၅၀။ ကိင်္ကဏိပုပ္ဖဝဂ္ဂ
၁။ တိကိင်္ကဏိပုပ္ဖိယတ္ထေရအပဒါန
၁။
‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ။
အဒ္ဒသံ ဝိရဇံ ဗုဒ္ဓံ၊ ဝိပဿိံ လောကနာယကံ။
၂။
‘‘တီဏိ ကိင်္ကဏိပုပ္ဖာနိ၊ ပဂ္ဂယှ အဘိရောပယိံ။
သမ္ဗုဒ္ဓမဘိပူဇေတွာ၊ ဂစ္ဆာမိ ဒက္ခိဏာမုခေါ။
၃။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၄။
‘‘ဧကနဝုတိတော ကပ္ပေ၊ ယံ ဗုဒ္ဓမဘိပူဇယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၅။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
၆။
‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
၇။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ တိကိင်္ကဏိပုပ္ဖိယော ထေရော ဣမာ
ဂါထာယော အဘာသိတ္ထာတိ။
တိကိင်္ကဏိပုပ္ဖိယတ္ထေရဿာပဒါနံ ပဌမံ။
၂။ ပံသုကူလပူဇကတ္ထေရအပဒါနံ
၈။
‘‘ဟိမဝန္တဿာဝိဒူရေ ၊ ဥဒင်္ဂဏော နာမ ပဗ္ဗတော။
တတ္ထဒ္ဒသံ ပံသုကူလံ၊ ဒုမဂ္ဂမှိ ဝိလမ္ဗိတံ။
၉။
‘‘တီဏိ ကိင်္ကဏိပုပ္ဖာနိ၊ ဩစိနိတွာနဟံ တဒါ။
ဟဋ္ဌော ဟဋ္ဌေန စိတ္တေန၊ ပံသုကူလမပူဇယိံ။
၁၀။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၁၁။
‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ပူဇိတွာ အရဟဒ္ဓဇံ။
၁၂။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၁၃။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၁၄။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပံသုကူလပူဇကော ထေရော ဣမာ ဂါထာယော
အဘာသိတ္ထာတိ။
ပံသုကူလပူဇကတ္ထေရဿာပဒါနံ ဒုတိယံ။
၃။ ကောရဏ္ဍပုပ္ဖိယတ္ထေရအပဒါနံ
၁၅။
‘‘ဝနကမ္မိကော ပုရေ အာသိံ၊ ပိတုမာတုမတေနဟံ [ပိတုပေတာမဟေနဟံ (သီ။ သျာ။ ဣ။)]။
ပသုမာရေန ဇီဝါမိ၊ ကုသလံ မေ န ဝိဇ္ဇတိ။
၁၆။
‘‘မမ အာသယသာမန္တာ၊ တိဿော လောကဂ္ဂနာယကော။
ပဒါနိ တီဏိ ဒဿေသိ၊ အနုကမ္ပာယ စက္ခုမာ။
၁၇။
‘‘အက္ကန္တေ စ ပဒေ ဒိသွာ၊ တိဿနာမဿ သတ္ထုနော။
ဟဋ္ဌော ဟဋ္ဌေန စိတ္တေန၊ ပဒေ စိတ္တံ ပသာဒယိံ။
၁၈။
‘‘ကောရဏ္ဍံ ပုပ္ဖိတံ ဒိသွာ၊ ပါဒပံ ဓရဏီရုဟံ။
သကောသကံ ဂဟေတွာန၊ ပဒသေဋ္ဌမပူဇယိံ [ပဒသေဋ္ဌေ အပူဇယိံ (သီ။ ဣ။)]။
၁၉။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၂၀။
‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။
ကောရဏ္ဍကဆဝိ ဟောမိ၊ သုပ္ပဘာသော [သပဘာသော (သီ။ သျာ။ ဣ။ က။)] ဘဝါမဟံ။
၂၁။
‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ပဒပူဇာယိဒံ ဖလံ။
၂၂။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၂၃။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၂၄။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ကောရဏ္ဍပုပ္ဖိယော ထေရော ဣမာ ဂါထာယော
အဘာသိတ္ထာတိ။
ကောရဏ္ဍပုပ္ဖိယတ္ထေရဿာပဒါနံ တတိယံ။
၄။ ကိံသုကပုပ္ဖိယတ္ထေရအပဒါနံ
၂၅။
‘‘ကိံသုကံ ပုပ္ဖိတံ ဒိသွာ၊ ပဂ္ဂဟေတွာန အဉ္ဇလိံ။
ဗုဒ္ဓသေဋ္ဌံ သရိတွာန၊ အာကာသေ အဘိပူဇယိံ။
၂၆။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၂၇။
‘‘ဧကတိံသေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၂၈။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၂၉။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၃၀။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ကိံသုကပုပ္ဖိယော ထေရော ဣမာ ဂါထာယော
အဘာသိတ္ထာတိ။
ကိံသုကပုပ္ဖိယတ္ထေရဿာပဒါနံ စတုတ္ထံ။
၅။ ဥပဍ္ဎဒုဿဒါယကတ္ထေရအပဒါနံ
၃၁။
‘‘ပဒုမုတ္တရဘဂဝတော ၊ သုဇာတော နာမ သာဝကော။
ပံသုကူလံ ဂဝေသန္တော၊ သင်္ကာရေ စရတေ [စရတီ (သီ။ က။)] တဒါ။
၃၂။
‘‘နဂရေ ဟံသဝတိယာ၊ ပရေသံ ဘတကော အဟံ။
ဥပဍ္ဎဒုဿံ ဒတွာန၊ သိရသာ အဘိဝါဒယိံ။
၃၃။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၃၄။
‘‘တေတ္တိံသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ။
သတ္တသတ္တတိက္ခတ္တုဉ္စ၊ စက္ကဝတ္တီ အဟောသဟံ။
၃၅။
‘‘ပဒေသရဇ္ဇံ ဝိပုလံ၊ ဂဏနာတော အသံခိယံ။
ဥပဍ္ဎဒုဿဒါနေန၊ မောဒါမိ အကုတောဘယော။
၃၆။
‘‘ဣစ္ဆမာနော စဟံ အဇ္ဇ၊ သကာနနံ သပဗ္ဗတံ။
ခေါမဒုဿေဟိ ဆာဒေယျံ၊ အဍ္ဎဒုဿဿိဒံ ဖလံ။
၃၇။
‘‘သတသဟဿိတော ကပ္ပေ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ အဍ္ဎဒုဿဿိဒံ ဖလံ။
