အာလမ္ဗဏဒါယကဝဂ္ဂ

၂၃။ အာလမ္ဗဏဒါယကဝဂ္ဂ

၁။ အာလမ္ဗဏဒါယကတ္ထေရအပဒါန

၁။

‘‘အတ္ထဒဿိဿ ဘဂဝတော၊ လောကဇေဋ္ဌဿ တာဒိနော။

အာလမ္ဗဏံ မယာ ဒိန္နံ၊ ဒွိပဒိန္ဒဿ တာဒိနော။

၂။

‘‘ဓရဏိံ ပဋိပဇ္ဇာမိ၊ ဝိပုလံ သာဂရပ္ပရံ။

ပါဏေသု စ ဣဿရိယံ၊ ဝတ္တေမိ ဝသုဓါယ စ။

၃။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ။

၄။

‘‘ဣတော ဒွေသဋ္ဌိကပ္ပမှိ၊ တယော အာသိံသု ခတ္တိယာ။

ဧကာပဿိတနာမာ တေ၊ စက္ကဝတ္တီ မဟဗ္ဗလာ။

၅။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာလမ္ဗဏဒါယကော ထေရော ဣမာ ဂါထာယော အဘာသိတ္ထာတိ။

အာလမ္ဗဏဒါယကတ္ထေရဿာပဒါနံ ပဌမံ။

၂။ အဇိနဒါယကတ္ထေရအပဒါနံ

၆။

‘‘ဧကတ္တိံသေ ဣတော ကပ္ပေ၊ ဂဏသတ္ထာရကော အဟံ။

အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ။

၇။

‘‘စမ္မခဏ္ဍံ မယာ ဒိန္နံ၊ သိခိနော လောကဗန္ဓုနော။

တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

၈။

‘‘သမ္ပတ္တိံ အနုဘောတွာန၊ ကိလေသေ ဈာပယိံ အဟံ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၉။

‘‘ဧကတ္တိံသေ ဣတော ကပ္ပေ၊ အဇိနံ ယံ အဒါသဟံ။

ဒုဂ္ဂတိံ နာဘိဇာနာမိ၊ အဇိနဿ ဣဒံ ဖလံ။

၁၀။

‘‘ဣတော ပဉ္စမကေ ကပ္ပေ၊ ရာဇာ အာသိံ သုဒါယကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဇိနဒါယကော ထေရော ဣမာ ဂါထာယော အဘာသိတ္ထာတိ။

အဇိနဒါယကတ္ထေရဿာပဒါနံ ဒုတိယံ။

၃။ ဒွေရတနိယတ္ထေရအပဒါနံ

၁၂။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ။

၁၃။

‘‘မံသပေသိ မယာ ဒိန္နာ၊ ဝိပဿိဿ မဟေသိနော။

သဒေဝကသ္မိံ လောကသ္မိံ၊ ဣဿရံ ကာရယာမဟံ။

၁၄။

‘‘ဣမိနာ မံသဒါနေန၊ ရတနံ နိဗ္ဗတ္တတေ မမ။

ဒုဝေမေ ရတနာ လောကေ၊ ဒိဋ္ဌဓမ္မဿ ပတ္တိယာ။

၁၅။

‘‘တေဟံ သဗ္ဗေ အနုဘောမိ၊ မံသဒါနဿ သတ္တိယာ။

ဂတ္တဉ္စ မုဒုကံ မယှံ၊ ပညာ နိပုဏဝေဒနီ။

၁၆။

‘‘ဧကနဝုတိတော ကပ္ပေ၊ ယံ မံသမဒဒိံ တဒါ။

ဒုဂ္ဂတိံ နာဘိဇာနာမိ၊ မံသဒါနဿိဒံ ဖလံ။

၁၇။

‘‘ဣတော စတုတ္ထကေ ကပ္ပေ၊ ဧကော အာသိံ ဇနာဓိပေါ။

မဟာရောဟိတနာမော သော၊ စက္ကဝတ္တီ မဟဗ္ဗလော။

၁၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒွေရတနိယော [ဒွိရတနိယော (သီ။)] ထေရော ဣမာ ဂါထာယော အဘာသိတ္ထာတိ။

