၃။ တိကနိပါတ
၁။ သင်္ကပ္ပဝဂ္ဂ
၂၅၁။ သင်္ကပ္ပရာဂဇာတက (၃-၁-၁)
၁။
သင်္ကပ္ပရာဂဓေါတေန ၊ ဝိတက္ကနိသိတေန စ။
နာလင်္ကတေန ဘဒြေန [နေဝါလင်္ကတဘဒြေန (သျာ။)]၊ ဥသုကာရာကတေန စ [န ဥသုကာရကတေန စ (သီ။ သျာ။ ဣ။)]။
၂။
န ကဏ္ဏာယတမုတ္တေန၊ နာပိ မောရူပသေဝိနာ။
တေနမှိ ဟဒယေ ဝိဒ္ဓေါ၊ သဗ္ဗင်္ဂပရိဒါဟိနာ။
၃။
အာဝေဓဉ္စ န ပဿာမိ၊ ယတော ရုဟိရမဿဝေ။
ယာဝ အယောနိသော စိတ္တံ၊ သယံ မေ ဒုက္ခမာဘတန္တိ။
သင်္ကပ္ပရာဂဇာတကံ ပဌမံ။
၂၅၂။ တိလမုဋ္ဌိဇာတကံ (၃-၁-၂)
၄။
အဇ္ဇာပိ မေ တံ မနသိ [သရသိ (က။)]၊ ယံ မံ တွံ တိလမုဋ္ဌိယာ။
ဗာဟာယ မံ ဂဟေတွာန၊ လဋ္ဌိယာ အနုတာဠယိ။
၅။
နနု ဇီဝိတေ န ရမသိ၊ ယေနာသိ ဗြာဟ္မဏာဂတော။
ယံ မံ ဗာဟာ ဂဟေတွာန၊ တိက္ခတ္တုံ အနုတာဠယိ။
၆။
အရိယော အနရိယံ ကုဗ္ဗန္တံ [ကုဗ္ဗာနံ (သီ။ ဣ။)၊ ကုဗ္ဗံ (သျာ။)]၊ ယော ဒဏ္ဍေန နိသေဓတိ။
သာသနံ တံ န တံ ဝေရံ၊ ဣတိ နံ ပဏ္ဍိတာ ဝိဒူတိ။
တိလမုဋ္ဌိဇာတကံ ဒုတိယံ။
၂၅၃။ မဏိကဏ္ဌဇာတကံ (၃-၁-၃)
၇။
မမန္နပါနံ ဝိပုလံ ဥဠာရံ၊ ဥပ္ပဇ္ဇတီမဿ မဏိဿ ဟေတု။
တံ တေ န ဒဿံ အတိယာစကောသိ၊ န စာပိ တေ အဿမမာဂမိဿံ။
၈။
သုသူ ယထာ သက္ခရဓေါတပါဏီ၊ တာသေသိ မံ သေလံ ယာစမာနော။
တံ တေ န ဒဿံ အတိယာစကောသိ၊ န စာပိ တေ အဿမမာဂမိဿံ။
၉။
န တံ ယာစေ ယဿ ပိယံ ဇိဂီသေ [ဇိဂိံသေ (သီ။ သျာ။ ဣ။)]၊ ဒေဿော ဟောတိ အတိယာစနာယ။
နာဂေါ မဏိံ ယာစိတော ဗြာဟ္မဏေန၊ အဒဿနံယေဝ တဒဇ္ဈဂမာတိ။
မဏိကဏ္ဌဇာတကံ တတိယံ။
၂၅၄။ ကုဏ္ဍကကုစ္ဆိသိန္ဓဝဇာတကံ (၃-၁-၄)
၁၀။
ဘုတွာ တိဏပရိဃာသံ၊ ဘုတွာ အာစာမကုဏ္ဍကံ။
ဧတံ တေ ဘောဇနံ အာသိ၊ ကသ္မာ ဒါနိ န ဘုဉ္ဇသိ။
၁၁။
ယတ္ထ ပေါသံ န ဇာနန္တိ၊ ဇာတိယာ ဝိနယေန ဝါ။
ဗဟုံ [ပဟူ (သီ။ ဣ။)၊ ပဟုံ (သျာ။ က။)] တတ္ထ မဟာဗြမှေ၊ အပိ အာစာမကုဏ္ဍကံ။
၁၂။
တွဉ္စ ခေါ မံ ပဇာနာသိ၊ ယာဒိသာယံ ဟယုတ္တမော။
ဇာနန္တော ဇာနမာဂမ္မ၊ န တေ ဘက္ခာမိ ကုဏ္ဍကန္တိ။
ကုဏ္ဍကကုစ္ဆိသိန္ဓဝဇာတကံ စတုတ္ထံ။
၂၅၅။ သုကဇာတကံ (၃-၁-၅)
၁၃။
ယာဝ သော မတ္တမညာသိ၊ ဘောဇနသ္မိံ ဝိဟင်္ဂမော။
တာဝ အဒ္ဓါနမာပါဒိ၊ မာတရဉ္စ အပေါသယိ။
၁၄။
ယတော စ ခေါ ဗဟုတရံ၊ ဘောဇနံ အဇ္ဈဝါဟရိ [အဇ္ဈုပါဟရိ (သီ။ ဣ။)]။
တတော တတ္ထေဝ သံသီဒိ၊ အမတ္တညူ ဟိ သော အဟု။
၁၅။
တသ္မာ မတ္တညုတာ သာဓု၊ ဘောဇနသ္မိံ အဂိဒ္ဓတာ [အဂိဒ္ဓိတာ (သျာ။ က။)]။
အမတ္တညူ ဟိ သီဒန္တိ၊ မတ္တညူ စ န သီဒရေတိ။
သုကဇာတကံ ပဉ္စမံ။
၂၅၆။ ဇရူဒပါနဇာတကံ (၃-၁-၆)
၁၆။
ဇရူဒပါနံ ခဏမာနာ၊ ဝါဏိဇာ ဥဒကတ္ထိကာ။
အဇ္ဈဂမုံ အယသံ လောဟံ [အဇ္ဈဂံသု အယောလောဟံ (သီ။ သျာ။ ဣ။)]၊ တိပုသီသဉ္စ ဝါဏိဇာ။
ရဇတံ ဇာတရူပဉ္စ၊ မုတ္တာ ဝေဠူရိယာ ဗဟူ။
၁၇။
တေ စ တေန အသန္တုဋ္ဌာ၊ ဘိယျော ဘိယျော အခါဏိသုံ။
တေ တတ္ထာသီဝိသော [တတ္ထ အာသီဝိသော (က။)၊ တတ္ထပါသီဝိသော (သျာ။)] ဃောရော၊ တေဇဿီ တေဇသာ ဟနိ။
၁၈။
တသ္မာ ခဏေ နာတိခဏေ၊ အတိခါတံ [အတိခဏံ (က။)] ဟိ ပါပကံ။
ခါတေန စ [ခဏေန စ (က။)၊ ခဏနေန (သျာ။)] ဓနံ လဒ္ဓံ၊ အတိခါတေန [အတိခဏေန (က။)] နာသိတန္တိ။
ဇရူဒပါနဇာတကံ ဆဋ္ဌံ။
၂၅၇။ ဂါမဏိစန္ဒဇာတကံ (၃-၁-၇)
၁၉။
နာယံ ဃရာနံ ကုသလော၊ လောလော အယံ ဝလီမုခေါ။
ကတံ ကတံ ခေါ ဒူသေယျ၊ ဧဝံဓမ္မမိဒံ ကုလံ။
၂၀။
နယိဒံ စိတ္တဝတော လောမံ၊ နာယံ အဿာသိကော မိဂေါ။
