ဧကပဒုမိယဝဂ္ဂ

၃၅။ ဧကပဒုမိယဝဂ္ဂ

၁။ ဧကပဒုမိယတ္ထေရအပဒါန

၁။

‘‘ပဒုမုတ္တရော နာမ ဇိနော၊ သဗ္ဗဓမ္မာန ပါရဂူ။

ဘဝါဘဝေ ဝိဘာဝေန္တော၊ တာရေသိ ဇနတံ ဗဟုံ။

၂။

‘‘ဟံသရာဇာ တဒါ ဟောမိ၊ ဒိဇာနံ ပဝရော အဟံ။

ဇာတဿရံ သမောဂယှ၊ ကီဠာမိ ဟံသကီဠိတံ။

၃။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

ဇာတဿရဿ ဥပရိ၊ အာဂစ္ဆိ တာဝဒေ ဇိနော။

၄။

‘‘ဒိသွာနဟံ ဒေဝဒေဝံ၊ သယမ္ဘုံ လောကနာယကံ။

ဝဏ္ဋေ ဆေတွာန ပဒုမံ၊ သတပတ္တံ မနောရမံ။

၅။

‘‘မုခတုဏ္ဍေန ပဂ္ဂယှ၊ ပသန္နော လောကနာယကေ [ဝိပ္ပသန္နေန စေတသာ (သျာ။)]။

ဥက္ခိပိတွာန ဂဂဏေ [ဥက္ခိပိတွာ နလာဋေန (က။)]၊ ဗုဒ္ဓသေဋ္ဌံ အပူဇယိံ။

၆။

‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။

အန္တလိက္ခေ ဌိတော သတ္ထာ၊ အကာ မေ အနုမောဒနံ။

၇။

‘‘‘ဣမိနာ ဧကပဒုမေန၊ စေတနာပဏိဓီဟိ စ။

ကပ္ပါနံ သတသဟဿံ၊ ဝိနိပါတံ န ဂစ္ဆသိ’။

၈။

‘‘ဣဒံ ဝတွာန သမ္ဗုဒ္ဓေါ၊ ဇလဇုတ္တမနာမကော။

မမ ကမ္မံ ပကိတ္တေတွာ၊ အဂမာ ယေန ပတ္ထိတံ။

၉။

‘‘သတသဟဿိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၀။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကပဒုမိယော ထေရော ဣမာ ဂါထာယော အဘာသိတ္ထာတိ။

ဧကပဒုမိယတ္ထေရဿာပဒါနံ ပဌမံ။

၂။ တီဏုပ္ပလမာလိယတ္ထေရအပဒါနံ

၁၁။

‘‘စန္ဒဘာဂါနဒီတီရေ ၊ အဟောသိံ ဝါနရော တဒါ။

အဒ္ဒသံ ဝိရဇံ ဗုဒ္ဓံ၊ နိသိန္နံ ပဗ္ဗတန္တရေ။

၁၂။

‘‘ဩဘာသေန္တံ ဒိသာ သဗ္ဗာ၊ သာလရာဇံဝ ဖုလ္လိတံ။

လက္ခဏဗျဉ္ဇနူပေတံ၊ ဒိသွာ အတ္တမနော အဟုံ။

၁၃။

‘‘ဥဒဂ္ဂစိတ္တော သုမနော၊ ဣတိယာ ဟဋ္ဌမာနသော။

တီဏိ ဥပ္ပလပုပ္ဖာနိ၊ မတ္ထကေ အဘိရောပယိံ။

၁၄။

‘‘ပုပ္ဖာနိ အဘိရောပေတွာ၊ ဝိပဿိဿ မဟေသိနော။

သဂါရဝေါ ဘဝိတွာန [ဂမိတွာန (သီ။)၊ နမိတွာန (က။)]၊ ပက္ကာမိံ ဥတ္တရာမုခေါ။

၁၅။

‘‘ဂစ္ဆန္တော ပဋိကုဋိကော၊ ဝိပ္ပသန္နေန စေတသာ။

သေလန္တရေ ပတိတွာန [ပပတိတွာ (သျာ။ က။)]၊ ပါပုဏိံ ဇီဝိတက္ခယံ။

၁၆။

‘‘တေန ကမ္မေန သုကတေန၊ စေတနာပဏိဓီဟိ စ။

ဇဟိတွာ မာနုသံ ဒေဟံ [ပုရိမံ ဇာတိံ (?) ဥပရိ ၃၈ ဝဂ္ဂေ တတိယာပဒါနေ ဧဝမေဝ ဒိဿတိ]၊ တာဝတိံသမဂစ္ဆဟံ။

