၁၁။ ဧကာဒသကနိပါတ
၄၅၅။ မာတုပေါသကဇာတက (၁)
၁။
တဿ နာဂဿ ဝိပ္ပဝါသေန၊ ဝိရူဠှာ သလ္လကီ စ ကုဋဇာ စ။
ကုရုဝိန္ဒကရဝီရာ [ကရဝရာ (သီ။ သျာ။)] တိသသာမာ စ၊ နိဝါတေ ပုပ္ဖိတာ စ ကဏိကာရာ။
၂။
ကောစိဒေဝ သုဝဏ္ဏကာယုရာ၊ နာဂရာဇံ ဘရန္တိ ပိဏ္ဍေန။
ယတ္ထ ရာဇာ ရာဇကုမာရော ဝါ၊ ကဝစမဘိဟေဿတိ အဆမ္ဘိတော [အသမ္ဘီတော (သီ။ သျာ။ ဣ။)]။
၃။
ဂဏှာဟိ နာဂ ကဗဠံ၊ မာ နာဂ ကိသကော ဘဝ။
ဗဟူနိ ရာဇကိစ္စာနိ၊ တာနိ [ယာနိ (သီ။ ဣ။)] နာဂ ကရိဿသိ။
၄။
သာ နူနသာ ကပဏိကာ၊ အန္ဓာ အပရိဏာယိကာ။
ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ။
၅။
ကာ နု တေ သာ မဟာနာဂ၊ အန္ဓာ အပရိဏာယိကာ။
ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ။
၆။
မာတာ မေ သာ မဟာရာဇ၊ အန္ဓာ အပရိဏာယိကာ။
ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ။
၇။
မုဉ္စထေတံ မဟာနာဂံ၊ ယောယံ ဘရတိ မာတရံ။
သမေတု မာတရာ နာဂေါ၊ သဟ သဗ္ဗေဟိ ဉာတိဘိ။
၈။
မုတ္တော စ ဗန္ဓနာ နာဂေါ၊ မုတ္တမာဒါယ ကုဉ္ဇရော [ကာသိရာဇေန ပေသိတော (သီ။ သျာ။)၊ မုတ္တော ဒါမာတော ကုဉ္ဇရော (ဣ။ သီ။ နိယျ)]။
မုဟုတ္တံ အဿာသယိတွာ [ဝိဿမိတွာန (သီ။)]၊ အဂမာ ယေန ပဗ္ဗတော။
၉။
တတော သော နဠိနိံ [နိလိနံ (သျာ။)] ဂန္တွာ၊ သီတံ ကုဉ္ဇရသေဝိတံ။
သောဏ္ဍာယူဒကမာဟတွာ [မာဟိတွာ (သျာ။ က။)]၊ မာတရံ အဘိသိဉ္စထ။
၁၀။
ကောယ အနရိယော ဒေဝေါ၊ အကာလေနပိ ဝဿတိ [အကာလေန ပဝဿတိ (သီ။ သျာ။)၊ အကာလေန’တိဝဿတိ (ဣ။)]။
ဂတော မေ အတြဇော ပုတ္တော၊ ယော မယှံ ပရိစာရကော။
၁၁။
ဥဋ္ဌေဟိ အမ္မ ကိံ သေသိ၊ အာဂတော တျာဟမတြဇော။
မုတ္တောမှိ ကာသိရာဇေန၊ ဝေဒေဟေန ယသဿိနာ။
၁၂။
စိရံ ဇီဝတု သော ရာဇာ၊ ကာသီနံ ရဋ္ဌဝဍ္ဎနော။
ယော မေ ပုတ္တံ ပမောစေသိ၊ သဒါ ဝုဒ္ဓါပစာယိကန္တိ။
မာတုပေါသကဇာတကံ ပဌမံ။
၄၅၆။ ဇုဏှဇာတကံ (၂)
၁၃။
သုဏောဟိ မယှံ ဝစနံ ဇနိန္ဒ၊ အတ္ထေန ဇုဏှမှိ ဣဓါနုပတ္တော။
န ဗြာဟ္မဏေ အဒ္ဓိကေ တိဋ္ဌမာနေ၊ ဂန္တဗ္ဗ [ဂန္တဗျ (က။)] မာဟု ဒွိပဒိန္ဒ [ဒိပဒါန (သီ။ ဣ။)၊ ဒွိပဒါန (သျာ။)] သေဋ္ဌ။
၁၄။
သုဏောမိ တိဋ္ဌာမိ ဝဒေဟိ ဗြဟ္မေ၊ ယေနာသိ [ယေနာပိ (သျာ။ က။)] အတ္ထေန ဣဓါနုပတ္တော။
ကံ ဝါ တွမတ္ထံ မယိ ပတ္ထယာနော၊ ဣဓါဂမာ ဗြဟ္မေ တဒိင်္ဃ ဗြူဟိ။
၁၅။
ဒဒါဟိ မေ ဂါမဝရာနိ ပဉ္စ၊ ဒါသီသတံ သတ္တ ဂဝံသတာနိ။
ပရောသဟဿဉ္စ သုဝဏ္ဏနိက္ခေ၊ ဘရိယာ စ မေ သာဒိသီ ဒွေ ဒဒါဟိ။
