၄၀။ ပိလိန္ဒဝစ္ဆဝဂ္ဂ
၁။ ပိလိန္ဒဝစ္ဆတ္ထေရအပဒါန
၁။
‘‘နဂရေ ဟံသဝတိယာ၊ အာသိံ ဒေါဝါရိကော အဟံ။
အက္ခောဘံ အမိတံ ဘောဂံ၊ ဃရေ သန္နိစိတံ မမ။
၂။
‘‘ရဟောဂတော နိသီဒိတွာ၊ ပဟံသိတွာန မာနသံ [သမ္ပဟံသိတွ မာနသံ (သီ။)]။
နိသဇ္ဇ ပါသာဒဝရေ၊ ဧဝံ စိန္တေသဟံ တဒါ။
(စိန္တနာကာရော)
၃။
‘‘‘ဗဟူ မေဓိဂတာ ဘောဂါ၊ ဖီတံ အန္တေပုရံ မမ။
ရာဇာပိ [ရာဇိသိ (က။)] သန္နိမန္တေသိ၊ အာနန္ဒော ပထဝိဿရော။
၄။
‘‘‘အယဉ္စ ဗုဒ္ဓေါ ဥပ္ပန္နော၊ အဓိစ္စုပ္ပတ္တိကော မုနိ။
သံဝိဇ္ဇန္တိ စ မေ ဘောဂါ၊ ဒါနံ ဒဿာမိ သတ္ထုနော။
၅။
‘‘‘ပဒုမေန ရာဇပုတ္တေန၊ ဒိန္နံ ဒါနဝရံ ဇိနေ။
ဟတ္ထိနာဂေ စ ပလ္လင်္ကေ၊ အပဿေနဉ္စနပ္ပကံ။
၆။
‘‘‘အဟမ္ပိ ဒါနံ ဒဿာမိ၊ သံဃေ ဂဏဝရုတ္တမေ။
အဒိန္နပုဗ္ဗမညေသံ၊ ဘဝိဿံ အာဒိကမ္မိကော။
၇။
‘‘‘စိန္တေတွာဟံ ဗဟုဝိဓံ၊ ယာဂေ ယဿ သုခံဖလံ။
ပရိက္ခာရဒါနမဒ္ဒက္ခိံ၊ မမ သင်္ကပ္ပပူရဏံ။
၈။
‘‘‘ပရိက္ခာရာနိ ဒဿာမိ၊ သံဃေ ဂဏဝရုတ္တမေ။
အဒိန္နပုဗ္ဗမညေသံ၊ ဘဝိဿံ အာဒိကမ္မိကော’။
(ဒါနဝတ္ထုသမ္ပာဒနံ)
၉။
‘‘နဠကာရေ ဥပါဂမ္မ၊ ဆတ္တံ ကာရေသိ တာဝဒေ။
ဆတ္တသတသဟဿာနိ၊ ဧကတော သန္နိပါတယိံ။
၁၀။
‘‘ဒုဿသတသဟဿာနိ၊ ဧကတော သန္နိပါတယိံ။
ပတ္တသတသဟဿာနိ၊ ဧကတော သန္နိပါတယိံ။
၁၁။
‘‘ဝါသိယော သတ္ထကေ စာပိ၊ သူစိယော နခဆေဒနေ။
ဟေဋ္ဌာဆတ္တေ ဌပါပေသိံ၊ ကာရေတွာ တဒနုစ္ဆဝေ။
၁၂။
‘‘ဝိဓူပနေ တာလဝဏ္ဋေ၊ မောရဟတ္ထေ စ စာမရေ။
ပရိဿာဝနေ တေလဓါရေ [တေလဓရေ (သီ။)]၊ ကာရယိံ တဒနုစ္ဆဝေ။
၁၃။
‘‘သူစိဃရေ အံသဗဒ္ဓေ၊ အထောပိ ကာယဗန္ဓနေ။
အာဓါရကေ စ သုကတေ၊ ကာရယိံ တဒနုစ္ဆဝေ။
၁၄။
‘‘ပရိဘောဂဘာဇနေ စ၊ အထောပိ လောဟထာလကေ။
ဘေသဇ္ဇေ ပူရယိတွာန၊ ဟေဋ္ဌာဆတ္တေ ဌပေသဟံ။
၁၅။
‘‘ဝစံ ဥသီရံ လဋ္ဌိမဓုံ၊ ပိပ္ဖလီ မရိစာနိ စ။
ဟရီတကိံ သိင်္ဂီဝေရံ၊ သဗ္ဗံ ပူရေသိ ဘာဇနေ။
၁၆။
‘‘ဥပါဟနာ ပါဒုကာယော၊ အထော ဥဒကပုဉ္ဆနေ။
ကတ္တရဒဏ္ဍေ သုကတေ၊ ကာရယိံ တဒနုစ္ဆဝေ။
၁၇။
‘‘ဩသဓဉ္ဇနနာဠီ စ [ဩသဓံ အဉ္ဇနာပိစ (သျာ။)]၊ သလာကာ ဓမ္မကုတ္တရာ။
ကုဉ္စိကာ ပဉ္စဝဏ္ဏေဟိ၊ သိဗ္ဗိတေ ကုဉ္စိကာဃရေ။
၁၈။
‘‘အာယောဂေ ဓူမနေတ္တေ စ၊ အထောပိ ဒီပဓါရကေ။
တုမ္ဗကေ စ ကရဏ္ဍေ စ၊ ကာရယိံ တဒနုစ္ဆဝေ။
၁၉။
‘‘သဏ္ဍာသေ ပိပ္ဖလေ စေဝ၊ အထောပိ မလဟာရကေ။
ဘေသဇ္ဇထဝိကေ စေဝ၊ ကာရယိံ တဒနုစ္ဆဝေ။
၂၀။
‘‘အာသန္ဒိယော ဣဌကေ စ၊ ပလ္လင်္ကေ စတုရောမယေ။
တဒနုစ္ဆဝေ ကာရယိတွာ၊ ဟေဋ္ဌာဆတ္တေ ဌပေသဟံ။
၂၁။
‘‘ဥဏ္ဏာဘိသီ တူလဘိသီ၊ အထောပိ ဣဌိကာဘိသီ [ဣဌကာဘိသီ (သျာ။ က။)]။
ဗိမ္ဗောဟနေ [ဗိဗ္ဗောဟနေ (သျာ။ က။)] စ သုကတေ၊ ကာရယိံ တဒနုစ္ဆဝေ။
၂၂။
‘‘ကုရုဝိန္ဒေ မဓုသိတ္ထေ၊ တေလံ ဟတ္ထပ္ပတာပကံ။
သိပါဋိဖလကေ သုစီ၊ မဉ္စံ အတ္ထရဏေန စ။
၂၃။
‘‘သေနာသနေ ပါဒပုဉ္ဆေ၊ သယနာသနဒဏ္ဍကေ။
ဒန္တပေါဏေ စ အာဋလီ [ကထလိံ (သျာ။)]၊ သီသာလေပနဂန္ဓကေ။
၂၄။
‘‘အရဏီ ဖလဣဌေ [ပလာလဣဌေ (သီ။)] စ၊ ပတ္တပိဓါနထာလကေ။
ဥဒကဿ ကဋစ္ဆူ စ၊ စုဏ္ဏကံ ရဇနမ္ဗဏံ [ရဇနမ္မဏံ (သီ။)]။
၂၅။
‘‘သမ္မဇ္ဇနံ [သမ္မုဉ္ဇနံ (သျာ။)၊ သမ္မဇ္ဇနိံ၊ သမ္မုဉ္ဇနိံ (?)] ဥဒပတ္တံ၊ တထာ ဝဿိကသာဋိကံ။
နိသီဒနံ ကဏ္ဍုစ္ဆာဒိ၊ အထ အန္တရဝါသကံ။
၂၆။
‘‘ဥတ္တရာသင်္ဂသံဃာဋီ၊ နတ္ထုကံ မုခသောဓနံ။
ဗိဠင်္ဂလောဏံ ပဟူတဉ္စ [လောဏဘူတဉ္စ (က။)]၊ မဓုဉ္စ ဒဓိပါနကံ။
၂၇။
‘‘ဓူပံ [ဓူမံ (က။)] သိတ္ထံ ပိလောတိဉ္စ၊ မုခပုဉ္ဆနသုတ္တကံ။
ဒါတဗ္ဗံ နာမ ယံ အတ္ထိ၊ ယဉ္စ ကပ္ပတိ သတ္ထုနော။
၂၈။
‘‘သဗ္ဗမေတံ သမာနေတွာ၊ အာနန္ဒံ ဥပသင်္ကမိံ။
ဥပသင်္ကမ္မ ရာဇာနံ၊ ဇနေတာရံ မဟေသိနော [မဟေသိနံ (သီ။)၊ မဟာယသံ (သျာ။)၊ မဟိဿရံ (က။)]။
သိရသာ အဘိဝါဒေတွာ၊ ဣဒံ ဝစနမဗြဝိံ။
(ဒါနောကာသယာစနာ)
၂၉။
‘‘‘ဧကတော ဇာတသံဝဒ္ဓါ၊ ဥဘိန္နံ ဧကတော မနံ [ယသော (သျာ။)၊ မနော (?)]။
သာဓါရဏာ သုခဒုက္ခေ၊ ဥဘော စ အနုဝတ္တကာ။
၃၀။
‘‘‘အတ္ထိ စေတသိကံ ဒုက္ခံ၊ တဝါဓေယျံ အရိန္ဒမ။
ယဒိ သက္ကောသိ တံ ဒုက္ခံ၊ ဝိနောဒေယျာသိ ခတ္တိယ။
၃၁။
‘‘‘တဝ ဒုက္ခံ မမ ဒုက္ခံ၊ ဥဘိန္နံ ဧကတော မနော [မနံ (သီ။ သျာ။)]။
နိဋ္ဌိတန္တိ ဝိဇာနာဟိ၊ မမာဓေယျံ သစေ တုဝံ။
၃၂။
‘‘‘ဇာနာဟိ ခေါ မဟာရာဇ၊ ဒုက္ခံ မေ ဒုဗ္ဗိနောဒယံ။
ပဟု သမာနော ဂဇ္ဇသု၊ ဧကံ တေ ဒုစ္စဇံ ဝရံ။
၃၃။
‘‘‘ယာဝတာ ဝိဇိတေ အတ္ထိ၊ ယာဝတာ မမ ဇီဝိတံ။
ဧတေဟိ ယဒိ တေ အတ္ထော၊ ဒဿာမိ အဝိကမ္ပိတော။
၃၄။
‘‘‘ဂဇ္ဇိတံ ခေါ တယာ ဒေဝ၊ မိစ္ဆာ တံ ဗဟု ဂဇ္ဇိတံ။
ဇာနိဿာမိ တုဝံ အဇ္ဇ၊ သဗ္ဗဓမ္မေ [သစ္စဓမ္မေ (?)] ပတိဋ္ဌိတံ။
၃၅။
‘‘‘အတိဗာဠှံ နိဣဠေသိ၊ ဒဒမာနဿ မေ သတော။
ကိံ တေ မေ ဣဠိတေနတ္ထော၊ ပတ္ထိတံ တေ ကထေဟိ မေ။
၃၆။
‘‘‘ဣစ္ဆာမဟံ မဟာရာဇ၊ ဗုဒ္ဓသေဋ္ဌံ အနုတ္တရံ။
ဘောဇယိဿာမိ သမ္ဗုဒ္ဓံ၊ ဝဇ္ဇံ [ဝဉ္စုံ (?)] မေ မာဟု ဇီဝိတံ။
၃၇။
‘‘‘အညံ တေဟံ ဝရံ ဒမ္မိ၊ မာ ယာစိတ္ထော တထာဂတံ [အယာစိတော တထာဂတော (သျာ။ က။)]။
အဒေယျော ကဿစိ ဗုဒ္ဓေါ၊ မဏိ ဇောတိရသော ယထာ။
၃၈။
‘‘‘နနု တေ ဂဇ္ဇိတံ ဒေဝ၊ ယာဝ ဇီဝိတမတ္တနော [ဝိဇိတမတ္ထိတံ (က။)၊ ဇီဝိတမတ္ထိကံ (သျာ။)]။
ဇီဝိတံ [ဝိဇိတံ (က။)] ဒဒမာနေန၊ ယုတ္တံ ဒါတုံ တထာဂတံ။
၃၉။
‘‘‘ဌပနီယော မဟာဝီရော၊ အဒေယျော ကဿစိ ဇိနော။
န မေ ပဋိဿုတော ဗုဒ္ဓေါ၊ ဝရဿု အမိတံ ဓနံ။
၄၀။
‘‘‘ဝိနိစ္ဆယံ ပါပုဏာမ၊ ပုစ္ဆိဿာမ ဝိနိစ္ဆယေ။
ယထာသဏ္ဌံ [ယထာသန္တံ (သီ။)] ကထေဿန္တိ၊ ပဋိပုစ္ဆာမ တံ တထာ။
၄၁။
‘‘‘ရညော ဟတ္ထေ ဂဟေတွာန၊ အဂမာသိံ ဝိနိစ္ဆယံ။
ပုရတော အက္ခဒဿာနံ၊ ဣဒံ ဝစနမဗြဝိံ။
၄၂။
‘‘‘သုဏန္တု မေ အက္ခဒဿာ၊ ရာဇာ ဝရမဒါသိ မေ။
န ကိဉ္စိ ဌပယိတွာန၊ ဇီဝိတမ္ပိ [ဝိဇိတံပိ (က။)] ပဝါရယိ။
၄၃။
‘‘‘တဿ မေ ဝရဒိန္နဿ၊ ဗုဒ္ဓသေဋ္ဌံ ဝရိံ အဟံ။
သုဒိန္နော ဟောတိ မေ ဗုဒ္ဓေါ၊ ဆိန္ဒထ သံသယံ မမ။
၄၄။
‘‘‘သောဿာမ တဝ ဝစနံ၊ ဘူမိပါလဿ ရာဇိနော။
ဥဘိန္နံ ဝစနံ သုတွာ၊ ဆိန္ဒိဿာမေတ္ထ သံသယံ။
၄၅။
‘‘‘သဗ္ဗံ ဒေဝ တယာ ဒိန္နံ၊ ဣမဿ သဗ္ဗဂါဟိကံ [သဗ္ဗဂါဟိတံ (သျာ။ က။)]။
န ကိဉ္စိ ဌပယိတွာန၊ ဇီဝိတမ္ပိ ပဝါရယိ။
၄၆။
‘‘‘ကိစ္ဆပ္ပတ္တောဝ ဟုတွာန၊ ယာစီ ဝရမနုတ္တရံ [ယာဝဇီဝမနုတ္တရံ (သျာ။ က။)]။
ဣမံ သုဒုက္ခိတံ ဉတွာ၊ အဒါသိံ သဗ္ဗဂါဟိကံ။
၄၇။
‘‘‘ပရာဇယော တုဝံ [တဝံ (သီ။)] ဒေဝ၊ အဿ ဒေယျော တထာဂတော။
ဥဘိန္နံ သံသယော ဆိန္နော၊ ယထာသဏ္ဌမှိ [ယထာသန္တမှိ (သီ။)] တိဋ္ဌထ။
၄၈။
‘‘‘ရာဇာ တတ္ထေဝ ဌတွာန၊ အက္ခဒဿေတဒဗြဝိ။
သမ္မာ မယှမ္ပိ ဒေယျာထ၊ ပုန ဗုဒ္ဓံ လဘာမဟံ။
၄၉။
‘‘‘ပူရေတွာ တဝ သင်္ကပ္ပံ၊ ဘောဇယိတွာ တထာဂတံ။
ပုန ဒေယျာသိ [ဒေယျာထ (က။)] သမ္ဗုဒ္ဓံ၊ အာနန္ဒဿ ယသဿိနော’။
(နိမန္တနကထာ)
၅၀။
‘‘အက္ခဒဿေဘိဝါဒေတွာ၊ အာနန္ဒဉ္စာပိ ခတ္တိယံ။
တုဋ္ဌော ပမုဒိတော ဟုတွာ၊ သမ္ဗုဒ္ဓမုပသင်္ကမိံ။
၅၁။
‘‘ဥပသင်္ကမ္မ သမ္ဗုဒ္ဓံ၊ ဩဃတိဏ္ဏမနာသဝံ။
သိရသာ အဘိဝါဒေတွာ၊ ဣဒံ ဝစနမဗြဝိံ။
၅၂။
‘ဝသီသတသဟဿေဟိ ၊ အဓိဝါသေဟိ စက္ခုမ။
ဟာသယန္တော မမ စိတ္တံ၊ နိဝေသနမုပေဟိ မေ’။
၅၃။
‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
မမ သင်္ကပ္ပမညာယ၊ အဓိဝါသေသိ စက္ခုမာ။
၅၄။
‘‘အဓိဝါသနမညာယ၊ အဘိဝါဒိယ သတ္ထုနော။
ဟဋ္ဌော ဥဒဂ္ဂစိတ္တောဟံ၊ နိဝေသနမုပါဂမိံ။
(ဒါနပဋိယာဒနံ)
၅၅။
‘‘မိတ္တာမစ္စေ သမာနေတွာ၊ ဣဒံ ဝစနမဗြဝိံ။
‘သုဒုလ္လဘော မယာ လဒ္ဓေါ၊ မဏိ ဇောတိရသော ယထာ။
၅၆။
‘‘‘ကေန တံ ပူဇယိဿာမ၊ အပ္ပမေယျော အနူပမော။
အတုလော အသမော ဓီရော၊ ဇိနော အပ္ပဋိပုဂ္ဂလော။
၅၇။
‘‘‘တထာသမသမော စေဝ၊ အဒုတိယော နရာသဘော။
ဒုက္ကရံ အဓိကာရဉှိ၊ ဗုဒ္ဓါနုစ္ဆဝိကံ မယာ။
၅၈။
‘‘‘နာနာပုပ္ဖေ သမာနေတွာ၊ ကရောမ ပုပ္ဖမဏ္ဍပံ။
ဗုဒ္ဓါနုစ္ဆဝိကံ ဧတံ၊ သဗ္ဗပူဇာ ဘဝိဿတိ’။
၅၉။
‘‘ဥပ္ပလံ ပဒုမံ ဝါပိ၊ ဝဿိကံ အဓိမုတ္တကံ [အတိမုတ္တကံ (?)]။
စမ္ပကံ [စန္ဒနံ (က။)] နာဂပုပ္ဖဉ္စ၊ မဏ္ဍပံ ကာရယိံ အဟံ။
၆၀။
‘‘သတာသနသဟဿာနိ၊ ဆတ္တစ္ဆာယာယ ပညပိံ။
ပစ္ဆိမံ အာသနံ မယှံ၊ အဓိကံ သတမဂ္ဃတိ။
၆၁။
‘‘သတာသနသဟဿာနိ၊ ဆတ္တစ္ဆာယာယ ပညပိံ။
ပဋိယာဒေတွာ အန္နပါနံ၊ ကာလံ အာရောစယိံ အဟံ။
၆၂။
‘‘အာရောစိတမှိ ကာလမှိ၊ ပဒုမုတ္တရော မဟာမုနိ။
ဝသီသတသဟဿေဟိ၊ နိဝေသနမုပေသိ မေ။
၆၃။
‘‘ဓါရေန္တံ ဥပရိစ္ဆတ္တံ [ဓါရေန္တမုပရိစ္ဆတ္တေ (သီ။)]၊ သုဖုလ္လပုပ္ဖမဏ္ဍပေ။
ဝသီသတသဟဿေဟိ၊ နိသီဒိ ပုရိသုတ္တမော။
၆၄။
‘‘‘ဆတ္တသတသဟဿာနိ၊ သတသဟဿမာသနံ။
ကပ္ပိယံ အနဝဇ္ဇဉ္စ၊ ပဋိဂဏှာဟိ စက္ခုမ’။
၆၅။
‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
မမံ တာရေတုကာမော သော၊ သမ္ပဋိစ္ဆိ မဟာမုနိ။
(ဒါနကထာ)
၆၆။
‘‘ဘိက္ခုနော ဧကမေကဿ၊ ပစ္စေကံ ပတ္တမဒါသဟံ။
