ဖလဒါယကဝဂ္ဂ

၅၂။ ဖလဒါယကဝဂ္ဂ

၁။ ကုရဉ္စိယဖလဒါယကတ္ထေရအပဒါန

၁။

‘‘မိဂလုဒ္ဒေါ ပုရေ အာသိံ၊ ဝိပိနေ ဝိစရံ အဟံ။

အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ။

၂။

‘‘ကုရဉ္စိယဖလံ ဂယှ၊ ဗုဒ္ဓသေဋ္ဌဿဒါသဟံ။

ပုညက္ခေတ္တဿ တာဒိနော၊ ပသန္နော သေဟိ ပါဏိဘိ။

၃။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၅။

‘‘သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၆။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုရဉ္စိယဖလဒါယကော ထေရော ဣမာ

ဂါထာယော အဘာသိတ္ထာတိ။

ကုရဉ္စိယဖလဒါယကတ္ထေရဿာပဒါနံ ပဌမံ။

၂။ ကပိတ္ထဖလဒါယကတ္ထေရအပဒါနံ

၇။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ရထိယံ ပဋိပဇ္ဇန္တံ၊ ကပိတ္ထံ [ကပိဋ္ဌံ (သျာ။)] အဒဒိံ ဖလံ။

၈။

‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကပိတ္ထဖလဒါယကော ထေရော ဣမာ

ဂါထာယော အဘာသိတ္ထာတိ။

ကပိတ္ထဖလဒါယကတ္ထေရဿာပဒါနံ ဒုတိယံ။

၃။ ကောသမ္ဗဖလိယတ္ထေရအပဒါနံ

၁၂။

‘‘ကကုဓံ ဝိလသန္တံဝ၊ ဒေဝဒေဝံ နရာသဘံ။

ရထိယံ ပဋိပဇ္ဇန္တံ၊ ကောသမ္ဗံ [ကောသုမ္ဗံ (သီ။ သျာ။ ဣ။)] အဒဒိံ တဒါ။

၁၃။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၁၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကောသမ္ဗဖလိယော ထေရော ဣမာ ဂါထာယော

အဘာသိတ္ထာတိ။

ကောသမ္ဗဖလိယတ္ထေရဿာပဒါနံ တတိယံ။

၄။ ကေတကပုပ္ဖိယတ္ထေရအပဒါနံ

၁၇။

‘‘ဝိနတာနဒိယာ တီရေ၊ ဝိဟာသိ ပုရိသုတ္တမော။

အဒ္ဒသံ ဝိရဇံ ဗုဒ္ဓံ၊ ဧကဂ္ဂံ သုသမာဟိတံ။

၁၈။

‘‘မဓုဂန္ဓဿ ပုပ္ဖေန၊ ကေတကဿ အဟံ တဒါ။

ပသန္နစိတ္တော သုမနော၊ ဗုဒ္ဓသေဋ္ဌမပူဇယိံ။

၁၉။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကေတကပုပ္ဖိယော ထေရော ဣမာ ဂါထာယော

အဘာသိတ္ထာတိ။

ကေတကပုပ္ဖိယတ္ထေရဿာပဒါနံ စတုတ္ထံ။

၅။ နာဂပုပ္ဖိယတ္ထေရအပဒါနံ

၂၃။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ရထိယံ ပဋိပဇ္ဇန္တံ၊ နာဂပုပ္ဖံ အပူဇယိံ။

၂၄။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နာဂပုပ္ဖိယော ထေရော ဣမာ ဂါထာယော

