၅။ ပဉ္စကနိပါတ
၁။ မဏိကုဏ္ဍလဝဂ္ဂ
၃၅၁။ မဏိကုဏ္ဍလဇာတကံ (၅-၁-၁)
၁။
ဇီနော ရထဿံ မဏိကုဏ္ဍလေ စ၊ ပုတ္တေ စ ဒါရေ စ တထေဝ ဇီနော။
သဗ္ဗေသု ဘောဂေသု အသေသကေသု [အသေသိတေသု (သီ။ ဣ။)၊ အသေသိကေသု (က။)]၊ ကသ္မာ န သန္တပ္ပသိ သောကကာလေ။
၂။
ပုဗ္ဗေဝ မစ္စံ ဝိဇဟန္တိ ဘောဂါ၊ မစ္စော ဝါ တေ [စ နေ (ဣ။)၊ ဓနေ (က။)] ပုဗ္ဗတရံ ဇဟာတိ။
အသဿတာ ဘောဂိနော ကာမကာမိ၊ တသ္မာ န သောစာမဟံ သောကကာလေ။
၃။
ဥဒေတိ အာပူရတိ ဝေတိ [ပူရေတိ ခီယတိ (သျာ။)] စန္ဒော၊ အတ္ထံ တပေတွာန [အန္ဓံ တပေတွာန (က။)၊ အတ္ထင်္ဂမေတွာန (သျာ။)၊ ဧတ္ထ ‘‘တပေတွာန အတ္ထံ ပလေတီ’’တိ သမ္ဗန္ဓော] ပလေတိ သူရိယော။
ဝိဒိတာ [ဝိဇိတာ (သျာ။)] မယာ သတ္တုက လောကဓမ္မာ၊ တသ္မာ န သောစာမဟံ သောကကာလေ။
၄။
အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု။
ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု။
၅။
နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ။
နိသမ္မကာရိနော ရာဇ [ရညော (သီ။ သျာ။)]၊ ယသော ကိတ္တိ စ ဝဍ္ဎတီတိ။
မဏိကုဏ္ဍလဇာတကံ ပဌမံ။
၃၅၂။ သုဇာတဇာတကံ (၅-၁-၂)
၆။
ကိံ နု သန္တရမာနောဝ၊ လာယိတွာ ဟရိတံ တိဏံ။
ခါဒ ခါဒါတိ လပသိ၊ ဂတသတ္တံ ဇရဂ္ဂဝံ။
၇။
န ဟိ အန္နေန ပါနေန၊ မတော ဂေါဏော သမုဋ္ဌဟေ။
တွဉ္စ တုစ္ဆံ ဝိလပသိ၊ ယထာ တံ ဒုမ္မတီ တထာ။
၈။
တထေဝ တိဋ္ဌတိ သီသံ၊ ဟတ္ထပါဒါ စ ဝါလဓိ။
သောတာ တထေဝ တိဋ္ဌန္တိ [သော တာတ တထေဝ တိဋ္ဌတိ (က။)]၊ မညေ ဂေါဏော သမုဋ္ဌဟေ။
၉။
နေဝယျကဿ သီသဉ္စ [သီသံ ဝါ (သီ။ သျာ။ ဣ။)]၊ ဟတ္ထပါဒါ စ ဒိဿရေ။
ရုဒံ မတ္တိကထူပသ္မိံ၊ နနု တွညေဝ ဒုမ္မတိ။
၁၀။
အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ။
ဝါရိနာ ဝိယ ဩသိဉ္စံ [ဩသိဉ္စိ (က။)]၊ သဗ္ဗံ နိဗ္ဗာပယေ ဒရံ။
၁၁။
အဗ္ဗဟီ [အဗ္ဗူဠှံ (သီ။ သျာ။)၊ အဗ္ဘူဠှံ (က။)] ဝတ မေ သလ္လံ၊ ယမာသိ ဟဒယဿိတံ [သောကံ ဟဒယနိဿိတံ (သီ။ သျာ။)]။
ယော မေ သောကပရေတဿ၊ ပိတု သောကံ အပါနုဒိ။
၁၂။
သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော။
န သောစာမိ န ရောဒါမိ၊ တဝ သုတွာန မာဏဝ။
၁၃။
ဧဝံ ကရောန္တိ သပ္ပညာ၊ ယေ ဟောန္တိ အနုကမ္ပကာ။
ဝိနိဝတ္တေန္တိ သောကမှာ၊ သုဇာတော ပိတရံ ယထာတိ။
သုဇာတဇာတကံ ဒုတိယံ။
၃၅၃။ ဝေနသာခဇာတကံ (၅-၁-၃)
၁၄။
နယိဒံ နိစ္စံ ဘဝိတဗ္ဗံ ဗြဟ္မဒတ္တ၊ ခေမံ သုဘိက္ခံ သုခတာ စ ကာယေ။
အတ္ထစ္စယေ မာ အဟု သမ္ပမူဠ္ဟော၊ ဘိန္နပ္လဝေါ သာဂရဿေဝ မဇ္ဈေ။
၁၅။
ယာနိ ကရောတိ ပုရိသော၊ တာနိ အတ္တနိ ပဿတိ။
ကလျာဏကာရီ ကလျာဏံ၊ ပါပကာရီ စ ပါပကံ။
ယာဒိသံ ဝပတေ ဗီဇံ၊ တာဒိသံ ဟရတေ ဖလံ။
၁၆။
ဣဒံ တဒါစရိယဝစော၊ ပါရာသရိယော ယဒဗြဝိ။
မာ သု [မာ ဿု (သီ။ သျာ။ ဣ။)] တွံ အကရိ ပါပံ၊ ယံ တွံ ပစ္ဆာ ကတံ တပေ။
၁၇။