၁၇။

‘‘သတာနံ တီဏိက္ခတ္တုဉ္စ၊ ဒေဝရဇ္ဇံ အကာရယိံ။

သတာနံ ပဉ္စက္ခတ္တုဉ္စ၊ စက္ကဝတ္တီ အဟောသဟံ။

၁၈။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တီဏုပ္ပလမာလိယော [တိဥပ္ပလမာလိယော (သီ။)] ထေရော ဣမာ ဂါထာယော အဘာသိတ္ထာတိ။

တီဏုပ္ပလမာလိယတ္ထေရဿာပဒါနံ ဒုတိယံ။

၃။ ဓဇဒါယကတ္ထေရအပဒါနံ

၂၀။

‘‘တိဿော နာမ အဟု သတ္ထာ၊ လောကဇေဋ္ဌော နရာသဘော။

တယောပဓိက္ခယေ [တဿောပဓိက္ခယေ (သီ။)] ဒိသွာ၊ ဓဇံ အာရောပိတံ မယာ။

၂၁။

‘‘တေန ကမ္မေန သုကတေန၊ စေတနာပဏိဓီဟိ စ။

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ။

၂၂။

‘‘သတာနံ တီဏိက္ခတ္တုဉ္စ၊ ဒေဝရဇ္ဇံ အကာရယိံ။

သတာနံ ပဉ္စက္ခတ္တုဉ္စ၊ စက္ကဝတ္တီ အဟောသဟံ။

၂၃။

‘‘ပဒေသရဇ္ဇံ ဝိပုလံ၊ ဂဏနာတော အသံခိယံ။

အနုဘောမိ သကံ ကမ္မံ၊ ပုဗ္ဗေ သုကတမတ္တနော။

၂၄။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဓဇဒါနဿိဒံ ဖလံ။

၂၅။

‘‘ဣစ္ဆမာနော စဟံ အဇ္ဇ၊ သကာနနံ သပဗ္ဗတံ။

ခေါမဒုဿေန ဆာဒေယျံ၊ တဒါ မယှံ ကတေ ဖလံ။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဓဇဒါယကော ထေရော ဣမာ ဂါထာယော အဘာသိတ္ထာတိ။

ဓဇဒါယကတ္ထေရဿာပဒါနံ တတိယံ။

၄။ တိကိင်္ကဏိပူဇကတ္ထေရအပဒါနံ

၂၇။

‘‘ဟိမဝန္တဿာဝိဒူရေ၊ ဘူတဂဏော နာမ ပဗ္ဗတော။

တတ္ထဒ္ဒသံ ပံသုကူလံ၊ ဒုမဂ္ဂမှိ ဝိလဂ္ဂိတံ။

၂၈။

‘‘တီဏိ ကိင်္ကဏိပုပ္ဖာနိ၊ ဩစိနိတွာနဟံ တဒါ။

ဟဋ္ဌော ဟဋ္ဌေန စိတ္တေန၊ ပံသုကူလံ အပူဇယိံ။

၂၉။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ တိဏ္ဏံ ပုပ္ဖာနိဒံ ဖလံ။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိကိင်္ကဏိပူဇကော ထေရော ဣမာ ဂါထာယော အဘာသိတ္ထာတိ။