ဇဟိံသု သုမ္ဘကံ [ပုဗ္ဗကံ (သီ။)၊ သမ္ဘတံ (သျာ။)၊ မတ္တိကံ (?)] ပတ္တံ၊ လောဟပတ္တံ အဓါရယုံ။
၆၇။
‘‘သတ္တရတ္တိန္ဒိဝံ ဗုဒ္ဓေါ၊ နိသီဒိ ပုပ္ဖမဏ္ဍပေ။
ဗောဓယန္တော ဗဟူ သတ္တေ၊ ဓမ္မစက္ကံ ပဝတ္တယိ။
၆၈။
‘‘ဓမ္မစက္ကံ ပဝတ္တေန္တော၊ ဟေဋ္ဌတော ပုပ္ဖမဏ္ဍပေ။
စုလ္လာသီတိသဟဿာနံ ၊ ဓမ္မာဘိသမယော အဟု။
၆၉။
‘‘သတ္တမေ ဒိဝသေ ပတ္တေ၊ ပဒုမုတ္တရော မဟာမုနိ။
ဆတ္တစ္ဆာယာယမာသီနော၊ ဣမာ ဂါထာ အဘာသထ။
(ဗျာကရဏံ)
၇၀။
‘‘‘အနူနကံ ဒါနဝရံ၊ ယော မေ ပါဒါသိ မာဏဝေါ။
တမဟံ ကိတ္တယိဿာမိ၊ သုဏာထ မမ ဘာသတော။
၇၁။
‘‘‘ဟတ္ထီ အဿာ ရထာ ပတ္တီ၊ သေနာ စ စတုရင်္ဂိနီ။
ပရိဝါရေဿန္တိမံ [တံ (သျာ။)] နိစ္စံ၊ သဗ္ဗဒါနဿိဒံ ဖလံ။
၇၂။
‘‘‘ဟတ္ထိယာနံ အဿယာနံ၊ သိဝိကာ သန္ဒမာနိကာ။
ဥပဋ္ဌိဿန္တိမံ နိစ္စံ၊ သဗ္ဗဒါနဿိဒံ ဖလံ။
၇၃။
‘‘‘သဋ္ဌိ ရထသဟဿာနိ၊ သဗ္ဗာလင်္ကာရဘူသိတာ။
ပရိဝါရေဿန္တိမံ နိစ္စံ၊ သဗ္ဗဒါနဿိဒံ ဖလံ။
၇၄။
‘‘‘သဋ္ဌိ တူရိယသဟဿာနိ၊ ဘေရိယော သမလင်္ကတာ။
ဝဇ္ဇယိဿန္တိမံ နိစ္စံ၊ သဗ္ဗဒါနဿိဒံ ဖလံ။
၇၅။
‘‘‘ဆဠာသီတိသဟဿာနိ၊ နာရိယော သမလင်္ကတာ။
ဝိစိတ္တဝတ္ထာဘရဏာ၊ အာမုက္ကမဏိကုဏ္ဍလာ [အာမုတ္တမဏိကုဏ္ဍလာ (သီ။ သျာ။)]။
၇၆။
‘‘‘အဠာရပမှာ ဟသုလာ၊ သုသညာ တနုမဇ္ဈိမာ။
ပရိဝါရေဿန္တိမံ နိစ္စံ၊ သဗ္ဗဒါနဿိဒံ ဖလံ။
၇၇။
‘‘‘တိံသကပ္ပသဟဿာနိ၊ ဒေဝလောကေ ရမိဿတိ။
သဟဿက္ခတ္တုံ ဒေဝိန္ဒော၊ ဒေဝရဇ္ဇံ ကရိဿတိ။
၇၈။
‘‘‘သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
ပဒေသရဇ္ဇံ ဝိပုလံ၊ ဂဏနာတော အသံခိယံ။
၇၉။
‘‘‘ဒေဝလောကေ ဝသန္တဿ၊ ပုညကမ္မသမင်္ဂိနော။
ဒေဝလောကပရိယန္တံ၊ ရတနဆတ္တံ ဓရိဿတိ။
၈၀။
‘‘‘ဣစ္ဆိဿတိ ယဒါ ဆာယံ [ယဒါ ဝါယံ (သျာ။ က။)]၊ ဆဒနံ ဒုဿပုပ္ဖဇံ။
ဣမဿ စိတ္တမညာယ၊ နိဗဒ္ဓံ ဆာဒယိဿတိ။
၈၁။
‘‘‘ဒေဝလောကာ စဝိတွာန၊ သုက္ကမူလေန စောဒိတော။
ပုညကမ္မေန သံယုတ္တော၊ ဗြဟ္မဗန္ဓု ဘဝိဿတိ။
၈၂။
‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ။
ဂေါတမော နာမ ဂေါတ္တေန [နာမေန (သဗ္ဗတ္ထ) ဧဝမုပရိပိ။ အဋ္ဌထာယံ ပန ပုဗ္ဗေ ဂေါတ္တေနာတိပဒံ ဝဏ္ဏိတံ]၊ သတ္ထာ လောကေ ဘဝိဿတိ။
၈၃။
‘‘‘သဗ္ဗမေတံ အဘိညာယ၊ ဂေါတမော သကျပုင်္ဂဝေါ။
ဘိက္ခုသံဃေ နိသီဒိတွာ၊ ဧတဒဂ္ဂေ ဌပေဿတိ။
၈၄။
‘‘‘ပိလိန္ဒဝစ္ဆနာမေန [ပိလိန္ဒိဝစ္ဆနာမေန (သီ။)]၊ ဟေဿတိ သတ္ထုသာဝကော။
ဒေဝါနံ အသုရာနဉ္စ၊ ဂန္ဓဗ္ဗာနဉ္စ သက္ကတော။
၈၅။
‘‘‘ဘိက္ခူနံ ဘိက္ခုနီနဉ္စ၊ ဂိဟီနဉ္စ တထေဝ သော။
ပိယော ဟုတွာန သဗ္ဗေသံ၊ ဝိဟရိဿတိနာသဝေါ’။
(ဒါနာနိသံသကထာ)
၈၆။
‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ။
သုမုတ္တော သရဝေဂေါဝ၊ ကိလေသေ ဈာပယီ မမ [ဈာပယိဿတိ (သီ။ က။)၊ ဈာပယိံ အဟံ (သျာ။)]။
၈၇။
‘‘အဟော မေ သုကတံ ကမ္မံ၊ ပုညက္ခေတ္တေ အနုတ္တရေ။
ယတ္ထ ကာရံ ကရိတွာန၊ ပတ္တောမှိ အစလံ ပဒံ။
၈၈။
‘‘အနူနကံ ဒါနဝရံ၊ အဒါသိ ယော [သော (က။)] ဟိ မာဏဝေါ။
အာဒိပုဗ္ဗင်္ဂမော အာသိ၊ တဿ ဒါနဿိဒံ ဖလံ။
(၁။ ဆတ္တာနိသံသော)
၈၉။
‘‘ဆတ္တေ စ သုဂတေ ဒတွာ [ဆတ္တေ သုဂတေ ဒတွာန (သီ။ သျာ။)]၊ သံဃေ ဂဏဝရုတ္တမေ။
အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
၉၀။
‘‘သီတံ ဥဏှံ န ဇာနာမိ၊ ရဇောဇလ္လံ န လိမ္ပတိ။
အနုပဒ္ဒဝေါ အနီတိ စ၊ ဟောမိ အပစိတော သဒါ။
၉၁။
‘‘သုခုမစ္ဆဝိကော ဟောမိ၊ ဝိသဒံ ဟောတိ မာနသံ။
ဆတ္တသတသဟဿာနိ၊ ဘဝေ သံသရတော မမ။
၉၂။
‘‘သဗ္ဗာလင်္ကာရယုတ္တာနိ ၊ တဿ ကမ္မဿ ဝါဟသာ။
ဣမံ ဇာတိံ ဌပေတွာန၊ မတ္ထကေ ဓါရယန္တိ မေ။
၉၃။
‘‘ကသ္မာ [တသ္မာ (သျာ။ က။)] ဣမာယ ဇာတိယာ၊ နတ္ထိ မေ ဆတ္တဓါရဏာ။
မမ သဗ္ဗံ ကတံ ကမ္မံ၊ ဝိမုတ္တိဆတ္တပတ္တိယာ။
(၂။ ဒုဿာနိသံသော)
၉၄။
‘‘ဒုဿာနိ သုဂတေ ဒတွာ၊ သံဃေ ဂဏဝရုတ္တမေ။
အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
၉၅။
‘‘သုဝဏ္ဏဝဏ္ဏော ဝိရဇော၊ သပ္ပဘာသော ပတာပဝါ။
သိနိဒ္ဓံ ဟောတိ မေ ဂတ္တံ၊ ဘဝေ သံသရတော မမ။
၉၆။
‘‘ဒုဿသတသဟဿာနိ၊ သေတာ ဣတာ စ လောဟိတာ။
ဓါရေန္တိ မတ္ထကေ မယှံ၊ ဒုဿဒါနဿိဒံ ဖလံ။
၉၇။
‘‘ကောသေယျကမ္ဗလိယာနိ၊ ခေါမကပ္ပါသိကာနိ စ။
သဗ္ဗတ္ထ ပဋိလဘာမိ၊ တေသံ နိဿန္ဒတော အဟံ။
(၃။ ပတ္တာနိသံသော)
၉၈။
‘‘ပတ္တေ သုဂတေ ဒတွာန၊ သံဃေ ဂဏဝရုတ္တမေ။
ဒသာနိသံသေ အနုဘောမိ၊ ကမ္မာနုစ္ဆဝိကေ မမ။
၉၉။
‘‘သုဝဏ္ဏထာလေ မဏိထာလေ၊ ရဇတေပိ စ ထာလကေ။
လောဟိတင်္ဂမယေ ထာလေ၊ ပရိဘုဉ္ဇာမိ သဗ္ဗဒါ။
၁၀၀။
‘‘အနုပဒ္ဒဝေါ အနီတိ စ၊ ဟောမိ အပစိတော သဒါ။
လာဘီ အန္နဿ ပါနဿ၊ ဝတ္ထဿ သယနဿ စ။
၁၀၁။
‘‘န ဝိနဿန္တိ မေ ဘောဂါ၊ ဌိတစိတ္တော ဘဝါမဟံ။
ဓမ္မကာမော သဒါ ဟောမိ၊ အပ္ပက္လေသော အနာသဝေါ။
၁၀၂။
‘‘ဒေဝလောကေ မနုဿေ ဝါ၊ အနုဗန္ဓာ ဣမေ ဂုဏာ။
ဆာယာ ယထာပိ ရုက္ခဿ၊ သဗ္ဗတ္ထ န ဇဟန္တိ မံ။
(၄။ ဝါသိအာနိသံသော)
၁၀၃။
‘‘စိတ္တဗန္ဓနသမ္ဗဒ္ဓါ [စိတ္တဗန္ဓနသမ္ပန္နာ (က။)]၊ သုကတာ ဝါသိယော ဗဟူ။
ဒတွာန ဗုဒ္ဓသေဋ္ဌဿ၊ သံဃဿ စ တထေဝဟံ။
၁၀၄။
‘‘အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
သူရော ဟောမဝိသာရီ စ၊ ဝေသာရဇ္ဇေသု ပါရမီ။
၁၀၅။
‘‘ဓိတိဝီရိယဝါ ဟောမိ၊ ပဂ္ဂဟီတမနော သဒါ။
ကိလေသစ္ဆေဒနံ ဉာဏံ၊ သုခုမံ အတုလံ သုစိံ။
သဗ္ဗတ္ထ ပဋိလဘာမိ၊ တဿ နိဿန္ဒတော အဟံ။
(၅။ သတ္ထကာနိသံသော)
၁၀၆။
‘‘အကက္ကသေ အဖရုသေ၊ သုဓေါတေ သတ္ထကေ ဗဟူ။
ပသန္နစိတ္တော ဒတွာန၊ ဗုဒ္ဓေ သံဃေ တထေဝ စ။
၁၀၇။
‘‘ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
ကလျာဏမိတ္တံ [ကလျာဏစိတ္တံ (သီ။)] ဝီရိယံ၊ ခန္တိဉ္စ မေတ္တသတ္ထကံ။
၁၀၈။
‘‘တဏှာသလ္လဿ ဆိန္နတ္တာ၊ ပညာသတ္ထံ အနုတ္တရံ။
ဝဇိရေန သမံ ဉာဏံ၊ တေသံ နိဿန္ဒတော လဘေ။
(၆။ သူစိအာနိသံသော)
၁၀၉။
‘‘သူစိယော သုဂတေ ဒတွာ၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၁၀။
‘‘န သံသယော ကင်္ခစ္ဆေဒေါ၊ အဘိရူပေါ စ ဘောဂဝါ။
တိက္ခပညော သဒါ ဟောမိ၊ သံသရန္တော ဘဝါဘဝေ။
၁၁၁။
‘‘ဂမ္ဘီရံ နိပုဏံ ဌာနံ၊ အတ္ထံ ဉာဏေန ပဿယိံ။
ဝဇိရဂ္ဂသမံ ဉာဏံ၊ ဟောတိ မေ တမဃာတနံ။
(၇။ နခစ္ဆေဒနာနိသံသော)
၁၁၂။
‘‘နခစ္ဆေဒနေ သုဂတေ၊ ဒတွာ သံဃေ ဂဏုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၁၃။
‘‘ဒါသိဒါသေ [ဒါသိဒါသ (က။)] ဂဝဿေ စ၊ ဘတကေ နာဋကေ [အာရက္ခကေ (သီ။)] ဗဟူ။
နှာပိတေ ဘတ္တကေ သူဒေ၊ သဗ္ဗတ္ထေဝ လဘာမဟံ။
(၈။ ဝိဓူပနတာလဝဏ္ဋာနိသံသော)
၁၁၄။
‘‘ဝိဓူပနေ သုဂတေ ဒတွာ၊ တာလဝဏ္ဋေ စ သောဘဏေ။
အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
၁၁၅။
‘‘သီတံ ဥဏှံ န ဇာနာမိ၊ ပရိဠာဟော န ဝိဇ္ဇတိ။
ဒရထံ နာဘိဇာနာမိ၊ စိတ္တသန္တာပနံ မမ။
၁၁၆။
‘‘ရာဂဂ္ဂိ ဒေါသမောဟဂ္ဂိ၊ မာနဂ္ဂိ ဒိဋ္ဌိအဂ္ဂိ စ။
သဗ္ဗဂ္ဂီ နိဗ္ဗုတာ မယှံ၊ တဿ နိဿန္ဒတော မမ။
(၉။ မောရဟတ္ထ-စာမရံ)
၁၁၇။
‘‘မောရဟတ္ထေ စာမရိယော၊ ဒတွာ သံဃေ ဂဏုတ္တမေ။
ဥပသန္တကိလေသောဟံ၊ ဝိဟရာမိ အနင်္ဂဏော။
(၁၀။ ပရိဿာဝန-ဓမ္မကရံ)
၁၁၈။
‘‘ပရိဿာဝနေ သုဂတေ၊ ဒတွာ ဓမ္မကရုတ္တမေ [ဒတွာ သုကတေ ဓမ္မကုတ္တရေ (သျာ။ က။)]။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၁၉။
‘‘သဗ္ဗေသံ သမတိက္ကမ္မ၊ ဒိဗ္ဗံ အာယုံ လဘာမဟံ။
အပ္ပသယှော သဒါ ဟောမိ၊ စောရပစ္စတ္ထိကေဟိ ဝါ။
၁၂၀။
‘‘သတ္ထေန ဝါ ဝိသေန ဝါ၊ ဝိဟေသမ္ပိ န ကုဗ္ဗတေ။
အန္တရာမရဏံ နတ္ထိ၊ တေသံ နိဿန္ဒတော မမ။
(၁၁။ တေလဓါရာနိသံသော)
၁၂၁။
‘‘တေလဓါရေ သုဂတေ ဒတွာ၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၂၂။
‘‘သုစာရုရူပေါ သုဘဒ္ဒေါ [သုဂဒေါ (သီ။)၊ သုဝါစော (?)]၊ သုသမုဂ္ဂတမာနသော။
အဝိက္ခိတ္တမနော ဟောမိ၊ သဗ္ဗာရက္ခေဟိ ရက္ခိတော။
(၁၂။ သူစိဃရာနိသံသော)
၁၂၃။
‘‘သူစိဃရေ သုဂတေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၂၄။
‘‘စေတောသုခံ ကာယသုခံ၊ ဣရိယာပထဇံ သုခံ။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၁၃။ အံသဗဒ္ဓါနိသံသော)
၁၂၅။
‘‘အံသဗဒ္ဓေ ဇိနေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၂၆။
‘‘သဒ္ဓမ္မေ ဂါဓံ [စေတောဉာဏံ စ (သီ။)] ဝိန္ဒာမိ၊ သရာမိ ဒုတိယံ ဘဝံ။
သဗ္ဗတ္ထ သုစ္ဆဝီ ဟောမိ၊ တဿ နိဿန္ဒတော အဟံ။
(၁၄။ ကာယဗန္ဓနာနိသံသော)
၁၂၇။
‘‘ကာယဗန္ဓေ ဇိနေ ဒတွာ၊ သံဃေ ဂဏဝရုတ္တမေ။
ဆာနိသံသေ အနုဘောမိ၊ ကမ္မာနုစ္ဆဝိကေ မမ။
၁၂၈။
‘‘သမာဓီသု န ကမ္ပာမိ၊ ဝသီ ဟောမိ သမာဓိသု။
အဘေဇ္ဇပရိသော ဟောမိ၊ အာဒေယျဝစနော သဒါ။
၁၂၉။
‘‘ဥပဋ္ဌိတသတိ ဟောမိ၊ တာသော မယှံ န ဝိဇ္ဇတိ။
ဒေဝလောကေ မနုဿေ ဝါ၊ အနုဗန္ဓာ ဣမေ ဂုဏာ။
(၁၅။ အာဓါရကာနိသံသော)
၁၃၀။
