ဆဌသဂႅီ တိပိဋကံ
ခုဒ္ဒကနိကာယ
ဇာတကပါဠိ
နမော တဿ ဘဂဝတော အရဟတော သမ္မာသမ္ဗုဒ္ဓဿ
(ပဌမော ဘာဂေါ)
၁။ ဧကကနိပါတ
၁။ အပဏ္ဏကဝဂ္ဂ
၁။ အပဏ္ဏကဇာတက
၁။
အပဏ္ဏကံ ဌာနမေကေ၊ ဒုတိယံ အာဟု တက္ကိကာ။
ဧတဒညာယ မေဓါဝီ၊ တံ ဂဏှေ ယဒပဏ္ဏကန္တိ [တံ ဂဏှေယျ အပဏ္ဏကံ (က။)]။
အပဏ္ဏကဇာတကံ ပဌမံ။
၂။ ဝဏ္ဏုပထဇာတကံ
၂။
အကိလာသုနော ဝဏ္ဏုပထေ [ဝဏ္ဏပထေ (က။)] ခဏန္တာ၊ ဥဒင်္ဂဏေ တတ္ထ ပပံ အဝိန္ဒုံ။
ဧဝံ မုနီ ဝီရိယ [မုနိ ဝိရိယ (ဣ။)၊ မုနိ ဝီရိယ (သျာ။ က။)] ဗလူပပန္နော၊ အကိလာသု ဝိန္ဒေ ဟဒယဿ သန္တိန္တိ။
ဝဏ္ဏုပထဇာတကံ ဒုတိယံ။
၃။ သေရိဝဝါဏိဇဇာတကံ
၃။
ဣဓ စေ နံ [ဣဓ စေ ဟိ နံ (သီ။ ဣ။)] ဝိရာဓေသိ၊ သဒ္ဓမ္မဿ နိယာမတံ [နိယာမကံ (သျာ။ က။)]။
စိရံ တွံ အနုတပ္ပေသိ [အနုတပေဿသိ (သီ။ ဣ။)၊ အနုတပ္ပိဿသိ (?)]၊ သေရိဝါယံဝ ဝါဏိဇောတိ။
သေရိဝဝါဏိဇဇာတကံ တတိယံ။
၄။ စူဠသေဋ္ဌိဇာတကံ
၄။
အပ္ပကေနပိ မေဓါဝီ၊ ပါဘတေန ဝိစက္ခဏော။
သမုဋ္ဌာပေတိ အတ္တာနံ၊ အဏုံ အဂ္ဂိံဝ သန္ဓမန္တိ။
စူဠ [စုလ္လ (သီ။), စုလ္လက (သျာ။ ဣ။)] သေဋ္ဌိဇာတကံ စတုတ္ထံ။
၅။ တဏ္ဍုလနာဠိဇာတကံ
၅။
[ကိမဂ္ဃတီ တဏ္ဍုလနာဠိကာ စ၊ ဗာရာဏသီ အန္တရဗာဟိရာနိ။ အဿပဉ္စသတေ တာနိ၊ ဧကာ တဏ္ဍုလနာဠိကာတိ။ (သျာ။)] ကိမဂ္ဃတိ တဏ္ဍုလနာဠိကာယ၊ အဿာန မူလာယ ဝဒေဟိ ရာဇ [နာဠိကာ စ (သီ။)၊ နာဠိကာယ (က။ သီ။ အဋ္ဌ။)]။
ဗာရာဏသိံ သန္တရဗာဟိရတော [ဗာဟိရန္တံ (သီ။)]၊ အယမဂ္ဃတိ တဏ္ဍုလနာဠိကာတိ [ကိမဂ္ဃတီ ဝဏ္ဍုလနာဠိကာ စ၊ ဗာရာဏသီ အန္တရဗာဟိရာနိ။ အဿပဉ္စသတေ တာနိ၊ ဧကာ တဏ္ဍုလနာဠိကာတိ။ (သျာ။)]။
တဏ္ဍုလနာဠိဇာတကံ ပဉ္စမံ။
၆။ ဒေဝဓမ္မဇာတကံ
၆။
ဟိရိဩတ္တပ္ပသမ္ပန္နာ ၊ သုက္ကဓမ္မသမာဟိတာ။
သန္တော သပ္ပုရိသာ လောကေ၊ ဒေဝဓမ္မာတိ ဝုစ္စရေတိ။
ဒေဝဓမ္မဇာတကံ ဆဋ္ဌံ။
၇။ ကဋ္ဌဟာရိဇာတကံ
၇။
ပုတ္တော တျာဟံ မဟာရာဇ၊ တွံ မံ ပေါသ ဇနာဓိပ။
အညေပိ ဒေဝေါ ပေါသေတိ၊ ကိဉ္စ [ကိဉ္စိ (က။)] ဒေဝေါ သကံ ပဇန္တိ။
ကဋ္ဌဟာရိ [ကဋ္ဌဝါဟန (က။)] ဇာတကံ သတ္တမံ။
၈။ ဂါမဏိဇာတကံ
၈။
အပိ အတရမာနာနံ၊ ဖလာသာဝ သမိဇ္ဈတိ။
ဝိပက္ကဗြဟ္မစရိယောသ္မိ၊ ဧဝံ ဇာနာဟိ ဂါမဏီတိ။
ဂါမဏိဇာတကံ အဋ္ဌမံ။
၉။ မဃဒေဝဇာတကံ
၉။
ဥတ္တမင်္ဂရုဟာ မယှံ၊ ဣမေ ဇာတာ ဝယောဟရာ။
ပါတုဘူတာ ဒေဝဒူတာ၊ ပဗ္ဗဇ္ဇာသမယော မမာတိ။
မဃဒေဝ [မခါဒေဝ (သီ။ ဣ။), ဒေဝဒူတ (က။)] ဇာတကံ နဝမံ။
၁၀။ သုခဝိဟာရိဇာတကံ
၁၀။
ယဉ္စ အညေ န ရက္ခန္တိ၊ ယော စ အညေ န ရက္ခတိ။
သ ဝေ ရာဇ သုခံ သေတိ၊ ကာမေသု အနပေက္ခဝါတိ။
သုခဝိဟာရိဇာတကံ ဒသမံ။
အပဏ္ဏကဝဂ္ဂေါ ပဌမော။
တဿုဒ္ဒါနံ –
ဝရာပဏ္ဏက ဝဏ္ဏုပထ သေရိဝရော၊ သုဝိစက္ခဏ တဏ္ဍုလနာဠိကဿာ။
ဟိရိ ပုတ္တဝရုတ္တဂါမဏိနာ၊ ယော စ န ရက္ခတိ တေန ဒသာတိ။
၂။ သီလဝဂ္ဂေါ
၁၁။ လက္ခဏမိဂဇာတကံ
၁၁။
ဟောတိ သီလဝတံ အတ္ထော၊ ပဋိသန္ထာရ [ပဋိသန္ဓာရ (က။)] ဝုတ္တိနံ။
လက္ခဏံ ပဿ အာယန္တံ၊ ဉာတိသံဃပုရက္ခတံ [ပုရက္ခိတံ (သျာ။)၊ ပုရေက္ခိတံ (က။)]။
အထ ပဿသိမံ ကာဠံ၊ သုဝိဟီနံဝ ဉာတိဘီတိ။
လက္ခဏမိဂဇာတကံ ပဌမံ။
၁၂။ နိဂြောဓမိဂဇာတကံ
၁၂။
နိဂြောဓမေဝ သေဝေယျ၊ န သာခမုပသံဝသေ။
နိဂြောဓသ္မိံ မတံ သေယျော၊ ယဉ္စေ သာခသ္မိ [သာခသ္မိံ (သီ။ ဣ။)] ဇီဝိတန္တိ။
နိဂြောဓမိဂဇာတကံ ဒုတိယံ။
၁၃။ ကဏ္ဍိဇာတကံ
၁၃။
ဓိရတ္ထု ကဏ္ဍိနံ သလ္လံ၊ ပုရိသံ ဂါဠှဝေဓိနံ။
ဓိရတ္ထု တံ ဇနပဒံ၊ ယတ္ထိတ္ထီ ပရိဏာယိကာ။
တေ စာပိ ဓိက္ကိတာ [ဓိက္ကတာ (?)] သတ္တာ၊ ယေ ဣတ္ထီနံ ဝသံဂတာတိ။
ကဏ္ဍိဇာတကံ တတိယံ။
၁၄။ ဝါတမိဂဇာတကံ
၁၄။
န ကိရတ္ထိ ရသေဟိ ပါပိယော၊ အာဝါသေဟိ ဝ [ဝါ (သဗ္ဗတ္ထ)] သန္ထဝေဟိ ဝါ။
ဝါတမိဂံ ဂဟနနိဿိတံ [ဂေဟနိဿိတံ (သီ။ ဣ။)]၊ ဝသမာနေသိ ရသေဟိ သဉ္ဇယောတိ။
ဝါတမိဂဇာတကံ စတုတ္ထံ။
၁၅။ ခရာဒိယဇာတကံ
၁၅။
အဋ္ဌက္ခုရံ ခရာဒိယေ၊ မိဂံ ဝင်္ကာတိဝင်္ကိနံ။
သတ္တဟိ ကာလာတိက္ကန္တံ [သတ္တဟိ ကလာဟ’တိက္ကန္တံ (သီ။)၊ သတ္တကာလေဟ’တိက္ကန္တံ (သျာ။)၊ သတ္တဟိ ကာလာဟ’တိက္ကန္တံ (ဣ။)]၊ န နံ ဩဝဒိတုဿဟေတိ။
ခရာဒိယဇာတကံ ပဉ္စမံ။
၁၆။ တိပလ္လတ္ထမိဂဇာတကံ
၁၆။
မိဂံ တိပလ္လတ္ထ [တိပလ္လတ္တ (က။)] မနေကမာယံ၊ အဋ္ဌက္ခုရံ အဍ္ဎရတ္တာပပါယိံ [အဍ္ဎရတ္တာဝပါယိံ (သီ။ ဣ။)]။
ဧကေန သောတေန ဆမာဿသန္တော၊ ဆဟိ ကလာဟိတိဘောတိ [ကလာဟတိဘောတိ (သီ။ သျာ။ ဣ။)] ဘာဂိနေယျောတိ။
တိပလ္လတ္ထမိဂဇာတကံ ဆဋ္ဌံ။
