၇။ သတ္တကနိပါတ
၁။ ကုက္ကုဝဂ္ဂ
၃၉၆။ ကုက္ကုဇာတက (၇-၁-၁)
၁။
ဒိယဍ္ဎကုက္ကူ ဥဒယေန ကဏ္ဏိကာ၊ ဝိဒတ္ထိယော အဋ္ဌ ပရိက္ခိပန္တိ နံ။
သာ သိံသပါ [သသိံသပါ (သီ။ ဣ။)၊ သာ သီသပါ (သျာ။)၊ ယာ သိံသပါ (က။ သီ။ နိယျ)] သာရမယာ အဖေဂ္ဂုကာ၊ ကုဟိံ ဌိတာ ဥပ္ပရိတော [ဥပရိတော (သီ။ သျာ။ ဣ။)] န ဓံသတိ။
၂။
ယာ တိံသတိ သာရမယာ အနုဇ္ဇုကာ၊ ပရိကိရိယ [ပကိရိယာ (က။)] ဂေါပါဏသိယော သမံ ဌိတာ [သမဋ္ဌိတာ (သီ။ သျာ။)]။
တာဟိ သုသင်္ဂဟိတာ ဗလသာ ဣဠိတာ [တာ သင်္ဂဟိတာ ဗလသာ စ ဣဠိတာ (သီ။)၊ တာဟိ သုသင်္ဂဟိတာ ဗလသာ စ ဣဠိတာ (သျာ။)၊ တာဟိ သင်္ဂဟီတာ ဗလသာ စ ဣဠိတာ (ဣ။)]၊ သမံ ဌိတာ ဥပ္ပရိတော န ဓံသတိ။
၃။
ဧဝမ္ပိ မိတ္တေဟိ ဒဠ္ဟေဟိ ပဏ္ဍိတော၊ အဘေဇ္ဇရူပေဟိ သုစီဟိ မန္တိဘိ။
သုသင်္ဂဟီတော သိရိယာ န ဓံသတိ၊ ဂေါပါဏသီ ဘာရဝဟာဝ ကဏ္ဏိကာ။
၄။
ခရတ္တစံ ဗေလ္လံ ယထာပိ သတ္ထဝါ၊ အနာမသန္တောပိ ကရောတိ တိတ္တကံ။
သမာဟရံ သာဒုံ ကရောတိ ပတ္ထိဝ၊ အသာဒုံ ကယိရာ တနုဗန္ဓမုဒ္ဓရံ [တနုဝဋ္ဋမုဒ္ဓရံ (သီ။ ဣ။)]။
၅။
ဧဝမ္ပိ ဂါမနိဂမေသု ပဏ္ဍိတော၊ အသာဟသံ ရာဇဓနာနိ သံဃရံ။
ဓမ္မာနုဝတ္တီ ပဋိပဇ္ဇမာနော၊ သ ဖာတိ ကယိရာ အဝိဟေဌယံ ပရံ။
၆။
ဩဒါတမူလံ သုစိဝါရိသမ္ဘဝံ၊ ဇာတံ ယထာ ပေါက္ခရဏီသု အမ္ဗုဇံ။
ပဒုမံ ယထာ အဂ္ဂိနိကာသိဖာလိမံ၊ န ကဒ္ဒမော န ရဇော န ဝါရိ လိမ္ပတိ။
၇။
ဧဝမ္ပိ ဝေါဟာရသုစိံ အသာဟသံ၊ ဝိသုဒ္ဓကမ္မန္တမပေတပါပကံ။
န လိမ္ပတိ ကမ္မကိလေသ တာဒိသော၊ ဇာတံ ယထာ ပေါက္ခရဏီသု အမ္ဗုဇန္တိ။
ကုက္ကုဇာတကံ ပဌမံ။
၃၉၇။ မနောဇဇာတကံ (၇-၁-၂)
၈။
ယထာ စာပေါ နိန္နမတိ၊ ဇိယာ စာပိ နိကူဇတိ။
ဟညတေ နူန မနောဇော၊ မိဂရာဇာ သခါ မမ။
၉။
ဟန္ဒ ဒါနိ ဝနန္တာနိ၊ ပက္ကမာမိ ယထာသုခံ။
နေတာဒိသာ သခါ ဟောန္တိ၊ လဗ္ဘာ မေ ဇီဝတော သခါ။
၁၀။
န ပါပဇနသံသေဝီ၊ အစ္စန္တံ သုခမေဓတိ။
မနောဇံ ပဿ သေမာနံ၊ ဂိရိယဿာနုသာသနီ [အရိယဿာနုသာသနီ (သီ။ သျာ။ ဣ။)]။
၁၁။
န ပါပသမ္ပဝင်္ကေန၊ မာတာ ပုတ္တေန နန္ဒတိ။
မနောဇံ ပဿ သေမာနံ၊ အစ္ဆန္နံ [သစ္ဆန္နံ (က။)] သမှိ လောဟိတေ။
၁၂။
ဧဝမာပဇ္ဇတေ ပေါသော၊ ပါပိယော စ နိဂစ္ဆတိ။
ယော ဝေ ဟိတာနံ ဝစနံ၊ န ကရောတိ အတ္ထဒဿိနံ။
၁၃။
ဧဝဉ္စ သော ဟောတိ တတော စ ပါပိယော၊ ယော ဥတ္တမော အဓမဇနူပသေဝီ။
ပဿုတ္တမံ အဓမဇနူပသေဝိတံ [သေဝိံ (သျာ။)]၊ မိဂါဓိပံ သရဝရဝေဂနိဒ္ဓုတံ။
၁၄။
နိဟီယတိ ပုရိသော နိဟီနသေဝီ၊ န စ ဟာယေထ ကဒါစိ တုလ္ယသေဝီ။
သေဋ္ဌမုပဂမံ [မုပနမံ (သီ။ ဣ။ အ။ နိ။ ၃။၂၆)] ဥဒေတိ ခိပ္ပံ၊ တသ္မာတ္တနာ ဥတ္တရိတရံ [တသ္မာ အတ္တနော ဥတ္တရိံ (သီ။ ဣ။)၊ တသ္မာ အတ္တနော ဥတ္တရံ (သျာ။)] ဘဇေထာတိ။
မနောဇဇာတကံ ဒုတိယံ။
၃၉၈။ သုတနုဇာတကံ (၇-၁-၃)
၁၅။
ရာဇာ တေ ဘတ္တံ ပါဟေသိ၊ သုစိံ မံသူပသေစနံ။
မဃဒေဝသ္မိံ [မခါဒေဝသ္မိံ (သီ။ ဣ။)၊ မာဃဒေဝသ္မိံ (က။)] အဓိဝတ္ထေ၊ ဧဟိ နိက္ခမ္မ ဘုဉ္ဇဿု။
၁၆။
ဧဟိ မာဏဝ ဩရေန၊ ဘိက္ခမာဒါယ သူပိတံ။
တွဉ္စ မာဏဝ ဘိက္ခာ စ [ဘက္ခောသိ (သျာ။)၊ ဘက္ခာဝ (က။)]၊ ဥဘော ဘက္ခာ ဘဝိဿထ။
၁၇။
အပ္ပကေန တုဝံ ယက္ခ၊ ထုလ္လမတ္ထံ ဇဟိဿသိ။
ဘိက္ခံ တေ နာဟရိဿန္တိ၊ ဇနာ မရဏသညိနော။
၁၈။
လဒ္ဓါယ ယက္ခာ [လဒ္ဓါယံ ယက္ခ (သီ။ သျာ။ ဣ။)] တဝ နိစ္စဘိက္ခံ၊ သုစိံ ပဏီတံ ရသသာ ဥပေတံ။
