ကဏိကာရပုပ္ဖိယဝဂ္ဂ

၂၁။ ကဏိကာရပုပ္ဖိယဝဂ္ဂ

၁။ ကဏိကာရပုပ္ဖိယတ္ထေရအပဒါန

၁။

‘‘ကဏိကာရံ ပုပ္ဖိတံ ဒိသွာ၊ ဩစိနိတွာနဟံ တဒါ။

တိဿဿ အဘိရောပေသိံ၊ ဩဃတိဏ္ဏဿ တာဒိနော။

၂။

‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃။

‘‘ပဉ္စတ္တိံသေ ဣတော ကပ္ပေ၊ အရုဏပါဏီတိ ဝိဿုတော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဏိကာရပုပ္ဖိယော ထေရော ဣမာ ဂါထာယော အဘာသိတ္ထာတိ။

ကဏိကာရပုပ္ဖိယတ္ထေရဿာပဒါနံ ပဌမံ။

၂။ မိနေလပုပ္ဖိယတ္ထေရအပဒါနံ

၅။

‘‘သုဝဏ္ဏဝဏ္ဏော ဘဂဝါ၊ သတရံသီ ပတာပဝါ။

စင်္ကမနံ သမာရူဠ္ဟော၊ မေတ္တစိတ္တော သိခီသဘော။

၆။

‘‘ပသန္နစိတ္တော သုမနော၊ ဝန္ဒိတွာ [ထောမေတွာ (သျာ။)] ဉာဏမုတ္တမံ။

မိနေလပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ။

၇။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၈။

‘‘ဧကူနတိံသကပ္ပမှိ၊ သုမေဃဃနနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မိနေလပုပ္ဖိယော ထေရော ဣမာ ဂါထာယော အဘာသိတ္ထာတိ။

မိနေလပုပ္ဖိယတ္ထေရဿာပဒါနံ ဒုတိယံ။

၃။ ကိင်္ကဏိပုပ္ဖိယတ္ထေရအပဒါနံ

၁၀။

‘‘ကဉ္စနဂ္ဃိယသင်္ကာသော၊ သဗ္ဗညူ လောကနာယကော။

ဩဒကံ ဒဟမောဂ္ဂယှ၊ သိနာယိ လောကနာယကော။

၁၁။

‘‘ပဂ္ဂယှ ကိင်္ကဏိံ [ကိင်္ကိဏိံ (သီ။)] ပုပ္ဖံ၊ ဝိပဿိဿာဘိရောပယိံ။

ဥဒဂ္ဂစိတ္တော သုမနော၊ ဒွိပဒိန္ဒဿ တာဒိနော။

၁၂။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၃။

‘‘သတ္တဝီသတိကပ္ပမှိ၊ ရာဇာ ဘီမရထော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိင်္ကဏိပုပ္ဖိယော [ကိင်္ကိဏိကပုပ္ဖိယော (သီ။)] ထေရော ဣမာ ဂါထာယော အဘာသိတ္ထာတိ။

ကိင်္ကဏိပုပ္ဖိယတ္ထေရဿာပဒါနံ တတိယံ။

၄။ တရဏိယတ္ထေရအပဒါနံ

၁၅။

‘‘အတ္ထဒဿီ တု ဘဂဝါ၊ ဒွိပဒိန္ဒော နရာသဘော။

ပုရက္ခတော သာဝကေဟိ၊ ဂင်္ဂါတီရမုပါဂမိ။

၁၆။

‘‘သမတိတ္တိ ကာကပေယျာ၊ ဂင်္ဂါ အာသိ ဒုရုတ္တရာ။

ဥတ္တာရယိံ ဘိက္ခုသသံဃံ၊ ဗုဒ္ဓဉ္စ ဒွိပဒုတ္တမံ။

၁၇။

‘‘အဋ္ဌာရသေ ကပ္ပသတေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ တရဏာယ ဣဒံ ဖလံ။

၁၈။

‘‘တေရသေတော ကပ္ပသတေ၊ ပဉ္စ သဗ္ဗောဘဝါ [သဗ္ဘောဂဝါ (သီ။)] အဟုံ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၉။

