ယသဝဂ္ဂ

၅၆။ ယသဝဂ္ဂ

၁။ ယသတ္ထေရအပဒါန

၁။

‘‘မဟာသမုဒ္ဒံ ဩဂ္ဂယှ၊ ဘဝနံ မေ သုနိမ္မိတံ။

သုနိမ္မိတာ ပေါက္ခရဏီ၊ စက္ကဝါကူပကူဇိတာ။

၂။

‘‘မန္ဒာရကေဟိ သဉ္ဆန္နာ၊ ပဒုမုပ္ပလကေဟိ စ။

နဒီ စ သန္ဒတေ တတ္ထ၊ သုပတိတ္ထာ မနောရမာ။

၃။

‘‘မစ္ဆကစ္ဆပသဉ္ဆန္နာ၊ နာနာဒိဇသမောတ္ထဋာ [နာနာမိဂသမောတ္ထဋာ (သျာ။)]။

မယူရကောဉ္စာဘိရုဒါ၊ ကောကိလာဒီဟိ ဝဂ္ဂုဟိ။

၄။

‘‘ပါရေဝတာ ရဝိဟံသာ၊ စက္ကဝါကာ နဒီစရာ။

တိတ္တိရာ သာဠိကာ စေတ္ထ၊ ပါဝကာ [သမ္ဗကာ (က။)] ဇီဝံဇီဝကာ။

၅။

‘‘ဟံသာကောဉ္စာဘိနဒိတာ၊ ကောသိယာ ပိင်္ဂလာ [ပိင်္ဂလီ (သီ။)၊ သိင်္ဂလီ၊ သိင်္ဃလီ (က။)] ဗဟူ။

သတ္တရတနသမ္ပန္နာ၊ မဏိမုတ္တပဝါဠိကာ။

၆။

‘‘သဗ္ဗေ သောဏ္ဏမယာ ရုက္ခာ၊ နာနာခန္ဓသမေရိတာ။

ဥဇ္ဇောတေန္တိ ဒိဝါရတ္တိံ၊ ဘဝနံ သဗ္ဗကာလိကံ။

၇။

‘‘သဋ္ဌိတုရိယသဟဿာနိ၊ သာယံ ပါတော ပဝဇ္ဇရေ။

သောဠသိတ္ထိသဟဿာနိ၊ ပရိဝါရေန္တိ မံ သဒါ။

၈။

‘‘အဘိနိက္ခမ္မ ဘဝနာ၊ သုမေဓံ လောကနာယကံ။

ပသန္နစိတ္တော သုမနော၊ ဝန္ဒယိံ တံ [သဗ္ဗဒဿိံ (က။)] မဟာယသံ။

၉။

‘‘သမ္ဗုဒ္ဓံ အဘိဝါဒေတွာ၊ သသသံဃံ တံ နိမန္တယိံ။

အဓိဝါသေသိ သော ဓီရော၊ သုမေဓေါ လောကနာယကော။

၁၀။

‘‘မမ ဓမ္မကထံ ကတွာ၊ ဥယျောဇေသိ မဟာမုနိ။

သမ္ဗုဒ္ဓံ အဘိဝါဒေတွာ၊ ဘဝနံ မေ ဥပါဂမိံ။

၁၁။

‘‘အာမန္တယိံ ပရိဇနံ၊ သဗ္ဗေ သန္နိပတုံ တဒါ။

‘ပုဗ္ဗဏှသမယံ ဗုဒ္ဓေါ၊ ဘဝနံ အာဂမိဿတိ’။

၁၂။

‘‘‘လာဘာ အမှံ သုလဒ္ဓါ နော၊ ယေ ဝသာမ တဝန္တိကေ။

မယမ္ပိ ဗုဒ္ဓသေဋ္ဌဿ၊ ပူဇယိဿာမ သတ္ထုနော’။

၁၃။

‘‘အန္နံ ပါနံ ပဋ္ဌပေတွာ၊ ကာလံ အာရောစယိံ အဟံ။

ဝသီသတသဟဿေဟိ၊ ဥပေသိ လောကနာယကော။

၁၄။

‘‘ပဉ္စင်္ဂိကေဟိ တုရိယေဟိ၊ ပစ္စုဂ္ဂမမကာသဟံ။

သဗ္ဗသောဏ္ဏမယေ ဣဌေ၊ နိသီဒိ ပုရိသုတ္တမော။

၁၅။

‘‘ဥပရိစ္ဆဒနံ အာသိ၊ သဗ္ဗသောဏ္ဏမယံ တဒါ။

ဗီဇနီယော ပဝါယန္တိ၊ ဘိက္ခုသသံဃံ အနုတ္တရံ။

၁၆။

‘‘ပဟူတေနန္နပါနေန၊ ဘိက္ခုသသံဃံ အတပ္ပယိံ။

ပစ္စေကဒုဿယုဂလေ၊ ဘိက္ခုသံဃဿဒါသဟံ။

၁၇။

‘‘ယံ ဝဒေတိ သုမေဓေါ သော၊ အာဟုတီနံ ပဋိဂ္ဂဟော။

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။

၁၈။

‘‘‘ယော မံ အန္နေန ပါနေန၊ သဗ္ဗေ ဣမေ စ တပ္ပယိ။

တမဟံ ကိတ္တယိဿာမိ၊ သုဏာထ မမ ဘာသတော။

၁၉။

‘‘‘အဋ္ဌာရသေ ကပ္ပသတေ၊ ဒေဝလောကေ ရမိဿတိ။

သဟဿက္ခတ္တုံ ရာဇာယံ၊ စက္ကဝတ္တီ ဘဝိဿတိ။

၂၀။

‘‘‘ဥပဂစ္ဆတိ ယံ ယောနိံ၊ ဒေဝတ္တံ အထ မာနုသံ။

သဗ္ဗသောဏ္ဏမယံ တဿ၊ ဆဒနံ ဓါရယိဿတိ။

၂၁။

‘‘‘တိံသကပ္ပသဟဿမှိ၊ ဩက္ကာကကုလသမ္ဘဝေါ။

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။

၂၂။

‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။

၂၃။

‘‘‘ဘိက္ခုသံဃေ နိသီဒိတွာ၊ သီဟနာဒံ နဒိဿတိ’။

စိတကေ ဆတ္တံ ဓါရေန္တိ၊ ဟေဋ္ဌာ ဆတ္တမှိ ဍယှထ။

၂၄။

‘‘သာမညံ မေ အနုပ္ပတ္တံ၊ ကိလေသာ ဈာပိတာ မယာ။

မဏ္ဍပေ ရုက္ခမူလေ ဝါ၊ သန္တာသော မေ န ဝိဇ္ဇတိ။

၂၅။

‘‘တိံသကပ္ပသဟဿမှိ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ သဗ္ဗဒါနဿိဒံ ဖလံ။

