သုဝဏ္ဏဗိဗ္ဗောဟနဝဂ္ဂ

၂၈။ သုဝဏ္ဏဗိဗ္ဗောဟနဝဂ္ဂ

၁။ သုဝဏ္ဏဗိဗ္ဗောဟနိယတ္ထေရအပဒါန

၁။

‘‘ဧကာသနံ အဟမဒံ၊ ပသန္နော သေဟိ ပါဏိဘိ။

ဗိဗ္ဗောဟနဉ္စ [ဗိမ္ဗောဟနဉ္စ (သီ။ ဣ။)] ပါဒါသိံ၊ ဥတ္တမတ္ထဿ ပတ္တိယာ။

၂။

‘‘ဧကနဝုတိတော ကပ္ပေ၊ ဗိဗ္ဗောဟနမဒါသဟံ။

ဒုဂ္ဂတိံ နာဘိဇာနာမိ၊ ဗိဗ္ဗောဟနဿိဒံ ဖလံ။

၃။

‘‘ဣတော တေသဋ္ဌိမေ ကပ္ပေ၊ အသမော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုဝဏ္ဏဗိဗ္ဗောဟနိယော ထေရော ဣမာ ဂါထာယော အဘာသိတ္ထာတိ။

သုဝဏ္ဏဗိဗ္ဗောဟနိယတ္ထေရဿာပဒါနံ ပဌမံ။

၂။ တိလမုဋ္ဌိဒါယကတ္ထေရအပဒါနံ

၅။

‘‘မမ သင်္ကပ္ပမညာယ၊ သတ္ထာ လောကဂ္ဂနာယကော။

မနောမယေန ကာယေန၊ ဣဒ္ဓိယာ ဥပသင်္ကမိ။

၆။

‘‘သတ္ထာရံ ဥပသင်္ကန္တံ၊ ဝန္ဒိတွာ ပုရိသုတ္တမံ။

ပသန္နစိတ္တော သုမနော၊ တိလမုဋ္ဌိမဒါသဟံ။

၇။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ တိလမုဋ္ဌိယိဒံ ဖလံ။

၈။

‘‘ဣတော သောဠသကပ္ပမှိ၊ တန္တိသော [ခန္တိယော (သျာ။)] နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိလမုဋ္ဌိဒါယကော ထေရော ဣမာ ဂါထာယော အဘာသိတ္ထာတိ။

တိလမုဋ္ဌိဒါယကတ္ထေရဿာပဒါနံ ဒုတိယံ။

၃။ စင္ကောဋကိယတ္ထေရအပဒါနံ

၁၀။

‘‘မဟာသမုဒ္ဒံ နိဿာယ၊ ဝသတီ ပဗ္ဗတန္တရေ။

ပစ္စုဂ္ဂန္တွာန ကတွာန [ပစ္စုဂ္ဂန္တွာန’ကာသဟံ (အဋ္ဌ။)၊ ပစ္စုဂ္ဂမနံ ကတွာန (?)]၊ စင္ကောဋက [စင်္ဂေါဋက (သီ။)] မဒါသဟံ။

၁၁။

‘‘သိဒ္ဓတ္ထဿ မဟေသိနော၊ သဗ္ဗသတ္တာနုကမ္ပိနော [သယမ္ဘုဿာနုကမ္ပိနော (သျာ။)]။

ပုပ္ဖစင္ကောဋကံ ဒတွာ၊ ကပ္ပံ သဂ္ဂမှိ မောဒဟံ။

၁၂။

‘‘စတုန္နဝုတိတော ကပ္ပေ၊ စင္ကောဋကမဒံ တဒါ။

ဒုဂ္ဂတိံ နာဘိဇာနာမိ၊ စင္ကောဋကဿိဒံ ဖလံ။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စင္ကောဋကိယော ထေရော ဣမာ ဂါထာယော အဘာသိတ္ထာတိ။

