တိဏဒါယကဝဂ္ဂ

၅၃။ တိဏဒါယကဝဂ္ဂ

၁။ တိဏမုဋ္ဌိဒါယကတ္ထေရအပဒါန

၁။

‘‘ဟိမဝန္တဿာဝိဒူရေ ၊ လမ္ဗကော နာမ ပဗ္ဗတော။

တတ္ထေဝ တိဿော [တတ္ထောပတိဿော (သီ။ ဣ။ က။)] သမ္ဗုဒ္ဓေါ၊ အဗ္ဘောကာသမှိ စင်္ကမိ။

၂။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

ဒိသွာန တံ ဒေဝဒေဝံ၊ တိဏမုဋ္ဌိမဒါသဟံ။

၃။

‘‘နိသီဒနတ္ထံ ဗုဒ္ဓဿ၊ ဒတွာ စိတ္တံ ပသာဒယိံ။

သမ္ဗုဒ္ဓံ အဘိဝါဒေတွာ၊ ပက္ကာမိံ [ပက္ကမိံ (က။)] ဥတ္တရာမုခေါ။

၄။

‘‘အစိရံ ဂတမတ္တဿ [ဂတမတ္တံ မံ (သီ။ သျာ။)]၊ မိဂရာဇာ အပေါထယိ [အဟေဌယိ (သီ။ သျာ။ ဣ။)]။

သီဟေန ပေါထိတော [ပါတိတော (သီ။ ဣ။)၊ ဃာဋိတော (သျာ။)] သန္တော၊ တတ္ထ ကာလင်္ကတော အဟံ။

၅။

‘‘အာသန္နေ မေ ကတံ ကမ္မံ၊ ဗုဒ္ဓသေဋ္ဌေ အနာသဝေ။

သုမုတ္တော သရဝေဂေါဝ၊ ဒေဝလောကမဂစ္ဆဟံ။

၆။

‘‘ယူပေါ တတ္ထ သုဘော အာသိ၊ ပုညကမ္မာဘိနိမ္မိတော။

သဟဿကဏ္ဍော သတဘေဏ္ဍု၊ ဓဇာလု ဟရိတာမယော။

၇။

‘‘ပဘာ နိဒ္ဓါဝတေ တဿ၊ သတရံသီဝ ဥဂ္ဂတော။

အာကိဏ္ဏော ဒေဝကညာဟိ၊ အာမောဒိံ ကာမကာမိဟံ။

၈။

‘‘ဒေဝလောကာ စဝိတွာန၊ သုက္ကမူလေန စောဒိတော။

အာဂန္တွာန မနုဿတ္တံ၊ ပတ္တောမှိ အာသဝက္ခယံ။

၉။

‘‘စတုန္နဝုတိတော ကပ္ပေ၊ နိသီဒနမဒါသဟံ။

ဒုဂ္ဂတိံ နာဘိဇာနာမိ၊ တိဏမုဋ္ဌေ ဣဒံ ဖလံ။

၁၀။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၁၁။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၁၂။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏမုဋ္ဌိဒါယကော ထေရော ဣမာ ဂါထာယော

အဘာသိတ္ထာတိ။

တိဏမုဋ္ဌိဒါယကတ္ထေရဿာပဒါနံ ပဌမံ။

၂။ မဉ္စဒါယကတ္ထေရအပဒါနံ

၁၃။

‘‘ဝိပဿိနော ဘဂဝတော၊ လောကဇေဋ္ဌဿ တာဒိနော။

ဧကမဉ္စံ [ဧကံ ဝေစ္စံ (သျာ။)၊ ဧကပစ္ဆံ (ဣ။)] မယာ ဒိန္နံ၊ ပသန္နေန သပါဏိနာ။

၁၄။

‘‘ဟတ္ထိယာနံ အဿယာနံ၊ ဒိဗ္ဗယာနံ သမဇ္ဈဂံ။

တေန မဉ္စကဒါနေန၊ ပတ္တောမှိ အာသဝက္ခယံ။

၁၅။

‘‘ဧကနဝုတိတော ကပ္ပေ၊ ယံ မဉ္စမဒဒိံ တဒါ။

ဒုဂ္ဂတိံ နာဘိဇာနာမိ၊ မဉ္စဒါနဿိဒံ ဖလံ။

၁၆။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၇။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဉ္စဒါယကော [ဝေစ္စကဒါယကော (သျာ။), သဒ္ဒသညိကဝဂ္ဂေပိ ဣဒံ§အပဒါနံ ဒိဿတိ] ထေရော ဣမာ ဂါထာယော အဘာသိတ္ထာတိ။

