၃၃။ ဥမာပုပ္ဖိယဝဂ္ဂ
၁။ ဥမာပုပ္ဖိယတ္ထေရအပဒါန
၁။
‘‘သမာဟိတံ သမာပန္နံ၊ သိဒ္ဓတ္ထမပရာဇိတံ။
သမာဓိနာ ဥပဝိဋ္ဌံ၊ အဒ္ဒသာဟံ နရုတ္တမံ။
၂။
‘‘ဥမာပုပ္ဖံ ဂဟေတွာန၊ ဗုဒ္ဓဿ အဘိရောပယိံ။
သဗ္ဗပုပ္ဖာ ဧကသီသာ၊ ဥဒ္ဓံဝဏ္ဋာ အဓေါမုခါ။
၃။
‘‘သုစိတ္တာ ဝိယ တိဋ္ဌန္တေ၊ အာကာသေ ပုပ္ဖသန္ထရာ။
တေန စိတ္တပ္ပသာဒေန၊ တုသိတံ ဥပပဇ္ဇဟံ။
၄။
‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ။
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
၅။
‘‘ပဉ္စပညာသိတော ကပ္ပေ၊ ဧကော အာသိံ မဟီပတိ။
သမန္တဆဒနော နာမ၊ စက္ကဝတ္တီ မဟဗ္ဗလော။
၆။
‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ။
ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂါထာယော အဘာသိတ္ထာတိ။
ဥမာပုပ္ဖိယတ္ထေရဿာပဒါနံ ပဌမံ။
၂။ ပုလိနပူဇကတ္ထေရအပဒါနံ
၇။
‘‘ကကုဓံ ဝိလသန္တံဝ၊ နိသဘာဇာနိယံ ယထာ။
ဩသဓိံဝ ဝိရောစန္တံ၊ ဩဘာသန္တံ နရာသဘံ။
၈။
‘‘အဉ္ဇလိံ ပဂ္ဂဟေတွာန၊ အဝန္ဒိံ သတ္ထုနော အဟံ။
သတ္ထာရံ ပရိဝဏ္ဏေသိံ၊ သကကမ္မေန တောသယိံ [တောသိတော (သီ။)]။
၉။
‘‘သုသုဒ္ဓံ ပုလိနံ ဂယှ၊ ဂတမဂ္ဂေ သမောကိရိံ။
ဥစ္ဆင်္ဂေန ဂဟေတွာန၊ ဝိပဿိဿ မဟေသိနော။
၁၀။
‘‘တတော ဥပဍ္ဎပုလိနံ၊ ဝိပ္ပသန္နေန စေတသာ။
ဒိဝါဝိဟာရေ ဩသိဉ္စိံ၊ ဒွိပဒိန္ဒဿ တာဒိနော။
၁၁။
‘‘ဧကနဝုတိတော ကပ္ပေ၊ ပုလိနံ ယမသိဉ္စဟံ။
ဒုဂ္ဂတိံ နာဘိဇာနာမိ၊ ပုလိနဿ ဣဒံ ဖလံ။
၁၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပုလိနပူဇကော ထေရော ဣမာ ဂါထာယော အဘာသိတ္ထာတိ။
ပုလိနပူဇကတ္ထေရဿာပဒါနံ ဒုတိယံ။
၃။ ဟာသဇနကတ္ထေရအပဒါနံ
၁၃။
‘‘ဒုမဂ္ဂေ ပံသုကူလကံ [ပံသုကူလိကံ (သျာ။ က။)]၊ လဂ္ဂံ ဒိသွာန သတ္ထုနော။
အဉ္ဇလိံ ပဂ္ဂဟေတွာန၊ ဘိယျော ဥစ္စာရိတံ မယာ။
၁၄။
‘‘ဒူရတော ပန ဒိသွာန [ပတိဒိသွာန (သီ။ သျာ။)]၊ ဟာသော မေ ဥဒပဇ္ဇထ။
အဉ္ဇလိံ ပဂ္ဂဟေတွာန၊ ဘိယျော စိတ္တံ ပသာဒယိံ။
၁၅။
‘‘ဧကနဝုတိတော ကပ္ပေ၊ ယံ သညမလဘိံ တဒါ။
ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။
၁၆။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ဟာသဇနကော ထေရော ဣမာ ဂါထာယော အဘာသိတ္ထာတိ။
ဟာသဇနကတ္ထေရဿာပဒါနံ တတိယံ။
၄။ ယညသာမိကတ္ထေရအပဒါနံ
၁၇။
‘‘ဇာတိယာ သတ္တဝဿောဟံ၊ အဟောသိံ မန္တပါရဂူ။
ကုလဝတ္တံ [ကုလဝံသံ (သီ။ သျာ။)] အဓါရေသိံ၊ ယညော ဥဿာဟိတော မယာ။
၁၈။
‘‘စုလ္လာသီတိသဟဿာနိ ၊ ပသူ ဟညန္တိ မေ တဒါ။
သာရထမ္ဘုပနီတာနိ [တာရသ္မီဟိ ဥပနီတာနိ (က။)၊ သာရသ္မိံဟိ ဥပနီတာနိ (သျာ။)]၊ ယညတ္ထာယ ဥပဋ္ဌိတာ။
၁၉။
‘‘ဥက္ကာမုခပဟဋ္ဌောဝ ၊ ခဒိရင်္ဂါရသန္နိဘော။
ဥဒယန္တောဝ သူရိယော၊ ပုဏ္ဏမာယေဝ [ပုဏ္ဏမာသေဝ (သီ။)] စန္ဒိမာ။
၂၀။
‘‘သိဒ္ဓတ္ထော သဗ္ဗသိဒ္ဓတ္ထော၊ တိလောကမဟိတော ဟိတော။
ဥပဂန္တွာန သမ္ဗုဒ္ဓေါ၊ ဣဒံ ဝစနမဗြဝိ။
၂၁။
‘‘‘အဟိံသာ သဗ္ဗပါဏီနံ၊ ကုမာရ မမ ရုစ္စတိ။
ထေယျာ စ အတိစာရာ စ၊ မဇ္ဇပါနာ စ အာရတိ။
၂၂။
‘‘‘ရတိ စ သမစရိယာယ၊ ဗာဟုသစ္စံ ကတညုတာ။
ဒိဋ္ဌေ ဓမ္မေ ပရတ္ထ စ၊ ဓမ္မာ ဧတေ ပသံသိယာ။
၂၃။
‘‘‘ဧတေ ဓမ္မေ ဘာဝယိတွာ၊ သဗ္ဗသတ္တဟိတေ ရတော [ဟိတေသိတော (က။)]။
ဗုဒ္ဓေ စိတ္တံ ပသာဒေတွာ၊ ဘာဝေဟိ မဂ္ဂမုတ္တမံ’။
၂၄။
‘‘ဣဒံ ဝတွာန သဗ္ဗညူ၊ လောကဇေဋ္ဌော နရာသဘော။
မမေဝံ အနုသာသိတွာ၊ ဝေဟာသံ ဥဂ္ဂတော ဂတော။
၂၅။
‘‘ပုဗ္ဗေ စိတ္တံ ဝိသောဓေတွာ၊ ပစ္ဆာ စိတ္တံ ပသာဒယိံ။
တေန စိတ္တပ္ပသာဒေန၊ တုသိတံ ဥပပဇ္ဇဟံ။
၂၆။
‘‘စတုန္နဝုတိတော ကပ္ပေ၊ ယဒါ စိတ္တံ ပသာဒယိံ။
ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။
၂၇။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ယညသာမိကော ထေရော ဣမာ ဂါထာယော အဘာသိတ္ထာတိ။
ယညသာမိကတ္ထေရဿာပဒါနံ စတုတ္ထံ။
၅။ နိမိတ္တသညကတ္ထေရအပဒါနံ
၂၈။
‘‘စန္ဒဘာဂါနဒီတီရေ ၊ ဝသာမိ အဿမေ အဟံ။
သုဝဏ္ဏမိဂမဒ္ဒက္ခိံ၊ စရန္တံ ဝိပိနေ အဟံ။
၂၉။
‘‘မိဂေ စိတ္တံ ပသာဒေတွာ၊ လောကဇေဋ္ဌံ အနုဿရိံ။
တေန စိတ္တပ္ပသာဒေန၊ အညေ ဗုဒ္ဓေ အနုဿရိံ။