၂၆။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၂၇။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၂၈။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ယသော ထေရော ဣမာ ဂါထာယော အဘာသိတ္ထာတိ။

ယသတ္ထေရဿာပဒါနံ ပဌမံ။

၂။ နဒီကဿပတ္ထေရအပဒါနံ

၂၉။

‘‘ပဒုမုတ္တရဿ ဘဂဝတော၊ လောကဇေဋ္ဌဿ တာဒိနော။

ပိဏ္ဍစာရံ စရန္တဿ၊ ဝါရတော ဥတ္တမံ ယသံ။

အဂ္ဂဖလံ ဂဟေတွာန၊ အဒါသိံ သတ္ထုနော အဟံ။

၃၀။

‘‘တေန ကမ္မေန ဒေဝိန္ဒော၊ လောကဇေဋ္ဌော နရာသဘော။

သမ္ပတ္တောမှိ အစလံ ဌာနံ၊ ဟိတွာ ဇယပရာဇယံ။

၃၁။

‘‘သတသဟဿိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ အဂ္ဂဒါနဿိဒံ ဖလံ။

၃၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နဒီကဿပေါ ထေရော ဣမာ ဂါထာယော

အဘာသိတ္ထာတိ။

နဒီကဿပတ္ထေရဿာပဒါနံ ဒုတိယံ။

၃။ ဂယာကဿပတ္ထေရအပဒါနံ

၃၅။

‘‘အဇိနစမ္မဝတ္ထောဟံ [အဇိနဝတ္တံ နိဝတ္တောဟံ (သီ။)]၊ ခါရိဘာရဓရော တဒါ။

ခါရိကံ ဟာရယိတွာန၊ ကောလံ အဟာသိ အဿမံ။

၃၆။

‘‘ဘဂဝါ တမှိ သမယေ၊ ဧကော အဒုတိယော ဇိနော။

မမဿမံ ဥပါဂစ္ဆိ၊ ဇောတေန္တော သဗ္ဗကာလိကံ။

၃၇။

‘‘သကံ စိတ္တံ ပသာဒေတွာ၊ အဘိဝါဒေတွာန သုဗ္ဗတံ။

ဥဘော ဟတ္ထေဟိ ပဂ္ဂယှ၊ ကောလံ ဗုဒ္ဓဿဒါသဟံ။

၃၈။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ကောလဒါနဿိဒံ ဖလံ။

၃၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂယာကဿပေါ ထေရော ဣမာ ဂါထာယော

အဘာသိတ္ထာတိ။

ဂယာကဿပတ္ထေရဿာပဒါနံ တတိယံ။

၄။ ကိမိလတ္ထေရအပဒါနံ

၄၂။

‘‘နိဗ္ဗုတေ ကကုသန္ဓမှိ၊ ဗြာဟ္မဏမှိ ဝုသီမတိ။

ဂဟေတွာ သလလံ မာလံ၊ မဏ္ဍပံ ကာရယိံ အဟံ။

၄၃။

‘‘တာဝတိံသံ ဂတော သန္တော၊ လဘိမှ [လဘာမိ (က။)] ဗျမှမုတ္တမံ။

အညေ ဒေဝေတိရောစာမိ၊ ပုညကမ္မဿိဒံ ဖလံ။

၄၄။

‘‘ဒိဝါ ဝါ ယဒိ ဝါ ရတ္တိံ၊ စင်္ကမန္တော ဌိတော စဟံ။

ဆန္နော သလလပုပ္ဖေဟိ၊ ပုညကမ္မဿိဒံ ဖလံ။

၄၅။

‘‘ဣမသ္မိံယေဝ ကပ္ပမှိ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၆။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၇။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိမိလော [ကိမ္ဗိလော (သီ။)] ထေရော ဣမာ ဂါထာယော

အဘာသိတ္ထာတိ။

ကိမိလတ္ထေရဿာပဒါနံ စတုတ္ထံ။

၅။ ဝဇ္ဇီပုတ္တတ္ထေရအပဒါနံ

၄၉။

‘‘သဟဿရံသီ ဘဂဝါ၊ သယမ္ဘူ အပရာဇိတော။

ဝိဝေကာ ဝုဋ္ဌဟိတွာန၊ ဂေါစရာယာဘိနိက္ခမိ။

၅၀။

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ။

ပသန္နစိတ္တော သုမနော၊ သဝဏ္ဋံ အဒဒိံ ဖလံ။

၅၁။

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၅၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝဇ္ဇီပုတ္တော ထေရော ဣမာ ဂါထာယော

