သုပါရိစရိယဝဂ္ဂ

၁၇။ သုပါရိစရိယဝဂ္ဂ

၁။ သုပါရိစရိယတ္ထေရအပဒါန

၁။

‘‘ပဒုမော နာမ နာမေန၊ ဒွိပဒိန္ဒော နရာသဘော။

ပဝနာ အဘိနိက္ခမ္မ၊ ဓမ္မံ ဒေသေတိ စက္ခုမာ။

၂။

‘‘ယက္ခာနံ သမယော အာသိ၊ အဝိဒူရေ မဟေသိနော။

ယေန ကိစ္စေန သမ္ပတ္တာ၊ အဇ္ဈာပေက္ခိံသု တာဝဒေ။

၃။

‘‘ဗုဒ္ဓဿ ဂိရမညာယ၊ အမတဿ စ ဒေသနံ။

ပသန္နစိတ္တော သုမနော၊ အပ္ဖောဋေတွာ ဥပဋ္ဌဟိံ။

၄။

‘‘သုစိဏ္ဏဿ ဖလံ ပဿ၊ ဥပဋ္ဌာနဿ သတ္ထုနော။

တိံသကပ္ပသဟဿေသု၊ ဒုဂ္ဂတိံ နုပပဇ္ဇဟံ။

၅။

‘‘ဦနတိံသေ ကပ္ပသတေ၊ သမလင်္ကတနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၆။

‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ။

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သုပါရိစရိယော ထေရော ဣမာ ဂါထာယော အဘာသိတ္ထာတိ။

သုပါရိစရိယတ္ထေရဿာပဒါနံ ပဌမံ။

၂။ ကဏဝေရပုပ္ဖိယတ္ထေရအပဒါနံ

၇။

‘‘သိဒ္ဓတ္ထော နာမ ဘဂဝါ၊ လောကဇေဋ္ဌော နရာသဘော။

ပုရက္ခတော သာဝကေဟိ၊ နဂရံ ပဋိပဇ္ဇထ။

၈။

‘‘ရညော အန္တေပုရေ အာသိံ၊ ဂေါပကော အဘိသမ္မတော။

ပါသာဒေ ဥပဝိဋ္ဌောဟံ၊ အဒ္ဒသံ လောကနာယကံ။

၉။

‘‘ကဏဝေရံ [ကရဝီရံ (သက္ကတာနုလောမံ)၊ ကဏဝီရံ (ပါကတ)] ဂဟေတွာန၊ ဘိက္ခုသံဃေ သမောကိရိံ။

ဗုဒ္ဓဿ ဝိသုံ ကတွာန၊ တတော ဘိယျော သမောကိရိံ။

၁၀။

‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ [ရောပယိံ (သျာ။)]။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၁၁။

‘‘သတ္တာသီတိမှိတော ကပ္ပေ၊ စတုရာသုံ မဟိဒ္ဓိကာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၁၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဏဝေရပုပ္ဖိယော ထေရော ဣမာ ဂါထာယော အဘာသိတ္ထာတိ။

ကဏဝေရပုပ္ဖိယတ္ထေရဿာပဒါနံ ဒုတိယံ။

၃။ ခဇ္ဇကဒါယကတ္ထေရအပဒါနံ

၁၃။

‘‘တိဿဿ ခေါ ဘဂဝတော၊ ပုဗ္ဗေ ဖလမဒါသဟံ။

နာဠိကေရဉ္စ ပါဒါသိံ၊ ခဇ္ဇကံ အဘိသမ္မတံ။

၁၄။

‘‘ဗုဒ္ဓဿ တမဟံ ဒတွာ၊ တိဿဿ တု မဟေသိနော။

မောဒါမဟံ ကာမကာမီ၊ ဥပပဇ္ဇိံ [ကာမကာရီ၊ ဥပပဇ္ဇံ (သီ။)] ယမိစ္ဆကံ [သဗ္ဗတ္ထပိ ဧဝမေဝ ဒိဿတိ]။