ဘိက္ခဉ္စ တေ အာဟရိယော နရော ဣဓ၊ သုဒုလ္လဘော ဟေဟိတိ ဘက္ခိတေ [ခါဒိတေ (သီ။ သျာ။ ဣ။)] မယိ။
၁၉။
မမေဝ [မမေသ (သီ။ ဣ။)] သုတနော အတ္ထော၊ ယထာ ဘာသသိ မာဏဝ။
မယာ တွံ သမနုညာတော၊ သောတ္ထိံ ပဿာဟိ မာတရံ။
၂၀။
ခဂ္ဂံ ဆတ္တဉ္စ ပါတိဉ္စ၊ ဂစ္ဆမာဒါယ [ဂစ္ဆေဝါဒါယ (သီ။ သျာ။ ဣ။)] မာဏဝ။
သောတ္ထိံ ပဿတု တေ မာတာ၊ တွဉ္စ ပဿာဟိ မာတရံ။
၂၁။
ဧဝံ ယက္ခ သုခီ ဟောဟိ၊ သဟ သဗ္ဗေဟိ ဉာတိဘိ။
ဓနဉ္စ မေ အဓိဂတံ၊ ရညော စ ဝစနံ ကတန္တိ။
သုတနုဇာတကံ တတိယံ။
၃၉၉။ မာတုပေါသကဂိဇ္ဈဇာတကံ (၇-၁-၄)
၂၂။
တေ ကထံ နု ကရိဿန္တိ၊ ဝုဒ္ဓါ ဂိရိဒရီသယာ။
အဟံ ဗဒ္ဓေါသ္မိ ပါသေန၊ နိလီယဿ ဝသံ ဂတော။
၂၃။
ကိံ ဂိဇ္ဈ ပရိဒေဝသိ၊ ကာ နု တေ ပရိဒေဝနာ။
န မေ သုတော ဝါ ဒိဋ္ဌော ဝါ၊ ဘာသန္တော မာနုသိံ ဒိဇော။
၂၄။
ဘရာမိ မာတာပိတရော၊ ဝုဒ္ဓေ ဂိရိဒရီသယေ။
တေ ကထံ နု ကရိဿန္တိ၊ အဟံ ဝသံ ဂတော တဝ။
၂၅။
ယံ နု ဂိဇ္ဈော ယောဇနသတံ၊ ကုဏပါနိ အဝေက္ခတိ။
ကသ္မာ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈသိ။
၂၆။
ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ။
အထ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတိ။
၂၇။
ဘရဿု မာတာပိတရော၊ ဝုဒ္ဓေ ဂိရိဒရီသယေ။
မယာ တွံ သမနုညာတော၊ သောတ္ထိံ ပဿာဟိ ဉာတကေ။
၂၈။
ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ။
ဘရိဿံ မာတာပိတရော၊ ဝုဒ္ဓေ ဂိရိဒရီသယေတိ။
မာတုပေါသကဂိဇ္ဈဇာတကံ စတုတ္ထံ။
၄၀၀။ ဒဗ္ဘပုပ္ဖဇာတကံ (၇-၁-၅)
၂၉။
အနုတီရစာရီ ဘဒ္ဒန္တေ၊ သဟာယမနုဓါဝ မံ။
မဟာ မေ ဂဟိတော [ရောဟိတော (က။)] မစ္ဆော၊ သော မံ ဟရတိ ဝေဂသာ။
၃၀။
ဂမ္ဘီရစာရီ ဘဒ္ဒန္တေ၊ ဒဠှံ ဂဏှာဟိ ထာမသာ။
အဟံ တံ ဥဒ္ဓရိဿာမိ၊ သုပဏ္ဏော ဥရဂါမိဝ [ဥရဂမ္မိဝ (သီ။ သျာ။ ဣ။)]။
၃၁။
ဝိဝါဒေါ နော သမုပ္ပန္နော၊ ဒဗ္ဘပုပ္ဖ သုဏောဟိ မေ။
သမေဟိ မေဓဂံ [မေဓကံ (ဣ။)] သမ္မ၊ ဝိဝါဒေါ ဝူပသမ္မတံ။
၃၂။
ဓမ္မဋ္ဌောဟံ ပုရေ အာသိံ၊ ဗဟူ အဍ္ဍာ မေ တီရိတာ [ဗဟုအဋ္ဋံ မေ တီရိတံ (သီ။)၊ ဗဟုအဋ္ဋံဝ တီရိတံ (သျာ။)၊ ဗဟု အတ္ထံ မေ တီရိတံ (ဣ။)]။
သမေမိ မေဓဂံ သမ္မ၊ ဝိဝါဒေါ ဝူပသမ္မတံ။
၃၃။
အနုတီရစာရိ နင်္ဂုဋ္ဌံ၊ သီသံ ဂမ္ဘီရစာရိနော။
အစ္စာယံ [အထာယံ (သီ။ ဣ။)] မဇ္ဈိမော ခဏ္ဍော၊ ဓမ္မဋ္ဌဿ ဘဝိဿတိ။
၃၄။
စိရမ္ပိ ဘက္ခော အဘဝိဿ၊ သစေ န ဝိဝဒေမသေ။
အသီသကံ အနင်္ဂုဋ္ဌံ၊ သိင်္ဂါလော ဟရတိ ရောဟိတံ။
၃၅။
ယထာပိ ရာဇာ နန္ဒေယျ၊ ရဇ္ဇံ လဒ္ဓါန ခတ္တိယော။
ဧဝါဟမဇ္ဇ နန္ဒာမိ၊ ဒိသွာ ပုဏ္ဏမုခံ ပတိံ။
၃၆။
ကထံ နု ထလဇော သန္တော၊ ဥဒကေ မစ္ဆံ ပရာမသိ။
ပုဋ္ဌော မေ သမ္မ အက္ခာဟိ၊ ကထံ အဓိဂတံ တယာ။
၃၇။
ဝိဝါဒေန ကိသာ ဟောန္တိ၊ ဝိဝါဒေန ဓနက္ခယာ။
ဇီနာ ဥဒ္ဒါ ဝိဝါဒေန၊ ဘုဉ္ဇ မာယာဝိ ရောဟိတံ။
၃၈။
ဧဝမေဝ မနုဿေသု၊ ဝိဝါဒေါ ယတ္ထ ဇာယတိ။
ဓမ္မဋ္ဌံ ပဋိဓါဝန္တိ၊ သော ဟိ နေသံ ဝိနာယကော။
ဓနာပိ တတ္ထ ဇီယန္တိ၊ ရာဇကောသော ပဝဍ္ဎတီတိ [စ ဝဍ္ဎတိ (ဣ။)]။
ဒဗ္ဘပုပ္ဖဇာတကံ ပဉ္စမံ။
၄၀၁။ ပဏ္ဏကဇာတကံ (၇-၁-၆)
၃၉။
ပဏ္ဏကံ [ဒသဏ္ဏကံ (သီ။ သျာ။ ဣ။)] တိခိဏဓါရံ၊ အသိံ သမ္ပန္နပါယိနံ။
ပရိသာယံ ပုရိသော ဂိလတိ၊ ကိံ ဒုက္ကရတရံ တတော။
ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော။
၄၀။
ဂိလေယျ ပုရိသော လောဘာ၊ အသိံ သမ္ပန္နပါယိနံ။