၁၇။ မာလုတဇာတကံ
၁၇။
ကာဠေ ဝါ ယဒိ ဝါ ဇုဏှေ၊ ယဒါ ဝါယတိ မာလုတော။
ဝါတဇာနိ ဟိ သီတာနိ၊ ဥဘောတ္ထမပရာဇိတာတိ။
မာလုတဇာတကံ သတ္တမံ။
၁၈။ မတကဘတ္တဇာတကံ
၁၈။
ဧဝံ စေ သတ္တာ ဇာနေယျုံ၊ ဒုက္ခာယံ ဇာတိသမ္ဘဝေါ။
န ပါဏော ပါဏိနံ ဟညေ၊ ပါဏဃာတီ ဟိ သောစတီတိ။
မတကဘတ္တဇာတကံ အဋ္ဌမံ။
၁၉။ အာယာစိတဘတ္တဇာတကံ
၁၉။
သစေ မုစ္စေ [မုဉ္စေ (သီ။ သျာ။ ဣ။)] ပေစ္စ မုစ္စေ [မုဉ္စေ (သီ။ သျာ။ ဣ။)]၊ မုစ္စမာနော ဟိ ဗဇ္ဈတိ။
န ဟေဝံ ဓီရာ မုစ္စန္တိ၊ မုတ္တိ ဗာလဿ ဗန္ဓနန္တိ။
အာယာစိတဘတ္တဇာတကံ နဝမံ။
၂၀။ နဠပါနဇာတကံ
၂၀။
ဒိသွာ ပဒမနုတ္တိဏ္ဏံ၊ ဒိသွာနောတရိတံ ပဒံ။
နဠေန ဝါရိံ ပိဿာမ [ပိဝိဿာမ (သီ။ သျာ။ ဣ။)]၊ နေဝ [န စ (က။)] မံ တွံ ဝဓိဿသီတိ။
နဠပါနဇာတကံ ဒသမံ။
သီလဝဂ္ဂေါ ဒုတိယော။
တဿုဒ္ဒါနံ –
အထ လက္ခဏ သာခ ဓိရတ္ထု ပုန၊ န ကိရတ္ထိ ရသေဟိ ခရာဒိယာ။
အတိဘောတိ ဝရ [ရသ (သဗ္ဗတ္ထ)] မာလုတ ပါဏ၊ မုစ္စေန နဠအဝှယနေန ဘဝန္တိ ဒသာတိ။
၃။ ကုရုင်္ဂဝဂ္ဂေါ
၂၁။ ကုရုင်္ဂမိဂဇာတကံ
၂၁။
ဉာတမေတံ ကုရုင်္ဂဿ၊ ယံ တွံ သေပဏ္ဏိ သိယျသိ [သေယျသိ (သီ။ သျာ။ ဣ။)]။
အညံ သေပဏ္ဏိ ဂစ္ဆာမိ၊ န မေ တေ ရုစ္စတေ ဖလန္တိ။
ကုရုင်္ဂမိဂဇာတကံ ပဌမံ။
၂၂။ ကုက္ကုရဇာတကံ
၂၂။
ယေ ကုက္ကုရာ ရာဇကုလမှိ ဝဒ္ဓါ၊ ကောလေယျကာ ဝဏ္ဏဗလူပပန္နာ။
တေမေ န ဝဇ္ဈာ မယမသ္မ ဝဇ္ဈာ၊ နာယံ သဃစ္စာ ဒုဗ္ဗလဃာတိကာယန္တိ။
ကုက္ကုရဇာတကံ ဒုတိယံ။
၂၃။ ဂေါဇာနီယဇာတကံ
၂၃။
အပိ ပဿေန သေမာနော၊ သလ္လေဘိ သလ္လလီကတော။
သေယျောဝ ဝဠဝါ ဂေါဇော [ဘောဇ္ဇော (သီ။)၊ ဘောဇ္ဈော (သျာ။ ဣ။)]၊ ယုဉ္ဇ မညေဝ သာရထီတိ။
ဂေါဇာနီယ [ဘောဇာဇာနီယ (သီ။ သျာ။ ဣ။)] ဇာတကံ တတိယံ။
၂၄။ အာဇညဇာတကံ
၂၄။
ယဒါ ယဒါ ယတ္ထ ယဒါ၊ ယတ္ထ ယတ္ထ ယဒါ ယဒါ။
အာဇညော ကုရုတေ ဝေဂံ၊ ဟာယန္တိ တတ္ထ ဝါဠဝါတိ။
အာဇညဇာတကံ စတုတ္ထံ။
၂၅။ တိတ္ထဇာတကံ
၂၅။
အညမညေဟိ တိတ္ထေဟိ၊ အဿံ ပါယေဟိ သာရထိ။
အစ္စာသနဿ ပုရိသော၊ ပါယာသဿပိ တပ္ပတီတိ။
တိတ္ထဇာတကံ ပဉ္စမံ။
၂၆။ မဟိဠာမုခဇာတကံ
၂၆။
ပုရာဏစောရာန ဝစော နိသမ္မ၊ မဟိဠာမုခေါ ပေါထယမနွစာရီ။
သုသညတာနဉှိ ဝစော နိသမ္မ၊ ဂဇုတ္တမော သဗ္ဗဂုဏေသု အဋ္ဌာတိ။
မဟိဠာမုခဇာတကံ ဆဋ္ဌံ။
၂၇။ အဘိဏှဇာတကံ
၂၇။
နာလံ ကဗဠံ ပဒါတဝေ၊ န စ ပိဏ္ဍံ န ကုသေ န ဃံသိတုံ။
မညာမိ အဘိဏှဒဿနာ၊ နာဂေါ သ္နေဟမကာသိ [သိနေဟမကာသိ (သီ။ သျာ။ ဣ။)] ကုက္ကုရေတိ။
အဘိဏှဇာတကံ သတ္တမံ။
၂၈။ နန္ဒိဝိသာလဇာတကံ
၂၈။
မနုညမေဝ ဘာသေယျ၊ နာမနုညံ ကုဒါစနံ။
မနုညံ ဘာသမာနဿ၊ ဂရုံ ဘာရံ ဥဒဒ္ဓရိ။
ဓနဉ္စ နံ အလာဘေသိ၊ တေန စတ္တမနော အဟူတိ။
နန္ဒိဝိသာလဇာတကံ အဋ္ဌမံ။
၂၉။ ကဏှဇာတကံ
၂၉။
ယတော ယတော ဂရု ဓုရံ၊ ယတော ဂမ္ဘီရဝတ္တနီ။
တဒါဿု ကဏှံ ယုဉ္ဇန္တိ၊ သွာဿု တံ ဝဟတေ ဓုရန္တိ။
ကဏှဇာတကံ နဝမံ။
၃၀။ မုနိကဇာတကံ
၃၀။
မာ မုနိကဿ ပိဟယိ၊ အာတုရန္နာနိ ဘုဉ္ဇတိ။
အပ္ပောဿုက္ကော ဘုသံ ခါဒ၊ ဧတံ ဒီဃာယုလက္ခဏန္တိ။
မုနိကဇာတကံ ဒသမံ။
ကုရုင်္ဂဝဂ္ဂေါ တတိယော။
တဿုဒ္ဒါနံ –
ကုရုင်္ဂဿ ကုက္ကုရဂေါဇဝရော၊ ပုန ဝါဠဝဿသိရိဝှယနော [သိရိဝယနော (သဗ္ဗတ္ထ)]။
မဟိဠာမုခနာမနုညဝရော၊ ဝဟတေ ဓုရ မုနိကေန ဒသာတိ။
၄။ ကုလာဝကဝဂ္ဂေါ
၃၁။ ကုလာဝကဇာတကံ
၃၁။
ကုလာဝကာ မာတလိ သိမ္ဗလိသ္မိံ၊ ဤသာမုခေန ပရိဝဇ္ဇယဿု။
ကာမံ စဇာမ အသုရေသု ပါဏံ၊ မာ မေ ဒိဇာ ဝိက္ကုလဝါ [မာယိမေ ဒိဇာ ဝိကုလာဝါ (သီ။ သျာ။ ဣ။)] အဟေသုန္တိ။
ကုလာဝကဇာတကံ ပဌမံ။
၃၂။ နစ္စဇာတကံ
၃၂။
ရုဒံ မနုညံ ရုစိရာ စ ပိဋ္ဌိ၊ ဝေဠုရိယဝဏ္ဏူပနိဘာ [ဝဏ္ဏူပဋိဘာ (သျာ။)၊ ဝဏ္ဏသန္နိဘာ (က။)] စ ဂီဝါ။
ဗျာမမတ္တာနိ စ ပေခုဏာနိ၊ နစ္စေန တေ ဓီတရံ နော ဒဒါမီတိ။
နစ္စဇာတကံ ဒုတိယံ။
၃၃။ သမ္မောဒမာနဇာတကံ
၃၃။
သမ္မောဒမာနာ ဂစ္ဆန္တိ၊ ဇာလမာဒါယ ပက္ခိနော။
ယဒါ တေ ဝိဝဒိဿန္တိ၊ တဒါ ဧဟိန္တိ မေ ဝသန္တိ။
သမ္မောဒမာနဇာတကံ တတိယံ။
၃၄။ မစ္ဆဇာတကံ
၃၄။
န မံ သီတံ န မံ ဥဏှံ၊ န မံ ဇာလသ္မိ ဗာဓနံ။
ယဉ္စ မံ မညတေ မစ္ဆီ၊ အညံ သော ရတိယာ ဂတောတိ။
မစ္ဆဇာတကံ စတုတ္ထံ။
၃၅။ ဝဋ္ဋကဇာတကံ
၃၅။
သန္တိ ပက္ခာ အပတနာ၊ သန္တိ ပါဒါ အဝဉ္စနာ။
မာတာပိတာ စ နိက္ခန္တာ၊ ဇာတဝေဒ ပဋိက္ကမာတိ။
ဝဋ္ဋကဇာတကံ ပဉ္စမံ။
၃၆။ သကုဏဇာတကံ
၃၆။
ယံ နိဿိတာ ဇဂတိရုဟံ ဝိဟင်္ဂမာ၊ သွာယံ အဂ္ဂိံ ပမုဉ္စတိ။
