ဧကဝိဟာရိဝဂ္ဂ

၄၄။ ဧကဝိဟာရိဝဂ္ဂ

၁။ ဧကဝိဟာရိကတ္ထေရအပဒါန

၁။

‘‘ဣမမှိ ဘဒ္ဒကေ ကပ္ပေ၊ ဗြဟ္မဗန္ဓု မဟာယသော။

ကဿပေါ နာမ ဂေါတ္တေန၊ ဥပ္ပဇ္ဇိ ဝဒတံ ဝရော။

၂။

‘‘နိပ္ပပဉ္စော နိရာလမ္ဗော၊ အာကာသသမမာနသော။

သုညတာဗဟုလော တာဒီ၊ အနိမိတ္တရတော ဝသီ။

၃။

‘‘အသင်္ဂစိတ္တော နိက္လေသော [နိလ္လေပေါ (သျာ။ က။)]၊ အသံသဋ္ဌော ကုလေ ဂဏေ။

မဟာကာရုဏိကော ဝီရော၊ ဝိနယောပါယကောဝိဒေါ။

၄။

‘‘ဥယျုတ္တော ပရကိစ္စေသု၊ ဝိနယန္တော သဒေဝကေ။

နိဗ္ဗာနဂမနံ မဂ္ဂံ၊ ဂတိံ ပင်္ကဝိသောသနံ။

၅။

‘‘အမတံ ပရမဿာဒံ၊ ဇရာမစ္စုနိဝါရဏံ။

မဟာပရိသမဇ္ဈေ သော၊ နိသိန္နော လောကတာရကော။

၆။

‘‘ကရဝီကရုတော [ကရဝီကရုဒေါ (သျာ။ ဣ။ က။)] နာထော၊ ဗြဟ္မဃောသော တထာဂတော။

ဥဒ္ဓရန္တော မဟာဒုဂ္ဂါ၊ ဝိပ္ပနဋ္ဌေ အနာယကေ။

၇။

‘‘ဒေသေန္တော ဝိရဇံ ဓမ္မံ၊ ဒိဋ္ဌော မေ လောကနာယကော။

တဿ ဓမ္မံ သုဏိတွာန၊ ပဗ္ဗဇိံ အနဂါရိယံ။

၈။

‘‘ပဗ္ဗဇိတွာ တဒါပါဟံ၊ စိန္တေန္တော ဇိနသာသနံ။

ဧကကောဝ ဝနေ ရမ္မေ၊ ဝသိံ သံသဂ္ဂဣဠိတော။

၉။

‘‘သက္ကာယဝူပကာသော မေ၊ ဟေတုဘူတော မမာဘဝီ [မမာဂမီ (သျာ။ ဣ။)]။

မနသော ဝူပကာသဿ၊ သံသဂ္ဂဘယဒဿိနော။

၁၀။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၁၁။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၁၂။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဝိဟာရိကော ထေရော ဣမာ ဂါထာယော

