၁၆။ တိံသနိပါတ
၅၁၁။ ကိံဆန္ဒဇာတက (၁)
၁။
ကိံဆန္ဒော ကိမဓိပ္ပါယော၊ ဧကော သမ္မသိ ဃမ္မနိ။
ကိံ ပတ္ထယာနော ကိံ ဧသံ၊ ကေန အတ္ထေန ဗြာဟ္မဏ။
၂။
ယထာ မဟာ ဝါရိဓရော၊ ကုမ္ဘော သုပရိဏာဟဝါ [သုပရိဏာမဝါ (က။)]။
တထူပမံ အမ္ဗပက္ကံ၊ ဝဏ္ဏဂန္ဓရသုတ္တမံ။
၃။
တံ ဝုယှမာနံ သောတေန၊ ဒိသွာနာမလမဇ္ဈိမေ။
ပါဏီဟိ နံ ဂဟေတွာန၊ အဂ္ယာယတနမာဟရိံ။
၄။
တတော ကဒလိပတ္တေသု၊ နိက္ခိပိတွာ သယံ အဟံ။
သတ္ထေန နံ ဝိကပ္ပေတွာ၊ ခုပ္ပိပါသံ အဟာသိ မေ။
၅။
သောဟံ အပေတဒရထော၊ ဗျန္တီဘူတော [ဗျန္တိဘူတော (သီ။ ဣ။ က။)] ဒုခက္ခမော။
အဿာဒံ နာဓိဂစ္ဆာမိ၊ ဖလေသွညေသု ကေသုစိ [ကေသုပိ (က။ သီ။)]။
၆။
သောသေတွာ နူန မရဏံ၊ တံ မမံ အာဝဟိဿတိ။
အမ္ဗံ ယဿ ဖလံ သာဒု၊ မဓုရဂ္ဂံ မနောရမံ။
ယမုဒ္ဓရိံ ဝုယှမာနံ၊ ဥဒဓိသ္မာ မဟဏ္ဏဝေ။
၇။
အက္ခာတံ တေ မယာ သဗ္ဗံ၊ ယသ္မာ ဥပဝသာမဟံ။
ရမ္မံ ပတိ နိသိန္နောသ္မိ၊ ပုထုလောမာယုတာ ပုထု။
၈။
တွဉ္စ ခေါ မေဝ [မေ (သီ။)၊ မမ (?)] အက္ခာဟိ၊ အတ္တာနမပလာယိနိ။
ကာ ဝါ တွမသိ ကလျာဏိ၊ ကိဿ ဝါ တွံ သုမဇ္ဈိမေ။
၉။
ရုပ္ပပဋ္ဋပလိမဋ္ဌီဝ [ရုပ္ပပဋ္ဋပ္လမဋ္ဌီဝ (သျာ။)၊ ရူပပဋ္ဋပမဋ္ဌီဝ (က။)]၊ ဗျဂ္ဃီဝ ဂိရိသာနုဇာ။
ယာ သန္တိ နာရိယော ဒေဝေသု၊ ဒေဝါနံ ပရိစာရိကာ။
၁၀။
ယာ စ မနုဿလောကသ္မိံ၊ ရူပေနာနွာဂတိတ္ထိယော။
ရူပေန တေ သဒိသီ နတ္ထိ၊ ဒေဝေသု ဂန္ဓဗ္ဗမနုဿလောကေ [ဒေဝဂန္ဓဗ္ဗမာနုသေ (သျာ။)]။
ပုဋ္ဌာသိ မေ စာရုပုဗ္ဗင်္ဂိ၊ ဗြူဟိ နာမဉ္စ ဗန္ဓဝေ။
၁၁။
ယံ တွံ ပတိ နိသိန္နောသိ၊ ရမ္မံ ဗြာဟ္မဏ ကောသိကိံ။
သာဟံ ဘုသာလယာ ဝုတ္ထာ၊ ဝရဝါရိဝဟောဃသာ။
၁၂။
နာနာဒုမဂဏာကိဏ္ဏာ၊ ဗဟုကာ ဂိရိကန္ဒရာ။
မမေဝ ပမုခါ ဟောန္တိ၊ အဘိသန္ဒန္တိ ပါဝုသေ။
၁၃။
အထော ဗဟူ ဝနတောဒါ၊ နီလဝါရိဝဟိန္ဓရာ။
ဗဟုကာ နာဂဝိတ္တောဒါ၊ အဘိသန္ဒန္တိ ဝါရိနာ။
၁၄။
တာ အမ္ဗဇမ္ဗုလဗုဇာ၊ နီပါ တာလာ စုဒုမ္ဗရာ [တာလမုဒုမ္ဗရာ (သျာ။ က။)]။
ဗဟူနိ ဖလဇာတာနိ၊ အာဝဟန္တိ အဘိဏှသော။
၁၅။
ယံ ကိဉ္စိ ဥဘတော တီရေ၊ ဖလံ ပတတိ အမ္ဗုနိ။
အသံသယံ တံ သောတဿ၊ ဖလံ ဟောတိ ဝသာနုဂံ။
၁၆။
ဧတဒညာယ မေဓါဝိ၊ ပုထုပည သုဏောဟိ မေ။
မာ ရောစယ မဘိသင်္ဂံ၊ ပဋိသေဓ ဇနာဓိပ။
၁၇။
န ဝါဟံ ဝဍ္ဎဝံ [ဝဒ္ဓဝံ (သီ။ ဣ။)] မညေ၊ ယံ တွံ ရဋ္ဌာဘိဝဍ္ဎန။
အာစေယျမာနော ရာဇိသိ၊ မရဏံ အဘိကင်္ခသိ။
၁၈။
တဿ ဇာနန္တိ ပိတရော၊ ဂန္ဓဗ္ဗာ စ သဒေဝကာ။
ယေ စာပိ ဣသယော လောကေ၊ သညတတ္တာ တပဿိနော။
အသံသယံ တေပိ [တေ (သီ။ ဣ။)] ဇာနန္တိ၊ ပဋ္ဌဘူတာ [ဝဒ္ဓဘူတာ (သီ။ ဣ။)] ယသဿိနော။
၁၉။
ဧဝံ ဝိဒိတွာ ဝိဒူ သဗ္ဗဓမ္မံ၊ ဝိဒ္ဓံသနံ စဝနံ ဇီဝိတဿ။
န စီယတီ တဿ နရဿ ပါပံ၊ သစေ န စေတေတိ ဝဓါယ တဿ။
၂၀။
ဣသိပူဂသမညာတေ၊ ဧဝံ လောက္ယာ ဝိဒိတာ သတိ [ပတိ (က။ သျာ။ က။)]။
အနရိယပရိသမ္ဘာသေ၊ ပါပကမ္မံ ဇိဂီသသိ [ဇိဂိံသသိ (သီ။ သျာ။ ဣ။)]။
၂၁။
သစေ အဟံ မရိဿာမိ၊ တီရေ တေ ပုထုသုဿောဏိ။
အသံသယံ တံ အသိလောကော၊ မယိ ပေတေ အာဂမိဿတိ။
၂၂။
တသ္မာ ဟိ ပါပကံ ကမ္မံ၊ ရက္ခဿေဝ [ရက္ခဿု စ (သျာ။)] သုမဇ္ဈိမေ။
မာ တံ သဗ္ဗော ဇနော ပစ္ဆာ၊ ပကုဋ္ဌာယိ [ပကတ္ထာသိ (သီ။ ဣ။)၊ ပတွက္ခာသိ (သျာ။)] မယိ မတေ။
၂၃။
အညာတမေတံ အဝိသယှသာဟိ၊ အတ္တာနမမ္ဗဉ္စ ဒဒါမိ တေ တံ။
သော ဒုစ္စဇေ ကာမဂုဏေ ပဟာယ၊ သန္တိဉ္စ ဓမ္မဉ္စ အဓိဋ္ဌိတောသိ။
၂၄။
ယော ဟိတွာ ပုဗ္ဗသညောဂံ၊ ပစ္ဆာ သံယောဇနေ ဌိတော။
အဓမ္မဉ္စေဝ စရတိ၊ ပါပဉ္စဿ ပဝဍ္ဎတိ။
၂၅။
ဧဟိ တံ ပါပယိဿာမိ၊ ကာမံ အပ္ပောဿုကော ဘဝ။
ဥပါနယာမိ သီတသ္မိံ၊ ဝိဟရာဟိ အနုဿုကော။
၂၆။
တံ ပုပ္ဖရသမတ္တေဘိ၊ ဝက္ကင်္ဂေဟိ အရိန္ဒမ။
ကောဉ္စာ မယူရာ ဒိဝိယာ၊ ကောလဋ္ဌိမဓုသာဠိကာ။
ကူဇိတာ ဟံသပူဂေဟိ၊ ကောကိလေတ္ထ ပဗောဓရေ။
၂၇။
အမ္ဗေတ္ထ ဝိပ္ပသာခဂ္ဂါ [ဝိပ္ပသူနဂ္ဂါ (သီ။ သျာ။ ဣ။)၊ ဝိပ္ပဩနဂ္ဂါ (က။)]၊ ပလာလခလသန္နိဘာ။
ကောသမ္ဗသဠလာ [ကောသုမ္ဘသလလာ (သီ။ သျာ။ ဣ။)] နီပါ၊ ပက္ကတာလဝိလမ္ဗိနော။
၂၈။
မာလီ တိရိဋီ ကာယူရီ၊ အင်္ဂဒီ စန္ဒနုဿဒေါ [စန္ဒနဿဒေါ (သီ။)]။
ရတ္တိံ တွံ ပရိစာရေသိ၊ ဒိဝါ ဝေဒေသိ ဝေဒနံ။
၂၉။
သောဠသိတ္ထိသဟဿာနိ၊ ယာ တေမာ ပရိစာရိကာ။
ဧဝံ မဟာနုဘာဝေါသိ၊ အဗ္ဘုတော လောမဟံသနော။
၃၀။
ကိံ ကမ္မမကရီ ပုဗ္ဗေ၊ ပါပံ အတ္တဒုခါဝဟံ။
ယံ ကရိတွာ မနုဿေသု၊ ပိဋ္ဌိမံသာနိ ခါဒသိ။
၃၁။
အဇ္ဈေနာနိ ပဋိဂ္ဂယှ၊ ကာမေသု ဂဓိတော [ဂထိတော (သီ။ ဣ။)၊ ဂိဒ္ဓိတော (သျာ။ က။)၊ ဂိဒ္ဓိကော (က။ အဋ္ဌ။)] အဟံ။
အစရိံ ဒီဃမဒ္ဓါနံ၊ ပရေသံ အဟိတာယဟံ။
၃၂။
ယော ပိဋ္ဌိမံသိကော ဟောတိ၊ ဧဝံ ဥက္ကစ္စ ခါဒတိ။
ယထာဟံ အဇ္ဇ ခါဒါမိ၊ ပိဋ္ဌိမံသာနိ အတ္တနောတိ။
ကိံဆန္ဒဇာတကံ ပဌမံ။
၅၁၂။ ကုမ္ဘဇာတကံ (၂)
၃၃။
ကော ပါတုရာသီ တိဒိဝါ နဘမှိ၊ ဩဘာသယံ သံဝရိံ စန္ဒိမာဝ။
ဂတ္တေဟိ တေ ရသ္မိယော နိစ္ဆရန္တိ၊ သတေရတာ [သတေရိတာ (သီ။ သျာ။ က။)] ဝိဇ္ဇုရိဝန္တလိက္ခေ။
၃၄။
သော ဆိန္နဝါတံ ကမသီ အဃမှိ၊ ဝေဟာယသံ ဂစ္ဆသိ တိဋ္ဌသီ စ။
ဣဒ္ဓီ နု တေ ဝတ္ထုကတာ သုဘာဝိတာ၊ အနဒ္ဓဂူနံ အပိ ဒေဝတာနံ။
၃၅။
ဝေဟာယသံ ဂမ္မမာဂမ္မ [ကမမာဂမ္မ (သီ။ သျာ။)] တိဋ္ဌသိ၊ ကုမ္ဘံ ကိဏာထာတိ ယမေတမတ္ထံ။
ကော ဝါ တုဝံ ကိဿ ဝါ တာယ ကုမ္ဘော၊ အက္ခာဟိ မေ ဗြာဟ္မဏ ဧတမတ္ထံ။
၃၆။
န သပ္ပိကုမ္ဘော နပိ တေလကုမ္ဘော၊ န ဖာဏိတဿ န မဓုဿ ကုမ္ဘော။
ကုမ္ဘဿ ဝဇ္ဇာနိ အနပ္ပကာနိ၊ ဒေါသေ ဗဟူ ကုမ္ဘဂတေ သုဏာထ။
၃၇။
ဂဠေယျ ယံ ပိတွာ [ဣတွာ (သီ။ ဣ။)] ပတေ ပပါတံ၊ သောဗ္ဘံ ဂုဟံ စန္ဒနိယောဠိဂလ္လံ။
ဗဟုမ္ပိ ဘုဉ္ဇေယျ အဘောဇနေယျံ၊ တဿာ ပုဏ္ဏံ ကုမ္ဘမိမံ ကိဏာထ။
၃၈။
ယံ ပိတွာ [ယံ ဝေ ဣတွာ (သီ။)] စိတ္တသ္မိမနေသမာနော၊ အာဟိဏ္ဍတီ ဂေါရိဝ ဘက္ခသာရီ [ဘက္ခသာဒီ (သီ။ သျာ။ အဋ္ဌ။)]။
အနာထမာနော ဥပဂါယတိ နစ္စတိ စ၊ တဿာ ပုဏ္ဏံ ကုမ္ဘမိမံ ကိဏာထ။
၃၉။
ယံ ဝေ ပိဝိတွာ အစေလောဝ နဂ္ဂေါ၊ စရေယျ ဂါမေ ဝိသိခန္တရာနိ။
သမ္မူဠှစိတ္တော အတိဝေလသာယီ၊ တဿာ ပုဏ္ဏံ ကုမ္ဘမိမံ ကိဏာထ။
၄၀။
ယံ ပိတွာ ဥဋ္ဌာယ ပဝေဓမာနော၊ သီသဉ္စ ဗာဟုဉ္စ [ဗာဟဉ္စ (ဣ။)] ပစာလယန္တော။
သော နစ္စတီ ဒါရုကဋလ္လကောဝ၊ တဿာ ပုဏ္ဏံ ကုမ္ဘမိမံ ကိဏာထ။
၄၁။
ယံ ဝေ ပိဝိတွာ အဂ္ဂိဒဍ္ဎာ သယန္တိ၊ အထော သိဂါလေဟိပိ ခါဒိတာသေ။
ဗန္ဓံ ဝဓံ ဘောဂဇာနိဉ္စုပေန္တိ၊ တဿာ ပုဏ္ဏံ ကုမ္ဘမိမံ ကိဏာထ။
၄၂။
ယံ ပိတွာ ဘာသေယျ အာဘာသနေယျံ၊ သဘာယမာသီနော အပေတဝတ္ထော။
သမ္မက္ခိတော [သမက္ခိတော (သီ။)] ဝန္တဂတော ဗျသန္နော၊ တဿာ ပုဏ္ဏံ ကုမ္ဘမိမံ ကိဏာထ။
၄၃။
ယံ ဝေ ပိဝိတွာ ဥက္ကဋ္ဌော အာဝိလက္ခော၊ မမေဝ သဗ္ဗာ ပထဝီတိ မညေ [မညတိ (သီ။)]။
န မေ သမော စာတုရန္တောပိ ရာဇာ၊ တဿာ ပုဏ္ဏံ ကုမ္ဘမိမံ ကိဏာထ။
၄၄။
မာနာတိမာနာ ကလဟာနိ ပေသုဏီ၊ ဒုဗ္ဗဏ္ဏိနီ နဂ္ဂယိနီ ပလာယိနီ။
စောရာန ဓုတ္တာန ဂတီ နိကေတော၊ တဿာ ပုဏ္ဏံ ကုမ္ဘမိမံ ကိဏာထ။
၄၅။
ဣဒ္ဓါနိ ဖီတာနိ ကုလာနိ အဿု၊ အနေကသာဟဿဓနာနိ လောကေ။
ဥစ္ဆိန္နဒါယဇ္ဇကတာနိမာယ၊ တဿာ ပုဏ္ဏံ ကုမ္ဘမိမံ ကိဏာထ။
၄၆။
ဓညံ ဓနံ ရဇတံ ဇာတရူပံ၊ ခေတ္တံ ဂဝံ ယတ္ထ ဝိနာသယန္တိ။
ဥစ္ဆေဒနီ ဝိတ္တဝတံ [ဥစ္ဆေဒနီ ဝိတ္တဂတံ (သျာ။)၊ ဥစ္ဆေဒနိဝိတ္တဂတံ (က။)] ကုလာနံ၊ တဿာ ပုဏ္ဏံ ကုမ္ဘမိမံ ကိဏာထ။
၄၇။
ယံ ဝေ ပိတွာ ဒိတ္တရူပေါဝ [ဒုဋ္ဌရူပေါဝ (သီ။)] ပေါသော၊ အက္ကောသတိ မာတရံ ပိတရဉ္စ။
သဿုမ္ပိ ဂဏှေယျ အထောပိ သုဏှံ၊ တဿာ ပုဏ္ဏံ ကုမ္ဘမိမံ ကိဏာထ။
၄၈။
ယံ ဝေ ပိတွာ ဒိတ္တရူပါဝ နာရီ၊ အက္ကောသတိ သသုရံ သာမိကဉ္စ။