အယမေဝ သော ပိင်္ဂိယ [သော ပိင်္ဂိယော (သျာ။)၊ သောပိ ဘိယျော (က။)] ဝေနသာခေါ၊ [ဓေါနသာခေါ (က။ သီ။ ဣ။)] ယမှိ ဃာတယိံ ခတ္တိယာနံ သဟဿံ။
အလင်္ကတေ စန္ဒနသာရာနုလိတ္တေ၊ တမေဝ ဒုက္ခံ ပစ္စာဂတံ မမံ။
၁၈။
သာမာ စ [သာမာပိ (သီ။ သျာ။)] ခေါ စန္ဒနလိတ္တဂတ္တာ [ဂတ္တီ (က။ သီ။ သျာ။ ဣ။)]၊ လဋ္ဌီဝ သောဘဉ္ဇနကဿ ဥဂ္ဂတာ။
အဒိသွာ [အဒိသွာဝ (သီ။)] ကာလံ ကရိဿာမိ ဥဗ္ဗရိံ၊ တံ မေ ဣတော ဒုက္ခတရံ ဘဝိဿတီတိ။
ဝေနသာခဇာတကံ [ဓေါနသာခဇာတကံ (က။ သီ။ ဣ။)] တတိယံ။
၃၅၄။ ဥရဂဇာတကံ (၅-၁-၄)
၁၉။
ဥရဂေါဝ တစံ ဇိဏ္ဏံ၊ ဟိတွာ ဂစ္ဆတိ သံ တနုံ။
ဧဝံ သရီရေ နိဗ္ဘောဂေ၊ ပေတေ ကာလင်္ကတေ သတိ။
၂၀။
ဍယှမာနော န ဇာနာတိ၊ ဉာတီနံ ပရိဒေဝိတံ။
တသ္မာ ဧတံ န သောစာမိ၊ ဂတော သော တဿ ယာ ဂတိ။
၂၁။
အနဝှတော တတော အာဂါ၊ အနနုညာတော [နာနုညာတော (က။)] ဣတော ဂတော။
ယထာဂတော တထာ ဂတော၊ တတ္ထ ကာ ပရိဒေဝနာ။
၂၂။
ဍယှမာနော န ဇာနာတိ၊ ဉာတီနံ ပရိဒေဝိတံ။
တသ္မာ ဧတံ န သောစာမိ၊ ဂတော သော တဿ ယာ ဂတိ။
၂၃။
သစေ ရောဒေ ကိသာ [ကိသီ (ဣ။)] အဿံ၊ တဿာ မေ ကိံ ဖလံ သိယာ။
ဉာတိမိတ္တသုဟဇ္ဇာနံ ၊ ဘိယျော နော အရတီ သိယာ။
၂၄။
ဍယှမာနော န ဇာနာတိ၊ ဉာတီနံ ပရိဒေဝိတံ။
တသ္မာ ဧတံ န သောစာမိ၊ ဂတော သော တဿ ယာ ဂတိ။
၂၅။
ယထာပိ ဒါရကော စန္ဒံ၊ ဂစ္ဆန္တမနုရောဒတိ။
ဧဝံ သမ္ပဒမေဝေတံ၊ ယော ပေတမနုသောစတိ။
၂၆။
ဍယှမာနော န ဇာနာတိ၊ ဉာတီနံ ပရိဒေဝိတံ။
တသ္မာ ဧတံ န သောစာမိ၊ ဂတော သော တဿ ယာ ဂတိ။
၂၇။
ယထာပိ ဥဒကကုမ္ဘော၊ ဘိန္နော အပ္ပဋိသန္ဓိယော။
ဧဝံ သမ္ပဒမေဝေတံ၊ ယော ပေတမနုသောစတိ။
၂၈။
ဍယှမာနော န ဇာနာတိ၊ ဉာတီနံ ပရိဒေဝိတံ။
တသ္မာ ဧတံ န သောစာမိ၊ ဂတော သော တဿ ယာ ဂတီတိ။
ဥရဂဇာတကံ စတုတ္ထံ။
၃၅၅။ ဃဋဇာတကံ (၅-၁-၅)
၂၉။
အညေ သောစန္တိ ရောဒန္တိ၊ အညေ အဿုမုခါ ဇနာ။
ပသန္နမုခဝဏ္ဏောသိ၊ ကသ္မာ ဃဋ [ဃတ (သီ။ ဣ။)] န သောစသိ။
၃၀။
နာဗ္ဘတီတဟရော သောကော၊ နာနာဂတသုခါဝဟော။
တသ္မာ ဓင်္က [ဝံက (ဣ။)] န သောစာမိ၊ နတ္ထိ သောကေ ဒုတီယတာ [သောကော ဒုတီယကာ (က။)]။
၃၁။
သောစံ ပဏ္ဍု ကိသော ဟောတိ၊ ဘတ္တဉ္စဿ န ရုစ္စတိ။
အမိတ္တာ သုမနာ ဟောန္တိ၊ သလ္လဝိဒ္ဓဿ ရုပ္ပတော။
၃၂။
ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ။
ဌိတံ မံ နာဂမိဿတိ၊ ဧဝံ ဒိဋ္ဌပဒေါ အဟံ။
၃၃။
ယဿတ္တာ နာလမေကောဝ၊ သဗ္ဗကာမရသာဟရော။
သဗ္ဗာပိ ပထဝီ တဿ၊ န သုခံ အာဝဟိဿတီတိ။
ဃဋဇာတကံ ပဉ္စမံ။
၃၅၆။ ကောရဏ္ဍိယဇာတကံ (၅-၁-၆)
၃၄။
ဧကော အရညေ ဂိရိကန္ဒရာယံ၊ ပဂ္ဂယှ ပဂ္ဂယှ သိလံ ပဝေစ္ဆသိ [ပဝေဇ္ဈသိ (သျာ။ သီ။ အဋ္ဌ။)]။
ပုနပ္ပုနံ သန္တရမာနရူပေါ၊ ကောရဏ္ဍိယ [ကာရဏ္ဍိယ (သီ။ သျာ။ ဣ။)] ကော နု တဝ ယိဓတ္ထော။
၃၅။
အဟဉှိမံ သာဂရ သေဝိတန္တံ၊ သမံ ကရိဿာမိ ယထာပိ ပါဏိ။
ဝိကိရိယ သာနူနိ စ ပဗ္ဗတာနိ စ၊ တသ္မာ သိလံ ဒရိယာ ပက္ခိပါမိ။
၃၆။
