နဠမာလိဝဂ္ဂ

၄၈။ နဠမာလိဝဂ္ဂ

၁။ နဠမာလိယတ္ထေရအပဒါန

၁။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ဝိပိနဂ္ဂေန ဂစ္ဆန္တံ၊ အဒ္ဒသံ လောကနာယကံ။

၂။

‘‘နဠမာလံ ဂဟေတွာန၊ နိက္ခမန္တော စ တာဝဒေ။

တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ။

၃။

‘‘ပသန္နစိတ္တော သုမနော၊ နဠမာလမပူဇယိံ။

ဒက္ခိဏေယျံ မဟာဝီရံ၊ သဗ္ဗလောကာနုကမ္ပကံ။

၄။

‘‘ဧကတိံသေ ဣတော ကပ္ပေ၊ ယံ မာလမဘိရောပယိံ [ပုပ္ဖမဘိရောပယိံ (သီ။ သျာ။ ဣ။)]။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၆။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၇။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နဠမာလိယော ထေရော ဣမာ ဂါထာယော

အဘာသိတ္ထာတိ။

နဠမာလိယတ္ထေရဿာပဒါနံ ပဌမံ။

၂။ မဏိပူဇကတ္ထေရအပဒါနံ

၈။

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။

ဝိဝေကကာမော သမ္ဗုဒ္ဓေါ၊ ဂစ္ဆတေ အနိလဉ္ဇသေ။

၉။

‘‘အဝိဒူရေ ဟိမဝန္တဿ၊ မဟာဇာတဿရော အဟု။

တတ္ထ မေ ဘဝနံ အာသိ၊ ပုညကမ္မေန သံယုတံ။

၁၀။

‘‘ဘဝနာ အဘိနိက္ခမ္မ၊ အဒ္ဒသံ လောကနာယကံ။

ဣန္ဒီဝရံဝ ဇလိတံ၊ အာဒိတ္တံဝ ဟုတာသနံ။

၁၁။

‘‘ဝိစိနံ နဒ္ဒသံ ပုပ္ဖံ၊ ပူဇယိဿန္တိ နာယကံ။

သကံ စိတ္တံ ပသာဒေတွာ၊ အဝန္ဒိံ သတ္ထုနော အဟံ။

၁၂။

‘‘မမ သီသေ မဏိံ ဂယှ၊ ပူဇယိံ လောကနာယကံ။

ဣမာယ မဏိပူဇာယ၊ ဝိပါကော ဟောတု ဘဒ္ဒကော။

၁၃။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

အန္တလိက္ခေ ဌိတော သတ္ထာ၊ ဣမံ ဂါထံ အဘာသထ။

၁၄။

‘သော တေ ဣဇ္ဈတု သင်္ကပ္ပော၊ လဘဿု ဝိပုလံ သုခံ။