မဉ္စဒါယကတ္ထေရဿာပဒါနံ ဒုတိယံ။

၃။ သရဏဂမနိယတ္ထေရအပဒါနံ

၁၉။

‘‘အာရုဟိမှ တဒါ နာဝံ၊ ဘိက္ခု စာဇီဝိကော စဟံ။

နာဝါယ ဘိဇ္ဇမာနာယ၊ ဘိက္ခု မေ သရဏံ အဒါ။

၂၀။

‘‘ဧကတိံသေ ဣတော ကပ္ပေ၊ ယံ သော မေ သရဏံ အဒါ။

ဒုဂ္ဂတိံ နာဘိဇာနာမိ၊ သရဏဂမနေ ဖလံ။

၂၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သရဏဂမနိယော ထေရော ဣမာ ဂါထာယော

အဘာသိတ္ထာတိ။

သရဏဂမနိယတ္ထေရဿာပဒါနံ တတိယံ။

၄။ အဗ္ဘဉ္ဇနဒါယကတ္ထေရအပဒါနံ

၂၄။

‘‘နဂရေ ဗန္ဓုမတိယာ၊ ရာဇုယျာနေ ဝသာမဟံ။

စမ္မဝါသီ တဒါ အာသိံ၊ ကမဏ္ဍလုဓရော အဟံ။

၂၅။

‘‘အဒ္ဒသံ ဝိမလံ ဗုဒ္ဓံ၊ သယမ္ဘုံ အပရာဇိတံ။

ပဓါနံ ပဟိတတ္တံ တံ၊ ဈာယိံ ဈာနရတံ ဝသိံ [ဣသိံ (သျာ။)]။

၂၆။

‘‘သဗ္ဗကာမသမိဒ္ဓိဉ္စ၊ ဩဃတိဏ္ဏမနာသဝံ။

ဒိသွာ ပသန္နော သုမနော၊ အဗ္ဘဉ္ဇနမဒါသဟံ။

၂၇။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ အဗ္ဘဉ္ဇနဿိဒံ ဖလံ။

၂၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဗ္ဘဉ္ဇနဒါယကော ထေရော ဣမာ ဂါထာယော

အဘာသိတ္ထာတိ။

အဗ္ဘဉ္ဇနဒါယကတ္ထေရဿာပဒါနံ စတုတ္ထံ။

၅။ သုပဋဒါယကတ္ထေရအပဒါနံ

၃၁။

‘‘ဒိဝါဝိဟာရာ နိက္ခန္တော၊ ဝိပဿီ လောကနာယကော။

လဟုံ သုပဋကံ [သုပဋိကံ (သျာ။)၊ ပူပပဝံ (ဣ။)] ဒတွာ၊ ကပ္ပံ သဂ္ဂမှိ မောဒဟံ။

၃၂။

‘‘ဧကနဝုတိတော ကပ္ပေ၊ သုပဋကမဒါသဟံ။

ဒုဂ္ဂတိံ နာဘိဇာနာမိ၊ သုပဋဿ ဣဒံ ဖလံ။

၃၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုပဋဒါယကော ထေရော ဣမာ ဂါထာယော