၃၀။
‘‘အဗ္ဘတီတာ စ ယေ ဗုဒ္ဓါ၊ ဝတ္တမာနာ အနာဂတာ။
ဧဝမေဝံ ဝိရောစန္တိ၊ မိဂရာဇာဝ တေ တယော။
၃၁။
‘‘စတုန္နဝုတိတော ကပ္ပေ၊ ယံ သညမလဘိံ တဒါ။
ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။
၃၂။
‘‘သတ္တဝီသေ ဣတော ကပ္ပေ၊ ဧကော အာသိံ မဟီပတိ။
အရညသတ္ထော နာမေန၊ စက္ကဝတ္တီ မဟဗ္ဗလော။
၃၃။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ နိမိတ္တသညကော ထေရော ဣမာ ဂါထာယော အဘာသိတ္ထာတိ။
နိမိတ္တသညကတ္ထေရဿာပဒါနံ ပဉ္စမံ။
၆။ အန္နသံသာဝကတ္ထေရအပဒါနံ
၃၄။
‘‘သုဝဏ္ဏဝဏ္ဏံ သမ္ဗုဒ္ဓံ၊ ဂစ္ဆန္တံ အန္တရာပဏေ။
ကဉ္စနဂ္ဃိယသင်္ကာသံ၊ ဗာတ္တိံသဝရလက္ခဏံ။
၃၅။
‘‘သိဒ္ဓတ္ထံ သဗ္ဗသိဒ္ဓတ္ထံ၊ အနေဇံ အပရာဇိတံ။
သမ္ဗုဒ္ဓံ အတိနာမေတွာ၊ ဘောဇယိံ တံ မဟာမုနိံ။
၃၆။
‘‘မုနိ ကာရုဏိကော လောကေ၊ ဩဘာသယိ မမံ တဒါ။
ဗုဒ္ဓေ စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။
၃၇။
‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ။
ဒုဂ္ဂတိံ နာဘိဇာနာမိ၊ ဘိက္ခာဒါနဿိဒံ ဖလံ။
၃၈။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ အန္နသံသာဝကော ထေရော ဣမာ ဂါထာယော အဘာသိတ္ထာတိ။
အန္နသံသာဝကတ္ထေရဿာပဒါနံ ဆဋ္ဌံ။
၇။ နိဂ္ဂုဏ္ဍိပုပ္ဖိယတ္ထေရအပဒါနံ
၃၉။
‘‘ယဒါ ဒေဝေါ ဒေဝကာယာ၊ စဝတေ အာယုသင်္ခယာ။
တယော သဒ္ဒါ နိစ္ဆရန္တိ၊ ဒေဝါနံ အနုမောဒတံ။
၄၀။
‘‘‘ဣတော ဘော သုဂတိံ ဂစ္ဆ၊ မနုဿာနံ သဟဗျတံ။
မနုဿဘူတော သဒ္ဓမ္မေ၊ လဘ သဒ္ဓံ အနုတ္တရံ။
၄၁။
‘‘‘သာ တေ သဒ္ဓါ နိဝိဋ္ဌာဿ၊ မူလဇာတာ ပတိဋ္ဌိတာ။
ယာဝဇီဝံ အသံဟီရာ၊ သဒ္ဓမ္မေ သုပ္ပဝေဒိတေ။
၄၂။
‘‘‘ကာယေန ကုသလံ ကတွာ၊ ဝါစာယ ကုသလံ ဗဟုံ။
မနသာ ကုသလံ ကတွာ၊ အဗျာပဇ္ဇံ နိရူပဓိံ။
၄၃။
‘‘‘တတော ဩပဓိကံ ပုညံ၊ ကတွာ ဒါနေန တံ ဗဟုံ။
အညေပိ မစ္စေ သဒ္ဓမ္မေ၊ ဗြဟ္မစရိယေ နိဝေသယ’။
၄၄။
‘‘ဣမာယ အနုကမ္ပာယ၊ ဒေဝါဒေဝံ ယဒါ ဝိဒူ။
စဝန္တံ အနုမောဒန္တိ၊ ဧဟိ ဒေဝ ပုနပ္ပုနံ [ဒေဝပုရံ ပုန (သီ။)]။