သိဋ္ဌံ [သတ္ထံ (သီ။ သျာ။ ဣ။)] မေ ဇနသန္ဓေန၊ နာယံ ကိဉ္စိ ဝိဇာနတိ။
၂၁။
န မာတရံ ပိတရံ ဝါ၊ ဘာတရံ ဘဂိနိံ သကံ။
ဘရေယျ တာဒိသော ပေါသော၊ သိဋ္ဌံ ဒသရထေန မေတိ။
ဂါမဏိစန္ဒ [ဂါမဏိစဏ္ဍ (သီ။ ဣ။)] ဇာတကံ သတ္တမံ။
၂၅၈။ မန္ဓာတုဇာတကံ (၃-၁-၈)
၂၂။
ယာဝတာ စန္ဒိမသူရိယာ၊ ပရိဟရန္တိ ဒိသာ ဘန္တိ ဝိရောစနာ [ဝိရောစမာနာ (က။)]။
သဗ္ဗေဝ ဒါသာ မန္ဓာတု၊ ယေ ပါဏာ ပထဝိဿိတာ [ပဌဝိနိဿိတာ (သီ။ ဣ။)၊ ပဌဝိဿိတာ (သျာ။)]။
၂၃။
န ကဟာပဏဝဿေန၊ တိတ္တိ ကာမေသု ဝိဇ္ဇတိ။
အပ္ပဿာဒါ ဒုခါ ကာမာ၊ ဣတိ ဝိညာယ ပဏ္ဍိတော။
၂၄။
အပိ ဒိဗ္ဗေသု ကာမေသု၊ ရတိံ သော နာဓိဂစ္ဆတိ။
တဏှက္ခယရတော ဟောတိ၊ သမ္မာသမ္ဗုဒ္ဓသာဝကောတိ။
မန္ဓာတုဇာတကံ အဋ္ဌမံ။
၂၅၉။ တိရီဋဝစ္ဆဇာတကံ (၃-၁-၉)
၂၅။
နယိမဿ ဝိဇ္ဇာမယမတ္ထိ ကိဉ္စိ၊ န ဗန္ဓဝေါ နော ပန တေ သဟာယော။
အထ ကေန ဝဏ္ဏေန တိရီဋဝစ္ဆော [တိရီဋိဝစ္ဆော (သျာ။ က။)]၊ တေဒဏ္ဍိကော ဘုဉ္ဇတိ အဂ္ဂပိဏ္ဍံ။
၂၆။
အာပါသု [အာဝါသု (က။)] မေ ယုဒ္ဓပရာဇိတဿ၊ ဧကဿ ကတွာ ဝိဝနသ္မိ ဃောရေ။
ပသာရယီ ကိစ္ဆဂတဿ ပါဏိံ၊ တေနူဒတာရိံ ဒုခသံပရေတော။
၂၇။
ဧတဿ ကိစ္စေန ဣဓါနုပတ္တော၊ ဝေသာယိနော ဝိသယာ ဇီဝလောကေ။
လာဘာရဟော တာတ တိရီဋဝစ္ဆော၊ ဒေထဿ ဘောဂံ ယဇထဉ္စ [ယဇတဉ္စ (သီ။ ဣ။)၊ ယဇိတဉ္စ (သျာ။)] ယညန္တိ။
တိရီဋဝစ္ဆဇာတကံ နဝမံ။
၂၆၀။ ဒူတဇာတကံ (၃-၁-၁၀)
၂၈။
ယဿတ္ထာ ဒူရမာယန္တိ၊ အမိတ္တမပိ ယာစိတုံ။
တဿူဒရဿဟံ ဒူတော၊ မာ မေ ကုဇ္ဈ [ကုဇ္ဈိ (သီ။ ဣ။)] ရထေသဘ။
၂၉။
ယဿ ဒိဝါ စ ရတ္တော စ၊ ဝသမာယန္တိ မာဏဝါ။
တဿူဒရဿဟံ ဒူတော၊ မာ မေ ကုဇ္ဈ [ကုဇ္ဈိ (သီ။ ဣ။)] ရထေသဘ။
၃၀။
ဒဒါမိ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန။
ဒူတော ဟိ ဒူတဿ ကထံ န ဒဇ္ဇံ၊ မယမ္ပိ တဿေဝ ဘဝါမ ဒူတာတိ။
ဒူတဇာတကံ ဒသမံ။
သင်္ကပ္ပဝဂ္ဂေါ ပဌမော။
တဿုဒ္ဒါနံ –
ဥသုကာရဝရော တိလမုဋ္ဌိ မဏိ၊ ဟယရာဇ ဝိဟင်္ဂမ အာသိဝိသော။
ဇနသန္ဓ ကဟာပဏဝဿ ပုန၊ တိရိဋံ ပုန ဒူတဝရေန ဒသာတိ။
၂။ ပဒုမဝဂ္ဂေါ
၂၆၁။ ပဒုမဇာတကံ (၃-၂-၁)
၃၁။
ယထာ ကေသာ စ မဿူ စ၊ ဆိန္နံ ဆိန္နံ ဝိရူဟတိ။
ဧဝံ ရူဟတု တေ နာသာ၊ ပဒုမံ ဒေဟိ ယာစိတော။
၃၂။
ယထာ သာရဒိကံ ဗီဇံ၊ ခေတ္တေ ဝုတ္တံ ဝိရူဟတိ။
ဧဝံ ရူဟတု တေ နာသာ၊ ပဒုမံ ဒေဟိ ယာစိတော။
၃၃။
ဥဘောပိ ပလပန္တေတေ [ဝိလပန္တေတေ (သျာ။ က။)]၊ အပိ ပဒ္မာနိ ဒဿတိ။
ဝဇ္ဇုံ ဝါ တေ န ဝါ ဝဇ္ဇုံ၊ နတ္ထိ နာသာယ ရူဟနာ။
ဒေဟိ သမ္မ ပဒုမာနိ၊ အဟံ ယာစာမိ ယာစိတောတိ။
ပဒုမဇာတကံ ပဌမံ။
၂၆၂။ မုဒုပါဏိဇာတကံ (၃-၂-၂)
၃၄။
ပါဏိ စေ မုဒုကော စဿ၊ နာဂေါ စဿ သုကာရိတော။
အန္ဓကာရော စ ဝဿေယျ၊ အထ နူန တဒါ သိယာ။
၃၅။
အနလာ မုဒုသမ္ဘာသာ၊ ဒုပ္ပူရာ တာ [ဒုပ္ပူရတ္တာ (က။)] နဒီသမာ။
သီဒန္တိ နံ ဝိဒိတွာန၊ အာရကာ ပရိဝဇ္ဇယေ။
၃၆။
ယံ ဧတာ ဥပသေဝန္တိ၊ ဆန္ဒသာ ဝါ ဓနေန ဝါ။
ဇာတဝေဒေါဝ သံ ဌာနံ၊ ခိပ္ပံ အနုဒဟန္တိ နန္တိ။
မုဒုပါဏိဇာတကံ ဒုတိယံ။
၂၆၃။ စူဠပလောဘနဇာတကံ (၃-၂-၃)
၃၇။
အဘိဇ္ဇမာနေ ဝါရိသ္မိံ၊ သယံ [အယံ (က။)] အာဂမ္မ ဣဒ္ဓိယာ။
မိဿီဘာဝိတ္ထိယာ ဂန္တွာ၊ သံသီဒသိ [သံသီဒတိ (က။)] မဟဏ္ဏဝေ။
၃၈။
အာဝဋ္ဋနီ မဟာမာယာ၊ ဗြဟ္မစရိယဝိကောပနာ။
သီဒန္တိ နံ ဝိဒိတွာန၊ အာရကာ ပရိဝဇ္ဇယေ။
၃၉။
ယံ ဧတာ ဥပသေဝန္တိ၊ ဆန္ဒသာ ဝါ ဓနေန ဝါ။
ဇာတဝေဒေါဝ သံ ဌာနံ၊ ခိပ္ပံ အနုဒဟန္တိ နန္တိ။
