ပဒုမကေသရဝဂ္ဂ

၃၁။ ပဒုမကေသရဝဂ္ဂ

၁။ ပဒုမကေသရိယတ္ထေရအပဒါန

၁။

‘‘ဣသိသံဃေ အဟံ ပုဗ္ဗေ၊ အာသိံ မာတင်္ဂဝါရဏော။

မဟေသီနံ ပသာဒေန၊ ပဒ္မကေသရမောကိရိံ။

၂။

‘‘ပစ္စေကဇိနသေဋ္ဌေသု၊ ဓုတရာဂေသု တာဒိသု။

တေသု စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။

၃။

‘‘ဧကနဝုတိတော ကပ္ပေ၊ ကေသရံ ဩကိရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဒုမကေသရိယော ထေရော ဣမာ ဂါထာယော အဘာသိတ္ထာတိ။

ပဒုမကေသရိယတ္ထေရဿာပဒါနံ ပဌမံ။

၂။ သဗ္ဗဂန္ဓိယတ္ထေရအပဒါနံ

၅။

‘‘ဂန္ဓမာလံ မယာ ဒိန္နံ၊ ဝိပဿိဿ မဟေသိနော။

အဒါသိံ ဥဇုဘူတဿ၊ ကောသေယျဝတ္ထမုတ္တမံ။

၆။

‘‘ဧကနဝုတိတော ကပ္ပေ၊ ယံ ဝတ္ထမဒဒိံ [ဂန္ဓမဒဒိံ (သျာ။)] ပုရေ။

ဒုဂ္ဂတိံ နာဘိဇာနာမိ၊ ဂန္ဓဒါနဿိဒံ ဖလံ။

၇။

‘‘ဣတော ပန္နရသေ ကပ္ပေ၊ သုစေဠော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဗ္ဗဂန္ဓိယော ထေရော ဣမာ ဂါထာယော အဘာသိတ္ထာတိ။

သဗ္ဗဂန္ဓိယတ္ထေရဿာပဒါနံ ဒုတိယံ။

၃။ ပရမန္နဒါယကတ္ထေရအပဒါနံ

၉။

‘‘ကဏိကာရံဝ ဇောတန္တံ၊ ဥဒယန္တံဝ ဘာဏုမံ။

ဝိပသ္သိံ အဒ္ဒသံ ဗုဒ္ဓံ၊ လောကဇေဋ္ဌံ နရာသဘံ။

၁၀။

‘‘အဉ္ဇလိံ ပဂ္ဂဟေတွာန၊ အဘိနေသိံ သကံ ဃရံ။

အဘိနေတွာန သမ္ဗုဒ္ဓံ၊ ပရမန္နမဒါသဟံ။

၁၁။

‘‘ဧကနဝုတိတော ကပ္ပေ၊ ပရမန္နမဒိံ [ပရမန္နံ ဒဒိံ (သီ။)၊ ပရမန္နမဒံ (သျာ။)] တဒါ။

ဒုဂ္ဂတိံ နာဘိဇာနာမိ၊ ပရမန္နဿိဒံ ဖလံ။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပရမန္နဒါယကော ထေရော ဣမာ ဂါထာယော အဘာသိတ္ထာတိ။

ပရမန္နဒါယကတ္ထေရဿာပဒါနံ တတိယံ။

၄။ ဓမ္မသညကတ္ထေရအပဒါနံ

၁၃။

‘‘ဝိပဿိနော ဘဂဝတော၊ မဟာဗောဓိမဟော အဟု။

ရုက္ခဋ္ဌဿေဝ သမ္ဗုဒ္ဓေါ၊ [ရုက္ခဋ္ဌေယေဝ သမ္ဗုဒ္ဓေ (သီ။)၊ ရုက္ခဋ္ဌော ဣဝ သမ္ဗုဒ္ဓေါ (အဋ္ဌ။) ဧတ္ထ ရုက္ခဋ္ဌဿေဝ ဗောဓိမဟကာရဇနဿ သမ္ဗုဒ္ဓေါ စတုသစ္စံ ပကာသေတီတိ အတ္ထောပိ သက္ကာ ဉာတုံ] လောကဇေဋ္ဌော နရာသဘော [လောကဇေဋ္ဌေ နရာသဘေ (သီ။)]။