ဒါသမ္ပိ ဂဏှေ ပရိစာရကမ္ပိ၊ တဿာ ပုဏ္ဏံ ကုမ္ဘမိမံ ကိဏာထ။
၄၉။
ယံ ဝေ ပိဝိတွာန [ယဉ္စေ ဣတွာန (ဣ။)] ဟနေယျ ပေါသော၊ ဓမ္မေ ဌိတံ သမဏံ ဗြာဟ္မဏံ ဝါ။
ဂစ္ဆေ အပါယမ္ပိ တတောနိဒါနံ၊ တဿာ ပုဏ္ဏံ ကုမ္ဘမိမံ ကိဏာထ။
၅၀။
ယံ ဝေ ပိဝိတွာ ဒုစ္စရိတံ စရန္တိ၊ ကာယေန ဝါစာယ စ စေတသာ စ။
နိရယံ ဝဇန္တိ ဒုစ္စရိတံ စရိတွာ၊ တဿာ ပုဏ္ဏံ ကုမ္ဘမိမံ ကိဏာထ။
၅၁။
ယံ ယာစမာနာ န လဘန္တိ ပုဗ္ဗေ၊ ဗဟုံ ဟိရညမ္ပိ ပရိစ္စဇန္တာ။
သော တံ ပိဝိတွာ အလိကံ ဘဏာတိ၊ တဿာ ပုဏ္ဏံ ကုမ္ဘမိမံ ကိဏာထ။
၅၂။
ယံ ဝေ ပိတွာ ပေသနေ ပေသိယန္တော၊ အစ္စာယိကေ ကရဏီယမှိ ဇာတေ။
အတ္ထမ္ပိ သော နပ္ပဇာနာတိ ဝုတ္တော၊ တဿာ ပုဏ္ဏံ ကုမ္ဘမိမံ ကိဏာထ။
၅၃။
ဟိရီမနာပိ အဟိရီကဘာဝံ၊ ပါတုံ ကရောန္တိ မဒနာယ [မဒိရာယ (ဣ။)] မတ္တာ။
ဓီရာပိ သန္တာ ဗဟုကံ ဘဏန္တိ၊ တဿာ ပုဏ္ဏံ ကုမ္ဘမိမံ ကိဏာထ။
၅၄။
ယံ ဝေ ပိတွာ ဧကထူပါ သယန္တိ၊ အနာသကာ ထဏ္ဍိလဒုက္ခသေယျံ။
ဒုဗ္ဗဏ္ဏိယံ အာယသကျဉ္စုပေန္တိ၊ တဿာ ပုဏ္ဏံ ကုမ္ဘမိမံ ကိဏာထ။
၅၅။
ယံ ဝေ ပိတွာ ပတ္တခန္ဓာ သယန္တိ၊ ဂါဝေါ ကုဋဟတာဝ န ဟိ ဝါရုဏိယာ။
[ယံ ဝေ ပိတွာ ပတ္တက္ခန္ဓာ၊ သယန္တိ ဂါဝေါ ကူဋဟတာရိဝ။ န ဟိ ဝါရုဏိယာ ဝေဂေါ၊ နရေန သုဿဟောရိဝ။ (သီ။)] ဝေဂေါ နရေန သုသဟောရိဝ [ယံ ဝေ ပိတွာ ပတ္တက္ခန္ဓာ၊ သယန္တိ ဂါဝေါ ကူဋဟတာရိဝ။ န ဟိ ဝါရုဏိယာ ဝေဂေါ၊ နရေန သုဿဟောရိဝ။ (သီ။)]၊ တဿာ ပုဏ္ဏံ ကုမ္ဘမိမံ ကိဏာထ။
၅၆။
ယံ မနုဿာ ဝိဝဇ္ဇေန္တိ၊ သပ္ပံ ဃောရဝိသံ မိဝ [ဝိသမိဝ (သျာ။)၊ ဝိသံ ဣဝ (က။)၊ ဝိသာမိဝ (?)]။
တံ လောကေ ဝိသသမာနံ၊ ကော နရော ပါတုမရဟတိ။
၅၇။
ယံ ဝေ ပိတွာ အန္ဓကဝေဏ္ဍပုတ္တာ၊ သမုဒ္ဒတီရေ ပရိစာရယန္တာ [အန္ဓကဝေဏ္ဟုပုတ္တာ (သီ။ ဣ။)၊ အဏ္ဍကဝေဏ္ဍပုတ္တာ (က။)]။
ဥပက္ကမုံ မုသလေဟညမညံ၊ တဿာ ပုဏ္ဏံ ကုမ္ဘမိမံ ကိဏာထ။
၅၈။
ယံ ဝေ ပိတွာ ပုဗ္ဗဒေဝါ ပမတ္တာ၊ တိဒိဝါ စုတာ သဿတိယာ သမာယ။
တံ တာဒိသံ မဇ္ဇမိမံ နိရတ္ထကံ၊ ဇာနံ မဟာရာဇ ကထံ ပိဝေယျ။
၅၉။
နယိမသ္မိံ ကုမ္ဘသ္မိံ ဒဓိ ဝါ မဓု ဝါ၊ ဧဝံ အဘိညာယ ကိဏာဟိ ရာဇ။
ဧဝဉှိမံ ကုမ္ဘဂတာ မယာ တေ၊ အက္ခာတရူပံ တဝ သဗ္ဗမိတ္တ။
၆၀။
န မေ ပိတာ ဝါ အထဝါပိ မာတာ၊ ဧတာဒိသာ ယာဒိသကော တုဝံသိ။
ဟိတာနုကမ္ပီ ပရမတ္ထကာမော၊ သောဟံ ကရိဿံ ဝစနံ တဝဇ္ဇ။
၆၁။
ဒဒါမိ တေ ဂါမဝရာနိ ပဉ္စ၊ ဒါသီသတံ သတ္တ ဂဝံ သတာနိ။
အာဇညယုတ္တေ စ ရထေ ဒသ ဣမေ၊ အာစရိယော ဟောသိ မမတ္ထကာမော။
၆၂။
တဝေဝ ဒါသီသတမတ္ထု ရာဇ၊ ဂါမာ စ ဂါဝေါ စ တဝေဝ ဟောန္တု။
အာဇညယုတ္တာ စ ရထာ တဝေဝ၊ သက္ကောဟမသ္မီ တိဒသာနမိန္ဒော။
၆၃။
မံသောဒနံ သပ္ပိပါယာသံ [သပ္ပိပါယဉ္စ (သီ။)] ဘုဉ္ဇ၊ ခါဒဿု စ တွံ မဓုမာသပူဝေ။
ဧဝံ တုဝံ ဓမ္မရတော ဇနိန္ဒ၊ အနိန္ဒိတော သဂ္ဂမုပေဟိ ဌာနန္တိ။
ကုမ္ဘဇာတကံ ဒုတိယံ။
၅၁၃။ ဇယဒ္ဒိသဇာတကံ (၃)
၆၄။
စိရဿံ ဝတ မေ ဥဒပါဒိ အဇ္ဇ၊ ဘက္ခော မဟာ သတ္တမိဘတ္တကာလေ။
ကုတောသိ ကော ဝါသိ တဒိင်္ဃ ဗြူဟိ၊ အာစိက္ခ ဇာတိံ ဝိဒိတော ယထာသိ။
၆၅။
ပဉ္စာလရာဇာ မိဂဝံ ပဝိဋ္ဌော၊ ဇယဒ္ဒိသော နာမ ယဒိဿုတော တေ။
စရာမိ ကစ္ဆာနိ ဝနာနိ စာဟံ၊ ပသဒံ ဣမံ ခါဒ မမဇ္ဇ မုဉ္စ။
၆၆။
သေနေဝ တွံ ပဏသိ သဿမာနော [သယှမာနော (သျာ။ က။)]၊ မမေသ ဘက္ခော ပသဒေါ ယံ ဝဒေသိ။
တံ ခါဒိယာန ပသဒံ ဇိဃညံ [ဇိဃစ္ဆံ (?)]၊ ခါဒိဿံ ပစ္ဆာ န ဝိလာပကာလော။
၆၇။
န စတ္ထိ မောက္ခော မမ နိက္ကယေန [ဝိက္ကယေန (သီ။)]၊ ဂန္တွာန ပစ္စာဂမနာယ ပဏှေ။
တံ သင်္ကရံ [သင်္ဂရံ (သီ။ သျာ။ ဣ။)] ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ။
၆၈။
ကိံ ကမ္မဇာတံ အနုတပ္ပတေ တွံ [အနုတပ္ပတီ တံ (သီ။ ဣ။)]၊ ပတ္တံ သမီပံ မရဏဿ ရာဇ။
အာစိက္ခ မေ တံ အပိ သက္ကုဏေမု၊ အနုဇာနိတုံ အာဂမနာယ ပဏှေ။
၆၉။
ကတာ မယာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ။
တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇိဿံ။
၇၀။
ယာ တေ ကတာ ဗြာဟ္မဏဿ ဓနာသာ၊ တံ သင်္ကရံ ပဋိမုက္ကံ န မုတ္တံ။
တံ သင်္ကရံ ဗြာဟ္မဏဿပ္ပဒါယ၊ သစ္စာနုရက္ခီ ပုနရာဝဇဿု။
၇၁။
မုတ္တော စ သော ပေါရိသာဒဿ [ပုရိသာဒဿ (ဣ။)] ဟတ္ထာ၊ ဂန္တွာ သကံ မန္ဒိရံ ကာမကာမီ။
တံ သင်္ကရံ ဗြာဟ္မဏဿပ္ပဒါယ၊ အာမန္တယီ ပုတ္တမလီနသတ္တံ [သတ္တုံ (သျာ။ ဣ။ က။)]။
၇၂။
အဇ္ဇေဝ ရဇ္ဇံ အဘိသိဉ္စယဿု၊ ဓမ္မံ စရ သေသု ပရေသု စာပိ။
အဓမ္မကာရော စ တေ မာဟု ရဋ္ဌေ၊ ဂစ္ဆာမဟံ ပေါရိသာဒဿ ဉတ္တေ [ဉန္တေ (သျာ။)]။
၇၃။
ကိံ ကမ္မ ကုဗ္ဗံ တဝ ဒေဝ ပါဝ [ဒေဝပါဒေ (သီ။ သျာ။ ဣ။)]၊ နာရာဓယီ တံ တဒိစ္ဆာမိ သောတုံ။
ယမဇ္ဇ ရဇ္ဇမှိ ဥဒဿယေ တုဝံ၊ ရဇ္ဇမ္ပိ နိစ္ဆေယျံ တယာ ဝိနာဟံ။
၇၄။
န ကမ္မုနာ ဝါ ဝစသာ ဝ တာတ၊ အပရာဓိတောဟံ တုဝိယံ သရာမိ။
သန္ဓိဉ္စ [သဒ္ဓိံ စ (က။)] ကတွာ ပုရိသာဒကေန၊ သစ္စာနုရက္ခီ ပုနာဟံ ဂမိဿံ။
၇၅။
အဟံ ဂမိဿာမိ ဣဓေဝ ဟောဟိ၊ နတ္ထိ တတော ဇီဝတော ဝိပ္ပမောက္ခော။
သစေ တုဝံ ဂစ္ဆသိယေဝ ရာဇ၊ အဟမ္ပိ ဂစ္ဆာမိ ဥဘော န ဟောမ။
၇၆။
အဒ္ဓါ ဟိ တာတ သတာနေသ ဓမ္မော၊ မရဏာ စ မေ ဒုက္ခတရံ တဒဿ။
ကမ္မာသပါဒေါ တံ ယဒါ ပစိတွာ၊ ပသယှ ခါဒေ ဘိဒါ ရုက္ခသူလေ။
၇၇။
ပါဏေန တေ ပါဏမဟံ နိမိဿံ၊ မာ တွံ အဂါ ပေါရိသာဒဿ ဉတ္တေ။
ဧတဉ္စ တေ ပါဏမဟံ နိမိဿံ၊ တသ္မာ မတံ ဇီဝိတဿ ဝဏ္ဏေမိ [ဝရေမိ (သီ။)]။
၇၈။
တတော ဟဝေ ဓိတိမာ ရာဇပုတ္တော၊ ဝန္ဒိတွာ မာတု စ ပိတု စ [ဝန္ဒိတ္ထ မာတုစ္စ ပိတုစ္စ (သီ။ ဣ။)] ပါဒေ။
ဒုခိနိဿ မာတာ နိပတာ [နိပတီ (သီ။ ဣ။)] ပထဗျာ၊ ပိတာဿ ပဂ္ဂယှ ဘုဇာနိ ကန္ဒတိ။
၇၉။
တံ ဂစ္ဆန္တံ တာဝ ပိတာ ဝိဒိတွာ၊ ပရမ္မုခေါ ဝန္ဒတိ ပဉ္ဇလီကော။
သောမော စ ရာဇာ ဝရုဏော စ ရာဇာ၊ ပဇာပတီ စန္ဒိမာ သူရိယော စ။
ဧတေဟိ ဂုတ္တော ပုရိသာဒကမှာ၊ အနုညာတော သောတ္ထိ ပစ္စေဟိ တာတ။
၈၀။
ယံ ဒဏ္ဍကိရညော ဂတဿ [ယံ ဒဏ္ဍကာရညဂတဿ (ဣ။)] မာတာ၊ ရာမဿကာသိ သောတ္ထာနံ သုဂုတ္တာ။
တံ တေ အဟံ သောတ္ထာနံ ကရောမိ၊ ဧတေန သစ္စေန သရန္တု ဒေဝါ။
အနုညာတော သောတ္ထိ ပစ္စေဟိ ပုတ္တ။
၈၁။
အာဝီ ရဟော ဝါဣ မနောပဒေါသံ၊ နာဟံ သရေ ဇာတု မလီနသတ္တေ။
ဧတေန သစ္စေန သရန္တု ဒေဝါ၊ အနုညာတော သောတ္ထိ ပစ္စေဟိ ဘာတိက [ဘာတ (သီ။)၊ ဘာတာ (သျာ။ ဣ။)]။
၈၂။
ယသ္မာ စ မေ အနဓိမနောသိ သာမိ၊ န စာပိ မေ မနသာ အပ္ပိယောသိ။
ဧတေန သစ္စေန သရန္တု ဒေဝါ၊ အနုညာတော သောတ္ထိ ပစ္စေဟိ သာမိ။
၈၃။
ဗြဟာ ဥဇူ စာရုမုခေါ ကုတောသိ၊ န မံ ပဇာနာသိ ဝနေ ဝသန္တံ။
လုဒ္ဒံ မံ ဉတွာ ‘‘ပုရိသာဒကော’’တိ၊ ကော သောတ္ထိ မာဇာနမိဓါ’ဝဇေယျ။
၈၄။
ဇာနာမိ လုဒ္ဒ ပုရိသာဒကော တွံ၊ န တံ န ဇာနာမိ ဝနေ ဝသန္တံ။
အဟဉ္စ ပုတ္တောသ္မိ ဇယဒ္ဒိသဿ၊ မမဇ္ဇ ခါဒ ပိတုနော ပမောက္ခာ။
၈၅။
ဇာနာမိ ပုတ္တောတိ [ပုတ္တောသိ (သျာ။ က။)] ဇယဒ္ဒိသဿ၊ တထာ ဟိ ဝေါ မုခဝဏ္ဏော ဥဘိန္နံ။
သုဒုက္ကရညေဝ [သုဒုက္ကရဉ္စေဝ (သျာ။ ဣ။ က။)] ကတံ တဝေဒံ၊ ယော မတ္တုမိစ္ဆေ ပိတုနော ပမောက္ခာ။
၈၆။
န ဒုက္ကရံ ကိဉ္စိ မဟေတ္ထ မညေ၊ ယော မတ္တုမိစ္ဆေ ပိတုနော ပမောက္ခာ။
မာတု စ [မာတုစ္စ (သီ။)] ဟေတု ပရလောက ဂန္တွာ [ဂမ္ယာ (သီ။ သျာ။)၊ ဂမ္ယ (ဣ။)]၊ သုခေန သဂ္ဂေန စ သမ္ပယုတ္တော။
၈၇။
အဟဉ္စ ခေါ အတ္တနော ပါပကိရိယံ၊ အာဝီ ရဟော ဝါပိ သရေ န ဇာတု။
သင်္ခါတဇာတီမရဏောဟမသ္မိ၊ ယထေဝ မေ ဣဓ တထာ ပရတ္ထ။
၈၈။
ခါဒဇ္ဇ မံ ဒါနိ မဟာနုဘာဝ၊ ကရဿု ကိစ္စာနိ ဣမံ သရီရံ။
ရုက္ခဿ ဝါ တေ ပပတာမိ အဂ္ဂါ၊ ဆာဒယမာနော မယှံ တွမဒေသိ မံသံ။
၈၉။