ဣမာယ မဏိပူဇာယ၊ အနုဘောဟိ မဟာယသံ’။

၁၅။

‘‘ဣဒံ ဝတွာန ဘဂဝါ၊ ဇလဇုတ္တမနာမကော။

အဂမာသိ ဗုဒ္ဓသေဋ္ဌော၊ ယတ္ထ စိတ္တံ ပဏီဟိတံ။

၁၆။

‘‘သဋ္ဌိကပ္ပါနိ ဒေဝိန္ဒော၊ ဒေဝရဇ္ဇမကာရယိံ။

အနေကသတက္ခတ္တုဉ္စ၊ စက္ကဝတ္တီ အဟောသဟံ။

၁၇။

‘‘ပုဗ္ဗကမ္မံ သရန္တဿ၊ ဒေဝဘူတဿ မေ သတော။

မဏိ နိဗ္ဗတ္တတေ မယှံ၊ အာလောကကရဏော မမံ။

၁၈။

‘‘ဆဠသီတိသဟဿာနိ၊ နာရိယော မေ ပရိဂ္ဂဟာ။

ဝိစိတ္တဝတ္ထာဘရဏာ၊ အာမုက္ကမဏိကုဏ္ဍလာ [အာမုတ္တမဏိကုဏ္ဍလာ (သီ။ သျာ။ ဣ။)]။

၁၉။

‘‘အဠာရပမှာ ဟသုလာ၊ သုသညာ တနုမဇ္ဈိမာ။

ပရိဝါရေန္တိ မံ နိစ္စံ၊ မဏိပူဇာယိဒံ ဖလံ။

၂၀။

‘‘သောဏ္ဏမယာ မဏိမယာ၊ လောဟိတင်္ဂမယာ တထာ။

ဘဏ္ဍာ မေ သုကတာ ဟောန္တိ၊ ယဒိစ္ဆသိ [ယဒိစ္ဆာယ (သီ။ ဣ။)] ပိဠန္ဓနာ။

၂၁။

‘‘ကူဋာဂါရာ ဂဟာရမ္မာ၊ သယနဉ္စ မဟာရဟံ။

မမ သင်္ကပ္ပမညာယ၊ နိဗ္ဗတ္တန္တိ ယဒိစ္ဆကံ။

၂၂။

‘‘လာဘာ တေသံ သုလဒ္ဓဉ္စ၊ ယေ လဘန္တိ ဥပဿုတိံ။

ပုညက္ခေတ္တံ မနုဿာနံ၊ ဩသဓံ သဗ္ဗပါဏိနံ။

၂၃။

‘‘မယှမ္ပိ သုကတံ ကမ္မံ၊ ယောဟံ အဒက္ခိ နာယကံ။

ဝိနိပါတာ ပမုတ္တောမှိ၊ ပတ္တောမှိ အစလံ ပဒံ။

၂၄။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

ဒိဝသဉ္စေဝ ရတ္တိဉ္စ [သမန္တာ သတ္တရတနာ (သီ။ ဣ။ က။)]၊ အာလောကော ဟောတိ မေ သဒါ။

၂၅။

‘‘တာယေဝ မဏိပူဇာယ၊ အနုဘောတွာန သမ္ပဒါ။

ဉာဏာလောကော မယာ ဒိဋ္ဌော၊ ပတ္တောမှိ အစလံ ပဒံ။

၂၆။

‘‘သတသဟဿိတော ကပ္ပေ၊ ယံ မဏိံ အဘိပူဇယိံ။

ဒုဂ္ဂတိံ နာဘိဇာနာမိ၊ မဏိပူဇာယိဒံ ဖလံ။

၂၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဏိပူဇကော ထေရော ဣမာ ဂါထာယော

