ကုမုဒဝဂ္ဂ

၁၈။ ကုမုဒဝဂ္ဂ

၁။ ကုမုဒမာလိယတ္ထေရအပဒါန

၁။

‘‘ပဗ္ဗတေ ဟိမဝန္တမှိ၊ မဟာဇာတဿရော အဟု။

တတ္ထဇော ရက္ခသော အာသိံ၊ ဃောရရူပေါ မဟဗ္ဗလော။

၂။

‘‘ကုမုဒံ ပုပ္ဖတေ တတ္ထ၊ စက္ကမတ္တာနိ ဇာယရေ။

ဩစိနာမိ စ တံ ပုပ္ဖံ၊ ဗလိနော သမိတိံ တဒါ။

၃။

‘‘အတ္ထဒဿီ တု ဘဂဝါ၊ ဒွိပဒိန္ဒော နရာသဘော။

ပုပ္ဖသင်္ကောစိတံ [ပုပ္ဖံ သင်္ကောစိတံ (သီ။ သျာ။)၊ ပုပ္ဖံ သမောစိတံ (?)] ဒိသွာ၊ အာဂစ္ဆိ မမ သန္တိကံ။

၄။

‘‘ဥပါဂတဉ္စ သမ္ဗုဒ္ဓံ၊ ဒေဝဒေဝံ နရာသဘံ။

သဗ္ဗဉ္စ ပုပ္ဖံ ပဂ္ဂယှ၊ ဗုဒ္ဓဿ အဘိရောပယိံ။

၅။

‘‘ယာဝတာ ဟိမဝန္တန္တာ၊ ပရိသာ သာ [ဟိမဝန္တသ္မိံ၊ ယာဝ မာလာ (သျာ။)] တဒါ အဟု။

တာဝစ္ဆဒနသမ္ပန္နော၊ အဂမာသိ တထာဂတော။

၆။

‘‘အဋ္ဌာရသေ ကပ္ပသတေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၇။

‘‘ဣတော ပန္နရသေ ကပ္ပေ၊ သတ္တာဟေသုံ ဇနာဓိပါ။

သဟဿရထနာမာ တေ၊ စက္ကဝတ္တီ မဟဗ္ဗလာ။

၈။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကုမုဒမာလိယော ထေရော ဣမာ ဂါထာယော အဘာသိတ္ထာတိ။

ကုမုဒမာလိယတ္ထေရဿာပဒါနံ ပဌမံ။

၂။ နိဿေဏိဒါယကတ္ထေရအပဒါနံ

၉။

‘‘ကောဏ္ဍညဿ ဘဂဝတော၊ လောကဇေဋ္ဌဿ တာဒိနော။

အာရောဟတ္ထာယ ပါသာဒံ၊ နိဿေဏီ ကာရိတာ မယာ။

၁၀။

‘‘တေန စိတ္တပ္ပသာဒေန၊ အနုဘောတွာန သမ္ပဒါ။

ဓါရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ။

၁၁။

‘‘ဧကတ္တိံသမှိ ကပ္ပါနံ၊ သဟဿမှိ တယော အဟုံ [မဟာ (သီ။ သျာ။)]။

သမ္ဗဟုလာ နာမ ရာဇာနော၊ စက္ကဝတ္တီ မဟဗ္ဗလာ။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ နိဿေဏိဒါယကော ထေရော ဣမာ ဂါထာယော အဘာသိတ္ထာတိ။

နိဿေဏိဒါယကတ္ထေရဿာပဒါနံ ဒုတိယံ။

၃။ ရတ္တိပုပ္ဖိယတ္ထေရအပဒါနံ

၁၃။

‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ။

ဝိပဿိံ အဒ္ဒသံ ဗုဒ္ဓံ၊ ဒေဝဒေဝံ နရာသဘံ။

၁၄။

‘‘ရတ္တိကံ ပုပ္ဖိတံ ဒိသွာ၊ ကုဋဇံ ဓရဏီရုဟံ။

သမူလံ ပဂ္ဂဟေတွာန၊ ဥပနေသိံ မဟေသိနော။

၁၅။

‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ ဖလံ။

၁၆။

‘‘ဣတော စ အဋ္ဌမေ ကပ္ပေ၊ သုပ္ပသန္နသနာမကော။

သတ္တရတနသမ္ပန္နော၊ ရာဇာဟောသိံ မဟဗ္ဗလော။

၁၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ရတ္တိပုပ္ဖိယော ထေရော ဣမာ ဂါထာယော အဘာသိတ္ထာတိ။

