ကဏိကာရဝဂ္ဂ

၅၁။ ကဏိကာရဝဂ္ဂ

၁။ တိကဏိကာရပုပ္ဖိယတ္ထေရအပဒါန

၁။

‘‘သုမေဓေါ နာမ သမ္ဗုဒ္ဓေါ၊ ဗာတ္တိံသဝရလက္ခဏော။

ဝိဝေကကာမော သမ္ဗုဒ္ဓေါ၊ ဟိမဝန္တမုပါဂမိံ။

၂။

‘‘အဇ္ဈောဂယှ ဟိမဝန္တံ၊ အဂ္ဂေါ ကာရုဏိကော မုနိ။

ပလ္လင်္ကမာဘုဇိတွာန၊ နိသီဒိ ပုရိသုတ္တမော။

၃။

‘‘ဝိဇ္ဇာဓရော တဒါ အာသိံ၊ အန္တလိက္ခစရော အဟံ။

တိသူလံ သုကတံ ဂယှ၊ ဂစ္ဆာမိ အမ္ဗရေ တဒါ။

၄။

‘‘ပဗ္ဗတဂ္ဂေ ယထာ အဂ္ဂိ၊ ပုဏ္ဏမာယေဝ စန္ဒိမာ။

ဝနေ ဩဘာသတေ ဗုဒ္ဓေါ၊ သာလရာဇာဝ ဖုလ္လိတော။

၅။

‘‘ဝနဂ္ဂါ နိက္ခမိတွာန၊ ဗုဒ္ဓရံသီဘိဓါဝရေ။

နဠဂ္ဂိဝဏ္ဏသင်္ကာသာ၊ ဒိသွာ စိတ္တံ ပသာဒယိံ။

၆။

‘‘ဝိစိနံ အဒ္ဒသံ ပုပ္ဖံ၊ ကဏိကာရံ ဒေဝဂန္ဓိကံ။

တီဏိ ပုပ္ဖာနိ အာဒါယ၊ ဗုဒ္ဓသေဋ္ဌမပူဇယိံ။

၇။

‘‘ဗုဒ္ဓဿ အာနုဘာဝေန၊ တီဏိ ပုပ္ဖာနိ မေ တဒါ။

ဥဒ္ဓံဝဏ္ဋာ အဓေါပတ္တာ၊ ဆာယံ ကုဗ္ဗန္တိ သတ္ထုနော။

၈။

‘‘တေန ကမ္မေန သုကတေန၊ စေတနာပဏိဓီဟိ စ။

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။

၉။

‘‘တတ္ထ မေ သုကတံ ဗျမှံ၊ ကဏိကာရီတိ ဉာယတိ။

သဋ္ဌိယောဇနမုဗ္ဗေဓံ၊ တိံသယောဇနဝိတ္ထတံ။

၁၀။

‘‘သဟဿကဏ္ဍံ သတဘေဏ္ဍု [သတဂေဏ္ဍု (သျာ။)]၊ ဓဇာလုဟရိတာမယံ။

သတသဟဿနိယ္ယူဟာ၊ ဗျမှေ ပါတုဘဝိံသု မေ။

၁၁။

‘‘သောဏ္ဏမယာ မဏိမယာ၊ လောဟိတင်္ဂမယာပိ စ။

ဖလိကာပိ စ ပလ္လင်္ကာ၊ ယေနိစ္ဆကာ ယဒိစ္ဆကာ [ယေနိစ္ဆယာ ယဒိစ္ဆကံ (သျာ။)၊ ယဒိစ္ဆကာယဒိစ္ဆကာ (က။)]။