နယိမံ မဟိံ အရဟတိ ပါဏိကပ္ပံ၊ သမံ မနုဿော ကရဏာယ မေကော။
မညာမိမညေဝ ဒရိံ ဇိဂီသံ [ဇိဂိံသံ (သီ။ သျာ။ ဣ။)]၊ ကောရဏ္ဍိယ ဟာဟသိ [ဟာယသိ (သျာ။ က။)] ဇီဝလောကံ။
၃၇။
သစေ အဟံ [အယံ (သီ။ သျာ။ ဣ။)] ဘူတဓရံ န သက္ကာ [သက္ကော (သျာ။ က။)]၊ သမံ မနုဿော ကရဏာယ မေကော။
ဧဝမေဝ တွံ ဗြဟ္မေ ဣမေ မနုဿေ၊ နာနာဒိဋ္ဌိကေ နာနယိဿသိ တေ [နေ (က။)]။
၃၈။
သံခိတ္တရူပေန ဘဝံ မမတ္ထံ၊ အက္ခာသိ ကောရဏ္ဍိယ ဧဝမေတံ။
ယထာ န သက္ကာ ပထဝီ သမာယံ၊ ကတ္တုံ မနုဿေန တထာ မနုဿာတိ။
ကောရဏ္ဍိယဇာတကံ ဆဋ္ဌံ။
၃၅၇။ လဋုကိကဇာတကံ (၅-၁-၇)
၃၉။
ဝန္ဒာမိ တံ ကုဉ္ဇရ သဋ္ဌိဟာယနံ၊ အာရညကံ ယူထပတိံ ယသဿိံ။
ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယ။
၄၀။
ဝန္ဒာမိ တံ ကုဉ္ဇရ ဧကစာရိံ၊ အာရညကံ ပဗ္ဗတသာနုဂေါစရံ။
ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယ။
၄၁။
ဝမိဿာမိ တေ လဋုကိကေ ပုတ္တကာနိ၊ ကိံ မေ တုဝံ ကာဟသိ ဒုဗ္ဗလာသိ။
သတံ သဟဿာနိပိ တာဒိသီနံ၊ ဝါမေန ပါဒေန ပပေါထယေယျံ။
၄၂။
န ဟေဝ သဗ္ဗတ္ထ ဗလေန ကိစ္စံ၊ ဗလဉှိ ဗာလဿ ဝဓါယ ဟောတိ။
ကရိဿာမိ တေ နာဂရာဇာ အနတ္ထံ၊ ယော မေ ဝဓီ ပုတ္တကေ ဒုဗ္ဗလာယ။
၄၃။
ကာကဉ္စ ပဿ လဋုကိကံ၊ မဏ္ဍူကံ နီလမက္ခိကံ။
ဧတေ နာဂံ အဃာတေသုံ၊ ပဿ ဝေရဿ ဝေရိနံ။
တသ္မာ ဟိ ဝေရံ န ကယိရာထ၊ အပ္ပိယေနပိ ကေနစီတိ။
လဋုကိကဇာတကံ သတ္တမံ။
၃၅၈။ စူဠဓမ္မပါလဇာတကံ (၅-၁-၈)
၄၄။
အဟမေဝ ဒူသိယာ ဘူနဟတာ၊ ရညော မဟာပတာပဿ။
ဧတံ မုဉ္စတု ဓမ္မပါလံ၊ ဟတ္ထေ မေ ဒေဝ ဆေဒေဟိ။
၄၅။
အဟမေဝ ဒူသိယာ ဘူနဟတာ၊ ရညော မဟာပတာပဿ။
ဧတံ မုဉ္စတု ဓမ္မပါလံ၊ ပါဒေ မေ ဒေဝ ဆေဒေဟိ။
၄၆။
အဟမေဝ ဒူသိယာ ဘူနဟတာ၊ ရညော မဟာပတာပဿ။
ဧတံ မုဉ္စတု ဓမ္မပါလံ၊ သီသံ မေ ဒေဝ ဆေဒေဟိ။
၄၇။
န ဟိ [နဟ (သီ။ သျာ။ ဣ။) ဧတ္ထ ဟ-ကာရော ခေဒေ] နူနိမဿ ရညော၊ မိတ္တာမစ္စာ စ ဝိဇ္ဇရေ သုဟဒါ။
ယေ န ဝဒန္တိ ရာဇာနံ၊ မာ ဃာတယိ ဩရသံ ပုတ္တံ။
၄၈။
န ဟိ [နဟ (သီ။ သျာ။ ဣ။) ဧတ္ထ ဟ-ကာရော ခေဒေ] နူနိမဿ ရညော၊ ဉာတီ မိတ္တာ စ ဝိဇ္ဇရေ သုဟဒါ။
ယေ န ဝဒန္တိ ရာဇာနံ၊ မာ ဃာတယိ အတြဇံ ပုတ္တံ။
၄၉။
စန္ဒနသာရာနုလိတ္တာ ၊ ဗာဟာ ဆိဇ္ဇန္တိ ဓမ္မပါလဿ။
ဒါယာဒဿ ပထဗျာ၊ ပါဏာ မေ ဒေဝ ရုဇ္ဈန္တီတိ။
စူဠဓမ္မပါလဇာတကံ အဋ္ဌမံ။
၃၅၉။ သုဝဏ္ဏမိဂဇာတကံ (၅-၁-၉)
၅၀။
ဝိက္ကမ ရေ ဟရိပါဒ [မဟာမိဂ (သီ။ သျာ။ ဣ။)]၊ ဝိက္ကမ ရေ မဟာမိဂ [ဟရီပဒ (သီ။ သျာ။ ဣ။)]။
ဆိန္ဒ ဝါရတ္တိကံ ပါသံ၊ နာဟံ ဧကာ ဝနေ ရမေ။
၅၁။
ဝိက္ကမာမိ န ပါရေမိ၊ ဘူမိံ သုမ္ဘာမိ ဝေဂသာ။
ဒဠ္ဟော ဝါရတ္တိကော ပါသော၊ ပါဒံ မေ ပရိကန္တတိ။
၅၂။
အတ္ထရဿု ပလာသာနိ၊ အသိံ နိဗ္ဗာဟ လုဒ္ဒက။
ပဌမံ မံ ဝဓိတွာန၊ ဟန ပစ္ဆာ မဟာမိဂံ။
၅၃။
န မေ သုတံ ဝါ ဒိဋ္ဌံ ဝါ၊ ဘာသန္တိံ မာနုသိံ မိဂိံ [န မေ သုတာ ဝါ ဒိဋ္ဌာ ဝါ၊ ဘာသန္တီ မာနုသိံ မိဂီ (ဋီကာ)]။