စူဠပလောဘန [စုလ္လပလောဘန (သီ။ သျာ။ ဣ။)] ဇာတကံ တတိယံ။
၂၆၄။ မဟာပနာဒဇာတကံ (၃-၂-၄)
၄၀။
ပနာဒေါ နာမ သော ရာဇာ၊ ယဿ ယူပေါ သုဝဏ္ဏယော။
တိရိယံ သောဠသုဗ္ဗေဓေါ [သောဠသပဗ္ဗေဓေါ (သီ။ ဣ။)]၊ ဥဒ္ဓမာဟု [ဥစ္စမာဟု (သီ။ သျာ။ ဣ။)] သဟဿဓါ။
၄၁။
သဟဿကဏ္ဍော သတဂေဏ္ဍု [သတဘေဒေါ (သီ။ ဣ။)၊ သတဘေဏ္ဍု (သီ။ နိဿယ)]၊ ဓဇာသု ဟရိတာမယော။
အနစ္စုံ တတ္ထ ဂန္ဓဗ္ဗာ၊ ဆ သဟဿာနိ သတ္တဓါ။
၄၂။
ဧဝမေတံ [ဧဝမေဝ (က။)] တဒါ အာသိ၊ ယထာ ဘာသသိ ဘဒ္ဒဇိ။
သက္ကော အဟံ တဒါ အာသိံ၊ ဝေယျာဝစ္စကရော တဝါတိ။
မဟာပနာဒဇာတကံ စတုတ္ထံ။
၂၆၅။ ခုရပ္ပဇာတကံ (၃-၂-၅)
၄၃။
ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓေါတေ။
တသ္မိံ ဘယသ္မိံ မရဏေ ဝိယူဠ္ဟေ၊ ကသ္မာ နု တေ နာဟု ဆမ္ဘိတတ္တံ။
၄၄။
ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓေါတေ။
တသ္မိံ ဘယသ္မိံ မရဏေ ဝိယူဠ္ဟေ၊ ဝေဒံ အလတ္ထံ ဝိပုလံ ဥဠာရံ။
၄၅။
သော ဝေဒဇာတော အဇ္ဈဘဝိံ အမိတ္တေ၊ ပုဗ္ဗေဝ မေ ဇီဝိတမာသိ စတ္တံ။
န ဟိ ဇီဝိတေ အာလယံ ကုဗ္ဗမာနော၊ သူရော ကယိရာ သူရကိစ္စံ ကဒါစီတိ။
ခုရပ္ပဇာတကံ ပဉ္စမံ။
၂၆၆။ ဝါတဂ္ဂသိန္ဓဝဇာတကံ (၃-၂-၆)
၄၆။
ယေနာသိ ကိသိယာ ပဏ္ဍု၊ ယေန ဘတ္တံ န ရုစ္စတိ။
အယံ သော အာဂတော ဘတ္တာ [တာတော (သီ။ သျာ။ ဣ။)]၊ ကသ္မာ ဒါနိ ပလာယသိ။
၄၇။
သစေ [န ခေါ (သျာ။ က။)] ပနာဒိကေနေဝ၊ သန္ထဝေါ နာမ ဇာယတိ။
ယသော ဟာယတိ ဣတ္ထီနံ၊ တသ္မာ တာတ ပလာယဟံ [ပလာယိဟံ (သျာ။)၊ ပလာယိတံ (က။)]။
၄၈။
ယဿဿိနံ ကုလေ ဇာတံ၊ အာဂတံ ယာ န ဣစ္ဆတိ။
သောစတိ စိရရတ္တာယ၊ ဝါတဂ္ဂမိဝ ဘဒ္ဒလီတိ [ကုန္ဒလီတိ (သီ။ ဣ။)၊ ဂဒြဘီတိ (သျာ။)]။
ဝါတဂ္ဂသိန္ဓဝဇာတကံ ဆဋ္ဌံ။
၂၆၇။ ကက္ကဋကဇာတကံ (၃-၂-၇)
၄၉။
သိင်္ဂီမိဂေါ အာယတစက္ခုနေတ္တော၊ အဋ္ဌိတ္တစော ဝါရိသယော အလောမော။
တေနာဘိဘူတော ကပဏံ ရုဒါမိ၊ မာ ဟေဝ မံ ပါဏသမံ ဇဟေယျ [ဇဟေယျာ (ဣ။) ဇဟာ’ယျေ (?)]။
၅၀။
အယျ န တံ ဇဟိဿာမိ၊ ကုဉ္ဇရံ သဋ္ဌိဟာယနံ [ကုဉ္ဇရ သဋ္ဌိဟာယန (သီ။ ဣ။)]။
ပထဗျာ စာတုရန္တာယ၊ သုပ္ပိယော ဟောသိ မေ တုဝံ။
၅၁။
ယေ ကုဠီရာ သမုဒ္ဒသ္မိံ၊ ဂင်္ဂါယ ယမုနာယ [နမ္မဒါယ (သီ။ ဣ။)] စ။
တေသံ တွံ ဝါရိဇော သေဋ္ဌော၊ မုဉ္စ ရောဒန္တိယာ ပတိန္တိ။
ကက္ကဋက [ကုဠီရ (က။)] ဇာတကံ သတ္တမံ။
၂၆၈။ အာရာမဒူသကဇာတကံ (၃-၂-၈)
၅၂။
ယော ဝေ သဗ္ဗသမေတာနံ၊ အဟုဝါ သေဋ္ဌသမ္မတော။
တဿာယံ ဧဒိသီ ပညာ၊ ကိမေဝ ဣတရာ ပဇာ။
၅၃။
ဧဝမေဝ တုဝံ ဗြဟ္မေ၊ အနညာယ ဝိနိန္ဒသိ။
ကထံ မူလံ အဒိသွာန [ကထံဟိ မူလံ အဒိတွာ (သျာ။ ဣ။)]၊ ရုက္ခံ ဇညာ ပတိဋ္ဌိတံ။
၅၄။
နာဟံ တုမှေ ဝိနိန္ဒာမိ၊ ယေ စညေ ဝါနရာ ဝနေ။
ဝိဿသေနောဝ ဂါရယှော၊ ယဿတ္ထာ ရုက္ခရောပကာတိ။
အာရာမဒူသကဇာတကံ အဋ္ဌမံ။
၂၆၉။ သုဇာတဇာတကံ (၃-၂-၉)
၅၅။
န ဟိ ဝဏ္ဏေန သမ္ပန္နာ၊ မဉ္ဇုကာ ပိယဒဿနာ။
ခရဝါစာ ပိယာ ဟောတိ၊ အသ္မိံ လောကေ ပရမှိ စ။
၅၆။
နနု ပဿသိမံ ကာဠိံ၊ ဒုဗ္ဗဏ္ဏံ တိလကာဟတံ။
ကောကိလံ သဏှဝါစေန၊ ဗဟူနံ ပါဏိနံ ပိယံ။
၅၇။
တသ္မာ သခိလဝါစဿ၊ မန္တဘာဏီ အနုဒ္ဓတော။
အတ္ထံ ဓမ္မဉ္စ ဒီပေတိ၊ မဓုရံ တဿ ဘာသိတန္တိ။
သုဇာတဇာတကံ နဝမံ။
၂၇၀။ ဥလူကဇာတကံ (၃-၂-၁၀)
၅၈။
သဗ္ဗေဟိ ကိရ ဉာတီဟိ၊ ကောသိယော ဣဿရော ကတော။
