၁၂။ ဒွါဒသကနိပါတ
၄၆၄။ စူဠကုဏာလဇာတက (၁)
၁။
လုဒ္ဓါနံ [ခုဒ္ဒါနံ (သီ။ သျာ။ ဣ။)] လဟုစိတ္တာနံ၊ အကတညူန ဒုဗ္ဘိနံ။
နာဒေဝသတ္တော ပုရိသော၊ ထီနံ သဒ္ဓါတု’မရဟတိ။
၂။
န တာ ပဇာနန္တိ ကတံ န ကိစ္စံ၊ န မာတရံ ပိတရံ ဘာတရံ ဝါ။
အနရိယာ သမတိက္ကန္တဓမ္မာ၊ သဿေဝ စိတ္တဿ ဝသံ ဝဇန္တိ။
၃။
စိရာနုဝုဋ္ဌမ္ပိ [စိရာနုဝုတ္ထမ္ပိ (သီ။ ဣ။)] ပိယံ မနာပံ၊ အနုကမ္ပကံ ပါဏသမမ္ပိ ဘတ္တုံ [သန္တံ (သီ။ သျာ။ ဣ။)]။
အာဝါသု ကိစ္စေသု စ နံ ဇဟန္တိ၊ တသ္မာဟမိတ္ထီနံ န ဝိဿသာမိ။
၄။
ထီနဉှိ စိတ္တံ ယထာ ဝါနရဿ၊ ကန္နပ္ပကန္နံ ယထာ ရုက္ခဆာယာ။
စလာစလံ ဟဒယမိတ္ထိယာနံ၊ စက္ကဿ နေမိ ဝိယ ပရိဝတ္တတိ။
၅။
ယဒါ တာ ပဿန္တိ သမေက္ခမာနာ၊ အာဒေယျရူပံ ပုရိသဿ ဝိတ္တံ။
သဏှာဟိ ဝါစာဟိ နယန္တိ မေနံ၊ ကမ္ဗောဇကာ ဇလဇေနေဝ အဿံ။
၆။
ယဒါ န ပဿန္တိ သမေက္ခမာနာ၊ အာဒေယျရူပံ ပုရိသဿ ဝိတ္တံ။
သမန္တတော နံ ပရိဝဇ္ဇယန္တိ၊ တိဏ္ဏော နဒီပါရဂတောဝ ကုလ္လံ။
၇။
သိလေသူပမာ သိခိရိဝ သဗ္ဗဘက္ခာ၊ တိက္ခမာယာ နဒီရိဝ သီဃသောတာ။
သေဝန္တိ ဟေတာ ပိယမပ္ပိယဉ္စ၊ နာဝါ ယထာ ဩရကူလံ ပရဉ္စ။
၈။
န တာ ဧကဿ န ဒွိန္နံ၊ အာပဏောဝ ပသာရိတော။
ယော တာ မယှန္တိ မညေယျ၊ ဝါတံ ဇာလေန ဗာဓယေ [ဗန္ဓယေ (သျာ။ က။)]။
၉။
ယထာ နဒီ စ ပန္ထော စ၊ ပါနာဂါရံ သဘာ ပပါ။
ဧဝံ လောကိတ္ထိယော နာမ၊ ဝေလာ တာသံ န ဝိဇ္ဇတိ [ဣမိဿာ ဂါထာယ ပုဗ္ဗဒ္ဓါပရဒ္ဓံ ဝိပရိယာယေန ဒိဿတိ (က။)]။
၁၀။
ဃတာသနသမာ ဧတာ၊ ကဏှသပ္ပသိရူပမာ။
ဂါဝေါ ဗဟိတိဏဿေဝ၊ ဩမသန္တိ ဝရံ ဝရံ။
၁၁။
ဃတာသနံ ကုဉ္ဇရံ ကဏှသပ္ပံ၊ မုဒ္ဓါဘိသိတ္တံ ပမဒါ စ သဗ္ဗာ။
ဧတေ နရော နိစ္စယတော [နိစ္စယတ္တော (သီ။ ဣ။)] ဘဇေထ၊ တေသံ ဟဝေ ဒုဗ္ဗိဒု သဗ္ဗဘာဝေါ [သစ္စဘာဝေါ (သျာ။)]။
၁၂။
နစ္စန္တဝဏ္ဏာ န ဗဟူနံ ကန္တာ၊ န ဒက္ခိဏာ ပမဒါ သေဝိတဗ္ဗာ။
န ပရဿ ဘရိယာ န ဓနဿ ဟေတု၊ ဧတိတ္ထိယော ပဉ္စ န သေဝိတဗ္ဗာတိ။
စူဠကုဏာလဇာတကံ ပဌမံ။
၄၆၅။ ဘဒ္ဒသာလဇာတကံ (၂)
၁၃။
ကာ တွံ သုဒ္ဓေဟိ ဝတ္ထေဟိ၊ အဃေ ဝေဟာယသံ [ဝေဟာသယံ (သီ။ ဣ။)] ဌိတာ။
ကေန တျာဿူနိ ဝတ္တန္တိ၊ ကုတော တံ ဘယမာဂတံ။
၁၄။
တဝေဝ ဒေဝ ဝိဇိတေ၊ ဘဒ္ဒသာလောတိ မံ ဝိဒူ။
သဋ္ဌိ [သဋ္ဌိံ (သီ။ ဣ။)] ဝဿသဟဿာနိ၊ တိဋ္ဌတော ပူဇိတဿ မေ။
၁၅။
ကာရယန္တာ နဂရာနိ၊ အဂါရေ စ ဒိသမ္ပတိ။
ဝိဝိဓေ စာပိ ပါသာဒေ၊ န မံ တေ အစ္စမညိသုံ။
ယထေဝ မံ တေ ပူဇေသုံ၊ တထေဝ တွမ္ပိ ပူဇယ။
၁၆။
တံ ဣဝါဟံ [တဉ္စ အဟံ (သီ။ သျာ။ ဣ။)] န ပဿာမိ၊ ထူလံ ကာယေန တေ ဒုမံ။
အာရောဟပရိဏာဟေန၊ အဘိရူပေါသိ ဇာတိယာ။
၁၇။
ပါသာဒံ ကာရယိဿာမိ၊ ဧကတ္ထမ္ဘံ မနောရမံ။