‘‘အာဓါရကေ ဇိနေ ဒတွာ၊ သံဃေ ဂဏဝရုတ္တမေ။
ပဉ္စဝဏ္ဏေဟိ ဒါယာဒေါ [ပဉ္စဝဏ္ဏေ ဘယာဘာဝေါ (သျာ။)]၊ အစလော ဟောမိ ကေနစိ။
၁၃၁။
‘‘ယေ ကေစိ မေ သုတာ ဓမ္မာ၊ သတိဉာဏပ္ပဗောဓနာ။
ဓတာ [ဌိတာ (က။)] မေ န ဝိနဿန္တိ၊ ဘဝန္တိ သုဝိနိစ္ဆိတာ။
(၁၆။ ဘာဇနာနိသံသော)
၁၃၂။
‘‘ဘာဇနေ ပရိဘောဂေ စ၊ ဒတွာ ဗုဒ္ဓေ ဂဏုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၃၃။
‘‘သောဏ္ဏမယေ မဏိမယေ၊ အထောပိ ဖလိကာမယေ။
လောဟိတင်္ဂမယေ စေဝ၊ လဘာမိ ဘာဇနေ အဟံ။
၁၃၄။
‘‘ဘရိယာ ဒါသဒါသီ [သဗ္ဗတ္ထပိ ဧဝမေဝ ဒိဿတိ] စ၊ ဟတ္ထိဿရထပတ္တိကေ။
ဣတ္ထီ ပတိဗ္ဗတာ စေဝ၊ ပရိဘောဂါနိ သဗ္ဗဒါ။
၁၃၅။
‘‘ဝိဇ္ဇာ မန္တပဒေ စေဝ၊ ဝိဝိဓေ အာဂမေ ဗဟူ။
သဗ္ဗံ သိပ္ပံ နိသာမေမိ၊ ပရိဘောဂါနိ သဗ္ဗဒါ။
(၁၇။ ထာလကာနိသံသော)
၁၃၆။
‘‘ထာလကေ သုဂတေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၃၇။
‘‘သောဏ္ဏမယေ မဏိမယေ၊ အထောပိ ဖလိကာမယေ။
လောဟိတင်္ဂမယေ စေဝ၊ လဘာမိ ထာလကေ အဟံ။
၁၃၈။
‘‘အသတ္ထကေ [အသတ္ထကေ (သီ။)၊ အဿဋ္ဌကေ (သျာ။)] ဖလမယေ၊ အထော ပေါက္ခရပတ္တကေ။
မဓုပါနကသင်္ခေ စ၊ လဘာမိ ထာလကေ အဟံ။
၁၃၉။
‘‘ဝတ္တေ ဂုဏေ ပဋိပတ္တိ၊ အာစာရကိရိယာသု စ။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၁၈။ ဘေသဇ္ဇာနိသံသော)
၁၄၀။
‘‘ဘေသဇ္ဇံ သုဂတေ ဒတွာ၊ သံဃေ ဂဏဝရုတ္တမေ။
ဒသာနိသံသေ အနုဘောမိ၊ ကမ္မာနုစ္ဆဝိကေ မမ။
၁၄၁။
‘‘အာယုဝါ ဗလဝါ ဓီရော၊ ဝဏ္ဏဝါ ယသဝါ သုခီ။
အနုပဒ္ဒဝေါ အနီတိ စ၊ ဟောမိ အပစိတော သဒါ။
န မေ ပိယဝိယောဂတ္ထိ၊ တဿ နိဿန္ဒတော မမ။
(၁၉။ ဥပါဟနာနိသံသော)
၁၄၂။
‘‘ဥပါဟနေ ဇိနေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၄၃။
‘‘ဟတ္ထိယာနံ အဿယာနံ၊ သိဝိကာ သန္ဒမာနိကာ။
သဋ္ဌိသတသဟဿာနိ၊ ပရိဝါရေန္တိ မံ သဒါ။
၁၄၄။
‘‘မဏိမယာ တမ္ဗမယာ [ကမ္ဗလိကာ (သီ။ က။)]၊ သောဏ္ဏရဇတပါဒုကာ။
နိဗ္ဗတ္တန္တိ ပဒုဒ္ဓါရေ၊ ဘဝေ သံသရတော မမ။
၁၄၅။
‘‘နိယာမံ သတိ ဓါဝန္တိ [နိယမံ ပဋိဓါဝန္တီ (သီ။)၊ နိယာမံ ပဋိဓါဝန္တိ (သျာ။)]၊ အာဂုအာစာရသောဓနံ [အာစာရဂုဏသောဓနံ (သီ။ သျာ။)]။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၂၀။ ပါဒုကာနိသံသော)
၁၄၆။
‘‘ပါဒုကေ သုဂတေ ဒတွာ၊ သံဃေ ဂဏဝရုတ္တမေ။
ဣဒ္ဓိပါဒုကမာရုယှ၊ ဝိဟရာမိ ယဒိစ္ဆကံ။
(၂၁။ ဥဒကပုဉ္ဆနာနိသံသော)
၁၄၇။
‘‘ဥဒကပုစ္ဆနစောဠေ ၊ ဒတွာ ဗုဒ္ဓေ ဂဏုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၄၈။
‘‘သုဝဏ္ဏဝဏ္ဏော ဝိရဇော၊ သပ္ပဘာသော ပတာပဝါ။
သိနိဒ္ဓံ ဟောတိ မေ ဂတ္တံ၊ ရဇောဇလ္လံ န လိမ္ပတိ။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၂၂။ ကတ္တရဒဏ္ဍာနိသံသော)
၁၄၉။
‘‘ကတ္တရဒဏ္ဍေ သုဂတေ၊ ဒတွာ သံဃေ ဂဏုတ္တမေ။
ဆာနိသံသေ အနုဘောမိ၊ ကမ္မာနုစ္ဆဝိကေ မမ။
၁၅၀။
‘‘ပုတ္တာ မယှံ ဗဟူ ဟောန္တိ၊ တာသော မယှံ န ဝိဇ္ဇတိ။
အပ္ပသယှော သဒါ ဟောမိ၊ သဗ္ဗာရက္ခေဟိ ရက္ခိတော။
ခလိတမ္ပိ [ခလိတံ မံ (သီ။ က။)] န ဇာနာမိ၊ အဘန္တံ မာနသံ မမ။
(၂၃။ ဩသဓဉ္ဇနာနိသံသော)
၁၅၁။
‘‘ဩသဓံ အဉ္ဇနံ ဒတွာ၊ ဗုဒ္ဓေ သံဃေ ဂဏုတ္တမေ။
အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
၁၅၂။
‘‘ဝိသာလနယနော ဟောမိ၊ သေတဣတော စ လောဟိတော။
အနာဝိလပသန္နက္ခော၊ သဗ္ဗရောဂဝိဝဇ္ဇိတော။
၁၅၃။
‘‘လဘာမိ ဒိဗ္ဗနယနံ၊ ပညာစက္ခုံ အနုတ္တရံ။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၂၄။ ကုဉ္စိကာနိသံသော)
၁၅၄။
‘‘ကုဉ္စိကေ သုဂတေ ဒတွာ၊ သံဃေ ဂဏဝရုတ္တမေ။
ဓမ္မဒွါရဝိဝရဏံ၊ လဘာမိ ဉာဏကုဉ္စိကံ။
(၂၅။ ကုဉ္စိကာဃရာနိသံသော)
၁၅၅။
‘‘ကုဉ္စိကာနံ ဃရေ ဒတွာ၊ ဗုဒ္ဓေ သံဃေ ဂဏုတ္တမေ။
ဒွါနိသံသေ အနုဘောမိ၊ ကမ္မာနုစ္ဆဝိကေ မမ။
အပ္ပကောဓေါ အနာယာသော၊ သံသရန္တော ဘဝေ အဟံ။
(၂၆။ အာယောဂါနိသံသော)
၁၅၆။
‘‘အာယောဂေ သုဂတေ ဒတွာ၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၅၇။
‘‘သမာဓီသု န ကမ္ပာမိ၊ ဝသီ ဟောမိ သမာဓိသု။
အဘေဇ္ဇပရိသော ဟောမိ၊ အာဒေယျဝစနော သဒါ။
ဇာယတိ ဘောဂသမ္ပတ္တိ၊ ဘဝေ သံသရတော မမ။
(၂၇။ ဓူမနေတ္တာနိသံသော)
၁၅၈။
‘‘ဓူမနေတ္တေ ဇိနေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၅၉။
‘‘သတိ မေ ဥဇုကာ ဟောတိ၊ သုသမ္ဗန္ဓာ စ နှာရဝေါ။
လဘာမိ ဒိဗ္ဗနယနံ [ဒိဗ္ဗသယနံ (သျာ။)]၊ တဿ နိဿန္ဒတော အဟံ။
(၂၈။ ဒီပဓါရာနိသံသော)
၁၆၀။
‘‘ဒီပဓါရေ [ဒီပဋ္ဌာနေ (သီ။)၊ ဒီပဒါနေ (သျာ။)၊ ဒီပဋ္ဌာပေ (က။)] ဇိနေ ဒတွာ၊ သံဃေ ဂဏဝရုတ္တမေ။
တီဏာနိသံသေ အနုဘောမိ၊ ကမ္မာနုစ္ဆဝိကေ မမ။
၁၆၁။
‘‘ဇာတိမာ အင်္ဂသမ္ပန္နော၊ ပညဝါ ဗုဒ္ဓသမ္မတော [ဗုဒ္ဓိသမ္မတော (သီ။ က။)]။
ဣမေ ဂုဏေ ပဋိလဘေ၊ တဿ နိဿန္ဒတော အဟံ။
(၂၉။ တုမ္ဗက-ကရဏ္ဍော)
၁၆၂။
‘‘တုမ္ဗကေ စ ကရဏ္ဍေ စ၊ ဒတွာ ဗုဒ္ဓေ ဂဏုတ္တမေ။
ဒသာနိသံသေ အနုဘောမိ၊ ကမ္မာနုစ္ဆဝိကေ မမ။
၁၆၃။
‘‘သုဂုတ္တော [သဒါဂုတ္တော (သီ။ သျာ။) သံဂုတ္တော (က။)] သုခသမင်္ဂီ၊ မဟာယသော တထာဂတိ။
ဝိပတ္တိဝိဂတော [ဝိဘတ္တိဂတ္တော (သျာ။)] သုခုမာလော၊ သဗ္ဗီတိပရိဝဇ္ဇိတော။
၁၆၄။
‘‘ဝိပုလေ စ ဂုဏေ လာဘီ၊ သမာဝ စလနာ မမ။
သုဝိဝဇ္ဇိတဥဗ္ဗေဂေါ၊ တုမ္ဗကေ စ ကရဏ္ဍကေ။
၁၆၅။
‘‘လဘာမိ စတုရော ဝဏ္ဏေ၊ ဟတ္ထိဿရတနာနိ စ။
တာနိ မေ န ဝိနဿန္တိ၊ တုမ္ဗဒါနေ ဣဒံ ဖလံ။
(၃၀။ မလဟရဏာနိသံသော)
၁၆၆။
‘‘မလဟရဏိယော [အဉ္ဇနနာဠိယော (သီ။)၊ ဟတ္ထလိလင်္ဂကေ (သျာ။ ဣ။)၊ ဟတ္ထလိလင်္ဂတေ (က။)] ဒတွာ၊ ဗုဒ္ဓေ သံဃေ ဂဏုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၆၇။
‘‘သဗ္ဗလက္ခဏသမ္ပန္နော၊ အာယုပညာသမာဟိတော။
သဗ္ဗာယာသဝိနိမုတ္တော၊ ကာယော မေ ဟောတိ သဗ္ဗဒါ။
(၃၁။ ပိပ္ဖလာနိသံသော)
၁၆၈။
‘‘တဏုဓါရေ သုနိသိတေ၊ သံဃေ ဒတွာန ပိပ္ဖလေ။
ကိလေသကန္တနံ ဉာဏံ၊ လဘာမိ အတုလံ သုစိံ။
(၃၂။ ဘဏ္ဍာသာနိသံသော)
၁၆၉။
‘‘သဏ္ဍာသေ သုဂတေ ဒတွာ၊ သံဃေ ဂဏဝရုတ္တမေ။
ကိလေသဘဉ္ဇနံ [ကိလေသလုဉ္စနံ (သီ။ သျာ။ ဣ။)] ဉာဏံ၊ လဘာမိ အတုလံ သုစိံ။
(၃၃။ နတ္ထုကာနိသံသော)
၁၇၀။
‘‘နတ္ထုကေ [ထဝိကေ (?) ဘေသဇ္ဇထဝိကေတိ ဟိ ပုဗ္ဗေ ဝုတ္တံ] သုဂတေ ဒတွာ၊ သံဃေ ဂဏဝရုတ္တမေ။
အဋ္ဌာနိသံသေ အနုဘောမိ၊ ကမ္မာနုစ္ဆဝိကေ မမ။
၁၇၁။
‘‘သဒ္ဓံ သီလံ ဟိရိဉ္စာပိ၊ အထ ဩတ္တပ္ပိယံ ဂုဏံ။
သုတံ စာဂဉ္စ ခန္တိဉ္စ၊ ပညံ မေ အဋ္ဌမံ ဂုဏံ။
(၃၄။ ဣဌကာနိသံသော)
၁၇၂။
‘‘ဣဌကေ သုဂတေ ဒတွာ၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၇၃။
‘‘ဥစ္စေ ကုလေ ပဇာယာမိ၊ မဟာဘောဂေါ ဘဝါမဟံ။
သဗ္ဗေ မံ အပစာယန္တိ၊ ကိတ္တိ အဗ္ဘုဂ္ဂတာ မမ။
၁၇၄။
‘‘ကပ္ပသတသဟဿာနိ၊ ပလ္လင်္ကာ စတုရဿကာ။
ပရိဝါရေန္တိ မံ နိစ္စံ၊ သံဝိဘာဂရတော အဟံ။
(၃၅။ ဘိသိအာနိသံသော)
၁၇၅။
‘‘ဘိသိယော သုဂတေ ဒတွာ၊ သံဃေ ဂဏဝရုတ္တမေ။
ဆာနိသံသေ အနုဘောမိ၊ ကမ္မာနုစ္ဆဝိကေ မမ။
၁၇၆။
‘‘သမသုဂတ္တောပစိတော၊ မုဒုကော စာရုဒဿနော။
လဘာမိ ဉာဏပရိဝါရံ၊ ဘိသိဒါနဿိဒံ ဖလံ။
၁၇၇။
‘‘တူလိကာ ဝိကတိကာယော၊ ကဋ္ဋိဿာ [ကဋ္ဌိဿာ (သီ။)၊ ကုဋ္ဋကာ (က။)] စိတ္တကာ ဗဟူ။
ဝရပေါတ္ထကေ ကမ္ဗလေ စ၊ လဘာမိ ဝိဝိဓေ အဟံ။
၁၇၈။
‘‘ပါဝါရိကေ စ မုဒုကေ၊ မုဒုကာဇိနဝေဏိယော။
လဘာမိ ဝိဝိဓတ္ထာရေ [ဝိဝိဓဋ္ဌာနေ (သျာ။ က။)]၊ ဘိသိဒါနဿိဒံ ဖလံ။
၁၇၉။
‘‘ယတော သရာမိ အတ္တာနံ၊ ယတော ပတ္တောသ္မိ ဝိညုတံ။
အတုစ္ဆော ဈာနမဉ္စောမှိ၊ ဘိသိဒါနဿိဒံ ဖလံ။
(၃၆။ ဗိဗ္ဗောဟနာနိသံသော)
၁၈၀။
‘‘ဗိဗ္ဗောဟနေ ဇိနေ ဒတွာ၊ သံဃေ ဂဏဝရုတ္တမေ။
ဆာနိသံသေ အနုဘောမိ၊ ကမ္မာနုစ္ဆဝိကေ မမ။
၁၈၁။
‘‘ဥဏ္ဏိကေ ပဒုမကေ စ၊ အထော လောဟိတစန္ဒနေ။
ဗိဗ္ဗောဟနေ ဥပါဓေမိ၊ ဥတ္တမင်္ဂံ သဒါ မမ။
၁၈၂။
‘‘အဋ္ဌင်္ဂိကေ မဂ္ဂဝရေ၊ သာမညေ စတုရော ဖလေ။
တေသု ဉာဏံ ဥပ္ပါဒေတွာ [ဥပနေတွာ (သီ။)]၊ ဝိဟရေ နိစ္စကာလိကံ။
၁၈၃။
‘‘ဒါနေ ဒမေ သံယမေ စ၊ အပ္ပမညာသု ရူပိသု။
တေသု ဉာဏံ ဥပ္ပါဒေတွာ [ဥပနေတွာ (သီ။)]၊ ဝိဟရေ သဗ္ဗကာလိကံ။
၁၈၄။
‘‘ဝတ္တေ ဂုဏေ ပဋိပတ္တိ၊ အာစာရကိရိယာသု စ။
တေသု ဉာဏံ ဥပ္ပါဒေတွာ [ဉာဏံ ဥပဒဟိတွာန (သီ။)]၊ ဝိဟရေ သဗ္ဗဒါ အဟံ။
၁၈၅။
‘‘စင်္ကမေ ဝါ ပဓါနေ ဝါ၊ ဝီရိယေ ဗောဓိပက္ခိယေ။
တေသု ဉာဏံ ဥပ္ပါဒေတွာ၊ ဝိဟရာမိ ယဒိစ္ဆကံ။
၁၈၆။
‘‘သီလံ သမာဓိ ပညာ စ၊ ဝိမုတ္တိ စ အနုတ္တရာ။
တေသု ဉာဏံ ဥပ္ပါဒေတွာ [ဉာဏံ ဥပဒဟိတွာန (သီ။)]၊ ဝိဟရာမိ သုခံ အဟံ။
(၃၇။ ဖလဣဌာနိသံသော)
၁၈၇။
‘‘ဖလဣဌေ [ပလာလဣဋ္ဌေ (သီ။)] ဇိနေ ဒတွာ၊ သံဃေ ဂဏဝရုတ္တမေ။
ဒွါနိသံသေ အနုဘောမိ၊ ကမ္မာနုစ္ဆဝိကေ မမ။
၁၈၈။
‘‘သောဏ္ဏမယေ မဏိမယေ၊ ဒန္တသာရမယေ ဗဟူ။
ပလ္လင်္ကသေဋ္ဌေ ဝိန္ဒာမိ၊ ဖလဣဌဿိဒံ ဖလံ။