အဘာသိတ္ထာတိ။

နာဂပုပ္ဖိယတ္ထေရဿာပဒါနံ ပဉ္စမံ။

၆။ အဇ္ဇုနပုပ္ဖိယတ္ထေရအပဒါနံ

၂၈။

‘‘စန္ဒဘာဂါနဒီတီရေ ၊ အဟောသိံ ကိန္နရော တဒါ။

အဒ္ဒသံ ဝိရဇံ ဗုဒ္ဓံ၊ သယမ္ဘုံ အပရာဇိတံ။

၂၉။

‘‘ပသန္နစိတ္တော သုမနော၊ ဝေဒဇာတော ကတဉ္ဇလီ။

ဂဟေတွာ အဇ္ဇုနံ ပုပ္ဖံ၊ သယမ္ဘုံ အဘိပူဇယိံ။

၃၀။

‘‘တေန ကမ္မေန သုကတေန၊ စေတနာပဏိဓီဟိ စ။

ဇဟိတွာ ကိန္နရံ ဒေဟံ၊ တာဝတိံသမဂစ္ဆဟံ။

၃၁။

‘‘ဆတ္တိံသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ။

ဒသက္ခတ္တုံ စက္ကဝတ္တီ၊ မဟာရဇ္ဇမကာရယိံ။

၃၂။

‘‘ပဒေသရဇ္ဇံ ဝိပုလံ၊ ဂဏနာတော အသံခိယံ။

သုခေတ္တေ ဝပ္ပိတံ ဗီဇံ၊ သယမ္ဘုမှိ အဟော မမ [အဟောသိ မေ (သျာ။)]။

၃၃။

‘‘ကုသလံ ဝိဇ္ဇတေ မယှံ၊ ပဗ္ဗဇိံ အနဂါရိယံ။

ပူဇာရဟော အဟံ အဇ္ဇ၊ သကျပုတ္တဿ သာသနေ။

၃၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဇ္ဇုနပုပ္ဖိယော ထေရော ဣမာ ဂါထာယော

အဘာသိတ္ထာတိ။

အဇ္ဇုနပုပ္ဖိယတ္ထေရဿာပဒါနံ ဆဋ္ဌံ။

၇။ ကုဋဇပုပ္ဖိယတ္ထေရအပဒါနံ

၃၇။

‘‘ဟိမဝန္တဿာဝိဒူရေ၊ ဝသလော [စာဝလော (သီ။ ဣ။)၊ အစ္စယော (သျာ။)] နာမ ပဗ္ဗတော။

ဗုဒ္ဓေါ သုဒဿနော နာမ၊ ဝသတေ ပဗ္ဗတန္တရေ။

၃၈။

‘‘ပုပ္ဖံ ဟေမဝန္တံ ဂယှ၊ ဝေဟာသံ အဂမာသဟံ။

တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ။

၃၉။

‘‘ပုပ္ဖံ ကုဋဇမာဒါယ၊ သိရေ ကတွာန အဉ္ဇလိံ [ကတွာနဟံ တဒါ (သျာ။ ဣ။ က။)]။

ဗုဒ္ဓဿ အဘိရောပေသိံ၊ သယမ္ဘုဿ မဟေသိနော။

၄၀။

‘‘ဧကတိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုဋဇပုပ္ဖိယော ထေရော ဣမာ ဂါထာယော

အဘာသိတ္ထာတိ။

ကုဋဇပုပ္ဖိယတ္ထေရဿာပဒါနံ သတ္တမံ။

၈။ ဃောသသညကတ္ထေရအပဒါနံ

၄၄။

‘‘မိဂလုဒ္ဒေါ ပုရေ အာသိံ၊ အရညေ ဝိပိနေ အဟံ။

အဒ္ဒသံ ဝိရဇံ ဗုဒ္ဓံ၊ ဒေဝသံဃပုရက္ခတံ။

၄၅။

‘‘စတုသစ္စံ ပကာသေန္တံ၊ ဒေသေန္တံ အမတံ ပဒံ။

အဿောသိံ မဓုရံ ဓမ္မံ၊ သိခိနော လောကဗန္ဓုနော။

၄၆။

‘‘ဃောသေ စိတ္တံ ပသာဒေသိံ၊ အသမပ္ပဋိပုဂ္ဂလေ။

တတ္ထ စိတ္တံ ပသာဒေတွာ၊ ဥတ္တရိံ [အတရိံ (သီ။ ဣ။)] ဒုတ္တရံ ဘဝံ။

၄၇။

‘‘ဧကတိံသေ ဣတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဃောသသညာယိဒံ ဖလံ။

၄၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဃောသသညကော ထေရော ဣမာ ဂါထာယော