သစေ ဉာတီဟိ အနုညာတော [ဉာတီဟနုညာတော (သီ။ ဣ။)]၊ ဘဏေယျာဟံ ဧကဝါစိကံ။
၅၉။
ဘဏ သမ္မ အနုညာတော၊ အတ္ထံ ဓမ္မဉ္စ ကေဝလံ။
သန္တိ ဟိ ဒဟရာ ပက္ခီ၊ ပညဝန္တော ဇုတိန္ဓရာ။
၆၀။
န မေ ရုစ္စတိ ဘဒ္ဒံ ဝေါ [ဘဒန္တေ (က။)]၊ ဥလူကဿာဘိသေစနံ။
အက္ကုဒ္ဓဿ မုခံ ပဿ၊ ကထံ ကုဒ္ဓေါ ကရိဿတီတိ။
ဥလူကဇာတကံ ဒသမံ။
ပဒုမဝဂ္ဂေါ ဒုတိယော။
တဿုဒ္ဒါနံ –
ပဒုမုတ္တမ နာဂသိရိဝှယနော၊ သ-မဟဏ္ဏဝ ယူပ ခုရပ္ပဝရော။
အထ ဘဒ္ဒလီ ကုဉ္ဇရ ရုက္ခ ပုန၊ ခရဝါစ ဥလူကဝရေန ဒသာတိ။
၃။ ဥဒပါနဝဂ္ဂေါ
၂၇၁။ ဥဒပါနဒူသကဇာတကံ (၃-၃-၁)
၆၁။
အာရညိကဿ ဣသိနော၊ စိရရတ္တံ တပဿိနော။
ကိစ္ဆာကတံ ဥဒပါနံ၊ ကထံ သမ္မ အဝါဟသိ [အဝါဟယိ (သီ။ ဣ။)၊ အပါဟသိ (သျာ။)]။
၆၂။
ဧသ ဓမ္မော သိင်္ဂါလာနံ၊ ယံ ပိတွာ ဩဟဒါမသေ။
ပိတုပိတာမဟံ ဓမ္မော၊ န တံ [န နံ (သီ။ ဣ။)] ဥဇ္ဈာတုမရဟသိ။
၆၃။
ယေသံ ဝေါ ဧဒိသော ဓမ္မော၊ အဓမ္မော ပန ကီဒိသော။
မာ ဝေါ ဓမ္မံ အဓမ္မံ ဝါ၊ အဒ္ဒသာမ ကုဒါစနန္တိ။
ဥဒပါနဒူသကဇာတကံ ပဌမံ။
၂၇၂။ ဗျဂ္ဃဇာတကံ (၃-၃-၂)
၆၄။
ယေန မိတ္တေန သံသဂ္ဂါ၊ ယောဂက္ခေမော ဝိဟိယျတိ။
ပုဗ္ဗေဝဇ္ဈာဘဝံ တဿ၊ ရုက္ခေ အက္ခီဝ ပဏ္ဍိတော။
၆၅။
ယေန မိတ္တေန သံသဂ္ဂါ၊ ယောဂက္ခေမော ပဝဍ္ဎတိ။
ကရေယျတ္တသမံ ဝုတ္တိံ၊ သဗ္ဗကိစ္စေသု ပဏ္ဍိတော။
၆၆။
ဧထ ဗျဂ္ဃါ နိဝတ္တဝ္ဟော၊ ပစ္စုပေထ [ပစ္စမေထ (သီ။ ဣ။)] မဟာဝနံ။
မာ ဝနံ ဆိန္ဒိ နိဗျဂ္ဃံ၊ ဗျဂ္ဃါ မာဟေသု နိဗ္ဗနာတိ။
ဗျဂ္ဃဇာတကံ ဒုတိယံ။
၂၇၃။ ကစ္ဆပဇာတကံ (၃-၃-၃)
၆၇။
ကော နု ဥဒ္ဓိတဘတ္တောဝ [ဥဒ္ဒိတဘတ္တောဝ (သီ။)၊ ဝဍ္ဎိတဘတ္တောဝ (သျာ။)]၊ ပူရဟတ္ထောဝ ဗြာဟ္မဏော။
ကဟံ နု ဘိက္ခံ အစရိ၊ ကံ သဒ္ဓံ ဥပသင်္ကမိ။
၆၈။
အဟံ ကပိသ္မိ ဒုမ္မေဓေါ၊ အနာမာသာနိ အာမသိံ။
တွံ မံ မောစယ ဘဒ္ဒန္တေ၊ မုတ္တော ဂစ္ဆေယျ ပဗ္ဗတံ။
၆၉။
ကစ္ဆပါ ကဿပါ ဟောန္တိ၊ ကောဏ္ဍညာ ဟောန္တိ မက္ကဋာ။
မုဉ္စ ကဿပ ကောဏ္ဍညံ၊ ကတံ မေထုနကံ တယာတိ။
ကစ္ဆပဇာတကံ တတိယံ။
၂၇၄။ လောလဇာတကံ (၃-၃-၄)
၇၀။
ကာယံ ဗလာကာ သိခိနီ၊ စောရီ လင္ဃိပိတာမဟာ။
ဩရံ ဗလာကေ အာဂစ္ဆ၊ စဏ္ဍော မေ ဝါယသော သခါ။
၇၁။
နာဟံ ဗလာကာ သိခိနီ၊ အဟံ လောလောသ္မိ ဝါယသော။
အကတွာ ဝစနံ တုယှံ၊ ပဿ လူနောသ္မိ အာဂတော။
၇၂။
ပုနပါပဇ္ဇသီ သမ္မ၊ သီလဉှိ တဝ တာဒိသံ။
န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာတိ။
လောလဇာတကံ စတုတ္ထံ။
၂၇၅။ ရုစိရဇာတကံ (၃-၃-၅)
၇၃။
ကာယံ ဗလာကာ ရုစိရာ၊ ကာကနီဠသ္မိမစ္ဆတိ။
စဏ္ဍော ကာကော သခါ မယှံ၊ ယဿ [တဿ (သီ။ ဣ။)] စေတံ ကုလာဝကံ။
၇၄။
နနု မံ သမ္မ ဇာနာသိ၊ ဒိဇ သာမာကဘောဇန။
အကတွာ ဝစနံ တုယှံ၊ ပဿ လူနောသ္မိ အာဂတော။
၇၅။
ပုနပါပဇ္ဇသီ သမ္မ၊ သီလဉှိ တဝ တာဒိသံ။
န ဟိ မာနုသကာ ဘောဂါ၊ သုဘုဉ္ဇာ ဟောန္တိ ပက္ခိနာတိ။
ရုစိရဇာတကံ ပဉ္စမံ။
၂၇၆။ ကုရုဓမ္မဇာတကံ (၃-၃-၆)
၇၆။
တဝ သဒ္ဓဉ္စ သီလဉ္စ၊ ဝိဒိတွာန ဇနာဓိပ။
ဝဏ္ဏံ အဉ္ဇနဝဏ္ဏေန၊ ကာလိင်္ဂသ္မိံ နိမိမှသေ [ဝိနိမှသေ (သျာ။)၊ ဝနိမှသေ (က။)]။
၇၇။
အန္နဘစ္စာ စဘစ္စာ စ၊ ယောဓ ဥဒ္ဒိဿ ဂစ္ဆတိ။
သဗ္ဗေ တေ အပ္ပဋိက္ခိပ္ပါ၊ ပုဗ္ဗာစရိယဝစော ဣဒံ။
၇၈။
ဒဒါမိ ဝေါ ဗြာဟ္မဏာ နာဂမေတံ၊ ရာဇာရဟံ ရာဇဘောဂ္ဂံ ယသဿိနံ။
အလင်္ကတံ ဟေမဇာလာဘိဆန္နံ၊ သသာရထိံ ဂစ္ဆထ ယေန ကာမန္တိ။
ကုရုဓမ္မဇာတကံ [ကုရုဓမ္မဇာတကံ (သီ။ သျာ။ ဣ။)] ဆဋ္ဌံ။