တိကိင်္ကဏိပူဇကတ္ထေရဿာပဒါနံ စတုတ္ထံ။

၅။ နဠာဂါရိကတ္ထေရအပဒါနံ

၃၁။

‘‘ဟိမဝန္တဿာဝိဒူရေ ၊ ဟာရိတော နာမ ပဗ္ဗတော။

သယမ္ဘူ နာရဒေါ နာမ၊ ရုက္ခမူလေ ဝသီ တဒါ။

၃၂။

‘‘နဠာဂါရံ ကရိတွာန၊ တိဏေန ဆာဒယိံ အဟံ။

စင်္ကမံ သောဓယိတွာန၊ သယမ္ဘုဿ အဒါသဟံ။

၃၃။

‘‘စတုဒ္ဒသသု ကပ္ပေသု၊ ဒေဝလောကေ ရမိံ အဟံ။

စတုသတ္တတိက္ခတ္တုဉ္စ၊ ဒေဝရဇ္ဇံ အကာရယိံ။

၃၄။

‘‘စတုသတ္တတိ [သတ္တသတ္တတိ (သီ။)] က္ခတ္တုဉ္စ ၊ စက္ကဝတ္တီ အဟောသဟံ။

ပဒေသရဇ္ဇံ ဝိပုလံ၊ ဂဏနာတော အသံခိယံ။

၃၅။

‘‘ဥဗ္ဗိဒ္ဓံ ဘဝနံ မယှံ၊ ဣန္ဒလဋ္ဌီဝ ဥဂ္ဂတံ။

သဟဿထမ္ဘံ အတုလံ၊ ဝိမာနံ သပဘဿရံ။

၃၆။

‘‘ဒွေ သမ္ပတ္တီ အနုဘောတွာ၊ သုက္ကမူလေန စောဒိတော။

ဂေါတမဿ ဘဂဝတော၊ သာသနေ ပဗ္ဗဇိံ အဟံ။

၃၇။

‘‘ပဓါနပဟိတတ္တောမှိ ၊ ဥပသန္တော နိရူပဓိ။

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နဠာဂါရိကော ထေရော ဣမာ ဂါထာယော အဘာသိတ္ထာတိ။

နဠာဂါရိကတ္ထေရဿာပဒါနံ ပဉ္စမံ။

၆။ စမ္ပကပုပ္ဖိယတ္ထေရအပဒါနံ

၃၉။

‘‘ဟိမဝန္တဿာဝိဒူရေ၊ ဇာပလော [စာပလော (သီ။)၊ ဆာပလော (သျာ။)] နာမ ပဗ္ဗတော။

ဗုဒ္ဓေါ သုဒဿနော နာမ၊ ဝိဟာသိ ပဗ္ဗတန္တရေ။

၄၀။

‘‘ပုပ္ဖံ ဟေမဝန္တံ [ဟေမဝတံ (သီ။)၊ ဟေမဝဏ္ဏံ (သျာ။)] ဂယှ၊ ဂစ္ဆံ ဝေဟာယသေနဟံ။

အဒ္ဒသံ ဝိရဇံ ဗုဒ္ဓံ၊ ဩဃတိဏ္ဏမနာသဝံ။

၄၁။

‘‘သတ္တ စမ္ပကပုပ္ဖာနိ၊ သီသေ ကတွာနဟံ တဒါ။

ဗုဒ္ဓဿ အဘိရောပေသိံ၊ သယမ္ဘုဿ မဟေသိနော။

၄၂။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ။

စမ္ပကပုပ္ဖိယတ္ထေရဿာပဒါနံ ဆဋ္ဌံ။

၇။ ပဒုမပူဇကတ္ထေရအပဒါနံ

၄၄။

‘‘ဟိမဝန္တဿာဝိဒူရေ ၊ ရောမသော နာမ ပဗ္ဗတော။

ဗုဒ္ဓေါပိ သမ္ဘဝေါ နာမ၊ အဗ္ဘောကာသေ ဝသီ တဒါ။

၄၅။

‘‘ဘဝနာ နိက္ခမိတွာန၊ ပဒုမံ ဓါရယိံ အဟံ။

ဧကာဟံ ဓါရယိတွာန၊ ပုန ဘဝနုပါဂမိံ။

၄၆။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမပူဇကော ထေရော ဣမာ ဂါထာယော အဘာသိတ္ထာတိ။