တွဉ္စ ဘဒ္ဒေ သုခီ ဟောဟိ၊ ဧသော စာပိ မဟာမိဂေါ။
၅၄။
ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ။
ယထာဟမဇ္ဇ နန္ဒာမိ၊ မုတ္တံ ဒိသွာ မဟာမိဂန္တိ။
သုဝဏ္ဏမိဂဇာတကံ နဝမံ။
၃၆၀။ သုယောနန္ဒီဇာတကံ (၅-၁-၁၀)
၅၅။
ဝါတိ ဂန္ဓော တိမိရာနံ၊ ကုသမုဒ္ဒေါ စ [ဝ (သျာ။ ဣ။)] ဃောသဝါ။
ဒူရေ ဣတော သုယောနန္ဒီ [ဣတော ဟိ သုသန္ဒီ (သီ။ သျာ။)၊ ဣတောပိ သုဿောန္ဒီ (ဣ။)]၊ တမ္ဗကာမာ တုဒန္တိ မံ။
၅၆။
ကထံ သမုဒ္ဒမတရိ၊ ကထံ အဒ္ဒက္ခိ သေဒုမံ [သေရုမံ (သီ။ သျာ။ ဣ။)]။
ကထံ တဿာ စ တုယှဉ္စ၊ အဟု သဂ္ဂ [အဂ္ဂ (သီ။ သျာ။)] သမာဂမော။
၅၇။
ကုရုကစ္ဆာ [ဘရုကစ္ဆာ (သီ။ သျာ။ ဣ။)] ပယာတာနံ၊ ဝါဏိဇာနံ ဓနေသိနံ။
မကရေဟိ အဘိဒါ [မကရေဟိဗ္ဘိဒါ (သီ။)၊ မကရေဟိ’ဘိဒါ (သျာ။)၊ မကရေဟိ ဘိန္နာ (ဣ။)] နာဝါ၊ ဖလကေနာဟမပ္လဝိံ။
၅၈။
သာ မံ သဏှေန မုဒုနာ၊ နိစ္စံ စန္ဒနဂန္ဓိနီ။
အင်္ဂေန [အင်္ကေန (ဣ။ က။)] ဥဒ္ဓရီ ဘဒ္ဒါ၊ မာတာ ပုတ္တံဝ ဩရသံ။
၅၉။
သာ မံ အန္နေန ပါနေန၊ ဝတ္ထေန သယနေန စ။
အတ္တနာပိ စ မန္ဒက္ခီ၊ ဧဝံ တမ္ဗ ဝိဇာနာဟီတိ။
သုယောနန္ဒီဇာတကံ ဒသမံ။
မဏိကုဏ္ဍလဝဂ္ဂေါ ပဌမော။
တဿုဒ္ဒါနံ –
အထ ဇိနဝရော ဟရိတံ တိဏကော၊ အထ ဘိန္နပ္လဝေါ ဥရဂေါဝ ဃဋော။
ဒရိယာ ပုန ကုဉ္ဇရ ဘူနဟတာ၊ မိဂမုတ္တမသဂ္ဂဝရေန ဒသာတိ။
၂။ ဝဏ္ဏာရောဟဝဂ္ဂေါ
၃၆၁။ ဝဏ္ဏာရောဟဇာတကံ (၅-၂-၁)
၆၀။
ဝဏ္ဏာရောဟေန ဇာတိယာ၊ ဗလနိက္ကမနေန စ။
သုဗာဟု န မယာ သေယျော၊ သုဒါဌ ဣတိ ဘာသသိ။
၆၁။
ဝဏ္ဏာရောဟေန ဇာတိယာ၊ ဗလနိက္ကမနေန စ။
သုဒါဌော န မယာ သေယျော၊ သုဗာဟု ဣတိ ဘာသသိ။
၆၂။
ဧဝံ စေ မံ ဝိဟရန္တံ၊ သုဗာဟု သမ္မ ဒုဗ္ဘသိ။
န ဒါနာဟံ တယာ သဒ္ဓိံ၊ သံဝါသမဘိရောစယေ။
၆၃။
ယော ပရေသံ ဝစနာနိ၊ သဒ္ဒဟေယျ [သဒ္ဒဟေထ (သီ။ သျာ။ ဣ။)] ယထာတထံ။
ခိပ္ပံ ဘိဇ္ဇေထ မိတ္တသ္မိံ၊ ဝေရဉ္စ ပသဝေ ဗဟုံ။
၆၄။
န သော မိတ္တော ယော သဒါ အပ္ပမတ္တော၊ ဘေဒါသင္ကီ ရန္ဓမေဝါနုပဿီ။
ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟီတိ။
ဝဏ္ဏာရောဟဇာတကံ ပဌမံ။
၃၆၂။ သီလဝီမံသဇာတကံ (၅-၂-၂)
၆၅။
သီလံ သေယျော သုတံ သေယျော၊ ဣတိ မေ သံသယော အဟု။
သီလမေဝ သုတာ သေယျော၊ ဣတိ မေ နတ္ထိ သံသယော။
၆၆။
မောဃာ ဇာတိ စ ဝဏ္ဏော စ၊ သီလမေဝ ကိရုတ္တမံ။
သီလေန အနုပေတဿ၊ သုတေနတ္ထော န ဝိဇ္ဇတိ။
၆၇။
ခတ္တိယော စ အဓမ္မဋ္ဌော၊ ဝေဿော စာဓမ္မနိဿိတော။
တေ ပရိစ္စဇ္ဇုဘော လောကေ၊ ဥပပဇ္ဇန္တိ ဒုဂ္ဂတိံ။
၆၈။
ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ။
ဣဓ ဓမ္မံ စရိတွာန၊ ဘဝန္တိ တိဒိဝေ သမာ။
၆၉။
န ဝေဒါ သမ္ပရာယာယ၊ န ဇာတိ နာပိ [နောပိ (ဣ။)] ဗန္ဓဝါ။
သကဉ္စ သီလံ သံသုဒ္ဓံ၊ သမ္ပရာယာယ သုခါယ စာတိ [သုခါဝဟန္တိ (သီ။ သျာ။)]။
သီလဝီမံသဇာတကံ ဒုတိယံ။
၃၆၃။ ဟိရိဇာတကံ (၅-၂-၃)
၇၀။