စင္ကောဋကိယတ္ထေရဿာပဒါနံ တတိယံ။

၄။ အဗ္ဘဉ္ဇနဒါယကတ္ထေရအပဒါနံ

၁၄။

‘‘ကောဏ္ဍညဿ ဘဂဝတော၊ ဝီတရာဂဿ တာဒိနော။

အာကာသသမစိတ္တဿ [အကက္ကသစိတ္တဿာထ (အဋ္ဌ။)]၊ နိပ္ပပဉ္စဿ ဈာယိနော။

၁၅။

‘‘သဗ္ဗမောဟာတိဝတ္တဿ၊ သဗ္ဗလောကဟိတေသိနော။

အဗ္ဘဉ္ဇနံ မယာ ဒိန္နံ၊ ဒွိပဒိန္ဒဿ တာဒိနော။

၁၆။

‘‘အပရိမေယျေ ဣတော ကပ္ပေ၊ အဗ္ဘဉ္ဇနမဒံ တဒါ [အမ္ဘဉ္ဇနမဒါသဟံ (သျာ။)]။

ဒုဂ္ဂတိံ နာဘိဇာနာမိ၊ အဗ္ဘဉ္ဇနဿိဒံ ဖလံ။

၁၇။

‘‘ဣတော ပန္နရသေ ကပ္ပေ၊ စိရပ္ပော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဗ္ဘဉ္ဇနဒါယကော ထေရော ဣမာ ဂါထာယော အဘာသိတ္ထာတိ။

အဗ္ဘဉ္ဇနဒါယကတ္ထေရဿာပဒါနံ စတုတ္ထံ။

၅။ ဧကဉ္ဇလိကတ္ထေရအပဒါနံ

၁၉။

‘‘ဥဒုမ္ဗရေ ဝသန္တဿ၊ နိယတေ ပဏ္ဏသန္ထရေ။

ဝုတ္ထောကာသော မယာ ဒိန္နော၊ သမဏဿ မဟေသိနော။

၂၀။

‘‘တိဿဿ ဒွိပဒိန္ဒဿ၊ လောကနာထဿ တာဒိနော။

အဉ္ဇလိံ ပဂ္ဂဟေတွာန၊ သန္ထရိံ ပုပ္ဖသန္ထရံ။

၂၁။

‘‘ဒွေနဝုတေ ဣတော ကပ္ပေ၊ ယံ ကရိံ ပုပ္ဖသန္ထရံ။

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ။

၂၂။

‘‘ဣတော စုဒ္ဒသကပ္ပမှိ၊ အဟောသိံ မနုဇာဓိပေါ။

ဧကအဉ္ဇလိကော နာမ၊ စက္ကဝတ္တီ မဟဗ္ဗလော။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဉ္ဇလိကော ထေရော ဣမာ ဂါထာယော အဘာသိတ္ထာတိ။

ဧကဉ္ဇလိကတ္ထေရဿာပဒါနံ ပဉ္စမံ။

၆။ ပေါတ္ထကဒါယကတ္ထေရအပဒါနံ

၂၄။

‘‘သတ္ထာရံ ဓမ္မမာရဗ္ဘ၊ သံဃဉ္စာပိ မဟေသိနံ။

ပေါတ္ထဒါနံ မယာ ဒိန္နံ၊ ဒက္ခိဏေယျေ အနုတ္တရေ။

၂၅။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပေါတ္ထဒါနဿိဒံ ဖလံ။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပေါတ္ထကဒါယကော ထေရော ဣမာ ဂါထာယော အဘာသိတ္ထာတိ။

ပေါတ္ထကဒါယကတ္ထေရဿာပဒါနံ ဆဋ္ဌံ။

၇။ စိတကပူဇကတ္ထေရအပဒါနံ

၂၇။

‘‘စန္ဒဘာဂါနဒီတီရေ၊ အနုသောတံ ဝဇာမဟံ။

သတ္တ မာလုဝပုပ္ဖာနိ၊ စိတမာရောပယိံ အဟံ။

၂၈။

‘‘စတုန္နဝုတိတော ကပ္ပေ၊ စိတကံ ယမပူဇယိံ။

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ။

၂၉။

‘‘သတ္တသဋ္ဌိမှိတော ကပ္ပေ၊ ပဋိဇဂ္ဂသနာမကာ။

သတ္တရတနသမ္ပန္နာ၊ သတ္တာသုံ စက္ကဝတ္တိနော [ပဋိဇဂ္ဂသနာမကော။ သတ္တရတနသမ္ပန္နော၊ စက္ကဝတ္တီ မဟဗ္ဗလော (သျာ။)]။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ။

