၂။ ဥဒ္ဒေသဝါရ
၁။ တတ္ထ ကတမေ သောဠသ ဟာရာ? ဒေသနာ ဝိစယော ယုတ္တိ ပဒဋ္ဌာနော လက္ခဏော စတုဗ္ယူဟော အာဝဋ္ဋော ဝိဘတ္တိ ပရိဝတ္တနော ဝေဝစနော ပညတ္တိ ဩတရဏော သောဓနော အဓိဋ္ဌာနော ပရိက္ခာရော သမာရောပနော ဣတိ။
တဿာနုဂီတိ
ဒေသနာ ဝိစယော ယုတ္တိ၊ ပဒဋ္ဌာနော စ လက္ခဏော။
စတုဗ္ယူဟော စ အာဝဋ္ဋော၊ ဝိဘတ္တိ ပရိဝတ္တနော။
ဝေဝစနော စ ပညတ္တိ၊ ဩတရဏော စ သောဓနော။
အဓိဋ္ဌာနော ပရိက္ခာရော၊ သမာရောပနော သောဠသော [သောဠသ (သီ။)]။
ဧတေ သောဠသ ဟာရာ၊ ပကိတ္တိတာ အတ္ထတော အသံကိဏ္ဏာ။
ဧတေသဉ္စေဝ ဘဝတိ၊ ဝိတ္ထာရတယာ နယဝိဘတ္တီတိ။
၂။ တတ္ထ ကတမေ ပဉ္စ နယာ? နန္ဒိယာဝဋ္ဋော တိပုက္ခလော သီဟဝိက္ကီဠိတော ဒိသာလောစနော အင္ကုသော ဣတိ။
တဿာနုဂီတိ
ပဌမော နန္ဒိယာဝဋ္ဋော၊ ဒုတိယော စ တိပုက္ခလော။
သီဟဝိက္ကီဠိတော နာမ၊ တတိယော နယလဉ္ဇကော [နယလဉ္ဆကော (သီ။)]။
ဒိသာလောစနမာဟံသု ၊ စတုတ္ထံ နယမုတ္တမံ။
ပဉ္စမော အင္ကုသော နာမ၊ သဗ္ဗေ ပဉ္စ နယာ ဂတာတိ။
၃။ တတ္ထ ကတမာနိ အဋ္ဌာရသ မူလပဒါနိ? နဝ ပဒါနိ ကုသလာနိ နဝ ပဒါနိ အကုသလာနိ။ တတ္ထ ကတမာနိ နဝ ပဒါနိ အကုသလာနိ, တဏှာ အဝိဇ္ဇာ လောဘော ဒေါသော မောဟော သုဘသညာ သုခသညာ နိစ္စသညာ အတ္တသညာတိ, ဣမာနိ နဝ ပဒါနိ အကုသလာနိ, ယတ္ထ သဗ္ဗော အကုသလပက္ခော သင်္ဂဟံ သမောသရဏံ ဂစ္ဆတိ။
တတ္ထ ကတမာနိ နဝ ပဒါနိ ကုသလာနိ? သမထော ဝိပဿနာ အလောဘော အဒေါသော အမောဟော အသုဘသညာ ဒုက္ခသညာ အနိစ္စသညာ အနတ္တသညာတိ, ဣမာနိ နဝ ပဒါနိ ကုသလာနိ, ယတ္ထ သဗ္ဗော ကုသလပက္ခော သင်္ဂဟံ သမောသရဏံ ဂစ္ဆတိ။
တတ္ရိဒံ ဥဒ္ဒါနံ
တဏှာ စ အဝိဇ္ဇာပိ စ၊ လောဘော ဒေါသော တထေဝ မောဟော စ။
စတုရော စ ဝိပလ္လာသာ၊ ကိလေသဘူမီ နဝ ပဒါနိ။
သမထော စ ဝိပဿနာ စ၊ ကုသလာနိ စ ယာနိ တီဏိ မူလာနိ။
စတုရော သတိပဋ္ဌာနာ၊ ဣန္ဒ္ရိယဘူမီ နဝ ပဒါနိ။
နဝဟိ စ ပဒေဟိ ကုသလာ၊ နဝဟိ စ ယုဇ္ဇန္တိ အကုသလပက္ခာ။
ဧတေ ခေါ မူလပဒါ၊ ဘဝန္တိ အဋ္ဌာရသ ပဒါနီတိ။
ဥဒ္ဒေသဝါရော။