ဒိသာ ဘဇထ ဝက္ကင်္ဂါ [ဝင်္ကင်္ဂါ (သျာ။)]၊ ဇာတံ သရဏတော ဘယန္တိ။
သကုဏဇာတကံ ဆဋ္ဌံ။
၃၇။ တိတ္တိရဇာတကံ
၃၇။
ယေ ဝုဍ္ဎ [ဝဒ္ဓ (သီ။ ဣ။)] မပစာယန္တိ၊ နရာ ဓမ္မဿ ကောဝိဒါ။
ဒိဋ္ဌေဝ ဓမ္မေ ပါသံသာ၊ သမ္ပရာယေ စ သုဂ္ဂတီတိ။
တိတ္တိရဇာတကံ သတ္တမံ။
၃၈။ ဗကဇာတကံ
၃၈။
နာစ္စန္တံ နိကတိပ္ပညော၊ နိကတျာ သုခမေဓတိ။
အာရာဓေတိ နိကတိပ္ပညော [အာရာဓေ နိကတိပ္ပညော (ဣ။)]၊ ဗကော ကက္ကဋကာမိဝါတိ။
ဗကဇာတကံ အဋ္ဌမံ။
၃၉။ နန္ဒဇာတကံ
၃၉။
မညေ သောဝဏ္ဏယော ရာသိ၊ သောဏ္ဏမာလာ စ နန္ဒကော။
ယတ္ထ ဒါသော အာမဇာတော၊ ဌိတော ထုလ္လာနိ [ထူလာနိ (က။)] ဂဇ္ဇတီတိ။
နန္ဒဇာတကံ နဝမံ။
၄၀။ ခဒိရင်္ဂါရဇာတကံ
၄၀။
ကာမံ ပတာမိ နိရယံ၊ ဥဒ္ဓံပါဒေါ အဝံသိရော။
နာနရိယံ ကရိဿာမိ၊ ဟန္ဒ ပိဏ္ဍံ ပဋိဂ္ဂဟာတိ။
ခဒိရင်္ဂါရဇာတကံ ဒသမံ။
ကုလာဝကဝဂ္ဂေါ စတုတ္ထော။
တဿုဒ္ဒါနံ –
သိရိမာတလိ ဓီတရ ပက္ခိဝရော၊ ရတိယာဂတော မာတာပိတာ စ ပုန။
ဇဂတီရုဟ ဝုဍ္ဎ သုကက္ကဋကော၊ တထာ နန္ဒကပိဏ္ဍဝရေန ဒသာတိ။
၅။ အတ္ထကာမဝဂ္ဂေါ
၄၁။ လောသကဇာတကံ
၄၁။
ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ။
အဇိယာ ပါဒမောလမ္ဗ [ပါဒမောလုမ္ဗ (သီ။ သျာ။ ဣ။)]၊ မိတ္တကော ဝိယ သောစတီတိ။
လောသကဇာတကံ ပဌမံ။
၄၂။ ကပေါတဇာတကံ
၄၂။
ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ။
ကပေါတကဿ ဝစနံ အကတွာ၊ အမိတ္တဟတ္ထတ္ထဂတောဝ သေတီတိ။
ကပေါတဇာတကံ ဒုတိယံ။
၄၃။ ဝေဠုကဇာတကံ
၄၃။
ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ။
ဧဝံ သော နိဟတော သေတိ၊ ဝေဠုကဿ ယထာ ပိတာတိ။
ဝေဠုကဇာတကံ တတိယံ။
၄၄။ မကသဇာတကံ
၄၄။
သေယျော အမိတ္တော မတိယာ ဥပေတော၊ န တွေဝ မိတ္တော မတိဝိပ္ပဟီနော။
မကသံ ဝဓိဿန္တိ ဟိ ဧဠမူဂေါ၊ ပုတ္တော ပိတု အဗ္ဘိဒါ ဥတ္တမင်္ဂန္တိ။
မကသဇာတကံ စတုတ္ထံ။
၄၅။ ရောဟိဏိဇာတကံ
၄၅။
သေယျော အမိတ္တော မေဓါဝီ၊ ယဉ္စေ ဗာလာနုကမ္ပကော။
ပဿ ရောဟိဏိကံ ဇမ္မိံ၊ မာတရံ ဟန္တွာန သောစတီတိ။
ရောဟိဏိဇာတကံ ပဉ္စမံ။
၄၆။ အာရာမဒူသကဇာတကံ
၄၆။
န ဝေ အနတ္ထကုသလေန၊ အတ္ထစရိယာ သုခါဝဟာ။
ဟာပေတိ အတ္ထံ ဒုမ္မေဓေါ၊ ကပိ အာရာမိကော ယထာတိ။
အာရာမဒူသကဇာတကံ ဆဋ္ဌံ။
၄၇။ ဝါရုဏိဒူသကဇာတကံ
၄၇။
န ဝေ အနတ္ထကုသလေန၊ အတ္ထစရိယာ သုခါဝဟာ။
ဟာပေတိ အတ္ထံ ဒုမ္မေဓေါ၊ ကောဏ္ဍညော ဝါရုဏိံ ယထာတိ။
ဝါရုဏိဒူသကဇာတကံ သတ္တမံ။
၄၈။ ဝေဒဗ္ဗဇာတကံ
၄၈။
အနုပါယေန ယော အတ္ထံ၊ ဣစ္ဆတိ သော ဝိဟညတိ။
စေတာ ဟနိံသု ဝေဒဗ္ဗံ [ဝေဒဗ္ဘံ (သီ။ ဣ။)]၊ သဗ္ဗေ တေ ဗျသနမဇ္ဈဂူတိ။
ဝေဒဗ္ဗ [ဝေဒဗ္ဘ (သီ။ ဣ။)] ဇာတကံ အဋ္ဌမံ။
၄၉။ နက္ခတ္တဇာတကံ
၄၉။
နက္ခတ္တံ ပဋိမာနေန္တံ၊ အတ္ထော ဗာလံ ဥပစ္စဂါ။
အတ္ထော အတ္ထဿ နက္ခတ္တံ၊ ကိံ ကရိဿန္တိ တာရကာတိ။
နက္ခတ္တဇာတကံ နဝမံ။
၅၀။ ဒုမ္မေဓဇာတကံ
၅၀။
ဒုမ္မေဓါနံ သဟဿေန၊ ယညော မေ ဥပယာစိတော။
ဣဒါနိ ခေါဟံ ယဇိဿာမိ၊ ဗဟု [ဗဟူ (သီ။ ဣ။)၊ ဗဟုံ (က။)] အဓမ္မိကော ဇနောတိ။
ဒုမ္မေဓဇာတကံ ဒသမံ။
အတ္ထကာမဝဂ္ဂေါ ပဉ္စမော။
တဿုဒ္ဒါနံ –
အထ မိတ္တက မာတု ကပေါတဝရော၊ တထာ ဝေဠူက ဧဠမူဂေါ ရောဟိဏီ။
ကပိ ဝါရုဏိ စေတစရာ စ ပုန၊ တထာ တာရက ယညဝရေန ဒသာတိ။
ပဌမော ပဏ္ဏာသကော။
၆။ အာသီသဝဂ္ဂေါ
၅၁။မဟာသီလဝဇာတကံ
၅၁။
အာသီသေထေဝ [အာသိံသေထေဝ (သီ။ သျာ။ ဣ။)] ပုရိသော၊ န နိဗ္ဗိန္ဒေယျ ပဏ္ဍိတော။
ပဿာမိ ဝေါဟံ အတ္တာနံ၊ ယထာ ဣစ္ဆိံ တထာ အဟူတိ။
မဟာသီလဝဇာတကံ ပဌမံ။
၅၂။ စူဠဇနကဇာတကံ
၅၂။
ဝါယမေထေဝ ပုရိသော၊ န နိဗ္ဗိန္ဒေယျ ပဏ္ဍိတော။
ပဿာမိ ဝေါဟံ အတ္တာနံ၊ ဥဒကာ ထလမုဗ္ဘတန္တိ။
စူဠဇနကဇာတကံ ဒုတိယံ။
၅၃။ ပုဏ္ဏပါတိဇာတကံ
၅၃။
တထေဝ ပုဏ္ဏာ ပါတိယော၊ အညာယံ ဝတ္တတေ ကထာ။
အာကာရဏေန [အာကာရကေန (သီ။ သျာ။ ဣ။)] ဇာနာမိ၊ န စာယံ ဘဒ္ဒိကာ သုရာတိ။
ပုဏ္ဏပါတိဇာတကံ တတိယံ။
၅၄။ ကိံဖလဇာတကံ
၅၄။
နာယံ ရုက္ခော ဒုရာရုဟော၊ နပိ ဂါမတော အာရကာ။
အာကာရဏေန ဇာနာမိ၊ နာယံ သာဒုဖလော ဒုမောတိ။
ကိံဖလဇာတကံ စတုတ္ထံ။
၅၅။ ပဉ္စာဝုဓဇာတကံ
၅၅။
ယော အလီနေန စိတ္တေန၊ အလီနမနသော နရော။
ဘာဝေတိ ကုသလံ ဓမ္မံ၊ ယောဂက္ခေမဿ ပတ္တိယာ။
ပါပုဏေ အနုပုဗ္ဗေန၊ သဗ္ဗသံယောဇနက္ခယန္တိ။
ပဉ္စာဝုဓဇာတကံ ပဉ္စမံ။
၅၆။ ကဉ္စနက္ခန္ဓဇာတကံ
၅၆။
ယော ပဟဋ္ဌေန စိတ္တေန၊ ပဟဋ္ဌမနသော နရော။
ဘာဝေတိ ကုသလံ ဓမ္မံ၊ ယောဂက္ခေမဿ ပတ္တိယာ။
ပါပုဏေ အနုပုဗ္ဗေန၊ သဗ္ဗသံယောဇနက္ခယန္တိ။
