၈။ အဋ္ဌကနိပါတ
၄၁၇။ ကစ္စာနိဇာတက (၁)
၁။
ဩဒါတဝတ္ထာ သုစိ အလ္လကေသာ၊ ကစ္စာနိ ကိံ ကုမ္ဘိမဓိဿယိတွာ [ကုမ္ဘိမပဿယိတွာ (ဣ။)]။
ပိဋ္ဌာ တိလာ ဓေါဝသိ တဏ္ဍုလာနိ၊ တိလောဒနော ဟေဟိတိ ကိဿ ဟေတု။
၂။
န ခေါ အယံ ဗြာဟ္မဏ ဘောဇနတ္ထာ [ဘောဇနတ္ထံ (သျာ။)]၊ တိလောဒနော ဟေဟိတိ သာဓုပက္ကော။
ဓမ္မော မတော တဿ ပဟုတ္တမဇ္ဇ [ပဟူနမဇ္ဇ (သျာ။)၊ ပဟူတမဇ္ဇ (သီ။)၊ ဗဟူတမဇ္ဇာ (ဣ။)]၊ အဟံ ကရိဿာမိ သုသာနမဇ္ဈေ။
၃။
အနုဝိစ္စ ကစ္စာနိ ကရောဟိ ကိစ္စံ၊ ဓမ္မော မတော ကော နု တဝေဝ [တဝေတ (သီ။ သျာ။ ဣ။)] သံသိ။
သဟဿနေတ္တော အတုလာနုဘာဝေါ၊ န မိယျတီ ဓမ္မဝရော ကဒါစိ။
၄။
ဒဠှပ္ပမာဏံ မမ ဧတ္ထ ဗြဟ္မေ၊ ဓမ္မော မတော နတ္ထိ မမေတ္ထ ကင်္ခါ။
ယေ ယေဝ ဒါနိ ပါပါ ဘဝန္တိ၊ တေ တေဝ ဒါနိ သုခိတာ ဘဝန္တိ။
၅။
သုဏိသာ ဟိ မယှံ ဝဉ္ဈာ အဟောသိ၊ သာ မံ ဝဓိတွာန ဝိဇာယိ ပုတ္တံ။
သာ ဒါနိ သဗ္ဗဿ ကုလဿ ဣဿရာ၊ အဟံ ပနမှိ [ဝသာမိ (သျာ။)] အပဝိဒ္ဓါ ဧကိကာ။
၆။
ဇီဝါမိ ဝေါဟံ န မတောဟမသ္မိ [နာဟံ မတောသ္မိ (သီ။ ဣ။)]၊ တဝေဝ အတ္ထာယ ဣဓါဂတောသ္မိ။
ယာ တံ ဝဓိတွာန ဝိဇာယိ ပုတ္တံ၊ သဟာဝ ပုတ္တေန ကရောမိ ဘသ္မံ။
၇။
ဧဝဉ္စ [ဧတဉ္စ (သီ။ ဣ။)] တေ ရုစ္စတိ ဒေဝရာဇ၊ မမေဝ အတ္ထာယ ဣဓါဂတောသိ။
အဟဉ္စ ပုတ္တော သုဏိသာ စ နတ္တာ၊ သမ္မောဒမာနာ ဃရမာဝသေမ။
၈။
ဧဝဉ္စ တေ ရုစ္စတိ ကာတိယာနိ၊ ဟတာပိ သန္တာ န ဇဟာသိ ဓမ္မံ။
တုဝဉ္စ [တွဉ္စ (ဣ။ က။)] ပုတ္တော သုဏိသာ စ နတ္တာ၊ သမ္မောဒမာနာ ဃရမာဝသေထ။
၉။
သာ ကာတိယာနီ သုဏိသာယ သဒ္ဓိံ၊ သမ္မောဒမာနာ ဃရမာဝသိတ္ထ။
ပုတ္တော စ နတ္တာ စ ဥပဋ္ဌဟိံသု၊ ဒေဝါနမိန္ဒေန အဓိဂ္ဂဟီတာတိ။
ကစ္စာနိဇာတကံ ပဌမံ။
၄၁၈။ အဋ္ဌသဒ္ဒဇာတကံ (၂)
၁၀။
ဣဒံ ပုရေ နိန္နမာဟု၊ ဗဟုမစ္ဆံ မဟောဒကံ။
အာဝါသော ဗကရာဇဿ၊ ပေတ္တိကံ ဘဝနံ မမ။
