၆။ ဆက္ကနိပါတ
၁။ အဝါရိယဝဂ္ဂ
၃၇၆။ အဝါရိယဇာတက (၆-၁-၁)
၁။
မာသု ကုဇ္ဈ ဘူမိပတိ၊ မာသု ကုဇ္ဈ ရထေသဘ။
ကုဒ္ဓံ အပ္ပဋိကုဇ္ဈန္တော၊ ရာဇာ ရဋ္ဌဿ ပူဇိတော။
၂။
ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ။
သဗ္ဗတ္ထ အနုသာသာမိ၊ မာသု ကုဇ္ဈ [မာဿု ကုဇ္ဈိ (သီ။ ဣ။)] ရထေသဘ။
၃။
အဝါရိယပိတာ နာမ၊ အဟု ဂင်္ဂါယ နာဝိကော။
ပုဗ္ဗေ ဇနံ တာရေတွာန၊ ပစ္ဆာ ယာစတိ ဝေတနံ။
တေနဿ ဘဏ္ဍနံ ဟောတိ၊ န စ ဘောဂေဟိ ဝဍ္ဎတိ။
၄။
အတိဏ္ဏံယေဝ ယာစဿု၊ အပါရံ တာတ နာဝိက။
အညော ဟိ တိဏ္ဏဿ မနော၊ အညော ဟောတိ ပါရေသိနော [တရေသိနော (သီ။ ဣ။)၊ တိရေသိနော (သျာ။)]။
၅။
ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ။
သဗ္ဗတ္ထ အနုသာသာမိ၊ မာသု ကုဇ္ဈိတ္ထ နာဝိက။
၆။
ယာယေဝါနုသာသနိယာ၊ ရာဇာ ဂါမဝရံ အဒါ။
တာယေဝါနုသာသနိယာ၊ နာဝိကော ပဟရီ မုခံ။
၇။
ဘတ္တံ ဘိန္နံ ဟတာ ဘရိယာ၊ ဂဗ္ဘော စ ပတိတော ဆမာ။
မိဂေါဝ ဇာတရူပေန၊ န တေနတ္ထံ အဗန္ဓိ သူတိ [အဝဍ္ဎိတုန္တိ (သီ။ သျာ။)၊ အဝဍ္ဎိ သူတိ (?)]။
အဝါရိယဇာတကံ ပဌမံ။
၃၇၇။ သေတကေတုဇာတကံ (၆-၁-၂)
၈။
မာ တာတ ကုဇ္ဈိ န ဟိ သာဓု ကောဓေါ၊ ဗဟုမ္ပိ တေ အဒိဋ္ဌမဿုတဉ္စ။
မာတာ ပိတာ ဒိသတာ [ဒိသာ တာတ (သျာ။)၊ ဒိသာ တာ (ဣ။)] သေတကေတု၊ အာစရိယမာဟု ဒိသတံ ပသတ္ထာ။
၉။
အဂါရိနော အန္နဒပါနဝတ္ထဒါ [အန္နပါနဝတ္ထဒါ (သျာ။ က။)]၊ အဝှာယိကာ တမ္ပိ ဒိသံ ဝဒန္တိ။
ဧသာ ဒိသာ ပရမာ သေတကေတု၊ ယံ ပတွာ ဒုက္ခီ သုခိနော ဘဝန္တိ။
၁၀။
ခရာဇိနာ ဇဋိလာ ပင်္ကဒန္တာ၊ ဒုမ္မက္ခရူပါ [ဒုမုက္ခရူပါ (သီ။ သျာ။)၊ ဒုမ္မုက္ခရူပါ (ဣ။ က။)] ယေမေ ဇပ္ပန္တိ မန္တေ။
ကစ္စိ နု တေ မာနုသကေ ပယောဂေ၊ ဣဒံ ဝိဒူ ပရိမုတ္တာ အပါယာ။
၁၁။
ပါပါနိ ကမ္မာနိ ကတွာန ရာဇ၊ ဗဟုဿုတော စေ န [ဗဟုဿုတော နေဝ (သီ။ သျာ။)] စရေယျ ဓမ္မံ။
သဟဿဝေဒေါပိ န တံ ပဋိစ္စ၊ ဒုက္ခာ ပမုဉ္စေ စရဏံ အပတွာ။
၁၂။
သဟဿဝေဒေါပိ န တံ ပဋိစ္စ၊ ဒုက္ခာ ပမုဉ္စေ စရဏံ အပတွာ။
မညာမိ ဝေဒါ အဖလာ ဘဝန္တိ၊ သသံယမံ စရဏမေဝ [စရဏညေဝ (သီ။ သျာ။ ဣ။)] သစ္စံ။
၁၃။
န ဟေဝ ဝေဒါ အဖလာ ဘဝန္တိ၊ သသံယမံ စရဏမေဝ သစ္စံ။
ကိတ္တိဉှိ ပပ္ပောတိ အဓိစ္စ ဝေဒေ၊ သန္တိံ ပုဏေတိ [သန္တံ ပုနေ’တိ (သီ။ ဣ။)] စရဏေန ဒန္တောတိ။
သေတကေတုဇာတကံ ဒုတိယံ။
၃၇၈။ ဒရီမုခဇာတကံ (၆-၁-၃)
၁၄။
ပင်္ကော စ ကာမာ ပလိပေါ စ ကာမာ၊ ဘယဉ္စ မေတံ တိမူလံ ပဝုတ္တံ။
ရဇော စ ဓူမော စ မယာ ပကာသိတာ၊ ဟိတွာ တုဝံ ပဗ္ဗဇ ဗြဟ္မဒတ္တ။
၁၅။
ဂဓိတော [ဂထိတော (သီ။)] စ ရတ္တော စ အဓိမုစ္ဆိတော စ၊ ကာမေသွဟံ ဗြာဟ္မဏ ဘိံသရူပံ။
တံ နုဿဟေ ဇီဝိကတ္ထော ပဟာတုံ၊ ကာဟာမိ ပုညာနိ အနပ္ပကာနိ။
၁၆။
ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ။
ဣဒမေဝ သေယျော ဣတိ မညမာနော၊ ပုနပ္ပုနံ ဂဗ္ဘမုပေတိ မန္ဒော။
၁၇။
သော ဃောရရူပံ နိရယံ ဥပေတိ၊ သုဘာသုဘံ မုတ္တကရီသပူရံ။