၄၅။
‘‘သံဝေဂေါ မေ [သံဝိဂ္ဂေါဟံ (သျာ။)] တဒါ အာသိ၊ ဒေဝသံဃေ သမာဂတေ။
ကံသု နာမ အဟံ ယောနိံ၊ ဂမိဿာမိ ဣတော စုတော။
၄၆။
‘‘မမ သံဝေဂမညာယ၊ သမဏော ဘာဝိတိန္ဒ္ရိယော။
မမုဒ္ဓရိတုကာမော သော၊ အာဂစ္ဆိ မမ သန္တိကံ။
၄၇။
‘‘သုမနော နာမ နာမေန၊ ပဒုမုတ္တရသာဝကော။
အတ္ထဓမ္မာနုသာသိတွာ၊ သံဝေဇေသိ မမံ တဒါ။
ဒွါဒသမံ ဘာဏဝါရံ။
၄၈။
‘‘တဿာဟံ ဝစနံ သုတွာ၊ ဗုဒ္ဓေ စိတ္တံ ပသာဒယိံ။
တံ ဓီရံ အဘိဝါဒေတွာ၊ တတ္ထ ကာလံကတော အဟံ။
၄၉။
‘‘ဥပပဇ္ဇိံ သ [ဥပပဇ္ဇိဿံ (သီ။)] တတ္ထေဝ၊ သုက္ကမူလေန စောဒိတော။
ဝသန္တော မာတုကုစ္ဆိမှိ၊ ပုန ဓါရေတိ မာတုယာ။
၅၀။
‘‘တမှာ ကာယာ စဝိတွာန၊ တိဒသေ ဥပပဇ္ဇဟံ။
ဧတ္ထန္တရေ န ပဿာမိ၊ ဒေါမနဿမဟံ တဒါ။
၅၁။
‘‘တာဝတိံသာ စဝိတွာန၊ မာတုကုစ္ဆိံ သမောက္ကမိံ။
နိက္ခမိတွာန ကုစ္ဆိမှာ၊ ကဏှသုက္ကံ အဇာနဟံ။
၅၂။
‘‘ဇာတိယာ သတ္တဝဿောဝ [ဇာတိယာ သတ္တဝဿေန (သျာ။)]၊ အာရာမံ ပါဝိသိံ အဟံ။
ဂေါတမဿ ဘဂဝတော၊ သကျပုတ္တဿ တာဒိနော။
၅၃။
‘‘ဝိတ္ထာရိကေ [ဝိတ္ထာရိတေ (သီ။ က။)] ပါဝစနေ၊ ဗာဟုဇညမှိ သာသနေ။
အဒ္ဒသံ သာသနကရေ၊ ဘိက္ခဝေါ တတ္ထ သတ္ထုနော။
၅၄။
‘‘သာဝတ္ထိ နာမ နဂရံ၊ ရာဇာ တတ္ထာသိ ကောသလော။
ရထေန နာဂယုတ္တေန၊ ဥပေသိ ဗောဓိမုတ္တမံ။
၅၅။
‘‘တဿာဟံ နာဂံ ဒိသွာန၊ ပုဗ္ဗကမ္မံ အနုဿရိံ။
အဉ္ဇလိံ ပဂ္ဂဟေတွာန၊ သမယံ အဂမာသဟံ။
၅၆။
‘‘ဇာတိယာ သတ္တဝဿောဝ၊ ပဗ္ဗဇိံ အနဂါရိယံ။
ယော သော ဗုဒ္ဓံ ဥပဋ္ဌာသိ၊ အာနန္ဒော နာမ သာဝကော။
၅၇။
‘‘ဂတိမာ ဓိတိမာ စေဝ၊ သတိမာ စ ဗဟုဿုတော။
ရညော စိတ္တံ ပသာဒေန္တော၊ နိယျာဒေသိ မဟာဇုတိ။
၅၈။
‘‘တဿာဟံ ဓမ္မံ သုတွာန၊ ပုဗ္ဗကမ္မံ အနုဿရိံ။
တတ္ထေဝ ဌိတကော သန္တော၊ အရဟတ္တမပါပုဏိံ။
၅၉။
‘‘ဧကံသံ စီဝရံ ကတွာ၊ သိရေ ကတွာန အဉ္ဇလိံ။
သမ္ဗုဒ္ဓံ အဘိဝါဒေတွာ၊ ဣမံ ဝါစံ ဥဒီရယိံ။
၆၀။
‘‘‘ပဒုမုတ္တရဗုဒ္ဓဿ၊ ဒွိပဒိန္ဒဿ သတ္ထုနော။
နိဂ္ဂုဏ္ဍိပုပ္ဖံ ပဂ္ဂယှ၊ သီဟာသနေ ဌပေသဟံ။
၆၁။
‘‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။