အဘာသိတ္ထာတိ။

မဏိပူဇကတ္ထေရဿာပဒါနံ ဒုတိယံ။

၃။ ဥက္ကာသတိကတ္ထေရအပဒါနံ

၃၀။

‘‘ကောသိကော နာမ ဘဂဝါ၊ စိတ္တကူဋေ ဝသီ တဒါ။

ဈာယီ ဈာနရတော ဗုဒ္ဓေါ၊ ဝိဝေကာဘိရတော မုနိ။

၃၁။

‘‘အဇ္ဈောဂါဟေတွာ [အဇ္ဈောဂဟေတွာ (သီ။ သျာ။ ဣ။)] ဟိမဝန္တံ၊ နာရီဂဏပုရက္ခတော။

အဒ္ဒသံ ကောသိကံ ဗုဒ္ဓံ၊ ပုဏ္ဏမာယေဝ စန္ဒိမံ။

၃၂။

‘‘ဥက္ကာသတေ ဂဟေတွာန၊ ပရိဝါရေသဟံ တဒါ။

သတ္တရတ္တိန္ဒိဝံ ဌတွာ [ဗုဒ္ဓေါ (သျာ။ က။)]၊ အဋ္ဌမေန အဂစ္ဆဟံ။

၃၃။

‘‘ဝုဋ္ဌိတံ ကောသိကံ ဗုဒ္ဓံ၊ သယမ္ဘုံ အပရာဇိတံ။

ပသန္နစိတ္တော ဝန္ဒိတွာ၊ ဧကံ ဘိက္ခံ အဒါသဟံ။

၃၄။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

ဥပ္ပဇ္ဇိံ တုသိတေ ကာယေ၊ ဧကဘိက္ခာယိဒံ ဖလံ။

၃၅။

‘‘ဒိဝသဉ္စေဝ ရတ္တိဉ္စ၊ အာလောကော ဟောတိ မေ သဒါ။

သမန္တာ ယောဇနသတံ၊ ဩဘာသေန ဖရာမဟံ။

၃၆။

‘‘ပဉ္စပညာသကပ္ပမှိ၊ စက္ကဝတ္တီ အဟောသဟံ။

စာတုရန္တော ဝိဇိတာဝီ၊ ဇမ္ဗုမဏ္ဍဿ [ဇမ္ဗုသဏ္ဍဿ (ဣ။)] ဣဿရော။

၃၇။

‘‘တဒါ မေ နဂရံ အာသိ၊ ဣဒ္ဓံ ဖီတံ သုနိမ္မိတံ။

တိံသယောဇနမာယာမံ၊ ဝိတ္ထာရေန စ ဝီသတိ။

၃၈။

‘‘သောဘဏံ နာမ နဂရံ၊ ဝိဿကမ္မေန မာပိတံ။

ဒသသဒ္ဒါဝိဝိတ္တံ တံ၊ သမ္မတာဠသမာဟိတံ။

၃၉။

‘‘န တမှိ နဂရေ အတ္ထိ၊ ဝလ္လိကဋ္ဌဉ္စ မတ္တိကာ။

သဗ္ဗသောဏ္ဏမယံယေဝ၊ ဇောတတေ နိစ္စကာလိကံ။

၄၀။

‘‘စတုပါကာရပရိက္ခိတ္တံ၊ တယော အာသုံ မဏိမယာ။

ဝေမဇ္ဈေ တာလပန္တီ စ၊ ဝိဿကမ္မေန မာပိတာ။

၄၁။

‘‘ဒသသဟဿပေါက္ခရညော၊ ပဒုမုပ္ပလဆာဒိတာ။

ပုဏ္ဍရီကေဟိ [ပုဏ္ဍရီကာဒိ (သျာ။)] သဉ္ဆန္နာ၊ နာနာဂန္ဓသမီရိတာ။

၄၂။

‘‘စတုန္နဝုတိတော ကပ္ပေ၊ ယံ ဥက္ကံ ဓါရယိံ အဟံ။

ဒုဂ္ဂတိံ နာဘိဇာနာမိ၊ ဥက္ကဓါရဿိဒံ ဖလံ။

၄၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥက္ကာသတိကော ထေရော ဣမာ ဂါထာယော

အဘာသိတ္ထာတိ။

ဥက္ကာသတိကတ္ထေရဿာပဒါနံ တတိယံ။

၄။ သုမနဗီဇနိယတ္ထေရအပဒါနံ

၄၆။

‘‘ဝိပဿိနော ဘဂဝတော၊ ဗောဓိယာ ပါဒပုတ္တမေ။

သုမနော ဗီဇနိံ ဂယှ၊ အဗီဇိံ ဗောဓိမုတ္တမံ။

၄၇။

‘‘ဧကနဝုတိတော ကပ္ပေ၊ အဗီဇိံ ဗောဓိမုတ္တမံ။

ဒုဂ္ဂတိံ နာဘိဇာနာမိ၊ ဗီဇနာယ ဣဒံ ဖလံ။

၄၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုမနဗီဇနိယော ထေရော ဣမာ ဂါထာယော

အဘာသိတ္ထာတိ။

သုမနဗီဇနိယတ္ထေရဿာပဒါနံ စတုတ္ထံ။

၅။ ကုမ္မာသဒါယကတ္ထေရအပဒါနံ

၅၁။

‘‘ဧသနာယ စရန္တဿ၊ ဝိပဿိဿ မဟေသိနော။

ရိတ္တကံ ပတ္တံ ဒိသွာန၊ ကုမ္မာသံ ပူရယိံ အဟံ။

၅၂။

‘‘ဧကနဝုတိတော ကပ္ပေ၊ ယံ ဘိက္ခံ အဒဒိံ တဒါ။

ဒုဂ္ဂတိံ နာဘိဇာနာမိ၊ ကုမ္မာသဿ ဣဒံ ဖလံ။

၅၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုမ္မာသဒါယကော ထေရော ဣမာ ဂါထာယော

