၂။ ဒုကနိပါတ
၁။ ဒဠှဝဂ္ဂ
၁၅၁။ ရာဇောဝါဒဇာတက (၂-၁-၁)
၁။
ဒဠှံ ဒဠှဿ ခိပတိ၊ ဗလ္လိကော [မလ္လိကော (သီ။ ဣ။)] မုဒုနာ မုဒုံ။
သာဓုမ္ပိ သာဓုနာ ဇေတိ၊ အသာဓုမ္ပိ အသာဓုနာ။
ဧတာဒိသော အယံ ရာဇာ၊ မဂ္ဂါ ဥယျာဟိ သာရထိ။
၂။
အက္ကောဓေန ဇိနေ ကောဓံ၊ အသာဓုံ သာဓုနာ ဇိနေ။
ဇိနေ ကဒရိယံ ဒါနေန၊ သစ္စေနာလိကဝါဒိနံ။
ဧတာဒိသော အယံ ရာဇာ၊ မဂ္ဂါ ဥယျာဟိ သာရထီတိ။
ရာဇောဝါဒဇာတကံ ပဌမံ။
၁၅၂။ အသမေက္ခိတကမ္မန္တံ, တုရိတာဘိနိပါတိနံ။
သာနိ ကမ္မာနိ တပ္ပေန္တိ၊ ဥဏှံဝဇ္ဈောဟိတံ မုခေ။
၄။
သီဟော စ သီဟနာဒေန၊ ဒဒ္ဒရံ အဘိနာဒယိ။
သုတွာ သီဟဿ နိဂ္ဃောသံ၊ သိင်္ဂါလော [သိဂါလော (သီ။ သျာ။ ဣ။)] ဒဒ္ဒရေ ဝသံ။
ဘီတော သန္တာသမာပါဒိ၊ ဟဒယဉ္စဿ အပ္ဖလီတိ။
သိင်္ဂါလဇာတကံ [သိဂါလဇာတကံ (သီ။ သျာ။ ဣ။)] ဒုတိယံ။
၁၅၃။ သူကရဇာတကံ (၂-၁-၃)
၅။
စတုပ္ပဒေါ အဟံ သမ္မ၊ တွမ္ပိ သမ္မ စတုပ္ပဒေါ။
ဧဟိ သမ္မ [သီဟ (သီ။ ဣ။)] နိဝတ္တဿု၊ ကိံ နု ဘီတော ပလာယသိ။
၆။
အသုစိ ပူတိလောမောသိ၊ ဒုဂ္ဂန္ဓော ဝါသိ သူကရ။
သစေ ယုဇ္ဈိတုကာမောသိ၊ ဇယံ သမ္မ ဒဒါမိ တေတိ။
သူကရဇာတကံ တတိယံ။
၁၅၄။ ဥရဂဇာတက (၂-၁-၄)
၇။
ဣဓူရဂါနံ ပဝရော ပဝိဋ္ဌော၊ သေလဿ ဝဏ္ဏေန ပမောက္ခမိစ္ဆံ။
ဗြဟ္မဉ္စ ဝဏ္ဏံ [ဝက္ကံ (က။)] အပစာယမာနော၊ ဗုဘုက္ခိတော နော ဝိတရာမိ [ဝိသဟာမိ (က။ သိ။ သျာ။ ဣ။)] ဘောတ္တုံ။
၈။
သော ဗြဟ္မဂုတ္တော စိရမေဝ ဇီဝ၊ ဒိဗျာ စ တေ ပါတုဘဝန္တု ဘက္ခာ။
ယော ဗြဟ္မဝဏ္ဏံ အပစာယမာနော၊ ဗုဘုက္ခိတော နော ဝိတရာသိ [သဗ္ဗတ္ထပိ သမာနံ] ဘောတ္တုန္တိ။
ဥရဂဇာတကံ စတုတ္ထံ။
၁၅၅။ ဘဂ္ဂဇာတကံ (၂-၁-၅)
၉။
ဇီဝ ဝဿသတံ ဘဂ္ဂ [ဂဂ္ဂ (သီ။ ဣ။)]၊ အပရာနိ စ ဝီသတိံ [ဝီသတိ (သျာ။ က။)]။
မာ မံ ပိသာစာ ခါဒန္တု၊ ဇီဝ တွံ သရဒေါ သတံ။
၁၀။
တွမ္ပိ ဝဿသတံ ဇီဝ၊ အပရာနိ စ ဝီသတိံ။
ဝိသံ ပိသာစာ ခါဒန္တု၊ ဇီဝ တွံ သရဒေါ သတန္တိ။
ဘဂ္ဂဇာတကံ ပဉ္စမံ။
၁၅၆။ အလီနစိတ္တဇာတကံ (၂-၁-၆)
၁၁။
အလီနစိတ္တံ နိဿာယ၊ ပဟဋ္ဌာ မဟတီ စမူ။
ကောသလံ သေနာသန္တုဋ္ဌံ၊ ဇီဝဂ္ဂါဟံ အဂါဟယိ။
၁၂။
ဧဝံ နိဿယသမ္ပန္နော၊ ဘိက္ခု အာရဒ္ဓဝီရိယော။
ဘာဝယံ ကုသလံ ဓမ္မံ၊ ယောဂက္ခေမဿ ပတ္တိယာ။
ပါပုဏေ အနုပုဗ္ဗေန၊ သဗ္ဗသံယောဇနက္ခယန္တိ။
အလီနစိတ္တဇာတကံ ဆဋ္ဌံ။
၁၅၇။ ဂုဏဇာတကံ (၂-၁-၇)
၁၃။
ယေန ကာမံ ပဏာမေတိ၊ ဓမ္မော ဗလဝတံ မိဂီ။
ဥန္နဒန္တီ ဝိဇာနာဟိ၊ ဇာတံ သရဏတော ဘယံ။
၁၄။
အပိ စေပိ ဒုဗ္ဗလော မိတ္တော၊ မိတ္တဓမ္မေသု တိဋ္ဌတိ။
သော ဉာတကော စ ဗန္ဓု စ၊ သော မိတ္တော သော စ မေ သခါ။
ဒါဌိနိ မာတိမညိတ္ထော [မညိဝေါ (သျာ။)၊ မညဝ္ဟော (က။)]၊ သိင်္ဂါလော မမ ပါဏဒေါတိ။
ဂုဏဇာတကံ သတ္တမံ။
၁၅၈။ သုဟနုဇာတကံ (၂-၁-၈)
၁၅။
နယိဒံ ဝိသမသီလေန၊ သောဏေန သုဟနူ သဟ။
သုဟနူပိ တာဒိသောယေဝ၊ ယော သောဏဿ သဂေါစရော။
၁၆။
ပက္ခန္ဒိနာ ပဂဗ္ဘေန၊ နိစ္စံ သန္ဒာနခါဒိနာ။
သမေတိ ပါပံ ပါပေန၊ သမေတိ အသတာ အသန္တိ။
သုဟနုဇာတကံ အဋ္ဌမံ။
၁၅၉။ မောရဇာတကံ (၂-၁-၉)
၁၇။
ဥဒေတယံ စက္ခုမာ ဧကရာဇာ၊ ဟရိဿဝဏ္ဏော ပထဝိပ္ပဘာသော [ပဌဝိပ္ပဘာသော (သီ။ သျာ။ ဣ။)]။
တံ တံ နမဿာမိ ဟရိဿဝဏ္ဏံ ပထဝိပ္ပဘာသံ၊ တယာဇ္ဇ ဂုတ္တာ ဝိဟရေမု ဒိဝသံ။
ယေ ဗြာဟ္မဏာ ဝေဒဂူ သဗ္ဗဓမ္မေ၊ တေ မေ နမော တေ စ မံ ပါလယန္တု။
နမတ္ထု ဗုဒ္ဓါနံ [ဗုဒ္ဓါန (?)] နမတ္ထု ဗောဓိယာ၊ နမော ဝိမုတ္တာနံ [ဝိမုတ္တာန (?)] နမော ဝိမုတ္တိယာ။
ဣမံ သော ပရိတ္တံ ကတွာ၊ မောရော စရတိ ဧသနာ။
၁၈။
အပေတယံ စက္ခုမာ ဧကရာဇာ၊ ဟရိဿဝဏ္ဏော ပထဝိပ္ပဘာသော။
တံ တံ နမ္မဿာမိ ဟရိဿဝဏ္ဏံ ပထဝိပ္ပဘာသံ၊ တယာဇ္ဇ ဂုတ္တာ ဝိဟရေမု ရတ္တိံ။
ယေ ဗြာဟ္မဏာ ဝေဒဂူ သဗ္ဗဓမ္မေ၊ တေ မေ နမော တေ စ မံ ပါလယန္တု။
နမတ္ထု ဗုဒ္ဓါနံ နမတ္ထု ဗောဓိယာ၊ နမော ဝိမုတ္တာနံ နမော ဝိမုတ္တိယာ။
ဣမံ သော ပရိတ္တံ ကတွာ၊ မောရော ဝါသမကပ္ပယီတိ။
မောရဇာတကံ နဝမံ။
၁၆၀။ ဝိနီလဇာတကံ (၂-၁-၁၀)
၁၉။
ဧဝမေဝ နူန [နု (က။)] ရာဇာနံ၊ ဝေဒေဟံ မိထိလဂ္ဂဟံ။
အဿာ ဝဟန္တိ အာဇညာ၊ ယထာ ဟံသာ ဝိနီလကံ။
၂၀။
ဝိနီလ ဒုဂ္ဂံ ဘဇသိ၊ အဘူမိံ တာတ သေဝသိ။
ဂါမန္တကာနိ [ဂါမန္တိကာနိ (သီ။)၊ ဂါမန္တရာနိ (က။)] သေဝဿု၊ ဧတံ မာတာလယံ တဝါတိ။
ဝိနီလဇာတကံ ဒသမံ။
ဒဠှဝဂ္ဂေါ ပဌမော။
တဿုဒ္ဒါနံ –
ဝရဗလ္လိက ဒဒ္ဒရ သူကရကော၊ ဥရဂူတ္တမ ပဉ္စမဘဂ္ဂဝရော။
မဟတီစမု ယာဝ သိင်္ဂါလဝရော၊ သုဟနုတ္တမ မောရ ဝိနီလံ ဒသာတိ။
၂။ သန္ထဝဝဂ္ဂေါ
၁၆၁။ ဣန္ဒသမာနဂေါတ္တဇာတကံ (၂-၂-၁)
၂၁။
န သန္ထဝံ [သန္ဓဝံ (က။)] ကာပုရိသေန ကယိရာ၊ အရိယော အနရိယေန ပဇာနမတ္ထံ။
စိရာနုဝုတ္ထောပိ ကရောတိ ပါပံ၊ ဂဇော ယထာ ဣန္ဒသမာနဂေါတ္တံ။
၂၂။
ယံ တွေဝ ဇညာ သဒိသော မမန္တိ၊ သီလေန ပညာယ သုတေန စာပိ။
တေနေဝ မေတ္တိံ ကယိရာထ သဒ္ဓိံ၊ သုခေါ ဟဝေ သပ္ပုရိသေန သင်္ဂမောတိ။
ဣန္ဒသမာနဂေါတ္တဇာတကံ ပဌမံ။
၁၆၂။ သန္ထဝဇာတကံ (၂-၂-၂)
၂၃။
န သန္ထဝသ္မာ ပရမတ္ထိ ပါပိယော၊ ယော သန္ထဝေါ [သန္ဓဝေါ (က။)] ကာပုရိသေန ဟောတိ။
သန္တပ္ပိတော သပ္ပိနာ ပါယသေန [ပါယာသေန (က။)]၊ ကိစ္ဆာကတံ ပဏ္ဏကုဋိံ အဒယှိ [အဒဍ္ဎဟိ (သီ။ သျာ။)၊ အဒဋ္ဌဟိ (ဣ။)၊ အဒဒ္ဒဟိ (?)]။