အဘာသိတ္ထာတိ။

ဧကဝိဟာရိကတ္ထေရဿာပဒါနံ ပဌမံ။

၂။ ဧကသံခိယတ္ထေရအပဒါနံ

၁၃။

‘‘ဝိပဿိနော ဘဂဝတော၊ မဟာဗောဓိမဟော အဟု။

မဟာဇနာ သမာဂမ္မ၊ ပူဇေန္တိ ဗောဓိမုတ္တမံ။

၁၄။

‘‘န ဟိ တံ ဩရကံ မညေ၊ ဗုဒ္ဓသေဋ္ဌော ဘဝိဿတိ။

ယဿာယံ ဤဒိသာ ဗောဓိ၊ ပူဇနီယာ [ဤဒိသော ဗောဓိ၊ ပူဇနီယော (သျာ။)] စ သတ္ထုနော။

၁၅။

‘‘တတော သင်္ခံ ဂဟေတွာန၊ ဗောဓိရုက္ခမုပဋ္ဌဟိံ။

ဓမန္တော သဗ္ဗဒိဝသံ၊ အဝန္ဒိံ ဗောဓိမုတ္တမံ။

၁၆။

‘‘အာသန္နကေ ကတံ ကမ္မံ၊ ဒေဝလောကံ အပါပယီ။

ကဠေဝရံ မေ ပတိတံ၊ ဒေဝလောကေ ရမာမဟံ။

၁၇။

‘‘သဋ္ဌိတုရိယသဟဿာနိ ၊ တုဋ္ဌဟဋ္ဌာ ပမောဒိတာ။

သဒါ မယှံ ဥပဋ္ဌန္တိ၊ ဗုဒ္ဓပူဇာယိဒံ ဖလံ။

၁၈။

‘‘ဧကသတ္တတိမေ ကပ္ပေ၊ ရာဇာ အာသိံ သုဒဿနော။

စာတုရန္တော ဝိဇိတာဝီ၊ ဇမ္ဗုမဏ္ဍဿ ဣဿရော။

၁၉။

‘‘တတော အင်္ဂသတာ တုရိယာ [တူရာ (သီ။ က။)]၊ ပရိဝါရေန္တိ မံ သဒါ။

အနုဘောမိ သကံ ကမ္မံ၊ ဥပဋ္ဌာနဿိဒံ ဖလံ။

၂၀။

‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။

မာတုကုစ္ဆိဂတဿာပိ၊ ဝဇ္ဇရေ ဘေရိယော သဒါ။

၂၁။

‘‘ဥပဋ္ဌိတွာန သမ္ဗုဒ္ဓံ၊ အနုဘုတွာန သမ္ပဒါ။

သိဝံ သုခေမံ အမတံ၊ ပတ္တောမှိ အစလံ ပဒံ။

၂၂။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကသံခိယော ထေရော ဣမာ ဂါထာယော

အဘာသိတ္ထာတိ။

ဧကသံခိယတ္ထေရဿာပဒါနံ ဒုတိယံ။

၃။ ပါဋိဟီရသညကတ္ထေရအပဒါနံ

၂၆။

‘‘ပဒုမုတ္တရော နာမ ဇိနော၊ အာဟုတီနံ ပဋိဂ္ဂဟော။

ဝသီသတသဟဿေဟိ၊ နဂရံ ပါဝိသီ တဒါ။

၂၇။

‘‘နဂရံ ပဝိသန္တဿ၊ ဥပသန္တဿ တာဒိနော။

ရတနာနိ ပဇ္ဇောတိံသု [ပနာဒိံသု (ဣ။)]၊ နိဂ္ဃောသော အာသိ တာဝဒေ။

၂၈။

‘‘ဗုဒ္ဓဿ အာနုဘာဝေန၊ ဘေရီ ဝဇ္ဇုမဃဋ္ဋိတာ။

သယံ ဝီဏာ ပဝဇ္ဇန္တိ၊ ဗုဒ္ဓဿ ပဝိသတော ပုရံ။

၂၉။

‘‘ဗုဒ္ဓသေဋ္ဌံ နမဿာမိ [န ပဿာမိ (သီ။)]၊ ပဒုမုတ္တရမဟာမုနိံ။

ပါဋိဟီရဉ္စ ပဿိတွာ၊ တတ္ထ စိတ္တံ ပသာဒယိံ။

၃၀။

‘‘အဟော ဗုဒ္ဓေါ အဟော ဓမ္မော၊ အဟော နော သတ္ထုသမ္ပဒါ။

အစေတနာပိ တုရိယာ၊ သယမေဝ ပဝဇ္ဇရေ။

၃၁။

‘‘သတသဟဿိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၃၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါဋိဟီရသညကော ထေရော ဣမာ ဂါထာယော

