၉။ နဝကနိပါတ
၄၂၇။ ဂိဇ္ဈဇာတက (၁)
၁။
ပရိသင်္ကုပထော နာမ၊ ဂိဇ္ဈပန္ထော သနန္တနော။
တတြာသိ မာတာပိတရော၊ ဂိဇ္ဈော ပေါသေသိ ဇိဏ္ဏကေ။
တေသံ အဇဂရမေဒံ၊ အစ္စဟာသိ ဗဟုတ္တသော [ပဟုတ္တတော (က။ သီ။)၊ ပဟူတသော (သျာ။ ဣ။)၊ ဗဟုဓသော (က။)]။
၂။
ပိတာ စ ပုတ္တံ အဝစ၊ ဇာနံ ဥစ္စံ ပပါတိနံ။
သုပတ္တံ ထာမသမ္ပန္နံ [ပက္ခသမ္ပန္နံ (သီ။ သျာ။ ဣ။)]၊ တေဇဿိံ ဒူရဂါမိနံ။
၃။
ပရိပ္လဝန္တံ ပထဝိံ၊ ယဒါ တာတ ဝိဇာနဟိ။
သာဂရေန ပရိက္ခိတ္တံ၊ စက္ကံဝ ပရိမဏ္ဍလံ။
တတော တာတ နိဝတ္တဿု၊ မာဿု ဧတ္တော ပရံ ဂမိ။
၄။
ဥဒပတ္တောသိ [ဥဒ္ဓံ ပတ္တောသိ (က။ သီ။)] ဝေဂေန၊ ဗလီ ပက္ခီ ဒိဇုတ္တမော။
ဩလောကယန္တော ဝက္ကင်္ဂေါ၊ ပဗ္ဗတာနိ ဝနာနိ စ။
၅။
အဒ္ဒဿ ပထဝိံ ဂိဇ္ဈော၊ ယထာသာသိ [ယထာဿာသိ (သျာ။ အဋ္ဌ။ ပါဌန္တရံ)] ပိတုဿုတံ။
သာဂရေန ပရိက္ခိတ္တံ၊ စက္ကံဝ ပရိမဏ္ဍလံ။
၆။
တဉ္စ သော သမတိက္ကမ္မ၊ ပရမေဝစ္စဝတ္တထ [ပရမေဝ ပဝတ္တထ (သီ။ သျာ။)]။
တဉ္စ ဝါတသိခါ တိက္ခာ၊ အစ္စဟာသိ ဗလိံ ဒိဇံ။
၇။
နာသက္ခာတိဂတော ပေါသော၊ ပုနဒေဝ နိဝတ္တိတုံ။
ဒိဇော ဗျသနမာပါဒိ၊ ဝေရမ္ဘာနံ [ဝေရမ္ဗာနံ (သီ။ ဣ။)] ဝသံ ဂတော။
၈။
တဿ ပုတ္တာ စ ဒါရာ စ၊ ယေ စညေ အနုဇီဝိနော။
သဗ္ဗေ ဗျသနမာပါဒုံ၊ အနောဝါဒကရေ ဒိဇေ။
၉။
ဧဝမ္ပိ ဣဓ ဝုဍ္ဎာနံ၊ ယော ဝါက္ယံ နာဝဗုဇ္ဈတိ။
အတိသီမစရော ဒိတ္တော၊ ဂိဇ္ဈောဝါတီတသာသနော။
သ ဝေ ဗျသနံ ပပ္ပောတိ၊ အကတွာ ဝုဍ္ဎသာသနန္တိ။
ဂိဇ္ဈဇာတကံ ပဌမံ။
၄၂၈။ ကောသမ္ဗိယဇာတကံ (၂)
၁၀။
ပုထုသဒ္ဒေါ သမဇနော၊ န ဗာလော ကောစိ မညထ။
သံဃသ္မိံ ဘိဇ္ဇမာနသ္မိံ၊ နာညံ ဘိယျော အမညရုံ။
၁၁။
ပရိမုဋ္ဌာ ပဏ္ဍိတာဘာသာ၊ ဝါစာဂေါစရဘာဏိနော။
ယာဝိစ္ဆန္တိ မုခါယာမံ၊ ယေန နီတာ န တံ ဝိဒူ။
၁၂။
အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။
ယေ စ တံ ဥပနယှန္တိ၊ ဝေရံ တေသံ န သမ္မတိ။
၁၃။
အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။
ယေ စ တံ နုပနယှန္တိ၊ ဝေရံ တေသူပသမ္မတိ။
၁၄။
န ဟိ ဝေရေန ဝေရာနိ၊ သမ္မန္တီဓ ကုဒါစနံ။
အဝေရေန စ သမ္မန္တိ၊ ဧသ ဓမ္မော သနန္တနော။
၁၅။
ပရေ စ န ဝိဇာနန္တိ၊ မယမေတ္ထ ယမာမသေ။