ဟိရိံ တရန္တံ ဝိဇိဂုစ္ဆမာနံ၊ တဝါဟမသ္မီ ဣတိ ဘာသမာနံ။
သေယျာနိ ကမ္မာနိ အနာဒိယန္တံ၊ နေသော မမန္တိ ဣတိ နံ ဝိဇညာ။
၇၁။
ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ။
အကရောန္တံ ဘာသမာနံ၊ ပရိဇာနန္တိ ပဏ္ဍိတာ။
၇၂။
န သော မိတ္တော ယော သဒါ အပ္ပမတ္တော၊ ဘေဒါသင္ကီ ရန္ဓမေဝါနုပဿီ။
ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟိ။
၇၃။
ပါမောဇ္ဇကရဏံ ဌာနံ၊ ပသံသာဝဟနံ သုခံ။
ဖလာနိသံသော ဘာဝေတိ၊ ဝဟန္တော ပေါရိသံ ဓုရံ။
၇၄။
ပဝိဝေကရသံ ပိတွာ၊ ရသံ ဥပသမဿ စ။
နိဒ္ဒရော ဟောတိ နိပ္ပါပေါ၊ ဓမ္မပ္ပီတိရသံ ပိဝန္တိ။
ဟိရိဇာတကံ တတိယံ။
၃၆၄။ ခဇ္ဇောပနကဇာတကံ (၅-၂-၄)
၇၅။
ကော နု သန္တမှိ ပဇ္ဇောတေ၊ အဂ္ဂိပရိယေသနံ စရံ။
အဒ္ဒက္ခိ ရတ္တိ [ရတ္တိံ (သျာ။)] ခဇ္ဇောတံ၊ ဇာတဝေဒံ အမညထ။
၇၆။
သွဿ ဂေါမယစုဏ္ဏာနိ၊ အဘိမတ္ထံ တိဏာနိ စ။
ဝိပရီတာယ သညာယ၊ နာသက္ခိ ပဇ္ဇလေတဝေ။
၇၇။
ဧဝမ္ပိ အနုပါယေန၊ အတ္ထံ န လဘတေ မိဂေါ [မူဂေါ (သျာ။)]။
ဝိသာဏတော ဂဝံ ဒေါဟံ၊ ယတ္ထ ခီရံ န ဝိန္ဒတိ။
၇၈။
ဝိဝိဓေဟိ ဥပါယေဟိ၊ အတ္ထံ ပပ္ပောန္တိ မာဏဝါ။
နိဂ္ဂဟေန အမိတ္တာနံ၊ မိတ္တာနံ ပဂ္ဂဟေန စ။
၇၉။
သေနာမောက္ခပလာဘေန [သေနီ မောက္ခူပလာဘေန (သျာ။)]၊ ဝလ္လဘာနံ နယေန စ။
ဇဂတိံ ဇဂတိပါလာ၊ အာဝသန္တိ ဝသုန္ဓရန္တိ။
ခဇ္ဇောပနကဇာတကံ စတုတ္ထံ။
၃၆၅။ အဟိတုဏ္ဍိကဇာတကံ (၅-၂-၅)
၈၀။
ဓုတ္တောမှိ သမ္မ သုမုခ၊ ဇူတေ အက္ခပရာဇိတော။
ဟရေဟိ [သေဝေဟိ (ဣ။)] အမ္ဗပက္ကာနိ၊ ဝီရိယံ တေ ဘက္ခယာမသေ။
၈၁။
အလိကံ ဝတ မံ သမ္မ၊ အဘူတေန ပသံသသိ။
ကော တေ သုတော ဝါ ဒိဋ္ဌော ဝါ၊ သုမုခေါ နာမ မက္ကဋော။
၈၂။
အဇ္ဇာပိ မေ တံ မနသိ [တေ မံ သရသိ (က။)]၊ ယံ မံ တွံ အဟိတုဏ္ဍိက။
ဓညာပဏံ ပဝိသိတွာ၊ မတ္တော [မုတ္တော (က။)] ဆာတံ ဟနာသိ မံ။
၈၃။
တာဟံ သရံ ဒုက္ခသေယျံ၊ အပိ ရဇ္ဇမ္ပိ ကာရယေ။
နေဝါဟံ ယာစိတော ဒဇ္ဇံ၊ တထာ ဟိ ဘယတဇ္ဇိတော။
၈၄။
ယဉ္စ ဇညာ ကုလေ ဇာတံ၊ ဂဗ္ဘေ တိတ္တံ အမစ္ဆရိံ။
တေန သခိဉ္စ မိတ္တဉ္စ၊ ဓီရော သန္ဓာတုမရဟတီတိ။
အဟိတုဏ္ဍိကဇာတကံ ပဉ္စမံ။
၃၆၆။ ဂုမ္ဗိယဇာတကံ (၅-၂-၆)
၈၅။
မဓုဝဏ္ဏံ မဓုရသံ၊ မဓုဂန္ဓံ ဝိသံ အဟု။
ဂုမ္ဗိယော ဃာသမေသာနော၊ အရညေ ဩဒဟီ ဝိသံ။
၈၆။
မဓု ဣတိ မညမာနာ [မဓူတိ မညမာနာယ (က။)]၊ ယေ တံ ဝိသမခါဒိသုံ [ဝိသမသာယိသုံ (သီ။ သျာ။)]။
တေသံ တံ ကဋုကံ အာသိ၊ မရဏံ တေနုပါဂမုံ။
၈၇။
ယေ စ ခေါ ပဋိသင်္ခါယ၊ ဝိသံ တံ ပရိဝဇ္ဇယုံ။
တေ အာတုရေသု သုခိတာ၊ ဍယှမာနေသု နိဗ္ဗုတာ။
၈၈။
ဧဝမေဝ မနုဿေသု၊ ဝိသံ ကာမာ သမောဟိတာ။
အာမိသံ ဗန္ဓနဉ္စေတံ၊ မစ္စုဝေသော [ပစ္စုဝသော (သီ။ သျာ။)] ဂုဟာသယော။
၈၉။
ဧဝမေဝ ဣမေ ကာမေ၊ အာတုရာ ပရိစာရိကေ [ပရိစာရကေ (က။)]။
ယေ သဒါ ပရိဝဇ္ဇေန္တိ၊ သင်္ဂံ လောကေ ဥပစ္စဂုန္တိ။
ဂုမ္ဗိယဇာတကံ ဆဋ္ဌံ။
၃၆၇။ သာဠိယဇာတကံ (၅-၂-၇)