အဘာသိတ္ထာတိ။

သုပဋဒါယကတ္ထေရဿာပဒါနံ ပဉ္စမံ။

၆။ ဒဏ္ဍဒါယကတ္ထေရအပဒါနံ

၃၆။

‘‘ကာနနံ ဝနမောဂယှ၊ ဝေဠုံ ဆေတွာနဟံ တဒါ။

အာလမ္ဗဏံ ကရိတွာန၊ သံဃဿ အဒဒိံ ဗဟုံ [အဟံ (သီ။ သျာ။ ဣ။)]။

၃၇။

‘‘တေန စိတ္တပ္ပသာဒေန၊ သုဗ္ဗတေ အဘိဝါဒိယ။

အာလမ္ဗဒဏ္ဍံ ဒတွာန၊ ပက္ကာမိံ ဥတ္တရာမုခေါ။

၃၈။

‘‘စတုန္နဝုတိတော ကပ္ပေ၊ ယံ ဒဏ္ဍမဒဒိံ တဒါ။

ဒုဂ္ဂတိံ နာဘိဇာနာမိ၊ ဒဏ္ဍဒါနဿိဒံ ဖလံ။

၃၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒဏ္ဍဒါယကော ထေရော ဣမာ ဂါထာယော

အဘာသိတ္ထာတိ။

ဒဏ္ဍဒါယကတ္ထေရဿာပဒါနံ ဆဋ္ဌံ။

တေဝီသတိမံ ဘာဏဝါရံ။

၇။ ဂိရိနေလပူဇကတ္ထေရအပဒါနံ

၄၂။

‘‘မိဂလုဒ္ဒေါ ပုရေ အာသိံ၊ ဝိပိနေ ဝိစရံ အဟံ။

အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ။

၄၃။

‘‘တသ္မိံ မဟာကာရုဏိကေ၊ သဗ္ဗသတ္တဟိတေ ရတေ။

ပသန္နစိတ္တော သုမနော၊ နေလပုပ္ဖမပူဇယိံ။

၄၄။

‘‘ဧကတိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂိရိနေလပူဇကော ထေရော ဣမာ ဂါထာယော