အဘာသိတ္ထာတိ။

ပါဋိဟီရသညကတ္ထေရဿာပဒါနံ တတိယံ။

၄။ ဉာဏတ္ထဝိကတ္ထေရအပဒါနံ

၃၅။

‘‘ကဏိကာရံဝ ဇလိတံ၊ ဒီပရုက္ခံဝ ဇောတိတံ။

ကဉ္စနံဝ ဝိရောစန္တံ၊ အဒ္ဒသံ ဒွိပဒုတ္တမံ။

၃၆။

‘‘ကမဏ္ဍလုံ ဌပေတွာန၊ ဝါကစီရဉ္စ ကုဏ္ဍိကံ။

ဧကံသံ အဇိနံ ကတွာ၊ ဗုဒ္ဓသေဋ္ဌံ ထဝိံ အဟံ။

၃၇။

‘‘‘တမန္ဓကာရံ ဝိဓမံ၊ မောဟဇာလသမာကုလံ။

ဉာဏာလောကံ ဒဿေတွာန၊ နိတ္တိဏ္ဏောသိ မဟာမုနိ။

၃၈။

‘‘‘သမုဒ္ဓရသိမံ လောကံ၊ သဗ္ဗာဝန္တမနုတ္တရံ။

ဉာဏေ တေ ဥပမာ နတ္ထိ၊ ယာဝတာဇဂတောဂတိ [ယာဝတာ စ ဂတောဂတိ (ဣ။ က။)]။

၃၉။

‘‘‘တေန ဉာဏေန သဗ္ဗညူ၊ ဣတိ ဗုဒ္ဓေါ ပဝုစ္စတိ။

ဝန္ဒာမိ တံ မဟာဝီရံ၊ သဗ္ဗညုတမနာဝရံ’။

၄၀။

‘‘သတသဟဿိတော ကပ္ပေ၊ ဗုဒ္ဓသေဋ္ဌံ ထဝိံ အဟံ။

ဒုဂ္ဂတိံ နာဘိဇာနာမိ၊ ဉာဏတ္ထဝါယိဒံ ဖလံ။

၄၁။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၂။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဉာဏတ္ထဝိကော ထေရော ဣမာ ဂါထာယော

အဘာသိတ္ထာတိ။

ဉာဏတ္ထဝိကတ္ထေရဿာပဒါနံ စတုတ္ထံ။

၅။ ဥစ္ဆုခဏ္ဍိကတ္ထေရအပဒါနံ

၄၄။

‘‘နဂရေ ဗန္ဓုမတိယာ၊ ဒွါရပါလော အဟောသဟံ။

အဒ္ဒသံ ဝိရဇံ ဗုဒ္ဓံ၊ သဗ္ဗဓမ္မာန ပါရဂုံ။

၄၅။

‘‘ဥစ္ဆုခဏ္ဍိကမာဒါယ၊ ဗုဒ္ဓသေဋ္ဌဿဒါသဟံ။

ပသန္နစိတ္တော သုမနော၊ ဝိပဿိဿ မဟေသိနော။

၄၆။

‘‘ဧကနဝုတိတော ကပ္ပေ၊ ယံ ဥစ္ဆုမဒဒိံ တဒါ။

ဒုဂ္ဂတိံ နာဘိဇာနာမိ၊ ဥစ္ဆုခဏ္ဍဿိဒံ ဖလံ။

၄၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥစ္ဆုခဏ္ဍိကော ထေရော ဣမာ ဂါထာယော

အဘာသိတ္ထာတိ။

ဥစ္ဆုခဏ္ဍိကတ္ထေရဿာပဒါနံ ပဉ္စမံ။

၆။ ကဠမ္ဗဒါယကတ္ထေရအပဒါနံ

၅၀။

‘‘ရောမသော နာမ သမ္ဗုဒ္ဓေါ၊ ဝသတေ ပဗ္ဗတန္တရေ။

ကဠမ္ဗံ တဿ ပါဒါသိံ၊ ပသန္နော သေဟိ ပါဏိဘိ။

၅၁။

‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ကဠမ္ဗဿ ဣဒံ ဖလံ။

၅၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဠမ္ဗဒါယကော ထေရော ဣမာ ဂါထာယော