၂၄။
န သန္ထဝသ္မာ ပရမတ္ထိ သေယျော၊ ယော သန္ထဝေါ သပ္ပုရိသေန ဟောတိ။
သီဟဿ ဗျဂ္ဃဿ စ ဒီပိနော စ၊ သာမာ မုခံ လေဟတိ သန္ထဝေနာတိ။
သန္ထဝဇာတကံ ဒုတိယံ။
၁၆၃။ သုသီမဇာတကံ (၂-၂-၃)
၂၅။
ကာဠာ မိဂါ သေတဒန္တာ တဝီမေ [တဝ ဣမေ (သီ။ သျာ။ ဣ။)]၊ ပရောသတံ ဟေမဇာလာဘိဆန္နာ [ဟေမဇာလာဘိသဉ္ဆန္နာ (သီ။)]။
တေ တေ ဒဒါမီတိ သုသီမ ဗြူသိ၊ အနုဿရံ ပေတ္တိပိတာမဟာနံ။
၂၆။
ကာဠာ မိဂါ သေတဒန္တာ မမီမေ [မမ ဣမေ (သီ။ ဣ။)]၊ ပရောသတံ ဟေမဇာလာဘိစ္ဆန္နာ။
တေ တေ ဒဒါမီတိ ဝဒါမိ မာဏဝ၊ အနုဿရံ ပေတ္တိပိတာမဟာနန္တိ။
သုသီမဇာတကံ တတိယံ။
၁၆၄။ ဂိဇ္ဈဇာတကံ (၂-၂-၄)
၂၇။
ယံ နု ဂိဇ္ဈော ယောဇနသတံ၊ ကုဏပါနိ အဝေက္ခတိ။
ကသ္မာ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈသိ။
၂၈။
ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ။
အထ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတီတိ။
ဂိဇ္ဈဇာတကံ စတုတ္ထံ။
၁၆၅။ နကုလဇာတကံ (၂-၂-၅)
၂၉။
သန္ဓိံ ကတွာ အမိတ္တေန၊ အဏ္ဍဇေန ဇလာဗုဇ။
ဝိဝရိယ ဒါဌံ သေသိ [သယသိ (သီ။ သျာ။ ဣ။)]၊ ကုတော တေ ဘယမာဂတံ။
၃၀။
သင်္ကေထေဝ [သင်္ကတေဝ (က။)] အမိတ္တသ္မိံ၊ မိတ္တသ္မိမ္ပိ န ဝိဿသေ။
အဘယာ ဘယမုပ္ပန္နံ၊ အပိ မူလာနိ ကန္တတီတိ [မူလံ နိကန္တတီတိ (သီ။)]။
နကုလဇာတကံ ပဉ္စမံ။
၁၆၆။ ဥပသာဠကဇာတကံ (၂-၂-၆)
၃၁။
ဥပသာဠကနာမာနိ [ဥပသာဠှကနာမာနံ (သီ။ သျာ။ ဣ။)]၊ သဟဿာနိ စတုဒ္ဒသ။
အသ္မိံ ပဒေသေ ဒဍ္ဎာနိ၊ နတ္ထိ လောကေ အနာမတံ။
၃၂။
ယမှိ သစ္စဉ္စ ဓမ္မော စ၊ အဟိံသာ သံယမော ဒမော။
ဧတံ အရိယာ သေဝန္တိ၊ ဧတံ လောကေ အနာမတန္တိ။
ဥပသာဠကဇာတကံ ဆဋ္ဌံ။
၁၆၇။ သမိဒ္ဓိဇာတကံ (၂-၂-၇)
၃၃။
အဘုတွာ ဘိက္ခသိ ဘိက္ခု၊ န ဟိ ဘုတွာန ဘိက္ခသိ။
ဘုတွာန ဘိက္ခု ဘိက္ခဿု၊ မာ တံ ကာလော ဥပစ္စဂါ။
၃၄။
ကာလံ ဝေါဟံ န ဇာနာမိ၊ ဆန္နော ကာလော န ဒိဿတိ။
တသ္မာ အဘုတွာ ဘိက္ခာမိ၊ မာ မံ ကာလော ဥပစ္စဂါတိ။
သမိဒ္ဓိဇာတကံ သတ္တမံ။
၁၆၈။ သကုဏဂ္ဃိဇာတကံ (၂-၂-၈)
၃၅။
သေနော ဗလသာ ပတမာနော၊ လာပံ ဂေါစရဌာယိနံ။
သဟသာ အဇ္ဈပ္ပတ္တောဝ၊ မရဏံ တေနုပါဂမိ။
၃၆။
သောဟံ နယေန သမ္ပန္နော၊ ပေတ္တိကေ ဂေါစရေ ရတော။
အပေတသတ္တု မောဒါမိ၊ သမ္ပဿံ အတ္ထမတ္တနောတိ။
သကုဏဂ္ဃိဇာတကံ အဋ္ဌမံ။
၁၆၉။ အရကဇာတကံ (၂-၂-၉)
၃၇။
ယော ဝေ မေတ္တေန စိတ္တေန၊ သဗ္ဗလောကာနုကမ္ပတိ။
ဥဒ္ဓံ အဓေါ စ တိရိယံ၊ အပ္ပမာဏေန သဗ္ဗသော။
၃၈။
အပ္ပမာဏံ ဟိတံ စိတ္တံ၊ ပရိပုဏ္ဏံ သုဘာဝိတံ။
ယံ ပမာဏကတံ ကမ္မံ၊ န တံ တတြာဝသိဿတီတိ။
အရကဇာတကံ နဝမံ။
၁၇၀။ ကကဏ္ဋကဇာတကံ (၂-၂-၁၀)
၃၉။
နာယံ ပုရေ ဥဏ္ဏမတိ [ဥန္နမတိ (သျာ။)]၊ တောရဏဂ္ဂေ ကကဏ္ဋကော။
မဟောသဓ ဝိဇာနာဟိ၊ ကေန ထဒ္ဓေါ ကကဏ္ဋကော။
၄၀။
အလဒ္ဓပုဗ္ဗံ လဒ္ဓါန၊ အဍ္ဎမာသံ ကကဏ္ဋကော။
အတိမညတိ ရာဇာနံ၊ ဝေဒေဟံ မိထိလဂ္ဂဟန္တိ။
ကကဏ္ဋကဇာတကံ ဒသမံ။
သန္ထဝဝဂ္ဂေါ ဒုတိယော။
တဿုဒ္ဒါနံ –
အထ ဣန္ဒသမာန သပဏ္ဏကုဋိ၊ သုသိမုတ္တမ ဂိဇ္ဈ ဇလာဗုဇကော။
ဥပသာဠက ဘိက္ခု သလာပဝရော၊ အထ မေတ္တဝရော ဒသပုဏ္ဏမတီတိ။
၃။ ကလျာဏဝဂ္ဂေါ
၁၇၁။ ကလျာဏဓမ္မဇာတကံ (၂-၃-၁)
၄၁။
ကလျာဏဓမ္မောတိ ယဒါ ဇနိန္ဒ၊ လောကေ သမညံ အနုပါပုဏာတိ။
တသ္မာ န ဟိယျေထ [ဟီယေထ (သီ။)] နရော သပညော၊ ဟိရိယာပိ သန္တော ဓုရမာဒိယန္တိ။
၄၂။
သာယံ သမညာ ဣဓ မဇ္ဇ ပတ္တာ၊ ကလျာဏဓမ္မောတိ ဇနိန္ဒ လောကေ။
တာဟံ သမေက္ခံ ဣဓ ပဗ္ဗဇိဿံ၊ န ဟိ မတ္ထိ ဆန္ဒော ဣဓ ကာမဘောဂေတိ။
ကလျာဏဓမ္မဇာတကံ ပဌမံ။
၁၇၂။ ဒဒ္ဒရဇာတကံ (၂-၃-၂)
၄၃။
ကော နု သဒ္ဒေန မဟတာ၊ အဘိနာဒေတိ ဒဒ္ဒရံ။
တံ သီဟာ နပ္ပဋိနဒန္တိ [ကိံ သီဟာ နပ္ပဋိနဒန္တိ (သီ။ ဣ။)၊ န သီဟာ ပဋိနဒန္တိ (က။)]၊ ကော နာမေသော မိဂါဓိဘူ။
၄၄။
အဓမော မိဂဇာတာနံ၊ သိင်္ဂါလော တာတ ဝဿတိ။
ဇာတိမဿ ဇိဂုစ္ဆန္တာ၊ တုဏှီ သီဟာ သမစ္ဆရေတိ။
ဒဒ္ဒရဇာတကံ ဒုတိယံ။
၁၇၃။ မက္ကဋဇာတကံ (၂-၃-၃)
၄၅။
တာတ မာဏဝကော ဧသော၊ တာလမူလံ အပဿိတော။
အဂါရကဉ္စိဒံ အတ္ထိ၊ ဟန္ဒ ဒေမဿဂါရကံ။
၄၆။
မာ ခေါ တွံ တာတ ပက္ကောသိ၊ ဒူသေယျ နော အဂါရကံ။
နေတာဒိသံ မုခံ ဟောတိ၊ ဗြာဟ္မဏဿ သုသီလိနောတိ။
မက္ကဋဇာတကံ တတိယံ။
၁၇၄။ ဒုဗ္ဘိယမက္ကဋဇာတကံ (၂-၃-၄)
၄၇။
အဒမှ တေ ဝါရိ ပဟူတရူပံ၊ ဃမ္မာဘိတတ္တဿ ပိပါသိတဿ။
သော ဒါနိ ပိတွာန [ဣတွာန (သီ။ ဣ။)] ကိရိင်္ကရောသိ [ကိကိံကရောသိ (သီ။ သျာ။ ဣ။)]၊ အသင်္ဂမော ပါပဇနေန သေယျော။
၄၈။
ကော တေ သုတော ဝါ ဒိဋ္ဌော ဝါ၊ သီလဝါ နာမ မက္ကဋော။
ဣဒါနိ ခေါ တံ ဩဟစ္ဆံ [ဦဟစ္စ (သီ။ ဣ။)၊ ဩဟစ္စံ (သျာ။)၊ ဥဟဇ္ဇံ (က။)]၊ ဧသာ အသ္မာက ဓမ္မတာတိ။
ဒုဗ္ဘိယမက္ကဋဇာတကံ စတုတ္ထံ။
၁၇၅။ အာဒိစ္စုပဋ္ဌာနဇာတကံ (၂-၃-၅)
၄၉။
သဗ္ဗေသု ကိရ ဘူတေသု၊ သန္တိ သီလသမာဟိတာ။
ပဿ သာခါမိဂံ ဇမ္မံ၊ အာဒိစ္စမုပတိဋ္ဌတိ။
၅၀။
နာဿ သီလံ ဝိဇာနာထ၊ အနညာယ ပသံသထ။
အဂ္ဂိဟုတ္တဉ္စ ဥဟန္နံ [ဦဟန္တံ (သီ။)၊ ဦဟနံ (သျာ။)၊ ဦဟန္တိ (ဣ။)၊ ဥဟဒံ (က။)]၊ ဒွေ စ ဘိန္နာ ကမဏ္ဍလူတိ။
အာဒိစ္စုပဋ္ဌာနဇာတကံ ပဉ္စမံ။
၁၇၆။ ကဠာယမုဋ္ဌိဇာတကံ (၂-၃-၆)
၅၁။
ဗာလော ဝတာယံ ဒုမသာခဂေါစရော၊ ပညာ ဇနိန္ဒ နယိမဿ ဝိဇ္ဇတိ။