တ္ယဇ္ဇ ဘေကေန [ဘိင်္ဂေန (က။)] ယာပေမ၊ ဩကံ န ဝဇဟာမသေ [ဩကန္တံ န ဇဟာမသေ (က။)]။
၁၁။
ကော ဒုတိယံ အသီလိဿ၊ ဗန္ဓရဿက္ခိ ဘေစ္ဆတိ [ဘေဇ္ဇတိ (သီ။ သျာ။ ဣ။)၊ ဘိန္ဒတိ (က။)]။
ကော မေ ပုတ္တေ ကုလာဝကံ၊ မဉ္စ သောတ္ထိံ ကရိဿတိ။
၁၂။
သဗ္ဗာ ပရိက္ခယာ ဖေဂ္ဂု၊ ယာဝ တဿာ ဂတီ အဟု။
ခီဏဘက္ခော မဟာရာဇ၊ သာရေ န ရမတီ ဃုဏော။
၁၃။
သာ နူနာဟံ ဣတော ဂန္တွာ၊ ရညော မုတ္တာ နိဝေသနာ။
အတ္တာနံ ရမယိဿာမိ၊ ဒုမသာခနိကေတိနီ။
၁၄။
သော နူနာဟံ ဣတော ဂန္တွာ၊ ရညော မုတ္တော နိဝေသနာ။
အဂ္ဂေါဒကာနိ ပိဿာမိ၊ ယူထဿ ပုရတော ဝဇံ။
၁၅။
တံ မံ ကာမေဟိ သမ္မတ္တံ၊ ရတ္တံ ကာမေသု မုစ္ဆိတံ။
အာနယီ ဘရတော [ဝနတော (က။)] လုဒ္ဒေါ၊ ဗာဟိကော ဘဒ္ဒမတ္ထု တေ။
၁၆။
အန္ဓကာရတိမိသာယံ၊ တုင်္ဂေ ဥပရိပဗ္ဗတေ။
သာ မံ သဏှေန မုဒုနာ၊ မာ ပါဒံ ခလိ [ခဏိ (သီ။ သျာ။ ဣ။)] ယသ္မနိ။
၁၇။
အသံသယံ ဇာတိခယန္တဒဿီ၊ န ဂဗ္ဘသေယျံ ပုနရာဝဇိဿံ။
အယမန္တိမာ ပစ္ဆိမာ ဂဗ္ဘသေယျာ [အယံ ဟိ မေ အန္တိမာ ဂဗ္ဘသေယျာ (သီ။ ဣ။)]၊ ခီဏော မေ သံသာရော ပုနဗ္ဘဝါယာတိ။
အဋ္ဌသဒ္ဒဇာတကံ ဒုတိယံ။
၄၁၉။ သုလသာဇာတကံ (၃)
၁၈။
ဣဒံ သုဝဏ္ဏကာယူရံ၊ မုတ္တာ ဝေဠုရိယာ ဗဟူ။
သဗ္ဗံ ဟရဿု ဘဒ္ဒန္တေ၊ မဉ္စ ဒါသီတိ သာဝယ။
၁၉။
ဩရောပယဿု ကလျာဏိ၊ မာ ဗာဠှံ [ဗဟုံ (သီ။ သျာ။ ဣ။)] ပရိဒေဝသိ။
န စာဟံ အဘိဇာနာမိ၊ အဟန္တွာ ဓနမာဘတံ။
၂၀။
ယတော သရာမိ အတ္တာနံ၊ ယတော ပတ္တာသ္မိ ဝိညုတံ။
န စာဟံ အဘိဇာနာမိ၊ အညံ ပိယတရံ တယာ။
၂၁။
ဧဟိ တံ ဥပဂူဟိဿံ [ဥပဂုယှိဿံ (က။)]၊ ကရိဿဉ္စ ပဒက္ခိဏံ။
န ဟိ ဒါနိ ပုန အတ္ထိ၊ မမ တုယှဉ္စ သင်္ဂမော။
၂၂။
န ဟိ သဗ္ဗေသု ဌာနေသု၊ ပုရိသော ဟောတိ ပဏ္ဍိတော။
ဣတ္ထီပိ ပဏ္ဍိတာ ဟောတိ၊ တတ္ထ တတ္ထ ဝိစက္ခဏာ။
၂၃။
န ဟိ သဗ္ဗေသု ဌာနေသု၊ ပုရိသော ဟောတိ ပဏ္ဍိတော။