ဣဒဉ္စ တေ ရုစ္စတိ ရာဇပုတ္တ၊ စဇေသိ [စဇာသိ (သီ။ ဣ။)] ပါဏံ ပိတုနော ပမောက္ခာ။
တသ္မာ ဟိ သော [တသ္မာတိဟ (သီ။ သျာ။)] တွံ တရမာနရူပေါ၊ သမ္ဘဉ္ဇ ကဋ္ဌာနိ ဇလေဟိ အဂ္ဂိံ။
၉၀။
တတော ဟဝေ ဓိတိမာ ရာဇပုတ္တော၊ ဒါရုံ သမာဟတွာ မဟန္တမဂ္ဂိံ။
သန္ဒီပယိတွာ ပဋိဝေဒယိတ္ထ၊ အာဒီပိတော ဒါနိ မဟာယမဂ္ဂိ [မယာ ယက္ခမဂ္ဂိ (က။)]။
၉၁။
ခါဒဇ္ဇ မံ ဒါနိ ပသယှကာရီ၊ ကိံ မံ မုဟုံ ပေက္ခသိ ဟဋ္ဌလောမော။
တထာ တထာ တုယှမဟံ ကရောမိ၊ ယထာ ယထာ မံ ဆာဒယမာနော အဒေသိ။
၉၂။
ကော တာဒိသံ အရဟတိ ခါဒိတာယေ၊ ဓမ္မေ ဌိတံ သစ္စဝါဒိံ ဝဒညုံ။
မုဒ္ဓါပိ တဿ ဝိဖလေယျ သတ္တဓါ၊ ယော တာဒိသံ သစ္စဝါဒိံ အဒေယျ။
၉၃။
ဣဒဉှိ သော ဗြာဟ္မဏံ မညမာနော၊ သသော အဝါသေသိ သကေ သရီရေ။
တေနေဝ သော စန္ဒိမာ ဒေဝပုတ္တော၊ သသတ္ထုတော [သသဋ္ဌကော (သျာ။)] ကာမဒုဟဇ္ဇ [ကာမရုဟဇ္ဇ (က။)] ယက္ခ။
၉၄။
စန္ဒော ယထာ ရာဟုမုခါ ပမုတ္တော၊ ဝိရောစတေ ပန္နရသေဝ ဘာဏုမာ [ဘာနုမာ (သီ။ ဣ။)]။
ဧဝံ တုဝံ ပေါရိသာဒါ ပမုတ္တော၊ ဝိရောစ ကပိလေ [ကမ္ပိလ္လ (သီ။ ဣ။)၊ ကပိလ္လေ (သျာ။)] မဟာနုဘာဝ။
အာမောဒယံ ပိတရံ မာတရဉ္စ၊ သဗ္ဗော စ တေ နန္ဒတု ဉာတိပက္ခော။
၉၅။
တတော ဟဝေ ဓိတိမာ ရာဇပုတ္တော၊ ကတဉ္ဇလီ ပရိယာယ [ပရိယဂါ (သီ။)၊ ပဂ္ဂယှ (သျာ။ ဣ။)] ပေါရိသာဒံ။
အနုညာတော သောတ္ထိ သုခီ အရောဂေါ၊ ပစ္စာဂမာ [ပစ္စာဂ (ဣ။)] ကပိလမလီနသတ္တာ [ကမ္ပိလ္လ’မလီနသတ္တော (သီ။ ဣ။)၊ ကပိလ’မလီနသတ္တာ (က။)]။
၉၆။
တံ နေဂမာ ဇာနပဒါ စ သဗ္ဗေ၊ ဟတ္ထာရောဟာ ရထိကာ ပတ္တိကာ စ။
နမဿမာနာ ပဉ္ဇလိကာ ဥပါဂမုံ၊ နမတ္ထု တေ ဒုက္ကရကာရကောသီတိ။
ဇယဒ္ဒိသဇာတကံ [ဇယဒိသဇာတကံ (က။)] တတိယံ။
၅၁၄။ ဆဒ္ဒန္တဇာတကံ (၄)
၉၇။
ကိံ နု သောစသိနုစ္စင်္ဂိ၊ ပဏ္ဍူသိ ဝရဝဏ္ဏိနိ။
မိလာယသိ ဝိသာလက္ခိ၊ မာလာဝ ပရိမဒ္ဒိတာ။
၉၈။
ဒေါဟဠော မေ မဟာရာဇ၊ သုပိနန္တေနုပဇ္ဈဂါ [နု’ပစ္စဂါ (သီ။ သျာ။ ဣ။)]။
န သော သုလဘရူပေါဝ၊ ယာဒိသော မမ ဒေါဟဠော။
၉၉။
ယေ ကေစိ မာနုသာ ကာမာ၊ ဣဓ လောကသ္မိ နန္ဒနေ။
သဗ္ဗေ တေ ပစုရာ မယှံ၊ အဟံ တေ ဒမ္မိ ဒေါဟဠံ။
၁၀၀။
လုဒ္ဒါ ဒေဝ သမာယန္တု၊ ယေ ကေစိ ဝိဇိတေ တဝ။
ဧတေသံ အဟမက္ခိဿံ၊ ယာဒိသော မမ ဒေါဟဠော။
၁၀၁။
ဣမေ တေ လုဒ္ဒကာ ဒေဝိ၊ ကတဟတ္ထာ ဝိသာရဒါ။
ဝနညူ စ မိဂညူ စ၊ မမတ္ထေ [မမ တေ (ဣ။)] စတ္တဇီဝိတာ။
၁၀၂။
လုဒ္ဒပုတ္တာ နိသာမေထ၊ ယာဝန္တေတ္ထ သမာဂတာ။
ဆဗ္ဗိသာဏံ ဂဇံ သေတံ၊ အဒ္ဒသံ သုပိနေ အဟံ။
တဿ ဒန္တေဟိ မေ အတ္ထော၊ အလာဘေ နတ္ထိ ဇီဝိတံ။
၁၀၃။
န နော ပိတူနံ န ပိတာမဟာနံ၊ ဒိဋ္ဌော သုတော ကုဉ္ဇရော ဆဗ္ဗိသာဏော။
ယမဒ္ဒသာ သုပိနေ ရာဇပုတ္တီ၊ အက္ခာဟိ နော ယာဒိသော ဟတ္ထိနာဂေါ။
၁၀၄။
ဒိသာ စတဿော ဝိဒိသာ စတဿော၊ ဥဒ္ဓံ အဓေါ ဒသ ဒိသာ ဣမာယော။
ကတမံ ဒိသံ တိဋ္ဌတိ နာဂရာဇာ၊ ယမဒ္ဒသာ သုပိနေ ဆဗ္ဗိသာဏံ။
၁၀၅။
ဣတော ဥဇုံ ဥတ္တရိယံ ဒိသာယံ၊ အတိက္ကမ္မ သော သတ္တဂိရီ ဗြဟန္တေ။
သုဝဏ္ဏပဿော နာမ ဂိရီ ဥဠာရော၊ သုပုပ္ဖိတော [သမ္ပုပ္ဖိတော (သျာ။)] ကိမ္ပုရိသာနုစိဏ္ဏော။
၁၀၆။
အာရုယှ သေလံ ဘဝနံ ကိန္နရာနံ၊ ဩလောကယ ပဗ္ဗတပါဒမူလံ။
အထ ဒက္ခသီ မေဃသမာနဝဏ္ဏံ၊ နိဂြောဓရာဇံ အထ သဟဿပါဒံ [ပေါရံ (က။)]။
၁၀၇။
တတ္ထစ္ဆတီ ကုဉ္ဇရော ဆဗ္ဗိသာဏော၊ သဗ္ဗသေတော ဒုပ္ပသဟော ပရေဘိ။
ရက္ခန္တိ နံ အဋ္ဌသဟဿနာဂါ၊ ဤသာဒန္တာ ဝါတဇဝပ္ပဟာရိနော။
၁၀၈။
တိဋ္ဌန္တိ တေ တုမူလံ [တုမူလ (သျာ။)၊ ဘိမူလ (ဣ။ က။)] ပဿသန္တာ၊ ကုပ္ပန္တိ ဝါတဿပိ ဧရိတဿ။
မနုဿဘူတံ ပန တတ္ထ ဒိသွာ၊ ဘသ္မံ ကရေယျုံ နာဿ ရဇောပိ တဿ။
၁၀၉။
ဗဟူ ဟိမေ ရာဇကုလမှိ သန္တိ၊ ပိဠန္ဓနာ ဇာတရူပဿ ဒေဝီ။
မုတ္တာမဏီဝေဠုရိယာမယာ စ၊ ကိံ ကာဟသိ ဒန္တပိဠန္ဓနေန။
မာရေတုကာမာ ကုဉ္ဇရံ ဆဗ္ဗိသာဏံ၊ ဥဒါဟု ဃာတေဿသိ လုဒ္ဒပုတ္တေ။
၁၁၀။
သာ ဣဿိတာ ဒုက္ခိတာ စသ္မိ လုဒ္ဒ၊ ဥဒ္ဓဉ္စ သုဿာမိ အနုဿရန္တီ။
ကရောဟိ မေ လုဒ္ဒက ဧတမတ္ထံ၊ ဒဿာမိ တေ ဂါမဝရာနိ ပဉ္စ။
၁၁၁။
ကတ္ထစ္ဆတီ ကတ္ထမုပေတိ ဌာနံ၊ ဝီထိဿ ကာ နှာန [နဟာန (သီ။ ဣ။)] ဂတဿ ဟောတိ။
ကထံဟိ သော နှာယတိ [နဟာယတိ (သီ။ ဣ။)] နာဂရာဇာ၊ ကထံ ဝိဇာနေမု ဂတိံ ဂဇဿ။
၁၁၂။
တတ္ထေဝ သာ ပေါက္ခရဏီ အဒူရေ [အဝိဒူရေ (သျာ။ က။)]၊ ရမ္မာ သုတိတ္ထာ စ မဟောဒိကာ [မဟောဒကာ (သျာ။ က။)] စ။
သမ္ပုပ္ဖိတာ ဘမရဂဏာနုစိဏ္ဏာ [ကိဏ္ဏာ (ကတ္ထစိ)]၊ ဧတ္ထ ဟိ သော နှာယတိ နာဂရာဇာ။
၁၁၃။
သီသံ နဟာတုပ္ပလ [နဟာတော ဥပ္ပလ (သီ။ သျာ။ ဣ။)] မာလဘာရီ၊ သဗ္ဗသေတော ပုဏ္ဍရီကတ္တစင်္ဂီ။
အာမောဒမာနော ဂစ္ဆတိ သန္နိကေတံ၊ ပုရက္ခတွာ မဟေသိံ သဗ္ဗဘဒ္ဒံ။
၁၁၄။
တတ္ထေဝ သော ဥဂ္ဂဟေတွာန ဝါက္ယံ၊ အာဒါယ တူဏိဉ္စ ဓနုဉ္စ လုဒ္ဒေါ။
ဝိတုရိယတိ [ဝိတုရိယ သော (သီ။ အဋ္ဌ။)] သတ္တဂိရီ ဗြဟန္တေ၊ သုဝဏ္ဏပဿံ နာမ ဂိရိံ ဥဠာရံ။
၁၁၅။
အာရုယှ သေလံ ဘဝနံ ကိန္နရာနံ၊ ဩလောကယီ ပဗ္ဗတပါဒမူလံ။
တတ္ထဒ္ဒသာ မေဃသမာနဝဏ္ဏံ၊ နိဂြောဓရာဇံ အဋ္ဌသဟဿပါဒံ။
၁၁၆။
တတ္ထဒ္ဒသာ ကုဉ္ဇရံ ဆဗ္ဗိသာဏံ၊ သဗ္ဗသေတံ ဒုပ္ပသဟံ ပရေဘိ။
ရက္ခန္တိ နံ အဋ္ဌသဟဿနာဂါ၊ ဤသာဒန္တာ ဝါတဇဝပ္ပဟာရိနော။
၁၁၇။
တတ္ထဒ္ဒသာ ပေါက္ခရဏိံ အဒူရေ၊ ရမ္မံ သုတိတ္ထဉ္စ မဟောဒိကဉ္စ။
သမ္ပုပ္ဖိတံ ဘမရဂဏာနုစိဏ္ဏံ၊ ယတ္ထ ဟိ သော နှာယတိ နာဂရာဇာ။
၁၁၈။
ဒိသွာန နာဂဿ ဂတိံ ဌိတိဉ္စ၊ ဝီထိဿ ယာ နှာနဂတဿ ဟောတိ။
ဩပါတမာဂစ္ဆိ အနရိယရူပေါ၊ ပယောဇိတော စိတ္တဝသာနုဂါယ။
၁၁၉။
ခဏိတွာန ကာသုံ ဖလကေဟိ ဆာဒယိ၊ အတ္တာနမောဓါယ ဓနုဉ္စ လုဒ္ဒေါ။
ပဿာဂတံ ပုထုသလ္လေန နာဂံ၊ သမပ္ပယီ ဒုက္ကဋကမ္မကာရီ။
၁၂၀။
ဝိဒ္ဓေါ စ နာဂေါ ကောဉ္စမနာဒိ ဃောရံ၊ သဗ္ဗေ စ [သဗ္ဗေဝ (သီ။ သျာ။ ဣ။)] နာဂါ နိန္နဒုံ [နိန္နာဒု (သျာ။)၊ နိန္နာဒံ (က။)] ဃောရရူပံ။
တိဏဉ္စ ကဋ္ဌဉ္စ ရဏံ [စုဏ္ဏံ (က။ သီ။ ဣ။)] ကရောန္တာ၊ ဓါဝိံသု တေ အဋ္ဌဒိသာ သမန္တတော။
၁၂၁။
ဝဓိဿမေတန္တိ [ဝဓိဿမေနန္တိ (သျာ။)] ပရာမသန္တော၊ ကာသာဝမဒ္ဒက္ခိ ဓဇံ ဣသီနံ။
ဒုက္ခေန ဖုဋ္ဌဿုဒပါဒိ သညာ၊ အရဟဒ္ဓဇော သဗ္ဘိ အဝဇ္ဈရူပေါ။
၁၂၂။
အနိက္ကသာဝေါ ကာသာဝံ၊ ယော ဝတ္ထံ ပရိဒဟိဿတိ [ပရိဒဟေဿတိ (သီ။ ဣ။)၊ ပရိဓဿတိ (ကတ္ထစိ)]။
အပေတော ဒမသစ္စေန၊ န သော ကာသာဝမရဟတိ။
၁၂၃။
ယော စ ဝန္တကသာဝဿ၊ သီလေသု သုသမာဟိတော။
ဥပေတော ဒမသစ္စေန၊ သ ဝေ ကာသာဝမရဟတိ။
၁၂၄။
သမပ္ပိတော ပုထုသလ္လေန နာဂေါ၊ အဒုဋ္ဌစိတ္တော လုဒ္ဒကမဇ္ဈဘာသိ။
ကိမတ္ထယံ ကိဿ ဝါ သမ္မ ဟေတု၊ မမံ ဝဓီ ကဿ ဝါယံ ပယောဂေါ။
၁၂၅။
ကာသိဿ ရညော မဟေသီ ဘဒန္တေ၊ သာ ပူဇိတာ ရာဇကုလေ သုဘဒ္ဒါ။
တံ အဒ္ဒသာ သာ စ မမံ အသံသိ၊ ဒန္တေဟိ အတ္ထောတိ စ မံ [အတ္ထောတိ မမံ (သျာ။ က။)] အဝေါစ။
၁၂၆။
ဗဟူ ဟိ မေ ဒန္တယုဂါ ဥဠာရာ၊ ယေ မေ ပိတူနဉ္စ [ပိတုန္နမ္ပိ (ဣ။)] ပိတာမဟာနံ။
ဇာနာတိ သာ ကောဓနာ ရာဇပုတ္တီ၊ ဝဓတ္ထိကာ ဝေရမကာသိ ဗာလာ။
၁၂၇။
ဥဋ္ဌေဟိ တွံ လုဒ္ဒ ခရံ ဂဟေတွာ၊ ဒန္တေ ဣမေ ဆိန္ဒ ပုရာ မရာမိ။
ဝဇ္ဇာသိ တံ ကောဓနံ ရာဇပုတ္တိံ၊ ‘‘နာဂေါ ဟတော ဟန္ဒ ဣမဿ ဒန္တာ’’။
၁၂၈။
ဥဋ္ဌာယ သော လုဒ္ဒေါ ခရံ ဂဟေတွာ၊ ဆေတွာန ဒန္တာနိ ဂဇုတ္တမဿ။
ဝဂ္ဂူ သုဘေ အပ္ပဋိမေ ပထဗျာ၊ အာဒါယ ပက္ကာမိ တတော ဟိ ခိပ္ပံ။
၁၂၉။
ဘယဋ္ဋိတာ [ဘယဒ္ဒိတာ (သီ။ ဣ။)] နာဂဝဓေန အဋ္ဋာ၊ ယေ တေ နာဂါ အဋ္ဌ ဒိသာ ဝိဓါဝုံ။
အဒိသွာန [အဒိသွ (သီ။ ဣ။)] ပေါသံ ဂဇပစ္စမိတ္တံ၊ ပစ္စာဂမုံ ယေန သော နာဂရာဇာ။
၁၃၀။
တေ တတ္ထ ကန္ဒိတွာ ရောဒိတွာန [ရောဒိတွ (သီ။ ဣ။)] နာဂါ၊ သီသေ သကေ ပံသုကံ ဩကိရိတွာ။