ပတ္တောမှိ အစလံ ဌာနံ၊ ဟိတွာ ဇယပရာဇယံ’။
၆၂။
‘‘ပဉ္စဝီသသဟဿမှိ ၊ ကပ္ပါနံ မနုဇာဓိပါ။
အဗ္ဗုဒနိရဗ္ဗုဒါနိ၊ အဋ္ဌဋ္ဌာသိံသု ခတ္တိယာ။
၆၃။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ နိဂ္ဂုဏ္ဍိပုပ္ဖိယော ထေရော ဣမာ ဂါထာယော အဘာသိတ္ထာတိ။
နိဂ္ဂုဏ္ဍိပုပ္ဖိယတ္ထေရဿာပဒါနံ သတ္တမံ။
၈။ သုမနာဝေဠိယတ္ထေရအပဒါနံ
၆၄။
‘‘ဝေဿဘုဿ ဘဂဝတော၊ လောကဇေဋ္ဌဿ တာဒိနော။
သဗ္ဗေ ဇနာ သမာဂမ္မ၊ မဟာပူဇံ ကရောန္တိ တေ။
၆၅။
‘‘သုဓါယ ပိဏ္ဍံ ကတွာန၊ အာဝေဠံ သုမနာယဟံ။
သီဟာသနဿ ပုရတော၊ အဘိရောပေသဟံ တဒါ။
၆၆။
‘‘သဗ္ဗေ ဇနာ သမာဂမ္မ၊ ပေက္ခန္တိ ပုပ္ဖမုတ္တမံ။
ကေနိဒံ ပူဇိတံ ပုပ္ဖံ၊ ဗုဒ္ဓသေဋ္ဌဿ တာဒိနော။
၆၇။
‘‘တေန စိတ္တပ္ပသာဒေန၊ နိမ္မာနံ ဥပပဇ္ဇဟံ။
အနုဘောမိ [အနုဘောသိံ (သီ။)] သကံ ကမ္မံ၊ ပုဗ္ဗေ သုကတမတ္တနော။
၆၈။
‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ။
သဗ္ဗေသာနံ ပိယော ဟောမိ၊ ပုပ္ဖပူဇာယိဒံ ဖလံ။
၆၉။
‘‘နာဘိဇာနာမိ ကာယေန၊ ဝါစာယ ဥဒ စေတသာ။
သံယတာနံ တပဿီနံ၊ ကတံ အက္ကောသိတံ မယာ။
၇၀။
‘‘တေန သုစရိတေနာဟံ၊ စိတ္တဿ ပဏိဓီဟိ စ။
သဗ္ဗေသံ ပူဇိတော ဟောမိ၊ အနက္ကောသဿိဒံ ဖလံ။
၇၁။
‘‘ဣတော ဧကာဒသေ ကပ္ပေ၊ သဟဿာရောသိ ခတ္တိယော။
သတ္တရတနသမ္ပန္နော၊ စက္ကဝတ္တီ မဟဗ္ဗလော။
၇၂။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သုမနာဝေဠိယော ထေရော ဣမာ ဂါထာယော အဘာသိတ္ထာတိ။
သုမနာဝေဠိယတ္ထေရဿာပဒါနံ အဋ္ဌမံ။
၉။ ပုပ္ဖစ္ဆတ္တိယတ္ထေရအပဒါနံ
၇၃။
‘‘သိဒ္ဓတ္ထဿ ဘဂဝတော၊ လောကဇေဋ္ဌဿ တာဒိနော။
သစ္စံ ပကာသယန္တဿ၊ နိဗ္ဗာပေန္တဿ ပါဏိနော။
၇၄။
‘‘ဇလဇံ အာဟရိတွာန၊ သတပတ္တံ မနောရမံ။
ပုပ္ဖဿ ဆတ္တံ ကတွာန၊ ဗုဒ္ဓဿ အဘိရောပယိံ။
၇၅။
‘‘သိဒ္ဓတ္ထော စ လောကဝိဒူ၊ အာဟုတီနံ ပဋိဂ္ဂဟော။
ဘိက္ခုသံဃေ ဌိတော သတ္ထာ၊ ဣမံ ဂါထံ အဘာသထ။
၇၆။
‘‘‘ယော မေ စိတ္တံ ပသာဒေတွာ၊ ပုပ္ဖစ္ဆတ္တံ အဓါရယိံ။
တေန စိတ္တပ္ပသာဒေန၊ ဒုဂ္ဂတိံ သော န ဂစ္ဆတိ’။
