၁၄။ ပကိဏ္ဏကနိပါတ
၄၈၄။ သာလိကေဒါရဇာတက (၁)
၁။
သမ္ပန္နံ သာလိကေဒါရံ၊ သုဝါ ဘုဉ္ဇန္တိ ကောသိယ။
ပဋိဝေဒေမိ တေ ဗြဟ္မေ၊ န နေ [တေ (သီ။ သျာ။)၊ နံ (သီ။ သျာ။ ဣ။ အဋ္ဌ။)၊ တံ (က။ အဋ္ဌ။)] ဝါရေတုမုဿဟေ။
၂။
ဧကော စ တတ္ထ သကုဏော၊ ယော နေသံ [တေသံ (သီ။ အဋ္ဌ။)] သဗ္ဗသုန္ဒရော။
ဘုတွာ သာလိံ ယထာကာမံ၊ တုဏ္ဍေနာဒါယ ဂစ္ဆတိ။
၃။
ဩဍ္ဍေန္တု [ဥဇ္ဈုန္တု (သျာ။ က။) အင်္ဂုတ္တရနိကာယေ ပဿိတဗ္ဗံ] ဝါဠပါသာနိ၊ ယထာ ဝဇ္ဈေထ သော ဒိဇော။
ဇီဝဉ္စ နံ ဂဟေတွာန၊ အာနယေဟိ [အာနယေထ (သီ။ ဣ။)] မမန္တိကေ။
၄။
ဧတေ ဘုတွာ ပိဝိတွာ စ [ဘုတွာ စ ပိတွာ စ (ဣ။)]၊ ပက္ကမန္တိ ဝိဟင်္ဂမာ။
ဧကော ဗဒ္ဓေါသ္မိ ပါသေန၊ ကိံ ပါပံ ပကတံ မယာ။
၅။
ဥဒရံ နူန အညေသံ၊ သုဝ အစ္စောဒရံ တဝ။
ဘုတွာ သာလိံ ယထာကာမံ၊ တုဏ္ဍေနာဒါယ ဂစ္ဆသိ။
၆။
ကောဋ္ဌံ နု တတ္ထ ပူရေသိ၊ သုဝ ဝေရံ နု တေ မယာ။
ပုဋ္ဌော မေ သမ္မ အက္ခာဟိ၊ ကုဟိံ သာလိံ နိဒါဟသိ [နိဓီယသိ (ဣ။)]။
၇။
န မေ ဝေရံ တယာ သဒ္ဓိံ၊ ကောဋ္ဌော မယှံ န ဝိဇ္ဇတိ။
ဣဏံ မုဉ္စာမိဏံ ဒမ္မိ၊ သမ္ပတ္တော ကောဋသိမ္ဗလိံ။
နိဓိမ္ပိ တတ္ထ နိဒဟာမိ၊ ဧဝံ ဇာနာဟိ ကောသိယ။
၈။
ကီဒိသံ တေ ဣဏဒါနံ၊ ဣဏမောက္ခော စ ကီဒိသော။
နိဓိနိဓါနမက္ခာဟိ ၊ အထ ပါသာ ပမောက္ခသိ။
၉။
အဇာတပက္ခာ တရုဏာ၊ ပုတ္တကာ မယှ ကောသိယ။
တေ မံ ဘတာ ဘရိဿန္တိ၊ တသ္မာ တေသံ ဣဏံ ဒဒေ။
၁၀။
မာတာ ပိတာ စ မေ ဝုဒ္ဓါ၊ ဇိဏ္ဏကာ ဂတယောဗ္ဗနာ။
တေသံ တုဏ္ဍေန ဟာတူန၊ မုဉ္စေ ပုဗ္ဗကတံ [ပုဗ္ဗေ ကတံ (သီ။)] ဣဏံ။
၁၁။
အညေပိ တတ္ထ သကုဏာ၊ ခီဏပက္ခာ သုဒုဗ္ဗလာ။
တေသံ ပုညတ္ထိကော ဒမ္မိ၊ တံ နိဓိံ အာဟု ပဏ္ဍိတာ။
၁၂။
ဤဒိသံ [ဧဒိသံ (သီ။ ဣ။)] မေ ဣဏဒါနံ၊ ဣဏမောက္ခော စ ဤဒိသော။
နိဓိနိဓါနမက္ခာမိ [နိဓိံ နိဓါနံ အက္ခာတံ (သီ။ ဣ။)]၊ ဧဝံ ဇာနာဟိ ကောသိယ။
၁၃။
ဘဒ္ဒကော ဝတယံ ပက္ခီ၊ ဒိဇော ပရမဓမ္မိကော။
ဧကစ္စေသု မနုဿေသု၊ အယံ ဓမ္မော န ဝိဇ္ဇတိ။
၁၄။
ဘုဉ္ဇ သာလိံ ယထာကာမံ၊ သဟ သဗ္ဗေဟိ ဉာတိဘိ။
ပုနာပိ သုဝ ပဿေမု၊ ပိယံ မေ တဝ ဒဿနံ။
၁၅။
ဘုတ္တဉ္စ ဣတဉ္စ တဝဿမမှိ [တဝဿဗျမှိ (က။)]၊ ရတ္တိဉ္စ [ရတီ စ (သီ။ ဣ။)] နော ကောသိယ တေ သကာသေ။
နိက္ခိတ္တဒဏ္ဍေသု ဒဒါဟိ ဒါနံ၊ ဇိဏ္ဏေ စ မာတာပိတရော ဘရဿု။
၁၆။
လက္ခီ ဝတ မေ ဥဒပါဒိ အဇ္ဇ၊ ယော အဒ္ဒသာသိံ ပဝရံ [ယောဟံ အဒဿံ ပရမံ (သျာ။ က။)] ဒိဇာနံ။
သုဝဿ သုတွာန သုဘာသိတာနိ၊ ကာဟာမိ ပုညာနိ အနပ္ပကာနိ။
၁၇။
သော ကောသိယော အတ္တမနော ဥဒဂ္ဂေါ၊ အန္နဉ္စ ပါနဉ္စဘိသင်္ခရိတွာ [အန္နဉ္စ ပါနံ အဘိသံဟရိတွာ (က။)]။
အန္နေန ပါနေန ပသန္နစိတ္တော၊ သန္တပ္ပယိ သမဏဗြာဟ္မဏေ စာတိ။
သာလိကေဒါရဇာတကံ [ကေဒါရဇာတကံ (က။)] ပဌမံ။
၄၈၅။ စန္ဒကိန္နရီဇာတကံ (၂)
၁၈။
ဥပနီယတိဒံ မညေ၊ စန္ဒေ [လောဟိတမဒေန မဇ္ဇာမိ။ ဝိဇဟာမိ ဇီဝိတံ ပါဏာ၊ (သီ။ ဣ။ အဋ္ဌ။)] လောဟိတမဒ္ဒနေ။
အဇ္ဇ ဇဟာမိ ဇီဝိတံ၊ ပါဏာ [လောဟိတမဒေန မဇ္ဇာမိ။ ဝိဇဟာမိ ဇီဝိတံ ပါဏာ၊ (သီ။ ဣ။ အဋ္ဌ။)] မေ စန္ဒေ နိရုဇ္ဈန္တိ။
၁၉။
ဩသီဒိ [ဩသဓိ (သီ။ သျာ။ ဣ။)၊ ဩသဋ္ဌိ (က။)၊ ဩသတိ (အဘိနဝဋီကာ)၊ ဩသီဒတိ (?)] မေ ဒုက္ခံ [ဒုက္ခံ မေ (သီ။ ဣ။)] ဟဒယံ၊ မေ ဍယှတေ နိတမ္မာမိ။
တဝ စန္ဒိယာ သောစန္တိယာ၊ န နံ အညေဟိ သောကေဟိ။
၂၀။
တိဏမိဝ ဝနမိဝ မိလာယာမိ [မိလယာမိ (သီ။)၊ မိယျာမိ (သီ။ ဣ။ အဋ္ဌ။)]၊ နဒီ အပရိပုဏ္ဏာဝ [အပရိပုဏ္ဏိယာဝ (သီ။ ဣ။)] သုဿာမိ။
တဝ စန္ဒိယာ သောစန္တိယာ၊ န နံ အညေဟိ သောကေဟိ။
၂၁။
ဝဿမိဝ သရေ ပါဒေ [ဝဿံဝ သရေ ပါဒေ (သီ။)၊ ဝဿံဝ သရေ ပဗ္ဗတပါဒေ (ဣ။)]၊ ဣမာနိ အဿူနိ ဝတ္တရေ မယှံ။
တဝ စန္ဒိယာ သောစန္တိယာ၊ န နံ အညေဟိ သောကေဟိ။
၂၂။
ပါပေါ ခေါသိ [ပါပေါသိ ခေါ (သီ။)၊ ပါပေါ ခေါ (သျာ။ ဣ။)] ရာဇပုတ္တ၊ ယော မေ ဣစ္ဆိတံ [ဣစ္ဆိတ (သီ။ သျာ။ ဣ။)] ပတိံ ဝရာကိယာ။
ဝိဇ္ဈသိ ဝနမူလသ္မိံ၊ သောယံ ဝိဒ္ဓေါ ဆမာ သေတိ။
၂၃။
ဣမံ မယှံ ဟဒယသောကံ၊ ပဋိမုဉ္စတု ရာဇပုတ္တ တဝ မာတာ။
ယော မယှံ ဟဒယသောကော၊ ကိမ္ပုရိသံ အဝေက္ခမာနာယ။
၂၄။
ဣမံ မယှံ ဟဒယသောကံ၊ ပဋိမုဉ္စတု ရာဇပုတ္တ တဝ ဇာယာ။
ယော မယှံ ဟဒယသောကော၊ ကိမ္ပုရိသံ အဝေက္ခမာနာယ။
၂၅။
မာ စ ပုတ္တံ [ပုတ္တေ (သီ။ ဣ။)] မာ စ ပတိံ၊ အဒ္ဒက္ခိ ရာဇပုတ္တ တဝ မာတာ။
ယော ကိမ္ပုရိသံ အဝဓိ၊ အဒူသကံ မယှ ကာမာ ဟိ [မယှံ ကာမာ (က။)]။
၂၆။
မာ စ ပုတ္တံ မာ စ ပတိံ၊ အဒ္ဒက္ခိ ရာဇပုတ္တ တဝ ဇာယာ။
ယော ကိမ္ပုရိသံ အဝဓိ၊ အဒူသကံ မယှ ကာမာ ဟိ။
၂၇။
မာ တွံ စန္ဒေ ရောဒိ၊ မာ သောစိ ဝနတိမိရမတ္တက္ခိ။
မမ တွံ ဟေဟိသိ ဘရိယာ၊ ရာဇကုလေ ပူဇိတာ နာရီဘိ [နာရီ (သီ။ ဣ။)]။
၂၈။
အပိ နူနဟံ မရိဿံ၊ နာဟံ [န စ ပနာဟံ (သီ။ ဣ။)] ရာဇပုတ္တ တဝ ဟေဿံ။
ယော ကိမ္ပုရိသံ အဝဓိ၊ အဒူသကံ မယှ ကာမာ ဟိ။
၂၉။
အပိ ဘီရုကေ အပိ ဇီဝိတုကာမိကေ၊ ကိမ္ပုရိသိ ဂစ္ဆ ဟိမဝန္တံ။
တာလီသတဂရဘောဇနာ၊ အညေ [တာလိဿတဂရဘောဇနေ၊ အရညေ (သီ။ ဣ။)] တံ မိဂါ ရမိဿန္တိ။
၃၀။
တေ ပဗ္ဗတာ တာ စ ကန္ဒရာ၊ [တာ စ ဂိရိဂုဟာယော (သီ။ သျာ။ ဣ။)] တာ စ ဂိရိဂုဟာယော တထေဝ တိဋ္ဌန္တိ [တာ စ ဂိရိဂုဟာယော (သီ။ သျာ။ ဣ။)]။
တတ္ထေဝ [တတ္ထ (သီ။ သျာ။ ဣ။)] တံ အပဿန္တီ၊ ကိမ္ပုရိသ ကထံ အဟံ ကဿံ။
၃၁။
တေ ပဏ္ဏသန္ထတာ ရမဏီယာ၊ ဝါဠမိဂေဟိ အနုစိဏ္ဏာ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ [ကာသံ (သီ။ သျာ။ ဣ။)]။
၃၂။
တေ ပုပ္ဖသန္ထတာ ရမဏီယာ၊ ဝါဠမိဂေဟိ အနုစိဏ္ဏာ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၃။
အစ္ဆာ သဝန္တိ ဂိရိဝန [ဂိရိဝရ (သီ။ ဣ။)] နဒိယော၊ ကုသုမာဘိကိဏ္ဏသောတာယော။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၄။