ယော စ ဝဇ္ဇာ ဒဒါမီတိ၊ တံ ဒုက္ကရတရံ တတော။
သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝ [မာဂဓ (သီ။ သျာ။ ဣ။)]။
၄၁။
ဗျာကာသိ အာယုရော ပဉ္ဟံ၊ အတ္ထံ [အတ္ထ (ဣ။ သီ။ နိယျ)] ဓမ္မဿ ကောဝိဒေါ။
ပုက္ကုသံ ဒါနိ ပုစ္ဆာမိ၊ ကိံ ဒုက္ကရတရံ တတော။
ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော။
၄၂။
န ဝါစမုပဇီဝန္တိ၊ အဖလံ ဂိရမုဒီရိတံ။
ယော စ ဒတွာ အဝါကယိရာ၊ တံ ဒုက္ကရတရံ တတော။
သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝ။
၄၃။
ဗျာကာသိ ပုက္ကုသော ပဉ္ဟံ၊ အတ္ထံ ဓမ္မဿ ကောဝိဒေါ။
သေနကံ ဒါနိ ပုစ္ဆာမိ၊ ကိံ ဒုက္ကရတရံ တတော။
ယဒညံ ဒုက္ကရံ ဌာနံ၊ တံ မေ အက္ခာဟိ ပုစ္ဆိတော။
၄၄။
ဒဒေယျ ပုရိသော ဒါနံ၊ အပ္ပံ ဝါ ယဒိ ဝါ ဗဟုံ။
ယော စ ဒတွာ နာနုတပ္ပေ [တပေ (သီ။ ဣ။)]၊ တံ ဒုက္ကရတရံ တတော။
သဗ္ဗညံ သုကရံ ဌာနံ၊ ဧဝံ ဇာနာဟိ မဒ္ဒဝ။
၄၅။
ဗျာကာသိ အာယုရော ပဉ္ဟံ၊ အထော ပုက္ကုသပေါရိသော။
သဗ္ဗေ ပဉ္ဟေ အတိဘောတိ၊ ယထာ ဘာသတိ သေနကောတိ။
ပဏ္ဏက [ဒသဏ္ဏက (သီ။ သျာ။ ဣ။)] ဇာတကံ ဆဋ္ဌံ။
၄၀၂။ သတ္တုဘသွာဇာတကံ (၇-၁-၇)
၄၆။
ဝိဗ္ဘန္တစိတ္တော ကုပိတိန္ဒ္ရိယောသိ၊ နေတ္တေဟိ တေ ဝါရိဂဏာ သဝန္တိ။
ကိံ တေ နဋ္ဌံ ကိံ ပန ပတ္ထယာနော၊ ဣဓါဂမာ ဗြဟ္မေ တဒိင်္ဃ [ဗြာဟ္မဏ ဣင်္ဃ (သီ။ သျာ။)] ဗြူဟိ။
၄၇။
မိယျေထ ဘရိယာ ဝဇတော မမဇ္ဇ၊ အဂစ္ဆတော မရဏမာဟ ယက္ခော။
ဧတေန ဒုက္ခေန ပဝေဓိတောသ္မိ၊ အက္ခာဟိ မေ သေနက ဧတမတ္ထံ။
၄၈။
ဗဟူနိ ဌာနာနိ ဝိစိန္တယိတွာ၊ ယမေတ္ထ ဝက္ခာမိ တဒေဝ သစ္စံ။
မညာမိ တေ ဗြာဟ္မဏ သတ္တုဘသ္တံ၊ အဇာနတော ကဏှသပ္ပော ပဝိဋ္ဌော။
၄၉။
အာဒါယ ဒဏ္ဍံ ပရိသုမ္ဘ ဘသ္တံ၊ ပဿေဠမူဂံ ဥရဂံ ဒုဇိဝှံ [ဒိဇိဝှံ (သီ။ ဣ။)]။
ဆိန္ဒဇ္ဇ ကင်္ခံ ဝိစိကိစ္ဆိတာနိ၊ ဘုဇင်္ဂမံ ပဿ ပမုဉ္စ ဘသ္တံ။
၅၀။
သံဝိဂ္ဂရူပေါ ပရိသာယ မဇ္ဈေ၊ သော ဗြာဟ္မဏော သတ္တုဘသ္တံ ပမုဉ္စိ။
အထ နိက္ခမိ ဥရဂေါ ဥဂ္ဂတေဇော၊ အာသီဝိသော သပ္ပော ဖဏံ ကရိတွာ။
၅၁။
သုလဒ္ဓလာဘာ ဇနကဿ ရညော၊ ယော ပဿတီ သေနကံ သာဓုပညံ။
ဝိဝဋ္ဋဆဒ္ဒေါ [ဝိဝတ္တစ္ဆဒ္ဒေါ (သီ။)၊ ဝိဝဋ္ဋစ္ဆဒေါ (သျာ။)၊ ဝိဝဋ္ဋစ္ဆဒ္ဒါ (ဣ။)] နုသိ သဗ္ဗဒဿီ၊ ဉာဏံ နု တေ ဗြာဟ္မဏ ဘိံသရူပံ။
၅၂။
ဣမာနိ မေ သတ္တသတာနိ အတ္ထိ၊ ဂဏှာဟိ သဗ္ဗာနိ ဒဒါမိ တုယှံ။
တယာ ဟိ မေ ဇီဝိတမဇ္ဇ လဒ္ဓံ၊ အထောပိ ဘရိယာယ မကာသိ သောတ္ထိံ။
၅၃။
န ပဏ္ဍိတာ ဝေတနမာဒိယန္တိ၊ စိတြာဟိ ဂါထာဟိ သုဘာသိတာဟိ။
ဣတောပိ တေ ဗြဟ္မေ ဒဒန္တု ဝိတ္တံ၊ အာဒါယ တွံ ဂစ္ဆ သကံ နိကေတန္တိ။
သတ္တုဘသွာဇာတကံ [သေနကဇာတကံ (သျာ။)] သတ္တမံ။
၄၀၃။ အဋ္ဌိသေနကဇာတကံ (၇-၁-၈)
၅၄။
ယေမေ အဟံ န ဇာနာမိ၊ အဋ္ဌိသေန ဝနိဗ္ဗကေ။
တေ မံ သင်္ဂမ္မ ယာစန္တိ၊ ကသ္မာ မံ တွံ န ယာစသိ။
၅၅။
ယာစကော အပ္ပိယော ဟောတိ၊ ယာစံ အဒဒမပ္ပိယော။
တသ္မာဟံ တံ န ယာစာမိ၊ မာ မေ ဝိဒေဿနာ [ဝိဒ္ဒေသနာ (သီ။ ဣ။)] အဟု။
၅၆။
ယော ဝေ ယာစနဇီဝါနော၊ ကာလေ ယာစံ န ယာစတိ။
ပရဉ္စ ပုညာ [ပုညံ (သျာ။ က။)] ဓံသေတိ၊ အတ္တနာပိ န ဇီဝတိ။
၅၇။
ယော စ [ယော ဝေ (က။)] ယာစနဇီဝါနော၊ ကာလေ ယာစဉှိ ယာစတိ [ယာစံပိ ယာစတိ (သျာ။)၊ ယာစာနိ ယာစတိ (ဣ။)၊ ယာစတိ ယာစနံ (သီ။ နိယျ)၊ ယာစနံ ယာစတိ (က။)]။
ပရဉ္စ ပုညံ လဗ္ဘေတိ၊ အတ္တနာပိ စ ဇီဝတိ။
၅၈။