တတ္ထ တံ ဥပနေဿာမိ၊ စိရံ တေ ယက္ခ ဇီဝိတံ။
၁၈။
ဧဝံ စိတ္တံ ဥဒပါဒိ၊ သရီရေန ဝိနာဘာဝေါ။
ပုထုသော မံ ဝိကန္တိတွာ၊ ခဏ္ဍသော အဝကန္တထ။
၁၉။
အဂ္ဂေ စ ဆေတွာ မဇ္ဈေ စ၊ ပစ္ဆာ မူလမှိ ဆိန္ဒထ [မူလဉ္စ ဆိန္ဒထ (သီ။)၊ မူလံ ဝိဆိန္ဒထ (ဣ။)]။
ဧဝံ မေ ဆိဇ္ဇမာနဿ၊ န ဒုက္ခံ မရဏံ သိယာ။
၂၀။
ဟတ္ထပါဒံ [ဟတ္ထပါဒေ (က။)] ယထာ ဆိန္ဒေ [ဆိန္နေ (က။)]၊ ကဏ္ဏနာသဉ္စ ဇီဝတော။
တတော ပစ္ဆာ သိရော ဆိန္ဒေ၊ တံ ဒုက္ခံ မရဏံ သိယာ။
၂၁။
သုခံ နု ခဏ္ဍသော ဆိန္နံ၊ ဘဒ္ဒသာလဝနပ္ပတိ။
ကိံ ဟေတု ကိံ ဥပါဒါယ၊ ခဏ္ဍသော ဆိန္နမိစ္ဆသိ။
၂၂။
ယဉ္စ ဟေတုမုပါဒါယ၊ ဟေတုံ ဓမ္မူပသံဟိတံ။
ခဏ္ဍသော ဆိန္နမိစ္ဆာမိ၊ မဟာရာဇ သုဏောဟိ မေ။
၂၃။
ဉာတီ မေ သုခသံဝဒ္ဓါ၊ မမ ပဿေ နိဝါတဇာ။
တေပိဟံ ဥပဟိံသေယျံ၊ ပရေသံ အသုခေါစိတံ။
၂၄။
စေတေယျရူပံ [စေတဗ္ဗရူပံ (သီ။ ဣ။)] စေတေသိ၊ ဘဒ္ဒသာလဝနပ္ပတိ။
ဟိတကာမောသိ ဉာတီနံ၊ အဘယံ သမ္မ ဒမ္မိ တေတိ။
ဘဒ္ဒသာလဇာတကံ ဒုတိယံ။
၄၆၆။ သမုဒ္ဒဝါဏိဇဇာတကံ (၃)
၂၅။
ကသန္တိ ဝပန္တိ တေ ဇနာ၊ မနုဇာ ကမ္မဖလူပဇီဝိနော။
နယိမဿ ဒီပကဿ ဘာဂိနော၊ ဇမ္ဗုဒီပါ ဣဒမေဝ နော ဝရံ။
၂၆။
တိပဉ္စရတ္တူပဂတမှိ စန္ဒေ၊ ဝေဂေါ မဟာ ဟေဟိတိ သာဂရဿ။
ဥပ္လဝိဿံ ဒီပမိမံ ဥဠာရံ၊ မာ ဝေါ ဝဓီ ဂစ္ဆထ လေဏမညံ။
၂၇။
န ဇာတုယံ သာဂရဝါရိဝေဂေါ၊ ဥပ္လဝိဿံ ဒီပမိမံ ဥဠာရံ။
တံ မေ နိမိတ္တေဟိ ဗဟူဟိ ဒိဋ္ဌံ၊ မာ ဘေထ ကိံ သောစထ မောဒထဝ္ဟော [မောဒထ ဝေါ (က။) ၆။၃၈ မောဂ္ဂလ္လာနသုတ္တံ ပဿိတဗ္ဗံ]။
၂၈။
ပဟူတဘက္ခံ ဗဟုအန္နပါနံ၊ ပတ္တတ္ထ အာဝါသမိမံ ဥဠာရံ။
န ဝေါ ဘယံ ပဋိပဿာမိ ကိဉ္စိ၊ အာပုတ္တပုတ္တေဟိ ပမောဒထဝ္ဟော။
၂၉။
ယော ဒေဝေါယံ ဒက္ခိဏာယံ [ဒက္ခိဏဿံ (သီ။)] ဒိသာယံ၊ ခေမန္တိ ပက္ကောသတိ တဿ သစ္စံ။
န ဥတ္တရော ဝေဒိ ဘယာဘယဿ၊ မာ ဘေထ ကိံ သောစထ မောဒထဝ္ဟော။
၃၀။
ယထာ ဣမေ ဝိပ္ပဝဒန္တိ ယက္ခာ၊ ဧကော ဘယံ သံသတိ ခေမမေကော။
တဒိင်္ဃ မယှံ ဝစနံ သုဏာထ၊ ခိပ္ပံ လဟုံ မာ ဝိနဿိမှ သဗ္ဗေ။
၃၁။
သဗ္ဗေ သမာဂမ္မ ကရောမ နာဝံ၊ ဒေါဏိံ ဒဠှံ သဗ္ဗယန္တူပပန္နံ။
သစေ အယံ ဒက္ခိဏော သစ္စမာဟ၊ မောဃံ ပဋိက္ကောသတိ ဥတ္တရောယံ။
သာ စေဝ နော ဟေဟိတိ အာပဒတ္ထာ၊ ဣမဉ္စ ဒီပံ န ပရိစ္စဇေမ။
၃၂။
သစေ စ ခေါ ဥတ္တရော သစ္စမာဟ၊ မောဃံ ပဋိက္ကောသတိ ဒက္ခိဏောယံ။
တမေဝ နာဝံ အဘိရုယှ သဗ္ဗေ၊ ဧဝံ မယံ သောတ္ထိ တရေမု ပါရံ။
၃၃။
န ဝေ သုဂဏှံ ပဌမေန သေဋ္ဌံ၊ ကနိဋ္ဌမာပါထဂတံ ဂဟေတွာ။
ယော စီဓ တစ္ဆံ [မဇ္ဈံ (သီ။ သျာ။ ဣ။)] ပဝိစေယျ ဂဏှတိ [ဂဏှိ (က။)]၊ သ ဝေ နရော သေဋ္ဌမုပေတိ ဌာနံ။