နီလာနိ ဟိမဝတော ပဗ္ဗတဿ၊ ကူဋာနိ ဒဿနီယာနိ [ဒဿနေယျာနိ (သီ။ ဣ။)]။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၅။
ဣတာနိ ဟိမဝတော ပဗ္ဗတဿ၊ ကူဋာနိ ဒဿနီယာနိ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၆။
တမ္ဗာနိ ဟိမဝတော ပဗ္ဗတဿ၊ ကူဋာနိ ဒဿနီယာနိ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၇။
တုင်္ဂါနိ ဟိမဝတော ပဗ္ဗတဿ၊ ကူဋာနိ ဒဿနီယာနိ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၈။
သေတာနိ ဟိမဝတော ပဗ္ဗတဿ၊ ကူဋာနိ ဒဿနီယာနိ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၃၉။
စိတြာနိ ဟိမဝတော ပဗ္ဗတဿ၊ ကူဋာနိ ဒဿနီယာနိ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၄၀။
ယက္ခဂဏသေဝိတေ ဂန္ဓမာဒနေ၊ ဩသဓေဘိ သဉ္ဆန္နေ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၄၁။
ကိမ္ပုရိသသေဝိတေ ဂန္ဓမာဒနေ၊ ဩသဓေဘိ သဉ္ဆန္နေ။
တတ္ထေဝ တံ အပဿန္တီ၊ ကိမ္ပုရိသ ကထံ အဟံ ကဿံ။
၄၂။
ဝန္ဒေ တေ အယိရဗြဟ္မေ [အယျိရေ ဗြဟ္မေ (က။)]၊ ယော မေ ဣစ္ဆိတံ ပတိံ ဝရာကိယာ။
အမတေန အဘိသိဉ္စိ၊ သမာဂတာသ္မိ ပိယတမေန။
၄၃။
ဝိစရာမ ဒါနိ ဂိရိဝန [ဂိရိဝရ (သီ။ ဣ။)] နဒိယော၊ ကုသုမာဘိကိဏ္ဏသောတာယော။
နာနာဒုမဝသနာယော [သေဝနာယော (ဣ။)]၊ ပိယံဝဒါ အညမညဿာတိ။
စန္ဒကိန္နရီဇာတကံ [စန္ဒကိန္နရဇာတကံ (သီ။ သျာ။ ဣ။)] ဒုတိယံ။
၄၈၆။ မဟာဥက္ကုသဇာတကံ (၃)
၄၄။
ဥက္ကာ စိလာစာ [မိလာစာ (သီ။ သျာ။ ဣ။)] ဗန္ဓန္တိ ဒီပေ [ဗန္ဓန္တိ လုဒ္ဒါ၊ ဒီပေ (က။)]၊ ပဇာ မမံ ခါဒိတုံ ပတ္ထယန္တိ။
မိတ္တံ သဟာယဉ္စ ဝဒေဟိ သေနက၊ အာစိက္ခ ဉာတိဗျသနံ ဒိဇာနံ။
၄၅။
ဒိဇော ဒိဇာနံ ပဝရောသိ ပက္ခိမ [ပက္ခိ (သီ။ ဣ။)၊ ပက္ခိ စ (သျာ။)]၊ ဥက္ကုသရာဇ သရဏံ တံ ဥပေမ [ဥပေမိ (သီ။ သျာ။ ဣ။)]။
ပဇာ မမံ ခါဒိတုံ ပတ္ထယန္တိ၊ လုဒ္ဒါ စိလာစာ [မိလာစာ (သီ။ သျာ။ ဣ။)] ဘဝ မေ သုခါယ။
၄၆။
မိတ္တံ သဟာယဉ္စ ကရောန္တိ ပဏ္ဍိတာ၊ ကာလေ အကာလေ သုခမေသမာနာ [မာသယာနာ (ဣ။)]။
ကရောမိ တေ သေနက ဧတမတ္ထံ၊ အရိယော ဟိ အရိယဿ ကရောတိ ကိစ္စံ။
၄၇။
ယံ ဟောတိ ကိစ္စံ အနုကမ္ပကေန၊ အရိယဿ အရိယေန ကတံ တယီဒံ [တဝ ယိဒံ (သီ။ ဣ။)]။
အတ္တာနုရက္ခီ ဘဝ မာ အဒယှိ [အဍယှ (သီ။ ဣ။)]၊ လစ္ဆာမ ပုတ္တေ တယိ ဇီဝမာနေ။
၄၈။
တဝေဝ [တမေဝ (သျာ။ က။)] ရက္ခာဝရဏံ ကရောန္တော၊ သရီရဘေဒါပိ န သန္တသာမိ။
ကရောန္တိ ဟေကေ [ဟေတေ (က။ သီ။ သျာ။ ဣ။)] သခီနံ သခါရော၊ ပါဏံ စဇန္တာ [စဇန္တိ (သီ။ ဣ။)] သတမေသ [သတာနေသ (ဣ။)] ဓမ္မော။
၄၉။
သုဒုက္ကရံ ကမ္မမကာသိ [မကာ (သီ။ ဣ။)]၊ အဏ္ဍဇာယံ ဝိဟင်္ဂမော။
အတ္ထာယ ကုရရော ပုတ္တေ၊ အဍ္ဎရတ္တေ အနာဂတေ။
၅၀။
စုတာပိ ဟေကေ [ဧကေ (သီ။ ဣ။)] ခလိတာ သကမ္မုနာ၊ မိတ္တာနုကမ္ပာယ ပတိဋ္ဌဟန္တိ။
ပုတ္တာ မမဋ္ဋာ ဂတိမာဂတောသ္မိ၊ အတ္ထံ စရေထော [စရေထ (သီ။ သျာ။ ဣ။)] မမ ဝါရိစရ [ဝါရိဆန္န (သီ။ ဣ။)]။
၅၁။
ဓနေန ဓညေန စ အတ္တနာ စ၊ မိတ္တံ သဟာယဉ္စ ကရောန္တိ ပဏ္ဍိတာ။
ကရောမိ တေ သေနက ဧတမတ္ထံ၊ အရိယော ဟိ အရိယဿ ကရောတိ ကိစ္စံ။
၅၂။
အပ္ပောဿုက္ကော တာတ တုဝံ နိသီဒ၊ ပုတ္တော ပိတု စရတိ အတ္ထစရိယံ။
အဟံ စရိဿာမိ တဝေတမတ္ထံ၊ သေနဿ ပုတ္တေ ပရိတာယမာနော။
၅၃။
အဒ္ဓါ ဟိ တာတ သတမေသ ဓမ္မော၊ ပုတ္တော ပိတု ယံ စရေ [ပိတုနံ စရေ (က။)၊ ပိတု ယဉ္စရေထ (သီ။ ဣ။)] အတ္ထစရိယံ။
အပ္ပေဝ မံ ဒိသွာန ပဝဍ္ဎကာယံ၊ သေနဿ ပုတ္တာ န ဝိဟေဌယေယျုံ။
၅၄။
ပသူ မနုဿာ မိဂဝီရသေဋ္ဌ [မိဂဝိရိယသေဋ္ဌ (သီ။ ဣ။)]၊ ဘယဋ္ဋိတာ [ဘယဒ္ဒိတာ (သီ။ ဣ။)] သေဋ္ဌမုပဗ္ဗဇန္တိ။
ပုတ္တာ မမဋ္ဋာ ဂတိမာဂတောသ္မိ၊ တွံ နောသိ ရာဇာ ဘဝ မေ သုခါယ။
၅၅။
ကရောမိ တေ သေနက ဧတမတ္ထံ၊ အာယာမိ တေ တံ ဒိသတံ ဝဓါယ။
ကထံဟိ ဝိညူ ပဟု သမ္ပဇာနော၊ န ဝါယမေ အတ္တဇနဿ ဂုတ္တိယာ။
၅၆။
မိတ္တဉ္စ ကယိရာထ သုဟဒယဉ္စ [သုဟဒ္ဒယဉ္စ (သီ။)၊ သခါဃရဉ္စ (ဣ။)]၊ အယိရဉ္စ ကယိရာထ သုခါဂမာယ။
နိဝတ္ထကောစောဝ [ကောဇောဝ (သီ။ ဣ။)] သရေဘိဟန္တွာ၊ မောဒါမ ပုတ္တေဟိ သမင်္ဂိဘူတာ။
၅၇။
သကမိတ္တဿ ကမ္မေန၊ သဟာယဿာပလာယိနော။
ကူဇန္တမုပကူဇန္တိ ၊ လောမသာ ဟဒယင်္ဂမံ။
၅၈။
မိတ္တံ သဟာယံ အဓိဂမ္မ ပဏ္ဍိတော၊ သော ဘုဉ္ဇတီ ပုတ္တ ပသုံ ဓနံ ဝါ။
အဟဉ္စ ပုတ္တာ စ ပတီ စ မယှံ၊ မိတ္တာနုကမ္ပာယ သမင်္ဂိဘူတာ။
၅၉။
ရာဇဝတာ သူရဝတာ စ အတ္ထော၊ သမ္ပန္နသခိဿ ဘဝန္တိ ဟေတေ။
သော မိတ္တဝါ ယသဝါ ဥဂ္ဂတတ္တော၊ အသ္မိံဓလောကေ [အသ္မိဉ္စ လောကေ (သီ။ သျာ။ ဣ။)] မောဒတိ ကာမကာမီ။
၆၀။
ကရဏီယာနိ မိတ္တာနိ၊ ဒလိဒ္ဒေနာပိ သေနက။
ပဿ မိတ္တာနုကမ္ပာယ၊ သမဂ္ဂမှာ သဉာတကေ [သဉာတကာ (?)]။
၆၁။
သူရေန ဗလဝန္တေန၊ ယော မိတ္တေ [မေတ္တေ (သီ။)၊ မိတ္တံ (သျာ။)] ကုရုတေ ဒိဇော။
ဧဝံ သော သုခိတော ဟောတိ၊ ယထာဟံ တွဉ္စ သေနကာတိ။
မဟာဥက္ကုသဇာတကံ တတိယံ။
၄၈၇။ ဥဒ္ဒါလကဇာတကံ (၄)
၆၂။
ခရာဇိနာ ဇဋိလာ ပင်္ကဒန္တာ၊ ဒုမ္မက္ခရူပါ [ဒုမ္မုဓရူပါ (သီ။ ဣ။ က။)] ယေ မန္တံ ဇပ္ပန္တိ [ယေမေ ဇပန္တိ (သီ။ ဣ။)၊ ယေ’မေ ဇပ္ပန္တိ မန္တေ (ဇာ။ ၁။၆။၁၀)]။
ကစ္စိန္နု တေ မာနုသကေ ပယောဂေ၊ ဣဒံ ဝိဒူ ပရိမုတ္တာ အပါယာ။
၆၃။
ပါပါနိ ကမ္မာနိ ကရေထ [ကရေယျ (သျာ။)၊ ကတွာန (ဇာ။ ၁။၆။၁၁)] ရာဇ၊ ဗဟုဿုတော စေ န စရေယျ ဓမ္မံ။
သဟဿဝေဒေါပိ န တံ ပဋိစ္စ၊ ဒုက္ခာ ပမုစ္စေ [ပမုဉ္စေ (သျာ။)] စရဏံ အပတွာ။
၆၄။
သဟဿဝေဒေါပိ န တံ ပဋိစ္စ၊ ဒုက္ခာ ပမုစ္စေ စရဏံ အပတွာ။
မညာမိ ဝေဒါ အဖလာ ဘဝန္တိ၊ သသံယမံ စရဏညေဝ သစ္စံ။
၆၅။
န ဟေဝ ဝေဒါ အဖလာ ဘဝန္တိ၊ သသံယမံ စရဏညေဝ သစ္စံ။
ကိတ္တိဉှိ [ကိတ္တိဉ္စ (သျာ။)] ပပ္ပောတိ အဓိစ္စ ဝေဒေ၊ သန္တိံ ပုဏာတိ [ပုနောတိ (သီ။ အဋ္ဌ။)၊ ပုဏေတိ (သျာ။ ဇာ။ ၁။၆။၁၃)၊ ပုနေတိ (ဣ။)] စရဏေန ဒန္တော။
