တမာလပုပ္ဖိယဝဂ္ဂ

၂၀။ တမာလပုပ္ဖိယဝဂ္ဂ

၁။ တမာလပုပ္ဖိယတ္ထေရအပဒါန

၁။

‘‘စုလ္လာသီတိသဟဿာနိ ၊ ထမ္ဘာ သောဝဏ္ဏယာ အဟူ။

ဒေဝလဋ္ဌိပဋိဘာဂံ၊ ဝိမာနံ မေ သုနိမ္မိတံ။

၂။

‘‘တမာလပုပ္ဖံ ပဂ္ဂယှ၊ ဝိပ္ပသန္နေန စေတသာ။

ဗုဒ္ဓဿ အဘိရောပယိံ၊ သိခိနော လောကဗန္ဓုနော။

၃။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၄။

‘‘ဣတော ဝီသတိမေ ကပ္ပေ၊ စန္ဒတိတ္တောတိ ဧကကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တမာလပုပ္ဖိယော ထေရော ဣမာ ဂါထာယော အဘာသိတ္ထာတိ။

တမာလပုပ္ဖိယတ္ထေရဿာပဒါနံ ပဌမံ။

၂။ တိဏသန္ထာရကတ္ထေရအပဒါနံ

၆။

‘‘ယဒါ ဝနဝါသီ [ယံ ဒါယဝါသိကော (သီ။)] ဣသိ၊ တိဏံ လာယတိ သတ္ထုနော။

သဗ္ဗေ ပဒက္ခိဏာဝဋ္ဋာ [ပဒက္ခိဏာဝတ္တာ (သီ။ သျာ။)]၊ ပထဗျာ [ပုထဝ္ယာ (သီ။)] နိပတိံသု တေ။

၇။

‘‘တမဟံ တိဏမာဒါယ၊ သန္ထရိံ ဓရဏုတ္တမေ။

တီဏေဝ တာလပတ္တာနိ၊ အာဟရိတွာနဟံ တဒါ။

၈။

‘‘တိဏေန ဆဒနံ ကတွာ၊ သိဒ္ဓတ္ထဿ အဒါသဟံ။

သတ္တာဟံ ဓါရယုံ တဿ [တတ္ထ (သျာ။)]၊ ဒေဝမာနုသသတ္ထုနော။

၉။

‘‘စတုန္နဝုတိတော ကပ္ပေ၊ ယံ တိဏံ အဒဒိံ တဒါ။

ဒုဂ္ဂတိံ နာဘိဇာနာမိ၊ တိဏဒါနဿိဒံ ဖလံ။

၁၀။

‘‘ပဉ္စသဋ္ဌိမှိတော ကပ္ပေ၊ စတ္တာရောသုံ မဟဒ္ဓနာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိဏသန္ထာရကော ထေရော ဣမာ ဂါထာယော အဘာသိတ္ထာတိ။

တိဏသန္ထာရကတ္ထေရဿာပဒါနံ ဒုတိယံ။

၃။ ခဏ္ဍပုလ္လိယတ္ထေရအပဒါနံ

၁၂။

‘‘ဖုဿဿ ခေါ ဘဂဝတော၊ ထူပေါ အာသိ မဟာဝနေ။

ကုဉ္ဇရေဟိ တဒါ ဘိန္နော၊ ပရူဠ္ဟော ပါဒပေါ [ပရူဠှပါဒပေါ (သီ။)၊ သံရူဠ္ဟော ပါဒပေါ (သျာ။)] တဟိံ။

၁၃။

‘‘ဝိသမဉ္စ သမံ ကတွာ၊ သုဓါပိဏ္ဍံ အဒါသဟံ။

တိလောကဂရုနော တဿ၊ ဂုဏေဟိ ပရိတောသိတော [ပရိတော သုတော (က။)]။

၁၄။

‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ သုဓါပိဏ္ဍဿိဒံ ဖလံ။

၁၅။

‘‘သတ္တသတ္တတိကပ္ပမှိ၊ ဇိတသေနာသုံ သောဠသ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ခဏ္ဍဖုလ္လိယော ထေရော ဣမာ ဂါထာယော အဘာသိတ္ထာတိ။