န ဝေ ဒေဿန္တိ [န ဝေ ဒုဿန္တိ (သျာ။)၊ န ဝေ ဒိဿန္တိ (ဣ။)၊ န ဝိဒေဿန္တိ (က။ အဋ္ဌ။)] သပ္ပညာ၊ ဒိသွာ ယာစကမာဂတေ။
ဗြဟ္မစာရိ ပိယော မေသိ၊ ဝဒ တွံ [ဝရ တံ (သီ။)၊ ဝရ တွံ (ဣ။)] ဘညမိစ္ဆသိ [ယညမိစ္ဆသိ (?)]။
၅၉။
န ဝေ ယာစန္တိ သပ္ပညာ၊ ဓီရော စ ဝေဒိတုမရဟတိ။
ဥဒ္ဒိဿ အရိယာ တိဋ္ဌန္တိ၊ ဧသာ အရိယာန ယာစနာ။
၆၀။
ဒဒါမိ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန။
အရိယော ဟိ အရိယဿ ကထံ န ဒဇ္ဇာ၊ သုတွာန ဂါထာ တဝ ဓမ္မယုတ္တာတိ။
အဋ္ဌိသေနကဇာတကံ အဋ္ဌမံ။
၄၀၄။ ကပိဇာတကံ (၇-၁-၉)
၆၁။
ယတ္ထ ဝေရီ နိဝသတိ၊ န ဝသေ တတ္ထ ပဏ္ဍိတော။
ဧကရတ္တံ ဒိရတ္တံ ဝါ၊ ဒုက္ခံ ဝသတိ ဝေရိသု။
၆၂။
ဒိသော ဝေ လဟုစိတ္တဿ၊ ပေါသဿာနုဝိဓီယတော။
ဧကဿ ကပိနော ဟေတု၊ ယူထဿ အနယော ကတော။
၆၃။
ဗာလောဝ [စ (သီ။ သျာ။ ဣ။)] ပဏ္ဍိတမာနီ၊ ယူထဿ ပရိဟာရကော။
သစိတ္တဿ ဝသံ ဂန္တွာ၊ သယေထာယံ [ပဿေထာယံ (က။)] ယထာ ကပိ။
၆၄။
န သာဓု ဗလဝါ ဗာလော၊ ယူထဿ ပရိဟာရကော။
အဟိတော ဘဝတိ ဉာတီနံ၊ သကုဏာနံဝ စေတကော [စေဋကော (က။)]။
၆၅။
ဓီရောဝ ဗလဝါ သာဓု၊ ယူထဿ ပရိဟာရကော။
ဟိတော ဘဝတိ ဉာတီနံ၊ တိဒသာနံဝ ဝါသဝေါ။
၆၆။
ယော စ သီလဉ္စ ပညဉ္စ၊ သုတဉ္စတ္တနိ ပဿတိ။
ဥဘိန္နမတ္ထံ စရတိ၊ အတ္တနော စ ပရဿ စ။
၆၇။
တသ္မာ တုလေယျ မတ္တာနံ၊ သီလပညာသုတာမိဝ [သီလံ ပညံ သုတံပိဝ (သျာ။)]။
ဂဏံ ဝါ ပရိဟရေ ဓီရော၊ ဧကော ဝါပိ ပရိဗ္ဗဇေတိ။
ကပိဇာတကံ နဝမံ။
၄၀၅။ ဗကဇာတကံ (၇-၁-၁၀)
၆၈။
ဒွါသတ္တတိ ဂေါတမ [ဘော ဂေါတမ (က။)] ပုညကမ္မာ၊ ဝသဝတ္တိနော ဇာတိဇရံ အတီတာ။
အယမန္တိမာ ဝေဒဂူ ဗြဟ္မပတ္တိ [ဗြဟ္မုပပတ္တိ (သျာ။ က။)]၊ အသ္မာဘိဇပ္ပန္တိ ဇနာ [ပဇာ (က။)] အနေကာ။
၆၉။
အပ္ပဉှိ ဧတံ [အပ္ပဉ္စ ဟေတံ (သျာ။)၊ အပ္ပံသိ ဧတံ (က။)] န ဟိ ဒီဃမာယု၊ ယံ တွံ ဗက မညသိ ဒီဃမာယုံ။
သတံ သဟဿာနိ [သဟဿာနံ (သီ။ ဣ။ သံ။ နိ။ ၁။၁၇၅)၊ သဟဿာန (သျာ။ ကံ။)] နိရဗ္ဗုဒါနံ၊ အာယုံ ပဇာနာမိ တဝါဟ ဗြဟ္မေ။
၇၀။
အနန္တဒဿီ ဘဂဝါဟမသ္မိ၊ ဇာတိဇ္ဇရံ သောကမုပါတိဝတ္တော။
ကိံ မေ ပုရာဏံ ဝတသီလဝတ္တံ [သီလဝန္တံ (ဣ။ က။)]၊ အာစိက္ခ မေ တံ ယမဟံ ဝိဇညံ။
၇၁။
ယံ တွံ အပါယေသိ ဗဟူ မနုဿေ၊ ပိပါသိတေ ဃမ္မနိ သမ္ပရေတေ။
တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓေါဝ အနုဿရာမိ။
၇၂။
ယံ ဧဏိကူလသ္မိ ဇနံ ဂဟီတံ၊ အမောစယီ ဂယှက နိယျမာနံ။
တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓေါဝ အနုဿရာမိ။
၇၃။
ဂင်္ဂါယ သောတသ္မိံ ဂဟီတနာဝံ၊ လုဒ္ဒေန နာဂေန မနုဿကပ္ပါ။
အမောစယိ တွံ ဗလသာ ပသယှ၊ တံ တေ ပုရာဏံ ဝတသီလဝတ္တံ။
သုတ္တပ္ပဗုဒ္ဓေါဝ အနုဿရာမိ။
၇၄။
ကပ္ပော စ တေ ဗဒ္ဓစရော [ပတ္ထစရော (သျာ။)၊ ပဋ္ဌစရော (က။)] အဟောသိ၊ သမ္ဗုဒ္ဓိမန္တံ [သမ္ဗုဒ္ဓိဝန္တံ (သျာ။ ဣ။)၊ သမ္ဗုဒ္ဓဝန္တံ (က။)] ဝတိနံ [ဝတိတံ (သျာ။)၊ ဝတိဒံ (က။)] အမညံ။
တံ တေ ပုရာဏံ ဝတသီလဝတ္တံ၊ သုတ္တပ္ပဗုဒ္ဓေါဝ အနုဿရာမိ။
၇၅။
အဒ္ဓါ ပဇာနာသိ မမေတမာယုံ၊ အညမ္ပိ ဇာနာသိ တထာ ဟိ ဗုဒ္ဓေါ။
တထာ ဟိ တာယံ [တျာယံ (သံ။ နိ။ ၁။၁၇၅)] ဇလိတာနုဘာဝေါ၊ ဩဘာသယံ တိဋ္ဌတိ ဗြဟ္မလောကန္တိ။
ဗကဇာတကံ ဒသမံ။
ကုက္ကုဝဂ္ဂေါ ပဌမော။
တဿုဒ္ဒါနံ –
ဝရကဏ္ဏိက စာပဝရော သုတနော၊ အထ ဂိဇ္ဈ သရောဟိတမစ္ဆဝရော။
