ပဏ္ဏဒါယကဝဂ္ဂ

၂၉. ပဏ္ဏဒါယကဝဂ္ဂ

၁. ပဏ္ဏဒါယကတ္ထေရအပဒါန

၁.

‘‘ပဏ္ဏသာလေ နိသိန္နောမှိ၊ ပဏ္ဏဘောဇနဘောဇနော။

ဥပဝိဋ္ဌဉ္စ မံ သန္တံ၊ ဥပါဂစ္ဆိ မဟာဣသိ [မဟာမုနိ (သီ.)]။

၂.

‘‘သိဒ္ဓတ္ထော လောကပဇ္ဇောတော၊ သဗ္ဗလောကတိကိစ္ဆကော။

တဿ ပဏ္ဏံ မယာ ဒိန္နံ၊ နိသိန္နံ [နိသိန္နဿ (သျာ. အဋ္ဌ.)] ပဏ္ဏသန္ထရေ။

၃.

‘‘စတုန္နဝုတိတော ကပ္ပေ၊ ယံ ပဏ္ဏမဒဒိံ တဒါ။

ဒုဂ္ဂတိံ နာဘိဇာနာမိ၊ ပဏ္ဏဒါနဿိဒံ ဖလံ။

၄.

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဏ္ဏဒါယကော ထေရော ဣမာ ဂါထာယော အဘာသိတ္ထာတိ။

ပဏ္ဏဒါယကတ္ထေရဿာပဒါနံ ပဌမံ။

၂. ဖလဒါယကတ္ထေရအပဒါနံ

၅.

‘‘သိနေရုသမသန္တောသော ၊ ဓရဏီသမ [ဓရဏီဓရ (သီ. သျာ.)] သာဒိသော။

ဝုဋ္ဌဟိတွာ သမာဓိမှာ၊ ဘိက္ခာယ မမုပဋ္ဌိတော။

၆.

‘‘ဟရီတကံ [ဟရီတကိံ (သျာ.)] အာမလကံ၊ အမ္ဗဇမ္ဗုဝိဘီတကံ။

ကောလံ ဘလ္လာတကံ ဗိလ္လံ၊ ဖာရုသကဖလာနိ စ။

၇.

‘‘သိဒ္ဓတ္ထဿ မဟေသိဿ၊ သဗ္ဗလောကာနုကမ္ပိနော။

တဉ္စ သဗ္ဗံ မယာ ဒိန္နံ၊ ဝိပ္ပသန္နေန စေတသာ။

၈.

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၉.

‘‘သတ္တပညာသိတော ကပ္ပေ၊ ဧကဇ္ဈော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၀.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ။

ဖလဒါယကတ္ထေရဿာပဒါနံ ဒုတိယံ။

၃. ပစ္စုဂ္ဂမနိယတ္ထေရအပဒါနံ

၁၁.

‘‘သီဟံ ယထာ ဝနစရံ၊ နိသဘာဇာနိယံ ယထာ။

ကကုဓံ ဝိလသန္တံဝ၊ အာဂစ္ဆန္တံ နရာသဘံ။

၁၂.

‘‘သိဒ္ဓတ္ထံ လောကပဇ္ဇောတံ၊ သဗ္ဗလောကတိကိစ္ဆကံ။

အကာသိံ ပစ္စုဂ္ဂမနံ၊ ဝိပ္ပသန္နေန စေတသာ။

၁၃.

‘‘စတုန္နဝုတိတော ကပ္ပေ၊ ပစ္စုဂ္ဂစ္ဆိံ နရာသဘံ။

ဒုဂ္ဂတိံ နာဘိဇာနာမိ၊ ပစ္စုဂ္ဂမနေ ဣဒံ ဖလံ။

၁၄.

‘‘သတ္တတိံသေ [သတ္တဝီသေ (သီ. သျာ.)] ဣတော ကပ္ပေ၊ ဧကော အာသိံ ဇနာဓိပေါ။

သပရိဝါရောတိ နာမေန၊ စက္ကဝတ္တီ မဟဗ္ဗလော။

၁၅.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပစ္စုဂ္ဂမနိယော ထေရော ဣမာ ဂါထာယော အဘာသိတ္ထာတိ။

ပစ္စုဂ္ဂမနိယတ္ထေရဿာပဒါနံ တတိယံ။

၄. ဧကပုပ္ဖိယတ္ထေရအပဒါနံ

၁၆.

‘‘ဒက္ခိဏမှိ ဒုဝါရမှိ၊ ပိသာစော အာသဟံ တဒါ။

အဒ္ဒသံ ဝိရဇံ ဗုဒ္ဓံ၊ ဣတရံသိံဝ ဘာဏုမံ။

၁၇.

‘‘ဝိပဿိဿ နရဂ္ဂဿ၊ သဗ္ဗလောကဟိတေသိနော။

ဧကပုပ္ဖံ မယာ ဒိန္နံ၊ ဒွိပဒိန္ဒဿ တာဒိနော။

၁၈.