သတ္တာ သကာယေ န ဇဟန္တိ ဂိဒ္ဓါ၊ ယေ ဟောန္တိ ကာမေသု အဝီတရာဂါ။
၁၈။
မီဠ္ဟေန လိတ္တာ ရုဟိရေန မက္ခိတာ၊ သေမှေန လိတ္တာ ဥပနိက္ခမန္တိ။
ယံ ယဉှိ ကာယေန ဖုသန္တိ တာဝဒေ၊ သဗ္ဗံ အသာတံ ဒုခမေဝ ကေဝလံ။
၁၉။
ဒိသွာ ဝဒါမိ န ဟိ အညတော သဝံ၊ ပုဗ္ဗေနိဝါသံ ဗဟုကံ သရာမိ။
စိတြာဟိ ဂါထာဟိ သုဘာသိတာဟိ၊ ဒရီမုခေါ နိဇ္ဈာပယိ သုမေဓန္တိ။
ဒရီမုခဇာတကံ တတိယံ။
၃၇၉။ နေရုဇာတကံ (၆-၁-၄)
၂၀။
ကာကောလာ ကာကသံဃာ စ၊ မယဉ္စ ပတတံ ဝရာ [ဝရ (က။) မယန္တိပဒဿ ဟိ ဝိသေသနံ]။
သဗ္ဗေဝ သဒိသာ ဟောမ၊ ဣမံ အာဂမ္မ ပဗ္ဗတံ။
၂၁။
ဣဓ သီဟာ စ ဗျဂ္ဃါ စ၊ သိင်္ဂါလာ စ မိဂါဓမာ။
သဗ္ဗေဝ သဒိသာ ဟောန္တိ၊ အယံ ကော နာမ ပဗ္ဗတော။
၂၂။
ဣမံ နေရူတိ [နေရုန္တိ (သီ။ သျာ။)] ဇာနန္တိ၊ မနုဿာ ပဗ္ဗတုတ္တမံ။
ဣဓ ဝဏ္ဏေန သမ္ပန္နာ၊ ဝသန္တိ သဗ္ဗပါဏိနော။
၂၃။
အမာနနာ ယတ္ထ သိယာ၊ သန္တာနံ ဝါ ဝိမာနနာ။
ဟီနသမ္မာနနာ ဝါပိ၊ န တတ္ထ ဝသတိံ ဝသေ [ဝသတီ ဝသေ (သျာ။)၊ ဝသ ဒိဝသေ (ဣ။)]။
၂၄။
ယတ္ထာလသော စ ဒက္ခော စ၊ သူရော ဘီရု စ ပူဇိယာ။
န တတ္ထ သန္တော ဝသန္တိ၊ အဝိသေသကရေ နရေ [နဂေ (သီ။ သျာ။ ဣ။)]။
၂၅။
နာယံ နေရု ဝိဘဇတိ၊ ဟီနဥက္ကဋ္ဌမဇ္ဈိမေ။
အဝိသေသကရော နေရု၊ ဟန္ဒ နေရုံ ဇဟာမသေတိ။
နေရုဇာတကံ စတုတ္ထံ။
၃၈၀။ အာသင်္ကဇာတကံ (၆-၁-၅)
၂၆။
အာသာဝတီ နာမ လတာ၊ ဇာတာ စိတ္တလတာဝနေ။
တဿာ ဝဿသဟဿေန၊ ဧကံ နိဗ္ဗတ္တတေ ဖလံ။
၂၇။
တံ ဒေဝါ ပယိရုပါသန္တိ၊ တာဝ ဒူရဖလံ သတိံ။
အာသီသေဝ [အာသိံသေဝ (သီ။ သျာ။ ဣ။)] တုဝံ ရာဇ၊ အာသာ ဖလဝတီ သုခါ။
၂၈။
အာသီသတေဝ [အာသိံသေထေဝ (သီ။ သျာ။ ဣ။)] သော ပက္ခီ၊ အာသီသတေဝ [အာသိံသေထေဝ (သီ။ သျာ။ ဣ။)] သော ဒိဇော။
တဿ စာသာ [တဿေဝါသာ (သျာ။)] သမိဇ္ဈတိ၊ တာဝ ဒူရဂတာ သတီ။
အာသီသေဝ တုဝံ ရာဇ၊ အာသာ ဖလဝတီ သုခါ။
၂၉။
သမ္ပေသိ ခေါ မံ ဝါစာယ၊ န စ သမ္ပေသိ [သံသေသိ (က။)] ကမ္မုနာ။
မာလာ သေရေယျကဿေဝ၊ ဝဏ္ဏဝန္တာ အဂန္ဓိကာ။
၃၀။
အဖလံ မဓုရံ ဝါစံ၊ ယော မိတ္တေသု ပကုဗ္ဗတိ။
အဒဒံ အဝိဿဇံ ဘောဂံ၊ သန္ဓိ တေနဿ ဇီရတိ။
၃၁။
ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ။
အကရောန္တံ ဘာသမာနံ၊ ပရိဇာနန္တိ ပဏ္ဍိတာ။
၃၂။
ဗလဉ္စ ဝတ မေ ခီဏံ၊ ပါထေယျဉ္စ န ဝိဇ္ဇတိ။
သင်္ကေ ပါဏူပရောဓါယ၊ ဟန္ဒ ဒါနိ ဝဇာမဟံ။
၃၃။
ဧတဒေဝ ဟိ မေ နာမံ၊ ယံ နာမသ္မိ ရထေသဘ။
အာဂမေဟိ မဟာရာဇ၊ ပိတရံ အာမန္တယာမဟန္တိ။
အာသင်္ကဇာတကံ ပဉ္စမံ။
၃၈၁။ မိဂါလောပဇာတကံ (၆-၁-၆)
၃၄။
န မေ ရုစ္စိ မိဂါလောပ၊ ယဿ တေ တာဒိသီ ဂတီ။
အတုစ္စံ တာတ ပတသိ၊ အဘူမိံ တာတ သေဝသိ။
၃၅။
စတုက္ကဏ္ဏံဝ ကေဒါရံ၊ ယဒါ တေ ပထဝီ သိယာ။
တတော တာတ နိဝတ္တဿု၊ မာဿု ဧတ္တော ပရံ ဂမိ။
၃၆။
သန္တိ အညေပိ သကုဏာ၊ ပတ္တယာနာ ဝိဟင်္ဂမာ။
အက္ခိတ္တာ ဝါတဝေဂေန၊ နဋ္ဌာ တေ သဿတီသမာ။
၃၇။
အကတွာ အပနန္ဒဿ [အပရဏ္ဏဿ (သီ။ သျာ။ ဣ။)]၊ ပိတု ဝုဒ္ဓဿ သာသနံ။
ကာလဝါတေ အတိက္ကမ္မ၊ ဝေရမ္ဘာနံ ဝသံ အဂါ [ဂတော (သီ။)]။
