ထောမကဝဂ္ဂ

၂၆။ ထောမကဝဂ္ဂ

၁။ ထောမကတ္ထေရအပဒါန

၁။

‘‘ဒေဝလောကေ ဌိတော သန္တော၊ ဝိပဿိဿ မဟေသိနော။

ဓမ္မံ သုဏိတွာ မုဒိတော၊ ဣမံ ဝါစံ အဘာသဟံ။

၂။

‘‘‘နမော တေ ပုရိသာဇည၊ နမော တေ ပုရိသုတ္တမ။

ဗဟုဇ္ဇနံ [ဗဟုံ ဇနံ (သီ။)] တာရယသိ၊ ဒေသေန္တော အမတံ ပဒံ’။

၃။

‘‘ဧကနဝုတိတော ကပ္ပေ၊ ယံ ဝါစမဘဏိံ တဒါ။

ဒုဂ္ဂတိံ နာဘိဇာနာမိ၊ ထောမနာယ ဣဒံ ဖလံ။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ထောမကော ထေရော ဣမာ ဂါထာယော အဘာသိတ္ထာတိ။

ထောမကတ္ထေရဿာပဒါနံ ပဌမံ။

၂။ ဧကာသနဒါယကတ္ထေရအပဒါနံ

၅။

‘‘ဝိဇဟိတွာ ဒေဝဝဏ္ဏံ၊ သဘရိယော ဣဓါဂမိံ။

အဓိကာရံ ကတ္တုကာမော၊ ဗုဒ္ဓသေဋ္ဌဿ သာသနေ။

၆။

‘‘ဒေဝလော နာမ နာမေန၊ ပဒုမုတ္တရသာဝကော။

တဿ ဘိက္ခာ မယာ ဒိန္နာ၊ ဝိပ္ပသန္နေန စေတသာ။

၇။

‘‘သတသဟဿိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပိဏ္ဍပါတဿိဒံ ဖလံ။

၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကာသနဒါယကော ထေရော ဣမာ ဂါထာယော အဘာသိတ္ထာတိ။

ဧကာသနဒါယကတ္ထေရဿာပဒါနံ ဒုတိယံ။

၃။ စိတကပူဇကတ္ထေရအပဒါနံ

၉။

‘‘အာနန္ဒော နာမ သမ္ဗုဒ္ဓေါ၊ သယမ္ဘူ အပရာဇိတော။

အရညေ ပရိနိဗ္ဗာယိ၊ အမနုဿမှိ ကာနနေ။

၁၀။

‘‘ဒေဝလောကာ ဣဓါဂန္တွာ၊ စိတံ ကတွာနဟံ တဒါ။

သရီရံ တတ္ထ ဈာပေသိံ၊ သက္ကာရဉ္စ အကာသဟံ။

၁၁။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ။

စိတကပူဇကတ္ထေရဿာပဒါနံ တတိယံ။

၄။ တိစမ္ပကပုပ္ဖိယတ္ထေရအပဒါနံ

၁၃။

‘‘ဟိမဝန္တဿာဝိဒူရေ ၊ ဝိကတော [ဝိကနော (သီ။ သျာ။)] နာမ ပဗ္ဗတော။

တဿ ဝေမဇ္ဈေ ဝသတိ၊ သမဏော ဘာဝိတိန္ဒ္ရိယော။

၁၄။

‘‘ဒိသွာန တဿောပသမံ၊ ဝိပ္ပသန္နေန စေတသာ။

တီဏိ စမ္ပကပုပ္ဖာနိ၊ ဂဟေတွာန သမောကိရိံ။

၁၅။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိစမ္ပကပုပ္ဖိယော ထေရော ဣမာ ဂါထာယော အဘာသိတ္ထာတိ။

တိစမ္ပကပုပ္ဖိယတ္ထေရဿာပဒါနံ စတုတ္ထံ။

၅။ သတ္တပါဋလိယတ္ထေရအပဒါနံ

၁၇။

‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ။

သတ္တ ပါဋလိပုပ္ဖာနိ၊ ဗုဒ္ဓဿ အဘိရောပယိံ။

၁၈။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သတ္တပါဋလိယော ထေရော ဣမာ ဂါထာယော အဘာသိတ္ထာတိ။

သတ္တပါဋလိယတ္ထေရဿာပဒါနံ ပဉ္စမံ။

၆။ ဥပါဟနဒါယကတ္ထေရအပဒါနံ

၂၀။

‘‘အဟောသိံ စန္ဒနော နာမ၊ သမ္ဗုဒ္ဓဿတြဇော တဒါ။

ဧကောပါဟနော မယာ ဒိန္နော၊ ဗောဓိံ သမ္ပဇ္ဇ မေ တုဝံ။

၂၁။

‘‘ဧကနဝုတိတော ကပ္ပေ၊ ယံ ပါနဓိံ [ယမုပါဟနံ (သီ။)၊ ယံ ပါဒုံ (သျာ။)] ဒဒိံ တဒါ။

ဒုဂ္ဂတိံ နာဘိဇာနာမိ၊ ဥပါဟနဿိဒံ ဖလံ။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥပါဟနဒါယကော ထေရော ဣမာ ဂါထာယော အဘာသိတ္ထာတိ။