အဘာသိတ္ထာတိ။

ကဠမ္ဗဒါယကတ္ထေရဿာပဒါနံ ဆဋ္ဌံ။

၇။ အမ္ဗာဋကဒါယကတ္ထေရအပဒါနံ

၅၅။

‘‘ဝိပိနေ ဗုဒ္ဓံ ဒိသွာန၊ သယမ္ဘုံ အပရာဇိတံ။

အမ္ဗာဋကံ ဂဟေတွာန၊ သယမ္ဘုဿ အဒါသဟံ။

၅၆။

‘‘ဧကတိံသေ ဣတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၅၇။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၅၈။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၅၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗာဋကဒါယကော ထေရော ဣမာ ဂါထာယော

အဘာသိတ္ထာတိ။

အမ္ဗာဋကဒါယကတ္ထေရဿာပဒါနံ သတ္တမံ။

၈။ ဟရီတကဒါယကတ္ထေရအပဒါနံ

၆၀။

‘‘ဟရီတကံ အာမလကံ၊ အမ္ဗဇမ္ဗုဝိဘီတကံ။

ကောလံ ဘလ္လာတကံ ဗိလ္လံ၊ သယမေဝ ဟရာမဟံ။

၆၁။

‘‘ဒိသွာန ပဗ္ဘာရဂတံ၊ ဈာယိံ ဈာနရတံ မုနိံ။

အာဗာဓေန အာဣဠေန္တံ၊ အဒုတီယံ မဟာမုနိံ။

၆၂။

‘‘ဟရီတကံ ဂဟေတွာန၊ သယမ္ဘုဿ အဒါသဟံ။

ခါဒမတ္တမှိ ဘေသဇ္ဇေ၊ ဗျာဓိ ပဿမ္ဘိ [ပဿဒ္ဓိ (က။)] တာဝဒေ။

၆၃။

‘‘ပဟီနဒရထော ဗုဒ္ဓေါ၊ အနုမောဒမကာသိ မေ။

‘ဘေသဇ္ဇဒါနေနိမိနာ၊ ဗျာဓိဝူပသမေန စ။

၆၄။

‘‘‘ဒေဝဘူတော မနုဿော ဝါ၊ ဇာတော ဝါ အညဇာတိယာ။

သဗ္ဗတ္ထ သုခိတော ဟောတု၊ မာ စ တေ ဗျာဓိမာဂမာ’။

၆၅။

‘‘ဣဒံ ဝတွာန သမ္ဗုဒ္ဓေါ၊ သယမ္ဘူ အပရာဇိတော။

နဘံ အဗ္ဘုဂ္ဂမီ ဓီရော၊ ဟံသရာဇာဝ အမ္ဗရေ။

၆၆။

‘‘ယတော ဟရီတကံ ဒိန္နံ၊ သယမ္ဘုဿ မဟေသိနော။

ဣမံ ဇာတိံ ဥပါဒါယ၊ ဗျာဓိ မေ နုပပဇ္ဇထ။

၆၇။

‘‘အယံ ပစ္ဆိမကော မယှံ၊ စရိမော ဝတ္တတေ ဘဝေါ။

တိဿော ဝိဇ္ဇာ သစ္ဆိကတာ၊ ကတံ ဗုဒ္ဓဿ သာသနံ။

၆၈။

‘‘စတုန္နဝုတိတော ကပ္ပေ၊ ဘေသဇ္ဇမဒဒိံ တဒါ။

ဒုဂ္ဂတိံ နာဘိဇာနာမိ၊ ဘေသဇ္ဇဿ ဣဒံ ဖလံ။

၆၉။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၀။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၇၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဟရီတကဒါယကော ထေရော ဣမာ ဂါထာယော