ယေ စ တတ္ထ ဝိဇာနန္တိ၊ တတော သမ္မန္တိ မေဓဂါ။
၁၆။
အဋ္ဌိစ္ဆိန္နာ ပါဏဟရာ၊ ဂဝဿ [ဂဝါဿ (သီ။ သျာ။ ဣ။)] ဓနဟာရိနော။
ရဋ္ဌံ ဝိလုမ္ပမာနာနံ၊ တေသမ္ပိ ဟောတိ သင်္ဂတိ။
ကသ္မာ တုမှာက နော သိယာ။
၁၇။
သစေ လဘေထ နိပကံ သဟာယံ၊ သဒ္ဓိံစရံ သာဓုဝိဟာရိဓီရံ။
အဘိဘုယျ သဗ္ဗာနိ ပရိဿယာနိ၊ စရေယျ တေနတ္တမနော သတီမာ။
၁၈။
နော စေ လဘေထ နိပကံ သဟာယံ၊ သဒ္ဓိံစရံ သာဓုဝိဟာရိဓီရံ။
ရာဇာဝ ရဋ္ဌံ ဝိဇိတံ ပဟာယ၊ ဧကော စရေ မာတင်္ဂရညေဝ နာဂေါ။
၁၉။
ဧကဿ စရိတံ သေယျော၊ နတ္ထိ ဗာလေ သဟာယတာ။
ဧကော စရေ န ပါပါနိ ကယိရာ၊ အပ္ပောဿုက္ကော မာတင်္ဂရညေဝ နာဂေါတိ။
ကောသမ္ဗိယဇာတကံ ဒုတိယံ။
၄၂၉။ မဟာသုဝဇာတကံ (၃)
၂၀။
ဒုမော ယဒါ ဟောတိ ဖလူပပန္နော၊ ဘုဉ္ဇန္တိ နံ ဝိဟင်္ဂမာ [ဝိဟဂါ (သီ။ ဣ။)] သမ္ပတန္တာ။
ခီဏန္တိ ဉတွာန ဒုမံ ဖလစ္စယေ [ဉတွာ ဒုမပ္ဖလစ္စယေန (က။)]၊ ဒိသောဒိသံ ယန္တိ တတော ဝိဟင်္ဂမာ။
၂၁။
စရ စာရိကံ လောဟိတတုဏ္ဍ မာမရိ၊ ကိံ တွံ သုဝ သုက္ခဒုမမှိ ဈာယသိ။
တဒိင်္ဃ မံ ဗြူဟိ ဝသန္တသန္နိဘ၊ ကသ္မာ သုဝ သုက္ခဒုမံ န ရိဉ္စသိ။
၂၂။
ယေ ဝေ သခီနံ သခါရော ဘဝန္တိ၊ ပါဏစ္စယေ [ပါဏံ စဇေ (က။)၊ ပါဏစ္စယေ မရဏကာလေ စ သုခဒုက္ခေသု စ န ဇဟန္တီတိ သမ္ဗန္ဓော] ဒုက္ခသုခေသု ဟံသ။
ခီဏံ အခီဏန္တိ န တံ ဇဟန္တိ၊ သန္တော သတံ ဓမ္မမနုဿရန္တာ။
၂၃။
သောဟံ သတံ အညတရောသ္မိ ဟံသ၊ ဉာတီ စ မေ ဟောတိ သခါ စ ရုက္ခော။
တံ နုဿဟေ ဇီဝိကတ္ထော ပဟာတုံ၊ ခီဏန္တိ ဉတွာန န ဟေသ ဓမ္မော [န သောသ (က။)၊ န ဧသ (သျာ။)]။
၂၄။
သာဓု သက္ခိ ကတံ ဟောတိ၊ မေတ္တိ သံသတိ သန္ထဝေါ [မိတ္တံ သင်္ဂတိ သန္ဓဝေါ (က။)]။
သစေတံ ဓမ္မံ ရောစေသိ၊ ပါသံသောသိ ဝိဇာနတံ။
၂၅။
သော တေ သုဝ ဝရံ ဒမ္မိ၊ ပတ္တယာန ဝိဟင်္ဂမ။
ဝရံ ဝရဿု ဝက္ကင်္ဂ၊ ယံ ကိဉ္စိ မနသိစ္ဆသိ။
၂၆။
ဝရဉ္စ မေ ဟံသ ဘဝံ ဒဒေယျ၊ အယဉ္စ ရုက္ခော ပုနရာယုံ လဘေထ။
သော သာခဝါ ဖလိမာ သံဝိရူဠ္ဟော၊ မဓုတ္ထိကော တိဋ္ဌတု သောဘမာနော။
၂၇။
တံ ပဿ သမ္မ ဖလိမံ ဥဠာရံ၊ သဟာဝ တေ ဟောတု ဥဒုမ္ဗရေန။
သော သာခဝါ ဖလိမာ သံဝိရူဠ္ဟော၊ မဓုတ္ထိကော တိဋ္ဌတု သောဘမာနော။
၂၈။
ဧဝံ သက္က သုခီ ဟောဟိ၊ သဟ သဗ္ဗေဟိ ဉာတိဘိ။