(၃၈။ ပါဒဣဌာနိသံသော)
၁၈၉။
‘‘ပါဒဣဌေ ဇိနေ ဒတွာ၊ သံဃေ ဂဏဝရုတ္တမေ။
ဒွါနိသံသေ အနုဘောမိ၊ ကမ္မာနုစ္ဆဝိကေ မမ။
လဘာမိ ဗဟုကေ ယာနေ၊ ပါဒဣဌဿိဒံ ဖလံ။
၁၉၀။
‘‘ဒါသီ ဒါသာ စ ဘရိယာ၊ ယေ စညေ အနုဇီဝိနော။
သမ္မာ ပရိစရန္တေ မံ၊ ပါဒဣဌဿိဒံ ဖလံ။
(၃၉။ တေလဗ္ဘဉ္ဇနာနိသံသော)
၁၉၁။
‘‘တေလအဗ္ဘဉ္ဇနေ [တေလာနဗ္ဘဉ္ဇနေ (သီ။)] ဒတွာ၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၉၂။
‘‘အဗျာဓိတာ ရူပဝတာ၊ ခိပ္ပံ ဓမ္မနိသန္တိတာ။
လာဘိတာ အန္နပါနဿ၊ အာယုပဉ္စမကံ မမ။
(၄၀။ သပ္ပိတေလာနိသံသော)
၁၉၃။
‘‘သပ္ပိတေလဉ္စ ဒတွာန၊ သံဃေ ဂဏဝရုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၉၄။
‘‘ထာမဝါ ရူပသမ္ပန္နော၊ ပဟဋ္ဌတနုဇော သဒါ။
အဗျာဓိ ဝိသဒေါ ဟောမိ၊ သပ္ပိတေလဿိဒံ ဖလံ။
(၄၁။ မုခသောဓနကာနိသံသော)
၁၉၅။
‘‘မုခသောဓနကံ ဒတွာ၊ ဗုဒ္ဓေ သံဃေ ဂဏုတ္တမေ။
ပဉ္စာနိသံသေ အနုဘောမိ၊ ကမ္မာနုစ္ဆဝိကေ မမ။
၁၉၆။
‘‘ဝိသုဒ္ဓကဏ္ဌော မဓုရဿရော၊ ကာသသာသဝိဝဇ္ဇိတော။
ဥပ္ပလဂန္ဓော မုခတော၊ ဥပဝါယတိ မေ သဒါ။
(၄၂။ ဒဓိအာနိသံသော)
၁၉၇။
‘‘ဒဓိံ ဒတွာန သမ္ပန္နံ၊ ဗုဒ္ဓေ သံဃေ ဂဏုတ္တမေ။
ဘုဉ္ဇာမိ အမတံ ဘတ္တံ [ဝိတ္တံ (သီ။ က။)]၊ ဝရံ ကာယဂတာသတိံ။
(၄၃။ မဓုအာနိသံသော)
၁၉၈။
‘‘ဝဏ္ဏဂန္ဓရသောပေတံ၊ မဓုံ ဒတွာ ဇိနေ ဂဏေ။
အနူပမံ အတုလိယံ၊ ပိဝေ မုတ္တိရသံ အဟံ။
(၄၄။ရသာနိသံသော)
၁၉၉။
‘‘ယထာဘူတံ ရသံ ဒတွာ၊ ဗုဒ္ဓေ သံဃေ ဂဏုတ္တမေ။
စတုရော ဖလေ အနုဘောမိ၊ ကမ္မာနုစ္ဆဝိကေ မမ။
(၄၅။ အန္နပါနာနိသံသော)
၂၀၀။
‘‘အန္နံ ပါနဉ္စ ဒတွာန၊ ဗုဒ္ဓေ သံဃေ ဂဏုတ္တမေ။
ဒသာနိသံသေ အနုဘောမိ၊ ကမ္မာနုစ္ဆဝိကေ မမ။
၂၀၁။
‘‘အာယုဝါ ဗလဝါ ဓီရော၊ ဝဏ္ဏဝါ ယသဝါ သုခီ။
လာဘီ အန္နဿ ပါနဿ၊ သူရော ပညာဏဝါ သဒါ။
ဣမေ ဂုဏေ ပဋိလဘေ၊ သံသရန္တော ဘဝေ အဟံ။
(၄၆။ ဓူပါနိသံသော)
၂၀၂။
‘‘ဓူပံ [ဓူမံ (သီ။ က။)] ဒတွာန သုဂတေ၊ သံဃေ ဂဏဝရုတ္တမေ။
ဒသာနိသံသေ အနုဘောမိ၊ ကမ္မာနုစ္ဆဝိကေ မမ။
၂၀၃။
‘‘သုဂန္ဓဒေဟော ယသဝါ၊ သီဃပညော စ ကိတ္တိမာ။
တိက္ခပညော ဘူရိပညော၊ ဟာသဂမ္ဘီရပညဝါ။
၂၀၄။
‘‘ဝေပုလ္လဇဝနပညော ၊ သံသရန္တော ဘဝါဘဝေ။
တဿေဝ ဝါဟသာ ဒါနိ၊ ပတ္တော သန္တိသုခံ သိဝံ။
(သာဓါရဏာနိသံသော)
၂၀၅။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
၂၀၆။
‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ [ဗုဒ္ဓသေဋ္ဌဿ သန္တိကေ (?) ဧဝမုပရိပိ။ ဧတဒေဝ ဟိ ဥပါလိတ္ထေရာပဒါနဋ္ဌကထာယံ ဝဏ္ဏိတံ]။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
၂၀၇။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပိလိန္ဒဝစ္ဆော ထေရော ဣမာ ဂါထာယော အဘာသိတ္ထာတိ။
ပိလိန္ဒဝစ္ဆတ္ထေရဿာပဒါနံ ပဌမံ။
၂။ သေလတ္ထေရအပဒါနံ
၂၀၈။
‘‘နဂရေ ဟံသဝတိယာ၊ ဝီထိသာမီ အဟောသဟံ။
မမ ဉာတီ သမာနေတွာ၊ ဣဒံ ဝစနမဗြဝိံ။
၂၀၉။
‘‘‘ဗုဒ္ဓေါ လောကေ သမုပ္ပန္နော၊ ပုညက္ခေတ္တော အနုတ္တရော [ပုညက္ခေတ္တံ အနုတ္တရံ (သီ။)]။
အာသိ သော [အာသီသော (သီ။)၊ အာဓါရော (ဣ။)] သဗ္ဗလောကဿ၊ အာဟုတီနံ ပဋိဂ္ဂဟော။
၂၁၀။
‘‘‘ခတ္တိယာ နေဂမာ စေဝ၊ မဟာသာလာ စ ဗြာဟ္မဏာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၁။
‘‘‘ဟတ္ထာရောဟာ အနီကဋ္ဌာ၊ ရထိကာ ပတ္တိကာရကာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၂။
‘‘‘ဥဂ္ဂါ စ ရာဇပုတ္တာ စ၊ ဝေသိယာနာ စ ဗြာဟ္မဏာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၃။
‘‘‘အာဠာရိကာ ကပ္ပကာ [အာဠာရိကာ စ သူဒါ (သျာ။)] စ၊ နှာပကာ မာလကာရကာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၄။
‘‘‘ရဇကာ ပေသကာရာ စ၊ စမ္မကာရာ စ နှာပိတာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၅။
‘‘‘ဥသုကာရာ ဘမကာရာ၊ စမ္မကာရာ စ တစ္ဆကာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၆။
‘‘‘ကမ္မာရာ သောဏ္ဏကာရာ စ၊ တိပုလောဟကရာ တထာ။
ပသန္နစိတ္တာ သုမနာ၊ ပူဂဓမ္မံ အကံသု တေ။
၂၁၇။
‘‘‘ဘတကာ စေဋကာ စေဝ၊ ဒါသကမ္မကရာ ဗဟူ။
ယထာသကေန ထာမေန၊ ပူဂဓမ္မံ အကံသု တေ။
၂၁၈။
‘‘‘ဥဒဟာရာ ကဋ္ဌဟာရာ၊ ကဿကာ တိဏဟာရကာ။
ယထာသကေန ထာမေန၊ ပူဂဓမ္မံ အကံသု တေ။
၂၁၉။
‘‘‘ပုပ္ဖိကာ မာလိကာ စေဝ၊ ပဏ္ဏိကာ ဖလဟာရကာ။
ယထာသကေန ထာမေန၊ ပူဂဓမ္မံ အကံသု တေ။
၂၂၀။
‘‘‘ဂဏိကာ ကုမ္ဘဒါသီ စ၊ ပူဝိကာ [သူပိကာ (က။)] မစ္ဆိကာပိ စ။
ယထာသကေန ထာမေန၊ ပူဂဓမ္မံ အကံသု တေ။
၂၂၁။
‘‘‘ဧထ သဗ္ဗေ သမာဂန္တွာ၊ ဂဏံ ဗန္ဓာမ ဧကတော။
အဓိကာရံ ကရိဿာမ၊ ပုညက္ခေတ္တေ အနုတ္တရေ’။
၂၂၂။
‘‘တေ မေ သုတွာန ဝစနံ၊ ဂဏံ ဗန္ဓိံသု တာဝဒေ။
ဥပဋ္ဌာနသာလံ သုကတံ၊ ဘိက္ခုသံဃဿ ကာရယုံ။
၂၂၃။
‘‘နိဋ္ဌာပေတွာန တံ သာလံ၊ ဥဒဂ္ဂေါ တုဋ္ဌမာနသော။
ပရေတော တေဟိ သဗ္ဗေဟိ၊ သမ္ဗုဒ္ဓမုပသင်္ကမိံ။
၂၂၄။
‘‘ဥပသင်္ကမ္မ သမ္ဗုဒ္ဓံ၊ လောကနာထံ နရာသဘံ။
ဝန္ဒိတွာ သတ္ထုနော ပါဒေ၊ ဣဒံ ဝစနမဗြဝိံ။
၂၂၅။
‘‘‘ဣမေ တီဏိ သတာ ဝီရ၊ ပုရိသာ ဧကတော ဂဏာ။
ဥပဋ္ဌာနသာလံ သုကတံ၊ နိယျာဒေန္တိ [နိယျာတေန္တိ (သီ။)] တုဝံ [တဝံ (သီ။)၊ တဝ (သျာ။)] မုနိ’။
၂၂၆။
‘‘ဘိက္ခုသံဃဿ ပုရတော၊ သမ္ပဋိစ္ဆတွ စက္ခုမာ။
တိဏ္ဏံ သတာနံ ပုရတော၊ ဣမာ ဂါထာ အဘာသထ။
၂၂၇။
‘‘‘တိသတာပိ စ ဇေဋ္ဌော စ၊ အနုဝတ္တိံသု ဧကတော။
သမ္ပတ္တိဉှိ [သမ္ပတ္တီဟိ (သျာ။ က။)] ကရိတွာန၊ သဗ္ဗေ အနုဘဝိဿထ။
၂၂၈။
‘‘‘ပစ္ဆိမေ ဘဝေ သမ္ပတ္တေ၊ သီတိဘာဝမနုတ္တရံ။
အဇရံ အမတံ သန္တံ၊ နိဗ္ဗာနံ ဖဿယိဿထ’။
၂၂၉။
‘‘ဧဝံ ဗုဒ္ဓေါ ဝိယာကာသိ၊ သဗ္ဗညူ သမဏုတ္တရော။
ဗုဒ္ဓဿ ဝစနံ သုတွာ၊ သောမနဿံ ပဝေဒယိံ။
၂၃၀။
‘‘တိံသ ကပ္ပသဟဿာနိ၊ ဒေဝလောကေ ရမိံ အဟံ။
ဒေဝါဓိပေါ ပဉ္စသတံ၊ ဒေဝရဇ္ဇမကာရယိံ။
၂၃၁။
‘‘သဟဿက္ခတ္တုံ ရာဇာ စ၊ စက္ကဝတ္တီ အဟောသဟံ။
ဒေဝရဇ္ဇံ ကရောန္တဿ၊ မဟာဒေဝါ အဝန္ဒိသုံ။
၂၃၂။
‘‘ဣဓ မာနုသကေ ရဇ္ဇံ [ရဇ္ဇေ (သီ။)]၊ ပရိသာ ဟောန္တိ ဗန္ဓဝါ။
ပစ္ဆိမေ ဘဝေ သမ္ပတ္တေ၊ ဝါသေဋ္ဌော နာမ ဗြာဟ္မဏော။
၂၃၃။
‘‘အသီတိကောဋိ နိစယော၊ တဿ ပုတ္တော အဟောသဟံ။
သေလော ဣတိ မမ နာမံ၊ ဆဠင်္ဂေ ပါရမိံ ဂတော။
၂၃၄။
‘‘ဇင်္ဃာဝိဟာရံ ဝိစရံ၊ သသိဿေဟိ ပုရက္ခတော။
ဇဋာဘာရိကဘရိတံ၊ ကေဏိယံ နာမ တာပသံ။
၂၃၅။
‘‘ပဋိယတ္တာဟုတိံ ဒိသွာ၊ ဣဒံ ဝစနမဗြဝိံ။
‘အာဝါဟော ဝါ ဝိဝါဟော ဝါ၊ ရာဇာ ဝါ တေ နိမန္တိတော’။
၂၃၆။
‘‘အာဟုတိံ [နာဟုတိံ (?)] ယိဋ္ဌုကာမောဟံ၊ ဗြာဟ္မဏေ ဒေဝသမ္မတေ။
န နိမန္တေမိ ရာဇာနံ၊ အာဟုတီ မေ န ဝိဇ္ဇတိ။
၂၃၇။
‘‘န စတ္ထိ မယှမာဝါဟော၊ ဝိဝါဟော မေ န ဝိဇ္ဇတိ။
သက္ယာနံ နန္ဒိဇနနော၊ သေဋ္ဌော လောကေ သဒေဝကေ။
၂၃၈။
‘‘သဗ္ဗလောကဟိတတ္ထာယ၊ သဗ္ဗသတ္တသုခါဝဟော။
သော မေ နိမန္တိတော အဇ္ဇ၊ တဿေတံ ပဋိယာဒနံ။
၂၃၉။
‘‘တိမ္ဗရူသကဝဏ္ဏာဘော ၊ အပ္ပမေယျော အနူပမော။
ရူပေနာသဒိသော ဗုဒ္ဓေါ၊ သွာတနာယ နိမန္တိတော။
၂၄၀။
‘‘ဥက္ကာမုခပဟဋ္ဌောဝ၊ ခဒိရင်္ဂါရသန္နိဘော။
ဝိဇ္ဇူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၁။
‘‘ပဗ္ဗတဂ္ဂေ ယထာ အစ္စိ၊ ပုဏ္ဏမာယေဝ စန္ဒိမာ။
နဠဂ္ဂိဝဏ္ဏသင်္ကာသော၊ သော မေ ဗုဒ္ဓေါ နိမန္တိတော။
၂၄၂။
‘‘အသမ္ဘီတော ဘယာတီတော၊ ဘဝန္တကရဏော မုနိ။
သီဟူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၃။
‘‘ကုသလော ဗုဒ္ဓဓမ္မေဟိ၊ အပသယှော ပရေဟိ သော။
နာဂူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၄။
‘‘သဒ္ဓမ္မာစာရကုသလော ၊ ဗုဒ္ဓနာဂေါ အသာဒိသော။
ဥသဘူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၅။
‘‘အနန္တဝဏ္ဏော အမိတယသော၊ ဝိစိတ္တသဗ္ဗလက္ခဏော။
သက္ကူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၆။
‘‘ဝသီ ဂဏီ ပတာဣ စ၊ တေဇဿီ စ ဒုရာသဒေါ။
ဗြဟ္မူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၇။
‘‘ပတ္တဓမ္မော ဒသဗလော၊ ဗလာတိဗလပါရဂေါ။
ဓရဏူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၈။
‘‘သီလဝီစိသမာကိဏ္ဏော၊ ဓမ္မဝိညာဏခေါဘိတော။
ဥဒဓူပမော မဟာဝီရော၊ သော မေ ဗုဒ္ဓေါ နိမန္တိတော။
၂၄၉။
‘‘ဒုရာသဒေါ ဒုပ္ပသဟော၊ အစလော ဥဂ္ဂတော ဗြဟာ။
နေရူပမော မဟာဝီရော၊ သော မေ ဗုဒ္ဓေါ နိမန္တိတော။
၂၅၀။
‘‘အနန္တဉာဏော အသမသမော၊ အတုလော အဂ္ဂတံ ဂတော။
ဂဂနူပမော မဟာဝီရော၊ သော မေ ဗုဒ္ဓေါ နိမန္တိတော။
ပန္နရသမံ ဘာဏဝါရံ။
၂၅၁။
‘‘ပတိဋ္ဌာ ဘယဘီတာနံ၊ တာဏော သရဏဂါမိနံ။
အဿာသကော မဟာဝီရော၊ သော မေ ဗုဒ္ဓေါ နိမန္တိတော။
၂၅၂။
‘‘အာသယော ဗုဒ္ဓိမန္တာနံ၊ ပုညက္ခေတ္တံ သုခေသိနံ။
