မန္ဒာရဝပုပ္ဖိယဝဂ္ဂ

၃၇။ မန္ဒာရဝပုပ္ဖိယဝဂ္ဂ

၁။ မန္ဒာရဝပုပ္ဖိယတ္ထေရအပဒါန

၁။

‘‘တာဝတိံသာ ဣဓါဂန္တွာ၊ မင်္ဂလော နာမ မာဏဝေါ။

မန္ဒာရဝံ ဂဟေတွာန၊ ဝိပဿိဿ မဟေသိနော။

၂။

‘‘သမာဓိနာ နိသိန္နဿ၊ မတ္ထကေ ဓါရယိံ အဟံ။

သတ္တာဟံ ဓါရယိတွာန၊ ဒေဝလောကံ ပုနာဂမိံ။

၃။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မန္ဒာရဝပုပ္ဖိယော ထေရော ဣမာ ဂါထာယော အဘာသိတ္ထာတိ။

မန္ဒာရဝပုပ္ဖိယတ္ထေရဿာပဒါနံ ပဌမံ။

၂။ ကက္ကာရုပုပ္ဖိယတ္ထေရအပဒါနံ

၅။

‘‘ယာမာ ဒေဝါ ဣဓါဂန္တွာ၊ ဂေါတမံ သိရိဝစ္ဆသံ။

ကက္ကာရုမာလံ [ဂေါက္ခနုမာလံ (သီ။)] ပဂ္ဂယှ၊ ဗုဒ္ဓဿ အဘိရောပယိံ။

၆။

‘‘ဒွေနဝုတေ ဣတော ကပ္ပေ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကက္ကာရုပုပ္ဖိယော [ဂေါက္ခနုပုပ္ဖိယော (က။)] ထေရော ဣမာ ဂါထာယော အဘာသိတ္ထာတိ။

ကက္ကာရုပုပ္ဖိယတ္ထေရဿာပဒါနံ ဒုတိယံ။

၃။ ဘိသမုဠာလဒါယကတ္ထေရအပဒါနံ

၈။

‘‘ဖုဿော နာမာသိ သမ္ဗုဒ္ဓေါ၊ သဗ္ဗဓမ္မာန ပါရဂူ။

ဝိဝေကကာမော သဗ္ဗညူ [သပ္ပညော (သီ။ သျာ။)]၊ အာဂဉ္ဆိ မမ သန္တိကေ။

၉။

‘‘တသ္မိံ စိတ္တံ ပသာဒေတွာ၊ မဟာကာရုဏိကေ ဇိနေ။

ဘိသမုဠာလံ ပဂ္ဂယှ၊ ဗုဒ္ဓသေဋ္ဌဿဒါသဟံ။

၁၀။

‘‘ဒွေနဝုတေ ဣတော ကပ္ပေ၊ ယံ ဘိသမဒဒိံ တဒါ။

ဒုဂ္ဂတိံ နာဘိဇာနာမိ၊ ဘိသဒါနဿိဒံ ဖလံ။

၁၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘိသမုဠာလဒါယကော ထေရော ဣမာ ဂါထာယော အဘာသိတ္ထာတိ။

ဘိသမုဠာလဒါယကတ္ထေရဿာပဒါနံ တတိယံ။

၄။ ကေသရပုပ္ဖိယတ္ထေရအပဒါနံ

၁၂။

‘‘ဝိဇ္ဇာဓရော တဒါ အာသိံ၊ ဟိမဝန္တမှိ ပဗ္ဗတေ။

အဒ္ဒသံ ဝိရဇံ ဗုဒ္ဓံ၊ စင်္ကမန္တံ မဟာယသံ။

၁၃။

‘‘တီဏိ ကေသရပုပ္ဖာနိ [ကေသရိပုပ္ဖာနိ (သီ။)]၊ သီသေ ကတွာနဟံ တဒါ။

ဥပသင်္ကမ္မ သမ္ဗုဒ္ဓံ၊ ဝေဿဘုံ အဘိပူဇယိံ။

၁၄။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကေသရပုပ္ဖိယော ထေရော ဣမာ ဂါထာယော အဘာသိတ္ထာတိ။

ကေသရပုပ္ဖိယတ္ထေရဿာပဒါနံ စတုတ္ထံ။

၅။ အင္ကောလပုပ္ဖိယတ္ထေရအပဒါနံ

၁၆။

‘‘ပဒုမော နာမ သမ္ဗုဒ္ဓေါ၊ စိတ္တကူဋေ ဝသီ တဒါ။

ဒိသွာန တံ အဟံ ဗုဒ္ဓံ၊ သယမ္ဘုံ အပရာဇိတံ [ဥပဂစ္ဆိဟံ (သီ။ သျာ။)]။

၁၇။

‘‘အင္ကောလံ ပုပ္ဖိတံ ဒိသွာ၊ ဩစိနိတွာနဟံ တဒါ။

ဥပဂန္တွာန သမ္ဗုဒ္ဓံ၊ ပူဇယိံ ပဒုမံ ဇိနံ။

၁၈။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အင္ကောလပုပ္ဖိယော ထေရော ဣမာ ဂါထာယော အဘာသိတ္ထာတိ။

