တုဝရဒါယကဝဂ္ဂ

၂၅။ တုဝရဒါယကဝဂ္ဂ

၁။ တုဝရဒါယကတ္ထေရအပဒါန

၁။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

ဘရိတွာ တုဝရမာဒါယ [ဘရိတွာ တုရဝမာဒါယ (က။)၊ ဘဇ္ဇိတံ တုဝရမာဒါယ (?) ဧတ္ထ တုဝရန္တိ မုဂ္ဂကလာယသဒိသံ တုဝရဋ္ဌိန္တိ တဒဋ္ဌကထာ။ တုဝရော ဓညဘေဒေတိ သက္ကတာဘိဓါနေ]၊ သံဃဿ အဒဒိံ အဟံ။

၂။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ တုဝရဿ ဣဒံ ဖလံ။

၃။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တုဝရဒါယကော ထေရော ဣမာ ဂါထာယော အဘာသိတ္ထာတိ။

တုဝရဒါယကတ္ထေရဿာပဒါနံ ပဌမံ။

၂။ နာဂကေသရိယတ္ထေရအပဒါနံ

၄။

‘‘ဓနုံ အဒွေဇ္ဈံ ကတွာန၊ ဝနမဇ္ဈောဂဟိံ အဟံ။

ကေသရံ ဩဂတံ [ဩသရံ (သျာ။)၊ ဩသဋံ (သီ။)] ဒိသွာ၊ ပတပတ္တံ သမုဋ္ဌိတံ။

၅။

‘‘ဥဘော ဟတ္ထေဟိ ပဂ္ဂယှ၊ သိရေ ကတွာန အဉ္ဇလိံ။

ဗုဒ္ဓဿ အဘိရောပေသိံ၊ တိဿဿ လောကဗန္ဓုနော။

၆။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၇။

‘‘တေသတ္တတိမှိ ကပ္ပမှိ [သတ္တသတ္တတိမေ ကပ္ပေ (သျာ။)]၊ သတ္တ ကေသရနာမကာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နာဂကေသရိယော ထေရော ဣမာ ဂါထာယော အဘာသိတ္ထာတိ။

နာဂကေသရိယတ္ထေရဿာပဒါနံ ဒုတိယံ။

၃။ နဠိနကေသရိယတ္ထေရအပဒါနံ

၉။

‘‘ဇာတဿရဿ ဝေမဇ္ဈေ၊ ဝသာမိ ဇလကုက္ကုဋော။

အဒ္ဒသာဟံ [အထဒ္ဒသံ (သီ။ သျာ။)] ဒေဝဒေဝံ၊ ဂစ္ဆန္တံ အနိလဉ္ဇသေ။

၁၀။

‘‘တုဏ္ဍေန ကေသရိံ [ကေသရံ (သျာ။)] ဂယှ၊ ဝိပ္ပသန္နေန စေတသာ။

ဗုဒ္ဓဿ အဘိရောပေသိံ၊ တိဿဿ လောကဗန္ဓုနော။

၁၁။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၂။

‘‘တေသတ္တတိမှိ ကပ္ပမှိ၊ သတ္တ ကေသရနာမကာ [သတပတ္တသနာမကော (သီ။ သျာ။)]။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နဠိနကေသရိယော ထေရော ဣမာ ဂါထာယော အဘာသိတ္ထာတိ။

နဠိနကေသရိယတ္ထေရဿာပဒါနံ တတိယံ။

၄။ ဝိရဝပုပ္ဖိယတ္ထေရအပဒါနံ

၁၄။

‘‘ခီဏာသဝသဟဿေဟိ၊ နိယျာတိ လောကနာယကော။

ဝိရဝပုပ္ဖမာဒါယ [ဝိရဝိပုပ္ဖံ ပဂ္ဂယှ (သီ။)]၊ ဗုဒ္ဓဿ အဘိရောပယိံ။

၁၅။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝိရဝပုပ္ဖိယော ထေရော ဣမာ ဂါထာယော အဘာသိတ္ထာတိ။

ဝိရဝပုပ္ဖိယတ္ထေရဿာပဒါနံ စတုတ္ထံ။

၅။ ကုဋိဓူပကတ္ထေရအပဒါနံ

၁၇။

‘‘သိဒ္ဓတ္ထဿ ဘဂဝတော၊ အဟောသိံ ကုဋိဂေါပကော။

ကာလေန ကာလံ ဓူပေသိံ၊ ပသန္နော သေဟိ ပါဏိဘိ။

၁၈။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဓူပဒါနဿိဒံ [ဗုဒ္ဓပူဇာယိဒံ (သီ။)] ဖလံ။

၁၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုဋိဓူပကော ထေရော ဣမာ ဂါထာယော အဘာသိတ္ထာတိ။