ဒွေရတနိယတ္ထေရဿာပဒါနံ တတိယံ။

ဒသမံ ဘာဏဝါရံ။

၄။ အာရက္ခဒါယကတ္ထေရအပဒါနံ

၁၉။

‘‘သိဒ္ဓတ္ထဿ ဘဂဝတော၊ ဝေဒိ ကာရာပိတာ [ဝေဒိကာ ကာရိတာ (သျာ။)] မယာ။

အာရက္ခော စ မယာ ဒိန္နော၊ သုဂတဿ မဟေသိနော။

၂၀။

‘‘တေန ကမ္မဝိသေသေန၊ န ပသ္သိံ ဘယဘေရဝံ။

ကုဟိဉ္စိ ဥပပန္နဿ၊ တာသော မယှံ န ဝိဇ္ဇတိ။

၂၁။

‘‘စတုန္နဝုတိတော ကပ္ပေ၊ ယံ ဝေဒိံ ကာရယိံ ပုရေ။

ဒုဂ္ဂတိံ နာဘိဇာနာမိ၊ ဝေဒိကာယ ဣဒံ ဖလံ။

၂၂။

‘‘ဣတော ဆဋ္ဌမှိ ကပ္ပမှိ၊ အပဿေနသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာရက္ခဒါယကော ထေရော ဣမာ ဂါထာယော အဘာသိတ္ထာတိ။

အာရက္ခဒါယကတ္ထေရဿာပဒါနံ စတုတ္ထံ။

၅။ အဗျာဓိကတ္ထေရအပဒါနံ

၂၄။

‘‘ဝိပဿိဿ ဘဂဝတော၊ အဂ္ဂိသာလံ အဒါသဟံ။

ဗျာဓိကာနဉ္စ အာဝါသံ၊ ဥဏှောဒကပဋိဂ္ဂဟံ။

၂၅။

‘‘တေန ကမ္မေနယံ မယှံ၊ အတ္တဘာဝေါ သုနိမ္မိတော။

ဗျာဓါဟံ နာဘိဇာနာမိ၊ ပုညကမ္မဿိဒံ ဖလံ။

၂၆။

‘‘ဧကနဝုတိတော ကပ္ပေ၊ ယံ သာလမဒဒိံ တဒါ။

ဒုဂ္ဂတိံ နာဘိဇာနာမိ၊ အဂ္ဂိသာလာယိဒံ ဖလံ။

၂၇။

‘‘ဣတော စ သတ္တမေ ကပ္ပေ၊ ဧကောသိံ အပရာဇိတော [ဧကော အာသိံ နရာဓိပေါ (သျာ။)]။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အဗျာဓိကော ထေရော ဣမာ ဂါထာယော အဘာသိတ္ထာတိ။

အဗျာဓိကတ္ထေရဿာပဒါနံ ပဉ္စမံ။

၆။ အင္ကောလပုပ္ဖိယတ္ထေရအပဒါနံ

၂၉။

‘‘နာရဒေါ [ဝရဒေါ (က။)] ဣတိ မေ နာမံ၊ ကဿပေါ ဣတိ မံ ဝိဒူ။

အဒ္ဒသံ သမဏာနဂ္ဂံ၊ ဝိပသ္သိံ ဒေဝသက္ကတံ။

၃၀။

‘‘အနုဗျဉ္ဇနဓရံ ဗုဒ္ဓံ၊ အာဟုတီနံ ပဋိဂ္ဂဟံ။

အင္ကောလပုပ္ဖံ [ဝကုလပုပ္ဖံ (သျာ။)၊ ဗကောလပုပ္ဖံ (က။)] ပဂ္ဂယှ၊ ဗုဒ္ဓဿ အဘိရောပယိံ။

၃၁။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၂။

‘‘စတုသတ္တတိတော ကပ္ပေ၊ ရောမသော နာမ ခတ္တိယော။

အာမုက္ကမာလာဘရဏော၊ သယောဂ္ဂဗလဝါဟနော။

၃၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အင္ကောလပုပ္ဖိယော [ဝကုလပုပ္ဖိယော (သျာ။), ဗကောလပုပ္ဖိယော (က။)] ထေရော ဣမာ ဂါထာယော အဘာသိတ္ထာတိ။

အင္ကောလပုပ္ဖိယတ္ထေရဿာပဒါနံ ဆဋ္ဌံ။

၇။ သောဝဏ္ဏဝဋံသကိယတ္ထေရအပဒါနံ

၃၄။

‘‘ဥယျာနဘူမိံ နိယျန္တော၊ အဒ္ဒသံ လောကနာယကံ။

ဝဋံသကံ ဂဟေတွာန၊ သောဝဏ္ဏံ သာဓုနိမ္မိတံ။

၃၅။

‘‘သီဃံ တတော သမာရုယှ၊ ဟတ္ထိက္ခန္ဓဂတော အဟံ။

ဗုဒ္ဓဿ အဘိရောပေသိံ၊ သိခိနော လောကဗန္ဓုနော။

၃၆။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ။

၃၇။

‘‘သတ္တဝီသေ ဣတော ကပ္ပေ၊ ဧကော အာသိံ ဇနာဓိပေါ။

မဟာပတာပနာမေန၊ စက္ကဝတ္တီ မဟဗ္ဗလော။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သောဝဏ္ဏဝဋံသကိယော ထေရော ဣမာ ဂါထာယော အဘာသိတ္ထာတိ။