အဘာသိတ္ထာတိ။

ဃောသသညကတ္ထေရဿာပဒါနံ အဋ္ဌမံ။

၉။ သဗ္ဗဖလဒါယကတ္ထေရအပဒါနံ

၅၁။

‘‘ဝရုဏော နာမ နာမေန၊ ဗြာဟ္မဏော မန္တပါရဂူ။

ဆဍ္ဍေတွာ ဒသပုတ္တာနိ၊ ဝနမဇ္ဈောဂဟိံ တဒါ။

၅၂။

‘‘အဿမံ သုကတံ ကတွာ၊ သုဝိဘတ္တံ မနောရမံ။

ပဏ္ဏသာလံ ကရိတွာန၊ ဝသာမိ ဝိပိနေ အဟံ။

၅၃။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

မမုဒ္ဓရိတုကာမော သော၊ အာဂစ္ဆိ မမ အဿမံ။

၅၄။

‘‘ယာဝတာ ဝနသဏ္ဍမှိ၊ ဩဘာသော ဝိပုလော အဟု။

ဗုဒ္ဓဿ အာနုဘာဝေန၊ ပဇ္ဇလီ ဝိပိနံ တဒါ။

၅၅။

‘‘ဒိသွာန တံ ပါဋိဟီရံ၊ ဗုဒ္ဓသေဋ္ဌဿ တာဒိနော။

ပတ္တပုဋံ ဂဟေတွာန၊ ဖလေန ပူဇယိံ အဟံ။

၅၆။

‘‘ဥပဂန္တွာန သမ္ဗုဒ္ဓံ၊ သဟခါရိမဒါသဟံ။

အနုကမ္ပာယ မေ ဗုဒ္ဓေါ၊ ဣဒံ ဝစနမဗြဝိ။

၅၇။

‘ခါရိဘာရံ ဂဟေတွာန၊ ပစ္ဆတော ဧဟိ မေ တုဝံ။

ပရိဘုတ္တေ စ သံဃမှိ၊ ပုညံ တဝ ဘဝိဿတိ’။

၅၈။

‘‘ပုဋကန္တံ ဂဟေတွာန၊ ဘိက္ခုသံဃဿဒါသဟံ။

တတ္ထ စိတ္တံ ပသာဒေတွာ၊ တုသိတံ ဥပပဇ္ဇဟံ။

၅၉။

‘‘တတ္ထ ဒိဗ္ဗေဟိ နစ္စေဟိ၊ ဂီတေဟိ ဝါဒိတေဟိ စ။

ပုညကမ္မေန သံယုတ္တံ၊ အနုဘောမိ သဒါ သုခံ။

၆၀။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

ဘောဂေ မေ ဦနတာ နတ္ထိ၊ ဖလဒါနဿိဒံ ဖလံ။

၆၁။

‘‘ယာဝတာ စတုရော ဒီပါ၊ သသမုဒ္ဒါ သပဗ္ဗတာ။

ဖလံ ဗုဒ္ဓဿ ဒတွာန၊ ဣဿရံ ကာရယာမဟံ။

၆၂။

‘‘ယာဝတာ မေ ပက္ခိဂဏာ၊ အာကာသေ ဥပ္ပတန္တိ စေ။

တေပိ မံ ဝသမန္ဝေန္တိ၊ ဖလဒါနဿိဒံ ဖလံ။

၆၃။

‘‘ယာဝတာ ဝနသဏ္ဍမှိ၊ ယက္ခာ ဘူတာ စ ရက္ခသာ။

ကုမ္ဘဏ္ဍာ ဂရုဠာ စာပိ၊ ပါရိစရိယံ ဥပေန္တိ မေ။

၆၄။

‘‘ကုမ္ဘာ သောဏာ မဓုကာရာ၊ ဍံသာ စ မကသာ ဥဘော။

တေပိ မံ ဝသမန္ဝေန္တိ၊ ဖလဒါနဿိဒံ ဖလံ။

၆၅။

‘‘သုပဏ္ဏာ နာမ သကုဏာ၊ ပက္ခိဇာတာ မဟဗ္ဗလာ။

တေပိ မံ သရဏံ ယန္တိ၊ ဖလဒါနဿိဒံ ဖလံ။

၆၆။

‘‘ယေပိ ဒီဃာယုကာ နာဂါ၊ ဣဒ္ဓိမန္တော မဟာယသာ။

တေပိ မံ ဝသမန္ဝေန္တိ၊ ဖလဒါနဿိဒံ ဖလံ။