‘‘ပစ္ဆိမေ စ ဘဝေ အသ္မိံ၊ ဇာတောဟံ ဗြာဟ္မဏေ ကုလေ။

သဒ္ဓိံ တီဟိ သဟာယေဟိ၊ ပဗ္ဗဇိံ သတ္ထု သာသနေ။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တရဏိယော ထေရော ဣမာ ဂါထာယော အဘာသိတ္ထာတိ။

တရဏိယတ္ထေရဿာပဒါနံ စတုတ္ထံ။

၅။ နိဂ္ဂုဏ္ဍိပုပ္ဖိယတ္ထေရအပဒါနံ

၂၁။

‘‘ဝိပဿိဿ ဘဂဝတော၊ အာသိမာရာမိကော အဟံ။

နိဂ္ဂုဏ္ဍိပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ။

၂၂။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၃။

‘‘ပဉ္စဝီသေ [ပဉ္စတိံသေ (သီ။ သျာ။)] ဣတော ကပ္ပေ၊ ဧကော အာသိံ ဇနာဓိပေါ။

မဟာပတာပနာမေန၊ စက္ကဝတ္တီ မဟဗ္ဗလော။

၂၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နိဂ္ဂုဏ္ဍိပုပ္ဖိယော ထေရော ဣမာ ဂါထာယော အဘာသိတ္ထာတိ။

နိဂ္ဂုဏ္ဍိပုပ္ဖိယတ္ထေရဿာပဒါနံ ပဉ္စမံ။

၆။ ဥဒကဒါယကတ္ထေရအပဒါနံ

၂၅။

‘‘ဘုဉ္ဇန္တံ သမဏံ ဒိသွာ၊ ဝိပ္ပသန္နမနာဝိလံ။

ဃဋေနောဒကမာဒါယ၊ သိဒ္ဓတ္ထဿ အဒါသဟံ။

၂၆။

‘‘နိမ္မလော ဟောမဟံ အဇ္ဇ၊ ဝိမလော ခီဏသံသယော။

ဘဝေ နိဗ္ဗတ္တမာနမှိ၊ ဖလံ နိဗ္ဗတ္တတေ မမ [သုဘံ (သီ။)]။

၂၇။

‘‘စတုန္နဝုတိတော ကပ္ပေ၊ ဥဒကံ ယမဒါသဟံ [ယံ တဒါ အဒံ (သီ။)၊ အဒဒိံ တဒါ (သျာ။)]။

ဒုဂ္ဂတိံ နာဘိဇာနာမိ၊ ဒကဒါနဿိဒံ ဖလံ။

၂၈။

‘‘ဧကသဋ္ဌိမှိတော ကပ္ပေ၊ ဧကောဝ ဝိမလော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒကဒါယကော ထေရော ဣမာ ဂါထာယော အဘာသိတ္ထာတိ။

ဥဒကဒါယကတ္ထေရဿာပဒါနံ ဆဋ္ဌံ။

၇။ သလလမာလိယတ္ထေရအပဒါနံ

၃၀။

‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ။

ဩဘာသေန္တံ ဒိသာ သဗ္ဗာ၊ သိဒ္ဓတ္ထံ နရသာရထိံ။

၃၁။

‘‘ဓနုံ အဒွေဇ္ဈံ ကတွာန၊ ဥသုံ သန္နယှဟံ တဒါ။

ပုပ္ဖံ သဝဏ္ဋံ ဆေတွာန၊ ဗုဒ္ဓဿ အဘိရောပယိံ။

၃၂။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၃။

‘‘ဧကပညာသိတော ကပ္ပေ၊ ဧကော အာသိံ ဇုတိန္ဓရော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သလလမာလိယော ထေရော ဣမာ ဂါထာယော အဘာသိတ္ထာတိ။