၃၈။
တဿ ပုတ္တာ စ ဒါရာ စ၊ ယေ စညေ အနုဇီဝိနော။
သဗ္ဗေ ဗျသနမာပါဒုံ၊ အနောဝါဒကရေ ဒိဇေ။
၃၉။
ဧဝမ္ပိ ဣဓ ဝုဒ္ဓါနံ၊ ယော ဝါက္ယံ နာဝဗုဇ္ဈတိ။
အတိသီမစရော [အတိသီမံ စရော (သီ။ သျာ။ က။)] ဒိတ္တော၊ ဂိဇ္ဈောဝါတီတသာသနော။
သဗ္ဗေ ဗျသနံ ပပ္ပောန္တိ၊ အကတွာ ဗုဒ္ဓသာသနန္တိ။
မိဂါလောပဇာတကံ ဆဋ္ဌံ။
၃၈၂။ သိရိကာဠကဏ္ဏိဇာတကံ (၆-၁-၇)
၄၀။
ကာ နု ကာဠေန ဝဏ္ဏေန၊ န စာပိ [န စာသိ (သီ။)] ပိယဒဿနာ။
ကာ ဝါ တွံ ကဿ ဝါ ဓီတာ၊ ကထံ ဇာနေမု တံ မယံ။
၄၁။
မဟာရာဇဿဟံ ဓီတာ၊ ဝိရူပက္ခဿ စဏ္ဍိယာ။
အဟံ ကာဠီ အလက္ခိကာ၊ ကာဠကဏ္ဏီတိ မံ ဝိဒူ။
ဩကာသံ ယာစိတော ဒေဟိ၊ ဝသေမု တဝ သန္တိကေ။
၄၂။
ကိံသီလေ ကိံသမာစာရေ၊ ပုရိသေ နိဝိသသေ တုဝံ။
ပုဋ္ဌာ မေ ကာဠိ အက္ခာဟိ၊ ကထံ [ယထာ (သီ။ ဣ။)] ဇာနေမု တံ မယံ။
၄၃။
မက္ခီ ပဠာသီ သာရမ္ဘီ၊ ဣဿုကီ မစ္ဆရီ သဌော။
သော မယှံ ပုရိသော ကန္တော၊ လဒ္ဓံ ယဿ ဝိနဿတိ။
၄၄။
ကောဓနော ဥပနာဟီ စ၊ ပိသုဏော စ ဝိဘေဒကော။
ကဏ္ဍကဝါစော [အဏ္ဍကဝါစော (က။ သီ။ ဣ။)] ဖရုသော၊ သော မေ ကန္တတရော တတော။
၄၅။
အဇ္ဇ သုဝေတိ ပုရိသော၊ သဒတ္ထံ နာဝဗုဇ္ဈတိ။
ဩဝဇ္ဇမာနော ကုပ္ပတိ၊ သေယျံ သော အတိမညတိ။
၄၆။
ဒဝပ္ပလုဒ္ဓေါ [ဒေဝပ္ပလုဒ္ဓေါ (က။)၊ ဒဝပ္ပလဒ္ဓေါ (ဣ။)] ပုရိသော၊ သဗ္ဗမိတ္တေဟိ ဓံသတိ။
သော မယှံ ပုရိသော ကန္တော၊ တသ္မိံ ဟောမိ အနာမယာ။
၄၇။
အပေဟိ ဧတ္တော တွံ ကာဠိ၊ နေတံ အမှေသု ဝိဇ္ဇတိ။
အညံ ဇနပဒံ ဂစ္ဆ၊ နိဂမေ ရာဇဓါနိယော။
၄၈။
အဟမ္ပိ ခေါ တံ [စေတံ (သီ။)] ဇာနာမိ၊ နေတံ တုမှေသု ဝိဇ္ဇတိ။
သန္တိ လောကေ အလက္ခိကာ၊ သံဃရန္တိ ဗဟုံ ဓနံ။
အဟံ ဒေဝေါ စ မေ ဘာတာ၊ ဥဘော နံ ဝိဓမာမသေ။
၄၉။
ကာ နု ဒိဗ္ဗေန ဝဏ္ဏေန၊ ပထဗျာ သုပတိဋ္ဌိတာ။
ကာ ဝါ တွံ ကဿ ဝါ ဓီတာ၊ ကထံ ဇာနေမု တံ မယံ။
၅၀။
မဟာရာဇဿဟံ ဓီတာ၊ ဓတရဋ္ဌဿ သိရီမတော [ဓတရဋ္ဌသိရီမတော (သျာ။ က။)]။
အဟံ သိရီ စ လက္ခီ စ၊ ဘူရိပညာတိ မံ ဝိဒူ။
ဩကာသံ ယာစိတော ဒေဟိ၊ ဝသေမု တဝ သန္တိကေ။
၅၁။
ကိံသီလေ ကိံသမာစာရေ၊ ပုရိသေ နိဝိသသေ တုဝံ။
ပုဋ္ဌာ မေ လက္ခိ အက္ခာဟိ၊ ကထံ [ယထာ (သီ။ ဣ။)] ဇာနေမု တံ မယံ။
၅၂။
ယော စာပိ သီတေ အထဝါပိ ဥဏှေ၊ ဝါတာတပေ ဍံသသရီသပေ စ။
ခုဓံ [ခုဒ္ဒံ (သျာ။ က။)၊ ခုဒံ (ဣ။)] ပိပါသံ အဘိဘုယျ သဗ္ဗံ၊ ရတ္တိန္တိဝံ ယော သတတံ နိယုတ္တော။
ကာလာဂတဉ္စ န ဟာပေတိ အတ္ထံ၊ သော မေ မနာပေါ နိဝိသေ စ တမှိ။
၅၃။
အက္ကောဓနော မိတ္တဝါ စာဂဝါ စ၊ သီလူပပန္နော အသဌောဇုဘူတော [အသဌော ဥဇ္ဇုဘူတော (ဣ။)]။
သင်္ဂါဟကော သခိလော သဏှဝါစော၊ မဟတ္တပတ္တောပိ နိဝါတဝုတ္တိ။
တသ္မိံဟံ [တသ္မာဟံ (သီ။ ဣ။)] ပေါသေ ဝိပုလာ ဘဝါမိ၊ ဦမိ သမုဒ္ဒဿ ယထာပိ ဝဏ္ဏံ။
၅၄။
ယော စာပိ မိတ္တေ အထဝါ အမိတ္တေ၊ သေဋ္ဌေ သရိက္ခေ အထ ဝါပိ ဟီနေ။
အတ္ထံ စရန္တံ အထဝါ အနတ္ထံ၊ အာဝီ ရဟော သင်္ဂဟမေဝ ဝတ္တေ [ဝတ္တော (သျာ။ က။)]။
ဝါစံ န ဝဇ္ဇာ ဖရုသံ ကဒါစိ၊ မတဿ ဇီဝဿ စ တဿ ဟောမိ။