အဘာသိတ္ထာတိ။

ကုမ္မာသဒါယကတ္ထေရဿာပဒါနံ ပဉ္စမံ။

၆။ ကုသဋ္ဌကဒါယကတ္ထေရအပဒါနံ

၅၆။

‘‘ကဿပဿ ဘဂဝတော၊ ဗြာဟ္မဏဿ ဝုသီမတော။

ပသန္နစိတ္တော သုမနော၊ ကုသဋ္ဌကမဒါသဟံ။

၅၇။

‘‘ဣမသ္မိံယေဝ ကပ္ပသ္မိံ၊ ကုသဋ္ဌကမဒါသဟံ။

ဒုဂ္ဂတိံ နာဘိဇာနာမိ၊ ကုသဋ္ဌကဿိဒံ ဖလံ။

၅၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုသဋ္ဌကဒါယကော ထေရော ဣမာ ဂါထာယော

အဘာသိတ္ထာတိ။

ကုသဋ္ဌကဒါယကတ္ထေရဿာပဒါနံ ဆဋ္ဌံ။

၇။ ဂိရိပုန္နာဂိယတ္ထေရအပဒါနံ

၆၁။

‘‘သောဘိတော နာမ သမ္ဗုဒ္ဓေါ၊ စိတ္တကူဋေ ဝသီ တဒါ။

ဂဟေတွာ ဂိရိပုန္နာဂံ၊ သယမ္ဘုံ အဘိပူဇယိံ။

၆၂။

‘‘စတုန္နဝုတိတော ကပ္ပေ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၆၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂိရိပုန္နာဂိယော ထေရော ဣမာ ဂါထာယော

အဘာသိတ္ထာတိ။

ဂိရိပုန္နာဂိယတ္ထေရဿာပဒါနံ သတ္တမံ။

၈။ ဝလ္လိကာရဖလဒါယကတ္ထေရအပဒါနံ

၆၆။

‘‘သုမနော နာမ သမ္ဗုဒ္ဓေါ၊ တက္ကရာယံ ဝသီ တဒါ။

ဝလ္လိကာရဖလံ ဂယှ၊ သယမ္ဘုဿ အဒါသဟံ။

၆၇။

‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၆၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝလ္လိကာရဖလဒါယကော ထေရော ဣမာ