၂၇၇။ ရောမကဇာတကံ (၃-၃-၇)
၇၉။
ဝဿာနိ ပညာသ သမာဓိကာနိ၊ ဝသိမှ သေလဿ ဂုဟာယ ရောမက။
အသင်္ကမာနာ အဘိနိဗ္ဗုတတ္တာ [အဘိနိဗ္ဗုတစိတ္တာ (သျာ။ က။)]၊ ဟတ္ထတ္တ [ဟတ္ထတ္ထ (သျာ။)] မာယန္တိ မမဏ္ဍဇာ ပုရေ။
၈၀။
တေ ဒါနိ ဝက္ကင်္ဂ ကိမတ္ထမုဿုကာ၊ ဘဇန္တိ အညံ ဂိရိကန္ဒရံ ဒိဇာ။
န နူန မညန္တိ မမံ ယထာ ပုရေ၊ စိရပ္ပဝုတ္ထာ အထ ဝါ န တေ ဣမေ။
၈၁။
ဇာနာမ တံ န မယံ သမ္ပမူဠှာ [န မယ’မသ္မ မူဠှာ (သီ။ ဣ။)]၊ သောယေဝ တွံ တေ မယမသ္မ နာညေ။
စိတ္တဉ္စ တေ အသ္မိံ ဇနေ ပဒုဋ္ဌံ၊ အာဇီဝိကာ [အာဇီဝက (သီ။ သျာ။)၊ အာဇီဝိက (ဣ။)] တေန တမုတ္တသာမာတိ။
ရောမကဇာတကံ သတ္တမံ။
၂၇၈။ မဟိံသရာဇဇာတကံ (၃-၃-၈)
၈၂။
ကိမတ္ထ [ကမတ္ထ (သီ။ ဣ။)] မဘိသန္ဓာယ၊ လဟုစိတ္တဿ ဒုဗ္ဘိနော [ဒူဘိနော (သီ။ ဣ။)]။
သဗ္ဗကာမဒဒဿေဝ [ဒုဟဿေဝ (သီ။ သျာ။ ဣ။)၊ ရဟဿေဝ (က။)]၊ ဣမံ ဒုက္ခံ တိတိက္ခသိ။
၈၃။
သိင်္ဂေန နိဟနာဟေတံ၊ ပဒသာ စ အဓိဋ္ဌဟ။
ဘိယျော [ဘီယော (သီ။)] ဗာလာ ပကုဇ္ဈေယျုံ၊ နော စဿ ပဋိသေဓကော။
၈၄။
မမေဝါယံ မညမာနော၊ အညေပေဝံ [အညမ္ပေဝံ (သီ။ သျာ။ ဣ။)] ကရိဿတိ။
တေ နံ တတ္ထ ဝဓိဿန္တိ၊ သာ မေ မုတ္တိ ဘဝိဿတီတိ။
မဟိံသရာဇဇာတကံ [မဟိသဇာတကံ (သီ။ သျာ။ ဣ။)] အဋ္ဌမံ။
၂၇၉။ သတပတ္တဇာတကံ (၃-၃-၉)
၈၅။
ယထာ မာဏဝကော ပန္ထေ၊ သိင်္ဂါလိံ ဝနဂေါစရိံ။
အတ္ထကာမံ ပဝေဒေန္တိံ [ပဝဒန္တိံ (ဣ။)]၊ အနတ္ထကာမာတိ မညတိ။
အနတ္ထကာမံ သတပတ္တံ၊ အတ္ထကာမောတိ မညတိ။
၈၆။
ဧဝမေဝ ဣဓေကစ္စော၊ ပုဂ္ဂလော ဟောတိ တာဒိသော။
ဟိတေဟိ ဝစနံ ဝုတ္တော၊ ပဋိဂဏှာတိ ဝါမတော။
၈၇။
ယေ စ ခေါ နံ ပသံသန္တိ၊ ဘယာ ဥက္ကံသယန္တိ ဝါ [စ (သီ။ ဣ။)]။
တဉှိ သော မညတေ မိတ္တံ၊ သတပတ္တံဝ မာဏဝေါတိ။
သတပတ္တဇာတကံ နဝမံ။
၂၈၀။ ပုဋဒူသကဇာတကံ (၃-၃-၁၀)
၈၈။
အဒ္ဓါ ဟိ နူန မိဂရာဇာ၊ ပုဋကမ္မဿ ကောဝိဒေါ။
တထာ ဟိ ပုဋံ ဒူသေတိ၊ အညံ နူန ကရိဿတိ။
၈၉။
န မေ မာတာ ဝါ ပိတာ ဝါ၊ ပုဋကမ္မဿ ကောဝိဒေါ။
ကတံ ကတံ ခေါ ဒူသေမ၊ ဧဝံ ဓမ္မမိဒံ ကုလံ။
၉၀။
ယေသံ ဝေါ ဧဒိသော ဓမ္မော၊ အဓမ္မော ပန ကီဒိသော။
မာ ဝေါ ဓမ္မံ အဓမ္မံ ဝါ၊ အဒ္ဒသာမ ကုဒါစနန္တိ။
ပုဋဒူသကဇာတကံ ဒသမံ။
ဥဒပါနဝဂ္ဂေါ [အရညဝဂ္ဂေါ (သီ။ ဣ။ က။)] တတိယော။
တဿုဒ္ဒါနံ –
ဥဒပါနဝရံ ဝနဗျဂ္ဃ ကပိ၊ သိခိနီ စ ဗလာက ရုစိရဝရော။
သုဇနာဓိပရောမကဒူသ ပုန၊ သတပတ္တဝရော ပုဋကမ္မ ဒသာတိ။
၄။ အဗ္ဘန္တရဝဂ္ဂေါ
၂၈၁။ အဗ္ဘန္တရဇာတကံ (၃-၄-၁)
၉၁။
အဗ္ဘန္တရော နာမ ဒုမော၊ ယဿ ဒိဗျမိဒံ ဖလံ။
ဘုတွာ ဒေါဟဠိနီ နာရီ၊ စက္ကဝတ္တိံ ဝိဇာယတိ။
၉၂။
တွမ္ပိ [တွဉ္စ (သီ။ ဣ။)၊ တွံ ဟိ (က။)] ဘဒ္ဒေ မဟေသီသိ၊ သာ စာပိ [စာသိ (သီ။ ဣ။)] ပတိနော ပိယာ။
အာဟရိဿတိ တေ ရာဇာ၊ ဣဒံ အဗ္ဘန္တရံ ဖလံ။
၉၃။
ဘတ္တုရတ္ထေ ပရက္ကန္တော၊ ယံ ဌာနမဓိဂစ္ဆတိ။
သူရော အတ္တပရိစ္စာဂီ၊ လဘမာနော ဘဝါမဟန္တိ။
အဗ္ဘန္တရဇာတကံ ပဌမံ။
၂၈၂။ သေယျဇာတကံ (၃-၄-၂)
၉၄။
သေယျံသော သေယျသော ဟောတိ၊ ယော သေယျမုပသေဝတိ။
ဧကေန သန္ဓိံ ကတွာန၊ သတံ ဝဇ္ဈေ [မစ္စေ (က။)၊ ဗဇ္ဈေ (က။ အဋ္ဌ။)] အမောစယိံ။
၉၅။
[ကသ္မာ။ပေ။။ သဂ္ဂံ န ဂစ္ဆေယျ (ကတ္ထစိ)] တသ္မာ သဗ္ဗေန လောကေန၊ သန္ဓိံ ကတွာန ဧကတော [ဧကကော (သီ။ သျာ။ ဣ။)]။
ပေစ္စ သဂ္ဂံ နိဂစ္ဆေယျ [ကသ္မာ။ပေ။။ သဂ္ဂံ န ဂစ္ဆေယျ (ကတ္ထစိ)]၊ ဣဒံ သုဏာထ ကာသိယာ [ကာသယော (သီ။ ဣ။)]။
