ဥဒကာသနဝဂ္ဂ

၂၄။ ဥဒကာသနဝဂ္ဂ

၁။ ဥဒကာသနဒါယကတ္ထေရအပဒါန

၁။

‘‘အာရာမဒွါရာ နိက္ခမ္မ၊ ဖလကံ သန္ထရိံ အဟံ။

ဥဒကဉ္စ ဥပဋ္ဌာသိံ၊ ဥတ္တမတ္ထဿ ပတ္တိယာ။

၂။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ အာသနေ စောဒကေ ဖလံ။

၃။

‘‘ဣတော ပန္နရသေ ကပ္ပေ၊ အဘိသာမသမဝှယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒကာသနဒါယကော ထေရော ဣမာ ဂါထာယော အဘာသိတ္ထာတိ။

ဥဒကာသနဒါယကတ္ထေရဿာပဒါနံ ပဌမံ။

၂။ ဘာဇနပါလကတ္ထေရအပဒါနံ

၅။

‘‘နဂရေ ဗန္ဓုမတိယာ၊ ကုမ္ဘကာရော အဟံ တဒါ။

ဘာဇနံ အနုပါလေသိံ၊ ဘိက္ခုသံဃဿ တာဝဒေ။

၆။

‘‘ဧကနဝုတိတော ကပ္ပေ၊ ဘာဇနံ အနုပါလယိံ။

ဒုဂ္ဂတိံ နာဘိဇာနာမိ၊ ဘာဇနဿ ဣဒံ ဖလံ။

၇။

‘‘တေပညာသေ ဣတော ကပ္ပေ၊ အနန္တဇာလိနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဘာဇနပါလကော [ဘာဇနဒါယကော (သီ။ သျာ။)] ထေရော ဣမာ ဂါထာယော အဘာသိတ္ထာတိ။

ဘာဇနပါလကတ္ထေရဿာပဒါနံ ဒုတိယံ။

၃။ သာလပုပ္ဖိယတ္ထေရအပဒါနံ

၉။

‘‘အရုဏဝတိယာ နဂရေ၊ အဟောသိံ ပူပိကော တဒါ။

မမ ဒွါရေန ဂစ္ဆန္တံ၊ သိခိနံ အဒ္ဒသံ ဇိနံ။

၁၀။

‘‘ဗုဒ္ဓဿ ပတ္တံ ပဂ္ဂယှ၊ သာလပုပ္ဖံ အဒါသဟံ။

သမ္မဂ္ဂတဿ ဗုဒ္ဓဿ၊ ဝိပ္ပသန္နေန စေတသာ။

၁၁။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိဒါသဟံ [ယံ ခဇ္ဇကမဒါသဟံ (သီ။)၊ ယံ ခဇ္ဇမဘိဒါသဟံ (က။) သာလပုပ္ဖနာမကံ ခဇ္ဇကံ ဝါ ဘဝေယျ]။

ဒုဂ္ဂတိံ နာဘိဇာနာမိ၊ သာလပုပ္ဖဿိဒံ ဖလံ။

၁၂။

‘‘ဣတော စုဒ္ဒသကပ္ပမှိ၊ အဟောသိံ အမိတဉ္ဇလော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သာလပုပ္ဖိယော ထေရော ဣမာ ဂါထာယော အဘာသိတ္ထာတိ။

သာလပုပ္ဖိယတ္ထေရဿာပဒါနံ တတိယံ။

၄။ ကိလဉ္ဇဒါယကတ္ထေရအပဒါနံ

၁၄။

‘‘တိဝရာယံ ပုရေ ရမ္မေ၊ နဠကာရော အဟံ တဒါ။

သိဒ္ဓတ္ထေ လောကပဇ္ဇောတေ၊ ပသန္နာ ဇနတာ တဟိံ။

၁၅။

‘‘ပူဇတ္ထံ လောကနာထဿ၊ ကိလဉ္ဇံ ပရိယေသတိ။

ဗုဒ္ဓပူဇံ ကရောန္တာနံ၊ ကိလဉ္ဇံ အဒဒိံ အဟံ။

၁၆။

‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ကိလဉ္ဇဿ ဣဒံ ဖလံ။

၁၇။

‘‘သတ္တသတ္တတိကပ္ပမှိ၊ ရာဇာ အာသိံ ဇလဒ္ဓရော [ဇုတိန္ဓရော (သီ။)]။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိလဉ္ဇဒါယကော ထေရော ဣမာ ဂါထာယော အဘာသိတ္ထာတိ။

ကိလဉ္ဇဒါယကတ္ထေရဿာပဒါနံ စတုတ္ထံ။

၅။ ဝေဒိကာရကတ္ထေရအပဒါနံ

၁၉။

‘‘ဝိပဿိနော ဘဂဝတော၊ ဗောဓိယာ ပါဒပုတ္တမေ။

ပသန္နစိတ္တော သုမနော၊ ကာရေသိံ ဝေဒိကံ အဟံ။

၂၀။

‘‘ဧကနဝုတိတော ကပ္ပေ၊ ကာရေသိံ ဝေဒိကံ အဟံ။

ဒုဂ္ဂတိံ နာဘိဇာနာမိ၊ ဝေဒိကာယ ဣဒံ ဖလံ။

၂၁။

‘‘ဣတော ဧကာဒသေ ကပ္ပေ၊ အဟောသိံ သူရိယဿမော။

သတ္တရတ္တနသမ္ပန္နော၊ စက္ကဝတ္တီ မဟဗ္ဗလော။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝေဒိကာရကော ထေရော ဣမာ ဂါထာယော အဘာသိတ္ထာတိ။