ကဠာယမုဋ္ဌိံ [ကလာယမုဋ္ဌိံ (သီ။ ဣ။)] အဝကိရိယ ကေဝလံ၊ ဧကံ ကဠာယံ ပတိတံ ဂဝေသတိ။
၅၂။
ဧဝမေဝ မယံ ရာဇ၊ ယေ စညေ အတိလောဘိနော။
အပ္ပေန ဗဟုံ ဇိယျာမ၊ ကဠာယေနေဝ ဝါနရောတိ။
ကဠာယမုဋ္ဌိဇာတကံ ဆဋ္ဌံ။
၁၇၇။ တိန္ဒုကဇာတကံ (၂-၃-၇)
၅၃။
ဓနုဟတ္ထကလာပေဟိ၊ နေတ္တိံ သဝရဓါရိဘိ။
သမန္တာ ပရိကိဏ္ဏမှ၊ ကထံ မောက္ခော ဘဝိဿတိ။
၅၄။
အပ္ပေဝ ဗဟုကိစ္စာနံ၊ အတ္ထော ဇာယေထ ကောစိ နံ။
အတ္ထိ ရုက္ခဿ အစ္ဆိန္နံ၊ ခဇ္ဇထညေဝ တိန္ဒုကန္တိ။
တိန္ဒုကဇာတကံ သတ္တမံ။
၁၇၈။ ကစ္ဆပဇာတကံ (၂-၃-၈)
၅၅။
ဇနိတ္တံ မေ ဘဝိတ္တံ မေ၊ ဣတိ ပင်္ကေ အဝဿယိံ။
တံ မံ ပင်္ကော အဇ္ဈဘဝိ၊ ယထာ ဒုဗ္ဗလကံ တထာ။
တံ တံ ဝဒါမိ ဘဂ္ဂဝ၊ သုဏောဟိ ဝစနံ မမ။
၅၆။
ဂါမေ ဝါ ယဒိ ဝါ ရညေ၊ သုခံ ယတြာဓိဂစ္ဆတိ။
တံ ဇနိတ္တံ ဘဝိတ္တဉ္စ၊ ပုရိသဿ ပဇာနတော။
ယမှိ ဇီဝေ တမှိ ဂစ္ဆေ၊ န နိကေတဟတော သိယာတိ။
ကစ္ဆပဇာတကံ အဋ္ဌမံ။
၁၇၉။ သတဓမ္မဇာတကံ (၂-၃-၉)
၅၇။
တဉ္စ အပ္ပဉ္စ ဥစ္ဆိဋ္ဌံ၊ တဉ္စ ကိစ္ဆေန နော အဒါ။
သောဟံ ဗြာဟ္မဏဇာတိကော၊ ယံ ဘုတ္တံ တမ္ပိ ဥဂ္ဂတံ။
၅၈။
ဧဝံ ဓမ္မံ နိရံကတွာ [နိရာကတွာ (?) နိ + အာ + ကရ + တွာ]၊ ယော အဓမ္မေန ဇီဝတိ။
သတဓမ္မောဝ လာဘေန၊ လဒ္ဓေနပိ န နန္ဒတီတိ။
သတဓမ္မဇာတကံ နဝမံ။
၁၈၀။ ဒုဒ္ဒဒဇာတကံ (၂-၃-၁၀)
၅၉။
ဒုဒ္ဒဒံ ဒဒမာနာနံ၊ ဒုက္ကရံ ကမ္မ ကုဗ္ဗတံ။
အသန္တော နာနုကုဗ္ဗန္တိ၊ သတံ ဓမ္မော ဒုရန္နယော။
၆၀။
တသ္မာ သတဉ္စ အသတံ၊ နာနာ ဟောတိ ဣတော ဂတိ။
အသန္တော နိရယံ ယန္တိ၊ သန္တော သဂ္ဂပရာယဏာတိ [ပရာယနာ (သျာ။ က။)]။
ဒုဒ္ဒဒဇာတကံ ဒသမံ။
ကလျာဏဝဂ္ဂေါ တတိယော။
တဿုဒ္ဒါနံ –
သုသမညမိဂါဓိဘူ မာဏဝကော၊ ဝါရိပဟူတရူပါဒိစ္စုပဋ္ဌာနာ။
သကဠာယသတိန္ဒုကပင်္က ပုန၊ သတဓမ္မ သုဒုဒ္ဒဒကေန ဒသာတိ။
၄။ အသဒိသဝဂ္ဂေါ
၁၈၁။ အသဒိသဇာတကံ (၂-၄-၁)
၆၁။
ဓနုဂ္ဂဟော အသဒိသော၊ ရာဇပုတ္တော မဟဗ္ဗလော။
ဒူရေပါတီ အက္ခဏဝေဓီ၊ မဟာကာယပ္ပဒါလနော။
၆၂။
သဗ္ဗာမိတ္တေ ရဏံ ကတွာ၊ န စ ကဉ္စိ ဝိဟေဌယိ။
ဘာတရံ သောတ္ထိံ ကတွာန၊ သံယမံ အဇ္ဈုပါဂမီတိ။
အသဒိသဇာတကံ ပဌမံ။
၁၈၂။ သင်္ဂါမာဝစရဇာတကံ (၂-၄-၂)
၆၃။
သင်္ဂါမာဝစရော သူရော၊ ဗလဝါ ဣတိ ဝိဿုတော။
ကိံ နု တောရဏမာသဇ္ဇ၊ ပဋိက္ကမသိ ကုဉ္ဇရ။
၆၄။
ဩမဒ္ဒ ခိပ္ပံ ပလိဃံ၊ ဧသိကာနိ စ အဗ္ဗဟ [ဥဗ္ဗဟ (သျာ။)၊ အဗ္ဘုဟ (က။)]။
တောရဏာနိ စ မဒ္ဒိတွာ၊ ခိပ္ပံ ပဝိသ ကုဉ္ဇရာတိ။
သင်္ဂါမာဝစရဇာတကံ ဒုတိယံ။
၁၈၃။ ဝါလောဒကဇာတကံ (၂-၄-၃)
၆၅။
ဝါလောဒကံ အပ္ပရသံ နိဟီနံ၊ ပိတွာ [ဣတွာ (သီ။ ဣ။)] မဒေါ ဇာယတိ ဂဒြဘာနံ။
ဣမဉ္စ ပိတွာန ရသံ ပဏီတံ၊ မဒေါ န သဉ္ဇာယတိ သိန္ဓဝါနံ။
၆၆။
အပ္ပံ ပိဝိတွာန နိဟီနဇစ္စော၊ သော မဇ္ဇတီ တေန ဇနိန္ဒ ပုဋ္ဌော [ဖုဋ္ဌော (သီ။ သျာ။)၊ မုဋ္ဌော (က။)]။
ဓေါရယှသီလီ စ ကုလမှိ ဇာတော၊ န မဇ္ဇတီ အဂ္ဂရသံ ပိဝိတွာတိ။
ဝါလောဒကဇာတကံ တတိယံ။
၁၈၄။ ဂိရိဒတ္တဇာတကံ (၂-၄-၄)
၆၇။
ဒူသိတော ဂိရိဒတ္တေန [ဂိရိဒန္တေန (ဣ။)]၊ ဟယော သာမဿ ပဏ္ဍဝေါ။
ပေါရာဏံ ပကတိံ ဟိတွာ၊ တဿေဝါနုဝိဓိယျတိ [နုဝိဓီယတိ (သီ။ ဣ။)]။
၆၈။
သစေ စ တနုဇော ပေါသော၊ သိခရာကာရ [သိင်္ဂါရာကာရ (သျာ။)] ကပ္ပိတော။
အာနနေ နံ [တံ (သီ။ သျာ။ ဣ။)] ဂဟေတွာန၊ မဏ္ဍလေ ပရိဝတ္တယေ။
ခိပ္ပမေဝ ပဟန္တွာန၊ တဿေဝါနုဝိဓိယျတီတိ။
ဂိရိဒတ္တဇာတကံ စတုတ္ထံ။
၁၈၅။ အနဘိရတိဇာတကံ (၂-၄-၅)
၆၉။
ယထောဒကေ အာဝိလေ အပ္ပသန္နေ၊ န ပဿတိ သိပ္ပိကသမ္ဗုကဉ္စ။
သက္ခရံ ဝါလုကံ မစ္ဆဂုမ္ဗံ၊ ဧဝံ အာဝိလမှိ [အာဝိလေ ဟိ (သီ။)] စိတ္တေ။
န ပဿတိ အတ္တဒတ္ထံ ပရတ္ထံ။
၇၀။
ယထောဒကေ အစ္ဆေ ဝိပ္ပသန္နေ၊ သော ပဿတိ သိပ္ပိကသမ္ဗုကဉ္စ။
သက္ခရံ ဝါလုကံ မစ္ဆဂုမ္ဗံ၊ ဧဝံ အနာဝိလမှိ စိတ္တေ။
သော ပဿတိ အတ္တဒတ္ထံ ပရတ္ထန္တိ။
အနဘိရတိဇာတကံ ပဉ္စမံ။
၁၈၆။ ဒဓိဝါဟနဇာတကံ (၂-၄-၆)
၇၁။
ဝဏ္ဏဂန္ဓရသူပေတော ၊ အမ္ဗောယံ အဟုဝါ ပုရေ။
တမေဝ ပူဇံ လဘမာနော၊ ကေနမ္ဗော ကဋုကပ္ဖလော။
၇၂။
ပုစိမန္ဒပရိဝါရော၊ အမ္ဗော တေ ဒဓိဝါဟန။
မူလံ မူလေန သံသဋ္ဌံ၊ သာခါ သာခါ [သာခံ (သျာ။ က။)] နိသေဝရေ [နိဝီသရေ (က။)]။
အသာတသန္နိဝါသေန၊ တေနမ္ဗော ကဋုကပ္ဖလောတိ။
ဒဓိဝါဟနဇာတကံ ဆဋ္ဌံ။
၁၈၇။ စတုမဋ္ဌဇာတကံ (၂-၄-၇)
၇၃။
ဥစ္စေ ဝိဋဘိမာရုယှ၊ မန္တယဝ္ဟော ရဟောဂတာ။
နီစေ ဩရုယှ မန္တဝ္ဟော၊ မိဂရာဇာပိ သောဿတိ။
၇၄။
ယံ သုဝဏ္ဏော သုဝဏ္ဏေန [ယံ သုပဏ္ဏော သုပဏ္ဏေန (သီ။ သျာ။ ဣ။)]၊ ဒေဝေါ ဒေဝေန မန္တယေ။
ကိံ တေတ္ထ စတုမဋ္ဌဿ၊ ဗိလံ ပဝိသ ဇမ္ဗုကာတိ။
စတုမဋ္ဌဇာတကံ သတ္တမံ။
၁၈၈။ သီဟကောတ္ထုဇာတကံ (၂-၄-၈)
၇၅။
သီဟင်္ဂုလီ သီဟနခေါ၊ သီဟပါဒပတိဋ္ဌိတော။
သော သီဟော သီဟသံဃမှိ၊ ဧကော နဒတိ အညထာ။
၇၆။
မာ တွံ နဒိ ရာဇပုတ္တ၊ အပ္ပသဒ္ဒေါ ဝနေ ဝသ။
သရေန ခေါ [မာ (က။)] တံ ဇာနေယျုံ၊ န ဟိ တေ ပေတ္တိကော သရောတိ။
သီဟကောတ္ထုဇာတကံ အဋ္ဌမံ။
၁၈၉။ သီဟစမ္မဇာတကံ (၂-၄-၉)
၇၇။
နေတံ သီဟဿ နဒိတံ၊ န ဗျဂ္ဃဿ န [ဗျဂ္ဃဿ န စ (က။)] ဒီပိနော။
ပါရုတော သီဟစမ္မေန၊ ဇမ္မော နဒတိ ဂဒြဘော။
၇၈။
စိရမ္ပိ ခေါ တံ ခါဒေယျ၊ ဂဒြဘော ဟရိတံ ယဝံ။
