အဝဋဖလဝဂ္ဂ

၃၉။ အဝဋဖလဝဂ္ဂ

၁။ အဝဋဖလဒါယကတ္ထေရအပဒါန

၁။

‘‘သတရံသိ နာမ ဘဂဝါ၊ သယမ္ဘူ အပရာဇိတော။

ဝိဝေကကာမော သမ္ဗုဒ္ဓေါ၊ ဂေါစရာယာဘိနိက္ခမိ။

၂။

‘‘ဖလဟတ္ထော အဟံ ဒိသွာ၊ ဥပဂစ္ဆိံ နရာသဘံ။

ပသန္နစိတ္တော သုမနော၊ အဝဋံ [အဝဏ္ဋံ (သီ။)၊ အမ္ဗဋံ (သျာ။)] အဒဒိံ ဖလံ။

၃။

‘‘စတုန္နဝုတိတော ကပ္ပေ၊ ယံ ဖလမဒဒိံ အဟံ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၅။

‘‘သွာဂတံ ဝတ မေ အာသိ၊ မမ ဗုဒ္ဓဿ သန္တိကေ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၆။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဝဋဖလဒါယကော ထေရော ဣမာ ဂါထာယော အဘာသိတ္ထာတိ။

အဝဋဖလဒါယကတ္ထေရဿာပဒါနံ ပဌမံ။

၂။ လဗုဇဒါယကတ္ထေရအပဒါနံ

၇။

‘‘နဂရေ ဗန္ဓုမတိယာ၊ အာသိံ အာရာမိကော တဒါ။

အဒ္ဒသံ ဝိရဇံ ဗုဒ္ဓံ၊ ဂစ္ဆန္တံ အနိလဉ္ဇသေ။

၈။

‘‘လဗုဇဿ ဖလံ ဂယှ၊ ဗုဒ္ဓသေဋ္ဌဿဒါသဟံ။

အာကာသေ ဌိတကော သန္တော၊ ပဋိဂဏှိ မဟာယသော။

၉။

‘‘ဝိတ္တိသဉ္ဇနနံ မယှံ၊ ဒိဋ္ဌဓမ္မသုခါဝဟံ။

ဖလံ ဗုဒ္ဓဿ ဒတွာန၊ ဝိပ္ပသန္နေန စေတသာ။

၁၀။

‘‘အဓိဂစ္ဆိံ တဒါ ဣတိံ၊ ဝိပုလဉ္စ သုခုတ္တမံ။

ဥပ္ပဇ္ဇတေဝ ရတနံ၊ နိဗ္ဗတ္တဿ တဟိံ တဟိံ။

၁၁။

‘‘ဧကနဝုတိတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၁၂။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၃။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၁၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ လဗုဇဒါယကော ထေရော ဣမာ ဂါထာယော အဘာသိတ္ထာတိ။

လဗုဇဒါယကတ္ထေရဿာပဒါနံ ဒုတိယံ။

၃။ ဥဒုမ္ဗရဖလဒါယကတ္ထေရအပဒါနံ

၁၅။

‘‘ဝိနတာနဒိယာ တီရေ၊ ဝိဟာသိ ပုရိသုတ္တမော။

အဒ္ဒသံ ဝိရဇံ ဗုဒ္ဓံ၊ ဧကဂ္ဂံ သုသမာဟိတံ။

၁၆။

‘‘တသ္မိံ ပသန္နမာနသော၊ ကိလေသမလဓေါဝနေ။

ဥဒုမ္ဗရဖလံ ဂယှ၊ ဗုဒ္ဓသေဋ္ဌဿဒါသဟံ။

၁၇။

‘‘ဧကနဝုတိတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၁၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၁၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒုမ္ဗရဖလဒါယကော ထေရော ဣမာ ဂါထာယော အဘာသိတ္ထာတိ။

ဥဒုမ္ဗရဖလဒါယကတ္ထေရဿာပဒါနံ တတိယံ။

၄။ ပိလက္ခဖလဒါယကတ္ထေရအပဒါနံ

၂၁။

‘‘ဝနန္တရေ ဗုဒ္ဓံ ဒိသွာ၊ အတ္ထဒသ္သိံ မဟာယသံ။

ပသန္နစိတ္တော သုမနော၊ ပိလက္ခဿာဒဒိံ ဖလံ [ပိလက္ခဿ ဖလံ အဒံ (သီ။)၊ ပိလက္ခုဿ ဖလံ အဒံ (သျာ။)]။