ယထာဟမဇ္ဇ သုခိတော၊ ဒိသွာန သဖလံ ဒုမံ။
၂၉။
သုဝဿ စ ဝရံ ဒတွာ၊ ကတွာန သဖလံ ဒုမံ။
ပက္ကာမိ သဟ ဘရိယာယ၊ ဒေဝါနံ နန္ဒနံ ဝနန္တိ။
မဟာသုဝဇာတကံ တတိယံ။
၄၃၀။ စူဠသုဝဇာတကံ (၄)
၃၀။
သန္တိ ရုက္ခာ ဟရိပတ္တာ [ဟရိတပတ္တာ (သီ။ သျာ။ ဣ။)]၊ ဒုမာ နေကဖလာ ဗဟူ။
ကသ္မာ နု သုက္ခေ [သုက္ခ (က။)] ကောဠာပေ၊ သုဝဿ နိရတော မနော။
၃၁။
ဖလဿ ဥပဘုဉ္ဇိမှာ၊ နေကဝဿဂဏေ ဗဟူ။
အဖလမ္ပိ ဝိဒိတွာန၊ သာဝ မေတ္တိ ယထာ ပုရေ။
၃၂။
သုခဉ္စ ရုက္ခံ ကောဠာပံ၊ ဩပတ္တမဖလံ ဒုမံ။
ဩဟာယ သကုဏာ ယန္တိ၊ ကိံ ဒေါသံ ပဿသေ ဒိဇ။
၃၃။
ယေ ဖလတ္ထာ သမ္ဘဇန္တိ၊ အဖလောတိ ဇဟန္တိ နံ။
အတ္တတ္ထပညာ ဒုမ္မေဓါ၊ တေ ဟောန္တိ ပက္ခပါတိနော။
၃၄။
သာဓု သက္ခိ ကတံ ဟောတိ၊ မေတ္တိ သံသတိ သန္ထဝေါ။
သစေတံ ဓမ္မံ ရောစေသိ၊ ပါသံသောသိ ဝိဇာနတံ။
၃၅။
သော တေ သုဝ ဝရံ ဒမ္မိ၊ ပတ္တယာန ဝိဟင်္ဂမ။
ဝရံ ဝရဿု ဝက္ကင်္ဂ၊ ယံ ကိဉ္စိ မနသိစ္ဆသိ။
၃၆။
အပိ နာမ နံ ပဿေယျံ [အပိ နာမ နံ ပုန ပဿေ (သီ။ သျာ။)]၊ သပတ္တံ သဖလံ ဒုမံ။
ဒလိဒ္ဒေါဝ နိဓိ လဒ္ဓါ၊ နန္ဒေယျာဟံ ပုနပ္ပုနံ။
၃၇။
တတော အမတမာဒါယ၊ အဘိသိဉ္စိ မဟီရုဟံ။
တဿ သာခါ ဝိရူဟိံသု [ဝိရူဠှဿ (က။)]၊ သီတစ္ဆာယာ မနောရမာ။
၃၈။
ဧဝံ သက္က သုခီ ဟောဟိ၊ သဟ သဗ္ဗေဟိ ဉာတိဘိ။
ယထာဟမဇ္ဇ သုခိတော၊ ဒိသွာန သဖလံ ဒုမံ။
၃၉။
သုဝဿ စ ဝရံ ဒတွာ၊ ကတွာန သဖလံ ဒုမံ။
ပက္ကာမိ သဟ ဘရိယာယ၊ ဒေဝါနံ နန္ဒနံ ဝနန္တိ။
စူဠသုဝဇာတကံ စတုတ္ထံ။
၄၃၁။ ဟရိတစဇာတကံ (၅)
၄၀။
သုတံ မေတံ မဟာဗြဟ္မေ၊ ကာမေ ဘုဉ္ဇတိ ဟာရိတော။
ကစ္စေတံ ဝစနံ တုစ္ဆံ, ကစ္စိ သုဒ္ဓေါ ဣရိယျသိ။
၄၁။
ဧဝမေတံ မဟာရာဇ၊ ယထာ တေ ဝစနံ သုတံ။
ကုမ္မဂ္ဂံ ပဋိပန္နောသ္မိ၊ မောဟနေယျေသု မုစ္ဆိတော။
၄၂။
အဒု [အာဒု (သီ။ ဣ။)] ပညာ ကိမတ္ထိယာ၊ နိပုဏာ သာဓုစိန္တိနီ [စိန္တနီ (သီ။ ဣ။)]။
ယာယ ဥပ္ပတိတံ ရာဂံ၊ ကိံ မနော န ဝိနောဒယေ။
၄၃။
စတ္တာရောမေ မဟာရာဇ၊ လောကေ အတိဗလာ ဘုသာ။
ရာဂေါ ဒေါသော မဒေါ မောဟော၊ ယတ္ထ ပညာ န ဂါဓတိ။
၄၄။
အရဟာ သီလသမ္ပန္နော၊ သုဒ္ဓေါ စရတိ ဟာရိတော။
မေဓါဝီ ပဏ္ဍိတော စေဝ၊ ဣတိ နော သမ္မတော ဘဝံ။
၄၅။
မေဓါဝီနမ္ပိ ဟိံသန္တိ၊ ဣသိံ ဓမ္မဂုဏေ ရတံ။