ကဉ္စနက္ခန္ဓဇာတကံ ဆဋ္ဌံ။
၅၇။ ဝါနရိန္ဒဇာတကံ
၅၇။
ယဿေတေ စတုရော ဓမ္မာ၊ ဝါနရိန္ဒ ယထာ တဝ။
သစ္စံ ဓမ္မော ဓိတိ [ဓိတီ (သီ။ ဣ။)] စာဂေါ၊ ဒိဋ္ဌံ သော အတိဝတ္တတီတိ။
ဝါနရိန္ဒဇာတကံ သတ္တမံ။
၅၈။ တယောဓမ္မဇာတကံ
၅၈။
ယဿေတေ စ [ယဿ ဧတေ (သီ။ ဣ။)] တယော ဓမ္မာ၊ ဝါနရိန္ဒ ယထာ တဝ။
ဒက္ခိယံ သူရိယံ ပညာ၊ ဒိဋ္ဌံ သော အတိဝတ္တတီတိ။
တယောဓမ္မဇာတကံ အဋ္ဌမံ။
၅၉။ ဘေရိဝါဒကဇာတကံ
၅၉။
ဓမေ ဓမေ နာတိဓမေ၊ အတိဓန္တဉှိ ပါပကံ။
ဓန္တေန ဟိ သတံ လဒ္ဓံ၊ အတိဓန္တေန နာသိတန္တိ။
ဘေရိဝါဒကဇာတကံ နဝမံ။
၆၀။ သင်္ခဓမဇာတကံ
၆၀။
ဓမေ ဓမေ နာတိဓမေ၊ အတိဓန္တဉှိ ပါပကံ။
ဓန္တေနာဓိဂတာ ဘောဂါ၊ တေ တာတော ဝိဓမီ ဓမန္တိ။
သင်္ခဓမဇာတကံ ဒသမံ။
အာသီသဝဂ္ဂေါ ဆဋ္ဌော။
တဿုဒ္ဒါနံ –
ယထာ ဣစ္ဆိံ တထာဟုဒကာ ထလာ၊ သုရ သာဒုဖလော စ အလီနမနော။
သမ္ပဟဋ္ဌမနော စတုရော စ တယော၊ သတလဒ္ဓက ဘောဂဓနေန ဒသာတိ။
၇။ ဣတ္ထိဝဂ္ဂေါ
၆၁။ အသာတမန္တဇာတကံ
၆၁။
အသာ လောကိတ္ထိယော နာမ၊ ဝေလာ တာသံ န ဝိဇ္ဇတိ။
သာရတ္တာ စ ပဂဗ္ဘာ စ၊ သိခီ သဗ္ဗဃသော ယထာ။
တာ ဟိတွာ ပဗ္ဗဇိဿာမိ၊ ဝိဝေကမနုဗြူဟယန္တိ။
အသာတမန္တဇာတကံ ပဌမံ။
၆၂။ အဏ္ဍဘူတဇာတကံ
၆၂။
ယံ ဗြာဟ္မဏော အဝါဒေသိ၊ ဝီဏံ သမုခဝေဌိတော။
အဏ္ဍဘူတာ ဘတာ ဘရိယာ၊ တာသု ကော ဇာတု ဝိဿသေတိ။
အဏ္ဍဘူတဇာတကံ ဒုတိယံ။
၆၃။ တက္ကပဏ္ဍိတဇာတကံ
၆၃။
ကောဓနာ အကတညူ စ၊ ပိသုဏာ မိတ္တဘေဒိကာ [ပိသုဏာ စ ဝိဘေဒိကာ (သီ။ သျာ။ ဣ။)]။
ဗြဟ္မစရိယံ စရ ဘိက္ခု၊ သော သုခံ န ဝိဟာဟသီတိ [ပိဟာဟိသီတိ (သီ။ သျာ။ ဣ။)၊ ဝိဟာယသိ (က။)]။
တက္ကပဏ္ဍိတဇာတကံ [တက္ကဇာတကံ (သီ။ သျာ။ ဣ။ အဋ္ဌ။)] တတိယံ။
၆၄။ ဒုရာဇာနဇာတကံ
၆၄။
မာ သု နန္ဒိ ဣစ္ဆတိ မံ၊ မာ သု သောစိ န မိစ္ဆတိ [န ဣစ္ဆတိ (သီ။ သျာ။ ဣ။)]။
ထီနံ ဘာဝေါ ဒုရာဇာနော၊ မစ္ဆဿေဝေါဒကေ ဂတန္တိ။
ဒုရာဇာနဇာတကံ စတုတ္ထံ။
၆၅။ အနဘိရတိဇာတကံ
၆၅။
ယထာ နဒီ စ ပန္ထော စ၊ ပါနာဂါရံ သဘာ ပပါ။
ဧဝံ လောကိတ္ထိယော နာမ၊ နာသံ ကုဇ္ဈန္တိ ပဏ္ဍိတာတိ။
အနဘိရတိဇာတကံ ပဉ္စမံ။
၆၆။ မုဒုလက္ခဏဇာတကံ
၆၆။
ဧကာ ဣစ္ဆာ ပုရေ အာသိ၊ အလဒ္ဓါ မုဒုလက္ခဏံ။
ယတော လဒ္ဓါ အဠာရက္ခီ၊ ဣစ္ဆာ ဣစ္ဆံ ဝိဇာယထာတိ။
မုဒုလက္ခဏဇာတကံ ဆဋ္ဌံ။
၆၇။ ဥစ္ဆင်္ဂဇာတကံ
၆၇။
ဥစ္ဆင်္ဂေ ဒေဝ မေ ပုတ္တော၊ ပထေ ဓါဝန္တိယာ ပတိ။
တဉ္စ ဒေသံ န ပဿာမိ၊ ယတော သောဒရိယမာနယေတိ [သောဒရိယံ နယေ (က။)]။
ဥစ္ဆင်္ဂဇာတကံ သတ္တမံ။
၆၈။ သာကေတဇာတကံ
၆၈။
ယသ္မိံ မနော နိဝိသတိ၊ စိတ္တဉ္စာပိ [စိတ္တံ ဝါပိ (ကတ္ထစိ)] ပသီဒတိ။
အဒိဋ္ဌပုဗ္ဗကေ ပေါသေ၊ ကာမံ တသ္မိမ္ပိ ဝိဿသေတိ။
သာကေတဇာတကံ အဋ္ဌမံ။
၆၉။ ဝိသဝန္တဇာတကံ
၆၉။
ဓိရတ္ထု တံ ဝိသံ ဝန္တံ၊ ယမဟံ ဇီဝိတကာရဏာ။
ဝန္တံ ပစ္စာဝမိဿာမိ [ပစ္စာဟရိဿာမိ (က။)]၊ မတံ မေ ဇီဝိတာ ဝရန္တိ။
ဝိသဝန္တဇာတကံ နဝမံ။
၇၀။ ကုဒ္ဒါလဇာတကံ
၇၀။
န တံ ဇိတံ သာဓု ဇိတံ၊ ယံ ဇိတံ အဝဇီယတိ။
တံ ခေါ ဇိတံ သာဓု ဇိတံ၊ ယံ ဇိတံ နာဝဇီယတီတိ။
ကုဒ္ဒါလဇာတကံ ဒသမံ။
ဣတ္ထိဝဂ္ဂေါ သတ္တမော။
တဿုဒ္ဒါနံ –
သိခီသဗ္ဗဃသောပိ စ ဝီဏဝရော၊ ပိသုဏာ မိတ္တဘေဒိကာ နန္ဒီ နဒီ။
မုဒုလက္ခဏ သောဒရိယာ စ မနော၊ ဝိသ သာဓုဇိတေန ဘဝန္တိ ဒသာတိ။
၈။ ဝရုဏဝဂ္ဂေါ
၇၁။ ဝရုဏဇာတကံ
၇၁။
ယော ပုဗ္ဗေ ကရဏီယာနိ၊ ပစ္ဆာ သော ကာတုမိစ္ဆတိ။
ဝရုဏကဋ္ဌ [ဝရဏကဋ္ဌ (သီ။ ဣ။)] ဘဉ္ဇောဝ၊ သ ပစ္ဆာ မနုတပ္ပတီတိ။
ဝရုဏဇာတကံ ပဌမံ။
၇၂။ သီလဝဟတ္ထိဇာတကံ
၇၂။
အကတညုဿ ပေါသဿ၊ နိစ္စံ ဝိဝရဒဿိနော။
သဗ္ဗံ စေ ပထဝိံ [ပဌဝိံ (သီ။ သျာ။ ဣ။)] ဒဇ္ဇာ၊ နေဝ နံ အဘိရာဓယေတိ။
သီလဝဟတ္ထိဇာတကံ ဒုတိယံ။
၇၃။ သစ္စံကိရဇာတကံ
၇၃။
သစ္စံ ကိရေဝမာဟံသု၊ နရာ ဧကစ္စိယာ ဣဓ။
ကဋ္ဌံ နိပ္လဝိတံ [ဝိပ္လာဝိတံ (သီ။ ဣ။)] သေယျော၊ န တွေဝေကစ္စိယော နရောတိ။
သစ္စံကိရဇာတကံ တတိယံ။
၇၄။ ရုက္ခဓမ္မဇာတကံ
၇၄။
သာဓူ သမ္ဗဟုလာ ဉာတီ၊ အပိ ရုက္ခာ အရညဇာ။
ဝါတော ဝဟတိ ဧကဋ္ဌံ၊ ဗြဟန္တမ္ပိ ဝနပ္ပတိန္တိ။
ရုက္ခဓမ္မဇာတကံ စတုတ္ထံ။
၇၅။ မစ္ဆဇာတကံ
၇၅။
အဘိတ္ထနယ ပဇ္ဇုန္န၊ နိဓိံ ကာကဿ နာသယ။
ကာကံ သောကာယ ရန္ဓေဟိ၊ မဉ္စ သောကာ ပမောစယာတိ။
မစ္ဆဇာတကံ ပဉ္စမံ။
၇၆။ အသင်္ကိယဇာတကံ
၇၆။
အသင်္ကိယောမှိ ဂါမမှိ၊ အရညေ နတ္ထိ မေ ဘယံ။
ဥဇုံ မဂ္ဂံ သမာရူဠ္ဟော၊ မေတ္တာယ ကရုဏာယ စာတိ။
အသင်္ကိယဇာတကံ ဆဋ္ဌံ။
