သံဃာဒိသေသကဏ္ဍံ

၂. သံဃာဒိသေသကဏ္ဍံ

၁. သုက္ကဝိဿဋ္ဌိသိက္ခါပဒံ

ဣမေ ခေါ ပနာယသ္မန္တော တေရသ သံဃာဒိသေသာ

ဓမ္မာ ဥဒ္ဒေသံ အာဂစ္ဆန္တိ။

၂၃၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ သေယျသကော အနဘိရတော ဗြဟ္မစရိယံ စရတိ။ သော တေန ကိသော ဟောတိ လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော။ အဒ္ဒသ ခေါ အာယသ္မာ ဥဒါယီ အာယသ္မန္တံ သေယျသကံ ကိသံ လူခံ ဒုဗ္ဗဏ္ဏံ ဥပ္ပဏ္ဍုပ္ပဏ္ဍုကဇာတံ ဓမနိသန္ထတဂတ္တံ။ ဒိသွာန အာယသ္မန္တံ သေယျသကံ ဧတဒဝေါစ – ‘‘ကိဿ တွံ, အာဝုသော သေယျသက, ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော? ကစ္စိ နော တွံ, အာဝုသော သေယျသက, အနဘိရတော ဗြဟ္မစရိယံ စရသီ’’တိ? ‘‘ဧဝမာဝုသော’’တိ။ ‘‘တေန ဟိ တွံ, အာဝုသော သေယျသက, ယာဝဒတ္ထံ ဘုဉ္ဇ ယာဝဒတ္ထံ သုပ ယာဝဒတ္ထံ နှာယ။ ယာဝဒတ္ထံ ဘုဉ္ဇိတွာ ယာဝဒတ္ထံ သုပိတွာ ယာဝဒတ္ထံ နှာယိတွာ ယဒါ တေ အနဘိရတိ ဥပ္ပဇ္ဇတိ ရာဂေါ စိတ္တံ အနုဒ္ဓံသေတိ တဒါ ဟတ္ထေန ဥပက္ကမိတွာ အသုစိံ မောစေဟီ’’တိ။ ‘‘ကိံ နု ခေါ, အာဝုသော, ကပ္ပတိ ဧဝရူပံ ကာတု’’န္တိ? ‘‘အာမ, အာဝုသော။ အဟမ္ပိ ဧဝံ ကရောမီ’’တိ။

အထ ခေါ အာယသ္မာ သေယျသကော ယာဝဒတ္ထံ ဘုဉ္ဇိ ယာဝဒတ္ထံ သုပိ ယာဝဒတ္ထံ နှာယိ။ ယာဝဒတ္ထံ ဘုဉ္ဇိတွာ ယာဝဒတ္ထံ သုပိတွာ ယာဝဒတ္ထံ နှာယိတွာ ယဒါ အနဘိရတိ ဥပ္ပဇ္ဇတိ ရာဂေါ စိတ္တံ အနုဒ္ဓံသေတိ တဒါ ဟတ္ထေန ဥပက္ကမိတွာ အသုစိံ မောစေသိ ။ အထ ခေါ အာယသ္မာ သေယျသကော အပရေန သမယေန ဝဏ္ဏဝါ အဟောသိ ဣဏိန္ဒြိယော ပသန္နမုခဝဏ္ဏော ဝိပ္ပသန္နဆဝိဝဏ္ဏော။ အထ ခေါ အာယသ္မတော သေယျသကဿ သဟာယကာ ဘိက္ခူ အာယသ္မန္တံ သေယျသကံ ဧတဒဝေါစုံ – ‘‘ပုဗ္ဗေ ခေါ တွံ, အာဝုသော သေယျသက, ကိသော အဟောသိ လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော။ သော ဒါနိ တွံ ဧတရဟိ ဝဏ္ဏဝါ ဣဏိန္ဒြိယော ပသန္နမုခဝဏ္ဏော ဝိပ္ပသန္နဆဝိဝဏ္ဏော။ ကိံ နု ခေါ တွံ, အာဝုသော သေယျသက, ဘေသဇ္ဇံ ကရောသီ’’တိ? ‘‘န ခေါ အဟံ, အာဝုသော, ဘေသဇ္ဇံ ကရောမိ ။ အပိစာဟံ ယာဝဒတ္ထံ ဘုဉ္ဇာမိ ယာဝဒတ္ထံ သုပါမိ ယာဝဒတ္ထံ နှာယာမိ။ ယာဝဒတ္ထံ ဘုဉ္ဇိတွာ ယာဝဒတ္ထံ သုပိတွာ ယာဝဒတ္ထံ နှာယိတွာ ယဒါ မေ အနဘိရတိ ဥပ္ပဇ္ဇတိ ရာဂေါ စိတ္တံ အနုဒ္ဓံသေတိ တဒါ ဟတ္ထေန ဥပက္ကမိတွာ အသုစိံ မောစေမီ’’တိ။ ‘‘ကိံ ပန တွံ, အာဝုသော သေယျသက, ယေနေဝ ဟတ္ထေန သဒ္ဓါဒေယျံ ဘုဉ္ဇသိ တေနေဝ ဟတ္ထေန ဥပက္ကမိတွာ အသုစိံ မောစေသီ’’တိ? ‘‘ဧဝမာဝုသော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ သေယျသကော ဟတ္ထေန ဥပက္ကမိတွာ အသုစိံ မောစေဿတီ’’တိ!

အထ ခေါ တေ ဘိက္ခူ အာယသ္မန္တံ သေယျသကံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ သေယျသကံ ပဋိပုစ္ဆိ – ‘‘သစ္စံ ကိရ တွံ, သေယျသက, ဟတ္ထေန ဥပက္ကမိတွာ အသုစိံ မောစေသီ’’တိ? ‘‘သစ္စံ, ဘဂဝါ’’တိ ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, ဟတ္ထေန ဥပက္ကမိတွာ အသုစိံ မောစေဿသိ! နနု မယာ, မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော နော သရာဂါယ, ဝိသညောဂါယ ဓမ္မော ဒေသိတော နော သညောဂါယ, အနုပါဒါနာယ ဓမ္မော ဒေသိတော နော သဥပါဒါနာယ! တတ္ထ နာမ တွံ, မောဃပုရိသ, မယာ ဝိရာဂါယ ဓမ္မေ ဒေသိတေ သရာဂါယ စေတေဿသိ, ဝိသညောဂါယ ဓမ္မေ ဒေသိတေ သညောဂါယ စေတေဿသိ, အနုပါဒါနာယ ဓမ္မေ ဒေသိတေ သဥပါဒါနာယ စေတေဿသိ! နနု မယာ, မောဃပုရိသ, အနေကပရိယာယေန ရာဂဝိရာဂါယ ဓမ္မော ဒေသိတော, မဒနိမ္မဒနာယ ပိပါသဝိနယာယ အာလယသမုဂ္ဃါတာယ ဝဋ္ဋုပစ္ဆေဒါယ တဏှက္ခယာယ ဝိရာဂါယ နိရောဓါယ နိဗ္ဗာနာယ ဓမ္မော ဒေသိတော? နနု မယာ, မောဃပုရိသ, အနေကပရိယာယေန ကာမာနံ ပဟာနံ အက္ခါတံ, ကာမသညာနံ ပရိညာ အက္ခါတာ, ကာမပိပါသာနံ ပဋိဝိနယော အက္ခါတော, ကာမဝိတက္ကာနံ သမုဂ္ဃါတော အက္ခါတော, ကာမပရိဠာဟာနံ ဝူပသမော အက္ခါတော? နေတံ, မောဃပုရိသ, အပ္ပသန္နာနံ ဝါ ပသာဒါယ, ပသန္နာနံ ဝါ ဘိယျောဘာဝါယ။ အထ ခွေတံ, မောဃပုရိသ, အပ္ပသန္နာနဉ္စေဝ အပ္ပသာဒါယ, ပသန္နာနဉ္စ ဧကစ္စာနံ အညထတ္တာယာ’’တိ။ အထ ခေါ ဘဂဝါ အာယသ္မန္တံ သေယျသကံ အနေကပရိယာယေန ဝိဂရဟိတွာ ဒုဗ္ဘရတာယ။ပေ.။ ‘‘ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

‘‘သဉ္စေတနိကာ သုက္ကဝိဿဋ္ဌိ [ဝိသဋ္ဌိ (သီ. သျာ.)] သံဃာဒိသေသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၂၃၅. တေန ခေါ ပန သမယေန ဘိက္ခူ ပဏီတဘောဇနာနိ ဘုဉ္ဇိတွာ မုဋ္ဌဿတီ အသမ္ပဇာနာ နိဒ္ဒံ ဩက္ကမန္တိ။ တေသံ မုဋ္ဌဿတီနံ အသမ္ပဇာနာနံ နိဒ္ဒံ ဩက္ကမန္တာနံ သုပိနန္တေန အသုစိ မုစ္စတိ။ တေသံ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ – ‘သဉ္စေတနိကာ သုက္ကဝိဿဋ္ဌိ သံဃာဒိသေသော’တိ။ အမှာကဉ္စ သုပိနန္တေန အသုစိ မုစ္စတိ။ အတ္ထိ စေတ္ထ စေတနာ လဗ္ဘတိ။ ကစ္စိ နု ခေါ မယံ သံဃာဒိသေသံ အာပတ္တိံ အာပန္နာ’’တိ? ဘဂဝတော ဧတမတ္ထံ အာရောစေသုံ။ ‘‘အတ္ထေသာ, ဘိက္ခဝေ, စေတနာ; သာ စ ခေါ အဗ္ဗောဟာရိကာတိ။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၂၃၆. ‘‘သဉ္စေတနိကာ သုက္ကဝိဿဋ္ဌိ အညတြ သုပိနန္တာ သံဃာဒိသေသော’’တိ။

၂၃၇. သဉ္စေတနိကာတိ ဇာနန္တော သဉ္ဇာနန္တော စေစ္စ အဘိဝိတရိတွာ ဝီတိက္ကမော။

သုက္ကန္တိ ဒသ သုက္ကာနိ – နီလံ ဣတကံ လောဟိတကံ ဩဒါတံ တက္ကဝဏ္ဏံ ဒကဝဏ္ဏံ တေလဝဏ္ဏံ ခီရဝဏ္ဏံ ဒဓိဝဏ္ဏံ သပ္ပိဝဏ္ဏံ။

ဝိဿဋ္ဌီတိ ဌာနတော စာဝနာ ဝုစ္စတိ ဝိဿဋ္ဌီတိ။

အညတြ သုပိနန္တာတိ ဌပေတွာ သုပိနန္တံ။

သံဃာဒိသေသောတိ သံဃောဝ တဿာ အာပတ္တိယာ ပရိဝါသံ ဒေတိ, မူလာယ ပဋိကဿတိ, မာနတ္တံ ဒေတိ , အဗ္ဘေတိ; န သမ္ဗဟုလာ, န ဧကပုဂ္ဂလော။ တေန ဝုစ္စတိ – ‘‘သံဃာဒိသေသော’’တိ။ တဿေဝ အာပတ္တိနိကာယဿ နာမကမ္မံ အဓိဝစနံ။ တေနပိ ဝုစ္စတိ – ‘‘သံဃာဒိသေသော’’တိ။

အဇ္ဈတ္တရူပေ မောစေတိ, ဗဟိဒ္ဓါရူပေ မောစေတိ, အဇ္ဈတ္တဗဟိဒ္ဓါရူပေ မောစေတိ, အာကာသေ ကဋိံ ကမ္ပေန္တော မောစေတိ; ရာဂူပတ္ထမ္ဘေ မောစေတိ, ဝစ္စူပတ္ထမ္ဘေ မောစေတိ, ပဿာဝူပတ္ထမ္ဘေ မောစေတိ, ဝါတူပတ္ထမ္ဘေ မောစေတိ , ဥစ္စာလိင်္ဂပါဏကဒဋ္ဌူပတ္ထမ္ဘေ မောစေတိ; အာရောဂျတ္ထာယ မောစေတိ, သုခတ္ထာယ မောစေတိ, ဘေသဇ္ဇတ္ထာယ မောစေတိ, ဒါနတ္ထာယ မောစေတိ, ပုညတ္ထာယ မောစေတိ, ယညတ္ထာယ မောစေတိ, သဂ္ဂတ္ထာယ မောစေတိ, ဗီဇတ္ထာယ မောစေတိ, ဝီမံသတ္ထာယ မောစေတိ, ဒဝတ္ထာယ မောစေတိ; နီလံ မောစေတိ, ဣတကံ မောစေတိ, လောဟိတကံ မောစေတိ, ဩဒါတံ မောစေတိ, တက္ကဝဏ္ဏံ မောစေတိ, ဒကဝဏ္ဏံ မောစေတိ, တေလဝဏ္ဏံ မောစေတိ, ခီရဝဏ္ဏံ မောစေတိ, ဒဓိဝဏ္ဏံ မောစေတိ, သပ္ပိဝဏ္ဏံ မောစေတိ။

၂၃၈. အဇ္ဈတ္တရူပေတိ အဇ္ဈတ္တံ ဥပါဒိန္နေ [ဥပါဒိဏ္ဏေ (သီ. က.)] ရူပေ။

ဗဟိဒ္ဓါရူပေတိ ဗဟိဒ္ဓါ ဥပါဒိန္နေ ဝါ အနုပါဒိန္နေ ဝါ။

အဇ္ဈတ္တဗဟိဒ္ဓါရူပေတိ တဒုဘယေ။

အာကာသေ ကဋိံ ကမ္ပေန္တောတိ အာကာသေ ဝါယမန္တဿ အင်္ဂဇာတံ ကမ္မနိယံ ဟောတိ။

ရာဂူပတ္ထမ္ဘေတိ ရာဂေန ဣဠိတဿ အင်္ဂဇာတံ ကမ္မနိယံ ဟောတိ။

ဝစ္စူပတ္ထမ္ဘေတိ ဝစ္စေန ဣဠိတဿ အင်္ဂဇာတံ ကမ္မနိယံ ဟောတိ။

ပဿာဝူပတ္ထမ္ဘေတိ ပဿာဝေန ဣဠိတဿ အင်္ဂဇာတံ ကမ္မနိယံ ဟောတိ။

ဝါတူပတ္ထမ္ဘေတိ ဝါတေန ဣဠိတဿ အင်္ဂဇာတံ ကမ္မနိယံ ဟောတိ။

ဥစ္စာလိင်္ဂပါဏကဒဋ္ဌူပတ္ထမ္ဘေတိ ဥစ္စာလိင်္ဂပါဏကဒဋ္ဌေန အင်္ဂဇာတံ ကမ္မနိယံ ဟောတိ။

၂၃၉. အာရောဂျတ္ထာယာတိ အရောဂေါ ဘဝိဿာမိ။

သုခတ္ထာယာတိ သုခံ ဝေဒနံ ဥပ္ပါဒေဿာမိ။

ဘေသဇ္ဇတ္ထာယာတိ ဘေသဇ္ဇံ ဘဝိဿတိ။

ဒါနတ္ထာယာတိ ဒါနံ ဒဿာမိ။

ပုညတ္ထာယာတိ ပုညံ ဘဝိဿတိ။

ယညတ္ထာယာတိ ယညံ ယဇိဿာမိ။

သဂ္ဂတ္ထာယာတိ သဂ္ဂံ ဂမိဿာမိ။

ဗီဇတ္ထာယာတိ ဗီဇံ ဘဝိဿတိ။

ဝီမံသတ္ထာယာတိ နီလံ ဘဝိဿတိ, ဣတကံ ဘဝိဿတိ, လောဟိတကံ ဘဝိဿတိ, ဩဒါတံ ဘဝိဿတိ, တက္ကဝဏ္ဏံ ဘဝိဿတိ, ဒကဝဏ္ဏံ ဘဝိဿတိ, တေလဝဏ္ဏံ ဘဝိဿတိ, ခီရဝဏ္ဏံ ဘဝိဿတိ, ဒဓိဝဏ္ဏံ ဘဝိဿတိ, သပ္ပိဝဏ္ဏံ ဘဝိဿတီတိ။

ဒဝတ္ထာယာတိ ခိဍ္ဍာဓိပ္ပါယော။

၂၄၀. အဇ္ဈတ္တရူပေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဗဟိဒ္ဓါရူပေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အဇ္ဈတ္တဗဟိဒ္ဓါရူပေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အာကာသေ ကဋိံ ကမ္ပေန္တော စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ရာဂူပတ္ထမ္ဘေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဝစ္စူပတ္ထမ္ဘေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ပဿာဝူပတ္ထမ္ဘေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဝါတူပတ္ထမ္ဘေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဥစ္စာလိင်္ဂပါဏကဒဋ္ဌူပတ္ထမ္ဘေ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အာရောဂျတ္ထာယ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သုခတ္ထာယ။ပေ.။ ဘေသဇ္ဇတ္ထာယ။ ဒါနတ္ထာယ။ ပုညတ္ထာယ။ ယညတ္ထာယ။ သဂ္ဂတ္ထာယ။ ဗီဇတ္ထာယ။ ဝီမံသတ္ထာယ။ ဒဝတ္ထာယ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

နီလံ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ ။

ဣတကံ။ လောဟိတကံ။ ဩဒါတံ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သုဒ္ဓိကံ နိဋ္ဌိတံ။

အာရောဂျတ္ထဉ္စ သုခတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အာရောဂျတ္ထဉ္စ ဘေသဇ္ဇတ္ထဉ္စ။ပေ.။ အာရောဂျတ္ထဉ္စ ဒါနတ္ထဉ္စ။ အာရောဂျတ္ထဉ္စ ပုညတ္ထဉ္စ။ အာရောဂျတ္ထဉ္စ ယညတ္ထဉ္စ။ အာရောဂျတ္ထဉ္စ သဂ္ဂတ္ထဉ္စ။ အာရောဂျတ္ထဉ္စ ဗီဇတ္ထဉ္စ။ အာရောဂျတ္ထဉ္စ ဝီမံသတ္ထဉ္စ။ အာရောဂျတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဧကမူလကဿ ခဏ္ဍစက္ကံ နိဋ္ဌိတံ။

၂၄၁. သုခတ္ထဉ္စ ဘေသဇ္ဇတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သုခတ္ထဉ္စ ဒါနတ္ထဉ္စ။ပေ.။ သုခတ္ထဉ္စ ပုညတ္ထဉ္စ။ သုခတ္ထဉ္စ ယညတ္ထဉ္စ။ သုခတ္ထဉ္စ သဂ္ဂတ္ထဉ္စ။ သုခတ္ထဉ္စ ဗီဇတ္ထဉ္စ။ သုခတ္ထဉ္စ ဝီမံသတ္ထဉ္စ။ သုခတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သုခတ္ထဉ္စ အာရောဂျတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

၂၄၂. ဘေသဇ္ဇတ္ထဉ္စ ဒါနတ္ထဉ္စ။ပေ.။ ဘေသဇ္ဇတ္ထဉ္စ ပုညတ္ထဉ္စ။ ဘေသဇ္ဇတ္ထဉ္စ ယညတ္ထဉ္စ။ ဘေသဇ္ဇတ္ထဉ္စ သဂ္ဂတ္ထဉ္စ။ ဘေသဇ္ဇတ္ထဉ္စ ဗီဇတ္ထဉ္စ။ ဘေသဇ္ဇတ္ထဉ္စ ဝီမံသတ္ထဉ္စ။ ဘေသဇ္ဇတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဘေသဇ္ဇတ္ထဉ္စ အာရောဂျတ္ထဉ္စ။ပေ.။ ဘေသဇ္ဇတ္ထဉ္စ သုခတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒါနတ္ထဉ္စ ပုညတ္ထဉ္စ။ပေ.။ ဒါနတ္ထဉ္စ ယညတ္ထဉ္စ။ ဒါနတ္ထဉ္စ သဂ္ဂတ္ထဉ္စ။ ဒါနတ္ထဉ္စ ဗီဇတ္ထဉ္စ။ ဒါနတ္ထဉ္စ ဝီမံသတ္ထဉ္စ။ ဒါနတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒါနတ္ထဉ္စ အာရောဂျတ္ထဉ္စ။ပေ.။ ဒါနတ္ထဉ္စ သုခတ္ထဉ္စ။ ဒါနတ္ထဉ္စ ဘေသဇ္ဇတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ပုညတ္ထဉ္စ ယညတ္ထဉ္စ။ပေ.။ ပုညတ္ထဉ္စ သဂ္ဂတ္ထဉ္စ။ ပုညတ္ထဉ္စ ဗီဇတ္ထဉ္စ။ ပုညတ္ထဉ္စ ဝီမံသတ္ထဉ္စ။ ပုညတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ပုညတ္ထဉ္စ အာရောဂျတ္ထဉ္စ။ပေ.။ ပုညတ္ထဉ္စ သုခတ္ထဉ္စ။ ပုညတ္ထဉ္စ ဘေသဇ္ဇတ္ထဉ္စ။ ပုညတ္ထဉ္စ ဒါနတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ယညတ္ထဉ္စ သဂ္ဂတ္ထဉ္စ။ပေ.။ ယညတ္ထဉ္စ ဗီဇတ္ထဉ္စ။ ယညတ္ထဉ္စ ဝီမံသတ္ထဉ္စ ။ ယညတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ယညတ္ထဉ္စ အာရောဂျတ္ထဉ္စ။ပေ.။ ယညတ္ထဉ္စ သုခတ္ထဉ္စ။ ယညတ္ထဉ္စ ဘေသဇ္ဇတ္ထဉ္စ။ ယညတ္ထဉ္စ ဒါနတ္ထဉ္စ။ ယညတ္ထဉ္စ ပုညတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သဂ္ဂတ္ထဉ္စ ဗီဇတ္ထဉ္စ။ပေ.။ သဂ္ဂတ္ထဉ္စ ဝီမံသတ္ထဉ္စ။ သဂ္ဂတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သဂ္ဂတ္ထဉ္စ အာရောဂျတ္ထဉ္စ။ပေ.။ သဂ္ဂတ္ထဉ္စ သုခတ္ထဉ္စ။ သဂ္ဂတ္ထဉ္စ ဘေသဇ္ဇတ္ထဉ္စ။ သဂ္ဂတ္ထဉ္စ ဒါနတ္ထဉ္စ။ သဂ္ဂတ္ထဉ္စ ပုညတ္ထဉ္စ။ သဂ္ဂတ္ထဉ္စ ယညတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဗီဇတ္ထဉ္စ ဝီမံသတ္ထဉ္စ။ပေ.။ ဗီဇတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဗီဇတ္ထဉ္စ အာရောဂျတ္ထဉ္စ။ပေ.။ ဗီဇတ္ထဉ္စ သုခတ္ထဉ္စ။ ဗီဇတ္ထဉ္စ ဘေသဇ္ဇတ္ထဉ္စ။ ဗီဇတ္ထဉ္စ ဒါနတ္ထဉ္စ။ ဗီဇတ္ထဉ္စ ပုညတ္ထဉ္စ။ ဗီဇတ္ထဉ္စ ယညတ္ထဉ္စ။ ဗီဇတ္ထဉ္စ သဂ္ဂတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဝီမံသတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဝီမံသတ္ထဉ္စ အာရောဂျတ္ထဉ္စ။ပေ.။ ဝီမံသတ္ထဉ္စ သုခတ္ထဉ္စ။ ဝီမံသတ္ထဉ္စ ဘေသဇ္ဇတ္ထဉ္စ။ ဝီမံသတ္ထဉ္စ ဒါနတ္ထဉ္စ။ ဝီမံသတ္ထဉ္စ ပုညတ္ထဉ္စ။ ဝီမံသတ္ထဉ္စ ယညတ္ထဉ္စ။ ဝီမံသတ္ထဉ္စ သဂ္ဂတ္ထဉ္စ။ ဝီမံသတ္ထဉ္စ ဗီဇတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒဝတ္ထဉ္စ အာရောဂျတ္ထဉ္စ။ပေ.။ ဒဝတ္ထဉ္စ သုခတ္ထဉ္စ။ ဒဝတ္ထဉ္စ ဘေသဇ္ဇတ္ထဉ္စ။ ဒဝတ္ထဉ္စ ဒါနတ္ထဉ္စ။ ဒဝတ္ထဉ္စ ပုညတ္ထဉ္စ။ ဒဝတ္ထဉ္စ ယညတ္ထဉ္စ။ ဒဝတ္ထဉ္စ သဂ္ဂတ္ထဉ္စ။ ဒဝတ္ထဉ္စ ဗီဇတ္ထဉ္စ။ ဒဝတ္ထဉ္စ ဝီမံသတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဧကမူလကဿ ဗဒ္ဓစက္ကံ နိဋ္ဌိတံ။

အာရောဂျတ္ထဉ္စ သုခတ္ထဉ္စ ဘေသဇ္ဇတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ပေ.။ အာရောဂျတ္ထဉ္စ သုခတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကဿ ခဏ္ဍစက္ကံ။

သုခတ္ထဉ္စ ဘေသဇ္ဇတ္ထဉ္စ ဒါနတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ပေ.။ သုခတ္ထဉ္စ ဘေသဇ္ဇတ္ထဉ္စ ဒဝတ္ထဉ္စ။ပေ.။ သုခတ္ထဉ္စ ဘေသဇ္ဇတ္ထဉ္စ အာရောဂျတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကဿ ဗဒ္ဓစက္ကံ သံခိတ္တံ။

ဝီမံသတ္ထဉ္စ ဒဝတ္ထဉ္စ အာရောဂျတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ ဝီမံသတ္ထဉ္စ ဒဝတ္ထဉ္စ ဗီဇတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကံ နိဋ္ဌိတံ။

တိမူလကမ္ပိ စတုမူလကမ္ပိ ပဉ္စမူလကမ္ပိ ဆမူလကမ္ပိ သတ္တမူလကမ္ပိ အဋ္ဌမူလကမ္ပိ နဝမူလကမ္ပိ ဧဝမေဝ ဝိတ္ထာရေတဗ္ဗံ။

ဣဒံ သဗ္ဗမူလကံ။

၂၄၃. အာရောဂျတ္ထဉ္စ သုခတ္ထဉ္စ ဘေသဇ္ဇတ္ထဉ္စ ဒါနတ္ထဉ္စ ပုညတ္ထဉ္စ ယညတ္ထဉ္စ သဂ္ဂတ္ထဉ္စ ဗီဇတ္ထဉ္စ ဝီမံသတ္ထဉ္စ ဒဝတ္ထဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သဗ္ဗမူလကံ နိဋ္ဌိတံ။

၂၄၄. နီလဉ္စ ဣတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

နီလဉ္စ လောဟိတကဉ္စ။ပေ.။ နီလဉ္စ ဩဒါတဉ္စ။ နီလဉ္စ တက္ကဝဏ္ဏဉ္စ။ နီလဉ္စ ဒကဝဏ္ဏဉ္စ။ နီလဉ္စ တေလဝဏ္ဏဉ္စ။ နီလဉ္စ ခီရဝဏ္ဏဉ္စ။ နီလဉ္စ ဒဓိဝဏ္ဏဉ္စ။ နီလဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတ္တိ, အာပတ္တိ သံဃာဒိသေသဿ။

ဧကမူလကဿ ခဏ္ဍစက္ကံ နိဋ္ဌိတံ။

၂၄၅. ဣတကဉ္စ လောဟိတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဣတကဉ္စ ဩဒါတဉ္စ။ပေ.။ ဣတကဉ္စ တက္ကဝဏ္ဏဉ္စ။ ဣတကဉ္စ ဒကဝဏ္ဏဉ္စ။ ဣတကဉ္စ တေလဝဏ္ဏဉ္စ။ ဣတကဉ္စ ခီရဝဏ္ဏဉ္စ။ ဣတကဉ္စ ဒဓိဝဏ္ဏဉ္စ။ ဣတကဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဣတကဉ္စ နီလဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဧကမူလကဿ ဗဒ္ဓစက္ကံ။

၂၄၆. လောဟိတကဉ္စ ဩဒါတဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

လောဟိတကဉ္စ တက္ကဝဏ္ဏဉ္စ။ပေ.။ လောဟိတကဉ္စ ဒကဝဏ္ဏဉ္စ။ လောဟိတကဉ္စ တေလဝဏ္ဏဉ္စ။ လောဟိတကဉ္စ ခီရဝဏ္ဏဉ္စ။ လောဟိတကဉ္စ ဒဓိဝဏ္ဏဉ္စ။ လောဟိတကဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

လောဟိတကဉ္စ နီလဉ္စ။ပေ.။ လောဟိတကဉ္စ ဣတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဩဒါတဉ္စ တက္ကဝဏ္ဏဉ္စ။ပေ.။ ဩဒါတဉ္စ ဒကဝဏ္ဏဉ္စ။ ဩဒါတဉ္စ တေလဝဏ္ဏဉ္စ။ ဩဒါတဉ္စ ခီရဝဏ္ဏဉ္စ။ ဩဒါတဉ္စ ဒဓိဝဏ္ဏဉ္စ။ ဩဒါတဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဩဒါတဉ္စ နီလဉ္စ။ပေ.။ ဩဒါတဉ္စ ဣတကဉ္စ။ ဩဒါတဉ္စ လောဟိတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

တက္ကဝဏ္ဏဉ္စ ဒကဝဏ္ဏဉ္စ။ပေ.။ တက္ကဝဏ္ဏဉ္စ တေလဝဏ္ဏဉ္စ။ တက္ကဝဏ္ဏဉ္စ ခီရဝဏ္ဏဉ္စ။ တက္ကဝဏ္ဏဉ္စ ဒဓိဝဏ္ဏဉ္စ။ တက္ကဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

တက္ကဝဏ္ဏဉ္စ နီလဉ္စ။ပေ.။ တက္ကဝဏ္ဏဉ္စ ဣတကဉ္စ။ တက္ကဝဏ္ဏဉ္စ လောဟိတကဉ္စ။ တက္ကဝဏ္ဏဉ္စ ဩဒါတဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒကဝဏ္ဏဉ္စ တေလဝဏ္ဏဉ္စ။ပေ.။ ဒကဝဏ္ဏဉ္စ ခီရဝဏ္ဏဉ္စ။ ဒကဝဏ္ဏဉ္စ ဒဓိဝဏ္ဏဉ္စ။ ဒကဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒကဝဏ္ဏဉ္စ နီလဉ္စ။ပေ.။ ဒကဝဏ္ဏဉ္စ ဣတကဉ္စ။ ဒကဝဏ္ဏဉ္စ လောဟိတကဉ္စ။ ဒကဝဏ္ဏဉ္စ ဩဒါတဉ္စ။ ဒကဝဏ္ဏဉ္စ တက္ကဝဏ္ဏဉ္စ စေတေတိ ဥပက္ကမတိ မုစ္စတိ , အာပတ္တိ သံဃာဒိသေသဿ။

တေလဝဏ္ဏဉ္စ ခီရဝဏ္ဏဉ္စ။ပေ.။ တေလဝဏ္ဏဉ္စ ဒဓိဝဏ္ဏဉ္စ။ တေလဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

တေလဝဏ္ဏဉ္စ နီလဉ္စ။ပေ.။ တေလဝဏ္ဏဉ္စ ဣတကဉ္စ။ တေလဝဏ္ဏဉ္စ လောဟိတကဉ္စ။ တေလဝဏ္ဏဉ္စ ဩဒါတဉ္စ။ တေလဝဏ္ဏဉ္စ တက္ကဝဏ္ဏဉ္စ။ တေလဝဏ္ဏဉ္စ ဒကဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ခီရဝဏ္ဏဉ္စ ဒဓိဝဏ္ဏဉ္စ။ပေ.။ ခီရဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ခီရဝဏ္ဏဉ္စ နီလဉ္စ။ပေ.။ ခီရဝဏ္ဏဉ္စ ဣတကဉ္စ။ ခီရဝဏ္ဏဉ္စ လောဟိတကဉ္စ။ ခီရဝဏ္ဏဉ္စ ဩဒါတဉ္စ။ ခီရဝဏ္ဏဉ္စ တက္ကဝဏ္ဏဉ္စ။ ခီရဝဏ္ဏဉ္စ ဒကဝဏ္ဏဉ္စ။ ခီရဝဏ္ဏဉ္စ တေလဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒဓိဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒဓိဝဏ္ဏဉ္စ နီလဉ္စ။ပေ.။ ဒဓိဝဏ္ဏဉ္စ ဣတကဉ္စ။ ဒဓိဝဏ္ဏဉ္စ လောဟိတကဉ္စ။ ဒဓိဝဏ္ဏဉ္စ ဩဒါတဉ္စ။ ဒဓိဝဏ္ဏဉ္စ တက္ကဝဏ္ဏဉ္စ။ ဒဓိဝဏ္ဏဉ္စ ဒကဝဏ္ဏဉ္စ။ ဒဓိဝဏ္ဏဉ္စ တေလဝဏ္ဏဉ္စ။ ဒဓိဝဏ္ဏဉ္စ ခီရဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သပ္ပိဝဏ္ဏဉ္စ နီလဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သပ္ပိဝဏ္ဏဉ္စ ဣတကဉ္စ။ပေ.။ သပ္ပိဝဏ္ဏဉ္စ လောဟိတကဉ္စ။ သပ္ပိဝဏ္ဏဉ္စ ဩဒါတဉ္စ။ သပ္ပိဝဏ္ဏဉ္စ တက္ကဝဏ္ဏဉ္စ။ သပ္ပိဝဏ္ဏဉ္စ ဒကဝဏ္ဏဉ္စ။ သပ္ပိဝဏ္ဏဉ္စ တေလဝဏ္ဏဉ္စ။ သပ္ပိဝဏ္ဏဉ္စ ခီရဝဏ္ဏဉ္စ ။ သပ္ပိဝဏ္ဏဉ္စ ဒဓိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဧကမူလကဿ ဗဒ္ဓစက္ကံ နိဋ္ဌိတံ။

နီလဉ္စ ဣတကဉ္စ လောဟိတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ပေ.။ နီလဉ္စ ဣတကဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကဿ ခဏ္ဍစက္ကံ။

ဣတကဉ္စ လောဟိတကဉ္စ ဩဒါတဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ပေ.။ ဣတကဉ္စ လောဟိတကဉ္စ သပ္ပိဝဏ္ဏဉ္စ။ပေ.။ ဣတကဉ္စ လောဟိတကဉ္စ နီလဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကဿ ဗဒ္ဓစက္ကံ သံခိတ္တံ။

ဒဓိဝဏ္ဏဉ္စ သပ္ပိဝဏ္ဏဉ္စ နီလဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။ပေ.။ ဒဓိဝဏ္ဏဉ္စ သပ္ပိဝဏ္ဏဉ္စ ခီရဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဒုမူလကံ နိဋ္ဌိတံ။

တိမူလကမ္ပိ စတုမူလကမ္ပိ ပဉ္စမူလကမ္ပိ ဆမူလကမ္ပိ သတ္တမူလကမ္ပိ အဋ္ဌမူလကမ္ပိ နဝမူလကမ္ပိ ဧဝမေဝ ဝိတ္ထာရေတဗ္ဗံ။

ဣဒံ သဗ္ဗမူလကံ။

၂၄၇. နီလဉ္စ ဣတကဉ္စ လောဟိတကဉ္စ ဩဒါတဉ္စ တက္ကဝဏ္ဏဉ္စ ဒကဝဏ္ဏဉ္စ တေလဝဏ္ဏဉ္စ ခီရဝဏ္ဏဉ္စ ဒဓိဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

သဗ္ဗမူလကံ နိဋ္ဌိတံ။

၂၄၈. အာရောဂျတ္ထဉ္စ နီလဉ္စ [အာရောဂျတ္ထံ နီလံ (?)] စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အာရောဂျတ္ထဉ္စ သုခတ္ထဉ္စ နီလဉ္စ ဣတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

အာရောဂျတ္ထဉ္စ သုခတ္ထဉ္စ ဘေသဇ္ဇတ္ထဉ္စ နီလဉ္စ ဣတကဉ္စ လောဟိတကဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

ဥဘတော ဝဍ္ဎကံ ဧဝမေဝ ဝဍ္ဎေတဗ္ဗံ။

အာရောဂျတ္ထဉ္စ သုခတ္ထဉ္စ ဘေသဇ္ဇတ္ထဉ္စ ဒါနတ္ထဉ္စ ပုညတ္ထဉ္စ ယညတ္ထဉ္စ သဂ္ဂတ္ထဉ္စ ဗီဇတ္ထဉ္စ ဝီမံသတ္ထဉ္စ ဒဝတ္ထဉ္စ နီလဉ္စ ဣတကဉ္စ လောဟိတကဉ္စ ဩဒါတဉ္စ တက္ကဝဏ္ဏဉ္စ ဒကဝဏ္ဏဉ္စ တေလဝဏ္ဏဉ္စ ခီရဝဏ္ဏဉ္စ ဒဓိဝဏ္ဏဉ္စ သပ္ပိဝဏ္ဏဉ္စ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

မိဿကစက္ကံ နိဋ္ဌိတံ။

၂၄၉. နီလံ မောစေဿာမီတိ စေတေတိ ဥပက္ကမတိ ဣတကံ မုစ္စတိ, အာပတ္တိ သံဃာဒိသေသဿ။

နီလံ မောစေဿာမီတိ စေတေတိ ဥပက္ကမတိ လောဟိတကံ။ပေ.။ ဩဒါတံ ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ မုစ္စတိ, အာပတ္တိ သံဃာဒိသေသဿ။

ခဏ္ဍစက္ကံ နိဋ္ဌိတံ။

၂၅၀. ဣတကံ မောစေဿာမီတိ စေတေတိ ဥပက္ကမတိ လောဟိတကံ မုစ္စတိ, အာပတ္တိ သံဃာဒိသေသဿ။

ဣတကံ မောစေဿာမီတိ စေတေတိ ဥပက္ကမတိ ဩဒါတံ။ပေ.။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ။ နီလံ မုစ္စတိ, အာပတ္တိ သံဃာဒိသေသဿ။

ဗဒ္ဓစက္ကမူလံ သံခိတ္တံ။

၂၅၁. သပ္ပိဝဏ္ဏံ မောစေဿာမီတိ စေတေတိ ဥပက္ကမတိ နီလံ မုစ္စတိ, အာပတ္တိ သံဃာဒိသေသဿ။

သပ္ပိဝဏ္ဏံ မောစေဿာမီတိ စေတေတိ ဥပက္ကမတိ ဣတကံ။ပေ.။ လောဟိတကံ။ ဩဒါတံ ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ မုစ္စတိ, အာပတ္တိ သံဃာဒိသေသဿ။

ကုစ္ဆိစက္ကံ နိဋ္ဌိတံ။

၂၅၂. ဣတကံ မောစေဿာမီတိ စေတေတိ ဥပက္ကမတိ နီလံ မုစ္စတိ, အာပတ္တိ သံဃာဒိသေသဿ။

လောဟိတကံ။ပေ.။ ဩဒါတံ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ မောစေဿာမီတိ စေတေတိ ဥပက္ကမတိ နီလံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ ပဌမံ ဂမနံ နိဋ္ဌိတံ။

၂၅၃. လောဟိတကံ မောစေဿာမီတိ စေတေတိ ဥပက္ကမတိ ဣတကံ မုစ္စတိ, အာပတ္တိ သံဃာဒိသေသဿ။

ဩဒါတံ။ပေ.။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ

။ ဒဓိဝဏ္ဏံ။ သပ္ပိဝဏ္ဏံ။ နီလံ မောစေဿာမီတိ စေတေတိ ဥပက္ကမတိ ဣတကံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ ဒုတိယံ ဂမနံ နိဋ္ဌိတံ။

၂၅၄. ဩဒါတံ မောစေဿာမီတိ စေတေတိ ဥပက္ကမတိ လောဟိတကံ မုစ္စတိ, အာပတ္တိ သံဃာဒိသေသဿ။

တက္ကဝဏ္ဏံ။ပေ.။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။

သပ္ပိဝဏ္ဏံ။ နီလံ ။ ဣတကံ မောစေဿာမီတိ စေတေတိ ဥပက္ကမတိ လောဟိတကံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ တတိယံ ဂမနံ နိဋ္ဌိတံ။

၂၅၅. တက္ကဝဏ္ဏံ မောစေဿာမီတိ စေတေတိ ဥပက္ကမတိ ဩဒါတံ မုစ္စတိ, အာပတ္တိ သံဃာဒိသေသဿ။

ဒကဝဏ္ဏံ။ပေ.။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ။ နီလံ။ ဣတကံ။ လောဟိတကံ မောစေဿာမီတိ စေတေတိ ဥပက္ကမတိ ဩဒါတံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ စတုတ္ထံ ဂမနံ နိဋ္ဌိတံ။

၂၅၆. ဒကဝဏ္ဏံ မောစေဿာမီတိ စေတေတိ ဥပက္ကမတိ တက္ကဝဏ္ဏံ မုစ္စတိ, အာပတ္တိ သံဃာဒိသေသဿ။

တေလဝဏ္ဏံ ။ပေ.။ ခီရဝဏ္ဏံ။ ဒဓိဝဏ္ဏံ။ သပ္ပိဝဏ္ဏံ။ နီလ။

ဣတကံ။ လောဟိတကံ။ ဩဒါတံ မောစေဿာမီတိ စေတေတိ ဥပက္ကမတိ တက္ကဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ ပဉ္စမံ ဂမနံ နိဋ္ဌိတံ။

၂၅၇. တေလဝဏ္ဏံ မောစေဿာမီတိ စေတေတိ ဥပက္ကမတိ ဒကဝဏ္ဏံ မုစ္စတိ, အာပတ္တိ သံဃာဒိသေသဿ။

ခီရဝဏ္ဏံ။ပေ.။ ဒဓိဝဏ္ဏံ။ သပ္ပိဝဏ္ဏံ။ နီလံ ။ ဣတကံ။ လောဟိတကံ။

ဩဒါတံ။ တက္ကဝဏ္ဏံ မောစေဿာမီတိ စေတေတိ ဥပက္ကမတိ ဒကဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ ဆဋ္ဌံ ဂမနံ နိဋ္ဌိတံ။

၂၅၈. ခီရဝဏ္ဏံ မောစေဿာမီတိ စေတေတိ ဥပက္ကမတိ တေလဝဏ္ဏံ မုစ္စတိ, အာပတ္တိ သံဃာဒိသေသဿ။

ဒဓိဝဏ္ဏံ။ပေ.။ သပ္ပိဝဏ္ဏံ။ နီလံ။ ဣတကံ။ လောဟိတကံ။ ဩဒါတံ။ တက္ကဝဏ္ဏံ။ ဒကဝဏ္ဏံ မောစေဿာမီတိ စေတေတိ ဥပက္ကမတိ တေလဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ သတ္တမံ ဂမနံ နိဋ္ဌိတံ။

၂၅၉. ဒဓိဝဏ္ဏံ မောစေဿာမီတိ စေတေတိ ဥပက္ကမတိ ခီရဝဏ္ဏံ မုစ္စတိ, အာပတ္တိ သံဃာဒိသေသဿ။

သပ္ပိဝဏ္ဏံ။ပေ.။ နီလံ။ ဣတကံ။ လောဟိတကံ။ ဩဒါတံ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ မောစေဿာမီတိ စေတေတိ ဥပက္ကမတိ ခီရဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ အဋ္ဌမံ ဂမနံ နိဋ္ဌိတံ။