ရတ္တိပုပ္ဖိယတ္ထေရဿာပဒါနံ တတိယံ။

၄။ ဥဒပါနဒါယကတ္ထေရအပဒါနံ

၁၈။

‘‘ဝိပဿိနော ဘဂဝတော၊ ဥဒပါနော ကတော မယာ။

ပိဏ္ဍပါတဉ္စ ဒတွာန [ဂဟေတွာန (သျာ။)]၊ နိယျာဒေသိမဟံ တဒါ။

၁၉။

‘‘ဧကနဝုတိတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဥဒပါနဿိဒံ ဖလံ။

၂၀။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဥဒပါနဒါယကော ထေရော ဣမာ ဂါထာယော အဘာသိတ္ထာတိ။

ဥဒပါနဒါယကတ္ထေရဿာပဒါနံ စတုတ္ထံ။

၅။ သီဟာသနဒါယကတ္ထေရအပဒါနံ

၂၁။

‘‘နိဗ္ဗုတေ လောကနာထမှိ၊ ပဒုမုတ္တရနာယကေ။

ပသန္နစိတ္တော သုမနော၊ သီဟာသနမဒါသဟံ။

၂၂။

‘‘ဗဟူဟိ ဂန္ဓမာလေဟိ၊ ဒိဋ္ဌဓမ္မသုခါဝဟေ။

တတ္ထ ပူဇဉ္စ ကတွာန၊ နိဗ္ဗာယတိ ဗဟုဇ္ဇနော။

၂၃။

‘‘ပသန္နစိတ္တော သုမနော၊ ဝန္ဒိတွာ ဗောဓိမုတ္တမံ။

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ။

၂၄။

‘‘ပန္နရသသဟဿမှိ၊ ကပ္ပါနံ အဋ္ဌ အာသု တေ [အဋ္ဌ အာသယုံ (က။)]။

သိလုစ္စယသနာမာ စ၊ ရာဇာနော စက္ကဝတ္တိနော။

၂၅။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သီဟာသနဒါယကော ထေရော ဣမာ ဂါထာယော အဘာသိတ္ထာတိ။

သီဟာသနဒါယကတ္ထေရဿာပဒါနံ ပဉ္စမံ။

၆။ မဂ္ဂဒတ္တိကတ္ထေရအပဒါနံ

၂၆။

‘‘အနောမဒဿီ ဘဂဝါ၊ ဒွိပဒိန္ဒော နရာသဘော။

ဒိဋ္ဌဓမ္မသုခတ္ထာယ၊ အဗ္ဘောကာသမှိ စင်္ကမိ။

၂၇။

‘‘ဥဒ္ဓတေ ပါဒေ ပုပ္ဖာနိ၊ သောဘံ မုဒ္ဓနိ တိဋ္ဌရေ။

ပသန္နစိတ္တော သုမနော၊ ဝန္ဒိတွာ ပုပ္ဖမောကိရိံ။

၂၈။

‘‘ဝီသကပ္ပသဟဿမှိ၊ ဣတော ပဉ္စ ဇနာ အဟုံ။

ပုပ္ဖစ္ဆဒနိယာ နာမ၊ စက္ကဝတ္တီ မဟဗ္ဗလာ။

၂၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဂ္ဂဒတ္တိကော ထေရော ဣမာ ဂါထာယော အဘာသိတ္ထာတိ။

မဂ္ဂဒတ္တိကတ္ထေရဿာပဒါနံ ဆဋ္ဌံ။

၇။ ဧကဒီပိယတ္ထေရအပဒါနံ

၃၀။

‘‘ပဒုမုတ္တရဿ မုနိနော၊ သဠလေ ဗောဓိမုတ္တမေ။

ပသန္နစိတ္တော သုမနော၊ ဧကဒီပံ အဒါသဟံ။

၃၁။

‘‘ဘဝေ နိဗ္ဗတ္တမာနမှိ၊ နိဗ္ဗတ္တေ ပုညသဉ္စယေ။

ဒုဂ္ဂတိံ နာဘိဇာနာမိ၊ ဒီပဒါနဿိဒံ ဖလံ။

၃၂။

‘‘သောဠသေ ကပ္ပသဟဿေ၊ ဣတော တေ စတုရော ဇနာ။

စန္ဒာဘာ နာမ နာမေန၊ စက္ကဝတ္တီ မဟဗ္ဗလာ။

၃၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဧကဒီပိယော ထေရော ဣမာ ဂါထာယော အဘာသိတ္ထာတိ။