၉၀။
ယွာယံ သာဠိယ [သာလိယ (သီ။ သျာ။ ဣ။)၊ သာဠိက (?)] ဆာပေါတိ၊ ကဏှသပ္ပံ အဂါဟယိ။
တေန သပ္ပေနယံ ဒဋ္ဌော၊ ဟတော ပါပါနုသာသကော။
၉၁။
အဟန္တာရ [အဟနန္တ (ဣ။)၊ အဟရန္တ (?)] မဟန္တာရံ၊ ယော နရော ဟန္တုမိစ္ဆတိ။
ဧဝံ သော နိဟတော သေတိ၊ ယထာယံ ပုရိသော ဟတော။
၉၂။
အဟန္တာရ [အဟနန္တ (သီ။ သျာ။ ဣ။)၊ အဟရန္တ (?)] မဃာတေန္တံ၊ ယော နရော ဟန္တုမိစ္ဆတိ။
ဧဝံ သော နိဟတော သေတိ၊ ယထာယံ ပုရိသော ဟတော။
၉၃။
ယထာ ပံသုမုဋ္ဌိံ ပုရိသော၊ ပဋိဝါတံ ပဋိက္ခိပေ။
တမေဝ သော ရဇော ဟန္တိ၊ တထာယံ ပုရိသော ဟတော။
၉၄။
ယော အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿ။
တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တောတိ။
သာဠိယဇာတကံ သတ္တမံ။
၃၆၈။ တစသာရဇာတကံ (၅-၂-၈)
၉၅။
အမိတ္တဟတ္ထတ္ထဂတာ [ဟတ္ထတ္တဂတာ (ကတ္ထစိ၊ သီ။ နိယျ)]၊ တစသာရသမပ္ပိတာ။
ပသန္နမုခဝဏ္ဏာတ္ထ၊ ကသ္မာ တုမှေ န သောစထ။
၉၆။
န သောစနာယ ပရိဒေဝနာယ၊ အတ္ထောဝ လဗ္ဘော [အတ္ထော စ လဗ္ဘာ (သီ။ သျာ။)၊ အတ္ထောဓ လဗ္ဘာ (အ။ နိ။ ၅။၄၈)] အပိ အပ္ပကောပိ။
သောစန္တမေနံ ဒုခိတံ ဝိဒိတွာ၊ ပစ္စတ္ထိကာ အတ္တမနာ ဘဝန္တိ။
၉၇။
ယတော စ ခေါ ပဏ္ဍိတော အာပဒါသု၊ န ဝေဓတီ အတ္ထဝိနိစ္ဆယညူ။
ပစ္စတ္ထိကာဿ [ပစ္စတ္ထိကာ တေ (က။)] ဒုခိတာ ဘဝန္တိ၊ ဒိသွာ မုခံ အဝိကာရံ ပုရာဏံ။
၉၈။
ဇပ္ပေန မန္တေန သုဘာသိတေန၊ အနုပ္ပဒါနေန ပဝေဏိယာ ဝါ။
ယထာ ယထာ ယတ္ထ လဘေထ အတ္ထံ၊ တထာ တထာ တတ္ထ ပရက္ကမေယျ။
၉၉။
ယတော စ ဇာနေယျ အလဗ္ဘနေယျော၊ မယာ ဝ [မယာ ဝါ (သျာ။ က။)] အညေန ဝါ ဧသ အတ္ထော။
အသောစမာနော အဓိဝါသယေယျ၊ ကမ္မံ ဒဠှံ ကိန္တိ ကရောမိ ဒါနီတိ။
တစသာရဇာတကံ အဋ္ဌမံ။
၃၆၉။ မိတ္တဝိန္ဒကဇာတကံ (၅-၂-၉)
၁၀၀။
က္ယာဟံ ဒေဝါနမကရံ၊ ကိံ ပါပံ ပကတံ မယာ။
ယံ မေ သိရသ္မိံ ဩဟစ္စ [ဥဟစ္စ (က။)၊ ဥဟစ္စ (ဣ။)]၊ စက္ကံ ဘမတိ မတ္ထကေ။
၁၀၁။
အတိက္ကမ္မ ရမဏကံ၊ သဒါမတ္တဉ္စ ဒူဘကံ။
ဗြဟ္မတ္တရဉ္စ ပါသာဒံ၊ ကေနတ္ထေန ဣဓါဂတော။
၁၀၂။
ဣတော ဗဟုတရာ ဘောဂါ၊ အတြ မညေ ဘဝိဿရေ။
ဣတိ ဧတာယ သညာယ၊ ပဿ မံ ဗျသနံ ဂတံ။
၁၀၃။
စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ [အဋ္ဌာဟိ စာပိ (သီ။ သျာ။)၊ အဋ္ဌာဘိ စာပိ (က။)] သောဠသ။
သောဠသာဟိ စ ဗာတ္တိံသ၊ အတ္ရိစ္ဆံ စက္ကမာသဒေါ။
ဣစ္ဆာဟတဿ ပေါသဿ, စက္ကံ ဘမတိ မတ္ထကေ။
၁၀၄။
ဥပရိဝိသာလာ ဒုပ္ပူရာ၊ ဣစ္ဆာ ဝိသဋဂါမိနီ [ဥပရိ ဝိသာလံ ဒုပ္ပူရံ၊ ဣစ္ဆာဝိသဒဂါမိနီ (သီ။)]။
ယေ စ တံ အနုဂိဇ္ဈန္တိ၊ တေ ဟောန္တိ စက္ကဓါရိနောတိ။
မိတ္တဝိန္ဒကဇာတကံ နဝမံ။
၃၇၀။ ပလာသဇာတကံ (၅-၂-၁၀)
၁၀၅။
ဟံသော ပလာသမဝစ၊ နိဂြောဓေါ သမ္မ ဇာယတိ။
အင်္ကသ္မိံ [အင်္ဂသ္မိံ (က။)] တေ နိသိန္နောဝ၊ သော တေ မမ္မာနိ ဆေစ္ဆတိ [ဆိဇ္ဇတိ (က။)]။
၁၀၆။
ဝဍ္ဎတာမေဝ [ဝဒ္ဓိတမေဝ (က။)] နိဂြောဓေါ၊ ပတိဋ္ဌဿ ဘဝါမဟံ။