၂၆၀. သပ္ပိဝဏ္ဏံ မောစေဿာမီတိ စေတေတိ ဥပက္ကမတိ ဒဓိဝဏ္ဏံ မုစ္စတိ, အာပတ္တိ သံဃာဒိသေသဿ။

နီလံ။ပေ.။ ဣတကံ။ လောဟိတကံ။ ဩဒါတံ။ တက္ကဝဏ္ဏံ။ ဒကဝဏ္ဏံ။ တေလဝဏ္ဏံ။ ခီရဝဏ္ဏံ မောစေဿာမီတိ စေတေတိ ဥပက္ကမတိ ဒဓိဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ နဝမံ ဂမနံ နိဋ္ဌိတံ။

၂၆၁. နီလံ မောစေဿာမီတိ စေတေတိ ဥပက္ကမတိ သပ္ပိဝဏ္ဏံ မုစ္စတိ, အာပတ္တိ သံဃာဒိသေသဿ။

ဣတကံ ။ပေ.။ လောဟိတကံ။ ဩဒါတံ။ တက္ကဝဏ္ဏံ။ ဒကဝဏ္ဏံ ။ တေလဝဏ္ဏံ။ ခီရဝဏ္ဏံ။ ဒဓိဝဏ္ဏံ မောစေဿာမီတိ စေတေတိ ဥပက္ကမတိ သပ္ပိဝဏ္ဏံ မုစ္စတိ, အာပတ္တိ သံဃာဒိသေသဿ။

ပိဋ္ဌိစက္ကဿ ဒသမံ ဂမနံ နိဋ္ဌိတံ။

ပိဋ္ဌိစက္ကံ နိဋ္ဌိတံ။

၂၆၂. စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ။

စေတေတိ ဥပက္ကမတိ န မုစ္စတိ, အာပတ္တိ ထုလ္လစ္စယဿ။

စေတေတိ န ဥပက္ကမတိ မုစ္စတိ, အနာပတ္တိ။

စေတေတိ န ဥပက္ကမတိ န မုစ္စတိ, အနာပတ္တိ။

န စေတေတိ ဥပက္ကမတိ မုစ္စတိ, အနာပတ္တိ။

န စေတေတိ ဥပက္ကမတိ န မုစ္စတိ, အနာပတ္တိ။

န စေတေတိ န ဥပက္ကမတိ မုစ္စတိ, အနာပတ္တိ။

န စေတေတိ န ဥပက္ကမတိ န မုစ္စတိ, အနာပတ္တိ။

အနာပတ္တိ သုပိနန္တေန, နမောစနာဓိပ္ပါယဿ, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

သုပိနောစ္စာရပဿာဝေါ ၊ ဝိတက္ကုဏှောဒကေန စ။

ဘေသဇ္ဇံ ကဏ္ဍုဝံ မဂ္ဂေါ၊ ဝတ္ထိ ဇန္တာဃရုပက္ကမော [ဇန္တဂ္ဂုပက္ကမော (သီ.)၊ ဇန္တာဃရံ ဦရု (သျာ.)]။

သာမဏေရော စ သုတ္တော စ၊ ဦရု မုဋ္ဌိနာ ဣဠယိ။

အာကာသေ ထမ္ဘံ နိဇ္ဈာယိ၊ ဆိဒ္ဒံ ကဋ္ဌေန ဃဋ္ဋယိ။

သောတော ဥဒဉ္ဇလံ ဓါဝံ၊ ပုပ္ဖာဝလိယံ ပေါက္ခရံ။

ဝါလိကာ ကဒ္ဒမုဿေကော [ကဒ္ဒမောသေကော (?)]၊ သယနင်္ဂုဋ္ဌကေန စာတိ။

ဝိနီတဝတ္ထု

၂၆၃. တေန ခေါ ပန သမယေန အညတရဿ ဘိက္ခုနော သုပိနန္တေန အသုစိ မုစ္စိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, သုပိနန္တေနာ’’တိ။

တေန ခေါ ပန သမယေန အညတရဿ ဘိက္ခုနော ဥစ္စာရံ ကရောန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, မောစနာဓိပ္ပါယော’’တိ။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော ပဿာဝံ ကရောန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော ကာမဝိတက္ကံ ဝိတက္ကေန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ဝိတက္ကေန္တဿာ’’တိ။

တေန ခေါ ပန သမယေန အညတရဿ ဘိက္ခုနော ဥဏှောဒကေန နှာယန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘ကိံစိတ္တော တွံ, ဘိက္ခူ’’တိ? ‘‘နာဟံ, ဘဂဝါ, မောစနာဓိပ္ပါယော’’တိ။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဥဏှောဒကေန နှာယန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဥဏှောဒကေန နှာယန္တဿ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော အင်္ဂဇာတေ ဝဏော ဟောတိ။ ဘေသဇ္ဇေန [တဿ ဘေသဇ္ဇေန (?)] အာလိမ္ပေန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော အင်္ဂဇာတေ ဝဏော ဟောတိ။ မောစနာဓိပ္ပါယဿ [တဿ မောစနာမိပ္ပါယဿ (သျာ.)] ဘေသဇ္ဇေန အာလိမ္ပေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော အဏ္ဍံ ကဏ္ဍုဝန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ , ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ အဏ္ဍံ ကဏ္ဍုဝန္တဿ [ကဏ္ဍူဝန္တဿ (သီ.)] အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

၂၆၄. တေန ခေါ ပန သမယေန အညတရဿ ဘိက္ခုနော မဂ္ဂံ ဂစ္ဆန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ မဂ္ဂံ ဂစ္ဆန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဝတ္ထိံ ဂဟေတွာ ပဿာဝံ ကရောန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဝတ္ထိံ ဂဟေတွာ ပဿာဝံ ကရောန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဇန္တာဃရေ ဥဒရဝဋ္ဋိံ တာပေန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဇန္တာဃရေ ဥဒရဝဋ္ဋိံ တာပေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဇန္တာဃရေ ဥပဇ္ဈာယဿ ပိဋ္ဌိပရိကမ္မံ ကရောန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဇန္တာဃရေ ဥပဇ္ဈာယဿ ပိဋ္ဌိပရိကမ္မံ ကရောန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

၂၆၅. တေန ခေါ ပန သမယေန အညတရဿ ဘိက္ခုနော ဦရုံ ဃဋ္ဋာပေန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဦရုံ ဃဋ္ဋာပေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု မောစနာဓိပ္ပါယော အညတရံ သာမဏေရံ ဧတဒဝေါစ – ‘‘ဧဟိ မေ တွံ, အာဝုသော သာမဏေရ, အင်္ဂဇာတံ ဂဏှာဟီ’’တိ။ သော တဿ အင်္ဂဇာတံ အဂ္ဂဟေသိ။ တဿေဝ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု သုတ္တဿ သာမဏေရဿ အင်္ဂဇာတံ အဂ္ဂဟေသိ။ တဿေဝ အသုစိ မုစ္စိ။ တဿ ကုက္ကုစ္စံ အဟောသိ ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

၂၆၆. တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဦရူဟိ အင်္ဂဇာတံ ဣဠေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ မုဋ္ဌိနာ အင်္ဂဇာတံ ဣဠေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ အာကာသေ ကဋိံ ကမ္ပေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ကာယံ ထမ္ဘေန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ကာယံ ထမ္ဘေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု သာရတ္တော မာတုဂါမဿ အင်္ဂဇာတံ ဥပနိဇ္ဈာယိ။ တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ။ န စ, ဘိက္ခဝေ, သာရတ္တေန မာတုဂါမဿ အင်္ဂဇာတံ ဥပနိဇ္ဈာယိတဗ္ဗံ။ ယော ဥပနိဇ္ဈာယေယျ, အာပတ္တိ ဒုက္ကဋဿာ’’တိ။

၂၆၇. တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ တာဠစ္ဆိဒ္ဒံ အင်္ဂဇာတံ ပဝေသေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ကဋ္ဌေန အင်္ဂဇာတံ ဃဋ္ဋေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ပဋိသောတေ နှာယန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ပဋိသောတေ နှာယန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဥဒဉ္ဇလံ ကီဠန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဥဒဉ္ဇလံ ကီဠန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဥဒကေ ဓါဝန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဥဒကေ ဓါဝန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ပုပ္ဖာဝလိယံ [ပုပ္ဖာဝဠိယံ (သျာ. က.)] ကီဠန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ပုပ္ဖာဝလိယံ ကီဠန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

၂၆၈. တေန ခေါ ပန သမယေန အညတရဿ ဘိက္ခုနော ပေါက္ခရဝနေ ဓါဝန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ပေါက္ခရဝနေ ဓါဝန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဝါလိကံ အင်္ဂဇာတံ ပဝေသေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ကဒ္ဒမံ အင်္ဂဇာတံ ပဝေသေန္တဿ အသုစိ မုစ္စိ။ပေ.။ အသုစိ န မုစ္စိ ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော ဥဒကေန အင်္ဂဇာတံ ဩသိဉ္စန္တဿ အသုစိ မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမောစနာဓိပ္ပါယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ ဥဒကေန အင်္ဂဇာတံ ဩသိဉ္စန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ သယနေ အင်္ဂဇာတံ ဃဋ္ဋေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရဿ ဘိက္ခုနော မောစနာဓိပ္ပါယဿ အင်္ဂုဋ္ဌေန အင်္ဂဇာတံ ဃဋ္ဋေန္တဿ အသုစိ မုစ္စိ။ပေ.။ အသုစိ န မုစ္စိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

သုက္ကဝိဿဋ္ဌိသိက္ခါပဒံ နိဋ္ဌိတံ ပဌမံ။

၂. ကာယသံသဂ္ဂသိက္ခါပဒံ

၂၆၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ အရညေ ဝိဟရတိ။ တဿာယသ္မတော ဝိဟာရော အဘိရူပေါ ဟောတိ ဒဿနီယော ပါသာဒိကော, မဇ္ဈေဂဗ္ဘော, သမန္တာပရိယာဂါရော, သုပညတ္တံ မဉ္စဣဌံ ဘိသိဗိမ္ဗောဟနံ, ပါနီယံ ပရိဘောဇနီယံ သုပဋ္ဌိတံ, ပရိဝေဏံ သုသမ္မဋ္ဌံ။ ဗဟူ မနုဿာ အာယသ္မတော ဥဒါယိဿ ဝိဟာရပေက္ခကာ အာဂစ္ဆန္တိ။ အညတရောပိ ဗြာဟ္မဏော သပဇာပတိကော ယေနာယသ္မာ ဥဒါယီ တေနုပသင်္ကမိ; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစ – ‘‘ဣစ္ဆာမ မယံ ဘောတော ဥဒါယိဿ ဝိဟာရံ ပေက္ခိတု’’န္တိ။ ‘‘တေန ဟိ, ဗြာဟ္မဏ, ပေက္ခဿူ’’တိ, အဝါပုရဏံ [အပါပုရဏံ (သျာ.)] အာဒါယ ဃဋိကံ ဥဂ္ဃါဋေတွာ ကဝါဋံ ပဏာမေတွာ ဝိဟာရံ ပါဝိသိ။ သောပိ ခေါ ဗြာဟ္မဏော အာယသ္မတော ဥဒါယိဿ ပိဋ္ဌိတော ပါဝိသိ။ သာပိ ခေါ ဗြာဟ္မဏီ တဿ ဗြာဟ္မဏဿ ပိဋ္ဌိတော ပါဝိသိ။ အထ ခေါ အာယသ္မာ ဥဒါယီ ဧကစ္စေ ဝါတပါနေ ဝိဝရန္တော ဧကစ္စေ ဝါတပါနေ ထကေန္တော ဂဗ္ဘံ အနုပရိဂန္တွာ ပိဋ္ဌိတော အာဂန္တွာ တဿာ ဗြာဟ္မဏိယာ အင်္ဂမင်္ဂါနိ ပရာမသိ။ အထ ခေါ သော ဗြာဟ္မဏော အာယသ္မတာ ဥဒါယိနာ သဒ္ဓိံ ပဋိသမ္မောဒိတွာ အဂမာသိ။ အထ ခေါ သော ဗြာဟ္မဏော အတ္တမနော အတ္တမနဝါစံ နိစ္ဆာရေသိ – ‘‘ဥဠာရာ ဣမေ သမဏာ သကျပုတ္တိယာ ယေ ဣမေ ဧဝရူပေ အရညေ ဝိဟရန္တိ။ ဘဝမ္ပိ ဥဒါယီ ဥဠာရော ယော ဧဝရူပေ အရညေ ဝိဟရတီ’’တိ။

ဧဝံ ဝုတ္တေ သာ ဗြာဟ္မဏီ တံ ဗြာဟ္မဏံ ဧတဒဝေါစ – ‘‘ကုတော တဿ ဥဠာရတ္တတာ! ယထေဝ မေ တွံ အင်္ဂမင်္ဂါနိ ပရာမသိ ဧဝမေဝ မေ သမဏော ဥဒါယီ အင်္ဂမင်္ဂါနိ ပရာမသီ’’တိ။ အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ ဣမေ ဟိ နာမ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ နတ္ထိ ဣမေသံ ဗြဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗြဟ္မညံ, ကုတော ဣမေသံ သာမညံ ကုတော ဣမေသံ ဗြဟ္မညံ, အပဂတာ ဣမေ သာမညာ အပဂတာ ဣမေ ဗြဟ္မညာ။ ကထဉှိ နာမ သမဏော ဥဒါယီ မမ ဘရိယာယ အင်္ဂမင်္ဂါနိ ပရာမသိဿတိ! န ဟိ သက္ကာ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ အာရာမံ ဝါ ဝိဟာရံ ဝါ ဂန္တုံ။ သစေ [သစေ ဟိ (သျာ.)] ကုလိတ္ထိယော ကုလဓီတရော [ကုလဓီတာယော (သီ. သျာ.)] ကုလကုမာရိယော ကုလသုဏှာယော ကုလဒါသိယော အာရာမံ ဝါ ဝိဟာရံ ဝါ ဂစ္ဆေယျုံ, တာပိ သမဏာ သကျပုတ္တိယာ ဒူသေယျု’’န္တိ!

အဿောသုံ ခေါ ဘိက္ခု တဿ ဗြာဟ္မဏဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမေန သဒ္ဓိံ ကာယသံသဂ္ဂံ သမာပဇ္ဇိဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ, ဥဒါယိ, မာတုဂါမေန သဒ္ဓိံ ကာယသံသဂ္ဂံ သမာပဇ္ဇသီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, မာတုဂါမေန သဒ္ဓိံ ကာယသံသဂ္ဂံ သမာပဇ္ဇိဿသိ! နနု မယာ, မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော နော သရာဂါယ။ပေ.။ ကာမပရိဠာဟာနံ ဝူပသမော အက္ခါတော။ နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၂၇၀. ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမေန သဒ္ဓိံ ကာယသံသဂ္ဂံ သမာပဇ္ဇေယျ ဟတ္ထဂ္ဂါဟံ ဝါ ဝေဏိဂ္ဂါဟံ ဝါ အညတရဿ ဝါ အညတရဿ ဝါ အင်္ဂဿ ပရာမသနံ, သံဃာဒိသေသော’’တိ။

၂၇၁. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဩတိဏ္ဏော နာမ သာရတ္တော အပေက္ခဝါ ပဋိဗဒ္ဓစိတ္တော။

ဝိပရိဏတန္တိ ရတ္တမ္ပိ စိတ္တံ ဝိပရိဏတံ။ ဒုဋ္ဌမ္ပိ စိတ္တံ ဝိပရိဏတံ။ မူဠှမ္ပိ စိတ္တံ ဝိပရိဏတံ။ အပိစ, ရတ္တံ စိတ္တံ ဣမသ္မိံ အတ္ထေ အဓိပ္ပေတံ ဝိပရိဏတန္တိ။

မာတုဂါမော နာမ မနုဿိတ္ထီ, န ယက္ခီ န ပေတီ, န တိရစ္ဆာနဂတာ။ အန္တမသော တဒဟုဇာတာပိ ဒါရိကာ, ပဂေဝ မဟတ္တရီ။

သဒ္ဓိန္တိ ဧကတော။

ကာယသံသဂ္ဂံ သမာပဇ္ဇေယျာတိ အဇ္ဈာစာရော ဝုစ္စတိ။

ဟတ္ထော နာမ ကပ္ပရံ ဥပါဒါယံ ယာဝ အဂ္ဂနခါ။

ဝေဏီ နာမ သုဒ္ဓကေသာ ဝါ, သုတ္တမိဿာ ဝါ, မာလာမိဿာ ဝါ, ဟိရညမိဿာ ဝါ, သုဝဏ္ဏမိဿာ ဝါ, မုတ္တာမိဿာ ဝါ, မဏိမိဿာ ဝါ။

အင်္ဂံ နာမ ဟတ္ထဉ္စ ဝေဏိဉ္စ ဌပေတွာ အဝသေသံ အင်္ဂံ နာမ။

၂၇၂. အာမသနာ , ပရာမသနာ, ဩမသနာ, ဥမ္မသနာ, ဩလင်္ဃနာ, ဥလ္လင်္ဃနာ, အာကဍ္ဎနာ, ပတိကဍ္ဎနာ, အဘိနိဂ္ဂဏှနာ, အဘိနိပ္ပီဠနာ, ဂဟဏံ, ဆုပနံ။

အာမသနာ နာမ အာမဋ္ဌမတ္တာ။

ပရာမသနာ နာမ ဣတောစိတော စ သံစောပနာ။

ဩမသနာ နာမ ဟေဋ္ဌာ ဩရောပနာ။

ဥမ္မသနာ နာမ ဥဒ္ဓံ ဥစ္စာရဏာ။

ဩလင်္ဃနာ နာမ ဟေဋ္ဌာ ဩနမနာ။

ဥလ္လင်္ဃနာ နာမ ဥဒ္ဓံ ဥစ္စာရဏာ။

အာကဍ္ဎနာ နာမ အာဝိဉ္ဆနာ [အာဝိဉ္ဇနာ (သီ. သျာ.)]။

ပတိကဍ္ဎနာ နာမ ပတိပ္ပဏာမနာ။

အဘိနိဂ္ဂဏှနာ နာမ အင်္ဂံ ဂဟေတွာ နိပ္ပီဠနာ။

အဘိနိပ္ပီဠနာ နာမ ကေနစိ သဟ နိပ္ပီဠနာ။

ဂဟဏံ နာမ ဂဟိတမတ္တံ။

ဆုပနံ နာမ ဖုဋ္ဌမတ္တံ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၂၇၃. ဣတ္ထီ စ ဟောတိ ဣတ္ထိသညီ သာရတ္တော စ ဘိက္ခု စ။ နံ ဣတ္ထိယာ ကာယေန ကာယံ အာမသတိ ပရာမသတိ ဩမသတိ ဥမ္မသတိ ဩလင်္ဃေတိ ဥလ္လင်္ဃေတိ အာကဍ္ဎတိ ပတိကဍ္ဎတိ အဘိနိဂ္ဂဏှာတိ အဘိနိပ္ပီဠေတိ ဂဏှာတိ ဆုပတိ, အာပတ္တိ သံဃာဒိသေသဿ။

ဣတ္ထီ စ ဟောတိ ဝေမတိကော သာရတ္တော စ။ ဘိက္ခု စ နံ ဣတ္ထိယာ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။

ဣတ္ထီ စ ဟောတိ ပဏ္ဍကသညီ သာရတ္တော စ။ ဘိက္ခု စ နံ ဣတ္ထိယာ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။

ဣတ္ထီ စ ဟောတိ ပုရိသသညီ သာရတ္တော စ။ ဘိက္ခု စ နံ ဣတ္ထိယာ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။

ဣတ္ထီ စ ဟောတိ တိရစ္ဆာနဂတသညီ သာရတ္တော စ။ ဘိက္ခု စ နံ ဣတ္ထိယာ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။

ပဏ္ဍကော စ ဟောတိ ပဏ္ဍကသညီ သာရတ္တော စ။ ဘိက္ခု စ နံ ပဏ္ဍကဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။

ပဏ္ဍကော စ ဟောတိ ဝေမတိကော သာရတ္တော စ။ ဘိက္ခု စ နံ ပဏ္ဍကဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

ပဏ္ဍကော စ ဟောတိ ပုရိသသညီ သာရတ္တော စ။ ဘိက္ခု စ နံ ပဏ္ဍကဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

ပဏ္ဍကော စ ဟောတိ တိရစ္ဆာနဂတသညီ သာရတ္တော စ။ ဘိက္ခု စ နံ ပဏ္ဍကဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ , အာပတ္တိ ဒုက္ကဋဿ။

ပဏ္ဍကော စ ဟောတိ ဣတ္ထိသညီ သာရတ္တော စ။ ဘိက္ခု စ နံ ပဏ္ဍကဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

ပုရိသော စ ဟောတိ ပုရိသသညီ သာရတ္တော စ။ ဘိက္ခု စ နံ ပုရိသဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

ပုရိသော စ ဟောတိ ဝေမတိကော။ပေ.။ ပုရိသော စ ဟောတိ တိရစ္ဆာနဂတသညီ။ ပုရိသော စ ဟောတိ ဣတ္ထိသညီ။ ပုရိသော စ ဟောတိ ပဏ္ဍကသညီ သာရတ္တော စ။ ဘိက္ခု စ နံ ပုရိသဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

တိရစ္ဆာနဂတော စ ဟောတိ တိရစ္ဆာနဂတသညီ သာရတ္တော စ။ ဘိက္ခု စ နံ တိရစ္ဆာနဂတဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

တိရစ္ဆာနဂတော စ ဟောတိ ဝေမတိကော။ပေ.။ တိရစ္ဆာနဂတော စ ဟောတိ ဣတ္ထိသညီ။ တိရစ္ဆာနဂတော စ ဟောတိ ပဏ္ဍကသညီ။ တိရစ္ဆာနဂတော စ ဟောတိ။ ပုရိသသညီ သာရတ္တော စ။ ဘိက္ခု စ နံ တိရစ္ဆာနဂတဿ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။

ဧကမူလကံ နိဋ္ဌိတံ။

၂၇၄. ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ သံဃာဒိသေသာနံ။

ဒွေ ဣတ္ထိယော ဒွိန္နံ ဣတ္ထီနံ ဝေမတိကော သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ။

ဒွေ ဣတ္ထိယော ဒွိန္နံ ဣတ္ထီနံ ပဏ္ဍကသညီ။ပေ.။ ပုရိသသညီ။ တိရစ္ဆာနဂတသညီ သာရတ္တော စ။ ဘိက္ခု စ ဒွိန္နံ ဣတ္ထီနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ။

ဒွေ ပဏ္ဍကာ ဒွိန္နံ ပဏ္ဍကာနံ ပဏ္ဍကသညီ သာရတ္တော စ ဘိက္ခု စ နံ ဒွိန္နံ ပဏ္ဍကာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ။

ဒွေ ပဏ္ဍကာ ဒွိန္နံ ပဏ္ဍကာနံ ဝေမတိကော။ပေ.။ ပုရိသသညီ။ တိရစ္ဆာနဂတသညီ။ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ပဏ္ဍကာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ဒွေ ပုရိသာ ဒွိန္နံ ပုရိသာနံ ပုရိသသညီ သာရတ္တော စ ဘိက္ခု စ နံ ဒွိန္နံ ပုရိသာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ဒွေ ပုရိသာ ဒွိန္နံ ပုရိသာနံ ဝေမတိကော။ပေ.။ တိရစ္ဆာနဂတသညီ။ ဣတ္ထိသညီ။ ပဏ္ဍကသညီ သာရတ္တော စ။ ဘိက္ခု စ နံ ဒွိန္နံ ပုရိသာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ဒွေ တိရစ္ဆာနဂတာ ဒွိန္နံ တိရစ္ဆာနဂတာနံ တိရစ္ဆာနဂတသညီ သာရတ္တော စ။ ဘိက္ခု စ နံ ဒွိန္နံ တိရစ္ဆာနဂတာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ဒွေ တိရစ္ဆာနဂတာ ဒွိန္နံ တိရစ္ဆာနဂတာနံ ဝေမတိကော။ပေ.။ ဣတ္ထိသညီ။ ပဏ္ဍကသညီ ။ ပုရိသသညီ သာရတ္တော စ။ ဘိက္ခု စ နံ ဒွိန္နံ တိရစ္ဆာနဂတာနံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

၂၇၅. ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ သံဃာဒိသေသေန ဒုက္ကဋဿ။

ဣတ္ထီ စ ပဏ္ဍကော စ ဥဘိန္နံ ဝေမတိကော သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ဣတ္ထီ စ ပဏ္ဍကော စ ဥဘိန္နံ ပဏ္ဍကသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ။

ဣတ္ထီ စ ပဏ္ဍကော စ ဥဘိန္နံ ပုရိသသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ဣတ္ထီ စ ပဏ္ဍကော စ ဥဘိန္နံ တိရစ္ဆာနဂတသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ဣတ္ထီ စ ပုရိသော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ သံဃာဒိသေသေန ဒုက္ကဋဿ။

ဣတ္ထီ စ ပုရိသော စ ဥဘိန္နံ ဝေမတိကော။ပေ.။ ပဏ္ဍကသညီ။ ပုရိသသညီ။ တိရစ္ဆာနဂတသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ဣတ္ထီ စ တိရစ္ဆာနဂတော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ သံဃာဒိသေသေန ဒုက္ကဋဿ။

ဣတ္ထီ စ တိရစ္ဆာနဂတော စ ဥဘိန္နံ ဝေမတိကော။ပေ.။ ပဏ္ဍကသညီ။ ပုရိသသညီ ။ တိရစ္ဆာနဂတသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ပဏ္ဍကော စ ပုရိသော စ ဥဘိန္နံ ပဏ္ဍကသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ပဏ္ဍကော စ ပုရိသော စ ဥဘိန္နံ ဝေမတိကော။ပေ.။ ပုရိသသညီ။ တိရစ္ဆာနဂတသညီ။ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ပဏ္ဍကော စ တိရစ္ဆာနဂတော စ ဥဘိန္နံ ပဏ္ဍကသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။

ပဏ္ဍကော စ တိရစ္ဆာနဂတော စ ဥဘိန္နံ ဝေမတိကော။ပေ.။ ပုရိသသညီ။ တိရစ္ဆာနဂတသညီ။ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ပုရိသော စ တိရစ္ဆာနဂတော စ ဥဘိန္နံ ပုရိသသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ပုရိသော စ တိရစ္ဆာနဂတော စ ဥဘိန္နံ ဝေမတိကော။ပေ.။ တိရစ္ဆာနဂတသညီ။ ဣတ္ထိသညီ။ ပဏ္ဍကသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။

ဒုမူလကံ နိဋ္ဌိတံ။

၂၇၆. ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ကာယေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ကာယပဋိဗဒ္ဓေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယပဋိဗဒ္ဓေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ထုလ္လစ္စယာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယပဋိဗဒ္ဓေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ထုလ္လစ္စယေန ဒုက္ကဋဿ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ကာယပဋိဗဒ္ဓေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယပဋိဗဒ္ဓေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယပဋိဗဒ္ဓေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ နိဿဂ္ဂိယေန ကာယံ အာမသတိ အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ နိဿဂ္ဂိယေန ကာယံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ နိဿဂ္ဂိယေန ကာယံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ နိဿဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ နိဿဂ္ဂိယေန နိဿဂ္ဂိယံ အာမသတိ, အာပတ္တိ ဒွိန္နံ ဒုက္ကဋာနံ။ပေ.။။

ဘိက္ခုပေယျာလော နိဋ္ဌိတော။

၂၇၇. ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ ကာယေန ကာယံ အာမသတိ ပရာမသတိ ဩမသတိ ဥမ္မသတိ ဩလင်္ဃေတိ ဥလ္လင်္ဃေတိ အာကဍ္ဎတိ ပတိကဍ္ဎတိ အဘိနိဂ္ဂဏှာတိ အဘိနိပ္ပီဠေတိ ဂဏှာတိ ဆုပတိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ သံဃာဒိသေသဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ ကာယေန ကာယံ အာမသန္တိ ပရာမသန္တိ ဩမသန္တိ ဥမ္မသန္တိ ဩလင်္ဃေန္တိ ဥလ္လင်္ဃေန္တိ အာကဍ္ဎန္တိ ပတိကဍ္ဎန္တိ အဘိနိဂ္ဂဏှန္တိ အဘိနိပ္ပီဠေန္တိ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ သံဃာဒိသေသာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ ကာယေန ကာယံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ သံဃာဒိသေသေန ဒုက္ကဋဿ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ ကာယေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ထုလ္လစ္စယဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ ကာယေန ကာယပဋိဗဒ္ဓံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ထုလ္လစ္စယာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ ကာယေန ကာယပဋိဗဒ္ဓံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ထုလ္လစ္စယေန ဒုက္ကဋဿ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ ကာယပဋိဗဒ္ဓေန ကာယံ အာမသတိ ပရာမသတိ။ပေ.။ ဂဏှာတိ ဆုပတိ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ထုလ္လစ္စယဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ ကာယပဋိဗဒ္ဓေန ကာယံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ထုလ္လစ္စယာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ ကာယပဋိဗဒ္ဓေန ကာယံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ထုလ္လစ္စယေန ဒုက္ကဋဿ။ပေ.။။

၂၇၈. ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ ကာယပဋိဗဒ္ဓေန ကာယပဋိဗဒ္ဓံ အာမသတိ ပရာမသတိ။ပေ.။ ဂဏှာတိ ဆုပတိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ ကာယပဋိဗဒ္ဓေန ကာယပဋိဗဒ္ဓံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ ကာယပဋိဗဒ္ဓေန ကာယပဋိဗဒ္ဓံ အာမသန္တိ ပရာမသန္တိ။ပေ.။ ဂဏှန္တိ ဆုပန္တိ, သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ နိဿဂ္ဂိယေန ကာယံ အာမသတိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ နိဿဂ္ဂိယေန ကာယံ အာမသန္တိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ နိဿဂ္ဂိယေန ကာယံ အာမသန္တိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ နိဿဂ္ဂိယေန ကာယပဋိဗဒ္ဓံ အာမသတိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ နိဿဂ္ဂိယေန ကာယပဋိဗဒ္ဓံ အာမသန္တိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ နိဿဂ္ဂိယေန ကာယပဋိဗဒ္ဓံ အာမသန္တိ။ သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဣတ္ထီ စ နံ ဘိက္ခုဿ နိဿဂ္ဂိယေန နိဿဂ္ဂိယံ အာမသတိ။ သေဝနာဓိပ္ပါယော ကာယေန ဝါယမတိ, န စ ဖဿံ ပဋိဝိဇာနာတိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဣတ္ထိယော စ နံ ဘိက္ခုဿ နိဿဂ္ဂိယေန နိဿဂ္ဂိယံ အာမသန္တိ။ သေဝနာဓိပ္ပါယော ကာယေန ဝါယမတိ, န စ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဥဘော စ နံ ဘိက္ခုဿ နိဿဂ္ဂိယေန နိဿဂ္ဂိယံ အာမသန္တိ။ သေဝနာဓိပ္ပါယော ကာယေန ဝါယမတိ, န စ ဖဿံ ပဋိဝိဇာနာတိ, အာပတ္တိ ဒွိန္နံ ဒုက္ကဋာနံ။ပေ.။။

၂၇၉. သေဝနာဓိပ္ပါယော ကာယေန ဝါယမတိ ဖဿံ ပဋိဝိဇာနာတိ, အာပတ္တိ သံဃာဒိသေသဿ။

သေဝနာဓိပ္ပါယော ကာယေန ဝါယမတိ, န စ ဖဿံ ပဋိဝိဇာနာတိ, အာပတ္တိ ဒုက္ကဋဿ။

သေဝနာဓိပ္ပါယော န စ ကာယေန ဝါယမတိ, ဖဿံ ပဋိဝိဇာနာတိ, အနာပတ္တိ။

သေဝနာဓိပ္ပါယော န စ ကာယေန ဝါယမတိ, န စ ဖဿံ ပဋိဝိဇာနာတိ, အနာပတ္တိ။

မောက္ခါဓိပ္ပါယော ကာယေန ဝါယမတိ, ဖဿံ ပဋိဝိဇာနာတိ, အနာပတ္တိ။

မောက္ခါဓိပ္ပါယော ကာယေန ဝါယမတိ, န စ ဖဿံ ပဋိဝိဇာနာတိ , အနာပတ္တိ။

မောက္ခါဓိပ္ပါယော န စ ကာယေန ဝါယမတိ, ဖဿံ ပဋိဝိဇာနာတိ, အနာပတ္တိ။

မောက္ခါဓိပ္ပါယော န စ ကာယေန ဝါယမတိ, န စ ဖဿံ ပဋိဝိဇာနာတိ, အနာပတ္တိ။

၂၈၀. အနာပတ္တိ အသဉ္စိစ္စ, အသတိယာ, အဇာနန္တဿ, အသာဒိယန္တဿ, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

မာတာ ဓီတာ ဘဂိနီ စ၊ ဇာယာ ယက္ခီ စ ပဏ္ဍကော။

သုတ္တာ မတာ တိရစ္ဆာနာ၊ ဒါရုဓိတလိကာယ စ။

သမ္ပီဠေ သင်္ကမော မဂ္ဂေါ၊ ရုက္ခေါ နာဝါ စ ရဇ္ဇု စ။

ဒဏ္ဍော ပတ္တံ ပဏာမေသိ၊ ဝန္ဒေ ဝါယမိ နစ္ဆုပေတိ။

ဝိနီတဝတ္ထု

၂၈၁. တေန ခေါ ပန သမယေန အညတရော ဘိက္ခု မာတုယာ မာတုပေမေန အာမသိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဓီတုယာ ဓီတုပေမေန အာမသိ။ပေ.။ ဘဂိနိယာ ဘဂိနိပေမေန အာမသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ပုရာဏဒုတိယိကာယ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု ယက္ခိနိယာ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ပဏ္ဍကဿ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ , ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု သုတ္တိတ္ထိယာ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု မတိတ္ထိယာ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု တိရစ္ဆာနဂတိတ္ထိယာ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဒါရုဓီတလိကာယ ကာယသံသဂ္ဂံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

၂၈၂. တေန ခေါ ပန သမယေန သမ္ဗဟုလာ ဣတ္ထိယော အညတရံ ဘိက္ခုံ သမ္ပီဠေတွာ ဗာဟာပရမ္ပရာယ အာနေသုံ။ တဿ ကုက္ကုစ္စံ အဟောသိ။ပေ.။ ‘‘သာဒိယိ တွံ, ဘိက္ခူ’’တိ? ‘‘နာဟံ, ဘဂဝါ, သာဒိယိ’’န္တိ။ ‘‘အနာပတ္တိ, ဘိက္ခူ, အသာဒိယန္တဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိယာ အဘိရူဠှံ သင်္ကမံ သာရတ္တော သဉ္စာလေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိံ ပဋိပထေ ပဿိတွာ သာရတ္တော အံသကူဋေန ပဟာရံ အဒါသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု ဣတ္ထိယာ အဘိရူဠှံ ရုက္ခံ သာရတ္တော သဉ္စာလေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိယာ အဘိရူဠှံ နာဝံ သာရတ္တော သဉ္စာလေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိယာ ဂဟိတံ ရဇ္ဇုံ သာရတ္တော အာဝိဉ္ဆိ [အာဝိဉ္ဇိ (သီ. သျာ.)]။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိယာ ဂဟိတံ ဒဏ္ဍံ သာရတ္တော အာဝိဉ္ဆိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု သာရတ္တော ဣတ္ထိံ ပတ္တေန ပဏာမေသိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု ဣတ္ထိယာ ဝန္ဒန္တိယာ သာရတ္တော ပါဒံ ဥစ္စာရေသိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု ဣတ္ထိံ ဂဟေဿာမီတိ ဝါယမိတွာ န ဆုပိ။

တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

ကာယသံသဂ္ဂသိက္ခါပဒံ နိဋ္ဌိတံ ဒုတိယံ။

၃. ဒုဋ္ဌုလ္လဝါစာသိက္ခါပဒံ

၂၈၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ အရညေ ဝိဟရတိ။ တဿာယသ္မတော ဝိဟာရော အဘိရူပေါ ဟောတိ ဒဿနီယော ပါသာဒိကော။ တေန ခေါ ပန သမယေန သမ္ဗဟုလာ ဣတ္ထိယော အာရာမံ အာဂမံသု ဝိဟာရပေက္ခိကာယော။ အထ ခေါ တာ ဣတ္ထိယော ယေနာယသ္မာ ဥဒါယီ တေနုပသင်္ကမိံသု; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစုံ – ‘‘ဣစ္ဆာမ မယံ, ဘန္တေ, အယျဿ ဝိဟာရံ ပေက္ခိတု’’န္တိ။ အထ ခေါ အာယသ္မာ ဥဒါယီ တာ ဣတ္ထိယော ဝိဟာရံ ပေက္ခါပေတွာ တာသံ ဣတ္ထီနံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ ယာစတိပိ အာယာစတိပိ ပုစ္ဆတိပိ ပဋိပုစ္ဆတိပိ အာစိက္ခတိပိ အနုသာသတိပိ အက္ကောသတိပိ။ ယာ တာ ဣတ္ထိယော ဆိန္နိကာ ဓုတ္တိကာ အဟိရိကာယော တာ အာယသ္မတာ ဥဒါယိနာ သဒ္ဓိံ ဥဟသန္တိပိ ဥလ္လပန္တိပိ ဥဇ္ဇဂ္ဃန္တိပိ ဥပ္ပဏ္ဍေန္တိပိ။ ယာ ပန တာ ဣတ္ထိယော ဟိရိမနာ တာ နိက္ခမိတွာ ဘိက္ခူ ဥဇ္ဈာပေန္တိ – ‘‘ဣဒံ, ဘန္တေ, နစ္ဆန္နံ နပ္ပတိရူပံ။ သာမိကေနပိ မယံ ဧဝံ ဝုတ္တာ န ဣစ္ဆေယျာမ, ကိံ ပနာယျေန ဥဒါယိနာ’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ, ဥဒါယိ, မာတုဂါမံ ဒုဋ္ဌုလ္လာဟိ ဝါစာဟိ ဩဘာသသီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, မာတုဂါမံ ဒုဋ္ဌုလ္လာဟိ ဝါစာဟိ ဩဘာသိဿသိ! နနု မယာ, မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော နော သရာဂါယ။ပေ.။ ကာမပရိဠာဟာနံ ဝူပသမော အက္ခါတော။ နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၂၈၄. ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမံ ဒုဋ္ဌုလ္လာဟိ ဝါစာဟိ ဩဘာသေယျ ယထာ တံ ယုဝါ ယုဝတိံ မေထုနုပသံဟိတာဟိ, သံဃာဒိသေသော’’တိ။

၂၈၅. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဩတိဏ္ဏော နာမ သာရတ္တော အပေက္ခဝါ ပဋိဗဒ္ဓစိတ္တော။

ဝိပရိဏတန္တိ ရတ္တမ္ပိ စိတ္တံ ဝိပရိဏတံ, ဒုဋ္ဌမ္ပိ စိတ္တံ ဝိပရိဏတံ မူဠှမ္ပိ စိတ္တံ ဝိပရိဏတံ။ အပိစ, ရတ္တံ စိတ္တံ ဣမသ္မိံ အတ္ထေ အဓိပ္ပေတံ ဝိပရိဏတန္တိ။

မာတုဂါမော နာမ မနုဿိတ္ထီ, န ယက္ခီ, န ပေတီ, န တိရစ္ဆာနဂတာ။ ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ။

ဒုဋ္ဌုလ္လာ နာမ ဝါစာ ဝစ္စမဂ္ဂပဿာဝမဂ္ဂမေထုနဓမ္မပ္ပဋိသံယုတ္တာ ဝါစာ။

ဩဘာသေယျာတိ အဇ္ဈာစာရော ဝုစ္စတိ။

ယထာ တံ ယုဝါ ယုဝတိန္တိ ဒဟရော ဒဟရိံ, တရုဏော တရုဏိံ, ကာမဘောဂီ ကာမဘောဂိနိံ။

မေထုနုပသံဟိတာဟီတိ မေထုနဓမ္မပ္ပဋိသံယုတ္တာဟိ။

သံဃာဒိသေသောတိ ။ပေ.။ တေနပိ ဝုစ္စတိ သံဃာဒိသေသောတိ။

ဒွေ မဂ္ဂေ အာဒိဿ ဝဏ္ဏမ္ပိ ဘဏတိ, အဝဏ္ဏမ္ပိ ဘဏတိ, ယာစတိပိ, အာယာစတိပိ, ပုစ္ဆတိပိ, ပဋိပုစ္ဆတိပိ, အာစိက္ခတိပိ, အနုသာသတိပိ, အက္ကောသတိပိ။

ဝဏ္ဏံ ဘဏတိ နာမ ဒွေ မဂ္ဂေ ထောမေတိ ဝဏ္ဏေတိ ပသံသတိ။

အဝဏ္ဏံ ဘဏတိ နာမ ဒွေ မဂ္ဂေ ခုံသေတိ ဝမ္ဘေတိ ဂရဟတိ။

ယာစတိ နာမ ဒေဟိ မေ, အရဟသိ မေ ဒါတုန္တိ။

အာယာစတိ နာမ ကဒါ တေ မာတာ ပသီဒိဿတိ, ကဒါ တေ ပိတာ ပသီဒိဿတိ, ကဒါ တေ ဒေဝတာယော ပသီဒိဿန္တိ, ကဒါ [ကဒါ တေ (သျာ.)] သုခဏော သုလယော သုမုဟုတ္တော ဘဝိဿတိ, ကဒါ တေ မေထုနံ ဓမ္မံ လဘိဿာမီတိ။

ပုစ္ဆတိ နာမ ကထံ တွံ သာမိကဿ ဒေသိ, ကထံ ဇာရဿ ဒေသီတိ?