၇၇။ မဟာသုပိနဇာတကံ
၇၇။
ဥသဘာ ရုက္ခာ ဂါဝိယော ဂဝါ စ၊ အဿော ကံသော သိင်္ဂါလီ [သိဂါသီ (သီ။ သျာ။ ဣ။)] စ ကုမ္ဘော။
ပေါက္ခရဏီ စ အပါကစန္ဒနံ၊ လာဗူနိ သီဒန္တိ သိလာ ပ္လဝန္တိ။
မဏ္ဍူကိယော ကဏှသပ္ပေ ဂိလန္တိ၊ ကာကံ သုပဏ္ဏာ ပရိဝါရယန္တိ။
တသာ ဝကာ ဧဠကာနံ ဘယာဟိ၊ ဝိပရိယာသော [ဝိပရိယာယော (သျာ။ က။)] ဝတ္တတိ နယိဓ မတ္ထီတိ။
မဟာသုပိနဇာတကံ သတ္တမံ။
၇၈။ ဣလ္လိသဇာတကံ
၇၈။
ဥဘော ခဉ္ဇာ ဥဘော ကုဏီ၊ ဥဘော ဝိသမစက္ခုကာ [စက္ခုလာ (သီ။ ဣ။)]။
ဥဘိန္နံ ပိဠကာ [ဣဠကာ (သျာ။)] ဇာတာ၊ နာဟံ ပဿာမိ ဣလ္လိသန္တိ။
ဣလ္လိသဇာတကံ အဋ္ဌမံ။
၇၉။ ခရဿရဇာတကံ
၇၉။
ယတော ဝိလုတ္တာ စ ဟတာ စ ဂါဝေါ၊ ဒဍ္ဎာနိ ဂေဟာနိ ဇနော စ နီတော။
အထာဂမာ ပုတ္တဟတာယ ပုတ္တော၊ ခရဿရံ ဍိဏ္ဍိမံ [ဒေဏ္ဍိမံ (သီ။ သျာ။ ဣ။)၊ ဍိန္ဒိမံ (က။)] ဝါဒယန္တောတိ။
ခရဿရဇာတကံ နဝမံ။
၈၀။ ဘီမသေနဇာတကံ
၈၀။
ယံ တေ ပဝိကတ္ထိတံ ပုရေ၊ အထ တေ ပူတိသရာ သဇန္တိ ပစ္ဆာ။
ဥဘယံ န သမေတိ ဘီမသေန၊ ယုဒ္ဓကထာ စ ဣဒဉ္စ တေ ဝိဟညန္တိ။
ဘီမသေနဇာတကံ ဒသမံ။
ဝရုဏဝဂ္ဂေါ [ဝရဏဝဂ္ဂေါ (သီ။ ဣ။)] အဋ္ဌမော။
တဿုဒ္ဒါနံ –
ဝရုဏာ အကတညူဝရေ တု သစ္စဝရံ၊ သဝနပ္ပတိနာ စ အဘိတ္ထနယ။
ကရုဏာယ သိလာပ္လဝ ဣလ္လိသတော၊ ပုန ဍိဏ္ဍိမပူတိသရေန ဒသာတိ။
၉။ အပါယိမှဝဂ္ဂေါ
၈၁။ သုရာပါနဇာတကံ
၈၁။
အပါယိမှ အနစ္စိမှ၊ အဂါယိမှ ရုဒိမှ စ။
ဝိသညိကရဏိံ ပိတွာ [ဣတွာ (သီ။ သျာ။ ဣ။)]၊ ဒိဋ္ဌာ နာဟုမှ ဝါနရာတိ။
သုရာပါနဇာတကံ ပဌမံ။
၈၂။ မိတ္တဝိန္ဒကဇာတကံ
၈၂။
အတိက္ကမ္မ ရမဏကံ၊ သဒါမတ္တဉ္စ ဒူဘကံ။
သွာသိ ပါသာဏမာသီနော၊ ယသ္မာ ဇီဝံ န မောက္ခသီတိ။
မိတ္တဝိန္ဒကဇာတကံ ဒုတိယံ။
၈၃။ ကာလကဏ္ဏိဇာတကံ
၈၃။
မိတ္တော ဟဝေ သတ္တပဒေန ဟောတိ၊ သဟာယော ပန ဒွါဒသကေန ဟောတိ။
မာသဍ္ဎမာသေန စ ဉာတိ ဟောတိ၊ တတုတ္တရိံ အတ္တသမောပိ ဟောတိ။
သောဟံ ကထံ အတ္တသုခဿ ဟေတု၊ စိရသန္ထုတံ [စိရသန္ဓဝံ (က။)၊ စိရသတ္ထုနံ (ဣ။)] ကာဠကဏ္ဏိံ ဇဟေယျန္တိ။
ကာလကဏ္ဏိဇာတကံ တတိယံ။
၈၄။ အတ္ထဿဒွါရဇာတကံ
၈၄။
အာရောဂ္ယမိစ္ဆေ ပရမဉ္စ လာဘံ၊ သီလဉ္စ ဝုဒ္ဓါနုမတံ သုတဉ္စ။
ဓမ္မာနုဝတ္တီ စ အလီနတာ စ၊ အတ္ထဿ ဒွါရာ ပမုခါ ဆဠေတေတိ။
အတ္ထဿဒွါရဇာတကံ စတုတ္ထံ။
၈၅။ ကိံပက္ကဇာတကံ
၈၅။
အာယတိံ ဒေါသံ နာညာယ၊ ယော ကာမေ ပဋိသေဝတိ။
ဝိပါကန္တေ ဟနန္တိ နံ၊ ကိံပက္ကမိဝ ဘက္ခိတန္တိ။
ကိံပက္ကဇာတကံ ပဉ္စမံ။
၈၆။ သီလဝီမံသကဇာတကံ
၈၆။
သီလံ ကိရေဝ ကလျာဏံ၊ သီလံ လောကေ အနုတ္တရံ။
ပဿ ဃောရဝိသော နာဂေါ၊ သီလဝါတိ န ဟညတီတိ။
သီလဝီမံသကဇာတကံ ဆဋ္ဌံ။
၈၇။ မင်္ဂလဇာတကံ
၈၇။
ယဿ မင်္ဂလာ သမူဟတာသေ [သမူဟတာ (သီ။ သျာ။ ဣ။ သု။ နိ။ ၃၆၂]၊ ဥပ္ပါတာ [ဥပ္ပါဒါ (ဣ။)] သုပိနာ စ လက္ခဏာ စ။
သော [သ (သီ။ ဣ။ က။)] မင်္ဂလဒေါသဝီတိဝတ္တော၊ ယုဂယောဂါဓိဂတော န ဇာတုမေတီတိ။
မင်္ဂလဇာတကံ သတ္တမံ။
၈၈။ သာရမ္ဘဇာတကံ
၈၈။
ကလျာဏိမေဝ မုဉ္စေယျ၊ န ဟိ မုဉ္စေယျ ပါပိကံ။
မောက္ခော ကလျာဏိယာ သာဓု၊ မုတွာ တပ္ပတိ ပါပိကန္တိ။
သာရမ္ဘဇာတကံ အဋ္ဌမံ။
၈၉။ ကုဟကဇာတကံ
၈၉။
ဝါစာဝ ကိရ တေ အာသိ၊ သဏှာ သခိလဘာဏိနော။
တိဏမတ္တေ အသဇ္ဇိတ္ထော၊ နော စ နိက္ခသတံ ဟရန္တိ။
ကုဟကဇာတကံ နဝမံ။
၉၀။ အကတညုဇာတကံ
၉၀။
ယော ပုဗ္ဗေ ကတကလျာဏော၊ ကတတ္ထော နာဝဗုဇ္ဈတိ။
ပစ္ဆာ ကိစ္စေ သမုပ္ပန္နေ၊ ကတ္တာရံ နာဓိဂစ္ဆတီတိ။
အကတညုဇာတကံ ဒသမံ။
အပါယိမှဝဂ္ဂေါ နဝမော။
တဿုဒ္ဒါနံ –
အပါယိမှ စ ဒူဘကံ သတ္တပဒံ၊ ဆဠဒွရ စ အာယတိနာ စ ပုန။
အဟိသီလဝ မင်္ဂလိ ပါပိကဿာ၊ သတံနိက္ခ ကတတ္ထဝရေန ဒသာတိ။
၁၀။ လိတ္တဝဂ္ဂေါ
၉၁။ လိတ္တဇာတကံ
၉၁။
လိတ္တံ ပရမေန တေဇသာ၊ ဂိလမက္ခံ ပုရိသော န ဗုဇ္ဈတိ။
ဂိလ ရေ ဂိလ ပါပဓုတ္တက၊ ပစ္ဆာ တေ ကဋုကံ ဘဝိဿတီတိ။
လိတ္တဇာတကံ ပဌမံ။
၉၂။ မဟာသာရဇာတကံ
၉၂။
ဥက္ကဋ္ဌေ သူရမိစ္ဆန္တိ၊ မန္တီသု အကုတူဟလံ။
ပိယဉ္စ အန္နပါနမှိ၊ အတ္ထေ ဇာတေ စ ပဏ္ဍိတန္တိ။
မဟာသာရဇာတကံ ဒုတိယံ။
၉၃။ ဝိသာသဘောဇနဇာတကံ
၉၃။
န ဝိဿသေ အဝိဿတ္ထေ၊ ဝိဿတ္ထေပိ န ဝိဿသေ။
ဝိဿာသာ ဘယမန္ဝေတိ၊ သီဟံဝ မိဂမာတုကာတိ [မိဂမာတုယာ (က။)]။
ဝိသာသဘောဇနဇာတကံ တတိယံ။
၉၄။ လောမဟံသဇာတကံ
၉၄။
သောတတ္တော သောသိန္ဒော [သောသီတော (သီ။ သျာ။ ဣ။)၊ သောသိနော (က။)] စေဝ၊ ဧကော ဘိံသနကေ ဝနေ။
နဂ္ဂေါ န စဂ္ဂိမာသီနော၊ ဧသနာပသုတော မုနီတိ။
လောမဟံသဇာတကံ စတုတ္ထံ။