၅၅။
ဧတေသံ ယော အညတရံ လဘိတွာ၊ ကန္တာ သိရီ [ကန္တသိရိံ (ကတ္ထစိ)၊ ကန္တံ သိရိံ (သျာ။) အဋ္ဌကထာယံ ဒုတိယတတိယပါဌန္တရာနိ] မဇ္ဇတိ အပ္ပပညော။
တံ ဒိတ္တရူပံ ဝိသမံ စရန္တံ၊ ကရီသဌာနံဝ [ကရီသဇာတံ ဝ (သီ။ သျာ။)] ဝိဝဇ္ဇယာမိ။
၅၆။
အတ္တနာ ကုရုတေ လက္ခိံ၊ အလက္ခိံ ကုရုတတ္တနာ။
န ဟိ လက္ခိံ အလက္ခိံ ဝါ၊ အညော အညဿ ကာရကောတိ။
သိရိကာဠကဏ္ဏိဇာတကံ သတ္တမံ။
၃၈၃။ ကုက္ကုဋဇာတကံ (၆-၁-၈)
၅၇။
သုစိတ္တပတ္တဆဒန ၊ တမ္ဗစူဠ ဝိဟင်္ဂမ။
ဩရောဟ ဒုမသာခါယ၊ မုဓါ ဘရိယာ ဘဝါမိ တေ။
၅၈။
စတုပ္ပဒီ တွံ ကလျာဏိ၊ ဒွိပဒါဟံ မနောရမေ။
မိဂီ ပက္ခီ အသညုတ္တာ၊ အညံ ပရိယေသ သာမိကံ။
၅၉။
ကောမာရိကာ တေ ဟေဿာမိ၊ မဉ္ဇုကာ ပိယဘာဏိနီ။
ဝိန္ဒ မံ အရိယေန ဝေဒေန၊ သာဝယ မံ ယဒိစ္ဆသိ။
၆၀။
ကုဏပါဒိနိ လောဟိတပေ၊ စောရိ ကုက္ကုဋပေါထိနိ။
န တွံ အရိယေန ဝေဒေန၊ မမံ ဘတ္တာရမိစ္ဆသိ။
၆၁။
ဧဝမ္ပိ စတုရာ [စာတုရာ (သျာ။ က။)] နာရီ၊ ဒိသွာန သဓနံ [ပဝရံ (သီ။ သျာ။ ဣ။)] နရံ။
နေန္တိ သဏှာဟိ ဝါစာဟိ၊ ဗိဠာရီ ဝိယ ကုက္ကုဋံ။
၆၂။
ယော စ ဥပ္ပတိတံ အတ္ထံ၊ န ခိပ္ပမနုဗုဇ္ဈတိ။
အမိတ္တဝသမန္ဝေတိ၊ ပစ္ဆာ စ အနုတပ္ပတိ။
၆၃။
ယော စ ဥပ္ပတိတံ အတ္ထံ၊ ခိပ္ပမေဝ နိဗောဓတိ။
မုစ္စတေ သတ္တုသမ္ဗာဓါ၊ ကုက္ကုဋောဝ ဗိဠာရိယာတိ။
ကုက္ကုဋဇာတကံ အဋ္ဌမံ။
၃၈၄။ ဓမ္မဓဇဇာတကံ (၆-၁-၉)
၆၄။
ဓမ္မံ စရထ ဉာတယော၊ ဓမ္မံ စရထ ဘဒ္ဒံ ဝေါ [ဘဒ္ဒ ဝေါ (က။)]။
ဓမ္မစာရီ သုခံ သေတိ၊ အသ္မိံ လောကေ ပရမှိ စ။
၆၅။
ဘဒ္ဒကော ဝတယံ ပက္ခီ၊ ဒိဇော ပရမဓမ္မိကော။
ဧကပါဒေန တိဋ္ဌန္တော၊ ဓမ္မမေဝါနုသာသတိ။
၆၆။
နာဿ သီလံ ဝိဇာနာထ၊ အနညာယ ပသံသထ။
ဘုတွာ အဏ္ဍဉ္စ ပေါတဉ္စ [ဆာပေ စ (သီ။ ဣ။)]၊ ဓမ္မော ဓမ္မောတိ ဘာသတိ။
၆၇။
အညံ ဘဏတိ ဝါစာယ၊ အညံ ကာယေန ကုဗ္ဗတိ။
ဝါစာယ နော စ ကာယေန၊ န တံ ဓမ္မံ အဓိဋ္ဌိတော။
၆၈။
ဝါစာယ သခိလော မနောဝိဒုဂ္ဂေါ၊ ဆန္နော ကူပသယောဝ ကဏှသပ္ပော။
ဓမ္မဓဇော ဂါမနိဂမာသုသာဓု [ဂါမနိဂမာသု သာဓုသမ္မတော (သီ။)၊ ဂါမနိဂမသာဓု (ဣ။)]၊ ဒုဇ္ဇာနော ပုရိသေန ဗာလိသေန။
၆၉။
ဣမံ တုဏ္ဍေဟိ ပက္ခေဟိ၊ ပါဒါ စိမံ ဝိဟေဌထ [ဝိပေါထထ (ဣ။)]။
ဆဝဉှိမံ ဝိနာသေထ၊ နာယံ သံဝါသနာရဟောတိ။
ဓမ္မဓဇဇာတကံ နဝမံ။
၃၈၅။ နန္ဒိယမိဂရာဇဇာတကံ (၆-၁-၁၀)
၇၀။
သစေ ဗြာဟ္မဏ ဂစ္ဆေသိ၊ သာကေတေ [သာကေတံ (သီ။ သျာ။)] အဇ္ဇုနံ [အဉ္ဈနံ (သီ။ သျာ။ ဣ။)] ဝနံ။
ဝဇ္ဇာသိ နန္ဒိယံ နာမ၊ ပုတ္တံ အသ္မာကမောရသံ။
မာတာ ပိတာ စ တေ ဝုဒ္ဓါ၊ တေ တံ ဣစ္ဆန္တိ ပဿိတုံ။
၇၁။
ဘုတ္တာ မယာ နိဝါပါနိ၊ ရာဇိနော ပါနဘောဇနံ။
တံ ရာဇပိဏ္ဍံ အဝဘောတ္တုံ [အဝဘောတ္တံ (က။)]၊ နာဟံ ဗြာဟ္မဏ မုဿဟေ။
၇၂။
ဩဒဟိဿာမဟံ ပဿံ၊ ခုရပ္ပါနိဿ [ခုရပ္ပါဏိဿ (သီ။)၊ ခုရပါဏိဿ (ဣ။)၊ ခုရပ္ပပါဏိဿ (?)] ရာဇိနော။
တဒါဟံ သုခိတော မုတ္တော၊ အပိ ပဿေယျ မာတရံ။
၇၃။
မိဂရာဇာ ပုရေ အာသိံ၊ ကောသလဿ နိကေတနေ [နိကေတဝေ (သီ။ သျာ။ ဣ။)]။