ပဋိပုစ္ဆတိ နာမ ဧဝံ ကိရ တွံ သာမိကဿ ဒေသိ, ဧဝံ ဇာရဿ ဒေသီတိ။

အာစိက္ခတိ နာမ ပုဋ္ဌော ဘဏတိ – ‘‘ဧဝံ ဒေဟိ။ ဧဝံ ဒေန္တာ သာမိကဿ ပိယာ ဘဝိဿသိ မနာပါ စာ’’တိ။

အနုသာသတိ နာမ အပုဋ္ဌော ဘဏတိ – ‘‘ဧဝံ ဒေဟိ။ ဧဝံ ဒေန္တာ သာမိကဿ ပိယာ ဘဝိဿတိ မနာပါ စာ’’တိ။

အက္ကောသတိ နာမ အနိမိတ္တာသိ, နိမိတ္တမတ္တာသိ, အလောဟိတာသိ, ဓုဝလောဟိတာသိ , ဓုဝစောဠာသိ, ပဂ္ဃရန္တီသိ, သိခရဏီသိ, ဣတ္ထိပဏ္ဍကာသိ, ဝေပုရိသိကာသိ, သမ္ဘိန္နာသိ, ဥဘတောဗျဉ္ဇနာသီတိ။

၂၈၆. ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ ယာစတိပိ အာယာစတိပိ ပုစ္ဆတိပိ ပဋိပုစ္ဆတိပိ အာစိက္ခတိပိ အနုသာသတိပိ အက္ကောသတိပိ, အာပတ္တိ သံဃာဒိသေသဿ။ပေ.။ ။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏံပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ သံဃာဒိသေသာနံ။ပေ.။ ။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ သံဃာဒိသေသေန ဒုက္ကဋဿ။ပေ.။ ။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ , အာပတ္တိ ထုလ္လစ္စယဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ ထုလ္လစ္စယာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ထုလ္လစ္စယေန ဒုက္ကဋဿ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ဥဗ္ဘက္ခကံ အဓေါဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ဥဗ္ဘက္ခကံ အဓေါဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ဥဗ္ဘက္ခကံ အဓေါဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒုက္ကဋဿ။ပေ.။။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ ဒုက္ကဋာနံ။ပေ.။။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ.။ အက္ကောသတိပိ, အာပတ္တိ ဒွိန္နံ ဒုက္ကဋာနံ။ပေ.။။

၂၈၇. အနာပတ္တိ အတ္ထပုရေက္ခါရဿ, ဓမ္မပုရေက္ခါရဿ, အနုသာသနိပုရေက္ခါရဿ, ဥမ္မတ္တကဿ, အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

လောဟိတံ ကက္ကသာကိဏ္ဏံ၊ ခရံ ဒီဃဉ္စ ဝါပိတံ။

ကစ္စိ သံသီဒတိ မဂ္ဂေါ၊ သဒ္ဓါ ဒါနေန ကမ္မုနာတိ။

ဝိနီတဝတ္ထု

၂၈၈. တေန ခေါ ပန သမယေန အညတရာ ဣတ္ထီ နဝရတ္တံ ကမ္ဗလံ ပါရုတာ ဟောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘လောဟိတံ ခေါ တေ, ဘဂိနီ’’တိ။ သာ န ပဋိဝိဇာနိ။ ‘‘အာမာယျ, နဝရတ္တော ကမ္ဗလော’’တိ။ တဿ ကုက္ကုစ္စံ အဟောသိ ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဣတ္ထီ ခရကမ္ဗလံ ပါရုတာ ဟောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ကက္ကသလောမံ ခေါ တေ, ဘဂိနီ’’တိ။ သာ န ပဋိဝိဇာနိ။ ‘‘အာမာယျ, ခရကမ္ဗလကော’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဣတ္ထီ နဝါဝုတံ ကမ္ဗလံ ပါရုတာ ဟောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘အာကိဏ္ဏလောမံ ခေါ တေ, ဘဂိနီ’’တိ။ သာ န ပဋိဝိဇာနိ။ ‘‘အာမာယျ, နဝါဝုတော ကမ္ဗလော’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဣတ္ထီ ခရကမ္ဗလံ ပါရုတာ ဟောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ခရလောမံ ခေါ တေ, ဘဂိနီ’’တိ။ သာ န ပဋိဝိဇာနိ။ ‘‘အာမာယျ, ခရကမ္ဗလကော’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဣတ္ထီ ပါဝါရံ [ဒီဃပါဝါရံ (သျာ.)] ပါရုတာ ဟောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ဒီဃလောမံ ခေါ တေ, ဘဂိနီ’’တိ။ သာ န ပဋိဝိဇာနိ။ ‘‘အာမာယျ, ပါဝါရော’’ [ဒီဃပါဝါရော (သျာ.)] တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

၂၈၉. တေန ခေါ ပန သမယေန အညတရာ ဣတ္ထီ ခေတ္တံ ဝပါပေတွာ အာဂစ္ဆတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ဝါပိတံ ခေါ တေ, ဘဂိနီ’’တိ? သာ န ပဋိဝိဇာနိ။ ‘‘အာမာယျ, နော စ ခေါ ပဋိဝုတ္တ’’န္တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ဘိက္ခု ပရိဗ္ဗာဇိကံ ပဋိပထေ ပဿိတွာ သာရတ္တော တံ ပရိဗ္ဗာဇိကံ ဧတဒဝေါစ – ‘‘ကစ္စိ, ဘဂိနိ, မဂ္ဂေါ သံသီဒတီ’’တိ? သာ န ပဋိဝိဇာနိ။ ‘‘အာမ ဘိက္ခု, ပဋိပဇ္ဇိဿသီ’’တိ ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

တေန ခေါ ပန သမယေန အညတရော ဘိက္ခု သာရတ္တော အညတရံ ဣတ္ထိံ ဧတဒဝေါစ – ‘‘သဒ္ဓါသိ တွံ, ဘဂိနိ။ အပိစ, ယံ သာမိကဿ ဒေသိ တံ နာမှာကံ ဒေသီ’’တိ ။ ‘‘ကိံ, ဘန္တေ’’တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရော ဘိက္ခု သာရတ္တော အညတရံ ဣတ္ထိံ ဧတဒဝေါစ – ‘‘သဒ္ဓါသိ တွံ, ဘဂိနိ။ အပိစ, ယံ အဂ္ဂဒါနံ တံ နာမှာကံ ဒေသီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကမ္မံ ကရောတိ။ အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘တိဋ္ဌ, ဘဂိနိ, အဟံ ကရိဿာမီတိ။ပေ.။ နိသီဒ, ဘဂိနိ, အဟံ ကရိဿာမီတိ။ပေ.။ နိပဇ္ဇ, ဘဂိနိ, အဟံ ကရိဿာမီ’’တိ။ သာ န ပဋိဝိဇာနိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

ဒုဋ္ဌုလ္လဝါစာသိက္ခါပဒံ နိဋ္ဌိတံ တတိယံ။

၄. အတ္တကာမပါရိစရိယသိက္ခါပဒံ

၂၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ သာဝတ္ထိယံ ကုလူပကော ဟောတိ, ဗဟုကာနိ ကုလာနိ ဥပသင်္ကမတိ။ တေန ခေါ ပန သမယေန အညတရာ ဣတ္ထီ မတပတိကာ အဘိရူပါ ဟောတိ ဒဿနီယာ ပါသာဒိကာ။ အထ ခေါ အာယသ္မာ ဥဒါယီ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တဿာ ဣတ္ထိယာ နိဝေသနံ တေနုပသင်္ကမိ; ဥပသင်္ကမိတွာ ပညတ္တေ အာသနေ နိသီဒိ။ အထ ခေါ သာ ဣတ္ထီ ယေနာယသ္မာ ဥဒါယီ တေနုပသင်္ကမိ; ဥပသင်္ကမိတွာ အာယသ္မန္တံ ဥဒါယိံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ တံ ဣတ္ထိံ အာယသ္မာ ဥဒါယီ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ သာ ဣတ္ထီ အာယသ္မတာ ဥဒါယိနာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ အာယသ္မန္တံ ဥဒါယိံ ဧတဒဝေါစ – ‘‘ဝဒေယျာထ, ဘန္တေ, ယေန အတ္ထော။ ပဋိဗလာ မယံ အယျဿ ဒါတုံ ယဒိဒံ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရ’’န္တိ။

‘‘န ခေါ တေ, ဘဂိနိ, အမှာကံ ဒုလ္လဘာ ယဒိဒံ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရာ။ အပိစ, ယော အမှာကံ ဒုလ္လဘော တံ ဒေဟီ’’တိ။ ‘‘ကိံ, ဘန္တေ’’တိ? ‘‘မေထုနဓမ္မ’’န္တိ။ ‘‘အတ္ထော , ဘန္တေ’’တိ? ‘‘အတ္ထော, ဘဂိနီ’’တိ။ ‘‘ဧဟိ, ဘန္တေ’’တိ, ဩဝရကံ ပဝိသိတွာ သာဋကံ နိက္ခိပိတွာ မဉ္စကေ ဥတ္တာနာ နိပဇ္ဇိ။ အထ ခေါ အာယသ္မာ ဥဒါယီ ယေန သာ ဣတ္ထီ တေနုပသင်္ကမိ; ဥပသင်္ကမိတွာ – ‘‘ကော ဣမံ ဝသလံ ဒုဂ္ဂန္ဓံ အာမသိဿတီ’’တိ, နိဋ္ဌုဟိတွာ ပက္ကာမိ။ အထ ခေါ သာ ဣတ္ထီ ဥဇ္ဈာယတိ ခိယျတိ ဝိပါစေတိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ ဣမေ ဟိ နာမ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ နတ္ထိ ဣမေသံ ဗြဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗြဟ္မညံ, ကုတော ဣမေသံ သာမညံ ကုတော ဣမေသံ ဗြဟ္မညံ, အပဂတာ ဣမေ သာမညာ အပဂတာ ဣမေ ဗြဟ္မညာ။ ကထဉှိ နာမ သမဏော ဥဒါယီ မံ သာမံ မေထုနဓမ္မံ ယာစိတွာ, ‘ကော ဣမံ ဝသလံ ဒုဂ္ဂန္ဓံ အာမသိဿတီ’’တိ နိဋ္ဌုဟိတွာ ပက္ကမိဿတိ! ကိံ မေ ပါပကံ ကိံ မေ ဒုဂ္ဂန္ဓံ, ကဿာဟံ ကေန ဟာယာမီ’’တိ? အညာပိ ဣတ္ထိယော ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ပေ.။ ကထဉှိ နာမ သမဏော ဥဒါယီ ဣမိဿာ သာမံ မေထုနဓမ္မံ ယာစိတွာ, ‘ကော ဣမံ ဝသလံ ဒုဂ္ဂန္ဓံ အာမသိဿတီ’တိ နိဋ္ဌုဟိတွာ ပက္ကမိဿတိ! ကိံ ဣမိဿာ ပါပကံ ကိံ ဣမိဿာ ဒုဂ္ဂန္ဓံ, ကဿာယံ ကေန ဟာယတီ’’တိ? အဿောသုံ ခေါ ဘိက္ခူ တာသံ ဣတ္ထီနံ ဥဇ္ဈာယန္တီနံ ခိယျန္တီနံ ဝိပါစေန္တီနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသိဿတီ’’တိ!

အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ, ဥဒါယိ, မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသသီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထဉှိ နာမ တွံ, မောဃပုရိသ, မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသိဿသိ! နနု မယာ , မောဃပုရိသ, အနေကပရိယာယေန ဝိရာဂါယ ဓမ္မော ဒေသိတော နော သရာဂါယ။ပေ.။ ကာမပရိဠာဟာနံ ဝူပသမော အက္ခါတော? နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၂၉၁. ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသေယျ – ‘ဧတဒဂ္ဂံ, ဘဂိနိ, ပါရိစရိယာနံ ယာ မာဒိသံ သီလဝန္တံ ကလျာဏဓမ္မံ ဗြဟ္မစာရိံ ဧတေန ဓမ္မေန ပရိစရေယျာတိ မေထုနုပသံဟိတေန’, သံဃာဒိသေသော’’တိ။

၂၉၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဩတိဏ္ဏော နာမ သာရတ္တော အပေက္ခဝါ ပဋိဗဒ္ဓစိတ္တော။

ဝိပရိဏတန္တိ ရတ္တမ္ပိ စိတ္တံ ဝိပရိဏတ္တံ, ဒုဋ္ဌမ္ပိ စိတ္တံ ဝိပရိဏတံ, မူဠှမ္ပိ စိတ္တံ ဝိပရိဏတံ။ အပိစ, ရတ္တံ စိတ္တံ ဣမသ္မိံ အတ္ထေ အဓိပ္ပေတံ ဝိပရိဏတန္တိ။

မာတုဂါမော နာမ မနုဿိတ္ထီ, န ယက္ခီ, န ပေတီ, န တိရစ္ဆာနဂတာ။ ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌလ္လာဒုဋ္ဌုလ္လံ အာဇာနိတုံ။

မာတုဂါမဿ သန္တိကေတိ မာတုဂါမဿ သာမန္တာ, မာတုဂါမဿ အဝိဒူရေ။

အတ္တကာမန္တိ အတ္တနော ကာမံ အတ္တနော ဟေတုံ အတ္တနော အဓိပ္ပါယံ အတ္တနော ပါရိစရိယံ။

ဧတဒဂ္ဂန္တိ ဧတံ အဂ္ဂံ ဧတံ သေဋ္ဌံ ဧတံ မောက္ခံ ဧတံ ဥတ္တမံ ဧတံ ပဝရံ။

ယာတိ ခတ္တိယီ [ခတ္တိယာ (သျာ.)] ဝါ ဗြာဟ္မဏီ ဝါ ဝေဿီ ဝါ သုဒ္ဒီ ဝါ။

မာဒိသန္တိ ခတ္တိယံ ဝါ ဗြာဟ္မဏံ ဝါ ဝေဿံ ဝါ သုဒ္ဒံ ဝါ။

သီလဝန္တန္တိ ပါဏာတိပါတာ ပဋိဝိရတံ, အဒိန္နာဒါနာ ပဋိဝိရတံ, မုသာဝါဒါ ပဋိဝိရတံ။

ဗြဟ္မစာရိန္တိ မေထုနဓမ္မာ ပဋိဝိရတံ။

ကလျာဏဓမ္မော နာမ တေန စ သီလေန တေန စ ဗြဟ္မစရိယေန ကလျာဏဓမ္မော ဟောတိ။

ဧတေန ဓမ္မေနာတိ မေထုနဓမ္မေန။

ပရိစရေယျာတိ အဘိရမေယျ။

မေထုနုပသံဟိတေနာတိ မေထုနဓမ္မပ္ပဋိသံယုတ္တေန။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၂၉၃. ဣတ္ထီ စ ဟောတိ ဣတ္ထိသညီ သာရတ္တော စ။ ဘိက္ခု စ နံ ဣတ္ထိယာ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ သံဃာဒိသေသဿ ။

ဣတ္ထီ စ ဟောတိ ဝေမတိကော။ပေ.။ ပဏ္ဍကသညီ။ ပုရိသသညီ။ တိရစ္ဆာနဂတသညီ သာရတ္တော စ။ ဘိက္ခု စ နံ ဣတ္ထိယာ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ထုလ္လစ္စယဿ။

ပဏ္ဍကော စ ဟောတိ ပဏ္ဍကသညီ သာရတ္တော စ။ ဘိက္ခု စ နံ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ထုလ္လစ္စယဿ။

ပဏ္ဍကော စ ဟောတိ ဝေမတိကော။ပေ.။ ပုရိသသညီ။ တိရစ္ဆာနဂတသညီ။ ဣတ္ထိသညီ သာရတ္တော စ။ ဘိက္ခု စ နံ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ဒုက္ကဋဿ။

ပုရိသော စ ဟောတိ။ပေ.။ တိရစ္ဆာနဂတော စ ဟောတိ တိရစ္ဆာနဂတသညီ။ပေ.။ ဝေမတိကော ဣတ္ထိသညီ။ ပဏ္ဍကသညီ။ ပုရိသသညီ သာရတ္တော စ။ ဘိက္ခု စ နံ တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ဒုက္ကဋဿ။

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ။ ဘိက္ခု စ နံ ဒွိန္နံ ဣတ္ထီနံ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ဒွိန္နံ သံဃာဒိသေသာနံ။ပေ.။ ။

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ။ ဘိက္ခု စ နံ ဥဘိန္နံ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ သံဃာဒိသေသေန ဒုက္ကဋဿ။ပေ.။ ။

၂၉၄. အနာပတ္တိ ‘‘စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရေန ဥပဋ္ဌဟာ’’တိ ဘဏတိ, ဥမ္မတ္တကဿ အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

ကထံ ဝဉ္ဈာ လဘေ ပုတ္တံ၊ ပိယာ စ သုဘဂါ သိယံ။

ကိံ ဒဇ္ဇံ ကေနုပဋ္ဌေယျံ၊ ကထံ ဂစ္ဆေယျံ သုဂ္ဂတိန္တိ။

ဝိနီတဝတ္ထု

၂၉၅. တေန ခေါ ပန သမယေန အညတရာ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ, ဘန္တေ, ဝိဇာယေယျ’’န္တိ? ‘‘တေန ဟိ, ဘဂိနိ, အဂ္ဂဒါနံ ဒေဟီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဝိဇာယိနီ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ, ဘန္တေ, ပုတ္တံ လဘေယျ’’န္တိ? ‘‘တေန ဟိ, ဘဂိနိ, အဂ္ဂဒါနံ ဒေဟီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ, ဘန္တေ, သာမိကဿ ပိယာ အဿ’’န္တိ? ‘‘တေန ဟိ, ဘဂိနိ, အဂ္ဂဒါနံ ဒေဟီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ, ဘန္တေ, သုဘဂါ အဿ’’န္တိ? ‘‘တေန ဟိ , ဘဂိနိ, အဂ္ဂဒါနံ ဒေဟီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကျာဟံ, ဘန္တေ, အယျဿ ဒဇ္ဇာမီ’’တိ? ‘‘အဂ္ဂဒါနံ, ဘဂိနီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကေနာဟံ, ဘန္တေ, အယျံ ဥပဋ္ဌေမီ’’တိ? ‘‘အဂ္ဂဒါနေန, ဘဂိနီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ,

ဘန္တေ, သုဂတိံ ဂစ္ဆေယျ’’န္တိ? ‘‘တေန ဟိ, ဘဂိနိ, အဂ္ဂဒါနံ ဒေဟီ’’တိ။ ‘‘ကိံ, ဘန္တေ, အဂ္ဂဒါန’’န္တိ? ‘‘မေထုနဓမ္မ’’န္တိ။ တဿ ကုက္ကုစ္စံ အဟောသိ။ပေ.။ ‘‘အာပတ္တိံ တွံ, ဘိက္ခု, အာပန္နော သံဃာဒိသေသ’’န္တိ။

အတ္တကာမပါရိစရိယသိက္ခါပဒံ နိဋ္ဌိတံ စတုတ္ထံ။

၅. သဉ္စရိတ္တသိက္ခါပဒံ

၂၉၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အာယသ္မာ ဥဒါယီ သာဝတ္ထိယံ ကုလူပကော ဟောတိ။ ဗဟုကာနိ ကုလာနိ ဥပသင်္ကမတိ။ ယတ္ထ ပဿတိ ကုမာရကံ ဝါ အပဇာပတိကံ, ကုမာရိကံ ဝါ အပတိကံ, ကုမာရကဿ မာတာပိတူနံ သန္တိကေ ကုမာရိကာယ ဝဏ္ဏံ ဘဏတိ – ‘‘အမုကဿ ကုလဿ ကုမာရိကာ အဘိရူပါ ဒဿနီယာ ပါသာဒိကာ ပဏ္ဍိတာ ဗျတ္တာ မေဓါဝိနီ ဒက္ခါ အနလသာ။ ဆန္နာ သာ ကုမာရိကာ ဣမဿ ကုမာရကဿာ’’တိ။ တေ ဧဝံ ဝဒန္တိ – ‘‘ဧတေ ခေါ, ဘန္တေ, အမှေ န ဇာနန္တိ – ‘ကေ ဝါ ဣမေ ကဿ ဝါ’တိ။ သစေ, ဘန္တေ, အယျော ဒါပေယျ အာနေယျာမ မယံ တံ ကုမာရိကံ ဣမဿ ကုမာရကဿာ’’တိ။ ကုမာရိကာယ မာတာပိတူနံ သန္တိကေ ကုမာရကဿ ဝဏ္ဏံ ဘဏတိ – ‘‘အမုကဿ ကုလဿ ကုမာရကော အဘိရူပေါ ဒဿနီယော ပါသာဒိကော ပဏ္ဍိတော ဗျတ္တော မေဓါဝီ ဒက္ခေါ အနလသော။ ဆန္နာယံ ကုမာရိကာ တဿ ကုမာရကဿာ’’တိ [ဆန္နော သော ကုမာရကော ဣမိဿာ ကုမာရိကာယာတိ (သျာ.)]။ တေ ဧဝံ ဝဒန္တိ – ‘‘ဧတေ ခေါ, ဘန္တေ, အမှေ န ဇာနန္တိ – ‘ကေ ဝါ ဣမေ ကဿ ဝါ’တိ, ကိသ္မိံ ဝိယ ကုမာရိကာယ ဝတ္တုံ။ သစေ, ဘန္တေ, အယျော ယာစာပေယျ ဒဇ္ဇေယျာမ မယံ ဣမံ ကုမာရိကံ တဿ ကုမာရကဿာ’’တိ။ ဧတေနေဝ ဥပါယေန အာဝါဟာနိပိ ကာရာပေတိ , ဝိဝါဟာနိပိ ကာရာပေတိ, ဝါရေယျာနိပိ ကာရာပေတိ။

၂၉၇. တေန ခေါ ပန သမယေန အညတရိဿာ ပုရာဏဂဏကိယာ ဓီတာ အဘိရူပါ ဟောတိ ဒဿနီယာ ပါသာဒိကာ။ တိရောဂါမကာ အာဇီဝကသာဝကာ အာဂန္တွာ တံ ဂဏကိံ ဧတဒဝေါစုံ – ‘‘ဒေဟာယျေ, ဣမံ ကုမာရိကံ အမှာကံ ကုမာရကဿာ’’တိ။ သာ ဧဝမာဟ – ‘‘အဟံ ခွယျော [ခွယျာ (သျာ.), ခွာယျော (က.)] တုမှေ န ဇာနာမိ – ‘ကေ ဝါ ဣမေ ကဿ ဝါ’တိ။ အယဉ္စ မေ ဧကဓီတိကာ, တိရောဂါမော စ ဂန္တဗ္ဗော, နာဟံ ဒဿာမီ’’တိ။ မနုဿာ တေ အာဇီဝကသာဝကေ ဧတဒဝေါစုံ – ‘‘ကိဿ တုမှေ, အယျော , အာဂတတ္ထာ’’တိ? ‘‘ဣဓ မယံ, အယျော, အမုကံ နာမ ဂဏကိံ ဓီတရံ ယာစိမှာ အမှာကံ ကုမာရကဿ။ သာ ဧဝမာဟ – ‘အဟံ, ခွယျော တုမှေ န ဇာနာမိ – ကေ ဝါ ဣမေ ကဿ ဝါ’တိ။ အယဉ္စ မေ ဧကဓီတိကာ, တိရောဂါမော စ ဂန္တဗ္ဗော, နာဟံ ဒဿာမီ’’တိ။ ‘‘ကိဿ တုမှေ, အယျော, တံ ဂဏကိံ ဓီတရံ ယာစိတ္ထ? နနု အယျော ဥဒါယီ ဝတ္တဗ္ဗော။ အယျော ဥဒါယီ ဒါပေဿတီ’’တိ။

အထ ခေါ တေ အာဇီဝကသာဝကာ ယေနာယသ္မာ ဥဒါယီ တေနုပသင်္ကမိံသု; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစုံ – ‘‘ဣဓ မယံ, ဘန္တေ, အမုကံ နာမ ဂဏကိံ ဓီတရံ ယာစိမှာ အမှာကံ ကုမာရကဿ။ သာ ဧဝမာဟ – ‘အဟံ ခွယျော တုမှေ န ဇာနာမိ – ကေ ဝါ ဣမေ ကဿ ဝါတိ။ အယဉ္စ မေ ဧကဓီတိကာ, တိရောဂါမော စ ဂန္တဗ္ဗော, နာဟံ ဒဿာမီ’တိ။ သာဓု, ဘန္တေ, အယျော တံ ဂဏကိံ ဓီတရံ ဒါပေတု အမှာကံ ကုမာရကဿာ’’တိ။ အထ ခေါ အာယသ္မာ ဥဒါယီ ယေန သာ ဂဏကီ တေနုပသင်္ကမိ; ဥပသင်္ကမိတွာ တံ ဂဏကိံ ဧတဒဝေါစ – ‘‘ကိဿိမေသံ ဓီတရံ န ဒေသီ’’တိ? ‘‘အဟံ ခွယျ, ဣမေ န ဇာနာမိ – ‘ကေ ဝါ ဣမေ ကဿ ဝါ’တိ။ အယဉ္စ မေ ဧကဓီတိကာ, တိရောဂါမော စ ဂန္တဗ္ဗော, နာဟံ ဒဿာမီ’’တိ။ ‘‘ဒေဟိမေသံ။ အဟံ ဣမေ ဇာနာမီ’’တိ။ ‘‘သစေ, ဘန္တေ, အယျော ဇာနာတိ, ဒဿာမီ’’တိ။ အထ ခေါ သာ ဂဏကီ တေသံ အာဇီဝကသာဝကာနံ ဓီတရံ အဒါသိ။ အထ ခေါ တေ အာဇီဝကသာဝကာ တံ ကုမာရိကံ နေတွာ မာသံယေဝ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။

အထ ခေါ သာ ကုမာရိကာ မာတုယာ သန္တိကေ ဒူတံ ပါဟေသိ – ‘‘အဟမှိ ဒုဂ္ဂတာ ဒုက္ခိတာ, န သုခံ လဘာမိ။ မာသံယေဝ မံ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။ အာဂစ္ဆတု မေ မာတာ, မံ နေဿတူ’’တိ။ အထ ခေါ သာ ဂဏကီ ယေန တေ အာဇီဝကသာဝကာ တေနုပသင်္ကမိ; ဥပသင်္ကမိတွာ တေ အာဇီဝကသာဝကေ ဧတဒဝေါစ – ‘‘မာယျော, ဣမံ ကုမာရိကံ ဒါသိဘောဂေန ဘုဉ္ဇိတ္ထ။ သုဏိသဘောဂေန ဣမံ ကုမာရိကံ ဘုဉ္ဇထာ’’တိ။ တေ ဧဝမာဟံသု – ‘‘နတ္ထမှာကံ တယာ သဒ္ဓိံ အာဟာရူပဟာရော, သမဏေန သဒ္ဓိံ အမှာကံ အာဟာရူပဟာရော ။ ဂစ္ဆ တွံ။ န မယံ တံ ဇာနာမာ’’တိ။ အထ ခေါ သာ ဂဏကီ တေဟိ အာဇီဝကသာဝကေဟိ အပသာဒိတာ ပုနဒေဝ သာဝတ္ထိံ ပစ္စာဂဉ္ဆိ။ ဒုတိယမ္ပိ ခေါ သာ ကုမာရိကာ မာတုယာ သန္တိကေ ဒူတံ ပါဟေသိ – ‘‘အဟမှိ ဒုဂ္ဂတာ ဒုက္ခိတာ, န သုခံ လဘာမိ။ မာသံယေဝ မံ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။ အာဂစ္ဆတု မေ မာတာ, မံ နေဿတူ’’တိ။ အထ ခေါ သာ ဂဏကီ ယေနာယသ္မာ ဥဒါယီ တေနုပသင်္ကမိ; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစ – ‘‘သာ ကိရ, ဘန္တေ, ကုမာရိကာ ဒုဂ္ဂတာ ဒုက္ခိတာ, န သုခံ လဘတိ။ မာသံယေဝ နံ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။ ဝဒေယျာထ, ဘန္တေ – ‘မာယျော, ဣမံ ကုမာရိကံ ဒါသိဘောဂေန ဘုဉ္ဇိတ္ထ။ သုဏိသဘောဂေန ဣမံ ကုမာရိကံ ဘုဉ္ဇိထာ’’’တိ။

အထ ခေါ အာယသ္မာ ဥဒါယီ ယေန တေ အာဇီဝကသာဝကာ တေနုပသင်္ကမိ; ဥပသင်္ကမိတွာ တေ အာဇီဝကသာဝကေ ဧတဒဝေါစ – ‘‘မာယျော, ဣမံ ကုမာရိကံ ဒါသိဘောဂေန ဘုဇ္ဇိတ္ထ။ သုဏိသဘောဂေန ဣမံ ကုမာရိကံ ဘုဉ္ဇထာ’’တိ။ တေ ဧဝမာဟံသု – ‘‘နတ္ထမှာကံ တယာ သဒ္ဓိံ အာဟာရူပဟာရော, ဂဏကိယာ သဒ္ဓိံ အမှာကံ အာဟာရူပဟာရော။ သမဏေန ဘဝိတဗ္ဗံ အဗျာဝဋေန။ သမဏော အဿ သုသမဏော, ဂစ္ဆ တွံ, န မယံ တံ ဇာနာမာ’’တိ။ အထ ခေါ အာယသ္မာ ဥဒါယီ တေဟိ အာဇီဝကသာဝကေဟိ အပသာဒိတော ပုနဒေဝ သာဝတ္ထိံ ပစ္စာဂဉ္ဆိ။ တတိယမ္ပိ ခေါ သာ ကုမာရိကာ မာတုယာ သန္တိကေ ဒူတံ ပါဟေသိ – ‘‘အဟမှိ ဒုဂ္ဂတာ ဒုက္ခိတာ, န သုခံ လဘာမိ။ မာသံယေဝ မံ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။ အာဂစ္ဆတု မေ မာတာ, မံ နေဿတူ’’တိ။ ဒုတိယမ္ပိ ခေါ သာ ဂဏကီ ယေနာယသ္မာ ဥဒါယီ တေနုပသင်္ကမိ; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစ – ‘‘သာ ကိရ, ဘန္တေ, ကုမာရိကာ ဒုဂ္ဂတာ ဒုက္ခိတာ, န သုခံ လဘတိ။ မာသံယေဝ နံ သုဏိသဘောဂေန ဘုဉ္ဇိံသု။ တတော အပရေန ဒါသိဘောဂေန ဘုဉ္ဇန္တိ။ ဝဒေယျာထ, ဘန္တေ – ‘မာယျော, ဣမံ ကုမာရိကံ ဒါသိဘောဂေန ဘုဉ္ဇိတ္ထ, သုဏိသဘောဂေန ဣမံ ကုမာရိကံ ဘုဉ္ဇထာ’’’တိ။ ‘‘ပဌမံပါဟံ တေဟိ အာဇီဝကသာဝကေဟိ အပသာဒိတော။ ဂစ္ဆ တွံ။ နာဟံ ဂမိဿာမီ’’တိ။

၂၉၈. အထ ခေါ သာ ဂဏကီ ဥဇ္ဈာယတိ ခိယျတိ ဝိပါစေတိ – ‘‘ဧဝံ ဒုဂ္ဂတော ဟောတု အယျော ဥဒါယီ, ဧဝံ ဒုက္ခိတော ဟောတု အယျော ဥဒါယီ, ဧဝံ မာ သုခံ လဘတု အယျော ဥဒါယီ, ယထာ မေ ကုမာရိကာ ဒုဂ္ဂတာ ဒုက္ခိတာ န သုခံ လဘတိ ပါပိကာယ သဿုယာ ပါပကေန သသုရေန ပါပကေန သာမိကေနာ’’တိ။ သာပိ ခေါ ကုမာရိကာ ဥဇ္ဈာယတိ ခိယျတိ ဝိပါစေတိ – ‘‘ဧဝံ ဒုဂ္ဂတော ဟောတု အယျော ဥဒါယီ, ဧဝံ ဒုက္ခိတော ဟောတု အယျော ဥဒါယီ, ဧဝံ မာ သုခံ လဘတု အယျော ဥဒါယီ, ယထာဟံ ဒုဂ္ဂတာ ဒုက္ခိတာ န သုခံ လဘာမိ ပါပိကာယ သဿုယာ ပါပကေန သသုရေန ပါပကေန သာမိကေနာ’’တိ။ အညာပိ ဣတ္ထိယော အသန္တုဋ္ဌာ သဿူဟိ ဝါ သသုရေဟိ ဝါ သာမိကေဟိ ဝါ, တာ ဧဝံ ဩယာစန္တိ – ‘‘ဧဝံ ဒုဂ္ဂတော ဟောတု အယျော ဥဒါယီ, ဧဝံ ဒုက္ခိတော ဟောတု အယျော ဥဒါယီ, ဧဝံ မာ သုခံ လဘတု အယျော ဥဒါယီ, ယထာ မယံ ဒုဂ္ဂတာ ဒုက္ခိတာ န သုခံ လဘာမ ပါပိကာဟိ သဿူဟိ ပါပကေဟိ သသုရေဟိ ပါပကေဟိ သာမိကေဟီ’’တိ။ ယာ ပန တာ ဣတ္ထိယော သန္တုဋ္ဌာ သဿူဟိ ဝါ သသုရေဟိ ဝါ သာမိကေဟိ ဝါ တာ ဧဝံ အာယာစန္တိ – ‘‘ဧဝံ သုခိတော ဟောတု အယျော ဥဒါယီ, ဧဝံ သဇ္ဇိတော ဟောတု အယျော ဥဒါယီ, ဧဝံ သုခမေဓေါ [သုခမေဓိတော (သီ. က.)] ဟောတု အယျော ဥဒါယီ, ယထာ မယံ သုခိတာ သဇ္ဇိတာ သုခမေဓါ ဘဒ္ဒိကာဟိ သဿူဟိ ဘဒ္ဒကေဟိ သသုရေဟိ ဘဒ္ဒကေဟိ သာမိကေဟီ’’တိ။

အဿောသုံ ခေါ ဘိက္ခူ ဧကစ္စာနံ ဣတ္ထီနံ ဩယာစန္တီနံ ဧကစ္စာနံ ဣတ္ထီနံ အာယာစန္တီနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ သဉ္စရိတ္တံ သမာပဇ္ဇိဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ, ဥဒါယိ, သဉ္စရိတ္တံ သမာပဇ္ဇသီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ကထဉှိ နာမ တွံ, မောဃပုရိသ, သဉ္စရိတ္တံ သမာပဇ္ဇသိ! နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၂၉၉. ‘‘ယော ပန ဘိက္ခု သဉ္စရိတ္တံ သမာပဇ္ဇေယျ, ဣတ္ထိယာ ဝါ ပုရိသမတိံ ပုရိသဿ ဝါ ဣတ္ထိမတိံ, ဇာယတ္တနေ ဝါ ဇာရတ္တနေ ဝါ, သံဃာဒိသေသော’’တိ။

ဧဝဉ္စိဒံ ဘဂဝတာ ဘိက္ခူနံ သိက္ခါပဒံ ပညတ္တံ ဟောတိ။

၃၀၀. တေန ခေါ ပန သမယေန သမ္ဗဟုလာ ဓုတ္တာ ဥယျာနေ ပရိစာရေန္တာ အညတရိဿာ ဝေသိယာ သန္တိကေ ဒူတံ ပါဟေသုံ – ‘‘အာဂစ္ဆတု ဥယျာနေ, ပရိစာရေဿာမာ’’တိ။ သာ ဧဝမာဟ – ‘‘အဟံ ခွယျော တုမှေ န ဇာနာမိ – ‘ကေ ဝါ ဣမေ ကဿ ဝါ’တိ။ အဟဉ္စမှိ ဗဟုဘဏ္ဍာ ဗဟုပရိက္ခါရာ, ဗဟိနဂရဉ္စ ဂန္တဗ္ဗံ။ နာဟံ ဂမိဿာမီ’’တိ။ အထ ခေါ သော ဒူတော တေသံ ဓုတ္တာနံ ဧတမတ္ထံ အာရောစေသိ။ ဧဝံ ဝုတ္တေ, အညတရော ပုရိသော တေ ဓုတ္တေ ဧတဒဝေါစ – ‘‘ကိဿ တုမှေ အယျော ဧတံ ဝေသိံ ယာစိတ္ထ? နနု အယျော ဥဒါယီ ဝတ္တဗ္ဗော! အယျော ဥဒါယီ ဥယျောဇေဿတီ’’တိ။ ဧဝံ ဝုတ္တေ, အညတရော ဥပါသကော တံ ပုရိသံ ဧတဒဝေါစ – ‘‘မာယျော ဧဝံ အဝစ။ န ကပ္ပတိ သမဏာနံ သကျပုတ္တိယာနံ ဧဝရူပံ ကာတုံ။ နာယျော ဥဒါယီ ဧဝံ ကရိဿတီ’’တိ။ ဧဝံ ဝုတ္တေ, ‘‘ကရိဿတိ န ကရိဿတီ’’တိ အဗ္ဘုတမကံသု။ အထ ခေါ တေ ဓုတ္တာ ယေနာယသ္မာ ဥဒါယီ တေနုပသင်္ကမိံသု; ဥပသင်္ကမိတွာ အာယသ္မန္တံ ဥဒါယိံ ဧတဒဝေါစုံ – ‘‘ဣဓ မယံ, ဘန္တေ, ဥယျာနေ ပရိစာရေန္တာ အသုကာယ နာမ ဝေသိယာ သန္တိကေ ဒူတံ ပဟိဏိမှာ – ‘အာဂစ္ဆတု ဥယျာနေ, ပရိစာရေဿာမာ’တိ။ သာ ဧဝမာဟ – ‘အဟံ ခွယျော တုမှေ န ဇာနာမိ – ကေ ဝါ ဣမေ ကဿ ဝါတိ, အဟဉ္စမှိ ဗဟုဘဏ္ဍာ ဗဟုပရိက္ခါရာ, ဗဟိနဂရဉ္စ ဂန္တဗ္ဗံ။ နာဟံ ဂမိဿာမီ’တိ။ သာဓု, ဘန္တေ, အယျော တံ ဝသိံ ဥယျောဇေတူ’’တိ။

အထ ခေါ အာယသ္မာ ဥဒါယီ ယေန သာ ဝေသီ တေနုပသင်္ကမိ; ဥပသင်္ကမိတွာ တံ ဝေသိံ ဧတဒဝေါစ – ‘‘ကိဿိမေသံ န ဂစ္ဆသီ’’တိ? ‘‘အဟံ ခွယျ ဣမေ န ဇာနာမိ – ‘ကေ ဝါ ဣမေ ကဿ ဝါ’တိ။ အဟဉ္စမှိ ဗဟုဘဏ္ဍာ ဗဟုပရိက္ခါရာ, ဗဟိနဂရဉ္စ ဂန္တဗ္ဗံ။ နာဟံ ဂမိဿာမီ’’တိ။ ‘‘ဂစ္ဆိမေသံ။ အဟံ ဣမေ ဇာနာမီ’’တိ။ ‘‘သစေ, ဘန္တေ, အယျော ဇာနာတိ အဟံ ဂမိဿာမီ’’တိ။ အထ ခေါ တေ ဓုတ္တာ တံ ဝေသိံ အာဒါယ ဥယျာနံ အဂမံသု။ အထ ခေါ သော ဥပါသကော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ အယျော ဥဒါယီ တင်္ခဏိကံ သဉ္စရိတ္တံ သမာပဇ္ဇိဿတီ’’တိ။ အဿောသုံ ခေါ ဘိက္ခူ တဿ ဥပါသကဿ ဥဇ္ဈာယန္တဿ ခိယျန္တဿ ဝိပါစေန္တဿ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ တင်္ခဏိကံ သဉ္စရိတ္တံ သမာပဇ္ဇိဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တွံ, ဥဒါယိ, တင်္ခဏိကံ သဉ္စရိတ္တံ သမာပဇ္ဇသီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တွံ, မောဃပုရိသ, တင်္ခဏိကံ သဉ္စရိတ္တံ သမာပဇ္ဇိဿသိ? နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၃၀၁. ‘‘ယော ပန ဘိက္ခု သဉ္စရိတ္တံ သမာပဇ္ဇေယျ, ဣတ္ထိယာ ဝါ ပုရိသမတိံ ပုရိသဿ ဝါ ဣတ္ထိမတိံ, ဇာယတ္တနေ ဝါ ဇာရတ္တနေ ဝါ, အန္တမသော တင်္ခဏိကာယပိ, သံဃာဒိသေသော’’တိ။

၃၀၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

သဉ္စရိတ္တံ သမာပဇ္ဇေယျာတိ ဣတ္ထိယာ ဝါ ပဟိတော ပုရိသဿ သန္တိကေ ဂစ္ဆတိ, ပုရိသေန ဝါ ပဟိတော ဣတ္ထိယာ သန္တိကေ ဂစ္ဆတိ။

ဣတ္ထိယာ ဝါ ပုရိသမတိန္တိ ပုရိသဿ မတိံ ဣတ္ထိယာ အာရောစေတိ။

ပုရိသဿ ဝါ ဣတ္ထိမတိန္တိ ဣတ္ထိယာ မတိံ ပုရိသဿ အာရောစေတိ။

ဇာယတ္တနေ ဝါတိ ဇာယာ ဘဝိဿသိ။

ဇာရတ္တနေ ဝါတိ ဇာရီ ဘဝိဿသိ။

အန္တမသော တင်္ခဏိကာယဣတိ မုဟုတ္တိကာ ဘဝိဿသိ ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၃၀၃. ဒသ ဣတ္ထိယော – မာတုရက္ခိတာ ပိတုရက္ခိတာ မာတာပိတုရက္ခိတာ ဘာတုရက္ခိတာ ဘဂိနိရက္ခိတာ ဉာတိရက္ခိတာ ဂေါတ္တရက္ခိတာ ဓမ္မရက္ခိတာ သာရက္ခါ သပရိဒဏ္ဍာ။

ဒသ ဘရိယာယော – ဓနက္ကီတာ ဆန္ဒဝါသိနီ ဘောဂဝါသိနီ ပဋဝါသိနီ ဩဒပတ္တကိနီ ဩဘဋစုမ္ဗဋာ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ မုဟုတ္တိကာ။

၃၀၄. မာတုရက္ခိတာ နာမ မာတာ ရက္ခတိ ဂေါပေတိ ဣဿရိယံ ကာရေတိ ဝသံ ဝတ္တေတိ။

ပိတုရက္ခိတာ နာမ ပိတာ ရက္ခတိ ဂေါပေတိ ဣဿရိယံ ကာရေတိ ဝသံ ဝတ္တေတိ။

မာတာပိတုရက္ခိတာ နာမ မာတာပိတရော ရက္ခန္တိ ဂေါပေန္တိ ဣဿရိယံ ကာရေန္တိ ဝသံ ဝတ္တေန္တိ။

ဘာတုရက္ခိတာ နာမ ဘာတာ ရက္ခတိ ဂေါပေတိ ဣဿရိယံ ကာရေတိ ဝသံ ဝတ္တေတိ။

ဘဂိနိရက္ခိတာ နာမ ဘဂိနီ ရက္ခတိ ဂေါပေတိ ဣဿရိယံ ကာရေတိ ဝသံ ဝတ္တေတိ။

ဉာတိရက္ခိတာ နာမ ဉာတကာ ရက္ခန္တိ ဂေါပေန္တိ ဣဿရိယံ ကာရေန္တိ ဝသံ ဝတ္တေန္တိ။

ဂေါတ္တရက္ခိတာ နာမ သဂေါတ္တာ ရက္ခန္တိ ဂေါပေန္တိ ဣဿရိယံ ကာရေန္တိ ဝသံ ဝတ္တေန္တိ။

ဓမ္မရက္ခိတာ နာမ သဟဓမ္မိကာ ရက္ခန္တိ ဂေါပေန္တိ ဣဿရိယံ ကာရေန္တိ ဝသံ ဝတ္တေန္တိ။

သာရက္ခါ နာမ ဂဗ္ဘေပိ ပရိဂ္ဂဟိတာ ဟောတိ – မယှံ ဧသာတိ။ အန္တမသော မာလာဂုဠပရိက္ခိတ္တာပိ။