ဣတ္ထီပိ ပဏ္ဍိတာ ဟောတိ၊ လဟုံ အတ္ထံ ဝိစိန္တိကာ [လဟုမတ္ထဝိစိန္တိကာ (သီ။ ဣ။)]။
၂၄။
လဟုဉ္စ ဝတ ခိပ္ပဉ္စ၊ နိကဋ္ဌေ သမစေတယိ။
မိဂံ ပုဏ္ဏာယတေနေဝ [ပုဏ္ဏာယတနေဝ (သျာ။)]၊ သုလသာ သတ္တုကံ ဝဓိ။
၂၅။
ယောဓ ဥပ္ပတိတံ အတ္ထံ၊ န ခိပ္ပမနုဗုဇ္ဈတိ။
သော ဟညတိ မန္ဒမတိ၊ စောရောဝ ဂိရိဂဗ္ဘရေ။
၂၆။
ယော စ ဥပ္ပတိတံ အတ္ထံ၊ ခိပ္ပမေဝ နိဗောဓတိ။
မုစ္စတေ သတ္တုသမ္ဗာဓါ၊ သုလသာ သတ္တုကာမိဝါတိ။
သုလသာဇာတကံ တတိယံ။
၄၂၀။ သုမင်္ဂလဇာတကံ (၄)
၂၇။
ဘုသမှိ [ဘုသမ္ပိ (က။)၊ ဘုသံ ဟိ (သီ။ နိယျ)] ကုဒ္ဓေါတိ အဝေက္ခိယာန၊ န တာဝ ဒဏ္ဍံ ပဏယေယျ ဣဿရော။
အဋ္ဌာနသော အပ္ပတိရူပမတ္တနော၊ ပရဿ ဒုက္ခာနိ ဘုသံ ဥဒီရယေ။
၂၈။
ယတော စ ဇာနေယျ ပသာဒမတ္တနော၊ အတ္ထံ နိယုဉ္ဇေယျ ပရဿ ဒုက္ကဋံ။
တဒါယမတ္ထောတိ သယံ အဝေက္ခိယ၊ အထဿ ဒဏ္ဍံ သဒိသံ နိဝေသယေ။
၂၉။
န စာပိ ဈာပေတိ ပရံ န အတ္တနံ၊ အမုစ္ဆိတော ယော နယတေ နယာနယံ။
ယော ဒဏ္ဍဓါရော ဘဝတီဓ ဣဿရော၊ သ ဝဏ္ဏဂုတ္တော သိရိယာ န ဓံသတိ။
၃၀။
ယေ ခတ္တိယာ သေ အနိသမ္မကာရိနော၊ ပဏေန္တိ ဒဏ္ဍံ သဟသာ ပမုစ္ဆိတာ။
အဝဏ္ဏသံယုတာ [ယုတ္တာဝ (က။)] ဇဟန္တိ ဇီဝိတံ၊ ဣတော ဝိမုတ္တာပိ စ ယန္တိ ဒုဂ္ဂတိံ။
၃၁။
ဓမ္မေ စ ယေ အရိယပ္ပဝေဒိတေ ရတာ၊ အနုတ္တရာ တေ ဝစသာ မနသာ ကမ္မုနာ စ။
တေ သန္တိသောရစ္စသမာဓိသဏ္ဌိတာ၊ ဝဇန္တိ လောကံ ဒုဘယံ တထာဝိဓါ။
၃၂။
ရာဇာဟမသ္မိ နရပမဒါနမိဿရော၊ သစေပိ ကုဇ္ဈာမိ ဌပေမိ အတ္တနံ။
နိသေဓယန္တော ဇနတံ တထာဝိဓံ၊ ပဏေမိ ဒဏ္ဍံ အနုကမ္ပ ယောနိသော။
၃၃။
သိရီ စ လက္ခီ စ တဝေဝ ခတ္တိယ၊ ဇနာဓိပ မာ ဝိဇဟိ ကုဒါစနံ။
အက္ကောဓနော နိစ္စပသန္နစိတ္တော၊ အနီဃော တုဝံ ဝဿသတာနိ ပါလယ။
၃၄။
ဂုဏေဟိ ဧတေဟိ ဥပေတ ခတ္တိယ၊ ဌိတမရိယဝတ္တီ [ဝတ္တိ (သီ။)၊ ဝုတ္တိ (က။)] သုဝစော အကောဓနော။