သောဝဏ္ဏဝဋံသကိယတ္ထေရဿာပဒါနံ သတ္တမံ။

၈။ မိဉ္ဇဝဋံသကိယတ္ထေရအပဒါနံ

၃၉။

‘‘နိဗ္ဗုတေ လောကနာထမှိ၊ သိခိမှိ ဝဒတံ ဝရေ။

ဝဋံသကေဟိ အာကိဏ္ဏံ၊ ဗောဓိပူဇံ အကာသဟံ။

၄၀။

‘‘ဧကတ္တိံသေ ဣတော ကပ္ပေ၊ ယံ ပူဇမကရိံ တဒါ။

ဒုဂ္ဂတိံ နာဘိဇာနာမိ၊ ဗောဓိပူဇာယိဒံ ဖလံ။

၄၁။

‘‘ဣတော ဆဗ္ဗီသတိကပ္ပေ၊ အဟုံ မေဃဗ္ဘနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မိဉ္ဇဝဋံသကိယော ထေရော ဣမာ ဂါထာယော အဘာသိတ္ထာတိ။

မိဉ္ဇဝဋံသကိယတ္ထေရဿာပဒါနံ အဋ္ဌမံ။

၉။ သုကတာဝေဠိယတ္ထေရအပဒါနံ

၄၃။

‘‘အသိတော နာမ နာမေန၊ မာလာကာရော အဟံ [အဟုံ (?)] တဒါ။

အာဝေဠံ ပဂ္ဂဟေတွာန၊ ရညော ဒါတုံ ဝဇာမဟံ။

၄၄။

‘‘အသမ္ပတ္တောမှိ [အသမ္ပတ္တမှိ (သီ။)၊ အသမ္ပတ္တောဝ (?)] ရာဇာနံ၊ အဒ္ဒသံ သိခိနာယကံ။

ဟဋ္ဌော ဟဋ္ဌေန စိတ္တေန၊ ဗုဒ္ဓဿ အဘိရောပယိံ။

၄၅။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄၆။

‘‘ပဉ္စဝီသေ ဣတော ကပ္ပေ၊ ရာဇာဟောသိံ မဟဗ္ဗလော။

ဝေဘာရော နာမ နာမေန၊ စက္ကဝတ္တီ မဟဗ္ဗလော။

၄၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုကတာဝေဠိယော ထေရော ဣမာ ဂါထာယော အဘာသိတ္ထာတိ။

သုကတာဝေဠိယတ္ထေရဿာပဒါနံ နဝမံ။

၁၀။ ဧကဝန္ဒနိယတ္ထေရအပဒါနံ

၄၈။

‘‘ဥသဘံ ပဝရံ ဝီရံ၊ ဝေဿဘုံ ဝိဇိတာဝိနံ။

ပသန္နစိတ္တော သုမနော၊ ဗုဒ္ဓသေဋ္ဌမဝန္ဒဟံ။

၄၉။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဝန္ဒနာယ ဣဒံ ဖလံ။

၅၀။

‘‘စတုဝီသတိကပ္ပမှိ၊ ဝိကတာနန္ဒနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဝန္ဒနိယော ထေရော ဣမာ ဂါထာယော အဘာသိတ္ထာတိ။

ဧကဝန္ဒနိယတ္ထေရဿာပဒါနံ ဒသမံ။

အာလမ္ဗဏဒါယကဝဂ္ဂေါ တေဝီသတိမော။

တဿုဒ္ဒါနံ –

အာလမ္ဗဏဉ္စ အဇိနံ၊ မံသဒါရက္ခဒါယကော။

အဗျာဓိ အင္ကောလံ [ဝကုလံ (သျာ။)၊ ဗကုဠံ (က။)] သောဏ္ဏံ၊ မိဉ္ဇအာဝေဠဝန္ဒနံ။

ပဉ္စပညာသ ဂါထာယော၊ ဂဏိတာ အတ္ထဒဿိဘိ။