ကုဋိဓူပကတ္ထေရဿာပဒါနံ ပဉ္စမံ။

၆။ ပတ္တဒါယကတ္ထေရအပဒါနံ

၂၀။

‘‘ပရမေန ဒမထေန၊ သိဒ္ဓတ္ထဿ မဟေသိနော။

ပတ္တဒါနံ မယာ ဒိန္နံ၊ ဥဇုဘူတဿ တာဒိနော။

၂၁။

‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ပတ္တဒါနဿိဒံ ဖလံ။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပတ္တဒါယကော ထေရော ဣမာ ဂါထာယော အဘာသိတ္ထာတိ။

ပတ္တဒါယကတ္ထေရဿာပဒါနံ ဆဋ္ဌံ။

၇။ ဓါတုပူဇကတ္ထေရအပဒါနံ

၂၃။

‘‘နိဗ္ဗုတေ လောကနာထမှိ၊ သိဒ္ဓတ္ထမှိ နရုတ္တမေ။

ဧကာ ဓါတု မယာ လဒ္ဓါ၊ ဒွိပဒိန္ဒဿ တာဒိနော။

၂၄။

‘‘တာဟံ ဓါတုံ ဂဟေတွာန၊ ဗုဒ္ဓဿာဒိစ္စဗန္ဓုနော။

ပဉ္စဝဿေ ပရိစရိံ၊ တိဋ္ဌန္တံဝ နရုတ္တမံ။

၂၅။

‘‘စတုန္နဝုတိတော ကပ္ပေ၊ ယံ ဓါတုံ ပူဇယိံ တဒါ။

ဒုဂ္ဂတိံ နာဘိဇာနာမိ၊ ဓါတုပဋ္ဌဟနေ ဖလံ။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဓါတုပူဇကော ထေရော ဣမာ ဂါထာယော အဘာသိတ္ထာတိ။

ဓါတုပူဇကတ္ထေရဿာပဒါနံ သတ္တမံ။

၈။ သတ္တလိပုပ္ဖပူဇကတ္ထေရအပဒါနံ

၂၇။

‘‘သတ္တ သတ္တလိပုပ္ဖာနိ၊ သီသေ ကတွာနဟံ တဒါ။

ဗုဒ္ဓဿ အဘိရောပေသိံ၊ ဝေဿဘုမှိ နရုတ္တမေ [ဝိဘတ္တိဝိပလ္လာသော စိန္တေတဗ္ဗော]။

၂၈။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သတ္တလိပုပ္ဖပူဇကော ထေရော ဣမာ ဂါထာယော အဘာသိတ္ထာတိ။

သတ္တလိပုပ္ဖပူဇကတ္ထေရဿာပဒါနံ အဋ္ဌမံ။

၉။ ဗိမ္ဗိဇာလိယတ္ထေရအပဒါနံ

၃၀။

‘‘ပဒုမုတ္တရော နာမ ဇိနော၊ သယမ္ဘူ အဂ္ဂပုဂ္ဂလော။

စတုသစ္စံ ပကာသေတိ၊ ဒီပေတိ အမတံ ပဒံ။

၃၁။

‘‘ဗိမ္ဗိဇာလကပုပ္ဖာနိ [ဗိမ္ဗဇာလကပုပ္ဖာနိ (က။)]၊ ပုထု ကတွာနဟံ တဒါ။

ဗုဒ္ဓဿ အဘိရောပေသိံ၊ ဒွိပဒိန္ဒဿ တာဒိနော။

၃၂။

‘‘အဋ္ဌသဋ္ဌိမှိတော ကပ္ပေ၊ စတုရော ကိဉ္ဇကေသရာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၃၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဗိမ္ဗိဇာလိယော ထေရော ဣမာ ဂါထာယော အဘာသိတ္ထာတိ။

ဗိမ္ဗိဇာလိယတ္ထေရဿာပဒါနံ နဝမံ။

၁၀။ ဥဒ္ဒါလကဒါယကတ္ထေရအပဒါနံ

၃၄။

‘‘ကကုဓေါ နာမ နာမေန၊ သယမ္ဘူ အပရာဇိတော။

ပဝနာ နိက္ခမိတွာန၊ အနုပ္ပတ္တော မဟာနဒိံ။

၃၅။

‘‘ဥဒ္ဒါလကံ ဂဟေတွာန၊ သယမ္ဘုဿ အဒါသဟံ။

သံယတဿုဇုဘူတဿ၊ ပသန္နမာနသော အဟံ။

၃၆။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ ဖလံ။

၃၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒ္ဒါလကဒါယကော ထေရော ဣမာ ဂါထာယော အဘာသိတ္ထာတိ။

ဥဒ္ဒါလကဒါယကတ္ထေရဿာပဒါနံ ဒသမံ။

တုဝရဒါယကဝဂ္ဂေါ ပဉ္စဝီသတိမော။

တဿုဒ္ဒါနံ –

တုဝရနာဂနဠိနာ၊ ဝိရဝီ ကုဋိဓူပကော။

ပတ္တော ဓါတုသတ္တလိယော၊ ဗိမ္ဗိ ဥဒ္ဒါလကေန စ။

သတ္တတိံသတိ ဂါထာယော၊ ဂဏိတာယော ဝိဘာဝိဘိ။