၆၆။
ဘစ္စာ မာတာ ပိတာ ဗန္ဓူ၊ ယေန ဇာတော သယေဝ သော။
ဥဒ္ဒါလကော အဟံ ဘောတော [ဘောတိ (က။)]၊ သောတ္တိယာကုလဝံသကော [ဝံသတော (က။)]။
၆၇။
ကထံ ဘော ဗြာဟ္မဏော ဟောတိ၊ ကထံ ဘဝတိ ကေဝလီ။
ကထဉ္စ ပရိနိဗ္ဗာနံ၊ ဓမ္မဋ္ဌော ကိန္တိ ဝုစ္စတိ။
၆၈။
နိရံကတွာ အဂ္ဂိမာဒါယ ဗြာဟ္မဏော၊ အာပေါ သိဉ္စံ ယဇံ ဥဿေတိ ယူပံ။
ဧဝံကရော ဗြာဟ္မဏော ဟောတိ ခေမီ၊ ဓမ္မေ ဌိတံ တေန အမာပယိံသု။
၆၉။
န သုဒ္ဓိ သေစနေနတ္ထိ၊ နာပိ ကေဝလီ ဗြာဟ္မဏော။
န ခန္တီ နာပိ သောရစ္စံ၊ နာပိ သော ပရိနိဗ္ဗုတော။
၇၀။
ကထံ သော [ဘော (သျာ။ က။)] ဗြာဟ္မဏော ဟောတိ၊ ကထံ ဘဝတိ ကေဝလီ။
ကထဉ္စ ပရိနိဗ္ဗာနံ၊ ဓမ္မဋ္ဌော ကိန္တိ ဝုစ္စတိ။
၇၁။
အခေတ္တဗန္ဓူ အမမော နိရာသော၊ နိလ္လောဘပါပေါ ဘဝလောဘခီဏော။
ဧဝံကရော ဗြာဟ္မဏော ဟောတိ ခေမီ၊ ဓမ္မေ ဌိတံ တေန အမာပယိံသု။
၇၂။
ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ။
သဗ္ဗေဝ သောရတာ ဒန္တာ၊ သဗ္ဗေဝ ပရိနိဗ္ဗုတာ။
သဗ္ဗေသံ သီတိဘူတာနံ၊ အတ္ထိ သေယျောထ [သေယျောဝ (သီ။ ဣ။)] ပါပိယော။
၇၃။
ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ။
သဗ္ဗေဝ သောရတာ ဒန္တာ၊ သဗ္ဗေဝ ပရိနိဗ္ဗုတာ။
သဗ္ဗေသံ သီတိဘူတာနံ၊ နတ္ထိ သေယျောထ ပါပိယော။
၇၄။
ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ။
သဗ္ဗေဝ သောရတာ ဒန္တာ၊ သဗ္ဗေဝ ပရိနိဗ္ဗုတာ။
၇၅။
သဗ္ဗေသံ သီတိဘူတာနံ၊ နတ္ထိ သေယျောထ ပါပိယော။
ပနတ္ထံ [ပသတ္ထံ (သျာ။)၊ ပသဋ္ဌံ (က။)] စရသိ ဗြဟ္မညံ၊ သောတ္တိယာကုလဝံသတံ။
၇၆။
နာနာရတ္တေဟိ ဝတ္ထေဟိ၊ ဝိမာနံ ဘဝတိ ဆာဒိတံ။
န တေသံ ဆာယာ ဝတ္ထာနံ၊ သော ရာဂေါ အနုပဇ္ဇထ။
၇၇။
ဧဝမေဝ [ဧဝမေဝံ (ဣ။)] မနုဿေသု၊ ယဒါ သုဇ္ဈန္တိ မာဏဝါ။
တေ သဇာတိံ ပမုဉ္စန္တိ [န တေသံ ဇာတိံ ပုစ္ဆန္တိ (သီ။ သျာ။ ဣ။)၊ န တေသံ ဇာတိ သုဇ္ဈတိ (က။)]၊ ဓမ္မမညာယ သုဗ္ဗတာတိ။
ဥဒ္ဒါလကဇာတကံ စတုတ္ထံ။
၄၈၈။ ဘိသဇာတကံ (၅)
၇၈။
အဿံ ဂဝံ ရဇတံ ဇာတရူပံ၊ ဘရိယဉ္စ သော ဣဓ လဘတံ မနာပံ။
ပုတ္တေဟိ ဒါရေဟိ သမင်္ဂိ ဟောတု၊ ဘိသာနိ တေ ဗြာဟ္မဏ ယော အဟာသိ။
၇၉။
မာလဉ္စ သော ကာသိကစန္ဒနဉ္စ၊ ဓါရေတု ပုတ္တဿ ဗဟူ ဘဝန္တု။
ကာမေသု တိဗ္ဗံ ကုရုတံ အပေက္ခံ၊ ဘိသာနိ တေ ဗြာဟ္မဏ ယော အဟာသိ။
၈၀။
ပဟူတဓညော ကသိမာ ယသဿီ၊ ပုတ္တေ ဂိဟီ ဓနိမာ သဗ္ဗကာမေ။
ဝယံ အပဿံ ဃရမာဝသာတု၊ ဘိသာနိ တေ ဗြာဟ္မဏ ယော အဟာသိ။
၈၁။
သော ခတ္တိယော ဟောတု ပသယှကာရီ၊ ရာဇာဘိရာဇာ [ရာဇာဓိရာဇာ (သျာ။ က။)] ဗလဝါ ယသဿီ။
သ စာတုရန္တံ မဟိမာဝသာတု၊ ဘိသာနိ တေ ဗြာဟ္မဏ ယော အဟာသိ။
၈၂။
သော ဗြာဟ္မဏော ဟောတု အဝီတရာဂေါ၊ မုဟုတ္တနက္ခတ္တပထေသု ယုတ္တော။
ပူဇေတု နံ ရဋ္ဌပတီ ယသဿီ၊ ဘိသာနိ တေ ဗြာဟ္မဏ ယော အဟာသိ။
၈၃။
အဇ္ဈာယကံ သဗ္ဗသမန္တဝေဒံ [သဗ္ဗသမတ္တဝေဒံ (သီ။)၊ သဗ္ဗသမတ္တဝေဒနံ (ဣ။)]၊ တပဿီနံ မညတု သဗ္ဗလောကော။
ပူဇေန္တု နံ ဇာနပဒါ သမေစ္စ၊ ဘိသာနိ တေ ဗြာဟ္မဏ ယော အဟာသိ။
၈၄။
စတုဿဒံ ဂါမဝရံ သမိဒ္ဓံ၊ ဒိန္နဉှိ သော ဘုဉ္ဇတု ဝါသဝေန။
အဝီတရာဂေါ မရဏံ ဥပေတု၊ ဘိသာနိ တေ ဗြာဟ္မဏ ယော အဟာသိ။
၈၅။
သော ဂါမဏီ ဟောတု သဟာယမဇ္ဈေ၊ နစ္စေဟိ ဂီတေဟိ ပမောဒမာနော။
သော ရာဇတော ဗျသန မာလတ္ထ [မာ ရာဇတော ဝ္ယသန’မလတ္ထ (သီ။ သျာ။ ဣ။)] ကိဉ္စိ၊ ဘိသာနိ တေ ဗြာဟ္မဏ ယော အဟာသိ။
၈၆။
ယံ ဧကရာဇာ ပထဝိံ ဝိဇေတွာ၊ ဣတ္ထီသဟဿာန [ဣတ္ထီသဟဿဿ (သီ။ ဣ။)] ဌပေတု အဂ္ဂံ။
သီမန္တိနီနံ ပဝရာ ဘဝါတု၊ ဘိသာနိ တေ ဗြာဟ္မဏ ယာ အဟာသိ။
၈၇။
ဣသီနဉှိ သာ သဗ္ဗသမာဂတာနံ၊ ဘုဉ္ဇေယျ သာဒုံ အဝိကမ္ပမာနာ။
စရာတု လာဘေန ဝိကတ္ထမာနာ၊ ဘိသာနိ တေ ဗြာဟ္မဏ ယာ အဟာသိ။
၈၈။
အာဝါသိကော ဟောတု မဟာဝိဟာရေ၊ နဝကမ္မိကော ဟောတု ဂဇင်္ဂလာယံ [ကဇင်္ဂလာယံ (သီ။ သျာ။ ဣ။)]။
အာလောကသန္ဓိံ ဒိဝသံ [ဒိဝသာ (သီ။ သျာ။ ဣ။)] ကရောတု၊ ဘိသာနိ တေ ဗြာဟ္မဏ ယော အဟာသိ။
၈၉။
သော ဗဇ္ဈတူ ပါသသတေဟိ ဆဗ္ဘိ [ဆမှိ (သီ။ ဣ။)၊ ဆဿု (?)]၊ ရမ္မာ ဝနာ နိယျတု ရာဇဓါနိံ [ရာဇဌာနိံ (က။)]။
တုတ္တေဟိ သော ဟညတု ပါစနေဟိ၊ ဘိသာနိ တေ ဗြာဟ္မဏ ယော အဟာသိ။
၉၀။
အလက္ကမာလီ တိပုကဏ္ဏဝိဒ္ဓေါ၊ လဋ္ဌီဟတော သပ္ပမုခံ ဥပေတု။
သကစ္ဆဗန္ဓော [သက္ကစ္စဗဒ္ဓေါ (သီ။ ဣ။)၊ သံကစ္စဗန္ဓော (နိယျ)] ဝိသိခံ စရာတု၊ ဘိသာနိ တေ ဗြာဟ္မဏ ယော အဟာသိ။
၉၁။
ယော ဝေ အနဋ္ဌံဝ [အနဋ္ဌံ (သီ။ သျာ။ ဣ။)] နဋ္ဌန္တိ စာဟ၊ ကာမေဝ သော လဘတံ ဘုဉ္ဇတဉ္စ [လဘတု ဘုဉ္ဇတု စ (သျာ။)]။
အဂါရမဇ္ဈေ မရဏံ ဥပေတု၊ ယော ဝါ ဘောန္တော သင်္ကတိ ကဉ္စိဒေဝ [ကိဉ္စိဒေဝ (က။)]။
၉၂။
ယဒေသမာနာ ဝိစရန္တိ လောကေ၊ ဣဋ္ဌဉ္စ ကန္တဉ္စ ဗဟူနမေတံ။
ပိယံ မနုညံ စိဓ ဇီဝလောကေ၊ ကသ္မာ ဣသယော နပ္ပသံသန္တိ ကာမေ။
၉၃။
ကာမေသု ဝေ ဟညရေ ဗဇ္ဈရေ စ၊ ကာမေသု ဒုက္ခဉ္စ ဘယဉ္စ ဇာတံ။
ကာမေသု ဘူတာဓိပတီ ပမတ္တာ၊ ပါပါနိ ကမ္မာနိ ကရောန္တိ မောဟာ။
၉၄။
တေ ပါပဓမ္မာ ပသဝေတွ ပါပံ၊ ကာယဿ ဘေဒါ နိရယံ ဝဇန္တိ။
အာဒီနဝံ ကာမဂုဏေသု ဒိသွာ၊ တသ္မာ ဣသယော နပ္ပသံသန္တိ ကာမေ။
၉၅။
ဝီမံသမာနော ဣသိနော ဘိသာနိ၊ တီရေ ဂဟေတွာန ထလေ နိဓေသိံ။
သုဒ္ဓါ အပါပါ ဣသယော ဝသန္တိ၊ ဧတာနိ တေ ဗြဟ္မစာရီ ဘိသာနိ။
၉၆။
န တေ နဋာ နော ပန ကီဠနေယျာ၊ န ဗန္ဓဝါ နော ပန တေ သဟာယာ။
ကိသ္မိံ ဝုပတ္ထမ္ဘ သဟဿနေတ္တ၊ ဣသီဟိ တွံ ကီဠသိ ဒေဝရာဇ။
၉၇။
အာစရိယော မေသိ ပိတာ စ မယှံ၊ ဧသာ ပတိဋ္ဌာ ခလိတဿ ဗြဟ္မေ။
ဧကာပရာဓံ ခမ ဘူရိပည၊ န ပဏ္ဍိတာ ကောဓဗလာ ဘဝန္တိ။
၉၈။
သုဝါသိတံ ဣသိနံ ဧကရတ္တံ၊ ယံ ဝါသဝံ ဘူတပတိဒ္ဒသာမ။
သဗ္ဗေဝ ဘောန္တော သုမနာ ဘဝန္တု၊ ယံ ဗြာဟ္မဏော ပစ္စုပါဒီ ဘိသာနိ။
၉၉။