အဘာသိတ္ထာတိ။

ဝဇ္ဇီပုတ္တတ္ထေရဿာပဒါနံ ပဉ္စမံ။

၆။ ဥတ္တရတ္ထေရအပဒါနံ

၅၅။

‘‘သုမေဓေါ နာမ သမ္ဗုဒ္ဓေါ၊ ဗာတ္တိံသဝရလက္ခဏော။

ဝိဝေကကာမော ဘဂဝါ၊ ဟိမဝန္တမုပါဂမိ။

၅၆။

‘‘အဇ္ဈောဂါဟေတွာ ဟိမဝန္တံ၊ အဂ္ဂေါ ကာရုဏိကော မုနိ။

ပလ္လင်္ကံ အာဘုဇိတွာန၊ နိသီဒိ ပုရိသုတ္တမော။

၅၇။

‘‘ဝိဇ္ဇဓရော တဒါ အာသိံ၊ အန္တလိက္ခစရော အဟံ။

တိသူလံ သုဂတံ ဂယှ၊ ဂစ္ဆာမိ အမ္ဗရေ တဒါ။

၅၈။

‘‘ပဗ္ဗတဂ္ဂေ ယထာ အဂ္ဂိ၊ ပုဏ္ဏမာယေဝ စန္ဒိမာ။

ဝနံ ဩဘာသတေ ဗုဒ္ဓေါ၊ သာလရာဇာဝ ဖုလ္လိတော။

၅၉။

‘‘ဝနဂ္ဂါ နိက္ခမိတွာန၊ ဗုဒ္ဓရံသီဘိဓါဝရေ [ဗုဒ္ဓရံသီ ဝိဓါဝရေ (သီ။ က။)]။

နဠဂ္ဂိဝဏ္ဏသင်္ကာသာ [နဠဂ္ဂိဝ နသင်္ကာသံ (သီ။)]၊ ဒိသွာ စိတ္တံ ပသာဒယိံ။

၆၀။

‘‘ဝိစိနံ အဒ္ဒသံ ပုပ္ဖံ၊ ကဏိကာရံ ဒေဝဂန္ဓိကံ။

တီဏိ ပုပ္ဖာနိ အာဒါယ၊ ဗုဒ္ဓသေဋ္ဌမပူဇယိံ။

၆၁။

‘‘ဗုဒ္ဓဿ အာနုဘာဝေန၊ တီဏိ ပုပ္ဖာနိ မေ တဒါ။

ဥဒ္ဓံ ဝဏ္ဋာ အဓေါပတ္တာ၊ ဆာယံ ကုဗ္ဗန္တိ သတ္ထုနော။

၆၂။

‘‘တေန ကမ္မေန သုကတေန၊ စေတနာပဏိဓီဟိ စ။

ဇဟိတွာ မာနုသံ ဒေဟံ တာဝတိံသမဂစ္ဆဟံ။

၆၃။

‘‘တတ္ထ မေ သုကတံ ဗျမှံ၊ ကဏိကာရီတိ [ကဏိကာရောတိ (သီ။)] ဉာယတိ။

သဋ္ဌိယောဇနမုဗ္ဗေဓံ၊ တိံသယောဇနဝိတ္ထတံ။

၆၄။

‘‘သဟဿကဏ္ဍံ သတဘေဏ္ဍု၊ ဓဇာလု ဟရိတာမယံ။

သတသဟဿနိယျူဟာ [သတသဟဿာနိ ဗ္ယူဟာနိ (သီ။)]၊ ဗျမှေ ပါတုဘဝိံသု [ပါတုရဟံသု (သီ။)၊ ပါတုရဟိံသု (က။)] မေ။

၆၅။

‘‘သောဏ္ဏမယာ မဏိမယာ၊ လောဟိတင်္ကမယာပိ စ။

ဖလိကာပိ စ ပလ္လင်္ကာ၊ ယေနိစ္ဆကာ ယဒိစ္ဆကာ။

၆၆။

‘‘မဟာရဟဉ္စ သယနံ၊ တူလိကာ ဝိကတီယုတံ။

ဥဒ္ဓလောမိဉ္စ ဧကန္တံ၊ ဗိမ္ဗောဟနသမာယုတံ။

၆၇။

‘‘ဘဝနာ နိက္ခမိတွာန၊ စရန္တော ဒေဝစာရိကံ။

ယထာ ဣစ္ဆာမိ [ယထာ ဂစ္ဆာမိ (သီ။)] ဂမနံ၊ ဒေဝသံဃပုရက္ခတော။

၆၈။

‘‘ပုပ္ဖဿ ဟေဋ္ဌာ တိဋ္ဌာမိ၊ ဥပရိစ္ဆဒနံ မမ။

သမန္တာ ယောဇနသတံ၊ ကဏိကာရေဟိ ဆာဒိတံ။

၆၉။

‘‘သဋ္ဌိတုရိယသဟဿာနိ ၊ သာယပါတံ ဥပဋ္ဌဟုံ။

ပရိဝါရေန္တိ မံ နိစ္စံ၊ ရတ္တိန္ဒိဝမတန္ဒိတာ။

၇၀။

‘‘တတ္ထ နစ္စေဟိ ဂီတေဟိ၊ တာလေဟိ ဝါဒိတေဟိ စ။

ရမာမိ ခိဍ္ဍာ ရတိယာ၊ မောဒါမိ ကာမကာမဟံ။

၇၁။

‘‘တတ္ထ ဘုတွာ ပိဝိတွာ စ၊ မောဒါမိ တိဒသေ တဒါ။

နာရီဂဏေဟိ သဟိတော၊ မောဒါမိ ဗျမှမုတ္တမေ။

၇၂။

‘‘သတာနံ ပဉ္စက္ခတ္တုဉ္စ၊ ဒေဝရဇ္ဇမကာရယိံ။

သတာနံ တီဏိက္ခတ္တုဉ္စ၊ စက္ကဝတ္တီ အဟောသဟံ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၇၃။

‘‘ဘဝေ ဘဝေ သံသရန္တော၊ မဟာဘောဂံ လဘာမဟံ။

ဘောဂေ မေ ဦနတာ နတ္ထိ၊ ဗုဒ္ဓပူဇာယိဒံ ဖလံ။

၇၄။

‘‘ဒုဝေ ဘဝေ သံသရာမိ၊ ဒေဝတ္တေ အထ မာနုသေ။

အညံ ဂတိံ န ဇာနာမိ၊ ဗုဒ္ဓပူဇာယိဒံ ဖလံ။

၇၅။

‘‘ဒုဝေ ကုလေ ပဇာယာမိ [ယတ္ထ ပစ္ဆာ ပဇာယာမိ (သီ။)]၊ ခတ္တိယေ စာပိ ဗြာဟ္မဏေ။

နီစေ ကုလေ န ဇာယာမိ၊ ဗုဒ္ဓပူဇာယိဒံ ဖလံ။

၇၆။

‘‘ဟတ္ထိယာနံ အဿယာနံ၊ သိဝိကံ သန္ဒမာနိကံ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၇၇။