၇၇။
‘‘ဣဒံ ဝတွာန သမ္ဗုဒ္ဓေါ၊ သိဒ္ဓတ္ထော လောကနာယကော။
ဥယျောဇေတွာန ပရိသံ၊ ဝေဟာသံ နဘမုဂ္ဂမိ။
၇၈။
‘‘ဝုဋ္ဌိတေ နရဒေဝမှိ၊ သေတစ္ဆတ္တမ္ပိ ဝုဋ္ဌဟိ။
ပုရတော ဗုဒ္ဓသေဋ္ဌဿ၊ ဂစ္ဆတိ ဆတ္တမုတ္တမံ။
၇၉။
‘‘စတုန္နဝုတိတော ကပ္ပေ၊ ယံ ဆတ္တံ အဘိရောပယိံ။
ဒုဂ္ဂတိံ နာဘိဇာနာမိ၊ ပုပ္ဖစ္ဆတ္တဿိဒံ ဖလံ။
၈၀။
‘‘စတုသတ္တတိကပ္ပမှိ၊ အဋ္ဌ ဇလသိခါ အဟူ။
သတ္တရတနသမ္ပန္နာ၊ စက္ကဝတ္တီ မဟဗ္ဗလာ။
၈၁။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ ပုပ္ဖစ္ဆတ္တိယော ထေရော ဣမာ ဂါထာယော အဘာသိတ္ထာတိ။
ပုပ္ဖစ္ဆတ္တိယတ္ထေရဿာပဒါနံ နဝမံ။
၁၀။ သပရိဝါရဆတ္တဒါယကတ္ထေရအပဒါနံ
၈၂။
‘‘ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
အာကာသေ ဇလဝုဋ္ဌီဝ ဝဿတေ [ဝဿတိ (သီ။ သျာ။)၊ ဝဿေတိ (?)] ဓမ္မဝုဋ္ဌိယာ။
၈၃။
‘‘တမဒ္ဒသာသိံ သမ္ဗုဒ္ဓံ၊ ဒေသေန္တံ အမတံ ပဒံ။
သကံ စိတ္တံ ပသာဒေတွာ၊ အဂမာသိံ သကံ ဃရံ။
၈၄။
‘‘ဆတ္တံ အလင်္ကတံ ဂယှ၊ ဥပဂစ္ဆိံ နရုတ္တမံ။
ဟဋ္ဌော ဟဋ္ဌေန စိတ္တေန၊ အာကာသေ ဥက္ခိပိံ အဟံ။
၈၅။
‘‘သုသင်္ဂဟိတယာနံဝ ၊ ဒန္တောဝ သာဝကုတ္တမော။
ဥပဂန္တွာန သမ္ဗုဒ္ဓံ၊ မတ္ထကေ သမ္ပတိဋ္ဌဟိ။
၈၆။
‘‘အနုကမ္ပကော ကာရုဏိကော၊ ဗုဒ္ဓေါ လောကဂ္ဂနာယကော။
ဘိက္ခုသံဃေ နိသီဒိတွာ၊ ဣမာ ဂါထာ အဘာသထ။
၈၇။
‘‘‘ယေန ဆတ္တမိဒံ ဒိန္နံ၊ အလင်္ကတံ မနောရမံ။
တေန စိတ္တပ္ပသာဒေန၊ ဒုဂ္ဂတိံ သော န ဂစ္ဆတိ။
၈၈။
‘‘‘သတ္တက္ခတ္တုဉ္စ ဒေဝေသု၊ ဒေဝရဇ္ဇံ ကရိဿတိ။
ဗာတ္တိံသက္ခတ္တုဉ္စ ရာဇာ၊ စက္ကဝတ္တီ ဘဝိဿတိ။
၈၉။
‘‘‘ကပ္ပသတသဟဿမှိ၊ ဩက္ကာကကုလသမ္ဘဝေါ။
ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ။
၉၀။
‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော။
သဗ္ဗာသဝေ ပရိညာယ၊ နိဗ္ဗာယိဿတိနာသဝေါ’။
၉၁။
‘‘ဗုဒ္ဓဿ ဂိရမညာယ၊ ဝါစာသဘိမုဒီရိတံ။
ပသန္နစိတ္တော သုမနော၊ ဘိယျော ဟာသံ ဇနေသဟံ။
၉၂။