၁၆။
တပေါ နု တေ ဗြာဟ္မဏ ဘိံသရူပေါ၊ မန္တာ နု တေ ဗြာဟ္မဏ စိတ္တရူပါ။
ယက္ခာ နု [ယက္ခာ ဝ (သီ။ ဣ။)] တေ အဿဝါ သန္တိ ကေစိ၊ အတ္ထံ ဝါ မေ အဘိဇာနာသိ ကတ္တံ။
၁၇။
န မေ တပေါ အတ္ထိ န စာပိ မန္တာ၊ ယက္ခာပိ မေ အဿဝါ နတ္ထိ ကေစိ။
အတ္ထမ္ပိ တေ နာဘိဇာနာမိ ကတ္တံ၊ ပုဗ္ဗေ စ ခေါ [ပုဗ္ဗေဝ ခေါ (သျာ။ က။)] သင်္ဂတိမတ္တမာသိ။
၁၈။
ပဌမံ ဣဒံ ဒဿနံ ဇာနတော မေ၊ န တာဘိဇာနာမိ ဣတော ပုရတ္ထာ။
အက္ခာဟိ မေ ပုစ္ဆိတော ဧတမတ္ထံ၊ ကဒါ ကုဟိံ ဝါ အဟု သင်္ဂမော နော။
၁၉။
ဂန္ဓာရရာဇဿ ပုရမှိ ရမ္မေ၊ အဝသိမှသေ တက္ကသီလာယံ ဒေဝ။
တတ္ထန္ဓကာရမှိ တိမီသိကာယံ [တိမိဿိကာယံ (သီ။ အဋ္ဌ။)၊ တိမိဿကာယံ (သျာ။)]၊ အံသေန အံသံ သမဃဋ္ဋယိမှ။
၂၀။
တေ တတ္ထ ဌတွာန ဥဘော ဇနိန္ဒ၊ သာရာဏိယံ [သာရဏီယံ (က။)] ဝီတိသာရယိမှ [ဝီတိသာရိမှ (သီ။ သျာ။ ဣ။)] တတ္ထ။
သာယေဝ နော သင်္ဂတိမတ္တမာသိ၊ တတော န ပစ္ဆာ န ပုရေ အဟောသိ။
၂၁။
ယဒါ ကဒါစိ မနုဇေသု ဗြဟ္မေ၊ သမာဂမော သပ္ပုရိသေန ဟောတိ။
န ပဏ္ဍိတာ သင်္ဂတိသန္ထဝါနိ၊ ပုဗ္ဗေ ကတံ ဝါပိ ဝိနာသယန္တိ။
၂၂။
ဗာလာဝ [ဗာလာ စ (သီ။ သျာ။ ဣ။)] ခေါ သင်္ဂတိသန္ထဝါနိ၊ ပုဗ္ဗေ ကတံ ဝါပိ ဝိနာသယန္တိ။
ဗဟုမ္ပိ ဗာလေသု ကတံ ဝိနဿတိ၊ တထာ ဟိ ဗာလာ အကတညုရူပါ။
၂၃။
ဓီရာ စ ခေါ သင်္ဂတိသန္ထဝါနိ၊ ပုဗ္ဗေ ကတံ ဝါပိ န နာသယန္တိ။
အပ္ပမ္ပိ ဓီရေသု ကတံ န နဿတိ၊ တထာ ဟိ ဓီရာ သုကတညုရူပါ။
၂၄။
ဒဒါမိ တေ ဂါမဝရာနိ ပဉ္စ၊ ဒါသီသတံ သတ္တ ဂဝံသတာနိ။
ပရောသဟဿဉ္စ သုဝဏ္ဏနိက္ခေ၊ ဘရိယာ စ တေ သာဒိသီ ဒွေ ဒဒါမိ။
၂၅။
ဧဝံ သတံ ဟောတိ သမေစ္စ ရာဇ၊ နက္ခတ္တရာဇာရိဝ တာရကာနံ။
အာပူရတီ ကာသိပတီ တထာဟံ၊ တယာပိ မေ သင်္ဂမော အဇ္ဇ လဒ္ဓေါတိ။
ဇုဏှဇာတကံ ဒုတိယံ။
၄၅၇။ ဓမ္မဒေဝပုတ္တဇာတကံ (၃)
၂၆။
ယသောကရော ပုညကရောဟမသ္မိ၊ သဒါတ္ထုတော သမဏဗြာဟ္မဏာနံ။
မဂ္ဂါရဟော ဒေဝမနုဿပူဇိတော၊ ဓမ္မော အဟံ ဒေဟိ အဓမ္မ မဂ္ဂံ။
၂၇။
အဓမ္မယာနံ ဒဠှမာရုဟိတွာ၊ အသန္တသန္တော ဗလဝါဟမသ္မိ။
သ ကိဿ ဟေတုမှိ တဝဇ္ဇ ဒဇ္ဇံ၊ မဂ္ဂံ အဟံ ဓမ္မ အဒိန္နပုဗ္ဗံ။
၂၈။
ဓမ္မော ဟဝေ ပါတုရဟောသိ ပုဗ္ဗေ၊ ပစ္ဆာ အဓမ္မော ဥဒပါဒိ လောကေ။
ဇေဋ္ဌော စ သေဋ္ဌော စ သနန္တနော စ၊ ဥယျာဟိ ဇေဋ္ဌဿ ကနိဋ္ဌ မဂ္ဂါ။
၂၉။
န ယာစနာယ နပိ ပါတိရူပါ၊ န အရဟတာ [န အရဟတိ (သီ။ ဣ။)၊ အရဟတိ (က။)] တေဟံ ဒဒေယျံ မဂ္ဂံ။