ဝိတက္ကာ ပါပကာ ရာဇ၊ သုဘာ ရာဂူပသံဟိတာ။
၄၆။
ဥပ္ပန္နာယံ သရီရဇော၊ ရာဂေါ ဝဏ္ဏဝိဒူသနော တဝ။
တံ ပဇဟ ဘဒ္ဒမတ္ထု တေ၊ ဗဟုန္နာသိ မေဓါဝိသမ္မတော။
၄၇။
တေ အန္ဓကာရကေ [ကရဏေ (သီ။ သျာ။ ဣ။)] ကာမေ၊ ဗဟုဒုက္ခေ မဟာဝိသေ။
တေသံ မူလံ ဂဝေသိဿံ၊ ဆေစ္ဆံ ရာဂံ သဗန္ဓနံ။
၄၈။
ဣဒံ ဝတွာန ဟာရိတော၊ ဣသိ သစ္စပရက္ကမော။
ကာမရာဂံ ဝိရာဇေတွာ၊ ဗြဟ္မလောကူပဂေါ အဟူတိ။
ဟရိတစဇာတကံ [ဟာရိတဇာတကံ (သီ။ ဣ။)] ပဉ္စမံ။
၄၃၂။ ပဒကုသလမာဏဝဇာတကံ (၆)
၄၉။
ဗဟုဿုတံ စိတ္တကထိံ [စိတ္တကထံ (သျာ။ က။)]၊ ဂင်္ဂါ ဝဟတိ ပါဋလိံ [ပါဋလံ (သီ။ ဣ။)]။
ဝုယှမာနက ဘဒ္ဒန္တေ၊ ဧကံ မေ ဒေဟိ ဂါထကံ [ဂီတကံ (က။ အဋ္ဌ။)]။
၅၀။
ယေန သိဉ္စန္တိ ဒုက္ခိတံ၊ ယေန သိဉ္စန္တိ အာတုရံ။
တဿ မဇ္ဈေ မရိဿာမိ၊ ဇာတံ သရဏတော ဘယံ။
၅၁။
ယတ္ထ ဗီဇာနိ ရူဟန္တိ၊ သတ္တာ ယတ္ထ ပတိဋ္ဌိတာ။
သာ မေ သီသံ နိဣဠေတိ၊ ဇာတံ သရဏတော ဘယံ။
၅၂။
ယေန ဘတ္တာနိ ပစ္စန္တိ၊ သီတံ ယေန ဝိဟညတိ။
သော မံ ဍဟတိ [ဒယှတိ (က။)] ဂတ္တာနိ၊ ဇာတံ သရဏတော ဘယံ။
၅၃။
ယေန ဘုတ္တေန [ဘတ္တေန (သျာ။ က။)] ယာပေန္တိ၊ ပုထူ ဗြာဟ္မဏခတ္တိယာ။
သော မံ ဘုတ္တော ဗျာပါဒေတိ၊ ဇာတံ သရဏတော ဘယံ။
၅၄။
ဂိမှာနံ ပစ္ဆိမေ မာသေ၊ ဝါတမိစ္ဆန္တိ ပဏ္ဍိတာ။
သော မံ [သော မေ (သီ။ ဣ။)] ဘဉ္ဇတိ ဂတ္တာနိ၊ ဇာတံ သရဏတော ဘယံ။
၅၅။
ယံ နိဿိတာ ဇဂတိရုဟံ၊ သွာယံ အဂ္ဂိံ ပမုဉ္စတိ။
ဒိသာ ဘဇထ ဝက္ကင်္ဂါ၊ ဇာတံ သရဏတော ဘယံ။
၅၆။
ယမာနယိံ သောမနဿံ၊ မာလိနိံ စန္ဒနုဿဒံ။
သာ မံ ဃရာ နိစ္ဆုဘတိ [နီဟရတိ (သီ။ သျာ။)]၊ ဇာတံ သရဏတော ဘယံ။
၅၇။
ယေန ဇာတေန နန္ဒိဿံ၊ ယဿ စ ဘဝမိစ္ဆိသံ။
သော မံ ဃရာ နိစ္ဆုဘတိ [နီဟရတိ (သီ။ သျာ။)]၊ ဇာတံ သရဏတော ဘယံ။
၅၈။
သုဏန္တု မေ ဇာနပဒါ၊ နေဂမာ စ သမာဂတာ။
ယတောဒကံ တဒါဒိတ္တံ၊ ယတော ခေမံ တတော ဘယံ။
၅၉။
ရာဇာ ဝိလုမ္ပတေ ရဋ္ဌံ၊ ဗြာဟ္မဏော စ ပုရောဟိတော။
အတ္တဂုတ္တာ ဝိဟရထ၊ ဇာတံ သရဏတော ဘယန္တိ။
ပဒကုသလမာဏဝဇာတကံ ဆဋ္ဌံ။
၄၃၃။ လောမသကဿပဇာတကံ (၇)
၆၀။
အဿ ဣန္ဒသမော ရာဇ၊ အစ္စန္တံ အဇရာမရော။
သစေ တွံ ယညံ ယာဇေယျ၊ ဣသိံ လောမသကဿပံ။
၆၁။
သသမုဒ္ဒပရိယာယံ၊ မဟိံ သာဂရကုဏ္ဍလံ။
