စိတကပူဇကဝဂ္ဂ

၃၀။ စိတကပူဇကဝဂ္ဂ

၁။ စိတကပူဇကတ္ထေရအပဒါန

၁။

‘‘အဇိတော နာမ နာမေန၊ အဟောသိံ ဗြာဟ္မဏော တဒါ။

အာဟုတိံ ယိဋ္ဌုကာမောဟံ၊ နာနာပုပ္ဖံ သမာနယိံ။

၂။

‘‘ဇလန္တံ စိတကံ ဒိသွာ၊ သိခိနော လောကဗန္ဓုနော။

တဉ္စ ပုပ္ဖံ သမာနေတွာ၊ စိတကေ ဩကိရိံ အဟံ။

၃။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄။

‘‘သတ္တဝီသေ [သတ္တတိံသေ (က။)] ဣတော ကပ္ပေ၊ သတ္တာသုံ မနုဇာဓိပါ။

သုပဇ္ဇလိတနာမာ တေ၊ စက္ကဝတ္တီ မဟဗ္ဗလာ။

၅။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ။

စိတကပူဇကတ္ထေရဿာပဒါနံ ပဌမံ။

၂။ ပုပ္ဖဓါရကတ္ထေရအပဒါနံ

၆။

‘‘ဝါကစီရဓရော အာသိံ၊ အဇိနုတ္တရဝါသနော။

အဘိညာ ပဉ္စ နိဗ္ဗတ္တာ၊ စန္ဒဿ ပရိမဇ္ဇကော။

၇။

‘‘ဝိပသ္သိံ လောကပဇ္ဇောတံ၊ ဒိသွာ အဘိဂတံ မမံ။

ပါရိစ္ဆတ္တကပုပ္ဖာနိ၊ ဓါရေသိံ သတ္ထုနော အဟံ။

၈။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဓါရဏာယ ဣဒံ ဖလံ။

၉။

‘‘သတ္တာသီတိမှိတော ကပ္ပေ၊ ဧကော အာသိံ မဟီပတိ။

သမန္တဓါရဏော နာမ၊ စက္ကဝတ္တီ မဟဗ္ဗလော။

၁၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုပ္ဖဓါရကော ထေရော ဣမာ ဂါထာယော အဘာသိတ္ထာတိ။

ပုပ္ဖဓါရကတ္ထေရဿာပဒါနံ ဒုတိယံ။

၃။ ဆတ္တဒါယကတ္ထေရအပဒါနံ

၁၁။

‘‘ပုတ္တော မမ ပဗ္ဗဇိတော၊ ကာသာယဝသနော တဒါ။

သော စ ဗုဒ္ဓတ္တံ သမ္ပတ္တော၊ နိဗ္ဗုတော လောကပူဇိတော။

၁၂။

‘‘ဝိစိနန္တော သကံ ပုတ္တံ၊ အဂမံ ပစ္ဆတော အဟံ။

နိဗ္ဗုတဿ မဟန္တဿ၊ စိတကံ အဂမာသဟံ။

၁၃။

‘‘ပဂ္ဂယှ အဉ္ဇလိံ တတ္ထ၊ ဝန္ဒိတွာ စိတကံ အဟံ။

သေတစ္ဆတ္တဉ္စ ပဂ္ဂယှ၊ အာရောပေသိံ အဟံ တဒါ။

၁၄။

‘‘စတုန္နဝုတိတော ကပ္ပေ၊ ယံ ဆတ္တမဘိရောပယိံ။

ဒုဂ္ဂတိံ နာဘိဇာနာမိ၊ ဆတ္တဒါနဿိဒံ ဖလံ။

၁၅။

‘‘ပဉ္စဝီသေ ဣတော ကပ္ပေ၊ သတ္တ အာသုံ ဇနာဓိပါ။

မဟာရဟသနာမာ တေ၊ စက္ကဝတ္တီ မဟဗ္ဗလာ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဆတ္တဒါယကော ထေရော ဣမာ ဂါထာယော အဘာသိတ္ထာတိ။

ဆတ္တဒါယကတ္ထေရဿာပဒါနံ တတိယံ။

၄။ သဒ္ဒသညကတ္ထေရအပဒါနံ

၁၇။

‘‘အနုဂ္ဂတမှိ အာဒိစ္စေ၊ ပနာဒေါ [ပသာဒေါ (သျာ။ အဋ္ဌ။)] ဝိပုလော အဟု။

ဗုဒ္ဓသေဋ္ဌဿ လောကမှိ၊ ပါတုဘာဝေါ မဟေသိနော။

၁၈။

‘‘ဃောသ [သဒ္ဒ (သီ။ သျာ။)] မဿောသဟံ တတ္ထ၊ န စ ပဿာမိ တံ ဇိနံ။

မရဏဉ္စ အနုပ္ပတ္တော၊ ဗုဒ္ဓသညမနုဿရိံ။

၁၉။

‘‘စတုန္နဝုတိတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သဒ္ဒသညကော ထေရော ဣမာ ဂါထာယော အဘာသိတ္ထာတိ။