‘‘ဒါသီဂဏံ ဒါသဂဏံ၊ နာရိယော သမလင်္ကတာ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၇၈။

‘‘ကောသေယျကမ္ဗလိယာနိ၊ ခေါမကပ္ပါသိကာနိ စ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၇၉။

‘‘နဝဝတ္ထံ နဝဖလံ၊ နဝဂ္ဂရသဘောဇနံ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၈၀။

‘‘ဣမံ ခါဒ ဣမံ ဘုဉ္ဇ၊ ဣမမှိ သယနေ သယ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၈၁။

‘‘သဗ္ဗတ္ထ ပူဇိတော ဟောမိ၊ ယသော အစ္စုဂ္ဂတော မမ။

မဟာပက္ခော [မဟေသက္ခော (က။)] သဒါ ဟောမိ၊ အဘေဇ္ဇပရိသော သဒါ။

ဉာတီနံ ဥတ္တမော ဟောမိ၊ ဗုဒ္ဓပူဇာယိဒံ ဖလံ။

၈၂။

‘‘သီတံ ဥဏှံ န ဇာနာမိ၊ ပရိဠာဟော န ဝိဇ္ဇတိ။

အထော စေတသိကံ ဒုက္ခံ၊ ဟဒယေ မေ န ဝိဇ္ဇတိ။

၈၃။

‘‘သုဝဏ္ဏဝဏ္ဏော ဟုတွာန၊ သံသရာမိ ဘဝါဘဝေ။

ဝေဝဏ္ဏိယံ န ဇာနာမိ၊ ဗုဒ္ဓပူဇာယိဒံ ဖလံ။

၈၄။

‘‘ဒေဝလောကာ စဝိတွာန၊ သုက္ကမူလေန စောဒိတော။

သာဝတ္ထိယံ ပုရေ ဇာတော၊ မဟာသာလေသု အဍ္ဎကေ။

၈၅။

‘‘ပဉ္စ ကာမဂုဏေ ဟိတွာ၊ ပဗ္ဗဇိံ အနဂါရိယံ။

ဇာတိယာ သတ္တဝဿောဟံ၊ အရဟတ္တမပါပုဏိံ။

၈၆။

‘‘ဥပသမ္ပဒါယီ ဗုဒ္ဓေါ၊ ဂုဏမညာယ စက္ခုမာ။

တရုဏော ပူဇနီယောဟံ၊ ဗုဒ္ဓပူဇာယိဒံ ဖလံ။

၈၇။

‘‘ဒိဗ္ဗစက္ခုဝိသုဒ္ဓံ မေ၊ သမာဓိကုသလော အဟံ။

အဘိညာပါရမိပ္ပတ္တော၊ ဗုဒ္ဓပူဇာယိဒံ ဖလံ။

၈၈။

‘‘ပဋိသမ္ဘိဒါ အနုပ္ပတ္တော၊ ဣဒ္ဓိပါဒေသု ကောဝိဒေါ။

ဓမ္မေသု ပါရမိပ္ပတ္တော၊ ဗုဒ္ဓပူဇာယိဒံ ဖလံ။

၈၉။

‘‘တိံသကပ္ပသဟဿမှိ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၉၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၉၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၉၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥတ္တရော ထေရော ဣမာ ဂါထာယော

အဘာသိတ္ထာတိ။

ဥတ္တရတ္ထေရဿာပဒါနံ ဆဋ္ဌံ။

၇။ အပရဥတ္တရတ္ထေရအပဒါနံ

၉၃။

‘‘နိဗ္ဗုတေ လောကနာထမှိ၊ သိဒ္ဓတ္ထေ လောကနာယကေ။

မမ ဉာတီ သမာနေတွာ၊ ဓါတုပူဇံ အကာသဟံ။

၉၄။

‘‘စတုန္နဝုတိတော ကပ္ပေ၊ ယံ ဓါတုမဘိပူဇယိံ။

ဒုဂ္ဂတိံ နာဘိဇာနာမိ၊ ဓါတုပူဇာယိဒံ ဖလံ။

၉၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၉၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၉၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အပရဥတ္တရတ္ထေရော ဣမာ ဂါထာယော

အဘာသိတ္ထာတိ။

အပရဿ ဥတ္တရတ္ထေရဿာပဒါနံ သတ္တမံ။

၈။ ဘဒ္ဒဇိတ္ထေရအပဒါနံ

၉၈။

‘‘ဩဂယှ ယံ ပေါက္ခရဏိံ၊ နာနာကုဉ္ဇရသေဝိတံ။

ဥဒ္ဓရာမိ ဘိသံ တတ္ထ၊ ဃာသဟေတု အဟံ တဒါ။

၉၉။

‘‘ဘဂဝါ တမှိ သမယေ၊ ပဒုမုတ္တရသဝှယော။

ရတ္တမ္ဗရဓရော ဗုဒ္ဓေါ၊ ဂစ္ဆတေ အနိလဉ္ဇသေ။

၁၀၀။

‘‘ဓုနန္တော ပံသုကူလာနိ၊ သဒ္ဒံ အဿောသဟံ တဒါ။

ဥဒ္ဓံ နိဇ္ဈာယမာနောဟံ၊ အဒ္ဒသံ လောကနာယကံ။

၁၀၁။

‘‘တတ္ထေဝ ဌိတကော သန္တော၊ အာယာစိံ လောကနာယကံ။

မဓုံ ဘိသေဟိ သဟိတံ၊ ခီရံ သပ္ပိံ မုဠာလိကံ [မဓုံ ဘိသေဟိ ပစတိ၊ ခီရသပ္ပိ မုလာလိဘိ (က။) ဘိသဒါယကတ္ထေရာပဒါနေပိ]။