၁၂။

‘‘မဟာရဟဉ္စ သယနံ၊ တူလိကာဝိကတီယုတံ။

ဥဒ္ဓလောမိကဧကန္တံ၊ ဗိမ္ဗောဟနသမာယုတံ [ဗိဗ္ဗောဟနသမာယုတံ။ (သျာ။ က။)]။

၁၃။

‘‘ဘဝနာ နိက္ခမိတွာန၊ စရန္တော ဒေဝစာရိကံ။

ယဒါ ဣစ္ဆာမိ ဂမနံ၊ ဒေဝသံဃပုရက္ခတော။

၁၄။

‘‘ပုပ္ဖဿ ဟေဋ္ဌာ တိဋ္ဌာမိ၊ ဥပရိစ္ဆဒနံ မမ။

သမန္တာ ယောဇနသတံ၊ ကဏိကာရေဟိ ဆာဒိတံ။

၁၅။

‘‘သဋ္ဌိတုရိယသဟဿာနိ၊ သာယပါတမုပဋ္ဌဟုံ။

ပရိဝါရေန္တိ မံ နိစ္စံ၊ ရတ္တိန္ဒိဝမတန္ဒိတာ။

၁၆။

‘‘တတ္ထ နစ္စေဟိ ဂီတေဟိ၊ တာဠေဟိ ဝါဒိတေဟိ စ။

ရမာမိ ခိဍ္ဍာရတိယာ၊ မောဒါမိ ကာမကာမိဟံ။

၁၇။

‘‘တတ္ထ ဘုတွာ ပိဝိတွာ စ၊ မောဒါမိ တိဒသေ တဒါ။

နာရီဂဏေဟိ သဟိတော၊ မောဒါမိ ဗျမှမုတ္တမေ။

၁၈။

‘‘သတာနံ ပဉ္စက္ခတ္တုဉ္စ၊ ဒေဝရဇ္ဇမကာရယိံ။

သတာနံ တီဏိက္ခတ္တုဉ္စ၊ စက္ကဝတ္တီ အဟောသဟံ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၁၉။

‘‘ဘဝါဘဝေ သံသရန္တော၊ မဟာဘောဂံ လဘာမဟံ။

ဘောဂေ မေ ဦနတာ နတ္ထိ၊ ဗုဒ္ဓပူဇာယိဒံ ဖလံ။

၂၀။

‘‘ဒုဝေ ဘဝေ သံသရာမိ၊ ဒေဝတ္တေ အထ မာနုသေ။

အညံ ဂတိံ န ဇာနာမိ၊ ဗုဒ္ဓပူဇာယိဒံ ဖလံ။

၂၁။

‘‘ဒုဝေ ကုလေ ပဇာယာမိ၊ ခတ္တိယေ စာပိ ဗြာဟ္မဏေ။

နီစေ ကုလေ န ဇာယာမိ၊ ဗုဒ္ဓပူဇာယိဒံ ဖလံ။

၂၂။

‘‘ဟတ္ထိယာနံ အဿယာနံ၊ သိဝိကံ သန္ဒမာနိကံ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၂၃။

‘‘ဒါသီဂဏံ ဒါသဂဏံ၊ နာရိယော သမလင်္ကတာ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၂၄။

‘‘ကောသေယျကမ္ဗလိယာနိ၊ ခေါမကပ္ပါသိကာနိ စ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၂၅။

‘‘နဝဝတ္ထံ နဝဖလံ၊ နဝဂ္ဂရသဘောဇနံ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၂၆။