အဘာသိတ္ထာတိ။

ဂိရိနေလပူဇကတ္ထေရဿာပဒါနံ သတ္တမံ။

၈။ ဗောဓိသမ္မဇ္ဇကတ္ထေရအပဒါနံ

၄၈။

‘‘အဟံ ပုရေ ဗောဓိပတ္တံ၊ ဥဇ္ဈိတံ စေတိယင်္ဂဏေ။

တံ ဂဟေတွာန ဆဍ္ဍေသိံ၊ အလဘိံ ဝီသတီဂုဏေ။

၄၉။

‘‘တဿ ကမ္မဿ တေဇေန၊ သံသရန္တော ဘဝါဘဝေ။

ဒုဝေ ဘဝေ သံသရာမိ၊ ဒေဝတ္တေ စာပိ မာနုသေ။

၅၀။

‘‘ဒေဝလောကာ စဝိတွာန၊ အာဂန္တွာ မာနုသံ ဘဝံ။

ဒုဝေ ကုလေ ပဇာယာမိ၊ ခတ္တိယေ စာပိ ဗြာဟ္မဏေ။

၅၁။

‘‘အင်္ဂပစ္စင်္ဂသမ္ပန္နော၊ အာရောဟပရိဏာဟဝါ။

အဘိရူပေါ သုစိ ဟောမိ၊ သမ္ပုဏ္ဏင်္ဂေါ အနူနကော။

၅၂။

‘‘ဒေဝလောကေ မနုဿေ ဝါ၊ ဇာတော ဝါ ယတ္ထ ကတ္ထစိ။

ဘဝေ သုဝဏ္ဏဝဏ္ဏော စ၊ ဥတ္တတ္တကနကူပမော။

၅၃။

‘‘မုဒုကာ မဒ္ဒဝါ သ္နိဒ္ဓါ [မုဒု မဒ္ဒဝါ သိနိဒ္ဓါ (သျာ။)]၊ သုခုမာ သုကုမာရိကာ။

ဆဝိ မေ သဗ္ဗဒါ ဟောတိ၊ ဗောဓိပတ္တေ သုဆဍ္ဍိတေ [သုဆဍ္ဍိနေ (သီ။)]။

၅၄။

‘‘ယတော ကုတောစိ ဂတီသု၊ သရီရေ သမုဒါဂတေ။

န လိမ္ပတိ ရဇောဇလ္လံ၊ ဝိပါကော ပတ္တဆဍ္ဍိတေ။

၅၅။

‘‘ဥဏှေ ဝါတာတပေ တဿ၊ အဂ္ဂိတာပေန ဝါ ပန။

ဂတ္တေ သေဒါ န မုစ္စန္တိ၊ ဝိပါကော ပတ္တဆဍ္ဍိတေ။

၅၆။

‘‘ကုဋ္ဌံ ဂဏ္ဍော ကိလာသော စ၊ တိလကာ ပိဠကာ တထာ။

န ဟောန္တိ ကာယေ ဒဒ္ဒု စ၊ ဝိပါကော ပတ္တဆဍ္ဍိတေ။

၅၇။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

ရောဂါ န ဟောန္တိ ကာယသ္မိံ၊ ဝိပါကော ပတ္တဆဍ္ဍိတေ။

၅၈။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

န ဟောတိ စိတ္တဇာ ဣဠာ၊ ဝိပါကော ပတ္တဆဍ္ဍိတေ။

၅၉။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

အမိတ္တာ န ဘဝန္တဿ၊ ဝိပါကော ပတ္တဆဍ္ဍိတေ။

၆၀။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

အနူနဘောဂေါ ဘဝတိ၊ ဝိပါကော ပတ္တဆဍ္ဍိတေ။

၆၁။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

အဂ္ဂိရာဇူဟိ စောရေဟိ၊ န ဟောတိ ဥဒကေ ဘယံ။

၆၂။

‘‘အပရမ္ပိ ဂုဏံ တဿ၊ နိဗ္ဗတ္တတိ ဘဝါဘဝေ။

ဒါသိဒါသာ အနုစရာ၊ ဟောန္တိ စိတ္တာနုဝတ္တကာ။

၆၃။

‘‘ယမှိ အာယုပ္ပမာဏမှိ၊ ဇာယတေ မာနုသေ ဘဝေ။

တတော န ဟာယတေ အာယု၊ တိဋ္ဌတေ ယာဝတာယုကံ။

၆၄။

‘‘အဗ္ဘန္တရာ စ ဗာဟိရာ [ဗဟိစရာ (သီ။ ဣ။ က။)]၊ နေဂမာ စ သရဋ္ဌကာ။

နုယုတ္တာ ဟောန္တိ သဗ္ဗေပိ၊ ဝုဒ္ဓိကာမာ သုခိစ္ဆကာ။

၆၅။

‘‘ဘောဂဝါ ယသဝါ ဟောမိ၊ သိရိမာ ဉာတိပက္ခဝါ။

အပေတဘယသန္တာသော၊ ဘဝေဟံ သဗ္ဗတော ဘဝေ။

၆၆။

‘‘ဒေဝါ မနုဿာ အသုရာ၊ ဂန္ဓဗ္ဗာ ယက္ခရက္ခသာ။

သဗ္ဗေ တေ ပရိရက္ခန္တိ၊ ဘဝေ သံသရတော သဒါ။

၆၇။

‘‘ဒေဝလောကေ မနုဿေ စ၊ အနုဘောတွာ ဥဘော ယသေ။

အဝသာနေ စ နိဗ္ဗာနံ၊ သိဝံ ပတ္တော အနုတ္တရံ။

၆၈။

‘‘သမ္ဗုဒ္ဓမုဒ္ဒိသိတွာန၊ ဗောဓိံ ဝါ တဿ သတ္ထုနော။

ယော ပုညံ ပသဝေ ပေါသော၊ တဿ ကိံ နာမ ဒုလ္လဘံ။

၆၉။

‘‘မဂ္ဂေ ဖလေ အာဂမေ စ၊ ဈာနာဘိညာဂုဏေသု စ။

အညေသံ အဓိကော ဟုတွာ၊ နိဗ္ဗာယာမိ အနာသဝေါ။

၇၀။

‘‘ပုရေဟံ ဗောဓိယာ ပတ္တံ၊ ဆဍ္ဍေတွာ ဟဋ္ဌမာနသော။

ဣမေဟိ ဝီသတင်္ဂေဟိ၊ သမင်္ဂီ ဟောမိ သဗ္ဗဒါ။

၇၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗောဓိသမ္မဇ္ဇကော ထေရော ဣမာ ဂါထာယော