၂၂။

‘‘အဋ္ဌာရသေ ကပ္ပသတေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၂၃။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၄။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပိလက္ခဖလဒါယကော ထေရော ဣမာ ဂါထာယော အဘာသိတ္ထာတိ။

ပိလက္ခဖလဒါယကတ္ထေရဿာပဒါနံ စတုတ္ထံ။

၅။ ဖာရုသဖလဒါယကတ္ထေရအပဒါနံ

၂၆။

‘‘သုဝဏ္ဏဝဏ္ဏံ သမ္ဗုဒ္ဓံ၊ အာဟုတီနံ ပဋိဂ္ဂဟံ။

ရထိယံ ပဋိပဇ္ဇန္တံ၊ ဖာရုသဖလမဒါသဟံ။

၂၇။

‘‘ဧကနဝုတိတော ကပ္ပေ၊ ယံ ဖလမဒဒိံ အဟံ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၂၈။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၂၉။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖာရုသဖလဒါယကော ထေရော ဣမာ ဂါထာယော အဘာသိတ္ထာတိ။

ဖာရုသဖလဒါယကတ္ထေရဿာပဒါနံ ပဉ္စမံ။

၆။ ဝလ္လိဖလဒါယကတ္ထေရအပဒါနံ

၃၁။

‘‘သဗ္ဗေ ဇနာ သမာဂမ္မ၊ အဂမိံသု ဝနံ တဒါ။

ဖလမန္ဝေသမာနာ တေ၊ အလဘိံသု ဖလံ တဒါ။

၃၂။

‘‘တတ္ထဒ္ဒသာသိံ သမ္ဗုဒ္ဓံ၊ သယမ္ဘုံ အပရာဇိတံ။

ပသန္နစိတ္တော သုမနော၊ ဝလ္လိဖလမဒါသဟံ။

၃၃။

‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၃၄။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၃၅။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝလ္လိဖလဒါယကော ထေရော ဣမာ ဂါထာယော အဘာသိတ္ထာတိ။

ဝလ္လိဖလဒါယကတ္ထေရဿာပဒါနံ ဆဋ္ဌံ။

၇။ ကဒလိဖလဒါယကတ္ထေရအပဒါနံ

၃၇။

‘‘ကဏိကာရံဝ ဇလိတံ၊ ပုဏ္ဏမာယေဝ [ပုဏ္ဏမာသေဝ (သီ။ က။)] စန္ဒိမံ။

ဇလန္တံ ဒီပရုက္ခံဝ၊ အဒ္ဒသံ လောကနာယကံ။

၃၈။

‘‘ကဒလိဖလံ ပဂ္ဂယှ၊ အဒါသိံ သတ္ထုနော အဟံ။

ပသန္နစိတ္တော သုမနော၊ ဝန္ဒိတွာန အပက္ကမိံ။

၃၉။

‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဒလိဖလဒါယကော ထေရော ဣမာ ဂါထာယော အဘာသိတ္ထာတိ။

ကဒလိဖလဒါယကတ္ထေရဿာပဒါနံ သတ္တမံ။

၈။ ပနသဖလဒါယကတ္ထေရအပဒါနံ

၄၃။

‘‘အဇ္ဇုနော နာမ သမ္ဗုဒ္ဓေါ၊ ဟိမဝန္တေ ဝသီ တဒါ။

စရဏေန စ သမ္ပန္နော၊ သမာဓိကုသလော မုနိ။

၄၄။

‘‘ကုမ္ဘမတ္တံ ဂဟေတွာန၊ ပနသံ ဇီဝဇီဝကံ [ဒေဝဂန္ဓိကံ (၄၁ ဝဂ္ဂေ၊ ၅ အပဒါနေ)]။

ဆတ္တပဏ္ဏေ ဌပေတွာန၊ အဒါသိံ သတ္ထုနော အဟံ။

၄၅။

‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄၆။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၄၇။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၄၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပနသဖလဒါယကော ထေရော ဣမာ ဂါထာယော အဘာသိတ္ထာတိ။

