သဒ္ဒသညကဝဂ္ဂ

၃၆။ သဒ္ဒသညကဝဂ္ဂ

၁။ သဒ္ဒသညကတ္ထေရအပဒါန

၁။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

တတ္ထဒ္ဒသာသိံ သမ္ဗုဒ္ဓံ၊ ဒေဝသံဃပုရက္ခတံ။

၂။

‘‘စတုသစ္စံ ပကာသေန္တံ၊ ဥဒ္ဓရန္တံ မဟာဇနံ။

အဿောသိံ မဓုရံ ဝါစံ၊ ကရဝီကရုဒေါပမံ [ရုတောပမံ (?)]။

၃။

‘‘ဗြဟ္မသရဿ မုနိနော၊ သိခိနော လောကဗန္ဓုနော။

ဃောသေ စိတ္တံ ပသာဒေတွာ၊ ပတ္တောမှိ အာသဝက္ခယံ။

၄။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပသာဒဿ ဣဒံ ဖလံ။

၅။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ။

သဒ္ဒသညကတ္ထေရဿာပဒါနံ ပဌမံ။

၂။ ယဝကလာပိယတ္ထေရအပဒါနံ

၆။

‘‘နဂရေ အရုဏဝတိယာ၊ အာသိံ ယဝသိကော တဒါ။

ပန္ထေ ဒိသွာန သမ္ဗုဒ္ဓံ၊ ယဝကလာပံ သန္ထရိံ [ယဝကလာပမဝတ္ထရိံ (သီ။)]။

၇။

‘‘အနုကမ္ပကော ကာရုဏိကော၊ သိခီ လောကဂ္ဂနာယကော။

မမ သင်္ကပ္ပမညာယ၊ နိသီဒိ ယဝသန္ထရေ။

၈။

‘‘ဒိသွာ နိသိန္နံ ဝိမလံ၊ မဟာဈာယိံ ဝိနာယကံ။

ပါမောဇ္ဇံ ဇနယိတွာန၊ တတ္ထ ကာလင်္ကတော အဟံ။

၉။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ယဝတ္ထရေ ဣဒံ ဖလံ။

၁၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ယဝကလာပိယော ထေရော ဣမာ ဂါထာယော အဘာသိတ္ထာတိ။

ယဝကလာပိယတ္ထေရဿာပဒါနံ ဒုတိယံ။

၃။ ကိံသုကပူဇကတ္ထေရအပဒါနံ

၁၁။

‘‘ကိံသုကံ ပုပ္ဖိတံ ဒိသွာ၊ ပဂ္ဂဟေတွာန အဉ္ဇလိံ။

ဗုဒ္ဓံ သရိတွာ သိဒ္ဓတ္ထံ၊ အာကာသေ အဘိပူဇယိံ။

၁၂။

‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိံသုကပူဇကော ထေရော ဣမာ ဂါထာယော အဘာသိတ္ထာတိ။

ကိံသုကပူဇကတ္ထေရဿာပဒါနံ တတိယံ။

၄။ သကောသကကောရဏ္ဍဒါယကတ္ထေရအပဒါနံ

၁၄။

‘‘အက္ကန္တဉ္စ ပဒံ ဒိသွာ၊ သိခိနော လောကဗန္ဓုနော။

ဧကံသံ အဇိနံ ကတွာ၊ ပဒသေဋ္ဌံ အဝန္ဒဟံ။

၁၅။

‘‘ကောရဏ္ဍံ ပုပ္ဖိတံ ဒိသွာ၊ ပါဒပံ ဓရဏီရုဟံ။

သကောသကံ [သကောဋကံ (သီ။ သျာ။)] ဂဟေတွာန၊ ပဒစက္ကံ အပူဇယိံ။

၁၆။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပဒပူဇာယိဒံ ဖလံ။

၁၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သကောသက [သကောဋက (သီ။ သျာ။)] ကောရဏ္ဍဒါယကော ထေရော ဣမာ ဂါထာယော အဘာသိတ္ထာတိ။

သကောသကကောရဏ္ဍဒါယကတ္ထေရဿာပဒါနံ စတုတ္ထံ။

၅။ ဒဏ္ဍဒါယကတ္ထေရအပဒါနံ

၁၈။

‘‘ကာနနံ ဝနမောဂယှ၊ ဝေဠုံ ဆေတွာနဟံ တဒါ။

အာလမ္ဗနံ ကရိတွာန၊ သံဃဿ အဒဒံ အဟံ။

၁၉။

‘‘တေန စိတ္တပ္ပသာဒေန၊ သုဗ္ဗတေ အဘိဝါဒိယ။

အာလမ္ဗနမ္ပိ ဒတွာန၊ ပက္ကာမိံ ဥတ္တရာမုခေါ။

၂၀။

‘‘စတုန္နဝုတိတော ကပ္ပေ၊ ယံ ဒဏ္ဍမဒဒိံ တဒါ။

ဒုဂ္ဂတိံ နာဘိဇာနာမိ၊ ဒဏ္ဍဒါနဿိဒံ ဖလံ။

၂၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒဏ္ဍဒါယကော ထေရော ဣမာ ဂါထာယော အဘာသိတ္ထာတိ။