ပုန ပဏ္ဏက [ဒသဏ္ဏက (သီ။ သျာ။ ဣ။)] သေနက ယာစနကော၊ အထ ဝေရိ သဗြဟ္မဗကေန ဒသာတိ။
၂။ ဂန္ဓာရဝဂ္ဂေါ
၄၀၆။ ဂန္ဓာရဇာတကံ (၇-၂-၁)
၇၆။
ဟိတွာ ဂါမသဟဿာနိ၊ ပရိပုဏ္ဏာနိ သောဠသ။
ကောဋ္ဌာဂါရာနိ ဖီတာနိ၊ သန္နိဓိံ ဒါနိ ကုဗ္ဗသိ။
၇၇။
ဟိတွာ ဂန္ဓာရဝိသယံ၊ ပဟူတဓနဓါရိယံ [ဓါနိယံ (သီ။ ဣ။)၊ ဓညန္တိ အတ္ထော]။
ပသာသနတော [ပသာသနိတော (သီ။ သျာ။)၊ ပသာသနာတော (ဣ။)] နိက္ခန္တော၊ ဣဓ ဒါနိ ပသာသသိ။
၇၈။
ဓမ္မံ ဘဏာမိ ဝေဒေဟ၊ အဓမ္မော မေ န ရုစ္စတိ။
ဓမ္မံ မေ ဘဏမာနဿ၊ န ပါပမုပလိမ္ပတိ။
၇၉။
ယေန ကေနစိ ဝဏ္ဏေန၊ ပရော လဘတိ ရုပ္ပနံ။
မဟတ္ထိယမ္ပိ စေ ဝါစံ၊ န တံ ဘာသေယျ ပဏ္ဍိတော။
၈၀။
ကာမံ ရုပ္ပတု ဝါ မာ ဝါ၊ ဘုသံဝ ဝိကိရီယတု။
ဓမ္မံ မေ ဘဏမာနဿ၊ န ပါပမုပလိမ္ပတိ။
၈၁။
နော စေ အဿ သကာ ဗုဒ္ဓိ၊ ဝိနယော ဝါ သုသိက္ခိတော။
ဝနေ အန္ဓမဟိံသောဝ [အန္ဓမဟိသောဝ (သီ။ ဣ။)] စရေယျ ဗဟုကော ဇနော။
၈၂။
ယသ္မာ စ ပနိဓေကစ္စေ၊ အာစေရမှိ [အာစာရမှိ (သီ။ ဣ။)] သုသိက္ခိတာ။
တသ္မာ ဝိနီတဝိနယာ၊ စရန္တိ သုသမာဟိတာတိ။
ဂန္ဓာရဇာတကံ ပဌမံ။
၄၀၇။ မဟာကပိဇာတကံ (၇-၂-၂)
၈၃။
အတ္တာနံ သင်္ကမံ ကတွာ၊ ယော သောတ္ထိံ သမတာရယိ။
ကိံ တွံ တေသံ ကိမေ [ကိမော (သီ။ ဣ။)၊ ကိံ မေ (သျာ။)] တုယှံ၊ ဟောန္တိ ဧတေ [ဟေတေ (သျာ။)၊ သော တေ (က။)] မဟာကပိ။
၈၄။
ရာဇာဟံ ဣဿရော တေသံ၊ ယူထဿ ပရိဟာရကော။
တေသံ သောကပရေတာနံ၊ ဘီတာနံ တေ အရိန္ဒမ။
၈၅။
ဥလ္လင်္ဃယိတွာ [သ လင်္ဃယိတွာ (ဣ။)၊ သုလင်္ဃယိတွာ (က။)] အတ္တာနံ၊ ဝိဿဋ္ဌဓနုနော သတံ။
တတော အပရပါဒေသု၊ ဒဠှံ ဗန္ဓံ လတာဂုဏံ။
၈၆။
ဆိန္နဗ္ဘမိဝ ဝါတေန၊ နုဏ္ဏော [နုန္နော (သီ။)] ရုက္ခံ ဥပါဂမိံ။
သောဟံ အပ္ပဘဝံ တတ္ထ၊ သာခံ ဟတ္ထေဟိ အဂ္ဂဟိံ။
၈၇။
တံ မံ ဝိယာယတံ သန္တံ၊ သာခါယ စ လတာယ စ။
သမနုက္ကမန္တာ ပါဒေဟိ၊ သောတ္ထိံ သာခါမိဂါ ဂတာ။
၈၈။
တံ မံ န တပတေ ဗန္ဓော၊ မတော [ဝဓေါ (သီ။ သျာ။ ဣ။)] မေ န တပေဿတိ။
သုခမာဟရိတံ တေသံ၊ ယေသံ ရဇ္ဇမကာရယိံ။
၈၉။
ဧသာ တေ ဥပမာ ရာဇ၊ တံ သုဏောဟိ အရိန္ဒမ [အတ္ထသန္ဒဿနီ ကတာ (ဣ။)]။
ရညာ ရဋ္ဌဿ ယောဂ္ဂဿ၊ ဗလဿ နိဂမဿ စ။
သဗ္ဗေသံ သုခမေဋ္ဌဗ္ဗံ၊ ခတ္တိယေန ပဇာနတာတိ။
မဟာကပိဇာတကံ ဒုတိယံ။
၄၀၈။ ကုမ္ဘကာရဇာတကံ (၇-၂-၃)
၉၀။
အမ္ဗာဟမဒ္ဒံ ဝနမန္တရသ္မိံ၊ နီလောဘာသံ ဖလိတံ [ဖလိနံ (ဣ။)] သံဝိရူဠှံ။
တမဒ္ဒသံ ဖလဟေတု ဝိဘဂ္ဂံ၊ တံ ဒိသွာ ဘိက္ခာစရိယံ စရာမိ။
၉၁။
သေလံ သုမဋ္ဌံ နရဝီရနိဋ္ဌိတံ [နရဝိဒ္ဒုနိဋ္ဌိတံ (က။)]၊ နာရီ ယုဂံ ဓါရယိ အပ္ပသဒ္ဒံ။
ဒုတိယဉ္စ အာဂမ္မ အဟောသိ သဒ္ဒေါ၊ တံ ဒိသွာ ဘိက္ခာစရိယံ စရာမိ။
၉၂။
ဒိဇာ ဒိဇံ ကုဏပမာဟရန္တံ၊ ဧကံ သမာနံ ဗဟုကာ သမေစ္စ။
အာဟာရဟေတူ ပရိပါတယိံသု၊ တံ ဒိသွာ ဘိက္ခာစရိယံ စရာမိ။
၉၃။
ဥသဘာဟမဒ္ဒံ ယူထဿ မဇ္ဈေ၊ စလက္ကကုံ ဝဏ္ဏဗလူပပန္နံ။
တမဒ္ဒသံ ကာမဟေတု ဝိတုန္နံ၊ တံ ဒိသွာ ဘိက္ခာစရိယံ စရာမိ။
၉၄။
ကရဏ္ဍကော [ကရဏ္ဍုနာမ (သီ။ ဣ။)] ကလိင်္ဂါနံ၊ ဂန္ဓာရာနဉ္စ နဂ္ဂဇိ။
နိမိရာဇာ ဝိဒေဟာနံ၊ ပဉ္စာလာနဉ္စ ဒုမ္မုခေါ။
ဧတေ ရဋ္ဌာနိ ဟိတွာန၊ ပဗ္ဗဇိံသု အကိဉ္စနာ။
၉၅။
သဗ္ဗေပိမေ ဒေဝသမာ သမာဂတာ၊ အဂ္ဂီ ယထာ ပဇ္ဇလိတော တထေဝိမေ။
အဟမ္ပိ ဧကော စရိဿာမိ ဘဂ္ဂဝိ၊ ဟိတွာန ကာမာနိ ယထောဓိကာနိ။
၉၆။
အယမေဝ ကာလော န ဟိ အညော အတ္ထိ၊ အနုသာသိတာ မေ န ဘဝေယျ ပစ္ဆာ။