၃၈။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၃၉။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၄၀။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဥပဍ္ဎဒုဿဒါယကော ထေရော ဣမာ
ဂါထာယော အဘာသိတ္ထာတိ။
ဥပဍ္ဎဒုဿဒါယကတ္ထေရဿာပဒါနံ ပဉ္စမံ။
၆။ ဃတမဏ္ဍဒါယကတ္ထေရအပဒါနံ
၄၁။
‘‘သုစိန္တိတံ ဘဂဝန္တံ၊ လောကဇေဋ္ဌံ နရာသဘံ။
ဥပဝိဋ္ဌံ မဟာရညံ၊ ဝါတာဗာဓေန ဣဠိတံ။
၄၂။
‘‘ဒိသွာ စိတ္တံ ပသာဒေတွာ၊ ဃတမဏ္ဍမုပါနယိံ။
ကတတ္တာ အာစိတတ္တာ [ဥပစိတတ္တာ (သျာ။ က။)] စ၊ ဂင်္ဂါ ဘာဂီရထီ အယံ။
၄၃။
‘‘မဟာသမုဒ္ဒါ စတ္တာရော၊ ဃတံ သမ္ပဇ္ဇရေ မမ။
အယဉ္စ ပထဝီ ဃောရာ၊ အပ္ပမာဏာ အသံခိယာ။
၄၄။
‘‘မမ သင်္ကပ္ပမညာယ၊ ဘဝတေ မဓုသက္ကရာ [မဓုသက္ခရာ (သျာ။ က။)]။
စာတုဒ္ဒီပါ ဣမေ ရုက္ခာ၊ ပါဒပါ ဓရဏီရုဟာ။
၄၅။
‘‘မမ သင်္ကပ္ပမညာယ၊ ကပ္ပရုက္ခာ ဘဝန္တိ တေ။
ပညာသက္ခတ္တုံ ဒေဝိန္ဒော၊ ဒေဝရဇ္ဇမကာရယိံ။
၄၆။
‘‘ဧကပညာသက္ခတ္တုဉ္စ၊ စက္ကဝတ္တီ အဟောသဟံ။
ပဒေသရဇ္ဇံ ဝိပုလံ၊ ဂဏနာတော အသံခိယံ။
၄၇။
‘‘စတုန္နဝုတိတော [ဆနဝုတေ ဣတော (သီ။)] ကပ္ပေ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ ဃတမဏ္ဍဿိဒံ ဖလံ။
၄၈။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၄၉။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၅၀။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဃတမဏ္ဍဒါယကော ထေရော ဣမာ ဂါထာယော
အဘာသိတ္ထာတိ။
ဃတမဏ္ဍဒါယကတ္ထေရဿာပဒါနံ ဆဋ္ဌံ။
၇။ ဥဒကဒါယကတ္ထေရအပဒါနံ
၅၁။
‘‘ပဒုမုတ္တရဗုဒ္ဓဿ ၊ ဘိက္ခုသံဃေ အနုတ္တရေ။
ပသန္နစိတ္တော သုမနော၊ ပါနီဃဋမပူရယိံ။
၅၂။
‘‘ပဗ္ဗတဂ္ဂေ ဒုမဂ္ဂေ ဝါ၊ အာကာသေ ဝါထ ဘူမိယံ။
ယဒါ ပါနီယမိစ္ဆာမိ၊ ခိပ္ပံ နိဗ္ဗတ္တတေ မမ။
၅၃။
‘‘သတသဟဿိတော ကပ္ပေ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ ဒကဒါနဿိဒံ ဖလံ။
၅၄။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၅၅။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၅၆။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဥဒကဒါယကော ထေရော ဣမာ ဂါထာယော
အဘာသိတ္ထာတိ။
ဥဒကဒါယကတ္ထေရဿာပဒါနံ သတ္တမံ။
၈။ ပုလိနထူပိယတ္ထေရအပဒါနံ
၅၇။
‘‘ဟိမဝန္တဿာဝိဒူရေ ၊ ယမကော နာမ ပဗ္ဗတော။