၃၄။
ယထာပိ တေ သာဂရဝါရိမဇ္ဈေ၊ သကမ္မုနာ သောတ္ထိ ဝဟိံသု ဝါဏိဇာ။
အနာဂတတ္ထံ ပဋိဝိဇ္ဈိယာန၊ အပ္ပမ္ပိ နာစ္စေတိ သ ဘူရိပညော။
၃၅။
ဗာလာ စ မောဟေန ရသာနုဂိဒ္ဓါ၊ အနာဂတံ အပ္ပဋိဝိဇ္ဈိယတ္ထံ။
ပစ္စုပ္ပန္နေ သီဒန္တိ အတ္ထဇာတေ, သမုဒ္ဒမဇ္ဈေ ယထာ တေ မနုဿာ။
၃၆။
အနာဂတံ ပဋိကယိရာထ ကိစ္စံ၊ ‘‘မာ မံ ကိစ္စံ ကိစ္စကာလေ ဗျဓေသိ’’။
တံ တာဒိသံ ပဋိကတ [ပဋိကတံ (က။)၊ ပဋိဂတ (သီ။ အဋ္ဌ။)၊ ပဋိကစ္စ (?)] ကိစ္စကာရိံ၊ န တံ ကိစ္စံ ကိစ္စကာလေ ဗျဓေတီတိ။
သမုဒ္ဒဝါဏိဇဇာတကံ တတိယံ။
၄၆၇။ ကာမဇာတကံ (၄)
၃၇။
ကာမံ ကာမယမာနဿ၊ တဿ စေ တံ သမိဇ္ဈတိ။
အဒ္ဓါ ဣတိမနော ဟောတိ၊ လဒ္ဓါ မစ္စော ယဒိစ္ဆတိ။
၃၈။
ကာမံ ကာမယမာနဿ၊ တဿ စေ တံ သမိဇ္ဈတိ။
တတော နံ အပရံ ကာမေ၊ ဓမ္မေ တဏှံဝ ဝိန္ဒတိ။
၃၉။
ဂဝံဝ သိင်္ဂိနော သိင်္ဂံ၊ ဝဍ္ဎမာနဿ ဝဍ္ဎတိ။
ဧဝံ မန္ဒဿ ပေါသဿ၊ ဗာလဿ အဝိဇာနတော။
ဘိယျော တဏှာ ပိပါသာ စ၊ ဝဍ္ဎမာနဿ ဝဍ္ဎတိ။
၄၀။
ပထဗျာ သာလိယဝကံ၊ ဂဝဿံ [ဂဝါသံ (သီ။ သျာ။ ဣ။)] ဒါသပေါရိသံ။
ဒတွာ စ [ဒတွာပိ (သီ။ သျာ။)၊ ဒတွာ ဝါ (ဣ။)] နာလမေကဿ၊ ဣတိ ဝိဒွါ [ဝိဒ္ဓါ (သျာ။)] သမံ စရေ။
၄၁။
ရာဇာ ပသယှ ပထဝိံ ဝိဇိတွာ၊ သသာဂရန္တံ မဟိမာဝသန္တော။
ဩရံ သမုဒ္ဒဿ အတိတ္တရူပေါ [အတိတ္တိရူပေါ (က။)]၊ ပါရံ သမုဒ္ဒဿပိ ပတ္ထယေထ။
၄၂။
ယာဝ အနုဿရံ ကာမေ၊ မနသာ တိတ္တိ နာဇ္ဈဂါ။
တတော နိဝတ္တာ ပဋိကမ္မ ဒိသွာ၊ တေ ဝေ သုတိတ္တာ ယေ [တိတ္တာ (သီ။ သျာ။ ဣ။)] ပညာယ တိတ္တာ။
၄၃။
ပညာယ တိတ္တိနံ [တိတ္တီနံ (သီ။ သျာ။)] သေဋ္ဌံ၊ န သော ကာမေဟိ တပ္ပတိ။
ပညာယ တိတ္တံ ပုရိသံ၊ တဏှာ န ကုရုတေ ဝသံ။
၄၄။
အပစိနေထေဝ ကာမာနံ [ကာမာနိ (သီ။ သျာ။ ဣ။)]၊ အပ္ပိစ္ဆဿ အလောလုပေါ။
သမုဒ္ဒမတ္တော ပုရိသော၊ န သော ကာမေဟိ တပ္ပတိ။
၄၅။
ရထကာရောဝ စမ္မဿ၊ ပရိကန္တံ ဥပါဟနံ။
ယံ ယံ စဇတိ [ဇဟတိ (သျာ။ က။)] ကာမာနံ၊ တံ တံ သမ္ပဇ္ဇတေ သုခံ။
သဗ္ဗံ စေ သုခမိစ္ဆေယျ၊ သဗ္ဗေ ကာမေ ပရိစ္စဇေ။
၄၆။
အဋ္ဌ တေ ဘာသိတာ ဂါထာ၊ သဗ္ဗာ ဟောန္တိ သဟဿိယော [သဟဿိယာ (?) ဥပရိ သုတသောမဇာတကေ တထာ ဒိဿတိ]။
ပဋိဂဏှ မဟာဗြဟ္မေ၊ သာဓေတံ တဝ ဘာသိတံ။
၄၇။
န မေ အတ္ထော သဟဿေဟိ၊ သတေဟိ နဟုတေဟိ ဝါ။
ပစ္ဆိမံ ဘာသတော ဂါထံ၊ ကာမေ မေ န ရတော မနော။
၄၈။
ဘဒြကော [သဒ္ဒေါ (သီ။)] ဝတာယံ မာဏဝကော၊ သဗ္ဗလောကဝိဒူ မုနိ။
ယော ဣမံ တဏှံ [ယော တဏှံ (သီ။ သျာ။)] ဒုက္ခဇနနိံ၊ ပရိဇာနာတိ ပဏ္ဍိတောတိ။
ကာမဇာတကံ စတုတ္ထံ။
၄၆၈။ ဇနသန္ဓဇာတကံ (၅)
၄၉။
ဒသ ခလု ဣမာနိ [ခလုမာနိ (သျာ။)] ဌာနာနိ၊ ယာနိ ပုဗ္ဗေ အကရိတွာ။