သပရိဒဏ္ဍာ နာမ ကေဟိစိ ဒဏ္ဍော ဌပိတော ဟောတိ – ယော ဣတ္ထန္နာမံ ဣတ္ထိံ ဂစ္ဆတိ ဧတ္တကော ဒဏ္ဍောတိ။

ဓနက္ကီတာ နာမ ဓနေန ကိဏိတွာ ဝါသေတိ။

ဆန္ဒဝါသိနီ နာမ ပိယော ပိယံ ဝါသေတိ။

ဘောဂဝါသိနီ နာမ ဘောဂံ ဒတွာ ဝါသေတိ။

ပဋဝါသိနီ နာမ ပဋံ ဒတွာ ဝါသေတိ။

ဩဒပတ္တကိနီ နာမ ဥဒကပတ္တံ အာမသိတွာ ဝါသေတိ။

ဩဘဋစုမ္ဗဋာ နာမ စုမ္ဗဋံ ဩရောပေတွာ ဝါသေတိ။

ဒါသီ နာမ ဒါသီ စေဝ ဟောတိ ဘရိယာ စ။

ကမ္မကာရီ နာမ ကမ္မကာရီ စေဝ ဟောတိ ဘရိယာ စ။

ဓဇာဟဋာ နာမ ကရမရာနီတာ ဝုစ္စတိ။

မုဟုတ္တိကာ နာမ တင်္ခဏိကာ ဝုစ္စတိ။

၃၀၅. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတံ ဗြူဟိ။ပေ.။ မာတာပိတုရက္ခိတံ ဗြူဟိ။ ဘာတုရက္ခိတံ ဗြူဟိ။ ဘဂိနိရက္ခိတံ ဗြူဟိ။ ဉာတိရက္ခိတံ ဗြူဟိ။ ဂေါတ္တရက္ခိတံ ဗြူဟိ။ ဓမ္မရက္ခိတံ ဗြူဟိ။ သာရက္ခံ ဗြူဟိ။ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၀၆. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ မာတာပိတုရအခတဉ္စ။ပေ.။

မာတုရက္ခိတဉ္စ ဘာတုရက္ခိတဉ္စ။ မာတုရက္ခိတဉ္စ ဘဂိနိရက္ခိတဉ္စ။ မာတုရက္ခိတဉ္စ ဉာတိရက္ခိတဉ္စ။ မာတုရက္ခိတဉ္စ ဂေါတ္တရက္ခိတဉ္စ။ မာတုရက္ခိတဉ္စ ဓမ္မရက္ခိတဉ္စ။ မာတုရက္ခိတဉ္စ သာရက္ခဉ္စ။ မာတုရက္ခိတဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၀၇. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ မာတာပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ ဘာတုရက္ခိတဉ္စ။ပေ.။ ပိတုရက္ခိတဉ္စ ဘဂိနိရက္ခိတဉ္စ။ ပိတုရက္ခိတဉ္စ ဉာတိရက္ခိတဉ္စ။ ပိတုရက္ခိတဉ္စ ဂေါတ္တရက္ခိတဉ္စ။ ပိတုရက္ခိတဉ္စ ဓမ္မရက္ခိတဉ္စ။ ပိတုရက္ခိတဉ္စ သာရက္ခဉ္စ။ ပိတုရက္ခိတဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ မာတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၀၈. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍဉ္စ မာတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍဉ္စ ပိတုရအခတဉ္စ။ပေ.။

သပရိဒဏ္ဍဉ္စ မာတာပိတုရက္ခိတဉ္စ။ သပရိဒဏ္ဍဉ္စ ဘာတုရက္ခိတဉ္စ။ သပရိဒဏ္ဍဉ္စ ဘဂိနိရက္ခိတဉ္စ။ သပရိဒဏ္ဍဉ္စ ဉာတိရက္ခိတဉ္စ။ သပရိဒဏ္ဍဉ္စ ဂေါတ္တရက္ခိတဉ္စ။ သပရိဒဏ္ဍဉ္စ ဓမ္မရက္ခိတဉ္စ။ သပရိဒဏ္ဍဉ္စ သာရက္ခဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဧဝံ ဒုမူလကမ္ပိ တိမူလကမ္ပိ ယာဝ နဝမူလကံ ကာတဗ္ဗံ။

ဣဒံ ဒသမူလကံ

၃၀၉. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ မာတာပိတုရက္ခိတဉ္စ ဘာတုရက္ခိတဉ္စ ဘဂိနိရက္ခိတဉ္စ ဉာတိရက္ခိတဉ္စ ဂေါတ္တရက္ခိတဉ္စ ဓမ္မရက္ခိတဉ္စ သာရက္ခဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဓနက္ကီတာစက္ကံ နိဋ္ဌိတံ။

၃၁၀. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ။ ပဋဝါသိနီ။ ဩဒပတ္တကိနီ။ ဩဘဋစုမ္ဗဋာ။ ဒါသီ စ ဘရိယာ စ။ ကမ္မကာရီ စ ဘရိယာ စ။ ဓဇာဟဋာ။ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတံ ဗြူဟိ။ပေ.။ မာတာပိတုရက္ခိတံ ဗြူဟိ။ ဘာတုရက္ခိတံ ဗြူဟိ။ ဘဂိနိရက္ခိတံ ဗြူဟိ။ ဉာတိရက္ခိတံ ဗြူဟိ။ ဂေါတ္တရက္ခိတံ ဗြူဟိ။ ဓမ္မရက္ခိတံ ဗြူဟိ။ သာရက္ခံ ဗြူဟိ။ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၁၁. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ မာတာပိတုရက္ခိတဉ္စ။ပေ.။ မာတုရက္ခိတဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၁၂. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ မာတာပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ ဘာတုရက္ခိတဉ္စ။ပေ.။ ပိတုရက္ခိတဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတဉ္စ မာတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၁၃. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍဉ္စ မာတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍဉ္စ ပိတုရက္ခိတဉ္စ။ပေ.။ သပရိဒဏ္ဍဉ္စ သာရက္ခဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကာဒီနိပိ ဧဝမေဝ ကာတဗ္ဗာနိ။

ဣဒံ ဒသမူလကံ

၃၁၄. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ မာတာပိတုရက္ခိတဉ္စ ဘာတုရက္ခိတဉ္စ ဘဂိနိရက္ခိတဉ္စ ဉာတိရက္ခိတဉ္စ ဂေါတ္တရက္ခိတဉ္စ ဓမ္မရက္ခိတဉ္စ သာရက္ခဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မုဟုတ္တိကာစက္ကံ နိဋ္ဌိတံ။

၃၁၅. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ။ ပဋဝါသိနီ။ ဩဒပတ္တကိနီ။ ဩဘဋစုမ္ဗဋာ။ ဒါသီ စ ဘရိယာ စ။ ကမ္မကာရီ စ ဘရိယာ စ။ ဓဇာဟဋာ။ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၁၆. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဘောဂဝါသိနီ စ။ပေ.။ ဓနက္ကီတာ စ ပဋဝါသိနီ စ။ ဓနက္ကီတာ စ ဩဒပတ္တကိနီ စ။ ဓနက္ကီတာ စ ဩဘဋစုမ္ဗဋာ စ။ ဓနက္ကီတာ စ ဒါသီ စ ဘရိယာ စ။ ဓနက္ကီတာ စ ကမ္မကာရီ စ ဘရိယာ စ။ ဓနက္ကီတာ စ ဓဇာဟဋာ စ။ ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၁၇. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ။ ဆန္ဒဝါသိနီ စ ဓနက္ကီတာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၁၈. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ။ပေ.။ မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကာဒီနိပိ ဧဝမေဝ ကာတဗ္ဗာနိ။

ဣဒံ ဒသမူလကံ

၃၁၉. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မာတုရက္ခိတာစက္ကံ နိဋ္ဌိတံ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ပိတုရက္ခိတံ။ပေ.။ မာတာပိတုရက္ခိတံ။ ဘာတုရက္ခိတံ။ ဘဂိနိရက္ခိတံ ။ ဉာတိရက္ခိတံ။ ဂေါတ္တရက္ခိတံ။ ဓမ္မရက္ခိတံ ။ သာရက္ခံ။ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ, ပဋဝါသိနီ, ဩဒပတ္တကိနီ, ဩဘဋစုမ္ဗဋာ, ဒါသီ စ ဘရိယာ စ, ကမ္မကာရီ စ ဘရိယာ စ, ဓဇာဟဋာ, မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၂၀. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဘောဂဝါသိနီ စ။ပေ.။ ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ, ဆန္ဒဝါသိနီ စ ဓနက္ကီတာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ, မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကမ္ပိ တိမူလကမ္ပိ ယာဝ နဝမူလကံ ဧဝမေဝ ကာတဗ္ဗံ။

ဣဒံ ဒသမူလကံ။

၃၂၁. ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ သပရိဒဏ္ဍံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

သပရိဒဏ္ဍာစက္ကံ နိဋ္ဌိတံ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတံ ဗြူဟိ – ‘ဟောဟိ ကိရ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ စ ဆန္ဒဝါသိနီ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ မာတာပိတုရက္ခိတဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ စ ဆန္ဒဝါသိနီ စ ဘောဂဝါသိနီ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧဝံ ဥဘတောဝဍ္ဎကံ ကာတဗ္ဗံ။

ပုရိသော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ မာတုရက္ခိတဉ္စ ပိတုရက္ခိတဉ္စ မာတာပိတုရက္ခိတဉ္စ ဘာတုရက္ခိတဉ္စ ဘဂိနိရက္ခိတဉ္စ ဉာတိရက္ခိတဉ္စ ဂေါတ္တရက္ခိတဉ္စ ဓမ္မရက္ခိတဉ္စ သာရက္ခဉ္စ သပရိဒဏ္ဍဉ္စ ဗြူဟိ – ‘ဟောထ ကိရ ဣတ္ထန္နာမဿ ဘရိယာယော ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဥဘတောဝဍ္ဎကံ နိဋ္ဌိတံ။

ပုရိသဿ မာတာ ဘိက္ခုံ ပဟိဏတိ။ပေ.။ ပုရိသဿ ပိတာ ဘိက္ခုံ ပဟိဏတိ။ပေ.။ ပုရိသဿ မာတာပိတရော ဘိက္ခုံ ပဟိဏန္တိ။ပေ.။ ပုရိသဿ ဘာတာ ဘိက္ခုံ ပဟိဏတိ။ပေ.။ ပုရိသဿ ဘဂိနီ ဘိက္ခုံ ပဟိဏတိ။ပေ.။ ပုရိသဿ ဉာတကာ ဘိက္ခုံ ပဟိဏန္တိ။ပေ.။ ပုရိသဿ ဂေါတ္တာ ဘိက္ခုံ ပဟိဏန္တိ။ပေ.။ ပုရိသဿ သဟဓမ္မိကာ ဘိက္ခုံ ပဟိဏန္တိ။ပေ.။။

ပုရိသဿ ပေယျာလော ဝိတ္ထာရေတဗ္ဗော။

ဥဘတောဝဍ္ဎကံ ယထာ ပုရိမနယော တထေဝ ဝိတ္ထာရေတဗ္ဗံ။

၃၂၂. မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ, ပဋဝါသိနီ, ဩဒပတ္တကိနီ, ဩဘဋစုမ္ဗဋာ, ဒါသီ စ ဘရိယာ စ, ကမ္မကာရီ စ ဘရိယာ စ, ဓဇာဟဋာ, မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၂၃. မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ။ပေ.။ ဓနက္ကီတာ စ ဘောဂဝါသိနီ စ, ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၂၄. မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ, ဆန္ဒဝါသိနီ စ ဓနက္ကီတာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၂၅. မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ။ပေ.။ မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကမ္ပိ တိမူလကမ္ပိ ယာဝ နဝမူလကံ ဧဝမေဝ ကာတဗ္ဗံ။

ဣဒံ ဒသမူလကံ

၃၂၆. မာတုရက္ခိတာယ မာတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မာတုစက္ကံ နိဋ္ဌိတံ။

ပိတုရက္ခိတာယ ပိတာ ဘိက္ခုံ ပဟိဏတိ။ပေ.။ မာတာပိတုရက္ခိတာယ မာတာပိတရော ဘိက္ခုံ ပဟိဏန္တိ။ ဘာတုရက္ခိတာယ ဘာတာ ဘိက္ခုံ ပဟိဏတိ။ ဘဂိနိရက္ခိတာယ ဘဂိနီ ဘိက္ခုံ ပဟိဏတိ။ ဉာတိရက္ခိတာယ ဉာတကာ ဘိက္ခုံ ပဟိဏန္တိ။ ဂေါတ္တရက္ခိတာယ ဂေါတ္တာ [သဂေါတ္တာ (?)] ဘိက္ခုံ ပဟိဏန္တိ။ ဓမ္မရက္ခိတာယ သဟဓမ္မိကာ ဘိက္ခုံ ပဟိဏန္တိ။ သာရက္ခါယ ယေန ပရိဂ္ဂဟိတာ ဟောတိ သော ဘိက္ခုံ ပဟိဏတိ။ သပရိဒဏ္ဍာယ ယေန ဒဏ္ဍော ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

သပရိဒဏ္ဍာယ ယေန ဒဏ္ဍော ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ။ ပဋဝါသိနီ။ ဩဒပတ္တကိနီ။ ဩဘဋစုမ္ဗဋာ။ ဒါသီ စ ဘရိယာ စ။ ကမ္မကာရီ စ ဘရိယာ စ။ ဓဇာဟဋာ။ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၂၇. သပရိဒဏ္ဍာယ ယေန ဒဏ္ဍော ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ။ပေ.။ ဓနက္ကီတာ စ ဘောဂဝါသိနီ စ။ ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၂၈. သပရိဒဏ္ဍာယ ယေန ဒဏ္ဍော ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ။ ဆန္ဒဝါသိနီ စ ဓနက္ကီတာ စာ’’’ တိ။ ပဋိဂ္ဂဏှာတိ ဝီမံသတိ ပစ္စာဟရတိ အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၂၉. သပရိဒဏ္ဍာယ ယေန ဒဏ္ဍော, ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ။ပေ.။ မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကမ္ပိ တိမူလကမ္ပိ ယာဝ နဝမူလကံ ဧဝမေဝ ကာတဗ္ဗံ။

ဣဒံ ဒသမူလကံ

၃၃၀. သပရိဒဏ္ဍာယ ယေန ဒဏ္ဍော ဌပိတော ဟောတိ သော ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောတု ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဒဏ္ဍဌပိတစက္ကံ နိဋ္ဌိတံ။

မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ။ ပဋဝါသိနီ။ ဩဒပတ္တကိနီ။ ဩဘဋစုမ္ဗဋာ။ ဒါသီ စ ဘရိယာ စ။ ကမ္မကာရီ စ ဘရိယာ စ။ ဓဇာဟဋာ။ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၃၁. မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ စ ဘောဂဝါသိနီ စ။ပေ.။ ဓနက္ကီတာ စ ပဋဝါသိနီ စ။ပေ.။ ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၃၂. မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ။ ဆန္ဒဝါသိနီ စ ဓနက္ကီတာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ။ပေ.။ မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကာဒီနိပိ ဧဝမေဝ ကာတဗ္ဗာနိ။

ဣဒံ ဒသမူလကံ

၃၃၃. မာတုရက္ခိတာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

အပရံ မာတုရက္ခိတာစက္ကံ နိဋ္ဌိတံ။

ပိတုရက္ခိတာ ဘိက္ခုံ ပဟိဏတိ။ပေ.။ မာတာပိတုရက္ခိတာ ဘိက္ခုံ ပဟိဏတိ။ ဘာတုရက္ခိတာ ဘိက္ခုံ ပဟိဏတိ။ ဘဂိနိရက္ခိတာ ဘိက္ခုံ ပဟိဏတိ။ ဉာတိရက္ခိတာ ဘိက္ခုံ ပဟိဏတိ။ ဂေါတ္တရက္ခိတာ ဘိက္ခုံ ပဟိဏတိ။ ဓမ္မရက္ခိတာ ဘိက္ခုံ ပဟိဏတိ။ သာရက္ခါ ဘိက္ခုံ ပဟိဏတိ။ သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဆန္ဒဝါသိနီ။ပေ.။ ဘောဂဝါသိနီ။ ပဋဝါသိနီ။ ဩဒပတ္တကိနီ။ ဩဘဋစုမ္ဗဋာ။ ဒါသီ စ ဘရိယာ စ။ ကမ္မကာရီ စ ဘရိယာ စ။ ဓဇာဟဋာ။ မုဟုတ္တိကာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

နိက္ခေပပဒါနိ။

၃၃၄. သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ။ပေ.။ ဓနက္ကီတာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ခဏ္ဍစက္ကံ။

၃၃၅. သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဆန္ဒဝါသိနီ စ ဘောဂဝါသိနီ စ။ပေ.။ ဆန္ဒဝါသိနီ စ မုဟုတ္တိကာ စ။ ဆန္ဒဝါသိနီ စ ဓနက္ကီတာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဗဒ္ဓစက္ကံ မူလံ သံခိတ္တံ။

၃၃၆. သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ မုဟုတ္တိကာ စ ဓနက္ကီတာ စ။ပေ.။ မုဟုတ္တိကာ စ ဆန္ဒဝါသိနီ စ။ပေ.။ မုဟုတ္တိကာ စ ဓဇာဟဋာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ဧကမူလကံ နိဋ္ဌိတံ။

ဒုမူလကာဒီနိပိ ဧဝမေဝ ကာတဗ္ဗာနိ။

ဣဒံ ဒသမူလကံ

၃၃၇. သပရိဒဏ္ဍာ ဘိက္ခုံ ပဟိဏတိ – ‘‘ဂစ္ဆ, ဘန္တေ, ဣတ္ထန္နာမံ ဗြူဟိ – ‘ဟောမိ ဣတ္ထန္နာမဿ ဘရိယာ ဓနက္ကီတာ စ ဆန္ဒဝါသိနီ စ ဘောဂဝါသိနီ စ ပဋဝါသိနီ စ ဩဒပတ္တကိနီ စ ဩဘဋစုမ္ဗဋာ စ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ စ မုဟုတ္တိကာ စာ’’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

အပရံ သပရိဒဏ္ဍာစက္ကံ နိဋ္ဌိတံ။

သဗ္ဗံ စက္ကပေယျာလံ နိဋ္ဌိတံ။

၃၃၈. ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။ ပဋိဂ္ဂဏှာတိ ဝီမံသတိ န ပစ္စာဟရတိ, အာပတ္တိ ထုလ္လစ္စယဿ။ ပဋိဂ္ဂဏှာတိ န ဝီမံသတိ ပစ္စာဟရတိ, အာပတ္တိ ထုလ္လစ္စယဿ။ ပဋိဂ္ဂဏှာတိ န ဝီမံသတိ န ပစ္စာဟရတိ, အာပတ္တိ ဒုက္ကဋဿ။ န ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ ထုလ္လစ္စယဿ။ န ပဋိဂ္ဂဏှာတိ ဝီမံသတိ န ပစ္စာဟရတိ, အာပတ္တိ ဒုက္ကဋဿ။ န ပဋိဂ္ဂဏှာတိ န ဝီမံသတိ ပစ္စာဟရတိ, အာပတ္တိ ဒုက္ကဋဿ။ န ပဋိဂ္ဂဏှာတိ န ဝီမံသတိ န ပစ္စာဟရတိ, အနာပတ္တိ။

ပုရိသော သမ္ဗဟုလေ ဘိက္ခူ အာဏာပေတိ – ‘‘ဂစ္ဆထ, ဘန္တေ, ဣတ္ထန္နာမံ ဣတ္ထိံ ဝီမံသထာ’’တိ။ သဗ္ဗေ ပဋိဂ္ဂဏှန္တိ သဗ္ဗေ ဝီမံသန္တိ သဗ္ဗေ ပစ္စာဟရန္တိ, အာပတ္တိ သဗ္ဗေသံ သံဃာဒိသေသဿ။

ပုရိသော သမ္ဗဟုလေ ဘိက္ခူ အာဏာပေတိ – ‘‘ဂစ္ဆထ, ဘန္တေ, ဣတ္ထန္နာမံ ဣတ္ထိံ ဝီမံသထာ’’တိ။ သဗ္ဗေ ပဋိဂ္ဂဏှန္တိ သဗ္ဗေ ဝီမံသန္တိ ဧကံ ပစ္စာဟရာပေန္တိ, အာပတ္တိ သဗ္ဗေသံ သံဃာဒိသေသဿ။

ပုရိသော သမ္ဗဟုလေ ဘိက္ခူ အာဏာပေတိ – ‘‘ဂစ္ဆထ, ဘန္တေ, ဣတ္ထန္နာမံ ဣတ္ထိံ ဝီမံသထာ’’တိ။ သဗ္ဗေ ပဋိဂ္ဂဏှန္တိ, ဧကံ ဝီမံသာပေတွာ သဗ္ဗေ ပစ္စာဟရန္တိ, အာပတ္တိ သဗ္ဗေသံ သံဃာဒိသေသဿ။

ပုရိသော သမ္ဗဟုလေ ဘိက္ခူ အာဏာပေတိ – ‘‘ဂစ္ဆထ, ဘန္တေ, ဣတ္ထန္နာမံ ဣတ္ထိံ ဝီမံသထာ’’တိ။ သဗ္ဗေ ပဋိဂ္ဂဏှန္တိ, ဧကံ ဝီမံသာပေတွာ ဧကံ ပစ္စာဟရာပေန္တိ, အာပတ္တိ သဗ္ဗေသံ သံဃာဒိသေသဿ။

ပုရိသော ဘိက္ခုံ အာဏာပေတိ – ‘‘ဂစ္ဆ, ဘန္တေ, ဣတ္ထန္နာမံ ဣတ္ထိံ ဝီမံသာ’’တိ။ ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ။

ပုရိသော ဘိက္ခုံ အာဏာပေတိ – ‘‘ဂစ္ဆ, ဘန္တေ, ဣတ္ထန္နာမံ ဣတ္ထိံ ဝီမံသာ’’တိ။ ပဋိဂ္ဂဏှာတိ ဝီမံသတိ အန္တေဝါသိံ ပစ္စာဟရာပေတိ, အာပတ္တိ သံဃာဒိသေသဿ။

ပုရိသော ဘိက္ခုံ အာဏာပေတိ – ‘‘ဂစ္ဆ, ဘန္တေ, ဣတ္ထန္နာမံ ဣတ္ထိံ ဝီမံသာ’’တိ။ ပဋိဂ္ဂဏှာတိ အန္တေဝါသိံ ဝီမံသာပေတွာ အတ္တနာ ပစ္စာဟရတိ အာပတ္တိ သံဃာဒိသေသဿ။

ပုရိသော ဘိက္ခုံ အာဏာပေတိ – ‘‘ဂစ္ဆ, ဘန္တေ, ဣတ္ထန္နာမံ ဣတ္ထိ ဝိမံသာ’’တိ။ ပဋိဂ္ဂဏှာတိ အန္တေဝါသိံ ဝီမံသာပေတိ အန္တေဝါသီ ဝီမံသိတွာ ဗဟိဒ္ဓါ ပစ္စာဟရတိ, အာပတ္တိ ဥဘိန္နံ ထုလ္လစ္စယဿ။

၃၃၉. ဂစ္ဆန္တော သမ္ပါဒေတိ, အာဂစ္ဆန္တော ဝိသံဝါဒေတိ, အာပတ္တိ ထုလ္လစ္စယဿ။

ဂစ္ဆန္တော ဝိသံဝါဒေတိ, အာဂစ္ဆန္တော သမ္ပါဒေတိ, အာပတ္တိ ထုလ္လစ္စယဿ။

ဂစ္ဆန္တော သမ္ပါဒေတိ, အာဂစ္ဆန္တော သမ္ပါဒေတိ, အာပတ္တိ သံဃာဒိသေသဿ။

ဂစ္ဆန္တော ဝိသံဝါဒေတိ, အာဂစ္ဆန္တော ဝိသံဝါဒေတိ, အနာပတ္တိ။

၃၄၀. အနာပတ္တိ သံဃဿ ဝါ စေတိယဿ ဝါ ဂိလာနဿ ဝါ ကရဏီယေန ဂစ္ဆတိ, ဥမ္မတ္တကဿ, အာဒိကမ္မိကဿာတိ။

ဝိနီတဝတ္ထုဥဒ္ဒါနဂါထာ

သုတ္တာ မတာ စ နိက္ခန္တာ၊ အနိတ္ထီ ဣတ္ထိပဏ္ဍကာ။

ကလဟံ ကတွာန သမ္မောဒိ၊ သဉ္စရိတ္တဉ္စ ပဏ္ဍကေတိ။

ဝိနီတဝတ္ထု

၃၄၁. တေန ခေါ ပန သမယေန အညတရော ပုရိသော အညတရံ ဘိက္ခုံ အာဏာပေသိ – [အာဏာပေတိ (သျာ. က.)] ‘‘ဂစ္ဆ, ဘန္တေ, ဣတ္ထန္နာမံ ဣတ္ထိံ ဝီမံသာ’’တိ။ သော ဂန္တွာ မနုဿေ ပုစ္ဆိ – ‘‘ကဟံ ဣတ္ထန္နာမာ’’တိ? ‘‘သုတ္တာ, ဘန္တေ’’တိ။ တဿ ကုက္ကုစ္စံ အဟောသိ – ‘‘ဘဂဝတာ သိက္ခါပဒံ ပညတ္တံ, ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရော ပုရိသော အညတရံ ဘိက္ခုံ အာဏာပေသိ – ‘‘ဂစ္ဆ, ဘန္တေ, ဣတ္ထန္နာမံ ဣတ္ထိံ ဝီမံသာ’’တိ။ သော ဂန္တွာ မနုဿေ ပုစ္ဆိ – ‘‘ကဟံ ဣတ္ထန္နာမာ’’တိ? ‘‘မတာ, ဘန္တေ’’တိ။ပေ.။ ‘‘နိက္ခန္တာ, ဘန္တေ’’တိ။ ‘‘အနိတ္ထီ, ဘန္တေ’’တိ။ ‘‘ဣတ္ထိပဏ္ဍကာ, ဘန္တေ’’တိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ဒုက္ကဋဿာ’’တိ။

တေန ခေါ ပန သမယေန အညတရာ ဣတ္ထီ သာမိကေန သဟ ဘဏ္ဍိတွာ မာတုဃရံ အဂမာသိ။ ကုလူပကော ဘိက္ခု သမ္မောဒနီယံ အကာသိ။ တဿ ကုက္ကုစ္စံ အဟောသိ။ပေ.။ ‘‘အလံဝစနီယာ, ဘိက္ခူ’’တိ? ‘‘နာလံဝစနီယာ, ဘဂဝါ’’တိ။ ‘‘အနာပတ္တိ, ဘိက္ခု, နာလံဝစနီယာယာ’’တိ။

တေန ခေါ ပန သမယေန အညတရော ဘိက္ခု ပဏ္ဍကေ သဉ္စရိတ္တံ သမာပဇ္ဇိ။ တဿ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, သံဃာဒိသေသဿ; အာပတ္တိ ထုလ္လစ္စယဿာ’’တိ။

သဉ္စရိတ္တသိက္ခါပဒံ နိဋ္ဌိတံ ပဉ္စမံ။

၆. ကုဋိကာရသိက္ခါပဒံ

၃၄၂. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန အာဠဝကာ ဘိက္ခူ သညာစိကာယော ကုဋိယော ကာရာပေန္တိ အဿာမိကာယော အတ္တုဒ္ဒေသိကာယော အပ္ပမာဏိကာယော။ တာယော န နိဋ္ဌာနံ ဂစ္ဆန္တိ။ တေ ယာစနဗဟုလာ ဝိညတ္တိဗဟုလာ ဝိဟရန္တိ – ‘‘ပုရိသံ ဒေထ, ပုရိသတ္ထကရံ ဒေထ, ဂေါဏံ ဒေထ, သကဋံ ဒေထ, ဝါသိံ ဒေထ, ပရသုံ ဒေထ, ကုဌာရိံ ဒေထ, ကုဒါလံ ဒေထ, နိခါဒနံ ဒေထ, ဝလ္လိံ ဒေထ, ဝေဠုံ ဒေထ, မုဉ္ဇံ ဒေထ, ပဗ္ဗဇံ ဒေထ, တိဏံ ဒေထ, မတ္တိကံ ဒေထာ’’တိ။ မနုဿာ ဥပဒ္ဒုတာ ယာစနာယ ဥပဒ္ဒုတာ ဝိညတ္တိယာ ဘိက္ခူ ဒိသွာ ဥဗ္ဗိဇ္ဇန္တိပိ ဥတ္တသန္တိပိ ပလာယန္တိပိ အညေနပိ ဂစ္ဆန္တိ အညေနပိ မုခံ ကရောန္တိ ဒွါရမ္ပိ ထကေန္တိ, ဂါဝိမ္ပိ ဒိသွာ ပလာယန္တိ ဘိက္ခူတိ မညမာနာ။

အထ ခေါ အာယသ္မာ မဟာကဿပေါ ရာဇဂဟေ ဝဿံဝုဋ္ဌော ယေန အာဠဝီ တေန ပက္ကာမိ။ အနုပုဗ္ဗေန ယေန အာဠဝီ တဒဝသရိ။ တတြ သုဒံ အာယသ္မာ မဟာကဿပေါ အာဠဝိယံ ဝိဟရတိ အဂ္ဂါဠဝေ စေတိယေ။ အထ ခေါ အာယသ္မာ မဟာကဿပေါ ပုဗ္ဗဏှသမယံ နိဝါသေတွာ ပတ္တစီဝရမာဒါယ အာဠဝိံ ပိဏ္ဍာယ ပါဝိသိ။ မနုဿာ အာယသ္မန္တံ မဟာကဿပံ ပဿိတွာ ဥဗ္ဗိဇ္ဇန္တိပိ ဥတ္တသန္တိပိ ပလာယန္တိပိ အညေနပိ ဂစ္ဆန္တိ အညေနပိ မုခံ ကရောန္တိ ဒွါရမ္ပိ ထကေန္တိ။ အထ ခေါ အာယသ္မာ မဟာကဿပေါ အာဠဝိယံ ပိဏ္ဍာယ စရိတွာ ပစ္ဆာဘတ္တံ ပိဏ္ဍပါတပ္ပဋိက္ကန္တော ဘိက္ခူ အာမန္တေသိ – ‘‘ပုဗ္ဗာယံ, အာဝုသော, အာဠဝီ သုဘိက္ခါ အဟောသိ သုလဘပိဏ္ဍာ သုကရာ ဥဉ္ဆေန ပဂ္ဂဟေန ယာပေတုံ; ဧတရဟိ ပနာယံ အာဠဝီ ဒုဗ္ဘိက္ခါ ဒုလ္လဘပိဏ္ဍာ, န သုကရာ ဥဉ္ဆေန ပဂ္ဂဟေန ယာပေတုံ။ ကော နု ခေါ, အာဝုသော, ဟေတု ကော ပစ္စယော, ယေနာယံ အာဠဝီ ဒုဗ္ဘိက္ခါ ဒုလ္လဘပိဏ္ဍာ, န သုကရာ ဥဉ္ဆေန ပဂ္ဂဟေန ယာပေတု’’န္တိ? အထ ခေါ တေ ဘိက္ခူ အာယသ္မတော မဟာကဿပဿ ဧတမတ္ထံ အာရောစေသုံ။

၃၄၃. အထ ခေါ ဘဂဝါ ရာဇဂဟေ ယထာဘိရန္တံ ဝိဟရိတွာ ယေန အာဠဝီ တေန စာရိကံ ပက္ကာမိ။ အနုပုဗ္ဗေန စာရိကံ စရမာနော ယေန အာဠဝီ တဒဝသရိ။ တတြ သုဒံ ဘဂဝါ အာဠဝိယံ ဝိဟရတိ အဂ္ဂါဠဝေ စေတိယေ။ အထ ခေါ အာယသ္မာ မဟာကဿပေါ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ မဟာကဿပေါ ဘဂဝတော ဧတမတ္ထံ အာရောစေသိ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာဠဝကေ ဘိက္ခူ ပဋိပုစ္ဆိ – ‘‘သစ္စံ ကိရ တုမှေ, ဘိက္ခဝေ, သညာစိကာယော ကုဋိယော ကာရာပေထ အဿာမိကာယော အတ္တုဒ္ဒေသိကာယော အပ္ပမာဏိကာယော ။ တာယော န နိဋ္ဌာနံ ဂစ္ဆန္တိ။ တေ တုမှေ ယာစနဗဟုလာ ဝိညတ္တိဗဟုလာ ဝိဟရထ – ‘ပုရိသံ ဒေထ ပုရိသတ္ထကရံ ဒေထ။ပေ.။ တိဏံ ဒေထ မတ္တိကံ ဒေထာ’တိ။ မနုဿာ ဥပဒ္ဒုတာ ယာစနာယ ဥပဒ္ဒုတာ ဝိညတ္တိယာ ဘိက္ခူ ဒိသွာ ဥဗ္ဗိဇ္ဇန္တိပိ ဥတ္တသန္တိပိ ပလာယန္တိပိ အညေနပိ ဂစ္ဆန္တိ အညေနပိ မုခံ ကရောန္တိ ဒွါရမ္ပိ ထကေန္တိ, ဂါဝိမ္ပိ ဒိသွာ ပလာယန္တိ ဘိက္ခူတိ မညမာနာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တုမှေ, မောဃပုရိသာ, သံယာစိကာယော ကုဋိယော ကာရာပေဿထ အဿာမိကာယော အတ္တုဒ္ဒေသိကာယော အပ္ပမာဏိကာယော! တာယော န နိဋ္ဌာနံ ဂစ္ဆန္တိ။ တေ တုမှေ ယာစနဗဟုလာ ဝိညတ္တိဗဟုလာ ဝိဟရိဿထ – ‘ပုရိသံ ဒေထ ပုရိသတ္ထကရံ ဒေထ။ပေ.။ တိဏံ ဒေထ မတ္တိကံ ဒေထာ’တိ! နေတံ မောဃပုရိသာ, အပ္ပသန္နာနံ ဝါ ပသာဒါယ။ပေ.။’’ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ –

၃၄၄. ‘‘ဘူတပုဗ္ဗံ , ဘိက္ခဝေ, ဒွေ ဘာတရော ဣသယော ဂင်္ဂံ နဒိံ ဥပနိဿာယ ဝိဟရိံသု။ အထ ခေါ, ဘိက္ခဝေ, မဏိကဏ္ဌော နာဂရာဇာ ဂင်္ဂံ နဒိံ ဥတ္တရိတွာ ယေန ကနိဋ္ဌော ဣသိ တေနုပသင်္ကမိ; ဥပသင်္ကမိတွာ ကနိဋ္ဌံ ဣသိံ သတ္တက္ခတ္တုံ ဘောဂေဟိ ပရိက္ခိပိတွာ ဥပရိမုဒ္ဓနိ မဟန္တံ ဖဏံ ကရိတွာ အဋ္ဌာသိ။ အထ ခေါ, ဘိက္ခဝေ, ကနိဋ္ဌော ဣသိ တဿ နာဂဿ ဘယာ ကိသော အဟောသိ လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော။ အဒ္ဒသ ခေါ, ဘိက္ခဝေ, ဇေဋ္ဌော ဣသိ ကနိဋ္ဌံ ဣသိံ ကိသံ လူခံ ဒုဗ္ဗဏ္ဏံ ဥပ္ပဏ္ဍုပ္ပဏ္ဍုကဇာတံ ဓမနိသန္ထတဂတ္တံ။ ဒိသွာန ကနိဋ္ဌံ ဣသိံ ဧတဒဝေါစ – ‘‘ကိဿ တွံ, ဘော, ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော’’တိ? ‘‘ဣဓ, ဘော, မဏိကဏ္ဌော နာဂရာဇာ ဂင်္ဂံ နဒိံ ဥတ္တရိတွာ ယေနာဟံ တေနုပသင်္ကမိ; ဥပသင်္ကမိတွာ မံ သတ္တက္ခတ္တုံ ဘောဂေဟိ ပရိက္ခိပိတွာ ဥပရိမုဒ္ဓနိ မဟန္တံ ဖဏံ ကရိတွာ အဋ္ဌာသိ။ တဿာဟံ, ဘော, နာဂဿ ဘယာ [ဘယာမှိ (သီ.)] ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော’’တိ။ ‘‘ဣစ္ဆသိ ပန တွံ, ဘော, တဿ နာဂဿ အနာဂမန’’န္တိ? ‘‘ဣစ္ဆာမဟံ, ဘော, တဿ နာဂဿ အနာဂမန’’န္တိ။ ‘‘အပိ ပန တွံ, ဘော, တဿ နာဂဿ ကိဉ္စိ ပဿသီ’’တိ? ‘‘ပဿာမဟံ, ဘော, မဏိမဿ [မဏိဿ (သီ. က.)] ကဏ္ဌေ ပိလန္ဓန’’န္တိ။ ‘‘တေန ဟိ တွံ, ဘော, တံ နာဂံ မဏိံ ယာစ – ‘မဏိံ မေ, ဘော, ဒေဟိ; မဏိနာ မေ အတ္ထော’’’တိ။

အထ ခေါ, ဘိက္ခဝေ, မဏိကဏ္ဌော နာဂရာဇာ ဂင်္ဂံ နဒိံ ဥတ္တရိတွာ ယေန ကနိဋ္ဌော ဣသိ တေနုပသင်္ကမိ ; ဥပသင်္ကမိတွာ ဧကမန္တံ အဋ္ဌာသိ။ ဧကမန္တံ ဌိတံ ခေါ, ဘိက္ခဝေ, မဏိကဏ္ဌံ နာဂရာဇာနံ ကနိဋ္ဌော ဣသိ ဧတဒဝေါစ – ‘‘မဏိံ မေ, ဘော, ဒေဟိ; မဏိနာ မေ အတ္ထော’’တိ။ အထ ခေါ, ဘိက္ခဝေ, မဏိကဏ္ဌော နာဂရာဇာ – ‘ဘိက္ခု မဏိံ ယာစတိ, ဘိက္ခုဿ မဏိနာ အတ္ထော’တိ ခိပ္ပညေဝ အဂမာသိ။ ဒုတိယမ္ပိ ခေါ, ဘိက္ခဝေ, မဏိကဏ္ဌော နာဂရာဇာ ဂင်္ဂံ နဒိံ ဥတ္တရိတွာ ယေန ကနိဋ္ဌော ဣသိ တေနုပသင်္ကမိ။ အဒ္ဒသ ခေါ, ဘိက္ခဝေ, ကနိဋ္ဌော ဣသိ မဏိကဏ္ဌံ နာဂရာဇာနံ ဒူရတောဝ အာဂစ္ဆန္တံ။ ဒိသွာန မဏိကဏ္ဌံ နာဂရာဇာနံ ဧတဒဝေါစ – ‘‘မဏိံ မေ, ဘော, ဒေဟိ; မဏိနာ မေ အတ္ထော’’တိ။ အထ ခေါ, ဘိက္ခဝေ, မဏိကဏ္ဌော နာဂရာဇာ – ‘‘ဘိက္ခု မဏိံ ယာစတိ, ဘိက္ခုဿ မဏိနာ အတ္ထော’’တိ တတောဝ ပဋိနိဝတ္တိ။ တတိယမ္ပိ ခေါ, ဘိက္ခဝေ, မဏိကဏ္ဌော နာဂရာဇာ ဂင်္ဂံ နဒိံ ဥတ္တရတိ။ အဒ္ဒသ ခေါ, ဘိက္ခဝေ, ကနိဋ္ဌော ဣသိ မဏိကဏ္ဌံ နာဂရာဇာနံ ဂင်္ဂံ နဒိံ ဥတ္တရန္တံ။ ဒိသွာန မဏိကဏ္ဌံ နာဂရာဇာနံ ဧတဒဝေါစ – ‘‘မဏိံ မေ, ဘော, ဒေဟိ; မဏိနာ မေ အတ္ထော’’တိ။ အထ ခေါ, ဘိက္ခဝေ, မဏိကဏ္ဌော နာဂရာဇာ ကနိဋ္ဌံ ဣသိံ ဂါထာဟိ အဇ္ဈဘာသိ –

[ဇာ. ၁.၃.၇ မဏိကဏ္ဌဇာတကေပိ] ‘‘မမန္နပါနံ ဝိပုလံ ဥဠာရံ၊

ဥပ္ပဇ္ဇတီမဿ မဏိဿ ဟေတု။

တံ တေ န ဒဿံ အတိယာစကောသိ။

န စာပိ တေ အဿမမာဂမိဿံ။

[ဇာ. ၁.၃.၈ မဏိကဏ္ဌဇာတကေပိ] ‘‘သုသူ ယထာ သက္ခရဓေါတပါဏီ။

တာသေသိ မံ သေလမာယာစမာနော။

တံ တေ န ဒဿံ အတိယာစကောသိ။

န စာပိ တေ အဿမမာဂမိဿ’’န္တိ။

အထ ခေါ, ဘိက္ခဝေ, မဏိကဏ္ဌော နာဂရာဇာ – ‘‘ဘိက္ခု မဏိံ ယာစတိ, ဘိက္ခုဿ မဏိနာ အတ္ထော’’တိ ပက္ကာမိ။ တထာ ပက္ကန္တောဝ [တဒါပက္ကန္တောဝ (က.)] အဟောသိ, န ပုန ပစ္စာဂဉ္ဆိ။ အထ ခေါ, ဘိက္ခဝေ, ကနိဋ္ဌော ဣသိ တဿ နာဂဿ ဒဿနီယဿ အဒဿနေန ဘိယျောသောမတ္တာယ ကိသော အဟောသိ လူခေါ ဒုဗ္ဗဏ္ဏော, ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော။ အဒ္ဒသ ခေါ, ဘိက္ခဝေ, ဇေဋ္ဌော ဣသိ ကနိဋ္ဌံ ဣသိံ ဘိယျောသောမတ္တာယ ကိသံ လူခံ ဒုဗ္ဗဏ္ဏံ ဥပ္ပဏ္ဍုပ္ပဏ္ဍုကဇာတံ ဓမနိသန္ထတဂတ္တံ။ ဒိသွာန ကနိဋ္ဌံ ဣသိံ ဧတဒဝေါစ – ‘‘ကိဿ တွံ, ဘော, ဘိယျောသောမတ္တာယ ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော’’တိ? ‘‘တဿာဟံ, ဘော, နာဂဿ ဒဿနီယဿ အဒဿနေန ဘိယျောသောမတ္တာယ ကိသော လူခေါ ဒုဗ္ဗဏ္ဏော ဥပ္ပဏ္ဍုပ္ပဏ္ဍုကဇာတော ဓမနိသန္ထတဂတ္တော’’တိ။ အထ ခေါ, ဘိက္ခဝေ, ဇေဋ္ဌော ဣသိ ကနိဋ္ဌံ ဣသိံ ဂါထာယ အဇ္ဈဘာသိ –

[ဇာ. ၁.၃.၉ မဏိကဏ္ဌဇာတကေပိ] ‘‘န တံ ယာစေ ယဿ ပိယံ ဇိဂီသေ၊

ဝိဒေဿော [ဒေဿော (သီ.)၊ ဒေဿော စ (သျာ.)] ဟောတိ အတိယာစနာယ။

နာဂေါ မဏိံ ယာစိတော ဗြာဟ္မဏေန။

အဒဿနညေဝ တဒဇ္ဈဂမာ’’တိ။

တေသဉှိ နာမ, ဘိက္ခဝေ, တိရစ္ဆာနဂတာနံ ပါဏာနံ အမနာပါ ဘဝိဿတိ ယာစနာ အမနာပါ ဝိညတ္တိ။ ကိမင်္ဂံ [ကိမင်္ဂ (သီ.)] ပန မနုဿဘူတာနံ!