‘‘ဣမံ ခါဒ ဣမံ ဘုဉ္ဇ၊ ဣမမှိ သယနေ သယ။

လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။

၂၇။

‘‘သဗ္ဗတ္ထ ပူဇိတော ဟောမိ၊ ယသော အဗ္ဘုဂ္ဂတော မမ။

မဟာပက္ခော သဒါ ဟောမိ၊ အဘေဇ္ဇပရိသော သဒါ။

ဉာတီနံ ဥတ္တမော ဟောမိ၊ ဗုဒ္ဓပူဇာယိဒံ ဖလံ။

၂၈။

‘‘သီတံ ဥဏှံ န ဇာနာမိ၊ ပရိဠာဟော န ဝိဇ္ဇတိ။

အထော စေတသိကံ ဒုက္ခံ၊ ဟဒယေ မေ န ဝိဇ္ဇတိ။

၂၉။

‘‘သုဝဏ္ဏဝဏ္ဏော ဟုတွာန၊ သံသရာမိ ဘဝါဘဝေ။

ဝေဝဏ္ဏိယံ န ဇာနာမိ၊ ဗုဒ္ဓပူဇာယိဒံ ဖလံ။

၃၀။

‘‘ဒေဝလောကာ စဝိတွာန၊ သုက္ကမူလေန စောဒိတော။

သာဝတ္ထိယံ ပုရေ ဇာတော၊ မဟာသာလေ သုအဍ္ဎကေ။

၃၁။

‘‘ပဉ္စ ကာမဂုဏေ ဟိတွာ၊ ပဗ္ဗဇိံ အနဂါရိယံ။

ဇာတိယာ သတ္တဝဿောဟံ၊ အရဟတ္တမပါပုဏိံ။

၃၂။

‘‘ဥပသမ္ပာဒယီ ဗုဒ္ဓေါ၊ ဂုဏမညာယ စက္ခုမာ။

တရုဏော ပူဇနီယောဟံ၊ ဗုဒ္ဓပူဇာယိဒံ ဖလံ။

၃၃။

‘‘ဒိဗ္ဗစက္ခု ဝိသုဒ္ဓံ မေ၊ သမာဓိကုသလော အဟံ။

အဘိညာပါရမိပ္ပတ္တော၊ ဗုဒ္ဓပူဇာယိဒံ ဖလံ။

၃၄။

‘‘ပဋိသမ္ဘိဒါ အနုပ္ပတ္တော၊ ဣဒ္ဓိပါဒေသု ကောဝိဒေါ။

ဓမ္မေသု ပါရမိပ္ပတ္တော၊ ဗုဒ္ဓပူဇာယိဒံ ဖလံ။

၃၅။

‘‘တိံသကပ္ပသဟဿမှိ ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၆။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၃၇။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၃၈။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ။

ဣတ္ထံ သုဒံ အာယသ္မာ တိကဏိကာရပုပ္ဖိယော ထေရော ဣမာ

ဂါထာယော အဘာသိတ္ထာတိ။

တိကဏိကာရပုပ္ဖိယတ္ထေရဿာပဒါနံ ပဌမံ။

၂။ ဧကပတ္တဒါယကတ္ထေရအပဒါနံ

၃၉။

‘‘နဂရေ ဟံသဝတိယာ၊ ကုမ္ဘကာရော အဟောသဟံ။

အဒ္ဒသံ ဝိရဇံ ဗုဒ္ဓံ၊ ဩဃတိဏ္ဏမနာသဝံ။

၄၀။

‘‘သုကတံ မတ္တိကာပတ္တံ၊ ဗုဒ္ဓသေဋ္ဌဿဒါသဟံ။

ပတ္တံ ဒတွာ ဘဂဝတော၊ ဥဇုဘူတဿ တာဒိနော။

၄၁။

‘‘ဘဝေ နိဗ္ဗတ္တမာနောဟံ၊ သောဏ္ဏထာလေ လဘာမဟံ။

ရူပိမယေ စ သောဝဏ္ဏေ၊ တဋ္ဋိကေ စ မဏီမယေ။

၄၂။

‘‘ပါတိယော ပရိဘုဉ္ဇာမိ၊ ပုညကမ္မဿိဒံ ဖလံ။

ယသာနဉ္စ ဓနာနဉ္စ [ယသသာဝ ဇနာနဉ္စ (သျာ။)]၊ အဂ္ဂဘူတော [ပတ္တဘူတော (သီ။ ဣ။)] စ ဟောမဟံ။

၄၃။

‘‘ယထာပိ ဘဒ္ဒကေ ခေတ္တေ၊ ဗီဇံ အပ္ပမ္ပိ ရောပိတံ။

သမ္မာဓါရံ ပဝစ္ဆန္တေ၊ ဖလံ တောသေတိ ကဿကံ။

၄၄။

‘‘တထေဝိဒံ ပတ္တဒါနံ၊ ဗုဒ္ဓခေတ္တမှိ ရောပိတံ။

ဣတိဓါရေ ပဝဿန္တေ၊ ဖလံ မံ တောသယိဿတိ။

၄၅။

‘‘ယာဝတာ ခေတ္တာ ဝိဇ္ဇန္တိ၊ သံဃာပိ စ ဂဏာပိ စ။

ဗုဒ္ဓခေတ္တသမော နတ္ထိ၊ သုခဒေါ သဗ္ဗပါဏိနံ။

၄၆။

‘‘နမော တေ ပုရိသာဇည၊ နမော တေ ပုရိသုတ္တမ။

ဧကပတ္တံ ဒဒိတွာန၊ ပတ္တောမှိ အစလံ ပဒံ။

၄၇။

‘‘ဧကနဝုတိတော ကပ္ပေ၊ ယံ ပတ္တမဒဒိံ တဒါ။

ဒုဂ္ဂတိံ နာဘိဇာနာမိ၊ ပတ္တဒါနဿိဒံ ဖလံ။

၄၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကပတ္တဒါယကော ထေရော ဣမာ ဂါထာယော