သုခီ အနုပ္ပီဠ ပသာသမေဒိနိံ [အနုပ္ပီဠံ သဟသမေဒနိံ (က။)]၊ ဣတော ဝိမုတ္တောပိ စ ယာဟိ သုဂ္ဂတိံ။
၃၅။
ဧဝံ သုနီတေန [သုဝိနီတေန (ဣ။)] သုဘာသိတေန၊ ဓမ္မေန ဉာယေန ဥပါယသော နယံ။
နိဗ္ဗာပယေ သင္ခုဘိတံ မဟာဇနံ၊ မဟာဝ မေဃော သလိလေန မေဒိနိန္တိ [မေဒနိန္တိ (သျာ။ က။)]။
သုမင်္ဂလဇာတကံ စတုတ္ထံ။
၄၂၁။ ဂင်္ဂမာလဇာတကံ (၅)
၃၆။
အင်္ဂါရဇာတာ ပထဝီ၊ ကုက္ကုဠာနုဂတာ မဟီ။
အထ ဂါယသိ ဝတ္တာနိ [ဝတ္ထာနိ (က။)]၊ န တံ တပတိ အာတပေါ။
၃၇။
ဥဒ္ဓံ တပတိ အာဒိစ္စော၊ အဓေါ တပတိ ဝါလုကာ။
အထ ဂါယသိ ဝတ္တာနိ [ဝတ္ထာနိ (က။)]၊ န တံ တပတိ အာတပေါ။
၃၈။
န မံ တပတိ အာတပေါ၊ အာတပါ [အာတပ္ပါ (သီ။ သျာ။ ဣ။)] တပယန္တိ မံ။
အတ္ထာ ဟိ ဝိဝိဓါ ရာဇ၊ တေ တပန္တိ န အာတပေါ။
၃၉။
အဒ္ဒသံ ကာမ တေ မူလံ၊ သင်္ကပ္ပါ ကာမ ဇာယသိ။
န တံ သင်္ကပ္ပယိဿာမိ၊ ဧဝံ ကာမ န ဟေဟိသိ။
၄၀။
အပ္ပါပိ ကာမာ န အလံ၊ ဗဟူဟိပိ န တပ္ပတိ။
အဟဟာ ဗာလလပနာ၊ ပရိဝဇ္ဇေထ [ပဋိဝိဇ္ဈေထ (ဣ။ သီ။ အဋ္ဌ။)] ဇဂ္ဂတော။
၄၁။
အပ္ပဿ ကမ္မဿ ဖလံ မမေဒံ၊ ဥဒယော အဇ္ဈာဂမာ မဟတ္တပတ္တံ။
သုလဒ္ဓလာဘော ဝတ မာဏဝဿ၊ ယော ပဗ္ဗဇီ ကာမရာဂံ ပဟာယ။
၄၂။
တပသာ ပဇဟန္တိ ပါပကမ္မံ၊ တပသာ နှာပိတကုမ္ဘကာရဘာဝံ။
တပသာ အဘိဘုယျ ဂင်္ဂမာလ၊ နာမေနာလပသဇ္ဇ ဗြဟ္မဒတ္တံ။
၄၃။
သန္ဒိဋ္ဌိကမေဝ ‘‘အမ္မ’’ ပဿထ၊ ခန္တီသောရစ္စဿ အယံ [ယော (သျာ။ ဣ။ က။)] ဝိပါကော။
ယော [သော (သျာ။ က။)] သဗ္ဗဇနဿ ဝန္ဒိတောဟု၊ တံ ဝန္ဒာမ သရာဇိကာ သမစ္စာ။
၄၄။
မာ ကိဉ္စိ အဝစုတ္ထ ဂင်္ဂမာလံ၊ မုနိနံ မောနပထေသု သိက္ခမာနံ။
ဧသော ဟိ အတရိ အဏ္ဏဝံ၊ ယံ တရိတွာ စရန္တိ ဝီတသောကာတိ။
ဂင်္ဂမာလဇာတကံ ပဉ္စမံ။
၄၂၂။ စေတိယဇာတကံ (၆)
၄၅။
ဓမ္မော ဟဝေ ဟတော ဟန္တိ၊ နာဟတော ဟန္တိ ကိဉ္စနံ [ကဉ္စိနံ (ဣ။)]။
တသ္မာ ဟိ ဓမ္မံ န ဟနေ၊ မာ တွံ [တံ (သျာ။ ဣ။)] ဓမ္မော ဟတော ဟနိ။