ပါရုတော သီဟစမ္မေန၊ ရဝမာနောဝ ဒူသယီတိ။
သီဟစမ္မဇာတကံ နဝမံ။
၁၉၀။ သီလာနိသံသဇာတကံ (၂-၄-၁၀)
၇၉။
ပဿ သဒ္ဓါယ သီလဿ၊ စာဂဿ စ အယံ ဖလံ။
နာဂေါ နာဝါယ ဝဏ္ဏေန၊ သဒ္ဓံ ဝဟတုပါသကံ။
၈၀။
သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ။
သတဉှိ သန္နိဝါသေန၊ သောတ္ထိံ ဂစ္ဆတိ နှာပိတောတိ။
သီလာနိသံသဇာတကံ ဒသမံ။
အသဒိသဝဂ္ဂေါ စတုတ္ထော။
တဿုဒ္ဒါနံ –
ဓနုဂ္ဂဟ ကုဉ္ဇရ အပ္ပရသော၊ ဂိရိဒတ္တမနာဝိလစိတ္တဝရံ။
ဒဓိဝါဟန ဇမ္ဗူက သီဟနခေါ၊ ဟရိတယဝ နာဂဝရေန ဒသာတိ။
၅။ ရုဟကဝဂ္ဂေါ
၁၉၁။ ရုဟကဇာတကံ (၂-၅-၁)
၈၁။
အပိ [အမ္ဘော (သျာ။ က။ သီ။)] ရုဟက ဆိန္နာပိ၊ ဇိယာ သန္ဓီယတေ ပုန။
သန္ဓီယဿု ပုရာဏိယာ၊ မာ ကောဓဿ ဝသံ ဂမိ။
၈၂။
ဝိဇ္ဇမာနေသု ဝါကေသု [ဝိဇ္ဇမာနာသု မရုဝါသု (သီ။)၊ ဝိဇ္ဇမာနာသု မရူဒွါသု (ဣ။)]၊ ဝိဇ္ဇမာနေသု ကာရိသု။
အညံ ဇိယံ ကရိဿာမိ၊ အလညေဝ ပုရာဏိယာတိ။
ရုဟကဇာတကံ ပဌမံ။
၁၉၂။ သိရိကာဠကဏ္ဏိဇာတကံ (၂-၅-၂)
၈၃။
ဣတ္ထီ သိယာ ရူပဝတီ၊ သာ စ သီလဝတီ သိယာ။
ပုရိသော တံ န ဣစ္ဆေယျ၊ သဒ္ဒဟာသိ မဟောသဓ။
၈၄။
သဒ္ဒဟာမိ မဟာရာဇ၊ ပုရိသော ဒုဗ္ဘဂေါ သိယာ။
သိရီ စ ကာဠကဏ္ဏီ စ၊ န သမေန္တိ ကုဒါစနန္တိ။
သိရိကာဠကဏ္ဏိဇာတကံ ဒုတိယံ။
၁၉၃။ စူဠပဒုမဇာတကံ (၂-၅-၃)
၈၅။
အယမေဝ သာ အဟမပိ [အဟမ္ပိ (သီ။ သျာ။ ဣ။)၊ အဟမ္သိ (က။)] သော အနညော၊ အယမေဝ သော ဟတ္ထစ္ဆိန္နော အနညော။
ယမာဟ ‘‘ကောမာရပတီ မမ’’န္တိ၊ ဝဇ္ဈိတ္ထိယော နတ္ထိ ဣတ္ထီသု သစ္စံ။
၈၆။
ဣမဉ္စ ဇမ္မံ မုသလေန ဟန္တွာ၊ လုဒ္ဒံ ဆဝံ ပရဒါရူပသေဝိံ။
ဣမိဿာ စ နံ ပါပပတိဗ္ဗတာယ၊ ဇီဝန္တိယာ ဆိန္ဒထ ကဏ္ဏနာသန္တိ။
စူဠပဒုမဇာတကံ တတိယံ။
၁၉၄။ မဏိစောရဇာတကံ (၂-၅-၄)
၈၇။
န သန္တိ ဒေဝါ ပဝသန္တိ နူန၊ န ဟိ နူန သန္တိ ဣဓ လောကပါလာ။
သဟသာ ကရောန္တာနမသညတာနံ၊ န ဟိ နူန သန္တီ ပဋိသေဓိတာရော။
၈၈။
အကာလေ ဝဿတီ တဿ၊ ကာလေ တဿ န ဝဿတိ။
သဂ္ဂါ စ စဝတိ ဌာနာ၊ နနု သော တာဝတာ ဟတောတိ။
မဏိစောရဇာတကံ စတုတ္ထံ။
၁၉၅။ ပဗ္ဗတူပတ္ထရဇာတကံ (၂-၅-၅)
၈၉။
ပဗ္ဗတူပတ္ထရေ [ပဗ္ဗတပတ္ထရေ (သီ။ သျာ။ ဣ။)] ရမ္မေ၊ ဇာတာ ပေါက္ခရဏီ သိဝါ။
တံ သိင်္ဂါလော အပါပါယိ [အပါပါသိ (သီ။ သျာ။ ဣ။)]၊ ဇာနံ သီဟေန ရက္ခိတံ။
၉၀။
ပိဝန္တိ စေ [ပိဝန္တိ ဝေ (သီ။)၊ ပိဝန္တိဝ (ဣ။)၊ ပိဝန္တွေ (?)] မဟာရာဇ၊ သာပဒါနိ မဟာနဒိံ။
န တေန အနဒီ ဟောတိ၊ ခမဿု ယဒိ တေ ပိယာတိ။
ပဗ္ဗတူပတ္ထရ [ပဗ္ဗတပတ္ထရ (သီ။ သျာ။ ဣ။)] ဇာတကံ ပဉ္စမံ။
၁၉၆။ ဝလာဟကဿဇာတကံ (၂-၅-၆)
၉၁။
ယေ န ကာဟန္တိ ဩဝါဒံ၊ နရာ ဗုဒ္ဓေန ဒေသိတံ။
ဗျသနံ တေ ဂမိဿန္တိ၊ ရက္ခသီဟိဝ ဝါဏိဇာ။
၉၂။
ယေ စ ကာဟန္တိ ဩဝါဒံ၊ နရာ ဗုဒ္ဓေန ဒေသိတံ။
သောတ္ထိံ ပါရံ ဂမိဿန္တိ၊ ဝလာဟေနေဝ [ဝါလာဟေနေဝ (သီ။ ဣ။)] ဝါဏိဇာတိ။
ဝလာဟကဿ [ဝါလာဟဿ (သီ။ ဣ။)] ဇာတကံ ဆဋ္ဌံ။
၁၉၇။ မိတ္တာမိတ္တဇာတကံ (၂-၅-၇)
၉၃။
န နံ ဥမှယတေ ဒိသွာ၊ န စ နံ ပဋိနန္ဒတိ။
စက္ခူနိ စဿ န ဒဒါတိ၊ ပဋိလောမဉ္စ ဝတ္တတိ။
၉၄။
ဧတေ ဘဝန္တိ အာကာရာ၊ အမိတ္တသ္မိံ ပတိဋ္ဌိတာ။
ယေဟိ အမိတ္တံ ဇာနေယျ၊ ဒိသွာ သုတွာ စ ပဏ္ဍိတောတိ။
မိတ္တာမိတ္တဇာတကံ သတ္တမံ။
၁၉၈။ ရာဓဇာတကံ (၂-၅-၈)
၉၅။
ပဝါသာ အာဂတော တာတ၊ ဣဒါနိ နစိရာဂတော။
ကစ္စိန္နု တာတ တေ မာတာ၊ န အညမုပသေဝတိ။
၉၆။
န ခေါ ပနေတံ သုဘဏံ၊ ဂိရံ သစ္စုပသံဟိတံ။
သယေထ ပေါဋ္ဌပါဒေါဝ၊ မုမ္မုရေ [မုမ္မုရေ (သျာ။)၊ မံ ပုရေ (က။) မုမ္မုရသဒ္ဒေါ ထုသဂ္ဂိမှိ ကုက္ကုဠေ စ ဝတ္တတီတိ သက္ကတာဘိဓါနေသု] ဥပကူထိတောတိ [ဥပကူသိတောတိ (သီ။ သျာ။ ဣ။)၊ ဥပကူလိတော (က။)]။
ရာဓဇာတကံ အဋ္ဌမံ။
၁၉၉။ ဂဟပတိဇာတကံ (၂-၅-၉)
၉၇။
ဥဘယံ မေ န ခမတိ၊ ဥဘယံ မေ န ရုစ္စတိ။
ယာစာယံ ကောဋ္ဌမောတိဏ္ဏာ၊ နာဒ္ဒသံ ဣတိ ဘာသတိ။
၉၈။
တံ တံ ဂါမပတိ ဗြူမိ၊ ကဒရေ အပ္ပသ္မိ ဇီဝိတေ။
ဒွေ မာသေ သင်္ဂရံ ကတွာ [ကာရံ ကတွာန (သီ။ ဣ။)၊ သံကရံ ကတွာ (က။)]၊ မံသံ ဇရဂ္ဂဝံ ကိသံ။
အပ္ပတ္တကာလေ စောဒေသိ၊ တမ္ပိ မယှံ န ရုစ္စတီတိ။
ဂဟပတိဇာတကံ နဝမံ။
၂၀၀။ သာဓုသီလဇာတကံ (၂-၅-၁၀)
၉၉။
သရီရဒဗျံ ဝုဍ္ဎဗျံ [ဝဒ္ဓဗျံ (သီ။ ဣ။)]၊ သောဇစ္စံ သာဓုသီလိယံ။
ဗြာဟ္မဏံ တေဝ ပုစ္ဆာမ၊ ကန္နု တေသံ ဝနိမှသေ [ဝဏိမှသေ (သီ။ ဣ။)]။
၁၀၀။
အတ္ထော အတ္ထိ သရီရသ္မိံ၊ ဝုဍ္ဎဗျဿ နမော ကရေ။
အတ္ထော အတ္ထိ သုဇာတသ္မိံ၊ သီလံ အသ္မာက ရုစ္စတီတိ။
သာဓုသီလဇာတကံ ဒသမံ။
ရုဟကဝဂ္ဂေါ ပဉ္စမော။
တဿုဒ္ဒါနံ –
အပိရုဟက ရူပဝတီ မုသလော၊ ပဝသန္တိ သပဉ္စမပေါက္ခရဏီ။
အထ မုတ္တိမဝါဏိဇ ဥမှယတေ၊ စိရအာဂတ ကောဋ္ဌ သရီရ ဒသာတိ။
၆။ နတံဒဠှဝဂ္ဂေါ
၂၀၁။ ဗန္ဓနာဂါရဇာတကံ (၂-၆-၁)
၁၀၁။
န တံ ဒဠှံ ဗန္ဓနမာဟု ဓီရာ၊ ယဒါယသံ ဒါရုဇပဗ္ဗဇဉ္စ [ဗဗ္ဗဇဉ္စ (သီ။)]။
သာရတ္တရတ္တာ မဏိကုဏ္ဍလေသု၊ ပုတ္တေသု ဒါရေသု စ ယာ အပေက္ခာ။
၁၀၂။
ဧတံ ဒဠှံ ဗန္ဓနမာဟု ဓီရာ၊ ဩဟာရိနံ သိထိလံ ဒုပ္ပမုဉ္စံ။
ဧတမ္ပိ ဆေတွာန ဝဇန္တိ ဓီရာ၊ အနပေက္ခိနော ကာမသုခံ ပဟာယာတိ။
ဗန္ဓနာဂါရဇာတကံ ပဌမံ။
၂၀၂။ ကေဠိသီလဇာတကံ (၂-၆-၂)
၁၀၃။
ဟံသာ ကောဉ္စာ မယူရာ စ၊ ဟတ္ထယော [ဟတ္ထိနော (သီ။)၊ ဟတ္ထိယော (သျာ။ ဣ။)] ပသဒါ မိဂါ။