ယုဒ္ဓဉ္စ နော ဟောတု ဥဘိန္နမဇ္ဇ၊ ယုဒ္ဓမှိ ယော ဇေဿတိ တဿ မဂ္ဂေါ။
၃၀။
သဗ္ဗာ ဒိသာ အနုဝိသဋောဟမသ္မိ၊ မဟဗ္ဗလော အမိတယသော အတုလ္ယော။
ဂုဏေဟိ သဗ္ဗေဟိ ဥပေတရူပေါ၊ ဓမ္မော အဓမ္မ တွံ ကထံ ဝိဇေဿသိ။
၃၁။
လောဟေန ဝေ ဟညတိ ဇာတရူပံ၊ န ဇာတရူပေန ဟနန္တိ လောဟံ။
သစေ အဓမ္မော ဟဉ္ဆတိ [ဟညတိ (သီ။ သျာ။)၊ ဟညိတိ (ကတ္ထစိ)] ဓမ္မမဇ္ဇ၊ အယော သုဝဏ္ဏံ ဝိယ ဒဿနေယျံ။
၃၂။
သစေ တုဝံ ယုဒ္ဓဗလော အဓမ္မ [ယုဒ္ဓဗလော’သိ’ဓမ္မ (က။ သီ။)၊ ယုဒ္ဓဗလော’သ’ဓမ္မ (ဣ။)]၊ န တုယှ ဝုဍ္ဎာ [ဝဒ္ဓါ (သီ။ ဣ။)] စ ဂရူ စ အတ္ထိ။
မဂ္ဂဉ္စ တေ ဒမ္မိ ပိယာပ္ပိယေန၊ ဝါစာဒုရုတ္တာနိပိ တေ ခမာမိ။
၃၃။
ဣဒဉ္စ သုတွာ ဝစနံ အဓမ္မော၊ အဝံသိရော ပတိတော ဥဒ္ဓပါဒေါ။
‘‘ယုဒ္ဓတ္ထိကော စေ န လဘာမိ ယုဒ္ဓံ’’၊ ဧတ္တာဝတာ ဟောတိ ဟတော အဓမ္မော။
၃၄။
ခန္တီဗလော ယုဒ္ဓဗလံ ဝိဇေတွာ၊ ဟန္တွာ အဓမ္မံ နိဟနိတွ [ဝိဟနိတွာ (က။)] ဘူမ္ယာ။
ပါယာသိ ဝိတ္တော [စိတ္တော (သျာ။)] အဘိရုယှ သန္ဒနံ၊ မဂ္ဂေနေဝ အတိဗလော သစ္စနိက္ကမော။
၃၅။
မာတာ ပိတာ သမဏဗြာဟ္မဏာ စ၊ အသမ္မာနိတာ ယဿ သကေ အဂါရေ။
ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ နိရယံ ဝဇန္တိ တေ [ဝဇန္တိ (သီ။ ဣ။)]။
ယထာ အဓမ္မော ပတိတော အဝံသိရော။
၃၆။
မာတာ ပိတာ သမဏဗြာဟ္မဏာ စ၊ သုသမ္မာနိတာ ယဿ သကေ အဂါရေ။
ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ သုဂတိံ ဝဇန္တိ တေ။
ယထာပိ ဓမ္မော အဘိရုယှ သန္ဒနန္တိ။
ဓမ္မဒေဝပုတ္တဇာတကံ [ဓမ္မဇာတကံ (သီ။ ဣ။)] တတိယံ။
၄၅၈။ ဥဒယဇာတကံ (၄)
၃၇။
ဧကာ နိသိန္နာ သုစိ သညတူရူ၊ ပါသာဒမာရုယှ အနိန္ဒိတင်္ဂီ။
ယာစာမိ တံ ကိန္နရနေတ္တစက္ခု၊ ဣမေကရတ္တိံ ဥဘယော ဝသေမ။
၃၈။
ဩကိဏ္ဏန္တရပရိခံ၊ ဒဠှမဋ္ဋာလကောဋ္ဌကံ။
ရက္ခိတံ ခဂ္ဂဟတ္ထေဟိ၊ ဒုပ္ပဝေသမိဒံ ပုရံ။
၃၉။
ဒဟရဿ ယုဝိနော စာပိ၊ အာဂမော စ န ဝိဇ္ဇတိ။
အထ ကေန နု ဝဏ္ဏေန၊ သင်္ဂမံ ဣစ္ဆသေ မယာ။
၄၀။
ယက္ခောဟမသ္မိ ကလျာဏိ၊ အာဂတောသ္မိ တဝန္တိကေ [တဝန္တိကံ (သီ။ ဣ။)]။
တွံ မံ နန္ဒယ [နန္ဒဿု (သျာ။ က။)] ဘဒ္ဒန္တေ၊ ပုဏ္ဏကံသံ ဒဒါမိ တေ။
၄၁။
ဒေဝံ ဝ ယက္ခံ အထ ဝါ မနုဿံ၊ န ပတ္ထယေ ဥဒယမတိစ္စ အညံ။
ဂစ္ဆေဝ တွံ ယက္ခ မဟာနုဘာဝ၊ မာ စဿု ဂန္တွာ ပုနရာဝဇိတ္ထ။
၄၂။
ယာ သာ ရတိ ဥတ္တမာ ကာမဘောဂိနံ၊ ယံ ဟေတု သတ္တာ ဝိသမံ စရန္တိ။
မာ တံ ရတိံ ဇီယိ တုဝံ သုစိမှိ တေ၊ ဒဒါမိ တေ ရူပိယံ ကံသပူရံ။
