ဇဂတိဒါယကဝဂ္ဂ

၄၆။ ဇဂတိဒါယကဝဂ္ဂ

၁။ ဇဂတိဒါယကတ္ထေရအပဒါန

၁။

‘‘ဓမ္မဒဿိဿ မုနိနော၊ ဗောဓိယာ ပါဒပုတ္တမေ။

ပသန္နစိတ္တော သုမနော၊ ဇဂတိံ ကာရယိံ အဟံ။

၂။

‘‘ဒရိတော ပဗ္ဗတတော ဝါ၊ ရုက္ခတော ပတိတော အဟံ။

စုတော ပတိဋ္ဌံ ဝိန္ဒာမိ၊ ဇဂတိယာ ဣဒံ ဖလံ။

၃။

‘‘န မေ စောရာ ဝိဟေသန္တိ၊ နာတိမညန္တိ ခတ္တိယာ [ပသဟန္တိ၊ နာတိမညတိ ခတ္တိယော (သီ။ ဣ။)]။

သဗ္ဗာမိတ္တေတိက္ကမာမိ၊ ဇဂတိယာ ဣဒံ ဖလံ။

၄။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

သဗ္ဗတ္ထ ပူဇိတော ဟောမိ၊ ဇဂတိယာ ဣဒံ ဖလံ။

၅။

‘‘အဋ္ဌာရသေ ကပ္ပသတေ၊ ဇဂတိံ ကာရယိံ အဟံ။

ဒုဂ္ဂတိံ နာဘိဇာနာမိ၊ ဇဂတိဒါနဿိဒံ ဖလံ။

၆။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၇။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၈။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဇဂတိဒါယကော ထေရော ဣမာ ဂါထာယော

အဘာသိတ္ထာတိ။

ဇဂတိဒါယကတ္ထေရဿာပဒါနံ ပဌမံ။

၂။ မောရဟတ္ထိယတ္ထေရအပဒါနံ

၉။

‘‘မောရဟတ္ထံ ဂဟေတွာန၊ ဥပေသိံ လောကနာယကံ။

ပသန္နစိတ္တော သုမနော၊ မောရဟတ္ထမဒါသဟံ။

၁၀။

‘‘ဣမိနာ မောရဟတ္ထေန၊ စေတနာပဏိဓီဟိ စ။

နိဗ္ဗာယိံသု တယော အဂ္ဂီ၊ လဘာမိ ဝိပုလံ သုခံ။

၁၁။

‘‘အဟော ဗုဒ္ဓေါ အဟော ဓမ္မော၊ အဟော နော သတ္ထုသမ္ပဒါ။

ဒတွာနဟံ မောရဟတ္ထံ၊ လဘာမိ ဝိပုလံ သုခံ။

၁၂။

‘‘တိယဂ္ဂီ [တိဓဂ္ဂီ (သျာ။ က။)၊ တိဝဂ္ဂီ (ဣ။)] နိဗ္ဗုတာ မယှံ၊ ဘဝါ သဗ္ဗေ သမူဟတာ။

သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။

၁၃။

‘‘ဧကတိံသေ ဣတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ မောရဟတ္ထဿိဒံ ဖလံ။

၁၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မောရဟတ္ထိယော ထေရော ဣမာ ဂါထာယော

အဘာသိတ္ထာတိ။

မောရဟတ္ထိယတ္ထေရဿာပဒါနံ ဒုတိယံ။

၃။ သီဟာသနဗီဇိယတ္ထေရအပဒါနံ

၁၇။

‘‘တိဿဿာဟံ ဘဂဝတော၊ ဗောဓိရုက္ခမဝန္ဒိယံ။

ပဂ္ဂယှ ဗီဇနိံ တတ္ထ၊ သီဟာသနမဗီဇဟံ [မဗီဇယိံ (သီ။)၊ မဝိဇ္ဇဟံ (သျာ။)]။

၁၈။

‘‘ဒွေနဝုတေ ဣတော ကပ္ပေ၊ သီဟာသနမဗီဇဟံ။

ဒုဂ္ဂတိံ နာဘိဇာနာမိ၊ ဗီဇနာယ ဣဒံ ဖလံ။

၁၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သီဟာသနဗီဇိယော ထေရော ဣမာ

ဂါထာယော အဘာသိတ္ထာတိ။

သီဟာသနဗီဇိယတ္ထေရဿာပဒါနံ တတိယံ။

၄။ တိဏုက္ကဓါရိယတ္ထေရအပဒါနံ

၂၂။

‘‘ပဒုမုတ္တရဗုဒ္ဓဿ ၊ ဗောဓိယာ ပါဒပုတ္တမေ။

ပသန္နစိတ္တော သုမနော၊ တယော ဥက္ကေ အဓါရယိံ။

၂၃။

‘‘သတသဟဿိတော ကပ္ပေ၊ သောဟံ ဥက္ကမဓါရယိံ။

ဒုဂ္ဂတိံ နာဘိဇာနာမိ၊ ဥက္ကဒါနဿိဒံ ဖလံ။

၂၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏုက္ကဓါရိယော ထေရော ဣမာ ဂါထာယော