အဟဉ္စ သာရိပုတ္တော စ၊ မောဂ္ဂလ္လာနော စ ကဿပေါ။
အနုရုဒ္ဓေါ ပုဏ္ဏော အာနန္ဒော၊ တဒါသုံ သတ္တ ဘာတရော။
၁၀၀။
ဘဂိနီ ဥပ္ပလဝဏ္ဏာ စ၊ ဒါသီ ခုဇ္ဇုတ္တရာ တဒါ။
စိတ္တော ဂဟပတိ ဒါသော၊ ယက္ခော သာတာဂိရော တဒါ။
၁၀၁။
ပါလိလေယျော [ပါရိလေယျော (သီ။ ဣ။)] တဒါ နာဂေါ၊ မဓုဒေါ [မဓုဝါ (သီ။ ဣ။)] သေဋ္ဌဝါနရော။
ကာဠုဒါယီ တဒါ သက္ကော၊ ဧဝံ ဓါရေထ ဇာတကန္တိ။
ဘိသဇာတကံ ပဉ္စမံ။
၄၈၉။ သုရုစိဇာတကံ (၆)
၁၀၂။
မဟေသီ သုရုစိနော [ရုစိနော (သီ။ သျာ။ ဣ။)] ဘရိယာ၊ အာနီတာ ပဌမံ အဟံ။
ဒသ ဝဿသဟဿာနိ၊ ယံ မံ သုရုစိမာနယိ။
၁၀၃။
သာဟံ ဗြာဟ္မဏ ရာဇာနံ၊ ဝေဒေဟံ မိထိလဂ္ဂဟံ။
နာဘိဇာနာမိ ကာယေန၊ ဝါစာယ ဥဒ စေတသာ။
သုရုစိံ အတိမညိတ္ထ [အတိမညိတ္ထော (သီ။ ဣ။)၊ အတိမညိတာ (?)]၊ အာဝိ [အာဝိံ (သီ။ ဣ။)] ဝါ ယဒိ ဝါ ရဟော။
၁၀၄။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၀၅။
ဘတ္တု မမ သဿု မာတာ၊ ပိတာ စာပိ စ သဿုရော။
တေ မံ ဗြဟ္မေ ဝိနေတာရော၊ ယာဝ အဋ္ဌံသု ဇီဝိတံ။
၁၀၆။
သာဟံ အဟိံသာရတိနီ၊ ကာမသာ [ကာမသော (သီ။)] ဓမ္မစာရိနီ [ဓမ္မစာရိဏီ (သီ။)]။
သက္ကစ္စံ တေ ဥပဋ္ဌာသိံ၊ ရတ္တိန္ဒိဝမတန္ဒိတာ။
၁၀၇။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၀၈။
သောဠသိတ္ထိသဟဿာနိ၊ သဟဘရိယာနိ ဗြာဟ္မဏ။
တာသု ဣဿာ ဝါ ကောဓေါ ဝါ၊ နာဟု မယှံ ကုဒါစနံ။
၁၀၉။
ဟိတေန တာသံ နန္ဒာမိ၊ န စ မေ ကာစိ အပ္ပိယာ။
အတ္တာနံဝါနုကမ္ပာမိ၊ သဒါ သဗ္ဗာ သပတ္တိယော။
၁၁၀။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၁၁။
ဒါသေ ကမ္မကရေ ပေဿေ [ပေါသေ (သျာ။ က။)]၊ ယေ စညေ အနုဇီဝိနော။
ပေသေမိ [ပေါသေမိ (သီ။ သျာ။ ဣ။)] သဟဓမ္မေန၊ သဒါ ပမုဒိတိန္ဒ္ရိယာ။
၁၁၂။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၁၃။
သမဏေ ဗြာဟ္မဏေ စာပိ၊ အညေ စာပိ ဝနိဗ္ဗကေ။
တပ္ပေမိ အန္နပါနေန၊ သဒါ ပယတပါဏိနီ။
၁၁၄။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၁၅။
စာတုဒ္ဒသိံ ပဉ္စဒ္ဒသိံ [ပန္နရသိံ (သီ။ ဣ။)]၊ ယာ စ ပက္ခဿ အဋ္ဌမီ [အဋ္ဌမိံ (သီ။ ဣ။)]။
ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ [အဋ္ဌင်္ဂသုသမာဟိတံ (သဗ္ဗတ္ထ) ဝိ။ ဝ။ ၁၂၉ ပါဠိယာ အဋ္ဌကထာ ပဿိတဗ္ဗာ]။
ဥပေါသထံ ဥပဝသာမိ [ဥပဝသိံ (က။)]၊ သဒါ သီလေသု သံဝုတာ။
၁၁၆။
ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ။
မုသာ မေ ဘဏမာနာယ၊ မုဒ္ဓါ ဖလတု သတ္တဓါ။
၁၁၇။
သဗ္ဗေဝ တေ ဓမ္မဂုဏာ၊ ရာဇပုတ္တိ ယသဿိနိ။
သံဝိဇ္ဇန္တိ တယိ ဘဒ္ဒေ၊ ယေ တွံ ကိတ္တေသိ အတ္တနိ။
၁၁၈။
ခတ္တိယော ဇာတိသမ္ပန္နော၊ အဘိဇာတော ယသဿိမာ။
ဓမ္မရာဇာ ဝိဒေဟာနံ၊ ပုတ္တော ဥပ္ပဇ္ဇတေ တဝ [တဝံ (သီ။ ဣ။)]။
၁၁၉။
ဒုမ္မီ [ရုမ္မီ (သီ။ ဣ။)] ရဇောဇလ္လဓရော၊ အဃေ ဝေဟာယသံ ဌိတော။
မနုညံ ဘာသသေ ဝါစံ၊ ယံ မယှံ ဟဒယင်္ဂမံ။
၁၂၀။
ဒေဝတာနုသိ သဂ္ဂမှာ၊ ဣသိ ဝါသိ [စာပိ (က။)] မဟိဒ္ဓိကော။
ကော ဝါသိ တွံ အနုပ္ပတ္တော၊ အတ္တာနံ မေ ပဝေဒယ။
၁၂၁။
ယံ ဒေဝသံဃာ ဝန္ဒန္တိ၊ သုဓမ္မာယံ သမာဂတာ။
သောဟံ သက္ကော သဟဿက္ခော၊ အာဂတောသ္မိ တဝန္တိကေ။
၁၂၂။
ဣတ္ထိယော [ဣတ္ထိယာ (ဣ။)] ဇီဝလောကသ္မိံ၊ ယာ ဟောတိ [ဟောန္တိ (သီ။ သျာ။)] သမစာရိနီ [သမစာရိဏီ (သီ။)]။
မေဓါဝိနီ သီလဝတီ၊ သဿုဒေဝါ ပတိဗ္ဗတာ။
၁၂၃။
တာဒိသာယ သုမေဓါယ၊ သုစိကမ္မာယ နာရိယာ။
ဒေဝါ ဒဿနမာယန္တိ၊ မာနုသိယာ အမာနုသာ။
၁၂၄။
တွဉ္စ ဘဒ္ဒေ သုစိဏ္ဏေန၊ ပုဗ္ဗေ သုစရိတေန စ။
ဣဓ ရာဇကုလေ ဇာတာ၊ သဗ္ဗကာမသမိဒ္ဓိနီ။
၁၂၅။
အယဉ္စ တေ ရာဇပုတ္တိ၊ ဥဘယတ္ထ ကဋဂ္ဂဟော။
ဒေဝလောကူပပတ္တီ စ၊ ကိတ္တီ စ ဣဓ ဇီဝိတေ။
၁၂၆။
စိရံ သုမေဓေ သုခိနီ၊ ဓမ္မမတ္တနိ ပါလယ။
ဧသာဟံ တိဒိဝံ ယာမိ၊ ပိယံ မေ တဝ ဒဿနန္တိ။
သုရုစိဇာတကံ ဆဋ္ဌံ။
၄၉၀။ ပဉ္စုပေါသထိကဇာတကံ (၇)
၁၂၇။
အပ္ပောဿုက္ကော ဒါနိ တုဝံ ကပေါတ၊ ဝိဟင်္ဂမ န တဝ ဘောဇနတ္ထော။
ခုဒံ [ခုဒ္ဒံ (သျာ။ က။)၊ ခုဓံ (သက္ကတ-ပါကတာနုရူပံ)] ပိပါသံ အဓိဝါသယန္တော၊ ကသ္မာ ဘဝံပေါသထိကော ကပေါတ [ကပေါတော (သီ။ ဣ။)]။
၁၂၈။
အဟံ ပုရေ ဂိဒ္ဓိဂတော ကပေါတိယာ၊ အသ္မိံ ပဒေသသ္မိမုဘော ရမာမ။
အထဂ္ဂဟီ သာကုဏိကော ကပေါတိံ၊ အကာမကော တာယ ဝိနာ အဟောသိံ။
၁၂၉။
နာနာဘဝါ ဝိပ္ပယောဂေန တဿာ၊ မနောမယံ ဝေဒန ဝေဒယာမိ [ဝေဒနံ ဝေဒိယာမိ (သီ။ ဣ။)]။
တသ္မာ အဟံပေါသထံ ပါလယာမိ၊ ရာဂေါ မမံ မာ ပုနရာဂမာသိ။
၁၃၀။
အနုဇ္ဇုဂါမီ ဥရဂါ ဒုဇိဝှ [ဥရဂ ဒွိဇိဝှ (သီ။)]၊ ဒါဌာဝုဓေါ ဃောရဝိသောသိ သပ္ပ။
ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော နု ဒီဃ [ဒီဃော (သီ။ ဣ။)]။
၁၃၁။
ဥသဘော အဟူ ဗလဝါ ဂါမိကဿ၊ စလက္ကကူ ဝဏ္ဏဗလူပပန္နော။
သော မံ အက္ကမိ တံ ကုပိတော အဍံသိ၊ ဒုက္ခာဘိတုဏ္ဏော မရဏံ ဥပါဂါ [ဥပါဂမိ (သီ။ ဣ။)]။
၁၃၂။
တတော ဇနာ နိက္ခမိတွာန ဂါမာ၊ ကန္ဒိတွာ ရောဒိတွာ [ကန္ဒိတွ ရောဒိတွ (သီ။)] အပက္ကမိံသု။
တသ္မာ အဟံပေါသထံ ပါလယာမိ၊ ကောဓေါ မမံ မာ ပုနရာဂမာသိ။
၁၃၃။
မတာန မံသာနိ ဗဟူ သုသာနေ၊ မနုညရူပံ တဝ ဘောဇနေ တံ။
ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော သိင်္ဂါလ [သိဂါလော (သီ။ ဣ။)]။
၁၃၄။
ပဝိသိ [ပဝိဿံ (သီ။ ဣ။)၊ ပဝိဿ (သျာ။)] ကုစ္ဆိံ မဟတော ဂဇဿ၊ ကုဏပေ ရတော ဟတ္ထိမံသေသု ဂိဒ္ဓေါ [ဟတ္ထိမံသေ ပဂိဒ္ဓေါ (သီ။ ဣ။)]။
ဥဏှော စ ဝါတော တိခိဏာ စ ရသ္မိယော၊ တေ သောသယုံ တဿ ကရီသမဂ္ဂံ။
၁၃၅။
ကိသော စ ပဏ္ဍူ စ အဟံ ဘဒန္တေ၊ န မေ အဟူ နိက္ခမနာယ မဂ္ဂေါ။
မဟာ စ မေဃော သဟသာ ပဝဿိ၊ သော တေမယီ တဿ ကရီသမဂ္ဂံ။
၁၃၆။
တတော အဟံ နိက္ခမိသံ ဘဒန္တေ၊ စန္ဒော ယထာ ရာဟုမုခါ ပမုတ္တော။
တသ္မာ အဟံပေါသထံ ပါလယာမိ၊ လောဘော မမံ မာ ပုနရာဂမာသိ။