၉၆။
ဣဒံ ဝတွာ မဟာရာဇာ၊ ကံသော ဗာရာဏသိဂ္ဂဟော။
ဓနုံ ကဏ္ဍဉ္စ [တူဏိဉ္စ (သီ။ ဣ။)] နိက္ခိပ္ပ၊ သံယမံ အဇ္ဈုပါဂမီတိ။
သေယျဇာတကံ ဒုတိယံ။
၂၈၃။ ဝဍ္ဎကီသူကရဇာတကံ (၃-၄-၃)
၉၇။
ဝရံ ဝရံ တွံ နိဟနံ ပုရေ စရိ၊ အသ္မိံ ပဒေသေ အဘိဘုယျ သူကရေ။
သော ဒါနိ ဧကော ဗျပဂမ္မ ဈာယသိ၊ ဗလံ နု တေ ဗျဂ္ဃ န စဇ္ဇ ဝိဇ္ဇတိ။
၉၈။
ဣမေ သုဒံ [ဣမဿု တာ (သျာ။ က။)] ယန္တိ ဒိသောဒိသံ ပုရေ၊ ဘယဋ္ဋိတာ လေဏဂဝေသိနော ပုထု။
တေ ဒါနိ သင်္ဂမ္မ ဝသန္တိ ဧကတော၊ ယတ္ထဋ္ဌိတာ ဒုပ္ပသဟဇ္ဇမေ [ဒုပ္ပသဟဇ္ဇိမေ (သျာ။)] မယာ။
၉၉။
နမတ္ထု သံဃာန သမာဂတာနံ၊ ဒိသွာ သယံ သခ္ယ ဝဒါမိ အဗ္ဘုတံ။
ဗျဂ္ဃံ မိဂါ ယတ္ထ ဇိနိံသု ဒါဌိနော၊ သာမဂ္ဂိယာ ဒါဌဗလေသု မုစ္စရေတိ။
ဝဍ္ဎကီသူကရဇာတကံ တတိယံ။
၂၈၄။ သိရိဇာတကံ (၃-၄-၄)
၁၀၀။
ယံ ဥဿုကာ သံဃရန္တိ၊ အလက္ခိကာ ဗဟုံ ဓနံ။
သိပ္ပဝန္တော အသိပ္ပါ စ၊ လက္ခိဝါ တာနိ ဘုဉ္ဇတိ။
၁၀၁။
သဗ္ဗတ္ထ ကတပုညဿ၊ အတိစ္စညေဝ ပါဏိနော။
ဥပ္ပဇ္ဇန္တိ ဗဟူ ဘောဂါ၊ အပ္ပနာယတနေသုပိ။
၁၀၂။
ကုက္ကုဋော [ကုက္ကုဋ (သီ။ ဣ။)၊ ကုက္ကုဋာ (သီ။ နိဿယ၊ သဒ္ဒနီတိ)] မဏယော ဒဏ္ဍော၊ ထိယော စ ပုညလက္ခဏာ။
ဥပ္ပဇ္ဇန္တိ အပါပဿ၊ ကတပုညဿ ဇန္တုနောတိ။
သိရိဇာတကံ စတုတ္ထံ။
၂၈၅။ မဏိသူကရဇာတကံ (၃-၄-၅)
၁၀၃။
ဒရိယာ သတ္တ ဝဿာနိ၊ တိံသမတ္တာ ဝသာမသေ။
ဟညာမ [ဟဉ္ဆေမ (သီ။ ဣ။)၊ ဟဉ္ဆာမ (?)] မဏိနော အာဘံ၊ ဣတိ နော မန္တနံ အဟု။
၁၀၄။
ယာဝတာ မဏိံ ဃံသာမ [ယာဝ ယာဝ နိဃံသာမ (သီ။ ဣ။)]၊ ဘိယျော ဝေါဒါယတေ မဏိ။
ဣဒဉ္စ ဒါနိ ပုစ္ဆာမ၊ ကိံ ကိစ္စံ ဣဓ မညသိ။
၁၀၅။
အယံ မဏိ ဝေဠူရိယော၊ အကာစော ဝိမလော [ဝိပုလော (က။)] သုဘော။
နာဿ သက္ကာ သိရိံ ဟန္တုံ၊ အပက္ကမထ သူကရာတိ။
မဏိသူကရ [မဏိဃံသ (က။)] ဇာတကံ ပဉ္စမံ။
၂၈၆။ သာလူကဇာတကံ (၃-၄-၆)
၁၀၆။
မာ သာလူကဿ ပိဟယိ၊ အာတုရန္နာနိ ဘုဉ္ဇတိ။
အပ္ပောဿုက္ကော ဘုသံ ခါဒ၊ ဧတံ ဒီဃာယုလက္ခဏံ။
၁၀၇။
ဣဒါနိ သော ဣဓါဂန္တွာ၊ အတိထီ ယုတ္တသေဝကော။
အထ ဒက္ခသိ သာလူကံ၊ သယန္တံ မုသလုတ္တရံ။
၁၀၈။
ဝိကန္တံ [ဝိကတ္တံ (သီ။)၊ ဝိကန္တိယမာနံ ဆိန္ဒိယမာနံတိ အတ္ထော] သူကရံ ဒိသွာ၊ သယန္တံ မုသလုတ္တရံ။
ဇရဂ္ဂဝါ ဝိစိန္တေသုံ၊ ဝရမှာကံ ဘုသာမိဝါတိ။
သာလူကဇာတကံ ဆဋ္ဌံ။
၂၈၇။ လာဘဂရဟဇာတကံ (၃-၄-၇)
၁၀၉။
နာနုမ္မတ္တော နာပိသုဏော၊ နာနဋော နာကုတူဟလော။
မူဠ္ဟေသု လဘတေ လာဘံ၊ ဧသာ တေ အနုသာသနီ။
၁၁၀။
ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ။
ယာ ဝုတ္တိ ဝိနိပါတေန၊ အဓမ္မစရဏေန [အဓမ္မစရိယာယ (သီ။ သျာ။)] ဝါ။
၁၁၁။
အပိ စေ ပတ္တမာဒါယ၊ အနဂါရော ပရိဗ္ဗဇေ။
ဧသာဝ ဇီဝိကာ သေယျော [သေယျာ (သီ။ သျာ။ ဣ။)]၊ ယာ စာဓမ္မေန ဧသနာတိ။
လာဘဂရဟဇာတကံ သတ္တမံ။
၂၈၈။ မစ္ဆုဒ္ဒါနဇာတကံ (၃-၄-၈)
၁၁၂။
အဂ္ဃန္တိ မစ္ဆာ အဓိကံ သဟဿံ၊ န သော အတ္ထိ ယော ဣမံ သဒ္ဒဟေယျ။
မယှဉ္စ အဿု ဣဓ သတ္တ မာသာ၊ အဟမ္ပိ တံ မစ္ဆုဒ္ဒါနံ ကိဏေယျံ။
၁၁၃။
မစ္ဆာနံ ဘောဇနံ ဒတွာ၊ မမ ဒက္ခိဏမာဒိသိ။
တံ ဒက္ခိဏံ သရန္တိယာ၊ ကတံ အပစိတိံ တယာ။
၁၁၄။
ပဒုဋ္ဌစိတ္တဿ န ဖာတိ ဟောတိ၊ န စာပိ တံ [နံ (သီ။ သျာ။)] ဒေဝတာ ပူဇယန္တိ။
ယော ဘာတရံ ပေတ္တိကံ သာပတေယျံ၊ အဝဉ္စယီ ဒုက္ကဋကမ္မကာရီတိ။
မစ္ဆုဒ္ဒါနဇာတကံ အဋ္ဌမံ။
၂၈၉။ နာနာဆန္ဒဇာတကံ (၃-၄-၉)