အဟမ္ပိ ဧကာ စရိဿာမိ ဘဂ္ဂဝ၊ သကုဏီဝ မုတ္တာ ပုရိသဿ ဟတ္ထာ။
၉၇။
အာမံ ပက္ကဉ္စ ဇာနန္တိ၊ အထော လောဏံ အလောဏကံ။
တမဟံ ဒိသွာန ပဗ္ဗဇိံ၊ စရေဝ တွံ စရာမဟန္တိ။
ကုမ္ဘကာရဇာတကံ တတိယံ။
၄၀၉။ ဒဠှဓမ္မဇာတကံ (၇-၂-၄)
၉၈။
အဟံ စေ ဒဠှဓမ္မဿ [ဒဠှဓမ္မာယ (ဣ။)]၊ ဝဟန္တိ နာဘိရာဓယိံ။
ဓရန္တီ ဥရသိ သလ္လံ၊ ယုဒ္ဓေ ဝိက္ကန္တစာရိနီ။
၉၉။
နူန ရာဇာ န ဇာနာတိ [န ဟ နူန ရာဇာ ဇာနာတိ (သီ။ ဣ။)]၊ မမ ဝိက္ကမပေါရိသံ။
သင်္ဂါမေ သုကတန္တာနိ၊ ဒူတဝိပ္ပဟိတာနိ စ။
၁၀၀။
သာ နူနာဟံ မရိဿာမိ၊ အဗန္ဓု အပရာယိနီ [အပရာယိဏီ (သီ။)၊ အပရာယဏီ (?)]။
တဒါ ဟိ [တထာ ဟိ (ဣ။)] ကုမ္ဘကာရဿ၊ ဒိန္နာ ဆကဏဟာရိကာ။
၁၀၁။
ယာဝတာသီသတီ ပေါသော၊ တာဝဒေဝ ပဝီဏတိ။
အတ္ထာပါယေ ဇဟန္တိ နံ၊ ဩဋ္ဌိဗျာဓိံဝ ခတ္တိယော။
၁၀၂။
ယော ပုဗ္ဗေ ကတကလျာဏော၊ ကတတ္ထော နာဝဗုဇ္ဈတိ။
အတ္ထာ တဿ ပလုဇ္ဇန္တိ၊ ယေ ဟောန္တိ အဘိပတ္ထိတာ။
၁၀၃။
ယော ပုဗ္ဗေ ကတကလျာဏော၊ ကတတ္ထော မနုဗုဇ္ဈတိ။
အတ္ထာ တဿ ပဝဍ္ဎန္တိ၊ ယေ ဟောန္တိ အဘိပတ္ထိတာ။
၁၀၄။
တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ။ သျာ။ ဣ။)]၊ ယာဝန္တေတ္ထ သမာဂတာ။
သဗ္ဗေ ကတညုနော ဟောထ၊ စိရံ သဂ္ဂမှိ ဌဿထာတိ။
ဒဠှဓမ္မဇာတကံ စတုတ္ထံ။
၄၁၀။ သောမဒတ္တဇာတကံ (၇-၂-၅)
၁၀၅။
ယော မံ ပုရေ ပစ္စုဍ္ဍေတိ [ပစ္စုဒေတိ (သီ။ သျာ။ ဣ။)၊ ပစ္စုဋ္ဌေတိ (က။)]၊ အရညေ ဒူရမာယတော။
သော န ဒိဿတိ မာတင်္ဂေါ၊ သောမဒတ္တော ကုဟိံ ဂတော။
၁၀၆။
အယံ ဝါ သော မတော သေတိ၊ အလ္လသိင်္ဂံဝ ဝစ္ဆိတော [အလ္လပိင်္ကဝ ဆိဇ္ဇိတော (သီ။ ဣ။)၊ အလ္လဣတံဝ ဝိစ္ဆိတော (သျာ။)]။
ဘုမ္ယာ နိပတိတော သေတိ၊ အမရာ ဝတ ကုဉ္ဇရော။
၁၀၇။
အနဂါရိယုပေတဿ၊ ဝိပ္ပမုတ္တဿ တေ သတော။
သမဏဿ န တံ သာဓု၊ ယံ ပေတမနုသောစသိ။
၁၀၈။
သံဝါသေန ဟဝေ သက္က၊ မနုဿဿ မိဂဿ ဝါ။
ဟဒယေ ဇာယတေ ပေမံ၊ တံ န သက္ကာ အသောစိတုံ။
၁၀၉။
မတံ မရိဿံ ရောဒန္တိ၊ ယေ ရုဒန္တိ လပန္တိ စ။
တသ္မာ တွံ ဣသိ မာ ရောဒိ၊ ရောဒိတံ မောဃမာဟု သန္တော။
၁၁၀။
ကန္ဒိတေန ဟဝေ ဗြဟ္မေ၊ မတော ပေတော သမုဋ္ဌဟေ။
သဗ္ဗေ သင်္ဂမ္မ ရောဒါမ၊ အညမညဿ ဉာတကေ။
၁၁၁။
အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ။
ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။
၁၁၂။
အဗ္ဗဟီ ဝတ မေ သလ္လံ၊ ယမာသိ ဟဒယဿိတံ။
ယော မေ သောကပရေတဿ၊ ပုတ္တသောကံ အပါနုဒိ။
၁၁၃။
သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော။
န သောစာမိ န ရောဒါမိ၊ တဝ သုတွာန ဝါသဝါတိ။
သောမဒတ္တဇာတကံ ပဉ္စမံ။
၄၁၁။ သုသီမဇာတကံ (၇-၂-၆)
၁၁၄။
ကာဠာနိ ကေသာနိ ပုရေ အဟေသုံ၊ ဇာတာနိ သီသမှိ ယထာပဒေသေ။
တာနဇ္ဇ သေတာနိ သုသီမ [သုသိမ (က။)] ဒိသွာ၊ ဓမ္မံ စရ ဗြဟ္မစရိယဿ ကာလော။
၁၁၅။
မမေဝ ဒေဝ ပလိတံ န တုယှံ၊ မမေဝ သီသံ မမ ဥတ္တမင်္ဂံ။
‘‘အတ္ထံ ကရိဿ’’န္တိ မုသာ အဘာဏိံ [အဘာသိံ (က။)]၊ ဧကာပရာဓံ ခမ ရာဇသေဋ္ဌ။
၁၁၆။
ဒဟရော တုဝံ ဒဿနိယောသိ ရာဇ၊ ပဌမုဂ္ဂတော ဟောသိ [ဟောဟိ (သီ။)၊ ဟောတိ (က။)] ယထာ ကဠီရော။
ရဇ္ဇဉ္စ ကာရေဟိ မမဉ္စ ပဿ၊ မာ ကာလိကံ အနုဓါဝီ ဇနိန္ဒ။
၁၁၇။
ပဿာမိ ဝေါဟံ ဒဟရိံ ကုမာရိံ၊ သာမဋ္ဌပဿံ သုတနုံ သုမဇ္ဈံ။
ကာဠပ္ပဝါဠာဝ ပဝေလ္လမာနာ၊ ပလောဘယန္တီဝ [သာ လောဘယန္တီဝ (ဣ။)] နရေသု ဂစ္ဆတိ။
၁၁၈။