၃၄၅. ‘‘ဘူတပုဗ္ဗံ, ဘိက္ခဝေ, အညတရော ဘိက္ခု ဟိမဝန္တပဿေ ဝိဟရတိ အညတရသ္မိံ ဝနသဏ္ဍေ။ တဿ ခေါ, ဘိက္ခဝေ, ဝနသဏ္ဍဿ အဝိဒူရေ မဟန္တံ နိန္နံ ပလ္လလံ။ အထ ခေါ,

ဝါသာယ ဥပဂစ္ဆတိ။ အထ ခေါ, ဘိက္ခဝေ, သော ဘိက္ခု တဿ သကုဏသံဃဿ သဒ္ဒေန ဥဗ္ဗာဠှော ယေနာဟံ တေနုပသင်္ကမိ; ဥပသင်္ကမိတွာ မံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ အဟံ, ဘိက္ခဝေ, တံ ဘိက္ခုံ ဧတဒဝေါစ – ‘ကစ္စိ, ဘိက္ခု, ခမနီယံ ကစ္စိ ယာပနီယံ ကစ္စိသိ အပ္ပကိလမထေန အဒ္ဓါနံ အာဂတော? ကုတော စ တွံ, ဘိက္ခု, အာဂစ္ဆသီ’တိ? ‘ခမနီယံ, ဘဂဝါ, ယာပနီယံ, ဘဂဝါ။ အပ္ပကိလမထေန စာဟံ, ဘန္တေ, အဒ္ဓါနံ အာဂတော။ အတ္ထိ, ဘန္တေ, ဟိမဝန္တပဿေ မဟာဝနသဏ္ဍော။ တဿ ခေါ ပန, ဘန္တေ, ဝနသဏ္ဍဿ အဝိဒူရေ မဟန္တံ နိန္နံ ပလ္လလံ။ အထ ခေါ, ဘန္တေ, မဟာသကုဏသံဃော တသ္မိံ ပလ္လလေ ဒိဝသံ ဂေါစရံ စရိတွာ သာယံ တံ ဝနသဏ္ဍံ ဝါသာယ ဥပဂစ္ဆတိ။ တတော အဟံ, ဘဂဝါ, အာဂစ္ဆာမိ – တဿ သကုဏသံဃဿ သဒ္ဒေန ဥဗ္ဗာဠှော’တိ။ ‘ဣစ္ဆသိ ပန တွံ, ဘိက္ခု, တဿ သကုဏသံဃဿ အနာဂမန’န္တိ ? ‘ဣစ္ဆာမဟံ, ဘဂဝါ, တဿ သကုဏသံဃဿ အနာဂမန’န္တိ။ ‘တေန ဟိ တွံ, ဘိက္ခု, တတ္ထ ဂန္တွာ တံ ဝနသဏ္ဍံ အဇ္ဈောဂါဟေတွာ ရတ္တိယာ ပဌမံ ယာမံ တိက္ခတ္တုံ သဒ္ဒမနုဿာဝေဟိ – သုဏန္တု မေ, ဘောန္တော သကုဏာ, ယာဝတိကာ ဣမသ္မိံ ဝနသဏ္ဍေ ဝါသံ ဥပဂတာ, ပတ္တေန မေ အတ္ထော။ ဧကေကံ မေ, ဘောန္တော, ပတ္တံ ဒဒန္တူ’တိ။ ရတ္တိယာ မဇ္ဈိမံ ယာမံ။ ရတ္တိယာ ပစ္ဆိမံ ယာမံ တိက္ခတ္တုံ သဒ္ဒမနုဿာဝေဟိ – ‘သုဏန္တု မေ, ဘောန္တော သကုဏာ, ယာဝတိကာ ဣမသ္မိံ ဝနသဏ္ဍေ ဝါသံ ဥပဂတာ, ပတ္တေန မေ အတ္ထော။ ဧကေကံ မေ, ဘောန္တော, ပတ္တံ ဒဒန္တူ’တိ။

‘‘အထ ခေါ, ဘိက္ခဝေ, သော ဘိက္ခု တတ္ထ ဂန္တွာ တံ ဝနသဏ္ဍံ အဇ္ဈောဂါဟေတွာ ရတ္တိယာ ပဌမံ ယာမံ တိက္ခတ္တုံ သဒ္ဒမနုဿာဝေသိ – ‘သုဏန္တု မေ, ဘောန္တော သကုဏာ, ယာဝတိကာ ဣမသ္မိံ ဝနသဏ္ဍေ ဝါသံ ဥပဂတာ, ပတ္တေန မေ အတ္ထော။ ဧကေကံ မေ, ဘောန္တော, ပတ္တံ ဒဒန္တူ’တိ။ ရတ္တိယာ မဇ္ဈိမ ယာမံ။ ရတ္တိယာ ပစ္ဆိမံ ယာမံ တိက္ခတ္တုံ သဒ္ဒမနုဿာဝေသိ – ‘သုဏန္တု မေ, ဘောန္တော သကုဏာ, ယာဝတိကာ ဣမသ္မိံ ဝနသဏ္ဍေ ဝါသံ ဥပဂတာ, ပတ္တေန မေ အတ္ထော။ ဧကေကံ မေ, ဘောန္တော, ပတ္တံ ဒဒန္တူ’တိ။ အထ ခေါ, ဘိက္ခဝေ, သော သကုဏသံဃော – ‘ဘိက္ခု ပတ္တံ ယာစတိ ဘိက္ခုဿ ပတ္တေန အတ္ထော’တိ တမှာ ဝနသဏ္ဍာ ပက္ကာမိ။ တထာ ပက္ကန္တောဝ အဟောသိ န ပုန ပစ္စာဂဉ္ဆိ။ တေသဉှိ နာမ, ဘိက္ခဝေ, တိရစ္ဆာနဂတာနံ ပါဏာနံ အမနာပါ ဘဝိဿတိ ယာစနာ အမနာပါ ဝိညတ္တိ။ ကိမင်္ဂံ ပန မနုဿဘူတာနံ’’!

၃၄၆. ‘‘ဘူတပုဗ္ဗံ, ဘိက္ခဝေ, ရဋ္ဌပါလဿ ကုလပုတ္တဿ ပိတာ ရဋ္ဌပါလံ ကုလပုတ္တံ ဂါထာယ အဇ္ဈဘာသိ –

‘အပါဟံ တေ န ဇာနာမိ၊ ရဋ္ဌပါလ ဗဟူ ဇနာ။

[ဇာ. ၁.၇.၅၄] တေ မံ သင်္ဂမ္မ ယာစန္တိ၊ ကသ္မာ မံ တွံ န ယာစသီ’တိ။

[ဇာ. ၁.၇.၅၅] ‘ယာစကော အပ္ပိယော ဟောတိ၊ ယာစံ အဒဒမပ္ပိယော။

တသ္မာဟံ တံ န ယာစာမိ၊ မာ မေ ဝိဒေဿနာ အဟူ’တိ။

‘‘သော ဟိ နာမ, ဘိက္ခဝေ, ရဋ္ဌပါလော ကုလပုတ္တော သကံ ပိတရံ ဧဝံ ဝက္ခတိ။ ကိမင်္ဂံ ပန ဇနော ဇနံ!

၃၄၇. ‘‘ဂိဟီနံ, ဘိက္ခဝေ, ဒုဿံဟရာနိ ဘောဂါနိ သမ္ဘတာနိပိ ဒုရက္ခိယာနိ ။ တတ္ထ နာမ တုမှေ, မောဃပုရိသာ, ဧဝံ ဒုဿံဟရေသု ဘောဂေသု သမ္ဘတေသုပိ ဒုရက္ခိယေသု ယာစနဗဟုလာ ဝိညတ္တိဗဟုလာ ဝိဟရိဿထ – ‘ပုရိသံ ဒေထ, ပုရိသတ္ထကရံ ဒေထ, ဂေါဏံ ဒေထ, သကဋံ ဒေထ, ဝါသိံ ဒေထ, ပရသုံ ဒေထ, ကုဌာရိံ ဒေထ, ကုဒါလံ ဒေထ, နိခါဒနံ ဒေထ, ဝလ္လိံ ဒေထ, ဝေဠုံ ဒေထ, မုဉ္ဇံ ဒေထ , ပဗ္ဗဇံ ဒေထ, တိဏံ ဒေထ, မတ္တိကံ ဒေထာ’’တိ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၃၄၈. ‘‘သညာစိကာယ ပန ဘိက္ခုနာ ကုဋိံ ကာရယမာနေန အဿာမိကံ အတ္တုဒ္ဒေသံ ပမာဏိကာ ကာရေတဗ္ဗာ။ တတြိဒံ ပမာဏံ – ဒီဃသော ဒွါဒသ ဝိဒတ္ထိယော, သုဂတဝိဒတ္ထိယာ; တိရိယံ သတ္တန္တရာ။ ဘိက္ခူ အဘိနေတဗ္ဗာ ဝတ္ထုဒေသနာယ။ တေဟိ ဘိက္ခူဟိ ဝတ္ထု ဒေသေတဗ္ဗံ – အနာရမ္ဘံ [အနာရဗ္ဘံ (က.)] သပရိက္ကမနံ။ သာရမ္ဘေ [သာရဗ္ဘေ (က.)] စေ ဘိက္ခု ဝတ္ထုသ္မိံ အပရိက္ကမနေ သညာစိကာယ ကုဋိံ ကာရေယျ, ဘိက္ခူ ဝါ အနဘိနေယျ ဝတ္ထုဒေသနာယ, ပမာဏံ ဝါ အတိက္ကာမေယျ, သံဃာဒိသေသော’’တိ။

၃၄၉. သညာစိကာ နာမ သယံ ယာစိတွာ ပုရိသမ္ပိ ပုရိသတ္ထကရမ္ပိ ဂေါဏမ္ပိ သကဋမ္ပိ ဝါသိမ္ပိ ပရသုမ္ပိ ကုဌာရိမ္ပိ ကုဒါလမ္ပိ နိခါဒနမ္ပိ ဝလ္လိမ္ပိ ဝေဠုမ္ပိ မုဉ္ဇမ္ပိ ပဗ္ဗဇမ္ပိ တိဏမ္ပိ မတ္တိကမ္ပိ။

ကုဋိ နာမ ဥလ္လိတ္တာ ဝါ ဟောတိ အဝလိတ္တာ ဝါ ဥလ္လိတ္တာဝလိတ္တာ ဝါ။

ကာရယမာနေနာတိ ကရောန္တော ဝါ ကာရာပေန္တော ဝါ။

အဿာမိကန္တိ န အညော ကောစိ သာမိကော ဟောတိ, ဣတ္ထီ ဝါ ပုရိသော ဝါ ဂဟဋ္ဌော ဝါ ပဗ္ဗဇိတော ဝါ။

အတ္တုဒ္ဒေသန္တိ အတ္တနော အတ္ထာယ။

ပမာဏိကာ ကာရေတဗ္ဗာ။ တတြိဒံ ပမာဏံ – ဒီဃသော ဒွါဒသ ဝိဒတ္ထိယော, သုဂတဝိဒတ္ထိယာတိ ဗာဟိရိမေန မာနေန။

တိရိယံ သတ္တန္တရာတိ အဗ္ဘန္တရိမေန မာနေန။

ဘိက္ခူ အဘိနေတဗ္ဗာ ဝတ္ထုဒေသနာယာတိ တေန ကုဋိကာရကေန ဘိက္ခုနာ ကုဋိဝတ္ထုံ သောဓေတွာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ, ဘန္တေ, သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ။ သောဟံ, ဘန္တေ, သံဃံ ကုဋိဝတ္ထုဩလောကနံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ သစေ သဗ္ဗော သံဃော ဥဿဟတိ ကုဋိဝတ္ထုံ ဩလောကေတုံ, သဗ္ဗေန သံဃေန ဩလောကေတဗ္ဗံ။ နော စေ သဗ္ဗော သံဃော ဥဿဟတိ ကုဋိဝတ္ထုံ ဩလောကေတုံ, ယေ တတ္ထ ဟောန္တိ ဘိက္ခူ ဗျတ္တာ ပဋိဗလာ သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတုံ တေ ယာစိတွာ သမ္မန္နိတဗ္ဗာ။ ဧဝဉ္စ ပန, ဘိက္ခဝေ, သမ္မန္နိတဗ္ဗာ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၅၀. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ။ သော သံဃံ ကုဋိဝတ္ထုဩလောကနံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမ္မန္နေယျ ဣတ္ထန္နာမဿ ဘိက္ခုနော ကုဋိဝတ္ထုံ ဩလောကေတုံ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ။ သော သံဃံ ကုဋိဝတ္ထုဩလောကနံ ယာစတိ။ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမ္မန္နတိ ဣတ္ထန္နာမဿ ဘိက္ခုနော ကုဋိဝတ္ထုံ ဩလောကေတုံ။ ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမ္မုတိ [သမ္မတိ (သျာ.)] ဣတ္ထန္နာမဿ ဘိက္ခုနော ကုဋိဝတ္ထုံ ဩလောကေတုံ, သော တုဏှဿ; ယဿ နက္ခမတိ, သော ဘာသေယျ။

‘‘သမ္မတာ သံဃေန ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော ကုဋိဝတ္ထုံ ဩလောကေတုံ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၃၅၁. တေဟိ သမ္မတေဟိ ဘိက္ခူဟိ တတ္ထ ဂန္တွာ ကုဋိဝတ္ထု ဩလောကေတဗ္ဗံ, သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတဗ္ဗံ။ သစေ သာရမ္ဘံ ဟောတိ အပရိက္ကမနံ, ‘မာ ဣဓ ကရီ’တိ ဝတ္တဗ္ဗော။ သစေ အနာရမ္ဘံ ဟောတိ သပရိက္ကမနံ, သံဃဿ အာရောစေတဗ္ဗံ – ‘အနာရမ္ဘံ သပရိက္ကမန’န္တိ။ တေန ကုဋိကာရကေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ, ဘန္တေ, သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ ။ သောဟံ, ဘန္တေ, သံဃံ ကုဋိဝတ္ထုဒေသနံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၅၂. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ။ သော သံဃံ ကုဋိဝတ္ထုဒေသနံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမဿ ဘိက္ခုနော ကုဋိဝတ္ထုံ ဒေသေယျ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သညာစိကာယ ကုဋိံ ကတ္တုကာမော အဿာမိကံ အတ္တုဒ္ဒေသံ။ သော သံဃံ ကုဋိဝတ္ထုဒေသနံ ယာစတိ။ သံဃော ဣတ္ထန္နာမဿ ဘိက္ခုနော ကုဋိဝတ္ထုံ ဒေသေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ကုဋိဝတ္ထုဿ ဒေသနာ, သော တုဏှဿ; ယဿ နက္ခမတိ, သော ဘာသေယျ။

‘‘ဒေသိတံ သံဃေန ဣတ္ထန္နာမဿ ဘိက္ခုနော ကုဋိဝတ္ထု။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၃၅၃. သာရမ္ဘံ နာမ ကိပိလ္လိကာနံ ဝါ အာသယော ဟောတိ, ဥပစိကာနံ ဝါ အာသယော ဟောတိ, ဥန္ဒုရာနံ ဝါ အာသယော ဟောတိ, အဟီနံ ဝါ အာသယော ဟောတိ, ဝိစ္ဆိကာနံ ဝါ အာသယော ဟောတိ, သတပဒီနံ ဝါ အာသယော ဟောတိ, ဟတ္ထီနံ ဝါ အာသယော ဟောတိ, အဿာနံ ဝါ အာသယော ဟောတိ, သီဟာနံ ဝါ အာသယော ဟောတိ, ဗျဂ္ဃါနံ ဝါ အာသယော ဟောတိ, ဒီဣနံ ဝါ အာသယော ဟောတိ, အစ္ဆာနံ ဝါ အာသယော ဟောတိ, တရစ္ဆာနံ ဝါ အာသယော ဟောတိ, ယေသံ ကေသဉ္စိ တိရစ္ဆာနဂတာနံ ပါဏာနံ အာသယော ဟောတိ, ပုဗ္ဗဏ္ဏနိဿိတံ ဝါ ဟောတိ, အပရဏ္ဏနိဿိတံ ဝါ ဟောတိ, အဗ္ဘာဃာတနိဿိတံ ဝါ ဟောတိ, အာဃာတနနိဿိတံ ဝါ ဟောတိ, သုသာနနိဿိတံ ဝါ ဟောတိ, ဥယျာနနိဿိတံ ဝါ ဟောတိ, ရာဇဝတ္ထုနိဿိတံ ဝါ ဟောတိ, ဟတ္ထိသာလာနိဿိတံ ဝါ ဟောတိ, အဿသာလာနိဿိတံ ဝါ ဟောတိ, ဗန္ဓနာဂါရနိဿိတံ ဝါ ဟောတိ, ပါနာဂါရနိဿိတံ ဝါ ဟောတိ, သူနနိဿိတံ ဝါ ဟောတိ, ရစ္ဆာနိဿိတံ ဝါ ဟောတိ, စစ္စရနိဿိတံ ဝါ ဟောတိ, သဘာနိဿိတံ ဝါ ဟောတိ, သံသရဏနိဿိတံ ဝါ [သဉ္စရဏနိဿိတံ ဝါ (က.)] ဟောတိ။ ဧတံ သာရမ္ဘံ နာမ။

အပရိက္ကမနံ နာမ န သက္ကာ ဟောတိ ယထာယုတ္တေန သကဋေန အနုပရိဂန္တုံ သမန္တာ နိဿေဏိယာ အနုပရိဂန္တုံ။ ဧတံ အပရိက္ကမနံ နာမ။

အနာရမ္ဘံ နာမ န ကိပိလ္လိကာနံ ဝါ အာသယော ဟောတိ, န ဥပစိကာနံ ဝါ အာသယော ဟောတိ, န ဥန္ဒုရာနံ ဝါ အာသယော ဟောတိ, န အဟီနံ ဝါ အာသယော ဟောတိ, န ဝိစ္ဆိကာနံ ဝါ အာသယော ဟောတိ, န သတပဒီနံ ဝါ အာသယော ဟောတိ။ပေ.။ န သံသရဏနိဿိတံ ဝါ ဟောတိ။ ဧတံ အနာရမ္ဘံ နာမ။

သပရိက္ကမနံ နာမ သက္ကာ ဟောတိ ယထာယုတ္တေန သကဋေန အနုပရိဂန္တုံ, သမန္တာ နိဿေဏိယာ အနုပရိဂန္တုံ။ ဧတံ သပရိက္ကမနံ နာမ။

သညာစိကာ နာမ သယံ ယာစိတွာ ပုရိသမ္ပိ ပုရိသတ္ထကရမ္ပိ။ပေ.။ မတ္တိကမ္ပိ ။

ကုဋိ နာမ ဥလ္လိတ္တာ ဝါ ဟောတိ ဝါ အဝလိတ္တာ ဝါ ဥလ္လိတ္တာဝလိတ္တာ ဝါ။

ကာရေယျာတိ ကရောတိ ဝါ ကာရာပေတိ ဝါ။

ဘိက္ခူ ဝါ အနဘိနေယျ, ဝတ္ထုဒေသနာယ ပမာဏံ ဝါ အတိက္ကာမေယျာတိ ဉတ္တိဒုတိယေန ကမ္မေန ကုဋိဝတ္ထုံ န ဒေသာပေတွာ, အာယာမတော ဝါ ဝိတ္ထာရတော ဝါ အန္တမသော ကေသဂ္ဂမတ္တမ္ပိ အတိက္ကာမေတွာ ကရောတိ ဝါ ကာရာပေတိ ဝါ, ပယောဂေ ပယောဂေ ဒုက္ကဋံ။ ဧကံ ပိဏ္ဍံ အနာဂတေ အာပတ္တိ ထုလ္လစ္စယဿ။ တသ္မိံ ပိဏ္ဍေ အာဂတေ အာပတ္တိ သံဃာဒိသေသဿ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၃၅၄. ဘိက္ခု ကုဋိံ ကရောတိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ အဒေသိတဝတ္ထုကံ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ အဒေသိတဝတ္ထုကံ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ အဒေသိတဝတ္ထုကံ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

၃၅၅. ဘိက္ခု ကုဋိံ ကရောတိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ ဒေသိတဝတ္ထုကံ သာရမ္ဘံ သပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ဒေသိတဝတ္ထုကံ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ဒေသိတဝတ္ထုကံ အနာရမ္ဘံ သပရိက္ကမနံ, အနာပတ္တိ။

ဘိက္ခု ကုဋိံ ကရောတိ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ ပမာဏာတိက္ကန္တံ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ ပမာဏာတိက္ကန္တံ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ ပမာဏာတိက္ကန္တံ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု ကုဋိံ ကရောတိ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ ပမာဏိကံ သာရမ္ဘံ သပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ပမာဏိကံ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ပမာဏိကံ အနာရမ္ဘံ သပရိက္ကမနံ, အနာပတ္တိ။

ဘိက္ခု ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ သာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ အနာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ ဘိက္ခု ကုဋိံ ကရောတိ အဒေသိတဝတ္ထုကံ ပမာဏာတိက္ကန္တံ အနာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသာနံ။

ဘိက္ခု ကုဋိံ ကရောတိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ ဘိက္ခု ကုဋိံ ကရောတိ ဒေသိတဝတ္ထုကံ ပမာဏိကံ သာရမ္ဘံ သပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ဒေသိတဝတ္ထုကံ ပမာဏိကံ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ ဘိက္ခု ကုဋိံ ကရောတိ ဒေသိတဝတ္ထုကံ ပမာဏိကံ အနာရမ္ဘံ သပရိက္ကမနံ, အနာပတ္တိ။

၃၅၆. ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ , အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသာနံ။

ဘိက္ခု သမာဒိသတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၅၇. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ , အာပတ္တိ ဒွိန္နံ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ ။ပေ.။ အနာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသာနံ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၅၈. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ အဒေသိတဝတ္ထုကာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ သပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ အဒေသိတဝတ္ထုကာ သာရမ္ဘာ သပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကာ စ ဟောတု အနာရမ္ဘာ စာ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ အနာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ အဒေသိတဝတ္ထုကာ အနာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကာ စ ဟောတု သပရိက္ကမနာ စာ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ အနာရမ္ဘံ သပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ အဒေသိတဝတ္ထုကာ အနာရမ္ဘာ သပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကာ ဟောတူ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ဒေသိတဝတ္ထုကာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘာ စ ဟောတု သပရိက္ကမနာ စာ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ သပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ဒေသိတဝတ္ထုကာ သာရမ္ဘာ သပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘာ ဟောတူ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ အနာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ဒေသိတဝတ္ထုကာ အနာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘သပရိက္ကမနာ ဟောတူ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ အနာရမ္ဘံ သပရိက္ကမနံ, အနာပတ္တိ။

၃၅၉. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏာတိက္ကန္တံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ပမာဏာတိက္ကန္တာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ပေ.။ ‘‘ပမာဏိကာ စ ဟောတု အနာရမ္ဘာ စာ’’တိ။ပေ.။ ‘‘ပမာဏိကာ စ ဟောတု သပရိက္ကမနာ စာ’’တိ။ပေ.။ ‘‘ပမာဏိကာ ဟောတူ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏိကံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ပမာဏိကာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘာ စ ဟောတု သပရိက္ကမနာ စာ’’တိ။ပေ.။ ‘‘အနာရမ္ဘာ ဟောတူ’’တိ။ပေ.။ ‘‘သပရိက္ကမနာ ဟောတူ’’တိ။ပေ.။ အနာပတ္တိ။

၃၆၀. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ အဒေသိတဝတ္ထုကာ ပမာဏာတိက္ကန္တာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ပေ.။ ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စာ’’တိ။ပေ.။ ‘‘ဒေသိတဝတ္ထုကာ စ ဟောတု ပမာဏိကာ စ သပရိက္ကမနာ စာ’’တိ။ပေ.။ ‘‘ဒေသိတဝတ္ထုကာ စ ဟောတု ပမာဏိကာ စာ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ။ သော သုဏာတိ – ‘‘ကုဋိ ကိရ မေ ကယိရတိ ဒေသိတဝတ္ထုကာ ပမာဏိကာ သာရမ္ဘာ အပရိက္ကမနာ’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘာ စ ဟောတု သပရိက္ကမနာ စာ’’တိ။ပေ.။ ‘‘အနာရမ္ဘာ ဟောတူ’’တိ။ပေ.။ ‘‘သပရိက္ကမနာ ဟောတူ’’တိ။ပေ.။ အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ကာရုကာနံ တိဏ္ဏံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကာဋနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ ကာရုကာနံ တိဏ္ဏံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ သပရိက္ကမနံ အာပတ္တိ ကာရုကာနံ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ပမာဏိကာ စ ဟောတု အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ပမာဏိကံ သာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ, အာပတ္တိ ကာရုကာနံ စတုန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ တိဏ္ဏံ ဒုက္ကဋာနံ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ တိဏ္ဏံ ဒုက္ကဋာနံ။ပေ.။ အနာရမ္ဘံ သပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကာ စ ဟောတု ပမာဏိကာ စ အနာရမ္ဘာ စ သပရိက္ကမနာ စာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၆၁. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ သံဃာဒိသေသေန ဒွိန္နံ ဒုက္ကဋာနံ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ သာရမ္ဘံ သပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ။ပေ.။ အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ။ပေ.။ အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၆၂. ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ပမာဏာတိက္ကန္တံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ပမာဏိကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ အဒေသိတဝတ္ထုကံ ပမာဏာတိက္ကန္တံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ ဒွိန္နံ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒွိန္နံ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ ဒွိန္နံ သံဃာဒိသေသာနံ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သာ ကုဋိ အညဿ ဝါ ဒါတဗ္ဗာ ဘိန္ဒိတွာ ဝါ ပုန ကာတဗ္ဗာ။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ ဒွိန္နံ ဒုက္ကာဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ကုဋိံ မေ ကရောထာ’’တိ။ တဿ ကုဋိံ ကရောန္တိ ဒေသိတဝတ္ထုကံ ပမာဏိကံ အနာရမ္ဘံ သပရိက္ကမနံ, အနာပတ္တိ။

၃၆၃. အတ္တနာ ဝိပ္ပကတံ အတ္တနာ ပရိယောသာပေတိ, အာပတ္တိ သံဃာဒိသေသဿ။

အတ္တနာ ဝိပ္ပကတံ ပရေဟိ ပရိယောသာပေတိ [ပရိယောသာဝါပေတိ (က.)], အာပတ္တိ သံဃာဒိသေသဿ။

ပရေဟိ ဝိပ္ပကတံ အတ္တနာ ပရိယောသာပေတိ, အာပတ္တိ သံဃာဒိသေသဿ။

ပရေဟိ ဝိပ္ပကတံ ပရေဟိ ပရိယောသာပေတိ [ပရိယောသာဝါပေတိ (က.)], အာပတ္တိ သံဃာဒိသေသဿ။

၃၆၄. အနာပတ္တိ လေဏေ ဂုဟာယ တိဏကုဋိကာယ အညဿတ္ထာယ ဝါသာဂါရံ ဌပေတွာ သဗ္ဗတ္ထ, အနာပတ္တိ ဥမ္မတ္တကဿ အာဒိကမ္မိကဿာတိ။

ကုဋိကာရသိက္ခါပဒံ နိဋ္ဌိတံ ဆဋ္ဌံ။

၇. ဝိဟာရကာရသိက္ခါပဒံ

၃၆၅. တေန သမယေန ဗုဒ္ဓေါ ဘဂဝါ ကောသမ္ဗိယံ ဝိဟရတိ ဃောသိတာရာမေ။ တေန ခေါ ပန သမယေန အာယသ္မတော ဆန္နဿ ဥပဋ္ဌာကော ဂဟပတိ အာယသ္မန္တံ ဆန္နံ ဧတဒဝေါစ – ‘‘ဝိဟာရဝတ္ထုံ, ဘန္တေ, ဇာနာဟိ အယျဿ ဝိဟာရံ ကာရာပေဿာမီ’’တိ။ အထ ခေါ အာယသ္မာ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒါပေသိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ။ မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ စေတိယရုက္ခံ ဆေဒါပေဿန္တိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ! ဧကိန္ဒြိယံ သမဏာ သကျပုတ္တိယာ ဇီဝံ ဝိဟေဌေန္တီ’’ [ဝိဟေဌေဿန္တိ (ကတ္ထစိ)] တိ။ အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဆန္နော စေတိယရုက္ခံ ဆေဒါပေဿတိ ဂါမပူဇိတံ။ပေ.။ ရဋ္ဌပူဇိတ’’န္တိ! အထ ခေါ တေ ဘိက္ခူ အာယသ္မန္တံ ဆန္နံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တွံ, ဆန္န, စေတိယရုက္ခံ ဆေဒါပေသိ ဂါမပူဇိတံ။ပေ.။ ရဋ္ဌပူဇိတ’’န္တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တွံ, မောဃပုရိသ, စေတိယရုက္ခံ ဆေဒါပေဿသိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ! ဇီဝသညိနော ဟိ, မောဃပုရိသ, မနုဿာ ရုက္ခသ္မိံ။ နေတံ, မောဃပုရိသ , အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၃၆၆. ‘‘မဟလ္လကံ ပန ဘိက္ခုနာ ဝိဟာရံ ကာရယမာနေန သဿာမိကံ အတ္တုဒ္ဒေသံ ဘိက္ခူ အဘိနေတဗ္ဗာ ဝတ္ထုဒေသနာယ။ တေဟိ ဘိက္ခူဟိ ဝတ္ထု ဒေသေတဗ္ဗံ အနာရမ္ဘံ သပရိက္ကမနံ။ သာရမ္ဘေ စေ ဘိက္ခု ဝတ္ထုသ္မိံ အပရိက္ကမနေ မဟလ္လကံ ဝိဟာရံ ကာရေယျ ဘိက္ခူ ဝါ အနဘိနေယျ ဝတ္ထုဒေသနာယ, သံဃာဒိသေသော’’တိ။

၃၆၇. မဟလ္လကော နာမ ဝိဟာရော သဿာမိကော ဝုစ္စတိ။

ဝိဟာရော နာမ ဥလ္လိတ္တော ဝါ ဟောတိ အဝလိတ္တော ဝါ ဥလ္လိတ္တာဝလိတ္တော ဝါ။

ကာရယမာနေနာတိ ကရောန္တော ဝါ ကာရာပေန္တော ဝါ။

သဿာမိကန္တိ အညော ကောစိ သာမိကော ဟောတိ ဣတ္ထီ ဝါ ပုရိသော ဝါ ဂဟဋ္ဌော ဝါ ပဗ္ဗဇိတော ဝါ။

အတ္တုဒ္ဒေသန္တိ အတ္တနော အတ္ထာယ။

ဘိက္ခူ အဘိနေတဗ္ဗာ ဝတ္ထုဒေသနာယာတိ တေန ဝိဟာရကာရကေန ဘိက္ခုနာ ဝိဟာရဝတ္ထုံ သောဓေတွာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ, ဘန္တေ, မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ။ သောဟံ, ဘန္တေ, သံဃံ ဝိဟာရဝတ္ထုဩလောကနံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ သစေ သဗ္ဗော သံဃော ဥဿဟတိ ဝိဟာရဝတ္ထုံ ဩလောကေတုံ သဗ္ဗေန သံဃေန ဩလောကေတဗ္ဗံ။ နော စေ သဗ္ဗော သံဃော ဥဿဟတိ ဝိဟာရဝတ္ထုံ ဩလောကေတုံ, ယေ တတ္ထ ဟောန္တိ ဘိက္ခူ ဗျတ္တာ ပဋိဗလာ သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတုံ တေ ယာစိတွာ သမ္မန္နိတဗ္ဗာ။ ဧဝဉ္စ ပန, ဘိက္ခဝေ, သမ္မန္နိတဗ္ဗာ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၆၈. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ။ သော သံဃံ ဝိဟာရဝတ္ထုဩလောကနံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခု သမ္မန္နေယျ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ။ သော သံဃံ ဝိဟာရဝတ္ထုဩလောကနံ ယာစတိ။ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမ္မန္နတိ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ။ ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမ္မုတိ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ, သော တုဏှဿ; ယဿ နက္ခမတိ, သော ဘာသေယျ။

‘‘သမ္မတာ သံဃေန ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၃၆၉. တေဟိ သမ္မတေဟိ ဘိက္ခူဟိ တတ္ထ ဂန္တွာ ဝိဟာရဝတ္ထု ဩလောကေတဗ္ဗံ; သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတဗ္ဗံ။ သစေ သာရမ္ဘံ ဟောတိ အပရိက္ကမနံ, ‘မာယိဓ ကရီ’တိ ဝတ္တဗ္ဗော။ သစေ အနာရမ္ဘံ ဟောတိ သပရိက္ကမနံ, သံဃဿ အာရောစေတဗ္ဗံ – ‘အနာရမ္ဘံ သပရိက္ကမန’န္တိ ။ တေန ဝိဟာရကာရကေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ, ဘန္တေ, မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ ။ သောဟံ, ဘန္တေ, သံဃံ ဝိဟာရဝတ္ထုဒေသနံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၇၀. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ။ သော သံဃံ ဝိဟာရဝတ္ထုဒေသနံ ယာစတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမဿ ဘိက္ခုနော ဝိဟာရဝတ္ထုံ ဒေသေယျ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ။ သော သံဃံ ဝိဟာရဝတ္ထုဒေသနံ ယာစတိ။ သံဃော ဣတ္ထန္နာမဿ ဘိက္ခုနော ဝိဟာရဝတ္ထုံ ဒေသေတိ။ ယဿာယသ္မတော ခမတိ ဣတ္ထန္နာမဿ ဘိက္ခုနော ဝိဟာရဝတ္ထုဿ ဒေသနာ, သော တုဏှဿ; ယဿ နက္ခမတိ, သော ဘာသေယျ။

‘‘ဒေသိတံ သံဃေန ဣတ္ထန္နာမဿ ဘိက္ခုနော ဝိဟာရဝတ္ထုံ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၃၇၁. သာရမ္ဘံ နာမ ကိပိလ္လိကာနံ ဝါ အာသယော ဟောတိ, ဥပစိကာနံ ဝါ အာသယော ဟောတိ, ဥန္ဒူရာနံ ဝါ။ပေ.။ အဟီနံ ဝါ ဝိစ္ဆိကာနံ ဝါ သတပဒီနံ ဝါ ဟတ္ထီနံ ဝါ အဿာနံ ဝါ သီဟာနံ ဝါ ဗျဂ္ဃါနံ ဝါ ဒီဣနံ ဝါ အစ္ဆာနံ ဝါ တရစ္ဆာနံ ဝါ အာသယော ဟောတိ, ယေသံ ကေသဉ္စိ တိရစ္ဆာနဂတာနံ ပါဏာနံ အာသယော ဟောတိ, ပုဗ္ဗဏ္ဏနိဿိတံ ဝါ ဟောတိ, အပရဏ္ဏနိဿိတံ ဝါ ဟောတိ, အဗ္ဘာဃာတနိဿိတံ ဝါ ဟောတိ, အာဃာတနနိဿိတံ ဝါ ဟောတိ, သုသာနနိဿိတံ ဝါ ဟောတိ, ဥယျာနနိဿိတံ ဝါ ဟောတိ, ရာဇဝတ္ထုနိဿိတံ ဝါ ဟောတိ, ဟတ္ထိသာလာနိဿိတံ ဝါ ဟောတိ, အဿသာလာနိဿိတံ ဝါ ဟောတိ, ဗန္ဓနာဂါရနိဿိတံ ဝါ ဟောတိ, ပါနာဂါရနိဿိတံ ဝါ ဟောတိ, သူနနိဿိတံ ဝါ ဟောတိ, ရစ္ဆာနိဿိတံ ဝါ ဟောတိ, စစ္စရနိဿိတံ ဝါ ဟောတိ, သဘာနိဿိတံ ဝါ ဟောတိ, သံသရဏနိဿိတံ ဝါ ဟောတိ။ ဧတံ သာရမ္ဘံ နာမ။

အပရိက္ကမနံ နာမ န သက္ကာ ဟောတိ ယထာယုတ္တေန သကဋေန အနုပရိဂန္တုံ, သမန္တာ နိဿေဏိယာ အနုပရိဂန္တုံ။ ဧတံ အပရိက္ကမနံ နာမ။

အနာရမ္ဘံ နာမ န ကိပိလ္လိကာနံ ဝါ အာသယော ဟောတိ။ပေ.။ န သံသရဏနိဿိတံ ဝါ ဟောတိ။ ဧတံ အနာရမ္ဘံ နာမ။

သပရိက္ကမနံ နာမ သက္ကာ ဟောတိ ယထာယုတ္တေန သကဋေန အနုပရိဂန္တုံ, သမန္တာ နိဿေဏိယာ အနုပရိဂန္တုံ။ ဧတံ သပရိက္ကမနံ နာမ။

မဟလ္လကော နာမ ဝိဟာရော သဿာမိကော ဝုစ္စတိ။

ဝိဟာရော နာမ ဥလ္လိတ္တော ဝါ ဟောတိ အဝလိတ္တော ဝါ ဥလ္လိတ္တာဝလိတ္တော ဝါ။

ကာရေယျာတိ ကရောတိ ဝါ ကာရာပေတိ ဝါ။

ဘိက္ခူ ဝါ အနဘိနေယျ ဝတ္ထုဒေသနာယာတိ ဉတ္တိဒုတိယေန ကမ္မေန ဝိဟာရဝတ္ထုံ န ဒေသာပေတွာ ကရောတိ ဝါ ကာရာပေတိ ဝါ, ပယောဂေ ဒုက္ကဋံ။ ဧကံ ပိဏ္ဍံ အနာဂတေ, အာပတ္တိ ထုလ္လစ္စယဿ ။ တသ္မိံ ပိဏ္ဍေ အာဂတေ, အာပတ္တိ သံဃာဒိသေသဿ။

သံဃာဒိသေသောတိ။ပေ.။ တေနပိ ဝုစ္စတိ – ‘သံဃာဒိသေသော’တိ။

၃၇၂. ဘိက္ခု ဝိဟာရံ ကရောတိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ ဘိက္ခု ဝိဟာရံ ကရောတိ အဒေသိတဝတ္ထုကံ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ဝိဟာရံ ကရောတိ အဒေသိတဝတ္ထုကံ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ ဘိက္ခု ဝိဟာရံ ကရောတိ အဒေသိတဝတ္ထုကံ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု ဝိဟာရံ ကရောတိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ ဘိက္ခု ဝိဟာရံ ကရောတိ ဒေသိတဝတ္ထုကံ သာရမ္ဘံ သပရိက္ကမနံ, အာပတ္တိ ဒုက္ကဋဿ။ ဘိက္ခု ဝိဟာရံ ကရောတိ ဒေသိတဝတ္ထုကံ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ ဘိက္ခု ဝိဟာရံ ကရောတိ ဒေသိတဝတ္ထုကံ အနာရမ္ဘံ သပရိက္ကမနံ, အနာပတ္တိ။

၃၇၃. ဘိက္ခု သမာဒိသတိ – ‘‘ဝိဟာရံ မေ ကရောထာ’’တိ။ တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသတိ – ‘‘ဝိဟာရံ မေ ကရောထာ’’တိ။ တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၇၄. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ န စ သမာဒိသတိ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၇၅. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ။ သော သုဏာတိ – ‘‘ဝိဟာရော ကိရ မေ ကယိရတိ အဒေသိတဝတ္ထုကော သာရမ္ဘော အပရိက္ကမနော’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ ။ပေ.။ ‘‘ဒေသိတဝတ္ထုကော စ ဟောတု အနာရမ္ဘော စာ’’တိ။ပေ.။ ‘‘ဒေသိတဝတ္ထုကော စ ဟောတု သပရိက္ကမနော စာ’’တိ ။ပေ.။ ‘‘ဒေသိတဝတ္ထုကော ဟောတူ’’တိ။ နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ, အာပတ္တိ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ။ သော သုဏာတိ – ‘‘ဝိဟာရော ကိရ မေ ကယိရတိ ဒေသိတဝတ္ထုကော သာရမ္ဘော အပရိက္ကမနော’’တိ။ တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘော စ ဟောတု သပရိက္ကမနော စာ’’တိ။ပေ.။ ‘‘အနာရမ္ဘော ဟောတူ’’တိ ‘‘သပရိက္ကမနော ဟောတူ’’တိ, အနာပတ္တိ။

၃၇၆. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ, အာပတ္တိ ကာရုကာနံ တိဏ္ဏံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ အနာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ။ တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ , အာပတ္တိ ကာရုကာနံ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ကာရုကာနံ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၇၇. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သော ဝိဟာရော အညဿ ဝါ ဒါတဗ္ဗော ဘိန္ဒိတွာ ဝါ ပုန ကာတဗ္ဗော။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ သံဃာဒိသေသေန ဒုက္ကဋဿ။ပေ.။ အနာရမ္ဘံ သပရိက္ကမနံ, အာပတ္တိ သံဃာဒိသေသဿ။

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ။ တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ။ သော စေ ဝိပ္ပကတေ အာဂစ္ဆတိ, တေန ဘိက္ခုနာ သော ဝိဟာရော အညဿ ဝါ ဒါတဗ္ဗော ဘိန္ဒိတွာ ဝါ ပုန ကာတဗ္ဗော။ နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ, အာပတ္တိ ဒွိန္နံ ဒုက္ကဋာနံ။ပေ.။ သာရမ္ဘံ သပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ အပရိက္ကမနံ, အာပတ္တိ ဒုက္ကဋဿ။ပေ.။ အနာရမ္ဘံ သပရိက္ကမနံ, အနာပတ္တိ။

၃၇၈. အတ္တနာ ဝိပ္ပကတံ အတ္တနာ ပရိယောသာပေတိ, အာပတ္တိ သံဃာဒိသေသဿ ။

အတ္တနာ ဝိပ္ပကတံ ပရေဟိ ပရိယောသာပေတိ, အာပတ္တိ သံဃာဒိသေသဿ။

ပရေဟိ ဝိပ္ပကတံ အတ္တနာ ပရိယောသာပေတိ, အာပတ္တိ သံဃာဒိသေသဿ။

ပရေဟိ ဝိပ္ပကတံ ပရေဟိ ပရိယောသာပေတိ, အာပတ္တိ သံဃာဒိသေသဿ။

၃၇၉. အနာပတ္တိ လေဏေ ဂုဟာယ တိဏကုဋိကာယ အညဿတ္ထာယ ဝါသာဂါရံ ဌပေတွာ သဗ္ဗတ္ထ။ အနာပတ္တိ ဥမ္မတ္တကဿ, အာဒိကမ္မိကဿာတိ။

ဝိဟာရကာရသိက္ခါပဒံ နိဋ္ဌိတံ သတ္တမံ။

၈. ဒုဋ္ဌဒေါသသိက္ခါပဒံ

၃၈၀. [ဣဒံ ဝတ္ထု စူဠဝ. ၁၈၉] တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန အာယသ္မတာ ဒဗ္ဗေန မလ္လပုတ္တေန ဇာတိယာ သတ္တဝဿေန အရဟတ္တံ သစ္ဆိကတံ ဟောတိ။ ယံ ကိဉ္စိ [ယဉ္စ ကိဉ္စိ (သီ. က.)] သာဝကေန ပတ္တဗ္ဗံ သဗ္ဗံ တေန အနုပ္ပတ္တံ ဟောတိ။ နတ္ထိ စဿ ကိဉ္စိ ဥတ္တရိ ကရဏီယံ, ကတဿ ဝါ ပတိစယော။ အထ ခေါ အာယသ္မတော ဒဗ္ဗဿ မလ္လပုတ္တဿ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ – ‘‘မယာ ခေါ ဇာတိယာ သတ္တဝဿေန အရဟတ္တံ သစ္ဆိကတံ။ ယံ ကိဉ္စိ သာဝကေန ပတ္တဗ္ဗံ သဗ္ဗံ မယာ အနုပ္ပတ္တံ။ နတ္ထိ စ မေ ကိဉ္စိ ဥတ္တရိ ကရဏီယံ, ကတဿ ဝါ ပတိစယော။ ကိန္နု ခေါ အဟံ သံဃဿ ဝေယျာဝစ္စံ ကရေယျ’’န္တိ?