၁၀၂။

‘‘ပဋိဂ္ဂဏှာတု မေ ဗုဒ္ဓေါ၊ အနုကမ္ပာယ စက္ခုမာ။

တတော ကာရုဏိကော သတ္ထာ၊ ဩရောဟိတွာ မဟာယသော။

၁၀၃။

‘‘ပဋိဂ္ဂဏှိ မမ ဘိက္ခံ၊ အနုကမ္ပာယ စက္ခုမာ။

ပဋိဂ္ဂဟေတွာ သမ္ဗုဒ္ဓေါ၊ အကာ မေ အနုမောဒနံ။

၁၀၄။

‘‘‘သုခီ ဟောတု မဟာပုည၊ ဂတိ တုယှံ သမိဇ္ဈတု။

ဣမိနာ ဘိသဒါနေန၊ လဘဿု ဝိပုလံ သုခံ’။

၁၀၅။

‘‘ဣဒံ ဝတွာန သမ္ဗုဒ္ဓေါ၊ ဇလဇုတ္တမနာမကော။

ဘိက္ခမာဒါယ သမ္ဗုဒ္ဓေါ၊ အာကာသေနာဂမာ ဇိနော။

၁၀၆။

‘‘တတော ဘိသံ ဂဟေတွာန၊ အဂစ္ဆိံ မမ အဿမံ။

ဘိသံ ရုက္ခေ လဂ္ဂေတွာန၊ မမ ဒါနံ အနုဿရိံ။

၁၀၇။

‘‘မဟာဝါတော ဥဋ္ဌဟိတွာ၊ သဉ္စာလေသိ ဝနံ တဒါ။

အာကာသော အဘိနာဒိတ္ထ၊ အသနီ စ ဖလီ တဒါ။

၁၀၈။

‘‘တတော မေ အသနီပါတော၊ မတ္ထကေ နိပတီ တဒါ။

သောဟံ နိသိန္နကော သန္တော၊ တတ္ထ ကာလင်္ကတော အဟံ။

၁၀၉။

‘‘ပုညကမ္မေန သညုတ္တော၊ တုသိတံ ဥပပဇ္ဇဟံ။

ကဠေဝရံ မေ ပတိတံ၊ ဒေဝလောကေ ရမာမဟံ။

၁၁၀။

‘‘ဆဠသီတိသဟဿာနိ၊ နာရိယော သမလင်္ကတာ။

သာယံ ပါတံ ဥပဋ္ဌန္တိ၊ ဘိသဒါနဿိဒံ ဖလံ။

၁၁၁။

‘‘မနုဿယောနိမာဂန္တွာ၊ သုခိတော ဟောမဟံ တဒါ။

ဘောဂါ မေ ဦနတာ နတ္ထိ၊ ဘိသဒါနဿိဒံ ဖလံ။

၁၁၂။

‘‘အနုကမ္ပိတကော တေန၊ ဒေဝဒေဝေန တာဒိနာ။

သဗ္ဗာသဝပရိက္ခီဏာ၊ နတ္ထိ ဒါနိ ပုနဗ္ဘဝေါ။

၁၁၃။

‘‘သတသဟဿိတော ကပ္ပေ၊ ယံ ဘိသံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဘိသဒါနဿိဒံ ဖလံ။

၁၁၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၁၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘဒ္ဒဇိတ္ထေရော ဣမာ ဂါထာယော

အဘာသိတ္ထာတိ။

ဘဒ္ဒဇိတ္ထေရဿာပဒါနံ အဋ္ဌမံ။

၉။ သိဝကတ္ထေရအပဒါနံ

၁၁၇။

‘‘ဧသနာယ စရန္တဿ၊ ဝိပဿိဿ မဟေသိနော။

ရိတ္တကံ ပတ္တံ ဒိသွာန၊ ကုမ္မာသံ ပူရယိံ အဟံ။

၁၁၈။

‘‘ဧကနဝုတိတော ကပ္ပေ၊ ယံ ဘိက္ခမဒဒိံ တဒါ။

ဒုဂ္ဂတိံ နာဘိဇာနာမိ၊ ကုမ္မာသဿ ဣဒံ ဖလံ။

၁၁၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၂၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၂၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သိဝကတ္ထေရော ဣမာ ဂါထာယော