ပဒုမပူဇကတ္ထေရဿာပဒါနံ သတ္တမံ။

တေရသမံ ဘာဏဝါရံ။

၈။ တိဏမုဋ္ဌိဒါယကတ္ထေရအပဒါနံ

၄၈။

‘‘ဟိမဝန္တဿာဝိဒူရေ၊ လမ္ဗကော နာမ ပဗ္ဗတော။

ဥပတိဿော နာမ သမ္ဗုဒ္ဓေါ၊ အဗ္ဘောကာသမှိ စင်္ကမိ။

၄၉။

‘‘မိဂလုဒ္ဒေါ တဒါ အာသိံ၊ အရညေ ကာနနေ အဟံ။

ဒိသွာန တံ ဒေဝဒေဝံ၊ သယမ္ဘုံ အပရာဇိတံ။

၅၀။

‘‘ဝိပ္ပသန္နေန စိတ္တေန၊ တဒါ တဿ မဟေသိနော။

နိသီဒနတ္ထံ ဗုဒ္ဓဿ၊ တိဏမုဋ္ဌိမဒါသဟံ။

၅၁။

‘‘ဒတွာန ဒေဝဒေဝဿ၊ ဘိယျော စိတ္တံ ပသာဒယိံ။

သမ္ဗုဒ္ဓံ အဘိဝါဒေတွာ၊ ပက္ကာမိံ ဥတ္တရာမုခေါ။

၅၂။

‘‘အစိရံ ဂတမတ္တံ မံ၊ မိဂရာဇာ အပေါထယိ [အဟေဌယိ (သီ။ သျာ။)]။

သီဟေန ပေါထိတော [ပါတိတော (သီ။ သျာ။)] သန္တော၊ တတ္ထ ကာလင်္ကတော အဟံ။

၅၃။

‘‘အာသန္နေ မေ ကတံ ကမ္မံ၊ ဗုဒ္ဓသေဋ္ဌေ အနာသဝေ။

သုမုတ္တော သရဝေဂေါဝ၊ ဒေဝလောကံ အဂဉ္ဆဟံ။

၅၄။

‘‘ယူပေါ တတ္ထ သုဘော အာသိ၊ ပုညကမ္မာဘိနိမ္မိတော။

သဟဿကဏ္ဍော သတဘေဏ္ဍု၊ ဓဇာလု ဟရိတာမယော။

၅၅။

‘‘ပဘာ နိဒ္ဓါဝတေ တဿ၊ သတရံသီဝ ဥဂ္ဂတော။

အာကိဏ္ဏော ဒေဝကညာဟိ၊ အာမောဒိံ ကာမကာမဟံ။

၅၆။

‘‘ဒေဝလောကာ စဝိတွာန၊ သုက္ကမူလေန စောဒိတော။

အာဂန္တွာန မနုဿတ္တံ၊ ပတ္တောမှိ အာသဝက္ခယံ။

၅၇။

‘‘စတုန္နဝုတိတော ကပ္ပေ၊ နိသီဒနမဒါသဟံ။

ဒုဂ္ဂတိံ နာဘိဇာနာမိ၊ တိဏမုဋ္ဌိယိဒံ ဖလံ။

၅၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏမုဋ္ဌိဒါယကော ထေရော ဣမာ ဂါထာယော အဘာသိတ္ထာတိ။

တိဏမုဋ္ဌိဒါယကတ္ထေရဿာပဒါနံ အဋ္ဌမံ။

၉။ တိန္ဒုကဖလဒါယကတ္ထေရအပဒါနံ

၅၉။

‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ။

အဒ္ဒသံ ဝိရဇံ ဗုဒ္ဓံ၊ ဩဃတိဏ္ဏမနာသဝံ။

၆၀။

‘‘တိန္ဒုကံ သဖလံ ဒိသွာ၊ ဘိန္ဒိတွာန သကောသကံ [သကောဋကံ (သီ။)၊ သကောဋိကံ (သျာ။)]။

ပသန္နစိတ္တော သုမနော၊ သယမ္ဘုဿ မဒါသဟံ [ဝေဿဘုဿ အဒါသဟံ (သီ။)]။

၆၁။

‘‘ဧကနဝုတိတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၆၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိန္ဒုကဖလဒါယကော ထေရော ဣမာ ဂါထာယော အဘာသိတ္ထာတိ။

တိန္ဒုကဖလဒါယကတ္ထေရဿာပဒါနံ နဝမံ။

၁၀။ ဧကဉ္ဇလိယတ္ထေရအပဒါနံ

၆၃။

‘‘ရောမသော [ရေဝတော (သီ။)] နာမ သမ္ဗုဒ္ဓေါ၊ နဒီကူလေ ဝသီ တဒါ။

အဒ္ဒသံ ဝိရဇံ ဗုဒ္ဓံ၊ ဣတရံသိံဝ ဘာဏုမံ။

၆၄။

‘‘ဥက္ကာမုခပဟဋ္ဌံဝ ၊ ခဒိရင်္ဂါရသန္နိဘံ။

ဩသဓိံဝ ဝိရောစန္တံ၊ ဧကဉ္ဇလိမကာသဟံ။

၆၅။

‘‘စတုန္နဝုတိတော ကပ္ပေ၊ ယံ အဉ္ဇလိမကာသဟံ။

ဒုဂ္ဂတိံ နာဘိဇာနာမိ၊ အဉ္ဇလိယာ ဣဒံ ဖလံ။

၆၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဉ္ဇလိယော ထေရော ဣမာ ဂါထာယော အဘာသိတ္ထာတိ။

ဧကဉ္ဇလိယတ္ထေရဿာပဒါနံ ဒသမံ။

ဧကပဒုမိယဝဂ္ဂေါ ပဉ္စတိံသတိမော။

တဿုဒ္ဒါနံ –

ပဒုမီ ဥပ္ပလမာလီ၊ ဓဇော ကိင်္ကဏိကံ နဠံ [ကိင်္ကဏိကော နဠော (သီ။)]။

စမ္ပကော ပဒုမော မုဋ္ဌိ၊ တိန္ဒုကေကဉ္ဇလီ တထာ။

ဆ စ သဋ္ဌိ စ ဂါထာယော၊ ဂဏိတာယော ဝိဘာဝိဘိ။