ပနသဖလဒါယကတ္ထေရဿာပဒါနံ အဋ္ဌမံ။

၉။ သောဏကောဋိဝီသတ္ထေရအပဒါနံ

၄၉။

‘‘ဝိပဿိနော ပါဝစနေ၊ ဧကံ လေဏံ မယာ ကတံ။

စာတုဒ္ဒိသဿ သံဃဿ၊ ဗန္ဓုမာရာဇဓါနိယာ။

၅၀။

‘‘ဒုဿေဟိ ဘူမိံ လေဏဿ၊ သန္ထရိတွာ ပရိစ္စဇိံ။

ဥဒဂ္ဂစိတ္တော သုမနော၊ အကာသိံ ပဏိဓိံ တဒါ။

၅၁။

‘‘အာရာဓယေယျံ သမ္ဗုဒ္ဓံ၊ ပဗ္ဗဇ္ဇဉ္စ လဘေယျဟံ။

အနုတ္တရဉ္စ နိဗ္ဗာနံ၊ ဖုသေယျံ သန္တိမုတ္တမံ။

၅၂။

‘‘တေနေဝ သုက္ကမူလေန၊ ကပ္ပေ [ကပ္ပံ (သီ။)၊ ကပ္ပ (က။)] နဝုတိ သံသရိံ။

ဒေဝဘူတော မနုဿော စ၊ ကတပုညော ဝိရောစဟံ။

၅၃။

‘‘တတော ကမ္မာဝသေသေန၊ ဣဓ ပစ္ဆိမကေ ဘဝေ။

စမ္ပာယံ အဂ္ဂသေဋ္ဌိဿ၊ ဇာတောမှိ ဧကပုတ္တကော။

၅၄။

‘‘ဇာတမတ္တဿ မေ သုတွာ၊ ပိတု ဆန္ဒော အယံ အဟု။

ဒဒါမဟံ ကုမာရဿ၊ ဝီသကောဋီ အနူနကာ။

၅၅။

‘‘စတုရင်္ဂုလာ စ မေ လောမာ၊ ဇာတာ ပါဒတလေ ဥဘော။

သုခုမာ မုဒုသမ္ဖဿာ၊ တူလာပိစုသမာ သုဘာ။

၅၆။

‘‘အတီတာ နဝုတိ ကပ္ပါ၊ အယံ ဧကော စ ဥတ္တရိ။

နာဘိဇာနာမိ နိက္ခိတ္တေ၊ ပါဒေ ဘူမ္ယာ အသန္ထတေ။

၅၇။

‘‘အာရာဓိတော မေ သမ္ဗုဒ္ဓေါ၊ ပဗ္ဗဇိံ အနဂါရိယံ။

အရဟတ္တဉ္စ မေ ပတ္တံ၊ သီတိဘူတောမှိ နိဗ္ဗုတော။

၅၈။

‘‘အဂ္ဂေါ အာရဒ္ဓဝီရိယာနံ၊ နိဒ္ဒိဋ္ဌော သဗ္ဗဒဿိနာ။

ခီဏာသဝေါမှိ အရဟာ၊ ဆဠဘိညော မဟိဒ္ဓိကော။

၅၉။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ လေဏဒါနဿိဒံ ဖလံ။

၆၀။

‘‘ကိလေသာ ဈာပိတာ မယှံ။ပေ။။ ဝိဟရာမိ အနာသဝေါ။

၆၁။

‘‘သွာဂတံ ဝတ မေ အာသိ။ပေ။။ ကတံ ဗုဒ္ဓဿ သာသနံ။

၆၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

၆၃။

‘‘ထေရော ကောဋိဝီသော [ကောဋိဝိသော (သျာ။ က။)၊ ကောဠိဝိသော (အညဋ္ဌာနေသု)] သောဏော၊ ဘိက္ခုသံဃဿ အဂ္ဂတော။

