အာရက္ခဒါယကဝဂ္ဂ

၃၂။ အာရက္ခဒါယကဝဂ္ဂ

၁။ အာရက္ခဒါယကတ္ထေရအပဒါန

၁။

‘‘ဓမ္မဒဿိဿ မုနိနော၊ ဝတိ ကာရာပိတာ မယာ။

အာရက္ခော စ မယာ ဒိန္နော၊ ဒွိပဒိန္ဒဿ တာဒိနော။

၂။

‘‘အဋ္ဌာရသေ ကပ္ပသတေ၊ ယံ ကမ္မမကရိံ တဒါ။

တေန ကမ္မဝိသေသေန၊ ပတ္တော မေ အာသဝက္ခယော။

၃။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာရက္ခဒါယကော ထေရော ဣမာ ဂါထာယော အဘာသိတ္ထာတိ။

အာရက္ခဒါယကတ္ထေရဿာပဒါနံ ပဌမံ။

၂။ ဘောဇနဒါယကတ္ထေရအပဒါနံ

၄။

‘‘သုဇာတော သာလလဋ္ဌီဝ၊ သောဘဉ္ဇနမိဝုဂ္ဂတော။

ဣန္ဒလဋ္ဌိရိဝါကာသေ၊ ဝိရောစတိ သဒါ ဇိနော။

၅။

‘‘တဿ ဒေဝါတိဒေဝဿ၊ ဝေဿဘုဿ မဟေသိနော။

အဒါသိ ဘောဇနမဟံ၊ ဝိပ္ပသန္နေန စေတသာ။

၆။

‘‘တံ မေ ဗုဒ္ဓေါ အနုမောဒိ၊ သယမ္ဘူ အပရာဇိတော။

ဘဝေ နိဗ္ဗတ္တမာနမှိ၊ ဖလံ နိဗ္ဗတ္တတူ တဝ။

၇။

‘‘ဧကတ္တိံသေ ဣတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ဘောဇနဿ ဣဒံ ဖလံ။

၈။

‘‘ပဉ္စဝီသေ ဣတော ကပ္ပေ၊ ဧကော အာသိံ အမိတ္တကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘောဇနဒါယကော ထေရော ဣမာ ဂါထာယော အဘာသိတ္ထာတိ။

ဘောဇနဒါယကတ္ထေရဿာပဒါနံ ဒုတိယံ။

၃။ ဂတသညကတ္ထေရအပဒါနံ

၁၀။

‘‘အာကာသေဝ ပဒံ နတ္ထိ၊ အမ္ဗရေ အနိလဉ္ဇသေ။

သိဒ္ဓတ္ထံ ဇိနမဒ္ဒက္ခိံ၊ ဂစ္ဆန္တံ တိဒိဝင်္ဂဏေ [တိဒိဝင်္ဂဏံ (သျာ။ က။)]။

၁၁။

‘‘အနိလေနေရိတံ ဒိသွာ၊ သမ္မာသမ္ဗုဒ္ဓစီဝရံ။

ဝိတ္တိ မမာဟု တာဝဒေ [ဝိတ္တိ မေ ပါဟုဏာ တာဝ (သျာ။)၊ ဝိတ္တိ မေ တာဝဒေ ဇာတာ (သီ။)]၊ ဒိသွာန ဂမနံ မုနိံ [မုနေ (သီ။)]။

၁၂။

‘‘စတုန္နဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂတသညကော ထေရော ဣမာ ဂါထာယော အဘာသိတ္ထာတိ။