သ ပစ္ဆာ မနုတပ္ပတိ၊ ဣစ္စေဝါဟ [ဣစ္စာဟ ရာဇာ (သီ။ သျာ။ ဣ။)] ဇနသန္ဓော။
၅၀။
အလဒ္ဓါ ဝိတ္တံ တပ္ပတိ၊ ပုဗ္ဗေ အသမုဒါနိတံ။
န ပုဗ္ဗေ ဓနမေသိဿံ၊ ဣတိ ပစ္ဆာနုတပ္ပတိ။
၅၁။
သကျရူပံ ပုရေ သန္တံ၊ မယာ သိပ္ပံ န သိက္ခိတံ။
ကိစ္ဆာ ဝုတ္တိ အသိပ္ပဿ၊ ဣတိ ပစ္ဆာနုတပ္ပတိ။
၅၂။
ကူဋဝေဒီ ပုရေ အာသိံ၊ ပိသုဏော ပိဋ္ဌိမံသိကော။
စဏ္ဍော စ ဖရုသော စာပိ [စာသိံ (သီ။ သျာ။ ဣ။)]၊ ဣတိ ပစ္ဆာနုတပ္ပတိ။
၅၃။
ပါဏာတိပါတီ ပုရေ အာသိံ၊ လုဒ္ဒေါ စာပိ [စာသိံ (သီ။ ဣ။)] အနာရိယော။
ဘူတာနံ နာပစာယိဿံ၊ ဣတိ ပစ္ဆာနုတပ္ပတိ။
၅၄။
ဗဟူသု ဝတ သန္တီသု၊ အနာပါဒါသု ဣတ္ထိသု။
ပရဒါရံ အသေဝိဿံ၊ ဣတိ ပစ္ဆာနုတပ္ပတိ။
၅၅။
ဗဟုမှိ ဝတ သန္တမှိ၊ အန္နပါနေ ဥပဋ္ဌိတေ။
န ပုဗ္ဗေ အဒဒံ [အဒဒိံ (သီ။)] ဒါနံ၊ ဣတိ ပစ္ဆာနုတပ္ပတိ။
၅၆။
မာတရံ ပိတရဉ္စာပိ၊ ဇိဏ္ဏကံ ဂတယောဗ္ဗနံ [ဇိဏ္ဏကေ ဂတယောဗ္ဗနေ (သီ။ သျာ။ ဣ။)]။
ပဟု သန္တော န ပေါသိဿံ၊ ဣတိ ပစ္ဆာနုတပ္ပတိ။
၅၇။
အာစရိယမနုသတ္ထာရံ ၊ သဗ္ဗကာမရသာဟရံ။
ပိတရံ အတိမညိဿံ၊ ဣတိ ပစ္ဆာနုတပ္ပတိ။
၅၈။
သမဏေ ဗြာဟ္မဏေ စာပိ၊ သီလဝန္တေ ဗဟုဿုတေ။
န ပုဗ္ဗေ ပယိရုပါသိဿံ၊ ဣတိ ပစ္ဆာနုတပ္ပတိ။
၅၉။
သာဓု ဟောတိ တပေါ စိဏ္ဏော၊ သန္တော စ ပယိရုပါသိတော။
န စ ပုဗ္ဗေ တပေါ စိဏ္ဏော၊ ဣတိ ပစ္ဆာနုတပ္ပတိ။
၆၀။
ယော စ ဧတာနိ ဌာနာနိ၊ ယောနိသော ပဋိပဇ္ဇတိ။
ကရံ ပုရိသကိစ္စာနိ၊ သ ပစ္ဆာ နာနုတပ္ပတီတိ။
ဇနသန္ဓဇာတကံ ပဉ္စမံ။
၄၆၉။ မဟာကဏှဇာတကံ (၆)
၆၁။
ကဏှော ကဏှော စ ဃောရော စ၊ သုက္ကဒါဌော ပဘာသဝါ [ပတာပဝါ (သီ။ သျာ။ ဣ။)]။
ဗဒ္ဓေါ ပဉ္စဟိ ရဇ္ဇူဟိ၊ ကိံ ရဝိ [ဓီရ (သီ။ ဣ။)၊ ဝီရ (သျာ။)] သုနခေါ တဝ။
၆၂။
နာယံ မိဂါနမတ္ထာယ၊ ဥသီနက [ဥသီနရ (သီ။ ဣ။)၊ ဥသီန္နရ (သျာ။)] ဘဝိဿတိ။
မနုဿာနံ အနယော ဟုတွာ၊ တဒါ ကဏှော ပမောက္ခတိ။
၆၃။
ပတ္တဟတ္ထာ သမဏကာ၊ မုဏ္ဍာ သံဃာဋိပါရုတာ။
နင်္ဂလေဟိ ကသိဿန္တိ၊ တဒါ ကဏှော ပမောက္ခတိ။
၆၄။
တပဿိနိယော [တပနီယာ (က။) ဒုတိယန္တပဒါနိ ဟေတာနိ] ပဗ္ဗဇိတာ၊ မုဏ္ဍာ သံဃာဋိပါရုတာ။
ယဒါ လောကေ ဂမိဿန္တိ၊ တဒါ ကဏှော ပမောက္ခတိ။
၆၅။
ဒီဃောတ္တရောဋ္ဌာ ဇဋိလာ၊ ပင်္ကဒန္တာ ရဇဿိရာ။
ဣဏံ စောဒါယ [ဝေါဒါယ (သီ။ ဣ။)၊ စောဒယ (သျာ။)] ဂစ္ဆန္တိ၊ တဒါ ကဏှော ပမောက္ခတိ။
၆၆။
အဓိစ္စ ဝေဒေ [ဝေဒံ (က။)] သာဝိတ္တိံ၊ ယညတန္တဉ္စ [တန္တ္ရဉ္စ (သီ။ သျာ။ ဣ။)] ဗြာဟ္မဏာ။
ဘတိကာယ ယဇိဿန္တိ၊ တဒါ ကဏှော ပမောက္ခတိ။
၆၇။
မာတရံ ပိတရဉ္စာပိ၊ ဇိဏ္ဏကံ ဂတယောဗ္ဗနံ။
ပဟူ သန္တော [သန္တာ (သီ။)] န ဘရန္တိ၊ တဒါ ကဏှော ပမောက္ခတိ။