အထ ခေါ အာယသ္မတော ဒဗ္ဗဿ မလ္လပုတ္တဿ ဧတဒဟောသိ – ‘‘ယံနူနာဟံ သံဃဿ သေနာသနဉ္စ ပညပေယျံ ဘတ္တာနိ စ ဥဒ္ဒိသေယျ’’န္တိ။ အထ ခေါ အာယသ္မာ ဒဗ္ဗော မလ္လပုတ္တော သာယနှသမယံ ပဋိသလ္လာနာ ဝုဋ္ဌိတော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဒဗ္ဗော မလ္လပုတ္တော ဘဂဝန္တံ ဧတဒဝေါစ – ‘‘ဣဓ မယှံ, ဘန္တေ, ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ မယာ ခေါ ဇာတိယာ သတ္တဝဿေန အရဟတ္တံ သစ္ဆိကတံ, ယံ ကိဉ္စိ သာဝကေန ပတ္တဗ္ဗံ, သဗ္ဗံ မယာ အနုပတ္တံ, နတ္ထိ စ မေ ကိဉ္စိ ဥတ္တရိ ကရဏီယံ, ကတဿ ဝါ ပတိစယော, ကိံ နု ခေါ အဟံ သံဃဿ ဝေယျာဝစ္စံ ကရေယျ’’န္တိ။ တဿ မယှံ ဘန္တေ, ဧတဒဟောသိ ယံနူနာဟံ ‘‘သံဃဿ သေနာသနဉ္စ ပညပေယျံ ဘတ္တာနိ စ ဥဒ္ဒိသေယျန္တိ။ ဣစ္ဆာမဟံ, ဘန္တေ, သံဃဿ သေနာသနဉ္စ ပညပေတုံ ဘတ္တာနိ စ ဥဒ္ဒိသိတု’’န္တိ။ ‘‘သာဓု သာဓု, ဒဗ္ဗ။ တေန ဟိ တွံ, ဒဗ္ဗ, သံဃဿ သေနာသနဉ္စ ပညပေဟိ ဘတ္တာနိ စ ဥဒ္ဒိသာ’’တိ။ ‘‘ဧဝံ, ဘန္တေ’’တိ ခေါ အာယသ္မာ ဒဗ္ဗော မလ္လပုတ္တော ဘဂဝတော ပစ္စဿောသိ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, သံဃော ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နတု။ ဧဝဉ္စ ပန, ဘိက္ခဝေ, သမ္မန္နိတဗ္ဗော။ ပဌမံ ဒဗ္ဗော မလ္လပုတ္တော ယာစိတဗ္ဗော။ ယာစိတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၈၁. ‘‘သုဏာတု မေ, ဘန္တေ, သံဃော။ ယဒိ သံဃဿ ပတ္တကလ္လံ သံဃော အာယသ္မန္တံ ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နေယျ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ သံဃော အာယသ္မန္တံ ဒဗ္ဗံ မလ္လပုတ္တံ သေနာသနပညာပကဉ္စ ဘတ္တုဒ္ဒေသကဉ္စ သမ္မန္နတိ။ ယဿာယသ္မတော ခမတိ အာယသ္မတော ဒဗ္ဗဿ မလ္လပုတ္တဿ သေနာသနပညာပကဿ စ ဘတ္တုဒ္ဒေသကဿ စ သမ္မုတိ, သော တုဏှဿ; ယဿ နက္ခမတိ, သော ဘာသေယျ။

‘‘သမ္မတော သံဃေန အာယသ္မာ ဒဗ္ဗော မလ္လပုတ္တော သေနာသနပညာပကော စ ဘတ္တုဒ္ဒေသကော စ။ ခမတိ သံဃဿ, တသ္မာ တုဏှီ , ဧဝမေတံ ဓါရယာမီ’’တိ။

၃၈၂. သမ္မတော စ ပနာယသ္မာ ဒဗ္ဗော မလ္လပုတ္တော သဘာဂါနံ ဘိက္ခူနံ ဧကဇ္ဈံ သေနာသနံ ပညပေတိ။ ယေ တေ ဘိက္ခူ သုတ္တန္တိကာ တေသံ ဧကဇ္ဈံ သေနာသနံ ပညပေတိ – ‘‘တေ အညမညံ သုတ္တန္တံ သင်္ဂါယိဿန္တီ’’တိ။ ယေ တေ ဘိက္ခူ ဝိနယဓရာ တေသံ ဧကဇ္ဈံ သေနာသနံ ပညပေတိ – ‘‘တေ အညမညံ ဝိနယံ ဝိနိစ္ဆိနိဿန္တီ’’တိ [ဝိနိစ္ဆိဿန္တီတိ (က.)]။ ယေ တေ ဘိက္ခူ ဓမ္မကထိကာ တေသံ ဧကဇ္ဈံ သေနာသနံ ပညပေတိ – ‘‘တေ အညမညံ ဓမ္မံ သာကစ္ဆိဿန္တီ’’တိ။ ယေ တေ ဘိက္ခူ ဈာယိနော တေသံ ဧကဇ္ဈံ သေနာသနံ ပညပေတိ – ‘‘တေ အညမညံ န ဗျာဗာဓိဿန္တီ’’တိ [န ဗျာဗာဟိဿန္တီတိ (က.)]။ ယေ တေ ဘိက္ခူ တိရစ္ဆာနကထိကာ ကာယဒဠှိဗဟုလာ [ကာယဒဍ္ဎိဗဟုလာ (သီ.)] ဝိဟရန္တိ တေသမ္ပိ ဧကဇ္ဈံ သေနာသနံ ပညပေတိ – ‘‘ဣမာယပိမေ အာယသ္မန္တော ရတိယာ အစ္ဆိဿန္တီ’’တိ။ ယေပိ တေ ဘိက္ခူ ဝိကာလေ အာဂစ္ဆန္တိ တေသမ္ပိ တေဇောဓါတုံ သမာပဇ္ဇိတွာ တေနေဝ အာလောကေန သေနာသနံ ပညပေတိ။ အပိသု ဘိက္ခူ သဉ္စိစ္စ ဝိကာလေ အာဂစ္ဆန္တိ – ‘‘မယံ အာယသ္မတော ဒဗ္ဗဿ မလ္လပုတ္တဿ ဣဒ္ဓိပါဋိဟာရိယံ ပဿိဿာမာ’’တိ။

တေ အာယသ္မန္တံ ဒဗ္ဗံ မလ္လပုတ္တံ ဥပသင်္ကမိတွာ ဧဝံ ဝဒန္တိ – ‘‘အမှာကံ, အာဝုသော ဒဗ္ဗ, သေနာသနံ ပညပေဟီ’’တိ။ တေ အာယသ္မာ ဒဗ္ဗော မလ္လပုတ္တော ဧဝံ ဝဒေတိ – ‘‘ကတ္ထာယသ္မန္တာ ဣစ္ဆန္တိ, ကတ္ထ ပညပေမီ’’တိ? တေ သဉ္စိစ္စ ဒူရေ အပဒိသန္တိ – ‘‘အမှာကံ, အာဝုသော ဒဗ္ဗ, ဂိဇ္ဈကူဋေ ပဗ္ဗတေ သေနာသနံ ပညပေဟိ။ အမှာကံ, အာဝုသော, စောရပပါတေ သေနာသနံ ပညပေဟိ။ အမှာကံ, အာဝုသော, ဣသိဂိလိပဿေ ကာဠသိလာယံ သေနာသနံ ပညပေဟိ။ အမှာကံ, အာဝုသော, ဝေဘာရပဿေ သတ္တပဏ္ဏိဂုဟာယံ သေနာသနံ ပညပေဟိ။ အမှာကံ, အာဝုသော, သီတဝနေ သပ္ပသောဏ္ဍိကပဗ္ဘာရေ သေနာသနံ ပညပေဟိ။ အမှာကံ, အာဝုသော, ဂေါတမကကန္ဒရာယံ သေနာသနံ ပညပေဟိ။ အမှာကံ, အာဝုသော, တိန္ဒုကကန္ဒရာယံ သေနာသနံ ပညပေဟိ။ အမှာကံ, အာဝုသော, တပေါဒကန္ဒရာယံ သေနာသနံ ပညပေဟိ။ အမှာကံ, အာဝုသော, တပေါဒါရာမေ သေနာသနံ ပညပေဟိ။ အမှာကံ, အာဝုသော, ဇီဝကမ္ဗဝနေ သေနာသနံ ပညပေဟိ။ အမှာကံ, အာဝုသော, မဒ္ဒကုစ္ဆိသ္မိံ မိဂဒါယေ သေနာသနံ ပညပေဟီ’’တိ။

တေသံ အာယသ္မာ ဒဗ္ဗော မလ္လပုတ္တော တေဇောဓါတုံ သမာပဇ္ဇိတွာ အင်္ဂုလိယာ ဇလမာနာယ ပုရတော ပုရတော ဂစ္ဆတိ။ တေပိ တေနေဝ အာလောကေန အာယသ္မတော ဒဗ္ဗဿ မလ္လပုတ္တဿ ပိဋ္ဌိတော ပိဋ္ဌိတော ဂစ္ဆန္တိ။ တေသံ အာယသ္မာ ဒဗ္ဗော မလ္လပုတ္တော ဧဝံ သေနာသနံ ပညပေတိ – ‘‘အယံ မဉ္စော, ဣဒံ ဣဌံ, အယံ ဘိသိ, ဣဒံ ဗိမ္ဗောဟနံ, ဣဒံ ဝစ္စဋ္ဌာနံ, ဣဒံ ပဿာဝဋ္ဌာနံ , ဣဒံ ပါနီယံ, ဣဒံ ပရိဘောဇနီယံ, အယံ ကတ္တရဒဏ္ဍော, ဣဒံ သံဃဿ ကတိကသဏ္ဌာနံ, ဣမံ ကာလံ ပဝိသိတဗ္ဗံ, ဣမံ ကာလံ နိက္ခမိတဗ္ဗ’’န္တိ။ တေသံ အာယသ္မာ ဒဗ္ဗော မလ္လပုတ္တော ဧဝံ သေနာသနံ ပညပေတွာ ပုနဒေဝ ဝေဠုဝနံ ပစ္စာဂစ္ဆတိ။

၃၈၃. တေန ခေါ ပန သမယေန မေတ္တိယဘူမဇကာ [ဘုမ္မဇကာ (သီ. သျာ.)] ဘိက္ခူ နဝကာ စေဝ ဟောန္တိ အပ္ပပုညာ စ။ ယာနိ သံဃဿ လာမကာနိ သေနာသနာနိ တာနိ တေသံ ပါပုဏန္တိ လာမကာနိ စ ဘတ္တာနိ။ တေန ခေါ ပန သမယေန ရာဇဂဟေ မနုဿာ ဣစ္ဆန္တိ ထေရာနံ ဘိက္ခူနံ အဘိသင်္ခါရိကံ ပိဏ္ဍပါတံ ဒါတုံ သပ္ပိမ္ပိ တေလမ္ပိ ဥတ္တရိဘင်္ဂမ္ပိ။ မေတ္တိယဘူမဇကာနံ ပန ဘိက္ခူနံ ပါကတိကံ ဒေန္တိ ယထာရန္ဓံ ကဏာဇကံ ဗိလင်္ဂဒုတိယံ။ တေ ပစ္ဆာဘတ္တံ ပိဏ္ဍပါတပ္ပဋိက္ကန္တာ ထေရေ ဘိက္ခူ ပုစ္ဆန္တိ – ‘‘တုမှာကံ, အာဝုသော, ဘတ္တဂ္ဂေ ကိံ အဟောသိ? တုမှာကံ, အာဝုသော, ဘတ္တဂ္ဂေ ကိံ အဟောသီ’’တိ? ဧကစ္စေ ထေရာ ဧဝံ ဝဒန္တိ – ‘‘အမှာကံ, အာဝုသော, သပ္ပိ အဟောသိ တေလံ အဟောသိ ဥတ္တရိဘင်္ဂံ အဟောသီ’’တိ။ မေတ္တိယဘူမဇကာ ပန ဘိက္ခူ ဧဝံ ဝဒန္တိ – ‘‘အမှာကံ, အာဝုသော, န ကိဉ္စိ အဟောသိ, ပါကတိကံ ယထာရန္ဓံ ကဏာဇကံ ဗိလင်္ဂဒုတိယ’’န္တိ။

တေန ခေါ ပန သမယေန ကလျာဏဘတ္တိကော ဂဟပတိ သံဃဿ စတုက္ကဘတ္တံ ဒေတိ နိစ္စဘတ္တံ။ သော ဘတ္တဂ္ဂေ သပုတ္တဒါရော ဥပတိဋ္ဌိတွာ ပရိဝိသတိ ။ အညေ ဩဒနေန ပုစ္ဆန္တိ, အညေ သူပေန ပုစ္ဆန္တိ, အညေ တေလေန ပုစ္ဆန္တိ, အညေ ဥတ္တရိဘင်္ဂေန ပုစ္ဆန္တိ။ တေန ခေါ ပန သမယေန ကလျာဏဘတ္တိကဿ ဂဟပတိနော ဘတ္တံ သွာတနာယ မေတ္တိယဘူမဇကာနံ ဘိက္ခူနံ ဥဒ္ဒိဋ္ဌံ ဟောတိ။ အထ ခေါ ကလျာဏဘတ္တိကော ဂဟပတိ အာရာမံ အဂမာသိ ကေနစိဒေဝ ကရဏီယေန။ သော ယေနာယသ္မာ ဒဗ္ဗော မလ္လပုတ္တော တေနုပသင်္ကမိ; ဥပသင်္ကမိတွာ အာယသ္မန္တံ ဒဗ္ဗံ မလ္လပုတ္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နံ ခေါ ကလျာဏဘတ္တိကံ ဂဟပတိံ အာယသ္မာ ဒဗ္ဗော မလ္လပုတ္တော ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ။ အထ ခေါ ကလျာဏဘတ္တိကော ဂဟပတိ အာယသ္မတာ ဒဗ္ဗေန မလ္လပုတ္တေန ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘ကဿ, ဘန္တေ, အမှာကံ ဃရေ သွာတနာယ ဘတ္တံ ဥဒ္ဒိဋ္ဌ’’န္တိ? ‘‘မေတ္တိယဘူမဇကာနံ ခေါ, ဂဟပတိ, ဘိက္ခူနံ တုမှာကံ ဃရေ သွာတနာယ ဘတ္တံ ဥဒ္ဒိဋ္ဌ’’န္တိ။ အထ ခေါ ကလျာဏဘတ္တိကော ဂဟပတိ အနတ္တမနော အဟောသိ – ‘‘ကထဉှိ နာမ ပါပဘိက္ခူ အမှာကံ ဃရေ ဘုဉ္ဇိဿန္တီ’’တိ! ဃရံ ဂန္တွာ ဒါသိံ အာဏာပေသိ – ‘‘ယေ, ဇေ, သွေ ဘတ္တိကာ အာဂစ္ဆန္တိ တေ ကောဋ္ဌကေ အာသနံ ပညပေတွာ ကဏာဇကေန ဗိလင်္ဂဒုတိယေန ပရိဝိသာ’’တိ။ ‘‘ဧဝံ အယျာ’’တိ ခေါ သာ ဒါသီ ကလျာဏဘတ္တိကဿ ဂဟပတိနော ပစ္စဿောသိ။

အထ ခေါ မေတ္တိယဘူမဇကာ ဘိက္ခူ – ‘‘ဟိယျော ခေါ, အာဝုသော, အမှာကံ ကလျာဏဘတ္တိကဿ ဂဟပတိနော ဃရေ ဘတ္တံ ဥဒ္ဒိဋ္ဌံ, သွေ အမှေ ကလျာဏဘတ္တိကော ဂဟပတိ သပုတ္တဒါရော ဥပတိဋ္ဌိတွာ ပရိဝိသိဿတိ; အညေ ဩဒနေန ပုစ္ဆိဿန္တိ, အညေ သူပေန ပုစ္ဆိဿန္တိ, အညေ တေလေန ပုစ္ဆိဿန္တိ, အညေ ဥတ္တရိဘင်္ဂေန ပုစ္ဆိဿန္တီ’’တိ။ တေ တေနေဝ သောမနဿေန န စိတ္တရူပံ ရတ္တိယာ သုပိံသု။ အထ ခေါ မေတ္တိယဘူမဇကာ ဘိက္ခူ ပုဗ္ဗဏှသမယံ နိဝါသေတွာ ပတ္တစီဝရံ အာဒါယ ယေန ကလျာဏဘတ္တိကဿ ဂဟပတိနော နိဝေသနံ တေနုပသင်္ကမိံသု။ အဒ္ဒသာ ခေါ သာ ဒါသီ မေတ္တိယဘူမဇကေ ဘိက္ခူ ဒူရတောဝ အာဂစ္ဆန္တေ။ ဒိသွာန ကောဋ္ဌကေ အာသနံ ပညပေတွာ မေတ္တိယဘူမဇကေ ဘိက္ခူ ဧတဒဝေါစ – ‘‘နိသီဒထ, ဘန္တေ’’တိ။ အထ ခေါ မေတ္တိယဘူမဇကာနံ ဘိက္ခူနံ ဧတဒဟောသိ – ‘‘နိဿံသယံ ခေါ န တာဝ ဘတ္တံ သိဒ္ဓံ ဘဝိဿတိ! ယထာ [ယာဝ (သီ.)] မယံ ကောဋ္ဌကေ နိသီဒေယျာမာ’’တိ [နိသီဒါဣယေယျာမာတိ (သီ.), နိသီဒါဣယာမာတိ (သျာ.)]။ အထ ခေါ သာ ဒါသီ ကဏာဇကေန ဗိလင်္ဂဒုတိယေန ဥပဂစ္ဆိ – ‘‘ဘုဉ္ဇထ, ဘန္တေ’’တိ။ ‘‘မယံ ခေါ, ဘဂိနိ, နိစ္စဘတ္တိကာ’’တိ။ ‘‘ဇာနာမိ အယျာ နိစ္စဘတ္တိကာတ္ထ။ အပိစာဟံ ဟိယျောဝ ဂဟပတိနာ အာဏတ္တာ – ‘ယေ, ဇေ, သွေ ဘတ္တိကာ အာဂစ္ဆန္တိ တေ ကောဋ္ဌကေ အာသနံ ပညပေတွာ ကဏာဇကေန ဗိလင်္ဂဒုတိယေန ပရိဝိသာ’တိ။ ဘုဉ္ဇထ, ဘန္တေ’’တိ။ အထ ခေါ မေတ္တိယဘူမဇကာ ဘိက္ခူ – ‘‘ဟိယျော ခေါ, အာဝုသော, ကလျာဏဘတ္တိကော ဂဟပတိ အာရာမံ အဂမာသိ ဒဗ္ဗဿ မလ္လပုတ္တဿ သန္တိကေ။ နိဿံသယံ ခေါ မယံ ဒဗ္ဗေန မလ္လပုတ္တေန ဂဟပတိနော အန္တရေ [သန္တိကေ (သျာ. ကံ. က.)] ပရိဘိန္နာ’’တိ။ တေ တေနေဝ ဒေါမနဿေန န စိတ္တရူပံ ဘုဉ္ဇိံသု။ အထ ခေါ မေတ္တိယဘူမဇကာ ဘိက္ခူ ပစ္ဆာဘတ္တံ ပိဏ္ဍပါတပ္ပဋိက္ကန္တာ အာရာမံ ဂန္တွာ ပတ္တစီဝရံ ပဋိသာမေတွာ ဗဟာရာမကောဋ္ဌကေ သံဃာဋိပလ္လတ္ထိကာယ နိသီဒိံသု တုဏှီဘူတာ မင်္ကုဘူတာ ပတ္တက္ခန္ဓါ အဓေါမုခါ ပဇ္ဈာယန္တာ အပ္ပဋိဘာနာ။

အထ ခေါ မေတ္တိယာ ဘိက္ခုနီ ယေန မေတ္တိယဘူမဇကာ ဘိက္ခူ တေနုပသင်္ကမိ; ဥပသင်္ကမိတွာ မေတ္တိယဘူမဇကေ ဘိက္ခူ ဧတဒဝေါစ – ‘‘ဝန္ဒါမိ, အယျာ’’တိ။ ဧဝံ ဝုတ္တေ မေတ္တိယဘူမဇကာ ဘိက္ခူ နာလပိံသု။ ဒုတိယမ္ပိ ခေါ။ပေ.။ တတိယမ္ပိ ခေါ မေတ္တိယာ ဘိက္ခုနီ မေတ္တိယဘူမဇကေ ဘိက္ခူ ဧတဒဝေါစ – ‘‘ဝန္ဒါမိ, အယျာ’’တိ။ တတိယမ္ပိ ခေါ မေတ္တိယဘူမဇကာ ဘိက္ခူ နာလပိံသု။ ‘‘ကျာဟံ အယျာနံ အပရဇ္ဈာမိ? ကိဿ မံ အယျာ နာလပန္တီ’’တိ? ‘‘တထာ ဟိ ပန တွံ, ဘဂိနိ, အမှေ ဒဗ္ဗေန မလ္လပုတ္တေန ဝိဟေဌီယမာနေ အဇ္ဈုပေက္ခသီ’’တိ? ‘‘ကျာဟံ, အယျာ, ကရောမီ’’တိ? ‘‘သစေ ခေါ တွံ, ဘဂိနိ, ဣစ္ဆေယျာသိ အဇ္ဇေဝ ဘဂဝါ ဒဗ္ဗံ မလ္လပုတ္တံ နာသာပေယျာ’’တိ။ ‘‘ကျာဟံ, အယျာ, ကရောမိ, ကိံ မယာ သက္ကာ ကာတု’’န္တိ? ‘‘ဧဟိ တွံ, ဘဂိနိ, ယေန ဘဂဝါ တေနုပသင်္ကမ; ဥပသင်္ကမိတွာ ဘဂဝန္တံ ဧဝံ ဝဒေဟိ – ‘ဣဒံ, ဘန္တေ, နစ္ဆန္နံ နပ္ပတိရူပံ။ ယာယံ, ဘန္တေ, ဒိသာ အဘယာ အနီတိကာ အနုပဒ္ဒဝါ သာယံ ဒိသာ သဘယာ သဤတိကာ သဥပဒ္ဒဝါ။ ယတော နိဝါတံ တတော သဝါတံ [ပဝါတံ (သီ. သျာ.)]။ ဥဒကံ မညေ အာဒိတ္တံ။ အယျေနမှိ ဒဗ္ဗေန မလ္လပုတ္တေန ဒူသိတာ’’’တိ။ ‘‘ဧဝံ, အယျာ’’တိ ခေါ မေတ္တိယာ ဘိက္ခုနီ မေတ္တိယဘူမဇကာနံ ဘိက္ခူနံ ပဋိဿုတွာ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ အဋ္ဌာသိ။ ဧကမန္တံ ဌိတာ ခေါ မေတ္တိယာ ဘိက္ခုနီ ဘဂဝန္တံ ဧတဒဝေါစ – ‘‘ဣဒံ, ဘန္တေ, နစ္ဆန္နံ နပ္ပတိရူပံ။ ယာယံ, ဘန္တေ, ဒိသာ အဘယာ အနီတိကာ အနုပဒ္ဒဝါ သာယံ ဒိသာ သဘယာ သဤတိကာ သဥပဒ္ဒဝါ။ ယတော နိဝါတံ တတော သဝါတံ။ ဥဒကံ မညေ အာဒိတ္တံ! အယျေနမှိ ဒဗ္ဗေန မလ္လပုတ္တေန ဒူသိတာ’’တိ။

၃၈၄. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဒဗ္ဗံ မလ္လပုတ္တံ ပဋိပုစ္ဆိ – ‘‘သရသိ တွံ, ဒဗ္ဗ, ဧဝရူပံ ကတ္တာ ယထာယံ ဘိက္ခုနီ အာဟာ’’တိ? ‘‘ယထာ မံ, ဘန္တေ, ဘဂဝါ ဇာနာတီ’’တိ။ ဒုတိယမ္ပိ ခေါ ဘဂဝါ။ပေ.။ တတိယမ္ပိ ခေါ ဘဂဝါ အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘သရသိ တွံ, ဒဗ္ဗ, ဧဝရူပံ ကတ္တာ ယထာယံ ဘိက္ခုနီ အာဟာ’’တိ? ‘‘ယထာ မံ, ဘန္တေ, ဘဂဝါ ဇာနာတီ’’တိ။ ‘‘န ခေါ, ဒဗ္ဗ, ဒဗ္ဗာ ဧဝံ နိဗ္ဗေဌေန္တိ။ သစေ တယာ ကတံ ကတန္တိ ဝဒေဟိ, သစေ တယာ အကတံ အကတန္တိ ဝဒေဟီ’’တိ။ ‘‘ယတော အဟံ, ဘန္တေ, ဇာတော နာဘိဇာနာမိ သုပိနန္တေနပိ မေထုနံ ဓမ္မံ ပဋိသေဝိတာ, ပဂေဝ ဇာဂရော’’တိ! အထ ခေါ ဘဂဝါ ဘိက္ခူ အာမန္တေသိ – ‘‘တေန ဟိ, ဘိက္ခဝေ, မေတ္တိယံ ဘိက္ခုနိံ နာသေထ ။ ဣမေ စ ဘိက္ခူ အနုယုဉ္ဇထာ’’တိ။ ဣဒံ ဝတွာ ဘဂဝါ ဥဋ္ဌာယာသနာ ဝိဟာရံ ပါဝိသိ။

အထ ခေါ တေ ဘိက္ခူ မေတ္တိယံ ဘိက္ခုနိံ နာသေသုံ။ အထ ခေါ မေတ္တိယဘူမဇကာ ဘိက္ခူ တေ ဘိက္ခူ ဧတဒဝေါစုံ – ‘‘မာဝုသော, မေတ္တိယံ ဘိက္ခုနိံ နာသေထ။ န သာ ကိဉ္စိ အပရဇ္ဈတိ။ အမှေဟိ သာ ဥဿာဟိတာ ကုပိတေဟိ အနတ္တမနေဟိ စာဝနာဓိပ္ပါယေဟီ’’တိ။ ‘‘ကိံ ပန တုမှေ, အာဝုသော, အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေထာ’’တိ? ‘‘ဧဝမာဝုသော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေဿန္တီ’’တိ! အထ ခေါ တေ ဘိက္ခူ မေတ္တိယဘူမဇကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမှေ, ဘိက္ခဝေ, ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေထာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တုမှေ, မောဃပုရိသာ, ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၃၈၅. ယော ပန ဘိက္ခု ဘိက္ခုံ ဒုဋ္ဌော ဒေါသော အပ္ပတီတော အမူလကေန ပါရာဇိကေန ဓမ္မေန အနုဒ္ဓံသေယျ – ‘အပ္ပေဝ နာမ နံ ဣမမှာ ဗြဟ္မစရိယာ စာဝေယျ’န္တိ, တတော အပရေန သမယေန သမနုဂ္ဂါဟီယမာနော ဝါ အသမနုဂ္ဂါဟီယမာနော ဝါ အမူလကဉ္စေဝ တံ အဓိကရဏံ ဟောတိ ဘိက္ခု စ ဒေါသံ ပတိဋ္ဌာတိ, သံဃာဒိသေသော’’တိ။

၃၈၆. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဘိက္ခုန္တိ အညံ ဘိက္ခုံ။

ဒုဋ္ဌော ဒေါသောတိ ကုပိတော အနတ္တမနော အနဘိရဒ္ဓေါ အာဟတစိတ္တော ခိလဇာတော။

အပ္ပတီတောတိ တေန စ ကောပေန တေန စ ဒေါသေန တာယ စ အနတ္တမနတာယ တာယ စ အနဘိရဒ္ဓိယာ အပ္ပတီတော ဟောတိ။

အမူလကံ နာမ အဒိဋ္ဌံ အသုတံ အပရိသင်္ကိတံ။

ပါရာဇိကေန ဓမ္မေနာတိ စတုန္နံ အညတရေန။

အနုဒ္ဓံသေယျာတိ စောဒေတိ ဝါ စောဒါပေတိ ဝါ။

အပ္ပေဝ နာမ နံ ဣမမှာ ဗြဟ္မစရိယာ စာဝေယျန္တိ ဘိက္ခုဘာဝါ စာဝေယျံ, သမဏဓမ္မာ စာဝေယျံ, သီလက္ခန္ဓါ စာဝေယျံ, တပေါဂုဏာ စာဝေယျံ။

တတော အပရေန သမယေနာတိ ယသ္မိံ ခဏေ အနုဒ္ဓံသိတော ဟောတိ တံ ခဏံ တံ လယံ တံ မုဟုတ္တံ ဝီတိဝတ္တေ။

သမနုဂ္ဂါဟီယမာနောတိ ယေန ဝတ္ထုနာ အနုဒ္ဓံသိတော ဟောတိ တသ္မိံ ဝတ္ထုသ္မိံ သမနုဂ္ဂါဟီယမာနော။

အသမနုဂ္ဂါဟီယမာနောတိ န ကေနစိ ဝုစ္စမာနော။

အဓိကရဏံ နာမ စတ္တာရိ အဓိကရဏာနိ – ဝိဝါဒါဓိကရဏံ, အနုဝါဒါဓိကရဏံ, အာပတ္တာဓိကရဏံ, ကိစ္စာဓိကရဏံ။

ဘိက္ခု စ ဒေါသံ ပတိဋ္ဌာတီတိ တုစ္ဆကံ မယာ ဘဏိတံ, မုသာ မယာ ဘဏိတံ, အဘူတံ မယာ ဘဏိတံ, အဇာနန္တေန မယာ ဘဏိတံ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၃၈၇. အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘ဒိဋ္ဌော မယာ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

အသုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘သုတော မယာ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

အပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘ပရိသင်္ကိတော မယာ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘ဒိဋ္ဌော မယာ သုတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘ဒိဋ္ဌော မယာ ပရိသင်္ကိတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘ဒိဋ္ဌော မယာ သုတော စ ပရိသင်္ကိတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

အသုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘သုတော မယာ ပရိသင်္ကိတော စ။ပေ.။ သုတော မယာ ဒိဋ္ဌော စ။ပေ.။ သုတော မယာ ပရိသင်္ကိတော စ ဒိဋ္ဌော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

အပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘ပရိသင်္ကိတော မယာ ဒိဋ္ဌော စ။ပေ.။ ပရိသင်္ကိတော မယာ သုတော စ။ပေ.။ ပရိသင်္ကိတော မယာ ဒိဋ္ဌော စ သုတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘သုတော မယာ ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒေတိ – ‘‘ပရိသင်္ကိတော မယာ, ပါရာဇိကံ ဓမ္မံ အဇ္ဈာပန္နောသိ’’။ပေ.။ ‘‘သုတော မယာ ပရိသင်္ကိတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

သုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘ပရိသင်္ကိတော မယာ, ပါရာဇိကံ ဓမ္မံ အဇ္ဈာပန္နောသိ။ပေ.။ ဒိဋ္ဌော မယာ, ပါရာဇိကံ ဓမ္မံ အဇ္ဈာပန္နောသိ။ပေ.။ ပရိသင်္ကိတော မယာ ဒိဋ္ဌော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒေတိ – ‘‘ဒိဋ္ဌော မယာ, ပါရာဇိကံ ဓမ္မံ အဇ္ဈာပန္နောသိ။ပေ.။ သုတော မယာ, ပါရာဇိကံ ဓမ္မံ အဇ္ဈာပန္နောသိ။ပေ.။ ဒိဋ္ဌော မယာ သုတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ ဒိဋ္ဌေ ဝေမတိကော ဒိဋ္ဌံ နော ကပ္ပေတိ ဒိဋ္ဌံ နဿရတိ ဒိဋ္ဌံ ပမုဋ္ဌော ဟောတိ။ပေ.။ သုတေ ဝေမတိကော သုတံ နော ကပ္ပေတိ သုတံ နဿရတိ သုတံ ပမုဋ္ဌော ဟောတိ။ပေ.။ ပရိသင်္ကိတေ ဝေမတိကော ပရိသင်္ကိတံ နော ကပ္ပေတိ ပရိသင်္ကိတံ နဿရတိ ပရိသင်္ကိတံ ပမုဋ္ဌော ဟောတိ။ တဉ္စေ စောဒေတိ – ‘‘ပရိသင်္ကိတော မယာ ဒိဋ္ဌော စ။ပေ.။ ပရိသင်္ကိတော မယာ သုတော စ။ပေ.။ ပရိသင်္ကိတော မယာ ဒိဋ္ဌော စ သုတော စ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

၃၈၈. အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒါပေတိ – ‘‘ဒိဋ္ဌောသိ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

အသုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ပေ.။ အပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒါပေတိ – ‘‘ပရိသင်္ကိတောသိ, ပါရာဇိကံ ဓမ္မံ အဇ္ဈာပန္နောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

အဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒါပေတိ – ‘‘ဒိဋ္ဌောသိ သုတောသိ။ပေ.။ ဒိဋ္ဌောသိ ပရိသင်္ကိတောသိ။ပေ.။ ဒိဋ္ဌောသိ သုတောသိ ပရိသင်္ကိတောသိ, ပါရာဇိကံ ဓမ္မံ အဇ္ဈာပန္နောသိ’’။ပေ.။ အသုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ပေ.။ အပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ စောဒါပေတိ – ‘‘ပရိသင်္ကိတောသိ, ဒိဋ္ဌောသိ။ပေ.။ ပရိသင်္ကိတောသိ, သုတောသိ။ပေ.။ ပရိသင်္ကိတောသိ, ဒိဋ္ဌောသိ, သုတောသိ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ တဉ္စေ စောဒါပေတိ – ‘‘သုတောသိ’’။ပေ.။ တဉ္စေ စောဒါပေတိ – ‘‘ပရိသင်္ကိတောသိ’’။ပေ.။ တဉ္စေ စောဒါပေတိ – ‘‘သုတောသိ, ပရိသင်္ကိတောသိ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

သုတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ပေ.။ ပရိသင်္ကိတဿ ဟောတိ – ‘‘ပါရာဇိကံ ဓမ္မံ အဇ္ဈာပန္နော’’တိ။ တဉ္စေ ‘‘ဒိဋ္ဌောသိ’’။ပေ.။ တဉ္စေ စောဒါပေတိ – ‘‘သုတောသိ’’။ပေ.။ တဉ္စေ စောဒါပေတိ – ‘‘ဒိဋ္ဌောသိ, သုတောသိ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

ဒိဋ္ဌဿ ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ ဒိဋ္ဌေ ဝေမတိကော ဒိဋ္ဌံ နော ကပ္ပေတိ ဒိဋ္ဌံ နဿရတိ ဒိဋ္ဌံ ပမုဋ္ဌော ဟောတိ။ပေ.။ သုတေ ဝေမတိကော သုတံ နော ကပ္ပေတိ သုတံ နဿရတိ သုတံ ပမုဋ္ဌော ဟောတိ။ပေ.။ ပရိသင်္ကိတေ ဝေမတိကော ပရိသင်္ကိတံ နော ကပ္ပေတိ ပရိသင်္ကိတံ နဿရတိ ပရိသင်္ကိတံ ပမုဋ္ဌော ဟောတိ။ တဉ္စေ စောဒါပေတိ – ‘‘ပရိသင်္ကိတောသိ, ဒိဋ္ဌောသိ’’။ပေ.။ ပရိသင်္ကိတံ ပမုဋ္ဌော ဟောတိ, တဉ္စေ စောဒါပေတိ – ‘‘ပရိသင်္ကိတောသိ သုတောသိ’’။ပေ.။ ပရိသင်္ကိတံ ပမုဋ္ဌော ဟောတိ, တဉ္စေ စောဒါပေတိ – ‘‘ပရိသင်္ကိတောသိ, ဒိဋ္ဌောသိ, သုတောသိ, ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

၃၈၉. အသုဒ္ဓေ သုဒ္ဓဒိဋ္ဌိ, သုဒ္ဓေ အသုဒ္ဓဒိဋ္ဌိ, အသုဒ္ဓေ အသုဒ္ဓဒိဋ္ဌိ, သုဒ္ဓေ သုဒ္ဓဒိဋ္ဌိ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ သုဒ္ဓဒိဋ္ဌိ သမာနော အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ သုဒ္ဓဒိဋ္ဌိ သမာနော ဩကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ သုဒ္ဓဒိဋ္ဌိ သမာနော အနောကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒေန ဒုက္ကဋဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ သုဒ္ဓဒိဋ္ဌိ သမာနော ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ ဒုက္ကဋဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော ဩကာသံ ကာရာပေတွာ စာဝနာဓိပ္ပါယော ဝဒေတိ, အနာပတ္တိ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော အနောကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒေန ဒုက္ကဋဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ ဒုက္ကဋဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော ဩကာသံ ကာရာပေတွာ စာဝနာဓိပ္ပါယော ဝဒေတိ, အနာပတ္တိ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော အနောကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒေန ဒုက္ကဋဿ။

အသုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အဇ္ဈာပန္နော။ တဉ္စေ အသုဒ္ဓဒိဋ္ဌိ သမာနော ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ သုဒ္ဓဒိဋ္ဌိ သမာနော အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ သုဒ္ဓဒိဋ္ဌိ သမာနော ဩကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော။ တဉ္စေ သုဒ္ဓဒိဋ္ဌိ သမာနော အနောကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒေန ဒုက္ကဋဿ။

သုဒ္ဓေါ ဟောတိ ပုဂ္ဂလော အညတရံ ပါရာဇိကံ ဓမ္မံ အနဇ္ဈာပန္နော တဉ္စေ သုဒ္ဓဒိဋ္ဌိ သမာနော ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

၃၉၀. အနာပတ္တိ သုဒ္ဓေ အသုဒ္ဓဒိဋ္ဌိဿ, အသုဒ္ဓေ အသုဒ္ဓဒိဋ္ဌိဿ, ဥမ္မတ္တကဿ, အာဒိကမ္မိကဿာတိ။

ဒုဋ္ဌဒေါသသိက္ခါပဒံ နိဋ္ဌိတံ အဋ္ဌမံ။

၉. ဒုတိယဒုဋ္ဌဒေါသသိက္ခါပဒံ

၃၉၁. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန မေတ္တိယဘူမဇကာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ အဒ္ဒသံသု ဆဂလကံ [ဆကလကံ (သျာ.)] အဇိကာယ ဝိပ္ပဋိပဇ္ဇန္တံ။ ဒိသွာန ဧဝမာဟံသု – ‘‘ဟန္ဒ မယံ, အာဝုသော, ဣမံ ဆဂလကံ ဒဗ္ဗံ မလ္လပုတ္တံ နာမ ကရောမ။ ဣမံ အဇိကံ မေတ္တိယံ နာမ ဘိက္ခုနိံ ကရောမ။ ဧဝံ မယံ ဝေါဟရိဿာမ။ ပုဗ္ဗေ မယံ, အာဝုသော, ဒဗ္ဗံ မလ္လပုတ္တံ သုတေန အဝေါစုမှာ။ ဣဒါနိ ပန အမှေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ။ တေ တံ ဆဂလကံ ဒဗ္ဗံ မလ္လပုတ္တံ နာမ အကံသု။ တံ အဇိကံ မေတ္တိယံ နာမ ဘိက္ခုနိံ အကံသု။ တေ ဘိက္ခူနံ အာရောစေသုံ – ‘‘ပုဗ္ဗေ မယံ, အာဝုသော, ဒဗ္ဗံ မလ္လပုတ္တံ သုတေန အဝေါစုမှာ။ ဣဒါနိ ပန အမှေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ။ ဘိက္ခူ ဧဝမာဟံသု – ‘‘မာဝုသော, ဧဝံ အဝစုတ္ထ။ နာယသ္မာ ဒဗ္ဗော မလ္လပုတ္တော ဧဝံ ကရိဿတီ’’တိ။

အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဒဗ္ဗံ မလ္လပုတ္တံ ပဋိပုစ္ဆိ – ‘‘သရသိ တွံ, ဒဗ္ဗ, ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ, ဘန္တေ, ဘဂဝါ ဇာနာတီ’’တိ။ ဒုတိယမ္ပိ ခေါ ဘဂဝါ။ပေ.။ တတိယမ္ပိ ခေါ ဘဂဝါ အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘သရသိ တွံ, ဒဗ္ဗ, ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ, ဘန္တေ, ဘဂဝါ ဇာနာတီ’’တိ။ ‘‘န ခေါ, ဒဗ္ဗ, ဒဗ္ဗာ ဧဝံ နိဗ္ဗေဌေန္တိ။ သစေ တယာ ကတံ ကတန္တိ ဝဒေဟိ, သစေ တယာ အကတံ အကတန္တိ ဝဒေဟီ’’တိ။ ‘‘ယတော အဟံ, ဘန္တေ, ဇာတော နာဘိဇာနာမိ သုပိနန္တေနပိ မေထုနဓမ္မံ ပဋိသေဝိတာ, ပဂေဝ ဇာဂရော’’တိ! အထ ခေါ ဘဂဝါ ဘိက္ခူ အာမန္တေသိ – ‘‘တေန ဟိ, ဘိက္ခုဝေ, ဣမေ ဘိက္ခူ အနုယုဉ္ဇထာ’’တိ။ ဣဒံ ဝတွာ ဘဂဝါ ဥဋ္ဌာယာသနာ ဝိဟာရံ ပါဝိသိ။