န ဣစ္ဆေ သဟ နိန္ဒာယ၊ ဧဝံ သေယျ [သယှ (သီ။ သျာ။ ဣ။)] ဝိဇာနဟိ။
၆၂။
ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ။
ယာ ဝုတ္တိ ဝိနိပါတေန၊ အဓမ္မစရဏေန ဝါ။
၆၃။
အပိ စေ ပတ္တမာဒါယ၊ အနဂါရော ပရိဗ္ဗဇေ။
သာယေဝ ဇီဝိကာ သေယျော၊ ယာ စာဓမ္မေန ဧသနာ။
၆၄။
အပိ စေ ပတ္တမာဒါယ၊ အနဂါရော ပရိဗ္ဗဇေ။
အညံ အဟိံသယံ လောကေ၊ အပိ ရဇ္ဇေန တံ ဝရံ။
၆၅။
ဗလံ စန္ဒော ဗလံ သုရိယော၊ ဗလံ သမဏဗြာဟ္မဏာ။
ဗလံ ဝေလာ သမုဒ္ဒဿ၊ ဗလာတိဗလမိတ္ထိယော။
၆၆။
ယထာ ဥဂ္ဂတပံ သန္တံ၊ ဣသိံ လောမသကဿပံ။
ပိတု အတ္ထာ စန္ဒဝတီ၊ ဝါဇပေယျံ [ဝါစပေယျံ (ဣ။ က။)] အယာဇယိ။
၆၇။
တံ လောဘပကတံ ကမ္မံ၊ ကဋုကံ ကာမဟေတုကံ။
တဿ မူလံ ဂဝေသိဿံ၊ ဆေစ္ဆံ ရာဂံ သဗန္ဓနံ။
၆၈။
ဓိရတ္ထု ကာမေ သုဗဟူပိ လောကေ၊ တပေါဝ သေယျော ကာမဂုဏေဟိ ရာဇ။
တပေါ ကရိဿာမိ ပဟာယ ကာမေ၊ တဝေဝ ရဋ္ဌံ စန္ဒဝတီ စ ဟောတူတိ။
လောမသကဿပဇာတကံ သတ္တမံ။
၄၃၄။ စက္ကဝါကဇာတကံ (၈)
၆၉။
ကာသာယဝတ္ထေ သကုဏေ ဝဒါမိ၊ ဒုဝေ ဒုဝေ နန္ဒမနေ [နန္ဒိမနေ (သီ။ ဣ။)] စရန္တေ။
ကံ အဏ္ဍဇံ အဏ္ဍဇာ မာနုသေသု၊ ဇာတိံ ပသံသန္တိ တဒိင်္ဃ ဗြူထ။
၇၀။
အမှေ မနုဿေသု မနုဿဟိံသ၊ အနုဗ္ဗတေ [အနုပုဗ္ဗကေ (က။)] စက္ကဝါကေ ဝဒန္တိ။
ကလျာဏဘာဝမှေ [ဘာဝ’မှ (သီ။ ဣ။)] ဒိဇေသု သမ္မတာ၊ အဘိရူပါ [အဘီတရူပါ (သီ။ သျာ။ ဣ။)] ဝိစရာမ အဏ္ဏဝေ။ ( ) [(န ဃာသဟေတူပိ ကရောမ ပါပံ) (က။)]
၇၁။
ကိံ အဏ္ဏဝေ ကာနိ ဖလာနိ ဘုဉ္ဇေ၊ မံသံ ကုတော ခါဒထ စက္ကဝါကာ။
ကိံ ဘောဇနံ ဘုဉ္ဇထ ဝေါ အနောမာ [အဘိဏှံ (က။)]၊ ဗလဉ္စ ဝဏ္ဏော စ အနပ္ပရူပါ [အနပ္ပရူပေါ (သီ။ သျာ။ ဣ။)]။
၇၂။
န အဏ္ဏဝေ သန္တိ ဖလာနိ ဓင်္က၊ မံသံ ကုတော ခါဒိတုံ စက္ကဝါကေ။
သေဝါလဘက္ခမှ [ဘက္ခိမှ (က။)] အပါဏဘောဇနာ [အဝါကဘောဇနာ (သီ။ ဣ။)]၊ န ဃာသဟေတူပိ ကရောမ ပါပံ။
၇၃။
န မေ ဣဒံ ရုစ္စတိ စက္ကဝါက၊ အသ္မိံ ဘဝေ ဘောဇနသန္နိကာသော။
အဟောသိ ပုဗ္ဗေ တတော မေ အညထာ၊ ဣစ္စေဝ မေ ဝိမတိ ဧတ္ထ ဇာတာ။
၇၄။
အဟမ္ပိ မံသာနိ ဖလာနိ ဘုဉ္ဇေ၊ အန္နာနိ စ လောဏိယတေလိယာနိ။
ရသံ မနုဿေသု လဘာမိ ဘောတ္တုံ၊ သူရောဝ သင်္ဂါမမုခံ ဝိဇေတွာ။
န စ မေ တာဒိသော ဝဏ္ဏော၊ စက္ကဝါက ယထာ တဝ။