အဘာသိတ္ထာတိ။

တိဏုက္ကဓါရိယတ္ထေရဿာပဒါနံ စတုတ္ထံ။

၅။ အက္ကမနဒါယကတ္ထေရအပဒါနံ

၂၇။

‘‘ကကုသန္ဓဿ မုနိနော၊ ဗြာဟ္မဏဿ ဝုသီမတော။

ဒိဝါဝိဟာရံ ဝဇတော၊ အက္ကမနမဒါသဟံ။

၂၈။

‘‘ဣမသ္မိံယေဝ ကပ္ပမှိ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ အက္ကမနဿိဒံ ဖလံ။

၂၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အက္ကမနဒါယကော ထေရော ဣမာ ဂါထာယော

အဘာသိတ္ထာတိ။

အက္ကမနဒါယကတ္ထေရဿာပဒါနံ ပဉ္စမံ။

၆။ ဝနကောရဏ္ဍိယတ္ထေရအပဒါနံ

၃၂။

‘‘သိဒ္ဓတ္ထဿ ဘဂဝတော၊ လောကဇေဋ္ဌဿ တာဒိနော။

ဝနကောရဏ္ဍမာဒါယ၊ ဗုဒ္ဓဿ အဘိရောပယိံ။

၃၃။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝနကောရဏ္ဍိယော ထေရော ဣမာ ဂါထာယော

အဘာသိတ္ထာတိ။

ဝနကောရဏ္ဍိယတ္ထေရဿာပဒါနံ ဆဋ္ဌံ။

ဝီသတိမံ ဘာဏဝါရံ။

၇။ ဧကဆတ္တိယတ္ထေရအပဒါနံ

၃၇။

‘‘အင်္ဂါရဇာတာ ပထဝီ၊ ကုက္ကုဠာနုဂတာ မဟီ။

ပဒုမုတ္တရော ဘဂဝါ၊ အဗ္ဘောကာသမှိ စင်္ကမိ။

၃၈။

‘‘ပဏ္ဍရံ ဆတ္တမာဒါယ၊ အဒ္ဓါနံ ပဋိပဇ္ဇဟံ။

တတ္ထ ဒိသွာန သမ္ဗုဒ္ဓံ၊ ဝိတ္တိ မေ ဥပပဇ္ဇထ။

၃၉။

‘‘မရီစိယောတ္ထဋာ [မရိစိမောဖုနာ (သျာ။)၊ မရီစိဝေါဖုဋာ (ဣ။)] ဘူမိ၊ အင်္ဂါရာဝ မဟီ အယံ။

ဥပဟန္တိ [ဥပဝါယန္တိ (သီ။ ဣ။)] မဟာဝါတာ၊ သရီရဿာသုခေပနာ [သရီရကာယုခေပနာ (သျာ။)]။

၄၀။

‘‘သီတံ ဥဏှံ ဝိဟနန္တံ [ဝိဟနတိ (သျာ။ က။)]၊ ဝါတာတပနိဝါရဏံ။

ပဋိဂ္ဂဏှ ဣမံ ဆတ္တံ၊ ဖဿယိဿာမိ [ပဿယိဿာမိ (က။)] နိဗ္ဗုတိံ။

၄၁။

‘‘အနုကမ္ပကော ကာရုဏိကော၊ ပဒုမုတ္တရော မဟာယသော။

မမ သင်္ကပ္ပမညာယ၊ ပဋိဂ္ဂဏှိ တဒါ ဇိနော။

၄၂။

‘‘တိံသကပ္ပါနိ ဒေဝိန္ဒော၊ ဒေဝရဇ္ဇမကာရယိံ။

သတာနံ ပဉ္စက္ခတ္တုဉ္စ၊ စက္ကဝတ္တီ အဟောသဟံ။

၄၃။

‘‘ပဒေသရဇ္ဇံ ဝိပုလံ၊ ဂဏနာတော အသံခိယံ။

အနုဘောမိ သကံ ကမ္မံ၊ ပုဗ္ဗေ သုကတမတ္တနော။

၄၄။

‘‘အယံ မေ ပစ္ဆိမာ ဇာတိ၊ စရိမော ဝတ္တတေ ဘဝေါ။

အဇ္ဇာပိ သေတစ္ဆတ္တံ မေ၊ သဗ္ဗကာလံ ဓရီယတိ။

၄၅။

‘‘သတသဟဿိတော ကပ္ပေ၊ ယံ ဆတ္တမဒဒိံ တဒါ။

ဒုဂ္ဂတိံ နာဘိဇာနာမိ၊ ဆတ္တဒါနဿိဒံ ဖလံ။

၄၆။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၇။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဆတ္တိယော ထေရော ဣမာ ဂါထာယော