အဘာသိတ္ထာတိ။

ဧကပတ္တဒါယကတ္ထေရဿာပဒါနံ ဒုတိယံ။

၃။ ကာသုမာရဖလိယတ္ထေရအပဒါနံ

၅၁။

‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ။

အဒ္ဒသံ ဝိရဇံ ဗုဒ္ဓံ၊ လောကဇေဋ္ဌံ နရာသဘံ။

၅၂။

‘‘ပသန္နစိတ္တော သုမနော၊ သိရေ ကတွာန အဉ္ဇလိံ။

ကာသုမာရိကမာဒါယ၊ ဗုဒ္ဓသေဋ္ဌဿဒါသဟံ။

၅၃။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၅၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကာသုမာရဖလိယော ထေရော ဣမာ ဂါထာယော

အဘာသိတ္ထာတိ။

ကာသုမာရဖလိယတ္ထေရဿာပဒါနံ တတိယံ။

၄။ အဝဋဖလိယတ္ထေရအပဒါနံ

၅၇။

‘‘သဟဿရံသီ ဘဂဝါ၊ သယမ္ဘူ အပရာဇိတော။

ဝိဝေကာ ဥဋ္ဌဟိတွာန၊ ဂေါစရာယာဘိနိက္ခမိ။

၅၈။

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ။

ပသန္နစိတ္တော သုမနော၊ အဝဋံ အဒဒိံ ဖလံ။

၅၉။

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၆၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဝဋဖလိယော ထေရော ဣမာ ဂါထာယော

အဘာသိတ္ထာတိ။

အဝဋဖလိယတ္ထေရဿာပဒါနံ စတုတ္ထံ။

၅။ ပါဒဖလိယတ္ထေရအပဒါနံ

၆၃။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ရထိယံ ပဋိပဇ္ဇန္တံ၊ ပါဒဖလံ [ဝါရဖလံ (သီ။)၊ စာရဖလံ (သျာ။)၊ ပါရဖလံ (ဣ။)] အဒါသဟံ။

၆၄။

‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၆၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါဒဖလိယော ထေရော ဣမာ ဂါထာယော

အဘာသိတ္ထာတိ။

ပါဒဖလိယတ္ထေရဿာပဒါနံ ပဉ္စမံ။

၆။ မာတုလုင်္ဂဖလဒါယကတ္ထေရအပဒါနံ

၆၈။

‘‘ကဏိကာရံဝ ဇလိတံ၊ ပုဏ္ဏမာယေဝ စန္ဒိမံ။

ဇလန္တံ ဒီပရုက္ခံဝ၊ အဒ္ဒသံ လောကနာယကံ။

၆၉။

‘‘မာတုလုင်္ဂဖလံ ဂယှ၊ အဒါသိံ သတ္ထုနော အဟံ။

ဒက္ခိဏေယျဿ ဝီရဿ [ဓီရဿ (သီ။)]၊ ပသန္နော သေဟိ ပါဏိဘိ။

၇၀။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၇၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မာတုလုင်္ဂဖလဒါယကော ထေရော ဣမာ

ဂါထာယော အဘာသိတ္ထာတိ။

မာတုလုင်္ဂဖလဒါယကတ္ထေရဿာပဒါနံ ဆဋ္ဌံ။

၇။ အဇေလိဖလဒါယကတ္ထေရအပဒါနံ

၇၄။

‘‘အဇ္ဇုနော [အဇိနော (သျာ။)] နာမ သမ္ဗုဒ္ဓေါ၊ ဟိမဝန္တေ ဝသီ တဒါ။

စရဏေန စ သမ္ပန္နော၊ သမာဓိကုသလော မုနိ။

၇၅။

‘‘ကုမ္ဘမတ္တံ ဂဟေတွာန၊ အဇေလိံ [အဉ္ဇလိံ (သျာ။)၊ အဇေလံ (ဣ။)] ဇီဝဇီဝကံ။

ဆတ္တပဏ္ဏံ ဂဟေတွာန၊ အဒါသိံ သတ္ထုနော အဟံ။

၇၆။

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၇၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဇေလိဖလဒါယကော ထေရော ဣမာ