တမေန ပဿာမိပရေန နာရိံ၊ အာသီတိကံ နာဝုတိကံ ဝ ဇစ္စာ။
ဒဏ္ဍံ ဂဟေတွာန ပဝေဓမာနံ၊ ဂေါပါနသီဘောဂ္ဂသမံ စရန္တိံ။
၁၁၉။
သောဟံ တမေဝါနုဝိစိန္တယန္တော၊ ဧကော သယာမိ [ပဿာမိ (က။)] သယနဿ မဇ္ဈေ။
‘‘အဟမ္ပိ ဧဝံ’’ ဣတိ ပေက္ခမာနော၊ န ဂဟေ ရမေ [န ဂေဟေ ရမေ (သီ။)၊ ဂေဟေ န ရမေ (သျာ။ က။)] ဗြဟ္မစရိယဿ ကာလော။
၁၂၀။
ရဇ္ဇုဝါလမ္ဗနီ စေသာ၊ ယာ ဂေဟေ ဝသတော ရတိ။
ဧဝမ္ပိ ဆေတွာန ဝဇန္တိ ဓီရာ၊ အနပေက္ခိနော ကာမသုခံ ပဟာယာတိ။
သုသီမဇာတကံ ဆဋ္ဌံ။
၄၁၂။ ကောဋသိမ္ဗလိဇာတကံ (၇-၂-၇)
၁၂၁။
အဟံ ဒသသတံဗျာမံ၊ ဥရဂမာဒါယ အာဂတော။
တဉ္စ မဉ္စ မဟာကာယံ၊ ဓါရယံ နပ္ပဝေဓသိ [န ပဝေဓယိ (က။)]။
၁၂၂။
အထိမံ ခုဒ္ဒကံ ပက္ခိံ၊ အပ္ပမံသတရံ မယာ။
ဓါရယံ ဗျထသိ [ဗျာဓသေ (သီ။)၊ ဗျဓသေ (ဣ။)၊ ဗျာဓသိ (က။)] ဘီတာ [ဘီတော (သီ။ သျာ။ ဣ။)]၊ ကမတ္ထံ ကောဋသိမ္ဗလိ [ကောဋိသိမ္ဗလိ (သီ။ ဣ။)]။
၁၂၃။
မံသဘက္ခော တုဝံ ရာဇ၊ ဖလဘက္ခော အယံ ဒိဇော။
အယံ နိဂြောဓဗီဇာနိ၊ ပိလက္ခုဒုမ္ဗရာနိ စ။
အဿတ္ထာနိ စ ဘက္ခိတွာ၊ ခန္ဓေ မေ ဩဟဒိဿတိ။
၁၂၄။
တေ ရုက္ခာ သံဝိရူဟန္တိ၊ မမ ပဿေ နိဝါတဇာ။
တေ မံ ပရိယောနန္ဓိဿန္တိ၊ အရုက္ခံ မံ ကရိဿရေ။
၁၂၅။
သန္တိ အညေပိ ရုက္ခာ သေ၊ မူလိနော ခန္ဓိနော ဒုမာ။
ဣမိနာ သကုဏဇာတေန၊ ဗီဇမာဟရိတာ ဟတာ။
၁၂၆။
အဇ္ဈာရူဟာဘိဝဍ္ဎန္တိ [အဇ္ဈာရူဠှာဘိဝဍ္ဎန္တိ (သီ။ ဣ။)]၊ ဗြဟန္တမ္ပိ ဝနပ္ပတိံ။
တသ္မာ ရာဇ ပဝေဓါမိ၊ သမ္ပဿံနာဂတံ ဘယံ။
၁၂၇။
သင်္ကေယျ သင်္ကိတဗ္ဗာနိ၊ ရက္ခေယျာနာဂတံ ဘယံ။
အနာဂတဘယာ ဓီရော၊ ဥဘော လောကေ အဝေက္ခတီတိ။
ကောဋသိမ္ဗလိဇာတကံ သတ္တမံ။
၄၁၃။ ဓူမကာရိဇာတကံ (၇-၂-၈)
၁၂၈။
ရာဇာ အပုစ္ဆိ ဝိဓုရံ၊ ဓမ္မကာမော ယုဓိဋ္ဌိလော။
အပိ ဗြာဟ္မဏ ဇာနာသိ၊ ကော ဧကော ဗဟု သောစတိ။
၁၂၉။
ဗြာဟ္မဏော အဇယူထေန၊ ပဟူတေဓေါ [ဗဟူတေဇော (ဣ။ က။)၊ ဗဟုတေန္ဒော (သျာ။)] ဝနေ ဝသံ။
ဓူမံ အကာသိ ဝါသေဋ္ဌော၊ ရတ္တိန္ဒိဝမတန္ဒိတော။
၁၃၀။
တဿ တံ ဓူမဂန္ဓေန၊ သရဘာ မကသဍ္ဍိတာ [မကသဒ္ဒိတာ (သီ။ သျာ။)၊ မကသဋ္ဋိတာ (ဣ။ က။)]။
ဝဿာဝါသံ ဥပါဂစ္ဆုံ၊ ဓူမကာရိဿ သန္တိကေ။
၁၃၁။
သရဘေသု မနံ ကတွာ၊ အဇာ သော နာဝဗုဇ္ဈထ။
အာဂစ္ဆန္တီ ဝဇန္တီ ဝါ [အာဂစ္ဆန္တိ ဝဇန္တိ ဝါ (သျာ။ ဣ။)၊ အာဂစ္ဆန္တိံ ဝဇန္တိံ ဝါ (က။)]၊ တဿ တာ ဝိနသုံ [ဝိနဿုံ (သီ။)] အဇာ။
၁၃၂။
သရဘာ သရဒေ ကာလေ၊ ပဟီနမကသေ ဝနေ။
ပါဝိသုံ ဂိရိဒုဂ္ဂါနိ၊ နဒီနံ ပဘဝါနိ စ။
၁၃၃။
သရဘေ စ ဂတေ ဒိသွာ၊ အဇာ စ ဝိဘဝံ ဂတာ [အဇေ စ ဝိဘဝံ ဂတေ (က။)]။
ကိသော စ ဝိဝဏ္ဏော စာသိ၊ ပဏ္ဍုရောဂီ စ ဗြာဟ္မဏော။
၁၃၄။
ဧဝံ ယော သံ နိရံကတွာ၊ အာဂန္တုံ ကုရုတေ ပိယံ။
သော ဧကော ဗဟု သောစတိ၊ ဓူမကာရီဝ ဗြာဟ္မဏောတိ။
ဓူမကာရိဇာတကံ အဋ္ဌမံ။
၄၁၄။ ဇာဂရဇာတကံ (၇-၂-၉)
၁၃၅။
ကောဓ ဇာဂရတံ သုတ္တော၊ ကောဓ သုတ္တေသု ဇာဂရော။
ကော မမေတံ ဝိဇာနာတိ၊ ကော တံ ပဋိဘဏာတိ မေ။
၁၃၆။
အဟံ ဇာဂရတံ သုတ္တော၊ အဟံ သုတ္တေသု ဇာဂရော။
အဟမေတံ ဝိဇာနာမိ၊ အဟံ ပဋိဘဏာမိ တေ။
၁၃၇။
ကထံ ဇာဂရတံ သုတ္တော၊ ကထံ သုတ္တေသု ဇာဂရော။
ကထံ ဧတံ ဝိဇာနာသိ၊ ကထံ ပဋိဘဏာသိ မေ။
၁၃၈။
ယေ ဓမ္မံ နပ္ပဇာနန္တိ၊ သံယမောတိ ဒမောတိ စ။
တေသု သုပ္ပမာနေသု၊ အဟံ ဇဂ္ဂါမိ ဒေဝတေ။
၁၃၉။
ယေသံ ရာဂေါ စ ဒေါသော စ၊ အဝိဇ္ဇာ စ ဝိရာဇိတာ။
တေသု ဇာဂရမာနေသု၊ အဟံ သုတ္တောသ္မိ ဒေဝတေ။