၇၅။
အသုဒ္ဓဘက္ခောသိ ခဏာနုပါတီ၊ ကိစ္ဆေန တေ လဗ္ဘတိ အန္နပါနံ။
န တုဿသီ ရုက္ခဖလေဟိ ဓင်္က၊ မံသာနိ ဝါ ယာနိ သုသာနမဇ္ဈေ။
၇၆။
ယော သာဟသေန အဓိဂမ္မ ဘောဂေ၊ ပရိဘုဉ္ဇတိ ဓင်္က ခဏာနုပါတီ။
တတော ဥပက္ကောသတိ နံ သဘာဝေါ၊ ဥပက္ကုဋ္ဌော ဝဏ္ဏဗလံ ဇဟာတိ။
၇၇။
အပ္ပမ္ပိ စေ နိဗ္ဗုတိံ ဘုဉ္ဇတီ ယဒိ၊ အသာဟသေန အပရူပဃာတီ [အသာဟသေနာနုပဃာတိနော (က။)]။
ဗလဉ္စ ဝဏ္ဏော စ တဒဿ ဟောတိ၊ န ဟိ သဗ္ဗော အာဟာရမယေန ဝဏ္ဏောတိ။
စက္ကဝါကဇာတကံ အဋ္ဌမံ။
၄၃၅။ ဟလိဒ္ဒိရာဂဇာတကံ (၉)
၇၈။
သုတိတိက္ခံ အရညမှိ၊ ပန္တမှိ သယနာသနေ။
ယေ စ ဂါမေ တိတိက္ခန္တိ၊ တေ ဥဠာရတရာ တယာ။
၇၉။
အရညာ ဂါမမာဂမ္မ၊ ကိံသီလံ ကိံဝတံ အဟံ။
ပုရိသံ တာတ သေဝေယျံ၊ တံ မေ အက္ခာဟိ ပုစ္ဆိတော။
၈၀။
ယော တေ [ယော တံ (သျာ။ ဇာ။ ၁။၄။၁၉၀ အရညဇာတကေပိ)] ဝိဿာသယေ တာတ၊ ဝိဿာသဉ္စ ခမေယျ တေ။
သုဿူသီ စ တိတိက္ခီ စ၊ တံ ဘဇေဟိ ဣတော ဂတော။
၈၁။
ယဿ ကာယေန ဝါစာယ၊ မနသာ နတ္ထိ ဒုက္ကဋံ။
ဥရသီဝ ပတိဋ္ဌာယ၊ တံ ဘဇေဟိ ဣတော ဂတော။
၈၂။
ယော စ ဓမ္မေန စရတိ၊ စရန္တောပိ န မညတိ။
ဝိသုဒ္ဓကာရိံ သပ္ပညံ၊ တံ ဘဇေဟိ ဣတော ဂတော။
၈၃။
ဟလိဒ္ဒိရာဂံ ကပိစိတ္တံ၊ ပုရိသံ ရာဂဝိရာဂိနံ။
တာဒိသံ တာတ မာ သေဝိ၊ နိမ္မနုဿမ္ပိ စေ သိယာ။
၈၄။
အာသီဝိသံဝ ကုပိတံ၊ မီဠှလိတ္တံ မဟာပထံ။
အာရကာ ပရိဝဇ္ဇေဟိ၊ ယာနီဝ ဝိသမံ ပထံ။
၈၅။
အနတ္ထာ တာတ ဝဍ္ဎန္တိ၊ ဗာလံ အစ္စုပသေဝတော။
မာဿု ဗာလေန သံဂစ္ဆိ၊ အမိတ္တေနေဝ သဗ္ဗဒါ။
၈၆။
တံ တာဟံ တာတ ယာစာမိ၊ ကရဿု ဝစနံ မမ။
မာဿု ဗာလေန သံဂစ္ဆိ [သံဂဉ္ဆိ (သီ။ ဣ။)]၊ ဒုက္ခော ဗာလေဟိ သင်္ဂမောတိ။
ဟလိဒ္ဒိရာဂဇာတကံ နဝမံ။
၄၃၆။ သမုဂ္ဂဇာတကံ (၁၀)
၈၇။
ကုတော နု အာဂစ္ဆထ ဘော တယော ဇနာ၊ သွာဂတာ ဧထ [သွာဂတံ ဧတ္ထ (သီ။ ဣ။)] နိသီဒထာသနေ။
ကစ္စိတ္ထ ဘောန္တော ကုသလံ အနာမယံ၊ စိရဿမဗ္ဘာဂမနံ ဟိ ဝေါ ဣဓ။
၈၈။
အဟမေဝ ဧကော ဣဓ မဇ္ဇ ပတ္တော၊ န စာပိ မေ ဒုတိယော ကောစိ ဝိဇ္ဇတိ။
ကိမေဝ သန္ဓာယ တေ ဘာသိတံ ဣသေ၊ ‘‘ကုတော နု အာဂစ္ဆထ ဘော တယော ဇနာ’’။
၈၉။
တုဝဉ္စ ဧကော ဘရိယာ စ တေ ပိယာ၊ သမုဂ္ဂပက္ခိတ္တနိကိဏ္ဏမန္တရေ ။