ရတနာကရော မဟာဝီရော၊ သော မေ ဗုဒ္ဓေါ နိမန္တိတော။
၂၅၃။
‘‘အဿာသကော ဝေဒကရော၊ သာမညဖလဒါယကော။
မေဃူပမော မဟာဝီရော၊ သော မေ ဗုဒ္ဓေါ နိမန္တိတော။
၂၅၄။
‘‘လောကစက္ခု မဟာတေဇော၊ သဗ္ဗတမဝိနောဒနော။
သူရိယူပမော မဟာဝီရော၊ သော မေ ဗုဒ္ဓေါ နိမန္တိတော။
၂၅၅။
‘‘အာရမ္မဏဝိမုတ္တီသု၊ သဘာဝဒဿနော မုနိ။
စန္ဒူပမော မဟာဝီရော၊ သော မေ ဗုဒ္ဓေါ နိမန္တိတော။
၂၅၆။
‘‘ဗုဒ္ဓေါ သမုဿိတော လောကေ၊ လက္ခဏေဟိ အလင်္ကတော။
အပ္ပမေယျော မဟာဝီရော၊ သော မေ ဗုဒ္ဓေါ နိမန္တိတော။
၂၅၇။
‘‘ယဿ ဉာဏံ အပ္ပမေယျံ၊ သီလံ ယဿ အနူပမံ။
ဝိမုတ္တိ အသဒိသာ ယဿ၊ သော မေ ဗုဒ္ဓေါ နိမန္တိတော။
၂၅၈။
‘‘ယဿ ဓီတိ အသဒိသာ၊ ထာမော ယဿ အစိန္တိယော။
ယဿ ပရက္ကမော ဇေဋ္ဌော၊ သော မေ ဗုဒ္ဓေါ နိမန္တိတော။
၂၅၉။
‘‘ရာဂေါ ဒေါသော စ မောဟော စ၊ ဝိသာ သဗ္ဗေ သမူဟတာ။
အဂဒူပမော မဟာဝီရော၊ သော မေ ဗုဒ္ဓေါ နိမန္တိတော။
၂၆၀။
‘‘က္လေသဗျာဓိဗဟုဒုက္ခ သဗ္ဗတမဝိနောဒနော [ဝိနောဒကော (သီ။ သျာ။)]။
ဝေဇ္ဇူပမော မဟာဝီရော၊ သော မေ ဗုဒ္ဓေါ နိမန္တိတော။
၂၆၁။
‘‘ဗုဒ္ဓေါတိ ဘော ယံ ဝဒေသိ၊ ဃောသောပေသော သုဒုလ္လဘော။
ဗုဒ္ဓေါ ဗုဒ္ဓေါတိ သုတွာန၊ ဣတိ မေ ဥဒပဇ္ဇထ။
၂၆၂။
‘‘အဗ္ဘန္တရံ အဂဏှန္တံ၊ ဣတိ မေ ဗဟိ နိစ္ဆရေ။
သောဟံ ဣတိမနော သန္တော၊ ဣဒံ ဝစနမဗြဝိံ။
၂၆၃။
‘‘‘ကဟံ နု ခေါ သော ဘဂဝါ၊ လောကဇေဋ္ဌော နရာသဘော။
တတ္ထ ဂန္တွာ နမဿိဿံ၊ သာမညဖလဒါယကံ’။
၂၆၄။
‘‘‘ပဂ္ဂယှ ဒက္ခိဏံ ဗာဟုံ၊ ဝေဒဇာတော ကတဉ္ဇလီ။
အာစိက္ခိ မေ ဓမ္မရာဇံ၊ သောကသလ္လဝိနောဒနံ။
၂၆၅။
‘‘‘ဥဒေန္တံဝ မဟာမေဃံ၊ နီလံ အဉ္ဇနသန္နိဘံ။
သာဂရံ ဝိယ ဒိဿန္တံ၊ ပဿသေတံ မဟာဝနံ။
၂၆၆။
‘‘‘ဧတ္ထ သော ဝသတေ ဗုဒ္ဓေါ၊ အဒန္တဒမကော မုနိ။
ဝိနယန္တော စ ဝေနေယျေ၊ ဗောဓေန္တော ဗောဓိပက္ခိယေ။
၂၆၇။
‘‘‘ပိပါသိတောဝ ဥဒကံ၊ ဘောဇနံဝ ဇိဃစ္ဆိတော။
ဂါဝီ ယထာ ဝစ္ဆဂိဒ္ဓါ၊ ဧဝါဟံ ဝိစိနိံ ဇိနံ။
၂၆၈။
‘‘‘အာစာရဥပစာရညူ၊ ဓမ္မာနုစ္ဆဝိသံဝရံ။
သိက္ခာပေမိ သကေ သိဿေ၊ ဂစ္ဆန္တေ ဇိနသန္တိကံ။
၂၆၉။
‘‘‘ဒုရာသဒါ ဘဂဝန္တော၊ သီဟာဝ ဧကစာရိနော။
ပဒေ ပဒံ နိက္ခိပန္တာ၊ အာဂစ္ဆေယျာထ မာဏဝါ။
၂၇၀။
‘‘‘အာသီဝိသော ယထာ ဃောရော၊ မိဂရာဇာဝ ကေသရီ။
မတ္တောဝ ကုဉ္ဇရော ဒန္တီ၊ ဧဝံ ဗုဒ္ဓါ ဒုရာသဒါ။
၂၇၁။
‘‘‘ဥက္ကာသိတဉ္စ ခိပိတံ၊ အဇ္ဈုပေက္ခိယ မာဏဝါ။
ပဒေ ပဒံ နိက္ခိပန္တာ၊ ဥပေထ ဗုဒ္ဓသန္တိကံ။
၂၇၂။
‘‘‘ပဋိသလ္လာနဂရုကာ၊ အပ္ပသဒ္ဒါ ဒုရာသဒါ။
ဒုရူပသင်္ကမာ ဗုဒ္ဓါ၊ ဂရူ ဟောန္တိ သဒေဝကေ။
၂၇၃။
‘‘‘ယဒါဟံ ပဉ္ဟံ ပုစ္ဆာမိ၊ ပဋိသမ္မောဒယာမိ ဝါ။
အပ္ပသဒ္ဒါ တဒါ ဟောထ၊ မုနိဘူတာဝ တိဋ္ဌထ။
၂၇၄။
‘‘‘ယံ သော ဒေသေတိ သမ္ဗုဒ္ဓေါ [သဒ္ဓမ္မံ (သီ။ သျာ။)]၊ ခေမံ နိဗ္ဗာနပတ္တိယာ။
တမေဝတ္ထံ နိသာမေထ၊ သဒ္ဓမ္မသဝနံ သုခံ’။
၂၇၅။
‘‘ဥပသင်္ကမ္မ သမ္ဗုဒ္ဓံ၊ သမ္မောဒိံ မုနိနာ အဟံ။
တံ ကထံ ဝီတိသာရေတွာ၊ လက္ခဏေ ဥပဓါရယိံ။
၂၇၆။
‘‘လက္ခဏေ ဒွေ စ ကင်္ခါမိ၊ ပဿာမိ တိံသလက္ခဏေ။
ကောသောဟိတဝတ္ထဂုယှံ၊ ဣဒ္ဓိယာ ဒဿယီ မုနိ။
၂၇၇။
‘‘ဇိဝှံ နိန္နာမယိတွာန၊ ကဏ္ဏသောတေ စ နာသိကေ။
ပဋိမသိ နလာဋန္တံ၊ ကေဝလံ ဆာဒယီ ဇိနော။
၂၇၈။
‘‘တဿာဟံ လက္ခဏေ ဒိသွာ၊ ပရိပုဏ္ဏေ သဗျဉ္ဇနေ။
ဗုဒ္ဓေါတိ နိဋ္ဌံ ဂန္တွာန၊ သဟ သိဿေဟိ ပဗ္ဗဇိံ။
၂၇၉။
‘‘သတေဟိ တီဟိ သဟိတော၊ ပဗ္ဗဇိံ အနဂါရိယံ။
အဒ္ဓမာသေ အသမ္ပတ္တေ၊ သဗ္ဗေ ပတ္တာမှ နိဗ္ဗုတိံ။
၂၈၀။
‘‘ဧကတော ကမ္မံ ကတွာန၊ ပုညက္ခေတ္တေ အနုတ္တရေ။
ဧကတော သံသရိတွာန၊ ဧကတော ဝိနိဝတ္တယုံ။
၂၈၁။
‘‘ဂေါပါနသိယော ဒတွာန၊ ပူဂဓမ္မေ ဝသိံ အဟံ။
တေန ကမ္မေန သုကတေန၊ အဋ္ဌ ဟေတူ လဘာမဟံ။
၂၈၂။
‘‘ဒိသာသု ပူဇိတော ဟောမိ၊ ဘောဂါ စ အမိတာ မမ။
ပတိဋ္ဌာ ဟောမိ သဗ္ဗေသံ၊ တာသော မမ န ဝိဇ္ဇတိ။
၂၈၃။
‘‘ဗျာဓယော မေ န ဝိဇ္ဇန္တိ၊ ဒီဃာယုံ ပါလယာမိ စ။
သုခုမစ္ဆဝိကော ဟောမိ၊ အာဝါသေ ပတ္ထိတေ ဝသေ [အာဝါသေ ပတ္တေ ဝဿေ (သျာ။)၊ အာဝါသေဝ ဌိတေ ဝသေ (က။)]။
၂၈၄။
‘‘အဋ္ဌ ဂေါပါနသီ ဒတွာ၊ ပူဂဓမ္မေ ဝသိံ အဟံ။
ပဋိသမ္ဘိဒါရဟတ္တဉ္စ၊ ဧတံ မေ အပရဋ္ဌမံ။
၂၈၅။
‘‘သဗ္ဗဝေါသိတဝေါသာနော၊ ကတကိစ္စော အနာသဝေါ။
အဋ္ဌဂေါပါနသီ နာမ၊ တဝ ပုတ္တော မဟာမုနိ။
၂၈၆။
‘‘ပဉ္စ ထမ္ဘာနိ ဒတွာန၊ ပူဂဓမ္မေ ဝသိံ အဟံ။
တေန ကမ္မေန သုကတေန၊ ပဉ္စ ဟေတူ လဘာမဟံ။
၂၈၇။
‘‘အစလော ဟောမိ မေတ္တာယ၊ အနူနင်္ဂေါ ဘဝါမဟံ။
အာဒေယျဝစနော ဟောမိ၊ န ဓံသေမိ ယထာ အဟံ။
၂၈၈။
‘‘အဘန္တံ ဟောတိ မေ စိတ္တံ၊ အခိလော ဟောမိ ကဿစိ။
တေန ကမ္မေန သုကတေန၊ ဝိမလော ဟောမိ သာသနေ။
၂၈၉။
‘‘သဂါရဝေါ သပ္ပတိဿော၊ ကတကိစ္စော အနာသဝေါ။
သာဝကော တေ မဟာဝီရ၊ ဘိက္ခု တံ ဝန္ဒတေ မုနိ။
၂၉၀။
‘‘ကတွာ သုကတပလ္လင်္ကံ၊ သာလာယံ ပညပေသဟံ။
တေန ကမ္မေန သုကတေန၊ ပဉ္စ ဟေတူ လဘာမဟံ။
၂၉၁။
‘‘ဥစ္စေ ကုလေ ပဇာယိတွာ၊ မဟာဘောဂေါ ဘဝါမဟံ။
သဗ္ဗသမ္ပတ္တိကော ဟောမိ၊ မစ္ဆေရံ မေ န ဝိဇ္ဇတိ။
၂၉၂။
‘‘ဂမနေ ပတ္ထိတေ မယှံ၊ ပလ္လင္ကော ဥပတိဋ္ဌတိ။
သဟ ပလ္လင်္ကသေဋ္ဌေန၊ ဂစ္ဆာမိ မမ ပတ္ထိတံ။
၂၉၃။
‘‘တေန ပလ္လင်္ကဒါနေန၊ တမံ သဗ္ဗံ ဝိနောဒယိံ။
သဗ္ဗာဘိညာဗလပ္ပတ္တော၊ ထေရော [သေလော (?)] ဝန္ဒတိ တံ မုနိ။
၂၉၄။
‘‘ပရကိစ္စတ္တကိစ္စာနိ၊ သဗ္ဗကိစ္စာနိ သာဓယိံ။
တေန ကမ္မေန သုကတေန၊ ပါဝိသိံ အဘယံ ပုရံ။
၂၉၅။
‘‘ပရိနိဋ္ဌိတသာလမှိ၊ ပရိဘောဂမဒါသဟံ။
တေန ကမ္မေန သုကတေန၊ သေဋ္ဌတ္တံ အဇ္ဈုပါဂတော။
၂၉၆။
‘‘ယေ ကေစိ ဒမကာ လောကေ၊ ဟတ္ထိအဿေ ဒမေန္တိ ယေ။
ကရိတွာ ကာရဏာ နာနာ၊ ဒါရုဏေန ဒမေန္တိ တေ။
၂၉၇။
‘‘န ဟေဝံ တွံ မဟာဝီရ၊ ဒမေသိ နရနာရိယော။
အဒဏ္ဍေန အသတ္ထေန၊ ဒမေသိ ဥတ္တမေ ဒမေ။
၂၉၈။
‘‘ဒါနဿ ဝဏ္ဏေ ကိတ္တေန္တော၊ ဒေသနာကုသလော မုနိ။
ဧကပဉ္ဟံ ကထေန္တောဝ၊ ဗောဓေသိ တိသတေ မုနိ။
၂၉၉။
‘‘ဒန္တာ မယံ သာရထိနာ၊ သုဝိမုတ္တာ အနာသဝါ။
သဗ္ဗာဘိညာဗလပတ္တာ၊ နိဗ္ဗုတာ ဥပဓိက္ခယေ။
၃၀၀။
‘‘သတသဟဿိတော ကပ္ပေ၊ ယံ ဒါနမဒဒိံ တဒါ။
အတိက္ကန္တာ ဘယာ သဗ္ဗေ၊ သာလာဒါနဿိဒံ ဖလံ။
၃၀၁။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၃၀၂။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၃၀၃။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သေလော သပရိသော ဘဂဝတော သန္တိကေ ဣမာ ဂါထာယော အဘာသိတ္ထာတိ။
သေလတ္ထေရဿာပဒါနံ ဒုတိယံ။
၃။ သဗ္ဗကိတ္တိကတ္ထေရအပဒါနံ
၃၀၄။
‘‘ကဏိကာရံဝ ဇလိတံ [ဇောတန္တံ (သီ။)]၊ ဒီပရုက္ခံဝ ဥဇ္ဇလံ [ဇောတိတံ (သျာ။)]။
ဩသဓိံဝ ဝိရောစန္တံ၊ ဝိဇ္ဇုတံ ဂဂနေ ယထာ။
၃၀၅။
‘‘အသမ္ဘီတံ အနုတ္တာသိံ၊ မိဂရာဇံဝ ကေသရိံ။
ဉာဏာလောကံ ပကာသေန္တံ၊ မဒ္ဒန္တံ တိတ္ထိယေ ဂဏေ။
၃၀၆။
‘‘ဥဒ္ဓရန္တံ ဣမံ လောကံ၊ ဆိဒ္ဒန္တံ သဗ္ဗသံသယံ။
ဂဇ္ဇန္တံ [အသမ္ဘီတံ (သျာ။)၊ ဂစ္ဆန္တံ (က။)] မိဂရာဇံဝ၊ အဒ္ဒသံ လောကနာယကံ။
၃၀၇။
‘‘ဇဋာဇိနဓရော အာသိံ၊ ဗြဟာ ဥဇု ပတာပဝါ။
ဝါကစီရံ ဂဟေတွာန၊ ပါဒမူလေ အပတ္ထရိံ။
၃၀၈။
‘‘ကာဠာနုသာရိယံ ဂယှ၊ အနုလိမ္ပိံ တထာဂတံ။
သမ္ဗုဒ္ဓမနုလိမ္ပေတွာ၊ သန္ထဝိံ လောကနာယကံ။
၃၀၉။
‘‘သမုဒ္ဓရသိမံ လောကံ၊ ဩဃတိဏ္ဏ [ဩဃတိဏ္ဏော (သျာ။ က။)] မဟာမုနိ။
ဉာဏာလောကေန ဇောတေသိ၊ နာဝဋံ [ပဝရံ (သျာ။)၊ ဝဇိရ (ဣ။)] ဉာဏမုတ္တမံ။
၃၁၀။
‘‘ဓမ္မစက္ကံ [တုဝံ စက္ကံ (က။)] ပဝတ္တေသိ၊ မဒ္ဒသေ ပရတိတ္ထိယေ။
ဥသဘော ဇိတသင်္ဂါမော၊ သမ္ပကမ္ပေသိ မေဒနိံ။
၃၁၁။
‘‘မဟာသမုဒ္ဒေ ဦမိယော၊ ဝေလန္တမှိ ပဘိဇ္ဇရေ။
တထေဝ တဝ ဉာဏမှိ၊ သဗ္ဗဒိဋ္ဌီ ပဘိဇ္ဇရေ။
၃၁၂။
‘‘သုခုမစ္ဆိကဇာလေန၊ သရမှိ သမ္ပတာနိတေ။
အန္တောဇာလိကတာ [ဇာလဂတာ (သီ။)] ပါဏာ၊ ဣဠိတာ ဟောန္တိ တာဝဒေ။
၃၁၃။
‘‘တထေဝ တိတ္ထိယာ လောကေ၊ ပုထုပါသဏ္ဍနိဿိတာ [မူဠ္ဟာ သစ္စဝိနိဿဋာ (သျာ။)၊ မုဋ္ဌသစ္စဝိနိဿဋာ (က။)]။
အန္တောဉာဏဝရေ တုယှံ၊ ပရိဝတ္တန္တိ မာရိသ။
၃၁၄။
‘‘ပတိဋ္ဌာ ဝုယှတံ ဩဃေ၊ တွဉှိ နာထော အဗန္ဓုနံ။
ဘယဋ္ဋိတာနံ သရဏံ၊ မုတ္တိတ္ထီနံ ပရာယဏံ။
၃၁၅။
‘‘ဧကဝီရော အသဒိသော၊ မေတ္တာကရုဏသဉ္စယော [သညုတော (သျာ။)]။
အသမော သုသမော သန္တော [သုသီလော အသမော သန္တော (သီ။)၊ ပညဝါ ယုတ္တစာဂေါ စ (သျာ။)]၊ ဝသီ တာဒီ ဇိတဉ္ဇယော။
၃၁၆။
‘‘ဓီရော ဝိဂတသမ္မောဟော၊ အနေဇော အကထံကထီ။
တုသိတော [ဝုသိတော (သီ။)] ဝန္တဒေါသောသိ၊ နိမ္မလော သံယတော သုစိ။
၃၁၇။
‘‘သင်္ဂါတိဂေါ ဟတမဒေါ [ဂတမဒေါ (သျာ။)၊ တမနုဒေါ (က။)]၊ တေဝိဇ္ဇော တိဘဝန္တဂေါ။
သီမာတိဂေါ ဓမ္မဂရု၊ ဂတတ္ထော ဟိတဝဗ္ဘုတော [ဟိတဝပ္ပထော (သီ။ သျာ။)]။
၃၁၈။
‘‘တာရကော တွံ ယထာ နာဝါ၊ နိဓီဝဿာသကာရကော။
အသမ္ဘီတော ယထာ သီဟော၊ ဂဇရာဇာဝ ဒပ္ပိတော။
၃၁၉။
‘‘ထောမေတွာ ဒသဂါထာဟိ၊ ပဒုမုတ္တရံ မဟာယသံ။