‘‘ဇဟိတွာ မာနုသံ ယောနိံ၊ ဒိဗ္ဗံ ယောနိံ [ဒေဝယောနိံ (သီ။)၊ ဒိဗ္ဗယောနိံ (သျာ။)] မဇ္ဈဂံ။
ဝိမာနမုတ္တမံ မယှံ၊ အဗ္ဘုဂ္ဂတံ မနောရမံ။
၉၃။
‘‘ဝိမာနာ နိက္ခမန္တဿ၊ သေတစ္ဆတ္တံ ဓရီယတိ။
တဒါ သညံ ပဋိလဘိံ၊ ပုဗ္ဗကမ္မဿိဒံ ဖလံ။
၉၄။
‘‘ဒေဝလောကာ စဝိတွာန၊ မနုဿတ္တဉ္စ အာဂမိံ။
ဆတ္တိံသက္ခတ္တုံ စက္ကဝတ္တီ၊ သတ္တကပ္ပသတမှိတော။
၉၅။
‘‘တမှာ ကာယာ စဝိတွာန၊ အာဂစ္ဆိံ [အဂဉ္ဆိံ (?)] တိဒသံ ပုရံ။
သံသရိတွာနုပုဗ္ဗေန၊ မာနုသံ ပုနရာဂမိံ။
၉၆။
‘‘ဩက္ကန္တံ မာတုကုစ္ဆိံ မံ၊ သေတ္တစ္ဆတ္တံ အဓါရယုံ။
ဇာတိယာ သတ္တဝဿောဟံ၊ ပဗ္ဗဇိံ အနဂါရိယံ။
၉၇။
‘‘သုနန္ဒော နာမ နာမေန၊ ဗြာဟ္မဏော မန္တပါရဂူ။
ဖလိကံ ဆတ္တမာဒါယ၊ သာဝကဂ္ဂဿ သော တဒါ။
၉၈။
‘‘အနုမောဒိ မဟာဝီရော၊ သာရိပုတ္တော မဟာကထီ။
သုတွာနုမောဒနံ တဿ၊ ပုဗ္ဗကမ္မမနုဿရိံ။
၉၉။
‘‘အဉ္ဇလိံ ပဂ္ဂဟေတွာန၊ သကံ စိတ္တံ ပသာဒယိံ။
သရိတွာ ပုရိမံ ကမ္မံ၊ အရဟတ္တမပါပုဏိံ။
၁၀၀။
‘‘ဥဋ္ဌာယ အာသနာ တမှာ၊ သိရေ ကတွာန အဉ္ဇလိံ။
သမ္ဗုဒ္ဓံ အဘိဝါဒေတွာ၊ ဣမံ ဝါစံ ဥဒီရိယိံ။
၁၀၁။
‘‘သတသဟဿိတော ကပ္ပေ၊ ဗုဒ္ဓေါ လောကေ အနုတ္တရော။
ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော။
၁၀၂။
‘‘တဿ ဆတ္တံ မယာ ဒိန္နံ၊ ဝိစိတ္တံ သမလင်္ကတံ။
ဥဘော ဟတ္ထေဟိ ပဂ္ဂဏှိ၊ သယမ္ဘူ အဂ္ဂပုဂ္ဂလော။
၁၀၃။
‘‘အဟော ဗုဒ္ဓေါ အဟော ဓမ္မော၊ အဟော နော သတ္ထုသမ္ပဒါ။
ဧကစ္ဆတ္တဿ ဒါနေန၊ ဒုဂ္ဂတိံ နုပပဇ္ဇဟံ။
၁၀၄။
‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။
သဗ္ဗာသဝေ ပရိညာယ၊ ဝိဟရာမိ အနာသဝေါ။
၁၀၅။
‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။
ဣတ္ထံ သုဒံ အာယသ္မာ သပရိဝါရဆတ္တဒါယကော ထေရော ဣမာ ဂါထာယော အဘာသိတ္ထာတိ။
သပရိဝါရဆတ္တဒါယကတ္ထေရဿာပဒါနံ ဒသမံ။
ဥမာပုပ္ဖိယဝဂ္ဂေါ တေတ္တိံသတိမော။
တဿုဒ္ဒါနံ –
ဥမာပုပ္ဖဉ္စ ပုလိနံ၊ ဟာသော ယညော နိမိတ္တကော။
သံသာဝကော နိဂ္ဂုဏ္ဍီ စ၊ သုမနံ ပုပ္ဖဆတ္တကော။
သပရိဝါရဆတ္တော စ၊ ဂါထာ သတ္တသတုတ္တရာတိ။