။ နမော တဿ ဘဂဝတော အရဟတော သမ္မာသမ္ဗုဒ္ဓဿ။
ခုဒ္ဒကနိကာယ
နေတ္တိပါဠိ
၁။ သင်္ဂဟဝါရ
ယံ လောကော ပူဇယတေ၊ သလောကပါလော သဒါ နမဿတိ စ။
တဿေတ သာသနဝရံ၊ ဝိဒူဟိ ဉေယျံ နရဝရဿ။
ဒွါဒသ ပဒါနိ သုတ္တံ၊ တံ သဗ္ဗံ ဗျဉ္ဇနဉ္စ အတ္ထော စ။
တံ ဝိညေယျံ ဥဘယံ၊ ကော အတ္ထော ဗျဉ္ဇနံ ကတမံ။
သောဠသဟာရာ နေတ္တိ [နေတ္တီ (က။)]၊ ပဉ္စနယာ သာသနဿ ပရိယေဋ္ဌိ။
အဋ္ဌာရသမူလပဒါ၊ မဟကစ္စာနေန [မဟာကစ္စာနေန (သီ။)] နိဒ္ဒိဋ္ဌာ။
ဟာရာ ဗျဉ္ဇနဝိစယော၊ သုတ္တဿ နယာ တယော စ သုတ္တတ္ထော။
ဥဘယံ ပရိဂ္ဂဟီတံ၊ ဝုစ္စတိ သုတ္တံ ယထာသုတ္တံ။
ယာ စေဝ ဒေသနာ ယဉ္စ၊ ဒေသိတံ ဥဘယမေဝ ဝိညေယျံ။
တတြာယမာနုပုဗ္ဗီ၊ နဝဝိဓသုတ္တန္တပရိယေဋ္ဌီတိ။
သင်္ဂဟဝါရော။