၁၄။

‘‘ဘဂဝါ တမှိ သမယေ၊ ဘိက္ခုသံဃပုရက္ခတော။

စတုသစ္စံ ပကာသေတိ၊ ဝါစာသဘိမုဒီရယံ။

၁၅။

‘‘သံခိတ္တေန စ ဒေသေန္တော၊ ဝိတ္ထာရေန စ ဒေသယံ [ဒေသယိ (သျာ။)၊ ဘာသတိ (က။)]။

ဝိဝဋ္ဋစ္ဆဒေါ သမ္ဗုဒ္ဓေါ၊ နိဗ္ဗာပေသိ မဟာဇနံ။

၁၆။

‘‘တဿာဟံ ဓမ္မံ သုတွာန၊ လောကဇေဋ္ဌဿ တာဒိနော။

ဝန္ဒိတွာ သတ္ထုနော ပါဒေ၊ ပက္ကာမိံ ဥတ္တရာမုခေါ။

၁၇။

‘‘ဧကနဝုတိတော ကပ္ပေ၊ ယံ ဓမ္မမသုဏိံ တဒါ။

ဒုဂ္ဂတိံ နာဘိဇာနာမိ၊ ဓမ္မသဝဿိဒံ ဖလံ။

၁၈။

‘‘တေတ္တိံသမှိ ဣတော ကပ္ပေ၊ ဧကော အာသိံ မဟီပတိ။

သုတဝါ နာမ နာမေန၊ စက္ကဝတ္တီ မဟဗ္ဗလော။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဓမ္မသညကော ထေရော ဣမာ ဂါထာယော အဘာသိတ္ထာတိ။

ဓမ္မသညကတ္ထေရဿာပဒါနံ စတုတ္ထံ။

၅။ ဖလဒါယကတ္ထေရအပဒါနံ

၂၀။

‘‘ဘာဂီရထီနဒီတီရေ ၊ အဟောသိ အဿမော တဒါ။

တမဟံ အဿမံ ဂစ္ဆိံ၊ ဖလဟတ္ထော အပေက္ခဝါ။

၂၁။

‘‘ဝိပသ္သိံ တတ္ထ အဒ္ဒက္ခိံ၊ ဣတရံသိံဝ ဘာဏုမံ။

ယံ မေ အတ္ထိ ဖလံ သဗ္ဗံ၊ အဒါသိံ သတ္ထုနော အဟံ။

၂၂။

‘‘ဧကနဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ။

ဖလဒါယကတ္ထေရဿာပဒါနံ ပဉ္စမံ။

၆။ သမ္ပသာဒကတ္ထေရအပဒါနံ

၂၄။

‘‘‘နမော တေ ဗုဒ္ဓ ဝီရတ္ထု၊ ဝိပ္ပမုတ္တောသိ သဗ္ဗဓိ။

ဗျသနမှိ [ဗျသနံ ဟိ (သီ။)] အနုပ္ပတ္တော၊ တဿ မေ သရဏံ ဘဝ’။

၂၅။

‘‘သိဒ္ဓတ္ထော တဿ ဗျာကာသိ၊ လောကေ အပ္ပဋိပုဂ္ဂလော။

‘မဟောဒဓိသမော သံဃော၊ အပ္ပမေယျော အနုတ္တရော။

၂၆။

‘‘‘တတ္ထ တွံ ဝိရဇေ ခေတ္တေ၊ အနန္တဖလဒါယကေ။

သံဃေ စိတ္တံ ပသာဒေတွာ၊ သုဗီဇံ ဝါပ [စာပိ (သီ။)၊ ဝါပိ (သျာ။)] ရောပယ။

၂၇။

‘‘ဣဒံ ဝတွာန သဗ္ဗညူ၊ လောကဇေဋ္ဌော နရာသဘော။

မမေဝ အနုသာသိတွာ၊ ဝေဟာသံ နဘမုဂ္ဂမိ။

၂၈။

‘‘အစိရံ ဂတမတ္တမှိ၊ သဗ္ဗညုမှိ နရာသဘေ။

မရဏံ သမနုပ္ပတ္တော၊ တုသိတံ ဥပပဇ္ဇဟံ။

၂၉။

‘‘တဒါဟံ ဝိရဇေ ခေတ္တေ၊ အနန္တဖလဒါယကေ။

သံဃေ စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။

၃၀။

‘‘စတုန္နဝုတိတော ကပ္ပေ၊ ပသာဒမလဘိံ တဒါ။

ဒုဂ္ဂတိံ နာဘိဇာနာမိ၊ ပသာဒဿ ဣဒံ ဖလံ။

၃၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သမ္ပသာဒကော ထေရော ဣမာ ဂါထာယော အဘာသိတ္ထာတိ။