နန္ဒိယော နာမ နာမေန၊ အဘိရူပေါ စတုပ္ပဒေါ။
၇၄။
တံ မံ ဝဓိတုမာဂစ္ဆိ၊ ဒါယသ္မိံ အဇ္ဇုနေ ဝနေ။
ဓနုံ အာရဇ္ဇံ [အာရဇ္ဇုံ (နိယျ)၊ အဒေဇ္ဈံ (သီ။ ဣ။) အဒွေဓါဘာဝံ ဧကီဘာဝန္တိ အတ္ထော] ကတွာန၊ ဥသုံ သန္နယှ [သန္ဓာယ (သီ။ ဣ။)] ကောသလော။
၇၅။
တဿာဟံ ဩဒဟိံ ပဿံ၊ ခုရပ္ပါနိဿ ရာဇိနော။
တဒါဟံ သုခိတော မုတ္တော၊ မာတရံ ဒဋ္ဌုမာဂတောတိ။
နန္ဒိယမိဂရာဇဇာတကံ ဒသမံ။
အဝါရိယဝဂ္ဂေါ ပဌမော။
တဿုဒ္ဒါနံ –
အထ ကုဇ္ဈရထေသဘ ကေတုဝရော၊ သဒရီမုခ နေရု လတာ စ ပုန။
အပနန္ဒ သိရီ စ သုစိတ္တဝရော၊ အထ ဓမ္မိက နန္ဒိမိဂေန ဒသာတိ။
၂။ ခရပုတ္တဝဂ္ဂေါ
၃၈၆။ ခရပုတ္တဇာတကံ (၆-၂-၁)
၇၆။
သစ္စံ ကိရေဝမာဟံသု၊ ဝသ္တံ [ဘသ္တံ (သီ။ ဣ။)၊ ကလကံ (သျာ။)၊ ဂရံ (က။)] ဗာလောတိ ပဏ္ဍိတာ။
ပဿ ဗာလော ရဟောကမ္မံ၊ အာဝိကုဗ္ဗံ န ဗုဇ္ဈတိ။
၇၇။
တွံ ခေါပိ [တွံ နု ခေါ (သီ။ သျာ။)၊ တွဉ္စ ခေါ (ဣ။)] သမ္မ ဗာလောသိ၊ ခရပုတ္တ ဝိဇာနဟိ။
ရဇ္ဇုယာ ဟိ [ရဇ္ဇုယာသိ (ဣ။)] ပရိက္ခိတ္တော၊ ဝင်္ကောဋ္ဌော ဩဟိတောမုခေါ။
၇၈။
အပရမ္ပိ သမ္မ တေ ဗာလ္ယံ [အယမ္ပိ သမ္မ တေ ဗာလော (က။)]၊ ယော မုတ္တော န ပလာယသိ။
သော စ ဗာလတရော သမ္မ၊ ယံ တွံ ဝဟသိ သေနကံ။
၇၉။
ယံ နု သမ္မ အဟံ ဗာလော၊ အဇရာဇ ဝိဇာနဟိ။
အထ ကေန သေနကော ဗာလော၊ တံ မေ အက္ခာဟိ ပုစ္ဆိတော။
၈၀။
ဥတ္တမတ္ထံ လဘိတွာန၊ ဘရိယာယ ယော ပဒဿတိ [ဘယိယာ ယော ပဒဿတိ (ဣ။)၊ ဘယိယာ န ဘဝိဿတိ (က။)]။
တေန ဇဟိဿတတ္တာနံ၊ သာ စေဝဿ န ဟေဿတိ။
၈၁။
န ဝေ ပိယမ္မေတိ [န ပိယမေတိ (က။)၊ န ပိယမေဒန္တိ (ကတ္ထစိ)] ဇနိန္ဒ တာဒိသော၊ အတ္တံ နိရံကတွာ ပိယာနိ သေဝတိ [သေဝယေ (?)]။
အတ္တာဝ သေယျော ပရမာ စ သေယျော၊ လဗ္ဘာ ပိယာ ဩစိတတ္ထေန ပစ္ဆာတိ။
ခရပုတ္တဇာတကံ ပဌမံ။
၃၈၇။ သူစိဇာတကံ (၆-၂-၂)
၈၂။
အကက္ကသံ အဖရုသံ၊ ခရဓေါတံ သုပါသိယံ။
သုခုမံ တိခိဏဂ္ဂဉ္စ၊ ကော သူစိံ ကေတုမိစ္ဆတိ။
၈၃။
သုမဇ္ဇဉ္စ သုပါသဉ္စ၊ အနုပုဗ္ဗံ [အနုပုဗ္ဗ (သီ။ သျာ။)] သုဝဋ္ဋိတံ။
ဃနဃာတိမံ ပဋိထဒ္ဓံ၊ ကော သူစိံ ကေတုမိစ္ဆတိ။
၈၄။
ဣတော ဒါနိ ပတာယန္တိ၊ သူစိယော ဗဠိသာနိ စ။
ကောယံ ကမ္မာရဂါမသ္မိံ၊ သူစိံ ဝိက္ကေတုမိစ္ဆတိ။
၈၅။
ဣတော သတ္ထာနိ ဂစ္ဆန္တိ၊ ကမ္မန္တာ ဝိဝိဓါ ပုထူ။
ကောယံ ကမ္မာရဂါမသ္မိံ၊ သူစိံ ဝိက္ကေတုမိစ္ဆတိ [မရဟတိ (သီ။ သျာ။ ဣ။)]။
၈၆။
သူစိံ ကမ္မာရဂါမသ္မိံ၊ ဝိက္ကေတဗ္ဗာ ပဇာနတာ။
အာစရိယာဝ ဇာနန္တိ [အာစရိယာ သဉ္ဇာနန္တိ (က။)၊ အာစရိယာ ပဇာနန္တိ (သျာ။)၊ အာစရိယာဝ သဉ္ဇာနန္တိ (ဣ။)]၊ ကမ္မံ သုကတဒုက္ကဋံ [ဒုက္ကတံ (သီ။ ဣ။)]။
၈၇။
ဣမံ စေ [ဣမဉ္စ (သီ။ သျာ။ ဣ။)] တေ ပိတာ ဘဒ္ဒေ၊ သူစိံ ဇညာ မယာ ကတံ။
တယာ စ မံ နိမန္တေယျ၊ ယဉ္စတ္ထညံ ဃရေ ဓနန္တိ။
သူစိဇာတကံ ဒုတိယံ။
၃၈၈။ တုဏ္ဍိလဇာတကံ (၆-၂-၃)
၈၈။
နဝဆန္နကေ [နဝဆန္ဒကေ (သီ။ ဣ။)၊ နဝစ္ဆဒ္ဒကေ (သျာ။)] ဒါနိ [ဒေါဏိ (က။)၊ ဒါနံ၊ ဒါနေ (ကတ္ထစိ)] ဒိယျတိ၊ ပုဏ္ဏာယံ ဒေါဏိ သုဝါမိနီ ဌိတာ။