အဂမံသု တေ သဗ္ဗေ သကံ နိကေတံ၊ ပုရက္ခတွာ မဟေသိံ သဗ္ဗဘဒ္ဒံ။
၁၃၁။
အာဒါယ ဒန္တာနိ ဂဇုတ္တမဿ၊ ဝဂ္ဂူ သုဘေ အပ္ပဋိမေ ပထဗျာ။
သုဝဏ္ဏရာဇီဟိ သမန္တမောဒရေ၊ သော လုဒ္ဒကော ကာသိပုရံ ဥပါဂမိ။
ဥပနေသိ သော ရာဇကညာယ ဒန္တေ၊ နာဂေါ ဟတော ဟန္ဒ ဣမဿ ဒန္တာ။
၁၃၂။
ဒိသွာန ဒန္တာနိ ဂဇုတ္တမဿ၊ ဘတ္တုပ္ပိယဿ ပုရိမာယ ဇာတိယာ။
တတ္ထေဝ တဿာ ဟဒယံ အဖာလိ၊ တေနေဝ သာ ကာလမကာသိ ဗာလာ။
၁၃၃။
သမ္ဗောဓိပတ္တော သ [စ (သီ။ သျာ။)၊ ဝ (ဣ။)] မဟာနုဘာဝေါ၊ သိတံ အကာသိ ပရိသာယ မဇ္ဈေ။
ပုစ္ဆိံသု ဘိက္ခူ သုဝိမုတ္တစိတ္တာ၊ နာကာရဏေ ပါတုကရောန္တိ ဗုဒ္ဓါ။
၁၃၄။
ယမဒ္ဒသာထ ဒဟရိံ ကုမာရိံ၊ ကာသာယဝတ္ထံ အနဂါရိယံ စရန္တိံ။
သာ ခေါ တဒါ ရာဇကညာ အဟောသိ၊ အဟံ တဒါ နာဂရာဇာ အဟောသိံ။
၁၃၅။
အာဒါယ ဒန္တာနိ ဂဇုတ္တမဿ၊ ဝဂ္ဂူ သုဘေ အပ္ပဋိမေ ပထဗျာ။
ယော လုဒ္ဒကော ကာသိပုရံ ဥပါဂမိ၊ သော ခေါ တဒါ ဒေဝဒတ္တော အဟောသိ။
၁၃၆။
အနာဝသူရံ စိရရတ္တသံသိတံ၊ ဥစ္စာဝစံ [ဥစံ နီစံ (သီ။ သျာ။ ဣ။)] စရိတမိဒံ ပုရာဏံ။
ဝီတဒ္ဒရော ဝီတသောကော ဝိသလ္လော၊ သယံ အဘိညာယ အဘာသိ ဗုဒ္ဓေါ။
၁၃၇။
အဟံ ဝေါ တေန ကာလေန၊ အဟောသိံ တတ္ထ ဘိက္ခဝေါ။
နာဂရာဇာ တဒါ ဟောမိ [ဟောသိံ (သီ။ သျာ။ ဣ။)]၊ ဧဝံ ဓါရေထ ဇာတကန္တိ။
ဆဒ္ဒန္တဇာတကံ စတုတ္ထံ။
၅၁၅။ သမ္ဘဝဇာတကံ (၅)
၁၃၈။
ရဇ္ဇဉ္စ ပဋိပန္နာသ္မ၊ အာဓိပစ္စံ သုစီရတ။
မဟတ္တံ ပတ္တုမိစ္ဆာမိ၊ ဝိဇေတုံ ပထဝိံ ဣမံ။
၁၃၉။
ဓမ္မေန နော အဓမ္မေန၊ အဓမ္မော မေ န ရုစ္စတိ။
ကိစ္စောဝ ဓမ္မော စရိတော၊ ရညော ဟောတိ သုစီရတ။
၁၄၀။
ဣဓ စေဝါနိန္ဒိတာ ယေန၊ ပေစ္စ ယေန အနိန္ဒိတာ။
ယသံ ဒေဝမနုဿေသု၊ ယေန ပပ္ပောမု [ပပ္ပေမု (သီ။ အဋ္ဌ။)] ဗြာဟ္မဏ။
၁၄၁။
ယောဟံ အတ္ထဉ္စ ဓမ္မဉ္စ၊ ကတ္တုမိစ္ဆာမိ ဗြာဟ္မဏ။
တံ တွံ အတ္ထဉ္စ ဓမ္မဉ္စ၊ ဗြာဟ္မဏက္ခာဟိ ပုစ္ဆိတော။
၁၄၂။
နာညတြ ဝိဓုရာ ရာဇ၊ ဧတဒက္ခာတုမရဟတိ။
ယံ တွံ အတ္ထဉ္စ ဓမ္မဉ္စ၊ ကတ္တုမိစ္ဆသိ ခတ္တိယ။
၁၄၃။
ဧဟိ ခေါ ပဟိတော ဂစ္ဆ၊ ဝိဓုရဿ ဥပန္တိကံ။
နိက္ခဉ္စိမံ [နိက္ခံ ရတ္တ (သီ။)၊ နိက္ခမိမံ (ဣ။)] သုဝဏ္ဏဿ၊ ဟရံ ဂစ္ဆ သုစီရတ။
အဘိဟာရံ ဣမံ ဒဇ္ဇာ၊ အတ္ထဓမ္မာနုသိဋ္ဌိယာ။
၁၄၄။
သွာဓိပ္ပါဂါ ဘာရဒွါဇော၊ ဝိဓုရဿ ဥပန္တိကံ။
တမဒ္ဒသ မဟာဗြဟ္မာ၊ အသမာနံ သကေ ဃရေ။
၁၄၅။
ရညောဟံ ပဟိတော ဒူတော၊ ကောရဗျဿ ယသဿိနော။
‘‘အတ္ထံ ဓမ္မဉ္စ ပုစ္ဆေသိ’’၊ ဣစ္စဗြဝိ ယုဓိဋ္ဌိလော။
တံ တွံ အတ္ထဉ္စ ဓမ္မဉ္စ၊ ဝိဓုရက္ခာဟိ ပုစ္ဆိတော။
၁၄၆။
ဂင်္ဂံ မေ ပိဒဟိဿန္တိ၊ န တံ သက္ကောမိ ဗြာဟ္မဏ။
အပိဓေတုံ မဟာသိန္ဓုံ၊ တံ ကထံ သော ဘဝိဿတိ။
၁၄၇။
န တေ သက္ကောမိ အက္ခာတုံ၊ အတ္ထံ ဓမ္မဉ္စ ပုစ္ဆိတော။
ဘဒြကာရော စ မေ ပုတ္တော၊ ဩရသော မမ အတြဇော။
တံ တွံ အတ္ထဉ္စ ဓမ္မဉ္စ၊ ဂန္တွာ ပုစ္ဆဿု ဗြာဟ္မဏ။
၁၄၈။
သွာဓိပ္ပါဂါ ဘာရဒွါဇော၊ ဘဒြကာရဿုပန္တိကံ [ဘဒြကာရဿ သန္တိကံ (သီ။ သျာ။)]။
တမဒ္ဒသ မဟာဗြဟ္မာ၊ နိသိန္နံ သမှိ ဝေသ္မနိ။
၁၄၉။
ရညောဟံ ပဟိတော ဒူတော၊ ကောရဗျဿ ယသဿိနော။
‘‘အတ္ထံ ဓမ္မဉ္စ ပုစ္ဆေသိ’’၊ ဣစ္စဗြဝိ ယုဓိဋ္ဌိလော။
တံ တွံ အတ္ထဉ္စ ဓမ္မဉ္စ၊ ဘဒြကာရ ပဗြူဟိ [ဗြဝီဟိ (သီ။ ဣ။)] မေ။
၁၅၀။
မံသကာဇံ [မံသကာစံ (ဣ။)] အဝဟာယ၊ ဂေါဓံ အနုပတာမဟံ။
န တေ သက္ကောမိ အက္ခာတုံ၊ အတ္ထံ ဓမ္မဉ္စ ပုစ္ဆိတော။
၁၅၁။
သဉ္စယော [သဉ္ဇယော (သီ။ သျာ။ ဣ။)] နာမ မေ ဘာတာ၊ ကနိဋ္ဌော မေ သုစီရတ။
တံ တွံ အတ္ထဉ္စ ဓမ္မဉ္စ၊ ဂန္တွာ ပုစ္ဆဿု ဗြာဟ္မဏ။
၁၅၂။
သွာဓိပ္ပါဂါ ဘာရဒွါဇော၊ သဉ္စယဿ ဥပန္တိကံ။
တမဒ္ဒသ မဟာဗြဟ္မာ၊ နိသိန္နံ သမှိ ဝေသ္မနိ [ပရိသတိ (သျာ။)၊ ပရီသတိ (ဣ။)]။
၁၅၃။
ရညောဟံ ပဟိတော ဒူတော၊ ကောရဗျဿ ယသဿိနော။
‘‘အတ္ထံ ဓမ္မဉ္စ ပုစ္ဆေသိ’’၊ ဣစ္စဗြဝိ ယုဓိဋ္ဌိလော။
တံ တွံ အတ္ထဉ္စ ဓမ္မဉ္စ၊ သဉ္စယက္ခာဟိ ပုစ္ဆိတော။
၁၅၄။
သဒါ မံ ဂိလတေ [ဂိလတီ (သီ။)၊ ဂိလတိ (ဣ။)] မစ္စု၊ သာယံ ပါတော သုစီရတ။
န တေ သက္ကောမိ အက္ခာတုံ၊ အတ္ထံ ဓမ္မဉ္စ ပုစ္ဆိတော။
၁၅၅။
သမ္ဘဝေါ နာမ မေ ဘာတာ၊ ကနိဋ္ဌော မေ သုစီရတ။
တံ တွံ အတ္ထဉ္စ ဓမ္မဉ္စ၊ ဂန္တွာ ပုစ္ဆဿု ဗြာဟ္မဏ။
၁၅၆။
အဗ္ဘုတော ဝတ ဘော ဓမ္မော၊ နာယံ အသ္မာက ရုစ္စတိ။
တယော ဇနာ ပိတာပုတ္တာ၊ တေသု ပညာယ နော ဝိဒူ။
၁၅၇။
န တံ သက္ကောထ အက္ခာတုံ၊ အတ္ထံ ဓမ္မဉ္စ ပုစ္ဆိတာ။
ကထံ နု ဒဟရော ဇညာ၊ အတ္ထံ ဓမ္မဉ္စ ပုစ္ဆိတော။
၁၅၈။
မာ နံ ဒဟရောတိ ဥညာသိ [မညာသိ (သျာ။ က။)]၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၅၉။
ယထာပိ စန္ဒော ဝိမလော၊ ဂစ္ဆံ အာကာသဓါတုယာ။
သဗ္ဗေ တာရာဂဏေ လောကေ၊ အာဘာယ အတိရောစတိ။
၁၆၀။
ဧဝမ္ပိ ဒဟရူပေတော၊ ပညာယောဂေန သမ္ဘဝေါ။
မာ နံ ဒဟရောတိ ဥညာသိ၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၆၁။
ယထာပိ ရမ္မကော မာသော၊ ဂိမှာနံ ဟောတိ ဗြာဟ္မဏ။
အတေဝညေဟိ မာသေဟိ၊ ဒုမပုပ္ဖေဟိ သောဘတိ။
၁၆၂။
ဧဝမ္ပိ ဒဟရူပေတော၊ ပညာယောဂေန သမ္ဘဝေါ။
မာ နံ ဒဟရောတိ ဥညာသိ၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၆၃။
ယထာပိ ဟိမဝါ ဗြဟ္မေ၊ ပဗ္ဗတော ဂန္ဓမာဒနော။
နာနာရုက္ခေဟိ သဉ္ဆန္နော၊ မဟာဘူတဂဏာလယော။
ဩသဓေဟိ စ ဒိဗ္ဗေဟိ၊ ဒိသာ ဘာတိ ပဝါတိ စ။
၁၆၄။
ဧဝမ္ပိ ဒဟရူပေတော၊ ပညာယောဂေန သမ္ဘဝေါ။
မာ နံ ဒဟရောတိ ဥညာသိ၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၆၅။
ယထာပိ ပါဝကော ဗြဟ္မေ၊ အစ္စိမာလီ ယသဿိမာ။
ဇလမာနော ဝနေ ဂစ္ဆေ [စရံ ကစ္ဆေ (ဣ။)]၊ အနလော ကဏှဝတ္တနီ။
၁၆၆။
ဃတာသနော ဓူမကေတု၊ ဥတ္တမာဟေဝနန္ဒဟော။
နိသီထေ [နိဿီဝေ (သျာ။)၊ နိသိဝေ (က။)] ပဗ္ဗတဂ္ဂသ္မိံ၊ ပဟူတေဓေါ [ဗဟုတေဇော (သျာ။ က။)] ဝိရောစတိ။
၁၆၇။
ဧဝမ္ပိ ဒဟရူပေတော၊ ပညာယောဂေန သမ္ဘဝေါ။
မာ နံ ဒဟရောတိ ဥညာသိ၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၆၈။
ဇဝေန ဘဒြံ ဇာနန္တိ၊ ဗလိဗဒ္ဒဉ္စ [ဗလိဝဒ္ဒဉ္စ (သီ။ ဣ။)] ဝါဟိယေ။
ဒေါဟေန ဓေနုံ ဇာနန္တိ၊ ဘာသမာနဉ္စ ပဏ္ဍိတံ။
၁၆၉။
ဧဝမ္ပိ ဒဟရူပေတော၊ ပညာယောဂေန သမ္ဘဝေါ။
မာ နံ ဒဟရောတိ ဥညာသိ၊ အပုစ္ဆိတွာန သမ္ဘဝံ။
ပုစ္ဆိတွာ သမ္ဘဝံ ဇညာ၊ အတ္ထံ ဓမ္မဉ္စ ဗြာဟ္မဏ။
၁၇၀။
သွာဓိပ္ပါဂါ ဘာရဒွါဇော၊ သမ္ဘဝဿ ဥပန္တိကံ။
တမဒ္ဒသ မဟာဗြဟ္မာ၊ ကီဠမာနံ ဗဟီပုရေ။
၁၇၁။
ရညောဟံ ပဟိတော ဒူတော၊ ကောရဗျဿ ယသဿိနော။
‘‘အတ္ထံ ဓမ္မဉ္စ ပုစ္ဆေသိ’’၊ ဣစ္စဗြဝိ ယုဓိဋ္ဌိလော။
တံ တွံ အတ္ထဉ္စ ဓမ္မဉ္စ၊ သမ္ဘဝက္ခာဟိ ပုစ္ဆိတော။
၁၇၂။
တဂ္ဃ တေ အဟမက္ခိဿံ၊ ယထာပိ ကုသလော တထာ။
ရာဇာ စ ခေါ တံ ဇာနာတိ၊ ယဒိ ကာဟတိ ဝါ န ဝါ။
၁၇၃။
‘‘အဇ္ဇ သုဝေ’’တိ သံသေယျ၊ ရညာ ပုဋ္ဌော သုစီရတ။
မာ ကတွာ အဝသီ ရာဇာ၊ အတ္ထေ ဇာတေ ယုဓိဋ္ဌိလော။
၁၇၄။
အဇ္ဈတ္တညေဝ သံသေယျ၊ ရညာ ပုဋ္ဌော သုစီရတ။
ကုမ္မဂ္ဂံ န နိဝေသေယျ၊ ယထာ မူဠ္ဟော အစေတသော [အစေတနော (က။)]။
၁၇၅။
အတ္တာနံ နာတိဝတ္တေယျ၊ အဓမ္မံ န သမာစရေ။
အတိတ္ထေ နပ္ပတာရေယျ၊ အနတ္ထေ န ယုတော သိယာ။
၁၇၆။
ယော စ ဧတာနိ ဌာနာနိ၊ ကတ္တုံ ဇာနာတိ ခတ္တိယော။
သဒါ သော ဝဍ္ဎတေ ရာဇာ၊ သုက္ကပက္ခေဝ စန္ဒိမာ။
၁၇၇။
ဉာတီနဉ္စ ပိယော ဟောတိ၊ မိတ္တေသု စ ဝိရောစတိ။
ကာယဿ ဘေဒါ သပ္ပညော၊ သဂ္ဂံ သော ဥပပဇ္ဇတီတိ။
သမ္ဘဝဇာတကံ ပဉ္စမံ။
၅၁၆။ မဟာကပိဇာတကံ (၆)
၁၇၈။
ဗာရာဏဿံ [ဗာရာဏဿံ (သီ။ ဣ။)] အဟူ ရာဇာ၊ ကာသီနံ ရဋ္ဌဝဍ္ဎနော။
မိတ္တာမစ္စပရိဗ္ယူဠ္ဟော၊ အဂမာသိ မိဂါဇိနံ [မိဂါဇိရံ (သီ။)၊ မိဂါစိရံ (ဣ။)]။