၄၆။
အလိကံ ဘာသမာနဿ၊ အပက္ကမန္တိ ဒေဝတာ။
ပူတိကဉ္စ မုခံ ဝါတိ၊ သကဋ္ဌာနာ စ ဓံသတိ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၄၇။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘူမိယံ တိဋ္ဌ စေတိယ။
၄၈။
အကာလေ ဝဿတီ တဿ၊ ကာလေ တဿ န ဝဿတိ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၄၉။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘူမိံ ပဝိသ စေတိယ။
၅၀။
ဇိဝှာ တဿ ဒွိဓါ ဟောတိ၊ ဥရဂဿေဝ ဒိသမ္ပတိ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၅၁။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘိယျော ပဝိသ စေတိယ။
၅၂။
ဇိဝှာ တဿ န ဘဝတိ၊ မစ္ဆဿေဝ ဒိသမ္ပတိ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၅၃။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘိယျော ပဝိသ စေတိယ။
၅၄။
ထိယောဝ တဿ ဇာယန္တိ [ထိယော တဿ ပဇာယန္တိ (က။)]၊ န ပုမာ ဇာယရေ ကုလေ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၅၅။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘိယျော ပဝိသ စေတိယ။
၅၆။
ပုတ္တာ တဿ န ဘဝန္တိ၊ ပက္ကမန္တိ ဒိသောဒိသံ။
ယော ဇာနံ ပုစ္ဆိတော ပဉ္ဟံ၊ အညထာ နံ ဝိယာကရေ။
၅၇။
သစေ ဟိ သစ္စံ ဘဏသိ၊ ဟောဟိ ရာဇ ယထာ ပုရေ။
မုသာ စေ ဘာသသေ ရာဇ၊ ဘိယျော ပဝိသ စေတိယ။
၅၈။
သ ရာဇာ ဣသိနာ သတ္တော၊ အန္တလိက္ခစရော ပုရေ။
ပါဝေက္ခိ ပထဝိံ စေစ္စော၊ ဟီနတ္တော ပတွ ပရိယာယံ [အတ္တပရိယာယံ (သီ။ သျာ။)၊ ပတ္တပရိယာယံ (က။ သီ။ နိယျ)]။
၅၉။
တသ္မာ ဟိ ဆန္ဒာဂမနံ၊ နပ္ပသံသန္တိ ပဏ္ဍိတာ။
အဒုဋ္ဌစိတ္တော ဘာသေယျ၊ ဂိရံ သစ္စူပသံဟိတန္တိ။
စေတိယဇာတကံ ဆဋ္ဌံ။
၄၂၃။ ဣန္ဒ္ရိယဇာတကံ (၇)
၆၀။
ယော ဣန္ဒ္ရိယာနံ ကာမေန၊ ဝသံ နာရဒ ဂစ္ဆတိ။