အဘာသိတ္ထာတိ။

ဗောဓိသမ္မဇ္ဇကတ္ထေရဿာပဒါနံ အဋ္ဌမံ။

၉။ အာမဏ္ဍဖလဒါယကတ္ထေရအပဒါနံ

၇၄။

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။

ဝုဋ္ဌဟိတွာ သမာဓိမှာ၊ စင်္ကမီ လောကနာယကော။

၇၅။

‘‘ခါရိဘာရံ ဂဟေတွာန၊ အာဟရန္တော ဖလံ တဒါ။

အဒ္ဒသံ ဝိရဇံ ဗုဒ္ဓံ၊ စင်္ကမန္တံ မဟာမုနိံ။

၇၆။

‘‘ပသန္နစိတ္တော သုမနော၊ သိရေ ကတွာန အဉ္ဇလိံ။

သမ္ဗုဒ္ဓံ အဘိဝါဒေတွာ၊ အာမဏ္ဍမဒဒိံ ဖလံ။

၇၇။

‘‘သတသဟဿိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ အာမဏ္ဍဿ ဣဒံ ဖလံ။

၇၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာမဏ္ဍဖလဒါယကော ထေရော ဣမာ

ဂါထာယော အဘာသိတ္ထာတိ။

အာမဏ္ဍဖလဒါယကတ္ထေရဿာပဒါနံ နဝမံ။

၁၀။ သုဂန္ဓတ္ထေရအပဒါနံ

၈၁။

‘‘ဣမမှိ ဘဒ္ဒကေ ကပ္ပေ၊ ဗြဟ္မဗန္ဓု မဟာယသော။

ကဿပေါ နာမ ဂေါတ္တေန [နာမေန (သဗ္ဗတ္ထ)]၊ ဥပ္ပဇ္ဇိ ဝဒတံ ဝရော။

၈၂။

‘‘အနုဗျဉ္ဇနသမ္ပန္နော၊ ဗာတ္တိံသဝရလက္ခဏော။

ဗျာမပ္ပဘာပရိဝုတော၊ ရံသိဇာလသမောတ္ထဋော [ရံသိဇာလသမောသဋော (သီ။ ဣ။)]။

၈၃။

‘‘အဿာသေတာ ယထာ စန္ဒော၊ သူရိယောဝ ပဘင်္ကရော။

နိဗ္ဗာပေတာ ယထာ မေဃော၊ သာဂရောဝ ဂုဏာကရော။

၈၄။

‘‘ဓရဏီရိဝ သီလေန၊ ဟိမဝါဝ သမာဓိနာ။

အာကာသော ဝိယ ပညာယ၊ အသင်္ဂေါ အနိလော ယထာ။

၈၅။

‘‘သ ကဒါစိ မဟာဝီရော၊ ပရိသာသု ဝိသာရဒေါ။

သစ္စာနိ သမ္ပကာသေတိ၊ ဥဒ္ဓရန္တော မဟာဇနံ။

၈၆။

‘‘တဒါ ဟိ ဗာရာဏသိယံ၊ သေဋ္ဌိပုတ္တော မဟာယသော။

အာသဟံ ဓနဓညဿ [အနန္တဓနဓညဿ (က။)]၊ ပဟူတဿ ဗဟူ တဒါ။

၈၇။