၆၈။
မာတရံ ပိတရဉ္စာပိ၊ ဇိဏ္ဏကံ ဂတယောဗ္ဗနံ။
ဗာလာ တုမှေတိ ဝက္ခန္တိ၊ တဒါ ကဏှော ပမောက္ခတိ။
၆၉။
အာစရိယဘရိယံ သခိံ [အာစရိယဘရိယံ သခါဘရိယံ (သီ။ ဣ။)]၊ မာတုလာနိံ ပိတုစ္ဆကိံ [ပိတုစ္ဆယံ (သီ။)၊ ပိတုစ္ဆသံ (ဣ။)]။
ယဒါ လောကေ ဂမိဿန္တိ၊ တဒါ ကဏှော ပမောက္ခတိ။
၇၀။
အသိစမ္မံ ဂဟေတွာန၊ ခဂ္ဂံ ပဂ္ဂယှ ဗြာဟ္မဏာ။
ပန္ထဃာတံ ကရိဿန္တိ၊ တဒါ ကဏှော ပမောက္ခတိ။
၇၁။
သုက္ကစ္ဆဝီ ဝေဓဝေရာ၊ ထူလဗာဟူ အပါတုဘာ။
မိတ္တဘေဒံ ကရိဿန္တိ၊ တဒါ ကဏှော ပမောက္ခတိ။
၇၂။
မာယာဝိနော နေကတိကာ၊ အသပ္ပုရိသစိန္တကာ။
ယဒါ လောကေ ဘဝိဿန္တိ၊ တဒါ ကဏှော ပမောက္ခတီတိ။
မဟာကဏှဇာတကံ ဆဋ္ဌံ။
၄၇၀။ ကောသိယဇာတကံ (၇)
၇၃။
နေဝ ကိဏာမိ နပိ ဝိက္ကိဏာမိ၊ န စာပိ မေ သန္နိစယော စ အတ္ထိ [ဣဓတ္ထိ (သျာ။)]။
သုကိစ္ဆရူပံ ဝတိဒံ ပရိတ္တံ၊ ပတ္ထောဒနော နာလမယံ ဒုဝိန္နံ။
၇၄။
အပ္ပမှာ အပ္ပကံ ဒဇ္ဇာ၊ အနုမဇ္ဈတော မဇ္ဈကံ။
ဗဟုမှာ ဗဟုကံ ဒဇ္ဇာ၊ အဒါနံ နုပပဇ္ဇတိ [န ဥပပဇ္ဇတိ (သီ။ ဣ။)၊ နူပပဇ္ဇတိ (သျာ။)]။
၇၅။
တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ [အရိယံ မဂ္ဂံ သမာရုဟ (သီ။ ဣ။)]၊ နေကာသီ လဘတေ သုခံ။
၇၆။
မောဃဉ္စဿ ဟုတံ ဟောတိ၊ မောဃဉ္စာပိ သမီဟိတံ။
အတိထိသ္မိံ ယော နိသိန္နသ္မိံ၊ ဧကော ဘုဉ္ဇတိ ဘောဇနံ။
၇၇။
တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ၊ နေကာသီ လဘတေ သုခံ။
၇၈။
သစ္စဉ္စဿ ဟုတံ ဟောတိ၊ သစ္စဉ္စာပိ သမီဟိတံ။
အတိထိသ္မိံ ယော နိသိန္နသ္မိံ၊ နေကော ဘုဉ္ဇတိ ဘောဇနံ။
၇၉။
တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ၊ နေကာသီ လဘတေ သုခံ။
၈၀။
သရဉ္စ ဇုဟတိ ပေါသော၊ ဗဟုကာယ ဂယာယ စ။
ဒေါဏေ တိမ္ဗရုတိတ္ထသ္မိံ၊ သီဃသောတေ မဟာဝဟေ။
၈၁။
အတြ စဿ ဟုတံ ဟောတိ၊ အတြ စဿ သမီဟိတံ။
အတိထိသ္မိံ ယော နိသိန္နသ္မိံ၊ နေကော ဘုဉ္ဇတိ ဘောဇနံ။
၈၂။
တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ၊ နေကာသီ လဘတေ သုခံ။
၈၃။
ဗဠိသဉှိ သော နိဂိလတိ [နိဂ္ဂိလတိ (သီ။ ဣ။)]၊ ဒီဃသုတ္တံ သဗန္ဓနံ။
အတိထိသ္မိံ ယော နိသိန္နသ္မိံ၊ ဧကော ဘုဉ္ဇတိ ဘောဇနံ။
၈၄။
တံ တံ ဝဒါမိ ကောသိယ၊ ဒေဟိ ဒါနာနိ ဘုဉ္ဇ စ။
အရိယမဂ္ဂံ သမာရူဟ၊ နေကာသီ လဘတေ သုခံ။
၈၅။
ဥဠာရဝဏ္ဏာ ဝတ ဗြာဟ္မဏာ ဣမေ၊ အယဉ္စ ဝေါ သုနခေါ ကိဿ ဟေတု။
ဥစ္စာဝစံ ဝဏ္ဏနိဘံ ဝိကုဗ္ဗတိ၊ အက္ခာထ နော ဗြာဟ္မဏာ ကေ နု တုမှေ။
၈၆။
စန္ဒော စ သုရိယော စ [သူရိယော စ (က။)] ဥဘော ဣဓါဂတာ၊ အယံ ပန မာတလိ ဒေဝသာရထိ။