သော ပရိစ္စဇ္ဇုဘော လောကေ၊ ဇီဝန္တောဝ ဝိသုဿတိ [ဇီဝန္တောပိဝိသုဿတိ (သျာ။)၊ ဇီဝန္တော ဝါပိ သုဿတိ (က။)]။
၆၁။
သုခဿာနန္တရံ ဒုက္ခံ၊ ဒုက္ခဿာနန္တရံ သုခံ။
သောသိ [သောပိ (သျာ။ ဣ။ က။)] ပတ္တော သုခါ [သုခ (သျာ။)၊ သုခံ (က။)] ဒုက္ခံ၊ ပါဋိကင်္ခ ဝရံ သုခံ။
၆၂။
ကိစ္ဆကာလေ ကိစ္ဆသဟော၊ ယော ကိစ္ဆံ နာတိဝတ္တတိ။
သ ကိစ္ဆန္တံ သုခံ ဓီရော၊ ယောဂံ သမဓိဂစ္ဆတိ။
၆၃။
န ဟေဝ ကာမာန ကာမာ၊ နာနတ္ထာ နာတ္ထကာရဏာ။
န ကတဉ္စ နိရင်္ကတွာ၊ ဓမ္မာ စဝိတုမရဟသိ။
၆၄။
ဒက္ခံ ဂဟပတီ [ဂဟပတံ (သီ။ သျာ။ ဣ။)၊ ဂဟဝတံ (?)] သာဓု၊ သံဝိဘဇ္ဇဉ္စ ဘောဇနံ။
အဟာသော အတ္ထလာဘေသု၊ အတ္ထဗျာပတ္တိ အဗျထော။
၆၅။
ဧတ္တာဝတေတံ ပဏ္ဍိစ္စံ၊ အပိ သော [အသိတော (သီ။ သျာ။ ဣ။)] ဒဝိလော [ဒေဝလော (သီ။ ဣ။)] ဗြဝိ။
န ယိတော ကိဉ္စိ ပါပိယော၊ ယော ဣန္ဒ္ရိယာနံ ဝသံ ဝဇေ။
၆၆။
အမိတ္တာနံဝ ဟတ္ထတ္ထံ၊ သိဝိ ပပ္ပောတိ မာမိဝ။
ကမ္မံ ဝိဇ္ဇဉ္စ ဒက္ခေယျံ၊ ဝိဝါဟံ သီလမဒ္ဒဝံ။
ဧတေ စ ယသေ ဟာပေတွာ၊ နိဗ္ဗတ္တော သေဟိ ကမ္မေဟိ။
၆၇။
သောဟံ သဟဿဇီနောဝ အဗန္ဓု အပရာယဏော။
အရိယဓမ္မာ အပက္ကန္တော၊ ယထာ ပေတော တထေဝဟံ။
၆၈။
သုခကာမေ ဒုက္ခာပေတွာ၊ အာပန္နောသ္မိ ပဒံ ဣမံ။
သော သုခံ နာဓိဂစ္ဆာမိ၊ ဌိတော [စိတော (ဣ။ သီ။ အဋ္ဌ။)] ဘာဏုမတာမိဝါတိ။
ဣန္ဒ္ရိယဇာတကံ သတ္တမံ။
၄၂၄။ အာဒိတ္တဇာတကံ (၈)
၆၉။
အာဒိတ္တသ္မိံ အဂါရသ္မိံ၊ ယံ နီဟရတိ ဘာဇနံ။
တံ တဿ ဟောတိ အတ္ထာယ၊ နော စ ယံ တတ္ထ ဍယှတိ။
၇၀။
ဧဝါမာဒီပိတော လောကော၊ ဇရာယ မရဏေန စ။
နီဟရေထေဝ ဒါနေန၊ ဒိန္နံ ဟောတိ သုနီဟတံ [သုနီဘတံ (သီ။ သျာ။ ဣ။)၊ သုနိဗ္ဘတံ (က။)]။
၇၁။
ယော ဓမ္မလဒ္ဓဿ ဒဒါတိ ဒါနံ၊ ဥဋ္ဌာနဝီရိယာဓိဂတဿ ဇန္တု။
အတိက္ကမ္မ သော ဝေတရဏိံ [ဝေတ္တရဏိံ (က။)] ယမဿ၊ ဒိဗ္ဗာနိ ဌာနာနိ ဥပေတိ မစ္စော။