အဘာသိတ္ထာတိ။

ဟရီတကဒါယကတ္ထေရဿာပဒါနံ အဋ္ဌမံ။

၉။ အမ္ဗပိဏ္ဍိယတ္ထေရအပဒါနံ

၇၂။

‘‘ဟတ္ထိရာဇာ တဒါ အာသိံ၊ ဤသာဒန္တော ဥရုဠှဝါ။

ဝိစရန္တော ဗြဟာရညေ၊ အဒ္ဒသံ လောကနာယကံ။

၇၃။

‘‘အမ္ဗပိဏ္ဍံ ဂဟေတွာန၊ အဒါသိံ သတ္ထုနော အဟံ။

ပဋိဂ္ဂဏှိ မဟာဝီရော၊ သိဒ္ဓတ္ထော လောကနာယကော။

၇၄။

‘‘မမ နိဇ္ဈာယမာနဿ၊ ပရိဘုဉ္ဇိ တဒါ ဇိနော။

တတ္ထ စိတ္တံ ပသာဒေတွာ၊ တုသိတံ ဥပပဇ္ဇဟံ။

၇၅။

‘‘တတော အဟံ စဝိတွာန၊ စက္ကဝတ္တီ အဟောသဟံ။

ဧတေနေဝ ဥပါယေန၊ အနုဘုတွာန သမ္ပဒါ။

၇၆။

‘‘ပဓါနပဟိတတ္တောဟံ၊ ဥပသန္တော နိရူပဓိ။

သဗ္ဗာသဝေ ပရိညာယ၊ ဝိဟရာမိ အနာသဝေါ။

၇၇။

‘‘စတုန္နဝုတိတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၇၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၇၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗပိဏ္ဍိယော ထေရော ဣမာ ဂါထာယော

အဘာသိတ္ထာတိ။

အမ္ဗပိဏ္ဍိယတ္ထေရဿာပဒါနံ နဝမံ။

၁၀။ အမ္ဗဖလိယတ္ထေရအပဒါနံ

၈၁။

‘‘ပဒုမုတ္တရဗုဒ္ဓဿ ၊ လောကဇေဋ္ဌဿ တာဒိနော။

ပိဏ္ဍာယ ဝိစရန္တဿ၊ ဓါရတော ဥတ္တမံ ယသံ။

၈၂။

‘‘အဂ္ဂဖလံ ဂဟေတွာန၊ ဝိပ္ပသန္နေန စေတသာ။

ဒက္ခိဏေယျဿ ဝီရဿ၊ အဒါသိံ သတ္ထုနော အဟံ။

၈၃။

‘‘တေန ကမ္မေန ဒွိပဒိန္ဒ [ဒိပဒိန္ဒ (သီ။ သျာ။ ဣ။)]၊ လောကဇေဋ္ဌ နရာသဘ။

ပတ္တောမှိ အစလံ ဌာနံ၊ ဟိတွာ ဇယပရာဇယံ။

၈၄။

‘‘သတသဟဿိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ အဂ္ဂဒါနဿိဒံ ဖလံ။

၈၅။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၈၆။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၈၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗဖလိယော ထေရော ဣမာ ဂါထာယော အဘာသိတ္ထာတိ။

အမ္ဗဖလိယတ္ထေရဿာပဒါနံ ဒသမံ။

ဧကဝိဟာရိဝဂ္ဂေါ စတုစတ္တာလီသမော။

တဿုဒ္ဒါနံ –

ထေရော ဧကဝိဟာရီ စ၊ သံခိယော ပါဋိဟီရကော။

ထဝိကော ဥစ္ဆုခဏ္ဍီ စ၊ ကဠမ္ဗအမ္ဗာဋကဒေါ။

ဟရီတကမ္ဗပိဏ္ဍီ စ၊ အမ္ဗဒေါ ဒသမော ယတိ။

ဆဠသီတိ စ ဂါထာယော၊ ဂဏိတာယော ဝိဘာဝိဘိ။