ဂတသညကတ္ထေရဿာပဒါနံ တတိယံ။

၄။ သတ္တပဒုမိယတ္ထေရအပဒါနံ

၁၄။

‘‘နဒီကူလေ ဝသာမဟံ၊ နေသာဒေါ နာမ ဗြာဟ္မဏော။

သတပတ္တေဟိ ပုပ္ဖေဟိ၊ သမ္မဇ္ဇိတွာန အဿမံ။

၁၅။

‘‘သုဝဏ္ဏဝဏ္ဏံ သမ္ဗုဒ္ဓံ၊ သိဒ္ဓတ္ထံ လောကနာယကံ။

ဒိသွာ နဘေန [ဝနေန (သျာ။ က။)] ဂစ္ဆန္တံ၊ ဟာသော မေ ဥဒပဇ္ဇထ။

၁၆။

‘‘ပစ္စုဂ္ဂန္တွာန သမ္ဗုဒ္ဓံ၊ လောကဇေဋ္ဌံ နရာသဘံ။

အဿမံ အတိနာမေတွာ၊ ဇလဇဂ္ဂေဟိ ဩကိရိံ။

၁၇။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၈။

‘‘ဣတော တေ သတ္တမေ ကပ္ပေ၊ စတုရော ပါဒပါဝရာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သတ္တပဒုမိယော ထေရော ဣမာ ဂါထာယော အဘာသိတ္ထာတိ။

သတ္တပဒုမိယတ္ထေရဿာပဒါနံ စတုတ္ထံ။

၅။ ပုပ္ဖာသနဒါယကတ္ထေရအပဒါနံ

၂၀။

‘‘သုဝဏ္ဏဝဏ္ဏံ သမ္ဗုဒ္ဓံ၊ ဣတရံသိံဝ [သတရံသိံဝ (သီ။ သျာ။)] ဘာဏုမံ။

အဝိဒူရေန ဂစ္ဆန္တံ၊ သိဒ္ဓတ္ထံ အပရာဇိတံ။

၂၁။

‘‘တဿ ပစ္စုဂ္ဂမိတွာန၊ ပဝေသေတွာန အဿမံ။

ပုပ္ဖာသနံ မယာ ဒိန္နံ၊ ဝိပ္ပသန္နေန စေတသာ။

၂၂။

‘‘အဉ္ဇလိံ ပဂ္ဂဟေတွာန၊ ဝေဒဇာတော တဒါ အဟံ။

ဗုဒ္ဓေ စိတ္တံ ပသာဒေတွာ၊ တံ ကမ္မံ ပရိဏာမယိံ။

၂၃။

‘‘ယံ မေ အတ္ထိ ကတံ ပုညံ၊ သယမ္ဘုမှပရာဇိတေ။

သဗ္ဗေန တေန ကုသလေန၊ ဝိမလော ဟောမိ သာသနေ။

၂၄။

‘‘စတုန္နဝုတိတော ကပ္ပေ၊ ပုပ္ဖာသနမဒံ တဒါ။

ဒုဂ္ဂတိံ နာဘိဇာနာမိ၊ ပုပ္ဖာသနဿိဒံ ဖလံ။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုပ္ဖာသနဒါယကော ထေရော ဣမာ ဂါထာယော အဘာသိတ္ထာတိ။