အဘာသိတ္ထာတိ။

သိဝကတ္ထေရဿာပဒါနံ နဝမံ။

၁၀။ ဥပဝါနတ္ထေရအပဒါနံ

၁၂၂။

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။

ဇလိတွာ အဂ္ဂိက္ခန္ဓောဝ၊ သမ္ဗုဒ္ဓေါ ပရိနိဗ္ဗုတော။

၁၂၃။

‘‘မဟာဇနာ သမာဂမ္မ၊ ပူဇယိတွာ တထာဂတံ။

စိတံ ကတွာန သုဂတံ၊ သရီရံ အဘိရောပယုံ။

၁၂၄။

‘‘သရီရကိစ္စံ ကတွာန၊ ဓါတုံ တတ္ထ သမာနယုံ။

သဒေဝမနုဿာ သဗ္ဗေ၊ ဗုဒ္ဓထူပံ အကံသု တေ။

၁၂၅။

‘‘ပဌမာ ကဉ္စနမယာ၊ ဒုတိယာ စ မဏိမယာ။

တတိယာ ရူပိယမယာ၊ စတုတ္ထီ ဖလိကာမယာ။

၁၂၆။

‘‘တတ္ထ ပဉ္စမိကာ စေဝ [တတ္ထ ပဉ္စမိကာ စေတိ (သီ။)]၊ လောဟိတင်္ကမယာ အဟု။

ဆဋ္ဌာ မသာရဂလ္လဿ၊ သဗ္ဗံ ရတနမယူပရိ။

၁၂၇။

‘‘ဇင်္ဃာ မဏိမယာ အာသိ၊ ဝေဒိကာ ရတနာမယာ။

သဗ္ဗသောဏ္ဏမယော ထူပေါ၊ ဥဒ္ဓံ ယောဇနမုဂ္ဂတော။

၁၂၈။

‘‘ဒေဝါ တတ္ထ သမာဂန္တွာ၊ ဧကတော မန္တယုံ တဒါ။

‘မယမ္ပိ ထူပံ ကဿာမ၊ လောကနာထဿ တာဒိနော။

၁၂၉။

‘‘‘ဓါတု အာဝေဏိကာ နတ္ထိ၊ သရီရံ ဧကပိဏ္ဍိတံ။

ဣမမှိ ဗုဒ္ဓထူပမှိ၊ ကဿာမ ကဉ္စုကံ မယံ’။

၁၃၀။

‘‘ဒေဝါ သတ္တဟိ ရတ္နေဟိ၊ အညံ ဝဍ္ဎေသုံ ယောဇနံ။

ထူပေါ ဒွိယောဇနုဗ္ဗေဓေါ၊ တိမိရံ ဗျပဟန္တိ သော။

၁၃၁။

‘‘နာဂါ တတ္ထ သမာဂန္တွာ၊ ဧကတော မန္တယုံ တဒါ။

‘မနုဿာ စေဝ ဒေဝါ စ၊ ဗုဒ္ဓထူပံ အကံသု တေ။

၁၃၂။

‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ။

မယမ္ပိ ထူပံ ကဿာမ၊ လောကနာထဿ တာဒိနော’။

၁၃၃။

‘‘ဣန္ဒနီလံ မဟာနီလံ၊ အထော ဇောတိရသံ မဏိံ။

ဧကတော သန္နိပါတေတွာ၊ ဗုဒ္ဓထူပံ အဆာဒယုံ။

၁၃၄။

‘‘သဗ္ဗံ မဏိမယံ အာသိ၊ ယာဝတာ [တာဝတာ (က။)] ဗုဒ္ဓစေတိယံ။

တိယောဇနသမုဗ္ဗေဓံ၊ အာလောကကရဏံ တဒါ။

၁၃၅။

‘‘ဂရုဠာ စ သမာဂန္တွာ၊ ဧကတော မန္တယုံ တဒါ။

‘မနုဿာ ဒေဝနာဂါ စ၊ ဗုဒ္ဓပူဇံ အကံသု တေ။

၁၃၆။

‘‘‘မာ နော ပမတ္တာ အဿုမှ၊ အပ္ပမတ္တာ သဒေဝကာ။

မယမ္ပိ ထူပံ ကဿာမ၊ လောကနာထဿ တာဒိနော’။

၁၃၇။

‘‘သဗ္ဗံ မဏိမယံ ထူပံ၊ အကရုံ တေ စ ကဉ္စုကံ။

ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ။

၁၃၈။

‘‘စတုယောဇနမုဗ္ဗေဓေါ၊ ဗုဒ္ဓထူပေါ ဝိရောစတိ။

ဩဘာသေတိ ဒိသာ သဗ္ဗာ၊ သတရံသီဝ ဥဂ္ဂတော။

၁၃၉။

‘‘ကုမ္ဘဏ္ဍာ စ သမာဂန္တွာ၊ ဧကတော မန္တယုံ တဒါ။

‘မနုဿာ စေဝ ဒေဝါ စ၊ နာဂါ စ ဂရုဠာ တထာ။

၁၄၀။

‘‘‘ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ။

မာ နော ပမတ္တာ အဿုမှ၊ အပ္ပမတ္တာ သဒေဝကာ။

၁၄၁။

‘‘‘မယမ္ပိ ထူပံ ကဿာမ၊ လောကနာထဿ တာဒိနော။

ရတနေဟိ ဆာဒေဿာမ၊ အာယတံ ဗုဒ္ဓစေတိယံ’။

၁၄၂။

‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ။

ပဉ္စယောဇနမုဗ္ဗေဓေါ၊ ထူပေါ ဩဘာသတေ တဒါ။

၁၄၃။

‘‘ယက္ခာ တတ္ထ သမာဂန္တွာ၊ ဧကတော မန္တယုံ တဒါ။

‘မနုဿာ ဒေဝနာဂါ စ၊ ဂရုဠာ စ ကုမ္ဘဏ္ဍကာ။

၁၄၄။