အဘာသိတ္ထာတိ။

ဧကဆတ္တိယတ္ထေရဿာပဒါနံ သတ္တမံ။

၈။ ဇာတိပုပ္ဖိယတ္ထေရအပဒါနံ

၄၉။

‘‘ပရိနိဗ္ဗုတေ ဘဂဝတိ၊ ပဒုမုတ္တရေ မဟာယသေ။

ပုပ္ဖဝဋံသကေ ကတွာ [ပုပ္ဖစင်္ကောဋကေ ဂဟေတွာ (သျာ။)]၊ သရီရမဘိရောပယိံ။

၅၀။

‘‘တတ္ထ စိတ္တံ ပသာဒေတွာ၊ နိမ္မာနံ အဂမာသဟံ။

ဒေဝလောကဂတော သန္တော၊ ပုညကမ္မံ သရာမဟံ။

၅၁။

‘‘အမ္ဗရာ ပုပ္ဖဝဿော မေ၊ သဗ္ဗကာလံ ပဝဿတိ။

သံသရာမိ မနုဿေ စေ [ဝေ (သျာ။)]၊ ရာဇာ ဟောမိ မဟာယသော။

၅၂။

‘‘တဟိံ ကုသုမဝဿော မေ၊ အဘိဝဿတိ သဗ္ဗဒါ။

တဿေဝ [ကာယေသု (သျာ။)၊ ကာယေဝ (ဣ။)] ပုပ္ဖပူဇာယ၊ ဝါဟသာ သဗ္ဗဒဿိနော။

၅၃။

‘‘အယံ ပစ္ဆိမကော မယှံ၊ စရိမော ဝတ္တတေ ဘဝေါ။

အဇ္ဇာပိ ပုပ္ဖဝဿော မေ၊ အဘိဝဿတိ သဗ္ဗဒါ။

၅၄။

‘‘သတသဟဿိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဒေဟပူဇာယိဒံ ဖလံ။

၅၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဇာတိပုပ္ဖိယော ထေရော ဣမာ ဂါထာယော

အဘာသိတ္ထာတိ။

ဇာတိပုပ္ဖိယတ္ထေရဿာပဒါနံ အဋ္ဌမံ။

၉။ ပဋ္ဋိပုပ္ဖိယတ္ထေရအပဒါနံ

၅၈။

‘‘နီဟရန္တေ သရီရမှိ၊ ဝဇ္ဇမာနာသု ဘေရိသု။

ပသန္နစိတ္တော သုမနော၊ ပဋ္ဋိပုပ္ဖမပူဇယိံ [သတ္တိ။ (သျာ။ ဣ။)]။

၅၉။

‘‘သတသဟဿိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဒေဟပူဇာယိဒံ ဖလံ။

၆၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဋ္ဋိပုပ္ဖိယော [သတ္တိပဏ္ဏိယော (သျာ။ ဣ။)] ထေရော ဣမာ ဂါထာယော

အဘာသိတ္ထာတိ။

ပဋ္ဋိပုပ္ဖိယတ္ထေရဿာပဒါနံ နဝမံ။

၁၀။ ဂန္ဓပူဇကတ္ထေရအပဒါနံ

၆၃။

‘‘စိတာသု ကုရုမာနာသု [စိတ္တေသု ကယိရမာနေသု (သီ။)]၊ နာနာဂန္ဓေ သမာဟဋေ။

ပသန္နစိတ္တော သုမနော၊ ဂန္ဓမုဋ္ဌိမပူဇယိံ။

၆၄။

‘‘သတသဟဿိတော ကပ္ပေ၊ စိတကံ ယမပူဇယိံ။

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ။

၆၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂန္ဓပူဇကော ထေရော ဣမာ ဂါထာယော

အဘာသိတ္ထာတိ။

ဂန္ဓပူဇကတ္ထေရဿာပဒါနံ ဒသမံ။

ဇဂတိဒါယကဝဂ္ဂေါ ဆစတ္တာလီသမော။

တဿုဒ္ဒါနံ –

ဇဂတီ မောရဟတ္ထီ စ၊ အာသနီ ဥက္ကဓါရကော။

အက္ကမိ ဝနကောရဏ္ဍိ၊ ဆတ္တဒေါ ဇာတိပူဇကော။

ပဋ္ဋိပုပ္ဖီ စ ယော ထေရော၊ ဒသမော ဂန္ဓပူဇကော။

သတ္တသဋ္ဌိ စ ဂါထာယော၊ ဂဏိတာယော ဝိဘာဝိဘိ။