ဂါထာယော အဘာသိတ္ထာတိ။

အဇေလိဖလဒါယကတ္ထေရဿာပဒါနံ သတ္တမံ။

၈။ အမောဒဖလိယတ္ထေရအပဒါနံ

၈၀။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ရထိယံ ပဋိပဇ္ဇန္တံ၊ အမောဒမဒဒိံ ဖလံ။

၈၁။

‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၈၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၈၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမောဒဖလိယော ထေရော ဣမာ ဂါထာယော

အဘာသိတ္ထာတိ။

အမောဒဖလိယတ္ထေရဿာပဒါနံ အဋ္ဌမံ။

၉။ တာလဖလဒါယကတ္ထေရအပဒါနံ

၈၅။

‘‘သတရံသီ နာမ ဘဂဝါ၊ သယမ္ဘူ အပရာဇိတော။

ဝိဝေကာ ဝုဋ္ဌဟိတွာန၊ ဂေါစရာယာဘိနိက္ခမိ။

၈၆။

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ။

ပသန္နစိတ္တော သုမနော၊ တာလဖလံ အဒါသဟံ။

၈၇။

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၈၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၈၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၉၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တာလဖလဒါယကော ထေရော ဣမာ ဂါထာယော

အဘာသိတ္ထာတိ။

တာလဖလဒါယကတ္ထေရဿာပဒါနံ နဝမံ။

၁၀။ နာဠိကေရဖလဒါယကတ္ထေရအပဒါနံ

၉၁။

‘‘နဂရေ ဗန္ဓုမတိယာ၊ အာရာမိကော အဟံ တဒါ။

အဒ္ဒသံ ဝိရဇံ ဗုဒ္ဓံ၊ ဂစ္ဆန္တံ အနိလဉ္ဇသေ။

၉၂။

‘‘နာဠိကေရဖလံ ဂယှ၊ ဗုဒ္ဓသေဋ္ဌဿဒါသဟံ။

အာကာသေ ဌိတကော သန္တော၊ ပဋိဂ္ဂဏှိ မဟာယသော။

၉၃။

‘‘ဝိတ္တိသဉ္ဇနနော မယှံ၊ ဒိဋ္ဌဓမ္မသုခါဝဟော။

ဖလံ ဗုဒ္ဓဿ ဒတွာန၊ ဝိပ္ပသန္နေန စေတသာ။

၉၄။

‘‘အဓိဂစ္ဆိံ တဒါ ဣတိံ၊ ဝိပုလဉ္စ သုခုတ္တမံ။

ဥပ္ပဇ္ဇတေဝ ရတနံ၊ နိဗ္ဗတ္တဿ တဟိံ တဟိံ။

၉၅။

‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၉၆။

‘‘ဒိဗ္ဗစက္ခု ဝိသုဒ္ဓံ မေ၊ သမာဓိကုသလော အဟံ။

အဘိညာပါရမိပ္ပတ္တော၊ ဖလဒါနဿိဒံ ဖလံ။

၉၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၉၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၉၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နာဠိကေရဖလဒါယကော ထေရော ဣမာ

ဂါထာယော အဘာသိတ္ထာတိ။

နာဠိကေရဖလဒါယကတ္ထေရဿာပဒါနံ ဒသမံ။

ကဏိကာရဝဂ္ဂေါ ဧကပညာသမော။

တဿုဒ္ဒါနံ –

ကဏိကာရေကပတ္တာ စ၊ ကာသုမာရီ တထာဝဋာ။

ပါဒဉ္စ မာတုလုင်္ဂဉ္စ၊ အဇေလီမောဒမေဝ စ။

တာလံ တထာ နာဠိကေရံ၊ ဂါထာယော ဂဏိတာ ဝိဟ။

ဧကံ ဂါထာသတံ ဟောတိ၊ ဦနာဓိကဝိဝဇ္ဇိတံ။