၁၇၉။
တတ္ထ ဗြာဟ္မဏမဒ္ဒက္ခိ၊ သေတံ စိတ္ရံ ကိလာသိနံ။
ဝိဒ္ဓသ္တံ ကောဝိဠာရံဝ၊ ကိသံ ဓမနိသန္ထတံ။
၁၈၀။
ပရမကာရုညတံ ပတ္တံ၊ ဒိသွာ ကိစ္ဆဂတံ နရံ။
အဝစ ဗျမှိတော ရာဇာ၊ ‘‘ယက္ခာနံ ကတမော နုသိ။
၁၈၁။
‘‘ဟတ္ထပါဒါ စ တေ သေတာ၊ တတော သေတတရံ [သေတတရော (ဣ။)] သိရော။
ဂတ္တံ ကမ္မာသဝဏ္ဏံ တေ၊ ကိလာသဗဟုလော စသိ။
၁၈၂။
‘‘ဝဋ္ဋနာဝဠိ [ဝဋ္ဌနာဝလိ (ဣ။)] သင်္ကာသာ၊ ပိဋ္ဌိ တေ နိန္နတုန္နတာ။
ကာဠပဗ္ဗာဝ [ကာဠပဗ္ဗာ စ (သျာ။)၊ ကာဠာ ပဗ္ဗာ စ (ဣ။)] တေ အင်္ဂါ၊ နာညံ ပဿာမိ ဧဒိသံ။
၁၈၃။
‘‘ဥဂ္ဃဋ္ဋပါဒေါ တသိတော၊ ကိသော ဓမနိသန္ထတော။
ဆာတော အာတတ္တရူပေါသိ [အာဒိတ္တရူပေါသိ (က။)၊ အတိတ္တရူပေါသိ (သျာ။ က။ အဋ္ဌ။)]၊ ကုတောသိ ကတ္ထ ဂစ္ဆသိ။
၁၈၄။
‘‘ဒုဒ္ဒသီ အပ္ပကာရောသိ၊ ဒုဗ္ဗဏ္ဏော ဘီမဒဿနော။
ဇနေတ္တိ ယာပိ တေ မာတာ၊ န တံ ဣစ္ဆေယျ ပဿိတုံ။
၁၈၅။
‘‘ကိံ ကမ္မမကရံ [ကမ္မမကရာ (သီ။ သျာ။ ဣ။)] ပုဗ္ဗေ၊ ကံ အဝဇ္ဈံ အဃာတယိ။
ကိဗ္ဗိသံ ယံ ကရိတွာန၊ ဣဒံ ဒုက္ခံ ဥပါဂမိ’’။
၁၈၆။
တဂ္ဃ တေ အဟမက္ခိဿံ၊ ယထာပိ ကုသလော တထာ။
သစ္စဝါဒိဉှိ လောကသ္မိံ၊ ပသံသန္တီဓ ပဏ္ဍိတာ။
၁၈၇။
ဧကော စရံ ဂေါဂဝေသော၊ မူဠ္ဟော အစ္စသရိံ ဝနေ။
အရညေ ဣရီဏေ [ဤရိဏေ (သီ။ သျာ။ ဣ။)] ဝိဝနေ၊ နာနာကုဉ္ဇရသေဝိတေ။
၁၈၈။
ဝါဠမိဂါနုစရိတေ၊ ဝိပ္ပနဋ္ဌောသ္မိ ကာနနေ။
အစရိံ တတ္ထ သတ္တာဟံ၊ ခုပ္ပိပါသ [ခုပ္ပိပါသာ (သီ။ ဣ။)] သမပ္ပိတော။
၁၈၉။
တတ္ထ တိန္ဒုကမဒ္ဒက္ခိံ၊ ဝိသမဋ္ဌံ ဗုဘုက္ခိတော။
ပပါတမဘိလမ္ဗန္တံ၊ သမ္ပန္နဖလဓါရိနံ။
၁၉၀။
ဝါတဿိတာနိ ဘက္ခေသိံ၊ တာနိ ရုစ္စိံသု မေ ဘုသံ။
အတိတ္တော ရုက္ခမာရူဟိံ [မာရုယှ (သီ။ သျာ။)]၊ တတ္ထ ဟေဿာမိ အာသိတော။
၁၉၁။
ဧကံ မေ ဘက္ခိတံ အာသိ၊ ဒုတိယံ အဘိပတ္ထိတံ။
တတော သာ ဘဉ္ဇထ သာခါ၊ ဆိန္နာ ဖရသုနာ ဝိယ။
၁၉၂။
သောဟံ သဟာဝ သာခါဟိ၊ ဥဒ္ဓံပါဒေါ အဝံသိရော။
အပ္ပတိဋ္ဌေ အနာလမ္ဗေ၊ ဂိရိဒုဂ္ဂသ္မိ ပါပတံ။
၁၉၃။
ယသ္မာ စ ဝါရိ ဂမ္ဘီရံ၊ တသ္မာ န သမပဇ္ဇိသံ [သမပဇ္ဇသိံ (သီ။)၊ သမဘဇ္ဇိသံ (ဣ။)]။
တတ္ထ သေသိံ နိရာနန္ဒော၊ အနူနာ [အနာထော (သီ။)] ဒသ ရတ္တိယော။
၁၉၄။
အထေတ္ထ ကပိ မာဂဉ္ဆိ [မာဂစ္ဆိ (သျာ။ က။)]၊ ဂေါနင်္ဂုလော ဒရီစရော။
သာခါဟိ သာခံ ဝိစရန္တော၊ ခါဒမာနော ဒုမပ္ဖလံ။
၁၉၅။
သော မံ ဒိသွာ ကိသံ ပဏ္ဍုံ၊ ကာရုညမကရံ မယိ။
အမ္ဘော ကော နာမ သော ဧတ္ထ၊ ဧဝံ ဒုက္ခေန အဋ္ဋိတော။
၁၉၆။
မနုဿော အမနုဿော ဝါ၊ အတ္တာနံ မေ ပဝေဒယ။
တဿဉ္ဇလိံ ပဏာမေတွာ၊ ဣဒံ ဝစနမဗြဝိံ။
၁၉၇။
မနုဿောဟံ ဗျသမ္ပတ္တော [ဝသမ္ပတ္တော (သျာ။ က။)]၊ သာ မေ နတ္ထိ ဣတော ဂတိ။
တံ ဝေါ ဝဒါမိ ဘဒ္ဒံ ဝေါ၊ တွဉ္စ မေ သရဏံ ဘဝ။
၁၉၈။
ဂရုံ [ဂရု (သီ။ ဣ။)] သိလံ ဂဟေတွာန၊ ဝိစရီ [ဝိစရိ (ဣ။)] ပဗ္ဗတေ ကပိ။
သိလာယ ယောဂ္ဂံ ကတွာန၊ နိသဘော ဧတဒဗြဝိ။
၁၉၉။
ဧဟိ မေ ပိဋ္ဌိမာရုယှ၊ ဂီဝံ ဂဏှာဟိ ဗာဟုဘိ။
အဟံ တံ ဥဒ္ဓရိဿာမိ၊ ဂိရိဒုဂ္ဂတ ဝေဂသာ။
၂၀၀။
တဿ တံ ဝစနံ သုတွာ၊ ဝါနရိန္ဒဿ သိရီမတော။
ပိဋ္ဌိမာရုယှ ဓီရဿ၊ ဂီဝံ ဗာဟာဟိ အဂ္ဂဟိံ။
၂၀၁။
သော မံ တတော သမုဋ္ဌာသိ၊ တေဇဿီ [တေဇသီ (သျာ။ ဣ။ က။)] ဗလဝါ ကပိ။
ဝိဟညမာနော ကိစ္ဆေန၊ ဂိရိဒုဂ္ဂတ ဝေဂသာ။
၂၀၂။
ဥဒ္ဓရိတွာန မံ သန္တော၊ နိသဘော ဧတဒဗြဝိ။
ဣင်္ဃ မံ သမ္မ ရက္ခဿု၊ ပဿုပိဿံ မုဟုတ္တကံ။
၂၀၃။
သီဟာ ဗျဂ္ဃါ စ ဒီဣ စ၊ အစ္ဆကောကတရစ္ဆယော။
တေ မံ ပမတ္တံ ဟိံသေယျုံ၊ တေ တွံ ဒိသွာ နိဝါရယ [ဒိသွာန ဝါရယ (ဣ။)]။
၂၀၄။
ဧဝံ မေ ပရိတ္တာတူန [ပရိတ္တာတုန (က။)]၊ ပဿုပိ သော မုဟုတ္တကံ။
တဒါဟံ ပါပိကံ ဒိဋ္ဌိံ၊ ပဋိလစ္ဆိံ အယောနိသော။
၂၀၅။
ဘက္ခော အယံ မနုဿာနံ၊ ယထာ စညေ ဝနေ မိဂါ။
ယံ နူနိမံ ဝဓိတွာန၊ ဆာတော ခါဒေယျ ဝါနရံ။
၂၀၆။
အသိတော [အာသိကော (ဣ။)] စ ဂမိဿာမိ၊ မံသမာဒါယ သမ္ဗလံ။
ကန္တာရံ နိတ္ထရိဿာမိ၊ ပါထေယျံ မေ ဘဝိဿတိ။
၂၀၇။
တတော သိလံ ဂဟေတွာန၊ မတ္ထကံ သန္နိတာဠယိံ။
မမ ဂတ္တ [ဘတ္တ (သီ။ သျာ။)၊ ဟတ္ထ (ဣ။)] ကိလန္တဿ၊ ပဟာရော ဒုဗ္ဗလော အဟု။
၂၀၈။
သော စ ဝေဂေနုဒပ္ပတ္တော၊ ကပိ ရုဟိရ [ရုဓိရ (သီ။)] မက္ခိတော။
အဿုပုဏ္ဏေဟိ နေတ္တေဟိ၊ ရောဒန္တော မံ ဥဒိက္ခတိ။
၂၀၉။
မာယျောမံ ကရိ ဘဒ္ဒန္တေ၊ တွဉ္စ နာမေဒိသံ ကရိ။
တွဉ္စ ခေါ နာမ ဒီဃာဝု [ဒီဃာယု (ဣ။)]၊ အညေ [အညံ (ဣ။)] ဝါရေတုမရဟသိ။
၂၁၀။
အဟော ဝတ ရေ ပုရိသ၊ တာဝ ဒုက္ကရကာရက။
ဧဒိသာ ဝိသမာ ဒုဂ္ဂါ၊ ပပါတာ ဥဒ္ဓတော [ဥဒ္ဓဋော (ဣ။)] မယာ။
၂၁၁။
အာနီတော ပရလောကာဝ၊ ဒုဗ္ဘေယျံ မံ အမညထ။
တံ တေန ပါပဓမ္မေန၊ ပါပံ ပါပေန စိန္တိတံ။
၂၁၂။
မာ ဟေဝ တွံ အဓမ္မဋ္ဌ၊ ဝေဒနံ ကဋုကံ ဖုသိ။
မာ ဟေဝ ပါပကမ္မံ တံ၊ ဖလံ ဝေဠုံဝ တံ ဝဓိ။
၂၁၃။
တယိမေ နတ္ထိ ဝိဿာသော၊ ပါပဓမ္မ အသညတ [ပါပဓမ္မံ အမညထ (ဣ။)]။
ဧဟိ မေ ပိဋ္ဌိတော ဂစ္ဆ၊ ဒိဿမာနောဝ သန္တိကေ။
၂၁၄။
မုတ္တောသိ ဟတ္ထာ ဝါဠာနံ၊ ပတ္တောသိ မာနုသိံ ပဒံ။
ဧသ မဂ္ဂေါ အဓမ္မဋ္ဌ၊ တေန ဂစ္ဆ ယထာသုခံ။
၂၁၅။
ဣဒံ ဝတွာ ဂိရိစရော၊ ရဟဒေ [ရုဟိရံ (သျာ။ က။)] ပက္ခလ္ယ မတ္ထကံ။
အဿူနိ သမ္ပမဇ္ဇိတွာ၊ တတော ပဗ္ဗတမာရုဟိ။
၂၁၆။
သောဟံ တေနာဘိသတ္တောသ္မိ၊ ပရိဠာဟေန အဋ္ဋိတော။
ဍယှမာနေန ဂတ္တေန၊ ဝါရိံ ပါတုံ ဥပါဂမိံ။
၂၁၇။
အဂ္ဂိနာ ဝိယ သန္တတ္တော၊ ရဟဒေါ ရုဟိရမက္ခိတော။
ပုဗ္ဗလောဟိတသင်္ကာသော၊ သဗ္ဗော မေ သမပဇ္ဇထ။
၂၁၈။
ယာဝန္တော ဥဒဗိန္ဒူနိ၊ ကာယသ္မိံ နိပတိံသု မေ။
တာဝန္တော ဂဏ္ဍ [ဂဏ္ဍူ (သီ။ ဣ။)၊ ဂဏ္ဍု (သျာ။)] ဇာယေထ၊ အဒ္ဓဗေလုဝသာဒိသာ။
၂၁၉။
ပဘိန္နာ ပဂ္ဃရိံသု မေ၊ ကုဏပါ ပုဗ္ဗလောဟိတာ။
ယေန ယေနေဝ ဂစ္ဆာမိ၊ ဂါမေသု နိဂမေသု စ။
၂၂၀။
ဒဏ္ဍဟတ္ထာ နိဝါရေန္တိ၊ ဣတ္ထိယော ပုရိသာ စ မံ။
ဩက္ကိတာ [ဩကိဏ္ဏာ (သီ။)] ပူတိဂန္ဓေန၊ မာဿု ဩရေန အာဂမာ [မာဂမာ (သီ။ ဣ။)]။
၂၂၁။
ဧတာဒိသံ ဣဒံ ဒုက္ခံ၊ သတ္တ ဝဿာနိ ဒါနိ မေ။
အနုဘောမိ သကံ ကမ္မံ၊ ပုဗ္ဗေ ဒုက္ကဋမတ္တနော။
၂၂၂။
တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ။ ဣ။)]၊ ယာဝန္တေတ္ထ သမာဂတာ။
မာဿု မိတ္တာန [မိတ္တာနံ (သီ။ ဣ။)] ဒုဗ္ဘိတ္ထော၊ မိတ္တဒုဗ္ဘော ဟိ ပါပကော။
၂၂၃။
ကုဋ္ဌီ ကိလာသီ ဘဝတိ၊ ယော မိတ္တာနိဓ ဒုဗ္ဘတိ [ယော မိတ္တာနံ ဣဓဒ္ဒုဘိ (သီ။ အဋ္ဌ။)၊ ယော မိတ္တာနံ ဣဓ ဒုဗ္ဘတိ (ဣ။)]။
ကာယဿ ဘေဒါ မိတ္တဒ္ဒု [မိတ္တဒုဗ္ဘီ (သျာ။ က။)]၊ နိရယံ သောပပဇ္ဇတီတိ [သော ဥပပဇ္ဇတီတိ (သီ။ သျာ။ ဣ။)]။
မဟာကပိဇာတကံ ဆဋ္ဌံ။
၅၁၇။ ဒကရက္ခသဇာတကံ (၇)
၂၂၄။
သစေ ဝေါ ဝုယှမာနာနံ၊ သတ္တန္နံ ဥဒကဏ္ဏဝေ။
မနုဿဗလိမေသာနော၊ နာဝံ ဂဏှေယျ ရက္ခသော။
အနုပုဗ္ဗံ ကထံ ဒတွာ၊ မုဉ္စေသိ ဒကရက္ခသာ [ဒကရက္ခတော (ဣ။)]။
၂၂၅။
မာတရံ ပဌမံ ဒဇ္ဇံ၊ ဘရိယံ ဒတွာန ဘာတရံ။
တတော သဟာယံ ဒတွာန၊ ပဉ္စမံ ဒဇ္ဇံ [ဒဇ္ဇ (သျာ။)] ဗြာဟ္မဏံ။
ဆဋ္ဌာဟံ ဒဇ္ဇမတ္တာနံ၊ နေဝ ဒဇ္ဇံ မဟောသဓံ။
၂၂၆။
ပေါသေတာ တေ ဇနေတ္တီ စ၊ ဒီဃရတ္တာနုကမ္ပိကာ။
ဆဗ္ဘီ တယိ ပဒုဿတိ [ပဒုဋ္ဌသ္မိံ (သီ။ သျာ။)]၊ ပဏ္ဍိတာ အတ္ထဒဿိနီ။
အညံ ဥပနိသံ ကတွာ၊ ဝဓါ တံ ပရိမောစယိ။
၂၂၇။
တံ တာဒိသိံ [တာဒိသံ (က။)] ပါဏဒဒိံ၊ ဩရသံ ဂဗ္ဘဓါရိနိံ [ဂဗ္ဘဓါရိဏိံ (သီ။ သျာ။)]။
မာတရံ ကေန ဒေါသေန၊ ဒဇ္ဇာသိ ဒကရက္ခိနော [ဒကရက္ခတော (ဣ။)]။
၂၂၈။
ဒဟရာ ဝိယလင်္ကာရံ၊ ဓါရေတိ အပိဠန္ဓနံ။
ဒေါဝါရိကေ အနီကဋ္ဌေ၊ အတိဝေလံ ပဇဂ္ဃတိ [သဉ္ဇဂ္ဃတိ (က။)]။
၂၂၉။
အထောပိ ပဋိရာဇူနံ၊ သယံ ဒူတာနိ သာသတိ။
မာတရံ တေန ဒေါသေန၊ ဒဇ္ဇာဟံ ဒကရက္ခိနော။