သာ ရက္ခိတာ ကုစ္ဆိဂတာဝ [ကုစ္ဆိဂတာ စ (က။)] တေ သဒါ၊ ဝါယုဿ [ဟရိဿ (က။)] ပုတ္တေန သဟာ တဟိံ ရတာ။
၉၀။
သံဝိဂ္ဂရူပေါ ဣသိနာ ဝိယာကတော [ပဗျာကတော (က။)၊ ဗျာကတော (သျာ။ ဣ။)]၊ သော ဒါနဝေါ တတ္ထ သမုဂ္ဂမုဂ္ဂိလိ။
အဒ္ဒက္ခိ ဘရိယံ သုစိ မာလဓါရိနိံ၊ ဝါယုဿ ပုတ္တေန သဟာ တဟိံ ရတံ။
၉၁။
သုဒိဋ္ဌရူပမုဂ္ဂတပါနုဝတ္တိနာ [သုဒိဋ္ဌရူပုဂ္ဂတပါနုဝတ္တိနာ (သီ။ သျာ။ ဣ။)]၊ ဟီနာ နရာ ယေ ပမဒါဝသံ ဂတာ။
ယထာ ဟဝေ ပါဏရိဝေတ္ထ ရက္ခိတာ၊ ဒုဋ္ဌာ မယီ အညမဘိပ္ပမောဒယိ။
၉၂။
ဒိဝါ စ ရတ္တော စ မယာ ဥပဋ္ဌိတာ၊ တပဿိနာ ဇောတိရိဝါ ဝနေ ဝသံ။
သာ ဓမ္မမုက္ကမ္မ အဓမ္မမာစရိ၊ အကိရိယရူပေါ ပမဒါဟိ သန္ထဝေါ။
၉၃။
သရီရမဇ္ဈမှိ ဌိတာတိမညဟံ၊ မယှံ အယန္တိ အသတိံ အသညတံ။
သာ ဓမ္မမုက္ကမ္မ အဓမ္မမာစရိ၊ အကိရိယရူပေါ ပမဒါဟိ သန္ထဝေါ။
၉၄။
သုရက္ခိတံ မေတိ ကထံ နု ဝိဿသေ၊ အနေကစိတ္တာသု န ဟတ္ထိ [အနေကစိတ္တာ ပုန ဟေတ္ထ (က။)] ရက္ခဏာ။
ဧတာ ဟိ ပါတာလပပါတသန္နိဘာ၊ ဧတ္ထပ္ပမတ္တော ဗျသနံ နိဂစ္ဆတိ။
၉၅။
တသ္မာ ဟိ တေ သုခိနော ဝီတသောကာ၊ ယေ မာတုဂါမေဟိ စရန္တိ နိဿဋာ။
ဧတံ သိဝံ ဥတ္တမမာဘိပတ္ထယံ၊ န မာတုဂါမေဟိ ကရေယျ သန္ထဝန္တိ။
သမုဂ္ဂဇာတကံ ဒသမံ။
၄၃၇။ ပူတိမံသဇာတကံ (၁၁)
၉၆။
န ခေါ မေ ရုစ္စတိ အာဠိ၊ ပူတိမံသဿ ပေက္ခနာ။
ဧတာဒိသာ သခါရသ္မာ၊ အာရကာ ပရိဝဇ္ဇယေ။
၉၇။
ဥမ္မတ္တိကာ အယံ ဝေဏီ၊ ဝဏ္ဏေတိ ပတိနော သခိံ။
ပဇ္ဈာယိ [ပဇ္ဈာတိ (သီ။ ဣ။)၊ ပဇ္ဈာယတိ (သီ။ နိယျ)] ပဋိဂစ္ဆန္တိံ၊ အာဂတံ မေဏ္ဍ [မေဠ (သီ။ ဣ။)] မာတရံ။
၉၈။
တွံ ခေါသိ သမ္မ ဥမ္မတ္တော၊ ဒုမ္မေဓေါ အဝိစက္ခဏော။
ယော တွံ [သော တွံ (သျာ။)] မတာလယံ ကတွာ၊ အကာလေန ဝိပေက္ခသိ။
၉၉။
န အကာလေ ဝိပေက္ခေယျ၊ ကာလေ ပေက္ခေယျ ပဏ္ဍိတော။
ပူတိမံသောဝ ပဇ္ဈာယိ [ပဇ္ဈာတိ (သီ။ ဣ။)၊ ပဇ္ဈာယတိ (သီ။ နိယျ)]၊ ယော အကာလေ ဝိပေက္ခတိ။
၁၀၀။
ပိယံ ခေါ အာဠိ မေ ဟောတု၊ ပုဏ္ဏပတ္တံ ဒဒါဟိ မေ။
ပတိ သဉ္ဇီဝိတော မယှံ၊ ဧယျာသိ ပိယပုစ္ဆိကာ [ပုစ္ဆိတာ (သျာ။ က။)]။
၁၀၁။
ပိယံ ခေါ အာဠိ တေ ဟောတု၊ ပုဏ္ဏပတ္တံ ဒဒါမိ တေ။
မဟတာ ပရိဝါရေန [ပရိဟာရေန (သျာ။)]၊ ဧဿံ [ဧသံ (သီ။ ဣ။)] ကယိရာဟိ [ကယိရာသိ (ဣ။)] ဘောဇနံ။