ဥပါဟနဒါယကတ္ထေရဿာပဒါနံ ဆဋ္ဌံ။

၇။ မဉ္ဇရိပူဇကတ္ထေရအပဒါနံ

၂၃။

‘‘မဉ္ဇရိကံ ကရိတွာန၊ ရထိယံ ပဋိပဇ္ဇဟံ။

အဒ္ဒသံ သမဏာနဂ္ဂံ၊ ဘိက္ခုသံဃပုရက္ခတံ။

၂၄။

‘‘ပသန္နစိတ္တော သုမနော၊ ပရမာယ စ ဣတိယာ။

ဥဘော ဟတ္ထေဟိ ပဂ္ဂယှ၊ ဗုဒ္ဓဿ အဘိရောပယိံ။

၂၅။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။

၂၆။

‘‘ဣတော တေသတ္တတိကပ္ပေ၊ ဧကော အာသိံ မဟီပတိ။

ဇောတိယော နာမ နာမေန၊ စက္ကဝတ္တီ မဟဗ္ဗလော။

၂၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဉ္ဇရိပူဇကော ထေရော ဣမာ ဂါထာယော အဘာသိတ္ထာတိ။

မဉ္ဇရိပူဇကတ္ထေရဿာပဒါနံ သတ္တမံ။

၈။ ပဏ္ဏဒါယကတ္ထေရအပဒါနံ

၂၈။

‘‘ပဗ္ဗတေ ဟိမဝန္တမှိ၊ ဝါကစီရဓရော အဟံ။

အလောဏပဏ္ဏဘက္ခောမှိ၊ နိယမေသု စ သံဝုတော။

၂၉။

‘‘ပါတရာသေ အနုပ္ပတ္တေ၊ သိဒ္ဓတ္ထော ဥပဂစ္ဆိ မံ။

တာဟံ ဗုဒ္ဓဿ ပါဒါသိံ၊ ပသန္နော သေဟိ ပါဏိဘိ။

၃၀။

‘‘စတုန္နဝုတိတော ကပ္ပေ၊ ယံ ပဏ္ဏမဒဒိံ တဒါ။

ဒုဂ္ဂတိံ နာဘိဇာနာမိ၊ ပဏ္ဏဒါနဿိဒံ ဖလံ။

၃၁။

‘‘သတ္တဝီသတိကပ္ပမှိ ၊ ရာဇာ အာသိံ သဒတ္ထိယော [ယဒတ္ထိယော (သီ။ သျာ။)]။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဏ္ဏဒါယကော ထေရော ဣမာ ဂါထာယော အဘာသိတ္ထာတိ။

ပဏ္ဏဒါယကတ္ထေရဿာပဒါနံ အဋ္ဌမံ။

၉။ ကုဋိဒါယကတ္ထေရအပဒါနံ

၃၃။

‘‘ဝိပိနစာရီ သမ္ဗုဒ္ဓေါ၊ ရုက္ခမူလေ ဝသီ တဒါ။

ပဏ္ဏသာလံ ကရိတွာန၊ အဒါသိံ အပရာဇိတေ။

၃၄။

‘‘ဧကနဝုတိတော ကပ္ပေ၊ ယံ ပဏ္ဏကုဋိကံ အဒံ။

ဒုဂ္ဂတိံ နာဘိဇာနာမိ၊ ကုဋိဒါနဿိဒံ ဖလံ။

၃၅။

‘‘အဋ္ဌဝီသေ [အဋ္ဌတိံသေ (သျာ။)] ဣတော ကပ္ပေ၊ သောဠသာသိံသု ရာဇာနော။

သဗ္ဗတ္ထ အဘိဝဿီတိ၊ ဝုစ္စရေ စက္ကဝတ္တိနော။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုဋိဒါယကော ထေရော ဣမာ ဂါထာယော အဘာသိတ္ထာတိ။

ကုဋိဒါယကတ္ထေရဿာပဒါနံ နဝမံ။

၁၀။ အဂ္ဂပုပ္ဖိယတ္ထေရအပဒါနံ

၃၇။

‘‘သုဝဏ္ဏဝဏ္ဏံ သမ္ဗုဒ္ဓံ၊ နိသိန္နံ ပဗ္ဗတန္တရေ။

ဩဘာသယန္တံ ရံသေန [ရံသိယာ (သျာ။)]၊ သိခိနံ သိခိနံ ယထာ။

၃၈။

‘‘အဂ္ဂဇံ ပုပ္ဖမာဒါယ၊ ဥပါဂစ္ဆိံ နရုတ္တမံ။

ပသန္နစိတ္တော သုမနော၊ ဗုဒ္ဓဿ အဘိရောပယိံ။

၃၉။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၀။

‘‘ပဉ္စဝီသတိကပ္ပမှိ၊ အဟောသိ အမိတောဂတော [အမိတဝှယော (သီ။)]။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဂ္ဂပုပ္ဖိယော ထေရော ဣမာ ဂါထာယော အဘာသိတ္ထာတိ။

အဂ္ဂပုပ္ဖိယတ္ထေရဿာပဒါနံ ဒသမံ။

ထောမကဝဂ္ဂေါ ဆဗ္ဗီသတိမော။

တဿုဒ္ဒါနံ –

ထောမကေကာသနစိတကံ၊ စမ္ပကော သတ္တပါဋလိ။

ပါနဓိ [ပါဟနော (သီ။)၊ ပါဒု (သျာ။)] မဉ္ဇရီ ပဏ္ဏံ၊ ကုဋိဒေါ အဂ္ဂပုပ္ဖိယော။

ဂါထာယော ဂဏိတာ စေတ္ထ၊ ဧကတာလီသမေဝ စာတိ။