၁၅။

‘‘ဒွေနဝုတေ ဣတော ကပ္ပေ၊ ယံ ဒါနမဒဒိံ တဒါ။

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ။

၁၆။

‘‘ဣတော တေရသကပ္ပမှိ၊ ရာဇာ ဣန္ဒသမော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၁၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ခဇ္ဇကဒါယကော ထေရော ဣမာ ဂါထာယော အဘာသိတ္ထာတိ။

ခဇ္ဇကဒါယကတ္ထေရဿာပဒါနံ တတိယံ။

၄။ ဒေသပူဇကတ္ထေရအပဒါနံ

၁၈။

‘‘အတ္ထဒဿီ တု ဘဂဝါ၊ လောကဇေဋ္ဌော နရာသဘော။

အဗ္ဘုဂ္ဂန္တွာန ဝေဟာသံ၊ ဂစ္ဆတေ အနိလဉ္ဇသေ။

၁၉။

‘‘ယမှိ ဒေသေ ဌိတော သတ္ထာ၊ အဗ္ဘုဂ္ဂစ္ဆိ မဟာမုနိ။

တာဟံ ဒေသံ အပူဇေသိံ၊ ပသန္နော သေဟိ ပါဏိဘိ။

၂၀။

‘‘အဋ္ဌာရသေ ကပ္ပသတေ၊ အဒ္ဒသံ ယံ မဟာမုနိံ။

ဒုဂ္ဂတိံ နာဘိဇာနာမိ၊ ဒေသပူဇာယိဒံ ဖလံ။

၂၁။

‘‘ဧကာဒသေ ကပ္ပသတေ၊ ဂေါသုဇာတသနာမကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၂၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒေသပူဇကော ထေရော ဣမာ ဂါထာယော အဘာသိတ္ထာတိ။

ဒေသပူဇကတ္ထေရဿာပဒါနံ စတုတ္ထံ။

၅။ ကဏိကာရဆတ္တိယတ္ထေရအပဒါနံ

၂၃။

‘‘ဝေဿဘူ နာမ သမ္ဗုဒ္ဓေါ၊ လောကဇေဋ္ဌော နရာသဘော။

ဒိဝါဝိဟာရာယ မုနိ၊ ဩဂါဟယိ မဟာဝနံ။

၂၄။

‘‘ကဏိကာရံ ဩစိနိတွာ၊ ဆတ္တံ ကတွာနဟံ တဒါ။

ပုပ္ဖစ္ဆဒနံ ကတွာန၊ ဗုဒ္ဓဿ အဘိရောပယိံ။

၂၅။

‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၂၆။

‘‘ဣတော ဝီသတိကပ္ပမှိ၊ သောဏ္ဏာဘာ အဋ္ဌ ခတ္တိယာ။

သတ္တရတနသမ္ပန္နာ၊ စက္ကဝတ္တီ မဟဗ္ဗလာ။

၂၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ကဏိကာရဆတ္တိယော ထေရော ဣမာ ဂါထာယော အဘာသိတ္ထာတိ။