၄၃။
နာရိံ နရော နိဇ္ဈပယံ ဓနေန၊ ဥက္ကံသတီ ယတ္ထ ကရောတိ ဆန္ဒံ။
ဝိပစ္စနီကော တဝ ဒေဝဓမ္မော၊ ပစ္စက္ခတော ထောကတရေန ဧသိ။
၄၄။
အာယု စ ဝဏ္ဏော စ [အာယုံ စ ဝဏ္ဏံ စ (က။ သီ။ ဣ။)] မနုဿလောကေ၊ နိဟီယတိ မနုဇာနံ သုဂ္ဂတ္တေ။
တေနေဝ ဝဏ္ဏေန ဓနမ္ပိ တုယှံ၊ နိဟီယတိ ဇိဏ္ဏတရာသိ အဇ္ဇ။
၄၅။
ဧဝံ မေ ပေက္ခမာနဿ၊ ရာဇပုတ္တိ ယသဿိနိ။
ဟာယတေဝ တဝ [ဟာယတေ ဝတ တေ (သီ။ သျာ။ က။)၊ ဟာယတေဝ တတော (ဣ။)] ဝဏ္ဏော၊ အဟောရတ္တာနမစ္စယေ။
၄၆။
ဣမိနာဝ တွံ ဝယသာ၊ ရာဇပုတ္တိ သုမေဓသေ။
ဗြဟ္မစရိယံ စရေယျာသိ၊ ဘိယျော ဝဏ္ဏဝတီ သိယာ။
၄၇။
ဒေဝါ န ဇီရန္တိ ယထာ မနုဿာ၊ ဂတ္တေသု တေသံ ဝလိယော န ဟောန္တိ။
ပုစ္ဆာမိ တံ ယက္ခ မဟာနုဘာဝ၊ ကထံ နု ဒေဝါန [ကထံ န ဒေဝါနံ (ဣ။)] သရီရဒေဟော။
၄၈။
ဒေဝါ န ဇီရန္တိ ယထာ မနုဿာ၊ ဂတ္တေသု တေသံ ဝလိယော န ဟောန္တိ။
သုဝေ သုဝေ ဘိယျတရောဝ [ဘိယျတရော စ (က။)] တေသံ၊ ဒိဗ္ဗော စ ဝဏ္ဏော ဝိပုလာ စ ဘောဂါ။
၄၉။
ကိံသူဓ ဘီတာ ဇနတာ အနေကာ၊ မဂ္ဂေါ စ နေကာယတနံ ပဝုတ္တော။
ပုစ္ဆာမိ တံ ယက္ခ မဟာနုဘာဝ၊ ကတ္ထဋ္ဌိတော ပရလောကံ န ဘာယေ။
၅၀။
ဝါစံ မနဉ္စ ပဏိဓါယ သမ္မာ၊ ကာယေန ပါပါနိ အကုဗ္ဗမာနော။
ဗဟုန္နပါနံ ဃရမာဝသန္တော၊ သဒ္ဓေါ မုဒူ သံဝိဘာဂီ ဝဒညူ။
သင်္ဂါဟကော သခိလော သဏှဝါစော၊ ဧတ္ထဋ္ဌိတော ပရလောကံ န ဘာယေ။
၅၁။
အနုသာသသိ မံ ယက္ခ၊ ယထာ မာတာ ယထာ ပိတာ။
ဥဠာရဝဏ္ဏံ ပုစ္ဆာမိ၊ ကော နု တွမသိ သုဗြဟာ။
၅၂။
ဥဒယောဟမသ္မိ ကလျာဏိ၊ သင်္ကရတ္တာ ဣဓါဂတော [သင်္ဂရတ္ထာ ဣဓါဂတော (သီ။ ဣ။)၊ သင်္ဂရတ္ထာယိဓါဂတော (သျာ။)]။
အာမန္တ ခေါ တံ ဂစ္ဆာမိ၊ မုတ္တောသ္မိ တဝ သင်္ကရာ [သင်္ဂရာ (သီ။ သျာ။ ဣ။)]။
၅၃။
သစေ ခေါ တွံ ဥဒယောသိ၊ သင်္ကရတ္တာ ဣဓါဂတော။
အနုသာသ မံ ရာဇပုတ္တ၊ ယထာဿ ပုန သင်္ဂမော။
၅၄။
အတိပတတိ [အဓိပတတီ (သီ။ ဣ။)] ဝယော ခဏော တထေဝ၊ ဌာနံ နတ္ထိ ဓုဝံ စဝန္တိ သတ္တာ။
ပရိဇိယျတိ အဒ္ဓုဝံ သရီရံ၊ ဥဒယေ မာ ပမာဒ [မာ ပမာဒံ (သီ။)] စရဿု ဓမ္မံ။
၅၅။
ကသိဏာ ပထဝီ ဓနဿ ပူရာ၊ ဧကဿေဝ သိယာ အနညဓေယျာ။
တဉ္စာပိ ဇဟတိ [ဇဟာတိ (သီ။ သျာ။ ဣ။)၊ ဇဟာတီ (?)] အဝီတရာဂေါ၊ ဥဒယေ မာ ပမာဒ စရဿု ဓမ္မံ။
၅၆။
မာတာ စ ပိတာ စ ဘာတရော စ၊ ဘရိယာ ယာပိ ဓနေန ဟောတိ ကီတာ [ဘရိယာပိ ဓနေန ဟောန္တိ အတိတ္တာ (က။)]။
တေ စာပိ ဇဟန္တိ အညမညံ၊ ဥဒယေ မာ ပမာဒ စရဿု ဓမ္မံ။
၅၇။