‘‘ဧကနဝုတိတော ကပ္ပေ၊ ယံ ပုပ္ဖမဒဒိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၉.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကပုပ္ဖိယော ထေရော ဣမာ ဂါထာယော အဘာသိတ္ထာတိ။

ဧကပုပ္ဖိယတ္ထေရဿာပဒါနံ စတုတ္ထံ။

၅. မဃဝပုပ္ဖိယတ္ထေရအပဒါနံ

၂၀.

‘‘နမ္မဒါနဒိယာ တီရေ၊ သယမ္ဘူ အပရာဇိတော။

သမာဓိံ သော သမာပန္နော၊ ဝိပ္ပသန္နော အနာဝိလော။

၂၁.

‘‘ဒိသွာ ပသန္နသုမနော၊ သမ္ဗုဒ္ဓံ အပရာဇိတံ။

တာဟံ မဃဝပုပ္ဖေန၊ သယမ္ဘုံ ပူဇယိံ တဒါ။

၂၂.

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၃.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဃဝပုပ္ဖိယော ထေရော ဣမာ ဂါထာယော အဘာသိတ္ထာတိ။

မဃဝပုပ္ဖိယတ္ထေရဿာပဒါနံ ပဉ္စမံ။

၆. ဥပဋ္ဌာကဒါယကတ္ထေရအပဒါနံ

၂၄.

‘‘ရထိယံ ပဋိပဇ္ဇန္တံ၊ အာဟုတီနံ ပဋိဂ္ဂဟံ။

ဒွိပဒိန္ဒံ မဟာနာဂံ၊ လောကဇေဋ္ဌံ နရာသဘံ။

၂၅.

‘‘ပက္ကောသာပိယ တဿာဟံ၊ သဗ္ဗလောကဟိတေသိနော။

ဥပဋ္ဌာကော မယာ ဒိန္နော၊ သိဒ္ဓတ္ထဿ မဟေသိနော။

၂၆.

‘‘ပဋိဂ္ဂဟေတွာ [ပဋိဂ္ဂဟေသိ (က.)] သမ္ဗုဒ္ဓေါ၊ နိယျာဒေသိ မဟာမုနိ [မဟာဣသိ (က.)]။

ဥဋ္ဌာယ အာသနာ တမှာ၊ ပက္ကာမိ ပါစိနာမုခေါ။

၂၇.

‘‘စတုန္နဝုတိတော ကပ္ပေ၊ ဥပဋ္ဌာကမဒံ တဒါ။

ဒုဂ္ဂတိံ နာဘိဇာနာမိ၊ ဥပဋ္ဌာနဿိဒံ ဖလံ။

၂၈.

‘‘သတ္တပညာသိတော ကပ္ပေ၊ ဗလသေနသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၉.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥပဋ္ဌာကဒါယကော ထေရော ဣမာ ဂါထာယော အဘာသိတ္ထာတိ။

ဥပဋ္ဌာကဒါယကတ္ထေရဿာပဒါနံ ဆဋ္ဌံ။

၇. အပဒါနိယတ္ထေရအပဒါနံ

၃၀.

‘‘အပဒါနံ သုဂတာနံ၊ ကိတ္တယိံဟံ မဟေသိနံ။

ပါဒေ စ သိရသာ ဝန္ဒိံ၊ ပသန္နော သေဟိ ပါဏိဘိ။

၃၁.

‘‘ဒွေနဝုတေ ဣတော ကပ္ပေ၊ အပဒါနံ ပကိတ္တယိံ။

ဒုဂ္ဂတိံ နာဘိဇာနာမိ၊ ကိတ္တနာယ ဣဒံ ဖလံ။

၃၂.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အပဒါနိယော ထေရော ဣမာ ဂါထာယော အဘာသိတ္ထာတိ။

အပဒါနိယတ္ထေရဿာပဒါနံ သတ္တမံ။

၈. သတ္တာဟပဗ္ဗဇိတတ္ထေရအပဒါနံ

၃၃.

‘‘ဝိပဿိဿ ဘဂဝတော၊ သံဃော သက္ကတမာနိတော။

ဗျသနံ မေ အနုပ္ပတ္တံ၊ ဉာတိဘေဒေါ ပုရေ အဟု။

၃၄.

‘‘ပဗ္ဗဇ္ဇံ ဥပဂန္တွာန၊ ဗျသနုပသမာယဟံ။

သတ္တာဟာဘိရတော တတ္ထ၊ သတ္ထုသာသနကမ္ယတာ။

၃၅.

‘‘ဧကနဝုတိတော ကပ္ပေ၊ ယမဟံ ပဗ္ဗဇိံ တဒါ။

ဒုဂ္ဂတိံ နာဘိဇာနာမိ၊ ပဗ္ဗဇ္ဇာယ ဣဒံ ဖလံ။

၃၆.