၉၅။ မဟာသုဒဿနဇာတကံ
၉၅။
အနိစ္စာ ဝတ သင်္ခါရာ၊ ဥပ္ပါဒဝယဓမ္မိနော။
ဥပ္ပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါတိ။
မဟာသုဒဿနဇာတကံ ပဉ္စမံ။
၉၆။ တေလပတ္တဇာတကံ
၉၆။
သမတိတ္တိကံ အနဝသေကံ၊ တေလပတ္တံ ယထာ ပရိဟရေယျ။
ဧဝံ သစိတ္တမနုရက္ခေ၊ ပတ္ထယာနော ဒိသံ အဂတပုဗ္ဗန္တိ။
တေလပတ္တဇာတကံ ဆဋ္ဌံ။
၉၇။ နာမသိဒ္ဓိဇာတကံ
၉၇။
ဇီဝကဉ္စ မတံ ဒိသွာ၊ ဓနပါလိဉ္စ ဒုဂ္ဂတံ။
ပန္ထကဉ္စ ဝနေ မူဠှံ၊ ပါပကော ပုနရာဂတောတိ။
နာမသိဒ္ဓိဇာတကံ သတ္တမံ။
၉၈။ ကူဋဝါဏိဇဇာတကံ
၉၈။
သာဓု ခေါ ပဏ္ဍိတော နာမ၊ န တွေဝ အတိပဏ္ဍိတော။
အတိပဏ္ဍိတေန ပုတ္တေန၊ မနမှိ ဥပကူဠိတောတိ [ဥပကူလိတောတိ (သီ။)၊ ဥပကုဋ္ဌိတောတိ (သျာ။)၊ ဥပကုဋိတော (က။)]။
ကူဋဝါဏိဇဇာတကံ အဋ္ဌမံ။
၉၉။ ပရောသဟဿဇာတကံ
၉၉။
ပရောသဟဿမ္ပိ သမာဂတာနံ၊ ကန္ဒေယျုံ တေ ဝဿသတံ အပညာ။
ဧကောဝ သေယျော ပုရိသော သပညော၊ ယော ဘာသိတဿ ဝိဇာနာတိ အတ္ထန္တိ။
ပရောသဟဿဇာတကံ နဝမံ။
၁၀၀။ အသာတရူပဇာတကံ
၁၀၀။
အသာတံ သာတရူပေန၊ ပိယရူပေန အပ္ပိယံ။
ဒုက္ခံ သုခဿ ရူပေန၊ ပမတ္တမတိဝတ္တတီတိ။
အသာတရူပဇာတကံ ဒသမံ။
လိတ္တဝဂ္ဂေါ ဒသမော။
တဿုဒ္ဒါနံ –
ဂိလမက္ခကုတူဟလ မာတုကဿာ၊ မုနိနာ စ အနိစ္စတ ပတ္တဝရံ။
ဓနပါလိဝရော အတိပဏ္ဍိတကော၊ သပရောသဟဿအသာတဒသာတိ။
မဇ္ဈိမော ပဏ္ဏာသကော။
၁၁။ ပရောသတဝဂ္ဂေါ
၁၀၁။ ပရောသတဇာတကံ
၁၀၁။
ပရောသတံ စေပိ သမာဂတာနံ၊ ဈာယေယျုံ တေ ဝဿသတံ အပညာ။
ဧကောဝ သေယျော ပုရိသော သပညော၊ ယော ဘာသိတဿ ဝိဇာနာတိ အတ္ထန္တိ။
ပရောသတဇာတကံ ပဌမံ။
၁၀၂။ ပဏ္ဏိကဇာတကံ
၁၀၂။
ယော ဒုက္ခဖုဋ္ဌာယ ဘဝေယျ တာဏံ၊ သော မေ ပိတာ ဒုဗ္ဘိ [ဒူဘိ (သီ။ ဣ။)] ဝနေ ကရောတိ။
သာ ကဿ ကန္ဒာမိ ဝနဿ မဇ္ဈေ၊ ယော တာယိတာ သော သဟသံ [သဟသာ (သီ။ သျာ။ ဣ။)] ကရောတီတိ။
ပဏ္ဏိကဇာတကံ ဒုတိယံ။
၁၀၃။ ဝေရိဇာတကံ
၁၀၃။
ယတ္ထ ဝေရီ နိဝိသတိ [နိဝသတိ (သီ။ က။)]၊ န ဝသေ တတ္ထ ပဏ္ဍိတော။
ဧကရတ္တံ ဒိရတ္တံ ဝါ၊ ဒုက္ခံ ဝသတိ ဝေရိသူတိ။
ဝေရိဇာတကံ တတိယံ။
၁၀၄။ မိတ္တဝိန္ဒကဇာတကံ
၁၀၄။
စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ သောဠသ။
သောဠသာဟိ စ ဗာတ္တိံသ [ဗတ္တိံသ (သီ။ သျာ။ ဣ။)]၊ အတ္ရိစ္ဆံ စက္ကမာသဒေါ။
ဣစ္ဆာဟတဿ ပေါသဿ၊ စက္ကံ ဘမတိ မတ္ထကေတိ။
မိတ္တဝိန္ဒကဇာတကံ စတုတ္ထံ။
၁၀၅။ ဒုဗ္ဗလကဋ္ဌဇာတကံ
၁၀၅။
ဗဟုမ္ပေတံ ဝနေ ကဋ္ဌံ၊ ဝါတော ဘဉ္ဇတိ ဒုဗ္ဗလံ။
တဿ စေ ဘာယသီ နာဂ၊ ကိသော နူန ဘဝိဿသီတိ။
ဒုဗ္ဗလကဋ္ဌဇာတကံ ပဉ္စမံ။
၁၀၆။ ဥဒဉ္စနီဇာတကံ
၁၀၆။
သုခံ ဝတ မံ ဇီဝန္တံ [သုခကံ ဝတ ဇီဝံ (က။)]၊ ပစမာနာ ဥဒဉ္စနီ။
စောရီ ဇာယပ္ပဝါဒေန၊ တေလံ လောဏဉ္စ ယာစတီတိ။
ဥဒဉ္စနီဇာတကံ ဆဋ္ဌံ။
၁၀၇။ သာလိတ္တကဇာတကံ
၁၀၇။
သာဓု ခေါ သိပ္ပကံ နာမ၊ အပိ ယာဒိသ ကီဒိသံ။
ပဿ ခဉ္ဇပ္ပဟာရေန၊ လဒ္ဓါ ဂါမာ စတုဒ္ဒိသာတိ။
သာလိတ္တကဇာတကံ သတ္တမံ။
၁၀၈။ ဗာဟိယဇာတကံ
၁၀၈။
သိက္ခေယျ သိက္ခိတဗ္ဗာနိ၊ သန္တိ တစ္ဆန္ဒိနော [သစ္ဆန္ဒိနော (သီ။ ဣ။)] ဇနာ။
ဗာဟိယာ ဟိ [ပိ (သီ။ သျာ။ ဣ။)] သုဟန္နေန၊ ရာဇာနမဘိရာဓယီတိ။
ဗာဟိယဇာတကံ အဋ္ဌမံ။
၁၀၉။ ကုဏ္ဍပူဝဇာတကံ
၁၀၉။
ယထန္နော ပုရိသော ဟောတိ၊ တထန္နာ တဿ ဒေဝတာ။
အာဟရေတံ ကုဏ္ဍပူဝံ [ကဏံ ပူဝံ (သီ။ ဣ။)]၊ မာ မေ ဘာဂံ ဝိနာသယာတိ။
ကုဏ္ဍပူဝဇာတကံ နဝမံ။
၁၁၀။ သဗ္ဗသံဟာရကပဉ္ဟဇာတကံ
၁၁၀။
သဗ္ဗသံဟာရကော [သဗ္ဗသာဟာရကော (က။)] နတ္ထိ၊ သုဒ္ဓံ ကင်္ဂု ပဝါယတိ။
အလိကံ ဘာယတိယံ ဓုတ္တီ၊ သစ္စမာဟ မဟလ္လိကာတိ။
သဗ္ဗသံဟာရကပဉ္ဟဇာတကံ ဒသမံ။
ပရောသတဝဂ္ဂေါ ဧကာဒသမော။
တဿုဒ္ဒါနံ –
သပရောသတ တာယိတ ဝေရီ ပုန၊ ဘမစက္ကထ နာဂသိရိဝှယနော။
သုခကဉ္စ ဝတ သိပ္ပက ဗာဟိယာ၊ ကုဏ္ဍပူဝ မဟလ္လိကကာ စ ဒသာတိ။
၁၂။ ဟံစိဝဂ္ဂေါ
၁၁၁။ ဂဒြဘပဉ္ဟဇာတကံ
၁၁၁။
ဟံစိ [ဟံသိ (သီ။ သျာ။)၊ ဟဉ္စိ (?)] တုဝံ ဧဝမညသိ သေယျော၊ ပုတ္တေန ပိတာတိ ရာဇသေဋ္ဌ။
ဟန္ဒဿတရဿ တေ အယံ၊ အဿတရဿ ဟိ ဂဒြဘော ပိတာတိ။
ဂဒြဘပဉ္ဟဇာတကံ ပဌမံ။
၁၁၂။ အမရာဒေဝီပဉ္ဟဇာတကံ
၁၁၂။
ယေန သတ္တုဗိလင်္ဂါ စ၊ ဒိဂုဏပလာသော စ ပုပ္ဖိတော။
ယေန ဒဒါမိ [ယေနာ’ဒါမိ (သီ။ သျာ။)] တေန ဝဒါမိ၊ ယေန န ဒဒါမိ [ယေန နာ’ဒါမိ (သီ။ သျာ။)] န တေန ဝဒါမိ။
ဧသ မဂ္ဂေါ ယဝမဇ္ဈကဿ၊ ဧတံ ဆန္နပထံ ဝိဇာနာဟီတိ။
အမရာဒေဝီပဉ္ဟဇာတကံ ဒုတိယံ။
၁၁၃။ သိင်္ဂါလဇာတကံ
၁၁၃။