ကာယော ပရဘောဇနန္တိ ဉတွာ [ကာယော စ ပရဘောဇနံ ဝိဒိတွာ (က။)]၊ သံသာရေ သုဂတိဉ္စ ဒုဂ္ဂတိဉ္စ [သုဂတီ စ ဒုဂ္ဂတီ စ (သီ။ သျာ။ ဣ။)၊ သုဂ္ဂတိံ ဒုဂ္ဂတိဉ္စ (က။)]။
ဣတ္တရဝါသောတိ ဇာနိယာန၊ ဥဒယေ မာ ပမာဒ စရဿု ဓမ္မံ။
၅၈။
သာဓု ဘာသတိယံ [ဘာသတယံ (သီ။ ဣ။)] ယက္ခော၊ အပ္ပံ မစ္စာန ဇီဝိတံ။
ကသိရဉ္စ ပရိတ္တဉ္စ၊ တဉ္စ ဒုက္ခေန သံယုတံ။
သာဟံ ဧကာ ပဗ္ဗဇိဿာမိ၊ ဟိတွာ ကာသိံ သုရုန္ဓနန္တိ။
ဥဒယဇာတကံ စတုတ္ထံ။
၄၅၉။ ပါနီယဇာတကံ (၅)
၅၉။
မိတ္တော မိတ္တဿ ပါနီယံ၊ အဒိန္နံ ပရိဘုဉ္ဇိသံ။
တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ။
မာ ပုန အကရံ ပါပံ၊ တသ္မာ ပဗ္ဗဇိတော အဟံ။
၆၀။
ပရဒါရဉ္စ ဒိသွာန၊ ဆန္ဒော မေ ဥဒပဇ္ဇထ [ဥပပဇ္ဇထ (သျာ။ က။)]။
တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ။
မာ ပုန အကရံ ပါပံ၊ တသ္မာ ပဗ္ဗဇိတော အဟံ။
၆၁။
ပိတရံ မေ မဟာရာဇ၊ စောရာ အဂဏ္ဟု [အဂဏ္ဟုံ (သီ။ ဣ။)၊ အဂဏှိ (က။)] ကာနနေ။
တေသာဟံ ပုစ္ဆိတော ဇာနံ၊ အညထာ နံ ဝိယာကရိံ။
၆၂။
တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ။
မာ ပုန အကရံ ပါပံ၊ တသ္မာ ပဗ္ဗဇိတော အဟံ။
၆၃။
ပါဏာတိပါတမကရုံ၊ သောမယာဂေ ဥပဋ္ဌိတေ။
တေသာဟံ သမနုညာသိံ၊ တေန ပစ္ဆာ ဝိဇိဂုစ္ဆိံ။
၆၄။
တံ ပါပံ ပကတံ မယာ၊ မာ ပုန အကရံ ပါပံ။
တသ္မာ ပဗ္ဗဇိတော အဟံ။
၆၅။
သုရာမေရယမာဓုကာ [မဓုကာ (သီ။ သျာ။ ဣ။)]၊ ယေ ဇနာ ပဌမာသု နော။
ဗဟူနံ တေ အနတ္ထာယ၊ မဇ္ဇပါနမကပ္ပယုံ။
၆၆။
တေသာဟံ သမနုညာသိံ၊ တေန ပစ္ဆာ ဝိဇိဂုစ္ဆိံ။
တံ ပါပံ ပကတံ မယာ၊ မာ ပုန အကရံ ပါပံ။
တသ္မာ ပဗ္ဗဇိတော အဟံ။
၆၇။
ဓိရတ္ထု သုဗဟူ ကာမေ၊ ဒုဂ္ဂန္ဓေ ဗဟုကဏ္ဋကေ။
ယေ အဟံ ပဋိသေဝန္တော၊ နာလဘိံ တာဒိသံ သုခံ။
၆၈။
မဟဿာဒါ သုခါ ကာမာ၊ နတ္ထိ ကာမာ ပရံ [ကာမပရံ (သီ။ ဣ။)] သုခံ။
ယေ ကာမေ ပဋိသေဝန္တိ၊ သဂ္ဂံ တေ ဥပပဇ္ဇရေ။
၆၉။
အပ္ပဿာဒါ ဒုခါ ကာမာ၊ နတ္ထိ ကာမာ ပရံ ဒုခံ။
ယေ ကာမေ ပဋိသေဝန္တိ၊ နိရယံ တေ ဥပပဇ္ဇရေ။
၇၀။
အသီ ယထာ သုနိသိတော၊ နေတ္တိံသောဝ သုပါယိကော [သုပါသိတော (က။ သီ။ နိယျ)၊ သုပါယိတော (က။ အဋ္ဌ။)]။
သတ္တီဝ ဥရသိ ခိတ္တာ၊ ကာမာ ဒုက္ခတရာ တတော။
၇၁။
အင်္ဂါရာနံဝ ဇလိတံ၊ ကာသုံ သာဓိကပေါရိသံ။
ဖာလံဝ ဒိဝသံတတ္တံ၊ ကာမာ ဒုက္ခတရာ တတော။
၇၂။
ဝိသံ ယထာ ဟလာဟလံ၊ တေလံ ပက္ကုထိတံ [ဥက္ကဋ္ဌိတံ (သီ။ ဣ။)၊ ပက္ကုဋ္ဌိတံ (သျာ။)] ယထာ။