ဒဏ္ဍဒါယကတ္ထေရဿာပဒါနံ ပဉ္စမံ။

၆။ အမ္ဗယာဂုဒါယကတ္ထေရအပဒါနံ

၂၂။

‘‘သတရံသီ နာမ သမ္ဗုဒ္ဓေါ၊ သယမ္ဘူ အပရာဇိတော။

ဝုဋ္ဌဟိတွာ သမာဓိမှာ၊ ဘိက္ခာယ မမုပါဂမိ။

၂၃။

‘‘ပစ္စေကဗုဒ္ဓံ ဒိသွာန၊ အမ္ဗယာဂုံ အဒါသဟံ။

ဝိပ္ပသန္နမနံ တဿ၊ ဝိပ္ပသန္နေန စေတသာ။

၂၄။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ အမ္ဗယာဂုယိဒံ ဖလံ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗယာဂုဒါယကော ထေရော ဣမာ ဂါထာယော အဘာသိတ္ထာတိ။

အမ္ဗယာဂုဒါယကတ္ထေရဿာပဒါနံ ဆဋ္ဌံ။

၇။ သုပုဋကပူဇကတ္ထေရအပဒါနံ

၂၆။

‘‘ဒိဝါဝိဟာရာ နိက္ခန္တော၊ ဝိပဿီ လောကနာယကော။

ဘိက္ခာယ ဝိစရန္တော သော၊ မမ သန္တိကုပါဂမိ။

၂၇။

‘‘တတော ပတီတော သုမနော၊ ဗုဒ္ဓသေဋ္ဌဿ တာဒိနော။

လောဏသုပုဋကံ ဒတွာ၊ ကပ္ပံ သဂ္ဂမှိ မောဒဟံ။

၂၈။

‘‘ဧကနဝုတိတော ကပ္ပေ၊ ယံ ပုဋကမဒါသဟံ။

ဒုဂ္ဂတိံ နာဘိဇာနာမိ၊ ပုဋကဿ ဣဒံ ဖလံ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုပုဋကပူဇကော ထေရော ဣမာ ဂါထာယော အဘာသိတ္ထာတိ။

သုပုဋကပူဇကတ္ထေရဿာပဒါနံ သတ္တမံ။

၈။ မဉ္စဒါယကတ္ထေရအပဒါနံ

၃၀။

‘‘ဝိပဿိနော ဘဂဝတော၊ လောကဇေဋ္ဌဿ တာဒိနော။

ဧကံ မဉ္စံ မယာ ဒိန္နံ၊ ပသန္နေန သပါဏိနာ။

၃၁။

‘‘ဟတ္ထိယာနံ အဿယာနံ၊ ဒိဗ္ဗယာနံ သမဇ္ဈဂံ။

တေန မဉ္စကဒါနေန၊ ပတ္တောမှိ အာသဝက္ခယံ။

၃၂။

‘‘ဧကနဝုတိတော ကပ္ပေ၊ ယံ မဉ္စမဒဒိံ တဒါ။

ဒုဂ္ဂတိံ နာဘိဇာနာမိ၊ မဉ္စဒါနဿိဒံ ဖလံ။

၃၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဉ္စဒါယကော ထေရော ဣမာ ဂါထာယော အဘာသိတ္ထာတိ။

မဉ္စဒါယကတ္ထေရဿာပဒါနံ အဋ္ဌမံ။

၉။ သရဏဂမနိယတ္ထေရအပဒါနံ

၃၄။

‘‘အာရုဟိမှ တဒါ နာဝံ၊ ဘိက္ခု စာဇီဝကော စဟံ။

နာဝါယ ဘိဇ္ဇမာနာယ၊ ဘိက္ခု မေ သရဏံ အဒါ။

၃၅။

‘‘ဧကတ္တိံသေ ဣတော ကပ္ပေ၊ ယဉ္စ မေ သရဏံ အဒါ။

ဒုဂ္ဂတိံ နာဘိဇာနာမိ၊ သရဏာဂမနေ ဖလံ။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သရဏဂမနိယော ထေရော ဣမာ ဂါထာယော အဘာသိတ္ထာတိ။

သရဏဂမနိယတ္ထေရဿာပဒါနံ နဝမံ။

၁၀။ ပိဏ္ဍပါတိကတ္ထေရအပဒါနံ

၃၇။

‘‘တိဿော နာမာသိ သမ္ဗုဒ္ဓေါ၊ ဝိဟာသိ ဝိပိနေ တဒါ။

တုသိတာ ဟိ ဣဓါဂန္တွာ၊ ပိဏ္ဍပါတံ အဒါသဟံ။

၃၈။

‘‘သမ္ဗုဒ္ဓမဘိဝါဒေတွာ၊ တိဿံ နာမ မဟာယသံ။

သကံ စိတ္တံ ပသာဒေတွာ၊ တုသိတံ အဂမာသဟံ။

၃၉။

‘‘ဒွေနဝုတေ ဣတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ပိဏ္ဍပါတဿိဒံ ဖလံ။

၄၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပိဏ္ဍပါတိကော ထေရော ဣမာ ဂါထာယော အဘာသိတ္ထာတိ။

ပိဏ္ဍပါတိကတ္ထေရဿာပဒါနံ ဒသမံ။

သဒ္ဒသညကဝဂ္ဂေါ ဆတ္တိံသတိမော။

တဿုဒ္ဒါနံ –

သဒ္ဒသညီ ယဝသိကော၊ ကိံသုကောရဏ္ဍပုပ္ဖိယော။

အာလမ္ဗနော အမ္ဗယာဂု၊ သုပုဋီ မဉ္စဒါယကော။

သရဏံ ပိဏ္ဍပါတော စ၊ ဂါထာ တာလီသမေဝ စ။