၁၁၅။
နာနာဆန္ဒာ မဟာရာဇ၊ ဧကာဂါရေ ဝသာမသေ။
အဟံ ဂါမဝရံ ဣစ္ဆေ၊ ဗြာဟ္မဏီ စ ဂဝံ သတံ။
၁၁၆။
ပုတ္တော စ အာဇညရထံ၊ ကညာ စ မဏိကုဏ္ဍလံ။
ယာ စေသာ ပုဏ္ဏိကာ ဇမ္မီ၊ ဥဒုက္ခလံဘိကင်္ခတိ။
၁၁၇။
ဗြာဟ္မဏဿ ဂါမဝရံ၊ ဗြာဟ္မဏိယာ ဂဝံ သတံ။
ပုတ္တဿ အာဇညရထံ၊ ကညာယ မဏိကုဏ္ဍလံ။
ယဉ္စေတံ ပုဏ္ဏိကံ ဇမ္မိံ၊ ပဋိပါဒေထုဒုက္ခလန္တိ။
နာနာဆန္ဒဇာတကံ နဝမံ။
၂၉၀။ သီလဝီမံသကဇာတကံ (၃-၄-၁၀)
၁၁၈။
သီလံ ကိရေဝ ကလျာဏံ၊ သီလံ လောကေ အနုတ္တရံ။
ပဿ ဃောရဝိသော နာဂေါ၊ သီလဝါတိ န ဟညတိ။
၁၁၉။
သောဟံ သီလံ သမာဒိဿံ၊ လောကေ အနုမတံ သိဝံ။
အရိယဝုတ္တိသမာစာရော ၊ ယေန ဝုစ္စတိ သီလဝါ။
၁၂၀။
ဉာတီနဉ္စ ပိယော ဟောတိ၊ မိတ္တေသု စ ဝိရောစတိ။
ကာယဿ ဘေဒါ သုဂတိံ၊ ဥပပဇ္ဇတိ သီလဝါတိ။
သီလဝီမံသကဇာတကံ ဒသမံ။
အဗ္ဘန္တရဝဂ္ဂေါ စတုတ္ထော။
တဿုဒ္ဒါနံ –
ဒုမ ကံသဝရုတ္တမဗျဂ္ဃမိဂါ၊ မဏယော မဏိ သာလုကမဝှယနော။
အနုသာသနိယောပိ စ မစ္ဆဝရော၊ မဏိကုဏ္ဍလကေန ကိရေန ဒသာတိ။
၅။ ကုမ္ဘဝဂ္ဂေါ
၂၉၁။ သုရာဃဋဇာတကံ (၂-၅-၁)
၁၂၁။
သဗ္ဗကာမဒဒံ ကုမ္ဘံ၊ ကုဋံ လဒ္ဓါန ဓုတ္တကော။
ယာဝ နံ အနုပါလေတိ၊ တာဝ သော သုခမေဓတိ။
၁၂၂။
ယဒါ မတ္တော စ ဒိတ္တော စ၊ ပမာဒါ ကုမ္ဘမဗ္ဘိဒါ။
တဒါ နဂ္ဂေါ စ ပေါတ္ထော စ၊ ပစ္ဆာ ဗာလော ဝိဟညတိ။
၁၂၃။
ဧဝမေဝ ယော ဓနံ လဒ္ဓါ၊ ပမတ္တော [အမတ္တာ (သီ။)၊ အမတ္တော (ဣ။)] ပရိဘုဉ္ဇတိ။
ပစ္ဆာ တပ္ပတိ ဒုမ္မေဓေါ၊ ကုဋံ ဘိတွာဝ [ကုဋံ ဘိန္နောဝ (သီ။ ဣ။)၊ ကုဋဘိန္နောဝ (?)] ဓုတ္တကောတိ။
သုရာဃဋ [ဘဒြဃဋ (သီ။ ဣ။), ဘဒြဃဋဘေဒက (သျာ။)] ဇာတကံ ပဌမံ။
၂၉၂။ သုပတ္တဇာတကံ (၃-၅-၂)
၁၂၄။
ဗာရာဏဿံ [ဗာရာဏဿံ (သီ။ ဣ။)] မဟာရာဇ၊ ကာကရာဇာ နိဝါသကော [နိဝါသိကော (သီ။ ဣ။)]။
အသီတိယာ သဟဿေဟိ၊ သုပတ္တော ပရိဝါရိတော။
၁၂၅။
တဿ ဒေါဟဠိနီ ဘရိယာ၊ သုဖဿာ ဘက္ခိတုမိစ္ဆတိ [မစ္ဆမိစ္ဆတိ (သီ။ ဣ။)]။
ရညော မဟာနသေ ပက္ကံ၊ ပစ္စဂ္ဃံ ရာဇဘောဇနံ။
၁၂၆။
တေသာဟံ ပဟိတော ဒူတော၊ ရညော စမှိ ဣဓါဂတော။
ဘတ္တု အပစိတိံ ကုမ္မိ၊ နာသာယမကရံ [မကရိံ (သီ။ နိဿယ)] ဝဏန္တိ။
သုပတ္တဇာတကံ ဒုတိယံ။
၂၉၃။ ကာယနိဗ္ဗိန္ဒဇာတကံ (၃-၅-၃)
၁၂၇။
ဖုဋ္ဌဿ မေ အညတရေန ဗျာဓိနာ၊ ရောဂေန ဗာဠှံ ဒုခိတဿ ရုပ္ပတော။
ပရိသုဿတိ ခိပ္ပမိဒံ ကဠေဝရံ၊ ပုပ္ဖံ ယထာ ပံသုနိ အာတပေ ကတံ။
၁၂၈။
အဇညံ ဇညသင်္ခါတံ၊ အသုစိံ သုစိသမ္မတံ။
နာနာကုဏပပရိပူရံ၊ ဇညရူပံ အပဿတော။
၁၂၉။
ဓိရတ္ထုမံ အာတုရံ ပူတိကာယံ၊ ဇေဂုစ္ဆိယံ အဿုစိံ ဗျာဓိဓမ္မံ။
ယတ္ထပ္ပမတ္တာ အဓိမုစ္ဆိတာ ပဇာ၊ ဟာပေန္တိ မဂ္ဂံ သုဂတူပပတ္တိယာတိ။
ကာယနိဗ္ဗိန္ဒ [ကာယဝိစ္ဆန္ဒ (သီ။), ကာယဝိစ္ဆိန္ဒ (ဣ။)] ဇာတကံ တတိယံ။
၂၉၄။ ဇမ္ဗုခါဒကဇာတကံ (၃-၅-၄)
၁၃၀။
ကောယံ ဗိန္ဒုဿရော ဝဂ္ဂု၊ သရဝန္တာန [ပဝဒန္တာန (သီ။ ဣ။)] မုတ္တမော။
အစ္စုတော ဇမ္ဗုသာခါယ၊ မောရစ္ဆာပေါဝ ကူဇတိ။
၁၃၁။
ကုလပုတ္တောဝ ဇာနာတိ [ကုလပုတ္တော ပဇာနာတိ (သျာ။ က။)]၊ ကုလပုတ္တံ [ကုလပုတ္တေ (သီ။ ဣ။)] ပသံသိတုံ။
ဗျဂ္ဃစ္ဆာပသရီဝဏ္ဏ၊ ဘုဉ္ဇ သမ္မ ဒဒါမိ တေ။
၁၃၂။
စိရဿံ ဝတ ပဿာမိ၊ မုသာဝါဒီ သမာဂတေ။
ဝန္တာဒံ ကုဏပါဒဉ္စ၊ အညမညံ ပသံသကေတိ။
ဇမ္ဗုခါဒကဇာတကံ စတုတ္ထံ။
၂၉၅။ အန္တဇာတကံ (၃-၅-၅)
၁၃၃။
ဥသဘဿေဝ တေ ခန္ဓော၊ သီဟဿေဝ ဝိဇမ္ဘိတံ။
မိဂရာဇ နမော တ္ယတ္ထု၊ အပိ ကိဉ္စိ လဘာမသေ။