ပဉ္ဟံ ပုဋ္ဌော ဝိယာကာသိ၊ အနောတတ္တေ မဟာသရေ’’တိ။

ဣတ္ထံ သုဒံ အာယသ္မာ သောဏော ကောဋိဝီသော ထေရော ဣမာ ဂါထာယော အဘာသိတ္ထာတိ။

သောဏကောဋိဝီသတ္ထေရဿာပဒါနံ နဝမံ။

၁၀။ ပုဗ္ဗကမ္မပိလောတိကဗုဒ္ဓအပဒါနံ

၆၄။

‘‘အနောတတ္တသရာသန္နေ ၊ ရမဏီယေ သိလာတလေ။

နာနာရတနပဇ္ဇောတေ၊ နာနာဂန္ဓဝနန္တရေ။

၆၅။

‘‘မဟတာ ဘိက္ခုသံဃေန၊ ပရေတော [ဥပေတော (ဥဒါနဋ္ဌကထာယံ ၄ ဝဂ္ဂေ၊ ၈ သုတ္တေ)] လောကနာယကော။

အာသီနော ဗျာကရီ တတ္ထ၊ ပုဗ္ဗကမ္မာနိ အတ္တနော။

၆၆။

[သုဏာထ ဘိက္ခဝေ မယှံ၊ ယံ ကမ္မံ ပကတံ မယာ။ ဧကံ အရညိကံ ဘိက္ခုံ၊ ဒိသွာ ဒိန္နံ ပိလောတိကံ။ ပတ္ထိတံ ပဌမံ ဗုဒ္ဓံ၊ ဗုဒ္ဓတ္တာယ မယာ တဒါ။ ပိလောတိယဿ ကမ္မဿ၊ ဗုဒ္ဓတ္တေပိ ဝိပစ္စတိ။ ဂေါပါလကော ပုရေ အာသိံ၊ ဂါဝိံ ပါဇေတိ ဂေါစရံ။ ပိဝန္တိံ ဥဒကံ အာဝိလံ၊ ဂါဝိံ ဒိသွာ နိဝါရယိံ။ တေန ကမ္မဝိပါကေန၊ ဣဓ ပစ္ဆိမကေ ဘဝေ။ ဝိပါသိတော ယဒိစ္ဆကံ၊ န ဟိ ပါတုံ လဘာမဟံ (သျာ။)] ‘‘သုဏာထ ဘိက္ခဝေါ မယှံ၊ ယံ ကမ္မံ ပကတံ မယာ။

ပိလောတိကဿ ကမ္မဿ၊ ဗုဒ္ဓတ္တေပိ ဝိပစ္စတိ [သုဏာထ ဘိက္ခဝေ မယှံ၊ ယံ ကမ္မံ ပကတံ မယာ။ ဧကံ အရညိကံ ဘိက္ခုံ၊ ဒိသွာ ဒိန္နံ ပိလောတိကံ။ ပတ္ထိတံ ပဌမံ ဗုဒ္ဓံ၊ ဗုဒ္ဓတ္တာယ မယာ တဒါ။ ပိလောတိယဿ ကမ္မဿ၊ ဗုဒ္ဓတ္တေပိ ဝိပစ္စတိ။ ဂေါပါလကော ပုရေ အာသိံ၊ ဂါဝိံ ပါဇေတိ ဂေါစရံ။ ပိဝန္တိံ ဥဒကံ အာဝိလံ၊ ဂါဝိံ ဒိသွာ နိဝါရယိံ။ တေန ကမ္မဝိပါကေန၊ ဣဓ ပစ္ဆိမကေ ဘဝေ။ ဝိပါသိတော ယဒိစ္ဆကံ၊ န ဟိ ပါတုံ လဘာမဟံ (သျာ။)]။

[၁]

၆၇။

‘‘မုနာဠိ နာမဟံ ဓုတ္တော၊ ပုဗ္ဗေ အညာသု ဇာတိသု [အညာယ ဇာတိယာ (ဥဒါန အဋ္ဌ။)]။

ပစ္စေကဗုဒ္ဓံ သုရဘိံ [သရဘုံ (သီ။)]၊ အဗ္ဘာစိက္ခိံ အဒူသကံ။

၆၈။

‘‘တေန ကမ္မဝိပါကေန၊ နိရယေ သံသရိံ စိရံ။

ဗဟူဝဿသဟဿာနိ၊ ဒုက္ခံ ဝေဒေသိ ဝေဒနံ။

၆၉။

‘‘တေန ကမ္မာဝသေသေန၊ ဣဓ ပစ္ဆိမကေ ဘဝေ။

အဗ္ဘက္ခာနံ မယာ လဒ္ဓံ၊ သုန္ဒရိကာယ ကာရဏာ။

[၂]

၇၀။

‘‘သဗ္ဗာဘိဘုဿ ဗုဒ္ဓဿ၊ နန္ဒော နာမာသိ သာဝကော။

တံ အဗ္ဘက္ခာယ နိရယေ၊ စိရံ သံသရိတံ မယာ။

၇၁။

‘‘ဒသဝဿသဟဿာနိ၊ နိရယေ သံသရိံ စိရံ။

မနုဿဘာဝံ လဒ္ဓါဟံ၊ အဗ္ဘက္ခာနံ ဗဟုံ လဘိံ။

၇၂။

‘‘တေန ကမ္မာဝသေသေန၊ စိဉ္စမာနဝိကာ မမံ။

အဗ္ဘာစိက္ခိ အဘူတေန၊ ဇနကာယဿ အဂ္ဂတော။

[၃]