‘‘‘ပစ္စေကံ ဗုဒ္ဓသေဋ္ဌဿ၊ အကံသု ထူပမုတ္တမံ။

မာ နော ပမတ္တာ အဿုမှ၊ အပ္ပမတ္တာ သဒေဝကာ။

၁၄၅။

‘‘‘မယမ္ပိ ထူပံ ကဿာမ၊ လောကနာထဿ တာဒိနော။

ဖလိကာ ဆာဒယိဿာမ၊ အာယတံ ဗုဒ္ဓစေတိယံ’။

၁၄၆။

‘‘ယောဇနံ တေပိ ဝဍ္ဎေသုံ၊ အာယတံ ဗုဒ္ဓစေတိယံ။

ဆယောဇနိကမုဗ္ဗေဓေါ၊ ထူပေါ ဩဘာသတေ တဒါ။

၁၄၇။

‘‘ဂန္ဓဗ္ဗာ စ သမာဂန္တွာ၊ ဧကတော မန္တယုံ တဒါ။

‘မနုဇာ ဒေဝတာ နာဂါ၊ ကုမ္ဘဏ္ဍာ ဂရုဠာ တထာ [ကုမ္ဘဏ္ဍာ စ ယက္ခာ တထာ (သီ။)]။

၁၄၈။

‘‘‘သဗ္ဗေ အကံသု ဗုဒ္ဓထူပံ၊ မယမေတ္ထ အကာရကာ။

မယမ္ပိ ထူပံ ကဿာမ၊ လောကနာထဿ တာဒိနော’။

၁၄၉။

‘‘ဝေဒိယော သတ္တ ကတွာန၊ ဓဇံ ဆတ္တံ အကံသု တေ။

သဗ္ဗသောဏ္ဏမယံ ထူပံ၊ ဂန္ဓဗ္ဗာ ကာရယုံ တဒါ။

၁၅၀။

‘‘သတ္တယောဇနမုဗ္ဗေဓေါ၊ ထူပေါ ဩဘာသတေ တဒါ။

ရတ္တိန္ဒိဝါ န ဉာယန္တိ၊ အာလောကော ဟောတိ သဗ္ဗဒါ။

၁၅၁။

‘‘အဘိဘောန္တိ န တဿာဘာ၊ စန္ဒသူရာ သတာရကာ။

သမန္တာ ယောဇနသတေ၊ ပဒီပေါပိ န ပဇ္ဇလိ။

၁၅၂။

‘‘တေန ကာလေန ယေ ကေစိ၊ ထူပံ ပူဇေန္တိ မာနုသာ။

န တေ ထူပံ အာရုဟန္တိ၊ အမ္ဗရေ ဥက္ခိပန္တိ တေ။

၁၅၃။

‘‘ဒေဝေဟိ ဌပိတော ယက္ခော၊ အဘိသမ္မတနာမကော။

ဓဇံ ဝါ ပုပ္ဖဒါမံ ဝါ၊ အဘိရောပေတိ ဥတ္တရိံ။

၁၅၄။

‘‘န တေ ပဿန္တိ တံ ယက္ခံ၊ ဒါမံ ပဿန္တိ ဂစ္ဆတော။

ဧဝံ ပဿိတွာ ဂစ္ဆန္တာ၊ သဗ္ဗေ ဂစ္ဆန္တိ သုဂ္ဂတိံ။

၁၅၅။

‘‘ဝိရုဒ္ဓါ ယေ ပါဝစနေ၊ ပသန္နာ ယေ စ သာသနေ။

ပါဋိဟီရံ ဒဋ္ဌုကာမာ၊ ထူပံ ပူဇေန္တိ မာနုသာ။

၁၅၆။

‘‘နဂရေ ဟံသဝတိယာ၊ အဟောသိံ ဘတကော တဒါ။

အာမောဒိတံ ဇနံ ဒိသွာ၊ ဧဝံ စိန္တေသဟံ တဒါ။

၁၅၇။

‘‘‘ဥဠာရော ဘဂဝါ နေသော၊ ယဿ ဓါတုဃရေ ဒိသံ။

ဣမာ စ ဇနတာ တုဋ္ဌာ၊ ကာရံ ကုဗ္ဗံ န တပ္ပရေ။

၁၅၈။

‘‘‘အဟမ္ပိ ကာရံ ကဿာမိ၊ လောကနာထဿ တာဒိနော။

တဿ ဓမ္မေသု ဒါယာဒေါ၊ ဘဝိဿာမိ အနာဂတေ’။

၁၅၉။

‘‘သုဓေါတံ ရဇကေနာဟံ၊ ဥတ္တရေယျံ ပဋံ မမ။

ဝေဠဂ္ဂေ အာလဂ္ဂေတွာန၊ ဓဇံ ဥက္ခိပိမမ္ဗရေ။

၁၆၀။

‘‘အဘိသမ္မတကော ဂယှ၊ အမ္ဗရေ ဟာသိ မေ ဓဇံ။

ဝါတေရိတံ ဓဇံ ဒိသွာ၊ ဘိယျော ဟာသံ ဇနေသဟံ။

၁၆၁။

‘‘တတ္ထ စိတ္တံ ပသာဒေတွာ၊ သမဏံ ဥပသင်္ကမိံ။

တံ ဘိက္ခုံ အဘိဝါဒေတွာ၊ ဝိပါကံ ပုစ္ဆဟံ ဓဇေ။

၁၆၂။

‘‘သော မေ ကထေသိ အာနန္ဒီ၊ ဣတိသဉ္ဇနနံ မမ။

‘တဿ ဓဇဿ ဝိပါကံ၊ အနုဘောဿသိ သဗ္ဗဒါ။

၁၆၃။

‘‘‘ဟတ္ထိအဿရထာပတ္တီ၊ သေနာ စ စတုရင်္ဂိနီ။

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။

၁၆၄။

‘‘‘သဋ္ဌိတုရိယသဟဿာနိ၊ ဘေရိယော သမလင်္ကတာ။

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။

၁၆၅။

‘‘‘ဆဠသီတိသဟဿာနိ ၊ နာရိယော သမလင်္ကတာ။

ဝိစိတ္တဝတ္ထာဘရဏာ၊ အာမုက္ကမဏိကုဏ္ဍလာ။

၁၆၆။

‘‘‘အာဠာရပမှာ ဟသုလာ၊ သုသညာ [သုတ္ထနာ (သီ။) အပ။ ထေရ ၂။၄၈။၁၉ မဏိပူဇကတ္ထေရာပဒါနေပိ] တနုမဇ္ဈိမာ။