သလလမာလိယတ္ထေရဿာပဒါနံ သတ္တမံ။

၈။ ကောရဏ္ဍပုပ္ဖိယတ္ထေရအပဒါနံ

၃၅။

‘‘အက္ကန္တဉ္စ ပဒံ ဒိသွာ၊ စက္ကာလင်္ကာရဘူသိတံ။

ပဒေနာနုပဒံ ယန္တော၊ ဝိပဿိဿ မဟေသိနော။

၃၆။

‘‘ကောရဏ္ဍံ ပုပ္ဖိတံ ဒိသွာ၊ သမူလံ ပူဇိတံ မယာ။

ဟဋ္ဌော ဟဋ္ဌေန စိတ္တေန၊ အဝန္ဒိံ ပဒမုတ္တမံ။

၃၇။

‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၈။

‘‘သတ္တပညာသကပ္ပမှိ၊ ဧကော ဝီတမလော အဟုံ။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကောရဏ္ဍပုပ္ဖိယော ထေရော ဣမာ ဂါထာယော အဘာသိတ္ထာတိ။

ကောရဏ္ဍပုပ္ဖိယတ္ထေရဿာပဒါနံ အဋ္ဌမံ။

၉။ အာဓါရဒါယကတ္ထေရအပဒါနံ

၄၀။

‘‘အာဓါရကံ မယာ ဒိန္နံ၊ သိခိနော လောကဗန္ဓုနော။

ဓါရေမိ ပထဝိံ သဗ္ဗံ၊ ကေဝလံ ဝသုဓံ ဣမံ။

၄၁။

‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၄၂။

‘‘သတ္တဝီသေ ဣတော ကပ္ပေ၊ အဟေသုံ စတုရော ဇနာ။

သမန္တဝရဏာ နာမ၊ စက္ကဝတ္တီ မဟဗ္ဗလာ။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အာဓါရဒါယကော [ပရိယာဒါနိယော (က။)] ထေရော ဣမာ ဂါထာယော အဘာသိတ္ထာတိ။

အာဓါရဒါယကတ္ထေရဿာပဒါနံ နဝမံ။

၁၀။ ပါပနိဝါရိယတ္ထေရအပဒါနံ

၄၄။

‘‘တိဿဿ တု ဘဂဝတော၊ ဒေဝဒေဝဿ တာဒိနော။

ဧကစ္ဆတ္တံ မယာ ဒိန္နံ၊ ဝိပ္ပသန္နေန စေတသာ။

၄၅။

‘‘နိဝုတံ ဟောတိ မေ ပါပံ၊ ကုသလဿုပသမ္ပဒါ။

အာကာသေ ဆတ္တံ ဓါရေန္တိ၊ ပုဗ္ဗကမ္မဿိဒံ ဖလံ။

၄၆။

‘‘စရိမံ ဝတ္တတေ မယှံ၊ ဘဝါ သဗ္ဗေ သမူဟတာ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၄၇။

‘‘ဒွေနဝုတေ ဣတော ကပ္ပေ၊ ယံ ဆတ္တမဒဒိံ တဒါ။

ဒုဂ္ဂတိံ နာဘိဇာနာမိ၊ ဆတ္တဒါနဿိဒံ ဖလံ။

၄၈။

‘‘ဒွေသတ္တတိမှိတော ကပ္ပေ၊ အဋ္ဌာသိံသု ဇနာဓိပါ။

မဟာနိဒါနနာမေန၊ ရာဇာနော စက္ကဝတ္တိနော။

၄၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပါပနိဝါရိယော [ဝါတာတပနိဝါရိယော (သီ။)] ထေရော ဣမာ ဂါထာယော အဘာသိတ္ထာတိ။

ပါပနိဝါရိယတ္ထေရဿာပဒါနံ ဒသမံ။

ကဏိကာရပုပ္ဖိယဝဂ္ဂေါ ဧကဝီသတိမော။

တဿုဒ္ဒါနံ –

ကဏိကာရော မိနေလဉ္စ၊ ကိင်္ကဏိ တရဏေန စ။

နိဂ္ဂုဏ္ဍိပုပ္ဖီ ဒကဒေါ၊ သလလော စ ကုရဏ္ဍကော။

အာဓါရကော ပါပဝါရီ၊ အဋ္ဌတာလီသ ဂါထကာတိ။