ဗဟုကေ ဇနေ ပါသပါဏိကေ၊ နော စ ခေါ မေ ပဋိဘာတိ ဘုဉ္ဇိတုံ။
၈၉။
တသသိ ဘမသိ လေဏမိစ္ဆသိ၊ အတ္တာဏောသိ ကုဟိံ ဂမိဿသိ။
အပ္ပောဿုက္ကော ဘုဉ္ဇ တုဏ္ဍိလ၊ မံသတ္ထာယ ဟိ ပေါသိတာမှသေ [ပေါသိယာမသေ (သီ။ သျာ။ ဣ။)]။
၉၀။
ဩဂဟ ရဟဒံ အကဒ္ဒမံ၊ သဗ္ဗံ သေဒမလံ ပဝါဟယ။
ဂဏှာဟိ နဝံ ဝိလေပနံ၊ ယဿ ဂန္ဓော န ကဒါစိ ဆိဇ္ဇတိ။
၉၁။
ကတမော ရဟဒေါ အကဒ္ဒမော၊ ကိံသု သေဒမလန္တိ ဝုစ္စတိ။
ကတမဉ္စ နဝံ ဝိလေပနံ၊ ယဿ ဂန္ဓော န ကဒါစိ ဆိဇ္ဇတိ။
၉၂။
ဓမ္မော ရဟဒေါ အကဒ္ဒမော၊ ပါပံ သေဒမလန္တိ ဝုစ္စတိ။
သီလဉ္စ နဝံ ဝိလေပနံ၊ တဿ ဂန္ဓော န ကဒါစိ ဆိဇ္ဇတိ။
၉၃။
နန္ဒန္တိ သရီရဃာတိနော၊ န စ နန္ဒန္တိ သရီရဓါရိနော။
ပုဏ္ဏာယ စ ပုဏ္ဏမာသိယာ၊ ရမမာနာဝ ဇဟန္တိ ဇီဝိတန္တိ။
တုဏ္ဍိလဇာတကံ တတိယံ။
၃၈၉။ သုဝဏ္ဏကက္ကဋဇာတကံ (၆-၂-၄)
၉၄။
သိင်္ဂီမိဂေါ အာယတစက္ခုနေတ္တော၊ အဋ္ဌိတ္တစော ဝါရိသယော အလောမော။
တေနာဘိဘူတော ကပဏံ ရုဒါမိ၊ ဟရေ သခါ ကိဿ နု မံ ဇဟာသိ။
၉၅။
သော ပဿသန္တော မဟတာ ဖဏေန၊ ဘုဇင်္ဂမော ကက္ကဋမဇ္ဈပတ္တော။
သခါ သခါရံ ပရိတာယမာနော၊ ဘုဇင်္ဂမံ ကက္ကဋကော ဂဟေသိ။
၉၆။
န ဝါယသံ နော ပန ကဏှသပ္ပံ၊ ဃာသတ္ထိကော ကက္ကဋကော အဒေယျ။
ပုစ္ဆာမိ တံ အာယတစက္ခုနေတ္တ၊ အထ ကိဿ ဟေတုမှ ဥဘော ဂဟီတာ။
၉၇။
အယံ ပုရိသော မမ အတ္ထကာမော၊ ယော မံ ဂဟေတွာန ဒကာယ နေတိ။
တသ္မိံ မတေ ဒုက္ခမနပ္ပကံ မေ၊ အဟဉ္စ ဧသော စ ဥဘော န ဟောမ။
၉၈။
မမဉ္စ ဒိသွာန ပဝဒ္ဓကာယံ၊ သဗ္ဗော ဇနော ဟိံသိတုမေဝ မိစ္ဆေ။
သာဒုဉ္စ ထူလဉ္စ မုဒုဉ္စ မံသံ၊ ကာကာပိ မံ ဒိသွာန [ဒိသွ (သီ။ ဣ။)] ဝိဟေဌယေယျုံ။
၉၉။
သစေတဿ ဟေတုမှ ဥဘော ဂဟီတာ၊ ဥဋ္ဌာတု ပေါသော ဝိသမာဝမာမိ [ဝိသမာစမာမိ (သီ။ ဣ။ က။)]။
မမဉ္စ ကာကဉ္စ ပမုဉ္စ ခိပ္ပံ၊ ပုရေ ဝိသံ ဂါဠှမုပေတိ မစ္စံ။
၁၀၀။
သပ္ပံ ပမောက္ခာမိ န တာဝ ကာကံ၊ ပဋိဗန္ဓကော [ပဋိဗဒ္ဓကော (သီ။ ဣ။)] ဟောဟိတိ [ဟောတိ ဟိ (သျာ။)] တာဝ ကာကော။
ပုရိသဉ္စ ဒိသွာန သုခိံ အရောဂံ၊ ကာကံ ပမောက္ခာမိ ယထေဝ သပ္ပံ။
၁၀၁။
ကာကော တဒါ ဒေဝဒတ္တော အဟောသိ၊ မာရော ပန ကဏှသပ္ပော အဟောသိ။
အာနန္ဒဘဒ္ဒေါ ကက္ကဋကော အဟောသိ၊ အဟံ တဒါ ဗြာဟ္မဏော ဟောမိ သတ္ထာတိ [တတ္ထာတိ (သီ။ ဣ။)]။
သုဝဏ္ဏကက္ကဋဇာတကံ စတုတ္ထံ။
၃၉၀။ မယှကဇာတကံ (၆-၂-၅)
၁၀၂။
သကုဏော မယှကော နာမ၊ ဂိရိသာနုဒရီစရော။
ပက္ကံ ပိပ္ဖလိမာရုယှ၊ မယှံ မယှန္တိ ကန္ဒတိ။
၁၀၃။
တဿေဝံ ဝိလပန္တဿ၊ ဒိဇသံဃာ သမာဂတာ။
ဘုတွာန ပိပ္ဖလိံ ယန္တိ၊ ဝိလပတွေဝ သော ဒိဇော။
၁၀၄။
ဧဝမေဝ ဣဓေကစ္စော၊ သံဃရိတွာ ဗဟုံ ဓနံ။
နေဝတ္တနော န ဉာတီနံ၊ ယထောဓိံ ပဋိပဇ္ဇတိ။
၁၀၅။
န သော အစ္ဆာဒနံ ဘတ္တံ၊ န မာလံ န ဝိလေပနံ။
အနုဘောတိ [နာနုဘောတိ (သျာ။ က။)] သကိံ ကိဉ္စိ၊ န သင်္ဂဏှာတိ ဉာတကေ။
၁၀၆။
တဿေဝံ ဝိလပန္တဿ၊ မယှံ မယှန္တိ ရက္ခတော။
ရာဇာနော အထ ဝါ စောရာ၊ ဒါယဒါ ယေ ဝ [ယေ စ (သျာ။ က။)] အပ္ပိယာ။