ဧကဒီပိယတ္ထေရဿာပဒါနံ သတ္တမံ။

နဝမံ ဘာဏဝါရံ။

၈။ မဏိပူဇကတ္ထေရအပဒါနံ

၃၄။

‘‘ဩရေန ဟိမဝန္တဿ၊ နဒိကာ သမ္ပဝတ္တထ။

တဿာ စာနုပခေတ္တမှိ၊ သယမ္ဘူ ဝသတေ တဒါ။

၃၅။

‘‘မဏိံ ပဂ္ဂယှ ပလ္လင်္ကံ၊ သာဓုစိတ္တံ မနောရမံ။

ပသန္နစိတ္တော သုမနော၊ ဗုဒ္ဓဿ အဘိရောပယိံ။

၃၆။

‘‘စတုန္နဝုတိတော ကပ္ပေ၊ ယံ မဏိံ အဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၇။

‘‘ဣတော စ ဒွါဒသေ ကပ္ပေ၊ သတရံသီသနာမကာ။

အဋ္ဌ တေ အာသုံ ရာဇာနော၊ စက္ကဝတ္တီ မဟဗ္ဗလာ။

၃၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ မဏိပူဇကော ထေရော ဣမာ ဂါထာယော အဘာသိတ္ထာတိ။

မဏိပူဇကတ္ထေရဿာပဒါနံ အဋ္ဌမံ။

၉။ တိကိစ္ဆကတ္ထေရအပဒါနံ

၃၉။

‘‘နဂရေ ဗန္ဓုမတိယာ၊ ဝေဇ္ဇော အာသိံ သုသိက္ခိတော။

အာတုရာနံ သဒုက္ခာနံ၊ မဟာဇနသုခါဝဟော။

၄၀။

‘‘ဗျာဓိတံ သမဏံ ဒိသွာ၊ သီလဝန္တံ မဟာဇုတိံ။

ပသန္နစိတ္တော သုမနော၊ ဘေသဇ္ဇမဒဒိံ တဒါ။

၄၁။

‘‘အရောဂေါ အာသိ တေနေဝ၊ သမဏော သံဝုတိန္ဒ္ရိယော။

အသောကော နာမ နာမေန၊ ဥပဋ္ဌာကော ဝိပဿိနော။

၄၂။

‘‘ဧကနဝုတိတော ကပ္ပေ၊ ယံ ဩသဓမဒါသဟံ။

ဒုဂ္ဂတိံ နာဘိဇာနာမိ၊ ဘေသဇ္ဇဿ ဣဒံ ဖလံ။

၄၃။

‘‘ဣတော စ အဋ္ဌမေ ကပ္ပေ၊ သဗ္ဗောသဓသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၄၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ တိကိစ္ဆကော ထေရော ဣမာ ဂါထာယော အဘာသိတ္ထာတိ။

တိကိစ္ဆကတ္ထေရဿာပဒါနံ နဝမံ။

၁၀။ သံဃုပဋ္ဌာကတ္ထေရအပဒါနံ

၄၅။

‘‘ဝေဿဘုမှိ ဘဂဝတိ၊ အဟောသာရာမိကော အဟံ။

ပသန္နစိတ္တော သုမနော၊ ဥပဋ္ဌိံ သံဃမုတ္တမံ။

၄၆။

‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ။

ဒုဂ္ဂတိံ နာဘိဇာနာမိ၊ ဥပဋ္ဌာနဿိဒံ ဖလံ။

၄၇။

‘‘ဣတော တေ သတ္တမေ ကပ္ပေ၊ သတ္တေဝါသုံ သမောဒကာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၄၈။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သံဃုပဋ္ဌာကော ထေရော ဣမာ ဂါထာယော အဘာသိတ္ထာတိ။

သံဃုပဋ္ဌာကတ္ထေရဿာပဒါနံ ဒသမံ။

ကုမုဒဝဂ္ဂေါ အဋ္ဌာရသမော။

တဿုဒ္ဒါနံ –

ကုမုဒေါ အထ နိဿေဏီ၊ ရတ္တိကော ဥဒပါနဒေါ။

သီဟာသနီ မဂ္ဂဒဒေါ၊ ဧကဒီဣ မဏိပ္ပဒေါ။

တိကိစ္ဆကော ဥပဋ္ဌာကော၊ ဧကပညာသ ဂါထကာတိ။