၆၇။

‘‘သီဟာ ဗျဂ္ဃါ စ ဒီဣ စ၊ အစ္ဆကောကတရစ္ဆကာ။

တေပိ မံ ဝသမန္ဝေန္တိ၊ ဖလဒါနဿိဒံ ဖလံ။

၆၈။

‘‘ဩသဓီတိဏဝါသီ စ၊ ယေ စ အာကာသဝါသိနော။

သဗ္ဗေ မံ သရဏံ ယန္တိ၊ ဖလဒါနဿိဒံ ဖလံ။

၆၉။

‘‘သုဒုဒ္ဒသံ သုနိပုဏံ၊ ဂမ္ဘီရံ သုပ္ပကာသိတံ။

ဖဿယိတွာ [ဖုသယိတွာ (က။)] ဝိဟရာမိ၊ ဖလဒါနဿိဒံ ဖလံ။

၇၀။

‘‘ဝိမောက္ခေ အဋ္ဌ ဖုသိတွာ၊ ဝိဟရာမိ အနာသဝေါ။

အာတာဣ နိပကော စာဟံ၊ ဖလဒါနဿိဒံ ဖလံ။

၇၁။

‘‘ယေ ဖလဋ္ဌာ ဗုဒ္ဓပုတ္တာ၊ ခီဏဒေါသာ မဟာယသာ။

အဟမညတရော တေသံ၊ ဖလဒါနဿိဒံ ဖလံ။

၇၂။

‘‘အဘိညာပါရမိံ ဂန္တွာ၊ သုက္ကမူလေန စောဒိတော။

သဗ္ဗာသဝေ ပရိညာယ၊ ဝိဟရာမိ အနာသဝေါ။

၇၃။

‘‘တေဝိဇ္ဇာ ဣဒ္ဓိပတ္တာ စ၊ ဗုဒ္ဓပုတ္တာ မဟာယသာ။

ဒိဗ္ဗသောတသမာပန္နာ၊ တေသံ အညတရော အဟံ။

၇၄။

‘‘သတသဟဿိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၇၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဗ္ဗဖလဒါယကော ထေရော ဣမာ ဂါထာယော

အဘာသိတ္ထာတိ။

သဗ္ဗဖလဒါယကတ္ထေရဿာပဒါနံ နဝမံ။

၁၀။ ပဒုမဓါရိကတ္ထေရအပဒါနံ

၇၈။

‘‘ဟိမဝန္တဿာဝိဒူရေ ၊ ရောမသော နာမ ပဗ္ဗတော။

ဗုဒ္ဓေါပိ သမ္ဘဝေါ နာမ၊ အဗ္ဘောကာသေ ဝသီ တဒါ။

၇၉။

‘‘ဘဝနာ နိက္ခမိတွာန၊ ပဒုမံ ဓါရယိံ အဟံ။

ဧကာဟံ ဓါရယိတွာန၊ ဘဝနံ ပုနရာဂမိံ။

၈၀။

‘‘ဧကတိံသေ ဣတော ကပ္ပေ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၈၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၈၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမဓါရိကော ထေရော ဣမာ ဂါထာယော

အဘာသိတ္ထာတိ။

ပဒုမဓါရိကတ္ထေရဿာပဒါနံ ဒသမံ။

ဖလဒါယကဝဂ္ဂေါ ဒွေပညာသမော။

တဿုဒ္ဒါနံ –

ကုရဉ္စိယံ ကပိတ္ထဉ္စ၊ ကောသမ္ဗမထ ကေတကံ။

နာဂပုပ္ဖဇ္ဇုနဉ္စေဝ၊ ကုဋဇီ ဃောသသညကော။

ထေရော စ သဗ္ဗဖလဒေါ၊ တထာ ပဒုမဓါရိကော။

အသီတိ စေတ္ထ ဂါထာယော၊ တိဿော ဂါထာ တဒုတ္တရိ။