၁၃၄။
ကုလပုတ္တောဝ ဇာနာတိ၊ ကုလပုတ္တံ ပသံသိတုံ။
မယူရဂီဝသင်္ကာသ၊ ဣတော ပရိယာဟိ ဝါယသ။
၁၃၅။
မိဂါနံ သိင်္ဂါလော [ကောတ္ထုကော (သီ။ ဣ။)၊ ကောဋ္ဌုကော (သျာ။)] အန္တော၊ ပက္ခီနံ ပန ဝါယသော။
ဧရဏ္ဍော အန္တော ရုက္ခာနံ၊ တယော အန္တာ သမာဂတာတိ။
အန္တဇာတကံ ပဉ္စမံ။
၂၉၆။ သမုဒ္ဒဇာတကံ (၃-၅-၆)
၁၃၆။
ကော နာယံ [ကော နွာယံ (သျာ။)] လောဏတောယသ္မိံ၊ သမန္တာ ပရိဓါဝတိ။
မစ္ဆေ မကရေ စ ဝါရေတိ၊ ဦမီသု စ ဝိဟညတိ။
၁၃၇။
အနန္တပါယီ သကုဏော၊ အတိတ္တောတိ ဒိသာသုတော။
သမုဒ္ဒံ ပါတုမိစ္ဆာမိ၊ သာဂရံ သရိတံ ပတိံ။
၁၃၈။
သော အယံ ဟာယတိ စေဝ၊ ပူရတေ စ မဟောဒဓိ။
နာဿ နာယတိ ဣတန္တော၊ အပေယျော ကိရ သာဂရောတိ။
သမုဒ္ဒဇာတကံ ဆဋ္ဌံ။
၂၉၇။ ကာမဝိလာပဇာတကံ (၃-၅-၇)
၁၃၉။
ဥစ္စေ သကုဏ ဍေမာန၊ ပတ္တယာန ဝိဟင်္ဂမ။
ဝဇ္ဇာသိ ခေါ တွံ ဝါမူရုံ၊ စိရံ ခေါ သာ ကရိဿတိ [သရိဿတိ (က။)]။
၁၄၀။
ဣဒံ ခေါ သာ န ဇာနာတိ၊ အသိံ သတ္တိဉ္စ ဩဍ္ဍိတံ။
သာ စဏ္ဍီ ကာဟတိ ကောဓံ၊ တံ မေ တပတိ နော ဣဒံ [နော ဣဓ (သီ။ သျာ။ ဣ။)]။
၁၄၁။
ဧသ ဥပ္ပလသန္နာဟော၊ နိက္ခဉ္စုဿီသကောဟိတံ [နိက္ခမုဿီသကေ ကတံ (သီ။ ဣ။)၊ နိက္ခဉ္စုဿီသကေ ကတံ (သျာ။)]။
ကာသိကဉ္စ မုဒုံ ဝတ္ထံ၊ တပ္ပေတု ဓနိကာ ပိယာတိ [ဓနကာမိယာတိ (သျာ။ ဣ။)၊ ဓနကာမိကာတိ (သီ။)]။
ကာမဝိလာပဇာတကံ သတ္တမံ။
၂၉၈။ ဥဒုမ္ဗရဇာတကံ (၃-၅-၈)
၁၄၂။
ဥဒုမ္ဗရာ စိမေ ပက္ကာ၊ နိဂြောဓါ စ ကပိတ္ထနာ။
ဧဟိ နိက္ခမ ဘုဉ္ဇဿု၊ ကိံ ဇိဃစ္ဆာယ မိယျသိ။
၁၄၃။
ဧဝံ သော သုဟိတော ဟောတိ၊ ယော ဝုဍ္ဎမပစာယတိ။
ယထာဟမဇ္ဇ သုဟိတော၊ ဒုမပက္ကာနိ မာသိတော။
၁၄၄။
ယံ ဝနေဇော ဝနေဇဿ၊ ဝဉ္စေယျ ကပိနော ကပိ။
ဒဟရော ကပိ [ဒဟရောပိ တံ န (သီ။ ဣ။)၊ ဒဟရောပိ န (သျာ။)] သဒ္ဓေယျ၊ န ဟိ ဇိဏ္ဏော ဇရာကဣတိ။
ဥဒုမ္ဗရဇာတကံ အဋ္ဌမံ။
၂၉၉။ ကောမာရပုတ္တဇာတကံ (၃-၅-၉)
၁၄၅။
ပုရေ တုဝံ သီလဝတံ သကာသေ၊ ဩက္ကန္တိကံ [ဩက္ကန္ဒိကံ (သီ။ သျာ။ ဣ။)] ကီဠသိ အဿမမှိ။
ကရောဟရေ [ကရောဟိ ရေ (က။)] မက္ကဋိယာနိ မက္ကဋ၊ န တံ မယံ သီလဝတံ ရမာမ။
၁၄၆။
သုတာ ဟိ မယှံ ပရမာ ဝိသုဒ္ဓိ၊ ကောမာရပုတ္တဿ ဗဟုဿုတဿ။
မာ ဒါနိ မံ မညိ တုဝံ ယထာ ပုရေ၊ ဈာနာနုယုတ္တော ဝိဟရာမိ [ဈာနာနုယုတ္တာ ဝိဟရာမ (သီ။ ဣ။)] အာဝုသော။
၁၄၇။
သစေပိ သေလသ္မိ ဝပေယျ ဗီဇံ၊ ဒေဝေါ စ ဝဿေ န ဟိ တံ ဝိရူဠ္ဟေ [နေဝ ဟိ တံ ရုဟေယျ (သီ။ ဣ။)၊ န ဟိ တံ ဝိရူဟေ (?)]။
သုတာ ဟိ တေ သာ ပရမာ ဝိသုဒ္ဓိ၊ အာရာ တုဝံ မက္ကဋ ဈာနဘူမိယာတိ။
ကောမာရပုတ္တဇာတကံ နဝမံ။
၃၀၀။ ဝကဇာတကံ (၃-၅-၁၀)
၁၄၈။
ပရပါဏရောဓါ [ပရပါဏဃာတေ (သျာ။)၊ ပရပါဏရောစံ (က။)] ဇီဝန္တော၊ မံသလောဟိတဘောဇနော။
ဝကော ဝတံ သမာဒါယ၊ ဥပပဇ္ဇိ ဥပေါသထံ။
၁၄၉။
တဿ သက္ကော ဝတညာယ၊ အဇရူပေနုပါဂမိ။
ဝီတတပေါ အဇ္ဈပ္ပတ္တော၊ ဘဉ္ဇိ လောဟိတပေါ တပံ။
၁၅၀။
ဧဝမေဝ ဣဓေကစ္စေ၊ သမာဒါနမှိ ဒုဗ္ဗလာ။
လဟုံ ကရောန္တိ အတ္တာနံ၊ ဝကောဝ အဇကာရဏာတိ။
ဝကဇာတကံ ဒသမံ။
ကုမ္ဘဝဂ္ဂေါ ပဉ္စမော။
တဿုဒ္ဒါနံ –
ဝရကုမ္ဘ သုပတ္တသိရိဝှယနော၊ သုစိသမ္မတ ဗိန္ဒုသရော စုသဘော။
သရိတံပတိ စဏ္ဍိ ဇရာကပိနာ၊ အထ မက္ကဋိယာ ဝကကေန ဒသာတိ။
အထ ဝဂ္ဂုဒ္ဒါနံ –
သင်္ကပ္ပော ပဒုမော စေဝ၊ ဥဒပါနေန တတိယံ။
အဗ္ဘန္တရံ ဃဋဘေဒံ၊ တိကနိပါတမှိလင်္ကတန္တိ။
တိကနိပါတံ နိဋ္ဌိတံ။