သမ္ပသာဒကတ္ထေရဿာပဒါနံ ဆဋ္ဌံ။

၇။ အာရာမဒါယကတ္ထေရအပဒါနံ

၃၂။

‘‘သိဒ္ဓတ္ထဿ ဘဂဝတော၊ အာရာမော ရောပိတော မယာ။

သန္ဒစ္ဆာယေသု [သီတဆာယေသု (သျာ။)၊ သန္တစ္ဆာယေသု (က။)] ရုက္ခေသု၊ ဥပါသန္တေသု ပက္ခိသု။

၃၃။

‘‘အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ။

အာရာမံ အဘိနာမေသိံ၊ လောကဇေဋ္ဌံ နရာသဘံ။

၃၄။

‘‘ဟဋ္ဌော ဟဋ္ဌေန စိတ္တေန၊ ဖလံ ပုပ္ဖမဒါသဟံ။

တတော ဇာတပ္ပသာဒေါဝ၊ တံ ဝနံ ပရိဏာမယိံ။

၃၅။

‘‘ဗုဒ္ဓဿ ယမိဒံ ဒါသိံ၊ ဝိပ္ပသန္နေန စေတသာ။

ဘဝေ နိဗ္ဗတ္တမာနမှိ၊ နိဗ္ဗတ္တတိ ဖလံ မမ။

၃၆။

‘‘စတုန္နဝုတိတော ကပ္ပေ၊ ယံ အာရာမမဒံ တဒါ။

ဒုဂ္ဂတိံ နာဘိဇာနာမိ၊ အာရာမဿ ဣဒံ ဖလံ။

၃၇။

‘‘သတ္တတိံသေ ဣတော ကပ္ပေ၊ သတ္တာသုံ မုဒုသီတလာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာရာမဒါယကော ထေရော ဣမာ ဂါထာယော အဘာသိတ္ထာတိ။

အာရာမဒါယကတ္ထေရဿာပဒါနံ သတ္တမံ။

၈။ အနုလေပဒါယကတ္ထေရအပဒါနံ

၃၉။

‘‘အတ္ထဒဿိဿ မုနိနော၊ အဒ္ဒသံ သာဝကံ အဟံ။

နဝကမ္မံ ကရောန္တဿ၊ သီမာယ ဥပဂစ္ဆဟံ။

၄၀။

‘‘နိဋ္ဌိတေ နဝကမ္မေ စ၊ အနုလေပမဒါသဟံ။

ပသန္နစိတ္တော သုမနော၊ ပုညက္ခေတ္တေ အနုတ္တရေ။

၄၁။

‘‘အဋ္ဌာရသေ ကပ္ပသတေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ အနုလေပဿိဒံ ဖလံ။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အနုလေပဒါယကော ထေရော ဣမာ ဂါထာယော အဘာသိတ္ထာတိ။

အနုလေပဒါယကတ္ထေရဿာပဒါနံ အဋ္ဌမံ။

၉။ ဗုဒ္ဓသညကတ္ထေရအပဒါနံ

၄၃။

‘‘ဥဒေန္တံ သတရံသိံဝ၊ ဣတရံသိံဝ ဘာဏုမံ။

ဝနန္တရဂတံ သန္တံ၊ လောကဇေဋ္ဌံ နရာသဘံ။

၄၄။

‘‘အဒ္ဒသံ သုပိနန္တေန၊ သိဒ္ဓတ္ထံ လောကနာယကံ။

တတ္ထ စိတ္တံ ပသာဒေတွာ၊ သုဂတိံ ဥပပဇ္ဇဟံ။

၄၅။

‘‘စတုန္နဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၄၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗုဒ္ဓသညကော ထေရော ဣမာ ဂါထာယော အဘာသိတ္ထာတိ။

ဗုဒ္ဓသညကတ္ထေရဿာပဒါနံ နဝမံ။

၁၀။ ပဗ္ဘာရဒါယကတ္ထေရအပဒါနံ

၄၇။

‘‘ပိယဒဿိနော ဘဂဝတော၊ ပဗ္ဘာရော သောဓိတော မယာ။

ဃဋကဉ္စ ဥပဋ္ဌာသိံ၊ ပရိဘောဂါယ တာဒိနော။

၄၈။

‘‘တံ မေ ဗုဒ္ဓေါ ဝိယာကာသိ၊ ပိယဒဿီ မဟာမုနိ။

သဟဿကဏ္ဍော သတဘေဏ္ဍု [သတဂေဏ္ဍု (သျာ။ က။)]၊ ဓဇာလု ဟရိတာမယော။

၄၉။

‘‘နိဗ္ဗတ္တိဿတိ သော ယူပေါ၊ ရတနဉ္စ အနပ္ပကံ။

ပဗ္ဘာရဒါနံ ဒတွာန၊ ကပ္ပံ သဂ္ဂမှိ မောဒဟံ။

၅၀။

‘‘ဣတော ဗာတ္တိံသကပ္ပမှိ၊ သုသုဒ္ဓေါ နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဗ္ဘာရဒါယကော ထေရော ဣမာ ဂါထာယော အဘာသိတ္ထာတိ။

ပဗ္ဘာရဒါယကတ္ထေရဿာပဒါနံ ဒသမံ။

ပဒုမကေသရဝဂ္ဂေါ ဧကတိံသတိမော။

တဿုဒ္ဒါနံ –

ကေသရံ ဂန္ဓမန္နဉ္စ၊ ဓမ္မသညီ ဖလေန စ။

ပသာဒါရာမဒါယီ စ၊ လေပကော ဗုဒ္ဓသညကော။

ပဗ္ဘာရဒေါ စ ဂါထာယော၊ ဧကပညာသ ကိတ္တိတာ။