၁၀၂။
ကီဒိသော တုယှံ ပရိဝါရော၊ ယေသံ ကာဟာမိ ဘောဇနံ။
ကိံနာမကာ စ တေ သဗ္ဗေ၊ တံ [တေ (သီ။ သျာ။ ဣ။)] မေ အက္ခာဟိ ပုစ္ဆိတာ။
၁၀၃။
မာလိယော စတုရက္ခော စ၊ ပိင်္ဂိယော အထ ဇမ္ဗုကော။
ဧဒိသော မယှံ ပရိဝါရော၊ တေသံ ကယိရာဟိ [ကယိရာသိ (ဣ။)] ဘောဇနံ။
၁၀၄။
နိက္ခန္တာယ အဂါရသ္မာ၊ ဘဏ္ဍကမ္ပိ ဝိနဿတိ။
အာရောဂ္ယံ အာဠိနော ဝဇ္ဇံ [ဝစ္ဆံ (?)]၊ ဣဓေဝ ဝသ မာဂမာတိ။
ပူတိမံသဇာတကံ ဧကာဒသမံ။
၄၃၈။ ဒဒ္ဒရဇာတကံ (၁၂)
၁၀၅။
ယော တေ ပုတ္တကေ အခါဒိ၊ ဒိန္နဘတ္တော အဒူသကေ။
တသ္မိံ ဒါဌံ နိပါတေဟိ၊ မာ တေ မုစ္စိတ္ထ ဇီဝတော။
၁၀၆။
အာကိဏ္ဏလုဒ္ဒေါ ပုရိသော၊ ဓါတိစေလံဝ မက္ခိတော။
ပဒေသံ တံ န ပဿာမိ၊ ယတ္ထ ဒါဌံ နိပါတယေ။
၁၀၇။
အကတညုဿ ပေါသဿ၊ နိစ္စံ ဝိဝရဒဿိနော။
သဗ္ဗံ စေ ပထဝိံ ဒဇ္ဇာ၊ နေဝ နံ အဘိရာဓယေ။
၁၀၈။
ကိန္နု သုဗာဟု တရမာနရူပေါ၊ ပစ္စာဂတောသိ သဟ မာဏဝေန။
ကိံ ကိစ္စမတ္ထံ ဣဓမတ္ထိ တုယှံ၊ အက္ခာဟိ မေ ပုစ္ဆိတော ဧတမတ္ထံ။
၁၀၉။
ယော တေ သခါ ဒဒ္ဒရော သာဓုရူပေါ၊ တဿ ဝဓံ ပရိသင်္ကာမိ အဇ္ဇ။
ပုရိသဿ ကမ္မာယတနာနိ သုတွာ၊ နာဟံ သုခိံ ဒဒ္ဒရံ အဇ္ဇ မညေ။
၁၁၀။
ကာနိဿ ကမ္မာယတနာနိ အဿု၊ ပုရိသဿ ဝုတ္တိသမောဓါနတာယ။
ကံ ဝါ ပဋိညံ ပုရိသဿ သုတွာ၊ ပရိသင်္ကသိ ဒဒ္ဒရံ မာဏဝေန။
၁၁၁။
စိဏ္ဏာ ကလိင်္ဂါ စရိတာ ဝဏိဇ္ဇာ၊ ဝေတ္တာစရော သင္ကုပထောပိ စိဏ္ဏော။
နဋေဟိ စိဏ္ဏံ သဟ ဝါကုရေဟိ [ဝါကရေဟိ (ဣ။ သီ။ နိယျ)၊ ဝါဂုရေဟိ (?)]၊ ဒဏ္ဍေန ယုဒ္ဓမ္ပိ သမဇ္ဇမဇ္ဈေ။
၁၁၂။
ဗဒ္ဓါ ကုလီကာ [ကုလိင်္ကာ (သီ။ ဣ။)] မိတမာဠှကေန၊ အက္ခာ ဇိတာ [အက္ခာစိတာ (သီ။ အဋ္ဌ။)] သံယမော အဗ္ဘတီတော။
အဗ္ဗာဟိတံ [အပ္ပဟိတံ (သီ။ သျာ။)၊ အဗ္ဗူဟိတံ (ဣ။ သီ။ နိယျ)] ပုဗ္ဗကံ [ပုပ္ဖကံ (သီ။ သျာ။)] အဍ္ဎရတ္တံ၊ ဟတ္ထာ ဒဍ္ဎာ ပိဏ္ဍပဋိဂ္ဂဟေန။
၁၁၃။
တာနိဿ ကမ္မာယတနာနိ အဿု၊ ပုရိသဿ ဝုတ္တိသမောဓါနတာယ။
ယထာ အယံ ဒိဿတိ လောမပိဏ္ဍော၊ ဂါဝေါ ဟတာ ကိံ ပန ဒဒ္ဒရဿာတိ။
ဒဒ္ဒရဇာတကံ ဒွါဒသမံ။
နဝကနိပါတံ နိဋ္ဌိတံ။
တဿုဒ္ဒါနံ –
ဝရဂိဇ္ဈ သမဇ္ဇန ဟံသဝရော၊ နိဓိသဝှယ ဟာရိတ ပါဋလိကော။
အဇရာမရ ဓင်္က တိတိက္ခ ကုတော၊ အထ ဒွါဒသ ပေက္ခန ဒဒ္ဒရိဘီတိ။