သဗ္ဗေ သီဟဿ ဘာယန္တိ၊ နတ္ထိ ကာယသ္မိ တုလ္ယတာ။
၁၀၄။
ဧဝမေဝ မနုဿေသု၊ ဒဟရော စေပိ ပညဝါ။
သော ဟိ တတ္ထ မဟာ ဟောတိ၊ နေဝ ဗာလော သရီရဝါတိ။
ကေဠိသီလဇာတကံ ဒုတိယံ။
၂၀၃။ ခဏ္ဍဇာတကံ (၂-၆-၃)
၁၀၅။
ဝိရူပက္ခေဟိ မေ မေတ္တံ၊ မေတ္တံ ဧရာပထေဟိ မေ။
ဆဗျာပုတ္တေဟိ မေ မေတ္တံ၊ မေတ္တံ ကဏှာဂေါတမကေဟိ စ။
အပါဒကေဟိ မေ မေတ္တံ၊ မေတ္တံ ဒွိပါဒကေဟိ မေ။
စတုပ္ပဒေဟိ မေ မေတ္တံ၊ မေတ္တံ ဗဟုပ္ပဒေဟိ မေ။
မာ မံ အပါဒကော ဟိံသိ၊ မာ မံ ဟိံသိ ဒွိပါဒကော။
မာ မံ စတုပ္ပဒေါ ဟိံသိ၊ မာ မံ ဟိံသိ ဗဟုပ္ပဒေါ။
သဗ္ဗေ သတ္တာ သဗ္ဗေ ပါဏာ၊ သဗ္ဗေ ဘူတာ စ ကေဝလာ။
သဗ္ဗေ ဘဒြာနိ ပဿန္တု၊ မာ ကဉ္စိ [ကိဉ္စိ (သျာ။ က။)] ပါပမာဂမာ။
၁၀၆။
အပ္ပမာဏော ဗုဒ္ဓေါ၊ အပ္ပမာဏော ဓမ္မော။
အပ္ပမာဏော သံဃော၊ ပမာဏဝန္တာနိ သရီသပါနိ [သိရိသပါနိ (သီ။ သျာ။ ဣ။)]။
အဟိဝိစ္ဆိကသတပဒီ၊ ဥဏ္ဏနာဘိ [ဥဏ္ဏာနာဘိ (သီ။ သျာ။ ဣ။)] သရဗူမူသိကာ။
ကတာ မေ ရက္ခာ ကတာ မေ ပရိတ္တာ၊ ပဋိက္ကမန္တု ဘူတာနိ။
သောဟံ နမော ဘဂဝတော၊ နမော သတ္တန္နံ သမ္မာသမ္ဗုဒ္ဓါနန္တိ။
ခဏ္ဍဇာတကံ တတိယံ။
၂၀၄။ ဝီရကဇာတကံ (၂-၆-၄)
၁၀၇။
အပိ ဝီရက ပဿေသိ၊ သကုဏံ မဉ္ဇုဘာဏကံ။
မယူရဂီဝသင်္ကာသံ၊ ပတိံ မယှံ သဝိဋ္ဌကံ။
၁၀၈။
ဥဒကထလစရဿ ပက္ခိနော၊ နိစ္စံ အာမကမစ္ဆဘောဇိနော။
တဿာနုကရံ သဝိဋ္ဌကော၊ သေဝါလေ ပလိဂုဏ္ဌိတော မတောတိ။
ဝီရကဇာတကံ စတုတ္ထံ။
၂၀၅။ ဂင်္ဂေယျဇာတကံ (၂-၆-၅)
၁၀၉။
သောဘတိ မစ္ဆော ဂင်္ဂေယျော၊ အထော သောဘတိ ယာမုနော [သောဘန္တိ မစ္ဆာ ဂင်္ဂေယျာ၊ အထော သောဘန္တိ ယာမုနာ (သျာ။ ဣ။)]။
စတုပ္ပဒေါယံ ပုရိသော၊ နိဂြောဓပရိမဏ္ဍလော။
ဤသကာယတ [ဤသမာယတ (က။)] ဂီဝေါ စ၊ သဗ္ဗေဝ အတိရောစတိ။
၁၁၀။
ယံ ပုစ္ဆိတော န တံ အက္ခာသိ [အက္ခာ (သီ။ သျာ။ ဣ။)]၊ အညံ အက္ခာသိ [အက္ခာတိ (သျာ။ ဣ။)] ပုစ္ဆိတော။
အတ္တပ္ပသံသကော ပေါသော၊ နာယံ အသ္မာက ရုစ္စတီတိ။
ဂင်္ဂေယျဇာတကံ ပဉ္စမံ။
၂၀၆။ ကုရုင်္ဂမိဂဇာတကံ (၂-၆-၆)
၁၁၁။
ဣင်္ဃ ဝဒ္ဓမယံ [ဝဒ္ဓမယံ (သီ။ သျာ။ ဣ။)] ပါသံ၊ ဆိန္ဒ ဒန္တေဟိ ကစ္ဆပ။
အဟံ တထာ ကရိဿာမိ၊ ယထာ နေဟိတိ လုဒ္ဒကော။
၁၁၂။
ကစ္ဆပေါ ပါဝိသီ ဝါရိံ၊ ကုရုင်္ဂေါ ပါဝိသီ ဝနံ။
သတပတ္တော ဒုမဂ္ဂမှာ၊ ဒူရေ ပုတ္တေ အပါနယီတိ။
ကုရုင်္ဂမိဂဇာတကံ ဆဋ္ဌံ။
၂၀၇။ အဿကဇာတကံ (၂-၆-၇)
၁၁၃။
အယမဿကရာဇေန၊ ဒေသော ဝိစရိတော မယာ။
အနုကာမယ ကာမေန [အနုကာမယဝနုကာမေန (သီ။ ဣ။)]၊ ပိယေန ပတိနာ သဟ။
၁၁၄။
နဝေန သုခဒုက္ခေန၊ ပေါရာဏံ အပိဓီယတိ [အပိထီယတိ (သီ။ ဣ။)၊ အပိထိယျတိ (သျာ။)]။
တသ္မာ အဿကရညာဝ၊ ကီဋော ပိယတရော မမာတိ။
အဿကဇာတကံ သတ္တမံ။
၂၀၈။ သုသုမာရဇာတကံ (၂-၆-၈)
၁၁၅။
အလံ မေတေဟိ အမ္ဗေဟိ၊ ဇမ္ဗူဟိ ပနသေဟိ စ။
ယာနိ ပါရံ သမုဒ္ဒဿ၊ ဝရံ မယှံ ဥဒုမ္ဗရော။
၁၁၆။
မဟတီ ဝတ တေ ဗောန္ဒိ၊ န စ ပညာ တဒူပိကာ။
သုသုမာရ [သုံသုမာရ (သီ။ သျာ။ ဣ။)] ဝဉ္စိတော မေသိ၊ ဂစ္ဆ ဒါနိ ယထာသုခန္တိ။
သုသုမာရဇာတကံ အဋ္ဌမံ။
၂၀၉။ ကုက္ကုဋဇာတကံ (၂-၆-၉)
၁၁၇။
ဒိဋ္ဌာ မယာ ဝနေ ရုက္ခာ၊ အဿကဏ္ဏာ ဝိဘီဋကာ [ဝိဘေဒကာ (သျာ။ က။)]။
န တာနိ ဧဝံ သက္ကန္တိ၊ ယထာ တွံ ရုက္ခ သက္ကသိ။
၁၁၈။
ပုရာဏကုက္ကုဋော [ကက္ကရော (သီ။ သျာ။ ဣ။)] အယံ၊ ဘေတွာ ပဉ္ဇရမာဂတော။
ကုသလော ဝါဠပါသာနံ၊ အပက္ကမတိ ဘာသတီတိ။
ကုက္ကုဋ [ကက္ကရ (သီ။ သျာ။ ဣ။)] ဇာတကံ နဝမံ။
၂၁၀။ ကန္ဒဂလကဇာတကံ (၂-၆-၁၀)
၁၁၉။
အမ္ဘော ကော နာမ ယံ ရုက္ခော၊ သိန္နပတ္တော [သီနပတ္တော (သီ။ ဣ။)] သကဏ္ဋကော။
ယတ္ထ ဧကပ္ပဟာရေန၊ ဥတ္တမင်္ဂံ ဝိဘိဇ္ဇိတံ [ဝိသာဋိကံ (သီ။ သျာ။ ဣ။)၊ ဝိဃာဋိတံ (သီ။ နိယျ)]။
၁၂၀။
အစာရိ ဝတာယံ ဝိတုဒံ ဝနာနိ၊ ကဋ္ဌင်္ဂရုက္ခေသု အသာရကေသု။
အထာသဒါ ခဒိရံ ဇာတသာရံ [ဇာတိသာရံ (က။)]၊ ယတ္ထဗ္ဘိဒါ ဂရုဠော ဥတ္တမင်္ဂန္တိ။
ကန္ဒဂလက [ကန္ဒလက (က။)] ဇာတကံ ဒသမံ။
နတံဒဠှဝဂ္ဂေါ ဆဋ္ဌော။
တဿုဒ္ဒါနံ –
ဒဠှဗန္ဓန ဟံသဝရော စ ပုန၊ ဝိရူပက္ခ သဝိဋ္ဌက မစ္ဆဝရော။
သကုရုင်္ဂ သအဿက အမ္ဗဝရော၊ ပုန ကုက္ကုဋကော ဂရုဠေန ဒသာတိ။
၇။ ဗီရဏထမ္ဘဝဂ္ဂေါ
၂၁၁။ သောမဒတ္တဇာတကံ (၂-၇-၁)
၁၂၁။
အကာသိ ယောဂ္ဂံ ဓုဝမပ္ပမတ္တော၊ သံဝစ္ဆရံ ဗီရဏထမ္ဘကသ္မိံ။
ဗျာကာသိ သညံ ပရိသံ ဝိဂယှ၊ န နိယျမော တာယတိ အပ္ပပညံ။
၁၂၂။
ဒွယံ ယာစနကော တာတ၊ သောမဒတ္တ နိဂစ္ဆတိ။
အလာဘံ ဓနလာဘံ ဝါ၊ ဧဝံ ဓမ္မာ ဟိ ယာစနာတိ။
သောမဒတ္တဇာတကံ ပဌမံ။
၂၁၂။ ဥစ္ဆိဋ္ဌဘတ္တဇာတကံ (၂-၇-၂)
၁၂၃။
အညော ဥပရိမော ဝဏ္ဏော၊ အညော ဝဏ္ဏော စ ဟေဋ္ဌိမော။
ဗြာဟ္မဏီ တွေဝ ပုစ္ဆာမိ၊ ကိံ ဟေဋ္ဌာ ကိဉ္စ ဥပ္ပရိ။
၁၂၄။
အဟံ နဋောသ္မိ ဘဒ္ဒန္တေ၊ ဘိက္ခကောသ္မိ ဣဓါဂတော။
အယဉှိ ကောဋ္ဌမောတိဏ္ဏော၊ အယံ သော ယံ [တွံ (က။)] ဂဝေသသီတိ။
ဥစ္ဆိဋ္ဌဘတ္တဇာတကံ ဒုတိယံ။
၂၁၃။ ဘရုဇာတကံ (၂-၇-၃)
၁၂၅။
ဣသီနမန္တရံ ကတွာ၊ ဘရုရာဇာတိ [ကုရုရာဇာတိ (က။)] မေ သုတံ။
ဥစ္ဆိန္နော သဟ ရဋ္ဌေဟိ [ရဋ္ဌေန (သီ။ ဣ။)]၊ သရာဇာ ဝိဘဝင်္ဂတော။
၁၂၆။
တသ္မာ ဟိ ဆန္ဒာဂမနံ၊ နပ္ပသံသန္တိ ပဏ္ဍိတာ။
အဒုဋ္ဌစိတ္တော ဘာသေယျ၊ ဂိရံ သစ္စုပသံဟိတန္တိ။
ဘရုဇာတကံ [ကုရုရာတကံ (က။)] တတိယံ။