ဝန္ဒိတွာ သတ္ထုနော ပါဒေ၊ တုဏှီ အဋ္ဌာသဟံ တဒါ။
၃၂၀။
‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ။
၃၂၁။
‘‘‘ယော မေ သီလဉ္စ ဉာဏဉ္စ၊ သဒ္ဓမ္မဉ္စာပိ ဝဏ္ဏယိ [ဓမ္မဉ္စာပိ ပကိတ္တယိ (သီ။ သျာ။)]။
တမဟံ ကိတ္တယိဿာမိ၊ သုဏာထ မမ ဘာသတော။
၃၂၂။
‘‘‘သဋ္ဌိ ကပ္ပသဟဿာနိ၊ ဒေဝလောကေ ရမိဿတိ။
အညေ ဒေဝေဘိဘဝိတွာ၊ ဣဿရံ ကာရယိဿတိ။
၃၂၃။
‘‘‘သော ပစ္ဆာ ပဗ္ဗဇိတွာန၊ သုက္ကမူလေန စောဒိတော။
ဂေါတမဿ ဘဂဝတော၊ သာသနေ ပဗ္ဗဇိဿတိ။
၃၂၄။
‘‘‘ပဗ္ဗဇိတွာန ကာယေန၊ ပါပကမ္မံ ဝိဝဇ္ဇိယ။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’။
၃၂၅။
‘‘ယထာပိ မေဃော ထနယံ၊ တပ္ပေတိ မေဒိနိံ ဣမံ။
တထေဝ တွံ မဟာဝီရ၊ ဓမ္မေန တပ္ပယီ မမံ။
၃၂၆။
‘‘သီလံ ပညဉ္စ ဓမ္မဉ္စ၊ ထဝိတွာ လောကနာယကံ။
ပတ္တောမှိ ပရမံ သန္တိံ၊ နိဗ္ဗာနံ ပဒမစ္စုတံ။
၃၂၇။
‘‘အဟော နူန သ ဘဂဝါ၊ စိရံ တိဋ္ဌေယျ စက္ခုမာ။
အညာတဉ္စ ဝိဇာနေယျုံ၊ ဖုသေယျုံ [အညာတဉ္စာပိ ဇာနေယျ၊ ပဿေယျ (က။)] အမတံ ပဒံ။
၃၂၈။
‘‘အယံ မေ ပစ္ဆိမာ ဇာတိ၊ ဘဝါ သဗ္ဗေ သမူဟတာ။
သဗ္ဗာသဝေ ပရိညာယ၊ ဝိဟရာမိ အနာသဝေါ။
၃၂၉။
‘‘သတသဟဿိတော ကပ္ပေ၊ ယံ ဗုဒ္ဓမဘိထောမယိံ
ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ။
၃၃၀။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
၃၃၁။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၃၃၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သဗ္ဗကိတ္တိကော ထေရော ဣမာ ဂါထာယော အဘာသိတ္ထာတိ။
သဗ္ဗကိတ္တိကတ္ထေရဿာပဒါနံ တတိယံ။
၄။ မဓုဒါယကတ္ထေရအပဒါနံ
၃၃၃။
‘‘သိန္ဓုယာ နဒိယာ တီရေ၊ သုကတော အဿမော မမ။
တတ္ထ ဝါစေမဟံ သိဿေ၊ ဣတိဟာသံ သလက္ခဏံ။
၃၃၄။
‘‘ဓမ္မကာမာ ဝိနီတာ တေ၊ သောတုကာမာ သုသာသနံ။
ဆဠင်္ဂေ ပါရမိပ္ပတ္တာ၊ သိန္ဓုကူလေ ဝသန္တိ တေ။
၃၃၅။
‘‘ဥပ္ပါတဂမနေ စေဝ၊ လက္ခဏေသု စ ကောဝိဒါ။
ဥတ္တမတ္ထံ ဂဝေသန္တာ၊ ဝသန္တိ ဝိပိနေ တဒါ။
၃၃၆။
‘‘သုမေဓေါ နာမ သမ္ဗုဒ္ဓေါ၊ လောကေ ဥပ္ပဇ္ဇိ တာဝဒေ။
အမှာကံ အနုကမ္ပန္တော၊ ဥပါဂစ္ဆိ ဝိနာယကော။
၃၃၇။
‘‘ဥပါဂတံ မဟာဝီရံ၊ သုမေဓံ လောကနာယကံ။
တိဏသန္ထာရကံ ကတွာ၊ လောကဇေဋ္ဌဿဒါသဟံ။
၃၃၈။
‘‘ဝိပိနာတော မဓုံ ဂယှ၊ ဗုဒ္ဓသေဋ္ဌဿဒါသဟံ။
သမ္ဗုဒ္ဓေါ ပရိဘုဉ္ဇိတွာ၊ ဣဒံ ဝစနမဗြဝိ။
၃၃၉။
‘‘‘ယော တံ အဒါသိ မဓုံ မေ၊ ပသန္နော သေဟိ ပါဏိဘိ။
တမဟံ ကိတ္တယိဿာမိ၊ သုဏာထ မမ ဘာသတော။
၃၄၀။
‘‘‘ဣမိနာ မဓုဒါနေန၊ တိဏသန္ထာရကေန စ။
တိံသ ကပ္ပသဟဿာနိ၊ ဒေဝလောကေ ရမိဿတိ။
၃၄၁။
‘‘‘တိံသ ကပ္ပသဟဿမှိ၊ ဩက္ကာကကုလသမ္ဘဝေါ။
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
၃၄၂။
‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။
၃၄၃။
‘‘‘ဒေဝလောကာ ဣဓါဂန္တွာ၊ မာတုကုစ္ဆိံ ဥပါဂတေ။
မဓုဝဿံ ပဝဿိတ္ထ၊ ဆာဒယံ မဓုနာ မဟိံ’။
၃၄၄။
‘‘မယိ နိက္ခန္တမတ္တမှိ၊ ကုစ္ဆိယာ စ သုဒုတ္တရာ။
တတြာပိ မဓုဝဿံ မေ၊ ဝဿတေ နိစ္စကာလိကံ။
၃၄၅။
‘‘အဂါရာ အဘိနိက္ခမ္မ၊ ပဗ္ဗဇိံ အနဂါရိယံ။
လာဘီ အန္နဿ ပါနဿ၊ မဓုဒါနဿိဒံ ဖလံ။
၃၄၆။
‘‘သဗ္ဗကာမသမိဒ္ဓေါဟံ၊ ဘဝိတွာ ဒေဝမာနုသေ။
တေနေဝ မဓုဒါနေန၊ ပတ္တောမှိ အာသဝက္ခယံ။
၃၄၇။
‘‘ဝုဋ္ဌမှိ ဒေဝေ စတုရင်္ဂုလေ တိဏေ၊ သမ္ပုပ္ဖိတေ [သုပုပ္ဖိတေ (သျာ။)] ဓရဏီရုဟေ သဉ္ဆန္နေ [ဝပ္ပဒေသေ (သျာ။)]။
သုညေ ဃရေ မဏ္ဍပရုက္ခမူလကေ၊ ဝသာမိ နိစ္စံ သုခိတော အနာသဝေါ။
၃၄၈။
‘‘မဇ္ဈေ မဟန္တေ ဟီနေ စ [မဇ္ဈေ မယှံ ဘဝါ အဿု (သျာ။ ဣ။ က။)]၊ ဘဝေ သဗ္ဗေ အတိက္ကမိံ [ယေ ဘဝေ သမတိက္ကမိံ (သျာ။ က။)၊ ယော ဘဝေသု ပကိတ္တယိ (က။)]။
အဇ္ဇ မေ အာသဝါ ခီဏာ၊ နတ္ထိ ဒါနိ ပုနဗ္ဘဝေါ။
၃၄၉။
‘‘တိံသကပ္ပသဟဿမှိ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ မဓုဒါနဿိဒံ ဖလံ။
၃၅၀။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
၃၅၁။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၃၅၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ မဓုဒါယကော ထေရော ဣမာ ဂါထာယော အဘာသိတ္ထာတိ။
မဓုဒါယကတ္ထေရဿာပဒါနံ စတုတ္ထံ။
၅။ ပဒုမကူဋာဂါရိယတ္ထေရအပဒါနံ
၃၅၃။
‘‘ပိယဒဿီ နာမ ဘဂဝါ၊ သယမ္ဘူ လောကနာယကော။
ဝိဝေကကာမော သမ္ဗုဒ္ဓေါ၊ သမာဓိကုသလော မုနိ။
၃၅၄။
‘‘ဝနသဏ္ဍံ သမောဂယှ၊ ပိယဒဿီ မဟာမုနိ။
ပံသုကူလံ ပတ္ထရိတွာ၊ နိသီဒိ ပုရိသုတ္တမော။
၃၅၅။
‘‘မိဂလုဒ္ဒေါ ပုရေ အာသိံ၊ အရညေ [ဝိပိနေ (သီ။)၊ ဣရိနေ (သျာ။ က။)] ကာနနေ အဟံ။
ပသဒံ မိဂမေသန္တော၊ အာဟိဏ္ဍာမိ အဟံ တဒါ။
၃၅၆။
‘‘တတ္ထဒ္ဒသာသိံ သမ္ဗုဒ္ဓံ၊ ဩဃတိဏ္ဏမနာသဝံ။
ပုပ္ဖိတံ သာလရာဇံဝ၊ သတရံသိံဝ ဥဂ္ဂတံ။
၃၅၇။
‘‘ဒိသွာနဟံ ဒေဝဒေဝံ၊ ပိယဒသ္သိံ မဟာယသံ။
ဇာတဿရံ သမောဂယှ၊ ပဒုမံ အာဟရိံ တဒါ။
၃၅၈။
‘‘အာဟရိတွာန ပဒုမံ၊ သတပတ္တံ မနောရမံ။
ကူဋာဂါရံ ကရိတွာန၊ ဆာဒယိံ ပဒုမေနဟံ။
၃၅၉။
‘‘အနုကမ္ပကော ကာရုဏိကော၊ ပိယဒဿီ မဟာမုနိ။
သတ္တရတ္တိန္ဒိဝံ ဗုဒ္ဓေါ၊ ကူဋာဂါရေ ဝသီ ဇိနော။
၃၆၀။
‘‘ပုရာဏံ ဆဍ္ဍယိတွာန၊ နဝေန ဆာဒယိံ အဟံ။
အဉ္ဇလိံ ပဂ္ဂဟေတွာန၊ အဋ္ဌာသိံ တာဝဒေ အဟံ။
၃၆၁။
‘‘ဝုဋ္ဌဟိတွာ သမာဓိမှာ၊ ပိယဒဿီ မဟာမုနိ။
ဒိသံ အနုဝိလောကေန္တော၊ နိသီဒိ လောကနာယကော။
၃၆၂။
‘‘တဒါ သုဒဿနော နာမ၊ ဥပဋ္ဌာကော မဟိဒ္ဓိကော။
စိတ္တမညာယ ဗုဒ္ဓဿ၊ ပိယဒဿိဿ သတ္ထုနော။
၃၆၃။
‘‘အသီတိယာ သဟဿေဟိ၊ ဘိက္ခူဟိ ပရိဝါရိတော။
ဝနန္တေ သုခမာသီနံ၊ ဥပေသိ လောကနာယကံ။
၃၆၄။
‘‘ယာဝတာ ဝနသဏ္ဍမှိ၊ အဓိဝတ္ထာ စ ဒေဝတာ။
ဗုဒ္ဓဿ စိတ္တမညာယ၊ သဗ္ဗေ သန္နိပတုံ တဒါ။
၃၆၅။
‘‘သမာဂတေသု ယက္ခေသု၊ ကုမ္ဘဏ္ဍေ သဟရက္ခသေ။
ဘိက္ခုသံဃေ စ သမ္ပတ္တေ၊ ဂါထာ ပဗျာဟရီ [သဗျာဟရီ (သျာ။)၊ မာဗျာဟရီ (သီ။)] ဇိနော။
၃၆၆။
‘‘‘ယော မံ သတ္တာဟံ ပူဇေသိ၊ အာဝါသဉ္စ အကာသိ မေ။
တမဟံ ကိတ္တယိဿာမိ၊ သုဏာထ မမ ဘာသတော။
၃၆၇။
‘‘‘သုဒုဒ္ဒသံ သုနိပုဏံ၊ ဂမ္ဘီရံ သုပ္ပကာသိတံ။
ဉာဏေန ကိတ္တယိဿာမိ၊ သုဏာထ မမ ဘာသတော။
၃၆၈။
‘‘‘စတုဒ္ဒသာနိ ကပ္ပါနိ၊ ဒေဝရဇ္ဇံ ကရိဿတိ။
ကူဋာဂါရံ မဟန္တဿ [ဗြဟံ တဿ (သီ။ သျာ။)]၊ ပဒ္မပုပ္ဖေဟိ ဆာဒိတံ။
၃၆၉။
‘‘‘အာကာသေ ဓါရယိဿတိ၊ ပုပ္ဖကမ္မဿိဒံ [ပုဗ္ဗကမ္မဿိဒံ (သျာ။)] ဖလံ။
စတုဗ္ဗီသေ [စတုဒ္ဒသေ (သျာ။)] ကပ္ပသတေ၊ ဝေါကိဏ္ဏံ သံသရိဿတိ။
၃၇၀။
‘‘‘တတ္ထ ပုပ္ဖမယံ ဗျမှံ၊ အာကာသေ ဓါရယိဿတိ။
ယထာ ပဒုမပတ္တမှိ၊ တောယံ န ဥပလိမ္ပတိ။
၃၇၁။
‘‘‘တထေဝီမဿ ဉာဏမှိ၊ ကိလေသာ နောပလိမ္ပရေ။
မနသာ ဝိနိဝဋ္ဋေတွာ၊ ပဉ္စ နီဝရဏေ အယံ။
၃၇၂။
‘‘‘စိတ္တံ ဇနေတွာ နေက္ခမ္မေ၊ အဂါရာ ပဗ္ဗဇိဿတိ။
တတော ပုပ္ဖမယေ ဗျမှေ၊ ဓါရေန္တေ [ပုပ္ဖမယံ ဗျမှံ၊ ဓါရေန္တံ (သျာ။ က။)] နိက္ခမိဿတိ။
၃၇၃။
‘‘‘ရုက္ခမူလေ ဝသန္တဿ၊ နိပကဿ သတီမတော။
တတ္ထ ပုပ္ဖမယံ ဗျမှံ၊ မတ္ထကေ ဓါရယိဿတိ။
၃၇၄။
‘‘‘စီဝရံ ပိဏ္ဍပါတဉ္စ၊ ပစ္စယံ သယနာသနံ။
ဒတွာန ဘိက္ခုသံဃဿ၊ နိဗ္ဗာယိဿတိနာသဝေါ’။
၃၇၅။
‘‘ကူဋာဂါရေန စရတာ [စရဏာ (သီ။ ဣ။ က။)၊ စရိတေ (သျာ။)]၊ ပဗ္ဗဇ္ဇံ အဘိနိက္ခမိံ။
ရုက္ခမူလေ ဝသန္တမ္ပိ [ဝသန္တမှိ (သီ။)၊ ဝသတောပိ (?)]၊ ကူဋာဂါရံ ဓရီယတိ။
၃၇၆။
‘‘စီဝရေ ပိဏ္ဍပါတေ စ၊ စေတနာ မေ န ဝိဇ္ဇတိ။
ပုညကမ္မေန သံယုတ္တော၊ လဘာမိ ပရိနိဋ္ဌိတံ။
၃၇၇။
‘‘ဂဏနာတော အသင်္ခေယျာ၊ ကပ္ပကောဋီ ဗဟူ မမ။
ရိတ္တကာ တေ အတိက္ကန္တာ၊ ပမုတ္တာ လောကနာယကာ။
၃၇၈။
‘‘အဋ္ဌာရသေ ကပ္ပသတေ၊ ပိယဒဿီ ဝိနာယကော။
တမဟံ ပယိရုပါသိတွာ၊ ဣမံ ယောနိံ ဥပါဂတော။
၃၇၉။
‘‘ဣဓ ပဿာမိ [ဣဓဒ္ဒသာသိံ (သီ။)] သမ္ဗုဒ္ဓံ၊ အနောမံ နာမ စက္ခုမံ။
တမဟံ ဥပဂန္တွာန၊ ပဗ္ဗဇိံ အနဂါရိယံ။
၃၈၀။
‘‘ဒုက္ခဿန္တကရော ဗုဒ္ဓေါ၊ မဂ္ဂံ မေ ဒေသယီ ဇိနော။
တဿ ဓမ္မံ သုဏိတွာန၊ ပတ္တောမှိ အစလံ ပဒံ။
၃၈၁။
‘‘တောသယိတွာန သမ္ဗုဒ္ဓံ၊ ဂေါတမံ သကျပုင်္ဂဝံ။
သဗ္ဗာသဝေ ပရိညာယ၊ ဝိဟရာမိ အနာသဝေါ။
၃၈၂။
‘‘အဋ္ဌာရသေ ကပ္ပသတေ၊ ယံ ဗုဒ္ဓမဘိပူဇယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၃၈၃။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
၃၈၄။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၃၈၅။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပဒုမကူဋာဂါရိယော ထေရော ဣမာ ဂါထာယော အဘာသိတ္ထာတိ။
ပဒုမကူဋာဂါရိယတ္ထေရဿာပဒါနံ ပဉ္စမံ။
၆။ ဗာကုလတ္ထေရအပဒါနံ
၃၈၆။
‘‘ဟိမဝန္တဿာဝိဒူရေ ၊ သောဘိတော နာမ ပဗ္ဗတော။
အဿမော သုကတော မယှံ၊ သကသိဿေဟိ မာပိတော။
၃၈၇။
‘‘မဏ္ဍပါ စ ဗဟူ တတ္ထ၊ ပုပ္ဖိတာ သိန္ဒုဝါရကာ။