ပရိဝါရေဿန္တိ တံ နိစ္စံ၊ ဓဇဒါနဿိဒံ ဖလံ။

၁၆၇။

‘‘‘တိံသကပ္ပသဟဿာနိ၊ ဒေဝလောကေ ရမိဿသိ။

အသီတိက္ခတ္တုံ ဒေဝိန္ဒော၊ ဒေဝရဇ္ဇံ ကရိဿသိ။

၁၆၈။

‘‘‘သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၁၆၉။

‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ။

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။

၁၇၀။

‘‘‘ဒေဝလောကာ စဝိတွာန၊ သုက္ကမူလေန စောဒိတော။

ပုညကမ္မေန သညုတ္တော၊ ဗြဟ္မဗန္ဓု ဘဝိဿသိ။

၁၇၁။

‘‘‘အသီတိကောဋိံ ဆဍ္ဍေတွာ၊ ဒါသေ ကမ္မကရေ ဗဟူ။

ဂေါတမဿ ဘဂဝတော၊ သာသနေ ပဗ္ဗဇိဿသိ။

၁၇၂။

‘‘‘အာရာဓယိတွာ သမ္ဗုဒ္ဓံ၊ ဂေါတမံ သကျပုင်္ဂဝံ။

ဥပဝါနောတိ နာမေန၊ ဟေဿသိ သတ္ထု သာဝကော’။

၁၇၃။

‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ။

သုမုတ္တော သရဝေဂေါဝ၊ ကိလေသေ ဈာပယိံ [ကိလေသာ ဈာပိတာ (သီ။)] မမ။

၁၇၄။

‘‘စက္ကဝတ္တိဿ သန္တဿ၊ စာတုဒ္ဒီပိဿရဿ မေ။

တီဏိ ယောဇနာနိ သာမန္တာ၊ ဥဿီယန္တိ ဓဇာ သဒါ။

၁၇၅။

‘‘သတသဟဿိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ။

၁၇၆။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၇၇။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၇၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥပဝါနတ္ထေရော ဣမာ ဂါထာယော

အဘာသိတ္ထာတိ။

ဥပဝါနတ္ထေရဿာပဒါနံ ဒသမံ။

၁၁။ ရဋ္ဌပါလတ္ထေရအပဒါနံ

၁၇၉။

‘‘ပဒုမုတ္တရဿ ဘဂဝတော၊ လောကဇေဋ္ဌဿ တာဒိနော။

ဝရနာဂေါ မယာ ဒိန္နော၊ ဤသာဒန္တော ဥရူဠှဝါ။

၁၈၀။

‘‘သေတစ္ဆတ္တောပသောဘိတော၊ သကပ္ပနော [သီဒဗ္ဗနော (သီ။)] သဟတ္ထိပေါ။

အဂ္ဃါပေတွာန တံ သဗ္ဗံ၊ သံဃာရာမံ အကာရယိံ။

၁၈၁။

‘‘စတုပညာသသဟဿာနိ၊ ပါသာဒေ ကာရယိံ အဟံ။

မဟောဃဒါနံ [မဟဂ္ဃဉ္စ (သီ။)၊ မယာ ဘတ္တံ (က။) အပ။ ထေရ ၁။၂။၉၉] ကရိတွာန၊ နိယျာဒေသိံ မဟေသိနော။

၁၈၂။

‘‘အနုမောဒိ မဟာဝီရော၊ သယမ္ဘူ အဂ္ဂပုဂ္ဂလော။

သဗ္ဗေ ဇနေ ဟာသယန္တော၊ ဒေသေသိ အမတံ ပဒံ။

၁၈၃။

‘‘တံ မေ ဗုဒ္ဓေါ ဝိယာကာသိ၊ ဇလဇုတ္တမနာမကော။

ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။

၁၈၄။

‘‘‘စတုပညာသသဟဿာနိ၊ ပါသာဒေ ကာရယီ အယံ။

ကထယိဿာမိ ဝိပါကံ၊ သုဏာထ မမ ဘာသတော။

၁၈၅။

‘‘‘အဋ္ဌာရသသဟဿာနိ၊ ကူဋာဂါရာ ဘဝိဿရေ။

ဗျမ္ဟုတ္တမမှိ နိဗ္ဗတ္တာ၊ သဗ္ဗသောဏ္ဏမယာ စ တေ။

၁၈၆။

‘‘‘ပညာသက္ခတ္တုံ ဒေဝိန္ဒော၊ ဒေဝရဇ္ဇံ ကရိဿတိ။

အဋ္ဌပညာသက္ခတ္တုဉ္စ၊ စက္ကဝတ္တီ ဘဝိဿတိ။

၁၈၇။

‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ။

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။

၁၈၈။

‘‘‘ဒေဝလောကာ စဝိတွာန၊ သုက္ကမူလေန စောဒိတော။

အဍ္ဎေ ကုလေ မဟာဘောဂေ၊ နိဗ္ဗတ္တိဿတိ တာဝဒေ။

၁၈၉။

‘‘‘သော ပစ္ဆာ ပဗ္ဗဇိတွာန၊ သုက္ကမူလေန စောဒိတော။

ရဋ္ဌပါလောတိ နာမေန၊ ဟေဿတိ သတ္ထု သာဝကော။

၁၉၀။

‘‘‘ပဓါနပဟိတတ္တော သော၊ ဥပသန္တော နိရူပဓိ။

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’။

၁၉၁။

‘‘ဥဋ္ဌာယ အဘိနိက္ခမ္မ၊ ဇဟိတာ ဘောဂသမ္ပဒါ။

ခေဠပိဏ္ဍေဝ ဘောဂမှိ၊ ပေမံ မယှံ န ဝိဇ္ဇတိ။

၁၉၂။

‘‘ဝီရိယံ မေ ဓုရဓေါရယှံ၊ ယောဂက္ခေမာဓိဝါဟနံ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၁၉၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၉၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၉၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရဋ္ဌပါလော ထေရော ဣမာ ဂါထာယော

အဘာသိတ္ထာတိ။

ရဋ္ဌပါလတ္ထေရဿာပဒါနံ ဧကာဒသမံ။

ယသဝဂ္ဂေါ ဆပညာသမော။

တဿုဒ္ဒါနံ –

ယသော နဒီကဿပေါ စ၊ ဂယာကိမိလဝဇ္ဇိနော။

ဒုဝေ ဥတ္တရာ ဘဒ္ဒဇီ၊ သိဝကော ဥပဝါဟနော။

ရဋ္ဌပါလော ဧကသတံ၊ ဂါထာနံ ပဉ္စနဝုတိ။

ထေရာပဒါနံ သမတ္တံ။

ဧတ္တာဝတာ ဗုဒ္ဓါပဒါနဉ္စ ပစ္စေကာပဒါနဉ္စ ထေရာပဒါနဉ္စ

သမတ္တာနိ။