၇၃။

‘‘ဗြာဟ္မဏော သုတဝါ အာသိံ၊ အဟံ သက္ကတပူဇိတော။

မဟာဝနေ ပဉ္စသတေ၊ မန္တေ ဝါစေမိ မာဏဝေ။

၇၄။

‘‘တတ္ထာဂတော [တမာဂတော (က။)] ဣသိ ဘီမော၊ ပဉ္စာဘိညော မဟိဒ္ဓိကော။

တံ စာဟံ အာဂတံ ဒိသွာ၊ အဗ္ဘာစိက္ခိံ အဒူသကံ။

၇၅။

‘‘တတောဟံ အဝစံ သိဿေ၊ ကာမဘောဂီ အယံ ဣသိ။

မယှမ္ပိ ဘာသမာနဿ၊ အနုမောဒိံသု မာဏဝါ။

၇၆။

‘‘တတော မာဏဝကာ သဗ္ဗေ၊ ဘိက္ခမာနံ ကုလေ ကုလေ။

မဟာဇနဿ အာဟံသု၊ ကာမဘောဂီ အယံ ဣသိ။

၇၇။

‘‘တေန ကမ္မဝိပါကေန၊ ပဉ္စ ဘိက္ခုသတာ ဣမေ။

အဗ္ဘက္ခာနံ လဘုံ သဗ္ဗေ၊ သုန္ဒရိကာယ ကာရဏာ။

[၄]

၇၈။

‘‘ဝေမာတုဘာတရံ ပုဗ္ဗေ၊ ဓနဟေတု ဟနိံ အဟံ။

ပက္ခိပိံ ဂိရိဒုဂ္ဂသ္မိံ၊ သိလာယ စ အပိံသယိံ။

၇၉။

‘‘တေန ကမ္မဝိပါကေန၊ ဒေဝဒတ္တော သိလံ ခိပိ။

အင်္ဂုဋ္ဌံ ပိံသယီ ပါဒေ၊ မမ ပါသာဏသက္ခရာ။

[၅]

၈၀။

‘‘ပုရေဟံ ဒါရကော ဟုတွာ၊ ကီဠမာနော မဟာပထေ။

ပစ္စေကဗုဒ္ဓံ ဒိသွာန၊ မဂ္ဂေ သကလိကံ [သက္ခလိကံ (က။)] ခိပိံ [ဒဟိံ (သျာ။)]။

၈၁။

‘‘တေန ကမ္မဝိပါကေန၊ ဣဓ ပစ္ဆိမကေ ဘဝေ။

ဝဓတ္ထံ မံ ဒေဝဒတ္တော၊ အဘိမာရေ ပယောဇယိ။

[၆]

၈၂။

‘‘ဟတ္ထာရောဟော ပုရေ အာသိံ၊ ပစ္စေကမုနိမုတ္တမံ။

ပိဏ္ဍာယ ဝိစရန္တံ တံ၊ အာသာဒေသိံ ဂဇေနဟံ။

၈၃။

‘‘တေန ကမ္မဝိပါကေန၊ ဘန္တော [ဒန္တော (က။)] နာဠာဂိရီ ဂဇော။

ဂိရိဗ္ဗဇေ ပုရဝရေ၊ ဒါရုဏော သမုပါဂမိ [မံ ဥပါဂမိ (သီ။)]။

[၇]

၈၄။

‘‘ရာဇာဟံ ပတ္ထိဝေါ [ပတ္တိကော (သျာ။ က။)၊ ခတ္တိယော (ဥဒါန အဋ္ဌ။)] အာသိံ၊ သတ္တိယာ ပုရိသံ ဟနိံ။

တေန ကမ္မဝိပါကေန၊ နိရယေ ပစ္စိသံ ဘုသံ။

၈၅။

‘‘ကမ္မုနော တဿ သေသေန၊ ဣဒါနိ သကလံ မမ။

ပါဒေ ဆဝိံ ပကပ္ပေသိ [ပကောပေသိ (သီ။)]၊ န ဟိ ကမ္မံ ဝိနဿတိ။

[၈]