၁၃၇။
ဝမ္မီကထူပသ္မိံ ကိပိလ္လိကာနိ၊ နိပ္ပောထယန္တော တုဝံ ပုရေ စရာသိ။
ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော နု အစ္ဆ [အစ္ဆော (သီ။ ဣ။)]။
၁၃၈။
သကံ နိကေတံ အတိဟီဠယာနော [အတိဟေဠယာနော (သျာ။ က။)]၊ အတ္ရိစ္ဆတာ [အတ္ရိစ္ဆတာယ (သီ။ သျာ။ ဣ။)] မလ္လဂါမံ [မလတံ (သီ။ ဣ။)၊ မလ္လယတံ (က။)] အဂစ္ဆိံ။
တတော ဇနာ နိက္ခမိတွာန ဂါမာ၊ ကောဒဏ္ဍကေန ပရိပေါထယိံသု မံ။
၁၃၉။
သော ဘိန္နသီသော ရုဟိရမက္ခိတင်္ဂေါ၊ ပစ္စာဂမာသိံ သကံ [သ သကံ (သျာ။ က။)၊’ထ သကံ (?)] နိကေတံ။
တသ္မာ အဟံပေါသထံ ပါလယာမိ၊ အတ္ရိစ္ဆတာ မာ ပုနရာဂမာသိ။
၁၄၀။
ယံ နော အပုစ္ဆိတ္ထ တုဝံ ဘဒန္တေ၊ သဗ္ဗေဝ ဗျာကရိမှ ယထာ ပဇာနံ။
မယမ္ပိ ပုစ္ဆာမ တုဝံ ဘဒန္တေ၊ ကသ္မာ ဘဝံပေါသထိကော နု ဗြဟ္မေ။
၁၄၁။
အနူပလိတ္တော မမ အဿမမှိ၊ ပစ္စေကဗုဒ္ဓေါ မုဟုတ္တံ နိသီဒိ။
သော မံ အဝေဒီ ဂတိမာဂတိဉ္စ၊ နာမဉ္စ ဂေါတ္တံ စရဏဉ္စ သဗ္ဗံ။
၁၄၂။
ဧဝမ္ပဟံ ဝန္ဒိ န [ဧဝမ္ပဟံ နဂ္ဂဟေ (သီ။ ဣ။)] တဿ ပါဒေ၊ န စာပိ နံ မာနဂတေန ပုစ္ဆိံ။
တသ္မာ အဟံပေါသထံ ပါလယာမိ၊ မာနော မမံ မာ ပုနရာဂမာသီတိ။
ပဉ္စုပေါသထိကဇာတကံ သတ္တမံ။
၄၉၁။ မဟာမောရဇာတကံ (၈)
၁၄၃။
သစေ ဟိ တျာဟံ ဓနဟေတု ဂါဟိတော၊ မာ မံ ဝဓီ ဇီဝဂါဟံ ဂဟေတွာ။
ရညော စ [ရညောဝ (သီ။ ဣ။)] မံ သမ္မ ဥပန္တိကံ [ဥပန္တိ (သီ။ သျာ။ ဣ။)] နေဟိ၊ မညေ ဓနံ လစ္ဆသိနပ္ပရူပံ။
၁၄၄။
န မေ အယံ တုယှ ဝဓါယ အဇ္ဇ၊ သမာဟိတော စာပဓုရေ [စာပဝရေ (သီ။ ဣ။)၊ စာပဝရော (သျာ။)] ခုရပ္ပော။
ပါသဉ္စ တျာဟံ အဓိပါတယိဿံ၊ ယထာသုခံ ဂစ္ဆတု မောရရာဇာ။
၁၄၅။
ယံ သတ္တ ဝဿာနိ မမာနုဗန္ဓိ၊ ရတ္တိန္ဒိဝံ ခုပ္ပိပါသံ သဟန္တော။
အထ ကိဿ မံ ပါသဝသူပနီတံ၊ ပမုတ္တဝေ ဣစ္ဆသိ ဗန္ဓနသ္မာ။
၁၄၆ ။
ပါဏာတိပါတာ ဝိရတော နုသဇ္ဇ၊ အဘယံ နု တေ သဗ္ဗဘူတေသု ဒိန္နံ။
ယံ မံ တုဝံ ပါသဝသူပနီတံ၊ ပမုတ္တဝေ ဣစ္ဆသိ ဗန္ဓနသ္မာ။
၁၄၇။
ပါဏာတိပါတာ ဝိရတဿ ဗြူဟိ၊ အဘယဉ္စ ယော သဗ္ဗဘူတေသု ဒေတိ။
ပုစ္ဆာမိ တံ မောရရာဇေတမတ္ထံ၊ ဣတော စုတော ကိံ လဘတေ သုခံ သော။
၁၄၈။
ပါဏာတိပါတာ ဝိရတဿ ဗြူမိ၊ အဘယဉ္စ ယော သဗ္ဗဘူတေသု ဒေတိ။
ဒိဋ္ဌေဝ ဓမ္မေ လဘတေ ပသံသံ၊ သဂ္ဂဉ္စ သော ယာတိ သရီရဘေဒါ။
၁၄၉။
န သန္တိ ဒေဝါ ဣတိ အာဟု [ဣစ္စာဟု (သီ။ ဣ။)] ဧကေ၊ ဣဓေဝ ဇီဝေါ ဝိဘဝံ ဥပေတိ။
တထာ ဖလံ သုကတဒုက္ကဋာနံ၊ ဒတ္တုပညတ္တဉ္စ ဝဒန္တိ ဒါနံ။
တေသံ ဝစော အရဟတံ သဒ္ဒဟာနော၊ တသ္မာ အဟံ သကုဏေ ဗာဓယာမိ။
၁၅၀။
စန္ဒော စ သုရိယော စ ဥဘော သုဒဿနာ၊ ဂစ္ဆန္တိ ဩဘာသယမန္တလိက္ခေ။
ဣမဿ လောကဿ ပရဿ ဝါ တေ၊ ကထံ နု တေ အာဟု မနုဿလောကေ။
၁၅၁။
စန္ဒော စ သုရိယော စ ဥဘော သုဒဿနာ၊ ဂစ္ဆန္တိ ဩဘာသယမန္တလိက္ခေ။
ပရဿ လောကဿ န တေ ဣမဿ၊ ဒေဝါတိ တေ အာဟု မနုဿလောကေ။
၁၅၂။
ဧတ္ထေဝ တေ နီဟတာ ဟီနဝါဒါ၊ အဟေတုကာ ယေ န ဝဒန္တိ ကမ္မံ။
တထာ ဖလံ သုကတဒုက္ကဋာနံ၊ ဒတ္တုပညတ္တံ ယေ စ ဝဒန္တိ ဒါနံ။
၁၅၃။
အဒ္ဓါ ဟိ သစ္စံ ဝစနံ တဝေဒံ [တဝေတံ (သီ။ သျာ။ ဣ။)]၊ ကထံဟိ ဒါနံ အဖလံ ဘဝေယျ [ဝဒေယျ (သီ။ ဣ။)]။
တထာ ဖလံ သုကတဒုက္ကဋာနံ၊ ဒတ္တုပညတ္တဉ္စ ကထံ ဘဝေယျ။
၁၅၄။
ကထံကရော ကိန္တိကရော ကိမာစရံ၊ ကိံ သေဝမာနော ကေန တပေါဂုဏေန။
အက္ခာဟိ [အက္ခာဟိ တံ ဒါနိ (က။)] မေ မောရရာဇေတမတ္ထံ၊ ယထာ အဟံ နော နိရယံ ပတေယျံ။
၁၅၅။
ယေ ကေစိ အတ္ထိ သမဏာ ပထဗျာ၊ ကာသာယဝတ္ထာ အနဂါရိယာ တေ။
ပါတောဝ ပိဏ္ဍာယ စရန္တိ ကာလေ၊ ဝိကာလစရိယာ ဝိရတာ ဟိ သန္တော။
၁၅၆။
တေ တတ္ထ ကာလေနုပသင်္ကမိတွာ၊ ပုစ္ဆာဟိ ယံ တေ မနသော ပိယံ သိယာ။
တေ တေ ပဝက္ခန္တိ ယထာပဇာနံ၊ ဣမဿ လောကဿ ပရဿ စတ္ထံ။
၁၅၇။
တစံဝ ဇိဏ္ဏံ ဥရဂေါ ပုရာဏံ၊ ပဏ္ဍူပလာသံ ဟရိတော ဒုမောဝ။
ဧသပ္ပဟီနော မမ လုဒ္ဒဘာဝေါ၊ ဇဟာမဟံ လုဒ္ဒကဘာဝမဇ္ဇ။
၁၅၈။
ယေ စာပိ မေ သကုဏာ အတ္ထိ ဗဒ္ဓါ၊ သတာနိနေကာနိ နိဝေသနသ္မိံ။
တေသမ္ပဟံ [တေသံ အဟံ (သျာ။ က။)] ဇီဝိတမဇ္ဇ ဒမ္မိ၊ မောက္ခဉ္စ တေ ပတ္တာ [ပတ္တော (သီ။)၊ အစ္ဆ (သျာ။)] သကံ နိကေတံ။
၁၅၉။
လုဒ္ဒေါ စရီ ပါသဟတ္ထော အရညေ၊ ဗာဓေတု မောရာဓိပတိံ ယသဿိံ။
ဗန္ဓိတွာ [ဗန္ဓိတွ (သီ။ ဣ။)] မောရာဓိပတိံ ယသဿိံ၊ ဒုက္ခာ သ ပမုစ္စိ [ဒုက္ခာ ပမုစ္စိ (သီ။)၊ ဒုက္ခာ ပမုဉ္စိ (သျာ။ ဣ။)] ယထာဟံ ပမုတ္တောတိ။
မဟာမောရဇာတကံ အဋ္ဌမံ။
၄၉၂။ တစ္ဆသူကရဇာတကံ (၉)
၁၆၀။
ယဒေသမာနာ ဝိစရိမှ၊ ပဗ္ဗတာနိ ဝနာနိ စ။
အန္ဝေသံ ဝိစရိံ [ဝိပုလေ (သျာ။ က။)] ဉာတီ၊ တေမေ အဓိဂတာ မယာ။
၁၆၁။
ဗဟုဉ္စိဒံ မူလဖလံ၊ ဘက္ခော စာယံ အနပ္ပကော။
ရမ္မာ စိမာ ဂိရီနဇ္ဇော [ဂိရိနဒိယော (သီ။ ဣ။)]၊ ဖာသုဝါသော ဘဝိဿတိ။
၁၆၂။
ဣဓေဝါဟံ ဝသိဿာမိ၊ သဟ သဗ္ဗေဟိ ဉာတိဘိ။
အပ္ပောဿုက္ကော နိရာသင္ကီ၊ အသောကော အကုတောဘယော။
၁၆၃။
အညမ္ပိ [အညံ ဟိ (သီ။ ဣ။)] လေဏံ ပရိယေသ၊ သတ္တု နော ဣဓ ဝိဇ္ဇတိ။
သော တစ္ဆ သူကရေ ဟန္တိ၊ ဣဓါဂန္တွာ ဝရံ ဝရံ။
၁၆၄။
ကော နုမှာကံ [ကော နမှာကံ (သီ။ ဣ။)] ဣဓ သတ္တု၊ ကော ဉာတီ သုသမာဂတေ။
ဒုပ္ပဓံသေ [အပ္ပဓံသေ (သီ။ ဣ။)] ပဓံသေတိ၊ တံ မေ အက္ခာထ ပုစ္ဆိတာ။
၁၆၅။
ဥဒ္ဓဂ္ဂရာဇီ မိဂရာဇာ၊ ဗလီ ဒါဌာဝုဓေါ မိဂေါ။
သော တစ္ဆ သူကရေ ဟန္တိ၊ ဣဓါဂန္တွာ ဝရံ ဝရံ။
၁၆၆။
န နော ဒါဌာ န ဝိဇ္ဇန္တိ [နု ဝိဇ္ဇန္တိ (က။)]၊ ဗလံ ကာယေ သမောဟိတံ။
သဗ္ဗေ သမဂ္ဂါ ဟုတွာန၊ ဝသံ ကာဟာမ ဧကကံ။
၁၆၇။
ဟဒယင်္ဂမံ ကဏ္ဏသုခံ၊ ဝါစံ ဘာသသိ တစ္ဆက။
ယောပိ ယုဒ္ဓေ ပလာယေယျ၊ တမ္ပိ ပစ္ဆာ ဟနာမသေ။
၁၆၈။
ပါဏာတိပါတာ ဝိရတော နု အဇ္ဇ၊ အဘယံ နု တေ သဗ္ဗဘူတေသု ဒိန္နံ။
ဒါဌာ နု တေ မိဂဝဓါယ [မိဂ ဝိရိယံ (သီ။ သျာ။ ဣ။)] န သန္တိ၊ ယော သံဃပတ္တော ကပဏောဝ ဈာယသိ။
၁၆၉။