တမ္ဗလောဟ [တမ္ပလောဟံ (သျာ။)] ဝိလီနံဝ၊ ကာမာ ဒုက္ခတရာ တတောတိ။
ပါနီယဇာတကံ ပဉ္စမံ။
၄၆၀။ ယုဓဉ္စယဇာတကံ (၆)
၇၃။
မိတ္တာမစ္စပရိဗ္ယူဠှံ [ပရိဗ္ဗူဠှံ (သီ။ ဣ။)]၊ အဟံ ဝန္ဒေ ရထေသဘံ။
ပဗ္ဗဇိဿာမဟံ ရာဇ [ပဗ္ဗဇိဿံ မဟာရာဇ (သီ။ ဣ။)]၊ တံ ဒေဝေါ အနုမညတု။
၇၄။
သစေ တေ ဦနံ ကာမေဟိ၊ အဟံ ပရိပူရယာမိ [အဟံဝ ပူရယာမိ (က။)] တေ။
ယော တံ ဟိံသတိ ဝါရေမိ၊ မာ ပဗ္ဗဇ [ပဗ္ဗဇိ (ဣ။)] ယုဓဉ္စယ [ယုဓဉ္ဇယ (သီ။ သျာ။)၊ ယုဝဉ္ဇယ (ဣ။)]။
၇၅။
န မတ္ထိ ဦနံ ကာမေဟိ၊ ဟိံသိတာ မေ န ဝိဇ္ဇတိ။
ဒီပဉ္စ ကာတုမိစ္ဆာမိ၊ ယံ ဇရာ နာဘိကီရတိ။
၇၆။
ပုတ္တော ဝါ ပိတရံ ယာစေ၊ ပိတာ ဝါ ပုတ္တမောရသံ။
နေဂမော တံ ယာစေ [နေဂမော ယာစတေ (သီ။ သျာ။ ဣ။)] တာတ၊ မာ ပဗ္ဗဇ ယုဓဉ္စယ။
၇၇။
မာ မံ ဒေဝ နိဝါရေဟိ၊ ပဗ္ဗဇန္တံ ရထေသဘ။
မာဟံ ကာမေဟိ သမ္မတ္တော၊ ဇရာယ ဝသမနွဂူ။
၇၈။
အဟံ တံ တာတ ယာစာမိ၊ အဟံ ပုတ္တ နိဝါရယေ။
စိရံ တံ ဒဋ္ဌုမိစ္ဆာမိ၊ မာ ပဗ္ဗဇ ယုဓဉ္စယ။
၇၉။
ဥဿာဝေါဝ တိဏဂ္ဂမှိ၊ သူရိယုဂ္ဂမနံ ပတိ။
ဧဝမာယု မနုဿာနံ၊ မာ မံ အမ္မ နိဝါရယ။
၈၀။
တရမာနော ဣမံ ယာနံ၊ အာရောပေတု [တရမာနာ ဣမံ ယာနံ၊ အာရောပေန္တု (သီ။ ဣ။)] ရထေသဘ။
မာ မေ မာတာ တရန္တဿ၊ အန္တရာယကရာ အဟု။
၈၁။
အဘိဓါဝထ ဘဒ္ဒန္တေ၊ သုညံ ဟေဿတိ ရမ္မကံ။
ယုဓဉ္စယော အနုညာတော၊ သဗ္ဗဒတ္တေန ရာဇိနာ။
၈၂။
ယောဟု သေဋ္ဌော သဟဿဿ [မနုဿာနံ (သျာ။)၊ သဟဿာနံ (က။)]၊ ယုဝါ ကဉ္စနသန္နိဘော။
သောယံ ကုမာရော ပဗ္ဗဇိတော၊ ကာသာယဝသနော ဗလီ။
၈၃။
ဥဘော ကုမာရာ ပဗ္ဗဇိတာ၊ ယုဓဉ္စယော ယုဓိဋ္ဌိလော။
ပဟာယ မာတာပိတရော၊ သင်္ဂံ ဆေတွာန မစ္စုနောတိ။
ယုဓဉ္စယဇာတကံ ဆဋ္ဌံ။
၄၆၁။ ဒသရထဇာတကံ (၇)
၈၄။
ဧထ လက္ခဏ သီတာ စ၊ ဥဘော ဩတရထောဒကံ။
ဧဝါယံ ဘရတော အာဟ၊ ‘‘ရာဇာ ဒသရထော မတော’’။
၈၅။
ကေန ရာမပ္ပဘာဝေန၊ သောစိတဗ္ဗံ န သောစသိ။
ပိတရံ ကာလကတံ [ကာလင်္ကတံ (က။)] သုတွာ၊ န တံ ပသဟတေ ဒုခံ။
၈၆။
ယံ န သက္ကာ နိပါလေတုံ၊ ပေါသေန လပတံ ဗဟုံ။
သ ကိဿ ဝိညူ မေဓါဝီ၊ အတ္တာနမုပတာပယေ။
၈၇။
ဒဟရာ စ ဟိ ဝုဒ္ဓါ စ [ယေ ဝုဒ္ဓါ (သီ။ အဋ္ဌ။)၊ ယေ ဝုဍ္ဎာ (သျာ။)]၊ ယေ ဗာလာ ယေ စ ပဏ္ဍိတာ။
အဍ္ဎာ စေဝ ဒလိဒ္ဒါ စ၊ သဗ္ဗေ မစ္စုပရာယဏာ။
၈၈။
ဖလာနမိဝ ပက္ကာနံ၊ နိစ္စံ ပတနတော ဘယံ။
ဧဝံ ဇာတာန မစ္စာနံ၊ နိစ္စ မရဏတော ဘယံ။
၈၉။
သာယမေကေ န ဒိဿန္တိ၊ ပါတော ဒိဋ္ဌာ ဗဟုဇ္ဇနာ။