သက္ကောဟမသ္မိ တိဒသာနမိန္ဒော၊ ဧသော စ ခေါ ပဉ္စသိခေါတိ ဝုစ္စတိ။
၈၇။
ပါဏိဿရာ မုဒိင်္ဂါ စ [မုတိင်္ဂါ စ (သီ။ သျာ။ ဣ။]၊ မုရဇာလမ္ဗရာနိ စ။
သုတ္တမေနံ ပဗောဓေန္တိ၊ ပဋိဗုဒ္ဓေါ စ နန္ဒတိ။
၈၈။
ယေ ကေစိမေ မစ္ဆရိနော ကဒရိယာ၊ ပရိဘာသကာ သမဏဗြာဟ္မဏာနံ။
ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ နိရယံ ဝဇန္တိ။
၈၉။
ယေ ကေစိမေ သုဂ္ဂတိမာသမာနာ [သုဂ္ဂတိမာသသာနာ (သီ။ ဣ။)၊ သုဂ္ဂတာသိသမာနာ (က။)]၊ ဓမ္မေ ဌိတာ သံယမေ သံဝိဘာဂေ။
ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ သုဂတိံ ဝဇန္တိ။
၉၀။
တွံ နောသိ ဉာတိ ပုရိမာသု ဇာတိသု၊ သော မစ္ဆရီ ရောသကော [ကောသိယော (သျာ။ က။)] ပါပဓမ္မော။
တဝေဝ အတ္ထာယ ဣဓါဂတမှာ၊ မာ ပါပဓမ္မော နိရယံ ဂမိတ္ထ [အပ္ပတ္ထ (က။ သီ။ သျာ။ ဣ။)]။
၉၁။
အဒ္ဓါ ဟိ မံ ဝေါ ဟိတကာမာ၊ ယံ မံ သမနုသာသထ။
သောဟံ တထာ ကရိဿာမိ၊ သဗ္ဗံ ဝုတ္တံ ဟိတေသိဘိ။
၉၂။
ဧသာဟမဇ္ဇေဝ ဥပါရမာမိ၊ န စာပိဟံ [န စာပဟံ (သီ။ ဣ။)] ကိဉ္စိ ကရေယျ ပါပံ။
န စာပိ မေ ကိဉ္စိ အဒေယျမတ္ထိ၊ န စာပိဒတွာ ဥဒကံ ပိဝါမိ [ဥဒကမ္ပဟံ ပိဗေ (သီ။)]။
၉၃။
ဧဝဉ္စ မေ ဒဒတော သဗ္ဗကာလံ [ကာလေ (က။)]၊ ဘောဂါ ဣမေ ဝါသဝ ခီယိဿန္တိ။
တတော အဟံ ပဗ္ဗဇိဿာမိ သက္က၊ ဟိတွာန ကာမာနိ ယထောဓိကာနီတိ။
ကောသိယဇာတကံ သတ္တမံ။
၄၇၁။ မေဏ္ဍကပဉ္ဟဇာတကံ (၈)
၉၄။
ယေသံ န ကဒါစိ ဘူတပုဗ္ဗံ၊ သခ္ယံ [သက္ခိံ (သီ။ ဣ။)၊ သခိ (သျာ။)] သတ္တပဒမ္ပိမသ္မိ လောကေ။
ဇာတာ အမိတ္တာ ဒုဝေ သဟာယာ၊ ပဋိသန္ဓာယ စရန္တိ ကိဿ ဟေတု။
၉၅။
ယဒိ မေ အဇ္ဇ ပါတရာသကာလေ၊ ပဉ္ဟံ န သက္ကုဏေယျာထ ဝတ္တုမေတံ။
ရဋ္ဌာ ပဗ္ဗာဇယိဿာမိ ဝေါ သဗ္ဗေ၊ န ဟိ မတ္ထော ဒုပ္ပညဇာတိကေဟိ။
၉၆။
မဟာဇနသမာဂမမှိ ဃောရေ၊ ဇနကောလာဟလသင်္ဂမမှိ ဇာတေ။
ဝိက္ခိတ္တမနာ အနေကစိတ္တာ၊ ပဉ္ဟံ န သက္ကုဏောမ ဝတ္တုမေတံ။
၉၇။
ဧကဂ္ဂစိတ္တာဝ ဧကမေကာ၊ ရဟသိ ဂတာ အတ္ထံ နိစိန္တယိတွာ [အတ္ထာနိ စိန္တယိတွာ (သျာ။ က။)]။
ပဝိဝေကေ သမ္မသိတွာန ဓီရာ၊ အထ ဝက္ခန္တိ ဇနိန္ဒ ဧတမတ္ထံ။
၉၈။
ဥဂ္ဂပုတ္တ-ရာဇပုတ္တိယာနံ၊ ဥရဗ္ဘဿ မံသံ ပိယံ မနာပံ။
န သုနခဿ တေ အဒေန္တိ မံသံ၊ အထ မေဏ္ဍဿ သုဏေန သခ္ယမဿ။
၉၉။
စမ္မံ ဝိဟနန္တိ ဧဠကဿ၊ အဿပိဋ္ဌတ္ထရဿုခဿ [အဿပိဋ္ဌတ္ထရဏသုခဿ (သီ။)] ဟေတု။
န စ တေ သုနခဿ အတ္ထရန္တိ၊ အထ မေဏ္ဍဿ သုဏေန သခ္ယမဿ။
၁၀၀။
အာဝေလ္လိတသိင်္ဂိကော ဟိ မေဏ္ဍော၊ န စ သုနခဿ ဝိသာဏကာနိ အတ္ထိ။
တိဏဘက္ခော မံသဘောဇနော စ၊ အထ မေဏ္ဍဿ သုဏေန သခ္ယမဿ။
၁၀၁။
တိဏမာသိ ပလာသမာသိ မေဏ္ဍော၊ န စ သုနခေါ တိဏမာသိ နော ပလာသံ။