ခဏ္ဍပုလ္လိယတ္ထေရဿာပဒါနံ တတိယံ။

၄။ အသောကပူဇကတ္ထေရအပဒါနံ

၁၇။

‘‘တိဝရာယံ [တိပုရာယံ (သျာ။)] ပုရေ ရမ္မေ၊ ရာဇုယျာနံ အဟု တဒါ။

ဥယျာနပါလော တတ္ထာသိံ၊ ရညော ဗဒ္ဓစရော အဟံ။

၁၈။

‘‘ပဒုမော နာမ နာမေန၊ သယမ္ဘူ သပ္ပဘော အဟု။

နိသိန္နံ [နိသိန္နော (က။)] ပုဏ္ဍရီကမှိ၊ ဆာယာ န ဇဟိ တံ မုနိံ။

၁၉။

‘‘အသောကံ ပုပ္ဖိတံ ဒိသွာ၊ ပိဏ္ဍိဘာရံ သုဒဿနံ။

ဗုဒ္ဓဿ အဘိရောပေသိံ၊ ဇလဇုတ္တမနာမိနော။

၂၀။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၁။

‘‘သတ္တတိံသမှိတော ကပ္ပေ၊ သောဠသ အရဏဉ္ဇဟာ [အရုဏဉ္ဇဟာ (သီ။)]။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အသောကပူဇကော ထေရော ဣမာ ဂါထာယော အဘာသိတ္ထာတိ။

အသောကပူဇကတ္ထေရဿာပဒါနံ စတုတ္ထံ။

၅။ အင်္ကောလကတ္ထေရအပဒါနံ

၂၃။

‘‘အင်္ကောလံ ပုပ္ဖိတံ ဒိသွာ၊ မာလာဝရံ သကောသကံ [သမောဂဓံ (သျာ။)]။

ဩစိနိတွာန တံ ပုပ္ဖံ၊ အဂမံ ဗုဒ္ဓသန္တိကံ။

၂၄။

‘‘သိဒ္ဓတ္ထော တမှိ သမယေ၊ ပတိလီနော မဟာမုနိ။

မုဟုတ္တံ ပဋိမာနေတွာ၊ ဂုဟာယံ ပုပ္ဖမောကိရိံ။

၂၅။

‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ။

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ [ဗုဒ္ဓပူဇာယိဒံ (သီ။ သျာ။)] ဖလံ။

၂၆။

‘‘ဆတ္တိံသမှိ ဣတော ကပ္ပေ၊ အာသေကော ဒေဝဂဇ္ဇိတော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ အင်္ကောလကော ထေရော ဣမာ ဂါထာယော အဘာသိတ္ထာတိ။

အင်္ကောလကတ္ထေရဿာပဒါနံ ပဉ္စမံ။

၆။ ကိသလယပူဇကတ္ထေရအပဒါနံ

၂၈။

‘‘နဂရေ ဒွါရဝတိယာ၊ မာလာဝစ္ဆော မမံ အဟု။

ဥဒပါနော စ တတ္ထေဝ၊ ပါဒပါနံ ဝိရောဟနော။

၂၉။

‘‘သဗလေန ဥပတ္ထဒ္ဓေါ၊ သိဒ္ဓတ္ထော အပရာဇိတော။

မမာနုကမ္ပမာနော သော၊ ဂစ္ဆတေ အနိလဉ္ဇသေ။

၃၀။

‘‘အညံ ကိဉ္စိ န ပဿာမိ၊ ပူဇာယောဂ္ဂံ မဟေသိနော။

အသောကံ ပလ္လဝံ ဒိသွာ၊ အာကာသေ ဥက္ခိပိံ အဟံ။

၃၁။

‘‘ဗုဒ္ဓဿ တေ ကိသလယာ၊ ဂစ္ဆတော ယန္တိ ပစ္ဆတော။

တာဟံ ဒိသွာန သံဝိဇိံ [သောဟံ ဒိသွာန တံ ဣဒ္ဓိံ (သီ။ သျာ။)]၊ အဟော ဗုဒ္ဓဿုဠာရတာ။

၃၂။

‘‘စတုန္နဝုတိတော ကပ္ပေ၊ ပလ္လဝံ အဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၃။