အင္ကောလပုပ္ဖိယတ္ထေရဿာပဒါနံ ပဉ္စမံ။

၆။ ကဒမ္ဗပုပ္ဖိယတ္ထေရအပဒါနံ

၂၀။

‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ။

ကဉ္စနဂ္ဃိယသင်္ကာသံ၊ ဗာတ္တိံသဝရလက္ခဏံ။

၂၁။

‘‘နိသဇ္ဇ ပါသာဒဝရေ၊ အဒ္ဒသံ လောကနာယကံ။

ကဒမ္ဗပုပ္ဖံ ပဂ္ဂယှ၊ ဝိပသ္သိံ အဘိပူဇယိံ။

၂၂။

‘‘ဧကနဝုတိတော ကပ္ပေ၊ ယံ ဗုဒ္ဓမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဒမ္ဗပုပ္ဖိယော ထေရော ဣမာ ဂါထာယော အဘာသိတ္ထာတိ။

ကဒမ္ဗပုပ္ဖိယတ္ထေရဿာပဒါနံ ဆဋ္ဌံ။

၇။ ဥဒ္ဒါလကပုပ္ဖိယတ္ထေရအပဒါနံ

၂၄။

‘‘အနောမော [သုဇာတော (သျာ။)၊ အနုမော (က။)] နာမ သမ္ဗုဒ္ဓေါ၊ ဂင်္ဂါကူလေ ဝသီ တဒါ။

ဥဒ္ဒါလကံ ဂဟေတွာန၊ ပူဇယိံ အပရာဇိတံ။

၂၅။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒ္ဒါလကပုပ္ဖိယော ထေရော ဣမာ ဂါထာယော အဘာသိတ္ထာတိ။

ဥဒ္ဒါလကပုပ္ဖိယတ္ထေရဿာပဒါနံ သတ္တမံ။

၈။ ဧကစမ္ပကပုပ္ဖိယတ္ထေရအပဒါနံ

၂၇။

‘‘ဥပသန္တော စ သမ္ဗုဒ္ဓေါ၊ ဝသတီ ပဗ္ဗတန္တရေ။

ဧကစမ္ပကမာဒါယ၊ ဥပဂစ္ဆိံ နရုတ္တမံ။

၂၈။

‘‘ပသန္နစိတ္တော သုမနော၊ ပစ္စေကမုနိမုတ္တမံ။

ဥဘောဟတ္ထေဟိ ပဂ္ဂယှ၊ ပူဇယိံ အပရာဇိတံ။

၂၉။

‘‘ပဉ္စသဋ္ဌိမှိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကစမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ။

ဧကစမ္ပကပုပ္ဖိယတ္ထေရဿာပဒါနံ အဋ္ဌမံ။

၉။ တိမိရပုပ္ဖိယတ္ထေရအပဒါနံ

၃၁။

‘‘စန္ဒဘာဂါနဒီတီရေ၊ အနုသောတံ ဝဇာမဟံ။

အဒ္ဒသံ ဝိရဇံ ဗုဒ္ဓံ၊ သာလရာဇံဝ ဖုလ္လိတံ။

၃၂။

‘‘ပသန္နစိတ္တော သုမနော၊ ပစ္စေကမုနိမုတ္တမံ။

ဂဟေတွာ တိမိရံ ပုပ္ဖံ၊ မတ္ထကေ ဩကိရိံ အဟံ။

၃၃။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိမိရပုပ္ဖိယော ထေရော ဣမာ ဂါထာယော အဘာသိတ္ထာတိ။

တိမိရပုပ္ဖိယတ္ထေရဿာပဒါနံ နဝမံ။

၁၀။ သဠလပုပ္ဖိယတ္ထေရအပဒါနံ

၃၅။

‘‘စန္ဒဘာဂါနဒီတီရေ ၊ အဟောသိံ ကိန္နရော တဒါ။

တတ္ထဒ္ဒသံ ဒေဝဒေဝံ၊ စင်္ကမန္တံ နရာသဘံ။

၃၆။

‘‘ဩစိနိတွာန သဠလံ၊ ပုပ္ဖံ ဗုဒ္ဓဿဒါသဟံ။

ဥပသိင္ဃိ မဟာဝီရော၊ သဠလံ ဒေဝဂန္ဓိကံ။

၃၇။

‘‘ပဋိဂ္ဂဟေတွာ သမ္ဗုဒ္ဓေါ၊ ဝိပဿီ လောကနာယကော။

ဥပသိင္ဃိ မဟာဝီရော၊ ပေက္ခမာနဿ မေ သတော။

၃၈။

‘‘ပသန္နစိတ္တော သုမနော၊ ဝန္ဒိတွာ ဒွိပဒုတ္တမံ။

အဉ္ဇလိံ ပဂ္ဂဟေတွာန၊ ပုန ပဗ္ဗတမာရုဟိံ။

၃၉။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဠလပုပ္ဖိယော ထေရော ဣမာ ဂါထာယော အဘာသိတ္ထာတိ။

သဠလပုပ္ဖိယတ္ထေရဿာပဒါနံ ဒသမံ။

မန္ဒာရဝပုပ္ဖိယဝဂ္ဂေါ သတ္တတိံသတိမော။

တဿုဒ္ဒါနံ –

မန္ဒာရဝဉ္စ ကက္ကာရု၊ ဘိသကေသရပုပ္ဖိယော။

အင္ကောလကော ကဒမ္ဗီ စ၊ ဥဒ္ဒါလီ ဧကစမ္ပကော။

တိမိရံ သဠလဉ္စေဝ၊ ဂါထာ တာလီသမေဝ စ။