ဂဏှေယျ သုဏော သသံ ဗိဠာရံ၊ အထ မေဏ္ဍဿ သုဏေန သခ္ယမဿ။
၁၀၂။
အဋ္ဌဍ္ဎပဒေါ စတုပ္ပဒဿ၊ မေဏ္ဍော အဋ္ဌနခေါ အဒိဿမာနော။
ဆာဒိယမာဟရတီ အယံ ဣမဿ၊ မံသံ အာဟရတီ အယံ အမုဿ။
၁၀၃။
ပါသာဒဝရဂတော ဝိဒေဟသေဋ္ဌော၊ ဝိတိဟာရံ အညမညဘောဇနာနံ။
အဒ္ဒက္ခိ [အဒ္ဒသ (သျာ။ က။)] ကိရ သက္ခိကံ ဇနိန္ဒော၊ ဗုဘုက္ကဿ ပုဏ္ဏံ မုခဿ [ဘောဘုက္ခဿ စ ပုဏ္ဏမုခဿ (သီ။)] စေတံ။
၁၀၄။
လာဘာ ဝတ မေ အနပ္ပရူပါ၊ ယဿ မေဒိသာ ပဏ္ဍိတာ ကုလမှိ။
ပဉ္ဟဿ ဂမ္ဘီရဂတံ နိပုဏမတ္ထံ၊ ပဋိဝိဇ္ဈန္တိ သုဘာသိတေန ဓီရာ။
၁၀၅။
အဿတရိရထဉ္စ ဧကမေကံ၊ ဖီတံ ဂါမဝရဉ္စ ဧကမေကံ။
သဗ္ဗေသံ ဝေါ ဒမ္မိ ပဏ္ဍိတာနံ၊ ပရမပ္ပတီတမနော သုဘာသိတေနာတိ။
မေဏ္ဍကပဉ္ဟဇာတကံ အဋ္ဌမံ။
၄၇၂။ မဟာပဒုမဇာတကံ (၉)
၁၀၆။
နာဒဋ္ဌာ [နာဒိဋ္ဌာ (က။ သီ။ သျာ။ က။)] ပရတော ဒေါသံ၊ အဏုံ ထူလာနိ သဗ္ဗသော။
ဣဿရော ပဏယေ ဒဏ္ဍံ၊ သာမံ အပ္ပဋိဝေက္ခိယ။
၁၀၇။
ယော စ အပ္ပဋိဝေက္ခိတွာ၊ ဒဏ္ဍံ ကုဗ္ဗတိ ခတ္တိယော။
သကဏ္ဋကံ သော ဂိလတိ၊ ဇစ္စန္ဓောဝ သမက္ခိကံ။
၁၀၈။
အဒဏ္ဍိယံ ဒဏ္ဍယတိ [ဒဏ္ဍိယတိ (သျာ။ ဣ။)]၊ ဒဏ္ဍိယဉ္စ အဒဏ္ဍိယံ [အဒဏ္ဍိယ (နိယျ)၊ န ဒဏ္ဍယေ (?)]။
အန္ဓောဝ ဝိသမံ မဂ္ဂံ၊ န ဇာနာတိ သမာသမံ။
၁၀၉။
ယော စ ဧတာနိ ဌာနာနိ၊ အဏုံ ထူလာနိ သဗ္ဗသော။
သုဒိဋ္ဌမနုသာသေယျ၊ သ ဝေ ဝေါဟရိတု [ဝေါဟာတု (ဣ။)] မရဟတိ။
၁၁၀။
နေကန္တမုဒုနာ သက္ကာ၊ ဧကန္တတိခိဏေန ဝါ။
အတ္တံ မဟန္တေ [မဟတ္တေ (သျာ။ က။)] ဌပေတုံ [ဌာပေတုံ (သီ။ သျာ။ ဣ။)]၊ တသ္မာ ဥဘယမာစရေ။
၁၁၁။
ပရိဘူတော မုဒု ဟောတိ၊ အတိတိက္ခော စ ဝေရဝါ။
ဧတဉ္စ ဥဘယံ ဉတွာ၊ အနုမဇ္ဈံ သမာစရေ။
၁၁၂။
ဗဟုမ္ပိ ရတ္တော ဘာသေယျ၊ ဒုဋ္ဌောပိ ဗဟု ဘာသတိ။
န ဣတ္ထိကာရဏာ ရာဇ၊ ပုတ္တံ ဃာတေတုမရဟသိ။
၁၁၃။
သဗ္ဗောဝ [သဗ္ဗော စ (က။ သီ။ ဣ။)] လောကော ဧကတော [ဧကန္တော (သီ။ ဣ။)]၊ ဣတ္ထီ စ အယမေကိကာ။
တေနာဟံ ပဋိပဇ္ဇိဿံ၊ ဂစ္ဆထ ပက္ခိပထေဝ [ပက္ခိပေထ (သျာ။ အဋ္ဌ။)] တံ။
၁၁၄။
အနေကတာလေ နရကေ၊ ဂမ္ဘီရေ စ သုဒုတ္တရေ [ဂမ္ဘီရေ သုဒုရုတ္တရေ (ဣ။ က။)]။
ပါတိတော ဂိရိဒုဂ္ဂသ္မိံ၊ ကေန တွံ တတ္ထ နာမရိ။
၁၁၅။
နာဂေါ ဇာတဖဏော တတ္ထ၊ ထာမဝါ ဂိရိသာနုဇော။
ပစ္စဂ္ဂဟိ မံ ဘောဂေဟိ၊ တေနာဟံ တတ္ထ နာမရိံ။
၁၁၆။
ဧဟိ တံ ပဋိနေဿာမိ၊ ရာဇပုတ္တ သကံ ဃရံ။
ရဇ္ဇံ ကာရေဟိ [ကာရေသိ (သီ။)] ဘဒ္ဒန္တေ၊ ကိံ အရညေ ကရိဿသိ။
၁၁၇။
ယထာ ဂိလိတွာ ဗဠိသံ၊ ဥဒ္ဓရေယျ သလောဟိတံ။
ဥဒ္ဓရိတွာ သုခီ အဿ၊ ဧဝံ [သုခံ (ဣ။ က။)] ပဿာမိ အတ္တနံ [အတ္တနိ (ဣ။ က။)၊ အတ္တနာ (သျာ။)၊ ဧဝံ အဟမ္ပိ ပုန သောတ္ထိဘာဝပ္ပတ္တံ ဂိလိတဗဠိသံ ပုရိသမိဝ အတ္တာနံ ပဿာမီတိ (အဋ္ဌ။ သံဝဏ္ဏနာ)]။