ဂါထာယော အဘာသိတ္ထာတိ။

ဝလ္လိကာရဖလဒါယကတ္ထေရဿာပဒါနံ အဋ္ဌမံ။

၉။ ပါနဓိဒါယကတ္ထေရအပဒါနံ

၇၁။

‘‘အနောမဒဿီ ဘဂဝါ၊ လောကဇေဋ္ဌော နရာသဘော။

ဒိဝါဝိဟာရာ နိက္ခမ္မ၊ ပထမာရုဟိ [ဣတိမာရုယှိ (သျာ။)] စက္ခုမာ။

၇၂။

‘‘ပါနဓိံ သုကတံ ဂယှ၊ အဒ္ဓါနံ ပဋိပဇ္ဇဟံ။

တတ္ထဒ္ဒသာသိံ သမ္ဗုဒ္ဓံ၊ ပတ္တိကံ စာရုဒဿနံ။

၇၃။

‘‘သကံ စိတ္တံ ပသာဒေတွာ၊ နီဟရိတွာန ပါနဓိံ။

ပါဒမူလေ ဌပေတွာန၊ ဣဒံ ဝစနမဗြဝိံ။

၇၄။

‘‘‘အဘိရူဟ မဟာဝီရ၊ သုဂတိန္ဒ ဝိနာယက။

ဣတော ဖလံ လဘိဿာမိ၊ သော မေ အတ္ထော သမိဇ္ဈတု’။

၇၅။

‘‘အနောမဒဿီ ဘဂဝါ၊ လောကဇေဋ္ဌော နရာသဘော။

ပါနဓိံ အဘိရူဟိတွာ၊ ဣဒံ ဝစနမဗြဝိ။

၇၆။

‘‘‘ယော ပါနဓိံ မေ အဒါသိ၊ ပသန္နော သေဟိ ပါဏိဘိ။

တမဟံ ကိတ္တယိဿာမိ၊ သုဏာထ မမ ဘာသတော’။

၇၇။

‘‘ဗုဒ္ဓဿ ဂိရမညာယ၊ သဗ္ဗေ ဒေဝါ သမာဂတာ။

ဥဒဂ္ဂစိတ္တာ သုမနာ၊ ဝေဒဇာတာ ကတဉ္ဇလီ။

၇၈။

‘‘ပါနဓီနံ ပဒါနေန၊ သုခိတောယံ ဘဝိဿတိ။

ပဉ္စပညာသက္ခတ္တုဉ္စ၊ ဒေဝရဇ္ဇံ ကရိဿတိ။

၇၉။

‘‘သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၈၀။

‘‘အပရိမေယျေ ဣတော ကပ္ပေ၊ ဩက္ကာကကုလသမ္ဘဝေါ။

ဂေါတမော နာမ ဂေါတ္တေန [နာမေန (သဗ္ဗတ္ထ)]၊ သတ္ထာ လောကေ ဘဝိဿတိ။

၈၁။

‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။

သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။

၈၂။

‘‘ဒေဝလောကေ မနုဿေ ဝါ၊ နိဗ္ဗတ္တိဿတိ ပုညဝါ။

ဒေဝယာနပဋိဘာဂံ၊ ယာနံ ပဋိလဘိဿတိ။

၈၃။

‘‘ပါသာဒါ သိဝိကာ ဝယှံ၊ ဟတ္ထိနော သမလင်္ကတာ။

ရထာ ဝါဇညသံယုတ္တာ၊ သဒါ ပါတုဘဝန္တိ မေ။

၈၄။

‘‘အဂါရာ နိက္ခမန္တောပိ၊ ရထေန နိက္ခမိံ အဟံ။

ကေသေသု ဆိဇ္ဇမာနေသု၊ အရဟတ္တမပါပုဏိံ။

၈၅။

‘‘လာဘာ မယှံ သုလဒ္ဓံ မေ၊ ဝါဏိဇ္ဇံ သုပ္ပယောဇိတံ။

ဒတွာန ပါနဓိံ ဧကံ၊ ပတ္တောမှိ အစလံ ပဒံ။

၈၆။

‘‘အပရိမေယျေ ဣတော ကပ္ပေ၊ ယံ ပါနဓိမဒါသဟံ။

ဒုဂ္ဂတိံ နာဘိဇာနာမိ၊ ပါနဓိဿ ဣဒံ ဖလံ။

၈၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၈၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါနဓိဒါယကော ထေရော ဣမာ ဂါထာယော

အဘာသိတ္ထာတိ။

ပါနဓိဒါယကတ္ထေရဿာပဒါနံ နဝမံ။

၁၀။ ပုလိနစင်္ကမိယတ္ထေရအပဒါနံ

၉၀။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

ဝါတမိဂံ ဂဝေသန္တော၊ စင်္ကမံ အဒ္ဒသံ အဟံ။

၉၁။

‘‘ဥစ္ဆင်္ဂေန ပုလိနံ [ပုဠိနံ (သီ။ သျာ။ ဣ။ က။)] ဂယှ၊ စင်္ကမေ ဩကိရိံ အဟံ။

ပသန္နစိတ္တော သုမနော၊ သုဂတဿ သိရီမတော။

၉၂။

‘‘ဧကတိံသေ ဣတော ကပ္ပေ၊ ပုလိနံ ဩကိရိံ အဟံ။

ဒုဂ္ဂတိံ နာဘိဇာနာမိ၊ ပုလိနဿ ဣဒံ ဖလံ။

၉၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၉၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၉၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုလိနစင်္ကမိယော ထေရော ဣမာ ဂါထာယော

အဘာသိတ္ထာတိ။

ပုလိနစင်္ကမိယတ္ထေရဿာပဒါနံ ဒသမံ။

နဠမာလိဝဂ္ဂေါ အဋ္ဌစတ္တာလီသမော။

တဿုဒ္ဒါနံ –

နဠမာလီ မဏိဒဒေါ၊ ဥက္ကာသတိကဗီဇနီ။

ကုမ္မာသော စ ကုသဋ္ဌော စ၊ ဂိရိပုန္နာဂိယောပိ စ။

ဝလ္လိကာရော ပါနဓိဒေါ၊ အထော ပုလိနစင်္ကမော။

ဂါထာယော ပဉ္စနဝုတိ၊ ဂဏိတာယော ဝိဘာဝိဘိ။