ယထာ ပိတာ စ မာတာ စ [ပိတာ ဝါ မာတာ ဝါ (ဣ။)၊ မာတာ ဝါ ပိတာ ဝါ (က။)]၊ ဧဝံ မေ သော ဘဝိဿတိ။
၁၀၇။
ယံ တွံ အင်္ကသ္မိံ ဝဍ္ဎေသိ၊ ခီရရုက္ခံ ဘယာနကံ။
အာမန္တ ခေါ တံ ဂစ္ဆာမ၊ ဝုဍ္ဎိ မဿ န ရုစ္စတိ။
၁၀၈။
ဣဒါနိ ခေါ မံ ဘာယေတိ၊ မဟာနေရုနိဒဿနံ။
ဟံသဿ အနဘိညာယ၊ မဟာ မေ ဘယမာဂတံ။
၁၀၉။
န တဿ ဝုဍ္ဎိ ကုသလပ္ပသတ္ထာ၊ ယော ဝဍ္ဎမာနော ဃသတေ ပတိဋ္ဌံ။
တဿူပရောဓံ ပရိသင်္ကမာနော၊ ပတာရယီ မူလဝဓါယ ဓီရောတိ။
ပလာသဇာတကံ ဒသမံ။
ဝဏ္ဏာရောဟဝဂ္ဂေါ ဒုတိယော [ဣမဿုဒ္ဒါနံ တတိယဝဂ္ဂပရိယောသာနေ ဘဝိဿတိ]။
၃။ အဍ္ဎဝဂ္ဂေါ
၃၇၁။ ဒီဃီတိကောသလဇာတကံ (၅-၃-၁)
၁၁၀။
ဧဝံဘူတဿ တေ ရာဇ၊ အာဂတဿ ဝသေ [ဝသော (ဣ။ က။)] မမ။
အတ္ထိ နု ကောစိ ပရိယာယော၊ ယော တံ ဒုက္ခာ ပမောစယေ။
၁၁၁။
ဧဝံဘူတဿ မေ တာတ၊ အာဂတဿ ဝသေ တဝ။
နတ္ထိ နော ကောစိ ပရိယာယော၊ ယော မံ ဒုက္ခာ ပမောစယေ။
၁၁၂။
နာညံ သုစရိတံ ရာဇ၊ နာညံ ရာဇ သုဘာသိတံ။
တာယတေ မရဏကာလေ၊ ဧဝမေဝိတရံ ဓနံ။
၁၁၃။
အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။
ယေ စ တံ ဥပနယှန္တိ၊ ဝေရံ တေသံ န သမ္မတိ။
၁၁၄။
အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။
ယေ စ တံ နုပနယှန္တိ၊ ဝေရံ တေသူပသမ္မတိ။
၁၁၅။
န ဟိ ဝေရေန ဝေရာနိ၊ သမ္မန္တီဓ ကုဒါစနံ။
အဝေရေန စ သမ္မန္တိ၊ ဧသ ဓမ္မော သနန္တနောတိ။
ဒီဃီတိကောသလဇာတကံ ပဌမံ။
၃၇၂။ မိဂပေါတကဇာတကံ (၅-၃-၂)
၁၁၆။
အဂါရာ ပစ္စုပေတဿ၊ အနဂါရဿ တေ သတော။
သမဏဿ န တံ သာဓု၊ ယံ ပေတမနုသောစသိ။
၁၁၇။
သံဝါသေန ဟဝေ သက္က၊ မနုဿဿ မိဂဿ ဝါ။
ဟဒယေ ဇာယတေ ပေမံ၊ န တံ သက္ကာ အသောစိတုံ။
၁၁၈။
မတံ မရိဿံ ရောဒန္တိ၊ ယေ ရုဒန္တိ လပန္တိ စ။
တသ္မာ တွံ ဣသိ မာ ရောဒိ၊ ရောဒိတံ မောဃမာဟု သန္တော။
၁၁၉။
ရောဒိတေန ဟဝေ ဗြဟ္မေ၊ မတော ပေတော သမုဋ္ဌဟေ။
သဗ္ဗေ သင်္ဂမ္မ ရောဒါမ၊ အညမညဿ ဉာတကေ။
၁၂၀။
အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ။
ဝါရိနာ ဝိယ ဩသိဉ္စံ၊ သဗ္ဗံ နိဗ္ဗာပယေ ဒရံ။
၁၂၁။
အဗ္ဗဟိ ဝတ မေ သလ္လံ၊ ယမာသိ ဟဒယဿိတံ။
ယော မေ သောကပရေတဿ၊ ပုတ္တသောကံ အပါနုဒိ။
၁၂၂။
သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော။
န သောစာမိ န ရောဒါမိ၊ တဝ သုတွာန ဝါသဝါတိ။
မိဂပေါတကဇာတကံ ဒုတိယံ။
၃၇၃။ မူသိကဇာတကံ (၅-၃-၃)
၁၂၃။
ကုဟိံ ဂတာ ကတ္ထ ဂတာ၊ ဣတိ လာလပ္ပတီ ဇနော။
အဟမေဝေကော ဇာနာမိ၊ ဥဒပါနေ မူသိကာ ဟတာ။
၁၂၄။
ယဉ္စေတံ [ယထေတံ (ဣ။)၊ ယဝေတံ (က။)၊ ယမေတံ (ကတ္ထစိ)] ဣတိ စီတိ စ၊ ဂဒြဘောဝ နိဝတ္တသိ။
ဥဒပါနေ မူသိကံ ဟန္တွာ၊ ယဝံ ဘက္ခေတုမိစ္ဆသိ။
၁၂၅။
ဒဟရော စာသိ ဒုမ္မေဓ၊ ပဌမုပ္ပတ္တိကော [ပဌမုပ္ပတ္တိတော (သီ။ ဣ။)] သုသု။
ဒီဃဉ္စေတံ [ဒီဃမေတံ (ဣ။)] သမာသဇ္ဇ [သမာပဇ္ဇ (သျာ။ က။)]၊ န တေ ဒဿာမိ ဇီဝိတံ။
၁၂၆။