၁၁၈။
ကိံ နု တွံ ဗဠိသံ ဗြူသိ၊ ကိံ တွံ ဗြူသိ သလောဟိတံ။
ကိံ နု တွံ ဥဗ္ဘတံ ဗြူသိ၊ တံ မေ အက္ခာဟိ ပုစ္ဆိတော။
၁၁၉။
ကာမာဟံ ဗဠိသံ ဗြူမိ၊ ဟတ္ထိအဿံ သလောဟိတံ။
စတ္တာဟံ ဥဗ္ဘတံ ဗြူမိ၊ ဧဝံ ဇာနာဟိ ခတ္တိယ။
၁၂၀။
စိဉ္စာမာဏဝိကာ မာတာ၊ ဒေဝဒတ္တော စ မေ ပိတာ။
အာနန္ဒော ပဏ္ဍိတော နာဂေါ၊ သာရိပုတ္တော စ ဒေဝတာ။
ရာဇပုတ္တော အဟံ အာသိံ [အဟံ တဒါ ရာဇပုတ္တော (သီ။ သျာ။ ဣ။)]၊ ဧဝံ ဓါရေထ ဇာတကန္တိ။
မဟာပဒုမဇာတကံ နဝမံ။
၄၇၃။ မိတ္တာမိတ္တဇာတကံ (၁၀)
၁၂၁။
ကာနိ ကမ္မာနိ ကုဗ္ဗာနံ၊ ကထံ ဝိညူ ပရက္ကမေ။
အမိတ္တံ ဇာနေယျ မေဓါဝီ၊ ဒိသွာ သုတွာ စ ပဏ္ဍိတော။
၁၂၂။
န နံ ဥမှယတေ ဒိသွာ၊ န စ နံ ပဋိနန္ဒတိ။
စက္ခူနိ စဿ [စက္ခူနိဿ (သျာ။ က။)] န ဒဒါတိ၊ ပဋိလောမဉ္စ ဝတ္တတိ။
၁၂၃။
အမိတ္တေ တဿ ဘဇတိ၊ မိတ္တေ တဿ န သေဝတိ။
ဝဏ္ဏကာမေ နိဝါရေတိ၊ အက္ကောသန္တေ ပသံသတိ။
၁၂၄။
ဂုယှဉ္စ တဿ နက္ခာတိ၊ တဿ ဂုယှံ န ဂူဟတိ။
ကမ္မံ တဿ န ဝဏ္ဏေတိ၊ ပညဿ နပ္ပသံသတိ။
၁၂၅။
အဘဝေ နန္ဒတိ တဿ၊ ဘဝေ တဿ န နန္ဒတိ။
အစ္ဆေရံ [အစ္ဆရိယံ (သီ။ သျာ။ ဣ။)] ဘောဇနံ လဒ္ဓါ၊ တဿ နုပ္ပဇ္ဇတေ သတိ။
တတော နံ နာနုကမ္ပတိ၊ အဟော သောပိ [အဟာသောပိ (က။ သီ။ သျာ။ က။)] လဘေယျိတော။
၁၂၆။
ဣစ္စေတေ သောဠသာကာရာ၊ အမိတ္တသ္မိံ ပတိဋ္ဌိတာ။
ယေဟိ အမိတ္တံ ဇာနေယျ၊ ဒိသွာ သုတွာ စ ပဏ္ဍိတော။
၁၂၇။
ကာနိ ကမ္မာနိ ကုဗ္ဗာနံ၊ ကထံ ဝိညူ ပရက္ကမေ။
မိတ္တံ ဇာနေယျ မေဓါဝီ၊ ဒိသွာ သုတွာ စ ပဏ္ဍိတော။
၁၂၈။
ပဝုတ္ထံ တဿ သရတိ၊ အာဂတံ အဘိနန္ဒတိ။
တတော ကေလာယိတော ဟောတိ၊ ဝါစာယ ပဋိနန္ဒတိ။
၁၂၉။
မိတ္တေ တဿေဝ ဘဇတိ၊ အမိတ္တေ တဿ န သေဝတိ။
အက္ကောသန္တေ နိဝါရေတိ၊ ဝဏ္ဏကာမေ ပသံသတိ။
၁၃၀။
ဂုယှဉ္စ တဿ အက္ခာတိ၊ တဿ ဂုယှဉ္စ ဂူဟတိ။
ကမ္မဉ္စ တဿ ဝဏ္ဏေတိ၊ ပညံ တဿ [ပညမဿ (သျာ။ က။)] ပသံသတိ။
၁၃၁။
ဘဝေ စ နန္ဒတိ တဿ [ဘဝေ နန္ဒတိ တဿ စ (က။)]၊ အဘဝေ တဿ န နန္ဒတိ။
အစ္ဆေရံ [အစ္ဆရိယံ (သီ။ သျာ။ ဣ။)] ဘောဇနံ လဒ္ဓါ၊ တဿ ဥပ္ပဇ္ဇတေ သတိ။
တတော နံ အနုကမ္ပတိ၊ အဟော သောပိ [ပဟာသောပိ (က။ သီ။ သျာ။ က။)] လဘေယျိတော။
၁၃၂။
ဣစ္စေတေ သောဠသာကာရာ၊ မိတ္တသ္မိံ သုပ္ပတိဋ္ဌိတာ။
ယေဟိ မိတ္တဉ္စ ဇာနေယျ [မိတ္တံ သုဇာနေယျ (ဣ။ က။)]၊ ဒိသွာ သုတွာ စ ပဏ္ဍိတောတိ။
မိတ္တာမိတ္တဇာတကံ ဒသမံ။
ဒွါဒသကနိပါတံ နိဋ္ဌိတံ။
တဿုဒ္ဒါနံ –
လဟုစိတ္တ သသာလ ကသန္တိ ပုန၊ အထ ကာမ ဒသခလုဋ္ဌာနဝရော။
အထ ကဏှ သုကောသိယ မေဏ္ဍဝရော၊ ပဒုမော ပုန မိတ္တဝရေန ဒသာတိ။