၂၈။ ဗုဒ္ဓပကိဏ္ဏကကဏ္ဍ
၁။
အပရိမေယျိတော ကပ္ပေ၊ စတုရော အာသုံ ဝိနာယကာ။
တဏှင်္ကရော မေဓင်္ကရော၊ အထောပိ သရဏင်္ကရော။
ဒီပင်္ကရော စ သမ္ဗုဒ္ဓေါ၊ ဧကကပ္ပမှိ တေ ဇိနာ။
၂။
ဒီပင်္ကရဿ အပရေန၊ ကောဏ္ဍညော နာမ နာယကော။
ဧကောဝ ဧကကပ္ပမှိ၊ တာရေသိ ဇနတံ ဗဟုံ။
၃။
ဒီပင်္ကရဿ ဘဂဝတော၊ ကောဏ္ဍညဿ စ သတ္ထုနော။
ဧတေသံ အန္တရာ ကပ္ပါ၊ ဂဏနာတော အသံခိယာ။
၄။
ကောဏ္ဍညဿ အပရေန၊ မင်္ဂလော နာမ နာယကော။
တေသမ္ပိ အန္တရာ ကပ္ပါ၊ ဂဏနာတော အသံခိယာ။
၅။
မင်္ဂလော စ သုမနော စ၊ ရေဝတော သောဘိတော မုနိ။
တေပိ ဗုဒ္ဓါ ဧကကပ္ပေ၊ စက္ခုမန္တော ပဘင်္ကရာ။
၆။
သောဘိတဿ အပရေန၊ အနောမဒဿီ မဟာယသော။
တေသမ္ပိ အန္တရာ ကပ္ပါ၊ ဂဏနာတော အသံခိယာ။
၇။
အနောမဒဿီ ပဒုမော၊ နာရဒေါ စာပိ နာယကော။
တေပိ ဗုဒ္ဓါ ဧကကပ္ပေ၊ တမန္တကာရကာ မုနီ။
၈။
နာရဒဿ အပရေန၊ ပဒုမုတ္တရော နာမ နာယကော။
ဧကကပ္ပမှိ ဥပ္ပန္နော၊ တာရေသိ ဇနတံ ဗဟုံ။
၉။
နာရဒဿ ဘဂဝတော၊ ပဒုမုတ္တရဿ သတ္ထုနော။
တေသမ္ပိ အန္တရာ ကပ္ပါ၊ ဂဏနာတော အသံခိယာ။
၁၀။
ကပ္ပသတသဟဿမှိ ၊ ဧကော အာသိ မဟာမုနိ။
ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
၁၁။
တိံသကပ္ပသဟဿမှိ၊ ဒုဝေ အာသုံ ဝိနာယကာ [အာသိံသု နာယကာ (သျာ။ က။)]။
သုမေဓေါ စ သုဇာတော စ၊ ဩရတော ပဒုမုတ္တရာ။
၁၂။
အဋ္ဌာရသေ ကပ္ပသတေ၊ တယော အာသုံ ဝိနာယကာ [အာသိံသု နာယကာ (သျာ။ က။)]။
ပိယဒဿီ အတ္ထဒဿီ၊ ဓမ္မဒဿီ စ နာယကာ။
၁၃။
ဩရတော စ သုဇာတဿ၊ သမ္ဗုဒ္ဓါ ဒွိပဒုတ္တမာ။
ဧကကပ္ပမှိ တေ ဗုဒ္ဓါ၊ လောကေ အပ္ပဋိပုဂ္ဂလာ။
၁၄။
စတုန္နဝုတိတော ကပ္ပေ၊ ဧကော အာသိ မဟာမုနိ။
သိဒ္ဓတ္ထော သော လောကဝိဒူ၊ သလ္လကတ္တော အနုတ္တရော။
၁၅။
ဒွေနဝုတေ ဣတော ကပ္ပေ၊ ဒုဝေ အာသုံ ဝိနာယကာ။
တိဿော ဖုဿော စ သမ္ဗုဒ္ဓါ၊ အသမာ အပ္ပဋိပုဂ္ဂလာ။
၁၆။
ဧကနဝုတိတော ကပ္ပေ၊ ဝိပဿီ နာမ နာယကော။
သောပိ ဗုဒ္ဓေါ ကာရုဏိကော၊ သတ္တေ မောစေသိ ဗန္ဓနာ။
၁၇။
ဧကတိံသေ ဣတော ကပ္ပေ၊ ဒုဝေ အာသုံ ဝိနာယကာ။
သိခီ စ ဝေဿဘူ စေဝ၊ အသမာ အပ္ပဋိပုဂ္ဂလာ။
၁၈။
ဣမမှိ ဘဒ္ဒကေ ကပ္ပေ၊ တယော အာသုံ ဝိနာယကာ။
ကကုသန္ဓော ကောဏာဂမနော၊ ကဿပေါ စာပိ နာယကော။
၁၉။
အဟမေတရဟိ သမ္ဗုဒ္ဓေါ၊ မေတ္တေယျော စာပိ ဟေဿတိ။
ဧတေပိမေ ပဉ္စ ဗုဒ္ဓါ၊ ဓီရာ လောကာနုကမ္ပကာ။
၂၀။
ဧတေသံ ဓမ္မရာဇူနံ၊ အညေသံနေကကောဋိနံ။
အာစိက္ခိတွာန တံ မဂ္ဂံ၊ နိဗ္ဗုတာ တေ သသာဝကာတိ။
ဗုဒ္ဓပကိဏ္ဏကကဏ္ဍံ နိဋ္ဌိတံ။