‘‘သတ္တသဋ္ဌိမှိတော ကပ္ပေ၊ သတ္တ အာသုံ မဟီပတီ။

သုနိက္ခမာတိ ဉာယန္တိ၊ စက္ကဝတ္တီ မဟဗ္ဗလာ။

၃၇.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သတ္တာဟပဗ္ဗဇိတော ထေရော ဣမာ ဂါထာယော အဘာသိတ္ထာတိ။

သတ္တာဟပဗ္ဗဇိတတ္ထေရဿာပဒါနံ အဋ္ဌမံ။

၉. ဗုဒ္ဓုပဋ္ဌာယိကတ္ထေရအပဒါနံ

၃၈.

‘‘ဝေဋမ္ဘိနီတိ [ဝေဋမ္ဗရီတိ (သီ.)၊ ဝေဓမ္ဘိနီတိ (သျာ.)] မေ နာမံ၊ ပိတုသန္တံ [ပိတာ’သန္တံ (?)] မမံ တဒါ။

မမ ဟတ္ထံ ဂဟေတွာန၊ ဥပါနယိ မဟာမုနိံ။

၃၉.

‘‘ဣမေမံ ဥဒ္ဒိသိဿန္တိ၊ ဗုဒ္ဓါ လောကဂ္ဂနာယကာ။

တေဟံ ဥပဋ္ဌိံ သက္ကစ္စံ၊ ပသန္နော သေဟိ ပါဏိဘိ။

၄၀.

‘‘ဧကတ္တိံသေ ဣတော ကပ္ပေ၊ ဗုဒ္ဓေ ဥပဋ္ဌဟိံ [ပရိစရိံ (သီ. သျာ.)] တဒါ။

ဒုဂ္ဂတိံ နာဘိဇာနာမိ၊ ဥပဋ္ဌာနဿိဒံ ဖလံ။

၄၁.

‘‘တေဝီသမှိ ဣတော ကပ္ပေ၊ စတုရော အာသု ခတ္တိယာ။

သမဏုပဋ္ဌာကာ နာမ၊ စက္ကဝတ္တီ မဟဗ္ဗလာ။

၄၂.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗုဒ္ဓုပဋ္ဌာယိကော ထေရော ဣမာ ဂါထာယော အဘာသိတ္ထာတိ။

ဗုဒ္ဓုပဋ္ဌာယိကတ္ထေရဿာပဒါနံ နဝမံ။

၁၀. ပုဗ္ဗင်္ဂမိယတ္ထေရအပဒါနံ

၄၃.

‘‘စုလ္လာသီတိသဟဿာနိ ၊ ပဗ္ဗဇိမှ အကိဉ္စနာ။

တေသံ ပုဗ္ဗင်္ဂမော အာသိံ၊ ဥတ္တမတ္ထဿ ပတ္တိယာ။

၄၄.

‘‘သရာဂါ သဘဝါ [သမောဟာ (သျာ.)] စေတေ၊ ဝိပ္ပသန္နမနာဝိလာ။

ဥပဋ္ဌဟိံသု သက္ကစ္စံ၊ ပသန္နာ သေဟိ ပါဏိဘိ။

၄၅.

‘‘ခီဏာသဝါ ဝန္တဒေါသာ၊ ကတကိစ္စာ အနာသဝါ။

ဖရိံသု မေတ္တစိတ္တေန၊ သယမ္ဘူ အပရာဇိတာ။

၄၆.

‘‘တေသံ ဥပဋ္ဌဟိတွာန၊ သမ္ဗုဒ္ဓါနံ ပတိဿတော။

မရဏဉ္စ အနုပ္ပတ္တော၊ ဒေဝတ္တဉ္စ အဂမှသေ။

၄၇.

‘‘စတုန္နဝုတိတော ကပ္ပေ၊ ယံ သီလမနုပါလယိံ။

ဒုဂ္ဂတိံ နာဘိဇာနာမိ၊ သညမဿ ဣဒံ ဖလံ။

၄၈.

‘‘ပဋိသမ္ဘိဒါ စတဿော။ပေ.။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပုဗ္ဗင်္ဂမိယော ထေရော ဣမာ ဂါထာယော အဘာသိတ္ထာတိ။

ပုဗ္ဗင်္ဂမိယတ္ထေရဿာပဒါနံ ဒသမံ။

ပဏ္ဏဒါယကဝဂ္ဂေါ ဧကူနတိံသတိမော။

တဿုဒ္ဒါနံ –

ပဏ္ဏံ ဖလံ ပစ္စုဂ္ဂမံ၊ ဧကပုပ္ဖိ စ မဃဝါ။

ဥပဋ္ဌာကာပဒါနဉ္စ ၊ ပဗ္ဗဇ္ဇာ ဗုဒ္ဓုပဋ္ဌာကော။

ပုဗ္ဗင်္ဂမော စ ဂါထာယော၊ အဋ္ဌတာလီသ ကိတ္တိတာ။