နာန္တလိက္ခဘဝနေန၊ နာင်္ဂပုတ္တပိနေန [နာင်္ဂပုတ္တသိရေန (သီ။ သျာ။ ဣ။)] ဝါ။
ပုတ္တေန ဟိ ပတ္ထယိတော၊ သိလောကေဟိ ပမောစိတော။
၁၂၇။
သဗ္ဗံ သုတမဓီယေထ၊ ဟီနမုက္ကဋ္ဌမဇ္ဈိမံ။
သဗ္ဗဿ အတ္ထံ ဇာနေယျ၊ န စ သဗ္ဗံ ပယောဇယေ။
ဟောတိ တာဒိသကော ကာလော၊ ယတ္ထ အတ္ထာဝဟံ သုတန္တိ။
မူသိကဇာတကံ တတိယံ။
၃၇၄။ စူဠဓနုဂ္ဂဟဇာတကံ (၅-၃-၄)
၁၂၈။
သဗ္ဗံ ဘဏ္ဍံ သမာဒါယ၊ ပါရံ တိဏ္ဏောသိ ဗြာဟ္မဏ။
ပစ္စာဂစ္ဆ လဟုံ ခိပ္ပံ, မမ္ပိ တာရေဟိ ဒါနိတော [ဒါနိဘော (သျာ။)]။
၁၂၉။
အသန္ထုတံ မံ စိရသန္ထုတေန၊ နိမီနိ ဘောတီ အဒ္ဓုဝံ ဓုဝေန။
မယာပိ ဘောတီ နိမိနေယျ အညံ၊ ဣတော အဟံ ဒူရတရံ ဂမိဿံ။
၁၃၀။
ကာယံ ဧဠဂလာဂုမ္ဗေ [ဧဠဂဏဂုမ္ဗေ (က။)]၊ ကရောတိ အဟုဟာသိယံ။
နယီဓ နစ္စဂီတံ ဝါ [နယိဓ နစ္စံ ဝါ ဂီတံ ဝါ (သီ။ သျာ။ ဣ။)]၊ တာဠံ ဝါ သုသမာဟိတံ။
အနမှိကာလေ [အနမှကာလေ (ဣ။)] သုသောဏိ [သုဿောဏိ (သီ။ သျာ။ ဣ။)]၊ ကိံ နု ဇဂ္ဃသိ သောဘနေ [သောဘဏေ (ဣ။ က။)]။
၁၃၁။
သိင်္ဂါလ ဗာလ ဒုမ္မေဓ၊ အပ္ပပညောသိ ဇမ္ဗုက။
ဇီနော မစ္ဆဉ္စ ပေသိဉ္စ၊ ကပဏော ဝိယ ဈာယသိ။
၁၃၂။
သုဒဿံ ဝဇ္ဇမညေသံ၊ အတ္တနော ပန ဒုဒ္ဒသံ။
ဇီနာ ပတိဉ္စ ဇာရဉ္စ၊ မညေ တွညေဝ [မမ္ပိ တွညေဝ (သီ။ သျာ။)၊ တွမ္ပိ မညေဝ (ဣ။)] ဈာယသိ။
၁၃၃။
ဧဝမေတံ မိဂရာဇ၊ ယထာ ဘာသသိ ဇမ္ဗုက။
သာ နူနာဟံ ဣတော ဂန္တွာ၊ ဘတ္တု ဟေဿံ ဝသာနုဂါ။
၁၃၄။
ယော ဟရေ မတ္တိကံ ထာလံ၊ ကံသထာလမ္ပိ သော ဟရေ။
ကတဉ္စေဝ [ကတံယေဝ (သီ။ သျာ။ ဣ။)] တယာ ပါပံ၊ ပုနပေဝံ ကရိဿသီတိ။
စူဠဓနုဂ္ဂဟဇာတကံ စတုတ္ထံ။
၃၇၅။ ကပေါတဇာတကံ (၅-၃-၅)
၁၃၅။
ဣဒါနိ ခေါမှိ သုခိတော အရောဂေါ၊ နိက္ကဏ္ဋကော နိပ္ပတိတော ကပေါတော။
ကာဟာမိ ဒါနီ ဟဒယဿ တုဋ္ဌိံ၊ တထာဟိမံ မံသသာကံ ဗလေတိ။
၁၃၆။
ကာယံ ဗလာကာ သိခိနော၊ စောရီ လင္ဃိပိတာမဟာ။
ဩရံ ဗလာကေ အာဂစ္ဆ၊ စဏ္ဍော မေ ဝါယသော သခါ။
၁၃၇။
အလဉှိ တေ ဇဂ္ဃိတာယေ၊ မမံ ဒိသွာန ဧဒိသံ။
ဝိလူနံ သူဒပုတ္တေန၊ ပိဋ္ဌမဏ္ဍေန [ပိဋ္ဌမဒ္ဒေန (သီ။ သျာ။ ဣ။)] မက္ခိတံ။
၁၃၈။
သုနှာတော သုဝိလိတ္တောသိ၊ အန္နပါနေန တပ္ပိတော။
ကဏ္ဌေ စ တေ ဝေဠုရိယော၊ အဂမာ နု ကဇင်္ဂလံ။
၁၃၉။
မာ တေ မိတ္တော အမိတ္တော ဝါ၊ အဂမာသိ ကဇင်္ဂလံ။
ပိဉ္ဆာနိ တတ္ထ လာယိတွာ၊ ကဏ္ဌေ ဗန္ဓန္တိ ဝဋ္ဋနံ။
၁၄၀။
ပုနပါပဇ္ဇသီ သမ္မ၊ သီလဉှိ တဝ တာဒိသံ။
န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာတိ။
ကပေါတဇာတကံ ပဉ္စမံ။
အဍ္ဎဝဂ္ဂေါ တတိယော။
တဿုဒ္ဒါနံ –
အထ ဝဏ္ဏ သသီလ ဟိရိ လဘတေ၊ သုမုခါ ဝိသ သာဠိယမိတ္တဝရော။
အထ စက္က ပလာသ သရာဇ သတော၊ ယဝ ဗာလ ကပေါတက ပန္နရသာတိ။
အထ ဝဂ္ဂုဒ္ဒါနံ –
ဇီနဉ္စ ဝဏ္ဏံ အသမံဝဂုပ္ပရိ၊ သုဒေသိတာ ဇာတကန္တိ သန္တိ ဝီသတိ [ဇာတက ပဉ္စဝီသတိ (?)]။
မဟေသိနော ဗြဟ္မစရိတ္တမုတ္တ-မဝေါစ ဂါထာ အတ္ထဝတီ သုဗျဉ္ဇနာတိ။
ပဉ္စကနိပါတံ နိဋ္ဌိတံ။