ပါတော ဧကေ န ဒိဿန္တိ၊ သာယံ ဒိဋ္ဌာ ဗဟုဇ္ဇနာ။
၉၀။
ပရိဒေဝယမာနော စေ၊ ကိဉ္စိဒတ္ထံ ဥဒဗ္ဗဟေ။
သမ္မူဠ္ဟော ဟိံသမတ္တာနံ၊ ကယိရာ တံ ဝိစက္ခဏော။
၉၁။
ကိသော ဝိဝဏ္ဏော ဘဝတိ၊ ဟိံသမတ္တာနမတ္တနော [မတ္တနာ (သီ။ အဋ္ဌ။ သု။ နိ။ ၅၉၀)]။
န တေန ပေတာ ပါလေန္တိ၊ နိရတ္ထာ ပရိဒေဝနာ။
၉၂။
ယထာ သရဏမာဒိတ္တံ၊ ဝါရိနာ ပရိနိဗ္ဗယေ [ဝါရိနာဝနိဗ္ဗာပယေ (သျာ။ က။)]။
ဧဝမ္ပိ ဓီရော သုတဝါ၊ မေဓါဝီ ပဏ္ဍိတော နရော။
ခိပ္ပမုပ္ပတိတံ သောကံ၊ ဝါတော တူလံဝ ဓံသယေ။
၉၃။
မစ္စော ဧကောဝ [ဧကောဝ မစ္စော (သီ။ သျာ။ ဣ။)] အစ္စေတိ၊ ဧကောဝ ဇာယတေ ကုလေ။
သံယောဂပရမာတွေဝ၊ သမ္ဘောဂါ သဗ္ဗပါဏိနံ။
၉၄။
တသ္မာ ဟိ ဓီရဿ ဗဟုဿုတဿ၊ သမ္ပဿတော လောကမိမံ ပရဉ္စ။
အညာယ ဓမ္မံ ဟဒယံ မနဉ္စ၊ သောကာ မဟန္တာပိ န တာပယန္တိ။
၉၅။
သောဟံ ဒဿဉ္စ ဘောက္ခဉ္စ၊ ဘရိဿာမိ စ [သောဟံ ယသဉ္စ ဘောဂဉ္စ၊ ဘရိယာပိ စ (သျာ။ က။)] ဉာတကေ။
သေသဉ္စ ပါလယိဿာမိ၊ ကိစ္စမေတံ [ကိစ္စမေဝံ (ဣ။)] ဝိဇာနတော။
၉၆။
ဒသ ဝဿသဟဿာနိ၊ သဋ္ဌိ ဝဿသတာနိ စ။
ကမ္ဗုဂီဝေါ မဟာဗာဟု၊ ရာမော ရဇ္ဇမကာရယီတိ။
ဒသရထဇာတကံ သတ္တမံ။
၄၆၂။ သံဝရဇာတကံ (၈)
၉၇။
ဇာနန္တော နော မဟာရာဇ၊ တဝ သီလံ ဇနာဓိပေါ။
ဣမေ ကုမာရေ ပူဇေန္တော၊ န တံ ကေနစိ မညထ။
၉၈။
တိဋ္ဌန္တေ နော မဟာရာဇေ၊ အဒု [အာဒု (သီ။ ဣ။)၊ အာဒူ (သျာ။)] ဒေဝေ ဒိဝင်္ဂတေ။
ဉာတီ တံ သမနုညိံသု၊ သမ္ပဿံ အတ္ထမတ္တနော။
၉၉။
ကေန သံဝရဝတ္တေန၊ သဉ္ဇာတေ အဘိတိဋ္ဌသိ။
ကေန တံ နာတိဝတ္တန္တိ၊ ဉာတိသံဃာ သမာဂတာ။
၁၀၀။
န ရာဇပုတ္တ ဥသူယာမိ [ရာဇပုတ္တ နုဿုယျာမိ (က။)]၊ သမဏာနံ မဟေသိနံ။
သက္ကစ္စံ တေ နမဿာမိ၊ ပါဒေ ဝန္ဒာမိ တာဒိနံ။
၁၀၁။
တေ မံ ဓမ္မဂုဏေ ယုတ္တံ၊ သုဿူသမနုသူယကံ။
သမဏာ မနုသာသန္တိ [သမနုသာသန္တိ (သီ။ သျာ။ ဣ။)]၊ ဣသီ ဓမ္မဂုဏေ ရတာ။
၁၀၂။
တေသာဟံ ဝစနံ သုတွာ၊ သမဏာနံ မဟေသိနံ။
န ကိဉ္စိ အတိမညာမိ၊ ဓမ္မေ မေ နိရတော မနော။
၁၀၃။
ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ။
တေသံ [တေသု (ဣ။)] နပ္ပဋိဗန္ဓာမိ၊ နိဝိဋ္ဌံ [နိဗဒ္ဓံ (သီ။ ဣ။)] ဘတ္တဝေတနံ။
၁၀၄။
မဟာမတ္တာ စ မေ အတ္ထိ၊ မန္တိနော ပရိစာရကာ။
ဗာရာဏသိံ ဝေါဟရန္တိ၊ ဗဟုမံသသုရောဒကံ။
၁၀၅။
အထောပိ ဝါဏိဇာ ဖီတာ၊ နာနာရဋ္ဌေဟိ အာဂတာ။
တေသု မေ ဝိဟိတာ ရက္ခာ၊ ဧဝံ ဇာနာဟုပေါသထ။
၁၀၆။
ဓမ္မေန ကိရ ဉာတီနံ၊ ရဇ္ဇံ ကာရေဟိ သံဝရ။