ကပိတ္ထာ စ ဗဟူ တတ္ထ၊ ပုပ္ဖိတာ ဇီဝဇီဝကာ [စမ္ပကာ နာဂကေတကာ (သျာ။)]။
၃၈၈။
‘‘နိဂ္ဂုဏ္ဍိယော ဗဟူ တတ္ထ၊ ဗဒရာမလကာနိ စ။
ဖာရုသကာ အလာဗူ စ၊ ပုဏ္ဍရီကာ စ ပုပ္ဖိတာ။
၃၈၉။
‘‘အာဠကာ [အဠက္ကာ (သျာ။)] ဗေလုဝါ တတ္ထ၊ ကဒလီ မာတုလုင်္ဂကာ။
မဟာနာမာ ဗဟူ တတ္ထ၊ အဇ္ဇုနာ စ ပိယင်္ဂုကာ။
၃၉၀။
‘‘ကောသမ္ဗာ သဠလာ နိမ္ဗာ [နီပါ (သီ။)]၊ နိဂြောဓါ စ ကပိတ္ထနာ။
ဧဒိသော အဿမော မယှံ၊ သသိဿောဟံ တဟိံ ဝသိံ။
၃၉၁။
‘‘အနောမဒဿီ ဘဂဝါ၊ သယမ္ဘူ လောကနာယကော။
ဂဝေသံ ပဋိသလ္လာနံ၊ မမဿမမုပါဂမိ။
၃၉၂။
‘‘ဥပေတမှိ မဟာဝီရေ၊ အနောမဒဿိမဟာယသေ။
ခဏေန လောကနာထဿ၊ ဝါတာဗာဓေါ သမုဋ္ဌဟိ။
၃၉၃။
‘‘ဝိစရန္တော အရညမှိ၊ အဒ္ဒသံ လောကနာယကံ။
ဥပဂန္တွာန သမ္ဗုဒ္ဓံ၊ စက္ခုမန္တံ မဟာယသံ။
၃၉၄။
‘‘ဣရိယဉ္စာပိ ဒိသွာန၊ ဥပလက္ခေသဟံ တဒါ။
အသံသယဉှိ ဗုဒ္ဓဿ၊ ဗျာဓိ နော ဥဒပဇ္ဇထ။
၃၉၅။
‘‘ခိပ္ပံ အဿမမာဂဉ္ဆိံ၊ မမ သိဿာန သန္တိကေ။
ဘေသဇ္ဇံ ကတ္တုကာမောဟံ၊ သိဿေ အာမန္တယိံ တဒါ။
၃၉၆။
‘‘ပဋိဿုဏိတွာန မေ ဝါက္ယံ၊ သိဿာ သဗ္ဗေ သဂါရဝါ။
ဧကဇ္ဈံ သန္နိပတိံသု၊ သတ္ထုဂါရဝတာ မမ။
၃၉၇။
‘‘ခိပ္ပံ ပဗ္ဗတမာရုယှ၊ သဗ္ဗောသဓမဟာသဟံ [မကာသဟံ (သျာ။ က။)]။
ပါနီယယောဂံ [ပါနီယယောဂ္ဂံ (သီ။)] ကတွာန၊ ဗုဒ္ဓသေဋ္ဌဿဒါသဟံ။
၃၉၈။
‘‘ပရိဘုတ္တေ မဟာဝီရေ၊ သဗ္ဗညုလောကနာယကေ။
ခိပ္ပံ ဝါတော ဝူပသမိ၊ သုဂတဿ မဟေသိနော။
၃၉၉။
‘‘ပဿဒ္ဓံ ဒရထံ ဒိသွာ၊ အနောမဒဿီ မဟာယသော။
သကာသနေ နိသီဒိတွာ၊ ဣမာ ဂါထာ အဘာသထ။
၄၀၀။
‘‘‘ယော မေ ပါဒါသိ ဘေသဇ္ဇံ၊ ဗျာဓိဉ္စ သမယီ မမ။
တမဟံ ကိတ္တယိဿာမိ၊ သုဏာထ မမ ဘာသတော။
၄၀၁။
‘‘‘ကပ္ပသတသဟဿာနိ၊ ဒေဝလောကေ ရမိဿတိ။
ဝါဒိတေ တူရိယေ တတ္ထ၊ မောဒိဿတိ သဒါ အယံ။
၄၀၂။
‘‘‘မနုဿလောကမာဂန္တွာ၊ သုက္ကမူလေန စောဒိတော။
သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
၄၀၃။
‘‘‘ပဉ္စပညာသကပ္ပမှိ၊ အနောမော နာမ ခတ္တိယော။
စာတုရန္တော ဝိဇိတာဝီ၊ ဇမ္ဗုမဏ္ဍဿ [ဇမ္ဗုဒီပဿ (သျာ။)] ဣဿရော။
၄၀၄။
‘‘‘သတ္တရတနသမ္ပန္နော၊ စက္ကဝတ္တီ မဟဗ္ဗလော။
တာဝတိံသေပိ ခေါဘေတွာ၊ ဣဿရံ ကာရယိဿတိ။
၄၀၅။
‘‘‘ဒေဝဘူတော မနုဿော ဝါ၊ အပ္ပါဗာဓေါ ဘဝိဿတိ။
ပရိဂ္ဂဟံ ဝိဝဇ္ဇေတွာ၊ ဗျာဓိံ လောကေ တရိဿတိ။
၄၀၆။
‘‘‘အပ္ပရိမေယျေ ဣတော ကပ္ပေ၊ ဩက္ကာကကုလသမ္ဘဝေါ။
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
၄၀၇။
‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။
၄၀၈။
‘‘‘ကိလေသေ ဈာပယိတွာန၊ တဏှာသောတံ တရိဿတိ။
ဗာကုလော [ဗက္ကုလော (သီ။ သျာ။)] နာမ နာမေန၊ ဟေဿတိ သတ္ထု သာဝကော။
၄၀၉။
‘‘‘ဣဒံ သဗ္ဗံ အဘိညာယ၊ ဂေါတမော သကျပုင်္ဂဝေါ။
ဘိက္ခုသံဃေ နိသီဒိတွာ၊ ဧတဒဂ္ဂေ ဌပေဿတိ’။
၄၁၀။
‘‘အနောမဒဿီ ဘဂဝါ၊ သယမ္ဘူ လောကနာယကော။
ဝိဝေကာနုဝိလောကေန္တော၊ မမဿမမုပါဂမိ။
၄၁၁။
‘‘ဥပါဂတံ မဟာဝီရံ၊ သဗ္ဗညုံ လောကနာယကံ။
သဗ္ဗောသဓေန တပ္ပေသိံ၊ ပသန္နော သေဟိ ပါဏိဘိ။
၄၁၂။
‘‘တဿ မေ သုကတံ ကမ္မံ၊ သုခေတ္တေ ဗီဇသမ္ပဒါ။
ခေပေတုံ နေဝ သက္ကောမိ၊ တဒါ ဟိ သုကတံ မမ။
၄၁၃။
‘‘လာဘာ မမ သုလဒ္ဓံ မေ၊ ယောဟံ အဒ္ဒက္ခိ နာယကံ။
တေန ကမ္မာဝသေသေန၊ ပတ္တောမှိ အစလံ ပဒံ။
၄၁၄။
‘‘သဗ္ဗမေတံ အဘိညာယ၊ ဂေါတမော သကျပုင်္ဂဝေါ။
ဘိက္ခုသံဃေ နိသီဒိတွာ၊ ဧတဒဂ္ဂေ ဌပေသိ မံ။
၄၁၅။
‘‘အပရိမေယျေ ဣတော ကပ္ပေ၊ ယံ ကမ္မမကရိံ တဒါ။
ဒုဂ္ဂတိံ နာဘိဇာနာမိ၊ ဘေသဇ္ဇဿ ဣဒံ ဖလံ။
၄၁၆။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
၄၁၇။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၄၁၈။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဗာကုလော [ဗက္ကုလော (သီ။ သျာ။)] ထေရော ဣမာ ဂါထာယော အဘာသိတ္ထာတိ။
ဗာကုလတ္ထေရဿာပဒါနံ ဆဋ္ဌံ။
၇။ ဂိရိမာနန္ဒတ္ထေရအပဒါနံ
၄၁၉။
‘‘ဘရိယာ မေ ကာလင်္ကတာ၊ ပုတ္တော သီဝထိကံ ဂတော။
မာတာ ပိတာ မတာ ဘာတာ၊ ဧကစိတမှိ [မာတာ ပိတာ စ ဘာတာ စ၊ ဧကစိတကမှိ (သီ။ သျာ။)] ဍယှရေ။
၄၂၀။
‘‘တေန သောကေန သန္တတ္တော၊ ကိသော ပဏ္ဍု အဟောသဟံ။
စိတ္တက္ခေပေါ စ မေ အာသိ၊ တေန သောကေန အဋ္ဋိတော။
၄၂၁။
‘‘သောကသလ္လပရေတောဟံ ၊ ဝနန္တမုပသင်္ကမိံ။
ပဝတ္တဖလံ ဘုဉ္ဇိတွာ၊ ရုက္ခမူလေ ဝသာမဟံ။
၄၂၂။
‘‘သုမေဓေါ နာမ သမ္ဗုဒ္ဓေါ၊ ဒုက္ခဿန္တကရော ဇိနော။
မမုဒ္ဓရိတုကာမော သော၊ အာဂဉ္ဆိ မမ သန္တိကံ။
၄၂၃။
‘‘ပဒသဒ္ဒံ သုဏိတွာန၊ သုမေဓဿ မဟေသိနော။
ပဂ္ဂဟေတွာနဟံ သီသံ၊ ဥလ္လောကေသိံ မဟာမုနိံ။
၄၂၄။
‘‘ဥပါဂတေ မဟာဝီရေ၊ ဣတိ မေ ဥဒပဇ္ဇထ။
တဒါသိမေကဂ္ဂမနော၊ ဒိသွာ တံ လောကနာယကံ။
၄၂၅။
‘‘သတိံ ပဋိလဘိတွာန၊ ပဏ္ဏမုဋ္ဌိမဒါသဟံ။
နိသီဒိ ဘဂဝါ တတ္ထ၊ အနုကမ္ပာယ စက္ခုမာ။
၄၂၆။
‘‘နိသဇ္ဇ တတ္ထ ဘဂဝါ၊ သုမေဓေါ လောကနာယကော။
ဓမ္မံ မေ ကထယီ ဗုဒ္ဓေါ၊ သောကသလ္လဝိနောဒနံ။
၄၂၇။
‘‘‘အနဝှတာ တတော အာဂုံ၊ အနနုညာတာ ဣတော ဂတာ။
ယထာဂတာ တထာ ဂတာ၊ တတ္ထ ကာ ပရိဒေဝနာ။
၄၂၈။
‘‘‘ယထာပိ ပထိကာ သတ္တာ၊ ဝဿမာနာယ ဝုဋ္ဌိယာ။
သဘဏ္ဍာ ဥပဂစ္ဆန္တိ၊ ဝဿဿာပတနာယ တေ။
၄၂၉။
‘‘‘ဝဿေ စ တေ ဩရမိတေ၊ သမ္ပယန္တိ ယဒိစ္ဆကံ။
ဧဝံ မာတာ ပိတာ တုယှံ၊ တတ္ထ ကာ ပရိဒေဝနာ။
၄၃၀။
‘‘‘အာဂန္တုကာ ပါဟုနကာ၊ စလိတေရိတကမ္ပိတာ။
ဧဝံ မာတာ ပိတာ တုယှံ၊ တတ္ထ ကာ ပရိဒေဝနာ။
၄၃၁။
‘‘‘ယထာပိ ဥရဂေါ ဇိဏ္ဏံ၊ ဟိတွာ ဂစ္ဆတိ သံ တစံ [သံတနုံ (သျာ။ က။)]။
ဧဝံ မာတာ ပိတာ တုယှံ၊ သံ တနုံ ဣဓ ဟီယရေ’။
၄၃၂။
‘‘ဗုဒ္ဓဿ ဂိရမညာယ၊ သောကသလ္လံ ဝိဝဇ္ဇယိံ။
ပါမောဇ္ဇံ ဇနယိတွာန၊ ဗုဒ္ဓသေဋ္ဌံ အဝန္ဒဟံ။
၄၃၃။
‘‘ဝန္ဒိတွာန မဟာနာဂံ၊ ပူဇယိံ ဂိရိမဉ္ဇရိံ [ဂိရိမဉ္ဇရိမပူဇယိံ (သီ။ သျာ။)]။
ဒိဗ္ဗဂန္ဓံ သမ္ပဝန္တံ [ဒိဗ္ဗဂန္ဓေန သမ္ပန္နံ (သီ။ သျာ။)]၊ သုမေဓံ လောကနာယကံ။
၄၃၄။
‘‘ပူဇယိတွာန သမ္ဗုဒ္ဓံ၊ သိရေ ကတွာန အဉ္ဇလိံ။
အနုဿရံ ဂုဏဂ္ဂါနိ၊ သန္ထဝိံ လောကနာယကံ။
၄၃၅။
‘‘နိတ္တိဏ္ဏောသိ [နိတ္တဏှောသိ (သီ။)၊ ဝိတိဏ္ဏောသိ (သျာ။)] မဟာဝီရ၊ သဗ္ဗညု လောကနာယက။
သဗ္ဗေ သတ္တေ ဥဒ္ဓရသိ၊ ဉာဏေန တွံ မဟာမုနေ။
၄၃၆။
‘‘ဝိမတိံ ဒွေဠှကံ ဝါပိ၊ သဉ္ဆိန္ဒသိ မဟာမုနေ။
ပဋိပါဒေသိ မေ မဂ္ဂံ၊ တဝ ဉာဏေန စက္ခုမ။
၄၃၇။
‘‘အရဟာ ဝသိပတ္တာ [သိဓ္ဒိပတ္တာ (သီ။ သျာ။)] စ၊ ဆဠဘိညာ မဟိဒ္ဓိကာ။
အန္တလိက္ခစရာ ဓီရာ၊ ပရိဝါရေန္တိ တာဝဒေ။
၄၃၈။
‘‘ပဋိပန္နာ စ သေခါ စ၊ ဖလဋ္ဌာ သန္တိ သာဝကာ။
သူရောဒယေဝ ပဒုမာ၊ ပုပ္ဖန္တိ တဝ သာဝကာ။
၄၃၉။
‘‘မဟာသမုဒ္ဒေါဝက္ခောဘော၊ အတုလောပိ [ယထာ သမုဒ္ဒေါ အက္ခောဘော၊ အတုလော စ (သီ။)] ဒုရုတ္တရော။
ဧဝံ ဉာဏေန သမ္ပန္နော၊ အပ္ပမေယျောသိ စက္ခုမ။
၄၄၀။
‘‘ဝန္ဒိတွာဟံ လောကဇိနံ၊ စက္ခုမန္တံ မဟာယသံ။
ပုထု ဒိသာ နမဿန္တော၊ ပဋိကုဋိကော အဂဉ္ဆဟံ။
၄၄၁။
‘‘ဒေဝလောကာ စဝိတွာန၊ သမ္ပဇာနော ပတိဿတော။
ဩက္ကမိံ မာတုယာ ကုစ္ဆိံ၊ သန္ဓာဝန္တော ဘဝါဘဝေ။
၄၄၂။
‘‘အဂါရာ အဘိနိက္ခမ္မ၊ ပဗ္ဗဇိံ အနဂါရိယံ။
အာတာဣ နိပကော ဈာယီ၊ ပဋိသလ္လာနဂေါစရော။
၄၄၃။
‘‘ပဓါနံ ပဒဟိတွာန၊ တောသယိတွာ မဟာမုနိံ။
စန္ဒောဝဗ္ဘဃနာ မုတ္တော၊ ဝိစရာမိ အဟံ သဒါ။
၄၄၄။
‘‘ဝိဝေကမနုယုတ္တောမှိ၊ ဥပသန္တော နိရူပဓိ။
သဗ္ဗာသဝေ ပရိညာယ၊ ဝိဟရာမိ အနာသဝေါ။
၄၄၅။
‘‘တိံသကပ္ပသဟဿမှိ၊ ယံ ဗုဒ္ဓမဘိပူဇယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၄၄၆။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝါ ပရိက္ခီဏာ၊ နတ္ထိ ဒါနိ ပုနဗ္ဘဝေါ။
၄၄၇။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၄၄၈။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဂိရိမာနန္ဒော ထေရော ဣမာ ဂါထာယော အဘာသိတ္ထာတိ။
ဂိရိမာနန္ဒတ္ထေရဿာပဒါနံ သတ္တမံ။
၈။ သဠလမဏ္ဍပိယတ္ထေရအပဒါနံ
၄၄၉။
‘‘နိဗ္ဗုတေ ကကုသန္ဓမှိ၊ ဗြာဟ္မဏမှိ ဝုသီမတိ။
ဂဟေတွာ သဠလံ မာလံ၊ မဏ္ဍပံ ကာရယိံ အဟံ။
၄၅၀။
‘‘တာဝတိံသဂတော သန္တော၊ လဘာမိ ဗျမှမုတ္တမံ။
အညေ ဒေဝေတိရောစာမိ၊ ပုညကမ္မဿိဒံ ဖလံ။
၄၅၁။
‘‘ဒိဝါ ဝါ ယဒိ ဝါ ရတ္တိံ၊ စင်္ကမန္တော ဌိတော စဟံ။
ဆန္နော သဠလပုပ္ဖေဟိ၊ ပုညကမ္မဿိဒံ ဖလံ။
၄၅၂။
‘‘ဣမသ္မိံယေဝ ကပ္ပမှိ၊ ယံ ဗုဒ္ဓမဘိပူဇယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၄၅၃။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၄၅၄။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၄၅၅။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သဠလမဏ္ဍပိယော ထေရော ဣမာ ဂါထာယော အဘာသိတ္ထာတိ။
သဠလမဏ္ဍပိယတ္ထေရဿာပဒါနံ အဋ္ဌမံ။
၉။ သဗ္ဗဒါယကတ္ထေရအပဒါနံ
၄၅၆။
‘‘မဟာသမုဒ္ဒံ ဩဂယှ၊ ဘဝနံ မေ သုနိမ္မိတံ။