သဒ္ဒသညကတ္ထေရဿာပဒါနံ စတုတ္ထံ။

၅။ ဂေါသီသနိက္ခေပကတ္ထေရအပဒါနံ

၂၁။

‘‘အာရာမဒွါရာ နိက္ခမ္မ၊ ဂေါသီသံ သန္ထတံ မယာ။

အနုဘောမိ သကံ ကမ္မံ၊ ပုဗ္ဗကမ္မဿိဒံ ဖလံ။

၂၂။

‘‘အာဇာနိယာ ဝါတဇဝါ၊ သိန္ဓဝါ သီဃဝါဟနာ။

အနုဘောမိ သဗ္ဗမေတံ၊ ဂေါသီသဿ ဣဒံ ဖလံ။

၂၃။

‘‘အဟော ကာရံ ပရမကာရံ၊ သုခတ္တေ သုကတံ မယာ။

သံဃေ ကတဿ ကာရဿ၊ န အညံ ကလမဂ္ဃတိ။

၂၄။

‘‘စတုန္နဝုတိတော ကပ္ပေ၊ ယံ သီသံ သန္ထရိံ အဟံ။

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ။

၂၅။

‘‘ပဉ္စသတ္တတိကပ္ပမှိ၊ သုပ္ပတိဋ္ဌိတနာမကော။

ဧကော အာသိံ မဟာတေဇော၊ စက္ကဝတ္တီ မဟဗ္ဗလော။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဂေါသီသနိက္ခေပကော ထေရော ဣမာ ဂါထာယော အဘာသိတ္ထာတိ။

ဂေါသီသနိက္ခေပကတ္ထေရဿာပဒါနံ ပဉ္စမံ။

၆။ ပါဒပူဇကတ္ထေရအပဒါနံ

၂၇။

‘‘ပဗ္ဗတေ ဟိမဝန္တမှိ၊ အဟောသိံ ကိန္နရော တဒါ။

အဒ္ဒသံ ဝိရဇံ ဗုဒ္ဓံ၊ ဣတရံသိံဝ ဘာဏုမံ။

၂၈။

‘‘ဥပေတံ တမဟံ [ဥပေတောပိ တဒါ (သျာ။)၊ ဥပေသိံ တမဟံ (?)] ဗုဒ္ဓံ၊ ဝိပသ္သိံ လောကနာယကံ။

စန္ဒနံ တဂရဉ္စာပိ၊ ပါဒေ ဩသိဉ္စဟံ တဒါ။

၂၉။

‘‘ဧကနဝုတိတော ကပ္ပေ၊ ယံ ပါဒံ အဘိပူဇယိံ။

ဒုဂ္ဂတိံ နာဘိဇာနာမိ၊ ပါဒပူဇာယိဒံ ဖလံ။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါဒပူဇကော ထေရော ဣမာ ဂါထာယော အဘာသိတ္ထာတိ။

ပါဒပူဇကတ္ထေရဿာပဒါနံ ဆဋ္ဌံ။

၇။ ဒေသကိတ္တကတ္ထေရအပဒါနံ

၃၁။

‘‘ဥပသာလကနာမောဟံ ၊ အဟောသိံ ဗြာဟ္မဏော တဒါ။

ကာနနံ ဝနမောဂါဠှံ၊ လောကဇေဋ္ဌံ နရာသဘံ။

၃၂။

‘‘ဒိသွာန ဝန္ဒိံ ပါဒေသု၊ လောကာဟုတိပဋိဂ္ဂဟံ။

ပသန္နစိတ္တံ မံ ဉတွာ၊ ဗုဒ္ဓေါ အန္တရဓါယထ။

၃၃။

‘‘ကာနနာ အဘိနိက္ခမ္မ၊ ဗုဒ္ဓသေဋ္ဌမနုဿရိံ။

တံ ဒေသံ ကိတ္တယိတွာန၊ ကပ္ပံ သဂ္ဂမှိ မောဒဟံ။

၃၄။

‘‘ဒွေနဝုတေ ဣတော ကပ္ပေ၊ ယံ ဒေသမဘိကိတ္တယိံ။

ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ။

၃၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒေသကိတ္တကော ထေရော ဣမာ ဂါထာယော အဘာသိတ္ထာတိ။