၂၁၄။ ပုဏ္ဏနဒီဇာတကံ (၂-၇-၄)
၁၂၇။
ပုဏ္ဏံ နဒိံ ယေန စ ပေယျမာဟု၊ ဇာတံ ယဝံ ယေန စ ဂုယှမာဟု။
ဒူရံ ဂတံ ယေန စ အဝှယန္တိ၊ သော တျာဂတော [တျာဘတော (သျာ။ က။) ပဟေဠိဂါထာဘာဝေါ မနသိ ကာတဗ္ဗော] ဟန္ဒ စ ဘုဉ္ဇ ဗြာဟ္မဏ။
၁၂၈။
ယတော မံ သရတီ ရာဇာ၊ ဝါယသမ္ပိ ပဟေတဝေ။
ဟံသာ ကောဉ္စာ မယူရာ စ [ဟံသကောဉ္စမယူရာနံ (က။ အဋ္ဌ။ ပါဌန္တရံ)]၊ အသတီယေဝ ပါပိယာတိ။
ပုဏ္ဏနဒီဇာတကံ စတုတ္ထံ။
၂၁၅။ ကစ္ဆပဇာတကံ (၂-၇-၅)
၁၂၉။
အဝဓီ ဝတ အတ္တာနံ၊ ကစ္ဆပေါ ဗျာဟရံ ဂိရံ [ကစ္ဆပေါဝ ပဗျာဟရံ (သျာ။)၊ ကစ္ဆပေါ သော ပဗျာဟရံ (က။)]။
သုဂ္ဂဟီတသ္မိံ ကဋ္ဌသ္မိံ၊ ဝါစာယ သကိယာဝဓိ။
၁၃၀။
ဧတမ္ပိ ဒိသွာ နရဝီရိယသေဋ္ဌ၊ ဝါစံ ပမုဉ္စေ ကုသလံ နာတိဝေလံ။
ပဿသိ ဗဟုဘာဏေန၊ ကစ္ဆပံ ဗျသနံ ဂတန္တိ။
ကစ္ဆပဇာတကံ ပဉ္စမံ။
၂၁၆။ မစ္ဆဇာတကံ (၂-၇-၆)
၁၃၁။
န မာယမဂ္ဂိ တပတိ၊ န သူလော သာဓုတစ္ဆိတော။
ယဉ္စ မံ မညတေ မစ္ဆီ၊ အညံ သော ရတိယာ ဂတော။
၁၃၂။
သော မံ ဒဟတိ ရာဂဂ္ဂိ၊ စိတ္တံ စူပတပေတိ မံ။
ဇာလိနော မုဉ္စထာယိရာ မံ၊ န ကာမေ ဟညတေ က္ဝစီတိ။
မစ္ဆဇာတကံ ဆဋ္ဌံ။
၂၁၇။ သေဂ္ဂုဇာတကံ (၂-၇-၇)
၁၃၃။
သဗ္ဗော လောကော အတ္တမနော အဟောသိ၊ အကောဝိဒါ ဂါမဓမ္မဿ သေဂ္ဂု။
ကောမာရိ ကော နာမ [ကောမာရိကာ နာမ (က။)၊ ကောမာရိကော နာမ (သျာ။ ဣ။)] တဝဇ္ဇ ဓမ္မော၊ ယံ တွံ ဂဟိတာ ပဝနေ ပရောဒသိ။
၁၃၄။
ယော ဒုက္ခဖုဋ္ဌာယ ဘဝေယျ တာဏံ၊ သော မေ ပိတာ ဒုဗ္ဘိ ဝနေ ကရောတိ။
သာ ကဿ ကန္ဒာမိ ဝနဿ မဇ္ဈေ၊ ယော တာယိတာ သော သဟသံ ကရောတီတိ။
သေဂ္ဂုဇာတကံ သတ္တမံ။
၂၁၈။ ကူဋဝါဏိဇဇာတကံ (၂-၇-၈)
၁၃၅။
သဌဿ သာဌေယျမိဒံ သုစိန္တိတံ၊ ပစ္စောဍ္ဍိတံ ပဋိကူဋဿ ကူဋံ။
ဖာလဉ္စေ ခါဒေယျုံ [အဒေယျုံ (သီ။ ဣ။)] မူသိကာ၊ ကသ္မာ ကုမာရံ ကုလလာ န [နော (သီ။ သျာ။ ဣ။)] ဟရေယျုံ။
၁၃၆။
ကူဋဿ ဟိ သန္တိ [သန္တီဓ (က။)] ကူဋကူဋာ၊ ဘဝတိ [ဘဝန္တိ (က။)] စာပိ နိကတိနော နိကတျာ။
ဒေဟိ ပုတ္တနဋ္ဌ ဖာလနဋ္ဌဿ ဖာလံ၊ မာ တေ ပုတ္တမဟာသိ ဖာလနဋ္ဌောတိ။
ကူဋဝါဏိဇဇာတကံ အဋ္ဌမံ။
၂၁၉။ ဂရဟိတဇာတကံ (၂-၇-၉)
၁၃၇။
ဟိရညံ မေ သုဝဏ္ဏံ မေ၊ ဧသာ ရတ္တိံ ဒိဝါ ကထာ။
ဒုမ္မေဓါနံ မနုဿာနံ၊ အရိယဓမ္မံ အပဿတံ။
၁၃၈။
ဒွေ ဒွေ ဂဟပတယော ဂေဟေ၊ ဧကော တတ္ထ အမဿုကော။
လမ္ဗတ္ထနော ဝေဏိကတော၊ အထော အင်္ကိတကဏ္ဏကော။
ကီတော ဓနေန ဗဟုနာ၊ သော တံ ဝိတုဒတေ ဇနန္တိ။
ဂရဟိတဇာတကံ နဝမံ။
၂၂၀။ ဓမ္မဓဇဇာတကံ (၂-၇-၁၀)
၁၃၉။
သုခံ ဇီဝိတရူပေါသိ၊ ရဋ္ဌာ ဝိဝနမာဂတော။
သော ဧကကော ရုက္ခမူလေ [အရညသ္မိံ (သီ။ သျာ။ ဣ။)]၊ ကပဏော ဝိယ ဈာယသိ။
၁၄၀။
သုခံ ဇီဝိတရူပေါသ္မိ၊ ရဋ္ဌာ ဝိဝနမာဂတော။
သော ဧကကော ရုက္ခမူလေ၊ ကပဏော ဝိယ ဈာယာမိ။
သတံ ဓမ္မံ အနုဿရံတိ။
ဓမ္မဓဇဇာတကံ ဒသမံ။
ဗီရဏထမ္ဘဝဂ္ဂေါ သတ္တမော။
တဿုဒ္ဒါနံ –
အထ ဗီရဏထမ္ဘဝရော စ နဋော၊ ဘရုရာဇဝရုတ္တမပုဏ္ဏနဒီ။
ဗဟုဘာဏိ အဂ္ဂိပဝနေ မူသိကာ၊ သဟလမ္ဗတ္ထနော ကပဏေန ဒသာတိ။
၈။ ကာသာဝဝဂ္ဂေါ
၂၂၁။ ကာသာဝဇာတကံ (၂-၈-၁)
၁၄၁။
အနိက္ကသာဝေါ ကာသာဝံ၊ ယော ဝတ္ထံ ပရိဒဟိဿတိ [ပရိဒဟေဿတိ (သီ။ ဣ။)]။
အပေတော ဒမသစ္စေန၊ န သော ကာသာဝမရဟတိ။
၁၄၂။
ယော စ ဝန္တကသာဝဿ၊ သီလေသု သုသမာဟိတော။
ဥပေတော ဒမသစ္စေန၊ သ ဝေ ကာသာဝမရဟတီတိ။
ကာသာဝဇာတကံ ပဌမံ။
၂၂၂။ စူဠနန္ဒိယဇာတကံ (၂-၈-၂)
၁၄၃။
ဣဒံ တဒါစရိယဝစော၊ ပါရာသရိယော ယဒဗြဝိ [ပေါရာဏာစရိယောဗြဝိ (က။)]။
မာသု တွံ အကရိ [အကရာ (သီ။ ဣ။)] ပါပံ၊ ယံ တွံ ပစ္ဆာ ကတံ တပေ။
၁၄၄။
ယာနိ ကရောတိ ပုရိသော၊ တာနိ အတ္တနိ ပဿတိ။
ကလျာဏကာရီ ကလျာဏံ၊ ပါပကာရီ စ ပါပကံ။
ယာဒိသံ ဝပတေ ဗီဇံ၊ တာဒိသံ ဟရတေ ဖလန္တိ။
စူဠနန္ဒိယဇာတကံ ဒုတိယံ။
၂၂၃။ ပုဋဘတ္တဇာတကံ (၂-၈-၃)
၁၄၅။
နမေ နမန္တဿ ဘဇေ ဘဇန္တံ၊ ကိစ္စာနုကုဗ္ဗဿ ကရေယျ ကိစ္စံ။
နာနတ္ထကာမဿ ကရေယျ အတ္ထံ၊ အသမ္ဘဇန္တမ္ပိ န သမ္ဘဇေယျ။
၁၄၆။
စဇေ စဇန္တံ ဝနထံ န ကယိရာ၊ အပေတစိတ္တေန န သမ္ဘဇေယျ။
ဒိဇော ဒုမံ ခီဏဖလန္တိ ဉတွာ၊ အညံ သမေက္ခေယျ မဟာ ဟိ လောကောတိ။
ပုဋဘတ္တဇာတကံ တတိယံ။
၂၂၄။ ကုမ္ဘိလဇာတကံ (၂-၈-၄)
၁၄၇။
ယဿေတေ စတုရော ဓမ္မာ၊ ဝါနရိန္ဒ ယထာ တဝ။
သစ္စံ ဓမ္မော ဓိတိ စာဂေါ၊ ဒိဋ္ဌံ သော အတိဝတ္တတိ။
၁၄၈။
ယဿ စေတေ န ဝိဇ္ဇန္တိ၊ ဂုဏာ ပရမဘဒ္ဒကာ။
သစ္စံ ဓမ္မော ဓိတိ စာဂေါ၊ ဒိဋ္ဌံ သော နာတိဝတ္တတီတိ။
ကုမ္ဘိလဇာတကံ စတုတ္ထံ။
၂၂၅။ ခန္တိဝဏ္ဏဇာတကံ (၂-၈-၅)
၁၄၉။
အတ္ထိ မေ ပုရိသော ဒေဝ၊ သဗ္ဗကိစ္စေသု ဗျာဝဋော [ဝါဝဋော (က။)]။
တဿ စေကောပရာဓတ္ထိ၊ တတ္ထ တွံ ကိန္တိ မညသိ။
၁၅၀။
အမှာကမ္ပတ္ထိ ပုရိသော၊ ဧဒိသော ဣဓ ဝိဇ္ဇတိ။
ဒုလ္လဘော အင်္ဂသမ္ပန္နော၊ ခန္တိရသ္မာက ရုစ္စတီတိ။
ခန္တိဝဏ္ဏဇာတကံ ပဉ္စမံ။
၂၂၆။ ကောသိယဇာတကံ (၂-၈-၆)
၁၅၁။
ကာလေ နိက္ခမနာ သာဓု၊ နာကာလေ သာဓု နိက္ခမော။
အကာလေန ဟိ နိက္ခမ္မ၊ ဧကကမ္ပိ ဗဟုဇ္ဇနော။
န ကိဉ္စိ အတ္ထံ ဇောတေတိ၊ ဓင်္ကသေနာဝ ကောသိယံ။
၁၅၂။
ဓီရော စ ဝိဓိဝိဓါနညူ၊ ပရေသံ ဝိဝရာနုဂူ။
သဗ္ဗာမိတ္တေ ဝသီကတွာ၊ ကောသိယောဝ သုခီ သိယာတိ။
ကောသိယဇာတကံ ဆဋ္ဌံ။
၂၂၇။ ဂူထပါဏဇာတကံ (၂-၈-၇)
၁၅၃။
သူရော သူရေန သင်္ဂမ္မ၊ ဝိက္ကန္တေန ပဟာရိနာ။