အထ ခေါ တေ ဘိက္ခူ မေတ္တိယဘူမဇကေ ဘိက္ခူ အနုယုဉ္ဇိံသု။ တေ ဘိက္ခူဟိ အနုယုဉ္ဇီယမာနာ ဘိက္ခူနံ ဧတမတ္ထံ အာရောစေသုံ – ‘‘ကိံ ပန တုမှေ, အာဝုသော, အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေထာ’’တိ? ‘‘ဧဝမာဝုသော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေဿန္တီ’’တိ! အထ ခေါ တေ ဘိက္ခူ မေတ္တိယဘူမဇကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမှေ, ဘိက္ခဝေ, ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေထာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တုမှေ, မောဃပုရိသာ, ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေဿထ! နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၃၉၂. ‘‘ယော ပန ဘိက္ခု ဘိက္ခုံ ဒုဋ္ဌော ဒေါသော အပ္ပတီတော အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေယျ – ‘အပ္ပေဝ နာမ နံ ဣမမှာ ဗြဟ္မစရိယာ စာဝေယျ’န္တိ။ တတော အပရေန သမယေန သမနုဂ္ဂါဟီယမာနော ဝါ အသမနုဂ္ဂါဟီယမာနော ဝါ အညဘာဂိယဉ္စေဝ တံ အဓိကရဏံ ဟောတိ ကောစိဒေသော လေသမတ္တော ဥပါဒိန္နော, ဘိက္ခု စ ဒေါသံ ပတိဋ္ဌာတိ, သံဃာဒိသေသော’’တိ။

၃၉၃. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

ဘိက္ခုန္တိ အညံ ဘိက္ခုံ။

ဒုဋ္ဌော ဒေါသောတိ ကုပိတော အနတ္တမနော အနဘိရဒ္ဓေါ အာဟတစိတ္တော ခိလဇာတော။

အပ္ပတီတောတိ တေန စ ကောပေန, တေန စ ဒေါသေန, တာယ စ အနတ္တမနတာယ, တာယ စ အနဘိရဒ္ဓိယာ အပ္ပတီတော ဟောတိ။

အညဘာဂိယဿ အဓိကရဏဿာတိ အာပတ္တညဘာဂိယံ ဝါ ဟောတိ အဓိကရဏညဘာဂိယံ ဝါ။ ကထံ အဓိကရဏံ အဓိကရဏဿ အညဘာဂိယံ? ဝိဝါဒါဓိကရဏံ အနုဝါဒါဓိကရဏဿ အာပတ္တာဓိကရဏဿ ကိစ္စာဓိကရဏဿ အညဘာဂိယံ။ အနုဝါဒါဓိကရဏံ အာပတ္တာဓိကရဏဿ ကိစ္စာဓိကရဏဿ ဝိဝါဒါဓိကရဏဿ အညဘာဂိယံ။ အာပတ္တာဓိကရဏံ ကိစ္စာဓိကရဏဿ ဝိဝါဒါဓိကရဏဿ အနုဝါဒါဓိကရဏဿ အညဘာဂိယံ။ ကိစ္စာဓိကရဏံ ဝိဝါဒါဓိကရဏဿ အနုဝါဒါဓိကရဏဿ အာပတ္တာဓိကရဏဿ အညဘာဂိယံ။ ဧဝံ အဓိကရဏံ အဓိကရဏဿ အညဘာဂိယံ။

ကထံ အဓိကရဏံ အဓိကရဏဿ တဗ္ဘာဂိယံ? ဝိဝါဒါဓိကရဏံ ဝိဝါဒါဓိကရဏဿ တဗ္ဘာဂိယံ။ အနုဝါဒါဓိကရဏံ အနုဝါဒါဓိကရဏဿ တဗ္ဘာဂိယံ။ အာပတ္တာဓိကရဏံ အာပတ္တာဓိကရဏဿ သိယာ တဗ္ဘာဂိယံ သိယာ အညဘာဂိယံ။

ကထံ အာပတ္တာဓိကရဏံ အာပတ္တာဓိကရဏဿ အညဘာဂိယံ? မေထုနဓမ္မပါရာဇိကာပတ္တိ အဒိန္နာဒါနပါရာဇိကာပတ္တိယာ မနုဿဝိဂ္ဂဟပါရာဇိကာပတ္တိယာ ဥတ္တရိမနုဿဓမ္မပါရာဇိကာပတ္တိယာ အညဘာဂိယာ။ အဒိန္နာဒါနပါရာဇိကာပတ္တိ မနုဿဝိဂ္ဂဟပါရာဇိကာပတ္တိယာ ဥတ္တရိမနုဿဓမ္မပါရာဇိကာပတ္တိယာ မေထုနဓမ္မပါရာဇိကာပတ္တိယာ အညဘာဂိယာ။ မနုဿဝိဂ္ဂဟပါရာဇိကာပတ္တိ ဥတ္တရိမနုဿဓမ္မပါရာဇိကာပတ္တိယာ မေထုနဓမ္မပါရာဇိကာပတ္တိယာ အဒိန္နာဒါနပါရာဇိကာပတ္တိယာ အညဘာဂိယာ။ ဥတ္တရိမနုဿဓမ္မပါရာဇိကာပတ္တိ မေထုနဓမ္မပါရာဇိကာပတ္တိယာ အဒိန္နာဒါနပါရာဇိကာပတ္တိယာ မနုဿဝိဂ္ဂဟပါရာဇိကာပတ္တိယာ အညဘာဂိယာ။ ဧဝံ အာပတ္တာဓိကရဏံ အာပတ္တာဓိကရဏဿ အညဘာဂိယံ။

ကထံ အာပတ္တာဓိကရဏံ အာပတ္တာဓိကရဏဿ တဗ္ဘာဂိယံ? မေထုနဓမ္မပါရာဇိကာပတ္တိ မေထုနဓမ္မပါရာဇိကာပတ္တိယာ တဗ္ဘာဂိယာ။ အဒိန္နာဒါနပါရာဇိကာပတ္တိ အဒိန္နာဒါနပါရာဇိကာပတ္တိယာ တဗ္ဘာဂိယာ။ မနုဿဝိဂ္ဂဟပါရာဇိကာပတ္တိ မနုဿဝိဂ္ဂဟပါရာဇိကာပတ္တိယာ တဗ္ဘာဂိယာ။ ဥတ္တရိမနုဿဓမ္မပါရာဇိကာပတ္တိ ဥတ္တရိမနုဿဓမ္မပါရာဇိကာပတ္တိယာ တဗ္ဘာဂိယာ။ ဧဝံ အာပတ္တာဓိကရဏံ အာပတ္တာဓိကရဏဿ တဗ္ဘာဂိယံ။

ကိစ္စာဓိကရဏံ ကိစ္စာဓိကရဏဿ တဗ္ဘာဂိယံ။ ဧဝံ အဓိကရဏံ အဓိကရဏဿ တဗ္ဘာဂိယံ။

၃၉၄. ကိဉ္စိ ဒေသံ လေသမတ္တံ ဥပါဒါယာတိ လေသော နာမ ဒသ လေသာ – ဇာတိလေသော , နာမလေသော, ဂေါတ္တလေသော, လိင်္ဂလေသော, အာပတ္တိလေသော, ပတ္တလေသော, စီဝရလေသော, ဥပဇ္ဈာယလေသော, အာစရိယလေသော, သေနာသနလေသော။

၃၉၅. ဇာတိလေသော နာမ ခတ္တိယော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ခတ္တိယံ ပဿိတွာ စောဒေတိ – ‘‘ခတ္တိယော မယာ ဒိဋ္ဌော [ဧတ္ထ ‘‘ပါရာဇိကံ ဓမ္မံ အဇ္ဈာပဇ္ဇန္တော’’တိ ပါဌော ဦနော မညေ, အဋ္ဌကထာယံ ဟိ ‘‘ခတ္တိယော မယာ ဒိဋ္ဌော ပါရာဇိကံ ဓမ္မံ အဇ္ဈာပဇ္ဇန္တော’’တိ ဒိဿတိ]။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

ဗြာဟ္မဏော ဒိဋ္ဌော ဟောတိ။ပေ.။ ဝေဿော ဒိဋ္ဌော ဟောတိ။ပေ.။ သုဒ္ဒေါ ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ သုဒ္ဒံ ပဿိတွာ စောဒေတိ – ‘‘သုဒ္ဒေါ မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ , အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၃၉၆. နာမလေသော နာမ ဗုဒ္ဓရက္ခိတော ဒိဋ္ဌော ဟောတိ။ပေ.။ ဓမ္မရက္ခိတော ဒိဋ္ဌော ဟောတိ။ပေ.။ သံဃရက္ခိတော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော ။ အညံ သံဃရက္ခိတံ ပဿိတွာ စောဒေတိ – ‘‘သံဃရက္ခိတော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၃၉၇. ဂေါတ္တလေသော နာမ ဂေါတမော ဒိဋ္ဌော ဟောတိ။ပေ.။ မောဂ္ဂလ္လာနော ဒိဋ္ဌော ဟောတိ။ပေ.။ ကစ္စာယနော ဒိဋ္ဌော ဟောတိ။ပေ.။ ဝါသိဋ္ဌော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဝါသိဋ္ဌံ ပဿိတွာ စောဒေတိ – ‘‘ဝါသိဋ္ဌော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၃၉၈. လိင်္ဂလေသော နာမ ဒီဃော ဒိဋ္ဌော ဟောတိ။ပေ.။ ရဿော ဒိဋ္ဌော ဟောတိ။ပေ.။ ကဏှော ဒိဋ္ဌော ဟောတိ။ပေ.။ ဩဒါတော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဩဒါတံ ပဿိတွာ စောဒေတိ – ‘‘ဩဒါတော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၃၉၉. အာပတ္တိလေသော နာမ လဟုကံ အာပတ္တိံ အာပဇ္ဇန္တော ဒိဋ္ဌော ဟောတိ။ တဉ္စေ ပါရာဇိကေန စောဒေတိ – ‘‘အဿမဏောသိ, အသကျပုတ္တိယောသိ။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၄၀၀. ပတ္တလေသော နာမ လောဟပတ္တဓရော ဒိဋ္ဌော ဟောတိ။ပေ.။ သာဋကပတ္တဓရော ဒိဋ္ဌော ဟောတိ။ပေ.။ သုမ္ဘကပတ္တဓရော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ သုမ္ဘကပတ္တဓရံ ပဿိတွာ စောဒေတိ – ‘‘သုမ္ဘကပတ္တဓရော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၄၀၁. စီဝရလေသော နာမ ပံသုကူလိကော ဒိဋ္ဌော ဟောတိ။ပေ.။ ဂဟပတိစီဝရဓရော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဂဟပတိစီဝရဓရံ ပဿိတွာ စောဒေတိ – ‘‘ဂဟပတိစီဝရဓရော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၄၀၂. ဥပဇ္ဈာယလေသော နာမ ဣတ္ထန္နာမဿ သဒ္ဓိဝိဟာရိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမဿ သဒ္ဓိဝိဟာရိကံ ပဿိတွာ စောဒေတိ – ‘‘ဣတ္ထန္နာမဿ သဒ္ဓိဝိဟာရိကော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၄၀၃. အာစရိယလေသော နာမ ဣတ္ထန္နာမဿ အန္တေဝါသိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမဿ အန္တေဝါသိကံ ပဿိတွာ စောဒေတိ – ‘‘ဣတ္ထန္နာမဿ အန္တေဝါသိကော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ’’။ပေ.။ အာပတ္တိ ဝါစာယ, ဝါစာယ သံဃာဒိသေသဿ။

၄၀၄. သေနာသနလေသော နာမ ဣတ္ထန္နာမသေနာသနဝါသိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော။ အညံ ဣတ္ထန္နာမသေနာသနဝါသိကံ ပဿိတွာ စောဒေတိ – ‘‘ဣတ္ထန္နာမသေနာသနဝါသိကော မယာ ဒိဋ္ဌော။ ပါရာဇိကံ ဓမ္မံ အဇ္ဈာပန္နောသိ, အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, အာပတ္တိ ဝါစာယ, ဝါစာယ သံဃာဒိသေသဿ။

၄၀၅. ပါရာဇိကေန ဓမ္မေနာတိ စတုန္နံ အညတရေန။

အနုဒ္ဓံသေယျာတိ စောဒေတိ ဝါ စောဒါပေတိ ဝါ။

အပ္ပေဝ နာမ နံ ဣမမှာ ဗြဟ္မစရိယာစာဝေယျန္တိ ဘိက္ခုဘာဝါ စာဝေယျံ, သမဏဓမ္မာ စာဝေယျံ, သီလက္ခန္ဓါ စာဝေယျံ, တပေါဂုဏာ စာဝေယျံ။

တတော အပရေန သမယေနာတိ ယသ္မိံ ခဏေ အနုဒ္ဓံသိတော ဟောတိ, တံ ခဏံ တံ လယံ တံ မုဟုတ္တံ ဝီတိဝတ္တေ။

သမနုဂ္ဂါဟီယမာနောတိ ယေန ဝတ္ထုနာ အနုဒ္ဓံသိတော ဟောတိ တသ္မိံ ဝတ္ထုသ္မိံ သမနုဂ္ဂါဟီယမာနော။

အသမနုဂ္ဂါဟီယမာနောတိ န ကေနစိ ဝုစ္စမာနော။

အဓိကရဏံ နာမ စတ္တာရိ အဓိကရဏာနိ – ဝိဝါဒါဓိကရဏံ, အနုဝါဒါဓိကရဏံ, အာပတ္တာဓိကရဏံ, ကိစ္စာဓိကရဏံ။

ကောစိ ဒေသော လေသမတ္တော ဥပါဒိန္နောတိ တေသံ ဒသန္နံ လေသာနံ အညတရော လေသော ဥပါဒိန္နော ဟောတိ။

ဘိက္ခု စ ဒေါသံ ပတိဋ္ဌာတီတိ တုစ္ဆကံ မယာ ဘဏိတံ, မုသာ မယာ ဘဏိတံ, အဘူတံ မယာ ဘဏိတံ, အဇာနန္တေန မယာ ဘဏိတံ။

သံဃာဒိသေသောတိ ။ပေ.။ တေနပိ ဝုစ္စတိ သံဃာဒိသေသောတိ။

၄၀၆. ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သံဃာဒိသေသေ သံဃာဒိသေသဒိဋ္ဌိ ဟောတိ။ တဉ္စေ ပါရာဇိကေန စောဒေတိ – ‘‘အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သံဃာဒိသေသေ ထုလ္လစ္စယဒိဋ္ဌိ ဟောတိ။ပေ.။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ တဉ္စေ ပါရာဇိကေန စောဒေတိ – ‘‘အဿမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ.။ ထုလ္လစ္စယေ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သံဃာဒိသေသဒိဋ္ဌိ ဟောတိ။ တဉ္စေ ပါရာဇိကေန စောဒေတိ – ‘‘အဿမဏောသိ’’ ။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု ပါစိတ္တိယံ။ပေ.။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ, ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ.။ ဒုဗ္ဘာသိတေ သံဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ တဉ္စေ ပါရာဇိကေန စောဒေတိ – ‘‘အဿမဏောသိ, အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဧကေကံ မူလံ ကာတုန စက္ကံ ဗန္ဓိတဗ္ဗံ။

၄၀၇. ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ သံဃာဒိသေသေ သံဃာဒိသေသဒိဋ္ဌိ ဟောတိ။ တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ, သံဃာဒိသေသေ ထုလ္လစ္စယဒိဋ္ဌိ ဟောတိ။ပေ.။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ.။ ထုလ္လစ္စယေ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သံဃာဒိသေသဒိဋ္ဌိ ဟောတိ။ တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ.။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

ဘိက္ခု ပါစိတ္တိယံ။ပေ.။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ.။ ဒုဗ္ဘာသိတေ သံဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ တဉ္စေ ပါရာဇိကေန စောဒါပေတိ – ‘‘အဿမဏောသိ , အသကျပုတ္တိယောသိ, နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ, ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော, အာပတ္တိ ဝါစာယ, ဝါစာယ သံဃာဒိသေသဿ။

၄၀၈. အနာပတ္တိ တထာသညီ စောဒေတိ ဝါ စောဒါပေတိ ဝါ, ဥမ္မတ္တကဿ, အာဒိကမ္မိကဿာတိ။

ဒုတိယဒုဋ္ဌဒေါသသိက္ခါပဒံ နိဋ္ဌိတံ နဝမံ။

၁၀. သံဃဘေဒသိက္ခါပဒံ

၄၀၉. [ဣဒံ ဝတ္ထု စူဠဝ. ၃၄၃] တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ အထ ခေါ ဒေဝဒတ္တော ယေန ကောကာလိကော ကဋမောဒကတိဿကော [ကဋမောရကတိဿကော (သီ. သျာ.)] ခဏ္ဍဒေဝိယာ ပုတ္တော သမုဒ္ဒဒတ္တော တေနုပသင်္ကမိ; ဥပသင်္ကမိတွာ ကောကာလိကံ ကဋမောဒကတိဿကံ ခဏ္ဍဒေဝိယာ ပုတ္တံ သမုဒ္ဒဒတ္တံ ဧတဒဝေါစ – ‘‘ဧထ မယံ, အာဝုသော, သမဏဿ ဂေါတမဿ သံဃဘေဒံ ကရိဿာမ စက္ကဘေဒ’’န္တိ။ ဧဝံ ဝုတ္တေ ကောကာလိကော ဒေဝဒတ္တံ ဧတဒဝေါစ – ‘‘သမဏော ခေါ, အာဝုသော, ဂေါတမော မဟိဒ္ဓိကော မဟာနုဘာဝေါ။ ကထံ မယံ သမဏဿ ဂေါတမဿ သံဃဘေဒံ ကရိဿာမ စက္ကဘေဒ’’န္တိ? ‘‘ဧထ မယံ, အာဝုသော, သမဏံ ဂေါတမံ ဥပသင်္ကမိတွာ ပဉ္စ ဝတ္ထူနိ ယာစိဿာမ – ‘ဘဂဝါ, ဘန္တေ, အနေကပရိယာယေန အပ္ပိစ္ဆဿ သန္တုဋ္ဌဿ သလ္လေခဿ ဓုတဿ ပါသာဒိကဿ အပစယဿ ဝီရိယာရမ္ဘဿ [ဝီရိယာရဗ္ဘဿ (က.)] ဝဏ္ဏဝါဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ သန္တုဋ္ဌိယာ သလ္လေခါယ ဓုတတာယ ပါသာဒိကတာယ အပစယာယ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အဿု; ယော ဂါမန္တံ ဩသရေယျ, ဝဇ္ဇံ နံ ဖုသေယျ။ ယာဝဇီဝံ ပိဏ္ဍပါတိကာ အဿု; ယော နိမန္တနံ သာဒိယေယျ, ဝဇ္ဇံ နံ ဖုသေယျ။ ယာဝဇီဝံ ပံသုကူလိကာ အဿု; ယော ဂဟပတိစီဝရံ သာဒိယေယျ, ဝဇ္ဇံ နံ ဖုသေယျ။ ယာဝဇီဝံ ရုက္ခမူလိကာ အဿု; ယော ဆန္နံ ဥပဂစ္ဆေယျ, ဝဇ္ဇံ နံ ဖုသေယျ။ ယာဝဇီဝံ မစ္ဆမံသံ န ခါဒေယျုံ; ယော မစ္ဆမံသံ ခါဒေယျ, ဝဇ္ဇံ နံ ဖုသေယျာ’တိ။ ဣမာနိ သမဏော ဂေါတမော နာနုဇာနိဿတိ။ တေ မယံ ဣမေဟိ ပဉ္စဟိ ဝတ္ထူဟိ ဇနံ သညာပေဿာမာတိ။ သက္ကာ ခေါ, အာဝုသော, ဣမေဟိ ပဉ္စဟိ ဝတ္ထူဟိ သမဏဿ ဂေါတမဿ သံဃဘေဒေါ ကာတုံ စက္ကဘေဒေါ။ လူခပသန္နာ ဟိ, အာဝုသော, မနုဿာ’’တိ။

အထ ခေါ ဒေဝဒတ္တော သပရိသော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ ဒေဝဒတ္တော ဘဂဝန္တံ ဧတဒဝေါစ – ‘‘ဘဂဝါ, ဘန္တေ, အနေကပရိယာယေန အပ္ပိစ္ဆဿ။ပေ.။ ဝီရိယာရမ္ဘဿ ဝဏ္ဏဝါဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ။ပေ.။ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အဿု; ယော ဂါမန္တံ ဩသရေယျ ဝဇ္ဇံ နံ ဖုသေယျ။ပေ.။ ယာဝဇီဝံ မစ္ဆမံသံ န ခါဒေယျုံ, ယော မစ္ဆမံသံ ခါဒေယျ ဝဇ္ဇံ နံ ဖုသေယျာ’’တိ။ ‘‘အလံ, ဒေဝဒတ္တ, ယော ဣစ္ဆတိ အာရညိကော ဟောတု, ယော ဣစ္ဆတိ ဂါမန္တေ ဝိဟရတု; ယော ဣစ္ဆတိ ပိဏ္ဍပါတိကော ဟောတု, ယော ဣစ္ဆတိ နိမန္တနံ သာဒိယတု; ယော ဣစ္ဆတိ ပံသုကူလိကော ဟောတု, ယော ဣစ္ဆတိ ဂဟပတိစီဝရံ သာဒိယတု။ အဋ္ဌမာသေ ခေါ မယာ, ဒေဝဒတ္တ, ရုက္ခမူလသေနာသနံ အနုညာတံ, တိကောဋိပရိသုဒ္ဓံ မစ္ဆမံသံ – အဒိဋ္ဌံ အသုတံ အပရိသင်္ကိတ’’န္တိ။ အထ ခေါ ဒေဝဒတ္တော – ‘‘န ဘဂဝါ ဣမာနိ ပဉ္စ ဝတ္ထူနိ အနုဇာနာတီ’’တိ ဟဋ္ဌော ဥဒဂ္ဂေါ သပရိသော ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ။

၄၁၀. အထ ခေါ ဒေဝဒတ္တော သပရိသော ရာဇဂဟံ ပဝိသိတွာ ပဉ္စဟိ ဝတ္ထူဟိ ဇနံ သညာပေသိ – ‘‘မယံ, အာဝုသော, သမဏံ ဂေါတမံ ဥပသင်္ကမိတွာ ပဉ္စ ဝတ္ထူနိ ယာစိမှာ – ‘ဘဂဝါ, ဘန္တေ, အနေကပရိယာယေန အပ္ပိစ္ဆဿ သန္တုဋ္ဌဿ သလ္လေခဿ ဓုတဿ ပါသာဒိကဿ အပစယဿ ဝီရိယာရမ္ဘဿ ဝဏ္ဏဝါဒီ။ ဣမာနိ, ဘန္တေ, ပဉ္စ ဝတ္ထူနိ အနေကပရိယာယေန အပ္ပိစ္ဆတာယ သန္တုဋ္ဌိယာ သလ္လေခါယ ဓုတတာယ ပါသာဒိကတာယ အပစယာယ ဝီရိယာရမ္ဘာယ သံဝတ္တန္တိ။ သာဓု, ဘန္တေ, ဘိက္ခူ ယာဝဇီဝံ အာရညိကာ အဿု; ယော ဂါမန္တံ ဩသရေယျ, ဝဇ္ဇံ နံ ဖုသေယျ။ ယာဝဇီဝံ ပိဏ္ဍပါတိကာ အဿု; ယော နိမန္တနံ သာဒိယေယျ, ဝဇ္ဇံ နံ ဖုသေယျ။ ယာဝဇီဝံ ပံသုကူလိကာ အဿု; ယော ဂဟပတိစီဝရံ သာဒိယေယျ, ဝဇ္ဇံ နံ ဖုသေယျ။ ယာဝဇီဝံ ရုက္ခမူလိကာ အဿု; ယော ဆန္နံ ဥပဂစ္ဆေယျ, ဝဇ္ဇံ နံ ဖုသေယျ။ ယာဝဇီဝံ မစ္ဆမံသံ န ခါဒေယျုံ; ယော မစ္ဆမံသံ ခါဒေယျ, ဝဇ္ဇံ နံ ဖုသေယျာ’တိ။ ဣမာနိ သမဏော ဂေါတမော နာနုဇာနာတိ ။ တေ မယံ ဣမေဟိ ပဉ္စဟိ ဝတ္ထူဟိ သမာဒါယ ဝတ္တာမာ’’တိ။ တတ္ထ ယေ တေ မနုဿာ အဿဒ္ဓါ အပ္ပသန္နာ ဒုဗ္ဗုဒ္ဓိနော တေ ဧဝမာဟံသု – ‘‘ဣမေ ခေါ သမဏာ သကျပုတ္တိယာ ဓုတာ သလ္လေခဝုတ္တိနော, သမဏော ပန ဂေါတမော ဗာဟုလ္လိကော ဗာဟုလ္လာယ စေတေတီ’’တိ။ ယေ ပန တေ မနုဿာ သဒ္ဓါ ပသန္နာ ပဏ္ဍိတာ ဗျတ္တာ ဗုဒ္ဓိမန္တော တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဒေဝဒတ္တော ဘဂဝတော သံဃဘေဒါယ ပရက္ကမိဿတိ စက္ကဘေဒါယာ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဒေဝဒတ္တော သံဃဘေဒါယ ပရက္ကမိဿတိ စက္ကဘေဒါယာ’’တိ! အထ ခေါ တေ ဘိက္ခူ ဒေဝဒတ္တံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တွံ, ဒေဝဒတ္တ, သံဃဘေဒါယ ပရက္ကမသိ စက္ကဘေဒါယာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တွံ, မောဃပုရိသ, သံဃဘေဒါယ ပရက္ကမိဿသိ စက္ကဘေဒါယ! နေတံ, မောဃပုရိသ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၄၁၁. ‘‘ယော ပန ဘိက္ခု သမဂ္ဂဿ သံဃဿ ဘေဒါယ ပရက္ကမေယျ, ဘေဒနသံဝတ္တနိကံ ဝါ အဓိကရဏံ သမာဒါယ ပဂ္ဂယှ တိဋ္ဌေယျ, သော ဘိက္ခု ဘိက္ခူဟိ ဧဝမဿ ဝစနီယော – ‘မာယသ္မာ သမဂ္ဂဿ သံဃဿ ဘေဒါယ ပရက္ကမိ, ဘေဒနသံဝတ္တနိကံ ဝါ အဓိကရဏံ သမာဒါယ ပဂ္ဂယှ အဋ္ဌာသိ။ သမေတာယသ္မာ သံဃေန။ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’တိ။ ဧဝဉ္စ သော ဘိက္ခု ဘိက္ခူဟိ ဝုစ္စမာနော တထေဝ ပဂ္ဂဏှေယျ , သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တဿ ပဋိနိဿဂ္ဂါယ။ ယာဝတတိယဉ္စေ သမနုဘာသိယမာနော တံ ပဋိနိဿဇ္ဇေယျ, ဣစ္စေတံ ကုသလံ; နော စေ ပဋိနိဿဇ္ဇေယျ, သံဃာဒိသေသော’’တိ။

၄၁၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

သမဂ္ဂေါ နာမ သံဃော သမာနသံဝါသကော သမာနသီမာယံ ဌိတော။

ဘေဒါယ ပရက္ကမေယျာတိ – ‘‘ကထံ ဣမေ နာနာ အဿု, ဝိနာ အဿု, ဝဂ္ဂါ အဿူ’’တိ ပက္ခံ ပရိယေသတိ, ဂဏံ ဗန္ဓတိ။

ဘေဒနသံဝတ္တနိကံ ဝါ အဓိကရဏန္တိ အဋ္ဌာရသဘေဒကရဝတ္ထူနိ။

သမာဒါယာတိ အာဒါယ။

ပဂ္ဂယှာတိ ဒီပေယျ။

တိဋ္ဌေယျာတိ န ပဋိနိဿဇ္ဇေယျ။

သော ဘိက္ခူတိ ယော သော သံဃဘေဒကော ဘိက္ခု။

ဘိက္ခူဟီတိ အညေဟိ ဘိက္ခူဟိ။

ယေ ပဿန္တိ, ယေ သုဏန္တိ, တေဟိ ဝတ္တဗ္ဗော – ‘‘မာယသ္မာ သမဂ္ဂဿ သံဃဿ ဘေဒါယ ပရက္ကမိ, ဘေဒနသံဝတ္တနိကံ ဝါ အဓိကရဏံ သမာဒါယ ပဂ္ဂယှ အဋ္ဌာသိ။ သမေတာယသ္မာ သံဃေန။ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သုတွာ န ဝဒန္တိ , အာပတ္တိ ဒုက္ကဋဿ။ သော ဘိက္ခု သံဃမဇ္ဈမ္ပိ အာကဍ္ဎိတွာ ဝတ္တဗ္ဗော – ‘‘မာယသ္မာ သမဂ္ဂဿ သံဃဿ ဘေဒါယ ပရက္ကမိ, ဘေဒနသံဝတ္တနိကံ ဝါ အဓိကရဏံ သမာဒါယ ပဂ္ဂယှ အဋ္ဌာသိ။ သမေတာယသ္မာ သံဃေန။ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သော ဘိက္ခု သမနုဘာသိတဗ္ဗော – ‘‘ဧဝဉ္စ ပန, ဘိက္ခဝေ, သမနုဘာသိတဗ္ဗော။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၁၃. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သမဂ္ဂဿ သံဃဿ ဘေဒါယ ပရက္ကမတိ။ သော တံ ဝတ္ထုံ န ပဋိနိဿဇ္ဇတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမံ ဘိက္ခုံ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သမဂ္ဂဿ သံဃဿ ဘေဒါယ ပရက္ကမတိ။ သော တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ – သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သမဂ္ဂဿ သံဃဿ ဘေဒါယ ပရက္ကမတိ။ သော တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘သမနုဘဋ္ဌော သံဃေန ဣတ္ထန္နာမော ဘိက္ခု တဿ ဝတ္ထုဿ ပဋိနိဿဂ္ဂါယ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၄၁၄. ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ, ကမ္မဝါစာပရိယောသာနေ အာပတ္တိ သံဃာဒိသေသဿ။ သံဃာဒိသေသံ အဇ္ဈာပဇ္ဇန္တဿ ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၄၁၅. ဓမ္မကမ္မေ ဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ ဝေမတိကော န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ အဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋဿ။

အဓမ္မကမ္မေ ဝေမတိကော, အာပတ္တိ ဒုက္ကဋဿ။

အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋဿ။

၄၁၆. အနာပတ္တိ အသမနုဘာသန္တဿ, ပဋိနိဿဇ္ဇန္တဿ, ဥမ္မတ္တကဿ, ခိတ္တစိတ္တဿ, ဝေဒနာဋ္ဋဿ, အာဒိကမ္မိကဿာတိ။

သံဃဘေဒသိက္ခါပဒံ နိဋ္ဌိတံ ဒသမံ။

၁၁. ဘေဒါနုဝတ္တကသိက္ခါပဒံ

၄၁၇. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ။ တေန ခေါ ပန သမယေန ဒေဝဒတ္တော သံဃဘေဒါယ ပရက္ကမတိ စက္ကဘေဒါယ။ ဘိက္ခူ ဧဝမာဟံသု – ‘‘အဓမ္မဝါဒီ ဒေဝဒတ္တော, အဝိနယဝါဒီ ဒေဝဒတ္တော။ ကထဉှိ နာမ ဒေဝဒတ္တော သံဃဘေဒါယ ပရက္ကမိဿတိ စက္ကဘေဒါယာ’’တိ! ဧဝံ ဝုတ္တေ ကောကာလိကော ကဋမောဒကတိဿကော ခဏ္ဍဒေဝိယာ ပုတ္တော သမုဒ္ဒဒတ္တော တေ ဘိက္ခူ ဧတဒဝေါစုံ – ‘‘မာယသ္မန္တော ဧဝံ အဝစုတ္ထ။ ဓမ္မဝါဒီ ဒေဝဒတ္တော, ဝိနယဝါဒီ ဒေဝဒတ္တော။ အမှာကဉ္စ ဒေဝဒတ္တော ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကံပေတံ ခမတီ’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဘဝိဿန္တိ ဝဂ္ဂဝါဒကာ’’တိ! အထ ခေါ တေ ဘိက္ခူ တေ အနုဝတ္တကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဟောန္တိ ဝဂ္ဂဝါဒကာ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တေ, ဘိက္ခဝေ, မောဃပုရိသာ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဘဝိဿန္တိ ဝဂ္ဂဝါဒကာ ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၄၁၈. ‘‘တဿေဝ ခေါ ပန ဘိက္ခုဿ ဘိက္ခူ ဟောန္တိ အနုဝတ္တကာ ဝဂ္ဂဝါဒကာ ဧကော ဝါ ဒွေ ဝါ တယော ဝါ။ တေ ဧဝံ ဝဒေယျုံ – ‘မာယသ္မန္တော ဧတံ ဘိက္ခုံ ကိဉ္စိ အဝစုတ္ထ။ ဓမ္မဝါဒီ စေသော ဘိက္ခု, ဝိနယဝါဒီ စေသော ဘိက္ခု။ အမှာကဉ္စေသော ဘိက္ခု ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကမ္ပေတံ ခမတီ’တိ, တေ ဘိက္ခူ ဘိက္ခူဟိ ဧဝမဿု ဝစနီယာ – ‘မာယသ္မန္တော ဧဝံ အဝစုတ္ထ, န စေသော ဘိက္ခု ဓမ္မဝါဒီ, န စေသော ဘိက္ခု ဝိနယဝါဒီ, မာယသ္မန္တာနမ္ပိ သံဃဘေဒေါ ရုစ္စိတ္ထ, သမေတာယသ္မန္တာနံ သံဃေန, သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’တိ။ ဧဝဉ္စ တေ ဘိက္ခူ ဘိက္ခူဟိ ဝုစ္စမာနာ တထေဝ ပဂ္ဂဏှေယျုံ, တေ ဘိက္ခူ ဘိက္ခူဟိ ယာဝတတိယံ သမနုဘာသိတဗ္ဗာ တဿ ပဋိနိဿဂ္ဂါယ။ ယာဝတတိယဉ္စေ သမနုဘာသိယမာနာ တံ ပဋိနိဿဇ္ဇေယျုံ, ဣစ္စေတံ ကုသလံ, နော စေ ပဋိနိဿဇ္ဇေယျုံ, သံဃာဒိသေသော’’တိ။

၄၁၉. တဿေဝ ခေါ ပနာတိ တဿ သံဃဘေဒကဿ ဘိက္ခုနော။

ဘိက္ခူ ဟောန္တီတိ အညေ ဘိက္ခူ ဟောန္တိ။

အနုဝတ္တကာတိ ယံဒိဋ္ဌိကော သော ဟောတိ ယံခန္တိကော ယံရုစိကော တေပိ တံဒိဋ္ဌိကာ ဟောန္တိ တံခန္တိကာ တံရုစိကာ။

ဝဂ္ဂဝါဒကာတိ တဿ ဝဏ္ဏာယ ပက္ခါယ ဌိတာ ဟောန္တိ။

ဧကော ဝါ ဒွေ ဝါ တယော ဝါတိ ဧကော ဝါ ဟောတိ ဒွေ ဝါ တယော ဝါ။ တေ ဧဝံ ဝဒေယျုံ – ‘‘မာယသ္မန္တော ဧတံ ဘိက္ခုံ ကိဉ္စိ အဝစုတ္ထ, ဓမ္မဝါဒီ စေသော ဘိက္ခု, ဝိနယဝါဒီ စေသော ဘိက္ခု, အမှာကဉ္စေသော ဘိက္ခု ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကံပေတံ ခမတီ’တိ။

တေ ဘိက္ခူတိ ယေ တေ အနုဝတ္တကာ ဘိက္ခူ။

ဘိက္ခူဟီတိ အညေဟိ ဘိက္ခူဟိ။

ယေ ပဿန္တိ ယေ သုဏန္တိ တေဟိ ဝတ္တဗ္ဗာ – ‘‘မာယသ္မန္တော ဧဝံ အဝစုတ္ထ။ န စေသော ဘိက္ခု ဓမ္မဝါဒီ, န စေသော ဘိက္ခု ဝိနယဝါဒီ။ မာယသ္မန္တာနမ္ပိ သံဃဘေဒေါ ရုစ္စိတ္ထ။ သမေတာယသ္မန္တာနံ သံဃေန။ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇန္တိ, ဣစ္စေတံ ကုသလံ; နော စေ ပဋိနိဿဇ္ဇန္တိ, အာပတ္တိ ဒုက္ကဋဿ။ သုတွာ န ဝဒန္တိ, အာပတ္တိ ဒုက္ကဋဿ။ တေ ဘိက္ခူ သံဃမဇ္ဈမ္ပိ အာကဍ္ဎိတွာ ဝတ္တဗ္ဗာ – ‘‘မာယသ္မန္တော ဧဝံ အဝစုတ္ထ။ န စေသော ဘိက္ခု ဓမ္မဝါဒီ, န စေသော ဘိက္ခု ဝိနယဝါဒီ။ မာယသ္မန္တာနမ္ပိ သံဃဘေဒေါ ရုစ္စိတ္ထ။ သမေတာယသ္မန္တာနံ သံဃေန။ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိဿဇ္ဇန္တိ, ဣစ္စေတံ ကုသလံ; နော စေ ပဋိနိဿဇ္ဇန္တိ, အာပတ္တိ ဒုက္ကဋဿ။ တေ ဘိက္ခူ သမနုဘာသိတဗ္ဗာ။ ဧဝဉ္စ ပန, ဘိက္ခဝေ, သမနုဘာသိတဗ္ဗာ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၂၀. ‘‘သုဏာတု မေ, ဘန္တေ, သံဃော။ ဣတ္ထန္နာမော စ ဣတ္ထနာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ ။ တေ တံ ဝတ္ထုံ န ပဋိနိဿဇ္ဇန္တိ။ ယဒိ သံဃဿ ပတ္တကလ္လံ, သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ။ တေ တံ ဝတ္ထုံ န ပဋိနိဿဇ္ဇန္တိ။ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ – သုဏာတု မေ, ဘန္တေ, သံဃော။ ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ။ တေ တံ ဝတ္ထုံ န ပဋိနိဿဇ္ဇန္တိ။ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘သမနုဘဋ္ဌာ သံဃေန ဣတ္ထန္နာမော စ ဣတ္ထန္နာမော စ ဘိက္ခူ တဿ ဝတ္ထုဿ ပဋိနိဿဂ္ဂါယ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၄၂၁. ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ, ကမ္မဝါစာပရိယောသာနေ အာပတ္တိ သံဃာဒိသေသဿ။ သံဃာဒိသေသံ အဇ္ဈာပဇ္ဇန္တာနံ ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ။ ဒွေ တယော ဧကတော သမနုဘာသိတဗ္ဗာ, တဒုတ္တရိ န သမနုဘာသိတဗ္ဗာ။

သံဃာဒိသေသောတိ။ပေ.။ တေနပိ ဝုစ္စတိ ‘‘သံဃာဒိသေသော’’တိ။

၄၂၂. ဓမ္မကမ္မေ ဓမ္မကမ္မသညီ န ပဋိနိဿဇ္ဇန္တိ, အာပတ္တိ သံဃာဒိသေသဿ။

ဓမ္မကမ္မေ ဝေမတိကာ န ပဋိနိဿဇ္ဇန္တိ, အာပတ္တိ သံဃာဒိသေသဿ။

ဓမ္မကမ္မေ အဓမ္မကမ္မသညီ န ပဋိနိဿဇ္ဇန္တိ, အာပတ္တိ သံဃာဒိသေသဿ။

အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋဿ။

အဓမ္မကမ္မေ ဝေမတိကာ, အာပတ္တိ ဒုက္ကဋဿ။

အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋဿ။

၄၂၃. အနာပတ္တိ အသမနုဘာသန္တာနံ, ပဋိနိဿဇ္ဇန္တာနံ, ဥမ္မတ္တကာနံ, ခိတ္တစိတ္တာနံ, ဝေဒနာဋ္ဋာနံ, အာဒိကမ္မိကာနန္တိ။

ဘေဒါနုဝတ္တကသိက္ခါပဒံ နိဋ္ဌိတံ ဧကာဒသမံ။

၁၂. ဒုဗ္ဗစသိက္ခါပဒံ

၄၂၄. တေန သမယေန ဗုဒ္ဓေါ ဘဂဝါ ကောသမ္ဗိယံ ဝိဟရတိ ဃောသိတာရာမေ။ တေန ခေါ ပန သမယေန အာယသ္မာ ဆန္နော အနာစရံ အာစရတိ။ ဘိက္ခူ ဧဝမာဟံသု – ‘‘မာဝုသော, ဆန္န, ဧဝရူပံ အကာသိ။ နေတံ ကပ္ပတီ’’တိ။ သော ဧဝံ ဝဒေတိ – ‘‘ကိံ နု ခေါ နာမ တုမှေ, အာဝုသော, မံ ဝတ္တဗ္ဗံ မညထ? အဟံ ခေါ နာမ တုမှေ ဝဒေယျံ။ အမှာကံ ဗုဒ္ဓေါ အမှာကံ ဓမ္မော အမှာကံ အယျပုတ္တေန ဓမ္မော အဘိသမိတော။ သေယျထာပိ နာမ မဟာဝါတော ဝါယန္တော တိဏကဋ္ဌပဏ္ဏသဋံ [တိဏကဋ္ဌပဏ္ဏကသဋံ (က.)] ဧကတော ဥဿာရေယျ, သေယျထာ ဝါ ပန နဒီ ပဗ္ဗတေယျာ သင်္ခသေဝါလပဏကံ ဧကတော ဥဿာရေယျ, ဧဝမေဝ တုမှေ နာနာနာမာ နာနာဂေါတ္တာ နာနာဇစ္စာ နာနာကုလာ ပဗ္ဗဇိတာ ဧကတော ဥဿရိတာ။ ကိံ နု ခေါ နာမ တုမှေ, အာဝုသော, မံ ဝတ္တဗ္ဗံ မညထ? အဟံ ခေါ နာမ တုမှေ ဝဒေယျံ! အမှာကံ ဗုဒ္ဓေါ အမှာကံ ဓမ္မော အမှာကံ အယျပုတ္တေန ဓမ္မော အဘိသမိတော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရိဿတီ’’တိ! အထ ခေါ တေ ဘိက္ခူ အာယသ္မန္တံ ဆန္နံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တွံ, ဆန္န, ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောသီ’’တိ? ‘‘သစ္စံ ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တွံ, မောဃပုရိသ, ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရိဿသိ! နေတံ, မောဃပုရိသ , အပ္ပသန္နာနံ ဝါ ပသာဒါယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၄၂၅. ‘‘ဘိက္ခု ပနေဝ ဒုဗ္ဗစဇာတိကော ဟောတိ ဥဒ္ဒေသပရိယာပန္နေသု သိက္ခါပဒေသု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ – ‘မာ မံ အာယသ္မန္တော ကိဉ္စိ အဝစုတ္ထ ကလျာဏံ ဝါ ပါပကံ ဝါ, အဟံပါယသ္မန္တေ န ကိဉ္စိ ဝက္ခါမိ ကလျာဏံ ဝါ ပါပကံ ဝါ, ဝိရမထာယသ္မန္တော မမ ဝစနာယာ’တိ, သော ဘိက္ခု ဘိက္ခူဟိ ဧဝမဿ ဝစနီယော – ‘မာယသ္မာ အတ္တာနံ အဝစနီယံ အကာသိ, ဝစနီယမေဝါယသ္မာ အတ္တာနံ ကရောတု, အာယသ္မာပိ ဘိက္ခူ ဝဒေတု သဟဓမ္မေန, ဘိက္ခူပိ အာယသ္မန္တံ ဝက္ခန္တိ သဟဓမ္မေန။ ဧဝံ သံဝဒ္ဓါ ဟိ တဿ ဘဂဝတော ပရိသာ ယဒိဒံ အညမညဝစနေန အညမညဝုဋ္ဌာပနေနာတိ။ ဧဝဉ္စ သော ဘိက္ခုံ ဘိက္ခူဟိ ဝုစ္စမာနော တထေဝ ပဂ္ဂဏှေယျ, သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တဿ ပဋိနိဿဂ္ဂါယ။ ယာဝတတိယဉ္စေ သမနုဘာသီယမာနော တံ ပဋိနိဿဇ္ဇေယျ, ဣစ္စေတံ ကုသလံ; နော စေ ပဋိနိဿဇ္ဇေယျ, သံဃာဒိသေသော’’တိ။