‘‘ဇင်္ဃာဝိဟာရံ ဝိစရံ၊ မိဂဒါယမုပေစ္စဟံ [မုပေသဟံ (က။)]။

အဒ္ဒသံ ဝိရဇံ ဗုဒ္ဓံ၊ ဒေသေန္တံ အမတံ ပဒံ။

၈၈။

‘‘ဝိသဋ္ဌကန္တဝစနံ ၊ ကရဝီကသမဿရံ။

ဟံသရုတေဟိ [ဟံသဒုန္ဒုဘိ (သျာ။ ဣ။)] နိဂ္ဃောသံ၊ ဝိညာပေန္တံ မဟာဇနံ။

၈၉။

‘‘ဒိသွာ ဒေဝါတိဒေဝံ တံ၊ သုတွာဝ မဓုရံ ဂိရံ။

ပဟာယနပ္ပကေ ဘောဂေ၊ ပဗ္ဗဇိံ အနဂါရိယံ။

၉၀။

‘‘ဧဝံ ပဗ္ဗဇိတော စာဟံ၊ န စိရေန ဗဟုဿုတော။

အဟောသိံ ဓမ္မကထိကော၊ ဝိစိတ္တပဋိဘာဏဝါ။

၉၁။

‘‘မဟာပရိသမဇ္ဈေဟံ၊ ဟဋ္ဌစိတ္တော ပုနပ္ပုနံ။

ဝဏ္ဏယိံ ဟေမဝဏ္ဏဿ၊ ဝဏ္ဏံ ဝဏ္ဏဝိသာရဒေါ။

၉၂။

‘‘ဧသ ခီဏာသဝေါ ဗုဒ္ဓေါ၊ အနီဃော ဆိန္နသံသယော။

သဗ္ဗကမ္မက္ခယံ ပတ္တော၊ ဝိမုတ္တောပဓိသင်္ခယေ။

၉၃။

‘‘ဧသ သော ဘဂဝါ ဗုဒ္ဓေါ၊ ဧသ သီဟော အနုတ္တရော။

သဒေဝကဿ လောကဿ၊ ဗြဟ္မစက္ကပ္ပဝတ္တကော။

၉၄။

‘‘ဒန္တော ဒမေတာ သန္တော စ၊ သမေတာ နိဗ္ဗုတော ဣသိ။

နိဗ္ဗာပေတာ စ အဿတ္ထော၊ အဿာသေတာ မဟာဇနံ။

၉၅။

‘‘ဝီရော သူရော စ ဝိက္ကန္တော [ဓီရော စ (သီ။ ဣ။)]၊ ပညော ကာရုဏိကော ဝသီ။

ဝိဇိတာဝီ စ သ ဇိနော၊ အပ္ပဂဗ္ဗော အနာလယော။

၉၆။

‘‘အနေဉ္ဇော အစလော ဓီမာ၊ အမောဟော အသမော မုနိ။

ဓေါရယှော ဥသဘော နာဂေါ၊ သီဟော သက္ကော ဂရူသုပိ။

၉၇။

‘‘ဝိရာဂေါ ဝိမလော ဗြဟ္မာ၊ ဝါဒီ သူရော ရဏဉ္ဇဟော။

အခိလော စ ဝိသလ္လော စ၊ အသမော သံယတော [ဝုသဘော (သျာ။)၊ ပယတော (ဣ။)] သုစိ။

၉၈။

‘‘ဗြာဟ္မဏော သမဏော နာထော၊ ဘိသက္ကော သလ္လကတ္တကော။

ယောဓေါ ဗုဒ္ဓေါ သုတာသုတော [သုတော သုတော (သီ။ ဣ။)]၊ အစလော မုဒိတော သိတော [ဒိတော (သီ။)]။