ပုပ္ဖာသနဒါယကတ္ထေရဿာပဒါနံ ပဉ္စမံ။

၆။ အာသနသန္ထဝိကတ္ထေရအပဒါနံ

၂၆။

‘‘စေတိယံ ဥတ္တမံ နာမ၊ သိခိနော လောကဗန္ဓုနော။

အရညေ ဣရီဏေ ဝနေ၊ အန္ဓာဟိဏ္ဍာမဟံ တဒါ။

၂၇။

‘‘ပဝနာ နိက္ခမန္တေန၊ ဒိဋ္ဌံ သီဟာသနံ မယာ။

ဧကံသံ အဉ္ဇလိံ ကတွာ၊ သန္ထဝိံ [ထဝိဿံ (သီ။)] လောကနာယကံ။

၂၈။

‘‘ဒိဝသဘာဂံ ထဝိတွာန၊ ဗုဒ္ဓံ လောကဂ္ဂနာယကံ။

ဟဋ္ဌော ဟဋ္ဌေန စိတ္တေန၊ ဣမံ ဝါစံ ဥဒီရယိံ။

၂၉။

‘‘‘နမော တေ ပုရိသာဇည၊ နမော တေ ပုရိသုတ္တမ။

သဗ္ဗညူသိ မဟာဝီရ၊ လောကဇေဋ္ဌ နရာသဘ’။

၃၀။

‘‘အဘိတ္ထဝိတွာ သိခိနံ၊ နိမိတ္တကရဏေနဟံ။

အာသနံ အဘိဝါဒေတွာ၊ ပက္ကာမိံ ဥတ္တရာမုခေါ။

၃၁။

‘‘ဧကတ္တိံသေ ဣတော ကပ္ပေ၊ ယံ ထဝိံ ဝဒတံ ဝရံ။

ဒုဂ္ဂတိံ နာဘိဇာနာမိ၊ ထောမနာယ ဣဒံ ဖလံ။

၃၂။

‘‘သတ္တဝီသေ ဣတော ကပ္ပေ၊ အတုလာ သတ္တ အာသု တေ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၃၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာသနသန္ထဝိကော [အာသနသန္ထဝကော (?), အာသနထဝိကော (က။), အာသနတ္ထဝိကော (သီ။ သျာ။)] ထေရော ဣမာ ဂါထာယော အဘာသိတ္ထာတိ။

အာသနသန္ထဝိကတ္ထေရဿာပဒါနံ ဆဋ္ဌံ။

၇။ သဒ္ဒသညကတ္ထေရအပဒါနံ

၃၄။

‘‘သုဒဿနော မဟာဝီရော၊ ဒေသေတိ အမတံ ပဒံ။

ပရိဝုတော သာဝကေဟိ၊ ဝသတိ ဃရမုတ္တမေ။

၃၅။

‘‘တာယ ဝါစာယ မဓုရာယ၊ သင်္ဂဏှာတိ [သင်္ဂဏှန္တေ (သီ။)] မဟာဇနံ။

ဃောသော စ ဝိပုလော အာသိ၊ အာသီသော [အာသံသော (သီ။)] ဒေဝမာနုသေ။

၃၆။

‘‘နိဂ္ဃောသသဒ္ဒံ သုတွာန၊ သိဒ္ဓတ္ထဿ မဟေသိနော။

သဒ္ဒေ စိတ္တံ ပသာဒေတွာ၊ အဝန္ဒိံ လောကနာယကံ။

၃၇။

‘‘စတုန္နဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ။

သဒ္ဒသညကတ္ထေရဿာပဒါနံ သတ္တမံ။

၈။ တိရံသိယတ္ထေရအပဒါနံ

၃၉။

‘‘ကေသရိံ အဘိဇာတံဝ၊ အဂ္ဂိက္ခန္ဓံဝ ပဗ္ဗတေ။

ဩဘာသေန္တံ ဒိသာ သဗ္ဗာ [နိဝါသေန္တံ (က။)၊ ဒိသာသိန္နံ (သျာ။)]၊ သိဒ္ဓတ္ထံ ပဗ္ဗတန္တရေ။

၄၀။

‘‘သူရိယဿ စ အာလောကံ၊ စန္ဒာလောကံ တထေဝ စ။

ဗုဒ္ဓါလောကဉ္စ ဒိသွာန၊ ဝိတ္တိ မေ ဥဒပဇ္ဇထ။

၄၁။

‘‘တယော အာလောကေ ဒိသွာန၊ သမ္ဗုဒ္ဓံ [ဗုဒ္ဓဉ္စ (သီ။)] သာဝကုတ္တမံ။

ဧကံသံ အဇိနံ ကတွာ၊ သန္ထဝိံ လောကနာယကံ။

၄၂။

‘‘တယော ဟိ အာလောကကရာ၊ လောကေ လောကတမောနုဒါ။

စန္ဒော စ သူရိယော စာပိ၊ ဗုဒ္ဓေါ စ လောကနာယကော။

၄၃။

‘‘ဩပမ္မံ ဥပဒဿေတွာ၊ ကိတ္တိတော မေ မဟာမုနိ။

ဗုဒ္ဓဿ ဝဏ္ဏံ ကိတ္တေတွာ၊ ကပ္ပံ သဂ္ဂမှိ မောဒဟံ။

၄၄။

‘‘စတုန္နဝုတိတော ကပ္ပေ၊ ယံ ဗုဒ္ဓမဘိကိတ္တယိံ။

ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ။

၄၅။

‘‘ဧကသဋ္ဌိမှိတော ကပ္ပေ၊ ဧကော ဉာဏဓရော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိရံသိယော ထေရော ဣမာ ဂါထာယော အဘာသိတ္ထာတိ။