၇၂။
ဒါနဉ္စ ယုဒ္ဓဉ္စ သမာနမာဟု၊ အပ္ပါပိ သန္တာ ဗဟုကေ ဇိနန္တိ။
အပ္ပမ္ပိ စေ သဒ္ဒဟာနော ဒဒါတိ၊ တေနေဝ သော ဟောတိ သုခီ ပရတ္ထ။
၇၃။
ဝိစေယျ ဒါနံ သုဂတပ္ပသတ္ထံ၊ ယေ ဒက္ခိဏေယျာ ဣဓ ဇီဝလောကေ။
ဧတေသု ဒိန္နာနိ မဟပ္ဖလာနိ၊ ဗီဇာနိ ဝုတ္တာနိ ယထာ သုခေတ္တေ။
၇၄။
ယော ပါဏဘူတာနိ အဟေဌယံ စရံ၊ ပရူပဝါဒါ န ကရောတိ ပါပံ။
ဘီရုံ ပသံသန္တိ န တတ္ထ သူရံ၊ ဘယာ ဟိ သန္တော န ကရောန္တိ ပါပံ။
၇၅။
ဟီနေန ဗြဟ္မစရိယေန၊ ခတ္တိယေ ဥပပဇ္ဇတိ။
မဇ္ဈိမေန စ ဒေဝတ္တံ၊ ဥတ္တမေန ဝိသုဇ္ဈတိ။
၇၆။
အဒ္ဓါ ဟိ ဒါနံ ဗဟုဓါ ပသတ္ထံ၊ ဒါနာ စ ခေါ ဓမ္မပဒံဝ သေယျော။
ပုဗ္ဗေဝ ဟိ ပုဗ္ဗတရေဝ သန္တော [ပုဗ္ဗေ စ ဟိ ပုဗ္ဗတရေ စ သန္တော (သံ။ နိ။ ၁။၃၃)]၊ နိဗ္ဗာနမေဝဇ္ဈဂမုံ သပညာတိ။
အာဒိတ္တဇာတကံ အဋ္ဌမံ။
၄၂၅။ အဋ္ဌာနဇာတကံ (၉)
၇၇။
ဂင်္ဂါ ကုမုဒိနီ သန္တာ၊ သင်္ခဝဏ္ဏာ စ ကောကိလာ။
ဇမ္ဗု တာလဖလံ ဒဇ္ဇာ၊ အထ နူန တဒါ သိယာ။
၇၈။
ယဒါ ကစ္ဆပလောမာနံ၊ ပါဝါရော တိဝိဓေါ သိယာ။
ဟေမန္တိကံ ပါဝုရဏံ [ပါပုရဏံ (သီ။ သျာ။ ဣ။)]၊ အထ နူန တဒါ သိယာ။
၇၉။
ယဒါ မကသပါဒါနံ [ဒါဌာနံ (သီ။ ဣ။)]၊ အဋ္ဋာလော သုကတော သိယာ။
ဒဠ္ဟော စ အဝိကမ္ပီ စ [အပ္ပကမ္ပီ စ (သီ။ ဣ။)]၊ အထ နူန တဒါ သိယာ။
၈၀။
ယဒါ သသဝိသာဏာနံ၊ နိဿေဏီ သုကတာ သိယာ။
သဂ္ဂဿာရောဟဏတ္ထာယ၊ အထ နူန တဒါ သိယာ။
၈၁။
ယဒါ နိဿေဏိမာရုယှ၊ စန္ဒံ ခါဒေယျု မူသိကာ။
ရာဟုဉ္စ ပရိပါတေယျုံ [ပရိဗာဟေယျုံ (သျာ။)]၊ အထ နူန တဒါ သိယာ။
၈၂။
ယဒါ သုရာဃဋံ ပိတွာ၊ မက္ခိကာ ဂဏစာရိဏီ။
အင်္ဂါရေ ဝါသံ ကပ္ပေယျုံ၊ အထ နူန တဒါ သိယာ။
၈၃။
ယဒါ ဗိမ္ဗောဋ္ဌသမ္ပန္နော၊ ဂဒြဘော သုမုခေါ သိယာ။
ကုသလော နစ္စဂီတဿ၊ အထ နူန တဒါ သိယာ။
၈၄။
ယဒါ ကာကာ ဥလူကာ စ၊ မန္တယေယျုံ ရဟောဂတာ။