ဒေသကိတ္တကတ္ထေရဿာပဒါနံ သတ္တမံ။

၈။ သရဏဂမနိယတ္ထေရအပဒါနံ

၃၆။

‘‘ပဗ္ဗတေ ဟိမဝန္တမှိ၊ အဟောသိံ လုဒ္ဒကော တဒါ။

ဝိပသ္သိံ အဒ္ဒသံ ဗုဒ္ဓံ၊ လောကဇေဋ္ဌံ နရာသဘံ။

၃၇။

‘‘ဥပါသိတွာန သမ္ဗုဒ္ဓံ၊ ဝေယျာဝစ္စမကာသဟံ။

သရဏဉ္စ ဥပါဂစ္ဆိံ၊ ဒွိပဒိန္ဒဿ တာဒိနော။

၃၈။

‘‘ဧကနဝုတိတော ကပ္ပေ၊ သရဏံ ဥပဂစ္ဆဟံ။

ဒုဂ္ဂတိံ နာဘိဇာနာမိ၊ သရဏာဂမနပ္ဖလံ။

၃၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သရဏဂမနိယော ထေရော ဣမာ ဂါထာယော အဘာသိတ္ထာတိ။

သရဏဂမနိယတ္ထေရဿာပဒါနံ အဋ္ဌမံ။

၉။ အမ္ဗပိဏ္ဍိယတ္ထေရအပဒါနံ

၄၀။

‘‘ရောမသော နာမ နာမေန၊ ဒါနဝေါ ဣတိ ဝိဿုတော။

အမ္ဗပိဏ္ဍီ မယာ ဒိန္နာ [အမ္ဗပိဏ္ဍော မယာ ဒိန္နော (သျာ။)]၊ ဝိပဿိဿ မဟေသိနော။

၄၁။

‘‘ဧကနဝုတိတော ကပ္ပေ၊ ယမမ္ဗမဒဒိံ တဒါ။

ဒုဂ္ဂတိံ နာဘိဇာနာမိ၊ အမ္ဗဒါနဿိဒံ ဖလံ။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗပိဏ္ဍိယော ထေရော ဣမာ ဂါထာယော အဘာသိတ္ထာတိ။

အမ္ဗပိဏ္ဍိယတ္ထေရဿာပဒါနံ နဝမံ။

၁၀။ အနုသံသာဝကတ္ထေရအပဒါနံ

၄၃။

‘‘ပိဏ္ဍာယ စရမာနာဟံ၊ ဝိပဿိမဒ္ဒသံ ဇိနံ။

ဥဠုင်္ဂဘိက္ခံ ပါဒါသိံ၊ ဒွိပဒိန္ဒဿ တာဒိနော။

၄၄။

‘‘ပသန္နစိတ္တော သုမနော၊ အဘိဝါဒေသဟံ တဒါ။

အနုသံသာဝယိံ ဗုဒ္ဓံ၊ ဥတ္တမတ္ထဿ ပတ္တိယာ။

၄၅။

‘‘ဧကနဝုတိတော ကပ္ပေ၊ အနုသံသာဝယိံ အဟံ။

ဒုဂ္ဂတိံ နာဘိဇာနာမိ၊ အနုသံသာဝနာ ဖလံ။

၄၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အနုသံသာဝကော ထေရော ဣမာ ဂါထာယော အဘာသိတ္ထာတိ။

အနုသံသာဝကတ္ထေရဿာပဒါနံ ဒသမံ။

စိတကပူဇကဝဂ္ဂေါ တိံသတိမော။

တဿုဒ္ဒါနံ –

စိတကံ ပါရိဆတ္တော စ၊ သဒ္ဒဂေါသီသသန္ထရံ။

ပါဒေါ ပဒေသံ သရဏံ၊ အမ္ဗော သံသာဝကောပိ စ။

အဋ္ဌတာလီသ ဂါထာယော၊ ဂဏိတာယော ဝိဘာဝိဘိ။

အထ ဝဂ္ဂုဒ္ဒါနံ –

ကဏိကာရော ဟတ္ထိဒဒေါ၊ အာလမ္ဗဏုဒကာသနံ။

တုဝရံ ထောမကော စေဝ၊ ဥက္ခေပံ သီသုပဓါနံ။

ပဏ္ဏဒေါ စိတပူဇီ စ၊ ဂါထာယော စေဝ သဗ္ဗသော။

စတ္တာရိ စ သတာနီဟ၊ ဧကပညာသမေဝ စ။

ပဉ္စဝီသသတာ သဗ္ဗာ၊ ဒွါသတ္တတိ တဒုတ္တရိ။

တိသတံ အပဒါနာနံ၊ ဂဏိတာ အတ္ထဒဿိဘိ။

ကဏိကာရဝဂ္ဂဒသကံ။

တတိယသတကံ သမတ္တံ။