န မေ ဒါဌာ န ဝိဇ္ဇန္တိ၊ ဗလံ ကာယေ သမောဟိတံ။
ဉာတီ စ ဒိသွာန သာမဂ္ဂီ ဧကတော၊ တသ္မာ စ ဈာယာမိ ဝနမှိ ဧကကော။
၁၇၀။
ဣမဿုဒံ ယန္တိ ဒိသောဒိသံ ပုရေ၊ ဘယဋ္ဋိတာ လေဏဂဝေသိနော ပုထု။
တေ ဒါနိ သင်္ဂမ္မ ဝသန္တိ ဧကတော၊ ယတ္ထဋ္ဌိတာ ဒုပ္ပသဟဇ္ဇ တေ မယာ။
၁၇၁။
ပရိဏာယကသမ္ပန္နာ၊ သဟိတာ ဧကဝါဒိနော။
တေ မံ သမဂ္ဂါ ဟိံသေယျုံ၊ တသ္မာ နေသံ န ပတ္ထယေ [အပတ္ထဝေ (ဣ။)]။
၁၇၂။
ဧကောဝ ဣန္ဒော အသုရေ ဇိနာတိ၊ ဧကောဝ သေနော ဟန္တိ ဒိဇေ ပသယှ။
ဧကောဝ ဗျဂ္ဃော မိဂသံဃပတ္တော၊ ဝရံ ဝရံ ဟန္တိ ဗလဉှိ တာဒိသံ။
၁၇၃။
န ဟေဝ ဣန္ဒော န သေနော၊ နပိ ဗျဂ္ဃော မိဂါဓိပေါ။
သမဂ္ဂေ သဟိတေ ဉာတီ၊ န ဗျဂ္ဃေ [ဗျဂ္ဃေ စ (သီ။ ဣ။)၊ ဗျဂ္ဃော န (သျာ။)] ကုရုတေ ဝသေ။
၁၇၄။
ကုမ္ဘီလကာ သကုဏကာ၊ သံဃိနော ဂဏစာရိနော။
သမ္မောဒမာနာ ဧကဇ္ဈံ၊ ဥပ္ပတန္တိ ဍယန္တိ စ။
၁၇၅။
တေသဉ္စ ဍယမာနာနံ၊ ဧကေတ္ထ အပသက္ကတိ [အပဝတ္တတိ (သီ။ ဣ။)]။
တဉ္စ သေနော နိတာဠေတိ၊ ဝေယျဂ္ဃိယေဝ သာ ဂတိ။
၁၇၆။
ဥဿာဟိတော ဇဋိလေန၊ လုဒ္ဒေနာမိသစက္ခုနာ။
ဒါဌီ ဒါဌီသု ပက္ခန္ဒိ၊ မညမာနော ယထာ ပုရေ။
၁၇၇။
သာဓု သမ္ဗဟုလာ ဉာတီ၊ အပိ ရုက္ခာ အရညဇာ။
သူကရေဟိ သမဂ္ဂေဟိ၊ ဗျဂ္ဃော ဧကာယနေ ဟတော။
၁၇၈။
ဗြာဟ္မဏဉ္စေဝ ဗျဂ္ဃဉ္စ၊ ဥဘော ဟန္တွာန သူကရာ။
အာနန္ဒိနော ပမုဒိတာ၊ မဟာနာဒံ ပနာဒိသုံ။
၁၇၉။
တေ သု ဥဒုမ္ဗရမူလသ္မိံ၊ သူကရာ သုသမာဂတာ။
တစ္ဆကံ အဘိသိဉ္စိံသု၊ ‘‘တွံ နော ရာဇာသိ ဣဿရော’’တိ။
တစ္ဆသူကရဇာတကံ နဝမံ။
၄၉၃။ မဟာဝါဏိဇဇာတကံ (၁၀)
၁၈၀။
ဝါဏိဇာ သမိတိံ ကတွာ၊ နာနာရဋ္ဌတော အာဂတာ။
ဓနာဟရာ ပက္ကမိံသု၊ ဧကံ ကတွာန ဂါမဏိံ။
၁၈၁။
တေ တံ ကန္တာရမာဂမ္မ၊ အပ္ပဘက္ခံ အနောဒကံ။
မဟာနိဂြောဓမဒ္ဒက္ခုံ၊ သီတစ္ဆာယံ မနောရမံ။
၁၈၂။
တေ စ တတ္ထ နိသီဒိတွာ၊ တဿ ရုက္ခဿ ဆာယယာ [ဆာဒိယာ (သီ။ သျာ။ ဣ။)]။
ဝါဏိဇာ သမစိန္တေသုံ၊ ဗာလာ မောဟေန ပါရုတာ။
၁၈၃။
အလ္လာယတေ [အဒ္ဒါယတေ (သီ။ ဣ။)] အယံ ရုက္ခော၊ အပိ ဝါရီဝ [ဝါရိ စ (သီ။ ဣ။)] သန္ဒတိ။
ဣင်္ဃဿ ပုရိမံ သာခံ၊ မယံ ဆိန္ဒာမ ဝါဏိဇာ။
၁၈၄။
သာ စ ဆိန္နာဝ ပဂ္ဃရိ၊ အစ္ဆံ ဝါရိံ အနာဝိလံ။
တေ တတ္ထ နှတွာ ပိဝိတွာ၊ ယာဝတိစ္ဆိံသု ဝါဏိဇာ။
၁၈၅။
ဒုတိယံ သမစိန္တေသုံ၊ ဗာလာ မောဟေန ပါရုတာ။
ဣင်္ဃဿ ဒက္ခိဏံ သာခံ၊ မယံ ဆိန္ဒာမ ဝါဏိဇာ။
၁၈၆။
သာ စ ဆိန္နာဝ ပဂ္ဃရိ၊ သာလိမံသောဒနံ ဗဟုံ။
အပ္ပောဒဝဏ္ဏေ ကုမ္မာသေ၊ သိင္ဂိံ ဝိဒလသူပိယော [သိင္ဂိံ ဗိဒလသူပိယော (သီ။ ဣ။)၊ သိင်္ဂီဝေရံ လသူပိယော (က။) သိင်္ဂီန္တိ သိင်္ဂီဝေရာဒိကံ ဥတ္တရိဘင်္ဂံ။ ဝိဒလသူပိယောတိ မုဂ္ဂသူပါဒယော (အဋ္ဌ။) ဝိဒလံ ကလာယာဒိမှိ ဝတ္တတီတိ သက္ကတာဘိဓါနေ]။
၁၈၇။
တေ တတ္ထ ဘုတွာ ခါဒိတွာ [ဘုတွာ စ ပိဝိတွာ စ (ဣ။)]၊ ယာဝတိစ္ဆိံသု ဝါဏိဇာ။
တတိယံ သမစိန္တေသုံ၊ ဗာလာ မောဟေန ပါရုတာ။
ဣင်္ဃဿ ပစ္ဆိမံ သာခံ၊ မယံ ဆိန္ဒာမ ဝါဏိဇာ။
၁၈၈။
သာ စ ဆိန္နာဝ ပဂ္ဃရိ၊ နာရိယော သမလင်္ကတာ။
ဝိစိတြဝတ္ထာဘရဏာ၊ အာမုတ္တမဏိကုဏ္ဍလာ။
၁၈၉။
အပိ သု ဝါဏိဇာ ဧကာ၊ နာရိယော ပဏ္ဏဝီသတိ။
သမန္တာ ပရိဝါရိံသု [ပရိကရိံသု (သီ။ သျာ။ ဣ။)]၊ တဿ ရုက္ခဿ ဆာယယာ [ဆာဒိယာ (သီ။ သျာ။ ဣ။)]။
၁၉၀။
တေ တာဟိ ပရိစာရေတွာ [ပရိဝါရေတွာ (သီ။ သျာ။ ဣ။)]၊ ယာဝတိစ္ဆိံသု ဝါဏိဇာ။
စတုတ္ထံ သမစိန္တေသုံ၊ ဗာလာ မောဟေန ပါရုတာ။
ဣင်္ဃဿ ဥတ္တရံ သာခံ၊ မယံ ဆိန္ဒာမ ဝါဏိဇာ။
၁၉၁။
သာ စ ဆိန္နာဝ ပဂ္ဃရိ၊ မုတ္တာ ဝေဠုရိယာ ဗဟူ။
ရဇတံ ဇာတရူပဉ္စ၊ ကုတ္တိယော ပဋိယာနိ စ။
၁၉၂။
ကာသိကာနိ စ ဝတ္ထာနိ၊ ဥဒ္ဒိယာနိ စ ကမ္ဗလာ [ဥဒ္ဒိယာနေ စ ကမ္ဗလေ (သီ။ ဣ။)]။
တေ တတ္ထ ဘာရေ ဗန္ဓိတွာ၊ ယာဝတိစ္ဆိံသု ဝါဏိဇာ။
၁၉၃။
ပဉ္စမံ သမစိန္တေသုံ၊ ဗာလာ မောဟေန ပါရုတာ။
ဣင်္ဃဿ မူလေ [မူလံ (သီ။ ဣ။ က။)] ဆိန္ဒာမ၊ အပိ ဘိယျော လဘာမသေ။
၁၉၄။
အထုဋ္ဌဟိ သတ္ထဝါဟော၊ ယာစမာနော ကတဉ္ဇလီ။
နိဂြောဓေါ ကိံ ပရဇ္ဈတိ [အပရဇ္ဈထ (သီ။)၊ အပရဇ္ဈတိ (သျာ။ ဣ။)]၊ ဝါဏိဇာ ဘဒ္ဒမတ္ထု တေ။
၁၉၅။
ဝါရိဒါ ပုရိမာ သာခါ၊ အန္နပါနဉ္စ ဒက္ခိဏာ။
နာရိဒါ ပစ္ဆိမာ သာခါ၊ သဗ္ဗကာမေ စ ဥတ္တရာ။
နိဂြောဓေါ ကိံ ပရဇ္ဈတိ၊ ဝါဏိဇာ ဘဒ္ဒမတ္ထု တေ။
၁၉၆။
ယဿ ရုက္ခဿ ဆာယာယ၊ နိသီဒေယျ သယေယျ ဝါ။
န တဿ သာခံ ဘဉ္ဇေယျ၊ မိတ္တဒုဗ္ဘော ဟိ ပါပကော။
၁၉၇။
တေ စ တဿာနာဒိယိတွာ [တဿ အနာဒိတွာ (သီ။ သျာ။)]၊ ဧကဿ ဝစနံ ဗဟူ။
နိသိတာဟိ ကုဌာရီဟိ [ကုဓါရီဟိ (က။)]၊ မူလတော နံ ဥပက္ကမုံ။
၁၉၈။
တတော နာဂါ နိက္ခမိံသု၊ သန္နဒ္ဓါ ပဏ္ဏဝီသတိ။
ဓနုဂ္ဂဟာနံ တိသတာ၊ ဆသဟဿာ စ ဝမ္မိနော။
၁၉၉။
ဧတေ ဟနထ ဗန္ဓထ၊ မာ ဝေါ မုဉ္စိတ္ထ [မုစ္စိတ္ထ (ဣ။)] ဇီဝိတံ။
ဌပေတွာ သတ္ထဝါဟံဝ၊ သဗ္ဗေ ဘသ္မံ [ဘသ္မီ (သီ။)] ကရောထ နေ။
၂၀၀။
တသ္မာ ဟိ ပဏ္ဍိတော ပေါသော၊ သမ္ပဿံ အတ္ထမတ္တနော။
လောဘဿ န ဝသံ ဂစ္ဆေ၊ ဟနေယျာရိသကံ [ဟနေယျ ဒိသတံ (သီ။)၊ ဟနေယျ ဒိသကံ (သျာ။)] မနံ။
၂၀၁။
ဧဝ [ဧတ (သီ။ ဣ။)] မာဒီနဝံ ဉတွာ၊ တဏှာ ဒုက္ခဿ သမ္ဘဝံ။
ဝီတတဏှော အနာဒါနော၊ သတော ဘိက္ခု ပရိဗ္ဗဇေတိ။
မဟာဝါဏိဇဇာတကံ ဒသမံ။
၄၉၄။ သာဓိနဇာတကံ (၁၁)
၂၀၂။
အဗ္ဘုတော ဝတ လောကသ္မိံ၊ ဥပ္ပဇ္ဇိ လောမဟံသနော။
ဒိဗ္ဗော ရထော ပါတုရဟု၊ ဝေဒေဟဿ ယသဿိနော။
၂၀၃။
ဒေဝပုတ္တော မဟိဒ္ဓိကော၊ မာတလိ [မာတလီ (သီ။)] ဒေဝသာရထိ။
နိမန္တယိတ္ထ ရာဇာနံ၊ ဝေဒေဟံ မိထိလဂ္ဂဟံ။
၂၀၄။
ဧဟိမံ ရထမာရုယှ၊ ရာဇသေဋ္ဌ ဒိသမ္ပတိ။
ဒေဝါ ဒဿနကာမာ တေ၊ တာဝတိံသာ သဣန္ဒကာ။
သရမာနာ ဟိ တေ ဒေဝါ၊ သုဓမ္မာယံ သမစ္ဆရေ။
၂၀၅။
တတော စ ရာဇာ သာဓိနော [သာဓီနော (သီ။ ဣ။)]၊ ဝေဒေဟော မိထိလဂ္ဂဟော [ပမုခေါ ရထမာရုဟိ (သီ။ ဣ။)]။
သဟဿယုတ္တမာရုယှ [ယုတ္တံ အဘိရုယှ (သီ။)]၊ အဂါ ဒေဝါန သန္တိကေ။