ကဏိကာရဆတ္တိယတ္ထေရဿာပဒါနံ ပဉ္စမံ။

၆။ သပ္ပိဒါယကတ္ထေရအပဒါနံ

၂၈။

‘‘ဖုဿော နာမာသိ [နာမာထ (သီ။)] ဘဂဝါ၊ အာဟုတီနံ ပဋိဂ္ဂဟော။

ဂစ္ဆတေ ဝီထိယံ ဝီရော၊ နိဗ္ဗာပေန္တော မဟာဇနံ။

၂၉။

‘‘အနုပုဗ္ဗေန ဘဂဝါ၊ အာဂစ္ဆိ မမ သန္တိကံ။

တတော တံ [တတောဟံ (သီ။ သျာ။)] ပတ္တံ ပဂ္ဂယှ၊ သပ္ပိတေလမဒါသဟံ။

၃၀။

‘‘ဒွေနဝုတေ ဣတော ကပ္ပေ၊ ယံ သပ္ပိမဒဒိံ တဒါ။

ဒုဂ္ဂတိံ နာဘိဇာနာမိ၊ သပ္ပိဒါနဿိဒံ ဖလံ။

၃၁။

‘‘ဆပ္ပညာသေ ဣတော ကပ္ပေ၊ ဧကော အာသိ သမောဒကော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၂။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သပ္ပိဒါယကော ထေရော ဣမာ ဂါထာယော အဘာသိတ္ထာတိ။

သပ္ပိဒါယကတ္ထေရဿာပဒါနံ ဆဋ္ဌံ။

၇။ ယူထိကပုပ္ဖိယတ္ထေရအပဒါနံ

၃၃။

‘‘စန္ဒဘာဂါနဒီတီရေ ၊ အနုသောတံ ဝဇာမဟံ။

သယမ္ဘုံ အဒ္ဒသံ တတ္ထ၊ သာလရာဇံဝ ဖုလ္လိတံ။

၃၄။

‘‘ပုပ္ဖံ ယူထိကမာဒါယ၊ ဥပဂစ္ဆိံ မဟာမုနိံ။

ပသန္နစိတ္တော သုမနော၊ ဗုဒ္ဓဿ အဘိရောပယိံ။

၃၅။

‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ။

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။

၃၆။

‘‘သတ္တသဋ္ဌိမှိတော ကပ္ပေ၊ ဧကော သာမုဒ္ဓရော အဟု။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၃၇။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ယူထိကပုပ္ဖိယော ထေရော ဣမာ ဂါထာယော အဘာသိတ္ထာတိ။

ယူထိကပုပ္ဖိယတ္ထေရဿာပဒါနံ သတ္တမံ။

၈။ ဒုဿဒါယကတ္ထေရအပဒါနံ

၃၈။

‘‘တိဝရာယံ ပုရေ ရမ္မေ၊ ရာဇပုတ္တောသဟံ [ရာဇပုတ္တော အဟံ (သီ။ သျာ။)] တဒါ။

ပဏ္ဏာကာရံ လဘိတွာန၊ ဥပသန္တဿဒါသဟံ။

၃၉။

‘‘အဓိဝါသေသိ ဘဂဝါ၊ ဝတ္ထံ [နဝံ (က။)] ဟတ္ထေန အာမသိ။

သိဒ္ဓတ္ထော အဓိဝါသေတွာ၊ ဝေဟာသံ နဘမုဂ္ဂမိ။

၄၀။

‘‘ဗုဒ္ဓဿ ဂစ္ဆမာနဿ၊ ဒုဿာ ဓါဝန္တိ ပစ္ဆတော။

တတ္ထ စိတ္တံ ပသာဒေသိံ၊ ဗုဒ္ဓေါ နော အဂ္ဂပုဂ္ဂလော။

၄၁။

‘‘စတုန္နဝုတိတော ကပ္ပေ၊ ယံ ဒုဿမဒဒိံ တဒါ။

ဒုဂ္ဂတိံ နာဘိဇာနာမိ၊ ဒုဿဒါနဿိဒံ ဖလံ။

၄၂။

‘‘သတ္တသဋ္ဌိမှိတော ကပ္ပေ၊ စက္ကဝတ္တီ တဒါ အဟု။

ပရိသုဒ္ဓေါတိ နာမေန၊ မနုဇိန္ဒော မဟဗ္ဗလော။

၄၃။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ဒုဿဒါယကော ထေရော ဣမာ ဂါထာယော အဘာသိတ္ထာတိ။