၉၉။

‘‘ဓါတာ ဓတာ စ သန္တိ စ၊ ကတ္တာ နေတာ ပကာသိတာ။

သမ္ပဟံသိတာ ဘေတ္တာ စ၊ ဆေတ္တာ သောတာ ပသံသိတာ။

၁၀၀။

‘‘အခိလော စ ဝိသလ္လော စ၊ အနီဃော အကထံကထီ။

အနေဇော ဝိရဇော ကတ္တာ၊ ဂန္ဓာ ဝတ္တာ ပသံသိတာ။

၁၀၁။

‘‘တာရေတာ အတ္ထကာရေတာ၊ ကာရေတာ သမ္ပဒါရိတာ။

ပါပေတာ သဟိတာ ကန္တာ၊ ဟန္တာ အာတာဣ တာပသော [ဟန္တာ၊ တာပိတာ စ ဝိသောသိတာ (သျာ။)]။

၁၀၂။

‘‘သမစိတ္တော [သစ္စဋ္ဌိတော (သျာ။)] သမသမော၊ အသဟာယော ဒယာလယော [ဒယာသယော (သီ။)]။

အစ္ဆေရသတ္တော [အစ္ဆေရမန္တော (သျာ။)] အကုဟော, ကတာဝီ ဣသိသတ္တမော။

၁၀၃။

‘‘နိတ္တိဏ္ဏကင္ခော နိမ္မာနော၊ အပ္ပမေယျော အနူပမော။

သဗ္ဗဝါကျပထာတီတော၊ သစ္စ နေယျန္တဂူ [သဗ္ဗနေယျန္တိကော (သျာ။)] ဇိနော။

၁၀၄။

‘‘သတ္တသာရဝရေ [သတရံသီဝရေ (သျာ။)] တသ္မိံ၊ ပသာဒေါ အမတာဝဟော။

တသ္မာ ဗုဒ္ဓေ စ ဓမ္မေ စ၊ သံဃေ သဒ္ဓါ မဟတ္ထိကာ [မဟိဒ္ဓိကာ (သီ။ က။)]။

၁၀၅။

‘‘ဂုဏေဟိ ဧဝမာဒီဟိ၊ တိလောကသရဏုတ္တမံ။

ဝဏ္ဏေန္တော ပရိသာမဇ္ဈေ၊ အကံ [ကထိံ (သျာ။)] ဓမ္မကထံ အဟံ။

၁၀၆။

‘‘တတော စုတာဟံ တုသိတေ၊ အနုဘောတွာ မဟာသုခံ။

တတော စုတော မနုဿေသု၊ ဇာတော ဟောမိ သုဂန္ဓိကော။

၁၀၇။

‘‘နိဿာသော မုခဂန္ဓော စ၊ ဒေဟဂန္ဓော တထေဝ မေ။

သေဒဂန္ဓော စ သတတံ၊ သဗ္ဗဂန္ဓောဝ ဟောတိ မေ [သဗ္ဗဂန္ဓောတိသေတိ မေ (သီ။ ဣ။)]။

၁၀၈။

‘‘မုခဂန္ဓော သဒါ မယှံ၊ ပဒုမုပ္ပလစမ္ပကော။

ပရိသန္တော [အာဒိသန္တော (သီ။)၊ အတိကန္တော (သျာ။)၊ အတိသန္တော (ဣ။)] သဒါ ဝါတိ၊ သရီရော စ တထေဝ မေ။

၁၀၉။

‘‘ဂုဏတ္ထဝဿ သဗ္ဗန္တံ၊ ဖလံ တု [ဖလန္တံ (သျာ။)] ပရမဗ္ဘုတံ။

ဧကဂ္ဂမနသာ သဗ္ဗေ၊ ဝဏ္ဏယိဿံ [ဘာသိတဿ (သျာ။)] သုဏာထ မေ။

၁၁၀။

‘‘ဂုဏံ ဗုဒ္ဓဿ ဝတွာန၊ ဟိတာယ စ န သဒိသံ [ဟိတာယ ဇနသန္ဓိသု (သီ။ ဣ။)၊ ဟိတာယ နံ သုခါဝဟံ (သျာ။)]။

သုခိတော [သုစိတ္တော (သျာ။)] ဟောမိ သဗ္ဗတ္ထ၊ သံဃော ဝီရသမာယုတော [သရဒ္ဓနိသမာယုတော (သီ။)]။

