံ သဇောတိဘူတံ, ကာယောပိ အာဒိတ္တော သမ္ပဇ္ဇလိတော သဇောတိဘူတော။ သာ သုဒံ အဋ္ဋဿရံ ကရောတိ။ တဿ မယှံ, အာဝုသော, ဧတဒဟောသိ – ‘အစ္ဆရိယံ ဝတ ဘော, အဗ္ဘုတံ ဝတ ဘော, ဧဝရူပေါပိ နာမ သတ္တော ဘဝိဿတိ! ဧဝရူပေါပိ နာမ ယက္ခေါ ဘဝိဿတိ! ဧဝရူပေါပိ နာမ အတ္တဘာဝပ္ပဋိလာဘော ဘဝိဿတီ’’’တိ! ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ။

အထ ခေါ ဘဂဝါ ဘိက္ခူ အာမန္တေသိ – ‘‘စက္ခုဘူတာ ဝတ, ဘိက္ခဝေ, သာဝကာ ဝိဟရန္တိ။ ဉာဏဘူတာ ဝတ , ဘိက္ခဝေ, သာဝကာ ဝိဟရန္တိ။ ယတြ ဟိ နာမ သာဝကော ဧဝရူပံ ဉဿတိ ဝါ ဒက္ခတိ ဝါ သက္ခိံ ဝါ ကရိဿတိ! ပုဗ္ဗေဝ မေ သာ, ဘိက္ခဝေ, သာမဏေရီ ဒိဋ္ဌာ အဟောသိ။ အပိ စာဟံ န ဗျာကာသိံ။ အဟဉ္စေတံ ဗျာကရေယျံ ပရေ စ မေ န သဒ္ဒဟေယျုံ။ ယေ မေ န သဒ္ဒဟေယျုံ တေသံ တံ အဿ ဒီဃရတ္တံ အဟိတာယ ဒုက္ခါယ။ ဧသာ, ဘိက္ခဝေ, သာမဏေရီ ကဿပဿ သမ္မာသမ္ဗုဒ္ဓဿ ပါဝစနေ ပါပသာမဏေရီ အဟောသိ။ သာ တဿ ကမ္မဿ ဝိပါကေန ဗဟူနိ ဝဿာနိ ဗဟူနိ ဝဿသတာနိ ဗဟူနိ ဝဿသဟဿာနိ ဗဟူနိ ဝဿသတသဟဿာနိ နိရယေ ပစ္စိတွာ တဿေဝ ကမ္မဿ ဝိပါကာဝသေသေန ဧဝရူပံ အတ္တဘာဝပ္ပဋိလာဘံ ပဋိသံဝေဒေတိ။ သစ္စံ, ဘိက္ခဝေ, မောဂ္ဂလ္လာနော အာဟ။ အနာပတ္တိ, ဘိက္ခဝေ, မောဂ္ဂလ္လာနဿာ’’တိ။

၂၃၁. အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ယတာယံ, အာဝုသော, တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တီ’’တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော ဧဝံ ဝက္ခတိ – ‘ယတာယံ, အာဝုသော , တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တီ’တိ။ အထ စ ပနာယံ တပေါဒါ ကုထိတာ သန္ဒတိ။ ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ။ ဘဂဝတော ဧတမတ္ထံ အာရောစေသုံ။ ‘‘ယတာယံ, ဘိက္ခဝေ, တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တိ။ အပိ စာယံ, ဘိက္ခဝေ, တပေါဒါ ဒွိန္နံ မဟာနိရယာနံ အန္တရိကာယ အာဂစ္ဆတိ။ တေနာယံ တပေါဒါ ကုထိတာ သန္ဒတိ။ သစ္စံ, ဘိက္ခဝေ, မောဂ္ဂလ္လာနော အာဟ။ အနာပတ္တိ, ဘိက္ခဝေ, မောဂ္ဂလ္လာနဿာ’’တိ။