ဒုဿဒါယကတ္ထေရဿာပဒါနံ အဋ္ဌမံ။

၉။ သမာဒပကတ္ထေရအပဒါနံ

၄၄။

‘‘နဂရေ ဗန္ဓုမတိယာ၊ မဟာပူဂဂဏော အဟု။

တေသာဟံ ပဝရော အာသိံ၊ မမ ဗဒ္ဓစရာ [ပဋ္ဌစရာ (သျာ။)] စ တေ။

၄၅။

‘‘သဗ္ဗေ တေ သန္နိပါတေတွာ၊ ပုညကမ္မေ သမာဒယိံ။

မာဠံ ကဿာမ သံဃဿ၊ ပုညက္ခေတ္တံ အနုတ္တရံ။

၄၆။

‘‘သာဓူတိ တေ ပဋိဿုတွာ၊ မမ ဆန္ဒဝသာနုဂါ။

နိဋ္ဌာပေတွာ စ တံ မာဠံ၊ ဝိပဿိဿ အဒမှသေ။

၄၇။

‘‘ဧကနဝုတိတော ကပ္ပေ၊ ယံ မာဠမဒဒိံ တဒါ။

ဒုဂ္ဂတိံ နာဘိဇာနာမိ၊ မာဠဒါနဿိဒံ ဖလံ။

၄၈။

‘‘ဧကူနသတ္တတိကပ္ပေ [ဧကူနသဋ္ဌိကပ္ပမှိ (သီ။ သျာ။)]၊

ဧကော အာသိ ဇနာဓိပေါ။

အာဒေယျော နာမ နာမေန၊ စက္ကဝတ္တီ မဟဗ္ဗလော။

၄၉။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ သမာဒပကော ထေရော ဣမာ ဂါထာယော အဘာသိတ္ထာတိ။

သမာဒပကတ္ထေရဿာပဒါနံ နဝမံ။

၁၀။ ပဉ္စင်္ဂုလိယတ္ထေရအပဒါနံ

၅၀။

‘‘တိဿော နာမာသိ ဘဂဝါ၊ လောကဇေဋ္ဌော နရာသဘော။

ပဝိသတိ ဂန္ဓကုဋိံ၊ ဝိဟာရကုသလော မုနိ။

၅၁။

‘‘သုဂန္ဓမာလမာဒါယ၊ အဂမာသိံ ဇိနန္တိကံ။

အပသဒ္ဒေါ စ သမ္ဗုဒ္ဓေ၊ ပဉ္စင်္ဂုလိမဒါသဟံ။

၅၂။

‘‘ဒွေနဝုတေ ဣတော ကပ္ပေ၊ ယံ ဂန္ဓမဘိရောပယိံ။

ဒုဂ္ဂတိံ နာဘိဇာနာမိ၊ ပဉ္စင်္ဂုလိဿိဒံ [ပဉ္စင်္ဂုလိယိဒံ (သီ။)] ဖလံ။

၅၃။

‘‘ဒွေသတ္တတိမှိတော ကပ္ပေ၊ ရာဇာ အာသိံ သယမ္ပဘော။

သတ္တရတနသမ္ပန္နော၊ စက္ကဝတ္တီ မဟဗ္ဗလော။

၅၄။

‘‘ပဋိသမ္ဘိဒါ စတဿော။ပေ။။ ကတံ ဗုဒ္ဓဿ သာသနံ’’။

ဣတ္ထံ သုဒံ အာယသ္မာ ပဉ္စင်္ဂုလိယော ထေရော ဣမာ ဂါထာယော အဘာသိတ္ထာတိ။

ပဉ္စင်္ဂုလိယတ္ထေရဿာပဒါနံ ဒသမံ။

သုပါရိစရိယဝဂ္ဂေါ သတ္တရသမော။

တဿုဒ္ဒါနံ –

သုပါရိစရိ ကဏဝေရီ၊ ခဇ္ဇကော ဒေသပူဇကော။

ကဏိကာရော သပ္ပိဒဒေါ၊ ယူထိကော ဒုဿဒါယကော။

မာဠော စ ပဉ္စင်္ဂုလိကော၊ စတုပညာသ ဂါထကာတိ။