ဧဟိ နာဂ နိဝတ္တဿု၊ ကိံ နု ဘီတော ပလာယသိ။
ပဿန္တု အင်္ဂမဂဓါ၊ မမ တုယှဉ္စ ဝိက္ကမံ။
၁၅၄။
န တံ ပါဒါ ဝဓိဿာမိ၊ န ဒန္တေဟိ န သောဏ္ဍိယာ။
မီဠ္ဟေန တံ ဝဓိဿာမိ၊ ပူတိ ဟညတု ပူတိနာတိ။
ဂူထပါဏဇာတကံ သတ္တမံ။
၂၂၈။ ကာမနီတဇာတကံ (၂-၈-၈)
၁၅၅။
တယော ဂိရိံ အန္တရံ ကာမယာမိ၊ ပဉ္စာလာ ကုရုယော ကေကကေ စ [ကုရယော ကေကယေ စ (သီ။)]။
တတုတ္တရိံ [တဒုတ္တရိံ (က။)] ဗြာဟ္မဏ ကာမယာမိ၊ တိကိစ္ဆ မံ ဗြာဟ္မဏ ကာမနီတံ။
၁၅၆။
ကဏှာဟိဒဋ္ဌဿ ကရောန္တိ ဟေကေ၊ အမနုဿပဝိဋ္ဌဿ [အမနုဿဝဒ္ဓဿ (သီ။ ဣ။)၊ အမနုဿဝိဋ္ဌဿ (သျာ။)] ကရောန္တိ ပဏ္ဍိတာ။
န ကာမနီတဿ ကရောတိ ကောစိ၊ ဩက္ကန္တသုက္ကဿ ဟိ ကာ တိကိစ္ဆာတိ။
ကာမနီတဇာတကံ အဋ္ဌမံ။
၂၂၉။ ပလာယိတဇာတကံ (၂-၈-၉)
၁၅၇။
ဂဇဂ္ဂမေဃေဟိ ဟယဂ္ဂမာလိဘိ၊ ရထူမိဇာတေဟိ သရာဘိဝဿေဘိ [သရာဘိဝဿဘိ (သျာ။ သီ။ အဋ္ဌ။)၊ သရာဘိဝဿိဘိ (?)]။
ထရုဂ္ဂဟာဝဋ္ဋ [ဓနုဂ္ဂဟာဝဋ္ဋ (က။)] ဒဠှပ္ပဟာရိဘိ၊ ပရိဝါရိတာ တက္ကသိလာ သမန္တတော။
၁၅၈။
[အဘိဓါဝထာ စ ပတထာ စ၊ ဝိဝိဓဝိနဒိတာ စ ဒန္တိဘိ။ ဝတ္တတဇ္ဇ တုမုလော ဃောသော၊ ယထာ ဝိဇ္ဇုတာ ဇလဓရဿ ဂဇ္ဇတောတိ။ (သီ။ ဣ။ က။)] အဘိဓါဝထ စူပဓါဝထ စ [အဘိဓါဝထာ စုပ္ပတထာ စ (သျာ။)]၊ ဝိဝိဓါ ဝိနာဒိတာ [ဝိနာဒိတတ္ထ (က။)] ဝဒန္တိဘိ။
ဝတ္တတဇ္ဇ တုမုလော ဃောသော ယထာ၊ ဝိဇ္ဇုလတာ ဇလဓရဿ ဂဇ္ဇတောတိ [အဘိဓါဝထာ စ ပတထာ စ၊ ဝိဝိဓဝိနဒိတာ စ ဒန္တိဘိ။ ဝတ္တတဇ္ဇ တုမုလော ဃောသော၊ ယထာ ဝိဇ္ဇုတာ ဇလဓရဿ ဂဇ္ဇတောတိ။ (သီ။ ဣ။ က။)]။
ပလာယိတဇာတကံ နဝမံ။
၂၃၀။ ဒုတိယပလာယိတဇာတကံ (၂-၈-၁၀)
၁၅၉။
ဓဇမပရိမိတံ အနန္တပါရံ၊ ဒုပ္ပသဟံဓင်္ကေဟိ သာဂရံဝ [သာဂရမိဝ (သီ။ သျာ။ ဣ။)]။
ဂိရိမိဝအနိလေန ဒုပ္ပသယှော [ဒုပ္ပသဟော (သီ။ ဣ။ က။)]၊ ဒုပ္ပသဟော အဟမဇ္ဇတာဒိသေန။
၁၆၀။
မာ ဗာလိယံ ဝိလပိ [ဝိပ္ပလပိ (ဗဟူသု)] န ဟိဿ တာဒိသံ၊ ဝိဍယှသေ [ဝိဠယှသေ (သီ။ ဣ။)] န ဟိ လဘသေ နိသေဓကံ။
အာသဇ္ဇသိ ဂဇမိဝ ဧကစာရိနံ၊ ယော တံ ပဒါ နဠမိဝ ပေါထယိဿတီတိ။
ဒုတိယပလာယိတဇာတကံ ဒသမံ။
ကာသာဝဝဂ္ဂေါ အဋ္ဌမော။
တဿုဒ္ဒါနံ –
ဝရဝတ္ထဝစော ဒုမခီဏဖလံ၊ စတုရောဓမ္မဝရံ ပုရိသုတ္တမ။
ဓင်္ကမဂဓါ စ တယောဂိရိနာမ၊ ဂဇဂ္ဂဝရော ဓဇဝရေန ဒသာတိ။
၉။ ဥပါဟနဝဂ္ဂေါ
၂၃၁။ ဥပါဟနဇာတကံ (၂-၉-၁)
၁၆၁။
ယထာပိ ကီတာ ပုရိသဿုပါဟနာ၊ သုခဿ အတ္ထာယ ဒုခံ ဥဒဗ္ဗဟေ။
ဃမ္မာဘိတတ္တာ ထလသာ ပဣဠိတာ၊ တဿေဝ ပါဒေ ပုရိသဿ ခါဒရေ။
၁၆၂။
ဧဝမေဝ ယော ဒုက္ကုလီနော အနရိယော၊ တမ္မာက [တမှာက (သီ။)၊ တုမှာက (သျာ။ ဣ။)] ဝိဇ္ဇဉ္စ သုတဉ္စ အာဒိယ။
တမေဝ သော တတ္ထ သုတေန ခါဒတိ၊ အနရိယော ဝုစ္စတိ ဒုပါဟနူပမောတိ [ပါနဒူပမောတိ (သီ။ ဣ။)]။
ဥပါဟနဇာတကံ ပဌမံ။
၂၃၂။ ဝီဏာဂုဏဇာတကံ (၂-၉-၂)
၁၆၃။
ဧကစိန္တိတော ယမတ္ထော၊ ဗာလော အပရိဏာယကော။
န ဟိ ခုဇ္ဇေန ဝါမေန၊ ဘောတိ သင်္ဂန္တုမရဟသိ။
၁၆၄။
ပုရိသူသဘံ မညမာနာ၊ အဟံ ခုဇ္ဇမကာမယိံ။
သောယံ သံကုဋိတော သေတိ၊ ဆိန္နတန္တိ ယထာ ဝိဏာတိ [ထုဏာတိ (သီ။)]။
ဝီဏာဂုဏဇာတကံ ဒုတိယံ။
၂၃၃။ ဝိကဏ္ဏဇာတကံ (၂-၉-၃)
၁၆၅။
ကာမံ ယဟိံ ဣစ္ဆသိ တေန ဂစ္ဆ၊ ဝိဒ္ဓေါသိ မမ္မမှိ [မမသ္မိ (က။)] ဝိကဏ္ဏကေန။
ဟတောသိ ဘတ္တေန သုဝါဒိတေန [သဝါဒိတေန (သီ။ သျာ။ ဣ။)]၊ လောလော စ မစ္ဆေ အနုဗန္ဓမာနော။
၁၆၆။
ဧဝမ္ပိ လောကာမိသံ ဩပတန္တော၊ ဝိဟညတီ စိတ္တဝသာနုဝတ္တီ။
သော ဟညတိ ဉာတိသခါန မဇ္ဈေ၊ မစ္ဆာနုဂေါ သောရိဝ သုံသုမာရောတိ [သုသုမာရော (က။)]။
ဝိကဏ္ဏဇာတကံ တတိယံ။
၂၃၄။ အသိတာဘူဇာတကံ (၂-၉-၄)
၁၆၇။
တွမေဝ ဒါနိမကရ [မကရိ (သျာ။)၊ မကရာ (က။ သီ။)]၊ ယံ ကာမော ဗျဂမာ တယိ။
သောယံ အပ္ပဋိသန္ဓိကော၊ ခရဆိန္နံဝ ရေနုကံ [ရေရုကံ (သီ။ ဣ။)]။
၁၆၈။
အတ္ရိစ္ဆံ [အတ္ရိစ္ဆာ (သီ။ သျာ။ ဣ။)] အတိလောဘေန၊ အတိလောဘမဒေန စ။
ဧဝံ ဟာယတိ အတ္ထမှာ၊ အဟံဝ အသိတာဘုယာတိ။
အသိတာဘူဇာတကံ စတုတ္ထံ။
၂၃၅။ ဝစ္ဆနခဇာတကံ (၂-၉-၅)
၁၆၉။
သုခါ ဃရာ ဝစ္ဆနခ၊ သဟိရညာ သဘောဇနာ။
ယတ္ထ ဘုတွာ ပိဝိတွာ စ၊ သယေယျာထ အနုဿုကော။
၁၇၀။
ဃရာ နာနီဟမာနဿ၊ ဃရာ နာဘဏတော မုသာ။
ဃရာ နာဒိန္နဒဏ္ဍဿ၊ ပရေသံ အနိကုဗ္ဗတော [အနိကြုဗ္ဗတော (က။)]။
ဧဝံ ဆိဒ္ဒံ ဒုရဘိသမ္ဘဝံ [ဒုရဘိဘဝံ (သီ။ ဣ။)]၊ ကော ဃရံ ပဋိပဇ္ဇတီတိ။
ဝစ္ဆနခဇာတကံ ပဉ္စမံ။
၂၃၆။ ဗကဇာတကံ (၂-၉-၆)
၁၇၁။
ဘဒ္ဒကော ဝတယံ ပက္ခီ၊ ဒိဇော ကုမုဒသန္နိဘော။
ဝူပသန္တေဟိ ပက္ခေဟိ၊ မန္ဒမန္ဒောဝ ဈာယတိ။
၁၇၂။
နာဿ သီလံ ဝိဇာနာထ၊ အနညာယ ပသံသထ။
အမှေ ဒိဇော န ပါလေတိ၊ တေန ပက္ခီ န ဖန္ဒတီတိ။
ဗကဇာတကံ ဆဋ္ဌံ။
၂၃၇။ သာကေတဇာတကံ (၂-၉-၇)
၁၇၃။
ကော နု ခေါ ဘဂဝါ ဟေတု၊ ဧကစ္စေ ဣဓ ပုဂ္ဂလေ။
အတီဝ ဟဒယံ နိဗ္ဗာတိ၊ စိတ္တဉ္စာပိ ပသီဒတိ။
၁၇၄။
ပုဗ္ဗေဝ သန္နိဝါသေန၊ ပစ္စုပ္ပန္နဟိတေန ဝါ။
ဧဝံ တံ ဇာယတေ ပေမံ၊ ဥပ္ပလံဝ ယထောဒကေတိ။
သာကေတဇာတကံ သတ္တမံ။
၂၃၈။ ဧကပဒဇာတကံ (၂-၉-၈)
၁၇၅။
ဣင်္ဃ ဧကပဒံ တာတ၊ အနေကတ္ထပဒဿိတံ [ပဒနိဿိတံ (သီ။ ဣ။)]။
ကိဉ္စိ သင်္ဂါဟိကံ ဗြူသိ၊ ယေနတ္ထေ သာဓယေမသေ။
၁၇၆။
ဒက္ခေယျေကပဒံ တာတ၊ အနေကတ္ထပဒဿိတံ။
တဉ္စ သီလေန သညုတ္တံ၊ ခန္တိယာ ဥပပါဒိတံ။