၂၃၀။
ဣတ္ထိဂုမ္ဗဿ ပဝရာ၊ အစ္စန္တံ ပိယဘာဏိနီ [အစ္စန္တပိယဝါဒိနီ (သီ။ ဣ။)]။
အနုဂ္ဂတာ [အနုဗ္ဗတာ (သျာ။)၊ အနုပုဗ္ဗတာ (က။)] သီလဝတီ၊ ဆာယာဝ အနပါယိနီ။
၂၃၁။
အက္ကောဓနာ ပုညဝတီ [ပညဝတီ (သီ။ ဣ။)]၊ ပဏ္ဍိတာ အတ္ထဒဿိနီ။
ဥဗ္ဗရိံ [ဥပ္ပရိံ (သီ။)] ကေန ဒေါသေန၊ ဒဇ္ဇာသိ ဒကရက္ခိနော။
၂၃၂။
ခိဍ္ဍာရတိသမာပန္နံ၊ အနတ္ထဝသမာဂတံ။
သာ မံ သကာန ပုတ္တာနံ၊ အယာစံ ယာစတေ ဓနံ။
၂၃၃။
သောဟံ ဒဒါမိ သာရတ္တော [သာရတော (သျာ။)]၊ ဗဟုံ ဥစ္စာဝစံ ဓနံ။
သုဒုစ္စဇံ စဇိတွာန၊ ပစ္ဆာ သောစာမိ ဒုမ္မနော။
ဥဗ္ဗရိံ တေန ဒေါသေန၊ ဒဇ္ဇာဟံ ဒကရက္ခိနော။
၂၃၄။
ယေနောစိတာ ဇနပဒါ [ဇာနပဒါ (သီ။ သျာ။ ဣ။)]၊ အာနီတာ စ ပဋိဂ္ဂဟံ။
အာဘတံ ပရရဇ္ဇေဘိ၊ အဘိဋ္ဌာယ ဗဟုံ ဓနံ။
၂၃၅။
ဓနုဂ္ဂဟာနံ ပဝရံ၊ သူရံ တိခိဏမန္တိနံ။
ဘာတရံ ကေန ဒေါသေန၊ ဒဇ္ဇာသိ ဒကရက္ခိနော။
၂၃၆။
ယေနောစိတာ [မယောစိတာ (သီ။)၊ မယာစိတာ (ဣ။)] ဇနပဒါ၊ အာနီတာ စ ပဋိဂ္ဂဟံ။
အာဘတံ ပရရဇ္ဇေဘိ၊ အဘိဋ္ဌာယ ဗဟုံ ဓနံ။
၂၃၇။
ဓနုဂ္ဂဟာနံ ပဝရော၊ သူရော တိခိဏမန္တိ စ [တိခိဏမန္တိနော (က။)]။
မယာယံ [မယာ သော (သီ။ ဣ။)] သုခိတော ရာဇာ၊ အတိမညတိ ဒါရကော။
၂၃၈။
ဥပဋ္ဌာနမ္ပိ မေ အယျေ၊ န သော ဧတိ ယထာ ပုရေ။
ဘာတရံ တေန ဒေါသေန၊ ဒဇ္ဇာဟံ ဒကရက္ခိနော။
၂၃၉။
ဧကရတ္တေန ဥဘယော၊ တွဉ္စေဝ ဓနုသေခ စ [ဓနုသေခဝါ (သီ။ သျာ။ ဣ။)]။
ဥဘော ဇာတေတ္ထ ပဉ္စာလာ၊ သဟာယာ သုသမာဝယာ။
၂၄၀။
စရိယာ တံ အနုဗန္ဓိတ္ထော [အနုဗန္ဓော (က။)]၊ ဧကဒုက္ခသုခေါ တဝ။
ဥဿုက္ကော တေ ဒိဝါရတ္တိံ၊ သဗ္ဗကိစ္စေသု ဗျာဝဋော။
သဟာယံ ကေန ဒေါသေန၊ ဒဇ္ဇာသိ ဒကရက္ခိနော။
၂၄၁။
စရိယာ မံ အယံ [စရိယာယ အယံ (သီ။ ဣ။)] အယျေ၊ ပဇဂ္ဃိတ္ထော [သဉ္ဇဂ္ဃိတ္ထော (သျာ။)] မယာ သဟ။
အဇ္ဇာပိ တေန ဝဏ္ဏေန၊ အတိဝေလံ ပဇဂ္ဃတိ။
၂၄၂။
ဥဗ္ဗရိယာပိဟံ အယျေ၊ မန္တယာမိ ရဟောဂတော။
အနာမန္တော [အနာမန္တာ (သီ။)] ပဝိသတိ၊ ပုဗ္ဗေ အပ္ပဋိဝေဒိတော။
၂၄၃။
လဒ္ဓဒွါရော [လဒ္ဓဝါရော (သီ။ ဣ။)] ကတောကာသော၊ အဟိရိကံ အနာဒရံ။
သဟာယံ တေန ဒေါသေန၊ ဒဇ္ဇာဟံ ဒကရက္ခိနော။
၂၄၄။
ကုသလော သဗ္ဗနိမိတ္တာနံ၊ ရုတညူ [ရုဒညူ (သီ။ သျာ။ ဣ။)] အာဂတာဂမော။
ဥပ္ပါတေ သုပိနေ ယုတ္တော၊ နိယျာနေ စ ပဝေသနေ။
၂၄၅။
ပဋ္ဌော [ပဒ္ဓေါ (သီ။ ဣ။)] ဘူမန္တလိက္ခသ္မိံ၊ နက္ခတ္တပဒကောဝိဒေါ။
ဗြာဟ္မဏံ ကေန ဒေါသေန၊ ဒဇ္ဇာသိ ဒကရက္ခိနော။
၂၄၆။
ပရိသာယမ္ပိ မေ အယျေ၊ ဥမ္မီလိတွာ ဥဒိက္ခတိ။
တသ္မာ အစ္စဘမုံ လုဒ္ဒံ၊ ဒဇ္ဇာဟံ ဒကရက္ခိနော။
၂၄၇။
သသမုဒ္ဒပရိယာယံ ၊ မဟိံ သာဂရကုဏ္ဍလံ။
ဝသုန္ဓရံ အာဝသသိ၊ အမစ္စပရိဝါရိတော။
၂၄၈။
စာတုရန္တော မဟာရဋ္ဌော၊ ဝိဇိတာဝီ မဟဗ္ဗလော။
ပထဗျာ ဧကရာဇာသိ၊ ယသော တေ ဝိပုလံ ဂတော။
၂၄၉။
သောဠသိတ္ထိသဟဿာနိ၊ အာမုတ္တမဏိကုဏ္ဍလာ။
နာနာဇနပဒါ နာရီ၊ ဒေဝကညူပမာ သုဘာ။
၂၅၀။
ဧဝံ သဗ္ဗင်္ဂသမ္ပန္နံ၊ သဗ္ဗကာမသမိဒ္ဓိနံ။
သုခိတာနံ ပိယံ ဒီဃံ၊ ဇီဝိတံ အာဟု ခတ္တိယ။
၂၅၁။
အထ တွံ ကေန ဝဏ္ဏေန၊ ကေန ဝါ ပန ဟေတုနာ။
ပဏ္ဍိတံ အနုရက္ခန္တော၊ ပါဏံ စဇသိ ဒုစ္စဇံ။
၂၅၂။
ယတောပိ အာဂတော အယျေ၊ မမ ဟတ္ထံ မဟောသဓေါ။
နာဘိဇာနာမိ ဓီရဿ၊ အနုမတ္တမ္ပိ ဒုက္ကဋံ။
၂၅၃။
သစေ စ ကိသ္မိစိ ကာလေ၊ မရဏံ မေ ပုရေ သိယာ။
သော မေ ပုတ္တေ [ပုတ္တေ စ မေ (သီ။ သျာ။ ဣ။] ပပုတ္တေ စ၊ သုခါပေယျ မဟောသဓေါ။
၂၅၄။
အနာဂတံ ပစ္စုပ္ပန္နံ၊ သဗ္ဗမတ္ထမ္ပိ ပဿတိ [သဗ္ဗမတ္ထံ ဝိပဿတိ (သီ။ သျာ။ ဣ။)]။
အနာပရာဓကမ္မန္တံ၊ န ဒဇ္ဇံ ဒကရက္ခိနော။
၂၅၅။
ဣဒံ သုဏာထ ပဉ္စာလာ၊ စူဠနေယျဿ [စူဠနီယဿ (သီ။)] ဘာသိတံ။
ပဏ္ဍိတံ အနုရက္ခန္တော၊ ပါဏံ စဇတိ ဒုစ္စဇံ။
၂၅၆။
မာတု ဘရိယာယ ဘာတုစ္စ၊ သခိနော ဗြာဟ္မဏဿ စ။
အတ္တနော စာပိ ပဉ္စာလော၊ ဆန္နံ စဇတိ ဇီဝိတံ။
၂၅၇။
ဧဝံ မဟတ္ထိကာ [ခဟိဒ္ဓိယာ (သျာ။)၊ မဟိဒ္ဓိကာ (က။)] ပညာ၊ နိပုဏာ သာဓုစိန္တိနီ။
ဒိဋ္ဌဓမ္မဟိတတ္ထာယ၊ သမ္ပရာယသုခါယ စာတိ။
ဒကရက္ခသဇာတကံ သတ္တမံ။
၅၁၈။ ပဏ္ဍရနာဂရာဇဇာတကံ (၈)
၂၅၈။
ဝိကိဏ္ဏဝါစံ အနိဂုယှ [အနိဂူဠှ (ဣ။)] မန္တံ၊ အသညတံ အပရိစက္ခိတာရံ [အပရိရက္ခိတာရံ (က။)]။
ဘယံ တမန္ဝေတိ သယံ အဗောဓံ၊ နာဂံ ယထာ ပဏ္ဍရကံ သုပဏ္ဏော [သုဝဏ္ဏော (က။)]။
၂၅၉။
ယော ဂုယှမန္တံ ပရိရက္ခနေယျံ၊ မောဟာ နရော သံသတိ ဟာသမာနော [ဘာသမာနော (ဣ။)]။
တံ ဘိန္နမန္တံ ဘယမန္ဝေတိ ခိပ္ပံ၊ နာဂံ ယထာ ပဏ္ဍရကံ သုပဏ္ဏော။
၂၆၀။
နာနုမိတ္တော ဂရုံ အတ္ထံ၊ ဂုယှံ ဝေဒိတုမရဟတိ။
သုမိတ္တော စ အသမ္ဗုဒ္ဓံ၊ သမ္ဗုဒ္ဓံ ဝါ အနတ္ထ ဝါ။
၂၆၁။
ဝိဿာသမာပဇ္ဇိမဟံ အစေလံ [အစေလော (သီ။ ဣ။)]၊ သမဏော အယံ သမ္မတော ဘာဝိတတ္တော။
တဿာဟမက္ခိံ ဝိဝရိံ [ဝိဝရံ (သီ။)] ဂုယှမတ္ထံ၊ အတီတမတ္ထော ကပဏံ [ကပဏော (ဣ။)] ရုဒါမိ။
၂၆၂။
တဿာဟံ ပရမံ [ပုရိမံ (သီ။)] ဗြဟ္မေ ဂုယှံ၊ ဝါစဉှိ မံ နာသက္ခိံ [နာသက္ခိ (ဣ။)] သံယမေတုံ။
တပ္ပက္ခတော ဟိ ဘယမာဂတံ မမံ၊ အတီတမတ္ထော ကပဏံ ရုဒါမိ။
၂၆၃။
ယော ဝေ နရော သုဟဒံ မညမာနော၊ ဂုယှမတ္ထံ သံသတိ ဒုက္ကုလီနေ။
ဒေါသာ ဘယာ အထဝါ ရာဂရတ္တာ [ရာဂရတ္တော (သီ။ သျာ။ ဣ။)]၊ ပလ္လတ္ထိတော [ပလ္လိတ္ထော (ဣ။)၊ ပလ္လတ္တိတော (က။)] ဗာလော အသံသယံ သော။
၂၆၄။
တိရောက္ခဝါစော အသတံ ပဝိဋ္ဌော၊ ယော သင်္ဂတီသု မုဒီရေတိ ဝါက္ယံ။
အာသီဝိသော ဒုမ္မုခေါတျာဟု တံ နရံ၊ အာရာ အာရာ [အာရာ အရာ (ဣ။)] သံယမေ တာဒိသမှာ။
၂၆၅။
အန္နံ ပါနံ ကာသိက [ကာသိကံ (ဣ။)] စန္ဒနဉ္စ၊ မနာပိတ္ထိယော မာလမုစ္ဆာဒနဉ္စ။
ဩဟာယ ဂစ္ဆာမသေ သဗ္ဗကာမေ၊ သုပဏ္ဏ ပါဏူပဂတာဝ တ္ယမှာ။
၂၆၆။
ကော နီဓ တိဏ္ဏံ ဂရဟံ ဥပေတိ၊ အသ္မိံဓ လောကေ ပါဏဘူ နာဂရာဇ။
သမဏော သုပဏ္ဏော အထ ဝါ တွမေဝ၊ ကိံ ကာရဏာ ပဏ္ဍရကဂ္ဂဟီတော။
၂၆၇။
သမဏောတိ မေ သမ္မတတ္တော အဟောသိ၊ ပိယော စ မေ မနသာ ဘာဝိတတ္တော။
တဿာဟမက္ခိံ ဝိဝရိံ ဂုယှမတ္ထံ၊ အတီတမတ္ထော ကပဏံ ရုဒါမိ။
၂၆၈။
န စတ္ထိ သတ္တော အမရော ပထဗျာ၊ ပညာဝိဓါ နတ္ထိ န နိန္ဒိတဗ္ဗာ။
သစ္စေန ဓမ္မေန ဓိတိယာ [ဓိယာ (သီ။ ဣ။)] ဒမေန, အလဗ္ဘမဗျာဟရတီ နရော ဣဓ။
၂၆၉။
မာတာပိတာ ပရမာ ဗန္ဓဝါနံ၊ နာဿ တတိယော အနုကမ္ပကတ္ထိ။
တေသမ္ပိ ဂုယှံ ပရမံ န သံသေ၊ မန္တဿ ဘေဒံ ပရိသင်္ကမာနော။
၂၇၀။
မာတာပိတာ ဘဂိနီ ဘာတရော စ၊ သဟာယာ ဝါ ယဿ ဟောန္တိ သပက္ခာ။
တေသမ္ပိ ဂုယှံ ပရမံ န သံသေ၊ မန္တဿ ဘေဒံ ပရိသင်္ကမာနော။
၂၇၁။
ဘရိယာ စေ ပုရိသံ ဝဇ္ဇာ၊ ကောမာရီ ပိယဘာဏိနီ။
ပုတ္တရူပယသူပေတာ ၊ ဉာတိသံဃပုရက္ခတာ၊ တဿာပိ ဂုယှံ ပရမံ န သံသေ။
မန္တဿ ဘေဒံ ပရိသင်္ကမာနော။
၂၇၂။
န ဂုယှမတ္ထံ [ဂုယှတ္ထံ (က။)] ဝိဝရေယျ၊ ရက္ခေယျ နံ ယထာ နိဓိံ။
န ဟိ ပါတုကတော သာဓု၊ ဂုယှော အတ္ထော ပဇာနတာ။
၂၇၃။
ထိယာ ဂုယှံ န သံသေယျ၊ အမိတ္တဿ စ ပဏ္ဍိတော။
ယော စာမိသေန သံဟီရော၊ ဟဒယတ္ထေနော စ ယော နရော။
၂၇၄။
ဂုယှမတ္ထံ အသမ္ဗုဒ္ဓံ၊ သမ္ဗောဓယတိ ယော နရော။
မန္တဘေဒဘယာ တဿ၊ ဒါသဘူတော တိတိက္ခတိ။
၂၇၅။
ယာဝန္တော ပုရိသဿတ္ထံ၊ ဂုယှံ ဇာနန္တိ မန္တိနံ။
တာဝန္တော တဿ ဥဗ္ဗေဂါ၊ တသ္မာ ဂုယှံ န ဝိဿဇေ။
၂၇၆။
ဝိဝိစ္စ ဘာသေယျ ဒိဝါ ရဟဿံ၊ ရတ္တိံ ဂိရံ နာတိဝေလံ ပမုဉ္စေ။
ဥပဿုတိကာ ဟိ သုဏန္တိ မန္တံ၊ တသ္မာ မန္တော ခိပ္ပမုပေတိ ဘေဒံ။
၂၇၇။
ယထာပိ အဿ [အယော (သျာ။)၊ အယ (က။)] နဂရံ မဟန္တံ၊ အဒွါရကံ [အာဠာရကံ (ဣ။)] အာယသံ ဘဒ္ဒသာလံ။
သမန္တခါတာပရိခါဥပေတံ၊ ဧဝမ္ပိ မေ တေ ဣဓ ဂုယှမန္တာ။
၂၇၈။