၄၂၆. ဘိက္ခူ ပနေဝ ဒုဗ္ဗစဇာတိကော ဟောတီတိ ဒုဗ္ဗစော ဟောတိ ဒေါဝစဿကရဏေဟိ ဓမ္မေဟိ သမန္နာဂတော အက္ခမော အပ္ပဒက္ခိဏဂ္ဂါဟီ အနုသာသနိံ။

ဥဒ္ဒေသပရိယာပန္နေသု သိက္ခါပဒေသူတိ ပါတိမောက္ခပရိယာပန္နေသု သိက္ခါပဒေသု။

ဘိက္ခူဟီတိ အညေဟိ ဘိက္ခူဟိ။

သဟဓမ္မိကံ နာမ ယံ ဘဂဝတာ ပညတ္တံ သိက္ခါပဒံ, ဧတံ သဟဓမ္မိကံ နာမ။

တေန ဝုစ္စမာနော အတ္တာနံ အဝစနီယံ ကရောတိ – ‘‘မာ မံ အာယသ္မန္တော ကိဉ္စိ အဝစုတ္ထ ကလျာဏံ ဝါ ပါပကံ ဝါ, အဟံပါယသ္မန္တေ န ကိဉ္စိ ဝက္ခါမိ ကလျာဏံ ဝါ ပါပကံ ဝါ။ ဝိရမထာယသ္မန္တော မမ ဝစနာယာ’’တိ။

သော ဘိက္ခူတိ ယော သော ဒုဗ္ဗစဇာတိကော ဘိက္ခု။

ဘိက္ခူဟီတိ အညေဟိ ဘိက္ခူဟိ။ ယေ ပဿန္တိ ယေ သုဏန္တိ တေဟိ ဝတ္တဗ္ဗော – ‘‘မာယသ္မာ အတ္တာနံ အဝစနီယံ အကာသိ။ ဝစနီယမေဝ အာယသ္မာ အတ္တာနံ ကရောတု။ အာယသ္မာပိ ဘိက္ခူ ဝဒေတု သဟဓမ္မေန, ဘိက္ခူပိ အာယသ္မန္တံ ဝက္ခန္တိ သဟဓမ္မေန။ ဧဝံ သံဝဒ္ဓါ ဟိ တဿ ဘဂဝတော ပရိသာ ယဒိဒံ အညမညဝစနေန အညမညဝုဋ္ဌာပနေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိဿဇ္ဇတိ , ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သုတွာ န ဝဒန္တိ, အာပတ္တိ ဒုက္ကဋဿ။ သော ဘိက္ခု သံဃမဇ္ဈမ္ပိ အာကဍ္ဎိတွာ ဝတ္တဗ္ဗော – ‘‘မာယသ္မာ အတ္တာနံ အဝစနီယံ အကာသိ။ပေ.။ အညမညဝုဋ္ဌာပနေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိဿဇ္ဇတိ, ဣစ္စေတံ ကုသလံ; နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သော ဘိက္ခု သမနုဘာသိတဗ္ဗော။ ဧဝဉ္စ ပန, ဘိက္ခဝေ, သမနုဘာသိတဗ္ဗော။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၂၇. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိဿဇ္ဇတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမံ ဘိက္ခုံ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ – ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ ကရောတိ။ သော တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘သမနုဘဋ္ဌော သံဃေန ဣတ္ထန္နာမော ဘိက္ခု တဿ ဝတ္ထုဿ ပဋိနိဿဂ္ဂါယ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၄၂၈. ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ, ကမ္မဝါစာပရိယောသာနေ အာပတ္တိ သံဃာဒိသေသဿ။ သံဃာဒိသေသံ အဇ္ဈာပဇ္ဇန္တဿ ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ။

သံဃာဒိသေသောတိ။ပေ.။ တေနပိ ဝုစ္စတိ သံဃာဒိသေသောတိ။

၄၂၉. ဓမ္မကမ္မေ ဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ ဝေမတိကော န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ အဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋဿ။

အဓမ္မကမ္မေ ဝေမတိကော, အာပတ္တိ ဒုက္ကဋဿ။

အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋဿ။

၄၃၀. အနာပတ္တိ အသမနုဘာသန္တဿ, ပဋိနိဿဇ္ဇန္တဿ, ဥမ္မတ္တကဿ, အာဒိကမ္မိကဿာတိ။

ဒုဗ္ဗစသိက္ခါပဒံ နိဋ္ဌိတံ ဒွါဒသမံ။

၁၃. ကုလဒူသကသိက္ခါပဒံ

၄၃၁. [ဣဒံ ဝတ္ထု စူဠဝ. ၂၁] တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန အဿဇိပုနဗ္ဗသုကာ နာမ [နာမ ဘိက္ခူ (က.)] ကီဋာဂိရိသ္မိံ အာဝါသိကာ ဟောန္တိ အလဇ္ဇိနော ပါပဘိက္ခူ။ တေ [စူဠဝ. ၂၉၃] ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ, သိဉ္စန္တိပိ သိဉ္စာပေန္တိပိ, ဩစိနန္တိပိ ဩစိနာပေန္တိပိ, ဂန္ထေန္တိပိ ဂန္ထာပေန္တိပိ, ဧကတောဝဏ္ဋိကမာလံ ကရောန္တိပိ ကာရာပေန္တိပိ, ဥဘတောဝဏ္ဋိကမာလံ ကရောန္တိပိ ကာရာပေန္တိပိ, မဉ္ဇရိကံ ကရောန္တိပိ ကာရာပေန္တိပိ, ဝိဓူတိကံ ကရောန္တိပိ ကာရာပေန္တိပိ, ဝဋံသကံ ကရောန္တိပိ ကာရာပေန္တိပိ, အာဝေဠံ ကရောန္တိပိ ကာရာပေန္တိပိ, ဥရစ္ဆဒံ ကရောန္တိပိ ကာရာပေန္တိပိ။ တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရန္တိပိ ဟရာပေန္တိပိ, ဥဘတောဝဏ္ဋိကမာလံ ဟရန္တိပိ ဟရာပေန္တိပိ, မဉ္ဇရိကံ ဟရန္တိပိ ဟရာပေန္တိပိ, ဝိဓူတိကံ ဟရန္တိပိ ဟရာပေန္တိပိ, ဝဋံသကံ ဟရန္တိပိ ဟရာပေန္တိပိ, အာဝေဠံ ဟရန္တိပိ ဟရာပေန္တိပိ, ဥရစ္ဆဒံ ဟရန္တိပိ ဟရာပေန္တိပိ။ တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇန္တိ, ဧကထာလကေပိ ပိဝန္တိ, ဧကာသနေပိ နိသီဒန္တိ, ဧကမဉ္စေပိ တုဝဋ္ဋေန္တိ, ဧကတ္ထရဏာပိ တုဝဋ္ဋေန္တိ, ဧကပါဝုရဏာပိ တုဝဋ္ဋေန္တိ, ဧကတ္ထရဏပါဝုရဏာပိ တုဝဋ္ဋေန္တိ, ဝိကာလေပိ ဘုဉ္ဇန္တိ, မဇ္ဇမ္ပိ ပိဝန္တိ, မာလာဂန္ဓဝိလေပနမ္ပိ ဓါရေန္တိ, နစ္စန္တိပိ ဂါယန္တိပိ ဝါဒေန္တိပိ လာသေန္တိပိ, နစ္စန္တိယာပိ နစ္စန္တိ, နစ္စန္တိယာပိ ဂါယန္တိ, နစ္စန္တိယာပိ ဝါဒေန္တိ, နစ္စန္တိယာပိ လာသေန္တိ, ဂါယန္တိယာပိ နစ္စန္တိ, ဂါယန္တိယာပိ ဂါယန္တိ, ဂါယန္တိယာပိ ဝါဒေန္တိ, ဂါယန္တိယာပိ လာသေန္တိ, ဝါဒေန္တိယာပိ နစ္စန္တိ, ဝါဒေန္တိယာပိ ဂါယန္တိ, ဝါဒေန္တိယာပိ ဝါဒေန္တိ, ဝါဒေန္တိယာပိ လာသေန္တိ, လာသေန္တိယာပိ နစ္စန္တိ, လာသေန္တိယာပိ ဂါယန္တိ, လာသေန္တိယာပိ ဝါဒေန္တိ, လာသေန္တိယာပိ လာသေန္တိ။ အဋ္ဌပဒေပိ ကီဠန္တိ, ဒသပဒေပိ ကီဠန္တိ, အာကာသေပိ ကီဠန္တိ, ပရိဟာရပထေပိ ကီဠန္တိ, သန္တိကာယပိ ကီဠန္တိ, ခလိကာယပိ ကီဠန္တိ, ဃဋိကာယပိ ကီဠန္တိ, သလာကဟတ္ထေနပိ ကီဠန္တိ, အက္ခေနပိ ကီဠန္တိ, ပင်္ဂစီရေနပိ ကီဠန္တိ, ဝင်္ကကေနပိ ကီဠန္တိ, မောက္ခစိကာယပိ ကီဠန္တိ, စိင်္ဂုလကေနပိ ကီဠန္တိ, ပတ္တာဠှကေနပိ ကီဠန္တိ, ရထကေနပိ ကီဠန္တိ, ဓနုကေနပိ ကီဠန္တိ, အက္ခရိကာယပိ ကီဠန္တိ, မနေသိကာယပိ ကီဠန္တိ, ယထာဝဇ္ဇေနပိ ကီဠန္တိ။ ဟတ္ထိသ္မိမ္ပိ သိက္ခန္တိ, အဿသ္မိမ္ပိ သိက္ခန္တိ, ရထသ္မိမ္ပိ သိက္ခန္တိ, ဓနုသ္မိမ္ပိ သိက္ခန္တိ, ထရုသ္မိမ္ပိ သိက္ခန္တိ, ဟတ္ထိဿပိ ပုရတော ဓါဝန္တိ, အဿဿပိ ပုရတော ဓါဝန္တိ, ရထဿပိ ပုရတော [ပုရတော ဓါဝန္တိ (သျာ.)] ဓါဝန္တိပိ အာဓါဝန္တိပိ, ဥဿေဠေန္တိပိ, အပ္ဖောဋေန္တိပိ, နိဗ္ဗုဇ္ဈန္တိပိ, မုဋ္ဌီဟိပိ ယုဇ္ဈန္တိ, ရင်္ဂမဇ္ဈေပိ သံဃာဋိံ ပတ္ထရိတွာ နစ္စကိံ [နစ္စန္တိံ (သီ. သျာ.)] ဧဝံ ဝဒန္တိ – ဣဓ, ဘဂိနိ, နစ္စဿူတိ, နလာဋိကမ္ပိ ဒေန္တိ, ဝိဝိဓမ္ပိ အနာစာရံ အာစရန္တိ။

၄၃၂. တေန ခေါ ပန သမယေန အညတရော ဘိက္ခု ကာသီသု ဝဿံဝုဋ္ဌော သာဝတ္ထိံ ဂစ္ဆန္တော ဘဂဝန္တံ ဒဿနာယ, ယေန ကီဋာဂိရိ တဒဝသရိ။ အထ ခေါ သော ဘိက္ခု ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိ ပါသာဒိကေန အဘိက္ကန္တေန ပဋိက္ကန္တေန အာလောကိတေန ဝိလောကိတေန သမိဉ္ဇိတေန ပသာရိတေန ဩက္ခိတ္တစက္ခု ဣရိယာပထသမ္ပန္နော။ မနုဿာ တံ ဘိက္ခုံ ပဿိတွာ ဧဝမာဟံသု – ‘‘ကွာယံ အဗလဗလော ဝိယ မန္ဒမန္ဒေါ ဝိယ ဘာကုဋိကဘာကုဋိကော ဝိယ? ကော ဣမဿ ဥပဂတဿ ပိဏ္ဍကံ ဒဿတိ? အမှာကံ ပန အယျာ အဿဇိပုနဗ္ဗသုကာ သဏှာ သခိလာ သုခသမ္ဘာသာ မိဟိတပုဗ္ဗင်္ဂမာ ဧဟိသွာဂတဝါဒိနော အဗ္ဘာကုဋိကာ ဥတ္တာနမုခါ ပုဗ္ဗဘာသိနော။ တေသံ ခေါ နာမ ပိဏ္ဍော ဒါတဗ္ဗော’’တိ။

အဒ္ဒသာ ခေါ အညတရော ဥပါသကော တံ ဘိက္ခုံ ကီဋာဂိရိသ္မိံ ပိဏ္ဍာယ စရန္တံ။ ဒိသွာန ယေန သော ဘိက္ခု တေနုပသင်္ကမိ; ဥပသင်္ကမိတွာ တံ ဘိက္ခုံ အဘိဝါဒေတွာ ဧတဒဝေါစ – ‘‘အပိ, ဘန္တေ, ပိဏ္ဍော လဗ္ဘတီ’’တိ? ‘‘န ခေါ, အာဝုသော, ပိဏ္ဍော လဗ္ဘတီ’’တိ။ ‘‘ဧဟိ, ဘန္တေ, ဃရံ ဂမိဿာမာ’’တိ။ အထ ခေါ သော ဥပါသကော တံ ဘိက္ခုံ ဃရံ နေတွာ ဘောဇေတွာ ဧတဒဝေါစ – ‘‘ကဟံ, ဘန္တေ, အယျော ဂမိဿတီ’’တိ? ‘‘သာဝတ္ထိံ ခေါ အဟံ, အာဝုသော, ဂမိဿာမိ ဘဂဝန္တံ ဒဿနာယာ’’တိ။ ‘‘တေန ဟိ, ဘန္တေ, မမ ဝစနေန ဘဂဝတော ပါဒေ သိရသာ ဝန္ဒ, ဧဝဉ္စ ဝဒေဟိ – ‘ဒုဋ္ဌော, ဘန္တေ, ကီဋာဂိရိသ္မိံ အာဝါသော။ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ။ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ, သိဉ္စန္တိပိ သိဉ္စာပေန္တိပိ။ပေ.။ ဝိဝိဓမ္ပိ အနာစာရံ အာစရန္တိ။ ယေပိ တေ, ဘန္တေ, မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ။ ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ။ ရိဉ္စန္တိ ပေသလာ ဘိက္ခူ, နိဝသန္တိ ပါပဘိက္ခူ။ သာဓု, ဘန္တေ, ဘဂဝါ ကီဋာဂိရိံ ဘိက္ခူ ပဟိဏေယျ ယထာယံ ကီဋာဂိရိသ္မိံ အာဝါသော သဏ္ဌဟေယျာ’’’တိ။

ဧဝမာဝုသောတိ ခေါ သော ဘိက္ခု တဿ ဥပါသကဿ ပဋိဿုတွာ ယေန သာဝတ္ထိ တေန ပက္ကာမိ။ အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခေါ ဘဂဝါ တံ ဘိက္ခုံ ဧတဒဝေါစ – ‘‘ကစ္စိ, ဘိက္ခု, ခမနီယံ ကစ္စိ ယာပနီယံ, ကစ္စိသိ အပ္ပကိလမထေန အဒ္ဓါနံ အာဂတော, ကုတော စ တွံ ဘိက္ခု အာဂစ္ဆသီ’’တိ? ‘‘ခမနီယံ, ဘဂဝါ, ယာပနီယံ, ဘဂဝါ။ အပ္ပကိလမထေန စာဟံ, ဘန္တေ, အဒ္ဓါနံ အာဂတော။ ဣဓါဟံ, ဘန္တေ, ကာသီသု ဝဿံဝုဋ္ဌော သာဝတ္ထိံ အာဂစ္ဆန္တော ဘဂဝန္တံ ဒဿနာယ ယေန ကီဋာဂိရိ တဒဝသရိံ။ အထ ခွာဟံ, ဘန္တေ, ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိံ။ အဒ္ဒသာ ခေါ မံ, ဘန္တေ, အညတရော ဥပါသကော ကီဋာဂိရိသ္မိံ ပိဏ္ဍာယ စရန္တံ။ ဒိသွာန ယေနာဟံ တေနုပသင်္ကမိ; ဥပသင်္ကမိတွာ မံ အဘိဝါဒေတွာ ဧတဒဝေါစ – ‘အပိ, ဘန္တေ, ပိဏ္ဍော လဗ္ဘတီ’တိ? ‘န ခေါ, အာဝုသော, ပိဏ္ဍော လဗ္ဘတီ’တိ။ ‘ဧဟိ, ဘန္တေ, ဃရံ ဂမိဿာမာ’တိ။ အထ ခေါ, ဘန္တေ, သော ဥပါသကော မံ ဃရံ နေတွာ ဘောဇေတွာ ဧတဒဝေါစ – ‘ကဟံ, ဘန္တေ, အယျော ဂမိဿသီ’တိ? ‘သာဝတ္ထိံ ခေါ အဟံ, အာဝုသော, ဂမိဿာမိ ဘဂဝန္တံ ဒဿနာယာ’တိ။ တေန ဟိ, ဘန္တေ, မမ ဝစနေန ဘဂဝတော ပါဒေ သိရသာ ဝန္ဒ, ဧဝဉ္စ ဝဒေဟိ – ‘ဒုဋ္ဌော, ဘန္တေ, ကီဋာဂိရိသ္မိံ အာဝါသော, အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ။ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ, သိဉ္စန္တိပိ သိဉ္စာပေန္တိပိ။ပေ.။ ဝိဝိဓမ္ပိ အနာစာရံ အာစရန္တိ။ ယေပိ တေ, ဘန္တေ, မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ, ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ, ရိဉ္စန္တိ ပေသလာ ဘိက္ခူ နိဝသန္တိ ပါပဘိက္ခူ။ သာဓု, ဘန္တေ, ဘဂဝါ ကီဋာဂိရိံ ဘိက္ခူ ပဟိဏေယျ ယထာယံ ကီဋာဂိရိသ္မိံ အာဝါသော သဏ္ဌဟေယျာ’တိ။ တတော အဟံ, ဘဂဝါ, အာဂစ္ဆာမီ’’တိ။

၄၃၃. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ, သိဉ္စန္တိပိ သိဉ္စာပေန္တိပိ ။ပေ.။ ဝိဝိဓမ္ပိ အနာစာရံ အာစရန္တိ, ယေပိ တေ, ဘိက္ခဝေ, မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ; ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ; ရိဉ္စန္တိ ပေသလာ ဘိက္ခူ နိဝသန္တိ ပါပဘိက္ခူ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ‘‘ကထဉှိ နာမ တေ, ဘိက္ခဝေ, မောဃပုရိသာ ဧဝရူပံ အနာစာရံ အာစရိဿန္တိ – မာလာဝစ္ဆံ ရောပေဿန္တိပိ ရောပါပေဿန္တိပိ, သဉ္စိဿန္တိပိ သိဉ္စာပေဿန္တိပိ, ဩစိနိဿန္တိပိ ဩစိနာပေဿန္တိပိ, ဂန္ထိဿန္တိပိ ဂန္ထာပေဿန္တိပိ, ဧကတောဝဏ္ဋိကမာလံ ကရိဿန္တိပိ ကာရာပေဿန္တိပိ, ဥဘတောဝဏ္ဋိကမာလံ ကရိဿန္တိပိ ကာရာပေဿန္တိပိ, မဉ္ဇရိကံ ကရိဿန္တိပိ ကာရာပေဿန္တိပိ, ဝိဓူတိကံ ကရိဿန္တိပိ ကာရာပေဿန္တိပိ, ဝဋံသကံ ကရိဿန္တိပိ ကာရာပေဿန္တိပိ, အာဝေဠံ ကရိဿန္တိပိ ကာရာပေဿန္တိပိ, ဥရစ္ဆဒံ ကရိဿန္တိပိ ကာရာပေဿန္တိပိ။ တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရိဿန္တိပိ ဟာရာပေဿန္တိပိ, ဥဘတောဝဏ္ဋိကမာလံ ဟရိဿန္တိပိ ဟာရာပေဿန္တိပိ, မဉ္ဇရိကံ ဟရိဿန္တိပိ ဟာရာပေဿန္တိပိ , ဝိဓူတိကံ ဟရိဿန္တိပိ ဟာရာပေဿန္တိပိ, ဝဋံသကံ ဟရိဿန္တိပိ ဟာရာပေဿန္တိပိ, အာဝေဠံ ဟရိဿန္တိပိ ဟာရာပေဿန္တိပိ, ဥရစ္ဆဒံ ဟရိဿန္တိပိ ဟာရာပေဿန္တိပိ။ တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇိဿန္တိ, ဧကထာလကေပိ ပိဝိဿန္တိ, ဧကာသနေပိ နိသီဒိဿန္တိ, ဧကမဉ္စေပိ တုဝဋ္ဋိဿန္တိ, ဧကတ္ထရဏာပိ တုဝဋ္ဋိဿန္တိ, ဧကပါဝုရဏာပိ တုဝဋ္ဋိဿန္တိ, ဧကတ္ထရဏပါဝုရဏာပိ တုဝဋ္ဋိဿန္တိ, ဝိကာလေပိ ဘုဉ္ဇိဿန္တိ, မဇ္ဇမ္ပိ ပိဝိဿန္တိ, မာလာဂန္ဓဝိလေပနမ္ပိ ဓါရိဿန္တိ, နစ္စိဿန္တိပိ ဂါယိဿန္တိပိ ဝါဒေဿန္တိပိ လာသေဿန္တိပိ, နစ္စန္တိယာပိ နစ္စိဿန္တိ နစ္စန္တိယာပိ ဂါယိဿန္တိ နစ္စန္တိယာပိ ဝါဒေဿန္တိ နစ္စန္တိယာပိ လာသေဿန္တိ, ဂါယန္တိယာပိ နစ္စိဿန္တိ ဂါယန္တိယာပိ ဂါယိဿန္တိ ဂါယန္တိယာပိ ဝါဒေဿန္တိ ဂါယန္တိယာပိ လာသေဿန္တိ, ဝါဒေန္တိယာပိ နစ္စိဿန္တိ ဝါဒေန္တိယာပိ ဂါယိဿန္တိ ဝါဒေန္တိယာပိ ဝါဒေဿန္တိ ဝါဒေန္တိယာပိ လာသေဿန္တိ, လာသေန္တိယာပိ နစ္စိဿန္တိ လာသေန္တိယာပိ ဂါယိဿန္တိ လာသေန္တိယာပိ ဝါဒေဿန္တိ လာသေန္တိယာပိ လာသေဿန္တိ, အဋ္ဌပဒေပိ ကီဠိဿန္တိ ဒသပဒေပိ ကီဠိဿန္တိ, အကာသေပိ ကီဠိဿန္တိ, ပရိဟာရပထေပိ ကီဠိဿန္တိ, သန္တိကာယပိ ကီဠိဿန္တိ, ခလိကာယပိ ကီဠိဿန္တိ, ဃဋိကာယပိ ကီဠိဿန္တိ, သလာကဟတ္ထေနပိ ကီဠိဿန္တိ, အက္ခေနပိ ကီဠိဿန္တိ, ပင်္ဂစီရေနပိ ကီဠိဿန္တိ, ဝင်္ကကေနပိ ကီဠိဿန္တိ, မောက္ခစိကာယပိ ကီဠိဿန္တိ, စိင်္ဂုလကေနပိ ကီဠိဿန္တိ, ပတ္တာဠှကေနပိ ကီဠိဿန္တိ, ရထကေနပိ ကီဠိဿန္တိ, ဓနုကေနပိ ကီဠိဿန္တိ, အက္ခရိကာယပိ ကီဠိဿန္တိ , မနေသိကာယပိ ကီဠိဿန္တိ, ယထာဝဇ္ဇေနပိ ကီဠိဿန္တိ, ဟတ္ထိသ္မိမ္ပိ သိက္ခိဿန္တိ, အဿသ္မိမ္ပိ သိက္ခိဿန္တိ, ရထသ္မိမ္ပိ သိက္ခိဿန္တိ, ဓနုသ္မိမ္ပိ သိက္ခိဿန္တိ, ထရုသ္မိမ္ပိ သိက္ခိဿန္တိ, ဟတ္ထိဿပိ ပုရတော ဓါဝိဿန္တိ, အဿဿပိ ပုရတော ဓါဝိဿန္တိ, ရထဿပိ ပုရတော [ပုရတော ဓါဝိဿန္တိ (သျာ.)] ဓါဝိဿန္တိပိ အာဓါဝိဿန္တိပိ, ဥဿေဠေဿန္တိပိ, အပ္ဖောဋေဿန္တိပိ, နိဗ္ဗုဇ္ဈိဿန္တိပိ, မုဋ္ဌီဟိပိ ယုဇ္ဈိဿန္တိ, ရင်္ဂမဇ္ဈေပိ သံဃာဋိံ ပတ္ထရိတွာ နစ္စကိံ ဧဝံ ဝက္ခန္တိ ‘‘ဣဓ ဘဂိနိ နစ္စဿူ’’တိ နလာဋိကမ္ပိ ဒဿန္တိ, ဝိဝိဓမ္ပိ အနာစာရံ အာစရိဿန္တိ! နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ ဓမ္မိံ ကထံ ကတွာ သာရိပုတ္တမောဂ္ဂလ္လာနေ အာမန္တေသိ – ‘‘ဂစ္ဆထ တုမှေ, သာရိပုတ္တာ, ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောထ။ တုမှာကံ ဧတေ သဒ္ဓိဝိဟာရိကာ’’တိ။

‘‘ကထံ မယံ, ဘန္တေ, အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောမ? စဏ္ဍာ တေ ဘိက္ခူ ဖရုသာ’’တိ။ ‘‘တေန ဟိ တုမှေ, သာရိပုတ္တာ, ဗဟုကေဟိ ဘိက္ခူဟိ သဒ္ဓိံ ဂစ္ဆထာ’’တိ။ ‘‘ဧဝံ, ဘန္တေ’’တိ ခေါ သာရိပုတ္တမောဂ္ဂလ္လာနာ ဘဂဝတော ပစ္စဿောသုံ။ ‘‘ဧဝဉ္စ ပန, ဘိက္ခဝေ, ကာတဗ္ဗံ။ ပဌမံ အဿဇိပုနဗ္ဗသုကာ ဘိက္ခူ စောဒေတဗ္ဗာ။ စောဒေတွာ သာရေတဗ္ဗာ။ သာရေတွာ အာပတ္တိံ ရောပေတဗ္ဗာ ။ အာပတ္တိံ ရောပေတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၃၄. ‘‘သုဏာတု မေ, ဘန္တေ, သံဃော။ ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ။ ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ။ ယဒိ သံဃဿ ပတ္တကလ္လံ, သံဃော အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရေယျ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ။ ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ။ သံဃော အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောတိ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ။ ယဿာယသ္မတော ခမတိ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မဿ ကရဏံ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ, သော တုဏှဿ; ယဿ နက္ခမတိ, သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ – သုဏာတု မေ, ဘန္တေ, သံဃော။ပေ.။ သော ဘာသေယျ။

‘‘ကတံ သံဃေန အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၄၃၅. အထ ခေါ သာရိပုတ္တမောဂ္ဂလ္လာနပ္ပမုခေါ ဘိက္ခုသံဃော ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ အကာသိ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ။ တေ သံဃေန ပဗ္ဗာဇနီယကမ္မကတာ န သမ္မာ ဝတ္တန္တိ, န လောမံ ပါတေန္တိ, န နေတ္ထာရံ ဝတ္တန္တိ, န ဘိက္ခူ ခမာပေန္တိ, အက္ကောသန္တိ ပရိဘာသန္တိ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေန္တိ, ပက္ကမန္တိပိ, ဝိဗ္ဘမန္တိပိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ န သမ္မာ ဝတ္တိဿန္တိ, န လောမံ ပါတေဿန္တိ, န နေတ္ထာရံ ဝတ္တိဿန္တိ, န ဘိက္ခူ ခမာပေဿန္တိ , အက္ကောသိဿန္တိ ပရိဘာသိဿန္တိ, ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေဿန္တိ ပက္ကမိဿန္တိပိ ဝိဗ္ဘမိဿန္တိဣ’’တိ ! အထ ခေါ တေ ဘိက္ခူ အဿဇိပုနဗ္ဗသုကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ န သမ္မာ ဝတ္တန္တိ။ပေ.။ ဝိဗ္ဘမန္တိဣ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ဧဝဉ္စ ပန, ဘိက္ခဝေ, ဣမံ သိက္ခါပဒံ ဥဒ္ဒိသေယျာထ –

၄၃၆. ‘‘ဘိက္ခု ပနေဝ အညတရံ ဂါမံ ဝါ နိဂမံ ဝါ ဥပနိဿာယ ဝိဟရတိ ကုလဒူသကော ပါပသမာစာရော။ တဿ ခေါ ပါပကာ သမာစာရာ ဒိဿန္တိ စေဝ သုယျန္တိ စ, ကုလာနိ စ တေန ဒုဋ္ဌာနိ ဒိဿန္တိ စေဝ သုယျန္တိ စ။ သော ဘိက္ခု ဘိက္ခူဟိ ဧဝမဿ ဝစနီယော – ‘အာယသ္မာ ခေါ ကုလဒူသကော ပါပသမာစာရော, အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ, ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ။ ပက္ကမတာယသ္မာ ဣမမှာ အာဝါသာ။ အလံ တေ ဣဓ ဝါသေနာ’တိ။ ဧဝဉ္စ သော ဘိက္ခု ဘိက္ခူဟိ ဝုစ္စမာနော တေ ဘိက္ခူ ဧဝံ ဝဒေယျ – ‘ဆန္ဒဂါမိနော စ ဘိက္ခူ ဒေါသဂါမိနော စ ဘိက္ခူ မောဟဂါမိနော စ ဘိက္ခူ ဘယဂါမိနော စ ဘိက္ခူ တာဒိသိကာယ အာပတ္တိယာ ဧကစ္စံ ပဗ္ဗာဇေန္တိ ဧကစ္စံ န ပဗ္ဗာဇေန္တီ’တိ, သော ဘိက္ခု ဘိက္ခူဟိ ဧဝမဿ ဝစနီယော – ‘မာယသ္မာ ဧဝံ အဝစ။ န စ ဘိက္ခူ ဆန္ဒဂါမိနော။ န စ ဘိက္ခူ ဒေါသဂါမိနော။ န စ ဘိက္ခူ မောဟဂါမိနော။ န စ ဘိက္ခူ ဘယဂါမိနော။ အာယသ္မာ ခေါ ကုလဒူသကော ပါပသမာစာရော။ အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ။ ပက္ကမတာယသ္မာ ဣမမှာ အာဝါသာ။ အလံ တေ ဣဓ ဝါသေနာ’တိ။ ဧဝဉ္စ သော ဘိက္ခု ဘိက္ခူဟိ ဝုစ္စမာနော တထေဝ ပဂ္ဂဏှေယျ, သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တဿ ပဋိနိဿဂ္ဂါယ။ ယာဝတတိယဉ္စေ သမနုဘာသီယမာနော တံ ပဋိနိဿဇ္ဇေယျ , ဣစ္စေတံ ကုသလံ; နော စေ ပဋိနိဿဇ္ဇေယျ, သံဃာဒိသေသော’’တိ။

၄၃၇. ဘိက္ခု ပနေဝ အညတရံ ဂါမံ ဝါ နိဂမံ ဝါတိ ဂါမောပိ နိဂမောပိ နဂရမ္ပိ ဂါမော စေဝ နိဂမော စ။

ဥပနိဿာယ ဝိဟရတီတိ တတ္ထ ပဋိဗဒ္ဓါ ဟောန္တိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခါရာ။

ကုလံ နာမ စတ္တာရိ ကုလာနိ – ခတ္တိယကုလံ, ဗြာဟ္မဏကုလံ, ဝေဿကုလံ, သုဒ္ဒကုလံ။

ကုလဒူသကောတိ ကုလာနိ ဒူသေတိ ပုပ္ဖေန ဝါ ဖလေန ဝါ စုဏ္ဏေန ဝါ မတ္တိကာယ ဝါ ဒန္တကဋ္ဌေန ဝါ ဝေဠုယာ ဝါ [ဝေဠုနာ ဝါ (သျာ.)] ဝေဇ္ဇိကာယ ဝါ ဇင်္ဃပေသနိကေန ဝါ။

ပါပသမာစာရောတိ မာလာဝစ္ဆံ ရောပေတိပိ ရောပါပေတိပိ, သိဉ္စတိပိ သိဉ္စာပေတိပိ, ဩစိနာတိပိ ဩစိနာပေတိပိ, ဂန္ထေတိပိ ဂန္ထာပေတိပိ။

ဒိဿန္တိ စေဝ သုယျန္တိ စာတိ ယေ သံမုခါ တေ ပဿန္တိ, ယေ တိရောက္ခါ တေ သုဏန္တိ။

ကုလာနိ စ တေန ဒုဋ္ဌာနီတိ ပုဗ္ဗေ သဒ္ဓါ ဟုတွာ တံ အာဂမ္မ အဿဒ္ဓါ ဟောန္တိ, ပသန္နာ ဟုတွာ အပ္ပသန္နာ ဟောန္တိ။

ဒိဿန္တိ စေဝ သုယျန္တိ စာတိ ယေ သံမုခါ တေ ပဿန္တိ, ယေ တိရောက္ခါ တေ သုဏန္တိ။

သော ဘိက္ခူတိ ယော သော ကုလဒူသကော ဘိက္ခု။

ဘိက္ခူဟီတိ အညေဟိ ဘိက္ခူဟိ။ ယေ ပဿန္တိ ယေ သုဏန္တိ။ တေဟိ ဝတ္တဗ္ဗော – ‘‘အာယသ္မာ ခေါ ကုလဒူသကော ပါပသမာစာရော။ အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ။ ပက္ကမတာယသ္မာ ဣမမှာ အာဝါသာ။ အလံ တေ ဣဓ ဝါသေနာ’’တိ။

ဧဝဉ္စ သော ဘိက္ခု ဘိက္ခူဟိ ဝုစ္စမာနော တေ ဘိက္ခူ ဧဝံ ဝဒေယျ – ‘‘ဆန္ဒဂါမိနော စ ဘိက္ခူ, ဒေါသဂါမိနော စ ဘိက္ခူ, မောဟဂါမိနော စ ဘိက္ခူ, ဘယဂါမိနော စ ဘိက္ခူ။ တာဒိသိကာယ အာပတ္တိယာ ဧကစ္စံ ပဗ္ဗာဇေန္တိ ဧကစ္စံ န ပဗ္ဗာဇေန္တီ’’တိ။

သော ဘိက္ခူတိ ယော သော ကမ္မကတော ဘိက္ခု။

ဘိက္ခူဟီတိ အညေဟိ ဘိက္ခူဟိ။ ယေ ပဿန္တိ ယေ သုဏန္တိ တေဟိ ဝတ္တဗ္ဗော – ‘‘မာယသ္မာ ဧဝံ အဝစ။ န စ ဘိက္ခူ ဆန္ဒဂါမိနော, န စ ဘိက္ခူ ဒေါသဂါမိနော, န စ ဘိက္ခူ မောဟဂါမိနော, န စ ဘိက္ခူ ဘယဂါမိနော။ အာယသ္မာ ခေါ ကုလဒူသကော ပါပသမာစာရော။ အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ။ ပက္ကမတာယသ္မာ ဣမမှာ အာဝါသာ။ အလံ တေ ဣဓ ဝါသေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။

သစေ ပဋိနိဿဇ္ဇတိ, ဣစ္စေတံ ကုသလံ။ နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သုတွာ န ဝဒန္တိ, အာပတ္တိ ဒုက္ကဋဿ။ သော ဘိက္ခု သံဃမဇ္ဈမ္ပိ အာကဍ္ဎိတွာ ဝတ္တဗ္ဗော – ‘‘မာယသ္မာ ဧဝံ အဝစ။ န စ ဘိက္ခူ ဆန္ဒဂါမိနော, န စ ဘိက္ခူ ဒေါသဂါမိနော, န စ ဘိက္ခူ မောဟဂါမိနော, န စ ဘိက္ခူ ဘယဂါမိနော။ အာယသ္မာ ခေါ ကုလဒူသကော ပါပသမာစာရော။ အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ။ ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ။ ပက္ကမတာယသ္မာ ဣမမှာ အာဝါသာ။ အလံ တေ ဣဓ ဝါသေနာ’’တိ။ ဒုတိယမ္ပိ ဝတ္တဗ္ဗော။ တတိယမ္ပိ ဝတ္တဗ္ဗော။ သစေ ပဋိနိဿဇ္ဇတိ, ဣစ္စေတံ ကုသလံ။ နော စေ ပဋိနိဿဇ္ဇတိ, အာပတ္တိ ဒုက္ကဋဿ။ သော ဘိက္ခု သမနုဘာသိတဗ္ဗော။ ဧဝဉ္စ ပန, ဘိက္ခဝေ, သမနုဘာသိတဗ္ဗော။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၃၈. ‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သံဃေန ပဗ္ဗာဇနီယကမ္မကတော ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေတိ။ သော တံ ဝတ္ထုံ န ပဋိနိဿဇ္ဇတိ။ ယဒိ သံဃဿ ပတ္တကလ္လံ, သံဃော ဣတ္ထန္နာမံ ဘိက္ခုံ သမနုဘာသေယျ တဿ ဝတ္ထုဿ ပဋိနိဿဂ္ဂါယ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ အယံ ဣတ္ထန္နာမော ဘိက္ခု သံဃေန ပဗ္ဗာဇနီယကမ္မကတော ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေတိ။ သော တံ ဝတ္ထုံ န ပဋိနိဿဇ္ဇတိ။ သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ။ ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ, သော တုဏှဿ; ယဿ နက္ခမတိ, သော ဘာသေယျ။

‘‘ဒုတိယမ္ပိ ဧတမတ္ထံ ဝဒါမိ။ပေ.။ တတိယမ္ပိ ဧတမတ္ထံ ဝဒါမိ။ပေ.။။

‘‘သမနုဘဋ္ဌော သံဃေန ဣတ္ထန္နာမော ဘိက္ခု တဿ ဝတ္ထုဿ ပဋိနိဿဂ္ဂါယ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၄၃၉. ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ, ကမ္မဝါစာပရိယောသာနေ အာပတ္တိ သံဃာဒိသေသဿ။ သံဃာဒိသေသံ အဇ္ဈာပဇ္ဇန္တဿ ဉတ္တိယာ ဒုက္ကဋံ, ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ။

သံဃာဒိသေသောတိ သံဃောဝ တဿာ အာပတ္တိယာ ပရိဝါသံ ဒေတိ, မူလာယ ပဋိကဿတိ, မာနတ္တံ ဒေတိ, အဗ္ဘေတိ; န သမ္ဗဟုလာ, န ဧကပုဂ္ဂလော ။ တေန ဝုစ္စတိ – ‘သံဃာဒိသေသော’တိ, တဿေဝ အာပတ္တိနိကာယဿ နာမကမ္မံ အဓိဝစနံ။ တေနပိ ဝုစ္စတိ သံဃာဒိသေသောတိ။

၄၄၀. ဓမ္မကမ္မေ ဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ ဝေမတိကော န ပဋိနိဿဇ္ဇတိ, အာပတ္တိ သံဃာဒိသေသဿ။

ဓမ္မကမ္မေ အဓမ္မကမ္မသညီ န ပဋိနိဿဇ္ဇတိ, အာပတ္တိ သံဃာဒိသေသဿ။

အဓမ္မကမ္မေ ဓမ္မကမ္မသညီ, အာပတ္တိ ဒုက္ကဋဿ။

အဓမ္မကမ္မေ ဝေမတိကော, အာပတ္တိ ဒုက္ကဋဿ။

အဓမ္မကမ္မေ အဓမ္မကမ္မသညီ, အာပတ္တိ ဒုက္ကဋဿ။

၄၄၁. အနာပတ္တိ အသမနုဘာသန္တဿ, ပဋိနိဿဇ္ဇန္တဿ, ဥမ္မတ္တကဿ, အာဒိကမ္မိကဿာတိ။

ကုလဒူသကသိက္ခါပဒံ နိဋ္ဌိတံ တေရသမံ။

၄၄၂. ဥဒ္ဒိဋ္ဌာ ခေါ, အာယသ္မန္တော, တေရသ သံဃာဒိသေသာ ဓမ္မာ, နဝ ပဌမာပတ္တိကာ, စတ္တာရော ယာဝတတိယကာ။ ယေသံ ဘိက္ခု အညတရံ ဝါ အညတရံ ဝါ အာပဇ္ဇိတွာ ယာဝတီဟံ ဇာနံ ပဋိစ္ဆာဒေတိ တာဝတီဟံ တေန ဘိက္ခုနာ အကာမာ ပရိဝတ္ထဗ္ဗံ။ ပရိဝုတ္ထပရိဝါသေန ဘိက္ခုနာ ဥတ္တရိ ဆာရတ္တံ ဘိက္ခုမာနတ္တာယ ပဋိပဇ္ဇိတဗ္ဗံ။ စိဏ္ဏမာနတ္တော ဘိက္ခု ယတ္ထ သိယာ ဝီသတိဂဏော ဘိက္ခုသံဃော တတ္ထ သော ဘိက္ခု အဗ္ဘေတဗ္ဗော။ ဧကေနပိ စေ ဦနော ဝီသတိဂဏော ဘိက္ခုသံဃော တံ ဘိက္ခုံ အဗ္ဘေယျ, သော စ ဘိက္ခု အနဗ္ဘိတော, တေ စ ဘိက္ခူ ဂါရယှာ, အယံ တတ္ထ သာမီစိ။ တတ္ထာယသ္မန္တေ ပုစ္ဆာမိ – ‘ကစ္စိတ္ထ ပရိသုဒ္ဓါ’? ဒုတိယမ္ပိ ပုစ္ဆာမိ – ‘ကစ္စိတ္ထ ပရိသုဒ္ဓါ’? တတိယမ္ပိ ပုစ္ဆာမိ – ‘ကစ္စိတ္ထ ပရိသုဒ္ဓါ’? ပရိသုဒ္ဓေတ္ထာယသ္မန္တော။ တသ္မာ တုဏှီ, ဧဝမေတံ ဓါရယာမီတိ။

တေရသကံ နိဋ္ဌိတံ။

တဿုဒ္ဒါနံ –

ဝိဿဋ္ဌိ ကာယသံသဂ္ဂံ၊ ဒုဋ္ဌုလ္လံ အတ္တကာမဉ္စ။

သဉ္စရိတ္တံ ကုဋီ စေဝ၊ ဝိဟာရော စ အမူလကံ။

ကိဉ္စိလေသဉ္စ ဘေဒေါ စ၊ တဿေဝ အနုဝတ္တကာ။

ဒုဗ္ဗစံ ကုလဒူသဉ္စ၊ သံဃာဒိသေသာ တေရသာတိ။

သံဃာဒိသေသကဏ္ဍံ နိဋ္ဌိတံ။