၁၄၀။
ဧဝံ ဇာဂရတံ သုတ္တော၊ ဧဝံ သုတ္တေသု ဇာဂရော။
ဧဝမေတံ ဝိဇာနာမိ၊ ဧဝံ ပဋိဘဏာမိ တေ။
၁၄၁။
သာဓု ဇာဂရတံ သုတ္တော၊ သာဓု သုတ္တေသု ဇာဂရော။
သာဓုမေတံ ဝိဇာနာသိ၊ သာဓု ပဋိဘဏာသိ မေတိ။
ဇာဂရဇာတကံ နဝမံ။
၄၁၅။ ကုမ္မာသပိဏ္ဍိဇာတကံ (၇-၂-၁၀)
၁၄၂။
န ကိရတ္ထိ အနောမဒဿိသု၊ ပါရိစရိယာ ဗုဒ္ဓေသု အပ္ပိကာ [အပ္ပကာ (က။)]။
သုက္ခာယ အလောဏိကာယ စ၊ ပဿဖလံ ကုမ္မာသပိဏ္ဍိယာ။
၁၄၃။
ဟတ္ထိဂဝဿာ စိမေ ဗဟူ [ဟတ္ထိဂဝါဿာ စ မေ ဗဟူ (သီ။)၊ ဟတ္ထီ ဂဝါဿာ စိမေ ဗဟူ (သျာ။)၊ ဟတ္ထီ ဂဝါဿာ စ မေ ဗဟူ (ဣ။)]၊ ဓနဓညံ ပထဝီ စ ကေဝလာ။
နာရိယော စိမာ အစ္ဆရူပမာ၊ ပဿဖလံ ကုမ္မာသပိဏ္ဍိယာ။
၁၄၄။
အဘိက္ခဏံ ရာဇကုဉ္ဇရ၊ ဂါထာ ဘာသသိ ကောသလာဓိပ။
ပုစ္ဆာမိ တံ ရဋ္ဌဝဍ္ဎန၊ ဗာဠှံ ဣတိမနော ပဘာသသိ။
၁၄၅။
ဣမသ္မိညေဝ နဂရေ၊ ကုလေ အညတရေ အဟုံ။
ပရကမ္မကရော အာသိံ၊ ဘတကော သီလသံဝုတော။
၁၄၆။
ကမ္မာယ နိက္ခမန္တောဟံ၊ စတုရော သမဏေဒ္ဒသံ။
အာစာရသီလသမ္ပန္နေ၊ သီတိဘူတေ အနာသဝေ။
၁၄၇။
တေသု စိတ္တံ ပသာဒေတွာ၊ နိသီဒေတွာ [နိသာဒေတွာ (?)] ပဏ္ဏသန္ထတေ။
အဒံ ဗုဒ္ဓါန ကုမ္မာသံ၊ ပသန္နော သေဟိ ပါဏိဘိ။
၁၄၈။
တဿ ကမ္မဿ ကုသလဿ၊ ဣဒံ မေ ဧဒိသံ ဖလံ။
အနုဘောမိ ဣဒံ ရဇ္ဇံ၊ ဖီတံ ဓရဏိမုတ္တမံ။
၁၄၉။
ဒဒံ ဘုဉ္ဇ မာ စ ပမာဒေါ [ဒဒ ဘုဉ္ဇ စ မာ စ ပမာဒေါ (သီ။ ဣ။)]၊ စက္ကံ ဝတ္တယ ကောသလာဓိပ။
မာ ရာဇ အဓမ္မိကော အဟု၊ ဓမ္မံ ပါလယ ကောသလာဓိပ။
၁၅၀။
သောဟံ တဒေဝ ပုနပ္ပုနံ၊ ဝဋုမံ အာစရိဿာမိ သောဘနေ။
အရိယာစရိတံ သုကောသလေ၊ အရဟန္တော မေ မနာပါဝ ပဿိတုံ။
၁၅၁။
ဒေဝီ ဝိယ အစ္ဆရူပမာ၊ မဇ္ဈေ နာရိဂဏဿ သောဘသိ။
ကိံ ကမ္မမကာသိ ဘဒ္ဒကံ၊ ကေနာသိ ဝဏ္ဏဝတီ သုကောသလေ။
၁၅၂။
အမ္ဗဋ္ဌကုလဿ ခတ္တိယ၊ ဒါသျာဟံ ပရပေသိယာ အဟုံ။
သညတာ စ [သညတာ (သီ။ ဣ။)] ဓမ္မဇီဝိနီ၊ သီလဝတီ စ အပါပဒဿနာ။
၁၅၃။
ဥဒ္ဓဋဘတ္တံ အဟံ တဒါ၊ စရမာနဿ အဒါသိ ဘိက္ခုနော။
ဝိတ္တာ သုမနာ သယံ အဟံ၊ တဿ ကမ္မဿ ဖလံ မမေဒိသန္တိ။
ကုမ္မာသပိဏ္ဍိဇာတကံ ဒသမံ။
၄၁၆။ ပရန္တပဇာတကံ (၇-၂-၁၁)
၁၅၄။
အာဂမိဿတိ မေ ပါပံ၊ အာဂမိဿတိ မေ ဘယံ။
တဒါ ဟိ စလိတာ သာခါ၊ မနုဿေန မိဂေန ဝါ။
၁၅၅။
ဘီရုယာ နူန မေ ကာမော၊ အဝိဒူရေ ဝသန္တိယာ။
ကရိဿတိ ကိသံ ပဏ္ဍုံ၊ သာဝ သာခါ ပရန္တပံ။
၁၅၆။
သောစယိဿတိ မံ ကန္တာ၊ ဂါမေ ဝသမနိန္ဒိတာ။
ကရိဿတိ ကိသံ ပဏ္ဍုံ၊ သာဝ သာခါ ပရန္တပံ။
၁၅၇။
တယာ မံ အသိတာပင်္ဂိ [ဟသိတာပင်္ဂိ (သီ။ သျာ။ ဣ။)]၊ သိတာနိ [မိဟိတာနိ (သီ။ သျာ။ ဣ။)] ဘဏိတာနိ စ။
ကိသံ ပဏ္ဍုံ ကရိဿန္တိ၊ သာဝ သာခါ ပရန္တပံ။
၁၅၈။
အဂမာ နူန သော သဒ္ဒေါ၊ အသံသိ နူန သော တဝ။
အက္ခာတံ နူန တံ တေန၊ ယော တံ သာခမကမ္ပယိ။
၁၅၉။
ဣဒံ ခေါ တံ သမာဂမ္မ၊ မမ ဗာလဿ စိန္တိတံ။
တဒါ ဟိ စလိတာ သာခါ၊ မနုဿေန မိဂေန ဝါ။
၁၆၀။
တထေဝ တွံ အဝေဒေသိ၊ အဝဉ္စိ [အဝဇ္ဈိ (က။)] ပိတရံ မမ။
ဟန္တွာ သာခါဟိ ဆာဒေန္တော၊ အာဂမိဿတိ မေ [တေ (သျာ။ က။)] ဘယန္တိ။
ပရန္တပဇာတကံ ဧကာဒသမံ။
ဂန္ဓာရဝဂ္ဂေါ ဒုတိယော။
တဿုဒ္ဒါနံ –
ဝရဂါမ မဟာကပိ ဘဂ္ဂဝ စ၊ ဒဠှဓမ္မ သကုဉ္ဇရ ကေသဝရော။
ဥရဂေါ ဝိဓုရော ပုန ဇာဂရတံ၊ အထ ကောသလာဓိပ ပရန္တပ စာတိ။
အထ ဝဂ္ဂုဒ္ဒါနံ –
အထ သတ္တနိပါတမှိ၊ ဝဂ္ဂံ မေ ဘဏတော သုဏ။
ကုက္ကု စ ပုန ဂန္ဓာရော၊ ဒွေဝ ဂုတ္တာ မဟေသိနာတိ။
သတ္တကနိပါတံ နိဋ္ဌိတံ။