စိတကပူဇကတ္ထေရဿာပဒါနံ သတ္တမံ။

၈။ အာလုဝဒါယကတ္ထေရအပဒါနံ

၃၁။

‘‘ပဗ္ဗတေ ဟိမဝန္တမှိ၊ မဟာသိန္ဓု သုဒဿနာ။

တတ္ထဒ္ဒသံ ဝီတရာဂံ၊ သုပ္ပဘာသံ သုဒဿနံ။

၃၂။

‘‘ပရမောပသမေ ယုတ္တံ၊ ဒိသွာ ဝိမှိတမာနသော။

အာလုဝံ တဿ ပါဒါသိံ၊ ပသန္နော သေဟိ ပါဏိဘိ။

၃၃။

‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ တဒါ။

ဒုဂ္ဂတိံ နာဘိဇာနာမိ၊ အာလုဝဿ ဣဒံ ဖလံ။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာလုဝဒါယကော ထေရော ဣမာ ဂါထာယော အဘာသိတ္ထာတိ။

အာလုဝဒါယကတ္ထေရဿာပဒါနံ အဋ္ဌမံ။

၉။ ဧကပုဏ္ဍရီကတ္ထေရအပဒါနံ

၃၅။

‘‘ရောမသော နာမ နာမေန၊ သယမ္ဘူ သုဗ္ဗတော [သပ္ပဘော (သျာ။)] တဒါ။

ပုဏ္ဍရီကံ မယာ ဒိန္နံ၊ ဝိပ္ပသန္နေန စေတသာ။

၃၆။

‘‘စတုန္နဝုတိတော ကပ္ပေ၊ ပုဏ္ဍရီကမဒံ တဒါ။

ဒုဂ္ဂတိံ နာဘိဇာနာမိ၊ ပုဏ္ဍရီကဿိဒံ ဖလံ။

၃၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကပုဏ္ဍရီကော ထေရော ဣမာ ဂါထာယော အဘာသိတ္ထာတိ။

ဧကပုဏ္ဍရီကတ္ထေရဿာပဒါနံ နဝမံ။

၁၀။ တရဏီယတ္ထေရအပဒါနံ

၃၈။

‘‘မဟာပထမှိ ဝိသမေ၊ သေတု ကာရာပိတော မယာ။

တရဏတ္ထာယ လောကဿ၊ ပသန္နော သေဟိ ပါဏိဘိ။

၃၉။

‘‘ဧကနဝုတိတော ကပ္ပေ၊ ယော သေတု ကာရိတော မယာ။

ဒုဂ္ဂတိံ နာဘိဇာနာမိ၊ သေတုဒါနဿိဒံ ဖလံ။

၄၀။

‘‘ပဉ္စပညာသိတော ကပ္ပေ၊ ဧကော အာသိံ သမောဂဓေါ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တရဏီယော ထေရော ဣမာ ဂါထာယော အဘာသိတ္ထာတိ။

တရဏီယတ္ထေရဿာပဒါနံ ဒသမံ။

သုဝဏ္ဏဗိဗ္ဗောဟနဝဂ္ဂေါ အဋ္ဌဝီသတိမော။

တဿုဒ္ဒါနံ –

သုဝဏ္ဏံ တိလမုဋ္ဌိ စ၊ စင္ကောဋဗ္ဘဉ္ဇနဉ္ဇလီ။

ပေါတ္ထကော စိတမာလုဝါ၊ ဧကပုဏ္ဍရီ သေတုနာ။

ဒွေစတ္တာလီသ ဂါထာယော၊ ဂဏိတာယော ဝိဘာဝိဘီတိ။

ဧကာဒသမံ ဘာဏဝါရံ။