မေဓါဝီ ပဏ္ဍိတော စာသိ [စာပိ (သီ။ ဣ။)]၊ အထောပိ ဉာတိနံ ဟိတော။
၁၀၇။
တံ တံ ဉာတိပရိဗ္ယူဠှံ၊ နာနာရတနမောစိတံ။
အမိတ္တာ နပ္ပသဟန္တိ၊ ဣန္ဒံဝ အသုရာဓိပေါတိ။
သံဝရဇာတကံ အဋ္ဌမံ။
၄၆၃။ သုပ္ပါရကဇာတကံ (၉)
၁၀၈။
ဥမ္မုဇ္ဇန္တိ နိမုဇ္ဇန္တိ၊ မနုဿာ ခုရနာသိကာ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၀၉။
ကုရုကစ္ဆာ [ဘရုကစ္ဆာ (သီ။ သျာ။ ဣ။ အဋ္ဌ။)] ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ ခုရမာလီတိ ဝုစ္စတိ။
၁၁၀။
ယထာ အဂ္ဂီဝ သုရိယောဝ [အဂ္ဂိ သုရိယော စ (သျာ။)၊ အဂ္ဂီဝ သူရိယော (က။)]၊ သမုဒ္ဒေါ ပဋိဒိဿတိ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၁၁။
ကုရုကစ္ဆာ ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ အဂ္ဂိမာလီတိ ဝုစ္စတိ။
၁၁၂။
ယထာ ဒဓီဝ ခီရံဝ [ဒဓိ စ ခီရံ စ (သျာ။)၊ ဧဝမုပရိပိ]၊ သမုဒ္ဒေါ ပဋိဒိဿတိ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၁၃။
ကုရုကစ္ဆာ ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ ဒဓိမာလီတိ [ခီရမာလီတိ (က။)] ဝုစ္စတိ။
၁၁၄။
ယထာ ကုသောဝ သဿောဝ၊ သမုဒ္ဒေါ ပဋိဒိဿတိ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၁၅။
ကုရုကစ္ဆာ ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ ကုသမာလီတိ ဝုစ္စတိ။
၁၁၆။
ယထာ နဠောဝ ဝေဠူဝ၊ သမုဒ္ဒေါ ပဋိဒိဿတိ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၁၇။
ကုရုကစ္ဆာ ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ နဠမာလီတိ ဝုစ္စတိ။
၁၁၈။
မဟဗ္ဘယော ဘိံသနကော၊ သဒ္ဒေါ သုယျတိမာနုသော [သမုဒ္ဒေါ သုယျတ’မာနုသော (သီ။ ဣ။ အဋ္ဌ။)]။
ယထာ သောဗ္ဘော ပပါတောဝ၊ သမုဒ္ဒေါ ပဋိဒိဿတိ။
သုပ္ပါရကံ တံ ပုစ္ဆာမ၊ သမုဒ္ဒေါ ကတမော အယံ။
၁၁၉။
ကုရုကစ္ဆာ ပယာတာနံ၊ ဝါဏိဇာနံ ဓနေသိနံ။
နာဝါယ ဝိပ္ပနဋ္ဌာယ၊ ဗဠဝါမုခီတိ [ဝဠဘာမုခီတိ (သီ။ သျာ။)၊ ဗလဝါမုခီတိ (သျာ။ က။)] ဝုစ္စတိ။
၁၂၀။
ယတော သရာမိ အတ္တာနံ၊ ယတော ပတ္တောသ္မိ ဝိညုတံ။
နာဘိဇာနာမိ သဉ္စိစ္စ၊ ဧကပါဏမ္ပိ ဟိံသိတံ။
ဧတေန သစ္စဝဇ္ဇေန၊ သောတ္ထိံ နာဝါ နိဝတ္တတူတိ။
သုပ္ပါရကဇာတကံ နဝမံ။
ဧကာဒသကနိပါတံ နိဋ္ဌိတံ။
တဿုဒ္ဒါနံ –
သိရိမာတုသုပေါသကနာဂဝရော၊ ပုန ဇုဏှက ဓမ္မမုဒယဝရော။
အထ ပါနိ ယုဓဉ္စယကော စ၊ ဒသရထ သံဝရ ပါရဂတေန နဝါတိ။