‘‘သတ္တတိံသေ [သတ္တဝီသေ (သီ။ သျာ။)] ဣတော ကပ္ပေ၊ ဧကော ဧကိဿရော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိသလယပူဇကော ထေရော ဣမာ ဂါထာယော အဘာသိတ္ထာတိ။

ကိသလယပူဇကတ္ထေရဿာပဒါနံ ဆဋ္ဌံ။

၇။ တိန္ဒုကဒါယကတ္ထေရအပဒါနံ

၃၅။

‘‘ဂိရိဒုဂ္ဂစရော အာသိံ၊ မက္ကဋော ထာမဝေဂိကော။

ဖလိနံ တိန္ဒုကံ ဒိသွာ၊ ဗုဒ္ဓသေဋ္ဌံ အနုဿရိံ။

၃၆။

‘‘နိက္ခမိတွာ ကတိပါဟံ၊ ဝိစိနိံ လောကနာယကံ။

ပသန္နစိတ္တော သုမနော၊ သိဒ္ဓတ္ထံ တိဘဝန္တဂုံ။

၃၇။

‘‘မမ သင်္ကပ္ပမညာယ၊ သတ္ထာ လောကေ အနုတ္တရော။

ခီဏာသဝသဟဿေဟိ၊ အာဂစ္ဆိ မမ သန္တိကံ။

၃၈။

‘‘ပါမောဇ္ဇံ ဇနယိတွာန၊ ဖလဟတ္ထော ဥပါဂမိံ။

ပဋိဂ္ဂဟေသိ ဘဂဝါ၊ သဗ္ဗညူ ဝဒတံ ဝရော။

၃၉။

‘‘စတုန္နဝုတိတော ကပ္ပေ၊ ယံ ဖလံ အဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၄၀။

‘‘သတ္တပညာသကပ္ပမှိ၊ ဥပနန္ဒသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၁။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိန္ဒုကဒါယကော ထေရော ဣမာ ဂါထာယော အဘာသိတ္ထာတိ။

တိန္ဒုကဒါယကတ္ထေရဿာပဒါနံ သတ္တမံ။

၈။ မုဋ္ဌိပူဇကတ္ထေရအပဒါနံ

၄၂။

‘‘သုမေဓေါ နာမ ဘဂဝါ၊ လောကဇေဋ္ဌော နရာသဘော။

ပစ္ဆိမေ အနုကမ္ပာယ၊ ပဓါနံ ပဒဟီ ဇိနော။

၄၃။

‘‘တဿ စင်္ကမမာနဿ၊ ဒွိပဒိန္ဒဿ တာဒိနော။

ဂိရိနေလဿ ပုပ္ဖာနံ၊ မုဋ္ဌိံ ဗုဒ္ဓဿ ရောပယိံ။

၄၄။

‘‘တေန စိတ္တပ္ပသာဒေန၊ သုက္ကမူလေန စောဒိတော။

တိံသကပ္ပသဟဿာနိ၊ ဒုဂ္ဂတိံ နုပပဇ္ဇဟံ။

၄၅။

‘‘တေဝီသတိကပ္ပသတေ၊ သုနေလော နာမ ခတ္တိယော။

သတ္တရတနသမ္ပန္နော၊ ဧကော အာသိံ မဟဗ္ဗလော။

၄၆။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မုဋ္ဌိပူဇကော ထေရော ဣမာ ဂါထာယော အဘာသိတ္ထာတိ။