ဓနမာဒါယ ဂစ္ဆန္တိ၊ ဝိလပတွေဝ သော နရော။
၁၀၇။
ဓီရော [ဓီရော စ (သီ။)] ဘောဂေ အဓိဂမ္မ၊ သင်္ဂဏှာတိ စ ဉာတကေ။
တေန သော ကိတ္တိံ ပပ္ပောတိ၊ ပေစ္စ သဂ္ဂေ ပမောဒတီတိ [သဂ္ဂေ စ မောဒတီတိ (သီ။ ဣ။)]။
မယှကဇာတကံ ပဉ္စမံ။
၃၉၁။ ဝိဇ္ဇာဓရဇာတကံ (၆-၂-၆)
၁၀၈။
ဒုဗ္ဗဏ္ဏရူပံ တုဝမရိယဝဏ္ဏီ၊ ပုရက္ခတွာ [ပုရက္ခိတွာ (သျာ။ က။)] ပဉ္ဇလိကော နမဿသိ။
သေယျော နု တေ သော ဥဒဝါ [ဥဒါဟု (သျာ။ က။)] သရိက္ခော၊ နာမံ ပရဿတ္တနော စာပိ ဗြူဟိ။
၁၀၉။
န နာမဂေါတ္တံ ဂဏှန္တိ ရာဇ၊ သမ္မဂ္ဂတာနုဇ္ဇုဂတာန [သမဂ္ဂတာနုဇ္ဇုဂတာန (သျာ။)၊ သမုဂ္ဂတာနုဇ္ဇုဂတာန (က။)] ဒေဝါ။
အဟဉ္စ တေ နာမဓေယျံ ဝဒါမိ၊ သက္ကောဟမသ္မီ တိဒသာနမိန္ဒော။
၁၁၀။
ယော ဒိသွာ ဘိက္ခုံ စရဏူပပန္နံ၊ ပုရက္ခတွာ ပဉ္ဇလိကော နမဿတိ။
ပုစ္ဆာမိ တံ ဒေဝရာဇေတမတ္ထံ၊ ဣတော စုတော ကိံ လဘတေ သုခံ သော။
၁၁၁။
ယော ဒိသွာ ဘိက္ခုံ စရဏူပပန္နံ၊ ပုရက္ခတွာ ပဉ္ဇလိကော နမဿတိ။
ဒိဋ္ဌေဝ ဓမ္မေ လဘတေ ပသံသံ၊ သဂ္ဂဉ္စ သော ယာတိ သရီရဘေဒါ။
၁၁၂။
လက္ခီ ဝတ မေ ဥဒပါဒိ အဇ္ဇ၊ ယံ ဝါသဝံ ဘူတပတိဒ္ဒသာမ။
ဘိက္ခုဉ္စ ဒိသွာန တုဝဉ္စ သက္က၊ ကာဟာမိ ပုညာနိ အနပ္ပကာနိ။
၁၁၃။
အဒ္ဓါ ဟဝေ သေဝိတဗ္ဗာ သပညာ၊ ဗဟုဿုတာ ယေ ဗဟုဌာနစိန္တိနော။
ဘိက္ခုဉ္စ ဒိသွာန မမဉ္စ ရာဇ၊ ကရောဟိ ပုညာနိ အနပ္ပကာနိ။
၁၁၄။
အက္ကောဓနော နိစ္စပသန္နစိတ္တော၊ သဗ္ဗာတိထီယာစယောဂေါ ဘဝိတွာ။
နိဟစ္စ မာနံ အဘိဝါဒယိဿံ၊ သုတွာန ဒေဝိန္ဒ သုဘာသိတာနီတိ။
ဝိဇ္ဇာဓရ [ဓဇဝိဟေဌက (သီ။ ဣ။), ပဗ္ဗဇိတဝိဟေဌက (သျာ။)] ဇာတကံ ဆဋ္ဌံ။
၃၉၂။ သိင်္ဃပုပ္ဖဇာတကံ (၆-၂-၇)
၁၁၅။
ယမေတံ [ယမေကံ (ဣ။)] ဝါရိဇံ ပုပ္ဖံ၊ အဒိန္နံ ဥပသိင်္ဃသိ။
ဧကင်္ဂမေတံ ထေယျာနံ၊ ဂန္ဓထေနောသိ မာရိသ။
၁၁၆။
န ဟရာမိ န ဘဉ္ဇာမိ၊ အာရာ သိင်္ဃာမိ ဝါရိဇံ။
အထ ကေန နု ဝဏ္ဏေန၊ ဂန္ဓထေနောတိ ဝုစ္စတိ။
၁၁၇။
ယောယံ ဘိသာနိ ခဏတိ၊ ပုဏ္ဍရီကာနိ ဘဉ္ဇတိ။
ဧဝံ အာကိဏ္ဏကမ္မန္တော၊ ကသ္မာ ဧသော န ဝုစ္စတိ။
၁၁၈။
အာကိဏ္ဏလုဒ္ဒေါ ပုရိသော၊ ဓါတိစေလံဝ မက္ခိတော။
တသ္မိံ မေ ဝစနံ နတ္ထိ၊ တဉ္စာရဟာမိ ဝတ္တဝေ။
၁၁၉။
အနင်္ဂဏဿ ပေါသဿ၊ နိစ္စံ သုစိဂဝေသိနော။
ဝါလဂ္ဂမတ္တံ ပါပဿ၊ အဗ္ဘာမတ္တံဝ ခါယတိ။
၁၂၀။
အဒ္ဓါ မံ ယက္ခ ဇာနာသိ၊ အထော မံ အနုကမ္ပသိ။
ပုနပိ ယက္ခ ဝဇ္ဇာသိ၊ ယဒါ ပဿသိ ဧဒိသံ။
၁၂၁။
နေဝ တံ ဥပဇီဝါမိ၊ နပိ တေ ဘတကာမှသေ [ဘတကမှသေ (သီ။ ဣ။)၊ ဘတိကမှသေ (သျာ။)]။
တွမေဝ ဘိက္ခု ဇာနေယျ၊ ယေန ဂစ္ဆေယျ သုဂ္ဂတိန္တိ။
သိင်္ဃပုပ္ဖ [ဘိသပုပ္ဖ (သီ။ ဣ။), ဥပသိင်္ဃပုပ္ဖ (သျာ။)] ဇာတကံ သတ္တမံ။
၃၉၃။ ဝိဃာသာဒဇာတကံ (၆-၂-၈)
၁၂၂။
သုသုခံ ဝတ ဇီဝန္တိ၊ ယေ ဇနာ ဝိဃာသာဒိနော။
ဒိဋ္ဌေဝ ဓမ္မေ ပါသံသာ၊ သမ္ပရာယေ စ သုဂ္ဂတီ။
၁၂၃။
သုကဿ [သုဝဿ (သီ။ သျာ။ ဣ။)] ဘာသမာနဿ၊ န နိသာမေထ ပဏ္ဍိတာ။
ဣဒံ သုဏာထ သောဒရိယာ၊ အမှေဝါယံ ပသံသတိ။
၁၂၄။