ဝေဒိကာရကတ္ထေရဿာပဒါနံ ပဉ္စမံ။

၆။ ဝဏ္ဏကာရတ္ထေရအပဒါနံ

၂၃။

‘‘နဂရေ အရုဏဝတိယာ၊ ဝဏ္ဏကာရော အဟံ တဒါ။

စေတိယေ ဒုဿဘဏ္ဍာနိ၊ နာနာဝဏ္ဏံ ရဇေသဟံ [ရဇိံ အဟံ (က။)၊ ရဇေမဟံ (သျာ။)]။

၂၄။

‘‘ဧကတ္တိံသေ ဣတော ကပ္ပေ၊ ယံ ဝဏ္ဏံ ရဇယိံ တဒါ။

ဒုဂ္ဂတိံ နာဘိဇာနာမိ၊ ဝဏ္ဏဒါနဿိဒံ ဖလံ။

၂၅။

‘‘ဣတော တေဝီသတိကပ္ပေ၊ ဝဏ္ဏသမ [စန္ဒုပမ (သီ။)၊ စန္ဒသမ (သျာ။)] သနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝဏ္ဏကာရော ထေရော ဣမာ ဂါထာယော အဘာသိတ္ထာတိ။

ဝဏ္ဏကာရတ္ထေရဿာပဒါနံ ဆဋ္ဌံ။

၇။ ပိယာလပုပ္ဖိယတ္ထေရအပဒါနံ

၂၇။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

ပိယာလံ ပုပ္ဖိတံ ဒိသွာ၊ ဂတမဂ္ဂေ ခိပိံ အဟံ။

၂၈။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပိယာလပုပ္ဖိယော ထေရော ဣမာ ဂါထာယော အဘာသိတ္ထာတိ။

ပိယာလပုပ္ဖိယတ္ထေရဿာပဒါနံ သတ္တမံ။

၈။ အမ္ဗယာဂဒါယကတ္ထေရအပဒါနံ

၃၀။

‘‘သကေ သိပ္ပေ အပတ္ထဒ္ဓေါ၊ အဂမံ ကာနနံ အဟံ။

သမ္ဗုဒ္ဓံ ယန္တံ ဒိသွာန၊ အမ္ဗယာဂံ အဒါသဟံ။

၃၁။

‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ အမ္ဗယာဂဿိဒံ ဖလံ။

၃၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အမ္ဗယာဂဒါယကော ထေရော ဣမာ ဂါထာယော အဘာသိတ္ထာတိ။

အမ္ဗယာဂဒါယကတ္ထေရဿာပဒါနံ အဋ္ဌမံ။

၉။ ဇဂတိကာရကတ္ထေရအပဒါနံ

၃၃။

‘‘နိဗ္ဗုတေ လောကနာထမှိ၊ အတ္ထဒဿိ နရုတ္တမေ။

ဇဂတီ ကာရိတာ မယှံ၊ ဗုဒ္ဓဿ ထူပမုတ္တမေ။

၃၄။

‘‘အဋ္ဌာရသေ ကပ္ပသတေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဇဂတိယာ ဣဒံ ဖလံ။

၃၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဇဂတိကာရကော ထေရော ဣမာ ဂါထာယော အဘာသိတ္ထာတိ။

ဇဂတိကာရကတ္ထေရဿာပဒါနံ နဝမံ။

၁၀။ ဝါသိဒါယကတ္ထေရအပဒါနံ

၃၆။

‘‘ကမ္မာရောဟံ ပုရေ အာသိံ၊ တိဝရာယံ ပုရုတ္တမေ။

ဧကာ ဝါသိ မယာ ဒိန္နာ၊ သယမ္ဘုံ အပရာဇိတံ [သယမ္ဘုမှိပရာဇိတေ (?)]။

၃၇။

‘‘စတုန္နဝုတိတော ကပ္ပေ၊ ယံ ဝါသိမဒဒိံ တဒါ။

ဒုဂ္ဂတိံ နာဘိဇာနာမိ၊ ဝါသိဒါနဿိဒံ ဖလံ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဝါသိဒါယကော ထေရော ဣမာ ဂါထာယော အဘာသိတ္ထာတိ။

ဝါသိဒါယကတ္ထေရဿာပဒါနံ ဒသမံ။

ဥဒကာသနဝဂ္ဂေါ စတုဝီသတိမော။

တဿုဒ္ဒါနံ –

ဥဒကာသနဘာဇနံ၊ သာလပုပ္ဖီ ကိလဉ္ဇကော။

ဝေဒိကာ ဝဏ္ဏကာရော စ၊ ပိယာလအမ္ဗယာဂဒေါ။

ဇဂတီ ဝါသိဒါတာ စ၊ ဂါထာ တိံသ စ အဋ္ဌ စ။