အညမညံ ပိဟယေယျုံ၊ အထ နူန တဒါ သိယာ။
၈၅။
ယဒါ မုဠာလ [ပုလသ (သီ။ ဣ။)၊ ပုလာသ (သျာ။)] ပတ္တာနံ၊ ဆတ္တံ ထိရတရံ သိယာ။
ဝဿဿ ပဋိဃာတာယ၊ အထ နူန တဒါ သိယာ။
၈၆။
ယဒါ ကုလကော [ကုလုင်္ကော (သီ။ ဣ။)၊ ကုလုကော (သျာ။)] သကုဏော၊ ပဗ္ဗတံ ဂန္ဓမာဒနံ။
တုဏ္ဍေနာဒါယ ဂစ္ဆေယျ၊ အထ နူန တဒါ သိယာ။
၈၇။
ယဒါ သာမုဒ္ဒိကံ နာဝံ၊ သ-ယန္တံ သ-ဝဋာကရံ [သပဋာကာရံ (က။)]။
စေဋော အာဒါယ ဂစ္ဆေယျ၊ အထ နူန တဒါ သိယာတိ။
အဋ္ဌာနဇာတကံ နဝမံ။
၄၂၆။ ဒီပိဇာတကံ (၁၀)
၈၈။
ခမနီယံ ယာပနီယံ၊ ကစ္စိ မာတုလ တေ သုခံ။
သုခံ တေ အမ္မာ အဝစ၊ သုခကာမာဝ [သုခကာမာ ဟိ (သီ။ သျာ။ ဣ။)] တေ မယံ။
၈၉။
နင်္ဂုဋ္ဌံ မေ အဝက္ကမ္မ [အပက္ကမ္မ (က။)]၊ ဟေဌယိတွာန [ပေါထယိတွာန (က။)] ဧဠိကေ [ဧဠကိ (သျာ။)၊ ဧဠိကိ (ဣ။)]။
သာဇ္ဇ မာတုလဝါဒေန၊ မုဉ္စိတဗ္ဗာ နု မညသိ။
၉၀။
ပုရတ္ထာမုခေါ နိသိန္နောသိ၊ အဟံ တေ မုခမာဂတာ။
ပစ္ဆတော တုယှံ နင်္ဂုဋ္ဌံ၊ ကထံ ခွါဟံ အဝက္ကမိံ [အပက္ကမိံ (က။)]။
၉၁။
ယာဝတာ စတုရော ဒီပါ၊ သသမုဒ္ဒါ သပဗ္ဗတာ။
တာဝတာ မယှံ နင်္ဂုဋ္ဌံ၊ ကထံ ခေါ တွံ ဝိဝဇ္ဇယိ။
၉၂။
ပုဗ္ဗေဝ မေတမက္ခိံသု [မေတံ အက္ခံသု (သီ။ ဣ။)]၊ မာတာ ပိတာ စ ဘာတရော။
ဒီဃံ ဒုဋ္ဌဿ နင်္ဂုဋ္ဌံ၊ သာမှိ ဝေဟာယသာဂတာ။
၉၃။
တဉ္စ ဒိသွာန အာယန္တိံ၊ အန္တလိက္ခသ္မိ ဧဠိကေ။
မိဂသံဃော ပလာယိတ္ထ၊ ဘက္ခော မေ နာသိတော တယာ။
၉၄။
ဣစ္စေဝံ ဝိလပန္တိယာ၊ ဧဠကိယာ ရုဟဂ္ဃသော။
ဂလကံ အနွာဝမဒ္ဒိ၊ နတ္ထိ ဒုဋ္ဌေ သုဘာသိတံ။
၉၅။
နေဝ ဒုဋ္ဌေ နယော အတ္ထိ၊ န ဓမ္မော န သုဘာသိတံ။
နိက္ကမံ ဒုဋ္ဌေ ယုဉ္ဇေထ၊ သော စ သဗ္ဘိံ န ရဉ္ဇတီတိ။
ဒီပိဇာတကံ ဒသမံ။
အဋ္ဌကနိပါတံ နိဋ္ဌိတံ။
တဿုဒ္ဒါနံ –
ပရိသုဒ္ဓါ မနာဝိလာ ဝတ္ထဓရာ၊ ဗကရာဇဿ ကာယုရံ ဒဏ္ဍဝရော။
အထ အင်္ဂါရ စေတိယ ဒေဝိလိနာ၊ အထ အာဒိတ္တ ဂင်္ဂါ ဒသေဠကိနာတိ။