အဿမော သုကတော မယှံ၊ ပဏ္ဏသာလာ သုမာပိတာ။
၅၈။
‘‘နာရဒေါ နာမ နာမေန၊ ဇဋိလော ဥဂ္ဂတာပနော။
စတုဒ္ဒသသဟဿာနိ၊ သိဿာ ပရိစရန္တိ မံ။
၅၉။
‘‘ပဋိသလ္လီနကော သန္တော၊ ဧဝံ စိန္တေသဟံ တဒါ။
‘သဗ္ဗော ဇနော မံ ပူဇေတိ၊ နာဟံ ပူဇေမိ ကိဉ္စနံ။
၆၀။
‘‘‘န မေ ဩဝါဒကော အတ္ထိ၊ ဝတ္တာ ကောစိ န ဝိဇ္ဇတိ။
အနာစရိယုပဇ္ဈာယော၊ ဝနေ ဝါသံ ဥပေမဟံ။
၆၁။
‘‘‘ဥပါသမာနော ယမဟံ၊ ဂရုစိတ္တံ ဥပဋ္ဌဟေ။
သော မေ အာစရိယော နတ္ထိ၊ ဝနဝါသော နိရတ္ထကော။
၆၂။
‘‘‘အာယာဂံ မေ ဂဝေသိဿံ၊ ဂရုံ ဘာဝနိယံ တထာ။
သာဝဿယော ဝသိဿာမိ၊ န ကောစိ ဂရဟိဿတိ’။
၆၃။
‘‘ဥတ္တာနကူလာ နဒိကာ၊ သုပတိတ္ထာ မနောရမာ။
သံသုဒ္ဓပုလိနာကိဏ္ဏာ၊ အဝိဒူရေ မမဿမံ။
၆၄။
‘‘နဒိံ အမရိကံ နာမ၊ ဥပဂန္တွာနဟံ တဒါ။
သံဝဍ္ဎယိတွာ ပုလိနံ၊ အကံ ပုလိနစေတိယံ။
၆၅။
‘‘ယေ တေ အဟေသုံ သမ္ဗုဒ္ဓါ၊ ဘဝန္တကရဏာ မုနီ။
တေသံ ဧတာဒိသော ထူပေါ၊ တံ နိမိတ္တံ ကရောမဟံ။
၆၆။
‘‘ကရိတွာ ပုလိနံ [ပုဠိနေ (သီ။ သျာ။ ဣ။)] ထူပံ၊ သောဝဏ္ဏံ မာပယိံ အဟံ။
သောဏ္ဏကိင်္ကဏိပုပ္ဖာနိ၊ သဟဿေ တီဏိ ပူဇယိံ။
၆၇။
‘‘သာယပါတံ နမဿာမိ၊ ဝေဒဇာတော ကတဉ္ဇလီ။
သမ္မုခါ ဝိယ သမ္ဗုဒ္ဓံ၊ ဝန္ဒိံ ပုလိနစေတိယံ။
၆၈။
‘‘ယဒါ ကိလေသာ ဇာယန္တိ၊ ဝိတက္ကာ ဂေဟနိဿိတာ။
သရာမိ သုကတံ ထူပံ၊ ပစ္စဝေက္ခာမိ တာဝဒေ။
၆၉။
‘‘ဥပနိဿာယ ဝိဟရံ၊ သတ္ထဝါဟံ ဝိနာယကံ။
ကိလေသေ သံဝသေယျာသိ၊ န ယုတ္တံ တဝ မာရိသ။
၇၀။
‘‘သဟ အာဝဇ္ဇိတေ ထူပေ၊ ဂါရဝံ ဟောတိ မေ တဒါ။
ကုဝိတက္ကေ ဝိနောဒေသိံ၊ နာဂေါ တုတ္တဋ္ဋိတော ယထာ။
၇၁။
‘‘ဧဝံ ဝိဟရမာနံ မံ၊ မစ္စုရာဇာဘိမဒ္ဒထ။
တတ္ထ ကာလင်္ကတော သန္တော၊ ဗြဟ္မလောကမဂစ္ဆဟံ။
၇၂။
‘‘ယာဝတာယုံ ဝသိတွာန၊ တိဒိဝေ [တိဒသေ (သီ။ ဣ။)] ဥပပဇ္ဇဟံ။
အသီတိက္ခတ္တုံ ဒေဝိန္ဒော၊ ဒေဝရဇ္ဇမကာရယိံ။
၇၃။
‘‘သတာနံ တီဏိက္ခတ္တုဉ္စ၊ စက္ကဝတ္တီ အဟောသဟံ။
ပဒေသရဇ္ဇံ ဝိပုလံ၊ ဂဏနာတော အသံခိယံ။
၇၄။
‘‘သောဏ္ဏကိင်္ကဏိပုပ္ဖာနံ [တေသံ ကိင်္ကဏိပုပ္ဖာနံ (သီ။)]၊ ဝိပါကံ အနုဘောမဟံ။
ဓါတီသတသဟဿာနိ၊ ပရိဝါရေန္တိ မံ [မေ (က။)] ဘဝေ။
၇၅။
‘‘ထူပဿ ပရိစိဏ္ဏတ္တာ၊ ရဇောဇလ္လံ န လိမ္ပတိ။
ဂတ္တေ သေဒါ န မုစ္စန္တိ၊ သုပ္ပဘာသော ဘဝါမဟံ။
၇၆။
‘‘အဟော မေ သုကတော ထူပေါ၊ သုဒိဋ္ဌာမရိကာ နဒီ။