တိရံသိယတ္ထေရဿာပဒါနံ အဋ္ဌမံ။

၉။ ကန္ဒလိပုပ္ဖိယတ္ထေရအပဒါနံ

၄၇။

‘‘သိန္ဓုယာ နဒိယာ တီရေ၊ အဟောသိံ ကဿကော တဒါ။

ပရကမ္မာယနေ ယုတ္တော၊ ပရဘတ္တံ အပဿိတော။

၄၈။

‘‘သိန္ဓုံ အနုစရန္တောဟံ၊ သိဒ္ဓတ္ထံ ဇိနမဒ္ဒသံ။

သမာဓိနာ နိသိန္နံဝ၊ သတပတ္တံဝ ပုပ္ဖိတံ။

၄၉။

‘‘သတ္တ ကန္ဒလိပုပ္ဖာနိ၊ ဝဏ္ဋေ ဆေတွာနဟံ တဒါ။

မတ္ထကေ အဘိရောပေသိံ၊ ဗုဒ္ဓဿာဒိစ္စဗန္ဓုနော။

၅၀။

‘‘သုဝဏ္ဏဝဏ္ဏံ သမ္ဗုဒ္ဓံ၊ အနုကူလေ သမာဟိတံ။

တိဓါပဘိန္နမာတင်္ဂံ၊ ကုဉ္ဇရံဝ ဒုရာသဒံ။

၅၁။

‘‘တမဟံ ဥပဂန္တွာန၊ နိပကံ ဘာဝိတိန္ဒ္ရိယံ။

အဉ္ဇလိံ ပဂ္ဂဟေတွာန၊ အဝန္ဒိံ သတ္ထုနော အဟံ။

၅၂။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကန္ဒလိပုပ္ဖိယော ထေရော ဣမာ ဂါထာယော အဘာသိတ္ထာတိ။

ကန္ဒလိပုပ္ဖိယတ္ထေရဿာပဒါနံ နဝမံ။

၁၀။ ကုမုဒမာလိယတ္ထေရအပဒါနံ

၅၄။

‘‘ဥသဘံ ပဝရံ ဝီရံ၊ မဟေသိံ ဝိဇိတာဝိနံ။

ဝိပဿိနံ မဟာဝီရံ၊ အဘိဇာတံဝ ကေသရိံ။

၅၅။

‘‘ရထိယံ ပဋိပဇ္ဇန္တံ၊ အာဟုတီနံ ပဋိဂ္ဂဟံ။

ဂဟေတွာ ကုမုဒံ မာလံ၊ ဗုဒ္ဓသေဋ္ဌံ သမောကိရိံ။

၅၆။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုမုဒမာလိယော ထေရော ဣမာ ဂါထာယော အဘာသိတ္ထာတိ။

ကုမုဒမာလိယတ္ထေရဿာပဒါနံ ဒသမံ။

အာရက္ခဒါယကဝဂ္ဂေါ ဗာတ္တိံသတိမော [ဗတ္တိံသတိမော (သီ။ သျာ။)]။

တဿုဒ္ဒါနံ –

အာရက္ခဒေါ ဘောဇနဒေါ၊ ဂတသညီ ပဒုမိယော။

ပုပ္ဖာသနီ သန္ထဝိကော၊ သဒ္ဒသညီ တိရံသိယော။

ကန္ဒလိကော ကုမုဒီ စ၊ သတ္တပညာသ ဂါထကာတိ။