ယေ ဂုယှမန္တာ အဝိကိဏ္ဏဝါစာ၊ ဒဠှာ သဒတ္ထေသု နရာ ဒုဇိဝှ [ဒုဇိဝှာ (သျာ။ ဣ။)]။
အာရာ အမိတ္တာ ဗျဝဇန္တိ တေဟိ၊ အာသီဝိသာ ဝါ ရိဝ သတ္တုသံဃာ [သတ္တသံဃာ (သီ။ သျာ။)]။
၂၇၉။
ဟိတွာ ဃရံ ပဗ္ဗဇိတော အစေလော၊ နဂ္ဂေါ မုဏ္ဍော စရတိ ဃာသဟေတု။
တမှိ [တမှီ (ဣ။)] နု ခေါ ဝိဝရိံ ဂုယှမတ္ထံ၊ အတ္ထာ စ ဓမ္မာ စ အပဂ္ဂတမှာ [အပါဂတမှာ (သီ။)၊ အပဂတမှာ (သျာ။)၊ အဝါဂတမှာ (ဣ။)]။
၂၈၀။
ကထံကရော ဟောတိ သုပဏ္ဏရာဇ၊ ကိံသီလော ကေန ဝတေန ဝတ္တံ။
သမဏော စရံ ဟိတွာ မမာယိတာနိ၊ ကထံကရော သဂ္ဂမုပေတိ ဌာနံ။
၂၈၁။
ဟိရိယာ တိတိက္ခာယ ဒမေနုပေတော [ဒမေန ခန္တိယာ (သီ။ သျာ။ ဣ။)]၊ အက္ကောဓနော ပေသုဏိယံ ပဟာယ။
သမဏော စရံ ဟိတွာ မမာယိတာနိ၊ ဧဝံကရော သဂ္ဂမုပေတိ ဌာနံ။
၂၈၂။
မာတာဝ ပုတ္တံ တရုဏံ တနုဇ္ဇံ [တနူဇံ (သီ။)]၊ သမ္ဖဿတာ [သမ္ပဿ တံ (သီ။ ဣ။)] သဗ္ဗဂတ္တံ ဖရေတိ။
ဧဝမ္ပိ မေ တွံ ပါတုရဟု ဒိဇိန္ဒ၊ မာတာဝ ပုတ္တံ အနုကမ္ပမာနော။
၂၈၃။
ဟန္ဒဇ္ဇ တွံ မုဉ္စ [မုစ္စ (သီ။)] ဝဓါ ဒုဇိဝှ၊ တယော ဟိ ပုတ္တာ န ဟိ အညော အတ္ထိ။
အန္တေဝါသီ ဒိန္နကော အတြဇော စ၊ ရဇ္ဇဿု [ရဇဿု (သီ။ သျာ။ ဣ။)] ပုတ္တညတရော မေ အဟောသိ။
၂၈၄။
ဣစ္စေဝ ဝါက္ယံ ဝိသဇ္ဇီ သုပဏ္ဏော၊ ဘုမ္ယံ ပတိဋ္ဌာယ ဒိဇော ဒုဇိဝှံ။
မုတ္တဇ္ဇ တွံ သဗ္ဗဘယာတိဝတ္တော၊ ထလူဒကေ ဟောဟိ မယာဘိဂုတ္တော။
၂၈၅။
အာတင်္ကိနံ ယထာ ကုသလော ဘိသက္ကော၊ ပိပါသိတာနံ ရဟဒေါဝ သီတော။
ဝေသ္မံ ယထာ ဟိမသီတဋ္ဋိတာနံ [ဟိမသိသိရဋ္ဋိတာနံ (ဣ။)]၊ ဧဝမ္ပိ တေ သရဏမဟံ ဘဝါမိ။
၂၈၆။
သန္ဓိံ ကတွာ အမိတ္တေန၊ အဏ္ဍဇေန ဇလာဗုဇ။
ဝိဝရိယ ဒါဌံ သေသိ၊ ကုတော တံ ဘယမာဂတံ။
၂၈၇။
သင်္ကေထေဝ အမိတ္တသ္မိံ၊ မိတ္တသ္မိမ္ပိ န ဝိဿသေ။
အဘယာ ဘယမုပ္ပန္နံ၊ အပိ မူလာနိ ကန္တတိ။
၂၈၈။
ကထံ နု ဝိဿသေ တ္ယမှိ၊ ယေနာသိ ကလဟော ကတော။
နိစ္စယတ္တေန ဌာတဗ္ဗံ၊ သော ဒိသဗ္ဘိ [သော ဒိသမှိ (ဣ။)] န ရဇ္ဇတိ။
၂၈၉။
ဝိဿာသယေ န စ တံ [နံ (သီ။ သျာ။ ဣ။)] ဝိဿယေယျ၊ အသင်္ကိတော သင်္ကိတော စ [အသင်္ကိတော စ သင်္ကိတော (သီ။ ဣ။)] ဘဝေယျ။
တထာ တထာ ဝိညူ ပရက္ကမေယျ၊ ယထာ ယထာ ဘာဝံ ပရော န ဇညာ။
၂၉၀။
တေ ဒေဝဝဏ္ဏာ [ဒေဝဝဏ္ဏီ (ဣ။)] သုခုမာလရူပါ၊ ဥဘော သမာ သုဇယာ [သုဇယော (သီ။ သျာ။ ဣ။)] ပုညခန္ဓာ [ပုညဂန္ဓာ (ဣ။)]။
ဥပါဂမုံ ကရမ္ပိယံ [ကာဒမ္ဗိယံ (သီ။)၊ ကာရမ္ဗိယံ (ဣ။)] အစေလံ၊ မိဿီဘူတာ အဿဝါဟာဝ နာဂါ။
၂၉၁။
တတော ဟဝေ ပဏ္ဍရကော အစေလံ၊ သယမေဝုပါဂမ္မ ဣဒံ အဝေါစ။
မုတ္တဇ္ဇဟံ သဗ္ဗဘယာတိဝတ္တော၊ န ဟိ [ဟ (ဣ။)] နူန တုယှံ မနသော ပိယမှာ။
၂၉၂။
ပိယော ဟိ မေ အာသိ သုပဏ္ဏရာဇာ၊ အသံသယံ ပဏ္ဍရကေန သစ္စံ။
သော ရာဂရတ္တောဝ အကာသိမေတံ၊ ပါပကမ္မံ [ပါပံ ကမ္မံ (သီ။ ဣ။)] သမ္ပဇာနော န မောဟာ။
၂၉၃။
န မေ ပိယံ အပ္ပိယံ ဝါပိ ဟောတိ၊ သမ္ပဿတော လောကမိမံ ပရဉ္စ။
သုသညတာနဉှိ ဝိယဉ္ဇနေန၊ အသညတော လောကမိမံ စရာသိ။
၂၉၄။
အရိယာဝကာသောသိ အနရိယောဝါသိ [အနရိယော စာသိ (သီ။ ဣ။)]၊ အသညတော သညတသန္နိကာသော။
ကဏှာဘိဇာတိကောသိ အနရိယရူပေါ၊ ပါပံ ဗဟုံ ဒုစ္စရိတံ အစာရိ။
၂၉၅။
အဒုဋ္ဌဿ တုဝံ ဒုဗ္ဘိ၊ ဒုဗ္ဘီ [ဒူဘိ၊ ဒူဘီ (ဣ။)] စ ပိသုဏော စသိ။
ဧတေန သစ္စဝဇ္ဇေန၊ မုဒ္ဓါ တေ ဖလတု သတ္တဓါ။
၂၉၆။
တသ္မာ ဟိ မိတ္တာနံ န ဒုဗ္ဘိတဗ္ဗံ၊ မိတ္တဒုဗ္ဘာ [မိတ္တဒုဗ္ဘာ ဟိ (သျာ။)] ပါပိယော နတ္ထိ အညော။
အာသိတ္တသတ္တော နိဟတော ပထဗျာ၊ ဣန္ဒဿ ဝါက္ယေန ဟိ သံဝရော ဟတောတိ။
ပဏ္ဍရနာဂရာဇဇာတကံ [ပဏ္ဍရကဇာတကံ (သီ။ သျာ။ ဣ။)] အဋ္ဌမံ။
၅၁၉။ သမ္ဗုလာဇာတကံ (၉)
၂၉၇။
ကာ ဝေဓမာနာ ဂိရိကန္ဒရာယံ၊ ဧကာ တုဝံ တိဋ္ဌသိ သံဟိတူရု [သညတူရ (သီ။ ဣ။)၊ သဉ္စိတူရု (သျာ။)]။
ပုဋ္ဌာသိ မေ ပါဏိပမေယျမဇ္ဈေ၊ အက္ခာဟိ မေ နာမဉ္စ ဗန္ဓဝေ စ။
၂၉၈။
ဩဘာသယံ ဝနံ ရမ္မံ၊ သီဟဗျဂ္ဃနိသေဝိတံ။
ကာ ဝါ တွမသိ ကလျာဏိ၊ ကဿ ဝါ တွံ သုမဇ္ဈိမေ။
အဘိဝါဒေမိ တံ ဘဒ္ဒေ၊ ဒါနဝါဟံ နမတ္ထု တေ။
၂၉၉။
ယော ပုတ္တော ကာသိရာဇဿ၊ သောတ္ထိသေနောတိ တံ ဝိဒူ။
တဿာဟံ သမ္ဗုလာ ဘရိယာ၊ ဧဝံ ဇာနာဟိ ဒါနဝ။
အဘိဝါဒေမိ တံ ဘန္တေ [ဘဒ္ဒန္တေ (သီ။ သျာ။)]၊ သမ္ဗုလာဟံ နမတ္ထု တေ။
၃၀၀။
ဝေဒေဟပုတ္တော ဘဒ္ဒန္တေ၊ ဝနေ ဝသတိ အာတုရော။
တမဟံ ရောဂသမ္မတ္တံ၊ ဧကာ ဧကံ ဥပဋ္ဌဟံ [ဥပဋ္ဌဟိံ (သီ။)]။
၃၀၁။
အဟဉ္စ ဝနမုဉ္ဆာယ၊ မဓုမံသံ မိဂါဗိလံ [မိဂါဝိလံ (သီ။)]။
ယဒါ ဟရာမိ တံ ဘက္ခော၊ တဿ နူနဇ္ဇ နာဓတိ [နာထတိ (က။)]။
၃၀၂။
ကိံ ဝနေ ရာဇပုတ္တေန၊ အာတုရေန ကရိဿသိ။
သမ္ဗုလေ ပရိစိဏ္ဏေန၊ အဟံ ဘတ္တာ ဘဝါမိ တေ။
၃၀၃။
သောကဋ္ဋာယ ဒုရတ္တာယ၊ ကိံ ရူပံ ဝိဇ္ဇတေ မမ။
အညံ ပရိယေသ ဘဒ္ဒန္တေ၊ အဘိရူပတရံ မယာ။
၃၀၄။
ဧဟိမံ ဂိရိမာရုယှ၊ ဘရိယာ မေ [မယှံ (သီ။ သျာ။ ဣ။)] စတုဿတာ။
တာသံ တွံ ပဝရာ ဟောဟိ၊ သဗ္ဗကာမသမိဒ္ဓိနီ။
၃၀၅။
နူန [နနု (သီ။ သျာ။ ဣ။ က။)] တာရကဝဏ္ဏာဘေ [ဟာဋကဝဏ္ဏာဘေ (ဣ။)]၊ ယံ ကိဉ္စိ မနသိစ္ဆသိ။
သဗ္ဗံ တံ ပစုရံ မယှံ၊ ရမသ္သ္ဝဇ္ဇ [ရမသုဇ္ဇ (သီ။ သျာ။)] မယာ သဟ။
၃၀၆။
နော စေ တုဝံ မဟေသေယျံ၊ သမ္ဗုလေ ကာရယိဿသိ။
အလံ တွံ ပါတရာသာယ၊ ပဏှေ [မညေ (သီ။ ဣ။)] ဘက္ခာ ဘဝိဿသိ။
၃၀၇။
တဉ္စ သတ္တဇဋော လုဒ္ဒေါ၊ ကဠာရော ပုရိသာဒကော။
ဝနေ နာထံ အပဿန္တိံ၊ သမ္ဗုလံ အဂ္ဂဟီ ဘုဇေ။
၃၀၈။
အဓိပန္နာ ပိသာစေန၊ လုဒ္ဒေနာမိသစက္ခုနာ။
သာ စ သတ္တုဝသမ္ပတ္တာ၊ ပတိမေဝါနုသောစတိ။
၃၀၉။
န မေ ဣဒံ တထာ ဒုက္ခံ၊ ယံ မံ ခါဒေယျ ရက္ခသော။
ယဉ္စ မေ အယျပုတ္တဿ၊ မနော ဟေဿတိ အညထာ။
၃၁၀။
န သန္တိ ဒေဝါ ပဝသန္တိ နူန၊ န ဟိ နူန သန္တိ ဣဓ လောကပါလာ။
သဟသာ ကရောန္တာနမသညတာနံ၊ န ဟိ နူန သန္တိ ပဋိသေဓိတာရော။
၃၁၁။
ဣတ္ထီနမေသာ ပဝရာ ယသဿိနီ၊ သန္တာ သမာ အဂ္ဂိရိဝုဂ္ဂတေဇာ။
တဉ္စေ တုဝံ ရက္ခသာဒေသိ ကညံ၊ မုဒ္ဓါ စ ဟိ သတ္တဓါ တေ ဖလေယျ။
မာ တွံ ဒဟီ [ဇဟီ (ဣ။)] မုဉ္စ ပတိဗ္ဗတာယ [ပတိဗ္ဗတာ သာ (သီ။)၊ ပတိဗ္ဗတာ ယာ (ဣ။)]။
၃၁၂။
သာ စ အဿမမာဂစ္ဆိ၊ ပမုတ္တာ ပုရိသာဒကာ။
နီဠံ [နိဍ္ဍံ (သျာ။ က။)] ပဠိနံ သကုဏီဝ [ဖလိနသကုဏီဝ (သီ။ သျာ။ ဣ။)]၊ ဂတသိင်္ဂံဝ အာလယံ။
၃၁၃။
သာ တတ္ထ ပရိဒေဝေသိ၊ ရာဇပုတ္တီ ယသဿိနီ။
သမ္ဗုလာ ဥတုမတ္တက္ခာ၊ ဝနေ နာထံ အပဿန္တီ [အပဿတီ (သီ။)]။
၃၁၄။
သမဏေ ဗြာဟ္မဏေ ဝန္ဒေ၊ သမ္ပန္နစရဏေ ဣသေ။
ရာဇပုတ္တံ အပဿန္တီ၊ တုမှံမှိ [တုမှံ ဟိ (ဣ။)] သရဏံ ဂတာ။
၃၁၅။
ဝန္ဒေ သီဟေ စ ဗျဂ္ဃေ စ၊ ယေ စ အညေ ဝနေ မိဂါ။
ရာဇပုတ္တံ အပဿန္တီ၊ တုမှံမှိ သရဏံ ဂတာ။
၃၁၆။
တိဏာ [တိဏ (ဣ။)] လတာနိ ဩသဓ္ယော၊ ပဗ္ဗတာနိ ဝနာနိ စ။
ရာဇပုတ္တံ အပဿန္တီ၊ တုမှံမှိ သရဏံ ဂတာ။
၃၁၇။
ဝန္ဒေ ဣန္ဒီဝရီသာမံ၊ ရတ္တိံ နက္ခတ္တမာလိနိံ။
ရာဇပုတ္တံ အပဿန္တီ၊ တုမှံမှိ သရဏံ ဂတာ။
၃၁၈။
ဝန္ဒေ ဘာဂီရထိံ ဂင်္ဂံ၊ သဝန္တီနံ ပဋိဂ္ဂဟံ။
ရာဇပုတ္တံ အပဿန္တီ၊ တုမှံမှိ သရဏံ ဂတာ။
၃၁၉။
ဝန္ဒေ အဟံ ပဗ္ဗတရာဇသေဋ္ဌံ၊ ဟိမဝန္တံ သိလုစ္စယံ။
ရာဇပုတ္တံ အပဿန္တီ၊ တုမှံမှိ သရဏံ ဂတာ။
၃၂၀။
အတိသာယံ ဝတာဂစ္ဆိ၊ ရာဇပုတ္တိ ယသဿိနိ။
ကေန နုဇ္ဇ သမာဂစ္ဆိ [သမာဂစ္ဆိ (သီ။ ဣ။)]၊ ကော တေ ပိယတရော မယာ။
၃၂၁။
ဣဒံ ခေါဟံ တဒါဝေါစံ [တဒဝေါစံ (သီ။ သျာ။)]၊ ဂဟိတာ တေန သတ္တုနာ။
န မေ ဣဒံ တထာ ဒုက္ခံ၊ ယံ မံ ခါဒေယျ ရက္ခသော။
ယဉ္စ မေ အယျပုတ္တဿ၊ မနော ဟေဿတိ အညထာ။
၃၂၂။
စောရီနံ ဗဟုဗုဒ္ဓီနံ၊ ယာသု သစ္စံ သုဒုလ္လဘံ။
ထီနံ ဘာဝေါ ဒုရာဇာနော၊ မစ္ဆဿေဝေါဒကေ ဂတံ။
၃၂၃။
တထာ မံ သစ္စံ ပါလေတု၊ ပါလယိဿတိ စေ မမံ။
ယထာဟံ နာဘိဇာနာမိ၊ အညံ ပိယတရံ တယာ။