၁၁၁။

‘‘ယသဿီ သုခိတော ကန္တော၊ ဇုတိမာ ပိယဒဿနော။

ဝတ္တာ အပရိဘူတော စ၊ နိဒ္ဒေါသော ပညဝါ တထာ။

၁၁၂။

‘‘ခီဏေ အာယုသိ [ပါသုသိ (သျာ။)] နိဗ္ဗာနံ၊ သုလဘံ ဗုဒ္ဓဘတ္တိနော။

တေသံ ဟေတုံ ပဝက္ခာမိ၊ တံ သုဏာထ ယထာတထံ။

၁၁၃။

‘‘သန္တံ ယသံ ဘဂဝတော၊ ဝိဓိနာ အဘိဝါဒယံ။

တတ္ထ တတ္ထူပပန္နောပိ [ယတ္ထ တတ္ထူပပန္နောပိ (သီ။ ဣ။)]၊ ယသဿီ တေန ဟောမဟံ။

၁၁၄။

‘‘ဒုက္ခဿန္တကရံ ဗုဒ္ဓံ၊ ဓမ္မံ သန္တမသင်္ခတံ။

ဝဏ္ဏယံ သုခဒေါ အာသိံ၊ သတ္တာနံ သုခိတော တတော။

၁၁၅။

‘‘ဂုဏံ ဝဒန္တော ဗုဒ္ဓဿ၊ ဗုဒ္ဓဣတိသမာယုတော။

သကန္တိံ ပရကန္တိဉ္စ၊ ဇနယိံ တေန ကန္တိမာ။

၁၁၆။

‘‘ဇိနော တေ တိတ္ထိကာကိဏ္ဏေ [ဇနောဃေ တိတ္ထကာကိဏ္ဏေ (သီ။ ဣ။)၊ ဇိနော ယော တိတ္ထိကာတိဏ္ဏော (သျာ။)]၊ အဘိဘုယျ ကုတိတ္ထိယေ။

ဂုဏံ ဝဒန္တော ဇောတေသိံ [ထောမေသိံ (သျာ။)]၊ နာယကံ ဇုတိမာ တတော။

၁၁၇။

‘‘ပိယကာရီ ဇနဿာပိ၊ သမ္ဗုဒ္ဓဿ ဂုဏံ ဝဒံ။

သရဒေါဝ သသင်္ကောဟံ၊ တေနာသိံ ပိယဒဿနော။

၁၁၈။

‘‘ယထာသတ္တိဝသေနာဟံ ၊ သဗ္ဗဝါစာဟိ သန္ထဝိံ။

သုဂတံ တေန ဝါဂိသော၊ ဝိစိတ္တပဋိဘာနဝါ။

၁၁၉။

‘‘ယေ ဗာလာ ဝိမတိံ ပတ္တာ၊ ပရိဘောန္တိ မဟာမုနိံ။

နိဂ္ဂဟိံ တေ သဒ္ဓမ္မေန၊ ပရိဘူတော န တေနဟံ [ပရိဘူတေန တေနဟံ (သျာ။)]။

၁၂၀။

‘‘ဗုဒ္ဓဝဏ္ဏေန သတ္တာနံ၊ ကိလေသေ အပနေသဟံ။

နိက္ကိလေသမနော ဟောမိ၊ တဿ ကမ္မဿ ဝါဟသာ။

၁၂၁။

‘‘သောတူနံ ဝုဒ္ဓိမဇနိံ [ဗုဒ္ဓိမဇနိံ (သီ။ ဣ။)]၊ ဗုဒ္ဓါနုဿတိဒေသကော။

တေနာဟမာသိံ [တေနာပိ စာသိံ (သျာ။)] သပ္ပညော၊ နိပုဏတ္ထဝိပဿကော။

၁၂၂။

‘‘သဗ္ဗာသဝပရိက္ခီဏော၊ တိဏ္ဏသံသာရသာဂရော။

သိခီဝ အနုပါဒါနော၊ ပါပုဏိဿာမိ နိဗ္ဗုတိံ။

၁၂၃။

‘‘ဣမသ္မိံယေဝ ကပ္ပသ္မိံ၊ ယမဟံ သန္ထဝိံ ဇိနံ။

ဒုဂ္ဂတိံ နာဘိဇာနာမိ၊ ဗုဒ္ဓဝဏ္ဏဿိဒံ ဖလံ။

၁၂၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၂၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုဂန္ဓော ထေရော ဣမာ ဂါထာယော

အဘာသိတ္ထာတိ။

သုဂန္ဓတ္ထေရဿာပဒါနံ ဒသမံ။

တိဏဒါယကဝဂ္ဂေါ တေပညာသမော။

တဿုဒ္ဒါနံ –

တိဏဒေါ မဉ္စဒေါ စေဝ၊ သရဏဗ္ဘဉ္ဇနပ္ပဒေါ။

သုပဋော ဒဏ္ဍဒါယီ စ၊ နေလပူဇီ တထေဝ စ။

ဗောဓိသမ္မဇ္ဇကော မဏ္ဍော၊ သုဂန္ဓော ဒသမောတိ စ။

ဂါထာသတံ သတေဝီသံ၊ ဂဏိတဉ္စေတ္ထ သဗ္ဗသော။