ဟတ္ထိဝဂ္ဂ

၂၂။ ဟတ္ထိဝဂ္ဂ

၁။ ဟတ္ထိဒါယကတ္ထေရအပဒါန

၁။

‘‘သိဒ္ဓတ္ထဿ ဘဂဝတော၊ ဒွိပဒိန္ဒဿ တာဒိနော။

နာဂသေဋ္ဌော မယာ ဒိန္နော၊ ဤသာဒန္တော ဥရူဠှဝါ။

၂။

‘‘ဥတ္တမတ္ထံ အနုဘောမိ၊ သန္တိပဒမနုတ္တရံ။

နာဂဒါနံ [အဂ္ဂဒါနံ (သီ။ က။)] မယာ ဒိန္နံ၊ သဗ္ဗလောကဟိတေသိနော။

၃။

‘‘စတုန္နဝုတိတော ကပ္ပေ၊ ယံ နာဂ [ဒါန (သီ။ က။)] မဒဒိံ တဒါ။

ဒုဂ္ဂတိံ နာဘိဇာနာမိ၊ နာဂဒါနဿိဒံ ဖလံ။

၄။

‘‘အဋ္ဌသတ္တတိကပ္ပမှိ၊ သောဠသာသိံသု ခတ္တိယာ။

သမန္တပါသာဒိကာ နာမ၊ စက္ကဝတ္တီ မဟဗ္ဗလာ။

၅။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဟတ္ထိဒါယကော ထေရော ဣမာ ဂါထာယော အဘာသိတ္ထာတိ။

ဟတ္ထိဒါယကတ္ထေရဿာပဒါနံ ပဌမံ။

၂။ ပါနဓိဒါယကတ္ထေရအပဒါနံ

၆။

‘‘အာရညိကဿ ဣသိနော၊ စိရရတ္တတပဿိနော [ဈာယိနော၊ မေတ္တစိတ္တတပဿိနော (သျာ။)]။

ဗုဒ္ဓဿ [ဓမ္မဿ (သျာ။ က။)] ဘာဝိတတ္တဿ၊ အဒါသိံ ပါနဓိံ အဟံ။

၇။

‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ။

ဒိဗ္ဗယာနံ [သဗ္ဗံ ယာနံ (သီ။)] အနုဘောမိ၊ ပုဗ္ဗကမ္မဿိဒံ ဖလံ။

၈။

‘‘စတုန္နဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ပါနဓိဿ ဣဒံ ဖလံ။

၉။

‘‘သတ္တသတ္တတိတော ကပ္ပေ၊ အဋ္ဌ အာသိံသု ခတ္တိယာ။

သုယာနာ နာမ နာမေန၊ စက္ကဝတ္တီ မဟဗ္ဗလာ။

၁၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါနဓိဒါယကော ထေရော ဣမာ ဂါထာယော အဘာသိတ္ထာတိ။

ပါနဓိဒါယကတ္ထေရဿာပဒါနံ ဒုတိယံ။

၃။ သစ္စသညကတ္ထေရအပဒါနံ

၁၁။

‘‘ဝေဿဘူ တမှိ သမယေ၊ ဘိက္ခုသံဃပုရက္ခတော။

ဒေသေတိ အရိယသစ္စာနိ၊ နိဗ္ဗာပေန္တော မဟာဇနံ။

၁၂။

‘‘ပရမကာရုညပတ္တောမှိ၊ သမိတိံ အဂမာသဟံ။

သောဟံ နိသိန္နကော သန္တော၊ ဓမ္မမဿောသိ သတ္ထုနော။

၁၃။

‘‘တဿာဟံ ဓမ္မံ သုတွာန၊ ဒေဝလောကံ အဂစ္ဆဟံ။

တိံသကပ္ပါနိ ဒေဝေသု၊ အဝသိံ တတ္ထဟံ ပုရေ။

၁၄။

‘‘ဧကတ္တိံသေ ဣတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ သစ္စသညာယိဒံ ဖလံ။

၁၅။

‘‘ဆဗ္ဗီသမှိ ဣတော ကပ္ပေ၊ ဧကော အာသိံ ဇနာဓိပေါ။

ဧကဖုသိတနာမေန၊ စက္ကဝတ္တီ မဟဗ္ဗလော။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သစ္စသညကော ထေရော ဣမာ ဂါထာယော အဘာသိတ္ထာတိ။

သစ္စသညကတ္ထေရဿာပဒါနံ တတိယံ။

၄။ ဧကသညကတ္ထေရအပဒါနံ

၁၇။

‘‘ဒုမဂ္ဂေ ပံသုကူလိကံ [ပံသုကူလကံ (?)]၊ လဂ္ဂံ ဒိသွာန သတ္ထုနော။

အဉ္ဇလိံ ပဂ္ဂဟေတွာန၊ ပံသုကူလံ အဝန္ဒဟံ။

၁၈။

‘‘ဧကတ္တိံသေ ဣတော ကပ္ပေ၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၉။

‘‘ပဉ္စဝီသေ ဣတော ကပ္ပေ၊ ဧကော အာသိံ ဇနာဓိပေါ။

အမိတာဘောတိ နာမေန၊ စက္ကဝတ္တီ မဟဗ္ဗလော။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကသညကော ထေရော ဣမာ ဂါထာယော အဘာသိတ္ထာတိ။