သဒ္ဒဟာသိ သိင်္ဂါလဿ [သိဂါလဿ (သီ။ သျာ။ ဣ။)]၊ သုရာဣတဿ ဗြာဟ္မဏ။
သိပ္ပိကာနံ သတံ နတ္ထိ၊ ကုတော ကံသသတာ ဒုဝေတိ။
သိင်္ဂါလဇာတကံ တတိယံ။
၁၁၄။ မိတစိန္တိဇာတကံ
၁၁၄။
ဗဟုစိန္တီ အပ္ပစိန္တီ၊ ဥဘော ဇာလေ အဗဇ္ဈရေ။
မိတစိန္တီ ပမောစေသီ၊ ဥဘော တတ္ထ သမာဂတာတိ။
မိတစိန္တိဇာတကံ စတုတ္ထံ။
၁၁၅။ အနုသာသိကဇာတကံ
၁၁၅။
ယာယည [ယာယညေ (က။)] မနုသာသတိ၊ သယံ လောလုပ္ပစာရိနီ။
သာယံ ဝိပက္ခိကာ သေတိ၊ ဟတာ စက္ကေန သာသိကာတိ [သာလိကာတိ (သီ။ သျာ။ ဣ။)]။
အနုသာသိကဇာတကံ ပဉ္စမံ။
၁၁၆။ ဒုဗ္ဗစဇာတကံ
၁၁၆။
အတိကရမကရာစရိယ ၊ မယှမ္ပေတံ န ရုစ္စတိ။
စတုတ္ထေ လင်္ဃယိတွာန၊ ပဉ္စမာယသိ အာဝုတောတိ။
ဒုဗ္ဗစဇာတကံ ဆဋ္ဌံ။
၁၁၇။ တိတ္တိရဇာတကံ
၁၁၇။
အစ္စုဂ္ဂတာတိလပတာ [အတိဗလတာ (သီ။ သျာ။ ဣ။)၊ အတိလပကာ (ကတ္ထစိ)]၊ အတိဝေလံ ပဘာသိတာ။
ဝါစာ ဟနတိ ဒုမ္မေဓံ၊ တိတ္တိရံဝါတိဝဿိတန္တိ။
တိတ္တိရဇာတကံ သတ္တမံ။
၁၁၈။ ဝဋ္ဋကဇာတကံ
၁၁၈။
နာစိန္တယန္တော ပုရိသော၊ ဝိသေသမဓိဂစ္ဆတိ။
စိန္တိတဿ ဖလံ ပဿ၊ မုတ္တောသ္မိ ဝဓဗန္ဓနာတိ။
ဝဋ္ဋကဇာတကံ အဋ္ဌမံ။
၁၁၉။ အကာလရာဝိဇာတကံ
၁၁၉။
အမာတာပိတရသံဝဒ္ဓေါ [ပိတရိ (သီ။ ဣ။)၊ ပိတု (သျာ။)]၊ အနာစေရကုလေ ဝသံ။
နာယံ ကာလံ အကာလံ ဝါ၊ အဘိဇာနာတိ ကုက္ကုဋောတိ။
အကာလရာဝိဇာတကံ နဝမံ။
၁၂၀။ ဗန္ဓနမောက္ခဇာတကံ
၁၂၀။
အဗဒ္ဓါ တတ္ထ ဗဇ္ဈန္တိ၊ ယတ္ထ ဗာလာ ပဘာသရေ။
ဗဒ္ဓါပိ တတ္ထ မုစ္စန္တိ၊ ယတ္ထ ဓီရာ ပဘာသရေတိ။
ဗန္ဓနမောက္ခဇာတကံ ဒသမံ။
ဟံစိဝဂ္ဂေါ [ဟံသိဝဂ္ဂေါ (သီ။ သျာ။)] ဒွါဒသမော။
တဿုဒ္ဒါနံ –
အထ ဂဒြဘ သတ္တုဝ ကံသသတံ၊ ဗဟုစိန္တိ သာသိကာယာတိကရ။
အတိဝေလ ဝိသေသမနာစရိယောဝ၊ ဓီရာပဘာသရတေန ဒသာတိ။
၁၃။ ကုသနာဠိဝဂ္ဂေါ
၁၂၁။ ကုသနာဠိဇာတကံ
၁၂၁။
ကရေ သရိက္ခော အထ ဝါပိ သေဋ္ဌော၊ နိဟီနကော ဝါပိ ကရေယျ ဧကော။
ကရေယျုမေတေ [ကရေယျုံ တေ (သီ။ ဣ။)] ဗျသနေ ဥတ္တမတ္ထံ၊ ယထာ အဟံ ကုသနာဠိ ရုစာယန္တိ။
ကုသနာဠိဇာတကံ ပဌမံ။
၁၂၂။ ဒုမ္မေဓဇာတကံ
၁၂၂။
ယသံ လဒ္ဓါန ဒုမ္မေဓေါ၊ အနတ္ထံ စရတိ အတ္တနော။
အတ္တနော စ ပရေသဉ္စ၊ ဟိံသာယ ပဋိပဇ္ဇတီတိ။
ဒုမ္မေဓဇာတကံ ဒုတိယံ။
၁၂၃။ နင်္ဂလီသဇာတကံ
၁၂၃။
အသဗ္ဗတ္ထဂါမိံ ဝါစံ၊ ဗာလော သဗ္ဗတ္ထ ဘာသတိ။
နာယံ ဒဓိံ ဝေဒိ န [န ဝေဒိ (က။)] နင်္ဂလီသံ၊ ဒဓိပ္ပယံ [ဒဓိမ္ပယံ (သီ။ ဣ။)] မညတိ နင်္ဂလီသန္တိ။
နင်္ဂလီသဇာတကံ တတိယံ။
၁၂၄။ အမ္ဗဇာတကံ
၁၂၄။
ဝါယမေထေဝ ပုရိသော၊ န နိဗ္ဗိန္ဒေယျ ပဏ္ဍိတော။
ဝါယာမဿ ဖလံ ပဿ၊ ဘုတ္တာ အမ္ဗာ အနီတိဟန္တိ။
အမ္ဗဇာတကံ စတုတ္ထံ။
၁၂၅။ ကဋာဟကဇာတကံ
၁၂၅။
ဗဟုမ္ပိ သော ဝိကတ္ထေယျ၊ အညံ ဇနပဒံ ဂတော။
အနွာဂန္တွာန ဒူသေယျ၊ ဘုဉ္ဇ ဘောဂေ ကဋာဟကာတိ။
ကဋာဟကဇာတကံ ပဉ္စမံ။
၁၂၆။ အသိလက္ခဏဇာတကံ
၁၂၆။
တဒေဝေကဿ [တထေဝေကဿ (သီ။ သျာ။ ဣ။ အဋ္ဌ။ မူလပါဌော)] ကလျာဏံ၊ တဒေဝေကဿ ပါပကံ။
တသ္မာ သဗ္ဗံ န ကလျာဏံ၊ သဗ္ဗံ ဝါပိ န ပါပကန္တိ။
အသိလက္ခဏဇာတကံ ဆဋ္ဌံ။
၁၂၇။ ကလဏ္ဍုကဇာတကံ
၁၂၇။
တေ ဒေသာ တာနိ ဝတ္ထူနိ၊ အဟဉ္စ ဝနဂေါစရော။
အနုဝိစ္စ ခေါ တံ ဂဏှေယျုံ၊ ပိဝ [ပိပ (သီ။ ဣ။)] ခီရံ ကလဏ္ဍုကာတိ။
ကလဏ္ဍုကဇာတကံ သတ္တမံ။
၁၂၈။ ဗိဠာရဝတဇာတကံ
၁၂၈။
ယော ဝေ ဓမ္မံ ဓဇံ [ဓမ္မဓဇံ (သျာ။ ဣ။ က။)] ကတွာ၊ နိဂူဠ္ဟော ပါပမာစရေ။
ဝိဿာသယိတွာ ဘူတာနိ၊ ဗိဠာရံ နာမ တံ ဝတန္တိ။
ဗိဠာရဝတဇာတကံ အဋ္ဌမံ။
၁၂၉။ အဂ္ဂိကဘာရဒွါဇဇာတကံ
၁၂၉။
နာယံ သိခါ ပုညဟေတု၊ ဃာသဟေတု အယံ သိခါ။
နာင်္ဂုဋ္ဌဂဏနံ ယာတိ၊ အလံ တေ ဟောတု အဂ္ဂိကာတိ။
အဂ္ဂိကဘာရဒွါဇဇာတကံ နဝမံ။
၁၃၀။ ကောသိယဇာတကံ
၁၃၀။
ယထာ ဝါစာ စ ဘုဉ္ဇဿု၊ ယထာ ဘုတ္တဉ္စ ဗျာဟရ။
ဥဘယံ တေ န သမေတိ၊ ဝါစာ ဘုတ္တဉ္စ ကောသိယေတိ။
ကောသိယဇာတကံ ဒသမံ။
ကုသနာဠိဝဂ္ဂေါ [သရိက္ခဝဂ္ဂေါ (က။)] တေရသမော။
တဿုဒ္ဒါနံ –
ကုသနာဠိသိရိဝှယနော စ ယသံ၊ ဒဓိ မမ္ဗ ကဋာဟကပဉ္စမကော။
အထ ပါပက ခီရ ဗိဠာရဝတံ၊ သိခိ ကောသိယသဝှယနေန ဒသာတိ။
၁၄။ အသမ္ပဒါနဝဂ္ဂေါ
၁၃၁။ အသမ္ပဒါနဇာတကံ
၁၃၁။
အသမ္ပဒါနေနိတရီတရဿ၊ ဗာလဿ မိတ္တာနိ ကလီ ဘဝန္တိ။
တသ္မာ ဟရာမိ ဘုသံ အဍ္ဎမာနံ၊ မာ မေ မိတ္တိ ဇီယိတ္ထ သဿတာယန္တိ။
အသမ္ပဒါနဇာတကံ ပဌမံ။
၁၃၂။ ဘီရုကဇာတကံ
၁၃၂။
ကုသလူပဒေသေ ဓိတိယာ ဒဠှာယ စ၊ အနိဝတ္တိတတ္တာဘယဘီရုတာယ [အဝတ္ထိတတ္တာဘယဘီရုတာယ (သီ။ သျာ။ ဣ။)] စ။
န ရက္ခသီနံ ဝသမာဂမိမှသေ၊ သ သောတ္ထိဘာဝေါ မဟတာ ဘယေန မေတိ။