သုနိမ္မိတာ ပေါက္ခရဏီ၊ စက္ကဝါကပကူဇိတာ။
၄၅၇။
‘‘မန္ဒာလကေဟိ သဉ္ဆန္နာ၊ ပဒုမုပ္ပလကေဟိ စ။
နဒီ စ သန္ဒတေ တတ္ထ၊ သုပတိတ္ထာ မနောရမာ။
၄၅၈။
‘‘မစ္ဆကစ္ဆပသဉ္ဆန္နာ ၊ နာနာဒိဇသမောတ္ထတာ။
မယူရကောဉ္စာဘိရုဒါ၊ ကောကိလာဒီဟိ ဝဂ္ဂုဟိ။
၄၅၉။
‘‘ပါရေဝတာ ရဝိဟံသာ စ၊ စက္ကဝါကာ နဒီစရာ။
ဒိန္ဒိဘာ သာဠိကာ စေတ္ထ၊ ပမ္မကာ [ပမ္ပကာ (သီ။)၊ စပ္ပကာ (သျာ။)] ဇီဝဇီဝကာ။
၄၆၀။
‘‘ဟံသာ ကောဉ္စာပိ နဒိတာ [ကောဉ္စာဘိနဒိတာ (သီ။ သျာ။)]၊ ကောသိယာ ပိင်္ဂလာ ဗဟူ။
သတ္တရတနသမ္ပန္နာ၊ မဏိမုတ္တိကဝါလုကာ။
၄၆၁။
‘‘သဗ္ဗသောဏ္ဏမယာ ရုက္ခာ၊ နာနာဂန္ဓသမေရိတာ။
ဥဇ္ဇောတေန္တိ ဒိဝါရတ္တိံ၊ ဘဝနံ သဗ္ဗကာလိကံ။
၄၆၂။
‘‘သဋ္ဌိ တူရိယသဟဿာနိ၊ သာယံ ပါတော ပဝဇ္ဇရေ။
သောဠသိတ္ထိသဟဿာနိ၊ ပရိဝါရေဋ္တိ မံ သဒါ။
၄၆၃။
‘‘အဘိနိက္ခမ္မ ဘဝနာ၊ သုမေဓံ လောကနာယကံ။
ပသန္နစိတ္တော သုမနော၊ ဝန္ဒယိံ တံ မဟာယသံ။
၄၆၄။
‘‘သမ္ဗုဒ္ဓံ အဘိဝါဒေတွာ၊ သသသံဃံ တံ နိမန္တယိံ။
အဓိဝါသေသိ သော ဓီရော၊ သုမေဓေါ လောကနာယကော။
၄၆၅။
‘‘မမ ဓမ္မကထံ ကတွာ၊ ဥယျောဇေသိ မဟာမုနိ။
သမ္ဗုဒ္ဓံ အဘိဝါဒေတွာ၊ ဘဝနံ မေ ဥပါဂမိံ။
၄၆၆။
‘‘အာမန္တယိံ ပရိဇနံ၊ သဗ္ဗေ သန္နိပတာထ [သန္နိပတတ္ထ (က။)] ဝေါ။
ပုဗ္ဗဏှသမယံ ဗုဒ္ဓေါ၊ ဘဝနံ အာဂမိဿတိ။
၄၆၇။
‘‘လာဘာ အမှံ သုလဒ္ဓံ နော၊ ယေ ဝသာမ တဝန္တိကေ။
မယမ္ပိ ဗုဒ္ဓသေဋ္ဌဿ၊ ပူဇံ ကဿာမ သတ္ထုနော။
၄၆၈။
‘‘အန္နပနံ ပဋ္ဌပေတွာ၊ ကာလံ အာရောစယိံ အဟံ။
ဝသီသတသဟဿေဟိ၊ ဥပေသိ လောကနာယကော။
၄၆၉။
‘‘ပဉ္စင်္ဂိကေဟိ တူရိယေဟိ၊ ပစ္စုဂ္ဂမနမကာသဟံ။
သဗ္ဗသောဏ္ဏမယေ ဣဌေ၊ နိသီဒိ ပုရိသုတ္တမော။
၄၇၀။
‘‘ဥပရိစ္ဆဒနံ အာသိ၊ သဗ္ဗသောဏ္ဏမယံ တဒါ။
ဗီဇနိယော ပဝါယန္တိ၊ ဘိက္ခုသံဃဿ အန္တရေ။
၄၇၁။
‘‘ပဟူတေနန္နပါနေန ၊ ဘိက္ခုသံဃမတပ္ပယိံ။
ပစ္စေကဒုဿယုဂဠေ၊ ဘိက္ခုသံဃဿဒါသဟံ။
၄၇၂။
‘‘ယံ ဝဒန္တိ သုမေဓေါတိ၊ လောကာဟုတိပဋိဂ္ဂဟံ။
ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။
၄၇၃။
‘‘ယော မေ အန္နေန ပါနေန၊ သဗ္ဗေ ဣမေ စ တပ္ပယိံ။
တမဟံ ကိတ္တယိဿာမိ၊ သုဏာထ မမ ဘာသတော။
၄၇၄။
‘‘အဋ္ဌာရသေ ကပ္ပသတေ၊ ဒေဝလောကေ ရမိဿတိ။
သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
၄၇၅။
‘‘ဥပ္ပဇ္ဇတိ [ဥပဂစ္ဆတိ (သီ။)] ယံ ယောနိံ၊ ဒေဝတ္တံ အထ မာနုသံ။
သဗ္ဗဒါ သဗ္ဗသောဝဏ္ဏံ၊ ဆဒနံ ဓါရယိဿတိ။
၄၇၆။
‘‘တိံသကပ္ပသဟဿမှိ၊ ဩက္ကာကကုသလသမ္ဘဝေါ။
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
၄၇၇။
‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။
၄၇၈။
‘‘‘ဘိက္ခုသံဃေ နိသီဒိတွာ၊ သီဟနာဒံ နဒိဿတိ။
စိတကေ ဆတ္တံ ဓါရေန္တိ၊ ဟေဋ္ဌာ ဆတ္တမှိ ဍယှထ’။
၄၇၉။
‘‘သာမညံ မေ အနုပ္ပတ္တံ၊ ကိလေသာ ဈာပိတာ မယာ။
မဏ္ဍပေ ရုက္ခမူလေ ဝါ၊ သန္တာပေါ မေ န ဝိဇ္ဇတိ။
၄၈၀။
‘‘တိံသကပ္ပသဟဿမှိ ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ သဗ္ဗဒါနဿိဒံ ဖလံ။
၄၈၁။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၄၈၂။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၄၈၃။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သဗ္ဗဒါယကော ထေရော ဣမာ ဂါထာယော အဘာသိတ္ထာတိ။
သဗ္ဗဒါယကတ္ထေရဿာပဒါနံ နဝမံ။
၁၀။ အဇိတတ္ထေရအပဒါနံ
၄၈၄။
‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။
အဇ္ဈောဂါဟေတွာ ဟိမဝန္တံ၊ နိသီဒိ လောကနာယကော။
၄၈၅။
‘‘နာဟံ အဒ္ဒက္ခိံ [ပဿာမိ (?)] သမ္ဗုဒ္ဓံ၊ နပိ သဒ္ဒံ သုဏောမဟံ။
မမ ဘက္ခံ ဂဝေသန္တော၊ အာဟိဏ္ဍာမိ ဝနေ အဟံ [တဒါ (သီ။)]။
၄၈၆။
‘‘တတ္ထဒ္ဒဿာသိံ သမ္ဗုဒ္ဓံ၊ ဒွတ္တိံသဝရလက္ခဏံ။
ဒိသွာန ဝိတ္တိမာပဇ္ဇိံ [စိတ္တမာပဇ္ဇိ (သီ။)၊ စိတ္တမာပဇ္ဇိံ (သျာ။)]၊ သတ္တော ကော နာမယံ ဘဝေ။
၄၈၇။
‘‘လက္ခဏာနိ ဝိလောကေတွာ၊ မမ ဝိဇ္ဇံ အနုဿရိံ။
သုတဉှိ မေတံ ဝုဍ္ဎာနံ၊ ပဏ္ဍိတာနံ သုဘာသိတံ။
၄၈၈။
‘‘တေသံ ယထာ တံ ဝစနံ၊ အယံ ဗုဒ္ဓေါ ဘဝိဿတိ။
ယံနူနာဟံ သက္ကရေယျံ၊ ဂတိံ မေ သောဓယိဿတိ။
၄၈၉။
‘‘ခိပ္ပံ အဿမမာဂန္တွာ၊ မဓုတေလံ ဂဟိံ အဟံ။
ကောလမ္ဗကံ ဂဟေတွာန၊ ဥပဂစ္ဆိံ ဝိနာယကံ [နရာသဘံ (သီ။)]။
၄၉၀။
‘‘တိဒဏ္ဍကေ ဂဟေတွာန၊ အဗ္ဘောကာသေ ဌပေသဟံ။
ပဒီပံ ပဇ္ဇလိတွာန၊ အဋ္ဌက္ခတ္တုံ အဝန္ဒဟံ။
၄၉၁။
‘‘သတ္တရတ္တိန္ဒိဝံ ဗုဒ္ဓေါ၊ နိသီဒိ ပုရိသုတ္တမော။
တတော ရတျာ ဝိဝသာနေ၊ ဝုဋ္ဌာသိ လောကနာယကော။
၄၉၂။
‘‘ပသန္နစိတ္တော သုမနော၊ သဗ္ဗရတ္တိန္ဒိဝံ အဟံ။
ဒီပံ ဗုဒ္ဓဿ ပါဒါသိံ၊ ပသန္နော သေဟိ ပါဏိဘိ။
၄၉၃။
‘‘သဗ္ဗေ ဝနာ ဂန္ဓမယာ၊ ပဗ္ဗတေ ဂန္ဓမာဒနေ။
ဗုဒ္ဓဿ အာနုဘာဝေန၊ အာဂစ္ဆုံ ဗုဒ္ဓသန္တိကံ [ဥပဂစ္ဆုံ တဒါ ဇိနံ (သီ။)]။
၄၉၄။
‘‘ယေ ကေစိ ပုပ္ဖဂန္ဓာသေ၊ ပုပ္ဖိတာ ဓရဏီရုဟာ။
ဗုဒ္ဓဿ အာနုဘာဝေန၊ သဗ္ဗေ သန္နိပတုံ တဒါ။
၄၉၅။
‘‘ယာဝတာ ဟိမဝန္တမှိ၊ နာဂါ စ ဂရုဠာ ဥဘော။
ဓမ္မဉ္စ သောတုကာမာ တေ၊ အာဂစ္ဆုံ ဗုဒ္ဓသန္တိကံ။
၄၉၆။
‘‘ဒေဝလော နာမ သမဏော၊ ဗုဒ္ဓဿ အဂ္ဂသာဝကော။
ဝသီသတသဟဿေဟိ၊ ဗုဒ္ဓသန္တိကုပါဂမိ။
၄၉၇။
‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။
၄၉၈။
‘‘‘ယော မေ ဒီပံ ပဒီပေသိ၊ ပသန္နော သေဟိ ပါဏိဘိ။
တမဟံ ကိတ္တယိဿာမိ၊ သုဏာထ မမ ဘာသတော။
၄၉၉။
‘‘‘သဋ္ဌိ ကပ္ပသဟဿာနိ၊ ဒေဝလောကေ ရမိဿတိ။
သဟဿက္ခတ္တုံ ရာဇာ စ၊ စက္ကဝတ္တီ ဘဝိဿတိ။
သောဠသမံ ဘာဏဝါရံ။
၅၀၀။
‘‘‘ဆတ္တိသက္ခတ္တုံ ဒေဝိန္ဒော၊ ဒေဝရဇ္ဇံ ကရိဿတိ။
ပထဝိယံ သတ္တသတံ၊ ဝိပုလံ ရဇ္ဇံ ကရိဿတိ။
၅၀၁။
‘‘‘ပဒေသရဇ္ဇံ ဝိပုလံ၊ ဂဏနာတော အသံခိယံ။
ဣမိနာ ဒီပဒါနေန၊ ဒိဗ္ဗစက္ခု ဘဝိဿတိ။
၅၀၂။
‘‘‘သမန္တတော အဋ္ဌကောသံ [အဍ္ဎကောသံ (သီ။ သျာ။)]၊ ပဿိဿတိ အယံ သဒါ။
ဒေဝလောကာ စဝန္တဿ၊ နိဗ္ဗတ္တန္တဿ ဇန္တုနော။
၅၀၃။
‘‘‘ဒိဝါ ဝါ ယဒိ ဝါ ရတ္တိံ၊ ပဒီပံ ဓါရယိဿတိ။
ဇာယမာနဿ သတ္တဿ၊ ပုညကမ္မသမင်္ဂိနော။
၅၀၄။
‘‘‘ယာဝတာ နဂရံ အာသိ၊ တာဝတာ ဇောတယိဿတိ။
ဥပပဇ္ဇတိ ယံ ယောနိံ၊ ဒေဝတ္တံ အထ မာနုသံ။
၅၀၅။
‘‘‘အဿေဝ ဒီပဒါနဿ၊ [အဋ္ဌဒီပဖလေန ဟိ။ ဥပဋ္ဌိဿန္တိမံ ဇန္တုံ (သျာ။)၊ အဋ္ဌ ဒီပါ ဖလေန ဟိ။ န ဇဟိဿန္တိ’မံ ဇန္တုံ (?)] အဋ္ဌဒီပဖလေန ဟိ။
န ဇယိဿန္တိမံ ဇန္တူ [အဋ္ဌဒီပဖလေန ဟိ။ ဥပဋ္ဌိဿန္တိမံ ဇန္တုံ (သျာ။)၊ အဋ္ဌ ဒီပါ ဖလေန ဟိ။ န ဇဟိဿန္တိ’မံ ဇန္တုံ (?)]၊ ဒီပဒါနဿိဒံ ဖလံ။
၅၀၆။
‘‘‘ကပ္ပသတသဟဿမှိ ၊ ဩက္ကာကကုလသမ္ဘဝေါ။
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
၅၀၇။
‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ။
၅၀၈။
‘‘‘တောသယိတွာန သမ္ဗုဒ္ဓံ၊ ဂေါတမံ သကျပုင်္ဂဝံ။
အဇိတော နာမ နာမေန၊ ဟေဿတိ သတ္ထု သာဝကော’။
၅၀၉။
‘‘သဋ္ဌိ ကပ္ပသဟဿာနိ၊ ဒေဝလောကေ ရမိံ အဟံ။
တတြာပိ မေ ဒီပသတံ၊ ဇောတတေ နိစ္စကာလိကံ [သဗ္ဗကာလိကံ (သီ။)]။
၅၁၀။
‘‘ဒေဝလောကေ မနုဿေ ဝါ၊ နိဒ္ဓါဝန္တိ ပဘာ မမ။
ဗုဒ္ဓသေဋ္ဌံ သရိတွာန၊ ဘိယျော ဟာသံ ဇနေသဟံ။
၅၁၁။
‘‘တုသိတာဟံ စဝိတွာန၊ ဩက္ကမိံ မာတုကုစ္ဆိယံ။
ဇာယမာနဿ သန္တဿ၊ အာလောကော ဝိပုလော အဟု။
၅၁၂။
‘‘အဂါရာ အဘိနိက္ခမ္မ၊ ပဗ္ဗဇိံ အနဂါရိယံ။
ဗာဝရိံ ဥပသင်္ကမ္မ၊ သိဿတ္တံ အဇ္ဈုပါဂမိံ။
၅၁၃။
‘‘ဟိမဝန္တေ ဝသန္တောဟံ၊ အဿောသိံ လောကနာယကံ။
ဥတ္တမတ္ထံ ဂဝေသန္တော၊ ဥပဂစ္ဆိံ ဝိနာယကံ။
၅၁၄။
‘‘ဒန္တော ဗုဒ္ဓေါ ဒမေတာဝီ၊ ဩဃတိဏ္ဏော နိရူပဓိ။
နိဗ္ဗာနံ ကထယီ ဗုဒ္ဓေါ၊ သဗ္ဗဒုက္ခပ္ပမောစနံ။
၅၁၅။
‘‘တံ မေ အာဂမနံ သိဒ္ဓံ၊ တောသိတောဟံ မဟာမုနိံ။
တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။
၅၁၆။
‘‘သတသဟဿိတော ကပ္ပေ၊ ယံ ဒီပမဒဒိံ တဒါ။
ဒုဂ္ဂတိံ နာဘိဇာနာမိ၊ ဒီပဒါနဿိဒံ ဖလံ။
၅၁၇။
‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။
၅၁၈။
‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။
၅၁၉။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ အဇိတော ထေရော ဣမာ ဂါထာယော အဘာသိတ္ထာတိ။
အဇိတတ္ထေရဿာပဒါနံ ဒသမံ။
ပိလိန္ဒဝစ္ဆဝဂ္ဂေါ စတ္တာလီသမော။
တဿုဒ္ဒါနံ –
ပိလိန္ဒဝစ္ဆော သေလော စ၊ သဗ္ဗကိတ္တီ မဓုံဒဒေါ။
ကူဋာဂါရီ ဗာကုလော စ၊ ဂိရိ သဠလသဝ္ဟယော။
သဗ္ဗဒေါ အဇိတော စေဝ၊ ဂါထာယော ဂဏိတာ ဣဟ။
သတာနိ ပဉ္စ ဂါထာနံ၊ ဝီသတိ စ တဒုတ္တရီတိ။
အထ ဝဂ္ဂုဒ္ဒါနံ –
ပဒုမာရက္ခဒေါ စေဝ၊ ဥမာ ဂန္ဓောဒကေန စ။
ဧကပဒ္မ သဒ္ဒသညီ၊ မန္ဒာရံ ဗောဓိဝန္ဒကော။
အဝဋဉ္စ ပိလိန္ဒိ [ဧဝမေဝ ဒိဿတိ] စ၊ ဂါထာယော ဂဏိတာ ဣဟ။
စတုသတ္တတိ ဂါထာယော၊ ဧကာဒသ သတာနိ စ။
ပဒုမဝဂ္ဂဒသကံ။
စတုတ္ထသတကံ သမတ္တံ။