တံ ဒေဝါ ပဋိနန္ဒိံသု၊ ဒိသွာ ရာဇာနမာဂတံ။
၂၀၆။
သွာဂတံ တေ မဟာရာဇ၊ အထော တေ အဒုရာဂတံ။
နိသီဒ ဒါနိ ရာဇီသိ [ရာဇိသိ (သီ။ သျာ။ ဣ။)]၊ ဒေဝရာဇဿ သန္တိကေ။
၂၀၇။
သက္ကောပိ ပဋိနန္ဒိတ္ထ၊ ဝေဒေဟံ မိထိလဂ္ဂဟံ။
နိမန္တယိတ္ထ [နိမန္တယီ စ (သီ။ ဣ။)] ကာမေဟိ၊ အာသနေန စ ဝါသဝေါ။
၂၀၈။
သာဓု ခေါသိ အနုပ္ပတ္တော၊ အာဝါသံ ဝသဝတ္တိနံ။
ဝသ ဒေဝေသု ရာဇီသိ၊ သဗ္ဗကာမသမိဒ္ဓိသု။
တာဝတိံသေသု ဒေဝေသု၊ ဘုဉ္ဇ ကာမေ အမာနုသေ။
၂၀၉။
အဟံ ပုရေ သဂ္ဂဂတော ရမာမိ၊ နစ္စေဟိ ဂီတေဟိ စ ဝါဒိတေဟိ။
သော ဒါနိ အဇ္ဇ န ရမာမိ သဂ္ဂေ၊ အာယုံ နု ခီဏော [ခီဏံ (သျာ။)] မရဏံ နု သန္တိကေ။
ဥဒါဟု မူဠ္ဟောသ္မိ ဇနိန္ဒသေဋ္ဌ။
၂၁၀။
န တာယု [န စာယု (သီ။ ဣ။ က။)] ခီဏံ မရဏဉ္စ [မရဏံ တေ (သီ။ ဣ။)] ဒူရေ၊ န စာပိ မူဠ္ဟော နရဝီရသေဋ္ဌ။
တုယှဉ္စ [တဝဉ္စ (သီ။ ဣ။)၊ တဝ စ (က။)] ပုညာနိ ပရိတ္တကာနိ၊ ယေသံ ဝိပါကံ ဣဓ ဝေဒယိတ္ထော [ဝေဒယတော (ဣ။ က။)]။
၂၁၁။
ဝသ ဒေဝါနုဘာဝေန၊ ရာဇသေဋ္ဌ ဒိသမ္ပတိ။
တာဝတိံသေသု ဒေဝေသု၊ ဘုဉ္ဇ ကာမေ အမာနုသေ။
၂၁၂။
ယထာ ယာစိတကံ ယာနံ၊ ယထာ ယာစိတကံ ဓနံ။
ဧဝံ သမ္ပဒမေဝေတံ၊ ယံ ပရတော ဒါနပစ္စယာ။
၂၁၃။
န စာဟမေတမိစ္ဆာမိ၊ ယံ ပရတော ဒါနပစ္စယာ။
သယံကတာနိ ပုညာနိ၊ တံ မေ အာဝေဏိကံ [အာဝေဏိယံ (သီ။ သျာ။ ဣ။)၊ အာဝေနိကံ (က။)] ဓနံ။
၂၁၄။
သောဟံ ဂန္တွာ မနုဿေသု၊ ကာဟာမိ ကုသလံ ဗဟုံ။
ဒါနေန သမစရိယာယ၊ သံယမေန ဒမေန စ။
ယံ ကတွာ သုခိတော ဟောတိ၊ န စ ပစ္ဆာနုတပ္ပတိ။
၂၁၅။
ဣမာနိ တာနိ ခေတ္တာနိ၊ ဣမံ နိက္ခံ သုကုဏ္ဍလံ။
ဣမာ တာ ဟရိတာနူပါ၊ ဣမာ နဇ္ဇော သဝန္တိယော။
၂၁၆။
ဣမာ တာ ပေါက္ခရဏီ ရမ္မာ၊ စက္ကဝါကပကူဇိတာ [စက္ကဝါကူပကူဇိတာ (သီ။ ဣ။)]။
မန္ဒာလကေဟိ သဉ္ဆန္နာ၊ ပဒုမုပ္ပလကေဟိ စ။
ယဿိမာနိ မမာယိံသု၊ ကိံ နု တေ ဒိသတံ ဂတာ။
၂၁၇။
တာနီဓ ခေတ္တာနိ သော ဘူမိဘာဂေါ၊ တေယေဝ အာရာမဝနုပစာရာ [တေ အာရာမာ တေ ဝန’မေ ပစာရာ (သီ။ ဣ။)၊ တေ ယေဝ အာရာမဝနာနိ သဉ္စရာ (က။)]။
တမေဝ မယှံ ဇနတံ အပဿတော၊ သုညံဝ မေ နာရဒ ခါယတေ ဒိသာ။
၂၁၈။
ဒိဋ္ဌာ မယာ ဝိမာနာနိ၊ ဩဘာသေန္တာ စတုဒ္ဒိသာ။
သမ္မုခါ ဒေဝရာဇဿ၊ တိဒသာနဉ္စ သမ္မုခါ။
၂၁၉။
ဝုတ္ထံ မေ ဘဝနံ ဒိဗျံ [ဒိဗ္ဗံ (သီ။ ဣ။)]၊ ဘုတ္တာ ကာမာ အမာနုသာ။
တာဝတိံသေသု ဒေဝေသု၊ သဗ္ဗကာမသမိဒ္ဓိသု။
၂၂၀။
သောဟံ ဧတာဒိသံ ဟိတွာ၊ ပုညာယမှိ ဣဓါဂတော။
ဓမ္မမေဝ စရိဿာမိ၊ နာဟံ ရဇ္ဇေန အတ္ထိကော။
၂၂၁။
အဒဏ္ဍာဝစရံ မဂ္ဂံ၊ သမ္မာသမ္ဗုဒ္ဓဒေသိတံ။
တံ မဂ္ဂံ ပဋိပဇ္ဇိဿံ၊ ယေန ဂစ္ဆန္တိ သုဗ္ဗတာတိ။
သာဓိနဇာတကံ [သာဓိနရာဇဇာတကံ (သျာ။)] ဧကာဒသမံ။
၄၉၅။ ဒသဗြာဟ္မဏဇာတကံ (၁၂)
၂၂၂။
ရာဇာ အဝေါစ ဝိဓုရံ၊ ဓမ္မကာမော ယုဓိဋ္ဌိလော။
ဗြာဟ္မဏေ ဝိဓုရ ပရိယေသ၊ သီလဝန္တေ ဗဟုဿုတေ။
၂၂၃။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု [ဘုဉ္ဇေယျုံ (သီ။)] ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၂၄။
ဒုလ္လဘာ ဗြာဟ္မဏာ ဒေဝ၊ သီလဝန္တော ဗဟုဿုတာ။
ဝိရတာ မေထုနာ ဓမ္မာ၊ ယေ တေ ဘုဉ္ဇေယျု ဘောဇနံ။
၂၂၅။
ဒသ ခလု မဟာရာဇ၊ ယာ တာ ဗြာဟ္မဏဇာတိယော။
တေသံ ဝိဘင်္ဂံ ဝိစယံ [ဝိစိယ (က။)]၊ ဝိတ္ထာရေန သုဏောဟိ မေ။
၂၂၆။
ပသိဗ္ဗကေ ဂဟေတွာန၊ ပုဏ္ဏေ မူလဿ သံဝုတေ။
ဩသဓိကာယော [ဩသဓိကာယေ (သျာ။ က။)] ဂန္ထေန္တိ၊ နှာပယန္တိ [နဟာယန္တိ (သီ။ ဣ။)] ဇပန္တိ စ။
၂၂၇။
တိကိစ္ဆကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၂၈။
အပေတာ တေ စ [တေ (သီ။ ဣ။)] ဗြဟ္မညာ၊
(ဣတိ ရာဇာ [ရာဇာ စ (သျာ။ က။)] ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၂၉။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၃၀။
ကိင်္ကိဏိကာယော [ကိင်္ကဏိကာယော (က။)၊ ကိင်္ကိဏိယော (သျာ။)] ဂဟေတွာ [ဂဟေတွာန (သီ။ သျာ။ ဣ။)]၊ ဃောသေန္တိ ပုရတောပိ တေ။
ပေသနာနိပိ ဂစ္ဆန္တိ၊ ရထစရိယာသု သိက္ခရေ။
၂၃၁။
ပရိစာရကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၃၂။
အပေတာ တေ စ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၃၃။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၃၄။
ကမဏ္ဍလုံ ဂဟေတွာန၊ ဝင်္ကဒဏ္ဍဉ္စ ဗြာဟ္မဏာ။
ပစ္စုပေဿန္တိ ရာဇာနော၊ ဂါမေသု နိဂမေသု စ။
နာဒိန္နေ ဝုဋ္ဌဟိဿာမ၊ ဂါမမှိ ဝါ ဝနမှိ ဝါ [ဝါမမှိ စ ဝနမှိ စ (သီ။ ဣ။)၊ ဂါမမှိ နိဂမမှိ ဝါ (သျာ။)]။
၂၃၅။
နိဂ္ဂါဟကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၃၆။
အပေတာ တေ စ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၃၇။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၃၈။
ပရူဠှကစ္ဆနခလောမာ ၊ ပင်္ကဒန္တာ ရဇဿိရာ။
ဩကိဏ္ဏာ ရဇရေဏူဟိ၊ ယာစကာ ဝိစရန္တိ တေ။
၂၃၉။
ခါဏုဃာတသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၄၀။
အပေတာ တေ စ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၄၁။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၄၂။
ဟရီတကံ [ဟရီဋကံ (ဗဟူသု)] အာမလကံ၊ အမ္ဗံ ဇမ္ဗုံ ဝိဘီတကံ [အမ္ဗဇမ္ဗုဝိဘီဋကံ (သီ။ ဣ။)]။
လဗုဇံ ဒန္တပေါဏာနိ၊ ဗေလုဝါ ဗဒရာနိ စ။
၂၄၃။
ရာဇာယတနံ ဥစ္ဆု-ပုဋံ၊ ဓူမနေတ္တံ မဓု-အဉ္ဇနံ။
ဥစ္စာဝစာနိ ပဏိယာနိ၊ ဝိပဏေန္တိ ဇနာဓိပ။
၂၄၄။
ဝါဏိဇကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၄၅။
အပေတာ တေ စ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၄၆။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၄၇။
ကသိ-ဝါဏိဇ္ဇံ [ကသိံ ဝဏိဇ္ဇံ (သီ။ ဣ။)] ကာရေန္တိ၊ ပေါသယန္တိ အဇေဠကေ။