၈၆။

‘‘အဟံ ကေဝဋ္ဋဂါမသ္မိံ၊ အဟုံ ကေဝဋ္ဋဒါရကော။

မစ္ဆကေ ဃာတိတေ ဒိသွာ၊ ဇနယိံ သောမနဿကံ [သောမနဿဟံ (ဥဒါန အဋ္ဌ။)]။

၈၇။

‘‘တေန ကမ္မဝိပါကေန၊ သီသဒုက္ခံ အဟူ မမ။

သဗ္ဗေ သက္ကာ စ ဟညိံသု၊ ယဒါ ဟနိ ဝိဋဋူဘော [ဝိဋဋုဘော (သျာ။ က။)]။

[၉]

၈၈။

‘‘ဖုဿဿာဟံ ပါဝစနေ၊ သာဝကေ ပရိဘာသယိံ။

ယဝံ ခါဒထ ဘုဉ္ဇထ၊ မာ စ ဘုဉ္ဇထ သာလယော။

၈၉။

‘‘တေန ကမ္မဝိပါကေန၊ တေမာသံ ခါဒိတံ ယဝံ။

နိမန္တိတော ဗြာဟ္မဏေန၊ ဝေရဉ္ဇာယံ ဝသိံ တဒါ။

[၁၀]

၉၀။

‘‘နိဗ္ဗုဒ္ဓေ ဝတ္တမာနမှိ၊ မလ္လပုတ္တံ နိဟေဌယိံ [နိသေဓယိံ (သျာ။ က။)]။

တေန ကမ္မဝိပါကေန၊ ပိဋ္ဌိဒုက္ခံ အဟူ မမ။

[၁၁]

၉၁။

‘‘တိကိစ္ဆကော အဟံ အာသိံ၊ သေဋ္ဌိပုတ္တံ ဝိရေစယိံ။

တေန ကမ္မဝိပါကေန၊ ဟောတိ ပက္ခန္ဒိကာ မမ။

[၁၂]

၉၂။

‘‘အဝစာဟံ ဇောတိပါလော၊ သုဂတံ ကဿပံ တဒါ။

ကုတော နု ဗောဓိ မုဏ္ဍဿ၊ ဗောဓိ ပရမဒုလ္လဘာ။

၉၃။

‘‘တေန ကမ္မဝိပါကေန၊ အစရိံ ဒုက္ကရံ ဗဟုံ။

ဆဗ္ဗဿာနုရုဝေဠာယံ၊ တတော ဗောဓိမပါပုဏိံ။

၉၄။

‘‘နာဟံ ဧတေန မဂ္ဂေန၊ ပါပုဏိံ ဗောဓိမုတ္တမံ။

ကုမ္မဂ္ဂေန ဂဝေသိဿံ၊ ပုဗ္ဗကမ္မေန ဝါရိတော။

၉၅။

‘‘ပုညပါပပရိက္ခီဏော၊ သဗ္ဗသန္တာပဝဇ္ဇိတော။

အသောကော အနုပါယာသော၊ နိဗ္ဗာယိဿမနာသဝေါ။

၉၆။

‘‘ဧဝံ ဇိနော ဝိယာကာသိ၊ ဘိက္ခုသံဃဿ အဂ္ဂတော။

သဗ္ဗာဘိညာဗလပ္ပတ္တော၊ အနောတတ္တေ မဟာသရေ’’တိ။

ဣတ္ထံ သုဒံ ဘဂဝါ အတ္တနော ပုဗ္ဗစရိတံ ကမ္မပိလောတိကံ နာမ ဗုဒ္ဓါပဒါနဓမ္မပရိယာယံ အဘာသိတ္ထာတိ။

ပုဗ္ဗကမ္မပိလောတိကံ နာမ ဗုဒ္ဓါပဒါနံ ဒသမံ။

အဝဋဖလဝဂ္ဂေါ ဧကူနစတ္တာလီသမော။

တဿုဒ္ဒါနံ –

အဝဋံ လဗုဇဉ္စေဝ၊ ဥဒုမ္ဗရပိလက္ခု စ။

ဖာရု ဝလ္လီ စ ကဒလီ၊ ပနသော ကောဋိဝီသကော။

ပုဗ္ဗကမ္မပိလောတိ စ၊ အပဒါနံ မဟေသိနော။

ဂါထာယော ဧကနဝုတိ၊ ဂဏိတာယော ဝိဘာဝိဘိ။

စုဒ္ဒသမံ ဘာဏဝါရံ။