ဧကသညကတ္ထေရဿာပဒါနံ စတုတ္ထံ။

၅။ ရံသိသညကတ္ထေရအပဒါနံ

၂၁။

‘‘ဥဒေန္တံ သတရံသိံဝ၊ ဣတရံသိံဝ [သိတရံသိံ ဝ (သီ။ သျာ။)] ဘာဏုမံ။

ဗျဂ္ဃူသဘံဝ ပဝရံ၊ သုဇာတံ ပဗ္ဗတန္တရေ။

၂၂။

‘‘ဗုဒ္ဓဿ အာနုဘာဝေါ သော၊ ဇလတေ ပဗ္ဗတန္တရေ။

ရံသေ [ရံသျာ (?)] စိတ္တံ ပသာဒေတွာ၊ ကပ္ပံ သဂ္ဂမှိ မောဒဟံ။

၂၃။

‘‘အဝသေသေသု ကပ္ပေသု၊ ကုသလံ စရိတံ မယာ။

တေန စိတ္တပ္ပသာဒေန၊ ဗုဒ္ဓါနုဿတိယာပိ စ။

၂၄။

‘‘တိံသကပ္ပသဟဿေတော၊ ယံ သညမလဘိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓသညာယိဒံ ဖလံ။

၂၅။

‘‘သတ္တပညာသကပ္ပမှိ၊ ဧကော အာသိံ ဇနာဓိပေါ။

သုဇာတော နာမ နာမေန၊ စက္ကဝတ္တီ မဟဗ္ဗလော။

၂၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရံသိသညကော ထေရော ဣမာ ဂါထာယော အဘာသိတ္ထာတိ။

ရံသိသညကတ္ထေရဿာပဒါနံ ပဉ္စမံ။

၆။ သန္ဓိတတ္ထေရအပဒါနံ

၂၇။

‘‘အဿတ္ထေ ဟရိတောဘာသေ၊ သံဝိရူဠှမှိ ပါဒပေ။

ဧကံ ဗုဒ္ဓဂတံ သညံ၊ အလဘိံဟံ [အလဘိဿံ (သီ။)] ပတိဿတော။

၂၈။

‘‘ဧကတ္တိံသေ ဣတော ကပ္ပေ၊ ယံ သညမလဘိံ တဒါ။

တဿာ သညာယ ဝါဟသာ၊ ပတ္တော မေ အာသဝက္ခယော။

၂၉။

‘‘ဣတော တေရသကပ္ပမှိ၊ ဓနိဋ္ဌော နာမ ခတ္တိယော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သန္ဓိတော [သဏ္ဌိတော (သီ။)] ထေရော ဣမာ ဂါထာယော အဘာသိတ္ထာတိ။

သန္ဓိတတ္ထေရဿာပဒါနံ ဆဋ္ဌံ။

၇။ တာလဝဏ္ဋဒါယကတ္ထေရအပဒါနံ

၃၁။

‘‘တာလဝဏ္ဋံ မယာ ဒိန္နံ၊ တိဿဿာဒိစ္စဗန္ဓုနော။

ဂိမှနိဗ္ဗာပနတ္ထာယ၊ ပရိဠာဟောပသန္တိယာ။

၃၂။

‘‘သန္နိဗ္ဗာပေမိ ရာဂဂ္ဂိံ၊ ဒေါသဂ္ဂိဉ္စ တဒုတ္တရိံ။

နိဗ္ဗာပေမိ စ မောဟဂ္ဂိံ၊ တာလဝဏ္ဋဿိဒံ ဖလံ။

၃၃။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၃၄။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ တာလဝဏ္ဋဿိဒံ ဖလံ။

၃၅။

‘‘တေသဋ္ဌိမှိ ဣတော ကပ္ပေ၊ မဟာနာမသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တာလဝဏ္ဋဒါယကော ထေရော ဣမာ ဂါထာယော အဘာသိတ္ထာတိ။