တေန ခေါ ပန သမယေန ရာဇာ မာဂဓေါ သေနိယော ဗိမ္ဗိသာရော လိစ္ဆဝီဟိ သဒ္ဓိံ သင်္ဂါမေန္တော ပဘဂ္ဂေါ အဟောသိ။ အထ ရာဇာ ပစ္ဆာ သေနံ သင်္ကဍ္ဎိတွာ လိစ္ဆဝယော ပရာဇေသိ။ သင်္ဂါမေ စ နန္ဒိ စရတိ – ‘‘ရညာ လိစ္ဆဝီ ပဘဂ္ဂါ’’တိ။ အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ရာဇာ, အာဝုသော, လိစ္ဆဝီဟိ ပဘဂ္ဂေါ’’တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော ဧဝံ ဝက္ခတိ – ‘ရာဇာ , အာဝုသော, လိစ္ဆဝီဟိ ပဘဂ္ဂေါ’တိ! သင်္ဂါမေ စ နန္ဒိံ စရတိ – ‘ရညာ လိစ္ဆဝီ ပဘဂ္ဂါ’တိ! ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ။ ဘဂဝတော ဧတမတ္ထံ အာရောစေသုံ။ ‘‘ပဌမံ, ဘိက္ခဝေ, ရာဇာ လိစ္ဆဝီဟိ ပဘဂ္ဂေါ။ အထ ရာဇာ ပစ္ဆာ သေနံ သင်္ကဍ္ဎိတွာ လိစ္ဆဝယော ပရာဇေသိ။ သစ္စံ, ဘိက္ခဝေ, မောဂ္ဂလ္လာနော အာဟ။ အနာပတ္တိ, ဘိက္ခဝေ, မောဂ္ဂလ္လာနဿာ’’တိ။

၂၃၂. အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ဣဓါဟံ, အာဝုသော, သပ္ပိနိကာယ နဒိယာ တီရေ အာနေဉ္ဇံ သမာဓိံ သမာပန္နော နာဂါနံ ဩဂယှ ဥတ္တရန္တာနံ ကောဉ္စံ ကရောန္တာနံ သဒ္ဒံ အဿောသိ’’န္တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော အာနေဉ္ဇံ သမာဓိံ သမာပန္နော သဒ္ဒံ သောဿတိ! ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ။ ဘဂဝတော ဧတမတ္ထံ အာရောစေသုံ။ ‘‘အတ္ထေသော, ဘိက္ခဝေ, သမာဓိ သော စ ခေါ အပရိသုဒ္ဓေါ။ သစ္စံ, ဘိက္ခဝေ, မောဂ္ဂလ္လာနော အာဟ။ အနာပတ္တိ, ဘိက္ခဝေ, မောဂ္ဂလ္လာနဿာ’’တိ။

အထ ခေါ အာယသ္မာ သောဘိတော ဘိက္ခူ အာမန္တေသိ – ‘‘အဟံ, အာဝုသော, ပဉ္စ ကပ္ပသတာနိ အနုဿရာမီ’’တိ။ ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ သောဘိတော ဧဝံ ဝက္ခတိ – ‘အဟံ, အာဝုသော , ပဉ္စ ကပ္ပသတာနိ အနုဿရာမီ’တိ! ဥတ္တရိမနုဿဓမ္မံ အာယသ္မာ သောဘိတော ဥလ္လပတီ’’တိ။ ဘဂဝတော ဧတမတ္ထံ အာရောစေသုံ။ ‘‘အတ္ထေသာ, ဘိက္ခဝေ, သောဘိတဿ။ သာ စ ခေါ ဧကာယေဝ ဇာတိ။ သစ္စံ, ဘိက္ခဝေ, သောဘိတော အာဟ။ အနာပတ္တိ, ဘိက္ခဝေ, သောဘိတဿာတိ။

စတုတ္ထပါရာဇိကံ သမတ္တံ။

၂၃၃. ဥဒ္ဒိဋ္ဌာ ခေါ အာယသ္မန္တော စတ္တာရော ပါရာဇိကာ ဓမ္မာ, ယေသံ ဘိက္ခု အညတရံ ဝါ အညတရံ ဝါ အာပဇ္ဇိတွာ န လဘတိ ဘိက္ခူဟိ သဒ္ဓိံ သံဝါသံ, ယထာ ပုရေ တထာ ပစ္ဆာ, ပါရာဇိကော ဟောတိ အသံဝါသော။ တတ္ထာယသ္မန္တေ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယသ္မန္တော, တသ္မာ တုဏှီ, ဧဝမေတံ ဓါရယာမီတိ။

ပါရာဇိကံ နိဋ္ဌိတံ။

တဿုဒ္ဒါနံ –

မေထုနာဒိန္နာဒါနဉ္စ၊ မနုဿဝိဂ္ဂဟုတ္တရိ။

ပါရာဇိကာနိ စတ္တာရိ၊ ဆေဇ္ဇဝတ္ထူ အသံသယာတိ။

ပါရာဇိကကဏ္ဍံ နိဋ္ဌိတံ။