နာဟံ တုမှေ ပသံသာမိ၊ ကုဏပါဒါ သုဏာထ မေ။
ဥစ္ဆိဋ္ဌဘောဇိနော [ဘောဇနာ (က။)] တုမှေ၊ န တုမှေ ဝိဃာသာဒိနော။
၁၂၅။
သတ္တဝဿာ ပဗ္ဗဇိတာ၊ မေဇ္ဈာရညေ [မဇ္ဈေရညေ (က။)] သိခဏ္ဍိနော။
ဝိဃာသေနေဝ ယာပေန္တာ၊ မယံ စေ ဘောတော ဂါရယ္ဟာ။
ကေ နု ဘောတော ပသံသိယာ။
၁၂၆။
တုမှေ သီဟာနံ ဗျဂ္ဃါနံ၊ ဝါဠာနဉ္စာဝသိဋ္ဌကံ။
ဥစ္ဆိဋ္ဌေနေဝ ယာပေန္တာ၊ မညိဝ္ဟော ဝိဃာသာဒိနော။
၁၂၇။
ယေ ဗြာဟ္မဏဿ သမဏဿ၊ အညဿ ဝါ [အညဿ စ (သီ။ သျာ။)၊ အညဿေဝ (ဣ။)] ဝနိဗ္ဗိနော [ဝဏိဗ္ဗိနော (သီ။ သျာ။)]။
ဒတွာဝ [ဒတွာန (ဣ။ က။)] သေသံ ဘုဉ္ဇန္တိ၊ တေ ဇနာ ဝိဃာသာဒိနောတိ။
ဝိဃာသာဒဇာတကံ အဋ္ဌမံ။
၃၉၄။ ဝဋ္ဋကဇာတကံ (၆-၂-၉)
၁၂၈။
ပဏီတံ ဘုဉ္ဇသေ ဘတ္တံ၊ သပ္ပိတေလဉ္စ မာတုလ။
အထ ကေန နု ဝဏ္ဏေန၊ ကိသော တွမသိ ဝါယသ။
၁၂၉။
အမိတ္တမဇ္ဈေ ဝသတော၊ တေသု အာမိသမေသတော။
နိစ္စံ ဥဗ္ဗိဂ္ဂဟဒယဿ၊ ကုတော ကာကဿ ဒဠှိယံ။
၁၃၀။
နိစ္စံ ဥဗ္ဗေဂိနော [ဥဗ္ဗိဂ္ဂိနော (သျာ။ က။)၊ ဥဗ္ဗေဓိနော (သီ။)] ကာကာ၊ ဓင်္ကာ ပါပေန ကမ္မုနာ။
လဒ္ဓေါ ပိဏ္ဍော န ဣဏေတိ၊ ကိသော တေနသ္မိ ဝဋ္ဋက။
၁၃၁။
လူခါနိ တိဏဗီဇာနိ၊ အပ္ပသ္နေဟာနိ ဘုဉ္ဇသိ။
အထ ကေန နု ဝဏ္ဏေန၊ ထူလော တွမသိ ဝဋ္ဋက။
၁၃၂။
အပ္ပိစ္ဆာ အပ္ပစိန္တာယ၊ အဒူရဂမနေန စ။
လဒ္ဓါလဒ္ဓေန ယာပေန္တော၊ ထူလော တေနသ္မိ ဝါယသ။
၁၃၃။
အပ္ပိစ္ဆဿ ဟိ ပေါသဿ၊ အပ္ပစိန္တသုခဿ [အပ္ပစိန္တိသုခဿ (သီ။ သျာ။ ဣ။)] စ။
သုသင်္ဂဟိတမာနဿ [သုသင်္ဂဟိတပမာဏဿ (သီ။ သျာ။ ဣ။)]၊ ဝုတ္တီ သုသမုဒါနယာတိ။
ဝဋ္ဋကဇာတကံ နဝမံ။
၃၉၅။ ပါရာဝတဇာတကံ (၆-၂-၁၀)
၁၃၄။
စိရဿံ ဝတ ပဿာမိ၊ သဟာယံ မဏိဓါရိနံ။
သုကတာ [သုကတာယ (သီ။ ဣ။)] မဿုကုတ္တိယာ၊ သောဘတေ ဝတ မေ သခါ။
၁၃၅။
ပရူဠှကစ္ဆနခလောမော ၊ အဟံ ကမ္မေသု ဗျာဝဋော။
စိရဿံ နှာပိတံ လဒ္ဓါ၊ လောမံ တံ အဇ္ဇံ ဟာရယိံ [အပဟာရယိံ (သီ။ ဣ။)]။
၁၃၆။
ယံ နု လောမံ အဟာရေသိ၊ ဒုလ္လဘံ လဒ္ဓ ကပ္ပကံ။
အထ ကိဉ္စရဟိ တေ သမ္မ၊ ကဏ္ဌေ ကိဏိကိဏာယတိ [ဣဒံ ကဏ္ဌေ ကိဏာယတိ (က။)၊ ကဏ္ဌေ ကိံနိကိလာယတိ (သျာ။)]။
၁၃၇။
မနုဿသုခုမာလာနံ၊ မဏိ ကဏ္ဌေသု လမ္ဗတိ။
တေသာဟံ အနုသိက္ခာမိ၊ မာ တွံ မညိ ဒဝါ ကတံ။
၁၃၈။
သစေပိမံ ပိဟယသိ၊ မဿုကုတ္တိံ သုကာရိတံ။
ကာရယိဿာမိ တေ သမ္မ၊ မဏိဉ္စာပိ ဒဒါမိ တေ။
၁၃၉။
တွညေဝ မဏိနာ ဆန္နော၊ သုကတာယ စ မဿုယာ။
အာမန္တ ခေါ တံ ဂစ္ဆာမိ၊ ပိယံ မေ တဝ ဒဿနန္တိ။
ပါရာဝတဇာတကံ [ကာကဇာတကံ (သီ။ ဣ။), မဏိဇာတကံ (သျာ။)] ဒသမံ။
ခရပုတ္တဝဂ္ဂေါ [သေနကဝဂ္ဂေါ (သီ။ ဣ။), ခုရပုတ္တဝဂ္ဂေါ (သျာ။), သူစိဝဂ္ဂေါ (က။)] ဒုတိယော။
တဿုဒ္ဒါနံ –
အထ ပဿ သသူစိ စ တုဏ္ဍိလကော၊ မိဂ မယှကပဉ္စမပက္ခိဝရော။
အထ ပဉ္ဇလိ ဝါရိဇ မေဇ္ဈ ပုန၊ အထ ဝဋ္ဋ ကပေါတဝရေန ဒသာတိ။
အထ ဝဂ္ဂုဒ္ဒါနံ –
အထ ဝဂ္ဂံ ပကိတ္တိဿံ၊ ဆနိပါတံ ဝရုတ္တမေ။
အဝါရိယာ စ ခရော စ [သေနက (သီ။)၊ သူစိ စ (သျာ။ က။)]၊ ဒွေ စ ဝုတ္တာ သုဗျဉ္ဇနာတိ။
ဆက္ကနိပါတံ နိဋ္ဌိတံ။