ထူပံ ကတွာန ပုလိနံ၊ ပတ္တောမှိ အစလံ ပဒံ။
၇၇။
‘‘ကုသလံ ကတ္တုကာမေန၊ ဇန္တုနာ သာရဂါဟိနာ။
နတ္ထိ ခေတ္တံ အခေတ္တံ ဝါ၊ ပဋိပတ္တီဝ သာဓကာ [သာရိကာ (ဣ။)၊ သာရကာ (သျာ။)၊ သာရတာ (က။)]။
၇၈။
‘‘ယထာပိ ဗလဝါ ပေါသော၊ အဏ္ဏဝံ တရိတုဿဟေ။
ပရိတ္တံ ကဋ္ဌမာဒါယ၊ ပက္ခန္ဒေယျ မဟာသရံ။
၇၉။
‘‘ဣမာဟံ ကဋ္ဌံ နိဿာယ၊ တရိဿာမိ မဟောဒဓိံ။
ဥဿာဟေန ဝီရိယေန၊ တရေယျ ဥဒဓိံ နရော။
၈၀။
‘‘တထေဝ မေ ကတံ ကမ္မံ၊ ပရိတ္တံ ထောကကဉ္စ ယံ။
တံ ကမ္မံ ဥပနိဿာယ၊ သံသာရံ သမတိက္ကမိံ။
၈၁။
‘‘ပစ္ဆိမေ ဘဝေ သမ္ပတ္တေ၊ သုက္ကမူလေန စောဒိတော။
သာဝတ္ထိယံ ပုရေ ဇာတော၊ မဟာသာလေ သုအဍ္ဎကေ။
၈၂။
‘‘သဒ္ဓါ မာတာ ပိတာ မယှံ၊ ဗုဒ္ဓဿ သရဏံ ဂတာ။
ဥဘော ဒိဋ္ဌပဒါ ဧတေ၊ အနုဝတ္တန္တိ သာသနံ။
၈၃။
‘‘ဗောဓိပပဋိကံ ဂယှ၊ သောဏ္ဏထူပမကာရယုံ။
သာယပါတံ [သာယံ ပါတံ (သျာ။ က။)] နမဿန္တိ၊ သကျပုတ္တဿ သမ္မုခါ။
၈၄။
‘‘ဥပေါသထမှိ ဒိဝသေ၊ သောဏ္ဏထူပံ ဝိနီဟရုံ။
ဗုဒ္ဓဿ ဝဏ္ဏံ ကိတ္တေန္တာ၊ တိယာမံ ဝီတိနာမယုံ။
၈၅။
‘‘သဟ ဒိသွာနဟံ [ပသာဒေတွာနဟံ (က။)] ထူပံ၊ သရိံ ပုလိနစေတိယံ။
ဧကာသနေ နိသီဒိတွာ၊ အရဟတ္တမပါပုဏိံ။
ဒွါဝီသတိမံ ဘာဏဝါရံ။
၈၆။
‘‘ဂဝေသမာနော တံ ဝီရံ၊ ဓမ္မသေနာပတိဒ္ဒသံ။
အဂါရာ နိက္ခမိတွာန၊ ပဗ္ဗဇိံ တဿ သန္တိကေ။
၈၇။
‘‘ဇာတိယာ သတ္တဝဿေန၊ အရဟတ္တမပါပုဏိံ။
ဥပသမ္ပာဒယီ ဗုဒ္ဓေါ၊ ဂုဏမညာယ စက္ခုမာ။
၈၈။
‘‘ဒါရကေနေဝ သန္တေန၊ ကိရိယံ နိဋ္ဌိတံ မယာ။
ကတံ မေ ကရဏီယဇ္ဇ၊ သကျပုတ္တဿ သာသနေ။
၈၉။
‘‘သဗ္ဗဝေရဘယာတီတော၊ သဗ္ဗသင်္ဂါတိဂေါ [သဗ္ဗသင်္ကာတိတော (က။)] ဣသိ။
သာဝကော တေ မဟာဝီရ၊ သောဏ္ဏထူပဿိဒံ ဖလံ။
၉၀။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၉၁။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၉၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပုလိနထူပိယော ထေရော ဣမာ ဂါထာယော
အဘာသိတ္ထာတိ။
ပုလိနထူပိယတ္ထေရဿာပဒါနံ အဋ္ဌမံ။
၉။ နဠကုဋိဒါယကတ္ထေရအပဒါနံ
၉၃။
‘‘ဟိမဝန္တဿာဝိဒူရေ ၊ ဟာရိတော နာမ ပဗ္ဗတော။
သယမ္ဘူ နာရဒေါ နာမ၊ ရုက္ခမူလေ ဝသီ တဒါ။
၉၄။
‘‘နဠာဂါရံ ကရိတွာန၊ တိဏေန ဆာဒယိံ အဟံ။
စင်္ကမံ သောဓယိတွာန၊ သယမ္ဘုဿ အဒါသဟံ။
၉၅။
‘‘တေန ကမ္မေန သုကတေန၊ စေတနာပဏိဓီဟိ စ။
ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။
၉၆။
‘‘တတ္ထ မေ သုကတံ ဗျမှံ၊ နဠကုဋိကနိမ္မိတံ။
သဋ္ဌိယောဇနမုဗ္ဗေဓံ၊ တိံသယောဇနဝိတ္ထတံ။
၉၇။
‘‘စတုဒ္ဒသေသု ကပ္ပေသု၊ ဒေဝလောကေ ရမိံ အဟံ။
ဧကသတ္တတိက္ခတ္တုဉ္စ၊ ဒေဝရဇ္ဇမကာရယိံ။
၉၈။
‘‘စတုတိံသတိက္ခတ္တုဉ္စ၊ စက္ကဝတ္တီ အဟောသဟံ။
ပဒေသရဇ္ဇံ ဝိပုလံ၊ ဂဏနာတော အသံခိယံ။
၉၉။
‘‘ဓမ္မပါသာဒမာရုယှ၊ သဗ္ဗာကာရဝရူပမံ။
ယဒိစ္ဆကာဟံ ဝိဟရေ၊ သကျပုတ္တဿ သာသနေ။
၁၀၀။
‘‘ဧကတိံသေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ နဠကုဋိယိဒံ ဖလံ။
၁၀၁။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၁၀၂။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၁၀၃။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ နဠကုဋိဒါယကော ထေရော ဣမာ ဂါထာယော
အဘာသိတ္ထာတိ။
နဠကုဋိဒါယကတ္ထေရဿာပဒါနံ နဝမံ။
၁၀။ ပိယာလဖလဒါယကတ္ထေရအပဒါနံ
၁၀၄။
‘‘မိဂလုဒ္ဒေါ ပုရေ အာသိံ၊ ဝိပိနေ ဝိစရံ တဒါ။
အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ။
၁၀၅။
‘‘ပိယာလဖလမာဒါယ၊ ဗုဒ္ဓသေဋ္ဌဿဒါသဟံ။
ပုညက္ခေတ္တဿ ဝီရဿ၊ ပသန္နော သေဟိ ပါဏိဘိ။
၁၀၆။
‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။
ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။
၁၀၇။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၁၀၈။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၁၀၉။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပိယာလဖလဒါယကော ထေရော ဣမာ
ဂါထာယော အဘာသိတ္ထာတိ။
ပိယာလဖလဒါယကတ္ထေရဿာပဒါနံ ဒသမံ။
ကိင်္ကဏိပုပ္ဖဝဂ္ဂေါ ပညာသမော။
တဿုဒ္ဒါနံ –
ကိင်္ကဏီ ပံသုကူလဉ္စ၊ ကောရဏ္ဍမထ ကိံသုကံ။
ဥပဍ္ဎဒုဿီ ဃတဒေါ၊ ဥဒကံ ထူပကာရကော။
နဠကာရီ စ နဝမော၊ ပိယာလဖလဒါယကော။
သတမေကဉ္စ ဂါထာနံ၊ နဝကဉ္စ တဒုတ္တရိ။
အထ ဝဂ္ဂုဒ္ဒါနံ –
မေတ္တေယျဝဂ္ဂေါ ဘဒ္ဒါလိ၊ သကိံသမ္မဇ္ဇကောပိ စ။
ဧကဝိဟာရီ ဝိဘီတကီ၊ ဇဂတီ သာလပုပ္ဖိယော။
နဠာဂါရံ ပံသုကူလံ၊ ကိင်္ကဏိပုပ္ဖိယော တထာ။
အသီတိ ဒွေ စ ဂါထာယော၊ စတုဒ္ဒသသတာနိ စ။
မေတ္တေယျဝဂ္ဂဒသကံ။
ပဉ္စမသတကံ သမတ္တံ။