အလံ မိတ္တေ သုခါပေတုံ၊ အမိတ္တာနံ ဒုခါယ စာတိ။
ဧကပဒဇာတကံ အဋ္ဌမံ။
၂၃၉။ ဟရိတမဏ္ဍူကဇာတကံ (၂-၉-၉)
၁၇၇။
အာသီဝိသမ္ပိ မံ [အာသီဝိသံ မမံ (သီ။ ဣ။)] သန္တံ၊ ပဝိဋ္ဌံ ကုမိနာမုခံ။
ရုစ္စတေ ဟရိတာမာတာ၊ ယံ မံ ခါဒန္တိ မစ္ဆကာ။
၁၇၈။
ဝိလုမ္ပတေဝ ပုရိသော၊ ယာဝဿ ဥပကပ္ပတိ။
ယဒါ စညေ ဝိလုမ္ပန္တိ၊ သော ဝိလုတ္တော ဝိလုမ္ပတီတိ [ဝိလုပ္ပတီတိ (?)]။
ဟရိတမဏ္ဍူကဇာတကံ နဝမံ။
၂၄၀။ မဟာပိင်္ဂလဇာတကံ (၂-၉-၁၀)
၁၇၉။
သဗ္ဗော ဇနော ဟိံသိတော ပိင်္ဂလေန၊ တသ္မိံ မတေ ပစ္စယာ [ပစ္စယံ (သီ။ သျာ။ ဣ။)] ဝေဒယန္တိ။
ပိယော နု တေ အာသိ အကဏှနေတ္တော၊ ကသ္မာ နု တွံ ရောဒသိ ဒွါရပါလ။
၁၈၀။
န မေ ပိယော အာသိ အကဏှနေတ္တော၊ ဘာယာမိ ပစ္စာဂမနာယ တဿ။
ဣတော ဂတော ဟိံသေယျ မစ္စုရာဇံ၊ သော ဟိံသိတော အာနေယျ ပုန ဣဓ။
၁၈၁။
ဒဍ္ဎော ဝါဟသဟဿေဟိ၊ သိတ္တော ဃဋသတေဟိ သော။
ပရိက္ခတာ စ သာ ဘူမိ၊ မာ ဘာယိ နာဂမိဿတီတိ။
မဟာပိင်္ဂလဇာတကံ ဒသမံ။
ဥပါဟနဝဂ္ဂေါ နဝမော။
တဿုဒ္ဒါနံ –
ဝရုပါဟန ခုဇ္ဇ ဝိကဏ္ဏကကော၊ အသိတာဘုယ ပဉ္စမဝစ္ဆနခေါ။
ဒိဇ ပေမဝရုတ္တမဧကပဒံ၊ ကုမိနာမုခ ပိင်္ဂလကေန ဒသာတိ။
၁၀။ သိင်္ဂါလဝဂ္ဂေါ
၂၄၁။ သဗ္ဗဒါဌိဇာတကံ (၂-၁၀-၁)
၁၈၂။
သိင်္ဂါလော မာနထဒ္ဓေါ စ၊ ပရိဝါရေန အတ္ထိကော။
ပါပုဏိ မဟတိံ ဘူမိံ၊ ရာဇာသိ သဗ္ဗဒါဌိနံ။
၁၈၃။
ဧဝမေဝ မနုဿေသု၊ ယော ဟောတိ ပရိဝါရဝါ။
သော ဟိ တတ္ထ မဟာ ဟောတိ၊ သိင်္ဂါလော ဝိယ ဒါဌိနန္တိ။
သဗ္ဗဒါဌိဇာတကံ ပဌမံ။
၂၄၂။ သုနခဇာတကံ (၂-၁၀-၂)
၁၈၄။
ဗာလော ဝတာယံ သုနခေါ၊ ယော ဝရတ္တံ [ယော စ ယောတ္တံ (က။)] န ခါဒတိ။
ဗန္ဓနာ စ ပမုဉ္စေယျ၊ အသိတော စ ဃရံ ဝဇေ။
၁၈၅။
အဋ္ဌိတံ မေ မနသ္မိံ မေ၊ အထော မေ ဟဒယေ ကတံ။
ကာလဉ္စ ပဋိကင်္ခါမိ၊ ယာဝ ပဿုပတူ ဇနော [ပသုပတုဇ္ဇနော (သျာ။ က။)]။
သုနခဇာတကံ ဒုတိယံ။
၂၄၃။ ဂုတ္တိလဇာတကံ (၂-၁၀-၃)
၁၈၆။
သတ္တတန္တိံ သုမဓုရံ၊ ရာမဏေယျံ အဝါစယိံ။
သော မံ ရင်္ဂမှိ အဝ္ဟေတိ၊ သရဏံ မေ ဟောဟိ ကောသိယ။
၁၈၇။
အဟံ တံ သရဏံ သမ္မ [အဟံ တေ သရဏံ ဟောမိ (ဝိ။ ဝ။ ၃၂၈)]၊ အဟမာစရိယပူဇကော။
န တံ ဇယိဿတိ သိဿော၊ သိဿမာစရိယ ဇေဿသီတိ။
ဂုတ္တိလဇာတကံ တတိယံ။
၂၄၄။ ဝိဂတိစ္ဆဇာတကံ (၂-၁၀-၄)
၁၈၈။
ယံ ပဿတိ န တံ ဣစ္ဆတိ၊ ယဉ္စ န ပဿတိ တံ ကိရိစ္ဆတိ။
မညာမိ စိရံ စရိဿတိ၊ န ဟိ တံ လစ္ဆတိ ယံ သ ဣစ္ဆတိ။
၁၈၉။
ယံ လဘတိ န တေန တုဿတိ၊ ယဉ္စ ပတ္ထေတိ လဒ္ဓံ ဟီဠေတိ။
ဣစ္ဆာ ဟိ အနန္တဂေါစရာ၊ ဝိဂတိစ္ဆာန [ဝီတိစ္ဆာနံ (သီ။ ဣ။)] နမော ကရောမသေတိ။
ဝိဂတိစ္ဆ [ဝီတိစ္ဆ (သီ။ ဣ။)] ဇာတကံ စတုတ္ထံ။
၂၄၅။ မူလပရိယာယဇာတကံ (၂-၁၀-၅)
၁၉၀။
ကာလော ဃသတိ ဘူတာနိ၊ သဗ္ဗာနေဝ သဟတ္တနာ။
ယော စ ကာလဃသော ဘူတော၊ သ ဘူတပစနိံ ပစိ။
၁၉၁။
ဗဟူနိ နရသီသာနိ၊ လောမသာနိ ဗြဟာနိ စ။
ဂီဝါသု ပဋိမုက္ကာနိ၊ ကောစိဒေဝေတ္ထ ကဏ္ဏဝါတိ။
မူလပရိယာယဇာတကံ ပဉ္စမံ။
၂၄၆။ ဗာလောဝါဒဇာတကံ (၂-၁၀-၆)
၁၉၂။
ဟန္တွာ ဆေတွာ [ဈတွာ (သီ။ ဣ။)၊ ဃတွာ (သျာ။)] ဝဓိတွာ စ၊ ဒေတိ ဒါနံ အသညတော။
ဧဒိသံ ဘတ္တံ ဘုဉ္ဇမာနော၊ သ ပါပမုပလိမ္ပတိ [သ ပါပေန ဥပလိပ္ပတိ (သီ။ ဣ။)]။
၁၉၃။
ပုတ္တဒါရမ္ပိ စေ ဟန္တွာ၊ ဒေတိ ဒါနံ အသညတော။
ဘုဉ္ဇမာနောပိ သပ္ပညော၊ န ပါပမုပလိမ္ပတီတိ။
ဗာလောဝါဒဇာတကံ ဆဋ္ဌံ။
၂၄၇။ ပါဒဉ္ဇလီဇာတကံ (၂-၁၀-၇)
၁၉၄။
အဒ္ဓါ ပါဒဉ္ဇလီ သဗ္ဗေ၊ ပညာယ အတိရောစတိ။
တထာ ဟိ ဩဋ္ဌံ ဘဉ္ဇတိ၊ ဥတ္တရိံ နူန ပဿတိ။
၁၉၅။
နာယံ ဓမ္မံ အဓမ္မံ ဝါ၊ အတ္ထာနတ္ထဉ္စ ဗုဇ္ဈတိ။
အညတြ ဩဋ္ဌနိဗ္ဘောဂါ၊ နာယံ ဇာနာတိ ကိဉ္စနန္တိ။
ပါဒဉ္ဇလီဇာတကံ သတ္တမံ။
၂၄၈။ ကိံသုကောပမဇာတကံ (၂-၁၀-၈)
၁၉၆။
သဗ္ဗေဟိ ကိံသုကော ဒိဋ္ဌော၊ ကိံန္ဝေတ္ထ ဝိစိကိစ္ဆထ။
န ဟိ သဗ္ဗေသု ဌာနေသု၊ သာရထီ ပရိပုစ္ဆိတော။
၁၉၇။
ဧဝံ သဗ္ဗေဟိ ဉာဏေဟိ၊ ယေသံ ဓမ္မာ အဇာနိတာ။
တေ ဝေ ဓမ္မေသု ကင်္ခန္တိ၊ ကိံသုကသ္မိံဝ ဘာတရောတိ။
ကိံသုကောပမဇာတကံ အဋ္ဌမံ။
၂၄၉။ သာလကဇာတကံ (၂-၁၀-၉)
၁၉၈။
ဧကပုတ္တကော ဘဝိဿသိ၊ တွဉ္စ နော ဟေဿသိ ဣဿရော ကုလေ။
ဩရောဟ ဒုမသ္မာ သာလက၊ ဧဟိ ဒါနိ ဃရကံ ဝဇေမသေ။
၁၉၉။
နနု မံ သုဟဒယောတိ [နနု မံ ဟဒယေတိ (သီ။ ဣ။)] မညသိ၊ ယဉ္စ မံ ဟနသိ ဝေဠုယဋ္ဌိယာ။
ပက္ကမ္ဗဝနေ ရမာမသေ၊ ဂစ္ဆ တွံ ဃရကံ ယထာသုခန္တိ။
သာလကဇာတကံ နဝမံ။
၂၅၀။ ကပိဇာတကံ (၂-၁၀-၁၀)
၂၀၀။
အယံ ဣသီ ဥပသမသံယမေ ရတော၊ သ တိဋ္ဌတိ [သန္တိဋ္ဌတိ (သီ။ ဣ။)] သိသိရဘယေန အဋ္ဋိတော။
ဟန္ဒ အယံ ပဝိသတုမံ အဂါရကံ၊ ဝိနေတု သီတံ ဒရထဉ္စ ကေဝလံ။
၂၀၁။
နာယံ ဣသီ ဥပသမသံယမေ ရတော၊ ကဣ အယံ ဒုမဝရသာခဂေါစရော။
သော ဒူသကော ရောသကော စာပိ ဇမ္မော၊ သစေဝဇေမမ္ပိ [သစေ + အာဝဇေ + ဣမမ္ပိ] ဒူသေယျဂါရန္တိ [ဒူသယေ ဃရန္တိ (သီ။ သျာ။ ဣ။)]။
ကပိဇာတကံ ဒသမံ။
သိင်္ဂါလဝဂ္ဂေါ ဒသမော။
တဿုဒ္ဒါနံ –
အထ ရာဇာ သိင်္ဂါလဝရော သုနခေါ၊ တထာ ကောသိယ ဣစ္ဆတိ ကာလဃသော။
အထ ဒါနဝရောဋ္ဌပိ သာရထိနာ၊ ပုနမ္ဗဝနဉ္စ သိသိရကပိ ဒသာတိ။
အထ ဝဂ္ဂုဒ္ဒါနံ –
ဒဠှဉ္စ ဝဂ္ဂံ အပရေန သန္ထဝံ၊ ကလျာဏဝဂ္ဂါသဒိသော စ ရူဟကံ။
နတံဒဠှ ဗီရဏထမ္ဘကံ ပုန၊ ကာသာဝုပါဟန သိင်္ဂါလကေန ဒသာတိ။
ဒုကနိပါတံ နိဋ္ဌိတံ။