မုဋ္ဌိပူဇကတ္ထေရဿာပဒါနံ အဋ္ဌမံ။

၉။ ကိံကဏိကပုပ္ဖိယတ္ထေရအပဒါနံ

၄၇။

‘‘သုမင်္ဂလောတိ နာမေန၊ သယမ္ဘူ အပရာဇိတော။

ပဝနာ နိက္ခမိတွာန၊ နဂရံ ပါဝိသီ ဇိနော။

၄၈။

‘‘ပိဏ္ဍစာရံ စရိတွာန၊ နိက္ခမ္မ နဂရာ မုနိ။

ကတကိစ္စောဝ သမ္ဗုဒ္ဓေါ၊ သော ဝသီ ဝနမန္တရေ။

၄၉။

‘‘ကိံကဏိပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ။

ပသန္နစိတ္တော သုမနော၊ သယမ္ဘုဿ မဟေသိနော။

၅၀။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၅၁။

‘‘ဆဠာသီတိမှိတော ကပ္ပေ၊ အပိလာသိသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကိံကဏိကပုပ္ဖိယော ထေရော ဣမာ ဂါထာယော အဘာသိတ္ထာတိ။

ကိံကဏိကပုပ္ဖိယတ္ထေရဿာပဒါနံ နဝမံ။

၁၀။ ယူထိကပုပ္ဖိယတ္ထေရအပဒါနံ

၅၃။

‘‘ပဒုမုတ္တရော နာမ ဇိနော၊ အာဟုတီနံ ပဋိဂ္ဂဟော။

ပဝနာ နိက္ခမိတွာန၊ ဝိဟာရံ ယာတိ စက္ခုမာ။

၅၄။

‘‘ဥဘော ဟတ္ထေဟိ ပဂ္ဂယှ၊ ယူထိကံ ပုပ္ဖမုတ္တမံ။

ဗုဒ္ဓဿ အဘိရောပယိံ၊ မေတ္တစိတ္တဿ တာဒိနော။

၅၅။

‘‘တေန စိတ္တပ္ပသာဒေန၊ အနုဘောတွာန သမ္ပဒါ။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၅၆။

‘‘ဣတော ပညာသကပ္ပေသု၊ ဧကော အာသိံ ဇနာဓိပေါ။

သမိတ္တနန္ဒနော နာမ၊ စက္ကဝတ္တီ မဟဗ္ဗလော။

၅၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ယူထိကပုပ္ဖိယော ထေရော ဣမာ ဂါထာယော အဘာသိတ္ထာတိ။

ယူထိကပုပ္ဖိယတ္ထေရဿာပဒါနံ ဒသမံ။

တမာလပုပ္ဖိယဝဂ္ဂေါ ဝီသတိမော။

တဿုဒ္ဒါနံ –

တမာလတိဏသန္ထာရော ၊ ခဏ္ဍဖုလ္လိ အသောကိယော။

အင်္ကောလကီ ကိသလယော၊ တိန္ဒုကော နေလပုပ္ဖိယော။

ကိံကဏိကော ယူထိကော စ၊ ဂါထာ ပညာသ အဋ္ဌ စာတိ။

အထ ဝဂ္ဂုဒ္ဒါနံ –

ဘိက္ခာဒါယီ ပရိဝါရော၊ သေရေယျော သောဘိတော တထာ။

ဆတ္တဉ္စ ဗန္ဓုဇီဝီ စ၊ သုပါရိစရိယောပိ စ။

ကုမုဒေါ ကုဋဇော စေဝ၊ တမာလိ ဒသမော ကတော။

ဆသတာနိ စ ဂါထာနိ၊ ဆသဋ္ဌိ စ တတုတ္တရိ။

ဘိက္ခာဝဂ္ဂဒသကံ။

ဒုတိယသတကံ သမတ္တံ။