ဘီရုက [ပဉ္စဂရုက (သီ။ ဣ။), ပဉ္စဘီရုက (သျာ။), အဘယဘီရုတ§(?)] ဇာတကံ ဒုတိယံ။
၁၃၃။ ဃတာသနဇာတကံ
၁၃၃။
ခေမံ ယဟိံ တတ္ထ အရီ ဥဒီရိတော [အရိ ဥဒ္ဓရိတော (က။)]၊ ဒကဿ မဇ္ဈေ ဇလတေ ဃတာသနော။
န အဇ္ဇ ဝါသော မဟိယာ မဟီရုဟေ၊ ဒိသာ ဘဇဝ္ဟော သရဏာဇ္ဇ နော ဘယန္တိ။
ဃတာသနဇာတကံ တတိယံ။
၁၃၄။ ဈာနသောဓနဇာတကံ
၁၃၄။
ယေ သညိနော တေပိ ဒုဂ္ဂတာ၊ ယေပိ အသညိနော တေပိ ဒုဂ္ဂတာ။
ဧတံ ဥဘယံ ဝိဝဇ္ဇယ၊ တံ သမာပတ္တိသုခံ အနင်္ဂဏန္တိ။
ဈာနသောဓနဇာတကံ စတုတ္ထံ။
၁၃၅။ စန္ဒာဘဇာတကံ
၁၃၅။
စန္ဒာဘံ သူရိယာဘဉ္စ၊ ယောဓ ပညာယ ဂါဓတိ။
အဝိတက္ကေန ဈာနေန၊ ဟောတိ အာဘဿရူပဂေါတိ။
စန္ဒာဘဇာတကံ ပဉ္စမံ။
၁၃၆။ သုဝဏ္ဏဟံသဇာတကံ
၁၃၆။
ယံ လဒ္ဓံ တေန တုဋ္ဌဗ္ဗံ၊ အတိလောဘော ဟိ ပါပကော။
ဟံသရာဇံ ဂဟေတွာန၊ သုဝဏ္ဏာ ပရိဟာယထာတိ။
သုဝဏ္ဏဟံသဇာတကံ ဆဋ္ဌံ။
၁၃၇။ ဗဗ္ဗုဇာတကံ
၁၃၇။
ယတ္ထေကော လဘတေ ဗဗ္ဗု၊ ဒုတိယော တတ္ထ ဇာယတိ။
တတိယော စ စတုတ္ထော စ၊ ဣဒံ တေ ဗဗ္ဗုကာ ဗိလန္တိ။
ဗဗ္ဗုဇာတကံ သတ္တမံ။
၁၃၈။ ဂေါဓဇာတကံ
၁၃၈။
ကိံ တေ ဇဋာဟိ ဒုမ္မေဓ၊ ကိံ တေ အဇိနသာဋိယာ။
အဗ္ဘန္တရံ တေ ဂဟနံ၊ ဗာဟိရံ ပရိမဇ္ဇသီတိ။
ဂေါဓဇာတကံ အဋ္ဌမံ။
၁၃၉။ ဥဘတောဘဋ္ဌဇာတကံ
၁၃၉။
အက္ခီ ဘိန္နာ ပဋော နဋ္ဌော၊ သခိဂေဟေ စ ဘဏ္ဍနံ။
ဥဘတော ပဒုဋ္ဌာ ကမ္မန္တာ [ပဒုဋ္ဌကမ္မန္တော (သီ။)၊ ပဒုဋ္ဌော ကမ္မန္တော (ဣ။)]၊ ဥဒကမှိ ထလမှိ စာတိ။
ဥဘတောဘဋ္ဌဇာတကံ နဝမံ။
၁၄၀။ ကာကဇာတကံ
၁၄၀။
နိစ္စံ ဥဗ္ဗိဂ္ဂဟဒယာ၊ သဗ္ဗလောကဝိဟေသကာ။
တသ္မာ နေသံ ဝသာ နတ္ထိ၊ ကာကာနမှာက [ကာကာနသ္မာက (သီ။ သျာ။ ဣ။)] ဉာတိနန္တိ။
ကာကဇာတကံ ဒသမံ။
အသမ္ပဒါနဝဂ္ဂေါ စုဒ္ဒသမော။
တဿုဒ္ဒါနံ –
ဣတရီတရ ရက္ခသိ ခေမိယော စ၊ ပရောသတပဉ္ဟေန အာဘဿရော ပုန။
အထ ဟံသဝရုတ္တမဗဗ္ဗုဇဋံ၊ ပဋနဋ္ဌက ကာကဝရေန ဒသာတိ။
၁၅။ ကကဏ္ဋကဝဂ္ဂေါ
၁၄၁။ ဂေါဓဇာတကံ
၁၄၁။
န ပါပဇနသံသေဝီ၊ အစ္စန္တသုခမေဓတိ။
ဂေါဓါကုလံ [ဂေါဓက္ကုလံ (က။)] ကကဏ္ဋာဝ [ကကဏ္ဋကာ (က။)]၊ ကလိံ ပါပေတိ အတ္တနန္တိ။
ဂေါဓဇာတကံ ပဌမံ။
၁၄၂။ သိင်္ဂါလဇာတကံ
၁၄၂။
ဧတဉှိ တေ ဒုရာဇာနံ၊ ယံ သေသိ မတသာယိကံ။
ယဿ တေ ကဍ္ဎမာနဿ၊ ဟတ္ထာ ဒဏ္ဍော န မုစ္စတီတိ။
သိင်္ဂါလဇာတကံ ဒုတိယံ။
၁၄၃။ ဝိရောစဇာတကံ
၁၄၃။
လသီ စ တေ နိပ္ဖလိတာ၊ မတ္ထကော စ ပဒါလိတော [ဝိဒါလိတော (သီ။ ဣ။)]။
သဗ္ဗာ တေ ဖာသုကာ ဘဂ္ဂါ၊ အဇ္ဇ ခေါ တွံ ဝိရောစသီတိ။
ဝိရောစဇာတကံ တတိယံ။
၁၄၄။ နင်္ဂုဋ္ဌဇာတကံ
၁၄၄။
ဗဟုမ္ပေတံ အသဗ္ဘိ [ဗဟုပေတမသဗ္ဘိ (က။)] ဇာတဝေဒ၊ ယံ တံ ဝါလဓိနာဘိပူဇယာမ။
မံသာရဟဿ နတ္ထဇ္ဇ မံသံ၊ နင်္ဂုဋ္ဌမ္ပိ ဘဝံ ပဋိဂ္ဂဟာတူတိ။
နင်္ဂုဋ္ဌဇာတကံ စတုတ္ထံ။
၁၄၅။ ရာဓဇာတကံ
၁၄၅။
န တွံ ရာဓ ဝိဇာနာသိ၊ အဍ္ဎရတ္တေ အနာဂတေ။
အဗျယတံ [အဗျာယတံ (သီ။ သျာ။ ဣ။)၊ အဗျတ္တတံ (?)] ဝိလပသိ၊ ဝိရတ္တာ ကောသိယာယနေတိ။
ရာဓဇာတကံ ပဉ္စမံ။
၁၄၆။ သမုဒ္ဒကာကဇာတကံ
၁၄၆။
အပိ နု ဟနုကာ သန္တာ၊ မုခဉ္စ ပရိသုဿတိ။
ဩရမာမ န ပါရေမ၊ ပူရတေဝ မဟောဒဓီတိ။
သမုဒ္ဒကာကဇာတကံ ဆဋ္ဌံ။
၁၄၇။ ပုပ္ဖရတ္တဇာတကံ
၁၄၇။
နယိဒံ ဒုက္ခံ အဒုံ ဒုက္ခံ၊ ယံ မံ တုဒတိ ဝါယသော။
ယံ သာမာ ပုပ္ဖရတ္တေန၊ ကတ္တိကံ နာနုဘောဿတီတိ။
ပုပ္ဖရတ္တဇာတကံ သတ္တမံ။
၁၄၈။ သိင်္ဂါလဇာတကံ
၁၄၈။
နာဟံ ပုနံ န စ ပုနံ၊ န စာပိ အပုနပ္ပုနံ။
ဟတ္ထိဗောန္ဒိံ ပဝေက္ခာမိ၊ တထာ ဟိ ဘယတဇ္ဇိတောတိ။
သိင်္ဂါလဇာတကံ အဋ္ဌမံ။
၁၄၉။ ဧကပဏ္ဏဇာတကံ
၁၄၉။
ဧကပဏ္ဏော အယံ ရုက္ခော၊ န ဘူမ္ယာ စတုရင်္ဂုလော။
ဖလေန ဝိသကပ္ပေန၊ မဟာယံ ကိံ ဘဝိဿတီတိ။
ဧကပဏ္ဏဇာတကံ နဝမံ။
၁၅၀။ သဉ္ဇီဝဇာတကံ
၁၅၀။
အသန္တံ ယော ပဂ္ဂဏှာတိ၊ အသန္တံ စူပသေဝတိ။
တမေဝ ဃာသံ ကုရုတေ၊ ဗျဂ္ဃော သဉ္ဇီဝကော ယထာတိ။
သဉ္ဇီဝဇာတကံ ဒသမံ။
ကကဏ္ဋက [ပါပသေဝန (က။)] ဝဂ္ဂေါ ပန္နရသမော။
တဿုဒ္ဒါနံ –
သုခမေဓတိ ဒဏ္ဍဝရော စ ပုန၊ လသိ ဝါလဓိ ပဉ္စမရာဓဝရော။
သမဟောဒဓိ ကတ္တိက ဗောန္ဒိ ပုန၊ စတုရင်္ဂုလဗျဂ္ဃဝရေန ဒသာတိ။
(ဥပရိမော ပဏ္ဏာသကော။) [( ) သီဟဠပေါတ္ထကေယေဝ ဒိဿတိ]
အထ ဝဂ္ဂုဒ္ဒါနံ –
အပဏ္ဏကံ သီလဝဂ္ဂကုရုင်္ဂ၊ ကုလာဝကံ အတ္ထကာမေန ပဉ္စမံ။
အာသီသော ဣတ္ထိဝရုဏံ အပါယိ၊ လိတ္တဝဂ္ဂေန တေ ဒသ။
ပရောသတံ ဟံစိ ကုသနာဠိ [ဟံသိ သရိက္ခံ (သဗ္ဗတ္ထ)]၊ အသမ္ပဒံ ကကဏ္ဋကဝဂ္ဂေါ။
ဧကနိပါတမှိလင်္ကတန္တိ။
ဧကကနိပါတံ နိဋ္ဌိတံ။