တာလဝဏ္ဋဒါယကတ္ထေရဿာပဒါနံ သတ္တမံ။

၈။ အက္ကန္တသညကတ္ထေရအပဒါနံ

၃၇။

‘‘ကုသာဋကံ ဂဟေတွာန၊ ဥပဇ္ဈာယဿဟံ ပုရေ။

မန္တဉ္စ အနုသိက္ခာမိ၊ ဂန္ထာဒေါသဿ [ကဏ္ဍဘေဒဿ (သီ။)၊ ဂဏ္ဍဘေဒဿ (သျာ။)] ပတ္တိယာ။

၃၈။

‘‘အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ။

ဥသဘံ ပဝရံ အဂ္ဂံ၊ တိဿံ ဗုဒ္ဓံ ဂဏုတ္တမံ [ဂဇုတ္တမံ (သျာ။)]။

၃၉။

‘‘ကုသာဋကံ ပတ္ထရိတံ၊ အက္ကမန္တံ နရုတ္တမံ။

သမုဂ္ဂတံ မဟာဝီရံ၊ လောကဇေဋ္ဌံ နရာသဘံ။

၄၀။

‘‘ဒိသွာ တံ လောကပဇ္ဇောတံ၊ ဝိမလံ စန္ဒသန္နိဘံ။

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ။

၄၁။

‘‘စတုန္နဝုတိတော ကပ္ပေ၊ ယံ အဒါသိံ ကုသာဋကံ။

ဒုဂ္ဂတိံ နာဘိဇာနာမိ၊ ကုသာဋကဿိဒံ ဖလံ။

၄၂။

‘‘သတ္တတိံသေ ဣတော ကပ္ပေ၊ ဧကော အာသိံ ဇနာဓိပေါ။

သုနန္ဒော နာမ နာမေန၊ စက္ကဝတ္တီ မဟဗ္ဗလော။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အက္ကန္တသညကော ထေရော ဣမာ ဂါထာယော အဘာသိတ္ထာတိ။

အက္ကန္တသညကတ္ထေရဿာပဒါနံ အဋ္ဌမံ။

၉။ သပ္ပိဒါယကတ္ထေရအပဒါနံ

၄၄။

‘‘နိသိန္နော ပါသာဒဝရေ၊ နာရီဂဏပုရက္ခတော။

ဗျာဓိတံ သမဏံ ဒိသွာ၊ အဘိနာမေသဟံ ဃရံ။

၄၅။

‘‘ဥပဝိဋ္ဌံ မဟာဝီရံ၊ ဒေဝဒေဝံ နရာသဘံ။

သပ္ပိတေလံ မယာ ဒိန္နံ၊ သိဒ္ဓတ္ထဿ မဟေသိနော။

၄၆။

‘‘ပဿဒ္ဓဒရထံ ဒိသွာ၊ ဝိပ္ပသန္နမုခိန္ဒ္ရိယံ။

ဝန္ဒိတွာ သတ္ထုနော ပါဒေ၊ အနုသံသာဝယိံ ပုရေ။

၄၇။

‘‘ဒိသွာ မံ သုပ္ပသန္နတ္တံ [သုပ္ပသန္နန္တံ (သျာ။ က။) သုပ္ပသန္နစိတ္တန္တိ အတ္ထော]၊ ဣဒ္ဓိယာ ပါရမိင်္ဂတော။

နဘံ အဗ္ဘုဂ္ဂမီ ဓီရော၊ ဟံသရာဇာဝ အမ္ဗရေ။

၄၈။

‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ သပ္ပိတေလဿိဒံ ဖလံ။

၄၉။

‘‘ဣတော သတ္တရသေ ကပ္ပေ၊ ဇုတိဒေဝ [ဒုတိဒေဝ (သျာ။)၊ တုတိဒေဝ (က။)] သနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သပ္ပိဒါယကော ထေရော ဣမာ ဂါထာယော အဘာသိတ္ထာတိ။

သပ္ပိဒါယကတ္ထေရဿာပဒါနံ နဝမံ။

၁၀။ ပါပနိဝါရိယတ္ထေရအပဒါနံ

၅၁။

‘‘ပိယဒဿိဿ ဘဂဝတော၊ စင်္ကမံ သောဓိတံ မယာ။

နဠကေဟိ ပဋိစ္ဆန္နံ၊ ဝါတာတပနိဝါရဏံ။

၅၂။

‘‘ပါပံ ဝိဝဇ္ဇနတ္ထာယ၊ ကုသလဿုပသမ္ပဒါ။

ကိလေသာနံ ပဟာနာယ၊ ပဒဟိံ သတ္ထု သာသနေ။

၅၃။

‘‘ဣတော ဧကာဒသေ ကပ္ပေ၊ အဂ္ဂိဒေဝေါတိ ဝိဿုတော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါပနိဝါရိယော [ဝါတာတပနိဝါရိယော (?)] ထေရော ဣမာ ဂါထာယော အဘာသိတ္ထာတိ။

ပါပနိဝါရိယတ္ထေရဿာပဒါနံ ဒသမံ။

ဟတ္ထိဝဂ္ဂေါ ဗာဝီသတိမော။

တဿုဒ္ဒါနံ –

ဟတ္ထိ ပါနဓိ သစ္စဉ္စ၊ ဧကသညိ စ ရံသိကော။

သန္ဓိတော တာလဝဏ္ဋဉ္စ၊ တထာ အက္ကန္တသညကော။

သပ္ပိ ပါပနိဝါရီ စ၊ စတုပ္ပညာသ ဂါထကာတိ။