ကုမာရိယော ပဝေစ္ဆန္တိ၊ ဝိဝါဟန္တာဝဟန္တိ စ။
၂၄၈။
သမာ အမ္ဗဋ္ဌဝေဿေဟိ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၄၉။
အပေတာ တေ စ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၅၀။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၅၁။
နိက္ခိတ္တဘိက္ခံ ဘုဉ္ဇန္တိ၊ ဂါမေသွေကေ ပုရောဟိတာ။
ဗဟူ တေ [နေ (သျာ။ က။)] ပရိပုစ္ဆန္တိ၊ အဏ္ဍစ္ဆေဒါ နိလဉ္ဆကာ [တိလဉ္ဆကာ (ဣ။)]။
၂၅၂။
ပသူပိ တတ္ထ ဟညန္တိ၊ မဟိံသာ သူကရာ အဇာ။
ဂေါဃာတကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၅၃။
အပေတာ တေ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၅၄။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၅၅။
အသိစမ္မံ ဂဟေတွာန၊ ခဂ္ဂံ ပဂ္ဂယှ ဗြာဟ္မဏာ။
ဝေဿပထေသု တိဋ္ဌန္တိ၊ သတ္ထံ အဗ္ဗာဟယန္တိပိ။
၂၅၆။
သမာ ဂေါပနိသာဒေဟိ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၅၇။
အပေတာ တေ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၅၈။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၅၉။
အရညေ ကုဋိကံ ကတွာ၊ ကူဋာနိ ကာရယန္တိ တေ။
သသဗိဠာရေ ဗာဓေန္တိ၊ အာဂေါဓါ မစ္ဆကစ္ဆပံ။
၂၆၀။
တေ လုဒ္ဒကသမာ ရာဇ [လုဒ္ဒကာ တေ မဟာရာဇ (သီ။ ဣ။)]၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၆၁။
အပေတာ တေ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၆၂။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၆၃။
အညေ ဓနဿ ကာမာ ဟိ၊ ဟေဋ္ဌာမဉ္စေ ပသက္ကိတာ [ပသက္ခိတာ (သီ။ သျာ။ ဣ။)]။
ရာဇာနော ဥပရိ နှာယန္တိ၊ သောမယာဂေ ဥပဋ္ဌိတေ။
၂၆၄။
မလမဇ္ဇကသမာ ရာဇ၊ တေပိ ဝုစ္စန္တိ ဗြာဟ္မဏာ။
အက္ခာတာ တေ မဟာရာဇ၊ တာဒိသေ နိပတာမသေ။
၂၆၅။
အပေတာ တေ ဗြဟ္မညာ၊
(ဣတိ ရာဇာ ကောရဗ္ယော)
န တေ ဝုစ္စန္တိ ဗြာဟ္မဏာ။
အညေ ဝိဓုရ ပရိယေသ၊ သီလဝန္တေ ဗဟုဿုတေ။
၂၆၆။
ဝိရတေ မေထုနာ ဓမ္မာ၊ ယေ မေ ဘုဉ္ဇေယျု ဘောဇနံ။
ဒက္ခိဏံ သမ္မ ဒဿာမ၊ ယတ္ထ ဒိန္နံ မဟပ္ဖလံ။
၂၆၇။
အတ္ထိ ခေါ ဗြာဟ္မဏာ ဒေဝ၊ သီလဝန္တော ဗဟုဿုတာ။
ဝိရတာ မေထုနာ ဓမ္မာ၊ ယေ တေ ဘုဉ္ဇေယျု ဘောဇနံ။
၂၆၈။
ဧကဉ္စ ဘတ္တံ ဘုဉ္ဇန္တိ၊ န စ မဇ္ဇံ ပိဝန္တိ တေ။
အက္ခာတာ တေ မဟာရာဇ၊ တာဒိသေ နိပတာမသေ။
၂၆၉။
ဧတေ ခေါ ဗြာဟ္မဏာ ဝိဓုရ၊ သီလဝန္တော ဗဟုဿုတာ။
ဧတေ ဝိဓုရ ပရိယေသ၊ ခိပ္ပဉ္စ နေ [ခိပ္ပံဝ နေ (က။)] နိမန္တယာတိ။
ဒသဗြာဟ္မဏဇာတကံ ဒွါဒသမံ။
၄၉၆။ ဘိက္ခာပရမ္ပရဇာတကံ (၁၃)
၂၇၀။
သုခုမာလရူပံ ဒိသွာ [ဒိသွာန (က။ သီ။ အဋ္ဌ။)]၊ ရဋ္ဌာ ဝိဝနမာဂတံ။
ကူဋာဂါရဝရူပေတံ၊ မဟာသယနမုပါသိတံ [မုပေါစိတံ (ဗဟူသု)]။
၂၇၁။
တဿ တေ ပေမကေနာဟံ၊ အဒါသိံ ဝဍ္ဎမောဒနံ [ဗဒ္ဓမောဒနံ (သီ။ ဣ။)]။
သာလီနံ ဝိစိတံ ဘတ္တံ၊ သုစိံ မံသူပသေစနံ။
၂၇၂။
တံ တွံ ဘတ္တံ ပဋိဂ္ဂယှ၊ ဗြာဟ္မဏဿ အဒါသယိ [အဒါပယိ (သီ။ သျာ။ ဣ။)]။
အတ္တာနံ [အတ္တနာ (ဣ။ အဋ္ဌ။ ပါဌန္တရံ)] အနသိတွာန၊ ကောယံ ဓမ္မော နမတ္ထု တေ။
၂၇၃။
အာစရိယော ဗြာဟ္မဏော မယှံ၊ ကိစ္စာကိစ္စေသု ဗျာဝဋော [ဝါဝဋော (က။)]။
ဂရု စ အာမန္တနီယော [အာမန္တဏီယော (သီ။ ဣ။)] စ၊ ဒါတုမရဟာမိ ဘောဇနံ။
၂၇၄။
ဗြာဟ္မဏံ ဒါနိ ပုစ္ဆာမိ၊ ဂေါတမံ ရာဇပူဇိတံ။
ရာဇာ တေ ဘတ္တံ ပါဒါသိ၊ သုစိံ မံသူပသေစနံ။
၂၇၅။
တံ တွံ ဘတ္တံ ပဋိဂ္ဂယှ၊ ဣသိဿ ဘောဇနံ အဒါ။
အခေတ္တညူသိ ဒါနဿ၊ ကောယံ ဓမ္မော နမတ္ထု တေ။
၂၇၆။
ဘရာမိ ပုတ္တ [ပုတ္တေ (သီ။ ဣ။)] ဒါရေ စ၊ ဃရေသု ဂဓိတော [ဂထိတော (သီ။ ဣ။)] အဟံ။
ဘုဉ္ဇေ မာနုသကေ ကာမေ၊ အနုသာသာမိ ရာဇိနော။
၂၇၇။
အာရညိကဿ [အာရညကဿ (သီ။ ဣ။)] ဣသိနော၊ စိရရတ္တံ တပဿိနော။
ဝုဍ္ဎဿ ဘာဝိတတ္တဿ၊ ဒါတုမရဟာမိ ဘောဇနံ။
၂၇၈။
ဣသိဉ္စ ဒါနိ ပုစ္ဆာမိ၊ ကိသံ ဓမနိသန္ထတံ။
ပရူဠှကစ္ဆနခလောမံ၊ ပင်္ကဒန္တံ ရဇဿိရံ။
၂၇၉။
ဧကော အရညေ ဝိဟရသိ [ဝိဟာသိ (က။)]၊ နာဝကင်္ခသိ ဇီဝိတံ။
ဘိက္ခု ကေန တယာ သေယျော၊ ယဿ တွံ ဘောဇနံ အဒါ။
၂၈၀။
ခဏန္တာလုကလမ္ဗာနိ [ခဏမာလုကလမ္ဗာနိ (သျာ။ က။)]၊ ဗိလာလိတက္ကလာနိ စ [ဗိဠာလိတက္ကဠာနိ စ (သီ။ ဣ။)]။
ဓုနံ သာမာကနီဝါရံ၊ သံဃာရိယံ ပသာရိယံ [သံဟာရိယံ ပဟာရိယံ (သျာ။)၊ သံသာရိယံ ပသာရိယံ (က။)]။
၂၈၁။
သာကံ ဘိသံ မဓုံ မံသံ၊ ဗဒရာမလကာနိ စ။
တာနိ အာဟရိတွာ [အာဟတွ (သီ။ သျာ။)] ဘုဉ္ဇာမိ၊ အတ္ထိ မေ သော ပရိဂ္ဂဟော။
၂၈၂။
ပစန္တော အပစန္တဿ၊ အမမဿ သကိဉ္စနော [အကိဉ္စနော (က။)]။
အနာဒါနဿ သာဒါနော၊ ဒါတုမရဟာမိ ဘောဇနံ။
၂၈၃။
ဘိက္ခုဉ္စ ဒါနိ ပုစ္ဆာမိ၊ တုဏှီမာသီန သုဗ္ဗတံ။
ဣသိ တေ ဘတ္တံ ပါဒါသိ၊ သုစိံ မံသူပသေစနံ။
၂၈၄။
တံ တွံ ဘတ္တံ ပဋိဂ္ဂယှ၊ တုဏှီ ဘုဉ္ဇသိ ဧကကော။
နာညံ ကဉ္စိ [ကိဉ္စိ (က။)] နိမန္တေသိ၊ ကောယံ ဓမ္မော နမတ္ထု တေ။
၂၈၅။
န ပစာမိ န ပါစေမိ၊ န ဆိန္ဒာမိ န ဆေဒယေ။
တံ မံ အကိဉ္စနံ ဉတွာ၊ သဗ္ဗပါပေဟိ အာရတံ။
၂၈၆။
ဝါမေန ဘိက္ခမာဒါယ၊ ဒက္ခိဏေန ကမဏ္ဍလုံ။
ဣသိ မေ ဘတ္တံ ပါဒါသိ၊ သုစိံ မံသူပသေစနံ။
၂၈၇။
ဧတေ ဟိ ဒါတုမရဟန္တိ၊ သမမာ သပရိဂ္ဂဟာ။
ပစ္စနီကမဟံ မညေ၊ ယော ဒါတာရံ နိမန္တယေ။
၂၈၈။
အတ္ထာယ ဝတ မေ အဇ္ဇ၊ ဣဓါဂစ္ဆိ ရထေသဘော။
သောဟံ အဇ္ဇ ပဇာနာမိ [ဣတော ပုဗ္ဗေ န ဇာနာမိ (သီ။ ဣ။)]၊ ယတ္ထ ဒိန္နံ မဟပ္ဖလံ။
၂၈၉။
ရဋ္ဌေသု ဂိဒ္ဓါ ရာဇာနော၊ ကိစ္စာကိစ္စေသု ဗြာဟ္မဏာ။
ဣသီ မူလဖလေ ဂိဒ္ဓါ၊ ဝိပ္ပမုတ္တာ စ ဘိက္ခဝေါတိ။
ဘိက္ခာပရမ္ပရဇာတကံ တေရသမံ။
တဿုဒ္ဒါနံ –
သုဝ ကိန္နရ မုက္က ခရာဇိနသော၊ ဘိသဇာတ မဟေသိ ကပေါတဝရော။
အထ မောရ သတစ္ဆက ဝါဏိဇကော၊ အထ ရာဇ သဗြာဟ္မဏ ဘိက္ခပရန္တိ။
ပကိဏ္ဏကနိပါတံ နိဋ္ဌိတံ။