ဧတေန သစ္စဝဇ္ဇေန၊ ဗျာဓိ တေ ဝူပသမ္မတု။
၃၂၄။
ယေ ကုဉ္ဇရာ သတ္တသတာ ဥဠာရာ၊ ရက္ခန္တိ ရတ္တိန္ဒိဝမုယျုတာဝုဓါ။
ဓနုဂ္ဂဟာနဉ္စ သတာနိ သောဠသ၊ ကထံဝိဓေ ပဿသိ ဘဒ္ဒေ သတ္တဝေါ။
၃၂၅။
အလင်္ကတာယော ပဒုမုတ္တရတ္တစာ၊ ဝိရာဂိတာ ပဿတိ ဟံသဂဂ္ဂရာ။
တာသံ သုဏိတွာ မိတဂီတဝါဒိတံ [မိတဂီတဝါဒိနံ (ဣ။)]၊ န ဒါနိ မေ တာတ တထာ ယထာ ပုရေ။
၃၂၆။
သုဝဏ္ဏသံကစ္စဓရာ သုဝိဂ္ဂဟာ၊ အလင်္ကတာ မာနုသိယစ္ဆရူပမာ။
သေနောပိယာ [သေနူပိယာ (ဣ။)] တာတ အနိန္ဒိတင်္ဂိယော၊ ခတ္တိယကညာ ပဋိလောဘယန္တိ [ပဋိလာဘယန္တိ (ဣ။)] နံ။
၃၂၇။
သစေ အဟံ တာတ တထာ ယထာ ပုရေ၊ ပတိံ တမုဉ္ဆာယ ပုနာ ဝနေ ဘရေ။
သမ္မာနယေ မံ န စ မံ ဝိမာနယေ၊ ဣတောပိ မေ တာတ တတော ဝရံ သိယာ။
၃၂၈။
ယမန္နပါနေ ဝိပုလသ္မိ ဩဟိတေ၊ နာရီ ဝိမဋ္ဌာဘရဏာ အလင်္ကတာ။
သဗ္ဗင်္ဂုပေတာ [ပဉ္စင်္ဂုပေတာ (သီ။ သျာ။ ဣ။)] ပတိနော စ အပ္ပိယာ၊ အဗဇ္ဈ [အဝဇ္ဈ (သျာ။)၊ အာဗဇ္ဈ (ဣ။)] တဿာ မရဏံ တတော ဝရံ။
၃၂၉။
အပိ စေ ဒလိဒ္ဒါ ကပဏာ အနာဠှိယာ၊ ကဋာဒုတီယာ ပတိနော စ သာ ပိယာ။
သဗ္ဗင်္ဂုပေတာယပိ အပ္ပိယာယ၊ အယမေဝ သေယျာ [သေယျော (သျာ။ က။)] ကပဏာပိ ယာ ပိယာ [ကပဏာပိ ယာ (က။)]။
၃၃၀။
သုဒုလ္လဘိတ္ထီ ပုရိသဿ ယာ ဟိတာ၊ ဘတ္တိတ္ထိယာ ဒုလ္လဘော ယော ဟိတော စ။
ဟိတာ စ တေ သီလဝတီ စ ဘရိယာ၊ ဇနိန္ဒ ဓမ္မံ စရ သမ္ဗုလာယ။
၃၃၁။
သစေ တုဝံ ဝိပုလေ လဒ္ဓဘောဂေ၊ ဣဿာဝတိဏ္ဏာ မရဏံ ဥပေသိ။
အဟဉ္စ တေ ဘဒ္ဒေ ဣမာ ရာဇကညာ [ဣမာ စ ကညာ (ဣ။)]၊ သဗ္ဗေ [သဗ္ဗေဝ (သီ။ သျာ။ ဣ။)] တေ ဝစနကရာ ဘဝါမာတိ။
သမ္ဗုလာဇာတကံ နဝမံ။
၅၂၀။ ဂန္ဓတိန္ဒုကဇာတကံ (၁၀)
၃၃၂။
အပ္ပမာဒေါ အမတံ ပဒံ [အမတပဒံ (သီ။ ဣ။)]၊ ပမာဒေါ မစ္စုနော ပဒံ။
အပ္ပမတ္တာ န မီယန္တိ၊ ယေ ပမတ္တာ ယထာ မတာ။
၃၃၃။
မဒါ ပမာဒေါ ဇာယေထ၊ ပမာဒါ ဇာယတေ ခယော။
ခယာ ပဒေါသာ [ခယာ စ ဒေါသာ (သီ။)] ဇာယန္တိ၊ မာ ပမာဒေါ [မာ မဒေါ (သီ။ သျာ။ ဣ။)] ဘရတူသဘ [ဘာရဓူသဘ (က။)]။
၃၃၄။
ဗဟူ ဟိ ခတ္တိယာ ဇီနာ၊ အတ္ထံ ရဋ္ဌံ ပမာဒိနော။
အထောပိ ဂါမိနော ဂါမာ၊ အနဂါရာ အဂါရိနော။
၃၃၅။
ခတ္တိယဿ ပမတ္တဿ၊ ရဋ္ဌသ္မိံ ရဋ္ဌဝဍ္ဎန။
သဗ္ဗေ ဘောဂါ ဝိနဿန္တိ၊ ရညော တံ ဝုစ္စတေ အဃံ။
၃၃၆။
နေသ ဓမ္မော မဟာရာဇ၊ အတိဝေလံ ပမဇ္ဇသိ။
ဣဒ္ဓံ ဖီတံ ဇနပဒံ၊ စောရာ ဝိဒ္ဓံသယန္တိ နံ။
၃၃၇။
န တေ ပုတ္တာ ဘဝိဿန္တိ၊ န ဟိရညံ န ဓါနိယံ [န ဟိရညနိဓါနိယာ (က။)]။
ရဋ္ဌေ ဝိလုပ္ပမာနမှိ၊ သဗ္ဗဘောဂေဟိ ဇိယျသိ။
၃၃၈။
သဗ္ဗဘောဂါ ပရိဇိဏ္ဏံ၊ ရာဇာနံ ဝါပိ ခတ္တိယံ [ခတ္တိယ (က။)]။
ဉာတိမိတ္တာ သုဟဇ္ဇာ စ၊ န တံ မညန္တိ မာနိယံ [မန္တိယံ (သျာ။)]။
၃၃၉။
ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ။
တမေဝမုပဇီဝန္တာ၊ န တံ မညန္တိ မာနိယံ။
၃၄၀။
အသံဝိဟိတကမ္မန္တံ၊ ဗာလံ ဒုမ္မန္တိမန္တိနံ။
သိရီ ဇဟတိ ဒုမ္မေဓံ၊ ဇိဏ္ဏံဝ ဥရဂေါ တစံ။
၃၄၁။
သုသံဝိဟိတကမ္မန္တံ ၊ ကာလုဋ္ဌာယိံ အတန္ဒိတံ။
သဗ္ဗေ ဘောဂါဘိဝဍ္ဎန္တိ၊ ဂါဝေါ သဥသဘာမိဝ။
၃၄၂။
ဥပဿုတိံ မဟာရာဇ၊ ရဋ္ဌေ ဇနပဒေ စရ။
တတ္ထ ဒိသွာ စ သုတွာ စ၊ တတော တံ [တွံ (က။)] ပဋိပဇ္ဇသိ။
၃၄၃။
ဧဝံ ဝေဒေတု ပဉ္စာလော၊ သင်္ဂါမေ သရမပ္ပိတော [သမပ္ပိတော (သီ။ ဣ။)]။
ယထာဟမဇ္ဇ ဝေဒေမိ၊ ကဏ္ဋကေန သမပ္ပိတော။
၃၄၄။
ဇိဏ္ဏော ဒုဗ္ဗလစက္ခူသိ၊ န ရူပံ သာဓု ပဿသိ။
ကိံ တတ္ထ ဗြဟ္မဒတ္တဿ၊ ယံ တံ မဂ္ဂေယျ [မဂ္ဃေယျ (ဣ။)] ကဏ္ဋကော [ကဏ္ဍကော (သီ။ သျာ။ ဣ။)]။
၃၄၅။
ဗဟ္ဝေတ္ထ ဗြဟ္မဒတ္တဿ၊ သောဟံ [ယောဟံ (သီ။ သျာ။ ဣ။)] မဂ္ဂသ္မိ [မဂ္ဂေါသ္မိ (ဣ။)] ဗြာဟ္မဏ။
အရက္ခိတာ ဇာနပဒါ၊ အဓမ္မဗလိနာ ဟတာ။
၃၄၆။
ရတ္တိဉှိ [ရတ္တိဉ္စ (သီ။)] စောရာ ခါဒန္တိ၊ ဒိဝါ ခါဒန္တိ တုဏ္ဍိယာ။
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော။
၃၄၇။
ဧတာဒိသေ ဘယေ ဇာတေ [တာတ (သီ။ ဣ။)]၊ ဘယဋ္ဋာ တာတ [တာဝ (သီ။ ဣ။)] မာဏဝါ။
နိလ္လေနကာနိ ကုဗ္ဗန္တိ၊ ဝနေ အာဟတွ ကဏ္ဋကံ။
၃၄၈။
ကဒါဿု နာမယံ ရာဇာ၊ ဗြဟ္မဒတ္တော မရိဿတိ။
ယဿ ရဋ္ဌမှိ ဇိယျန္တိ၊ အပ္ပတိကာ ကုမာရိကာ။
၃၄၉။
ဒုဗ္ဘာသိတဉှိ တေ ဇမ္မိ၊ အနတ္ထပဒကောဝိဒေ။
ကုဟိံ ရာဇာ ကုမာရီနံ၊ ဘတ္တာရံ ပရိယေသတိ။
၃၅၀။
န မေ ဒုဗ္ဘာသိတံ ဗြဟ္မေ၊ ကောဝိဒတ္ထပဒါ အဟံ။
အရက္ခိတာ ဇာနပဒါ၊ အဓမ္မဗလိနာ ဟတာ။
၃၅၁။
ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ။
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော။
ဒုဇ္ဇီဝေ ဒုဗ္ဘရေ ဒါရေ၊ ကုတော ဘတ္တာ ကုမာရိယော။
၃၅၂။
ဧဝံ သယတု ပဉ္စာလော၊ သင်္ဂါမေ သတ္တိယာ ဟတော။
ယထာယံ ကပဏော သေတိ၊ ဟတော ဖာလေန သာလိယော။
၃၅၃။
အဓမ္မေန တုဝံ ဇမ္မ၊ ဗြဟ္မဒတ္တဿ ကုဇ္ဈသိ။
ယော တွံ သပသိ ရာဇာနံ၊ အပရဇ္ဈိတွာန အတ္တနော [အတ္တနာ (ဣ။)]။
၃၅၄။
ဓမ္မေန ဗြဟ္မဒတ္တဿ၊ အဟံ ကုဇ္ဈာမိ ဗြာဟ္မဏ။
အရက္ခိတာ ဇာနပဒါ၊ အဓမ္မဗလိနာ ဟတာ။
၃၅၅။
ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ။
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော။
၃၅၆။
သာ နူန ပုန ရေ ပက္ကာ၊ ဝိကာလေ ဘတ္တမာဟရိ။
ဘတ္တဟာရိံ အပေက္ခန္တော၊ ဟတော ဖာလေန သာလိယော။
၃၅၇။
ဧဝံ ဟညတု ပဉ္စာလော၊ သင်္ဂါမေ အသိနာ ဟတော [ဒဠှံ (ဣ။)]။
ယထာဟမဇ္ဇ ပဟတော၊ ခီရဉ္စ မေ ပဝဋ္ဋိတံ။
၃၅၈။
ယံ ပသု ခီရံ ဆဍ္ဍေတိ၊ ပသုပါလံ ဝိဟိံသတိ [ပသုပါလဉ္စ ဟိံသတိ (သီ။)၊ ပသု ဖာလဉ္စ ဟိံသတိ (ဣ။)]။
ကိံ တတ္ထ ဗြဟ္မဒတ္တဿ၊ ယံ နော ဂရဟတေ [ဂရဟတော (ဣ။)] ဘဝံ။
၃၅၉။
ဂါရယှော ဗြဟ္မေ ပဉ္စာလော၊ ဗြဟ္မဒတ္တဿ ရာဇိနော။
အရက္ခိတာ ဇာနပဒါ၊ အဓမ္မဗလိနာ ဟတာ။
၃၆၀။
ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ။
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော။
၃၆၁။
စဏ္ဍာ အဋနကာ [အဋနက (ဣ။)၊ အကဋနာ (က။)] ဂါဝီ၊ ယံ ပုရေ န ဒုဟာမသေ။
တံ ဒါနိ အဇ္ဇ ဒေါဟာမ၊ ခီရကာမေဟုပဒ္ဒုတာ။
၃၆၂။
ဧဝံ ကန္ဒတု ပဉ္စာလော၊ ဝိပုတ္တော ဝိပ္ပသုက္ခတု။
ယထာယံ ကပဏာ ဂါဝီ၊ ဝိပုတ္တာ ပရိဓါဝတိ။
၃၆၃။
ယံ ပသု ပသုပါလဿ၊ သမ္ဘမေယျ [ပဗ္ဘမေယျ (သီ။ ဣ။)] ရဝေယျ ဝါ။
ကော နီဓ အပရာဓတ္ထိ၊ ဗြဟ္မဒတ္တဿ ရာဇိနော။
၃၆၄။
အပရာဓေါ မဟာဗြဟ္မေ၊ ဗြဟ္မဒတ္တဿ ရာဇိနော။
အရက္ခိတာ ဇာနပဒါ၊ အဓမ္မဗလိနာ ဟတာ။
၃၆၅။
ရတ္တိဉှိ စောရာ ခါဒန္တိ၊ ဒိဝါ ခါဒန္တိ တုဏ္ဍိယာ။
ရဋ္ဌသ္မိံ ကူဋရာဇဿ၊ ဗဟု အဓမ္မိကော ဇနော။
ကထံ နော အသိကောသတ္ထာ၊ ခီရပါ ဟညတေ ပဇာ။
၃၆၆။
ဧဝံ ခဇ္ဇတု ပဉ္စာလော၊ ဟတော ယုဒ္ဓေ သပုတ္တကော။
ယထာဟမဇ္ဇ ခဇ္ဇာမိ၊ ဂါမိကေဟိ [ဂါမကေဟိ (သီ။ ဣ။)] အရညဇော။
၃၆၇။
န သဗ္ဗဘူတေသု ဝိဓေန္တိ [ဝိဓန္တိ (က။)] ရက္ခံ၊ ရာဇာနော မဏ္ဍူက မနုဿလောကေ။
နေတ္တာဝတာ ရာဇာ အဓမ္မစာရီ၊ ယံ တာဒိသံ ဇီဝမဒေယျု ဓင်္ကာ။
၃၆၈။
အဓမ္မရူပေါ ဝတ ဗြဟ္မစာရီ၊ အနုပ္ပိယံ ဘာသသိ ခတ္တိယဿ။
ဝိလုပ္ပမာနာယ ပုထုပ္ပဇာယ၊ ပူဇေသိ ရာဇံ ပရမပ္ပမာဒံ [ရာဇံ ပရမပ္ပဝါဒံ (သီ။)၊ ရာဇာ ပရမပ္ပဝါဒိံ (သျာ။)]။
၃၆၉။
သစေ ဣမံ ဗြဟ္မေ သုရဇ္ဇကံ သိယာ၊ ဖီတံ ရဋ္ဌံ မုဒိတံ [ပူရိတံ (က။)] ဝိပ္ပသန္နံ။
ဘုတွာ ဗလိံ အဂ္ဂပိဏ္ဍဉ္စ ကာကာ၊ န မာဒိသံ ဇီဝမဒေယျု ဓင်္ကာတိ။
ဂန္ဓတိန္ဒုကဇာတကံ ဒသမံ။
တဿုဒ္ဒါနံ –
ကိံဆန္ဒ ကုမ္ဘ ဇယဒ္ဒိသ ဆဒ္ဒန္တ၊ အထ ပဏ္ဍိတသမ္ဘဝ သိရကပိ။
ဒကရက္ခသ ပဏ္ဍရနာဂဝရော၊ အထ သမ္ဗုလ တိန္ဒုကဒေဝသုတောတိ။
တိံသနိပါတံ နိဋ္ဌိတံ။
ဇာတကပါဠိယာ ပဌမော ဘာဂေါ နိဋ္ဌိတော။